اسيرة قدرك

البارت 34

اسيرة_قدرك..
بقلمي رسل..
البارت الرابع و الثلاثون..
واتباد rasolaa7

آني مَـارِدتك تِـضيع
‏  و تعتك بعِيـني رِسالة وتِنتهي
‏رِدتـك ولاية لغُـربتي
‏منِين مَـر بيك‏ الضبَـاب وتَـيهتني..

-ايهم حاول هواي يتصل بيه بس جنت انطي
حضر رغم وجع كلبي بس ما بيدي شيء
هيج راح نتأذى اكثر..

-كم يوم واجت علينا خالة ريا قبل لا تطلع
انطيتها الهدايا.. كولي لعمو اسر يرجعهم
لايهم.. هي تنهدت ما راضي ينساج سجى
والله كلها تلوم بي..

- ولا اني الي نسيتو بس احاول خالة خلي
عمو يحجي ويا كافي حرام الي يسوي بروحه..

-مرت الايام و نكطعت اخبارو لايهم بس حضي
ما كملها وياي سمعت من بيت جدو انو
اليوم عرسو والله كانو الدنيا اضلمت بعيني
و القهر تغلغل بروحي صعب جثير صعب
حلمك يروح لغيرك هذا اليوم هو اصعب يوم
بحياتي اتمنيت لا شفتو و لا عرفتو لايهم بيوم..

-اخذت جهازي بايدين ترجف بس صبر
ما عندي بعد دكيت على خالة بس
جاوبتني بجيت..

-خالة الله عليج كولي و لا تجذبين عليه ايهم
فرحان
كاشخ الها
لزم ايدها و يبتسم بوجهه مو احجي..

-سجى لو تشوفينه جان ما حجيتي هيج
وربي شكله مو مال عريس اللبس كله اسود
و حتى زيان ما زين معاند لحيته مخربطة
و حنه ما قبل يسوي حنه مجرد زفة و لاف على
ايده السبحة الي جبتيها اله انتي..

-اسمعها و ازيد بالبجي حقدت على بابا
هواي بسببه و بسبب تفكيره الطائفي حرمنا
من الفرح شصار لو موافق مو جان اليوم
هو يوم فرحنا و جان ما نظلمت هالبنية الي
دخلت بينا..

-بهذا اليوم ضعفت جثير البجي الي بجيته
مال وحده ارمله لحظات ضعف مرت عليه
ردت بيها انتحر و اخلص من هالدنيا و همها
بس استغفرت ربي لانو ما كاتب النا هالشيء..

-نص الليل دك جهازي فز كلبي من شفت اسمو مضوي الشاشة استغربت انو داك عليه بليلة
عرسه..

-رفعت خط اجاني صوتو بتعب.. سجى مخنوك
اطلعي من بالي و من كلبي و ارحميني راح
اموت والله تخيلتها انتي ومن شفت وجهه ضربتها
لج شسويتي بيه اطلعي من تفكيري الخاطر الله..

-حرام والله حرام الي جاي تسوي بالبنت
اصحى ايهم انت متزوج هسه وما يصير
هيج تسوي بمرتك شنو ذنبها ليش تعذبها وياك
سمعت شهكته الي مثل السهم و دخل لكلبي..

-احبج احبج مو بيدي سجى والله مو بيدي عشت
احلى ايام عمري وياج لا شكلج و لا ضحكتج
يفاركني اعرف اذيتج هواي بس اني متأذي
اكثر من احترك ابوج بجهنم على الي سواه..

-سجى اريد انسى اكو واحد ليله عرسه يشرب
لج اريد انسى..

-اني اخليك تنسى حجيتها واني اضغط على
شفايفي واكتم صوت بجيتي..

-شلون؟!..

-اي شخص يتقدملي راح اوافق عليه وانت
هم عيش حرام عليك البنية شنو ذنبها..

-زكح بيه.. اموتج سجى اذا سويتيها ابوج
ادمره شلون حجيتيها سجى شلون..

-كافي ايهم انت رجال متزوج كافي اصحى..

-لا تمسلتين هي فترة و اطلكها و اخذج سجى
ديري بالج توافقين لا تدمريني..

