شفاه مخملية

Part 28

♛ ♛ ♛ ♛ ♛ ♛ ♛ ♛ ♛ ♛

بارت كُلش طويل لعيونكم الحلوة😍.

"شفاه مخملية"

بقلم: زهراء السلامي.

#كالو ما يجيك و كلت غيـــره شكــــد
وكتــلهم حلاة العلك مــــــن ينــــــشد
وبعد كلبي خشن من هسه راح يصير
معزتــه تزيد كلما يخشــــن المبـــــرد

♛ ♛ ♛ ♛ ♛ ♛ ♛ ♛ ♛ ♛

"رهف"
انفجرت غزاله عليّ چن وحده حابسة طَنّ قهر وطلعته بيه..

-غزاله: ولچ غبررره عوووبة انتي شني من شي ماتگليلي!!!!

-رهف: غزل انه گتلچ لا تعصبين وحسچ عالي انفضحنه

-غزاله: دهر صابچ انتي تردين تموتين ابوووچ ولچ تردين تاخذي من عدنه صخااام الصخم وجهچ رهف

گامت تدگ ؏ راسهه ووجهها ملخته وتصيح..

-غزاله: ولچ انتي بت شيييييخ الوادم عيونهه علينه وتعاينلنه وتنتظر من عدنه الزلة ترحين تركبين ويه زلمه غريب ويوصلچ للبيت ويسولف وياچ جدام العالم شنييي

-رهف: غزاله مو غريب گال هو صاحب ابوي

-حمسسس كون ياهو گال صدك صاحبه مايچذب عليچ ويأذيچ ويذبچ ؏ چبد ابوچ وتخزي بين الوادم؟؟؟!

-رهف: شفتيي لهيچ صايره ماحچيلچ شي لان رأساً تهجمين عليً وماتفتهمين القصه كامله

هدأت من نفسهه وصارت تاخذ شهيق وزفير، كظت راسهه مبين عليهه داخت، حچت بصوت تعبااان وهلكان...

-غزاله: احچي الصار بالتفصيل

جريت نفس وبديت احچيلهه ولو خايفه منهه واحس شويه وتهجم عليّ بَـس ميهم..

-رهف: ؏ مرتين وصلني من اردن من المدرسة مو ما يجيني السايق مادري ليش فَـہ انه اظل حايره شلون ارد وهو يگول هو صديق ابوي وعادي اذا اركب وياه

-غزاله: يااهوو گال عاادي؟؟؟ وليش السايق ما يجيچ؟؟؟

-مادري

-چا شمالچ ماتگولين لأبوچ؟؟!

-رهف: هذا الزلمة گال ابوچ صاحبي وعادي اذا تركبين وياي، گتله والوادم شتگول يگول طز بيهم انه مو نيتي سوء وابوي راضي هم وحتى مرة اتصل بي جدامي وگاله اخذ رهوفة وياك

-غزاله: سمعتي صوت ابوچ لو ؏ حچيه تمشين؟؟

-لا ؏ حچية

رجعت تضرب ؏ وجهها وتصيح...

-غزاله: رهفففف تردين تسودنينييي بله سوالچ شيييي اااخخخ منچ ومن غبائچ!!! زين تعاي شلون شكله هذا؟ صغير چبير؟ اسمه شني مافتهمتي؟؟

-شكله شاب يعني يطلع شويه اكبر من عمو مرتضى وعنده شامة چبيرة ؏ خده ولا ما احاچي استحي بَـس هو يحچي

-شيصخم شيگول؟

-ماگال بَـس يحچي هو وابوي شلون اصدقاء وشكثر واگفين لبعض وناس معروفين ويحلفون براس ابوي ويگول ابوچ تاج وباج السلف كله يحچي بي

-غزاله: واكيييد انتي صدگتي!!

-اي چا ليش عندچ شك بسمعه ابوي؟

-غزاله: لاااا طبعاً لااااء بَـس هذا مامرتاحتله رهففف تدرين مروان وخلفته يلوبون ؏ ابوچ ويردون يشوهون سمعته الانذال وخاف هذا منهم!! ممنوع تصعدين وياه ابدد وهسة تمشين تحچين لأبوچ خاف يصير مايصير

-رهف: غززززل انه گتلچ الچ وبسسسس والزلمة حلفني ما اگله

-غزاله: وليش ماتگليله؟؟؟

-رهف: يگول ابوچ يستحي من اتفضل عليه لان هواي مسوي افضال فَـہ لا تحچيله خاف يزعل لو يعاتبني وتخرب رفجتنه

-غزاله: مادري مادري رهوفه انه ما مرتاحة احسن اكو شي غلط

-وين الغلط؟؟؟ خلص اذا تگليلي لا تصعدين وياه بعد ماسويهه

بهتت وفتحت عيونهه نترت بعصبيه...

-غزاله: ليش ان شالله ناويه تعيدين الكرة وتركبين يا عوووبة

-رهف: هااا لا لا والله لا

-غزاله بتحذير: رهفففف ديري بالچ ؏ سمعة ابوچ لا تنزلين راسه من وره غبائچ وبرائتچ

-رهف: خلص غزل افتهمت ماعيدهه

-غزاله: زين انتي شمالچ خايفه وتطگين سن بسن؟؟

-رهف: ماكو شي بَـس خايفه منچ

-غزاله: اويلي منچ وين ترحين مني اذا افتهمت مصخمة شي

-رهف: مامصخمة والله

-غزاله: لا تحلفين كلشي يبين بعدين

-رهف: اي ماشي يله انه انزل انام

-غزاله: اوگفي اجي وياچ

-وين تجين وانه انام عد ابوي

-غزاله: رهف حبوبه ننام بغرفتنه القديمه اريد ارتاح الله يخليچ

-رهف: وعمو وين يروح؟؟!

-غزاله: يبقى هنا فدوة رهف ساعديني انه جاي اموت ؏ ايد عمچ مايرحمني

وطگت بچي، انكسر گلبي عليهه وحرت شسوي ماعرف ؏ شنو جاي تحچي لان من تزوجت عمو لسه منعزله ودائماً وحدهه لا تگعد ويانه ولا تشاركنه بحديث..

-رهف: غزاله يله حبي ننام سوا

رفعت عيونهه تلمع بيهن الدموع، مسحتهن بردن قميصهه بحماس وحچت بفرحة...

-غزاله: اي اي يله نرجع مثل گبل

هزيتلهه راسي وابتسمت، گمت من الچربايه اللبس نعالي وانفتحت باب الغرفه اجه عمو، غزاله بهتت وگالت بحسرة...

-غزاله: شو راجع من وكت؟

-مرتضى: اشتاگيتلچ

-رهف: احم انه ارفع الزحمة يله تصبحون ؏ خير

غزاله تتوسلني بعيونهه حتى ماطلع واعوفهه وانه حرت لان اشوف الرغبه والاشتياق كلهه بعيون عمو..

طلعت من حجرتهم ووگفت دقيقتين بالباب ورديت دگيتهه، عمو جاوب بضجر...

-مرتضى: ياهووو هاذ

-رهف: عمو هاي انه رهف

اسمعه ينافخ وضايج گال دقيقه وطبي للحجرة، فتحت الباب غزاله چانت لسه عيونهه مدمعه وگاعده ؏ طرف الچربايه وعمو واگف گبالهه وجاي يلبس بقميصه..

-مرتضى: خير رهوفة محتاجة شي؟

-رهف: هااا اي هذا ابوي يريد غزل

-مرتضى: گليله باچر هسّ نريد ننام

-رهف: لا مو يحتاجهه بموضوع ضروري

صار يستغفر ويتأفأف وغزاله گامت وياي عساس تشوف ابوي، بعدنه ؏ الدرج وغزل گالت...

-ابوچ وين بحجرته لو بالهول؟

-رهف: ولچ لاا چذبت ابوي اصلاً نايم

-چا ليش تچذبين؟

-لانچ كسرتي خاطري شمالچ ترجفين من عمو مرتضى؟؟

حركت راسهه بيأس وهمست...

-غزاله: امشي رهف عوفچ مني

نزلنه لغرفتنه وهيه تلوب تخاف عمو يجي ويكتشف ابوي ماجاي يحاچيهه، دخت ؏ گد ما تحركت وصحت بيهه...

-ولچ غزل اهجعي راسي افتر

-غزاله: لو يدري مرتضى چذبنه عليه والعباس يحطنه ويكتلنه ثنينه

-رهف: خيه تلگي نام اصلاً

-غزاله: هاا اي اي هم صدگ

اجت يمي ؏ الچربايه وتمددت، حظنتهه حتى تهدأ شويه وثنينه غفينه.. حسيت ؏ صوت دگ باب حجرتنه ؏ الخفيف، گامت غزاله مفزوعه..

