#الابواب_الخمس
البارت الثالث والعشرون /الجزء الثاني
للكاتبة Reem
(بارت طويل لعيونكم )
يبعد اليوجعني منين ماچان
انه اول محترگ وبلايه دخان
غسلي وافرشي سجادتج وابجي لحد ماترتاحين وراها خابريني واني افهمج شسوين اذا مااخليج تاخذين حقج مربع مااصير خوله
ناي : ماشي عمه هسه راح اكول
خوله : اي بنتي السباعيه كومي وكولي ياالله ربج ميعوف حمل مطروح ياما دكت على روسنا طبول بقت على هاي
ناي : اي والله ياعمه اني همي ابني كل الصار بجفه وابني بجفه عمه اخاف مينطونياه وينساني هاي وداد كلشي تسوي حتى مااخذه
خوله : خلي تولي مو هو بكيفها عمتج هاي كون الزمها واملخ شعرها واطلع ضيم گلبي كله بيها مالج دخل كلها جم يوم وابنج يصير بحضنج اكلج عندج رقم خال مهدي عمران
ناي : اي عندي بس بتلفوني والتلفون نسيته هناك
خوله : يلفاهيه غير تاخذي وياج
ناي : شأخذ ياعمه هو اني طلعت بطرك ملابسي حطت حوري جبه عليه وشال وطلعت افكر بموبايل اني كل فكري بأبني
خوله : الله كريم سوي هسه مثل مكتلج وحاولي تحصليلي رقم عمران خابري حماتج واخذي منها
ناي : ماشي سديته منها وكمت اسحل بروحي جسمي كله يون عليه مثل الواحد شايلي وشامري من فوك
عمشه : اسنديها يمه بدعه هاي البت متفصخه عساه كسر بيده وبراس امه على سوايته الماتسولف
بديعه : تعالي بنتي
ناي : كمت غسلت وتوضيت وعمه واكفه يمي تخاف لا اوكع فرشت السجاده وكعدت اصلي جنت اشهك بلصلاه اناشد ربي واكول اله مظلومه وانت ادرى بحالي كل ركعه اركع بيها جانت شهكتي مسمعه البيت كله صعب الظلم ومن اقرب الناس
بقيت هواي اناشد وادعي لحد محسيت هدأت ناري ماطفت هيج نار ماتطفه كمت وكعدت على صفحه وشلت السجاده طلعت ايدي ورجلي اباوع عليهن بيهن طكع حمر ذني شوكت صارن اما وجهي احسه طك حب ناعم من الشوطه ولساني حيل يوجعني مجروح لان عضيته من ضربني
كلشي بيه يوجعني كلشي من الداخل والخارج سواء روحي او جسمي
بديعه : تاكلين يمه
ناي : شأكل ياعمه ليش هو المي يدخل بزردومي
بديعه : لازم تاكلين حتى توكفين على حيلج
ناي : عوفي الاكل يونس وين
بديعه : اخوج متخبل حالف اله لزم مهند اله يذبحه شكد حجيت وياه وبيبيتج هم حجت ولا دار النا بال وخابرت فلاح يجي بلكي يلزمه ويحجي لج اخوج راح يضيع روحه
ناي : وينه هو
بديعه : شمدريني ركع الباب وطلع
ناي : خابري فدوة
بديعه : كال مااجي اله اجيب مهند ويايه مدمه
ناي : خابري كول اله ناي تخربطت تعال وديها مستشفى هسه يجي ركض
بديعه : يااسم الله ليش تفاولين على نفسج
ناي : اذا مو هيج ميجي بسرعه عمه قبل ليروح لبغداد وما انلكفه
دكت عليه اكثر من مره مجاوب كتلها دزي رساله دزت مباشره دك سوده عليه ميتحمل يصير عليه شى
بديعه : تعال يمه الحك لاختك وكعت تخربطت
يونس : جاي جاي
بديعه : راح يجي مبين بعده بكربلا
ناي : مو كتلج حنين ميكدر يعوفني تعبانه
بقيت انتظره ربع ساعه وطب يركض
شافني كاعده وايدي على راسي وصافنه جر نفس
يونس : بيج شى
ناي : تعال اكعد يمي
يونس : يمعوده نشف دمي رحت ازور هستوني اريد اوصل وعمه كالت متخربطه بنفس التكسي رجعت
ناي : تعال فدوة لعيونك مااكدر اكوم
تقرب وكعد يمي
يونس : شيوجعج
ناي : حطيت راسي على جتفه ونزلت دمعتي وكتله گلبي ياخويه حط ايده على وجهي
يونس : وعيونج اخذلج حقج لا اخلي مهند يبوس رجلج اله اكتله خلاص شون يطعن بشرفج الناقص
ناي : رفعت راسي من جتفه ومسحت عيوني وكتله
تدري لو انت مداخل للسجن جان هسه اني اتخرج من الكليه وشرهب راح اطب كليه هاي السنه جان خواتك متعلمات وتفتخر بيهن جان حالنا هسه غير لا اني انذل ولا شرهب تضيع طفولتها
يونس : اااااخ لتذبين بانزين على ناري
ناي : هذا واقع مو بانزين جان هسه حالنا كلش يختلف يوم مافضلتنا على نفسك بلدراسه جنت متأمل خير بينا بس الصار لخاطر وحده متسوه ضيعت عمرك وضيعتنا وهسه كعد تعيد نفس الغلطه ويه نفس الناس وراح تضيع عمرك وتضيعنا بله هسه اذا كتلت مهند اني شراح اربح
يونس : لج هذا طعن شرفي هذا واحد الكواد اشرف منه بت عمه ويسوي هيج بيها شايفتلج اكثر من هيج دونيه تردين اسكت على سوايته شايفتني ناقص غيره وعرض واسكتله
ناي : حشاك مو هيج قصدي افهمني ولتعيط عفيه
كول كتلته ومات بيدك اكو غير تنحكم وهلمره مو سنتين لو اعدام لو مأبد اني بعد ماعافني مهدي منو الي هم ارجع لعمو فلاح حتى شوكت مايقررون عبيد وجوحي يزوجوني يشيلني عمو وينطيني وهلمره تختلف مو بنيه ويتحملوها هلمره وحده مطلقه يعني يحطوني براس اتعس رجال
يونس : ومنو كال تطلكين
ناي : الصار اليوم يدل اني ماابقى على ذمته زين منو الي اذا اطلكت ابني شون اخذه اذا انت مو بظهري مافكرت بيه وبحالي اذا صار شى عليك اني معودت وكفت على حيلك حتى اسند نفسي بيك تالي انت التكسرني
