#بنات_حجي_عمران
#الفصول_الاربعة
#للكاتب _ محمد_ ابو جود
#البارت_السابع_عشر
وجع وحشه وظما ايفتت
أناشغ والدموع اتكت
شاورني الجرح عوفه وكَلتله اسكت
عبد الكريم القصاب
سمر : انت مو غريب انت عرف و اني متأكدة لعد اشلون تعرف الشيخ بهاء
الرقم الغريب : الي عندي كلتة الج و الباقي بيدج لا تنسين خلال شهر اريد اسمع سحر و رسلان متزوجين
سمر : سد الموبايل بوجهي ضليت صافنة شحجي شسوي المن اروح منو هذا حاولت اتصل على رسلان طلعلي مغلق صحت لسحر صعدتلي
سحر : صاحتلي سمر صعدتلها حجتلي كلشي ع الصور و على رسلان حسيت الدنيا افترت بية ضغطي صعد خشمي طك دم و كل جسمي ضل يرجف
سمر : بس اهدي خلي نعرف نتصرف أنت تعرفين الولد
سحر : حجيتلها كلشي عن لقائاتي برسلان
سمر : زين يعني تندلين المحل الي جان بي
سحر : ما ادري يمكن اذا اشوفة اعرفة يعني هوا من 2010 شيذكرني بي بالضبط
سمر : باعي حاولي ترحين للسوك و اذا تلكين المحل و بي الولد حاجي بس خلي ينطينا رقم رسلان و الباقي كلة علية
سحر : شتسوين
سمر : بس روحي جيبيلي رقم الولد و هاهية
سحر : كمت كل جسمي يرجف غسلت وجهي و نزلت لجوري
سحر : جوري اريد اروح للسوك تجين وياي
جوري : اي خوش اروح بس خلي اكول لبابا
سحر : باعي كليلة على اساس رايحين الج انتي تردين ملابس للجامعة لان اني استحي اكلة الية
جوري : خوش هسة اكلة
سحر : راحت جوري كالت لابوها و قبل و طلعنا اني اتذكر المحل بصفه كوزمتك ضلينا نمشي و اتلفت و ادور بعدين لكيت المحل بس يا ترى هوا لو تاركة الولد دخلت اول شي جوري لمحل كوزمتك حتى اخليها مشغولة بالمكياج و اطلع و فعلاً جوري انشغلت بالمكياج و هل سوالف
سحر : جوري كملي الي ترديهن و لحكيني اني بهذا المحل اشوف شجايبين ملابس
جوري : ماشي روحي بس خلي اشوف كم شغلة اجيبهن و الحكج
سحر : رحت للمحل و ما خليت اية ما قريتها دخلت لكيت ولد تقريبا يطلع عمرة بالـ 15 سنة كلتلة وين صاحب
الولد : عمو سلام راح يشرب جاي هسة يجي
سحر : فدوة روح صيحلة كلة بنية محتاجتك بشي ضروري و كلة من طرف الضابط رسلان
الولد : اي خالة هسة اروح ركض
سحر : راح الولد ركض و اني ضليت من التوترت اكل باظافري شوية و دخل الولد الي جان ويا رسلان بالسيارة بيوم ما نزل التاير بعدني ما حاجية اتفاجئت برسلان دخل وراه
سلام : هلا خوية محتاجة شي هذا رسلان
رسلان : هاي انتي شجابج لهنا خير كالو محتاجتني
سحر : التوتر زاد عندي بس شفت رسلان ما ادري شلون احجي بس طكيتها طك بوجهة
سحر : اني و اختي طايحين بمشكلة كلش جبيرة و حتى انت طايح بيها و ضروري تنطيني رقمك حتى اختي تحجي وياك و تفهمك و لا تفكر عبالك اجذب عليك حتى بس اخذ رقمك لا والله فعلاً طايحات بمشكلة جبيرة حيل
رسلان : بس على كيفج احجيلي شصاير
سحر : اني ما اكدر احجي وياك بس اذا تكدر تنطي رقمك انطي لاختي و رجاءً لا تفكر بينا سوء و عبالك....