-غزاله: رهف هذا عمچ اجه والله هوه

-رهف: اي وشكو گليله تعبت وغفيت هنا

-غزاله: مو اخاف مايصدگ

-لا يصدگ ماعليچ انتي

كمت افتح الباب بعدما اندگت اقوى للمرة الثانيه، فتحتهه وجفلت من شفت ابوي واگف وجهه عرگان وصاير اصفر، بَـس شافني گال بلهفة...

-عميد: رهوفة بابا وينچ انتي؟!!

-رهف: ها حبيبي انه نمت ويه غزاله هنا بَـس انته شمالك وجهك اصفر؟

مسح وجهه وجر نفس، حچة بتعب..

-عميد: حلمان بعد ابوچ تعاي ليه

جرني عليه وحظني وبوس راسي ويمسح بي، ظلينه واگفين بالباب وغزاله لبست شال واجت تحاچي ابوي، بعدهه ماسألت ؏ احواله وشلون صار وشفنه عمو ؏ روسنه مخنزر ووجهه احمر، كتم غضبه بحك رقبته من وره وگال بأبتسامه چذابه..

-مرتضى: ها خويه لسه بعدكم تحچون يله نعست اريدن مرتي

-عميد بأستغراب: ما تاخذهه ياهو كاظك

-مرتضى: مو استحيت اقاطع حچيكم

-عميد: شني؟

طفرت غزاله ؏ ابوي وصاحت بتوتر...

-غزاله: يي هذا هوه باباتي انه اردن للمدرسة ويه رهوفة

حچيت اجاريهه بالكلام...

-رهف: بابا بَـس انه ما احتاج احد وياي بالدوام

خزرتني والدموع مشكله بطرف عينهه وابوي وعمو مرتضى صافنين علينه، حچت بين اسنانهه...

-غزاله: رهوفة گلبي خلص ابوچ يريدني اردن يعني هذا هوه بعد محد يجادله.

دارت وجهها ؏ ابوي تتوسل بي بعيونهه وهوه اكيد فطن ويلگفهه، ابتسم بالچذب وهز راسه...

-عميد: اي بنيتي عفيه عليچ ماريدن رهف وحيدهه بالدوام، ويله مرتضى اخذ مريتك حنه خلصنه ورهوفه تعاي لحجرتي

راحت غزاله ويه عمو ووجهها صاير ازرگ مو اصفر حتى عيونهه گوة فاتحتهن بَـس مبين عمو هدأ وراحت العصبيه منه..

اول ماطبينه للحجرة ابوي اللتفت عليّ وگال بشك...

-عميد: رهف شمالهه غزاله؟؟

-ماكو شي

-عميد: احچي رهف ليش مچذبات وگايلات چنتن تحاچني؟؟

اخر كلمه حچاهه بحدة، بلعت ريگ وگتله...

-بابا اسمعني غزاله خطيه مشتاگه تنام بصفي فَـہ ماگدرت تجي اله لمن تچذب ؏ عمو وتگله عميد يريدني وعساس تأخرتو بالسوالف وغفت يمي

-الللله شحلات الچذببب!! بله ماعرفت ارد ؏ اخوي وصارت سالفه من وراچن امهات عگل الصغير!!

-رهف: بابا حبيبي انته ذكي وتفتهم وتداركت الموقف بعد خلص خلينه ننام وبعد ماعيدهه وعد والله

بقى يتأفأف وضايج وانه گمزت ؏ الچربايه ونمت، شويه واجه ينام بحدي وانطاني ظهره عكس العادة ننام وجه بوجه لان احظنه بَـس صارله فتره بطل هالحركة يگول عيب ومايصلح..

دفيته بظهره ؏ الخفيف وهمست..

-رهف: تصبح ؏ خير باباتي

جاوبني وهوه منطيني ظهره..

-عميد: وانتي بخير تاج راسي

ابتسمت ونمت، گعدت الصبح وبدلت ملابسي بحجرتي وودعت ابوي وبوسته وطلعت للسايق منتظرني كالعاده بباب البيت، ركبت السيارة وگظه اليوم طبيعي بين صديقاتي ودروس وسوالف وضحك..

طلعت بالباب انتظر السايق وشفت نفس الزلمة الي گال هو صديق ابوي، من شافني ابتسم ولوحلي بأيده من بعيد وانه درت وجهي للجهة الثانيه بَـس هاي صديقتي مرام انتبهت عليه ونغزتني بيدي وحچت بصوت خادر...

-مرام: عااا رهوفه اجه الصاك صديق ابوچ شفتييي؟!؟

-اي

-مرام: اويلي يااب.. ياا يااا شوفي جاي بأتجاهنه يمكن يريد يحاچيچ

اللتفتت عليه وشفته واگف جدامي، نصيت راسي وهوه بده بالسلام ويسأل ؏ احوالي واحوال ابوي ويگول مشتاگله صارله فتره ماجايله للديوان وصاير يعتب عليّ ومن هالسوالف مال الزلم وانه منصيه وماجاوبه بَـس اهز براسي..

عيوني تدور السايق وماهوه اختفى والبنات اغلبهن حلن للبيوت والمدرسة شبه الفرغت ومرام عافتني بقيت وحدي واتراجف من البرد، فاجأني من گال...

-بردانه رهف؟

هزيت راسي بـ اي وظليت منطيته ظهري، نزع سترته ومد ايده بأتجاهي، گال بأبتسامه...

-هاچ هاي السترة لبسيهه بارده

-رهف: هااا لا عمو ماريد تسلم

-ههههه حنه مو اتفقنه ماتصيحلي عمو

-رهف(دنگت راسي): استحي

-لا لا تستحين اعتبريني صديق، اخ، قريب أي شي يعجبچ وصيحلي بأسمي ترا ازعل من وحده مثلچ تصيحلي عمو

ظليت ساكته واللوب بمكاني وهوه مستمر ماد ايده حتى اللبس الجاكيت بَـس مارضيت، اخيراً اجه السايق والزلمة ودعني وگال ديري بالچ ؏ نفسچ، ماهتميت ولا جاوبته وركبت بالسيارة وصرت ادردم ؏ السايق لان تأخر وهوه يگول ازدحام ومن هالچذب...

وصلت للبيت وسلمت ؏ بيبي انتصار وحبوبه عطيه وبوجهي رحت للغرفه بدلت وطلعت ادور ؏ ابوي لان هيچ وقت هوه يرد، سألت بيبي گالت گاعد بالهول ويه عمو عثمان يسولفون، رحت ركض ابشره اخذت درجة امتحان الفيزيا وماخذه 98 حتى يكافئني مثل كل مرة اخذ درجة عاليه بأمتحان..

بعدني بالباب اريدن ادگهه حتى يسمحولي افوت بَـس وگفني حديثهم لان ثنينهم اصواتهم خشنه وتنسمع، عمو عثمان يگول لأبوي...

-عثمان: وتالي وياك عميدان ليمته تبقى هيك

-عميد: اسكت عثمان انه جاي اموتن ؏ البطيء

-عثمان: كافي عميد انته تشتهي التعب والشگه وع طاري التعب أنَا راجع باچر لبيتنا

-عميد: لا بشرفك عثمان عليك الحسين ابقى هين

-عثمان: مستحيل اگعد بمكان وبكر وياي ماكدر ماطيقو

-عميد: لك لخاطري انه مو رفيج عمرك

-انته ؏ عيني وراسي بَـس تعبتو كثير كلما افوت من عندو يسممني بكلامو الزفر

-ماعليك منه هذا بيتي وانه استقبلك واحطنك ببطن عيني، لك خوية انته مو عندك دوام شلون ترد

-احاول اسوي نقل لجامعه بغداد بعدني هذي اول سنه الي

-عميد: معقوله خاطري لهدرجة هين عندك عثيمن

-والحمزة عميدي وهاي حلفت بالغالي انته اول اخواني وهمه يجون وراك بَـس يول تعبت

-ماعليك ماخلي يندگ بيك ؏ الاقل بَـس هالفتره عثمان انه تعبان شمالك وياي

حچاهه بصوت تعبان مليان حسرات، عثمان زفر قوي وگال...

-عثمان: خلص هاي لخاطرك لانك حبيب ؏ گلبي وماريدو لزعلك

-عميد: يا بعد روحي

دگيت الباب وسمحولي اطب، رحت لبابا وگتله ؏ درجتي طار من الفرح بَـس ضوجني من گال...

