#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الخامس_عشر
*قبل لا نبدي البارت ترى الله شاهد كل بارت اكتبة حيل اتعب بي يعني دراسة و امتحانات يوميا و اكتبلكم القصة و ما جاي اقصر و بارتات طويل توصل لحد 6000 كلمة و 4000 كلمة الارجو منكم اريد تتفاعلون بنجمة و تعليقات حتى اتحمس للكتابة و اريدكم تتفاعلون على كل فقرة تحياتي الكم اتمنى تستمتعون بالبارت ♥️
"چَنت أحس النَظرة من عِينه حُضن وچَنت أشوف البَسمه بِشفافه وَطن ."
اني و نور و سحر و عايدة و جوري و ورد و خالة و عمة و عمو و بيبي و ام ماجد و جعفر و احمد و محمد و حسن و عمة بدرية ام احمد و صابرين ام حسن و فؤاد زوج ورد و كلنا مرتاحين بهاي اللمة جنت اباوعلهم واحد واحد و اكول يا رب ديم هاي اللمة و لا تضيمنا على احد ما ادري شنو الي مضموم النة بهاي الدنيا و بعد و بعد شنو الي راح يشوفنة بنات حجي عمران الفصول الاربعة
جنت كاعدة يم ام ماجد اتقربت علية ام ماجد و كلتلي
ام ماجد : الي يفكر بالمستقبل ما يكدر يعيش الحاظر انسي يمة فكري بفرحتكم هسة و خلي المستقبل بيد الله
سمر : ابتسمت و كملنا لليل اتصل علية رسلان ضحكت و رديت عليه و اني اضحك
رسلان : مرحبا
سمر : اهلاً تفضلو منو وياي
رسلان : شنو منو اني رسلان
سمر : عفواً خوية يا رسلان
رسلان : مو مهم مع السلامة ... سديتة بوجه سمر كلش غثني كلامها شنو ما تعرفني شبسرعة نستني دكت علية مرتين انطيتها رفض
سمر : ما ادري بس حبيت اضوجة اتصلت عليه ما يرد عفتة شوية و رجع دزلي رسالة و ضلينا نحجي بالرسايل
رسلان : باجر اداومين
سمر : اي اكيد اداوم صار 6 ايام ما مداومة
رسلان : اكدر اشوفج باجر
سمر : ليش ؟
رسلان : هيج عاجبني نطلع اني وياج و نحجي
سمر : اي تمام باجر نطلع اني وياك و قمر و لبنى و دكتورة اماني
رسلان : اي و اخواتج و بنات عمج و عماتج و خالاتج و نسوان عمامج و بيبيتج و جيبي ناس من الجامعة رايحين زفة
سمر : متت ضحك على كلامة بالكوة كتبت لا شدعوة المن اجيبهم كلهم نجي بس اني و صديقاتي
رسلان : خلي نطلع وحدنا
سمر : ما ادري بس ما احب اطلع ويا ولد وحدنا
رسلان : اوكي تصبحين على خير
سمر : عرفتة ضاج بس فعلاً ما اكدر اطلع ويا كلتلة اجمعين و سديت الموبايل و كمت يم البنات لكيتهن ملتمات على عايدة
سمر : ها ولجن راح تكتلنها
جوري : اي نريد نطلع حوبة الايام الخفت بيهن ههههه
سمر : كعدنا ورد نظفت وجه عايدة و اني و جوري سوينالها تقشير و تعديلات لوجهة الباهت ضلت هاي الايام هي ما داومت حتى من صارت زينة لان وجهة كلش تعبان ضلت تقريباً اسبوع لحد ما رجعت على حيلها يلة داومت
اما نور بقت ادرس بجوري و ورد رجعت لبيتها و سحر ملتهية بدراستها و اني بين البيت و الجامعة و صديقاتي
عايدة : رجعت لحياتي طبيعي و رجعت اداوم بالجامعة اول يوم دخلت حيل فرحانة اجتني تيسير تركض تحضني و تصيح
تيسير : لج وينج والقران متت ادك عليج ما تردين بيت عمج ما اندلة
عايدة : كعدت و سولفتلها كلشي و حتى علية و على فرات سولفتلها
تيسير : ههههه اكلج شغلة
عايدة : اي كولي
