هل للوداع مكان أم أنه سفينة بلا شراع، يا ليت الزمان يعود واللقاء يبقى للأبد ولكن مهما مضينا من سنين سيبقى الموت هو الأنين وستبقى قاموس تتردد عليه لمسات الوداع والفراق، والموت هو البقاء...💔
البارت الحادي عشر
ليلى محمد
نيران غياهب الانتقام 💚
بعد ما دفعني عالسرير بقوة وهجم عليه حاولت اني اگوم وادفع بي بس ما گدرت چان كلش ثگيل وفاقد وعيه ويحچي بثگل
مازن : انتي اليه ميفتهم اللي يضيعچ من ايده لچ من جمالچ لازم يحطوچ بمتحف
نار : مازن لا تجن ابتعد عني
حچيتها بصياح خلى ايده على حلگي وهو يحچي بجنون وعيونه حمر دم
مازن : اشش لا يسمعونا خليها بيني وبينچ
حاولت ادفع ايدي ما گدرت دموعي نزلت بقهر ما راح اخسر بعد كافي اللي خسرته صار دوركم انتو هسة يا عديمين الشرف حچيتها بداخلي واني امد ايدي جوا المخدة لزمت المسدس بس باللحظة اللي طلعته بيها انفتح باب الغرفة بقوة وواحد لزم مازن وسحبه بقوة ورماه عالارض خفيت المسدس جوا المخدة وگمت من مكاني گعدت عالسرير ودموعي تنزل بقهر باوعت
وحچيت بغصة : جهاد
عافة واندار عليه اجه بلهفة و خلة ايده على خدي وعيونه تفتر على وجهي يريد يطمن نفسه انو مابيه شي
جهاد : سوالچ شي اذاچ احچي
نزلت راسي بقهر وجاوبته : الله يلعنكم
سحب الحجاب چان نازل وطالع شوية من شعري ورجع المازن ضربه بوكس بس ذاك چان منتهي اغمى عليه من اول بوكس بس هو استمر يضرب بي
صرخت بي واني ابچي : خلص كافي عوفه واخذه واطلع من الغرفة ما اريد اشوف واحد بيكم يلا
عافة وگام باوعلي بنظرة حسيت بيها حنية هاي النظرة المحرومة منها سنين رجعت شفتها نزلت راسي ومسحت دموعي ما احب اكون ضعيفة وخصوصا مقابيل اعدائي جريت انفاسي بعمق حتى اهدي نفسي انتبهت عليه مشى لزم بطل الماي الموجود يم السرير استغربت تصرفة شراح يسوي قاطع افكاري شهگة مازن ذب الماي عليه ،
نزل جره من ياخة قميصة ووگفه
جهاد : اطلع ما اريد اشوف وجهك لان اذا شفته راح اشوهة الك
دفعة بقوة وذاك راح يركض بخوف بس ممتوازن بمشيته
اتقرب مني وحچى بهدوء
جهاد : اذاچ ؟
نار بابتسامة استهزاء : راح يهمك
جهاد : شلون ما يهمني
باوعتلة باستغراب
جهاد : اقصد انتي ضيفتنا وبحمايتنا مو احنا اللي يتأذى الضيف عدنا
نار : لا تخاف ما قصرتو بس چنت راح اتعرض للاغتصاب قبل شوية اصلا مو شي يسوى
طلع جگارة من جيبه حطها بحلگه
واگفة بمكاني اباوع على حركاتة كلها رجولة عجيب هالانسان هذا مع اني اكرهة بس ما اگدر اخفي اعجابي برجولته وقوته
جهاد : مبين انچ تعبانة واللي صار أثر عليچ
نار: لا تخاف لو شما صار عقلي يضل نفسه مو اني اللي اتأثر بهيچ شي
اتقرب عليه صار وجهة مقابيل وجهي نفخ دخان الجگارة بوجهي وضيق عيونه عليه
جهاد : انتي منين جايبة هالجرأة والعناد كله
نار : من الحياة قساوتها تربي اكبر واحد
جهاد وشبه ابتسامة على وجهة : الحياة القاسية تكسر الواحد
حطيت عيوني بعيونة وحچيت بقوة : الا اني خلتني اقوى
جهاد : عيونچ نزليهن
نار بابتسامة تحدي : يزعجك انو واحد يواجهك
جهاد : چنتي راح تخسرين شرفچ قبل شوية لو ما اجيت
نار باستهزاء : وشنو يعني لازم اشكرك لانك انقذتني من ابن عمك المتعاطي اللي هجم على غرفتي بنص الليل تريدني اوگف الطم وابچي عاللي صار
جاوبني وهو ياخذ نفس من جگارتة : المفروض هيچ
نار : بهالحالة احب اگولك اني اختلف مو اني اللي ابچي بعد المصيبة اني اصير اقوى مع كل فاجعة امر بيها
