#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الثامن_عشر
بارت هدية عيد ميلاد احد المتابعات كل عام و هي بالف خير و وعافية
آنه بلياك مدري شبيه مابيه
زلف وبلآيه ترجيه
درب مآ بيه كُل جيه!
نهر فآض وتبع ميه،
رجع بس ما لكاله جروف..
سمر : كاعدة فوك و اتصلت علية قمر رديت عليها اجاني صوتها تبجي بقوة اخترعت فوراً كمت وكفت
قمر : سمر الحكيلي راح ياخذوني فصليةةةة
سمر : ها شنو شكو
قمر : راح ياخذوني فصليةة
سمر : ليش شنو شصاير يمعودة
قمر : ابن عمي دعملة واحد و مات و صارت كعدة و اهل الميت يردون فصلية ولج تعزيت و تصخمت و ابوية كالي انتي ترحين فصلية
سمر : انتي شعليج هوا ابن عمج و خلي وحدة من اخواتة تروح انتي شكو
قمر : ماكو ابن عمي عندا اخت وحدة و متزوجة
سمر : و طبة مرض خلي يكتلون ابن عمج و خلي تصير دم و قاتل و مقتول انتي شكو شعليج
قمر : شسوي فهميني اشلون اخلص نفسي من هل مصيبة و ابراهيم
سمر : بس اهدي خلي نشوف شنسوي ما ادري هل سالفة مال عشاير صارت اووووووف اووووف
يا يوم ياخذونج يردون
قمر : الاربعاء ابوبة كالي
سمر : ماشي هسة انتي بس اهدي بلكت اكدر احلها ... سديتة من قمر و صفنت فكرت اتصل على وسيم و يدزلي رقم شيخ فيصل ابو اركان
بس استحيت من الزلمة هوا غريب عاد نزلت لعمو حازم و سولفتلة كلشي
كلتلة و قمر خطية تحبلها واحد من الجامعة ماكو فد حل نكدر نساعدها
عمو حازم : خلي اشوف شيخ بهاء ولو اني كلش خجلان من عندا
سمر : يا عمو ليش
عمو حازم : لان شيخ بهاء طلع خاطب نور من ابوج قبل لا يموت
سمر : ياااا و هسة بس لا الشيخ زعلان
عمو حازم : لا لا ما زعلان بس والله ما جنت ادري و زوجت نور
سمر : صوج الشيخ وين جان ما يحجي يستحي شنو
عمو حازم : المهم خلي اخابرة و اشوفه
سمر : كام عمو طلع برة يخابر و اني ضليت منتظرة كاعدة شوية و دخل عمو حازم كلتلة ها عمو بشر
عمو حازم : باجر من الفجر يطلع و يجينا شيخ بهاء بس شوفيلي صديقتج اهل الولد الميت وين و شنو عشيرتهم
سمر : صعدت ركض خابرت سمر كلتلها شسمها عشيرة الميت
قمر : عشيرة ******* بيت اهل الميت بمنطقة ******
سمر : نزلت ركض لعمو حازم و كلتلة و صعدت رجعت خابرت على قمر و كلتلها على الي سويتة و عمو و بهاء باجر يرحون للناس و بلكت تفض بغير الفصلية
قمر : سمر تتوقعين تنحل هاي سالفة عشاير و كلمة انكالت كدام شيوخ ما معقولة يتراجعون بيها
سمر : بس شوية تفائل و ان شاء الله خير
قمر : ابراهيم راسلني اشكد و ما رديت
سمر : باعي ردي و حاولي تكليلة عدكم شغلة ماتلكم احد اي شي لحد ما تنحل السالفه
قمر : ماشي خلي اروح اراسلة فدوة كلشي يصير كون تنطيني علم
سمر : اي اي اكيد .... سديتة من قمر و ضليت اصفن و ساعة اضحك يعني من مشكلة لمشكلة اكبر شنو الموضوع وين التالية
عايدة جانت هل فترة ملتهية تجهز بنفسها تطلع هي و خالة و مرة هي و عمة فردوس
ثاني يوم كعدت الساعة بالعشرة الصبح لكيت عمو حازم ماكو سئلت خالة عليه كالت قبل شوية طلعو هوا و شيخ بهاء
حازم : رحنة اني و شيخ بهاء لاهل الولد الميت جانو ناس كلش اوادم و فقرة ناس بسيطين كعدنا بالاستقبال بس اني و الشيخ بهاء و ابو الميت و اخو الميت
