شفاه مخملية

Part 26

♛ ♛ ♛ ♛ ♛ ♛ ♛ ♛ ♛ ♛

شو صايره احب ادللكم😁 وتفاعلكم حلو، اذا اشوف تفاعل يصيرلي واهس ؏ الكتابه فَـہ استمروا هيچ💋..

"شفاه مخملية"

بقلم: زهراء السلامي.

#أتبكين على حُزنٍ مضى؟
على محبوبٍ لو أحب لبقى
ياغاليتي كُفِ عن الحزن والبُكى
من أرتحل لا يستحق الشقى..

♛ ♛ ♛ ♛ ♛ ♛ ♛ ♛ ♛ ♛

"هجران"
ضربات ببطني بسيطة صحتني من النوم، فتحت عيوني تلمستهه وابتسمت، تمايزت بطني واني ادري بطفلتي وقطعه من روحي تتحرك بيهه جوز گعد تلعب او تريد تصحيني من غبائي وحبي لأبوهه الي عمى گلبي، تنهدت وافكر بيهه كُلش متحمسه ؏ جيتهه وانتظر يوم يوم تجي للدنيا واتفائل بيهه تغيرلي حياتي..

گمت سبحت وتريگت رغم مالي نفس بَـس لخاطر بنتي اريدهه تجي بعافيتهه، اخذت برتقاله وگشرتهه واكلتهه وره متريگت حتى اتغذه وتتغذه زنوبة ويايه..

رجعت لغرفتي وافكر شلون اواجه جواهر اليوم وشنو رح تكون ردة فعلهه؟ وهم رح تحچي الحقيقه لو تلف وتدور مثل قبل.. قاطع تفكيري ماما دگت الباب وگالت وصلو وگاعدين بالاستقبال..

طبيت عليهم وسلمت وگفلي عثمان وگال بأبتسامة برزت سنونه..

-عثمان: شلونِك هجران؟

هزيتله براسي "زينه" اجت رهف تسلم عليه وشهد همات، سلمت عليهن بكل برود مابيه حيل اجامل، اما جواهر بقت واگفه وتباوعلي، عثمان حچة..

-عثمان: اجت مرت ابوي هم بَـس راحت للمستشفى تشوفو لحفيدها

هزيتله براسي ادري، وگال هوه يترخص يطلع يزور لان صارله سنين مزاير، راحن شهد ورهف لجوري وبقينه اني وجواهر وحده مگابله الثانيه، اول من بدت الحديث جواهر..

-شلونچ هجران؟

-زينه

-جواهر: رح احچيلچ كلشي بَـس....

-قاطعتهه: احچي اسمعچ

جرت نفس عميق وزفرته، گالت بهدوء..

-چان عمري 18 سنة من عرفت اني مخطوبة لبكر

-هجران: مخطوووبة؟؟؟!

-جواهر: اي بَـس چانت خطبه كلام وحاجزني من اهلي من قبل بدون مينطوني خبر

-هجران: جواااهررر منيلچ هالكلاوااات وين اكو وحده تنخطب لواحد ومتعرف بروحهه مخطوبه؟!!

-والله العظيم مادري بالموضوع، اهلي خفو عليه الحقيقه عود حتى ما اللتهي عن دراستي تخيلي السذاجة!! ومن نجحت وقدمت جامعة ذي قار وداومت اول اسبوعين ياله حچولي  وچانت صدمة حياتي من افتهمت وبكر گلي بنفسه

-شگال؟

-گلي احنه مخطوبين وچان يريد شسمه احم...

-شيريد؟

حچت بهمس

-جواهر: راد ياخذني

-وين؟

-جواهر: هجراان اقصد ياخذذني ياخذني يعني كزوجة اله

بلعت ريگي من تخيلت الموقف ونار سعرت بگلبي..

-كملي

-جواهر: اني اكيد رفضت هالشي وتفاجأت من اكدلي احنه مخطوبين بَـس بدون عقد سيد وهوه حاجزني من زمان، ومن سألته ليش اهلي مگلولي گام يستهزأ بيهم ويگول ليش اهلچ هم تحسبيهم اهل ويهتمون لبناتهم

-هجران: وتالي شلون تخلصتي من الموضوع؟

-عميد تدخل ونخيته گتله بداعت بنتك تخلصني منه وتحميني، تعارك ويه بكر عركة كُلش كبيره بحيث بكر اسبوعين هوه مو بالبيت وميجي حسبالي عميد طارده بَـس گال لا هوه كلشي مگاله بَـس انصدم من جوابي وراد يبتعد..

