اسيرة قدرك

البارت 30

اسيرة_قدرك..
بقلمي رسل..
البارت الثلاثون..
واتباد rasolaa7

خسرت هواي وفهمت هواي
وعرفت الي طعن بكفاي
نفسه الي ضحك وياي..

-اجه علينا من بعد هذا الاسبوع.. حضروا
روحكم نطلع محد يضل هنا بعد..

-عمتي انتفضت.. شصاير النوب يمه وين
نروح..

-للشمال اخذكم فترة لما تصفى الاوضاع
و نشوف حل الهالمشكلة..

-هنا عمتي اصرت ما تروح و هو تعبان
توسل بيها بس هي قفلت كالت اني اخذ
بناتي و اروح يم اخوي للنجف وهم اشكي
همي للامام و هم اروح لابوك و اشكيله
على الصار..

-هو كعد بمستواها وباس راسها .. يمه فدوه اروحلج لا تخلون بالي يمكم هي فترة بس خلي تهدأ الامور امشي وياي..

-هي ما قبلت وجانت مصرة على قرارها
كام منها و القهر و التعب مبين على ملامحه
كسرت كلبه برفضها هواي توسل بيها وهي معانده اتقرب يمي..

-حضري غراضج و غراض بناتج ولا تأخريني
و كلي لام مهاب تحضر نفسها يطلعون ويانا..

-صار تدلل حجيتها و اريد اروح و اسمع
مهاب.. خالي ما اكدر هنا شغلي و القضايا
الي لازمها ما اكدر اعوفها اني..

-هو مهاب محامي و شاطر كلش بشغله
ولازم قضايا لهذا رفض بس اسر قاطعه
وصاح بي..

-كلمة زايدة ما اريد تعبتوني والله المن اصير
انتم شنو ما عدكم احساس ما تكولون هذا
ليل و نهار يركض بس حتى يخلصنا من هالسالفة لعبة عبالكم هي شوكت تفهمون من
ينخطف واحد منكم لو من تطلعون من الباب
و يكتلونكم بمكانكم انت بالذات تروح وياي
ما ابقيك هنا وشغلك تأجله وخلي واحد بعد
يفتح حلكه ما يردون هم انتم منو الماخذكم سفرة
يابه خطر عليكم هنا ما امن عليكم لخاطر
الله واحد منكم يفهم عليه..

-اسر صار اعصاب و كلها سكتت مهاب
سكته كاله اروح وياك بس على كيفك
حركوا اعصابه وهو خطيه يفكر بيهم وكل
همه شلون يامن عليهم و يرتاح..

-بدينا نحضر ارواحنا نطلع اسر نقل كل اثاث
البيت لبيت ام مهاب كال بعد رجعه هنا ما نرجع
ثاني يوم اجه ايهم على عمتي و البنات حتى
ياخذهم للنجف عمتي شابكه اسر و تبجي
وهو مقهور عليها احس الدمعة تفتر بعينه
وهو يودع بيهم سماح انتهت من البجي مخليه
بناني على كلبها و تبوس بيهن عمتي ما قبلت
تجي ويانا..

-شعور حزين ما ينوصف عائلة بين ليله ويوم
اتطشرت عمتي والبنات راحوا للنجف و حماي
سافر برا و احنا راح نروح بمكان ثاني عنهم
كله بسبب حقد و جشع البشر وصلنا
لهاي المواصيل..

-كملت كل شيء البيت فرغ وصار مثل
المدينة الي يهجرونها سكانها طلعنا و اني
بعد ما تحملت بجيت اختنكت احس طاقتي
خلصت من تزوجت اسر و لحد الايام الي قبل
هاي الحادثة هواي مرت عليه ايام صعبة
نكسرت
وتأذيت
و جعت
و تعذبت
و نضربت بس احساسي هسه غير عن كل
ذيج الايام احس هاي الايام اصعب بهواي
اسر اذا طلع للباب كلبي ياخذه ويا
وابقى بخوف الى ان يرجع ما عدا التعب
النفسي والقلق..

-هو من شافني بجيت حجه بحنيه.. شبيج
ريا حبيبتي بس اصبروا عليه ان شاء الله فترة
و تعدي و ارجعكم..

-مسحت ادموعي.. اريد اروح اسلم على اهلي
اريد اشوفهم قبل لا نروح..