-سديته واني ابجي شنو ذنبها للبنت وصلتني
صورهم من نورهان اني ضغطت عليها
ترسلهن جان فعلا شكله مو عريس الوجهه ذبلان
و لا كانو ايهم حبيبي الي ضحكتو ترد العافية
انقهرت عليه جثير بابا و اهلو دمرونا..

-ثاني يوم داومت التهيت ويه صديقاتي ما اريد
افكر تعبت جثير خلص الدوام طلعت والمح
سيارة ايهم انصدمت ادحج عليه بنظرة مليان
شوك و لهفه هو صفن شوي وكانت نضرته عتب وحرك اجتني رسالة منه..

-ليش هيش سجى ليش مبينه مرتاحه بفراكي
هيج هنت عليج واني الي متعذب وحتى روحي
كارهه..

-رديت.. شلون عرفت اني مرتاحة عجل
وكلبي الي ينزف و روحي الي تعبت حكمت
عليه من شكلي ايهم اضعاف تعبك تعبي..

-من هذا اليوم ما حجيت ويا مر الايام و
بيوم نايمين بالليل و فزينا مرعوبين ركضنا على
مصدر الصوت جان جام الاستقبال الي صار
طحين كلو قطع صغيرة بابا شال طابوكه
و بنصها ورقة احس وجهو نكلب لونو من
قرا المكتوب بيها..

-الطيار البعثي ما نسينا الثار من سنين..

-طبعا بابا جان طيار بزمن النظام وكان
ولائي لصدام و من سقط النظام جثير اجانه
تهديد من ناس مجهولة..

-كلهم جان خوفهم من شيء الا انا جنت واثقه
انو هذا ايهم احس كلبي يكولي هذا تهديد
من ايهم اخويه اخذ الورقة و كال اسلمها
بيدي لضابط و هو يحقق..

خفت جثير لا يطلع ايهم و يروح بيها
انتظرتهم ينامو وبالي جان يم الورقة
اجتني رسالة من ايهم..

-هذي بدايتها ويه  ابوج الناقص ويسب بي بسرعة اتصلت عليه..  انت على شنو  ناوي اتركو لبابا الله يخليك جاوبني بصوت سكران ما اتركو اذا ما يكول خلاص سجى  لك كتلو ومرتك شنو ذنبها عايفها ومكابلنا روح عيش حياتك ايهم
اترك بابا..

-لا تسدينه احلفج  بغلاتي سجى احبج لاتركيني تعبان واحس نفسي ضعت والله سجى ما ضايك
طعم الراحة..

-حبيبي انا ما اتركك ولا عمري انطي بيك جدام احد لخاطري انسه و عيش..

-ليش تريدين تتزوجين واتركيني ليش هيج
هنت عليج و هيج تحجين..

-ايهم اكيد مراح ابقى بدون زواج..

-ارجع اتقدملج ونسافر..  تنهدت حبيبي صعب انت صارت بركبتك زوجة حرام تظلمها ضل يكول ما اريدها ما اريدها..

-عجل هي شنو ذنبها ايهم اصحى الله يخليك
سديت الخط و  رحت اريد بس اخذ الورقة
شفت اخويه غرفتو مفتوحة هذي فرصتج
يا سجى..

ريا..

-قبل لا نطلع امنت بناتي يم سماح لان طريق
طويل و مستشفى وين اخليهم مهاب كال جاي
وياكم اني..

-طلعنا و طول الطريق دموعي ما نشفت ادعي
و ابجي اريد بس اوصل واشوفها اخاف كلش
اخاف ما الحك عليها وانحرم منها من تجيني
هيج افكار انتفض بسرعة وادعي الله ما يحرمني
منها امي كلش حنينه علينا ما تستاهل..

-مشينا مدة و كفوا نتريك توسل بيه اسر بس
ما كدرت اكل شيء و هو يباوعلي بقهر و حتى
مهاب جان مقهور من حالتي بس اني والله
مالي نفس اكل الخبر الي تلقيته جان اثره جبير
عليه احس نكسرت و طفت الدنيا بعيني..

