♛ ♛ ♛ ♛ ♛ ♛ ♛ ♛ ♛ ♛
بارت طويل لعيونكم♥️
"شفاه مخملية"
بقلم: زهراء السلامي.
# روحي صبيره ،
ومشه بيها الرمل شمسين ! ،
وانت ، انت روحي تريد من فيّك شبر ...
♛ ♛ ♛ ♛ ♛ ♛ ♛ ♛ ♛ ♛
-غزل: عميدي خطب العاشگهه
-هجران(گلت بفرحة): يااا الف مبروووك يتهنون ان شالله
تفاجأت من غزل زادت بالبچي من گلت هيچ، صفنت عليهه واني مستغربه صدُك هيه ليش بالاساس دتبچي؟؟ درت وجهي اباوع لـ جواهر وشهد وهنه حالتهن بعد اسوء من غزل خصوصاً جواهر، ماحچت شي بَـس عافتنه وراحت بعيد عنه وشهد راحت لحگتهه، تعجبت من تصرفهن ومن تصرف غزل؟؟
-غزل شبيچ حبي تبچين؟ لازم تفرحيله راح يكمل حياته ويعيش ويه الانسانه اليحبهه
عاطت بوجهي
-غزل: اوووووف يالقهررر وينههه العاشگهه وعلييي امرعههه بيدييي
-هجران: يااا ولچ شبييچ صوووتج!!
تلفتت واشوف الناس تباوعلنه وعميد عيونه علينه، من اللتقت نظراتنه هز راسه بيأس واشر ؏ غزل افتهمتهه يسأل شبيهه، ابتسمت وهزيت براسي مابيهه شي بَـس ظلت عيونه علينه الى ان اجه قريب يمنه، همس بنتر
-عميد: هااا گلتيليهن ما تتحملين بعد
-غزل: حرااام عليك والله حراااام
-عميد: اششش بسچ غزل لا تفضحينه
-غزل: شگد انااانيييي
-عميد: غزززل كظي لسانچ لا اطلع لوعة گلبي بيچ
من گال هيچ باوعلي ودار وجهه، سحبهه من ايدهه وابتعدوا عني واني رجعت اگعد ويه الباقين، بكر همسلي
-بكر: شمالكم شصاير؟
-ابتسمت: دريت بعميد الدين خطب؟
-بكر بأستغراب: خطب؟؟؟!
-اي هسة غزل گلتلنه
-يمته هاي؟
-مادري بَـس تگول خطب العاشقهه
-بكر: هجران ترا مخي انلحس عميد يمته عاشگ حتى خطب العاشگهه؟؟
-هجران: يجوز يحب وانته متدري؟
-لا لا مستحيل معگوله ماحس عليه؟؟
-اي حبيبي عادي هواي اكو يحبون بالسكته ومحد يدري بيهم
هز راسه وظل ساكت، بَـس الحيرة واضحة ؏ وجهه هاي شبيهم ذوله عبالك گلولهم واحد مات شو كلهه گلبت وجهها وناس تبچي وجواهر وشهد الله اعلم وين راحن؟؟
ظليت گاعده بمكاني واكيد الفضول ينخر بيه بَـس لا لازم اقاوم وماهتم واتدخل بكلشي، ايي ترا كُلش عيب هسة يگولون عني حشرية وتدخل بشغلات متعنيهه
-بكر: اگلچ انه هسة ارد
-وين رايح؟
-بكر: هسة شمالچ بَـس شوي وارد
-اووّك لا تتأخر
هز براسه وراح عني، تابعته بعيوني وين يروح بَـس ضاع عن منظوري بسبب زحمة الناس، اتصلت بجوريه الي اختفت ولسه ما اجت، ومن جاوبتني الصدمة چانت مراح تجي!!! علبو تريد تروح للسوگ ومتحب مدينة الالعاب، هاي شنو يعني ابقى وحدي!! حتى جواهر ماكو مادري شبيهه ضاجت لو تخربطت شمدريني شصار
مرت تقريباً ساعه وبكر ماكو، واني گاعده ويه اهله مبتسمه مجامله وطالعه روحي، تدنت عليه ام عميد الدين خاله انتصار وگالت بهمس
-انتصار: اگلچ هجران اختچ شگد عمرهه؟
-قصدچ ندى؟
-اي هيه
-اصغر مني بسنه يعني هستوهه حَ تطب الـ 17 سنة
-انتصار: هااا زين
سكتت شويه واردفت
-انتصار: زين هلچ يزوجوهه؟؟
-والله مادري خاله بَـس حسب علمي ماما متقبل تگول بعدهه صغيره
-انتصار: زين واذا خوش غسمه (قسمه)
-خاله يعني منو هالشخص؟ خليني اگول لماما يجوز تقبل
تلفتت يمين ويسار واتدنت اكثر عليه، اشرت بعيونهه ؏ عميد الدين الي هستوه رجع ويه غزل الي عيونهه خابطات حمر من البچي
-انتصار: لوليدي عمييّد
فتحت عيوني بصدمة عززااا تصير بته!!