-عميد: بابا حنه مو اتفقنه تجيبين ميه؟

-رهف: باباتي بَـس خطأ واحد عندي والله الشهر الجاي اجيب ميه واحد مو بَـس ميه

-ههههههه يله حبيبتي روحي تغدي اكيد ماماكله

-لا انتظرك تاكل وياي

-لا بويه انه مالي نفس روحي انتي وخلي بيبي تصبلچ مو وحيدچ وتحرگين روحچ

-رهف: بااابااا انه كبرت واعرف اصب والله

-عميد: اي صح ياهي السمطت روحهه بالمرگة گبل اسبوعين خالتي؟

ضحكت وگمت للمطبخ اتغده، صبتلي بيبي انتصار وگعدت ؏ الميز وماعرف شبيه افكر بهالزلمة ابو شامة وليش هالگد مهتم بيه وعيونه تگصني من فوگ ليجوه مليانه نظرات اعجاب، مديت ايدي بجيبي وطلعت ورقه انطاهه ليه گبل يومين كاتب معرف الفيس مالته حتى اراسله من احتاجه، تذكرت كلام غزاله وشگيت الورقه وذبيتهه بالزباله، عندي اهم شي بهالدنيا عگال ابوي ما ينهان.

**

"هجران"
گاعده ؏ الميز المطبخ اتغده وافكر، صارلي بالضبط 33 يوم اني ببيت اهلي زعلانه وماعرف شنو نهايتي وتاليتي، گلبي ينزف وعيوني تبچي عليه وعقلي رافض فكرة ارجع ويه واحد يحب وحده ثانيه، قطعت تفكيري جورية اجتي شايله ابنهه من بطنه وتدگدگ ؏ ظهره حتى يتريع...

-جوريتي علاوي شلون صار؟

-جوري: نفسه ماعرف شبي ميثبت حليبي ببطنه رأساً يذبه

-هجران: سوده عليه زين انطي حليب قواطي مو يحبه ويتقبله

-جوري: اي بَـس عمتي متقبل تگول بعد مياخذ صدري

-هجران: مممم

رجعت للغرفه واني هم غسلت ورحت وراهه حتى اتمدد، هستوني دا انام ؏ الفراش وفاضل دگ باب غرفتي وصاح...

-فاضل: هجران.. هجران گاعده؟؟

گمت بسرعه وفتحتله الباب..

-ها فضولي؟

-فاضل: هذا بكر اجه وطببته بالاستقبال

بهتت هذا شجابه؟ وليش مانطاني خبر لجيته؟ حرت شسوي لان ماما وبابا ثنينهم طالعين يزورون وعمه سلمى رجعت قبل كم يوم وفاضل يريد يروح للدوام معناهه ماكو غيري اني اطلعله..

ركضت ؏ المراية اباوع لشكلي شگد متغيره بَـس للاحسن حتى بشرتي خف الحب منهه بسبب الماسكات الي نداوي تحطلياهن وغيرت ذبة حواجبي رجعتهن ثخان بَـس تنظيف بسيط وشعري سرحته اكثر صار مي، اتبعت نصيحة جواهر مال اهتمي لنفسچ وفعلاً حسيت روحي هواي احسن واصلاً داحس روحي حلوة..

رحت لكنتوري ولبست تراك وردي ضيگ مشتريته بالجديد وبطني برزت منه صايره طوبه، وشلت شعري ذيل حصان وطلعت گذله وبس حطيت كحلة حتى مبين حاطتهه من قبل مو علموده، رشيت عطر وطلعت..

وگفت بالباب اصيح اسم فاضل خاف موجود عيب اطلع بهيچ لبس ضيگ گدامه بَـس چنه طلع لان بَـس اجاني صوت بكر گال...

-بكر: ماهوه

جريت نفس عميق وقريت فاتحة لأم البنين تسهيل امر وهمست بكلمة "يا وهاب" اربع مرات هاي تخلي عندچ لقلقه باللسان ومتتلكئين بالكلام ويطلع منچ بسلاسه ويروح شعور الرهبة من قلبچ ويخلي الطرف المقابل يسمعلچ ويصغيلچ بكل اهتمام، طبعاً ماعرف بيهه هاي جواهر علمتنياهه تگول عميد دائماً يگولهه من تصير عنده گعده ولازم هوه اليحچي..

طبيت للاستقبال چان گاعد ومدنگ راسه وحاطه بين ايديه بَـس شافني وگف ؏ حيله وابتسم.. ما بادلته الابتسامه ماعرف شصار بيه من شفته حسيت بالاهانة والضعف وممسوحة الكرامه..

-بكر: شون كيفچ هجران؟

ماجاوبته، رحت گعدت ؏ وحده من القنفات ومنزلة راسي بالگاع، احس بعيونه عليه تراقبني وكأنه منتظرني اگول شي، اردف..

-بكر: متغيره هواي صايره احلى

اللتزمت الصمت ومجاوبت، جر نفس وكمل...

-بكر: انه ادري انتي زعلانه ومكسور خاطرچ بَـس هجران انه هم انظلمت

رفعت عيوني عليه وبدت تتجمع دموعي، حچيت بصوت ناصي..

-انظلمت؟؟

-بكر: اي، چا مو انه خاطب بت فوگ الاربع سنوات وتالي بليله وضحاهه تگلي انه ماحبك وماريدك!! وحتى مانطوني مجال استوعب السالفه ابوي ماصدگ وراح خطبچ ليه!!

-وليش وافقت؟؟ ليش ماگلت متريدني؟؟

تنهد بعمق وظل ساكت، ميل راسه وعيونه تتابعني..

-بكر: ماريد ازعلچ هجران بَسّنه زعل وهجر ترا انه تعبان

-واني بكر؟؟ واني مو تعبانه؟؟ متعبانه صارلي 33 يوم ببيت اهلي ومافكرت تسأل عليه؟!! ليش هالاهمال ليش الجفاء؟؟ اني شسويتلك؟ قصرت وياك بفد شي؟ رديتلك طلب شي يوم؟ شو كله سمعاً وطاعة وتأمر حبيبي وتأمر گلبي وانيمك بحظني واللعب بشعرك واريحك واسوي كلشي الي انته تحبه حتى بَـس تحبني وتبادلني شعوري!! تعبت نفسيتي واني عايشة بالذل ويه اهلك وعمتك تبسمر بيه واني ابلع موس واسكت لخاطرك!! لخاطر حبك بگلبي!! تأذيت وعانيت وتكسرت وتفسخ جسمي من التعب واني كل يوم انام مهدود حيلي!! ماخافو الله وگالو اني مرة حامل ولازم هم ارتاح!! كل هذا سويته لخاطرك ودست ؏ روحي وعبالك اني متعبانه؟؟؟!

صافن بوجهي متفاجأ من ردة فعلي، هاي اول مرة احچي وياه بهالطريقه واول مرة اتجرأ ويطلع مني هيچ كلام ماعرف منين اجه، رغم ماحچيت بصوت عالي لان گلبي مخنوگ وصايره غصه بصدري.. فرك وجهه وهز راسه..

-بكر: ادري بيچ تحبيني وتخافين عليّ ومدللتني بَـس هجران الگلب من يهوى مايسيطر ؏ مشاعره يعني ترديني بين يوم وليل انسى الحبيتهه بهالسهوله؟!

مسحت دموعي ودست ؏ گلبي وگلت كلام حسيته اجه سچاچين وزرفت معدتي ردت اتقيأ واني احچي..

-اتناسى بكر اني مرتك ورح اصير ام بنتك حتى نعيش ويه بعض لازم تدوس ؏ گلبك وتتحمل مثل ما اني رح اتحمل واسكت حتى ما اخرب بيتي!

ظل ساكت ومنزل عيونه، حك مؤخرة راسه وهمس..

-بكر: تردين وياي صح؟

-انته شتگول؟

-اريدچ ترّدين چا شجابني كل هالطريچ غير لخاطر تردين وياي

سكتت افكر ماعرف اروح واكمل حياتي ويه انسان اعرف گلبه ويه غيري لو ابقى وادمر حياتي ومستقبلي ومستقبل بنتي، واني متأكدة اذا جبت ياخذوهه مني لان همه هيچ عاداتهم.. واذا ابقى ببيت اهلي اكثر اخاف اثگل ؏ بابا وتسوء حالته همه ديعانون من الديون وحالته الماديه دتصير من سيئة لأسوء انوب اجي اني وازيد همهم وينكسر من يفتهم بالموضوع، هوه افتهم بيه متعاركة ويه بكر گتله سالفه تافهه ومتسوه تخبل ووگع من طوله ميتحمل يشوفني متأذيه..

گمت وطلعت من الاستقبال من دون ماردله خبر، رحت للمطبخ بچيت شويه اريد ارتاح واطلع گلبي وادوس عليه وادچچه بالسكاكين وارتاح واخلص منه، تفاجأت من سمعت صوت ماما جاي من الغرفه هاي شوكت اجوي وليش مسمعت من دخلو..

رحت عليهه وحچيتلهه.. هيه اصلاً تدري بالموضوع واني حاسه جوري حاچيتلهه بَـس مثل مذكرت طبع ماما متدخل لحدما اخذ رأيهه..

