#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الثالث_و_العشرون
أخاف أترّز بيك حد گطع النفسْ
وأزهَگ واضرّك
وخاف تتطشَر ولك وشلون ألمَك
عريان السيد خلف
خالة منيرة
" شبي ابوك طلع مستعجل "
جعفر
" المحكمة حكمت على حيدر اعدام و عمي صبري اتخربط نقلوه مستشفى ضربتة جلطة قوية "
سمر
" الف الحمدلله و الشكر منك العوض و اليك العوض يا الله عساهم بالزايد " كلها ضلت ساكتة و بس العيون تتحرك جعفر طلعوا هوا و الولد كمت اخذت موبايلي و اتصلت على سما ردت علية
سمر
" سما منو و منو بالبيت مالتكم "
سما
" اني و نورس و نسرين ليش "
سمر
" ماكو شي بس راح اجي عندي موضوع وياج "
سما
" اي هلا بيج "
سمر : سديتة من سما و صحت لجوري كلتلها على الي اريد اسوي
جوري
" لعد عيناج الف طلب مثل هل طلب "
سمر : لبسنا الحجابات و الجبب و نزلنا شافتنة خالة منيرة
خالة منيرة
" وين رايحات "
سمر
" نسوي الي زلمنا ما سوتة "
سحر
" سمر شنو الموضوع وين رايحات "
سمر
" امشي جوري " اخذت جوري و طلعت كلها صاحت علينا ما ردينا طلعنا اخذنا تكسي و لبيت صبري دكيت الباب طلعت سما
سما
" هلا تفضلن "
سمر
" بعدجن بس انتي و نورس و نسرين لو اجة احد "
سما
" لا لا محد اجة "
سمر : دخلت و قفلت باب الشارع
سما
" ليش قفلتي الباب "
سمر : ما رديت عليها جانت اكو ماسحة فتحت العودة مال الماسحة و ضربتها بالحايط كسرت العودة صار اثنين انطيت وحدة لجوري و وحدة الية
سما
" شكو شنو الموضوع "
سمر
" نسرين وين "
سما ضحكت و كالت
" هلا راح تنكتل نسرين فوتي كاعدة بالصالة "
سمر : فتنا اني و جوري و سما اول شي للمطبخ باوعت لسما و كلتلها
" طلعيلنا المكص " و احنة دخلنا للصالة شافتنة نسرين كامت وكفت
نسرين
" خير شكو جايات "
جوري
" يا بعد خوالي المعفنين مشتاقيلج و جايات انشوفج "
نسرين
" الي تحاول تسوي شي ما تلوم الا نفسها "
سمر
" و اني اريد الوم نفسي يلة جوري " ذبينة حجاباتنا و الجبب و ركضنا على نسرين نضرب بيها بالعود رادت تشرد بس جوري ذبتلها رجل و وكعتها بالكاع و ضلينا نكتل بيها بقوة و هي صريخها ترس البيت نزلت نورس تركض و وكفت ع الدرج و سما راحت صعدت و نزلت بيدها المكص و حجابات اثنين
سما
" هاجن ربطنها "
جوري
" بعد ايدي جيبي "
اخذت الحجابات جوري و ربطناها و هي تغلط و تصرخ و ضلينا نضرب بيها و هي تصرخ جوري انكسرت العودة مالتها ضلت تضرب نسرين بايدها اكثر من ربع ساعة نضرب بيها لحد ما تعبنا و وخرنا من عدها اخذت المكص و كعدت يم راسها بالكاع
سمر
" مطولة شعرج موو بنت الصخلة " جان شعر نسرين واصل لحد نص ظهرها جريتة و كصيتة كلش ويا حد اذنها و هي تصرخ
جوري
" والله عاجبني اجويها "
سما
" بعد ايدي جويها "
ركضت جوري و جابت خاشوكة و جداحة تشغل بالجداحة و تخلي الخاشوكة ع النار تصير حارة و تخليها على رجل نسرين و نسرين عياطها وصل للمريخ تريد تكوم و ما تكدر لان مربطينها
كمنا من عدها و هي مربطة و تبجي لبسنا حجاباتنا و الجبب و طلعنا فتحنا الباب صار بوجهنا سامي صفن بوجهنا
سمر
" ها خير شبيك "
عقد حاجبة و كال
" ماتت نسرين لو بعدها "
سمر
" لا تخاف العار ما يصير بي شي ما تشوف انت و امك و ابوك و حيدر بعدكم بخير "