-هجران: خاله سيد عميد مو خطب؟!!
-انتصار: لا شوفي هو ماخطب يعني بَـس تدانشنه بالسالفه، عساس اخطبله بت خالته سارة ومادري احسنهه چبيرة وخاف ماتخلف
-هجران: هاا شگد عمرهه
-انتصار: 27 سنة
-لعد ليش متخلف؟
-انتصار: مو انه اخافن هو گوة قنعته يتزوج خاطر يصير عنده فريخ وليد انوبينه مايصير شسوي بيهه حاطتهه ؏ چبدي
سكتت وماعلقت بشي وگلتلهه خير ان شالله، بَـس رجعت تلح عليه بموضوع ندى، ردت اسألهه هوه مو عساس يحب بت خالته وعاشقهه ؏ كلام غزل شكو ميتزوجهه؟ بَـس مابيه حيل النقاش لان بالي ويه بكر الي اختفى..
گمت گلت خليني ادور عليه شنو هاي عافني وراح، وقفني صوت مرتضى من عاط
-مرتضى: هجرااان وين رايحة؟؟
-ادور ؏ بكر شو گال شويه ويرجع ولسه ما اجه
-مرتضى: چا ياخويه انتي ترحين تدورين بنص هالوادم؟! بله صارلچ شي لو ضعتي وعلي عميد الدين يمرعنه
ابتسمت بالچذب ورجعت اگعد بمكاني، ومرتضى راح يدور عليه، احس روحي مليت واني غريبه بينهم وبعيده عن اهلي! هاي عود صارلي 3 اسابيع متزوجة وهيچ حسيت شلون بيه بعدين؟!
اخيراً رجع بكر وكالعادة كلما يختفي معناهه اكو مصيبه، وجهه احمر وينفخ نار، اللتزمت الصمت وماسألت شبي حتى ليفشلني ويعيط عليه هنا بنص الكل، ورغم ماحچيت وياه بس حصلت حصتي من الاهانة
-بكر: گوووومي امشي نوولي نرررد للفندق
-بَـس كلشي ماسوينه هنا
عاط بعلو صوته خله الكل يلتفت ويباوعلنه
-بكر: شنيييي جاااهلة انتي جااااهلة؟!!! تردين تلعبين وتهوبزين مثل الفروووخ ولچ بابااا كبررري كبرررري انتي حُرمة متزووووجة فوگاهه ابوي يگلي تزووجهه تجيبلك فريييخ هوه انتي اكبر فررخ ولزم اربيييچ
فاتحة عيوني بصدمة ؏ كلامه والدموع بدت تتجمع بعيوني، ماعندي طاقة ادير وجهي واباوعلهم لان ادري كل العيون عليه، ماحسيت اله ؏ جرة عمة دلال الي، حظنتني لصدرهه وعاطت وهيه خازرة بكر
-دلال: ولك بچرررر ليمته تظل هيچ ولللك!!!! شمالك ويه بت الوادم؟؟!!
-بكر: عممممه تعبتتت ملييييييت وانه اجاريهه حته مو نفسسسس التفكييير مو نفس الطبقة مو نفس الشكللل مو نفس كلشيييي
-دلال: وسممم من الله!!! ولك هاي الذهب هيچ تحچي عليهه من اهمداااك لو صار براسك حظظظ
-بكر: عمممه بسكممم كلما حچيتو وذبيتو كلشي براااسي شني ماكو غير بچررر عدكمممم
حجية عطيه تباوعلنه وگاعده ؏ الكرسي بكل شموخ وسانده حنچهه ؏ العوچية مالتهه
-حجية عطيه: بچرر تعال يبعد حبوبتك
-بكر: ماااريدن شييي امشيييي ولللللچ
گمت وياه ودموعي تتسابق من عيوني ياهيه التنزل اسرع وتوگع ؏ وجناتي السمرة، اخيراً گدرت ارفع راسي واباوعلهم ارتاحيت شويه من شفتهم مدا يباوعولي وكلمن حاير بشي، او اكيد عميد صگرهم ومخلاهم يباوعون لان شفت رهف تباوعلي وابوهه خزرهه حتى تدير وجهها
امشي وحتى طريقي ماشوفه من وره دموعي، خلت الطريق مغوش عليه، بكر يسحل بيه من ايدي بقوة احسهه انخلعت، صادفت جواهر وشهد بالطريق، جواهر صاحت بلهفة
-جواهر: هجرااان شبيييچ تبچين؟؟ بكرر شبيهه؟؟؟
-بكر بنتر: اشششش وخري انتييي مالچ خص
-جواهر: شبييك انته شنو مالچ خصصص شوف البنيه وشوف حالتهه انته شبييييك!!!!