-ماما انتي شتگولين؟

سحبت نفس عميق وتقربت عليه، همست بصوت خافت خوفاً ندى تسمعهه..

-صباح: والله يا بنتي تردين تبقين هنا الف هـلا بيچ نحطچ بعيونه انتي وبنتچ من تجيبين بالسلامه، وان كان تردين ترجعين ويه رجلچ وتفتحين صفحة جديدة وياه وتحاولين تنسي اليحبهه هم الشي راجع الچ

-هجران: شلون انسي ماما شلووون وهيه گدامه اربعه وعشرين ساعه؟!

-هيه ليش مترجع لبيتهم؟

-لان كليتهه بذي قار وحياتهه ببغداد يجوز بعد اتعس من حياتي

-شلون يعني؟

-ماما هاي البنيه مهضومة رغم تملك جمال وحسن وشهادة وفلوس بَـس ماعدهه سند كفو يسندهه ويخاف عليهه ويعلمهه الصح من الغلط!!

هزت ماما براسهه وگالت بصوت ناصي..

-صباح: الله يساعدهه، وتالي انتي شنو حَ تسوين؟

-ماعرف ماما حايره

-تردين تفكرين كم يوم وترديله خبر؟

-ماما ؏ بختچ صارلي 33 يوم افكر وگلبي وعقلي وكلشي بيه تصيح وتون عليه تريده، احبه واموت عليه الليل ما انامه واني افكر بي واموت الف موته اريد بَـس اسمع صوته وارتاح

ابتسمت ماما نص ابتسامه وگالت بتصميم..

-صباح: رجعي امي لرجلچ وبيتچ وانطي فرصه يجوز يتغير والله يهدي، واتذكر جوري گالت جواهر متحبه يعني مستحيل اكو امل ينجمعون صح لو لا؟

-اي صح

-لعد هاهيه روحي امي وارتاحي، المرة الحوك تنسي اليحبهه والخلفو هم بَـس اصبري عليه لخاطر الي ببطنچ

هزيت راسي بالموافقة ورجعت لـ بكر، چان گاعد ثاني ايدي وحاطهن ؏ ركبه ويطگ بأصابعه، من شافني رفع راسه وگال..

-بكر: هااا؟؟

-هجران: ارجع وياك بَـس بشرط!

-الي هو؟

-هجران: نطلع من بيت اهلك ونعيش وحدنه

صفگ ايده بقهر وگال بغضب مكتوم..

-بكر: انه لو عندي اگعد ببيت ابن عميي!! هجران شمالچ انتي!!

-بكر ترا انتو ناس غريبين شو العالم كلهه تگول عنكم زناگين وعدكم خير!! شنو السالفه متگولي؟!

-عدنه خير صحح بَـس مو مالنه كله مال عمي سيد عباس ابوي مايملك طابوگة، عمي شال ابوي شيل ومن مات عمي ابوي نام براس عميد الدين ولعب روحه!! ياكل ويشرب ما يصرف ربع دينار بالبيت!

-هجران: وانته؟ مو تشتغل ليش ماعندك؟

-ولچ بويه منين اجيب ماعندي امكانية اشتري بيت والزهرة!!

-زين ماعندك ورث من امك؟

سألت وتندمت لان ثار وظل يعيط اجت ماما تركض تشوفنه شبينه..

-بكر: ياااا صخاااام ورثثثث ليش السگطططط عثمان عافلييي شيييي النذذذل باگني واخذ فلوسي وورث امي كله ببطنه!!!

-هجران: وليش هيچي سوه؟

-نذذذذل لانه نذذذذذل

-بَـس اني اشوف سيد عثمان كُلش حباب وماتوقع عنده هالسوالف

تگلبت عيونه وشرايين گصته برزن، تخبل عليه وماما تدخلت تهدي بي..

-صباح: سيد ؏ بختك شبيك هيچ معصب يا عيني

-بكر: عممممة گولي لبتچ تدداافع لاخوي السگط وجداااامي

ماما غمزتلي وعظت ؏ شفتهه السفليه..

-صباح: يله يا امي كافي عراك شنو ماشتاقيتو لبعض! تردون تعيدون الهوسة وترجعون تفترقون

هدأ بكر ورجع گعد ؏ القفنة ويهز رجله سريع ويبرم بشواربه، رفع عينه وگال لماما..

-بكر: عمه فهميهه ماعدي امكانيه اشتري بيت

-صباح: زين اجروا اجار مو احسن؟

-بكر: عمه مال اطلعهه بيت وحدهه ماطلعهه اخاف عليهه بنيه حديثه وحامل ماگدر اخاف

-هجران: بكر عادي نگعد بمكان قريب بيت اهلك

-بكر: ماكو كل البيوت كلش كبار بهالمنطقة وغاليه

درت وجهي ؏ ماما اترجاهه بعيوني تدخل، وتوقعتهه رح تفهم شنو البداخلي، گالت بحزم..

-صباح: ماشي سيد تبقى بالبيت بَـس تلگه حل بسالفه جواهر

-بكر: يعني شسوي مثلاً؟

-صباح: ماعرف لازم تدبر وضعك!

-بكر: واذا گتلچ من يوم زعلت هجران لهذا يومي انه ماشايف البت ولا حتى لمحة لامحهة

-صباح: هههههه سيد انته عليمن تضحك؟ ترا البنيه عايشه وياك بنفس البيت

-بكر: بالضبط، عايشين بنفس البيت وما اشوفهة لا ؏ الغده تگعد ويانه ولا ؏ العشه، ماتطلع من حجرتهه ابددد! واكثر من مرة رادت ترد لبغداد وتترك جامعتهه بَـس حبوبتي (حجية عطيه) ماترضى

-صباح: زين وبعدين شيصير؟

-بكر: شيصير عمه؟؟ بَـس فهموني البت ماشوفهه وحابسة روحهه بحجرتهه وماتطلع كله لخاطر هجران وانه ادري علاقتهن شكثر قوية ويحبن بعض.

-هجران: بكررر اني وجواهر ثنينه متعذبااات ولازم انته تلگه حل وتنساهه بأي طريقه كانت!

-بكر: والعبااس رح انساهه وروح امي بَـس انطوني مجااال شمالكم وياي!!

-صباح: صارلك شگد ولسه مانسيتهه سيد شنو سالفتك؟

زفر بقوة وضرب فخذه اقوه، نزيت من صوت اللطمة.. گام من مكانه وگال ينهي الحديث..

-بكر: انه راجع للناصريه وشوكت ما العلويه تريد ترد بَـس اتصلو بيه

بهتت ملامح وجهي واللتفتت لأمي بقهر، هزت براسهه وغمضت عيونهه بمعنى اسكتي..

-صباح: لا مترجع اليوم الدنيا صارت غروب اتعشى هنا وباچر توكل

-بكر: لا ممنون عمه ماريد اتأخر عندي شغل

-صباح: واذا گلنالك نزعل منك؟ ترضى تزعلنه؟ ترا احنه سادة ونشور!! (گالتهه بضحكة)

بادلهه الابتسامه وظل گاعد، گال وهوه رافع تك حاجب

-بكر: وحنه هم سادة ؏ كيفچ وياي عمه

ضحكت ماما وجرتني بره، گلتلي بعد لتدخلين عليه هيه راح تتفاهم وياه، رحت لغرفتي ومتت من البچي احس روحي اختنگت وقبط صدري بعد ما اگدر اجر النفس طبيعي، كلشي اظلم بعيني تمنيت روحي مشايفه جواهر ولا ملتقيه بيهه، ؏ الاقل رح تسهل عليه المهمه واكرهه لو اعاديهه لو اصلاً ماشوفهه گدامي..

طلعت للحمام اغسل وجهي انطعن واحتريت، خفت يطلعلي حب واني صارلي شگد اعالجه، فتحت باب الحمام چانت مقفوله يعني اكو احد هنا..

درت وجهي وگلت اغسل بالمطبخ بَـس توقفني صوت الي بالحمام، چان صوت بچي، اعرف هالصوت ونبره البكاء المبحوح، هاي جورية!!

عفتهه براحتهه ورجعت للغرفه، ظليت گاعده انتظرهه تطلع وصدُك شويه واجت شكلهه طبيعي بَـس سايله كحلتهه شويه، من شافتني سألت بأستغراب..

-جوري: هجور شبي وجهچ؟

تلمست وجهي وسألت..

-شبي؟

-جوري: طلعتلچ حبايتين بخدچ قبل شويه مابيچ شي؟

ركضت ؏ المراية اشوف روحي وشفت حبايتين كبار حمر وحده فوگ الثانيه، هااااي شلون بهالسررعه طلعننن اني شنو من شيي اوووف يالقهررر، ماتحملت اتخذت الحبايه وسيله حتى ابچي مرة ثانيه، گنبصت بنص الغرفه وحظنت روحي وابچي..