يونس : لعد تردين اسكت وابلعها هيج شايفتني مابيه خير
ناي : تاج راسي انت وكل الخير انت بس فكر بيه وبأبني وحتى بشرهب الي الله اعلم حياتها لوين تصفه ضيعتنا مره لا تضيعنا مره ثانيه بروح امي عليك ترابها للعزيزه كافي الصار گبل لا تعيدها بينا هلمره الكسره جبيره اضربه طيح حضه طلع قهرتك بيه بس لا كتل وذبح وهاي السوالف دنكت ابوس ايده جان يسحبها وباس راسي
يونس انت ابويه وحزام ظهري لاتعري ظهر اختك الهم واخذ حقي منهم بدون متضيع نفسك بلياك اني انتهي وحق الله هلمره انداس بلقندره وذني صالحه وساهره يطلعن حركت عمتي بيه راح يطلعن الف شغله عليه اذا انت ماكو منو يوكفهن عند حدهن
يونس : ليش تشدين ايدي هيج وتعجزيني
ناي : بلعكس جاي احمي نفسي واحميك واحمي حتى ابني بله اذا اخذته شون اعيشه شون اكدر اوفرله عيشه زينه حتى مهدي راح يلزمني من ايدي التوجعني وراح ياخذه مني يعني مو بس ضيعت اخويه ونفسي ضيعت ابني اترجاك فكر بكلامي وراعي الله بيه وبأبني مالنا غيرك يونس
عافني وكااام وطلع اعرف بيه ديفكر بكلامي اجت بان يمي حطت راسي بحضنها وكعدت تفرك بيه
بان : تنحل وعيونج لتبجين
ناي : نار وشابه بيه
بان : حقج والله وهذا مهند شخبله صدك جذب شجاه هو هيج واحد يسوي
ناي : توقعت منه يأذيني بس مو هيج
بان : جنت دوم احسه عاقل ورزن ومو مثل امه وابوه حتى احسه اعقل من مرتضى طلع فاشوش بيه جينات صلوحه
ناي : اريد احجي ويه عمه كالت خابريني
بان : هسه اجيبلج التلفون
ناي : اخذته وخابرت عمه
خوله : اسمعيني بالاول لازم تحجين ويه مهند واطفين ناره
ناي : عساه بحرك وبتيزاب يطبه طوب ياحجي احجي وياه
خوله : ميصير هيج صيري ذكيه واكعدي وافتهمي منه
ناي : بقت عمه تحجي وتوصي واكدت على رقم عمران
هاي سهله سالفه الرقم هسه يجي يونس واخابر على حوراء بس مهند شون اشوفه
خوله : دزي رساله اله كولي انتي بكربلا ولازم تحجين وياه
ناي : تلفونه مغلق
خوله : قابل مايفتحه اقلها اول ميفتح يقرا كلامج ويجي
ناي : مااعتقد يجي
خوله : هذا واحد شايش وميشوف كدامه كلمة منج تخلي يجي ركض راح اكتبلج الرساله وادزيها نفسها
ناي : اكتبي واني ادز
اجتني الرساله مكتوب بيها
هلو مهند اني ناي الردته صار واني هسه زعلانه بيت بيبي بكربلا اشكرك على سوايتك هيج ياابن عمي تكسر بيه فهمني ليش هيج سويت اذا انت رجال تعال واجهني ولو الي يسوي سوايتك مستحيل يوكف بوجهي لان مو كدها
تتوقعين يجي
خوله : راح يجي خلي بس يفتح تلفونه
ناي : بقيت اسولف ويه عمه وسديته
بان رقم مهند عندج
بان : اي موجود خابر على بيبي من اجه من السفر وخزنته
كمت حولت رساله عمه اله عود اني الي كاتبتها ومنتظره شوكت يفتح تلفونه طب يونس مدخن من الاعصاب وحاير اعرف كلامي دوخه بلزايد
اريد تلفونك رقم حوري بيه
يونس : اي بيه هاج
ناي : دكيت عليه مجاوبت وره ١٠ دقايق ردت دكت
حوراء : هلو يونس
ناي : اني ناي
حوراء : هاا حبيبتي طمنيني
ناي : ابني شلونه
حوراء : كلشي مابيه يلعب ويكمز كولي انت شونج
ناي : متأذيه حيل حوري
حوراء : سوده عليه كون حبايه بمعدته لمهند على دكته هاي كون ماياكل ولا يشرب ويخلصها بلحمام وماكو مي
ناي : ابتسمت بقهر على دعوتها شصار ورايه
حوراء : اجه خالو عمران وصلاح والدنيا انگلبت محد قبل على سوايه مهدي هو اصلاً مهدي ماحجه شى ولا كال سبب العركه بس كال مشكله بينا لحد يدخل بس امي اوووف شحجي هم تبقى امي هي حجت السالفه كلها خرطت الاول والتالي وتعارك مهدي وياها بحياتي مشايفته هيج يعيط على امي كوه سكته خالي لان حجت وعاف الكل وطلع ولهسه ماكو وميجاوب على تلفونه
ناي : انطيني رقم خالو عمران
حوراء : هسه ادزه الج برساله نايه انتي هم على كيفج وقدري وضع مهدي حقه واحد يجي يكول اله مرتك كيت وكيت وهلمره ابن عمها شتردي ياخذج بالاحضان هو تهستر لان انتي مرته واكيد غار عليج وفقد اعصابيه يبقى رجال وغيرته تعمي
ناي : دزيلي رقم خالو محجيت اي شى على كلامها لان همي هسه ابني
اخذت الرقم ودزيته لعمه
بليل وهاي اول ليله بليه ابني و مهدي جانت صعبه حييل تخنك حايره ادور ريحة ابني لو حضن مهدي كل لمسه منه وخاصه مصار جم يوم واني بحضنه وهستوها الدنيا شويه ضحكتلي وياه وتالي شالتني وركعتني بلكاع من تذكرت كلامه وضربه الي اختنكت اكثر
منمت للصبح وعيوني مانشفت شلون تنشف والصارلي يخلي الحجر يبجي غفيت شوي وجهه الصبح من التعب كوه غمضت عيني لان حيل تحرگني
كعدت الصبح على ايد بيبي تلعب بشعري
عمشه : هااا يمه صبحج الله بلخير
ناي : صباح النور بيبي
عمشه : شونه وانه اشوفنج مكدره ومهمومه ودمعتج طايحه على خذج