افتهمت الموضوع من عميد وشرحلي شلون صارت الخطبه وگال هوه ماحظر لان چان مسافر، رحت بالعطله لأهلي عاتبتهم بَـس ادري بيهم ميهتمون وگالو خوش رجال وانطينا كلمه بعد عيب نرجع بحچايتنه

توسلت بيهم ودگيت ولطمت لان اني ما احبه شلون اتزوجه واني گلبي وروحي معلگه بأبن عمه، بهذيچه الفتره بَـس عميد الوحيد الوگف ويايه حتى حلاوة عاداني وگال عيب نرد بحچايتنه خصوصاً بكر عقّد الموضوع وخجل اهلي، مرتين جاب مشية زلم وسيد حتى يعقدلنه..

واني اتوسل وابوس بالايدين والرجلين والحمد لله ماعرف منو صاح براس بابا وگللهم البنيه متريد ومنجبرهه ؏ شي، طلع حجة علبو چنت طفله ومفكرت لبعيد من قبلت اول مرة، عمو خليل مصدگ وصار يحچي ؏ بابا واني رجعت انتكست حالتي وگتله انته بحياتك مجبرتنه ؏ شي لتجي بتالي عمرك تجبرني اتزوج رجال ماريده..

صارت مشاكل بَـس بسرعه فضت السالفه، كملت المرحلة الاولى واني ميته گوة عليه اداوم اريد بَـس تخلص السنه حتى اسوي نقل لجامعه بغداد لان بالنقل ميصير لازم اداوم سنة كامله بالجامعه الطلعتلي وبالمرحلة الثانيه ياله يسمحون بالنقل، بَـس كل هذا تغير من اجه اليوم الي زوج اختي....

دمعت عيونهه وبلعت غصتهه، هزت راسهه بيأس وگالت بگلب ملچوم..

-الى ان اجه اليوم وطلال زوج اختي فردوس اعتده عليه

شهگت وضربت صدري بقوه، وهيه گامت تشهگ وتبچي، دگات گلبي اضطربت وشعر راسي حسيته وگف، ماعرف شنو اگول لو بشنو احچي، همست..

-واخذ شرفچ؟

هزت راسهه بـ "لا"

-جواهر: مگدرر مگدر لان أذيته وضربته ؏ راسه، (علت شهگتهه ودموعهه تنزل) هجراان جرنيي بليله ظلمه بغرفتي واخذني بكل قسوووه اهلي چانو بايتين ببيت عمي وبس شهد نايمه بغرفتهه وفردوس جوة، طلال وفردوس شبه العايشين ويانه ودائماً ببيتنه وطلال ميشتغل وعطالي فَـہ يبقى يمنه..

وبيوم اغبر دگ باب غرفتي وسمحتله يدخل بَـس مبين عليه مو طبيعي، تفاجأت من دخل جوه يترنح بمشيته وگال بلسان ثگيل..

-طلال: نزعي

-جواهر: شنو؟

-طلال: نزعي هذني (ويأشر ؏ ملابسي)

-جواهر: طلاال شبيك تخبلتتت امشي اطلع بررره لو اگعد فردووس والله

-طلال: تنزعين لو اخذچ بالقوة

اجه بأتجاهي وجرني حيل، گمت اصرخ وكمم حلگي بأيده الچبيره، ردت افلت منه واضرب بي وهوه قوي وضخم ماگدرله، شالني وشمرني ؏ السرير ونام فوگايه واني مستمرة اقاومه دارني من وره شاغت روحي و..

گطعت كلامهه ورجعت غطت وجهها وتحرك براسهه كأنما تذكرت الموقف ودتنفضه من بالهه، استمرت ؏ هالحال واني گاعده گبالهه ماگدرت اگول شي غير..

-گلتي لعميد الدين؟

رفعت راسهه مفزوعة وتحركه تنفي كلامي..

-جواهر: لا لا لا طبعاً لااا لاا مستحييييل اگوله لااا اصلاً اصلاً.. اصلاً ماراح شرفييي والله مگدرر من گام عني وراد ياخذني گدرت اتملص منه وضربته بالتيبل لامب ؏ راسه وخليت الدمايه تكت، لبست ملابسي وشردت لغرفه شهد، الم بجسمي وحتى ماگدر انام طبيعي رحت للحمام و....