جهاد : لا تكونين واثقة من نفسچ الهلدرجة
نار : لا تخاف عليه يالفهد اني گدها
جهاد : راح يجي يوم وهذا عنادچ اكسره بايدية
ابتسمت على كلامة : ما اعتقد يجي هذا اليوم وعالعموم شكرا للمرة الثالثة انقذت حياتي اردلكياها ان شاء الله بالمصايب
جر نفس من جگارتة وحچي وهو يبتعد عني : بابچ قفلي بالليل مو دائما راح اكون موجود
كتفت ايديه : مشكور عالنصيحة
دار وجهة حتى يطلع من الغرفة بس وگف
جهاد : عطرچ غيري يخنگ ترا
وطلع وسد الباب بقوة
فتحت عيوني مصدومة من كلامة انت شدخلك الله يلعنك انت وابن عمك الحقارة تمشي بدمكم فوگ شينه هم ببدال ما يعتذر عن اللي سوا ابن عمه واگف مدري شيحچي وتاليها غيري العطر انت شدخلك يا ابو عيون شدخلك نزعت الحجاب ورميتة بعصبية ورحت قفلت باب الغرفة وگفت بعدها واتذكرت اللي صار دموعي نزلو
نار : يا ربي يمتى راح اخلص من هالعائلة هاي
رحت للحمام حتى اغسل ما تحملت نفسي بعد اللي صار سبحت وكملت طلعت اتمددت واني افكر يا ترا شراح يصير بيه بعد اكثر من اللي صار مسحت دموعي وغمضت عيوني بقوة بمحاولة انو انام ...
الجمعة
الساعة 8:00 صباحاً
سمعت دگت المنبه طفيتة ورجعت غطيت راسي ما بيه حيل اگوم من مكاني البارحة گضيت الليل ابچي وما نمت ميتة تعب ، چنت راح اغفي بس فزيت على صوت الباب
صحت بتوتر : منو
سمر : هاي اني سمر شبيچ
گمت فتحتلها الباب ورجعت اتمددت
سمر : اشو رجعتي ما راح تنزلين
نار بصوت مبحوح: لا ما اشتهي
سمر : هاي شبيچ تمرضتي
نار : ما ادري يمكن راح انام شوية بلكي ارتاح
سمر : زين ديوجعچ شي اجيبلچ دوا
نار بابتسامة تعبانة : لا حبيبتي تسلمين ما اريد شي
سمر بتفهم : ماشي نامي ارتاحي وشتحتاجين صيحني
نار: ما تقصرين
سبحان الله شلون انتي وهالنذل مازن شايلين نفس الدم
عائلة فاسدة شلون طالع منها انتي وغيث وهبة ..
بعد ما كملو الريوگ وكلمن گام على شغلة سمر چانت رايحة الغرفتها بس وگفها صوت غيث
غيث: سمر لعد نار وينها شنو ما گعدتيها
سمر : والله طلعت گعدتها بس تعبانة ومبين مريضة مقبلت تنزل رادت تنام
غيث : شبيها ما سألتيها تحتاج دكتور
سمر : گلتلها بس ما رضت گالت بس انام اصير زينة
قاطع كلامها صوت نسرين بخبث
نسرين : طبيعي تكون تعبانة
دارو راسهم عليها بتعجب
غيث: شقصدچ
نسرين : ما قصدي شي بس الصحفية ليلتها چانت طويلة حقها تنام شوية تعويض على تعب البارحة
سمر : انتي اكيد صاير بعقلچ شي
نسرين : لا ما صاير شي بس الصحفية اللي گاتلين نفسكم عليها
- نسريين
قاطع كلامها صياح الفهد بصوت عالي اللي خلة كل اللي بالبيت يجتمعون على صوته ونسرين مع انها انرعبت من صوته ومبين من رجفتها بالحچي بس كملت بجرأة :شنو اتريدني اسكت مگعدين ببيتنا بنت ليل
نار : انتي شلون تتجرأين تحچين عليه بهالطريقة
چنت بين النايمة والگاعدة لمن سمعت صوت الفهد گمت لبست حجابي ونزلت جوا اشوف شكو انصدمت من كلام نسرين واللي مبين عليه ماكو غيري مگعديها ببيتهم
جهاد : نار طلعي الغرفتچ وانتي نسرين صمي حلگچ وامشي يلا
نسرين : ليش تريدني اسكت رجعت باوعت الغيث
لاتنخدع بيها غيث
غيث : انتي فعلا مو طبيعية
الجدة : نسرين شجاچ شهالحچي
نسرين : اني المريضة والمو طبيعية مو لعد شراح تگولون على ضيفتنا المحترمة اللي جهاد طلع من غرفتها البارحة ساعة ثنتين بالليل
