#الابواب_الخمس
البارت السادس والاربعون /الجزءالثاني
للكاتبة Reem
(بارت طويل لعيونكم )
لـــو كحلتـنـي بحلـــم بـگليبي يفتـك بـاب
وافرش سنين العمر ضحكـه وزعل وعتاب
شرهب : عصه البلوز براسي وعطت شنوو عمران جايي بنفسه وجان اوكع على وجهي
كوه طلعت راسي وعمه تجر بلبلوز اختنكت جان تجيني رساله ركضت على جنطتي فتحت الفون مكتوب بيها
اشوف يامره اليوم ترفض لا احرك جدها وجد اليطلع وراها من سابع ظهر
ابتسمت على كلامه
عمشه : شنهي تسودنتي وتضحكين ويه رويحتج چاهيج ابوالفخيتات مدولب حالج
شرهب : شبيج بيبي صديقتي دزتلي رساله وضحكت على كلامها
عمشه : انهجم راسج انه حاسه موش صويحبتج
شرهب : احنا بيا حال بيبي السمعته صدك جاي عمران يخطب
عمشه : لا نلعب وياج طم خريزه خايبه جايين يملجون على شعفتج وماضل وكت لجيتهم وانتي ضاله فاچه حلكج اكومن اطكها بنعال يفتح عگلها المجيم
بديعه : على كيفج عمه وياها حقها غير تفهم شكوو
شرهب : منو خابركم
بديعه : يونس وكال حضرو البيت وشرهب انطوها خبر
شرهب : بله اكو واحد ينطي خبر بنفس اليوم غير قبل ايام او اسبوع حتى واحد يتحضر بله البيت وصخ اني محافه متروسه شعر وممحضره روحي اطلعهم هيج جني ولد مراهق هستوه طالعات شواربه
عمشه : صحلها رجل كالت اعور خايبه ماتعينيني يبدعه اكومن اجسر عضامها هاي البت تعاير براسنه موزين من الزلمه كاض بيج ويريدج
شرهب : ليش عيني شبيهه ناقصني ايد لو رجل اخبل شعري يسوه عشيرته
عمشه : من كملاتج الطايحات على شواربج بسچ نافخه رويحتج يلبايره
شرهب : شفتي عمه بيبي شون تحجي عليه
بديعه : تتشاقه وياج واذا على الحفافه هسه احفلج وجهج وفضينا وتره ممبين شى وجهج والله يخبل
شرهب : اي هيج رفعي معنوياتي مو مثل غير ناس تريد تخلص مني
عمشه : صمي حلكج وادخلي تسوبحي اريدن الزلمه يطيح على جهرته من يشوفج مثل طيحتج الحين من عرفتي بلسالفه بيضي وجوهنه يلموغفه على افادي
شرهب : بعد وبعد طلعيهن عيني عمووش تكول اكل عشاها وتريد تخلص مني
بديعه : امشي اسبحي بين مااصب الاكل حتى اعدلج وجهج ونشوف شتلبسين وخلي اشسور شعرج
شرهب : ليش هذا الغش التجاري قابل ميعرف شعري كيرلي شايفني بأتعس حالتي المن بعد اتعب روحي واشسوره
بديعه : يابنتي هذا اليوم غير شكل قابل يوم عادي لتعاندين يله
شرهب : كمت واني ممصدكه اخاف ذوله ناصبين عليه مشيت ورجعت مديت راسي صدك تحجون
عمشه : اكومن اتولاها واهد حيلها واشرد الزلمه هاي موش وجهه خير
بديعه : هههههه عوفيها عمه ممصدكه
شرهب : طبيت ركض للحمام اسبح واغني والله صوتي بلحمام ام كلثوم متلحكني مكاني مو هنا بدار الاوبرا
طلعت اكلت لكمه على السريع وعمه لحت عليه اله اشسور شعري كتلها بكيفج واكلتها ماتت يله كملته لان طولان وهم حتى يتشسور عدل لازم ترجع اكثر من مره عليه ونزلت على ام حسن انبيع من ضمن شغلات الاقساط كاويات مال شعر جابت وحده وكمت اعيط راح يحترك شعري وتالي والله طلع يخبل طويل وسرح اباوع على عمه تفرك بأيدها وجتفها من التعب حييل تستاهلين عمه منو كلج تشسورين وكفختني على راسي
اجه يونس وماحجه اي شى لان هو هم مستغرب الوضع باوعت شلبس طلعت فستان شتوي عدل لونه نيلي وبيه خطوط بيض تحت الركبه طوله وكصيف مطلع جسمي بشده اشترته ناي اليه من ذاك الشتا الراح ومالبسته وين اولي شو كل الوكت بلبيت
حطيت عطر بالاحرى سبحت بلعطر ومكياج خفيف بشرفي طلعت اخبل لج شوشه شنو هذا الحسن يربي ماكو بجمالج اثنين
بديعه : هااا يمه تخبلتي تحجين ويه روحج
شرهب : شوني عمه بداعتي
بديعه : انتي من الاول تخبلين
شرهب : شنو اخبل كوني اجنن اكطع اهبل
عمشه : بطنج بطن شبوط بس المصارين كاضيه لحمه مابيج
شرهب : هااا بدينا عمشه غير رشاقه
عمشه : البت لون بيها لحمات يكضها الزلمه وترد رويحته موش كاض عظمة جنهه اخيه نايم جاره
شرهب : لتخلين بيبي تكعد راح تخزيني وتخلي الولد يغير رأيه
بديعه : صوجج شدت وياج من كالت الج خابريلي خوله ومخابرتي
شرهب : غير نسيت ابتليت على عمري صار جم يوم موتتني بس تعيب عليه مو خابرت وحجت وياها لعمه خوله ضلت شايلتها شون نسيتها
عمشه : جاانه لون فختيه مانسيتي عبن ذاك يهفهف على الگلب انه كاضيه كضيان مااروي
شرهب : يبوووو عليه شراح يخلصني
يونس : خيركم
شرهب : تعال لبيبيتك موتتني
يونس : شبيهه الغاليه كعدت وحضنتها وبست راسها
عمشه : يبعد بيتي انت الوحيد اطيب خاطري
يونس : شعدنا غيرج بيبي انتي الخير والبركه
عمشه : تعلمي يلمكموعه چاكاضيتها تفرفر بلمدرسه وماتعرفين جلمة عدله اطري خلكي
شرهب : كليه اسمها بيبي مو مدرسه
يونس : طالعه حلووة
شرهب : عيونك الحلووة يويو بربك الفستان كاعد ويه المكياج وشوكت يجون تأخرو
بديعه : اكو وحده يوم المشيه مالتها تسأل اخوها هيج وين الخجل مال البنات المستحه