سامي
" مشكورة اصلاً جاي الم ملابسي و طالع من بيت النداف كلهم "
سمر
" دفعت مردي امشي جوري " طلعنا للشارع العام اني و جوري اخذنا تكسي و رجعنا للبيت الدنيا مغرب وصلنا للبيت
عمة فردوس
" شنو هل استهتار وين رحتن "
سمر
" رحنة أدبنا نسرين "
عمة فردوس
" شسويتن يمعزايات "
جوري
" ما سوينة شي بس ربطناها و كسرنا الماسحة عليها و انوب كتلناها بايدنا انوب كصينا شعرها و انوب جويناها بالنار و بس "
عمة بدرية
" ما كايلات شي "
بيبي لبابة
" بعد ايدي تعال احبنجن "
رحنة يم بيبي لبابة ضلت تبوس بية اني و جوري لليل شيخ بهاء طلب من نور تجهز نفسها لان ثاني يوم يرجعون للبصرة و طلب ياخدها ويا و همة عاقدين سيد بقى بس يعقدون محكمة و نور طلبت من عندا ما يسوون عرس و هوا وافق و كال بس يسوي عزيمة للناس يعلن بيها زواجة
بليل صافنة اشلون اقنع نور تطلع من قوقعة حزنها جهزت نفسها رادت تنام و هي بالكوة تمشي مهدود حيلها يمكن الي صبرها انو ما تعبت هواي على زهراء
سمر
" نور كومي عندي موضوع وياج "
نور
" احجي هنا ما بية حيل اكوم "
سمر
" موضوع كلش مهم تعاي جوة " اخذت نور بالكوة تمشي نزلنا جوة الصالة فارغة كعدنا بيها
نور
" احجي شعندج "
سمر : جنت محتارة منين ابدي نور جانت حيل عاطفية كلت اجيها من باب العاطفة ما عندي غير هل طريقة حتى اكدر اخلي نور تعيش حياتها و اغيض بيت صبري
نور
" شو صفنتي شبيج ما تحجين "
سمر
" موضوعي يخص شيخ بهاء "
نور
" شبي بهاء "
سمر
" بهاء حيل تعب خطية و جان رايدج من زمان مهما كانت مصيبتج جبيرة لا تقصرين ويا و لا تكونين بعيدة عنه خطية كوني الة زوجة فعلاً كوني شيخة الة لا تخلينة ينقهر "
نور
" شقصدج من كل هل كلام "
سمر
" بهاء عمرة اكثر من 35 سنة خطية بهل عمر ما يكون عندا ولد و حرام عليج تحرمينة "
نور عقدت حاجبها مستغربة
" شبيج سمر مصخنة فهميني شكو "
سمر
" كلامي واضح اقصد داوي جرحج ببهاء "
نور
" انتي شايفة هل موضوع وقتة "
سمر
" اي وقتة لان ما ندري اشوكت ننجمع بعد باجر من الصبح ترحون للبصرة و انتي حتى من العرس حرمتي و عوفي العرس يولي بس الج يومين كون يكون زواجكم تام "
نور
" بس سمر "
قاطعتها و اني اكللها
" لا تحجين شي كومي خلي انام حتى ترتاحين و فكري بكلامي كلش زين و اذا مو لخاطرج لخاطر الشيخ بهاء "
صعدنا و انتبهت نور صفنت معناها كلامي خش عقلها ادري بيها حيل تعبانة و محروك گلبها على بنتها بس تكدر تعوض الراح و تعوض الشيخ بهاء ثاني يوم راحو بهاء و نور و احنة ملتهيات بالدراسة يومين و اجة عمو حازم
عمو حازم
" اريد اكللكم شغلة بس كون ما توصلونها لنور "
بيبي لبابة
" خير يمة شصاير "
عمو حازم
" حيدر ما ينعدم "
سمر
" يا ليش مو انحكم اعدام "
عمو حازم
" جليلة و اخوها مخلين محامي كلش زين و دافعين اشكد فلوس حتى يتغير الحكم و انحكم حيدر بس 20 سنة "
عمة فردوس
" و الحكومة و المحكمة عافت مخافة الله و الحق و الباطل و تشتغل بالفلوس مو "
عمو حازم
" الحاكم الي يخاف الله راح ويا الامام علي و اليوم جليلة تباوعلي و تكلي والله الا فترة و اطلعة من السجن ما اخلي يضيع من عمرة عشرين سنة كلتلها شتسوين سوي شعلية بيكم ترجع تكلي انتظروني سنة و اطلعة "