هم گطعت كلامهه ورجعت تبچي مهضومة، الله يساعدهه شنو من موقف وشنو من حاله مرت بيهه، تذكرت من چنه بأيران من تحارشو بيهه ذوله الادبسزيه وهيه كلمه مانطقت ظلت مثل المصدومة، وقوتهه وشلون دافعت ؏ نفسهه وصارعتهم بأيدهه اثاري مارة بهالتجربة المريرة..

سكتت من البچي وكملت..

-ثاني يوم گلت لفردوس وتخبلت حبستني بغرفتي يومين وحتى اكل متقبل تنطيني وكتلتني لدرجة خلتني انزف ميته قهر لان زوجهه رادني وانجذبلي، سحبت موبايلي مني حتى اخاف ادگ ؏ اهلي وهددت شهد اذا ساعدتني هم تحبسهه بَـس سوده عليه شهد گضت هاليومين مرابطة باب غرفتي وتصبر بيه وتناوشني من جوة الباب صمون وخبز لان ماكو شي غيره يدخل منهه..

وره يومين رجعو اهلي واضطرت تطلعني بَـس وجهها ثگيل ومتحچي ويايه، وهدتتني اذا حچيت لماما تجيب طلال ويسوي اليريده بيه، ماعرف ليش هيچ تسوي وليش هيچ حاقده عليه، وره فترة انصدمت من عرفت طلال وهيه رح يجون يسكنون ببيتنه بشكل نهائي حتى من بابا وماما يصير عدهم خفارة بالمستشفى يبقون يمنه خاف يصيرلنه شي، همه ميدرون زوج اختنه واحد نگس وزباله عينه ؏ خوات مرته وحارشني وحارش شهد اكثر من مرة..

مچان عندي غير عميد الدين احچيله وهوه كُلش تعاطف ويايه بَـس ماگوله كلشي وبالتفصيل، من احچيله چان يتخبل ويگلب الدنيا ومرة فلت لساني وافتهم بطلال تحارش بيه بَـس محچيتله ؏ هذيچ الليله الگشره، اجه من الناصريه وكتل طلال كتله دماه تدمي وحاچه بابا وگاله لازم يلگون حل وواحد منهم لو امي لو ابويه يبقون بالبيت ويانه..

بوكتهه بابا ضاج علبو ليش يتدخل وهوه شيخصه واني مأمن بناتي ويه بنتي الكبيره وزوجهه، ماهتم لعميد ولا سمع كلامه، حاولنه وجاهدنه اني وشهد نفهم امي وابويه بطريقه غير مباشره بَـس چان عقلهم قافل ؏ ان طلال خوش رجال وفردوس اختنه وتخاف علينه..

حاچيت حلاوة وگال هوه معليه وميتدخل لان ماله خلگ فردوس وطلايبهه، بَـس اكيد محچيتله عن سالفه طلال لان لو يدري يقتل طلال وماستبعد فردوس تقتلني وتقتل شهد، حلاوة شال ايده بشكل نهائي من عدنه وحتى مگام يجي للبيت شگد ما لعبت روحه من فردوس يوميه مسويه هوسة وحارگة الجو.. واكيد هالشي سَهل ؏ طلال مهمته وحاول ويايه اكثر من مرة يريدني ويحچي حچي زباله ويهدد بيه اذا حچيت لفردوس او گلتلهه شي..

سائت حالتي وكرهت كلشي هم طلال من جهة وبكر من الجهة الثانيه وحتى دراستي ردت اتركهه وماريد لا نقل ولا شي بَـس اكيد اهلي ميقبلون علبو احنه ماعدنه احد جاهل بالعائله وميكمل دراسه..

بده دوام مرحلة الثانيه وگلت لبابا ؏ سالفه النقله وفردوس مقبلت لان تدري بزوجهه يريدني بَـس ليش جابته واجت لبيتنه مادري لسه الشغله مبهمة واكيييد ماما وبابا سمعولهه لان عدهم فردوس صعدت منزلت، سوتلي هوسة وهددتني بشي ثاني..

سكتت شويه ودموعهه تنزل من عيونهه، استرسلت بالكلام..

-اضطريت ادوس ؏ نفسي وارجع للناصرية وداومت مرحلة ثانيه رغم بكر يضايقني بنظراته وبكلامه بَـس ؏ الاقل مچان يتجرأ ويتلمستي اني ونايمة مثل طلال..

مرت الايام وافتهمت بعمو خليل خطبچ اله متتصورين فرحتي شلون چانت، لدرجه بيوم المهر رگصت رگص مصاير وگلت هاهيه فك ياخة عني بكر ماطول حيتزوج ورح ينساني ويلتهي بزوجته بَـس صار اضرب وصار يقارني بيچ تخيلي!!!