ناي : حظي يابيبي
بديعه : هله بوردتنا اليوم تتريك ويانه
ناي : بلاعيمي حيل مطبكه ومااكدر ابلع
عمشه : تعاي يمه امرخها الج والجعيها بجاي حار تصير زينه
ناي : بقت بيبي تفرك اليه وراها شربت جاي حاولت ابلع اللكمه كوه واني عيوني ماكو غير صوره سيف گبالي اكل شرب نايم اخاف يخفلون عنه كمت متحملت واخذت التلفون ودكيت على حوراء ضل شكد يدك لحد مشالته مبين نايمه
حوراء : هااا ولج حلمانه بيه
ناي : صباح الخير فدوة حوري سيف شلونه
حوراء : شونه رجله بحلكي ونايم بلعرض الليل كله طن دفرات اكلت منه
ناي :گلبي نار عليه
حوراء : لتخافين يمي والله عيني عليه هو انتي موجوده وكل الوكت يمي ارتاحي
ناي : شرتاح واني بعيده عنه كعدي اريد اسمع صوته وابوسه
حاولت تكعده نومه ثكيل ميقبل يكعد
حوراء : من يكعد اخابرج لتضلين تهرين بروحج سيوفي بعيوني حيري بمصيبتج وفضيها حتى ترجعين لبيتج وابنج
ناي : الله كريم مااوصيج فدوة وكلي وغسلي اله وعينج عليه لتخلي يطلع
حوراء : صار بس كافي رجف وخوف وشيصير اني ابلغج صدك خالي راد يجيكم البارحه وتالي مهدي مقبل وتحاجه وياه وخالو كال يومين خلي يهدا الوضع ويجي وكال سلميلي عليها وصليلها خالج وياج ويعرفج تشرفين العشيره والعيبه متطلع منج والتردي يجرالج ويسلم هواي عليج
ناي : الله يسلمه اعرف بيه ميقصر
سديته وبقيت اليوم كله كاعده وايدي على خدي ومااعرف شسوي ابجي هواي ومن اشوف بيبي تتأذه اسكت لان هيه مريضة والبيها كافيها
يونس بقى بكربلا مارجع لبغداد ويتخابر ويه مرتضى علمود بلكت شاف مهند
مرت ٣ ايام والله مو ٣ ايام احسها جن عمر لان ابني مو ويايه وقهرتي من مهدي كعد تلجع بروحي بيبي وصت عمو فلاح مينطون خبر بلي صار لا لعبيد ولا جوحي لان تعرف اذا ادخلو احتمال يلوصوها اضافه صالحه مراح تنطي بأبنها والله اعلم شسوي يجوز حتى تخبث تروح لوداد وتأكد كلام مهند هاي وحده سافله وكلشي يطلع منها
خوله : بقيت مراقبه الوضع خابرت لخال مهدي عمران وفهمته كلشي والرجال طلع متفهم وعاقل حيل وانطاني وعد يحاول يقنع مهدي اما يرجع ناي او على الاقل ينطيها ابنها اني كتله راح ابقي الشغله وراك واذا ماانطاها ابنها لتزعل اخلي محامي ونشتكي بلمحكمه الطفل من حقها لتخلوها توصل هيج بينا جنت مستعده اداين واشتغل ليل نهار وادز فلوس لناي حتى تحط محامي وترجع ابنها لحضنها
هاي الايام جوحي يوميه يخابر واني غير حجايه شهر اله ارجع فلوسك متنزل من لساني وميكدر يتعارك ويايه لان يعرف خبالاتي
صار ٣ ايام ادك على اشواق ماكو تلفونها مغلق وهي الوحيده الي اخذ منها اخبار عبيد
لحد ما بليل دك تلفوني باوعت اشواق ركضت وجاوبتها
هااي وينج يمعوده
اشواق : هله خوله شلونج
خوله : شبيج صوتج مدري شونه
اشواق : تعبانه جنت بلمستشفى اليوم طلعت
خوله : شكوو شصاير
اشواق : هاي الگلبه بت الگلب صالحه هجمت عليه
خوله : شنوو شصار
اشواق : جنت بلبيت كاعده اتفرج على التلفزيون واكل فاكهه ومندمجه امي واختي يمي تدرين بهذا الشى امي كالت رايحه للسوك اتسوك وما اتأخر واختي نايمه واني وحدي كاعده
خوله : عبيد وين جان
اشواق : طالع للمحل وره عركته ويه مهند رجع يبات يمي
طلعت امي شويه وجان تندك الباب اني عبالي رجعت نست شى فلوس او اي شى لان اعرف هواي امي تنسى كمت فتحت الباب حتى بدون مااصيح منو جان اطب مره وتدفعني لج عيني شضخماتها تسويني عصفور جواها دفعن الباب وطبن اني وكعت بلكراج وكمت اعيط دخلن تلث نسوان وصالحه رابعتهن عصابه كفيلج العباس عصابه وحده شدتني والثانيه سدت حلكي وسحلني ليجوه واني مفرفحه بيدهن
خوله : ايا چلبات وتالي
اشواق : اضرب وادفع بيهن ولا يمهن تالي لزمني كطعني ودك على بطني حتى ايدي كسرنها واني اقاوم بس مااكدر الهن اربعه هنه
صالحه : لج اني صالحه تلعبين هيج بيه تاخذين رجلي وبيتي عبالج اعوفج هيج تسرحين وتمرحين واسكت اول شى هذا الي بطنج ادفنه برحمج وبعدين اسحلج من البيت واطلعج مخبله منه لا اخليج تبوسين رجليه حتى اتوب منج
اشواق :كمت اعيط حييل اختي طلعت تركض ضلت تضرب بيهن بس هنه قويات حتى اختي اذنها ومن وره عياطنا التمو الجيران وطلعن يركضن بعد ما طرحني
خوله : صخام طرحتي
اشواق : طلعت من الموت يخوله
خوله : مو كتلج هاي وحده متخاف الله
اشواق : توقعت سالفه سحوره هيج مو ضرب
خوله : قابل تسكت اكيد من عرفت بيج حامل رادت تاخذ حقها بيدها لعد شكد شايطه ومحروك گلبها
اشواق : والخلقج لا اندمها على اليوم الفكرت بيه هيج تسوي بيه
خوله : وعبيد شكال
اشواق : شيكول ردت اشتكي عليها بلمركز واخيسها وهو ضل يتوسل تالي كتله مااشتكي بشرط تسجل كل البيت بأسمي مو نصه بأسمي اريده كله