تيسير : اني و هواي من الطلاب ندري فرات معجب بيج عيونة فاضحتة بالمحاضرة من دون كل الطلاب هوا صافن عليج ههههه
عايدة : عليج الله
تيسير : هههه اي والله اصلاً هواي طلاب يحجون بهل شي
عايدة : عزااااا و صخام انفضحت
تيسير : يمعودة قابل شكو الله يحفظكم و يجمعكم بالحلال
عايدة : اميييين ضلينا شوية نسولف و دخلنا للقاعة خلصنا محاضرتين و المحاضرة الثالثة جانت محاضرة دكتور فرات
تيسير : عايدة باعيلي خلي اعدلج الكحلة مالتج
عايدة : تيسير عدلتلي الكحلة و الحمرة و المسكارة باوعت لنفسي بالمرايا عدها مرايا صغيرة طلعت توب انتظرت فرات يجي شوية و دخل
اول ما دخل باوعلي أبتسم و مبين عليه فرحان حجة واحد من الطلاب
الطالب : الحمدلله اليوم دكتور فرات يضحك يعني ماكو محاضرة تخوف
تيسير : و يجوز اكو احد جان بعيد و رجع
فرات : ههههه خلي تركيزكم بالدراسة مو وياي يلة نبلش
عايدة : جنت طايرة من الفرح و اني أشوف كل شوية يباوعلي ورة المحاضرة كال
فرات : عايدة عمران تعالي وراي للمكتب حتى نعيد امتحانج للامتحانات الي جنتي غايبة بيهن
عايدة : رحت وراه اول ما دخلت للمكتب كام وكف
فرات : نورتي الجامعة يا نظر عين فرات
عايدة : ضليت مدنكة و العب بالسحابة مال الجنطة و ما اعرف شجاوب
فرات : اشلونج اشلون صرتي
عايدة : الحمدلله زينة ما انسى فضلك ابد
فرات : غير مرتي شعندي غيرج
عايدة : ضليت مبتسمة و بالكوة كاعدة لان من الخجل حسيت الجو صار نار
فرات : دورت السنة و عبرت و بنت عمج اتزوجت حان الوقت النة لو لا
عايدة : ما ادري بكيفك
فرات : انتي موافقة علية
عايدة : اي طبعًا موافقة
فرات : تعاي اكعدي خلي احجيلج موضوع مهم ... كعدت عايدة و بديت احجيلها كلشي عن حياتي حتى تكون على بينة اني مقطوع من شجرة ما عندي احد فقط اني و كونت نفسي
فرات : و هسة ارجع اعيد سؤالي موافقة تكونين زوجة لواحد ما عندا لا اهل و لا عمام
عايدة : حيل انقهرت على الي عايشة فرات و اني جنت مفكرة هوا مدلل من اشوفة و اشوف سيارتة و لبسة و الله جنت دائما افكر انو حياتة مثل الي بالمسلسل يرجع من البيت امة و ابو منتظري ع الغدا بس خطية طلع يتيم من سئلني مرة ثانية على موافقتي باوعتلة و كلتلة
عايدة : و هسة زاد اصراري اكون زوجة الك
فرات : احبج والله
عايدة : ضليت مبتسمة و هوا ضحك و كال دكوليها يمعودة مو صار هواي انتظرها
باوعتلة و كلتلة اني هم احبك ضل يضحك و اني كمت طلعت كلش فرحانة بنفس اليوم بليل جنت بالمطبخ و اندكت الباب راح عمو يفتحها وخرت البردة و شفت فرات كدامي غير گلبي وكع سلم على عمي ما سمعتهم شحجو و دخلو للاستقبال
طكيتها ركضة للغرفة رحت للبنات
عايدة : بنااااات بنااااات ولجن لحكلييييي
جوري : لا يا الحمزة تخبلت البنية
سمر : شكو شمالج هادة علينة
عايدة : ولجن دكتور فرات يم عمو حازم
سمر : لا عليج الله
عايدة : والله العظيم هذا وينة بالاستقبال يم عمو عزااااا راح اموت ... سمعنا صوت خالة منيرة صاحت لجوري تسوي جاي نزلنا كلنا اني ضليت واكفة اباب الاستقبال
عمو حازم : اهلاً وسهلاً زارتنا البركه
فرات : الله يبارك بي ابو جعفر