-ميخالف نروح عليهم تدللين..

-اخذني لبيت اهلي ودعتهم و ماما و فارس
تخبلوا عليه فارس احس العبره خانكته
كوه يحجي كال ما تروحين تبقين هنا
يروح يصير عليكم شيء ما مضحي بيج اني
ريا ابقي وماما هم ما قبلت اروح..

-ما كدرت ابقى و اعوفه فهمت ماما انو اسر
منتهي على ساعة يوكع  تعبان و مخنوك
وحاير بينا ما اكدر اتركه ينتهي ولازم اوكف
ويا بهاي المحنة لان نكسر من اهله و نخذل
ما اكدر اكملها عليه..

-سلمنا عليهم وقبل لا نطلع نورهان سألتني
على مهاب و كالت طمنيني خاف بي شيء
وما يحجي اليه زمخت بيها..

-مهاب مهاب نورهان اتركي هالشيء
طلعي من بالج ميفيدوج شوفي اني كبالج
شلون عشت و صدكي لو يرجع بيه الزمن
و يخيروني اتزوج اسر جان رفضت..

-ريا احنا نختلف احنا نحب بعض مو مثلكم
لا تقارنين..

-تعبت منها سكتت لو شكد احجي مستحيل
تفهمني لان هي ما عاشت و لا شافت الي
شفته اني والله ما اكره مهاب و لا حاقده عليه
بس بسببهم صارت عندي ردة فعل لهذا اني متخوفه من سالفة اختي تصير اله وهاي ما تفهم..

-طلعنا و فارس يوصي و يحلف باسر يدير باله
عليه كاله امانه ريا يمك..

-هو كالهم بطن عيني و ان شاء الله بس تصير
فرصه هم اجيبها تشوفكم..

-توجهنا للشمال بروح حزينه محد اله نفس
بشيء وصلنا للبيت الي مأجره اسر يكول اسبوع
كامل اني بس ادور ما ينطون بيت هنا بسهولة
بلد تقسم بسبب الما يخافون الله زرعوا بينا
الحقد تجاه بعض بحيث صار السني ما يواطن
الشيعي و الكردي ما ييريد لا ذول و لا ذول
سنين مرت علينا وصفها صعب بحيث الواحد
يتمنى بس تعدي على خير
وما كادر يأجر الا بمساعدة صديقة و على
مسؤوليته..

-دخلنا للبيت واحس كلبي نقبض باوعت
لاسر بنظرة حزن و ندم وهو نظراته جانت
قهر..

-فرشت فراش بالكاع و خليت بناتي لان نايمات
و تعبن من الطريق هو اجه مدد..

-فركي راسي حبيبتي راح ينفجر..

-جاوبته بكل برود ما اعرف ليش كلما تتعب
نفسيتي انكلب على اسر..

-اذا انت راسك يوجعك اني وجع روحي اكثر
تعبانه اني اسر ما اتحمل بعد متندمه على كل
يوم ضاع من عمري ما ضكت طعم الراحة
وياك اسر سنين من عمري خلصتهن
بقلق وخوف جنت احجي و ابجي وهو صافن
عليه يسمع مني قسيت ويا بالكلام و ردي
اله جان مو بوكته بس والله اني تعبت الي
عشته وياهم خله عندي حالة نفسيه و احس
حتى روحي صرت اكرهه..

-هو جان مخنوك كلش سحبني لحضنه
نزلت دمعته تنهد بحسرة.. ابجي ريا ابجي
ارتاحي خلي نبجي ليش هو من الي مرتاح
قابل عاجبني هالوضع اني اتعس حال منج
بس شبيدي كولي شبيدي لا تزيدينها عليه
بروح اعزازج يعني قابل اني عاجبتني هاي
البهذلة و دوامي الي صار منا للانبار
و فكري المشغول بيكم المن اصير اني
الكم
الامي الي عاندت
لو اخوي الي كسر ظهري
لو ذاك الجبير الي بالوقت الي محتاجه
اب النه و يحتوينه ياخذ عائلته و يضم راسه
حتى ما كلف نفسه واجه سأل..

-جنت بس اسمعه وهو يحجي بكل قهر
مكتوم بداخله حضنته هو باسني..