-هجران: شيگول؟

سكتت وماحچت شي، ضحكت بأستهزاء اكيد رح يقارن بيناتنه، ليش شجاب الليل ؏ النهار واكيد شايف جواهر وترتيبهه وجمالهه وعيونه تباوعلهه ويباوعلي، مسحت دموعهه بردن قميصهه وگامت..

-هجران: وين رايحة؟؟

-جواهر: اتصل بعثمان حتى نرجع

باوعتلهه بأنكسار وهيه دايره وجهها عني، حسيت ظلمتهه هواي وجرحتهه، رغم جرحي بَـس هيه هم معايشة بعالم وردي ودتعاني نفس معاناتي ويجوز اكثر، ؏ الاقل اني الحمد لله محد تجرأ وتحارش بيه جنسياً..

بالنسبة لجواهر وشهد والتربيه الي ربوهن اهلهن كُلش زين من طلعن هيچي ومانجرفن وصارن مثل اختهن، صح عدهن تصرفات غريبة ونوعاً ما عيب بَـس كبنات شابات وماكو ام تلزمهن واختهن وحده بايعة نفسهه وتدلل بيهن وتهدد ما شالله شلون طلعن..

اتصلت بـ عثمان وگال بَـس يزور ابو الافضل العباس ويرجع، طلعت برة بالطارمة تنتظره واني رحت وراهه، لازم اعتذر منهه هيه شنو ذنبهه اذا رجلي حاط عينه عليهه ومأذيهه، صحت بأسمهه مرة وحده ودارت وجهها عليه، عيونهه الزمردية مليانه دموع وخشمهه صاير احمر هم من البرد وهم من البچي

ماحچيت شي حظنتهه وبادلتني الحظن، اعتذرت منهه هوايه وبوستهه بَـس هيه گلبهه طيب وگالت اصلاً مازعلت مني، ابتعدت عني ومسحت دموعهه وگالت بصوت طفولي وبارزه شفتهه السفلية ليگدام..

-جواهر: هجران اوعدچ اللگه حل واطلع من البيت ومتشوفين وجهي ابد ابد

تنهدت وسألتهه..

-وين ترحين؟

-عسى ما لجهنم الحمرة، وكلشي يصير بيه استاهل وبالجير اني من الاساس ليش رحت هناك بَـس والله اضطريت وردت اهرب من بيت اهلي والضيم الشفته وسوالف اختي الي متنحچي واصلاً استحي اگولهه

-ليش اكو بعد؟

هزت راسهه ونزلته ودموعهه رجعت تنزل، اويلي غير متت من القهر، رجعت سألتهه...

-هجران: زين روحي اقسام

حچت بجزع..

-بابا ميقبببل متت البارحة اتوسل بي وميقبل يگول ما أأمن

-بَـس يأمنكم ببيت كله زلم؟؟ وين المنطق؟؟

-اووف هجران اوووف شحچي وشگول ابويه مستعد يكذبنه كلنه وعنده فردوس صح ومتغلط يشوفهه معصومة عن الخطأ!!!

هزيت براسي وظلينه ساكتات، حسيت بعذاب الضمير شلون رح اخليهه تطلع وترجع يم اهلهه ويجوز صدُك يصيرلهه شي، نهيت الحديث وياهه بـ...

-شوفي انتي لتطلعين من البيت ماشي؟ اصلاً هوه بيت عميد الدين واني مالي أي حق اطلب منچ تطلعين منه ؏ حسابي واذا ؏ سالفه بكر اني اگوله نطلع من البيت

-هسة يگولچ ماگدر

-وشمعرفچ انتي؟

-هه تعلميني بي

-لا لا معليچ وحتى لو صار ماصار ؏ الاقل كملي هاي السنه شلون مچان ونحلهه ان شالله، اساساً انتي متطلعين من غرفتچ ومتتشاوفون اله ما ندر وادري بيچ چنتي تسويهه لخاطري

-والله يا هجران تمنيت احچيلچ كلشي من البدايه بَـس بيبي عطيه مقبلت تگول تخربين بيت البنيه وهوه اصلاً مصار شي لا خطبه رسميه ولا ابد فَـہ ؏ شنو نحچي بشي مصاير وبكر كبره بخياله واحلامه.

سكتت ومجاوبتهه، ماعرف الي رح اسوي صح لو غلطة چبيرة مني بَـس البنيه هم مو ذنبهه وهيه انظلمت وبكر هم انظلم واني المظلومة الاكبر الوگعت ؏ وجهي بسبب طيبة گلبي وحُبي الاعمى اله...