-بكر: جواااااهر وحگ هو علي لو مارحتي من وجهي اطلع ضيييم سنيني وانتظاري كله بيييچ فَـہ حافظي ؏ رويحتچ وع هالچم عظمه بجسمچ لا تتكسررر
-جواهر: تدري انته مريض
-بكر: ايييييي عفييييه مريض ويلللهه رووووحي عن وجهييي
جواهر فوراً ابتعدت وجرت شهد وياهه واني بقيت ويه هالكتله الحارقة الي ؏ ساعه ياخذني لمنطقة نائية ويذبحني حالي من حال البهيمة ولا من شاف ولا من درى، اخذلنه تكسي وطبيت بي واني شهگاتي ونشاري تسبق خطواتي، رجع عاط بيه
-حسسسسسچ لا تفضحيييينه!!!!!
كممت حلگي بأيدي وحاولت اهدئ روحي، وصلنه قريب الامام واحس روحي تريده، گمت ابچي بحرگة وقهر، صحت بترجي
-بكر ابوس ايدك نزلني هناا بَـس ازور والله ماسوي شي بَـس زيارة ونرجع للفندق وشتسوي سوي
ظل ساكت ويفرك وجهه، اشر للسايق يوگفنه ؏ جهه ونزلنه من السيارة، لزمني من ايدي حيل مادري عصبيه منه او خوفاً اضيع وسط هالحشود الضخمة، دخلت من بوابه الصحن وگلي زوري وكملي واني اوگفلچ بالباب مثل كل مرة، (طبعاً حچاهه بنتر)
دخلت للامام وگعدت بزاويه من الزوايا وبچيت لحدما خلصت طاقتي، النسوان يباوعنلي لان ابچي بقهر والم وبصوت عالي، دعيت من الله يهدي بكر عليه وطلبت من الامام يساعدني ويوگف ويايه ومن اطلع بكر يكون هادئ وساكت، وفعلاً طلعت من الباب وشفته چان يخابر بالموبايل، گلت بصوت ناصي
-كملت
دار عيونه يباوعلي وسد الموبايل، اخذ نفس عميق وگال كلمه استغربت منهه
-بكر: هجران حلليني مو گصدي أأذيچ
گامت تنزل دموعي وحدهن متتت احس حتى النفس ماگدر اجره، سحبني لصدره وهدأني وهوه يگول بصوت ناصي
-بسچ انفضحنه يا بت الاوادم الناس جاي تعاينلنه، يله هجران بسچ بچي گتلچ مو گصدي
جرني عنه وباوع بعيوني وابتسم خفيف، بَـس مادري شبيه ماگدرت ابادله هالمرة، رجعنه للفندق وطلب اكل وهم ماگدرت اشاركه بالاكل، حسيته عصب لان ما احاچي ولابسته فَـہ خفت ؏ روحي ورجعت وياه طبيعي بَـس اسولف وياه ؏ الخفيف
نمت بليلتهه وماسمحتله يتقربلي بحجة اني تعبانه، صح ضاج وانزعج بَـس ماگدر اتقبله واني بهالحال واحتمال يضوج اكثر لان يشوفني بارده، هوه اني بالايام العاديه وميعجبه يگول عني بارده وما ابادله بَـس اني استحي واحس لسه ماتعلمت عليه وهوه يريدني انگلبله بت ليل!!