-ما اكدر يا نفس تشتهي عوفني عفيه ما اكدر انزل..

-هم صعدوا كملنا طريقنا واني ابجي كل شوي و اسر  داير وجهه عليه يباوع بخوف لو يوكف و يجي يمي يغسل وجهي لان صار وجهي اصفر وكلبي احسه دكاته سريعة وروحي مفرفحه..

-من بعد مسافة الطريق  وصلنا رحنا للمستشفى نزلت ركض  اسر همس..

-على  كيفج ريا  راح توكعين مو هيج حبيبتي..

-دكينه على فارس نعرف وينهم كال بطوارئ رحنا شفت اخوتي وبابا وعمامي ومرت عمي واكفين بره ادور بوجوهم على امي كلها ما تهمني اتمنى اشمر روحي بحضنها و تكلي يمه ما بيه شيء..

-سلمنا و اني دخلت يم امي ويا ريتني ما دخلت
روحي نمردت لشوفتها حلكها يذب دم  بعده
وايدها متأذيه  ومجرحه ركضت ابوس بيها ومتحملت ضليت اصرخ اختي لجبيرة كالت شبيج لا تسوين هيج و تخوفينها..

-مو بيدي وضع ماما يبجي الصخر اجه اسر طلعني جنت منهاره هو اخذني غسل وجهي ورحت للردهه الثانية اشوف سرى  لكيتها تبجي من وجع راسها ولافين راسها خطيه وشفتها وكصتها مجروحات متأذيه من ضاربه بريك جانت تباوعلنا بخوف و تسأل على  الولد الي تصادموا ويا  عمر كال  شفت ابنهم مطروح بالكاع ينزف بس ما كتلها هي بيا حال  طمنتها..

-لا تخافين ماكو شي ارتاحي..

-بقيت بين امي وسرى  كل شويه اروح يم وحدة
واسر  يغار و ما يقبل كل شوي اطلع و المستشفى
مليانه عالم بس ما حجيت ابد مو وكت غيرته
الوضع الي بي احنا حتى ما اكدر احجي لو اناقشه صار ليل و اني لا اكل ولا شرب بس
ننتظر بقهر والله لحظات تدمر النفسية..

-لليل كالوا لازم مرافقين اثنين يبقون و الباقي
يطلع اختي الجبيرة كالت اني ابقه يمهن..

-واني هم ابقى وياج ما اعوف امي.. حجيتها
واسر خزرني..

-ريا ما تبقين عود باجر الصبح ارجعج
انتي مريضه ما تتحملين تختنكين و يحيرون
بيج لو بامج واختج امشي حبيبتي..

-لا اسر والله ما اكدر اعوفها ما اروح عفيه
خليني يمها.. هو كوه يلا قبل..

-كلها طلعت بقينا بس اني و اختي الجبيرة
ساعة نروح يم ماما وساعة يم اختي شوي واجه
مهاب و اسر صاحني رحت يمه جان جايب اكل..

-بداعتي اكلي شوي لا تخربين و ديري بالج
على نفسج..

-اكلنا اني و اختي و رجعنا يم ماما لتلاثة
ماما صاحت علينا ركضنا عليها اثنينا..

-ها ماما شبيج شيوجعج؟!..

-بجيت من سمعتها كالت مخنوكه ودي اشيل
التعب كله منها رادت تروح للحمام
ما قبلنا تكوم لان جانت تعبانه كلش بس هي اصرت سندناها اني و اختي مشينا شوي وجان
توكع علينا جسمها كله صار يهتز اختي تخبلت
غسلت وجهه هي حجت بتعب.. يمه اي شيء
وكلوني..

-جان اكو شوربه وكلتها شوي وهي منتهيه
فتحت عيني بصدمة و اختي مثلي من سمعتها
تهمس بالشهادة و تردد اللهم احشرني
مع الحسن و الحسين يارب و تردد بآيات..