توسلت بيهه حتى يبقون ؏ العشه بَـس عثمان گال ميگدر يتأخر، اما عمه سلمى ظلت تدردم وتنگ ليش يرجعون هسة..

-عثمان: عمة اذا تردين انتي ابقي هينه أَنا ارجع البنوات لبغداد يشوفون اهلهم وانتي ظلي

-سلمى: هااا مادري

چانت تباوع لأمي تنتظر عزيمة منهه، وماما اكييييد گلتلهه ابقي وظلت عمه سلمى ويانه ومگابله ابن جوري وگاعده وبس تنگ وتسخر عبالك بيت الخلفوهه..

مشت الايام واني لسه حاظره بكر اريد ارتاح واصفي دماغي، وبيوم ماما وعمه سلمى گاعدات بالصاله يشربن چاي اجت ندى تهلهل..

-جوري: هاا شكوو

-ندى: ولچن لو تعرفننن منو عرسه الخميس؟؟؟

-هجران: منو بله؟

-ندى: غزوااان

-جوري: صدُك تحچين؟؟

-ندى: اي وربي هسة خالو اتصل بماما وعزمنه

-هجران: ايييي ؏ الخير الحمد لله من مشه بحياته

-جوري: اي الحمد لله، الله يهني ويوفقه وياهه

-امين..

فرحت من كل گلبي لغزوان وحتى جورية كُلش فرحت ولحت عليه نحظر عرسه ونأدي الواجب بَـس اذا اريد احظر معناهه لازم اتصل ببكر وابلغه واني ماريد اگوله، اريد اتونس واغير الجو الكئيب الي دا اعيشه..

گلت لأمي وگالت حتى لو چنتو متعاركين لازم تنطي خبر ميصير، استسلمت وفتحت الحظر عنه ودزيتله رساله كتبت...

-💬"السلام عليكم،، بكر عرس ابن خالي باچر واريد اروح ممكن؟"

شاف الرساله وبسرعه اتصل، رفضته وكتبتله..

-💬"جاوبني برساله لان هوسة يمي وماسمع شي"

رد عليه...

-💬بكر: "روحي براحتچ"

فرحت وضجت بنفس الوقت وحسيت روحي غبيه لان رفضت اتصاله ومن حرگة گلبي رجعت حظرته، اوووف اني شجاي اسوي ووين اريد اوصل؟!

نمت وگعدنه الصبح مخبوصين وعمه سلمى هم حايره وضايجة لان مجايبه ملابس وياهه وذهبهه ملابسته كله ومرادت تجي بَـس ماما اصرت عليهه وگلتلهه محد يبقى بالبيت، وهيه تجاوبهه ابقي علي ابن جوري يمي و و و و.. اخير شي قبلت تجي ويانه بعدما شلعت گلب ماما وجوري، بدلت ملابسي واستعاريت من ندى لان مجايبه شي وياية..

صح الفستان بي كبر بَـس ممبين لان بطني كبرانه، حطتلي مكياج جورية يوالم فستاني البيجي وشسورتلي شعري وهيه هم كشخت كشخة تگولون هيه العروسه، ضحكت بيني وبين نفسي شنو قصدهه من هالحركات ومن لبست فستان اوف وايت ومكياج ثگيل..

طلعنه من البيت وابنهه ذبته ؏ عمه وهيه حارت بي، غزوان مسوي عرسه بقاعه وشنو من ترتيب واناقه اهل العروسه من اهل بغداد وماشالله تأسر العين بجمالهه ونزاكتهه وبياضهه الناصع..

بدت الملا تقره واشتغل الردح، گامت جورية ووگفت بنص القاعه وترگص ؏ الخفيف والنسوان يباوعنلهه وصافنات ؏ حركاتهه وجمالهه.. اما اني تكترت كالعادة وگعدت ؏ صفحة ماحچيت ويه أي وحده ومن يسألوني ؏ بكر اكتفي بقول كلمة "زين الحمد لله" ومخلصت من نظرات النسوان وكلامهن الجارح خصوصاً من شفت عمتي هدى العايشه بالديوانيه چانت جايه لانهه صديقه ام غزوان...

-العمة هدى: هجران عمه شلونج حبيبتي

-هجران: هلوو گلبي عمة مشتاقتلچ

گمت ابوسهه وهيه هم بادلتني بشوق، سولفنه شويه وگالت بهمس...