شرهب : كلتيها مال البنات مو مال شرهب احد كلج اني بنيه تره غلطانه بلعنوان
بديعه : لسانج اطول منج
شرهب : فضونا شوكت يجون
يونس : يجون ان شاء الله كالو ساعه ٤ ونص همه يمنا
شرهب : وناي شوكت تجي حتى مخابرتني
بديعه : خابرت وانتي بلحمام كالت اجي ويه مهدي وكالت اذا محتاجين شى اجيبه ويايه كتلها ممحتاجين
يونس : واني بلغت مرتضى وبان وعلى جيه
شرهب : كعدت اعيش اللحظه واتخيل عبدالرحمن جاي واكول كون يجيب باقه ورد ويااه عجبتني هاي الحركه شفتها بلفيس واحد يخطب وحده وجايب الها باقه ورد شكبرها كون يحس ويجيب واتخيل شكله من اصير اله شعور غريب گلبي دك سريع لك هااا دكيت وابتسم على خبالاتي
اجه مرتضى وبان وبقى مرتضى ناصب عليه واضحك وياه والكل يضحك ومنتظر وبدت ضحكتي تختفي من مرت الاربعه ونص وصارت فوك الساعه ٥ وربع ومحد اجه اتصلت على ناي يدك ومحد يشيله
بدا القلق يسيطر عليه اباوع الوجهه هدأت من الضحك والعيون حايره كل واحد يسأل بعيونه شو ماكو لهسه
يونس : اخابر عليهم لو زحمه اخاف يكولون شبيهه مستعجل
مرتضى : همه هم تأخرو ساعه ٦ الا ربع صارت وماكو وصار الليل وأذن المغرب ولا بين احد ولا خابرو
شرهب : العب بأضافيري وبديت اكسر واحد واحد بأيدي اريد شئ يهديني زين ناي ليش متجاوب وينها
دك تلفون يونس كمزت
يونس : هااا نايه وينج نتصل وماكو ومابينتو
ناي : ممروده من القهر گلبي راح يوكف كوه طلعت الحجايه مني
مراح يجون لتنتظرون
يونس : شصار
ناي : ماادري مهدي خابرني وبلغني مكدرت اجاوبكم لان ردت حجايه اخيره وهسه خابرني وكال لينتظرون
يونس : ماشي عود افتهمي منه وخابريني
ناي : عينك على شرهب عفيه
يونس : الله كريم
شرهب : خير شكالت اباوع وجهه يونس انطعن وضاج اعرفه من يختنك هيج يصير
يونس : مراح يجون
عمشه : يايمه لويش ماعرفت
يونس : ناي تكول مهدي خابر وهي هم متعرف السبب
بديعه : والله عيب عليهم يخلون ناي تخابرنا لهاي الدرجه ماكو احترام النا مالهم نيه يجون على الاقل يبلغون گبل بوكت والمن بعد انطو موعد ناس متستحي
لتزعلين بنتي
يونس : يجوز صار ظرف عدهم ليش نحكم على الناس
بديعه : ابني ياظرف وهمه مصار كم ساعه من خابروك وبلغوك وداعتك هسه يطلع عمران گالب عليهم وكول كالت عمتي
بان : شوشه لتضوجين اكيد يجون غير وكت
شرهب : جريت نفس شك صدري شك اريد الرئه تنترس هوا حتى استوعب الصار لان شفت الكل توتر وميعرف شيسوي مباشره ابتسمت بهدوء وكلت
همه الخسرانين المن متوترين هيج
يونس : اكيد صار شى جبير عدهم مهدي من خابرني وبلغني جان مرتاح مامعقوله شئ بسيط يلغون بسببه الجيه
شرهب : وخلي يلغوها احسن شى سوه يله شناكل اني جوعانه بلغدا مااكلت زين
بان : شرهب بيج شى
شرهب : لا مابيه كتلكم جوعانه اني راح ادخل انزع لان تعبت من هاي الملابس ومن اطلع اريد تكولون شناكل مو اضل اتوسل بيكم
دخلت للغرفه سديت الباب قفلتها وكفت كبال المرايه واني اباوع على وجهي شون الفرحه طفت منه وشون جنت منتظره دقيقه دقيقه جيتهم صفنت على حالي ليش من دون البنات هيج يصير بيه ليش الفرح يدك بابي ومن افتحه ينهزم اني شنو السويته وگلبي يتوجع هيج ليش كل مااكول الدنيا نصفتني ترجع تضربني وتكسر شى حلوو بداخلي باوعت على مكياجي كمت امسحه بيدي حييييل اريده يروح مااريد اتمكيج ولا ابدل ولا افرح اني انكتب عليه اضحك الكل وابجي بداخلي
شلت شعري وردت انزع الفستان كمت اجر حييل بيه فتحت السحاب ونزعته محسيت بروحي غير لازمته وشكيته ذبيت حركتي بيه
جان تنزل المردتها تنذل وتنزل على خدي دموعي ذني عزيزات وغاليات وماانزلهن للي رخصني بس شون امنعهن واني منهاره الي طاقه تحمل واليوم صفرت بعد مااكدر كعدت بلكاع اضرب براسي على الكنتور وابجي
حطيت ايدي على حلكي مااريد احد يسمع شون ابجي وينقهر عليه
بان : يوم شرهب تأخرت
بديعه : روحي شوفيها خاف بيها شى سوده عليه كسرو فرحتها
مرتضى : شراح تسوي يونس
يونس : شسوي ناس انطت موعد ومااجوي قابل اعتب عليهم المايعرف الاصول لتعلمه لان ميفيد اني همي شرهب اعرف بيها تگابر وتبين ماكو شى وهي متأذيه حيل
عمشه : يمه كوم راضي اخيتك مايطيب الجرح اله من ضاك نفس الجرح وضاك لوعته كوم وليدي
يونس : تعاي بان اني اروح الها
كمت عليها دكيت الباب مجاوبت
شوشه افتحي الباب
شرهب : مسحت دموعي مخنوكه اريد الحجايه تطلع مكعد تطلع
يونس : شرهب حبيبتي افتحي الباب
شرهب : اريد اكول اله شويه واجي بس مكعد اكدر
يونس : بداعت يويو عندج افتحي
شرهب : كمت سحلت روحي باوعت بعدني نازعه جريت الدشداشه ولبستها وحاولت امسح عيووني بس ميفيد لان صارن دم فتحت الباب واندرايت بلعت ريك هاا حبيبي ثواني واجي
يونس : شوو بله درتها عليه هاااي شنوو ام گلب الحديد تبجي