خوله : وقبل
اشواق : غصبن عليه مكافي وصلني الموت وسكتت اله اخليها تبجي دم هي عبالها من اطرحني راح يطلكني ويرجع الها يشمرني بلشارع بيه زود خلي يرجع الها بطرك روحه البيت وبح وباجر رايح يكمل المعامله مال التحويل ويصير كله بأسمي خلي تعرف وتمسح ايدها بلحايط واذا على الطفل احبل واجيب غيره قابل صعبه
خوله : والله وطلعتي مو هينه يااشواق
اشواق : خلي اكوم على حيلي واني افرغ الها حتى البيت الكاعده بيه اطلعها منها
خوله : ويجوز اطكج سحر تخليج تمشين اعوج
اشواق : متكدر اذا هي عدها سحوره اني عندي الي يفك السحوره اني ضليت ساكته وكلت عبيد هو يحلها بس مادام اندكت بيه وهيج سوت خلي تاكلها وهو عبيد رايح الها لاعب بيها طوبه همزين ابنها هم گلب عليها ضلت وحدها وخلي هاي الدكه السوتها بيها اتفيدها
خوله : مااكول غير الله يقويج عليها اني كتلج ونبهتج وانتي قبلتي بكلشي
اشواق : تجيج الاخبار
خوله : سلامتج خيه مابيج اله العافيه محتاجه شى
اشواق : لا ممحتاجه سلامتج
خوله : سديته منها وعفتهن وحده تاكل بلثاني حيل بقت سهوره اكيد متگلايه هناك
ناي : احجي بلتلفون ويه حوري واسمع صوت سيوفي واحجي وياه منبهه مهدي ابد متخابرني وهي خطيه بلبوكه تخابرني وتسمعني صوت سيف سمعت هوسه بره
حوري بعدين اخابرج سديته وكمت اركض
بيبي بلهول هيه وعمه كوه كامت بيبي على العكاز طلعنا ونشوف مهند ويونس واحد لازم الثاني ودك ضرب وبينهم مرتضى وعمو فلاح جان يونس يضربه بقوه وذاك هم مدخلت لان مرتضى موجود وعمو خليت يونس يفرغ عصبيته بيه عفتهم وطبيت جوه بيبي وعمه يعيطون وخايفين من الموقف عفتهم ودخلت لغرفة بيبي فتحت الشباك على كيفي واباوع واحد ملخ وجهه الثاني لحد مابيبي ياعيني عليها وكعت من العكاز وصارت بينهم يله واحد هد الثاني كوموها همزين منكسرت من وراهم وعمو كام يغلط عليهم وطببهم جوه
اسمع يونس يغلط عليه ومرتضى يحاول يسكته مبين رسالتي وصلت لهذا اجه بقو اكثر من نص ساعه عياط وصياح وكل واحد يحجي شكل شيفيد الحجي اني الي واكعه بيها اني الي انداس شرفي
متحملت لبست شال على راسي وطلعت من غرفه بيبي وصرت كبالهم جان عمي فلاح ويونس ومرتضى ومهند كاعدين اباوع يونس وجهه متأذي ومهند هم
كلت الهم من رخصتكم اريد مهند احجي وياه
وحدنا
يونس : شتحجن هو هذا مال حجي
ناي : فدوة يونس خليني احجي وياه ما اتأخر والله من رخصتك عمو اني ام الانه وكل هاي الهوسه اليه ولازم افهم الصار كله ومراح افهم طول ماناس تضرب وناس تعيط اني احجي جم شغله وياه وراها ماادخل بعد
عمشه : كوم يلملطم ويه بت عمك
فلاح : غير نفهم شتردين منه
عمشه : عيفهم يمه خلي ناي تسولف وياه هذا تسودن وماضل فگر براسه وسود وجهه بت عمه لزوم تعرف بنفسها عليش كل هاي الطلايب بسگم وانطوها مجال تفهم راسها من رجلها خذي يمه لغرفتي
يونس : بيبي صدك جذب مو كاعدين
عمشه : كوم غسل وجهك مشلفط ماضال ساحه عدله بيه حارث وجهك حرث وعيف اخيتك كلها دقايق وترد چا راح اطير
ناي : كام مهند ودخلنا للغرفه هو كعد على جربايه بيبي واني كعدت بلكاع گباله وعدلت الشال مالتي خليت ظهري على الحايط
جريت نفس وكمت احجي بهدوء وياه
شلونك ياابن عمي ياشيال همي يكولون ابن العم درع للضيچ وسند للبنيه
مهدي : شتردين ناي اني اجيت لان كلتي انت مو كدها وردت اثبتلج اني كدها
ناي : كدها بأن تطعن بت عمك اي بهاي والنعم كدها وكدود هم
مهند : وانتي السويتي بيه قليل
ناي : انت ليش تعرفها وتحرفها ليش اتذب كلشي براسي شتريد توصل لوين يامهند
مهند :مثل ماحترك بجمري احركج وياي
ناي : باوعت عليه وكتله تتذكر من جنت طفله شكد جنت اداريني جنت تخاف عليه من الهوا واذا لزمني مرتضى تتخبل وحتى من جنت تشتري لاختك جنت تكطع من مصرفك وتشتريلي حبيت حنيتك عليه وكلت اذا بيوم أحد يأذيني اكيد مهند يوكف بوجهه وامك ياما وياما جانت تحاول تضربني وانت توكف گبالها تتذكر من وكعت على رجلي وانجرحت وانشكت رگبي رحت لابن الجيران فشخته براسه وخليت دمه يجري لان دفعني وبيوما ابوك عاقبك لان ضربته وضربك بلعوده كسرها عليك راد بس يعرف سبب ضربك للولد محجيت حتى لا امك تأذيني من تعرف من ورايه وغيرها من المواقف الاوكع بيها الكاك اول واحد يلزم ايدي وياخذ حقي
حتى من حسيت بمشاعر اتجاهك كله لان انت حنين وطيب ويايه ومداراتك المالها حد وجنت دوم اكول كلها تأذيني اله انت ومن دخل يونس للسجن اشوف ركضتك وتعبك حتى اخويه ماياخذ حكم جبير ويضيع
مهند : زين تتذكرين شجنت اسوي علمودج
ناي : اني مو قليله اصل وانسى اعرف معدنك شنو لهذا انصدمت بطريقه عقابك اليه