-هدى: كُلش مبين عليچ التعب شجاچ عمه

-هجران: اي والله الحمل ماخذ من حيلي

-هدى: هاااا وبشرتچ تعبانه وحب طالعلچ وشعرچ متقصف شجاچ حبيبتي خو رجلچ هم يريد

بلعت عبرتي وهزيت براسي، متدري بيا ضيم عايشه اني الي وصلت مرحلة ماللحگ اباوع لروحي بالمراية من التعب والهلاك الاهلكه واشتغله ببيت الگصاب عبالك اني البنيه الوحيده العايشه هناك ولازم اشتغل..

گظه العرس زقوم عليه وگوة لازمة دمعتي احس النسوان كلهه تأشر عليه ويعيبن مع العلم محد ديسوي هيچ بَـس صارت عندي حالة نفسيه واني اشوف البنات شكولهن وشلون مرتبات وملابسهن حلوة.. اختنگت كُلش وگلت لماما اطلع اوگف بباب القاعه ارتاح شويه لان نفسي بدت تلعب، رادت تجي ندى ويايه ومقبلت..

طلعت بره چانو الزفافه جايين فَـہ عدت ادراجي وبقيت بباب القاعه، گعدت ؏ الدچة وصوت الاغاني والهلاهل ليوين واصلات، شافتني ام الاستعلامات وعبالهه محتاجة شي، گلتلهه بَـس ارتاح.. خطيه راحت جابتلي مي ونستله من شافتني حامل عبالهه نزل ضغطي لو تخربطت..

ماتحملت هالاهتمام رأساً طگيت بچي، ظلت حايره ويايه عبالهه سوتلي شي غلط بَـس چذبت عليهه وگلت بطني توجعني.. عافتني وراحت بعدما تطمنت عليه زينه واني بقيت گاعده مثل المگدية بالباب..

مرت ذكرياتي وياه مثل الشريط ؏ بالي، اتذكر كل حچاية منه كل لمسه كل مرة يگولي هجران شفايفچ مال عظ واعشق اللون الي تحطي.. مسحت دموعي براحة ايدي ونزلت راسي تعبانه اريد ارتاح واستجمع قوتي بَـس ماگدر احس روحي مكسورة ومخذوله..

لزمت موبايلي وظليت افكر افتح الحظر عنه واحاچي وارجع وياه لو لا، ساعه اگول اي ارجع واتحمل لخاطر بنتي وساعه اگول لا ماگدر كرامتي متسمحلي وظليت ؏ هالحال وآكُل بروحي اكل لحدما طگت روحي واخذتني ايدي لا ارادي ؏ اسم جواهر، دگيت عليهه اريد افضفض وارتاح وهم اتطمن ؏ احوالهه مشتاقتلهه ومشتاقه تحچيلي خبالهه وتصرفاتهه ويه عميد الدين، دگيت عليهه مرتين ومجاوبت گلت يمكن جاي تقره..

وره شويه اتصلت كام، فتحت الخط ومن شافتني گامت تضحك وتصوفر فرحانه، ضحكت وگلتلهه..

-هجران: وجعع شكو هالضحكك

-جواهر: ايي عيني شهالتمزمز والتحتحت لو جاي حبيب الگلب عليچ؟ (وغمزت)

-ههههه ولچ يا حبيب گلب لسه زعلانه ومطنگره عليه اني بعرس ابن خالي

شهگت بعجب وگالت بضحكة..

-جواهر: هجراااان لسسسه زعلانه ومطنگرة ؏ الحُب مالتهه؟؟!!! لااااا مستحيييييل ولچن شهدددد رهففف تعالن اسمعن هجران لسه زعلانه ؏ بكر

گلبت الكامرا عليهن وشهد گامت تلطم مثل نسوان العمارة

-شهد: احااا احااا گابليني ولچ رهيفه احاااا عفت الروح عفت الريه وكل الناس عاريه احاااا

ورهف ما گالت لا گابلتهه ويلطمن ويضحكن، متت ضحك من انفتحت باب غرفتهن وطبت بيبي عطيه شايله عكازتهه وفتحت حلگهه بشهگة..

-حجية عطيه: ولچن يا معزااايااات شنهييي ياهو مااات؟؟؟

-شهد تمتمت: هااا اءء لا بيبي شسمه هاي صديقتي ماتت ودا اللطم عليهه

-حجية عطيه: يما صوااب شني ياهي هاي؟؟

-شهد: احم شسمه بيبي هاي وحده ويايه بالقسم خطيه ماتت بسرطان سودة عليه وعدهه ثمن جهال

لطمت صدرهه وجرت شيلتهه وشغلت سنفونيتهه..