**
"رهف"
من طلعوا عمو بكر وهجران ومحد گال هسس، انقهرت وتأذيت وانه اشوفه شون يعاملهه ويعيط عليهه جدامنه، هو مو عيب واحد يگلل ادبه ويه مريته؟ انه مادري بَـس ابوي يگول لزم نحترم الچبير والصغير، الحُرمة والزلمة ومانخجل لو نكسر بخاطر احد لو نزعجه بنظراتنه
حتى اليوم من چنت اعاين لهجران وانه اشوف عمو بكر يهزأهه ابوي نتر بيه حتى ادير وجهي، انه لسه مزاعلته ؏ خبر خطوبته، ولو هو لسه ماصار شي بَـس مجرد فكرة يحب سارة بت خالته شمس ماحبيتهه وماستلطفتهه، لان انه بالاساس ماحبن ساره واحسهه مغروره وعدهه شهادتين وشايفه روحهه بيهن انوب تاخذ ابوي وتصير الشيخة يبوووي غير تلعب فلك
ابوي اصرّ عليّ اللعب عود حتى يرضيني، بَـس ماگدرت كثر ما ضايجة واحسه خلاص راح من ايدي وهاي اخر طلعه اطلعهه وياه ويدللني ويخاف عليّ، دموعي من وحيدهه تنزل من اتخيل شون راح يهملني ويتركني وحتى من ابچي بالليل مايجيني ويكظني ويگلي تاج راسي لا تخافين انه موجود، گعدت ؏ جهه بينما الكل ملتهي يسولف وابوي راح يجيب اكل ويه عمو مرتضى، اجاني زيود گال بضحكة بشوشه
-زيد: هااا شو وحدچ گاعده؟
-رهف: اي ناطره ابوي
-زيد: شعجب مو ويه جواهر؟
-حسيتهه ضايجة ومو مال تتحمل نگي وملحتي فَـہ اجيت اگعد وحيدي
-لا رهوفه لتگولين هيچ ؏ روحچ
ابتسمتله واجه گعد بصفي، اشوف عمه دلال تعاينلنه ومبتسمه ماعرف شني سالفتهه، ظلينه حوالي خمس دقايق واجه حلاوة (محمد)
-حلاوة: هاااي شنووو متجمعين الحبايب
-زيد: هههه اي تعال هـلا بيك اگعد ويانه بعزانه
-حلاوة: خيير؟؟ ليش عزه؟
-زيد: رهوفة ناصبه عزه لان ابوهه راح يتزوج
-حلاوة: اهوووو بعدچ هيچ رهيفه!! لچ بابا عتقي ابووچ مو حتى الرجال راح يبزع منچ
حزت بخاطري هالچلمة، گلت وانه دموعي بعيوني
-رهف: ابوووي مايبزع هو يحبنيييي
-حلاوة: افاا رهف تبچينن؟؟ لا عيوني انتي دا اتشاقه وياچ
-رهف: شقه ماصخ
-زيد: صدُك ماصخ شبيك محمد وياهه!!
-حلاوة: يبوووو يا كلمة ردي مكانچ ديلاا
-زيد: تعاال حلاوة ؏ طاري العرس راح تجي لعرس سيد عميد اذا يسوون؟؟
-رهف: زيييييييييد
-زيد: ههههههههه شبيچ ولچ اريد اضحكچ
-رهف: گصدك تموتتتني
-حلاوة: معليييك بيهه!!! اكيييد احظر هلوو عيني واكيد عثمان راح يحظر غير نردح للصبح
-زيد: منو يگول يجي عثمان؟
-حلاوة: لا بله تتوقعه ميجي لعرس ضلعه؟!
-زيد: ايي هم صح
-حلاوة: اني من هسة متحمس للدبچ والرگص اكيد راح يعلگوهه بعد هذا عرس الشيخ
-رهف: حلاااوة انته اله تريدني اجي احطن اصابيعي بعيووونك ولككك شمالك وياااي
-حلاوة: هههههه كافي ولچ شگد تتنعوصين، المهم زيوود حظر روحك ورايه
-زيد: وراك شلون؟
نفخ نفسه وعدل قميصه، رفع راسه بتباهي وگال بغرور
-حلاوة: نويت اتزوج
-زيد: خاب هلاااا اني همممم
-حلاوة: كذااااب
زيد: والكعبة المكعبه!! حتى العروس موجودة
-حلاوة: وهلاااا حتى اني موجودة يللهه نتزوج نفس اليوووم
-زيد: ماعندي أي مشكله
-رهف (عطت بيهم): روحوووا عن وجهيييي شكوووو گاعدين وتلغون يم راسي ولوك لوك لوك لوك لوك شنيييي شكووو جيتو وراي انه اجيت هنا ارتاح من سالفه الزواج انوب انتو انفتگتتوو
-زيد: رهفف شبيچ تعيطين هوه احنه شحچينه!!
-حلاوة: اندري، بَـس احم خاف غرتي (وغمزلهه)
-رهف: عووووع اغار من ياهو؟؟
-حلاوة: يبووو مو لسااان رشاشه اقصد غرتي عليييه
-رهف: لاااا انته كللش مصدگ رويحتك انه اگومن ابركلي
ردت اگوم وزيد سحب ايدي، رجع گعدني وگال بأبتسامة
-زيد: رهوفة شبيچ بسرعه تعصبين دنتشاقه وياچ
-رهف: هم گال يتشااقه خاااالي انه اظن انتم فاهمين الشقه غلططط
وانه بنص صياحي وسمعت عيطه رجفت گلبي، تلاثتنه درنه وجوهنه واذا اشوفلكم ابوي غادي طماطة من العصبيه، وعيونه ؏ ايد زيد الكاظة ايدي، سحب ايده بسرعه من شاف بابا يجي ناحيتنه والشرار يتطاير من عيونه
-عميد: رهففففففف لييييييش گااااااعده وحييييدچ هناااااا
-رهف: باباتي چنت احاچي الولد
-عميد: امشيييي جدااامي بساااع
اشر بأيده ليگدام وگمت وياه، كظ ايدي قوي وخزر حلاوة وزيد ثنينهم گامو يبلعمون، وداني يم بيبي انتصار وعاط بيه، يله همزين حنه گاعدين وحيدنه وبعيدين شوي عن الناس يعني الفشله تقل شوي
-عميد: اننننه چم مرررة گتتتلچ ماتگعدييين وياااهم؟!!!!