-انفجعت طلعت من الغرفة الممر جان مابي احد
وما اندل شيء نوب احنا بالخاص وهذا هدوء
اصيح و ابجي الحكوا فدوه امي راح تروح منا
طلعن نسوان من الغرف الي بصفنه وركضن
على امي و اختي الي حايره بيها خطية هن
شالنها ويه اختي وخلنها على السدية جهازي
ايدك من انتبهت هذا اسر رفعت الخط واني
اشهك.. اسر امي راح تموت اسر الحك..

-هو عاط بيه ليش  شبيها شصار ريا سدي
سدي.. اقل الخمس دقايق ودخل هو ومهاب
وامي نقلوها لقسم الأشعة طلع عدها نزف
بالرئة لان متعرضة لضربة قوية انطوها علاج
و مغذي رجعت نامت هدت حيلي بوكعتها
تشكرنا من النسوان وكفن ويانا و صاحن للدكتور احنا جنه مربطين من وكعت علينا طلعت لاسر برا الغرفة..

-هو كال ها شلون صارت؟!.. تنهدت نامت
شسوت بينا اسر والله اسمعها تتشاهد واحس
روحي تطلع ويه كل كلمة..

-على كيفج روحي انتي ان شاء الله تكوم
الكم بالسلامة..

-صدك انت شبسرعة اجيت وين جنت؟!..

-مو بعيد يمج بقينا اني ومهاب بالسيارة
ما ردت اتركم خاف يصير شيء كلت..

-شكد حنين والله احسن من اخوتي الي عافونا
وراحوا ما عدا فارس احنا الي توسلنا بي يروح
لان جان منهار عليها علاقته بامي تختلف عنا
كلنا متعلق بيها بشكل..

-يلا حبيبتي اروح ما يقبلون نبقى هنا اذا
صار شيء خابريني هنا يمكم اني..

-هو مشه شوي صحت عليه اسر.. التفت عليه
ها محتاجه شيء؟!..

-الله لا يحرمني منك يالحنين.. هو ابتسم وراح..

-رجعت يم امي من شفتها تتنفس تشكرت من
رب العالمين الي حفظها النا كابلتها و كعدت
و اسر خطية كل شوي و متصل عليه يتطمن
للخمسة الفجر وهو ما نايم..

-اجه هو وماما جانت كاعدة باس راسها..

-يلا حجيه كومي عاد نعرفج قوية.. هي ابتسمت
بتعب بوجهه ما بيها تحجي..

-همس.. شصاير بيج حبيبتي الا توكعين علينا
يلا ترتاحين اليوم ما تباتين هنا واذا عاندتي
اخذج سحل..

-ما اكدر اعوفها مابيه شيء لا تخاف عليه..

-منو كالج تعوفيها عيني انتي بس ترتاحين
و ترجعين مو راح تتمرضين.. ماشي من تروح
اروح وياك ذبني على اهلي..

-للسبعة اجه مهاب جايب ريوك و شوربه لماما
و الله وكفتهم هو واسر ترفع الراس..

-وكلنه ماما شوي و الممرضين كل شوي
و يجيكون و ضعها الدكتور كتب علاج
اخذت الراجيته هو ما قبل اخذها مني وراح
جابه جنت فشلانه منه لا بابا و لا اخوتي
لهسه مغلسين وهو يدفع..

-انطاني العلاج بعد لا تعيدينها اهلي انتم
ماكو فرق حبيبتي..

-ساعة و اجوي اهلي بابا و اخوتي و نورهان
حضنت امي و شبعت بجي عيني على مهاب
الي اكلها بنظراته اشرلي اوخرها وخرتها
عن امي و مسحت دموعها مهاب همسلها..

-كافي يا عيني ما بيها شيء.. هي باوعتله بقهر
مهاب جان واكف يمنه عمر انتبه عليه واكف
يمنا عاط بنورهان.. تعالي هنا اوكفي يمنا..

-مهاب ابتعد ويخزر بي نوب اخويه الجبير
فشلنه يحجي ويه اختي و صوته مسموع..

-لج فلوس عرسي خلصت على خطاطيركم
النايمين على كلبي وهذا ابوج فلس ما يصرف..

-امي تباوعله بقهر مهاب صاح بي.. انت شبيك
وكت هذا الحجي مو امك مريضه شنو من
احساس عندك..