شرهب : هزيت راسي وابلع بلغصه مالتي لا
جرني من ايدي وكعدني
يونس : ليش متكولين اي ابجي قابل عيب لو حرام اني اعرف متبجين اله من توصلين بقمه مراحل الانهيار تصيرين تراب يله تطلع هاي الدمعات شبيج ياجوهره گلب اخوج ورفعت راسه
شرهب : شمرت نفسي بحضنه وكمت ابجي بحرگة
يونس : ابجي حتى ترتاحين صدكيني البجي نعمه من الله حتى يخف الضغط على الگلب
شرهب : قهروني يويو وكسرو فرحتي
يونس : واني اشتم الهوا محد يكسر فرحتج شوشه يمكن هذا الشى زحمه احجي وياج بحكم اني اخوج بس خلي نكون واقعين الولد شاريج ورايدج وصار سنين ينتظرج واكثر من مره اجه وطلبج لوما شرطنا جان هسه انتي مرته اني من كلت عمران يجي يخطب ردت اطبين مرفوعه الراس محد بعدين يعيرج محد خطبج انتي ذبيتي نفسج علينا او يعيروج بسالفه تأذيج وادمر حياتج ويااه اني متأكد اليوم من مااجويه لسبب جبير حييل لان عبد الرحمن ميدك هيج دكه خلي نصبر وننتظر ناي تعرف شكوو وتبلغنا
شرهب : مااريد اعرف اي شى وبعد لو مو عمران يجي لو ابوه من الكبور وعشيرته كلها مااقبل بيه لخاطري اطردهم اذا اجوي اريد يتأذون وينذلون مثل مخلوني اليوم انذل وانتظرهم وتالي حتى مكلفو نفسهم يخابرون ويعتذرون خلو ناي تخابر
يونس : التردي يصير اني مااريدج هيج متأذيه
شرهب : گلبي يأذيني حييييل
يونس : ودموعج غاليه عليه حييل شوو خلي امسح هذا الذهب الكعد يوكع على الخد بله شنو هذا التبذير ماطلعتي على عمج حريصه
شرهب : خلي يولي هم عايزه اطلع عليه ابو الوصخ حتى سبح ميسبح حتى ليصرف صابون
يونس : ههههه ليسمعج مرتضى
شرهب : قابل اتبله عليه من باكته سهيره حتى سبح كام ميسبح المعفن صفن يونس عليه شبيك
يونس : دمعتج وكعن ملح على جرحي لتبجين يبعد روح اخوج مو انتي تكولين ياروح اختك انتي وناي انتم هم روح اخوجن عندي روحين شفتي شون مدلل اني كومي هزي طولج الحلوو واضحكي واضربي الكل عرض الحايط الي استفادينه منه اليوم اول مره اشوف طول شعرج واشوفه مشسور هم نعمه توقعت عمري كله اخلصه والكفشه كبالي
شرهب : بربك مو الكيرلي احلالي من شسورت صار وجهي شطوله جنه حصان
يونس : انتي تخبلين بكل حالاتج
شرهب : اني جعت
يونس : ههههههه عندي حل يرضيج ماطول بعد وكت اخذج ونروح للمطعم اعشيج احسن عشوه حاب اصرف وناخذ مرتضى وبان
شرهب : خلي يولون يخسروك دز عشا هنا اصرف
يونس : مو كتلج صايره مثل جوحي
شرهب : حضنته حييل الله لايحرمني منك ومن حنانك
يونس : هااا نطلع
شرهب : لا غير مره دز وخلي نكعد كلنا ناكل
طلع يونس كمت غسلت وجهي وحاولت اتناسه الصار واجذب على نفسي بأن الصار كله كابوس وهسه كعدت منه
قبل بيوم :
ناي : حبيبي فدوة مو تتعارك
مهدي : اني مااريد اتعارك بس خالي شيبني وتعب منه حيل وتعبت اكثر من اشوف حوراء كعد تموت كدامي هلمره دار وجهه وراح ابنه بلخارج مرتاح وبته بحضنه وخالي محتار بلعقارات والشغل وعايف شغله حوراء صار شهرين حتى تلفون مارفع وكال شبيهه مابيهه هذا الموضوع دمر اعصابي ولازم انهي اليوم
ناي : ليش اخذت عم خالك الجبير
مهدي : يأثر عليه هلمره اذا خالي ماسمعلي وماسوه حل قسماً بالله لساني ميخاطب لسانه لهاي اللحظه معبرها واكفه بعيني تربيته اليه ومحبته بس من توصل لاختي وفضل ابنه عليها لو اعرف انهي كل صله القرابه بينا المهم متموت لازم يرجع بتها ويطلكها
ناي : كلشي بلتفاهم ياحبيبي
مهدي : عينج عليه وانطيها علاجها مو تنسين
ناي : ليضل بالك كاعده يمها توكل بالله وطمني عود
طلع مهدي واني خايفه حييل كلش اخاف من عركات الزلم لان بسرعه تتطور
بقيت انتظر بلساعات وماكو اي خبر وحوراء ماخذه مسكن ومهدأ ونايمه بغير ملكوت لحد مصار المغرب يله اجه مباشره طفرت ليمه اريد افتهم منه لان اخابر ينطيني رفض وميجاوب هااا عفيه خير
مهدي : خلي اجر نفس واحجيلج جيبي مي عطشان
ناي : رحت بسرعه جبتله وكعد يسولف اليه كلشي بلتفصيل
عمران : هلمره مجاي وحدك
عم عمران : ليش مبين مامرغوب بيه
عمران : العفو عمي على راسي اشيلك والبيت بيتك اني استغربت لان جابك مهدي
عم عمران : ماكو فرق هو هم ولدنا لو تبريت منه
عمران : ياعمي انت مو غريب وجبيرنا الشغله سهله وهمه صعبوها
عم عمران : كلشي سولفلي واني اعرف جزء منها لا تنسى مره رحت ويه عبد خطبت البنيه
عمران : هاي وحده من دكات ابني وابن اختي ماخلو قدر اليه ولا حشيمه البنيه مرايدها ولا اريد تنحسب عليه يلون ذراعي ويجبروني بيا حق وفوكها بت اختي الربيتها وحسبتها بتي واعز كاعده وتتشرط عليه وماوكفت بعينها دلالي ومحبتي الها
مهدي : خالي عوف شغله عبد وشرهب اني اجيتك على حوراء