-انتصار: يمه عميدي شمالك
-عميد: بتتتچ يوووم بتتتچ العنوديه چم مرة اگلهه ابتتتعدي عنهم ولا تگعدين وياااهم تعاندني وتروح
-دلال: عميدي وشماله وليدي ماتريدهه تگعد جاره؟
-عميد: عممه زيد ؏ عيني وراسي بَـس انه اعرف شنهي نيته وخلييي يطلع السالفه من راسه!!!
-دلال: يبعد عمتك خطااية انته ماتشوفه شون...
قاطعهه واشر عليه
-عميد: عمممه اغديلچ فدووة لا تكملين چا انه ليش مارضى تشوفه
اندار ؏ خالة ام محمد (ام حلاوة وجواهر..) وگال بتحذير
-عميد: حتى محمد حجية خلي يشيل الموضوع بكبره من راسه
-ام محمد: ليش سيد؟؟ الحجي حچالك وطلبهه منك!!
-عميد: حجية انه گلتله ماعدنه مرة للزواج
-ام محمد: ولييييش؟؟؟ شوفهه شحلاتهه شبييهه؟!!
-انتصار: ام محمد يبعد حيلي بعدهي رهوفه صغيره خليهه تكبر والله چريم
-عميد: ولاااا تكبررر انه گلت لااا يعني لاااء
-ام محمد: سيييد شبييك؟؟؟ وشبي محمد متريده نسيب الك؟؟؟
-عميد: حجية اعيد واكرر الوليدات ؏ راسي بَـس انه ماريدن ازوج بنيتي
-دلال: يااااء عمييّد شني هالحچي بعد عمتك شني تريدهه تخمر ؏ افادك!!
-عميد: اييي تخمرر وانه گتلكم زوااااج مازوجهه وامي وحبوبه عطيه همات يدرن بالسالفه
انداروا يباوعولهن وهزن روسهن بـ "اي" عمه دلال تعيط وخاله ام محمد همات وگبت واحنه بنص مدينه الالعاب، كل هذا يصير وانه مثل الاطرش بالزفه، يعني حلاوة وزيد چانو يلمحولي؟؟؟ يعني انه البت اليردوهه؟؟
سكت الكل وره ما ابوي عاط بيهم من شاف الشباب يجون بأتجاهنه وحذرهم يسدون السالفه حتى لا تصير مشاكل وزعل بيناتنه، عفتهم وردت اگوم وابوي رجع عاط بيه حتى اگعد
هفففف شماله صاير چبريت ومايتحچة!! بَـس عاندت وگمت ماتحملت اشوف جواهر گاعده بعيد عنه وسارحه، همست لأبوي
-باباتي
-عميد: ها بويه
-رهف: بابا اريدن اروح لجواهر
دار وجهه يعاينلهه وگال بحيرة
-عميد: بويه شوفيهه زعلانه عوفيهه براحتهه
-رهف: شمالهه زعلانه؟ انه ماحب اشوفهه هيچ
هز راسه وگال بصوت ناصي
-عميد: يله روحي ونسيهه شوي، ورهف لا تظلين تنگين ؏ راسهه وتكدرين البت زين بابا؟
-رهف: اي صاار
تركته ورحتلهه، من تگربت جارهه مسحت دموعهه وابتسمت ابتسامه حزينه
-رهف: جوهرة ليش گاعده هنا وحيدچ؟
ابتسمت من گلت هيچ، حظنتني لصدرهه وباست راسي، رفعت عيوني اعاينلهه واشوفن دموعهه الليلو بعيونهه، گالت بضحكة حزينه
-صايره تصيحلي مثل باباتچ
-رهف: شون يعني؟
-جواهر: بَـس عميدي يصيحلي جوهرة بَـس صارله هواااي ميگولهه
-شمعنه؟
-مادري
ذبت زفير قوي ونزلت دموعهه مرة ثانيه، اردفت بتعب
-جواهر: ابوچ هواي متغير، ومو مثل قبل
-رهف: انه هم حاسه بي، كله من وره اليحبهه
-جواهر: منو هاي؟ عرفتيهه؟؟ يعني هيه نفسهه الراح يخطبهه؟
-رهف: مادري ماعرفتهه واستبعد نفسهه سارة لان سارة بعيده ومو مال تظل براسه
-جواهر: المهم الله يهني
-چا شمالچ زعلانه؟ حتى ابوي ظل باله عليچ
-صدُك؟؟!