جوري حاوطتني بأيدهه وانصدمت گامت تبچي ويايه وتمسح ؏ راسي، بقينه ؏ هالحال ربع ساعه ثنينه نواسي بعض ببچينه وكأنما دنشكي همومنه لبعض، هيه تعرف حالتي وتعرف ضيمي بَـس اني ماعرف شبيهه ومنو مزعل جوريتي ومضوجهه..

مسحت دموعي ووخرت جوري عني، وهيه الثانيه هم مسحت دموعهه بردن بلوزهه وگامت گعدت ؏ الچربايه، گمت گعدت بصفهه ولزمت أيدهه..

-هجران: منو مزعل جوريتنه المدلله؟

ردت تبچي وغطت وجهه بتك ايد لان اني لازمة الثانيه، خليتهه تبچي شويه وتفرغ البداخلهه، فاجأتني من گالت بغصه..

-جوري: فيصل يريد يطلگني

-شنووو؟؟؟؟

سكتت ودموعهه تصب بدون صوت ولا حركة، الدهشه اخذتني وحسيت راسي انسطر هم من گد ما بچيت وهم من صدمة جوري..

-جوريه ليش؟؟ انتو مو علاقتكم حلوة ويه بعض؟؟

هزت راسهه بـ اي وحچت..

-جوري: اي علاقتنه تجنن بَـس اخر فتره كُلش ابتعد عني ويتحجج من اگوله تعال شوفني مشتاقتلك يگول عنده شغل ويطلع الف عذر وعذر بَـس حتى يتملص! حتى ابنه مجاي يشوفه وكلما حچة لو ضوجته يگول جوري رح اطلگچ حتى اخلص من ملحتچ

-هجران: بَـس مبين مال ضحك وديشاقيچ مو؟؟

-جوري: هوه صح يحچيهه هيچ بَـس ما اشك لو سواهه خصوصاً بآخر فتره وشلون صار جافي ويايه ويزعل ؏ اقل شي عبالك محمل عليه

ماتحملت كلامهه وگمت ابچي، تفاجأت من بكائي وسألتني "شبيچ؟" ماگدرت اجاوبهه حسيت اني الحسدتهه لان دائماً اتمنى بكر يحبني مثل حب فيصل لجوري بَـس الله شاهد مافد يوم حطيت عيني عليهه بالعكس اگول بالعافيه عليهه وان شالله يحبهه ويدللهه اكثر واكثر لانهه تستاهل..

عفتهه بحيرتهه وحدهه وطلعت لماما بالمطبخ بَـس مچانت موجوده وين راحت؟ رحت للصاله وسمعت صوتهه جاي من الاستقبال مبين جاي تحاچي بكر، حاولت اسمع كلامهم بَـس اكثر شي ماما التحچي وصوتهه كُلش ناصي مينسمع بَـس اسمع دندنه..

أيست افتهم شي وگعدت بالصاله انتظرهه، نص ساعه وطلعت من شافتني ابتسمت واجت عليه..

-هجران: ها ماماتي شصار؟ بشنو چنتو تحچون؟

ابتسمت وغمضت عيونهه..

-صباح: خلص ماما ان شالله انحلت حبيبتي، ووعدني ميشوف جواهر ولا يحچي وياهه حچي ميليق ويضوجچ

-هجران: وانتي صدگتي؟

-صباح: اي صدگت لان واضح عليه تعبان من دونچ

-طبعاً يتعب اذا اني شايلته بالصلوات

-صباح: ماما هجور هذا رجلچ وانتي من تسوين هيچ من حبچ اله غير

-هجران: اي والله يا ماما ابد ما امل ولا اضوج من اخدمه بالعكس اكيّف من يطلب مني شي، حتى بآخر فتره من يرجع تعبان اغسله رجليه وافركلهيا بمي وملح جوري تحچي عليه وتگول لا تذلين نفسچ اله بَـس ماما اني ماشوفهه ذله لان هوه زوجي ويرجع تعبان من الشغل غير يلگه اهتمام ومدارا

-صباح: عفيه عليچ بنيتي ولا بالعكس هاي مو ذله هاي شكبرهه عد الله خدمة الزوجه لزوجهه والعكس صحيح، والله يجازيچ خير

هزيتلهه راسي وراحت، رجعت للغرفه چانت جوري نايمه ودترضع ابنهه فدوه لهلوجه، ناعم كُلش بَـس ملامحه ما شالله كُلش حلوة خصوصاً عيونه شكبرهن طالع ؏ ابو وعمته نص وجههم عيون، بست راسه ولعبت شويه بشعره الاشگر، عليمن طلع اشگر مادري، بَـس عمه سلمى تگول فيصل بصغره هم شعره چان اشگر بَـس من كبر گلب بُني..

دخلت ندى للغرفه وجهها احمر وتلهث چانت تغسل الطارمة، لحت عليه تسويلي ماسكات وسكربات ونظفتلي جسمي كله، واكلت گلبي تريد تحطلي مكياج بَـس ماقبلت..

صاحتلي ماما حتى افرش السفرة، قبل لا ادخل للاستقبال سحبت نفس عميق وطبيت بدون ماگول شي، چان يلعب بموبايله من شافني مجرد رفع عيونه ورجع يتصفح.. يله همزين حتى منحچي وتصير مشكله وتتعقد الامور اكثر..

جبت الاكل وتوسلت بماما وبابا يجون ياكلون ويانه ماعرف شبيه رغم اشتياقي بَـس بعدني خايفه منه، اجو فاضل وحيدر هم وگعدنه حول السفره، ماما شاوية دجاجة وزلاطه ومن هالسوالف..

ماگدرت آكُل ماعرف شبيه نفسي تلعب مع العلم خلصت فتره نساتي وصرت زينه وآكُل طبيعي بَـس هسه رجعت، من شافني ما آكُل گال..

-بكر: شمالچ ما تاكلين؟

-ماشتهي

-بكر: چا شون البت تتغذه؟؟

-هجران: ماشتهي بكر واذا آكُل اتقيأ

زفر بعصبيه وظل يستغفر وينفس، اخير شي ختمهه باوع لماما وگال..

-بكر: اكيد صارلهه شهر ما تاكل صح؟؟

-صباح: هاي هجران من يوم يومهه متاكُل

-بكر: چا ماتشوفيهه شضعفاتهه!! وانوب هسّ ضعفانه بالزايد شنيي اليشوفچ يگول من مجاعة افريقيا!!

حزت بخاطري وبابا رفع راسه مصدوم من تعليقه، استغفر بهمس وظل ساكت واني گمت من السفره، جر ايدي وهمس..

-بكر: اگعدي

-هجران: هدني اريد اروح لخواتي

نترت ايدي منه وگمت، رحت گبل للغرفه وكالعاده بچيت لحدما طلعت عيوني وراسي انفخ، يعني لهدرجة سودة وضعيفه الي يشبهني بمجاعه افريقيا!! سوده عليه خو همه مو ذنبهم صاروا هيچ من الفقر، بَـس اني يا فقر هذا جسمي شسوي بروحي املخ نفسي وارتااح!! اووف هجران مستحيل يمر عليچ يوم بدون متندگرين وينزرف گلبچ بكلمه..

دخلن جوري وندى وسألني ليش ابچي، مسحت دموعي وگلتلهن لان رح ارجع باچر ورح اشتاقلهن..

-جوري: اني هم باچر ارجع وياچ گلتله لفيصل گال رجعي ويه بكر لان هوه ببغداد وميكدر يجي

-هجران: صدُك والله؟ اييي واخيراً رجعي ؏ الاقل افضفضلچ واعتق جواهر من نكدي ونگي

ضحكت وگالت بخبث..

-جوري: اهووو يعني ناويه ترجعين لنگچ ههههه

-هوه بيدي يا جوري شسوي اني، هاي حياتي والله كاتبلي هيچ يصير بيه واتمرمر طول عمري ومارتاح

-ندى: اسم الله عليچ شبيچ!! ليش هيچي تحچين، لا ان شالله تعيشين احلى عيشه وتجي بنوتچ وتنور حياتچ انتي بَـس گولي يارب

تنهدت بعمق وهزيت راسي..

-يارب

گامت ندى تساعدني اللملم غراضي واغراض جوري وشغلات ابنهه، كملت كلشي وتمددت اريد انام واجتني رساله من بكر كاتب بيهه..

💬"هجران تعالي اريد احاچيچ"

ردت اغلس بَـس جوري گالت روحي شوفي شيريد، دگيت الباب قبل لا ادخل للاستقبال چان نازع دشداشته وباقي بالفانيله الداخليه والشورت، تقدم عليه وجرني عليه گعدني بحظنه، بقيت منزلة راسي ومارفعته، يعني صاحلي يريد شي مني مو سالفه مشتاقلي ويريد يسولف ويايه..