-بحيل الله اعوضج انتي هواي صبرتي عليه
وين متردين اوديج بس على كيفج ويه نفسج
لا تتمرضين..

-مليت من الكلام والله اسر كل مرة نفس
الكلام تكوله..

-خرب غيرتج ولج هذا الصار كله مو كدامج
شسوي اذا الدنيا تكفخ بيه وطلعني من سالفة
طببني بالثانية..

-كافي لا تزيدينها عليه و تأذيني عليج
ارتاحي اليوم و باجر اطلعي انتي وام مهاب
والبنات تونسي و غيري جو..

-ما اريد عوفوني براحتي بس..

-باس راسي وكام واني مددت و دموعي تصب
مخنوكه كلش ضليت ابجي لحد ما غفيت..

-كعدت ما شفته بالبيت سألت اخته كالت طلع
هو مهاب لان مهاب يريد يشوف جرحه
نضفت وياها و سوينا عشه واني ساكته
وهي كل شوي وكالت شبيج ريا؟!..

-ما بيه بس ضايجة هي سكتت عني وره مدة
رجعوا و تعشينا غسلت المواعين و هو اجه
وراي.. سويلنا جاي ريا..

-سويت واني ساكته هو زفر بغضب شبيج
شبيج ريا والله طلعتي روحي..

-انطيته الجاي.. ما بيه شيء حجيتها وطلعت..

-رحت للغرفة اباوع لنفسي بالمرايا شبيه
اني والله احس روحي مخبله مدري طفلة
ما تعرف تتصرف انقهر عليه و من يصير
كبالي اطلع حركة كلبي بي باوعت لروحي
الوجه تعبان و مابي روح اخذت ملابس
و دخلت للحمام سبحت و فتحت شعري
خليت مكياج ردت باي طريقة بس اعدل
من نفسيتي لان اني كرهت روحي حقه اسر
يضوج دخلت سمر كالت راح اخذ مهرة يمي
و اخذتها وطلعت هي مهرة عادي متعلمة
تنام يمهم و يم عماتها ما تستغرب تعلمت
من هي طفلة باوعت لريا نايمة مددت
اريد انام بدون ما افكر سمعت صوته قريب يحجي ويه ام مهاب غطيت روحي ومثلت
النوم هو دخل واني اباوعله من جوه البطانية
جان شايل ماعون مال حلويات خلاه على
الميز و اخذ ملابسه و دخل للحمام
طلع مشط و تعطر و كعد يمي شال راسي
وخلاه على رجله و ايده تمشي بنعومه على
وجهي و شعري واني جمدت..

-ضحك.. شلون يعني راح تبقين تمثلين ادري
بيج كاعده دنك همس باذاني.. ترى مكيف
على هذا الوضع استمري بتمثيلج عاد ابوس
و العب بكيفي حجاها واخذ شفتي بين شفايفه
هنا لا بقى تمثيل و لانوم فتحت عيوني
بوسعها دفعته.. شبيك خنكتني هو هيج..

-هو رجع دفعني وصار فوكي وصار يتجرأ
يبوس و يجردني من ملابسي اخذني بحبه
و لهفته ابتعد عني بعد مدة مدد و حضني
بقوة.. اعشكج ريا هواي والله يمكن ما تصدكين
اذا اكلج  راحتي بس يمج و همي يزول من
اشوف وجهج هذا الحلو..

-رفعت نفسي و بسته بشفته.. واني هم احبك
دير بالك على نفسك لخاطرنا و على كيفك
ويه نفسك ان شاء الله تعدي الامور على خير..

-سبحنا وهو جاب الماعون كال جبتهن الج
من جنتي نايمه حجاها بضحكة ضربته على
ايده يقلد عليه عود جذابه وامثل عليه كعدنا ناكل و يحجي كال اطلعي
تونسي باجر حجيت ويه ام مهاب تاخذكم
انتي والبنات و سمر لا تحبسون روحكم هنا..

-جنت اسمع و بس اهز راسي باي تذكرت شيء
اسر لعد عمتك من ودعتك قبل لا تسافر
شو جانت حنينه و ما مبين عليها هيج يطلع
منها وحتى انت جان اسلوبك حلو وياها
معقولة ما شكيت لو عرفت هي سبب كل هذا؟!..