-اي بعلي حتى گالي روحي ونسيهه
-ههه فديتچ وفديته
ابتسمتلهه وبقيت گاعده جارهه اسولف وياهه، سألتهه ليش تبچين بَـس تگول تذكرت امتحاناتهه وماجاوبت عدل وخايفه ترسب لو تطلع اكمال، ردينه للبيت بعد ماگظينه يوم متعب وحتى ماتونسنه
گعدت الصبح نشيطه مطيت جسمي براحة ورحت اشوفن ابوي اصبح عليه، احس روحي مرتاحة وانه ماجاي احلم بأمي، صح اشتاگلهه بَـس ؏ الاقل ما افز بالليل واكدر ابوي وازعله
اليوم اخر يوم النه بأيران والبيت كلهم مخبوصين يحظرون ويعدلون بالجنط، سألت ؏ ابوي وبيبي انتصار گالت راح يشوف الحجوزات وماخذ حبوبه عطيه للزيارة
طلعت بالحديقه شفت زيود واگف بحد (بصف) شجرة ورد، صبحت عليه وهوه ردلي الصباحيه بأبتسامته الحلوة
-رهف: والله مادري چم وردة اكو هنا
-زيد: هااا هاا ست رهف شو دتزحفين عليه
-رهف: هههههه لو ابوي يدري جاي احاچيك اظنه ينحرني
-زيد: ميخالف انتي لتحاچيني هالفترة
-مو اشتاگ انه
ابتسم ولمعة حلوة بعيونه
-زيد: فديت التشتاقلي، شوفي لعد هيچ راح نسوي من نرجع للبيت اشوفچ من بعيد ونسولف بعيوننه
-رهف: ههههههه شني هاي جاي يخيلي عايشين بفلم مصري
-زيد: فلم مصري فلم هندي احسن مما ننحرم ومنسولف ويه بعض، لان ترا حتى اني اشتاقلچ وينمرد گلبي اذا ماشوفچ
-رهف: اويلي عليك شني هاي ولك شو صاير تعرف تحچي
-زيد: هههه اعجبچ
-رهف: ديلا خوش فكرة هسة نسولف بالعيون بَـس تعااال واذا ردت اغنيه شون؟
-زيد: كتبيلي من موبايل غزل اسم الاغنيه واني بعيني انزلهه الچ واجيبهه الچ برام
-رهف: لا لا مو گصدي تنزلهه، اريدك تغنيهه
-زيد: امممم يله هسة اغنيلچ ماطول ابوچ وخالو خليل طالعين، بَـس گولي شنو تردين اغني؟
-رهف: اغنيه ابوي المفضله "هيه عيوني هيه"
هز راسه وابتسم، بده يغني هاللغنيه الاعشگهه بسبب ابوي، دائماً اسمعه يغنيهه ويدندنهه ويسرح ويعيش اجواء عبالك عنده ذكرى ويه هالاغنيه الحلوة او مولود ماعرف شنهي بالضبط
"هيه عيوني هيه.. حبها مو بديه.. هيه عيوني هيه.. حبها مو بديه..
جميلة وحبها ساحرني.. ساحرني.. احبها بكثر متحبني.. متحبني
هيه عيوني هيه.. هيه عيونيي هيه..
جميله ويا سلام الله عليها.. من تلزمني اذوب ابين ايديها.. جميله ويا سلام الله عليها.. من تلزمني اذوب ابين ايديها..
مثل نغمة هلاهل يا حچيهه.. مثل نغمة هلاهل يا حچيهه..
تهيم الروح من تگبل عليه.. تهيم الروح من تگبل عليه..."
وكمل الاغنيه واني سارحة بصوته الحنين الي يهز گلبي وتصير بي نغزات غريبه من اسمعه يغني
ودعته ورديت للغرفه وشفت غزل ومعصومة گاعدات
-رهف: غزاله اگلچ ماعرفتي شصار بخطبه ابوي؟
-غزل: لاع
-زين يمته المهر؟
-مادري
-رهف: يعني تظنين نرد مرة لخ لأيران يعقدون لو همه يجونه للناصريه؟
-غزل: مادري
-شماااالچ مادري ومااادري
-غزل: رهففففففف روووووحي من وجهييييييييي
-وسممم شكو تعيطين عليّ!!!
گامت تبچي قوي وغطت وجهها، معصومة حاولت تهدأهه وغزل مستمرة بالبچي، گلت لمعصومة تعوفنه وحيدنه حتى اخذ راحتي وياهه، اعرف ليش تبچي وزعلانه بَـس بعد ماكو شي بيدنه ابوي معزم والفاس وگع بالراس
-رهف: غزل بسچ بچي، ماراح يتغير شي
-غزل: رهف عميدي رح يتزوج
-ادري
-وراح ينسانه
-رهف: لا مايسويهه ابوي يحبنه وحنه بنياته
-غزل: گلبي محتررگ رهففف
-حرام الجاي تسوي انتي خطيبه عمو مرتضى
-غزل: اووووف يالقهررررر شسوي بروحي انيييي اكرررهه عمچ مااااريددده مااااااريددددده اخذنييي غصبببب عنيييييي
-ولچ حسسسسچ شمالچ!!!