عمران : غير اختك حضرت جنابها جان شرطها الاول اخطب شرهب اخاف عبالها تلوي ذراعي ماعاش ولا كان اليمشي حجايته براسي هي الخسرانه تبقى هيج معلكه لا مطلكه ولا حره وتستاهل تنحرم من بتها هي الجابتها لنفسها لو باقيه على شروطها ذيج اكول حقها واخلي عبدالله ينفذها بس مال تحط او شرط خطوبه عبد ماارضاها الصار بيها من ايدها لتجي تلومني وهاي كدام عمي لوما وداد توسلت بيه وكعت دخيل مااخلي عبدالله يطلك حوراء جان من يوم ماطلعت منكم هي طالك منه وتحلم تشوف بتها اني ماارضى بت ابني تعيش ويه ام تفضل روحها على جهالها اكو ام تضل اشهر بليه طفلتها الرضيعه وكت منكول الها ارجعي وحطي شروطج تحط شرط زواج بربكم صاير دايره
مهدي : سالفه امي توسلت بيك بعدين احاسبها اني المخبلني شون تفضل ابنك علينا وتعرف بيه مأذي حوراء وباطل بتصرفاته وياها
عمران : واني ماشفت منكم الزين حتى افضلكم عليه كل واحد بيكم تجاوز عليه وماحسب احساب لمكانتي اولكم جبيري والشايل اسمي واخركم اختك الصارت تالي وكت تكعد كبال خالها بكل عين صلفه وتتأمر بعد مجانت تستحي ترفع عينها بعيني واذا سمعت صوتي تنهزم
عبدالرحمن: السلام عليكم
عمران : هاكم هذا اجه الجبير المفروض يعقل مرت اخوه ويرجعها مو يروح يحط سالفه براسها ويخليها تتشرط اخطب مره اله مرايدها ولا راح اريدها
عبدالرحمن: اني لا خليت سالفه براسها ولا طلبت منها هي من ذاتها سوت هيج واذا على شرطها الي يخصني اعتبره ملغي ونفذ طلباتها الثانيه ورجعها لابنك وخلي بتها تبات بحضنها كافي طيحتو حظها للبنيه نايمه بلفراش من وره ابنك المستهتر
عمران : لتحجي على اخوك انت لو بيك خير جان صرت مثله ورفعت راسي مو خلصتها طيور وتاليها تريد تتزوج وحده امها استغفر الله مااريد اشيل ذنبها
مهدي : وكفت عقلي شنو الغيرك انت مو بنفسك مزوجني ناي وكلت شرهب لوما متزوجه جان زوجتها لواحد من ولدي انت بيدك بيوم سحلتني من ديالى لبغداد حتى انعالج بيبيتهم بعد ماجنت مااطيق اسمع خبر عنهم
عمران : ولهاي اللحظه اذا نخوني مااقصر
عبدالرحمن: شو شئ ميشبهه شى
عمران : اذا نخوني هذا من اصلي اركض للغريب وللكريب ويوم ماكلت البت اخذها لواحد من ولدي ماجنت اعرف امها هيج وضعها جنت سامع امها ذبتها وراحت اطلكت حالها حال هواي نسوان ويوم مادزيت ناس تسأل وتستفسر جابولي سوالف تشيب شعر الراس امها وحده فالته وسمعتها على كل لسان وحده مشهوره بفسوقها تردون ادخل بتها جنه لبيتي
عبدالرحمن: والبنيه معليها وشفت اخلاقها وسمعتها وحتى مهدي اجه گلك عاشت ويايه اكثر من سنه ونص مدري سنتين وماشفت منها غير الاخلاق والادب والعشره الطيبه بعد ليش تاخذها بذنب امها
عم عمران : ولا تزر وازرة وزر أخرى كلمن واعماله ابوعبد
عمران : هاي يوم القيامه مو واحنا بمجتمع عشائري ننسأل عن النسب اني حتى عبدالله ماخليته يتزوج وحده اجنبيه وشرطت عليه ياخذ بت عمته لان اعرف اصلها وفصلها ومحسوبه علينا اجي بعد هذا التعب كله اجيب وحده تلوث سمعت عائلتي وتبقى نقطه سوده اله جوه التراب
عبدالرحمن: واني مااتزوج غيرها ولو اخوها منطيها جان هسه اني بيتي وهي صارت ام ابني
عمران : اعرف بيك عناد بيه تريد تاخذها
عبدالرحمن: ادري لو احجي منا لباجر متصدكني بس خليها بالك يابه البنيه احبها ورايدها ومثل ماانت تريد النسب الزين والسمعه الزينه اني اريد المره الاحبها والي ادري راح تشيل اسمي وتحطه على راسها وتعيشني مرتاح كلمن يدور على مصلحته
واذا مو اليوم باجر بعد سنه اضل انكل ناس وعمام لحد مايقبل اخوها
عمران : اعرف يونس مينطيها الك اله اروح برجلي وادوس عتبت بابهم واني مراح اريحك ولا اريحه
عم عمران : صلو على النبي مو هيج النقاش
عبدالرحمن: اني اجيت اشوف امي وشفت سياره مهدي ودخلت اسلم واله اني حتى جياتي لهنا لخاطر هاي المسكينه الجوه لان تخابرني تبجي
مهدي : اكعد عبدالرحمن
عبدالرحمن: شكعد مو كدامك اذا ابقى الوص شغلتك بلزايد مو انت تعرف ابويه اذا اثنين تعاركو واحد بروسيا والثاني بأمريكا راح يكول عبدالرحمن السبب خليك بلجاي علموده ليشيلك ذنب كلشي
مهدي : اكعد يمعود وخلي نتفاهم
عمران : واني ماعندي شى نتفاهم عليه تريد اختك بتها من باجر تحجز وترجع والاكدر اسوي انفذ شروطها لان من حقها مايضربها ولا ياخذ راتبها ويعاملها بلحسنى اما شرطها الاول تنكعه وتشرب مايه خطبه مااخطب
مهدي : واني مااريد اختي ترجع وشروطها اعتبرها مسحوبه اني اجيت عليك حتى ترجعون بتها ويطلكها
عمران : يطلك وبنتها تبقى يم ابوها غيرها ماعندي
مهدي : خالي لتخربها بينه لهاي اللحظه حاسب حساب الك
عمران : واني مااحسب حساب لاي احد على دكتكم الاخيره
عم عمران : بله اسكتو وخلي نحلها بلتراضي الكل تصلي على النبي
عليه الصلاة والسلام
عم عمران : خلي نلزم العصا من النص وكلمن اله طرف البنيه ترجع لرجلها وتنطي لعبد الله فرصه ثانيه اذا عوج وياها ثاني يوم ترجع للعراق والطفله من حقها