خالة منيرة
" خليهم نارهم تاكل حطبهم معلينة بيهم "
جعفر
" و سامي ماكو مختفي اخواتة يكولن لم ملابس و سلم عليهن و راح "
خالة منيرة
" الله يكون بعونة هم الي صار ويا مو سهل "
سمر : صعدت فوك كملت دراستي و بليل خابرت نور
سمر
" اي بشري شسويتي ما سويتي "
نور
" شنو شسوي "
سمر
" انتي و بهاء تم زواجكم لو بس بالاسم متزوجين "
نور
" ههههه ولج انتي شكو تفترين وراي "
سمر
" اسمعي تكومين تجهزين نفسج الة و روح بابا باجر اخابرج و اعرفج اذا تجذبين اذا ما صار شي بيناتكم اخابر بهاء و اخلي يتزوج ترى حرام عليج حارمة زوجج خلي ع الاقل يصيرلكم ولد يعوضج عن زهراء و يسندكم لكبرتكم مع السلامة " سديتة بوجهة و كلت خلي اضغط عليها شكو دافنة نفسها
سحر : حياتي ويا رسلان كلش طبيعية مثل كل اثنين صح بالبداية جان عندا نوع من البرود لكن هسة لا يسولف و يضحك و يتشاقة وياي و خالتي العلوية ام رسلان مستحيل اكو مثلها بالدنيا صارتلي ام الية و دائما تنصحني اشلون احافظ على زواجي و دوم تدعيلي يصير عندي طفل و دائما اشوفها تقرا قرآن اكثر من نص يومها بس تقرأ قرآن
سحر
" خالة ليش تقرين القرآن بكثرة "
العلوية ام رسلان
" كل حرف من القرآن لو قريتي من كل گلبج و بكل ايمان و كون اطبقين كلام القرآن مو بس تقرينا ثقي و اعتقدي تلكين كل حرف شمعة بكبرج "
سحر
" كم مرة خاتة القرآن خالة "
ام رسلان
" هههه يمكن اذا اكلج ما تصدكين بس من مات ابو رسلان لليوم اني روحي بالقرآن اقرا و اهديلة و اني خاتمة القرآن اكثر من 25 مرة "
سحر
" ما شاء الله زين من تقرينا و تكملين و تعيدينا ما تحسين بملل انج دا تقرين نفس الشي و اكيد حفظتي هواي من عندا "
ام رسلان
" والله كل مرة اقرا بي احس اول مرة اقراه اتونس بالايات افرح بالقصص كلامة و مواسات ربانية تخبل "
سحر : كلام ام رسلان حيل حلو و هي حنونة و محبوبة صاحني رسلان جان فوك
رسلان
" سحر تعاي موبايلج يدك "
صعدت لكيت نور داكة علية رجعت دكيت عليها سلمت عليها و سولفتلي على سمر و سوالفها ضليت اضحك
سحر
" طبعاً كلام سمر صحيح خطية لا تظلمين الشيخ وياج "
نور
" والله احس صعب امشي حياتي من بعد بنتي "
سحر
" طير بالجنة و شفيعة الج بالعكس مشي حياتج يصيرولج اولاد ونسة الج و يعوضونج عن زهراء و سند لابوهم "
نور
" والله ما ادري "
سحر
" ماكو ما ادري كومي مثل ما كالت سمورة جهزي نفسج للولد و ياريت تذبين الاسود مو ينام و بكعد عبالك غراب يما "
نور
" هههه عابتلج هسة شسوي "
سحر
" يعني شنو شسوين سوي الي تسوي كل مرة لزوجها "
نور
" راح اجرب و الله كريم يلة باي "
سحر
" الله وياج حب "
سمر : مر الايام و الحمدلله نور انفكت عقدتها و خلت الشيخ يتقرب عليها و قنعناها ذبت الاسود كلها بعدها مقهورة على زهراء بس الحمدلله على كل حال صبري طلع من المستشفى بس حيل تعبان سامي ماكو عنه اي اخبار و جلال و سكينة هم مختفين كل بيت صبري ما نعرف شي عنهم يرحولهم عمة فردوس و عمو حازم يشوفون صبري و الي عرفناه نسرين تاركة البيت و ما يدرون بيها وين ولت