-غزل: خلي الكللللل يسمعنييي مايهمنييييي ماريدن مرتضىىىىى انه عاشگه اخوووو احبن عميدددييي ماررريدن غييييره
كممت حلگهه بأيدي اخاف احد يسمعنه وننفضح، بَـس الطرگاعه طلعت عمه دلال سمعت واجت تركض
-دلال: يا معزاااياات شمااالچن شني هالحچي السمتعه؟؟؟
-رهف: عمه هييچ انسي هاي خبله ماعليچ بيهه
-غزل: آآآآه مو خبللله انه مووو خبللله انه عاشگـ....
رجعت كممت حلگهه وهيه مستمره تبچي وتعيط، احسهه فقدت وماجاي تسيطر ؏ روحهه وماتحس بلي تگوله، كبرت السالفه ودخلت بيبي انتصار وعمو مرتضى وشافوهه بهالحال
عمو تسودن من شاف حالتهه، وكامشه گلبي خايفه سمع الگالته، اجه ملهوف عليهه
-مرتضى: غزززل شمااالچ ليش تونين؟؟؟
-انتصار بتوتر: اءء يمه مرتضاوي روح بعد امك انه احاچيهه روح
-مرتضى: يوووم وين تحاچيهه شوفي حالتهه
اجت عمه سلمى تركض لابسه عبايتهه لان هستوهه راده من الزيارة
-سلمى: هااي شبيكم؟؟؟ شصااير؟؟ غزززل يمممه بنتي شبييهه؟؟؟
-رهف: مااكو شي عمه ماكو شي بَـس تعبت شوي خلوهه وحيدهه ترتاح
-انتصار: اي اي يله حبيبي يله يا يمه امشينا نطلع بره الدار خليهه ويه امهه
-مرتضى: والزهرررة ماطلع شنييي شمالهه ليش هيچ حالتهه؟؟؟
-رهف: عمووو غزل متعاركة ويه ابوي وزعلانه منه مااكو شييي صدگني
-دلال: ولچ رهيفه شني وين زعلانه وهيه تصيح تريده!
-رهف: لااا عمه لااا هاي خبله وماتعرفين شتريد
-غزل: وخرررري عني رهففففف وخررررري ليش نايمه علللليّ
-رهف(همست بأذنهه): غزاله ابوس يدچ لا تسويلنه مشكله ترا عمو مخبل وعلي يذبح ابوي ومايرفله جفن
من گلت هيچ هدأت، وظلت تبچي بالسكته، والكل واگف جدامنه والفشله حتى خاله شمس ومعصومه ردن اجن للغرفه، وعمو مرتضى مستمر يحاچيهه ويسألهه شمالهه
سمعنه صوت طبگة باب قويه چان ابوي، طلعتله للصاله وحچيتله كل الصار بأختصار، فتح عيونه بصدمة ومتعجب من تصرفهه الغريب
-عميد: مرتضى سمعهه؟؟؟ احچييي رهففف عمچ سمعهه من صاحت؟؟؟
-رهف: مادري بابا ماادري بَـس اكيد لاا چا حطهه وذبحهه لو صگد سمع
-عميد: لاا مو شرط يجوز ينطرهه تهدأ ويحاچيهه
عافني وراح للغرفه، صاح بينه حتى نطلع وگالي ابقى انه وعمه سلمى وبيبي انتصار، عمو مرتضى راد يبقى بَـس مارضى ابوي وگال بَـس تهدأ يجي يحاچيهه ويشبع منهه، اخيراً اقتنع وطلع برا
ابوي زفر نفس قوي وفرك وجهه، يعاين لغزل حاطه راسهه بحظن امهه ودموعهه ماهجعن ينزلن بأستمرار، تقرب عليهه وگنبص جدامهه
-عميد: غزل بويه اگعدي اريدن احاچيچ
ماردت عليه، ظلت ؏ نومتهه وزادت بالبچي، مسح دموعهه بأبهامه واشر لعمه سلمى تگعدهه ؏ حيلهه
-عميد: بابا غزل سمعيني، انه راح احچي جدام امي وامچ وبنيتي رهوفه، شوفي بويه انه يشهد ربي عليّ مافد يوم عاينتلچ بنظره غير عن رهف احبچ واعزچ نفسهه بالضبط، لان انه الي ربيتچ هو صح انتي ماتذكرين بَـس امچ شاهده عمرچ اشهر وشيلاء الله يرحمهه تجيبچ لبيتنه وحتى نوم تنامين عدنه موش صح عمه؟
هزت عمه سلمى راسهه وظلت ساكته، بابا اردف