مهند : جنت اشتغل ليل نهار واتعب وانجرح واتأذه ومن اتذكرج اكول يهون لعيونها المهم اعيشها عيشه زينه وماتحتاج احد وابني بأحلام وخيالات وتالي من اجي الكاج بحضن غيري وتردين اسكت
ناي : احلفك بعزيز گلبك جان يعيط
مهند : لتحلفيني لان عزيز گلبج طعني بظهري
ناي : بلعت ريكي من عيطته وحاولت اهدي نفسي وكتله
ماشي اني ناقصه اني خاينه اني مو خوش اني بعتك اني كلشي موزين بيه انت مفكرت من تكول هيج لمهدي شراح تكون ردت فعله انت لو تحبني جان خفت عليه
تدري الصار بيه يشبهه الصار بإمي نفس الشى نفس الموقف انعاد الزمن بس الفرق هذا حماها وانت ابن عمي ابويه اجوي كالو اله مرتك تحب اخوك وتهستر عبالك ابويه يريد يگتل امي خلاص اكيد لا بس ساعه شيطان وسمو عقله شالها وشمرها وتاليها اندفنت بعز شبابها وعافت ٣ يتامه يتلطمون بلدنيا مفكرت ولو ثانيه وكلت اخاف ناي تتعرض لنفس الموقف رجال وسمع على مرته هيج شغلات ودخل الشيطان براسه مو شرط يشمرني من الدرج مثل ماابويه شمر امي يجوز يحط طلقه براسي ويكتلني واروح اسكن الكبور يم امي ويتيتم ابني ويضيع مثل ماضعنا احنا
مهند : حتى اذبحه وراج
ناي :لا بالله لعد شتريد يسوي يبوس راسي ويكول يله لتضوجين ماضي وراح خلي يولي مااسمع كلام ابن عمج
انت غايتك اطلكني من مهدي اعرف كل السويته حتى اطلك منه وارجع الك
مهند : اني بعد مااريدج
ناي : لا تريدني والسويته حتى اصير الك بس انت مخفت الله بيه اول شى ذبيت تهمه شكبرها وكسرت سمعتي كدام الكل ولوثت شرفي ثاني شى ماخفت عليه لا انذبح او انكتل اهم شى تبرد گلبك وتتشمت بيه وتذلني وثالث شى عدت نفس السوته امك بأمي وجاي تلومني لان مابقيت انتظرك افضل ماتلوم وتخطط وتأذي روح اسأل صالحه شسوت بيه وبأختي
مهند : كالولي
ناي : لا محجو كلشي مكالو الك شون انهزمت بليله ظلمه حتى احمي اختي ماكالو الك شون كامو يلوبون حتى يزوجوني غصب ويخلصون مني مستحيل كالت الك امك شسوت بينا من اخذت شرهب وضيعتها بسلمان باك حتى بس تطعن بيها وتكول انهزمت ويه واحد امك سوت سوايات الشيطان يضل صافن عليها هججت الكل من البيت حتى بيبي وكسرتها بسببها وبعد كل هاي السنين وبكل عين صلفه جاي حتى تذب كل سوايات امك براسي روح حاسبها وحاسب خالتك وابوك وعمك شون شمرو لحمهم بلشارع لا تحاسبني والله ماانتظرتيني
وخلي اذكرك بشى اذا ناسي اني مااعيرك لان هي هم بت عمي وعيب احجي بس باع الفرق بينك وبين يونس اختك وعدته وخلت بيه وتزوجت ومن وراها طلب سجن ومن طلع ماحاول بيوم يشوه صورتها كدام الناس وهي تستاهل لان حقيره واكتفه ابتعد عنها رغم كلشي شافه منها لان شريف واكفه بعينه بأن هيه محسوبه عليه بينما انت بأول فرصه طعنت بأخته وخليتها مهزله كدام اليسوه والمايسوه ارتاحيت برد گلبك هاي اني مشموره هنا ومحرومه من ابني عبالك اذا اطلك ارجع الك لو يصبوك ذهب مااكون الك واحمدالله لان ماتزوجتك لان مع الاسف ثبتت اليه وبلدليل انت ابن صالحه وعبيد
والخباثه تجري بدمكم
مهند : راح تطلكين واخذج ماعندج غير حل
ناي : ابتسمت بأستهزاء متكدر لان بگلبي الك بس الكراهيه والحقد واذا يدفنوني ويكولون مطلعين اله تتزوجين مهند راضيه اندفن ولا اكون الك
مهدي : لهاي الدرجه كارهتني
ناي : من ايدك انت كرهتني بيك حرام عليك ماشفت مني غير الكلمة الحلوة واني مو ذنبي قشمرو عليك ومحد انطاك خبر بلصار اليه مهند اني ناي ترضى اعيش العمر كله ادعي عليك ترضى انحرم من ابني امك حرمتنا من امنا وانت جاي تكمل سوايتها
نزلت دمعتي وكمت اشهك ليش ماكو واحد بيكم يراعي الله بينا شنو السويناه فتحنا عينا على اذيه امك وابوك وراها اختك وهسه انت مكافي لكم انتم من ياطين مخلوقين خليتونا نكرهكم كره العمى
جان يكوم يروح ويجي ويعيط
مهند : تعرفين شنو انتي اليه لج انتي روحي انتي الهوا الاتنفسه تحملت الغربه لعيونج ماحبيت ولا حتى تجرأت اصادق حتى لا اخونج واكول اذا سألتني بيوم اكلها بس انتي مره بعيوني شايفه هناك شكد مغريات وشكد بنات مافكرت بيوم اخونج حتى بخيالي خلصت ٤ سنوات مطي شغل انام جفي على وجهي واون من التعب واكول ميخالف اريدها تفتخر بيه حطيتج بعقلي وگلبي وقفلت عليج بيه ماكو بشر لو تفترين زحوف على ايدج متلكين واحد حبج بكدي وتحمل حتى تصيرين اله بكدي حتى ابويه وامي التحجين عليهم ضربتهم عرض الحايط ولا اهتميت برأيهم كلت ناي الي هيه راح تعوضني كلشي واعوضها كلشي حتى حنان الاب والام
ناي : اني مو الك افهم رحمه لله اني مو الك وكتلك قبل لتسافر انت حالك حال مرتضى
مهند : ورجعتي وعدتيني
ناي : لخاطرك لخاطر لا تنسجن هيج اسوي شى زين الك يرجع عليه بلموزين وتعال كولي انت منين عرفت سالفه الشامه
سكت وراح بأتجاه الشباك يباوع ويجر حسره