كلهم باوعولي بنظرة تمنيت الارض تنشگ وتبلعني الله ينتقم منك مازن شسويت بيه
غيث : نار هاي شدتگول
نزلت دموعي بقهر لمن كملت كلامها بثقة
نسرين : التعلولة ويا غيث وتكمل الليلة ويا جهاد دتلعب بيكم خوش لعب هالصحفية
فجأة سمعنا صرختها بعد ما الفهد ضربها بكف على وجهها وطبعت اصابعة على خدودها رجع جرها من شعرها
حچى وهو صاگ سنونة وعيونه كلها شرار : انتي ينرادلچ تربية من جديد واذا محد رباچ اني اللي راح اربيچ حيوا***
لزمت ايدي وهي تبچي
نسرين : هاي لان كشفت حقيقتها صرت اني الموزينة لو عاجبك وجودها متونس بيها
نار بصوت عالي : لچ انتي فعلا متستحين حرام عليچ تتهميني هيچ تهمة
جهاد : نار گتلچ طلعي الغرفتچ
حچاها ودفع نسرين عالارض بقوة
وانتي روحي من گدامي قبل ما انهيچ هسة
نار : راح اطلع بس مو حتى ابقى بيها واتحمل اهاناتكم راح الم غراضي واطلع من البيت كله
غيث: نار بس صبري خلي نفتهم الصاير
نار : شتفتهم غيث من كل عقلك دتسألني هاي دتتهمني بشرفي شتريدني اوگف واتفرج عليها ما راح اضل دقيقة هنا
درت وجهي طالعة عالدرج بس وگفني صوت الفهد
الفهد : ممنوع تطلعين من هنا
درت راسي علي : ومنو انت حتى تمنعني
الفهد : گصري الشر وروحي الغرفتچ كعدي بهدوء
نار : واذا طولته
الفهد : راح تحرگج ناره
نار : مو اني الاخاف من النار
الفهد : گلت ما راح تطلعين وحگچ يوصلچ
باوعلي بنظرة ما عرفت افسرها نظرة خلتني ابقى رغم انو عقلي چان قافل عالروحة خلص بقائي هنا ديعقد الامور اكثر من ما ديحلها بس شنو اللي سوته بيه هاي النظرة ما اعرف يا ريتني سمعت عقلي وطلعت بذاك اليوم يا ريت ...
غيث راد يطلع خلف نار بعد ما طلعت فوگ بس وگفة صوت الفهد
الفهد : غيث الشيخ رايدك بمكتبه
غيث : بعدين اروحله
الفهد بحدة : هسة يريدك
نزل غيث بانزعاج وراح المكتب الشيخ
الفهد : يلا كل وحدة على شغلها نسوان اتدور عالمشاكل دوارة
نزل المستوى نسرين وجرها من ايدها بقوة صرخت بالم ورجع جرها ويا بس امها وگفت بوجهه
- وين ماخذها لا تأذيها
الفهد ببرود : ما راح اسويلها شي بس اعلمها شلون تحچي لان مبين ناسية الادب والاصول
جرها ويا وهي تبچي امها ماگدرت توگفه الكل يخاف منه ويحسبلة الف حساب ومحد يگدر يحچي كلمة فوگ كلمته عدا الشيخ ، دخلها بغرفة من الغرف وقفل الباب ضربها كف ورجع ضربها الثاني ضل يضربها الى ان صارت تنزف من حلگها رجع لزمها من حنچها ودفعها عالحايط بقوة وهي تبچي
الفهد : اني حذرتچ البارحة وگتلچ صيري عاقلة ولا تتصرفين من راسچ گلت لو ما گلت
حچى اخر كلمتين بصياح هزت راسها بقوة وهي تبچي
نسرين : مو قصدي احچي عليك والله بس هي مبينه محتالة ومو خوش
ضربها كف مقاطع كلامها وگعت عالارض رجع دفرها برجله بقوة نزل المستواها وجرها من شعرها
الفهد : هاي اخر مرة احذرچ ابتعدي عن هالبنية ومالچ دخل بيها واليوم عالعشا مثل الشاطرة راح تعتذرين منها گدام الكل وتگولين انچ جنتي دتحلمين مدتشوفين زين غبائچ صاير مبالغ بي فدتخترعين اشياء مو موجودة مفهوووم
نسرين بخوف وهي تهز راسها بالموافقة : ممفهوم
رمه راسها بقوة وگام من مكانه
الفهد : هاي الگتلة خليها براسچ كل ما تفكرين تسوين شي مع اني هالمرة اذا رحمتچ وعفتچ مرة الجاية والخلقچ اسويچ جنازة يا نسرين
طلع من الغرفة تاركها تبچي بألم وهي تندب حظها رجعت حچت بحقد : راح تندمين يا نار عاليوم الاجيتي بي هنانه ....