اركان حيل افتقدة و مرات اكول شبية افكر بالولد خلي الله يسعدة شعلية بي عايدة محتارة بحملها ماكو شي بحياتها مخلصتها بين البيت و الجامعة و اكلهم لو مطعم لو مرات خالة منيرة تطبخلها شي مشتهيتة و ادزة الها
اجت عطلة نص السنة و ما عدنا شي نسوي اني و جوري لحد الان ما ذابات الاسود و خالة منيرة و عمة فردوس و بيبي همات ما ذابات الاسود هواي حجن ويانا و بس احنة قافلات
اجاني اتصال من لبنى باول يوم العطلة سلمت علية و فتحت موضوع وياي
لبنى
" اركان يريد يشوفج "
سمر جنت متمددة ع الجرباية بس جابت طاري اركان كمت بسرعة وكفت
" يريد يشوفني شيريد مني "
لبنى
" يكول اذا تكدر تجي للشقة مال وسيم احجي وياها بشي مهم "
سمر
" ام وسيم موجودة لو لا "
لبنى
" اي والله العظيم موجودة "
سمر
" ماشي اشوكت يريد نتشاوف "
لبنى
" هوا اليوم اجة يبقى يومين و ياخذ ام وسيم و يرحون للناصرية "
سمر
" ماشي اذا كدرت باجر اجي "
لبنى
" تمام يلة باي حبي "
سمر
" الله وياج " وكفت كدام المرايا صفنت على نفسي ليش ما اقبل باركان شاب حلو و مرتب و ابن حسب و نسب فززتني جوري دخلت للغرفة
جوري
" حبيبتي الصفنة مو الج "
سمر
" ادري الج "
جوري
" يا ادب سز شبيج "
سمر
" ما بية انتي شبيج "
جوري
" صار اكثر من شهر ما شايفة ايسر "
سمر
" اكلج شي "
جوري
" كولي "
سمر
" احس ايسر راح يكون قريب عليج بس ما تنجمعون ما اعرف ليش هل احساس "
جوري
" عوذة من هل احساس "
سمر : ثاني يوم كلت لخالة و كالت لعمو اروح لصديقاتي و قبل و جعفر وصلني لبيت لبنى و من بيت لبنى اجة وسيم اخذنا للشقة مالتة
سمر
" عليك الله وسيم امك موجودة لو لا "
وسيم
" اي والله و حتى كلتلها من نوصل انتي فتحيلنا الباب حتى تشوفج سمر "
سمر : وصلنا للشقة مال وسيم و صدك طلعتلنا ام وسيم سلمت عليها و دخلت بس شفت اركان گلبي رجف و حتى ضيعت نفسي
كام وكف من شافني جانت ضحكتة و فرحتة واضحة حيل
اركان
" اشلونج سمر "
سمر حاولت ابين طبيعي و ما مهتمة
" الحمدلله زينة و انت "
اركان
" كلش كلش زين "
دخلو وسيم و ام وسيم و لبنى للغرفة و احنة بالصالة
إركان
" نكدر نعتبر هاي الكعدة الرؤية الشرعية "
سمر
" شنو "
إركان
" يا بنت الناس من الاخير اني لا اعرف احجي و لا اعرف اجمعلي كلمتين كدام بنية خلي انطيها الج طك بطك اني احبج و رايدج على سنة الله و رسوله و لا تكلي ما اعرف امسح و ما اعرف اغسل و ما اعرف اطبخ حتى لو اني اجيبلج خدم و انتي ضلي كاعدة و مكابلتني هم قابل يلة نقرا الفاتحة تسهيل امر "
سمر
" بس اني بعدني ما وافقت "
اركان
" بلة باعيلي "
باوعتلة صفن علية ثواني و غمزلي ضحكت
اركان
" ها باع موافقة اقري الفاتحة و اذا ما حافظتها اقري سورة الكوثر هم خير و بركة "
ضحكت و ضليت مدنكة حجة بصوت ناصي
اركان
" ها شنو "
باوعتلة و هزيت راسي
" موافقة "
اركان
" يا بعد گلبي هلهلي عمة ام وسيم "
طلعت ام وسيم و هي تهلهل بوستني و اجت لبني بوستني و باركولي
وسيم
" و اخيراً راح نخلص من سمر و اركان "
سمر : ضليت يمهم شويا انوب وصلوني للبيت وسيم و لبنى دخلت للبيت حيل فرحانة ما كلت لاحد و لان اركان هاي الفترة ما يجون يخطبون لان عندا شغل يكملة يلة