عمران : عمي ميصير هيج
عم عمران : لا يصير بلعقل كلشي يصير انت مو ابنك خير وتريد تركبه على الكل انت حقاني عمران ويه الناس مو تجي تالي عمرك ويه لحمك ودمك تعوج ابنك مكسراته هوايه وأذاها لو شافت الزين منه متشرد بليله ظلمه
وانت تكول حسبت بنتي واكثر ولو بنتك ماترضالها الاذيه والاهانه الطرفين عايدين الك انصفهم خلي ترجع لبيتها وبنتها واي تصرف من ابنك يسقط حقه وترجع للعراق وبذاك الوكت اني اوكف وياها ضدك وانت مهدي عقل اختك وخلي تكوم على حيلها وترجع لبيتها مااكول تتحمل بس على الاقل تصبر عسى ولعل يدخل الرحمن بينهم وتتحسن امورها وياه غير المره المعدله الي تبني الرجال وتعلمه على طباعها
مهدي : واذا راحت وانتقم منها
عم عمران : اذا لمسها ابوه كدامي اخلي غصب عنه يرجعها بيده للعراق وبحضنها بتها
وانت عمران خلي ابنك يثكل بنات الناس مو لعبه عنده وتبقى عرضه خلي يحطها على راسه حتى يشوف معدنها لاتقوي عليها لتنسى هاي يتيمه فأما اليتيم فلا تقهر وانت بحسبت ابوها
عبدالرحمن: واني
عم عمران : انت سالفتك غمه
عبدالرحمن: يابه مااريد شى منك غير نص ساعه نروح نطلبها وراها شتسوي بيه راضي
عمران : اله هاي السالفه
عم عمران : البت شفت شى عليها
عمران : لا
عم عمران : مرات الورده من تنزرع بكاع بور تصير قيمتها اعلى من ورده مزروعه بنص بستان لان تحملت اشكال لحد ماكبرت وفتحت صدكني حتى لونها وعطرها يصير مميز توكل بالله وروح اخطبها وعود لدخلها لبيتك ابنك متمكن يفتح بيت وحده
عبدالرحمن: يابه شلعت گلبي صار سنين مايوم طلبت شى منك ورضيت طالبك هلمره
مهدي : بقى يتوسل عبد والعم على سالفه الخطبه لحد مادكت الباب ام عبدالرحمن
وسلمت
ام عبدالرحمن: ارضى عمران وخلي الولد يفرح مو حتى انحرمت من شوفته
عمران : لا تضلون كلكم فوك راسي تحجون
ام عبدالرحمن: خلي ياخذها ويطلع انت مو تريد راحته خلي ياخذها قابل هو مره ونخاف يطلك اذا طلعت مو خوش ومو ادميه يطلكها ونزوجه اغاتها مشي وياه حتى بعدين لا يلومنا ليش زوجتوني فلانه ومااخذت شرهب طلعها من نفسه ومتأكده اذا عناد لو نزوه راح يمل منها بأسرع وكت وهو بنفسه يجي يگلك اختارلي لتضيعه من ايدنا كافي الثاني بلخارج والبنيه هم ضل بس هو عدنا وهاج من البيت اضل هيج عايشة كل خلفتي بعيده عني
عم عمران : ليصير راسك يابس وخلي نروح باجر نخطبها ونفض السالفه كلها
عمران :خلوني افكر
ناي : وبعدين
مهدي : باجر ينطينا الخبر وهذا عبد شايط حتى مقبل يطلع ويايه كال راح ابات يمهم حتى اضمن موافقته
ناي : وحوراء
مهدي :شرطها الاول انلغه بس اذا خالو راح خطبها لشرهب معناها الرادته هم صار وشروطها الباقيه محد معترض عليها خلي اطيب وتكوم بلسلامه ارجعها واذا أذاها عبدالله مره ثانيه بذاك الوكت حتى ويه خالي اتعارك وعمه ويايه اصير صاحب الحق واخذ كل حقوقها من عينه
ناي : خلي اكوم ابلغها
مهدي : لتحجين لشرهب على الصار اليوم اخاف خالي ميوافق مااريدها تتأمل
ناي : لا مااحجي ولا اني اريدها تتأمل
كمت ورحت لحوري الجانت شبهه واعيه بس دايخه كتلها على الصار سكتت اعرف هيه متريد ترجع بس مجبوره لان محد ينطيها بتها
ثاني يوم كاعده اغسل لحوراء وحاولت اوكلها بدت تاكل لان رادت اطيب بأسرع وكت حتى ترجع لبتها خابرني مهدي وكال عمران وافق يخطب شرهب واليوم نروح يخاف ليغير رأيه لابوه جنت ممصدكه حتى حوري الجانت طافيه فرحت وابتسمت مكلت لشرهب ردت تصير الها مفاجأه فرحتي جبيره بأختي وحوراء كالت اجي وياج حتى لو تعبانه
حضرنا نفسنا وبقينا ننتظر والوكت مشه وماكو اي خبر اتصل بمهدي وميجاوب وهلمره يخابرون عليه اهلي ومااكدر اجاوبهم شكول الهم ضليت ارجف وحوراء هم خافت لان منعرف شصار لحد مخابر مهدي وكال لينتظرون جانت صدمه الساني انخرس خابرت يونس واني وحوراء مصدومات وحده تباوع بوجهه الثانيه ومنعرف شصار لحد ساعه ١٠ بليل نطحن طحن دخل مهدي وعبدالرحمن وياه وايده مخيطه وراسه مشدود تخبلنا ركضت عليه شصار عفيه
مهدي : انطينا مجاال
كعد عبد الجان حاله مخربط ونخاف نعيد السؤال ليعيط مهدي
مدده وخله مخده جوه راسه حوراء كعدت گباله واني طبيت وره مهدي للغرفه اريد افهم شصار اباوع مهدي ملابسه كلها دم عفيه انت بيك شى
مهدي : مابيه لتخافين
ناي : اشصار مو حتى دم ماضل بيه من الخوف
مهدي : عبد تعارك ويه ابوه
ناي : صخام ليش
مهدي : من رحنا على الموعد طلع النا خالي كال مااروح اخطب لو عبد تصركع
ناي : زين هو مو الصبح كال موافق شغيره
مهدي : عبدالله
ناي : هذا شعليه
مهدي : خالي مخابر عبدالله وكايله مرتك راح ترجع ورايح اخطب لعبدالرحمن يعني مفهمه كلشي وذاك متخبل وضال يعيط اني الدكتور التعبان على نفسي مرت اخويه تصير