رسلان : يابة افتهمت ما اضن بيكم سوء هاج هذا رقمي
سحر : ردلي الرقم و اني دا اسجل بي دخلت جوري عقدت حواجبها مستغربة و كالت شنو هاي شكو
رسلان : انتي منو
جوري : سحر شكو
سحر : ماكو شي اني بعدين افهمج ... اخذت الرقم و ردت اطلع كان الخوف و الرهبة مسيطرة علية شراح يصير يا ترى بالباب و ما حسيت غير وكعت للكاع متخربطة صحيت على نفسي رسلان و جوري و سلام و الولد الصغير ملتمين علية
رسلان : هاي وكعتج بسبب المشكلة الصايرة
جوري : ممكن احد يفهمني يا مشكلة و شكو شصاير
سحر : ماكو شي خلي نروح
رسلان : تعالن اوصلجن
سحر : لا خوية احنة نروح وحدنا
رسلان : تعالن اوصلجن ما تكدرين تمشين
سحر : اصر رسلان يوصلنا صعدنا بالسيارة و اني اضرب أخماس باسداس اشلون رسلان راح يشوف الصور و شنو راح تسوي سمر ااااخ يا ربي وين تاليتي دلتة جوري ع البيت اول ما وصلنا اندار علينا مستغرب
رسلان : هذا بيتكم !!!
جوري : اي خوية هذا بيتنا مشكور
رسلان : صدك تحجون
سحر : شكو شبيك
رسلان : هذا مو بيت سمر
سحر : اي هي اختي سمر
رسلان : ضليت صافن شنو هل صدف الي جاي تتراكع يعني اني قبل فترة كاعد ويا اخت سمر و احجيلها على سمر معقولة والله ضليت صافن نزلن البنات و اني رحت
سمر : رجعت سحر جايبة رقم التلفون ما ادري بيا وجه ادك عليه و شحجي فد اختنكت بيومها حسيت نفسي راح اموت
كاعدة و صافنة ع الرقم و اشلون راح اتصل يا ترى يلبي طلبي لو نوكع بمشكلة اكبر كمت للغرفة كعدت و اتصلت شوية و رد اول ما رد بجيت حسيت نفسي انذليت
رسلان : لا تبجين تدرين تأذيني هيج والله
سمر : ما كدرت احجي بس ابجي لان كل ما اوكع بمشكلة اروح لرسلان
رسلان : كافي لا تبجين احجيلي شبيج اسمع بس لا زوجج سوالج شي
سمر : استغربت يا زوج انوب تذكرت اني كلتلة عرسي بالعيد استغليت هل شغلة لصالحي حتى يقتنع يتزوج سحر و ما يتأمل بية
سمر : اكدر التقي بيك و نحجي
رسلان : اشلون اطلعين من البيت و انتي عروس
سمر : مو اليوم خلي هل يومين نلتقي
رسلان : ماشي اشوكت ما تحبين نلتقي
سمر : رسلان شكرا
رسلان : بالخدمة اختي هسة اترخص اني
سمر : الله وياك ... سدا رسلان و اني صافنة و اطلب من الله كون تنحل السالفة على خير اجتني رسالة من نفس الرقم الغريب
الرقم الغريب : اذا تحاولين تتقوين برسلان لان ضابط احب اكلج هذا الرقم مو بأسمي و اذا كدر و كمشني راح انكر و الصور موجودات عند غيري يكدر يفضحكم بكل سهولة تخايلي حال عمامج لو اخواتج لو شيخ بهاء من يشوفون بنات عمران مفضوحات هههههه
سمر : عدت الرسالة اكثر من مرة و النار تاكل بية اكل شسوي خاف رسلان يتهور لو يصعب الامور دخيلك يا ابا الفضل كون تنحل على خير احلفك بستر زينب استر سحر
سحر : بعد المشكلة الصارت كمت لا اكل و لا انام حتى الماي بالكوة ابلعة و كلها انتبهتلي و الي يسئل اكلة مريضة ثاني يوم رحنة لنور معزومين عشا يم بيت صبري بس سمر ما راحت
سحر : كعدت ويا نور ورة العشا و كلتلها اشلونة حيدر وياج
نور : يخبل والله مو مثل ما انتن مفكراتة و روح بابا فد يحبني و مدللني و البارحة بليل سئلني وين احب اروح شهر العسل و كلتلة لتركيا و كال اسبوع و نروح