عايدة : واكفة اتسمع عليهم و گلبي يدك الف فرات عرف عن نفسة بس جان التوتر عندي فول اجتني عمة فردوس
عمة فردوس : ترديني ادخل اكعد وياهم ما دام اني اعرف الولد حتى اضل امدح بي كدام حازم
عايدة : اي اي فدوة ... دخلت عمة فردوس عليهم و حتى عمو حازم استغرب
فردوس : اشلونك خالة فرات شخبارك
فرات : الله يسلمج الحمدلله
حازم : تعرفينة الولد
فردوس : اي اي اعرفة هوا هذا الولد يصير دكتور عايدة بالجامعة و الي كلتلك عليه هوا الجاب المرة الي مسوية عمل لعايدة و ساعدنة خطية ما قصر ويانة
عمو حازم :. والله و النعم منك ما قصرت ... كام حازم و باس فرات من راسة و كالة اتمنى ارد شي من تعبك
فرات : جنت ما اعرف شسوي و اشلون اطلب عايدة من حازم بس من دخلت فردوس و حجت و حازم باسني من راسي و كالي اتمنى ارد شي من تعبك... كلت بيني و بين نفسي ما عندي غير هل فرصة اججي بيها يا الله
فرات : والله يا ابو جعفر اني رايد منك شغلة بس قبل لا نحجي الشغلة اريد اكلك شي عني حتى تعرفني
عمو حازم : اي تفضل سولف
فرات : بديت احجيلة شي سريع و مختصر عن حياتي و وين جنت و اشلون صرت و اهلي و وفاتهم
عمو حازم : الله يرحمهم و يجعل مثواهم الجنة ان شاء الله
فرات : رحم الله والديك اي ابو جعفر هسة اريد احجي بالموضوع الي جاي عليه
عمو حازم : تفضل ابني احجي
فرات : بلعت ريكي و حجيت بثقة كلتلة عمي يشرفني اطلب عايدة منك و ان شاء الله لو صارت القسمة اوعدك اكون الها اب و سند قبل لا اكون زوج
عمو حازم : والله و النعم منك و نتشرف بيك بس يبقى الرأي رأي عايدة و ان شاء الله الي رايدة الله و بي خير يصير
فرات : جان حازم كلش اريحي بالكلام و كلش راقي و مثقف تشكرت من عندة و كمت طلعت و اخذ مني عنواني
عايدة : راح فرات و اني طايرة الا شوية تطلعلي اجنحة و اطير ركضت للغرفة سولفت كلشي لسمر و جوري و اني اضحك و اكمز و اصيح ولج خطبني خطبني احبةةةةةةة
انتبهت شو جوري و سمر حابسات ضحكتهن و صافنات علية و ماكو ردت فعل كلتلهن شكو .. سمر أشرتلي بحاجبها ع الباب درت وجهي شفت عمو حازم و عمة فردوس واكفين و يضحكون بس شفتهم شهكت و نزلت راسي و ضليت العب باصابيعي
عمو حازم : ههههه اجيت احجي وياج بس وصلني جوابج تعاي بنيتي
عايدة : فتحلي ايدة ركضت بحضنة ضل يمسد بشعري باس راسي و كال والله و كبرن بناتك يا عمران و راح يتزوجن
راح عمو حازم و عمة فردوس تضحك تكلي اثكلي ولج
سحر : كلنا فرحانات لفرح عايدة و اشلون كل شوية تكمز اول شي اتمنيتة كون فرات يطلع خوش ولد و ما تنخذل عايدة مثل ما انخذلت اني كمت من البنات نزلت جوة لكيت عمو و خالة كاعدين بالصالة و عمة فردوس تسبح و بيبي كاعدة بغرفتها رحت كعدت يمها
بيبي لبابة : تعاي نامي هنا ... و أشرتلي على رجلها
رحت خليت راسي بحضنها و هي ضلت تمسح على راسي انوب قرت اية الكرسي صوتهة تعبان بس حلو و حنين حيل
بيبي لبابة : بعدج تفكرين بي
سحر : منو ... عرفت قصدها ذو الفقار
بيبي لبابة : المفلوك ابن المدهورة ذو الفقار
سحر : لا حبوبة هاهية نسيتة الله يسعدة
بيبي لبابة : ادريج بعدج تفكرين بي و من دريتي ام المتعة فحمة حامل مرةً الثانية انقهرتي