ناي : كمل ليش سكتت
مهدي : خلي اروح اشوف عبد
ناي : كمل مهدي كمل خلي افهم
مهدي : مااريدج تزعلين هذا واحد مطي حرامات الشهاده الماخذها
ناي : كمل ياعيني وشصار بعد
مهدي : ضل يقنع ابوه وكايله حتى حوراء مااريدها اذا خطبت هاي البنيه لعبد شون بنتي تصير بت عمها او ابن عمها من هيج بيئه وحجي هواي ماصخ وسخيف ومع الاسف خالي من زمان يحب عبدالله ويلبي طلباته وكله مراح اروح اخطب وهذا الي خله عبد ميشوف كدامه هستره لان كله اخوك ميقبل واني ويااه مااكسره واصغره لخاطرك حقه تعب دراسه ومستوى شون انزل من مستواه لو خالي كايل رجعت بكلامي ومااخطبها جان هواي ارحم بس حسس عبدالرحمن لا شئ واهم شى مصلحه اخوه والي يريده وطز بعبد خالي شكد جان حنين علينا كلنا اله عبدالرحمن دوم صارم وياه ودوم طلبات عبدالله بلمقام الاول حتى على حساب عبد لهذا همه مو على اتفاق التفرقه مال خالي زرعت الحزازيه بين الاخوه
وهاي النتيجه اليوم عبدالرحمن متحمل وتجاوز وكسر الغراض الكدامه وضل يعيط وخابر على عبدالله فشر فشار عليه مو طبيعي وخالي متحمل سحب السلاح عليه ولوما امه واني جان كتله
وضربه براسه خله دمه بطوله ربج عبد وعه على نفسه ومتجاوز على ابوه اكثر اول مره اشوف خالي وعبد بهيج وضع
ناي : ساعة السوده على هاي الخطبه خلي يعوف شرهب كاافي
مهدي : الشغله مو يم شرهب الشغله اكبر ناي التفرقه تأذي وعبد سنين يعاني منها وعقدته جانت خالي مااحتوه ابنه وكبره بعينه وبعين اخوه بلعكس جان دوم يقلل من قيمة عبدالرحمن ويفضل عبدالله بكلشي بأصغر الامور واكبرها واليوم كملها من صغر عبد كدام اخوج وشرهب ومراح ونفذ كلام عبدالله
ناي : ماادري انقهر على عبد والصار بيه لو على اختي وفرحتها الراحت
مهدي : اني باجر اروح ليونس واعتذر منه مكدرت اخابره حيل انحرجت معرفت شكوول ومنا عبد فاقد ودمه يجري وبلمستشفى اخيط جرحه خابرتج حتى تبلغين وباجر اروح اله
ناي : الله كريم سمعنا صووت عبد طلعنا جان يعيط من راسه مبين متأذي انطيناه مسكن اباوع خطيه ايده اليسره مشدوده وراسه مشدد خابرت على شرهب ردتها تعرف حتى لتحقد عليه مو هو السبب هو ماله ذنب مغلق تلفونها
شرهب : ضليت فاتحه رسالته واقراها مكان المره ١٠٠ مره اعيد بيها لزمتها ومسحتها وسويت حظر اله وطفيت التلفون مااريد شى يذكرني بيه طبيت حاولت انام عمه كالت انتي نامي بلغرفه واني بلهول جنت محتاجه ابقى وحدي وخطيه بيبي كالت اني انام يم بدعه فرغولي الغرفه هي الغرفه صغيره متكفي ٣ اشخاص ينامون بيها لهذا دوم انام بلهول
غمضت واتذكر كلمات رسالته المصيبه اسمعهن بصوته مو بصوتي من اقراهم حاولت انام وادردم على روحي اول تالي متغفين بسرعه كمت طلعت من الغرفه للهول سحبت المخده مالتي شايلتها وافتر باوعت الهول ضوا خافت بيه وبيبي نايمه وعمه هم واكو مجال بنصهن حطيت المخده ونمت على الزوليه بدون فراش ولا غطا ردت احس بوجودهم ردت ام تحس بيه تواسيني
بلحظتها احتاجيت ناي ويونس لان دوم اعتبرهم امي وابويه حطيت راسي على المخده جان تنشمر طرف من البطانه عليه رفعت راسي لكيتها بيبي
عمشه : تعاي يمه نامي جاري
شرهب : تقربت منها وحطيت راسي على صدرها مدت ايدها على راسي وتقرا الايات الحافظتهم رغم متعرف هوايه بس كم وحده وتعيد بيهم بس بيهم امان وسكون عجيب لگلبي بلحظتها غفيت بدون حتى ماافكر اباجر وشمرت حملي وقهري على الله هو جابر القلوب المنكسره
فتحت عيني ثاني يوم وبيبي تكرط يم راسي خيار تعروزي من الصبح
شرهب : هااا بيبي شسامعه من الصبح خيار
عمشه : چا غير الجالي صعد على افادي نايمه طابوكه راسج شكبره
شرهب : فركت عيني انتي تدرين الخيار هو يزيده ويهيج القولون مالتج
عمشه : مايهيجه غيرج عبن مدهربه ومشلوشه جنج عمتج طايره وفاره
شرهب :هذا كله لان نمت بحضنج اعتذر مااعيدها ولو النومه يمج طلعت حلووة اكول جدي خلف ٦ منج
عمشه : چالو ضال وما خذاه الموت اسويهم درزن
شرهب : لا دخيلج وخاصه اذا طلعو نسخ من جوحي وعبيد يممممه مجرد اتخيل صعد الجالي انطيني خياار وجريته من ايدها واكلت
عمشه : چاموش يزيده
شرهب : هااااا ماادري
عمشه : والغسل مسويه رويحتها دغتوره وهيه هايشه بجول مااحطها
كعدت اقرا احاول مااريد ارسب هذا اخر امتحان عندي شكد صعب الواحد من يقرا وراسه مشغول وگلبه يأذي قمه بلتعب حرب نفسيه
مجاوبت ناي حتى لتفتح موضوع عبد ولا حتى سألت شنو الصار كتلهم لحد يفتح هذا الموضوع كدامي ورايه امتحان والكل سكت
ثاني يوم رحت امتحنت ومجاوبت زين على كد نجاح ميخالف المهم مااوكع رجعت طافيه واسحل بروحي كلشي اظلم بعيوني
طبيت بدلت ونمت حتى غدا متغديت كعدت العصر غسلت وراسي صداع دمرني
سمعت عمه تخابر
خير عمه