شيخ بهاء : حجي اني اصير شيخ بهاء شيخ عشيرة ***** العام و هذا حجي حازم يصير اخو المرحوم الشيخ عمران
ابو الميت : حياكم الله شرفتونا الله شاهد فرحتوني بجيتكم هاي
حازم : البقية بحياتك و خاتمة الاحزان و ان شاء الله ابنك بجنات الخلد
ابو الميت : حياتك الباقية الله يسلمك خوية
حازم : ضلينا نسولف اشياء عادية لحد ما جابوا الجاي راد الولد ينزل الجاي كدامنا
حازم : اوكف اوليدي لا تحط الجاي
ابو الميت : ها خوية ليش ما تشربون الجاي
حازم : ما نشرب الجاي اذا ما ناخذ الجايين عليه و مبين انت ابن اصل و اجاويد و حمولة و ان شاء الله ما ترد طلبنا
ابو الميت : شاهد ربي علية ما اطلعون منا الا تاخذون التردونة يكفي انتم كاعدين ابيتي شرف الية هذا الشي
حازم : الله يسلمك النة الشرف دايسين ابساطك
ابو الميت : اي خوية كول أمرني شنو طلبك
حازم : يا الله اولاً سمعونا الصلاة على النبي..... اي حجي ندخل بموضوعنا حجي احنة سمعنا انتم طالبين فصلية احنة اليوم جايينك و نريدك تتنازل عن الفصلية و اعتبرها صدقة جارية لوجه الله و المرحوم ابنك .... الرجال دنك راسة و كال لا اله الا الله و رفع راسة و كال
ابو الميت : خوية اشربو جايكم و الجايين عليه تم و البنية ما نريدها فصلية و عتقناها لوجه الله و حق ابني المقتول الله الياخذة اشربو جايكم اهلا و سهلاً بيكم حياكم الله
حازم : تشكرنا من عندا و ضلينا شوي نسولف و طلعنا من طلعت خابرت على سمر
سمر : متت و اني انتظر عمو حازم و قمر كل شويا تخابرني و ولا كعدت مخلصتها افتر بالبيت حتى ريوك ما اتريكت اتصل علية عمو حازم بسرعة رديت
عمو حازم : شنو السالفة بعدة حتى ما مسوي طوط
سمر : ههههههه هوا غير صافنة صار ساعة ع الموبايل بشر شصار وياكم
عمو حازم : حضري نفسج بسرعة بس ارمش عليج اطلعيلنا اني و شيخ بهاء و انتي نروح لبيت صاحبتج نبشرها ما ياخذونها فصلية
سمر : اي اي هسة ركض ابدل ... رحت بدلت بسرعة اني بعدني لابسة اسود حتى بعرس نور و عقد عايدة ما نزعتة بس ورد و نور و عايدة نزعن الاسود اتصل علية عمو طلعت لكيتهم كاعدين بالسيارة سلمت عليهم
شيخ بهاء : اشلونج خوية سمر
سمر : الله يسلمك شيخ الحمدلله بخير .... دليتهم على بيت قمر دكينا الباب طلع ابو قمر هوا يعرفني رحب بينا دخلنا وكفنا بالحوش
سمر : بس نريد قمر عدنا كلام مهم و ضروري تسمعنا
ابو قمر : ها عمو سمر صاير شي
شيخ بهاء : كل خير بس نريد نحجي ويا الاخت
ابو قمر : اي هسة اصيحلها
سمر : ضلينا واكفين بالحوش طلعو قمر و ابوها رحت سلمت عليها و كلتلها جبتلج البشارة ... ضحكت و كلتلي
قمر : شنو يا بشارة
سمر : هسة عمو حازم و شيخ بهاء راحو لاهل الولد الميت و خلوهم يتنازلون عن سالفة الفصلية
قمر : بروح ابوج و امج صدك تحجين
سمر : اي والله... ضلت تبجي قمر و ركضت على عمو حازم جرت ايدة تريد تبوسها بس عمو ما خلاها و حتى خطية ابو قمر ضل يبجي باس راس الشيخ و عمو و يتشكر منهم و قمر تحضن بية و ام قمر من البيت و ضلت تهلهل
قمر : سمر احبج والله اموت عليج