-عميد: ربيتچ وكبرتچ ووراهه بسنه اجت رهف ونورت حياتي، بَـس ماتخليت عنچ بالعكس تعلگت بيچ اكثر لان حسيت رهف بنيتي الثانيه وانتي الاولى، كبرتي وانتي تصيحيلي بابا ولشيلاء ماما تذكرينن؟؟؟
هزت راسهه خفيف وماجاوبت
-عميد: فَـہ بويه انه مادري غلطان لان اعاملچ نفس بنيتي؟ لو شني الموضوع مادري؟ بَـس الاعرفه كل معاملتي الچ ماتصلح وحرام!! من بديتي تشبين وتصيرين حديثه امي نبهتني وگالتلي يمه عمييّد دير بالك ترا البت ماتصحلك ومايجوز تتگرب ليهه وتحظنهه وتگعدهه بحظنك و و و.. بَـس انه عاندت وگتلهه مستحيل مثل ما اعامل رهف اعامل غزاله، هاي غزالتي الاحبهه بنيتي الربيتهه ؏ ايدي، مرت الايام والسنين ويوم بعد يوم احسچ تميليلي اكثر واكثر، ويشهد ربي عليّ رغم اشوفنچ مثل بنيتي گلت لأمي انه مستعد اتزوجهه من تكبر
من گال هيچ رفعت عيونهه تباوعله، گالت بصوت مبحوح
-غزل: چا ليش رضيت مرتضى ينهي عليّ؟ ليش مو انته النهيت؟
-عميد: جايچ بالحچي، المهم.. كبرتي وكبر مرتضى وانه اشوفن عينه عليچ ويريدچ واكثر من مرة اشوفه يسيح من يعاينلچ ويشرد باله كلما تمرين وانه اعرف حظنه من نعشگ مانعشگ البت التخصنه لاا نروح لوحده گلبهه ينبض لغيرنه وحتى لو گلبهه ينبض النه مايحگلنه ناخذهه مثل حظ ابوي الله يرحمه، عشگ امي حتى ورا ماتزوجت غيره ظل مصرّ وعاشگهه وهايم بيهه ونطرهه وره ما مات زلمتهه وخذاهه وهيه وليدهه عمره اشهر
سكت شويه واردف
-هسه هذا موش موضوعنه، انه اريدن اوصلچ مرتضى مو بَـس عاشگچ ولچ الوليد طايح چفي ؏ وجهه مايشوف غيرچ ومايريد غيرچ!! تدرين شكثر هدولي بنيات وانه انطي وهو مايرضى يگول لو ما اخذ غزل ماتزوج ولا تحلّ عليّ حُرمة، شمالچ يابويه تكسري وتأذي؟
-غزل: لان انه احبك الك
-بويه مايصلح، لو مادري شنسوي لو تنگلب السما ؏ الگاع ما اخذچ ماطول اخوي نفسه بيچ!!
-غزل: يعني انته ماتزوجتني لان مرتضى يحبني؟
-انه بالاساس ماحبچ كحب حُرمة ليه، بَـس ماردت اأذيچ والوعچ وگلت لأمي انه مستعد اتزوجهه واكمل حياتي وياهه والحب يجي بعدين، موش صح يوم؟
-انتصار: اي يمه، بَـس حبوبه غزاله فكري بعگلچ ليش ترضين بواحد مايحبچ وتدفرين نعمتچ وتوجرين گليب اليحبچ!!
-عميد: غزل انتي تدرين وانه گايلچ من گبل وراح اردن واعيدهه انه گلبي مو ليه ردت اخطب غيرهه گلت عسى انساهه بَـس گلبي رافض كل حُرمة وماجاي اتحمل الفكرة بس غصباً عني راح اتزوج واكمل حياتي واخلف و و و ، فَـہ انتي سوي نفسي دوسي ؏ گلبچ وارضي بلي الله كاتبه الچ حبيبتي انه ادرى بمصلحتچ ومصلحتچ كلهه ويه مرتضى
-سلمى: اي ماما غزل سمعي كلامه هوه يحبچ ويريدلچ الخير
-غزل: انه مو انته عميد وادوس ؏ گلبي!! انه الانسان الماحبه لو يصبو ذهب ماراح احبه ولا راح اطيقه شي يوم، وحتى زواجي من اخوك العاشگ الولهان راح يكون بااطل بااااطل لان صار غصب وبالاكراه
-عميد: غزل طيعيني ترا.....
گطع حچايته وتوسعت عيونه، حط ايده ؏ صدره ووجهه انگلب ازرگ وعروگه نطت، عمري كله مانسى هاي اللحظه ومن عطت بصوت طلع من عمق اوتاري الصوتيه
-رهف: باااااابااااااا.....
يتبع☘️...
♛ ♛ ♛ ♛ ♛ ♛ ♛ ♛ ♛ ♛
توقعاتكم؟؟؟🌝 ولتنسون التصويت حبايب ئلبي💞.