بديعه : هذا يونس يكول مهدي مخابره يريد يجي يزورنا
شرهب : هله بيه وليش يستأذن
بديعه : مو عبدالرحمن ويااه
شرهب : وشكوو جاي خير
بديعه : ماادري والله وناي وياهم خابرتها كالت عمه من اجي احجيلج
شرهب : اني راح اطب انام لحد يكعدني
عمشه : مهروشه على النوم شجرالج توج كعدتي
شرهب : خلي انام بيبي اذا سمعت صوته راح اتعارك وعيب اطلع صوتي ويونس كاعد وياهم
عمشه : يايمه نوم الظالم عباده ولي نامي گله ولا حسج يلعلع
شرهب : عفيه افتهمتيني واخيراً
طبيت تمددت جذب يانوم اقشمر روحي غير من عرفت جاي لو بيدي الزمه مااخلي عظمه بيه صاحيه واحركه بيدي واطفي وارجع اكطعه
سويت نفسي نايمه ورجلي تتحرك من القلق
عمه اجت فتحت الضوا اخذت تلفوني كالت بيبي تريد عمه خوله فتحت الجهاز الها وانطيته ورجعت حطيت المخده على راسي
ناي : ثاني يوم عبد تعب وراسه يأذي ومراح مهدي وكال باجر نروح اندكت الباب فتحتها لكيتها عمتي ياستار خيرها ماسلمت كالمعتاد طبت جفت على عبد هداده
وداد : لك شون تتجاوز على ابوك وكسرت الغراض كدامه وتفشر على اخوك مستحيت كله علمود بت الكحبه هااي من انعل ابو الساعه الجابهن علينا من يوم ماطبن بيوتنا حركنا حرك
عبدالرحمن: عمه انزلي جوه مالي خلك لروحي
وداد :هاي تاليها تهد على ابوك
عبدالرحمن: اني ماهديت اله من أذاني حييل لو لان رجل بتج ادافعين اله ولو اني على شنو متعب نفسي هو انت يايوم صرتي من جانب الحق وحجيتي ضميرج حتى هسه تصيرين من جانبي انزلي عمه رحمه لابومهدي وخليني بحالي
وداد : ابوك جان انجلط من وراك
عبدالرحمن: عنده ابنه يجي يداري هو كالها انت متت بلنسبه اليه بعد عليمن جايه ادوخيني
وداد : كله من وراها اليوم اروح افضحها بلمنطقه هلساقطه هااي دخلت الشيطان بينكم
ناي : مجاوبتها لان اعرف تتحارش حتى تتعارك ويايه وتذب حرگتها بيه بقيت اتفرج
عبدالرحمن: خليني عاقل والله هاديني ليش حتى انتي انهد بيج ايااج تتجاوزين عليها واوصلي لبيتها وشوف شسوي
وتره البنيه مالها دخل اخوج عاال بيه هوايه وصغرني وفضل ابنه عليه وكل مره ابلعها واكول يمون ابويه واخويه مو غربه واصبر سنه وره سنه من اني وبالاعداديه واخوج شوفني الويل وخلصتها مشتري راحه بالي واتغاضه عن سوالفهم وزادو لحد مافشلوني وطلعوني اني والماكو سوه يلعبون عليه واحدهم مسويني تسليه لنفسه واكف يكولي اخوك ابده منك هو دكتور ومركزه وسمعته اهم انت خلك مطيرجي ميهمك حجي الناس ولا السمعه بربج اكو اب يكول لابنه هيج مرات اشك هو ابويه اي حنيه عليه ماشفتها وزع طيبته وحنيته وتعبه على الكل واني دفرني برجله كومي عمه انزلي لبيتج راسي موتني صوتج يرن براسي وكعد يأذي
وداد : لك ابني روح بوس راس ابوك وراضيه محد يفيدك غيره سندك بلدنيا النسوان خرابات بيوت كاطعات صله الرحم تركض وراهن متحصل غير الخراب
عبدالرحمن: لتحجين عن نفسج عمه
وداد : شقصدك
عبدالرحمن: ام سيف حبايه مسكن يرحم والديج اريد هذا الصماخ يهود
ناي : صار
وداد : ينلام ابوك من ضربك تستاهل وخليك وراهن لحد متضل بلشوارع محد يلفيك
خلت ونزلت واني انطيته المسكن
عبدالرحمن: خابرتي شرهب
ناي : مغلق تلفونها عبد انت مثل اخويه والله شاهد اعزك عوف سالفه الخطوبه وصالح ابوك وسد الباب هذا كله وعيش حياتك بين اهلك وناسك
عبدالرحمن: الباب الوحيده الي اريد اسده باب بيتي وبداخله اختج
ثاني يوم العصر قررو يرحون وعبد وياهم كتله خلي اجي حتى اشوف شرهب گلبي نار عليها بقت حوراء بلبيت وسيف وياها
وصلنا فتح الباب يونس سلمنا ودخلنا
قدمت عمه كيك مسويته وعصير وكعدت وبيبي موجوده تباوع
عمشه : سلامتك يمه منهي طاكك هيج
عبدالرحمن: ابويه
عمشه : بعد ايدي عبنك ماتنجرع وطكاك انه اعرفن عمران العيبه ماتطلع منه
عبدالرحمن: ويه الكل الناس متطلع بس ويايه
يونس : خير شصار
مهدي : اليوم اجيناك نعتذر منك لان خلفنا بموعدنا والمفروض نجي
يونس : خلي افهم بالاول ليش مااجيتو وشبيهه عبد هيج وضعه وبعدين نشوف سالفه الاعتذار
ناي : كعد مهدي يسولف كلشي بس احتفظ بشغلات الغلط الصارت بحق شرهب لان ميكدر يحجيها يونس ساكت وبس يسمع بالاحرى الكل ساكت لحد مكال
يونس : الله يبرد الگلوب بينكم واعتبرو الصار اول البارحه مصار انتم خطارنا وهذا بيتكم وسالفه الخطبه اعتبروها ملغيه تماماً وياريت بعد ماينفتح طاري هاي السالفه
عبدالرحمن: اجيتك مره وحده ومقبلت واجيتك وجبت عمامي كلهم وهم ماقبلت وجنت ناوي اجيب ابويه ومصارت وكدامك كبرت اكثر وبعد مستحيل بيوم يجي ويخطب شرهب
يونس : عادي تبقى اخونا وهذا بيتك وعزيز علينا وكلشي قسمه ونصيب