مهند : من جنتي صغيره ادري بيها شايفها ونسيتها وبيوم كعد تنظفين ومدنكه وطالع ظهرج نازله البجامه متدرين بروحج ودخلت وشفتها الله شاهد غضيت بصري بس گلبي رجف وحلفت من يومها من تصيرين اليه وعلى ذمتي وحلالي لا اول مكان ابوسج منه هو الشامه
ناي : عطت بيه كاافي لتنسى اني على ذمه رجال عيب عليك
مهند : انتي سألتي واني جاوبت
ناي : تذكرت عمه خوله من منعتني من لبس البجايم وحولتها كلها دشاديش وماامسح وادنك اذا اكو احد فزيت من صفنتي وكتله شون كدرت تكول لمهدي مستحيت
مهند : مهدي مصدكني بالاول وسد التلفون بوجهي ورجعت دزيت رساله اله كتله عندي دليل وهو خابر ومجان عندي حل غير اكول سالفه الشامه لان مكانها مينشاف بسهوله وراح يصدك لج رجلج ميسوه التراب التمشين عليه صدكني وأذاج لو يحبج ميصدك او على الاقل يتأكد هو راح يخلص منج واجته مطبوخه وكامله
ناي : هذا شى يخصني ويخصه وارجع واكول يامهند مااصير الك
مهند : وره هذا الحجي كله تردين اروح اكول اله انتي ماعندج شى ويايه وابريج
ناي : لا مااريد خلي هيج ماطول صدك واحد مثلك معناها ميستاهلني
صفن بوجهي واستغرب جان يكول لعد شتردين
ناي : ردت بس اكول الك مامبري الذمه بلي سويته بيه وربك ضرباته قويه واخاف عبالك بيوم اكون الك وتنتظر لا ادوخ راسك روح اطعن شوه احرك اصلخ شسوي عادي ولا اهتم انت من اليوم بداخلي حالك حال امك وابوك واختك كلكم اكرهكم وبلنسبه لمهدي برأتني كدامه او لا هذا الانسان هم انتهى كلكم اشيلكم واشمركم من حياتي ولا اندار واباوع عليكم لان ماتستاهلون حتى اتعب نفسي واندار
تفضل روح لاهلك شوف مصيبة ابوك وامك واذا تحب تمر لديالى تكمل البديته روح الله وياك ومشكور ياابن عمي سهمك وصل وغرز زين مشكور ماقصرت كفيت وفيت
عفته وطلعت
ورحت للمطبخ مااريد اشوفه
اجت بان
بان : هااا شصار ولو حجيكم نصه سمعنا لان مرات صوتكم يعلى
ناي : اريد ابني انطيني تلفونج اخذته وخابرت خالو تقصدت اعلي صوتي حتى يسمعني مهند
عمران : هله بنيتي شونج
ناي : الْحٍمَدٍ للـّہ خالو اريد ابني
عمران : اني مااجيت لان منتظر مهدي يبرد شوي بلكي اقنعه وارجعج ونفض هاي السالفه كلها
ناي : واني ماارجع لمهدي حتى لو هو راد كل الاريده منك سيف مااكدر بدونه واذا مقبل حتى نسويها محاكم الحضانه من حقي
عمران : خالو كولي ياالله كلها جم يوم ويبرد ماكو شى يضل على حاله
ناي : اي عفيه خالو ماكو شى يضل على حاله واعتقد اني اكتفيت من ابن اختك واختك ومااريد شى منهم طلعوني مثل مااستقبلوني بس اني تركت امانه عدهم ابني ومااعوفه الهم لو اعرف يوميه محكمه ادخل
اذا الي معزه ومحبه بگلبك انصف هاي اليتيمه گبل جم سنه اجيتك دخيله وانت استقبلتني وزوجتني حتى تحميني وماتدري انت ذبيتني بنار جهنم وهاي اني اترجاك طلعني من هاي النار واجبر بخاطري ورجع ابني بحضني
عمران : يصير خير بنتي تحملي هليومين واني اطيب خاطرج
ناي : مشكور خالو
سديته لكيت الكل يسمعني اني جنت احجي بصوت عالي
باوع عليه مهند وطلع وركض وراه مرتضى ويونس لزمت يونس من ايده
بروح امي عوفه خلي يولي
يونس : لج مابردت گلبي منه
ناي : حضنته وكتله تعبانه حيل ابقى يمي حسيته سكت وباس راسي وبقى يمي
عفيه جيب شرهب يمي مشتاقتلها
يونس : باجر اطلع واجيبها خابريها وانطيها خبر حتى تكول لرجلها
شرهب : خابروني على سالفه ناي تخبلت وكلت لعمي وعمتي وكالو روحي الها وابقي براحتج جنت حايره بعدي اخاف ميقبل شو هذا بسرعه قبل وگيف هم كلت بعد احسن خلي ابقى جم يوم يم اختي واهلي
اجانه الصبح يونس وطلعت وياه طول الطريق افكر بحال نايه شكد كرهت مهند وسوايته الحقير ويونس حيل متأذي من الموضوع كله وصلنا لكربلا بعد ما وكفتهم مرتين بلطريق لان معدتي توجعني وتلعب نفسي من وره الحمل
طبيت الهم لكيت بيبي كاعده يم ناي اطيب خاطرها مبين باجيه
حضنتها حييل
ليش مكتلولي
ناي : انتي تعبانه شيجيبج الطريق صعب عليج بس حيل اشتاقيتلج ومتحملت
شرهب : شبيهه رجلج تزومل اكو واحد يصدك بمهند
ناي : ابن عمج الشفيه هم ممقصر مطلعني من البتاوين
شرهب : الله لاينطي عباله مثل اخته يوميه بحضن واحد
ناي : عوفج منه شخبارج
شرهب : عايشه بعدني صامده رغم الاعاقه
ناي : ليش اعاقه ياستار
شرهب : ليش هو الي يعيش ويه عدي ميصير بيه اعاقه يمعوده بعد فتره تلكيني بلشماعيه من وراه هلمره الطلاب طابين طالعين گلب البيت مدرسه
ناي : ميخالف تحملي اقلها يگون نفسه وينطيج
شرهب : هااي شبيج من كل عقلج ينطيني لو اموت فلس مااشوف منه هذا البخيل ضال يجمعهن تكول راح يعبرنه للجنه عوفج منه هذا يرادله گلب ممدشن
شونج عمووش
عمشه : عموش بعينج ام شعفه چان انه موش كاعده جدامج ضاله ادردمين ويه اخيتج وناسيتني