سحر : انتبهتلها تحجي بكل فرح و مبينة صدك مرتاحة لان من تحجي بي عيونة تلمع
جوري : من جنة يم بيت صبري اتصلت علية صديقتي كمت ارد عليها جانوا كلهم كاعدين بالاستقبال ورة العشا و يشربون جاي طلعت بالحديقه الخلفية حتى اخابر و اتفاجئت و اني اشوف جلال ابن صبري و سكينه متحاضنين و وجه جلال بوجه سكينة انوب تقرب باسها من شفايفها و كاللها لا تهتمين كم يوم و نطفر منا
ضل كل جسمي يرجف هاي شنو يا رب الكائنات سكينة زوجت سامي عدها علاقة ويا جلال و الصوج مو بسكينة الصوج بجلال اشلون يخون اخوه رجعت جوة بدون ما يشوفوني بس وجهي اصفر و جسمي يرجف
حازم : شبيج بابا جوري
جوري : ها لا ما بية شي بس شسمة صديقتي مريضة خطية و انقهرت عليها
حازم : يلة ان شاء الله ما بيها غير العافية
عايدة : كاعدين ابيت صبري ع العشا و كلش ضايقني جلال صارت كعدت جلال كدامي صافن علية و نظراتة ابد مو حلوة لو يمد لسانة يلحس شفتة كلش لعبت نفسي على نص الاكل و كمت
سحر : كل شويا و اضربلي صفنة و اني افكر سمر راح تحل الموضوع لو لا و اذا ما انحل الموضوع شراح يصير معقولة انفضح كدام الناس كلها معقولة يا ربي الشريف ينفضح دخيلك ربي استرني
سمر : بقيت وحدي بالبيت شوية و اجة جعفر جاب اكل من برة و كعدنا ناكل هوا هم ما يدخل لبيت صبري صفنت على جعفر اكلة و اخلي يساعدنا لو لا جعفر عصبي اشلون تنحل هاي اذا انحلت اصلاً الله كريم ربي يسر الامور
رجعن البنات و سحر سولفتلي على نور و اشلون مرتاحة و اشلون حيدر محترمها و يحبها كلش ارتاحيت شريد من حيدر غير يحب نور و يحترمها
بس ضوجتني عايدة من كلتلي على جلال من يوم يومة مستهتر هذا
سمر : خلي نكول لعمو حازم عليه يربي
عايدة : لا يمعودة ما نريد مشاكل هي كم يوم و اروح لبيت زوجي
سمر : صعدت فوك لكيت جوري كاعدة كدام المرايا و ضاربتلها صفنة كلتلها جوجو شبيج .. ما ردت علية صافنة من الاخير وكفت يمها و هي ما تدري بية لحد ما ضربت ايدها
جوري : اسم الله اشوكت اجيتي
سمر : شبيج صاير شي
جوري : شوفي راح احجيلج شي و كليلي شنتصرف بس و روح عمو عمران و مستعدة احلفلج ع القران انو الي راح احجي كلة صدك
سمر : شبيج شهل حلفان مصدكتج بدون كلشي
جوري : مو الي راح احجي ماكو عقل يشيلة الله وكيلج شي حتى الحيوانات ما تسوي
سمر : شكو شبيج خوفتيني ترى احجي
جوري : بديت اسولفلها و هي ضلت تلطم على خدها انوب عاطت بية
سمر : اسمعي لج هذا كلامج هجمان بيوت لا سمعتي شي و لا شفتي شي رحتي اتعشيتي و اجيتي ماشي
جوري : اي اي ماشي
سمر : ضليت كل شوي اصفن حتى راسي ضل يوجعني الف سالفة و سالفة براسي بس سالفة جلال و سكينة ما صايرة و لا دايرة المسكين سامي كلش فقير و عاقل و رزن مرتة و اخو ضربتين ع الراس توجع
سمر : يومين و رجعت اتصلت برسلان اتفقنا نلتقي طلعت بحجة اشوف اماني و رحت لرسلان كلتلة موضوع كلش خاص اخذنا لمكان معزول
رسلان : مو خاف زوجج ما يقبل نروح لمكان معزول يخاف عليج حقة
سمر : جنت اشوفة اشلون ضايج و يحجي من ورة خشمة بس شسوي ما بيدي شي خلي جذبة زواجي تمشي لحد ما يتزوج سحر و تالي الله كريم
كعدنا بمكان وحدنا و بالكوة بديت بالموضوع لان ما اعرف منين ابدي و شسوي و اشلون احجي مثل هيج موضوع حجيتلة كلشي