سمر : حضنتها و كلتلها غير احنة اخوات ... بعدين همست بصوت ناصي يم اذنها كلتلها تلاحكي على نفسج و خلي ابراهيم بسرعة يجي يخطبج لا تماطلون بالسالفة
قمر : اي اي هسة بس ادخل احجي ويا
سمر : طلعنا من عدهم بس بالكوة توسلوا بينا نتغدا يمهم بس كلنالهم عدنا شغل صعدنا بالسيارة و رجعنة للبيت و الشيخ نزل ويانا اتغدا يمنه
سحر : نزلت حجيت ويا عمة و خالة كلتلهم اكو ضابط اكثر من مرة اجة للجامعة مالتي يصير اقارب احد الزملاء الي ويانا و الولد انعجب بية و راد يخطبني و الصراحه اني وافقت و الخميس راح تجي ام الولد و خالاتة علينا
عمة فردوس : هلا بيهم ان شاء الله ربي يسعدج و يتمم على خير بس كون خوش ولد
سحر : اي والله خوش ولد و انتم هم راح تسئلون عليه و تشوفون
خالة منيرة : اووف لو بيدي اخليجن يمي طول العمر بس شسوي هاي سنةً الحياة الله يسعدج يا بعد روحي تعاي
سحر : كمت حضنت خالة حيل و اشم بيها احس بيها ريحة امي
سحر : واكفة كدام المرايا مجهزة تفسي اليوم يجن ام رسلان و خالاتة خالة خلتني انزع الاسود و عمو حازم جاب كيك جاهز قطع من برة و عصاير و ضيافة مرتبة عمو و جعفر طلعو من البيت و كلنا كاعدين منتظرين النسوان و حتى نور و ورد اجن ساعة 3 اندك الجرس طلعت عمة فردوس فتحتة شفنة دخلن 3 نسوان
سمر : يا فدوة باعي اشكد حلوات عبالك دبب قطبية فدوة لله
سحر : ضحكت على كلام سمر لان فعلاً دخلن سمينات و كلش حلوات دخلن للبيت صلن على محمد و سلمن علينا و كعدن بالصالة
كعدن بيبي لبابة و خالة منيرة و عمة فردوس و نور و النسوان و احنة بقينا بالمطبخ راحت سمر خلت طبلات كدامهن و رجعت ودت الماي و اني شوية و رحت وديت العصير انوب لحكتني عايدة بالضيافة عمة فردوس عرفت النسوان علينا
ام رسلان : صلاوات على النبي بناتكم يخبلن بس كليلي منو بيهن سحر
نور : هاي اختي سحر
خالة رسلان : صلوات على محمد تخبل حقة رسلان متخبل عليها
ام رسلان : اي والله رسلان يسولفنة عليها يكول بس عيونهة تجنن تعاي يمة ابوسج
سحر : اتقربت من ام رسلان بوستني ريحتها تجنن و كلش حنينة و مبينات طيبات خالت رسلان فرت ايدها علية و كالت
خالة رسلان : اللهم صل على محمد وال محمد محوطتج بسورة ياسين من كل عين
ام رسلان : انتي هاي عيونج حقيقيه
سمر : اي خالة ترى اختي ع الطبيعة
ام رسلان : هههه صلاوات على محمد الله يحفظجن تخبلن كلجن دخلتن لگلبي
سحر : ضلن يمدحن برسلان و شغلة و ممتلكاتة و الله رازقة انوب ام رسلان طلعت ورقة من جنطتها و انطتها لعمة فردوس
ام رسلان : هاي ورقة بيها رقم موبايلي و بيها عنوان بيتنا حتى تخلون زلمكم تسئل علينا
بيبي لبابة : نتشرفة بيكم خية
سحر : شويا و راحن النسوان و ام رسلان كل شويا تصلي على محمد و للعصر اجة حيدر اخذ نور و ورد هم اجة فؤاد اخذها صعدنا فوك لليل دك موبايل سمر ردت عليها شوية و كامت و لطمت على خدها و هي تحجي بالتلفون كالت
سمر : ولج منين حامل يمعزاية .......
يتبع...
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا author_abu_joud
للتواصل فيس بوك Mohammed Fadhel