-خزره عمر وسكت هو كل اخواني يخافون
من عمر..

-رحت على سرى لان راح تطلع اليوم
بس امي يومين يلا تطلع هي كالت فدوه بس
الولد الي دعمته شبي خاف مات وما تكوليلي..

-زين شبيج لا تخافين..

-اسر اجه.. يلا حضري روحج خلي اخذكم
بطريقي..

-زين اسر فدوه الولد  الي ضربته سرى انت تابع
وياهم حالته ترى خايفه هي كلش..

-سهله خلي اخذكم للبيت و افهم الموضوع
وعود ناخذ عمامج و نروح على اهل الولد..

-فدوه اروح للحنين و الشهم مالتي..

-والله يا ريا لعيونج الي جاي اسوي كله
عمري انتي..

-رحت بوست ماما و طمنت عليها و اخذنا
سرى و طلعنا اسر كال نروح لبيت ابو مهاب
نرتاح كم ساعة و نجيكم التفت عليه..

-ما تجين وياي والله هسه تلكين بيتكم هوسه
ما ترتاحين..

-لا حبيبي والله ماكو شيء روح ارتاح
صاح.. خرب بيج على هذا العناد اذا صار
عليج شيء انهيج..

-وصلونا لبيت اهلي و راحوا اتلكني خالاتي
و كرايبنا والبيت صاير هوسه جنت تعبانه
بشكل طريق و مستشفى و هبطه احس انتهيت
كتلهم ديروا بالكم على سرى بس ارتاح شوي
رحت للغرفة اتلكتني اختي..

-خير شجابج شرجعج علينا.. دفعتها روحي
طالعة توخرين عني لا والله انهيج هسه..

-هي ضلت تغلط عليه تركتها ورحت سبحت
و ارتاحيت شوي و اجه اسر جاب اكل جاهز لسرى انطيتها ر رحت صليت و اتصلت
على سمر كلبي يم بناتي اشتاقيتلهن هي
كالت زينات و خالة ما مقصرة وياهن لا
يضل بالج عليهن..فدوه سمر خلوهن بعيونكم..

-امنت سرى يم خالاتي و طلعت ويه اسر
لبيت حماتي ام مهاب هو اصر عليه اجي واني
هم فكرت ارتاح هناك احسن من مغثة اختي
و عمر اذا شافني وصلنا لبيتهم مهاب جان
نايم اسر مدد واخذني بحضنه سولفنا على
الحادث و على حالة امي بس اتذكرت شلون
وكعت علينا البارحة و شلون تتشاهد صرت
اشهك من البجي هو حضني و يطمن بيه..

-كافي يا عيني ادعيلها مو هيج تسوين بروحج
واني وياج يروحي والله ما نعوفها الا تكوم
على حيلها اخذت اجازه وهاي راح اكابلج
حضني و يهدي بيه غفيت بحضنه..

-فزيت وره كم ساعة على صوت الجهاز
رفعت خط جانت نورهان.. ريا شوكت
تجين فارس تعبان كلش..

-باوعت على اسر خطيه هو هم تعب ويانا
كمت بدلت و كعدته مجبوره ما عندي غيره
هو بدل و طلعنا مهاب كال جاي وياكم
رحنا للمستشفى الي صايرة هوسه لان اهل
الولد الي ندعم هم جايين فتت بسد اسر
ورحت يم امي بوستها وهي على حالها
وكل شوي واحد يجي يشوفها..

-لليل اسر كال ما تبقين اليوم امشي ويانا
طلعت ويا ما قبل اروح لبيتنا كال ما ترتاحين
هناك رحنا ويه مهاب البيتهم..

-اليوم تطلع امي فرحتنا ما تنوصف
وصلت للبيت ذبحوا ذبيحه جوه رجلها لسلامتها
دخلت و انصدم بابن خالي الي من زعلت
من اسر كتله لو ما خذته احس من الخوف
صارت عيني متنقله نضره عليه ونضره
على اسر..

يتبع....

لا تنسون التصويت حبايبي تفاعلكم يشجعني..

اللهم صل على محمد وال محمد❤️