-بكر: اشتاگيت انه

-هجران: من ايدك

-بكر: بسنه زعل هجران شني مامليتي واشتاگيتيلي؟

ردت اگوله مو بَـس مشتاقتلك ميته عليك واتمنى ادفن راسي بصدرك واستنشق عطرك، مشتاقه لكل شي بيك حتى لعصبيتك تخيل شگد احبك وذايبه بيك بَـس اكتفيت بالسكوت، تنهد وجر وجهي طبع قُبلة ؏ خدي، ودار وجهي من الجهة الثانيه وسوه نفس الشي بالخد الثاني، همس..

-بكر: عاينيلي

عيوني لا ارادي صارت بعيونه، تلمس وجناتي الضعيفة السمرة وگرصهن، گال بأبتسامة..

-انه مو قصدي اعيب عليچ گبل شوي، والعباس خايف عليچ وع الطفله اريدهه تجي بكامل عافيتهه

-هجران: الطفله متتأثر اني الي اتأثر

-اي چا ليش تردين تأذين روحچ، هجران وعديني تاكلين وتحاولين تسمنين

-هجران: بكر دا آكُل والله بَـس هذا جسمي ومراح يتغير!

-ميخالف لا يتغير بَـس اكلي زين حبيبتي؟

هزيتله براسي وهوه ابتسملي، جر راسي وحطه ؏ صدره ويمسد بشعري، گال بصوت ناصي..

-هجران تدرين ليش تزوجتچ؟

رفعت راسي اباوعله وسألت بأهتمام..

-ليش؟

-لان حبيت حنيتچ عليّ، انه مانكر من ابوي خطبچ من دون علمي گلبت الدنيا وتعاركت عركة وصلت للستار بَـس اخواني حاچوني وگالو انطي لنفسك فرصه، تعرفت عليچ وحسيتچ ام اكثر من زوجة وانه فاگد امي وانه صغير، اتذكر امي چانت حنينه كللش وروحهه معلگه بيه وبأخوي عثمان بَـس راحت وحنه فروخ انه سبع سنوات وعثمان عمره خمسه ونص..

تزوج ابوي ام احمد بسرعه وره موتت امي وماطولت وياه هم چم سنه وودعت الله يرحمهه، تالي تزوج سلمى اوووف من سلمى راوتني نجووم الظهر!! چانت جاسيه وتعاملني مثل الخادم الهه، رغم ابوي يحبني اكثر واحد من خواني بَـس هم يطبل وراهه ويمشي بچلامهه، اعاين لفيصل وغزاله اشوف شلون تدللهم وتخاف عليهم وانه عايش بالضيم! اكثر من مرة تخليني اوديهه لبيت اختهه ببغداد الي هوه بيت حجي اسماعيل..

سكت وماكمل شلون الي بلع غصته.. چان عندي فضول اعرف شلون حب جواهر وتعلق بيهه، صح مشتعله نار بگلبي بَـس ميخالف لازم اتحمل واسمع..

-هجران: كمل

-بكر: لا خلص اريدن انام

-كمل بكر شصار بعدين؟

جر حسره اجت طعنه بگلبي قبل گلبه، حچة بصوت ناصي..

-بكر: صرت اروح وارد لبيت حجي اسماعيل مثل السايق لمرت ابوي واوقات حتى خواني غيث واحمد يجون ويانه، بالبدايه ما اللتقيت بجواهر وشهد وماعرفتهن اله من غزاله صاحتلهن يسلمن علينه وره چم زيارة جيناهم، عجبتني جواهر كللش وتسودنت عليهه، تگربت منهه وهيه ارتاحتلي وقوت علاقتهه وياي.. رسمت ببالي فكره وصممت ؏ تنفيذهه..

حاچيت ابوي وگتله يخطبهه ليه اخاف تروح من ايدي، بنيه بجمالهه ما تظل تنلگف بساع.. حجي اسماعيل گال هيه الك بَـس انطرهه تكبر وماريدك تفتح موضوع الخطبه وياهه اله لمن تكمل سادي اعدادي، صح عانيت وتعبت بَـس ميهم اهم شي نهايتهه الي..

وصار الي صار ونكرتني بعد مرور سنييين ؏ حبي الهه، گلبي احترگ باليوم الگالتلي هيه ماتحبني وتشوفني مجرد صديق لا اكثر، بيومهه تمنيت املخهه واثرد بدمهه بَـس الوگفني عميد وعاركني عركة چبيره لدرجة اول مرة اتصارع وياه ونتعارك هيچ..

طلعت من البيت وجواهر رادت ترجع لبغداد وماعرف ليش ردت وعاشت عدنه وكملت مرحله ثانيه بَـس بهالفتره لو اللمحهة لمحة باليوم لو اصلاً ما اشوفهه.. تهرب مني كأني وحش ويريد يفترسهه وانه ما اچذب عليچ اكثر من مرة اجتني افكار شيطانيه خصوصاً وانه اشوف لبسهه وعنايتهه لروحهه وبشعرهه وعطرهه يدوخ اكبر واحد دمرتني واخذت من عافيتي..

وره فتره قليله تغيرت وعرضت هدومهه وگامت تظفر شعرهه الملفلف بعدما چانت دائماً تفتحه، اعتزلت بحجرتهه ماتطلع ولا تطل علينه الا ما نَدر..

چان يحچي وعيونه بالگاع، رفع راسه باوع لوجهي ومسح دموعي بأبهامه، همس...

-بكر: وانتي ذهب صافي تخافين اذا اتأخر وتانيني لحدما ارد وتدلليني وتحبيني رغم عيوبي، انه مقدر كل التسوي ليه والله يجازيچ خير

صح ختم كلامه بشي حلو بعدما عذبني ونزع گلبي من صدري بَـس تمنيت كل هالحچي يگوله عليه ويحچي بيه ويهيم بيه بهالطريقه، تمنيته يگولي حبيتچ الچ مو حنيتچ، ردته يگولي حبيت گلبچ وكلشي بيچ مو دلالچ وانتظارچ وتحملچ، حرك راسه متسائل من جمودي..

-بكر: شمالچ سكتي؟

-هجران: بكر انته تحبني؟

صفن بوجهي ثواني، حسيته حار بالسؤال وبدت الغصه تتكون ببلعومي وع ساعه انفجر هنا.. عيوني بعيونه وواضح التيه والحيرة بيهن، اخيراً هز راسه وگال بأبتسامه..

-احبچ

-ماكو داعي تچذب تگدر تحچي الصراحة

گوة گلت هالجمله والدموع ترگص بعيوني وگوة لازمتهن، ماگدرت اقاوم ووگعت اول دمعه ؏ جفن عيني.. مسحهه بأبهامه وباسني من شفايفي خفيف وهمس وهوه يفرك خشمه بخشمي..

-بكر: احبچ اكيد، انتي مريتي وام بنيتي الغاليه

ارتاحيت نوعاً ما بَـس لسه مامقتنعه بالكامل واسم جواهر احسه يرگع بگلبي قبل عقلي، تسائلت بيني وبين نفسي لو چان متزوج جواهر هم چان عاملهه مثلي لو يختلف؟ بعد وجهه عني شويه وگال وعيونه ؏ شفايفي..

-افقد ؏ لون شفايفچ وعلي

-ابتسمت: هذا مو لونهن الحقيقي هاي حمرة

-ادري بَـس والعباس تلوگلچ وتنطيچ شكل خاص ومميز

بقيت ؏ ابتسامتي ونزلت راسي بخجل، رفع حنچي بأيده ورجع يبوسني بكل وجهي، حظنته من رقبته وبادلته لثواني وابتعدت عنه ظليت حاظنته من رقبته واستنشق عطره اليدوخني، حچة بصوت ناصي...

-عندي الچ مفاجأة

رفعت راسي وتسائلت...

-هجران: شنو هيه؟

ضيگ عينه وعض ؏ شفته السفليه، وهمس...

-بكر: سجلتچ جامعه

-صدُك تحچي؟؟؟؟

-بكر: هههه اي شمالچ؟

-شلون؟؟ وشوكت؟؟ ترا صارله هواي من بادي الدوام!!

-بكر: اي عادي انه رتبتهه وسجلتلچ ويه جماعه دور الثالث

-انته مو گلت متقبل اداوم جامعه؟

-بكر: اي صح بَـس ردت افرحچ بشي وانه ادري بيچ شاطره فَـہ قدمتلچ

-سألت بحماس: وطلع قبولي؟؟

-اي تربيه عربي

-هجران: صدُك والله؟؟؟

-اي وترا قسمچ صعب ويرادله قرايه بتركيز

-ايي كُلش صعب ادري بي

حظنته من رگبته حيل وهوه يضحك ومبادلني الحظن، حسيت كل الزعل راح اخيراً رح ارجع ادرس واحصل شهادة واحقق حلمي، حتى لو مو نفس الاختصاص الچنت اتمناه بَـس هم خوش قسم وحلو..