-حجية عطيه: اهئ اهؤ اهئ اهؤ يا دهر يمدلله اهئ اهئ اهؤ..

-رهف: حبوبه وانتي شمدريچ چانت مدلله؟

-شهد: اندري بيبي عدهه ثمان جهال يعني زوجهه موتهه هاي

شالت عوچيتهه وعاطت بيهه

-حجية عطيه: ولچ سلبووحة شهيدااان شني هاللغوة الزايده ولچ صايره ماتستحين كلللش انتي

-جواهر بضحك: ايي بيبي ختولي مو اگلكم اختي ادبسز

-حجية عطيه: اي بعلي شني موش بت بررره مرجانة احسن منهه ؏ الاقل نافعتنه بحليباتهه

متت من الضحك واني اسمعلهن وشهد گلبت وجهها، وجواهر تقرب الكامرا ؏ وجهها وتگولي شوفي گلبت الخلقة بعد شلون نفكهه، سألتهه ؏ عميد وشلونهه وياه گالت متگدر تحچي لان رهف بغرفتهن بَـس گالت صارلهه هواي مشايفته لان متطلع من غرفتهه ابد وملتهيه بالدراسه، اني ادري بيهه چذابه متطلع حتى متلتقي ببكر ومتسببلهه وتسببلي احراج..

سديت الخط وياهن واني الضحكة تارسه وجهي، نسيت نفسي ونسيت اني گاعده بالباب والناس طابه طالعه شلون فشله..

ذبيت الموبايل من ايدي وتتفست بعنق وافكر شسوي، شويه ورجعت جواهر دگت عليه، جاوبتهه...

-ها جوهرة محتاجة شي؟

تحچي بهمس...

-جواهر: لا بَـس حسيتچ تردين تحچين ومگدرتي بسبب دخلت بيبي

-هجران: اااه جواهر اي والله تعبانه حييل حيييل

-اسم الله عليج شجاچ

-ماعرف شسوي بروحي ووين انطي وجهي، بابا حاير بروحه والديون واخواني ليل نهار يكرفون وكلمن حاير بهمه اخاف اصلاً اگوللهم ؏ سالفتي ويه بكر

تنهدت وظلت ساكته، اردفت...

-هجران: ولعبانه نفسي من نفسي وشكلي صاير يلعب الروح وشعري ديوگع ومتقصف وحالتي من سيئة لأسوء....

احچي وهيه ساكته تسمعلي، حسيتهه راحت لان حتى هس ما گالت، صحت..

-الو جواهر انتي ويايه؟

-اي وياچ حُبي

-ها عبالي رحتي

-جواهر: لا موجوده

-زين شنو رأيچ بكلامي؟

-جواهر: لو شنو اگول ما اوصل نقطه للي گعد تحسي هسه

-شسوي گوليلي حبابه ماعندي غيرچ اني

-لو چنت بمكانچ تعرفين شسوي؟

-شنو؟

-جواهر: طزز ببكر وطزز ببيت الگصاب وطزز بكلشي اهم شي روحي وبنتي الحامل بيهه، اهتم لنفسي واطلع من المزاج السيئ الي دا اعيشه وارتب روحي واخبله ويايه

-شلون اخبله؟

-يعني بأختصار انتي نهايتچ ترجعيله صح؟

-لعد وين انطي وجهي

-ماشي خلي من يجي يشوف هجران ثانيه

-شلون؟

-يعني غيري من نفسچ، اشتري ملابس حلوة اللوانهه فرايحيه عووفي اللون النيلي انكرب گلبي منه واهتمي لشعرچ وبشرتچ، روحي للصالون صبغي وحفي وسوي تنظيف وتمكيجي وعيشي حياتچ وخلي بكر يشتعل ويلوب عليچ من يشوفچ رغم انتي زعلانه بَـس مرتبه وتخبلين وممتأثره بالسالفه

-مالي واهس والله

-اصنعي الواهس، هجران ترا انتي الوحيده الي راح تخسرين بالنهاية وعذريني اذا كلامي جارح بَـس بكر مراح يهتم اذا زعلتي او لا وبالعكس من يشوفچ هامله روحچ ويرجع يلگاچ بهالحال رح يگول اي هاي متگدر من دوني ويظل يأذيچ وياخذچ بالعين الصغيرة

-اني صدُك ماگدر من دونه

-ادررري والله ادري بَـس بيعي ثگل عليه ولتنطي مجال يتمادى عليچ ويجرحچ، ترا والله محد يفيدچ لا بكر ولا اني ولا بيت الگصاب كلهم