نار
طلعت الغرفتي ودموعي زادت صرت اسمع صوت شهگاتي اللي ما گدرت اسيطر عليهم دخلت على غرفتي وگعدت عالارض بضعف الحياة قاسية هواي والبشر بدون رحمة كرهت كلشي هنا حتى نفسي
اني چنت اعرف انو هالمهمة صعبة وراح تاخذ من عمري عمر بس هاي العائلة اسوأ من ما چنت متوقعة اسوأ بهواي ....
وسام : اريدچ تكونين قوية وتسمعيني زين اللي راح احچي يمكن بنية بعمرچ صعب تستوعبه بس انتي مختلفة اني ربيتچ عالقوة والثقة بالنفس مفهوم حبيبتي
مسحت دموعي بايديه الصغار وباوعت عليه بانصات
وسام : ابوية مات باليوم اللي ولدتي بي
شهگت بقهر لزم ايديه
وسام : باعي بعيوني نارة
باوعت علي
وسام : انتي مالچ علاقة بكل اللي صار جيتچ للدنيا هي احلى شي صار بحياتنا لا تصدگين انو الچ ذنب كل انسان الله سبحانه وتعالي يخلقه ويكتبلة يوم يموت بي
سواءاً اجيتي للدنيا او لا هو چان راح يموت بهذا اليوم بس
نار : بس شنو
وسام : طريقة الموت هي اللي تختلف
حقد البشر وظلمهم هو اللي خلة ابونا يموت
نار ابوچ مات مگتول
فتحت عيوني بصدمة من كلامة همست
بصوت ناصي : ليش هيچ شسوالهم
ناديا : ما رضا باجرامهم
باوعت الامي اللي دخلت وهي تبچي مبين چانت دتسمعنا گمت عليها حضنتها وبچيت
نار : ماما شلون مات بيوم ميلادي
گعدت ونزلت دموعها وهي تحچي
ناديا :چان يوم متعب گضيتة اتلوى من الوجع عرفت راح تجين هو چان بالرغم من انه خايف عليه ومبين علي قلق بس چان كلش فرحان هواي راد بنية من زمان حتى قبل لا يجي اخوچ دائما چان يگولي اريد بنية هيچ حلوة تشبهچ وتكون قوية ما يهزها شي البنية حبيبة ابوها ولمن اجا اخوچ وبعدها ما گدرت احمل مرة اللخ كلش انقهر بوگتها فلمن حملت بيچ وعرف بنية حسيته بذيچ اللحظة ملك الدنيا كلها
بچيت واني اسمع كلامها گام وسام وحضني وباسني من راسي كملت امي
ناديا : رحنا للمستشفى وگضيتها تعب والم وهو وياي ما تركني ولا لحظة هو وهناء وجمال چانو مو بس اصدقاء اخوة واعز
بچت بغصة وماگدرت اتكمل كلامها گام وسام جابلها مي شربت
ناديا : ما عافونا ولا لحظة واجيتي بعدها للدنيا من شافچ حسيت وجهه نور بحياتي ما شايفتة سعيد وفرحان الهلدرجة
هشام : لچ ناديا باعي شگد حلوة يا ربي صار عندي بنية تخبل
جمال : تتربى بعزك وتشوفها عروس
هناء: الف مبارك ابو وسام تتربى بعزكم
هشام : الله يباركلكم ما قصرتو
هناء: طبعا ناديا ولا تشبهچ كلها ابوها
ناديا : اي يحظي اني حملت وتعبت وطلعت نسخه منه
هشام : انتو تغارون من جمال بنيتي
ضحكو كلهم على كلامة
ناديا : بعدها اجه اتصال الجمال واضطرو يروحون وهمه يعتذرون من عدنا بعد ما راحو ابوچ اتذكر شغلة ناسيها بالمحل وعافني وراح شگد منعته وگتله لا تعوفني وحدي بس هو اصر يروح
نار : شصار بعدها
ناديا : طول هواي وشگد اتصلت علي ما يرد متت من الخوف علي بس بعد ساعتين اجاني اتصال ومن رديت سمعت الشي اللي ما چنت متوقعته وحسيت الدنيه وگفت بهاللحظة
- البقاء بحياتچ ام وسام
يتبع ...
ارائكم 💜
ولا تنسون اللايك بليز ❤️❤️