اللعب بشعره من وره واحس بي يلعب بشعري ويخصله بأصابع ايده، شم شعري وگال بضحكة وهوه لسه حاظني..

-بكر: بالمناسبه شعرچ همات كللش حلو

ابتعدت عنه وگلت بجدية..

-هجران: بَـس لو چان اشگر

طفت عيونه وبلع ريگه، عباله مراح اربط من گلي اريد شعرچ اشگر وتسوي كيرلي، يريد ينسخني ويسويني نفس حبيبة گلبه، گمت من حظنه وردت اطلع صاح..

-وين رايحة؟

-انام

-وليش ماتنامين يمي؟

-ماگدر تعبانه

ماحچة شي بَـس مبين عليه ضاج، رجعت للغرفه وتمددت بفراشي.. واكيد مانمت فوراً لازم اخذلي نوبة بكاء واندب حظي العاثر.. ماعرف شوكت غفيت بَـس صحيت ؏ صوت ماما تگعدني وتگول..

-صباح: هجور بنيتي يله حبيبتي رجلچ يگول هم ياله تطلعون

-هجران: ساعه بيش هسة؟

-صباح: بالخمسة ونص الصبح

هزيتلهه براسي ورحت بوجهي للحمام سبحت بسرعه وطلعت بالروب لان ملابسي ماخذتهن اخاف يتبللن، چانت جوري دتتمكيج گبال المراية هيه هم رح ترجع ويايه..

بدلت ملابسي وابد ماعندي حماس للرجعه لان رح ارجع للمرار والشغل، بَـس اوووف ويه گلبي الاعوج المتعلق بواحد ومدا يگدر يبتعد عنه!!

ودعت اهلي وشلت جنطه جوريه ويايه لان هيه شايله علاوي وطلعنه، بابا وصاني ؏ نفسي وماما هم گالت ديري بالچ ؏ روحچ ولا تتعبين هواي..

دخلت للسيارة وكعدت ليگدام وجوريه ورايه، لابسات عبايه ؏ الراس لان ميصير نكون قريبين ؏ الامام وملابسات عبي، بكر سألنه اذا نريد نزور واني گتله قبل يومين زرنه ومابيه حيل..

الطريق چان ممل وطويل، گضيتهه انام واگعد وبكر عالگ اغنيه لياس خضر ويستمع الهه.. نفسي گامت تلعب وحطيت راسي بين رجليه اريد تروح مني الدوخة، حسيت ؏ واحد يمسد بظهري، رفعت راسي چان بكر يباوعلي وعيونه تتسائل شبيه، فرحت لان حسيت بي خايف عليه، حچيت بتعب...

-هجران: مابيه شي بَـس شويه تعبت

-بكر: يله ما بقه شي وصلنه

وفعلاً اقل الساعه ووصلنه، باوعت ؏ البيت من بره اليشوفه يگول اهله عايشين احلى عيشه، مليانه ترف ولعب وراحة وحُب، ميدرون كلمن عنده هم اكبر منه والغيظ والضغينة البيناتهم شيء لا يوصف، حتى عمو خليل باارد لدرجة غريبه وحتى لو اسم الله صار شي لواحد من ولده مراح يهتم ولا تنهزله شعره..

الانسان الوحيد الي فعلاً حسيت عنده خوف وحرص ويرجف ؏ كل نفر بالبيت ويخاف احد يزعل لو يضوج ويداري الصغير والچبير، الولد والبنيه وميفرق بين احد هوه عميد الدين، انسان كامل والكامل الله هيچ حنية وعطف ورزانه عنده مو طبيعي الله يحفظه ويطول بعمره ويديمه لبنته..

نزلنه من السيارة وسبحان الله ابن الحلال بذكره يبين صار بوجهنه عميد الدين ديبرك سيارته السوده العاليه قريب البيت، تابعنا بعيوننه وهوه ينزل منهه ولابس اللبس العربي مبين چان بگعده لو رايح خطار..

تقدم علينه والابتسامه مرسومة ؏ وجهه البشوش..

-عميد: السلام عليكم

-كلنه گلنه: وعليكم السلام

راح بكر عليه وصافحه وباسه بوستين من كل جهه، ودار عيونه يباوعلنه بَـس سرعان ما رجع نزلهن هذي عادته ومنتبهه عليه ميباوع بعيون أي وحدة من بيناتنه لهيچ مننحرج واحنه نحچي وياه لان يحترم المرة واكثر من مرة بكر يگول هذا طبعه ومستحيل يحط عينه بعين بنيه بَـس غزاله لان يعتبرهه مثل بنته..

-عميد: نوّر البيت بالعلويات الحمد لله ؏ السلامة بويه

-هجران: الله يسلمك سيد رحم الله والديك

-جوري: منور بوجودك سيد

-عميد: الله يعزكم

رفع عيونه يباوع لعلاوي وگال بأبتسامه واسعه برزت سنونه..

-عميد: اللهم صلِّ على محمد وال محمد منور سيد علي الله يحفظه ويتربه بعزكم ان شالله ويكون من الصالحين

-جوري: امين الله يحفظك سيد

مد ايده حتى ياخذه يشيله وجوري انطته، ظل يباوعله واني وجوري صافنات عليه، يباوعله بعيون ملهوفة ومليانه حنية.. تركنه علي بأيده ورحنه نجيب شغلاتنه من جنطة السيارة.. اجه بكر وشال جنطتي واني شلت مال جوري، وهيه راحت تاخذ علي من عميد..

گال عميد "تفضلو" واشر ؏ البيت واحنه بدورنه دخلنه جوه، طبوا الزلم قبلنه اخذتهم السوالف واني اناحط بجنطه جوري وهاي جوري لسه متگدر تمشي عدل مع العلم حيصيرلهه اكثر من شهرين من جايبة بَـس تگول بآخر فتره وره عرس غزوان كُلش جاي تتوجع، ضحكت بيني وبين نفسي گلت هيه ذبت لحم وشلون چانت طالعه اكيد النسوان حسدنهه، وگفني صوتهه..

-جوري: يااا هجراااان شوفي عميد الدين منگط علاوي

-صدُك؟؟ هاي شوكت شو ماشفنا؟؟

-جوري: اي يمكن من رحنه نجيب جنطاتنه، چؤؤ شوفي شلون فشله شگد منطي

طلعت ورقة من گماطه (مية دولار) وحطتهه بجنطتهه، دخلنه للبيت چان فارغ ومن سألنه گالو رايحين للنجف يزورون ومناك يرحون للمقبرة لأمواتهم..

-جوري: اييي احسن مابيه حيل اشوف فتوح ونرجس وعمتي

-هجران: حرام عليچ عمتچ زينه وياچ

-جوري: دختروووخ لو تشوفيهه شلون تعاملني وتسخرني عبالك خدامتهه

-ههههه بهاي صدقتي، اويلي ؏ حظنه ماكو وحده بينه مرتاحة

هزت راسهه بقله حيلة وكل وحده راحت لغرفتهه، رحت للحمام وغسلت ونزعت ملابسي.. اووف تعبانه فد مرة، باوعت ؏ الساعه چانت قريب الوحده الظهر يعني البنات بالجامعه مو هنا..

ظليت بفراشي مدده اطرافي بتعب وماتحرك اريد تخف الدوخة، ادري هيچ دايخة من وره الجوع لان ماتريگت، شويه واجه بكر هم نزع ملابسه وراح للحمام اسمع صوت الدوش يعني جاي يسبح..

گمت وحظرتله گلبيه نيليه واختاريتله عطر يرش منه، طلع وبدل ملابسه وعيونه عليه، ابتسم وگال..

-نورتي الحجرة

-ابتسمت بحياء: منورة بيك

بطني گامت تطلع اصوات من الجوع واحس رح اغيب عن الوعي، گلت بتعب..

-هجران: بكر اني ميته من الجوع

-هسّ عميدي جاب اكل من بره

-عززا صدُك تحچي!! شلون فشششله ليش هيچ؟؟!

-شنو ليش هيچ؟

-؏ الاقل چان گتله البنات يطبخن يعني بَـس كمجامله

-اي خو گلتله بَـس هو گال اكيد انتن تعبانات فَـہ يجيب احسن

هزيتله براسي وگمت لبست جبة اسلامية وشال وردت انزل وبكر صاح..