شهر الثاني اعتقد كان يوم 28 كانت عطلة نص السنة خلصانة و راجعين ندرس اتصلت علية نور
سلمت عليها و كلتلي
نور
" سمر اريد اكلج شي "
سمر
" شبي صوتج يرجف و خايفة احجي شصاير "
نور
" سمر اشك بنفسي حملت "
سمر
" يا عمري ان شاء الله بس شبيج خايفة "
نور
" ما اريد احبل هسة "
سمر
" اكول انطمي احسن كليلي حللتي لو لا "
نور
" لا ما حللت بس شوفي اني من حملت بزهراء ما طلعت علية اعراض الحمل بس تقلصات قوية ابطني و خاصة من الجانب الجوة و هسة هم نفس الشي "
سمر
" اي لعد روحي حللي شمنتظرة "
نور
" ما ادري شو خايفة "
سمر
" اخ يا بوية كون انتي يمي الا اكطعج روحي حللي و تعالي بشريني يلة "
نور : ما اعرف شنو نوع الخوف الي كان عندي يمكن جنت خايفة اخسرهم مثل ما خسرت زهراء او يمكن ما مستعدة للحمل هسة عائلة بهاء كلش حبابين و على نياتهم ابو بهاء متوفي و ام بهاء مرة جبيرة بالعمر بهاء هوا الجبير و عندا اثنين اخوان ما عندا اخوات اخوان بهاء الياس متزوج و زوجتة متوفية و اسحاق زوجتة ثناء كلش طيبة و حنونة و اني وياها مثل الصديقات و اكثر بيوم الي شكيت بنفسي حامل و خابرت سمر بعدين خابرت بهاء كلتلة تعبانة و اريد اروح احلل وافق اروح نزلت حاجيت عمتي
نور
" خالة اريد اروح لمختبر اني و ثناء علمود احلل و خابرت بهاء و قبل "
ام بهاء
" ليش يمة بيج شي "
نور
" خالة راح اكلج بس بعدني ما متأكدة "
ام بهاء
" اي احجي "
نور
" اشك بنفسي حامل "
بعدني ما مكملة كلامي ضلت تهلهل طلعت ثناء من غرفتها تركض
ثناء
" شكو ولكم "
ام بهاء
" نور حبلة "
ثناء
" يا صدك كلللللللللللوووووووش "
نور
" يمعودات بعدني ما متأكدة هسة نروح اني وياج للمختبر و نحلل "
ثناء
" رايحة ركض اكول لاسحاق و اجي "
راحت ثناء تكول لاسحاق زوجها و اني ضليت كاعدة ما ادري شبية و لا فرحانة و لا متحمسة
ام بهاء
" شبيج ليش مكدر خاطرج خافن بهاء مزعلج "
نور
" ما ادري عمة شو خايفة "
ام بهاء
" خايفة تحبلين و يرحون مثل زهراء مو "
نور
" اي والله خالة "
ام بهاء
" لا تخافين يمة الصار مستحيل يتكرر مستحيل سلمي أمرج لربج هوا يحلها "
طلعت ثناء من الغرفة لابسة عبايتها و رحنة اني وياها تمشينا للمختبر مو كلش بعيد علينا فحصتني الدكتورة الي بالمختبر و سحبتلي دم و كعدنا ننتظر اني و ثناء برة
ثناء
" شبيج عبالك ميتلج واحد اليوم "
نور
" تدرين خايفة عبالك وحدة شايلتلها ابن حرام ما ادري شبية والله "
ثناء
" كولي يا الله و اقري الفاتحة لام البنين"
ضلينا كاعدات شوية طلعت البنية كالتلي الف مبروك عيوني حامل الله يكومج بالسلامة
ثناء هلهلت بالمختبر اخذت التحليل و طلعنا
ثناء
" الف مبروك ربي يتمملج على خير "
نور
" الله يبارك بيج "
ثناء
" تعاي خلي ناخذ منا بقلاوة هذا محل مال حلويات البقلاوة مالتة تجنن "
نور : اخذنا بقلاوة و رجعنا للبيت دخلنا خالتي كاعدة بالصالة و مقابيل الصالة غرفة الياس اخو بهاء الي زوجتة متوفية فتح باب الغرفة و طلع باوعت و انصدمت صورة انهار ع الحايط مال الغرفة وكعت مني العلاكة و
صحت انهاااار .........
يتبع...
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا author_abu_joud
للتواصل فيس بوك Mohammed Fadhel