-و روح ابويه يا حبيبتي ولا اعرف بيها
و حتى ماجد اصلا ما جنت متوقع اني كلت
نخطفت حالها حال هواي ناس راحت بيها
بسبب فلوسهم و منصبهم عبالي مظلومة
طلعت حية هي بنفسها كالتلي عمه اطلع للخارج
بلد انتهى قبل لا يصفونك وكل ضني تخاف
على ابن اخوها و كلفت ابن خالي يتكفل
بالموضوع و نعرف منو ذول الي اذوها
وتالي نصدمت صدمة عمري و خلتني حاير
شلون اطلعكم منا بامان..

-شبكته ما اريد نطلع اسر ما اكدر اعوف امي
و فارس البقيه اتحمل افراكهم بس امي واخوي
لا ما اكدر..

-تنهد.. ليش اني يهون عليه اعوف امي و
خواتي بس ريا عمتي مطيحه حضي وكاشفه
كل شغلي عمري جبته اشتغل بسريه وهاي
كشفت كل اوراقي عوفيها على الله هسه
و لا تحجين بشيء ترى بس انتي ومهاب
يعرفون بسالفة السفر حاليا ما اكدر اطلع
وذول وراي وداعتج ياخذون مني المعلومات و يخلون طلقة براسي
و ين تصفون انتم و اني حتى اخوتي ما
بيهم خير..

-اسم الله عليك لا تحجي هيج الله يخليك
النا اسر والله تذبحني بكلامك هذا عوفها
على ربك هو يحلها..

-الله كريم.. كومي جيبي الدهن جبته
هو دهن رجلي كال طابت بس خلي حتى
ما يبقى اثر..

-نمت بحضنه و من بعد كل ذيج الايام
اول مرة انام و اني شبه مرتاحة مهما يكون
هنا امان و محد يعرف بينا وين
كعد الصبح هو حاضني وغافي كمت وعفته
نايم نفسيتي احسها هواي احسن فتحت الشبابيك
الجو حلو كلش رتبت البيت كعدت سمر
كتلها تعالي تريكي وياي سويت ريوك
وهي كعدت وياي و نسولف و اثناء حجيها
تسألني عن خواتي و اخواني واني اعرف
قصدها عن فارس هي البنية حبابه ويمكن
فارس عجبها بس اني دائما احاول بكلامي
ما انطيها امل لان بالاخير هي الي تتأذى
فارس اعرف بي يحب بنت جيرانا هو مسولفلي
عنها و رايدها..

-هي احسها تضوج مني بس شسوي ما اريد
اكسر كلبها كعد اسر وشايل ريا كمت اخذتها
منه.. وين رايح؟!..

-هنا مو بعيد عندي شغله ويه صديقي..

-صبيتله جاي شربه وطلع..

-العصر ام مهاب كالت يلا امشن نطلع
ركضت للغرفة احضر نفسي واسر يضحك
عليه هو صح اني خلصتها كله مطنكره
بس شسوي اذا الموضوع بي طلعه حتى
الزعل انساه لبست فستان مرتب وحلو
و خليت مكياج خفيف شلت العطر هو دخل.

-ريا اخذي مهرة بس وياج ريا تبقى يمي
خاف تعذبج قطع كلامه واجه عليه اخذ
العطر..

-هاي ليش انطينياه اسر..

-شنو ليش يابه حرام واحد يشتم عطرج
وبعدين هاي شمسويه بنفسج انتي ليش تجيبين
الاهانة لروحج..

-الحمرة هاي هسه تنمسح  و هاج هذا عطر
خفيف خلي منه سكتت من شفته عصب..

-اي انت روح و اني جايه وراك بس اجيب
الجنطة..

-هو طلع خليت الحمرة بالجنطة و طلعت
هم منتظرين باوعت على سمر جانت لابسه
بنطرون و قميص وكفت يمه.. شوف شلابسه
وانت بس عليه تحجي..

-لج انتي شنو بربج عندج عقل لا تقارنين
نفسج بيها سمر عدها اخوان وهم الي يحاسبوها
بس انتي مرتي شلون اخليج تطلعين هيج
بعدين انتي حليوه ما عايزه هاي السوالف
بس بطلي عنادج وهاي سوالفج حبيبتي..

-قشمرني بكلامه و تالي حتى الحمرة نمسحت
طلعنا و زيد ويانا ما قبل اسر نروح وحدنا..