-وين رايحة؟

-انزل جوة اجيب مي عطشانه

-بكر: زين انه شوي واللحگچ حتى نتغده

-ماشي

عفته گاعد بالغرفه ورحت لجوري وصحتهه حتى نتغده، ريحة الاكل تعط بالبيت كله، واصل الاكل ومبين هستوه لان بعده كُلش حار، جايب كباب وتكة وعلبه بيتزا هاي اكيد لشهد لان متاكُل لحم، حظرت الاكل وگلت ناكُل ؏ الميز بالمطبخ ماطولنه قليلين..

رتبت كلشي وطلعت الخضره من الثلاجة والمي واللبن، واني ملتهية اجيب المواعين دخل عثمان للمطبخ، نز من شافني صاح بخرعة...

-عثمان: ول خفتو

-هجران: اسفه

مد ايده للطاوله واخذ خياره، ابتسم خفيف وگال..

-عثمان: شوكت جيتو؟

-هستونه دخلنه مصارلنه ساعه

-عثمان: نورتو

-تسلم بنوركم

گعد ؏ الميز واني كملت شغلي واحسه يباوعلي، استحيت من نظراته هذا شبي صافن؟ لمحته بطرف عيني چانت عيونه ؏ ايدي لان مشلهه رداني يباااوو اتخزيييت، نزلت ردن العبايه مالتي وهوه نزل راسه، حچة وهوه لسه منزل راسه..

-ايديكي لسه توجعِك؟

سألته بأستغراب

-شبيهه ايدي؟

-عثمان: هذيك المرة من حرگتها بالغلط

-هاااا لا لا صرت زينه وحتى اثر ما صار الحمد لله

-الحمد لله

ارتاحيت معناهه چان يدور ؏ اثر الحرق، اجت جوري وجفلت بمكانهه من شافت عثمان ظلت صافنه وتباوعلي، ضحكت ؏ منظرهه وهوه هم حرك راسه وگال بأبتسامه بشوشه..

-عثمان: سلااام أَنا عثمان الابن المنبوذ تشرفت بيكي

-هجران: هههه هذي اختي جورية وتصير مرت فيصل انتو مملتقين من قبل صح؟؟

-عثمان: صحح وتشرفنه اخت جورية شلونكِ؟

-جوري: احم اءء زينه.. شسمه هجران تعالي احاچيچ

رحت وراهه بالصاله وبعدهه مدهوشة..

-جوري: منوووو هذاااا؟؟؟!!

-يااا هاي شبيچ مو گلچ اسمه عثمان!

-جوري: منووو عثمااان؟!!

-ولچ شبيچن تتخبلن من تسمعن اسمه هاي شكوو!! هذا عثمان اخو فيصل وبكرر

-جوري: وشدعوة هالگد حلوو

-ههههه خرب بيچ شنو هاي ولچ

-جوري: احوووو عود اني گلت عميد الدين احلى واحد بالعشيره منين طلعلنه هذا الصاك صفحححح!!!

-ولچ صوتچ لتفضحييينه!!!

قطع حديثنه صوت طبگة باب غرفة عميد الدين، عزاا انفضحنننه بَـس لا سمعنه.. تعده من يمنه وما گال شي، جوري سحبتني من ايدي وهمست..

-جوري: هجران اخاف سمعنه؟

-عوبة مو بيدچ اهمداچ

غميتهه وصعدت فوگ اشوف بكر وينه، چان متمدد وايده ؏ عيونه، تقربت عليه وهمست..

-بكر گاعد؟

ماجاوبني ونفسه ثگيل واضح رايح بسابع نومة، طفيت الضوة وطلعت من الغرفه خلي يرتاح.. نزلت جوة وشفت جوري گاعده بالصاله، صحتلهه ودخلنه للمطبخ چانو عميد وعثمان يسولفون، سألو ؏ بكر گلتلهم نايم فَـہ بدينه نآكُل..

استحيت گاعدات وياهم بَـس حسيت فشله اشيل مواعيننه ونگعد بالصاله وحدنه فَـہ سكتت وبس استمعلهم يحچون..

-عثمان: ضلعي شصار وياك؟

-عميد: ماصار نفس الشي

-خاب صدك كذب شبيك متگولي

-عميد: بسك عثمان الدنيا طالعه من عيني

سكتو من سمعنه صوت باب الحوش يندگ، عثمان گال..

-عثمان: اكيد اجو التوأم

-جوري: يا توأم؟

گام عميد من مكانه وگال وهوه يطلع..

-عميد: جواهر وشهد..

حمدت ربي ان بكر نايم وماتغده ويانه همزين مراح يلتقي بجواهر، دخلن من الباب وخشم وخدود جواهر حمر عبالك باچية.. گمنه اني وجوري نسلم عليهن خطيه شگد رحبن بينه وشهد تخبلت تريد تشوف علي بَـس جوري گلتلهه گوة نيمته..

-هجران بهمس: جواهر شنو باچيه؟

ضحكت وگالت..

-جواهر: لاا شكو ابچي بَـس خشمي من ابرد ينگلب احمر هوه وخدودي

گالت شهد وهيه گالبه وجهها..

-شهد: حاته حتى من تبرد

ضحكنه ؏ حچيهه وعثمان گال..

-عثمان: بنوات يله تعالو اكلو برد الاكل يولن

جواهر باوعتلي يمكن عبالهه بكر هم رح ياكل ويانه، گلت بسرعه..

-هجران: اي بنات تعالن اكلن ويانه، تصدگن بكر نايم وميقبل يگعد گال يتغده بعدين

هزت براسهه وسحبت كرسي وشهد هم گعدت، كلنه نحچي ونسولف عدى عميد الدين وعثمان هم بالقطارة يحچي، ثنينهم هادئين وواضح ميحبون يحچون هواي..

-شهد: عاااا عميييد جايبلي بيتزااا شووكراً!!!!

ابتسملهه وجواهر كفختهه ؏ راسهه..

-جواهر: خفه لهلحلگ عدلي لا اعدله بطريقتيي

-شهد: هااا هااا هااا اشتغلت غيرتچ

-جواهر: انچبي شهدد

-شهد بغمزة: ندري بيچ تغارين عاتي عاتي

جواهر صارت حمرة وعميد غلس او جوز مسمع، گرصتهه من زندهه قوي ونترت بين سنونهه...

-جواهر: كلبهه شنو قصدچ من هالسوالف

علت نبرة صوت شهد وگالت وهيه تحرك حوجابهه..

-ديلااا يابه متغارين ؏ عميد الدين زيين ارتاحيتييي؟؟

عزا انصدمت هاي شبيهه وليش هيچي دتحچي وتخجل اختهه، گامت جواهر من السفره وگوة لازمة روحهه وعميد وعثمان ماگالو هسس وجوري صفنت وشهد هم گامت من السفره لا واضح الجو كُلش متوتر هنا...

تفرق الكل لمكان وجوري صعدت لعلاوي خافت عليه يگعد، رحت اشوف بيبي عطيه بغرفتهه خاف گعدت لان گالو بقت هنا مگدرت تروح چانت بعدهه نايمة، رحت للمطبخ ارتبه واغسل المواعين، وگفت ؏ السينك اخض بالگلاصات ودرت وجهي حتى ارجعهن بالكاونتر وجفلت من شفته واگف بالباب، من شافني اخترعت ابتسم وگال..

-اسف مانويت اخوفچ

-احم هااا لا عادي عادي

ارتبكت وايدي گامت ترجف ماعرف شبيه، تقرب ؏ الطباخ صارت مسافة قليله بيناتنه واخذ القوري حط بي مي يريد يسوي چاي، من التوتر حتى ماگتله عوفه اني اسوي بدالك لزگت بالسينك واجلف بالماعين، تحمحم ودار وجهه عليه دا احس بي لان عطره يكفخ بالخشم كلما يتحرك، مبين يريد يحچي شي بَـس متردد لو يجوز خايف! بَـس ليش خايف؟؟ شنو بباله؟؟ گلبي يرگع وانفاسي اضطربت دخيلك يا ربي هوه الرجال زين بَـس ليش من اوگف وياه وحدنه اتخيل شغلات تخوف، ساحت روحي من همس بصوت كُلش ناصي...

-عميد الدين: علوية اگدر احاچيچ بموضوع واتمنى ماتفهميني غلط..

يتبع☘️...

♛ ♛ ♛ ♛ ♛ ♛ ♛ ♛ ♛ ♛
هاا شبابات شلونكم🙂❤️ اريد انوه ؏ شغله غيث يصير اخو بكر والباقين وعنده اخ اسمه احمد من نفس الام هواي داخو وگالو منو هذا مع العلم اكثر من مرة نبهت ؏ هالشي.
+
البارت كُلش طويل مگدرت اقسمه، لتنسون التصويت والتعليقات الحلوة بيبايات💋.