رسلان : وين الصور
سمر : صعبة اشوفك الصور
رسلان : خلي اشوف الصور حتى اكدر اتصرف
سمر : بالكوة فتحت الصور بالكوة خليتة يشوفهن و بسرعة سحبت الموبايل
رسلان : سهلة انطيني رقم الي دزلج الصور و اسحلة سحل
سمر : لا فدوة مو هددني اذا انت تسويلة شي الصور يم واحد ثاني
رسلان : لعد شنو المطلوب و اشلون تنحل
سمر : حسيت نفسي كلش صغيرة كدام رسلان و خجلانة اشلون اكلة تعال اتزوج اختي والله هل يوم جان من اصعب الايام الي مريت بيها حسيت روحي مذلولة حيل
رسلان : احجي لا تستحين اني مثل اخوج صرت و ان شاء الله الي تردينة اسوي
سمر : رسلان تكدر تتزوج سحر حتى لو فترة مؤقتة فدوة باوع ..... قاطعني و هوا يكول
رسلان : اليوم ثنين الخميس امي و خالاتي يجن يخطبن سحر خلي تحظر نفسها
سمر : حسيت نفسي اختنكت معقولة رسلان يروح مني بس بلعت الغصة لخاطر سحر كمت وكفت و كلتلة ما اعرف اشلون اجازيك فعلًا الي دا تسويليا مستحيل انساه اكثر من مرة وكفتلي وكفاتك لا تعد و لا تحصى شكرا رسلان
رسلان : خلينا نروح و لا تنسين الخميس يجن امي و خالاتي
سمر : هزيت راسي اي و صعدنا بالسيارة وصلني قريب على فرع بيت عمي ردت انزل كالي
رسلان : اشلونة زوجج وياج
سمر : زين و كلش يحبني و حباب وياي
رسلان : الله يسعدكم خيتي
سمر : مع السلامة
رسلان : الله وياج
سمر : نزلت من السيارة و رسلان راح مشيت للبيت بخطوات ثكيلة متعبة مكسورة حزينة لحد يتوقع اني احب رسلان لا مستحيل بس تعودت عليه و على خبالة و عصبيتة الحمدلله من خلصت من هل مشكلة
"تكبر بعد كل ازمة تتخطاها...و يصغر العالم في عيناها"
دخلت للبيت اول ما دخلت شافتني عمة فردوس كلتلي تعاي عندي موضوع وياج
رحت وراها لغرفة بيبي كلتلها ها شكو
فردوس : شبيها سحر
سمر : شنو شبيها صاير شي
فردوس : اني جاي اسئلج لان حيل متغيرة لا اكل و لا شرب
سمر : ما ادري هسة اصعد و اشوفها ... صعدت فوك بالكوة امشي رجلية موتتني من الوجع والله
دخلت للغرفة سولفت كلشي لسحر ضلت تبجي
سحر : كانت ايام حيل صعبه و صعب اوصفهن كل لحظة افز و اكول راح يدخل عمو حازم عصبي و الصور وصلتلة و ساعة اكول رسلان ما راح يهتم هوا ولد ما يعيبة شي من اجتني سمر و حجتلي فرحت حيل و دعيت لرسلان من كل گلبي و بعد منتظرة شنو الي ضامتة الية الايام و شنو المصير الي اواجهة ويا رسلان
نزلت جوة مرتاحة لكيت ام ماجد يمنه سلمت عليها و دخلت للمطبخ اكل و سمعت ام ماجد تسولف لخالة و عمة و بيبي
ام ماجد : هاي رحمة مرت ذو الفقار سمعت بيها واكعة و طايح الطفل و هسة حبلة نوبت الاخرى بعدها ما داخلة شهر توها يمكن نص شهر
حجية لبابة : فلك طرهة بزونة و تحبل فوكة فوكة
عمة فردوس : عوفج منها يمة تولي شعلينا بيها
سحر : ضحكت بيني و بين نفسي هاي عود ذو الفقار كارههة و ثالث مرة يحبلها لو يحبها اشلون فعلاً حسافة الايام الضيعتها ويا ذو الفقار
سمر : كاعدة فوك و اتصلت علية قمر رديت عليها اجاني صوتها تبجي بقوة اخترعت فوراً كمت وكفت
قمر : سمر الحكيلي راح ياخذوني فصليةةةة....
يتبع...
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا author_abu_joud
للتواصل فيس بوك Mohammed Fadhel