سجى..

هذه قسمة حضنا
لا مو قسمة الله
جنت تمدح بالقطار
وحسبت مو منها لالله..

-سجى بعد ما ضل عندي صبر امشي
وياي نعوف كل شيء ونسافر..

-كلامو نزل مثل الصاعقة على راسي
و ضليت اردد بي شنو شلون يعني نسافر
ونعوف كل شيء هاي الكل شيء الي
يحجي عنهم ايهم  هذول
اهل و سند ممكن نختلف و ممكن بعض
الاحيان يظلمونا بقرارتهم الي ياخذونها
نيابه عنا بس يبقون سندنا
و الهم فضل علينا
دفعته عني وانتفضت ايهم احبو و جثير
بس الكلام الي كالو صعب يستوعبه العاقل
احس برجفتو الجسمي و انتفاضتو..

-لا ايهم لا اني احبك جثير و اعرف انت تحبني
بس صعب هالشيء اهلنا ينزل راسهم بسببنا
والله ما راح يبارك بينا الله وراح يغضب علينا
ما اكدر اروح وياك ما اكدر
اكدر اوعدك ما اقبل بواحد غيرك
و اكدر اصبر منا لما بابا يحن قلبو بس
ما اكدر اسوي هيج باهلي الي تعبو عليه
و وصلوني للجامعة وصار الي اسم..

-ابوج قافل سجى ابوج ذبحني بتفكيره
اريدج ما اريد اتحرك منا سجى كليلي شسويله
ويقنع مو حتى شيوخ جبتله وناس عليها العتب
وهو قافل..

-دفعتو.. روح ايهم الله يخليك  ما اقبل
بغيرك بس ما يصير وكفتك هين راح تجيبلنا
مصيبة..

-ادفع بي وابجي وهو طلع قبلها دحجلي بنظرة
حزن و خذلان.. سجى اذبحج اذا صرتي لغيري
سجى انتي لايهم وبس..

-بأمانه الله يا كلبها و روحها لسجى حجيتها
بداخلي و سديت الباب رجعت جوه الحمد لله
محد كعد رجعت للغرفة و ابجي بحركه
شوفتو بهذا الحال كسرت كلبي جان مخنوك
و العبره خانكته و مأيس من بابا ومن اهله جثير..

-اسبوع كامل واني ما اعرف عنو شيء
اخباروا نكطعت وحتى خالة ريا من تتصل
ما تحجي عنو احس كلبي راح يطك عليه
حنيت لحبو و لصوتو اتصلت على خالة
من جهاز ماما حجيت وياها بعدها سألتها
عن ايهم..

-هي كالت انسي ايهم ما يفيدج مو قسمتج
سجى اهله كلهم ضده اذا ابوج قافل اهله
قفلوا اكثر منه وسمعت امه تحجي ويه عمتي
و تكلها ما نريدها على شنو شايفين نفسهم علينا..

-حسيت صاير شيء و كلبي نغزني وخالة تقنعني اعوفو خالة احلفج بداعت بناتج فهميني شصاير وليش هو اختفى..

-حبيبتي راح احجي بس لا تضوجين
تعرفين امه لايهم عندها صرع وهو من كدما
ضاغط عليهم يخطبوله هي متخربطة عليهم
و حالتها خطرة و كلها تلوم بي و محملينا
الي صار بيها و كلها ضاغطة عليه يخطب
و ينساج لان ما يردونج..

-هي كالت يخطب واني كلبي تفتت مثل الحجر
يعني شنو يخطب سديتها منها بسرعة واني
كوه مصبره نفسي ما ابجي كتبت رقمه و اتصلت
واني كلبي يدك بخوف و ضياع اختنكت
اريد بس واحد يطمنو لكلبي و يكولي هذا
كلو جذب هو  رفع خط..

-ايهم صدك الي سمعته الله عليك كول جذب
كول ماكو هيج شيء عجل واني شنو وحبك
وينو ايهم كول جذب احجي و ابجي وكلبي
دكاتو تزيد بخوف من اجابتو..

-هو حجه بقلق سجى حبيبتي
ليش شنو سمعتي..

يتبع....

شنو افتهمتوا من الصورة
اريد اشوف توقعاتكم..

اللهم صل على محمد وال محمد❤️