سحر : تجمع الدمع بعيوني كلتلها لا حبوبة
بيبي لبابة : كونن قويات بنات عمران خلجن مثل النسر خلي احجيلج هاي القصة
النسر من يوصل لعمر الاربعين مخالب النسر تصير لينة و ما بيها قوة و هي المخالب مصدر عيشت النسر و منكار النسر يصير معووج و يصير النسر ثكيل و لهذا السبب يكوم ما يكدر يطير عدل هنا لازم يقرر قرار مصيري صعب حيل المصاعب تخلي النسر بين خيارين و نارين يا اما يستسلم و يموت يا اما يتغير و يغير من نفسة اول شي يضرب منكارة بحجر حتى ينكسر و ينتظر فترة لحد ما يطلع مرة ثانية و من يطلع المنكار يكوم النسر يشلع مخالبة الضعيفة و ينتظر لحد ما يطلعن و انوب ينتف ريشة و ينتظر لحد ما يطلعن و يرجع يطير و عبالك مولود جديد تدري شنستفاد من هل نسر بعض الاحيان لازم نتغير حتى نكدر نعيش و حتى لو كان التغير صعب
سحر : اسمع بكلام بيبي و حيل محتاجة لهل كلام محتاجة احد يقويني
بيبي لبابة : خلي اكلج بعد شغلة
الانسان خلي يمشي على فد شغلة لمدة 21 يوم بعدها هاي الشغلة حتى لو صعبة راح تصير سهلة و تصير شي مهم من هذا الانسان و بعد 99 يوم الشغلة تصير جزء من الانسان و ما يكدر بدونهة
يعني سوي نفسج ناسية ذو الفقار و انتي راح تنسينة من صدك
سحر : رفعت راسي و حضنت بيبي ضليت اكثر من دقيقتين بحضنها بستها من راسها و كمت طلعت من الغرفة صعدت فوك ردت اروح لجعفر احجي ويا وصلت ليم باب الغرفة سمعتة يحجي
جعفر : لج كافي كل هاي السنين و ما مليتي كلتلج اني و انتي انتهينة
......
جعفر : خلص ما اريدج لعد شعبالج سوالف اخوج ينسكت عليها هاهية بعد لا اريدكم و لا اريد كرباكم بيت صبري
......
جعفر : كافي سما ما اريدج لا تلزكين مع السلامة
سحر : ضليت فاكة حلكي جعفر و سما بينهم علاقة .. دكيت الباب و دخلت
سحر : اكدر اكعد احجي وياك
جعفر : اي تعاي اكعدي شكو
سحر : سمعتك و انت تحجي ويا سما ليش تكسرها خطية
جعفر : هاهية ما اريد اوصل لبيت صبري كلهم
سحر : ليش صاير شي
جعفر : فعايل حيدر كثرت
سحر : و سما شعليها
جعفر : عوفينة من هل موضوع الله يخليج سدي بروح ابوج اموت و ما اخذ من بيت صبري
سحر : تنهدت و كمت طلعت من الغرفة
عايدة : عمو حازم دز جعفر و احمد يسئلون على فرات رجعو يمدحون بي حيل يومين و رجعنة جواب لفرات موافقين
مرت الايام ماكو شي جديد حياتنا مثل ما هية ماكو اي جديد روتين مثل ما هوا
عايدة : واكفة كدام المرايا و الفرحة تارسة وجهي و نور و سحر و سمر و جوري و ورد واكفات وراي يغنن و النسوان جوة كاعدة اوووف اليوم احلى ايام حياتي اليوم نعقد اني و فرات اليوم اكون زوجت حبيبي شرعاً
دخلت خالة منيرة عيونها مدمعة هلهلت و حضنتني انوب دخلت ام ماجد تهلهل و اطش جكليت و ضلن ام ماجد و سمر و جوري يهوسن و يغنن و ام ماجد تصيح
ام ماجد : يوم الالي و اذبح طلي
و احنة نضحك على سوالفها شوية و نزلنا كان عقد بسيط الزلم فرات و دكاترة من الجامعة و اعمدة الجامعة و شيخ حتى يعقدلنة و عمو حازم و عمو صبري و جعفر و احمد و محمد