شرهب : هذا منو ينسى الحب مالته
عمشه : چاانه مااكل بسوالف القشامر لاتبيعيهن براسي
شرهب : كمت ابوس بيها لتزعلين ياحلوة انتي الخير والبركه
ناي : بقت شرهب يمنا ويونس راح لبغداد علمود المحل وصار يومين مااجه كال اكمل اموري مااعرف ياامور يقصدها
رغم كلهم داير مدايري حتى عمه خوله تلفون مايبطل كل شويه مخابره بس علتي وشوقي على ابني مخليني مااحس بوجودهم كمت مااكل والمي كوه ابلعه الليل اخلصه ابجي وخطيه حوري تخابرني على رقم بان وتسمعني صوته واني اشب وانطفي من القهر
لحد ماخابرت الصبح وكالت خالي جايكم وياه مهدي وصلاح وعبد
سديته منها وبلغت بيبي وعمه خابرت عمو فلاح اما يونس ماالحك انطي خبر
تفاجأت بدخوله وبيده مسواك
يونس : صباح الخير
ناي : صباح النور الله جابك همزين ذوله جايين
يونس : اي اعرف
ناي : منين تعرف مجاوبني وانطه المسواك للبنات وهنه كعدن ينظفن زين كالو عيب لازم البيت يلمع من يجون
طبيت سبحت ولبست دشداشه مال بان جديده ولبست شال اباوع لوجهي اصفر حتى بياض عيوني اصفر وشفتي بيضه وجهي كله حب الشوطه بعدها مرايحه من دمي
بقينا ننتظرهم وعمه بدت تسوي غدا حتى يتغدون كال يونس عيب جاين من طريق بعيد ويطلعون بليه غدا متسوك لحم وسمج مبين هواي صارف بدو البنات يساعدون عمه اني مقبلو ادخل المطبخ لان اصلاً ايدي ترجف مااكدر الزم شغل
يونس هو وعمو الي اجه من شغله كاعدين ينتظروهم وبيبي وياهم الدقايق كوه تمشي لحد ماسمعنا هورن سياره جن رن بگلبي
طبو وتسالمو واني باقيه بغرفه بيبي اسمع كلامهم ماكو صوت لسيف متت قهر وكمت اكل بأضافيري يعني مجابو وياهم بيت عمو فلاح صغير هو هول (صاله) وغرفتين نوم جوه وغرفه فوك يعني ماكو غرفه خطار بيت قديم بس عمه ايدها بيه تنظف وترتب وكاعدين لهذا من كعدو بلهول اسمع كلامهم كله
بعد ماسلمو وخالو سأل عن صحة بيبي وسوالف بلربع ساعه كالو خالو
عمران : اريد ناي حتى الحجي كله كدامها
ناي : فتحت الباب يونس وصاحني طلعت مدنكه سلمت ورفعت عيني بعينه اااااخ منك شكد اشتاقيتلك هو مباوع حتى بوجهي كعدت گباله وبصفي بيبي ويونس
عمران : تعرفين معزتج عندي ميحتاج افتح مواضيع تاخذ وقت منا ومنكم الصار شى جبير وكلكم تعرفوه والي اجه ابن عمها يعني مو واحد غريب من الشارع حتى نفصله ونشعل عشيرته اني حاولت اوصل لمهند وحتى حجيت ويه ابوه ابنج ياحجيه ماانطانه نجده وكال منكم اله ردت على الاقل افهم ليش هيج سوه ولا حضيت بلولد ولا ابوه وكف ويانه وساعد
الشهاده لله ناي ماشفنه منها غير كل الخير سنين بينا صوتها ماسمعناه ومداريه بيتها ورجلها ومتحمله اختي ليش اكذب اختي قويه وصعبه وناي تحملت كلشي وماشكت وهذا من اصلها الطيب
يونس : وخوش جازاها ابن خالها ورجلها
عمران : على كيفك يونس لاتنسى هو رجال ودمه حامي يسمع هيج حجي اكيد مايسكت حط نفسك بمكانه اني مكعد اطبك وياه واكول السواه صحيح بس هم السواه نتيجه ردت الفعل وليش صار جم يوم مااجيت حتى تبرد الگلوب والعقل يشتغل
وجاي اليوم وجايب مهدي ويايه حتى نرجع ناي
يونس : ناي مترجع
عمران : ياابني انطينا صبر المواضيع ماتنحل هيج همه عدهم طفل بينهم شنو ذنبه وماكو رجال ميتعارك ويه مرته
فلاح : هاي السالفه تختلف ابو عبد مهدي حيل اذاها وطردها ولهسه اني متأكد شاك بيها لان حسب كلامكم ماحضيتو بمهند وبراها
عمران : اي ابو بان ماحضينا وحتى لو شفناه الي يسوي هيج مااعتقد شريف وابن حموله ويبريها هذا رايد يهجم بيتها
ناي : اني مدنكه وكلت بهدوء وانهجم
عمران : لا بنتي ان شاء الله ترجعين لبيتج وبين الحق وتتصافى الگلوب ترجعين ويانه لخاطر ابنج واحنا نبقى اندور على مهند لحد مايبين اني مااكدر اكعده عشاير لان سمعتج تصير على كل لسان الي عليه تجين هسه ويايه بين مانحضه بيه واني اكعد وياه وعسى ولعل يحجي ويبري ذمتج كدام رجلج
ناي : تجرأت ووجهت كلامي لمهدي وهو جان كاعد متوتر والوجهه مگلوب
صحت بصوت ناصي وكلت مهدي رفع عيونه بعيوني وكتله
بعدك مصدك بمهند
نفخ بقله صبر ومحجه رجعت كتله
مبين الصار قبل اربع سنوات انعاد اليوم
عمران : شنو قصدج ام سيف
ناي : قبل اربع سنوات كعدت مهدي وجبرته يتزوجني واليوم جايبه وجابره يرجعني واذا غلطت قبل وافقت على الصار مااعيد الغلط مرتين
مهدي : طفل كدامج ويجبروه شو انتي متعرفين تحجين
ناي : لا اعرف احجي وكلامي تدري بيه كلش زين صحيح جاي لخاطر خالك وابنك واني مااقبل اعيش الذل مرتين عشته گبل وتحملت برودك ومحبتك لغيري جان يخنزر لان كاعد صلاح عباله راح اجيب طاري سدره بس اني مستحيل اجيب طاريها وبنفس الوقت ردت اذكره شتحملت منه