مهدي : اعرف بيك تحب اختك وتريد سعادتها وتريدها معززه مكرمه وتطلع من بيتك كدام اهل رجلها وهذا ابسط حق الها بس مرات الظروف تحكمنا وتجبرنا على شغلات غصب عنا في سبيل تمشي الحياه اني مايوم اجيتك وكتلك اريد شرهب لعبد صحيح اجيت وياه من اجو عمامه بحكم صديقي واقرب شخص عندي بس جنت رافض الفكرة لان مااريد تگبر حيل المشاكل بينه وبين ابوه بس اليوم جايك وعشمي بيك متردني واحلفك بلدم والنسب الجمعني بيك تقبل على زواج عبد من شرهب واني انطيك كلمة شرف اختك تعيش افضل عيشه ومدللـه وعبد يحطها بعيونه وحط معلومه قبل متنطي رأيك عمران من راد يجي يقرا فاتحه وبس ومايتقبل شرهب بيته ابد ولا بحياته يعني شى شكلي كدامك حتى ابنه مايرضى عليه صارت لحظة ضغط من الكل عمه واني وعبد وام عبد لهذا وافق وبكلمة من عبدالله رجع ورفض يعني جيته صحيح مهمه عندك بس مراح تاخذ من حياة شرهب غير نص ساعه وراها راح يتبره منهم يعني بلحالتين هو مامتقبلها ولا راح يتقبلها
شرهب عاشت مده لا بأس بيها يمي وحسيتها حالها حال حوراء وداعت ابني ولو اعرف عبد مو كفو ومو رجال مااتجرأ واخطبها واني اتحمل مسؤوليه وانطي كلمة شرف ثق بالله مراح تلكة انسان يصون اختك ويراعي الله بيها غيره انت تريد عائله لو رجال يصير الها عائلة ويعوضها عن كلشي وعبد كدها جاييك واحلفك بدم امك وابويه الي يسرون بينا لترد طلبي وخلي افرح اخويه الوحيد ماضلي غيره ولو انت هم مثل اخويه بس تعرف علاقتي بعبد وبصلاح الله يرحمه غير شكل ذاك مات بعز شبابه ومالحك يتزوج ويشوف خلفته وهذا ضال يفتر مثل المخبل على ساعه يضيع ويسوينا مكسوره
حجيه شنو رايج
عمشه : يايمه انه لون عليه كبع واخذ چاهيه هاي السوالف ماتگبر بخت ياما زلم معكله ينحلف بيها كعدت وكطعت الحك وتالي البت ايام ماتضل وترد لاهلها وبختها ضايع والزلم الكعدت مانشوف طولهم هيه مريوده موش مامريوده لجن كلمن وظرفه انه عندي الزلمه اهم من كلشي يراعيها ويحابي عليها ويحطها بگلبه ابرك من كل هاي السوالف
يونس : انطوني كم يوم وادزلكم خبر
عمشه : شنهي يمه الزلمه مدمه وضاله مشدد وصلعته هلكبرها والله كطعه عوزها بس حرث ارحم بحاله وفرحه
عبدالرحمن: اروح فدوة لهلوجهه ماكو غيرج مريحني
وهاي الصلعه جم يوم ويطلع شعر بيها لان انضربت زينوني
عمشه : لاتقشمر على رويحتك غير شعراتك طايحه يله الزلمه مايعيبه لون طاحن چا الرگيه صلعه ماتنوجل كشورها العينه على لبتهه لون حمره وحلوة هي المريوده موش بيضه وفاهيه تالي الكشور بلزبل تعلس بيها الحواوين
عبدالرحمن: هسه اني مفهمت ترزلت لو انمدحت
بديعه : ههههههه انمدحت ابني
عبدالرحمن: ينعم الله عليج حجيه
دك التلفون عمه خوله رادت يونس استأذن منهم واخذ التلفون وطب بقى حدود الربع ساعه وطلع اني كمت
طبيت على شرهب فتحت الباب وخرت المخده ادري بيج منايمه
شرهب : شتردون مني
ناي : عبد جاي بره ورايد يخطبج
شرهب : واني مااقبل لا كل شويه فاتحين الموضوع
ناي : جذابه تردي
شرهب : مااريده بعد لو يصبوه ذهب مااااريدددددددده اعييييط بعد
بعد عشرة ايام :
هلمره اذا مااجه احرك عشيرته
بديعه : شكد حجيتي عليه من الصبح لهسه
شرهب : گلبي مقبوض من ذيج المره
بديعه : يمعوده مو وكتها شوو خلي اشوفج
شرهب : هااا شوني
بديعه : طالعه تخبلين
شرهب : الله يستر
بديعه : عليمن خايفه هي دقايق يقرون الفاتحه ويطلعون
شرهب : دك تلفوني هذا عبد كون يكول مجاي حتى ادخل بيه اربعه ارها.ب
الوووو
عبدالرحمن: دقيقه وحده واحنا يمكم بس مدي راسج موو اطلعين بلباب اريدج تشوفين شى لتخلين احد يلمحج اشعل اهلج
شرهب : وتاالي وياك تره بعدني موو الك تره ارفض
عبدالرحمن: موو هيه بكيفج وصلنا
شرهب : ركضت اشووف شكوو طلعت من باب الهول اكو حايط مديت راسي شفت الشارع واضح كدامي وانصدم سيارات سدت الشارع سد ارقى انواع السيارات كلها حديثه وشباب وكم رجال معكل ومزيقه وكفت بلباب فتحت عيووووني مصدومه
دك تلفوني فتحته هاااي شمسوي
عبدالرحمن:مو راد اخوج مشيه جبت اهلي واصدقائي وكل شخص يحبني ويريد خاطري كله لعيونج لا اخلي الصغير والجبير اليوم يركص لان خطبتج
باوعت عليه من بعيد القاط يجنن بيه ومزين اصلع بس السكسوكه طالع ينكرط
دخل كم واحد منهم لان البيت ميكفي وبدو يقرون الفاتحه
ومااشوف غير الهلاهل والجكليت من كل مكان معقوله اني انخطبت وهذا الصاك صار اليه
حوراء : كاعده احظر جنطتي عكب باجر اسافر تمنيت احظر خطوبه شرهب وافرح لفرحهم بس مردت اسوي مشاكل ويه خالي وخاصه اكد مااوصل لذاك البيت اسمع امي بلتلفون تعييط واني ابتسم رغم مراح خالي يخطبها بس غصب عنها صارت جنتهم والله عبدالرحمن رجال وكد كلمته
بليل كملت كلشي واسمع ناي تكول لو مبقيني ابات ياعيني هم لازم ارجع باجر
مهدي : باجر اوديج لان شفتج تعبتي
ناي :كون يارب الفرحه فرحتين ونخطب باجر ليونس ونخلص
مهدي : هذا هو قررتو
ناي : ممصدكه واخيراً يونس قبل يخطب
يتبع .....