و النسوان عماتي و بيبي و ام ماجد و اخواتي و خالة منيرة و ام ماجد و زوجت احمد و اختها و صديقات سمر لبنى و قمر و دكتورة اماني و اجت تيسير و اثنين صديقاتي من الجامعة كان بسيط بس ام ماجد سوتة يخبل ما خلت وحدة تكعد كلهن كومتهن يركصن و يهوسن
نزلت و اني لابسة الفستان السمائي و مطرز بابيض و ضحكتي تارسة وجهي و كلها تهلهل و ام ماجد تهوس
ام ماجد : العين الحارة الحمزة يطفيها و العين الباردة كل الهلا بيها
سمر : كله اتزوجت بس احنة ضلينة وين ام البنين ارجولة تنطينة
كلها ضلت تضحك على هوسة سمر و اماني تكللها ها ولج تردين تتزوجين
سمر : لعد شسوي معوزة حنان
ام ماجد : يلة يلة راح يعقدون
عايدة : كعدوني على كرسي بصف باب الاستقبال خالة منيرة خلتلي قماش ابيض على راسي و ام ماجد جابت طشت بي ماي ورد و ياس
و عمة فردوس جابتلي قرآن فتحتة على سورة النور و خلت ايدي عليه و بيبي لبابة خلتلي شكر بحلكي
شوية و اجة الشيخ سئلني موافقة لو لا
ردت اكلة هوا غير لو بيدي هسة اروح ويا
عايدة : نعم موافقة ... بس كلت موافقة سمر و ام ماجد طرشني بالهلاهل كملنا العقد و شغلن اغاني و يركصن و ام ماجد وياهن شبعت ضحك عليها بس تهز
ام ماجد كلش طيبة و تستاهل كل خير وكفاتهة حلوة ويانا بافراحنة و احزانة هي ويانا مرة فقيرة و على نياتهة
سمر : خلصنا من عايدة و التهينا بالامتحانات هاي السنة اني و عايدة مرحلة ثالثة و سحر مرحلة اخيرة و نسيت اكللكم جوري دخلت تحليلات مرضية و اما نور بقت ما رجعت للجامعة خلصنة امتحانات قبل رمضان و كعدنا
عايدة دائما مشغولة بفرات و سحر لو اسوي حلويات لو تنام لو تروح يم ورد و اما رسلان ما سمعت عنه اي شي بعد اكثر من شهر و ماكو تواصل بيناتنة
رسلان : رحنة اني و سلام لكربلاء نزور و جنت كلش محتاج هل زيارة
سلام : من تدخل للامام لا تطلب تكون سمر الك اطلب الي بيها الخير تجيك
رسلان : دخلت للامام العباس و كانت هاي اول مرة تنزل دمعتي بالامام و فعلاً ما طلبت سمر طلبت الي بيها الخير تكون الية لكن سمر هي الي ابالي رجعنة من كربلاء و سمر مثل المرض الخبيث يعذب بية و سلام دائما وياي يقنعني انساها
و بيوم و بليلة من الليالي ما كدرت انام حسيت نفسي راح اموت ساعة 2 بليل طلعت من البيت و خابرت سلام طلعنا سهرنا اني ويا و كان هاي اول مرة اشرب الخمر العرك ما دريت بنفسي و اني سكران اتصلت على سمر
سمر : بيوم و بنص الليل الساعة تقريباً تريد تصير ب3 الفجر دك موبايلي فزيت من النوم شفتة رسلان دا يتصل دخلت للحمام و رديت عليه حجيت بصوت ناصي
سمر : الو رسلان
رسلان : سمر
سمر : شكو رسلان صاير شي
رسلان : انتي وحدة حقيرة
سمر : يا شكو
رسلان : انتي ما عندج احساس ما تحسين بالناس همج نفسج و بس يا خبيثة يا مغرورة
سمر : حسيت رسلان سكران لان مبين من نبرت صوتة كلتلة رسلان سكران مو
رسلان : لا لا اصلاً اني ما عندي جهال
سمر : يا جهال شبيك
رسلان : رحت للامام العباس و كلتلة اريد سمر و هوا راح يخطبج الية
سمر : يا رسلان دخيل ابو فاضل شكو شبيك
رسلان : نتزوج و يصير عدنا اربع جهال حلوين مثلج و اريد بنية تطلع لبوة شرسة مثلج
سمر : رسلان كافي شنو هل كلام