كملت كلامي ومدرت بال لان تعصب
وتحملت لوعتك واكول اني دخلت حياته حقه لازم اتحمل يجي يوم وينساها وصبرت على صدگ اليه اكثر من مره حتى كرامتي صارت جوه رجلك وكلت رجلي مابيها شى ماكو كرامه بين المره والرجال ايام وسنين اني والماكو سوه يمكن جهازك تستفقده اكثر مني حتى طفل ثاني ماردت مني حتى لاترتبط اكثر الوفرته الي غير الاكل والشرب والفلوس عبالك ذني راح يعوضن اهمالك وتحملت امك الي حتى اهلها محد متحملها وصرت خدامه الها تكرب ليل نهار عليه وبلعت وسكتت لعيونك وكلت بيتي مو بيت غريب اخدم بيه
وتحملت اهاناتها ويوميه تعير وتبسمر واكول تهون مره جبيره واتحملها تالي اطلعني مضروبه ومنهانه وتريد ترجعني وانت بعدك شاك بيه لخاطر خالك لا اعذرني لهنا وبس رجعه ماارجع من رخصت اهلي وعمي هاي حياتي واني اقررها انجبرت مره هلمره ماانجبر بجاه اخويه مااعتاز ان شاء الله احد
كل الاريده منكم ابني والله وياك روح شوف حياتك
مهدي : سيف ماانطي يااما تجين ترجعين وتخلي بحضنج لحين ماالزم ابن عمج العار يااما تضلين هنا وابنج تحلمين تشوفي
يونس : لا تشوفه مو بكيفك
طفر يونس على مهدي ولزمه صلاح وعبد
عمران : هيج اني مالي مقام عدكم تتعاركون كدامي
يونس : على راسي خالي مقامك عالي بس شوفه شون كاعد وشايل خشمه ويتأمر
عمران : مالك دخل بيه الحجي يمي بتي ناي تعوذي من الشيطان وامشي ارجعي لبيتج وكفي هاي السالفه كلها لتنسون اكو دم بينكم وانتم اهل
ناي : العندي كلته خالو رجعه ماارجع وسيف اخذه حتى لو اعرف بلمحاكم
مهدي : انتي مره وطبي محكمه لااذبحج واشرب من دمج
يونس : هاااك كدامي ويهدد لك انت شنو ماكو احد واكف بعينك كدامي تهدد بيها شو اطب وبيدي اخذها واخليها تشتكي عليك واخذ ابنها من عيونك
مهدي : خوش انت سويتها وشوف شراح اسوي
عمران : كاااااااافي اسكتوو
حجيه راضيه بهذا الحجي
عمشه : الدنيه كسرت جفي و عضيدي
و بعد ميفيد عض شفتي و عض ايدي
شلي بدنياي لو غرب عضيدي
هذاك الجان من اوكع تجيه
مايفيد يمه ابوعبد الشك خاش بينهم كل واحد منهم لازم خنجر وضامه وره ظهره انه اكولن انطوها بزرتها ولاتكبرون السالفه وعيفوها لون تبرد ومن تشوف الطيب منكم ترد لدارها هذا اليعت من كل جانب مايلوحكم غير الخراب راح البزره تمزك (تتملخ) بينهم ويطيح بيها ردت ناي الحين ماتفيد لا ابن اخيتك راح يعاين بوجهه عبنهه شاك وافاده افرفح منهه وكل مايعاين يتذكر الصار ويأذيها ولا اخيتك تسكت وتلصم لسانها راح تعلكها للستار وتگببها عجاجه
انه اكولن لاادجهه يمهدي وجرحهه ماطاب عبن المجروح رداته كويه
عمران : صحيح كلامج ام عبيد نخلي الايام تبرد الگلوب
ناي : اريد ابني كلشي مااريد منكم
عمران : اني راح اجيبلج ابنج
مهدي : خالي احنا شتفقنا
عمران : بعدين نحجي اسكت
يبقى جم يوم لحد ماتهدين وبلكي بهاي الفتره نحضه بهذا الچلب ونخلص من هاي الدوخه كلها
ناي : شوكت تجيبون ابني
عمران : اني باجر بيدي جايبه الج
ناي : باوعت على مهدي اختنك حييل حتى من خاله
رادو يطلعون مقبل عمو ويونس وصبو الاكل مهدي مقبل ياكل بس خالو تقصد يكعد ويكعد الولد حتى هو هم ينجبر يكعد راد يهدا الوضع اعرف بيه كاعد على بركان على لحظه يطك اني طبيت للغرفه ولا طلعت
شرهب : صبينا الاكل ونطي بيد يونس نسيت الخبز طلعت اركض عليهم صارو بوجهي وخاصه عبدالرحمن باوع عليه وضحك ودنج
عمران : شونج بابا شرهب
شرهب : الْحٍمَدٍ للـّہ خالو
عمران : عيشتج شونها
شرهب : زينه ماشية هاي الخبز
جان عبد يكول
عبدالرحمن: اريد كبه من هاي ماكو يمي
شرهب : جنا مسوين سمج شوي وتمن علية لحم وگلت عمه كبب جبت ماعون وانطيته اله جان يكول بصوت ناصي
عبدالرحمن: اذا اكو شعرايه بالاكل افضحج متكوليلي شوكت تمشطين لخاطر ربج
شرهب : من تموت طيورك جان اطب وهو كام يكمز حييل ليش يعيب على شعري
اني اصلاً من اطبخ المه كله وهسه فتحته لان احتريت وصار بوجهي مبقى عليه بس المطيرجي
ناي : اكلو وشربو جاي وطلعو حتى مطلعت وراهم ابد اما يونس ومهدي واحد محجه ويه الثاني
بقن البنات ينظفن جانت السفره مرتبه فدوة لعيونه يونس رفع راسي بلغدا المرتب حتى الفاكهه جايبها
بقيت اليوم كله انتظر وخابرت عمه واكيد كلشي بلتفصيل حجيت الها حاولت الهي روحي ويه شرهب وبان وبلال حتى ماافكر دماغي راح يوكف من التفكير
ثاني يوم حاطه ايدي بحلكي واعض بيها شوكت يجوون شوكت
شرهب : بعد وكت على كيفج
ناي : لا مهدي يسوي سالفه ومينطي
شرهب : ماطول خالو عمران كال اجيبه الج يعني يجيبه فاتت صلاه الظهر واجه العصر ومحد بين
دك تلفون بان جانت حوري اخذته منها واسمعها تبجي
لج شبيج گلبي انقبض
حوراء : لج ناي سيف انتل وهو بلمستشفى هسه
يتبع ....