-صح كلامچ

-اكيد صح ولازم تبدين ويه روحچ من هسة رجعي هجران جديده، بنيه قويه ميكسرهه شي ماشي حُبي؟

-ماشي، شكراً جواهر والله ماعرف شنو اگولچ بَـس انتي الوحيدة الي ارتاح من احچي وياهه واحسچ صدُك محروگ گلبچ عليه

-لانچ اختي هجرانه يشهد الله عليه احبچ واتمنالچ كل خير لانچ تستاهلين

دمعت عيوني ؏ كلامهه وگلت بصوت مبحوح...

-هواي احبچ جواهر شكراً

-يا عيوني واني احبچ ويله داده روحي تونسي بالعرس اني گاعده هنا وصوت الاغاني سطرني وصارلي واهس اهز ههههه

-هههههه ماشي يله مع السلامه

-الله وياچ

كُلش ارتاحيت من حچيت وياهه وحسيت مثل المي البارد ووگع ؏ گلبي لانهه بسيطه وكلامهه بسيط وخالي من التعقيد وعدهه اسلوب تقنيع حلو، گمت اريد اطب للقاعه ووگفني صوت واحد صارلي بالسنه مسامعه صوته، درت وجهي وگلت بأبتسامه...

-شلونك غزواان؟

ابتسملي وتقدم عليه...

-غزوان: يا هـلا هجرانه شلونچ

-بخير انته شلونك عريسنه هههه

-الحمد الله

-غزوان: عروستك تخبل ترا، هاي وين لگيتهه

ابتسم ومسح لحيته

-غزوان: تصير بت صديقة امي

-هااا يعني اخذتو بعض عن حووب(غمزتله)

-هههه لا لا يا حب حتى مصارلنه شهر من عاقدين سيد بَـس همه الله يسلمهم مستعجلين ويردون بسرعه العرس

-هااا يله يجي الحب وره الزواج

-ان شالله

حسيته يلوب وعيونه تروح وتجي ؏ باب القاعه واعرف بالضبط عليمن ديدور ويلوب عليهه، ظل يمسح بوجهه ويبلعم وبعد ماتحمل حچة...

-غزوان: اءء گالو جوري صار عدهه ولد

-اي فدوه صار عدهه سيد علي

-غزوان: الله يحفظه احم هيه ... هيه شلونهه

حچاهه بغصة وحسرة، ابتسمت ورديت عليه...

-الحمد لله زينه تسلم عليك

-الله يسلمهه

دار وجهها عني ومسح عيونه، اوف يغزوان لسه مانسيتهه وببالك.. ودعته ودعيتله بالسعادة ورجعت للقاعه چانن جوري وندى ديلبسن حجابهن لان غزوان رح يدخل..

وفعلاً دخل والف كسره مبينه بوجهه وعيونه تدور بين المعازيم، وجوري حست بالموضوع ورأساً تغشت حتى ميشوفهه وتجدد وجعه.. طلعت الزفافه ورحنه وياهم وچانت زفة ضخمة وكوومة ناس جايين وكلهم قوط وملابس رسميه عكس زفتي وزفة جورية اجو الاغلبيه معگلين ودشاديش..

چانت الزفة حلوة وعلگو الجو اصدقاء غزوان وفاضل وحيدر وياه ما عافو بَـس حسيت بأختي مو زينه واكو نظرات بعيونهه غريبه معقوله هذا ندم وتحسف؟

مافتحت الموضوع ولا حچيت وياهه شي لان عمه سلمى كل شويه ذابتلهه بسمار وتعيب وهواي تجرح بكلامهه، رجعنه ابو الكوستر الصعدنه بي بباب القاعه واجه بابا علينه بسيارة صديقه گال يرجعنه لان بابا ماعنده سيارة اضطر يبيعهه بسبب الديانه حتى يسددلهم...

بعدنه بباب الفرع مال بيتنه ونشوف الامة العربيه مگلوبه بباب بيتنه وبيت جوارينه واصواتهم عاليه وهوووسه ومبين عليهم الحيرة، نزلنه وبابا راح يركض يشوف شكو واذا انصدم من اشوف.....

يتبع☘️...

♛ ♛ ♛ ♛ ♛ ♛ ♛ ♛ ♛ ♛
توقعاااتكمم الحلوة كتبوهه هنا😎 ولتنسون التصويت يعيونيي😋💋
+
احبكم وااايد وااايد💋💋💋.