رسلان : اني اكرهج لا لا جذب اني احبج لا تزعلين مني احبج والقران
سمر : كافي رسلان من تصحى نحجي ما ارد عليك هسة ... سديتة بوجه رسلان و قفلت الموبايل و نمت
ثاني يوم بدينا نحظر لرمضان لان قرب شهر الخير علينا عمو حازم و جعفر راحو تسوكو كلشي محتاجينة و احنة رتبنة المسواك لليل اندكت الباب اجو عمو صبري و جليلة و حيدر و سامي
سمر : يبووو هم هذولة اجو من لا هلا
سحر : معليج بيهم روحي اصعدي
سمر : رحت صعدت لكيت اتصالات هواي من رسلان و رسايل كاتب بيها بس ردي علية بروح ابوج
ما رديت عليه كمت سبحت رجعت كعدت كدام المرايا انوب صعدتلي جوري و ضلينا نخلي غسولات لوجهنة و اجت عايدة همات صايرة تهتم هواي لوجهة على وجه عرس
نزلنا حضرنة العشا اني ما اتعشيت صعدت نسولف اني و لبنى و قمر مسويات كروب
لبنى : البارحة جنت يم خالة ام وسيم و كالت برمضان تعزمنة يمها و نجيب ويانا اماني
سمر : ان شاء الله نروح انتي و وسيم اشلونكم
قمر : اشلونهم 24 ساعة يحجون اكللها لا تلطشين بالولد خلي يشتاقلج بس هي ماكو لاطشة عبالك عانس لكتلها رجال
سمر : ههههه عابتلج
لبنى : لعد وين اروح انتن من اراسلجن سنة يلة تردن
سمر : ضلينا نحجي اني و البنات اتصل رسلان انطيتة رفض دزلي رسالة
رسلان : اذا ما تردين على اتصالي اجي لبيتكم والله
رجع اتصل رديت عليه
سمر : ها رسلان شكو عندك شي تريد تكولة غير البارحة والله ولا اتوقعتك تكون سكير و شراب عرك البارحة انت وكعت من عيني حيل
رسلان : لا تحجين هيج والله كلامج يأذيني و اسف اذا ضوجتج بكلامي
سمر : رسلان اني اعتبرك مثلك مثل جعفر اتمنى تبتعد مني ارجوك ابوس ايدك اني لا مال سوالف حب و لا هل أمور اعذرني
رسلان : خلص ان شاء الله من اليوم بعد لا تشوفيني ولا تسمعين صوتي
سمر : مع السلامة
رسلان : الله وياج
سمر : سديتة من رسلان و ضليت صافنة هذا شبسرعة حبني هوا احنة يمكن مرتين مدري ثلاث مرات التقينة طبت جوري اطك اصبع و تغني
جوري : احبك و استحي من اهلك و ارد حي و عاجبني على خدك ورد حي
ضلت اطك اصبع و تركص و تغني و تهز بشعرها
سمر : شبيج تخبلتي
جوري : لج اجة ايسر جاب غراض لجعفر و راح بس اني المهم شفتة و لمحتة لك اويلييييي ياااب
سمر : ايسر منين هذا انوب
جوري : ايسر يصير صديق جعفر ولد كلش مؤدب و حلو و مرتب و من زمان احبة و هوا الصديق المقرب لجعفر كل ما يجي ضل كاعدة كدام الشباك حتى بس اشوفة اوووف اشكد احبة
سمر : و انتي هيج بس على شكلة حبيتي
جوري : اوووف اشكد محبوب والقران اموت عليه مو بشر جمارة يجنن
سمر : ضليت اضحك على سوالف جوري فجأة سمعنا صوت عمو حازم يصيح نزلنا كلنا نركض شفت عمو حازم .....
يتبع...
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
جهزو نفسكم راح ندخل سنة 2015 مع احداث نار تركت بصمة كبيرة بحياة البنات بصمة مستحيل ينسنها بيوم من الايام كونو على استعاد لفتح باب جديد على بنات حجي عمران الفصول الاربعة
و كونو على استعداد لجريمة جديدة قادمة
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا author_abu_joud
للتواصل فيس بوك Mohammed Fadhel