الأبواب الخمس

الجزء الثاني البارت ٢٢

#الابواب_الخمس
البارت الثاني والعشرون /الجزء الثاني
للكاتبة Reem

يلم بيه الحزن ساعه  والم بيه
وعليكم كلبي يوجعني  وألم بيه
الحزن تفصال ومخيط  والم بيه
لبسته وما قبل يعتك عليه💔

وداد : اسحلها لهاي الساقطه اني يوم مااجت مهزومه كلت وراها مكسوره وكتلك على بياضها هاي وحده عاشت ويه اثنين من ولد عمها بنفس البيت منو يكول ما واحد منهم قشمرها وتونس بيهاوانهزمت  وانت ضليت ادافع الها وسويتها اشرف من الشرف براسي اكلها هسه

قبل اسبوع ..

ناي : بقيت كاعده انتظر مهدي يجي واكل بروحي لازم اروح لكربلا ونحل هاي السالفه كلها مهند جاي وباله يخرب كلشي واني گلبي خلصان ومابيه حيل مشاكل معودت شوي الامور تغيرت بيني وبين مهدي مااريد ارجع لنقطه الصفر
كاعده بلغرفه ادردم ويه روحي واشيل ملابس سيف واحطهن بمكان وارجع اغير مكانهن عقلي مو براسي ولا بالي شكعد اسوي كل فكري بسالفه مهند طبت حوري عليه
حوراء : شصاير نايه وضعج مو زين وجهج ينطي الوان ومنو هذا ابن عمج الي اجه وضليتي تتراجفين منه اني اعرف مرتضى هذا مشايفته
ناي : هذا مهند ابن عمي عبيد مره كتلج عندي ابن عم ثاني
حوراء : وليش خايفه منه احجي والله مااكول لاحد تدرين بيه سرانيه
ناي : والله اعرف بس اخاف احجي ومتفهميني وعبالج مسويه شى
حوراء : صار سنين سوه قابل مااعرف انتي شنو احجي وخلي افهم لان حالج يصفن

ناي : بديت اسولف كلشي الها وهي تسمع حتى مقاطعتني
حوراء : انتي جنتي تحبي
ناي : مو حب والله تكدرين تكولين مراهقه احساس لازم البنيه تحسه من تشوف اهتمام من ولد شاب وخاصه مهند جان طيب ويايه وكتلج يوم مادخل يونس السجن صحيت على نفسي ولو جنت احبه جان مستحيل اكدر اتركه اني بسهوله تركته وحسبته ابن عمي وكتله وداعت سيف كتله انت حالك حال مرتضى وهو مقتنع وحتى يوم ميسافر وكتله انتظرك خفت ليبقى ويدخل السجن ودخلته راح تصير بسبب اختي لان هي البلغته بسالفه سما وخلته يضرب اخته ردت بس يروح حتى صالحه ماتحقد حيل على شرهب كلت تفض السالفه مو ولدها واحد بلسجن والثانيه بلمستشفى بهيج راح تحركنا اني واختي ولو اعرف صالحه راح تنتقم من شرهب هيج انتقام حتى مااطلب من مهند يروح والقران جان خليته يبقى واكيد صالحه مراح تخلي يدخل سجن همه لعبوها علينا ومشت براسنا سفرت ابنها واستلمتنا وحده وحده والباقي تعرفي

حوراء : اني ما الومج لان انطيتي وعد لان الوضع الجنتي بيه كلش صعب بس جان المفروض ادزيله خبر بيد احد مرتضى او عمتج تكولين اله وضعج او بعد زواجج تبلغي يابه تزوجت تره والموضوع كيت وكيت حتى على الاقل مايتأمل هاي السنين كلها شوفي اني احبج وروح بابا اعتبرج اختي الماجابتها امي وخاصه من تزوجت سدره وابتعدت والتهت بحياتها انتي صرتي قريبة حيل مني وجودج حيل مخفف عني حبست البيت بس الحق حق هو غلط وانتي هم غلط

ناي : ليش غلط شسويت
حوراء : اكو هواي طرق توصلين اله بيها وادزين خبر انتي التهيتي بحياتج ومشاكلج ونسيتي واحد اسمه مهند كعد يتعب ويشتغل حتى يكون حياة كريمة الج ولغيتي تماماً من فكرج لان لو اجه بالج ولو مره جان حاولتي توصلين اله شوفي من شوكت عندج تلفون صار اكثر من سنه فكرتي مره تخابري فكرتي ولو مره تاخذين رقمه وتفهمي الصار حتى يعذرج هو مجروح مرتين مره لان اتزوجتي وضاع حب عمره ومره الثانيه لان عايشة حياتج ومخلفه وناسيته من بالج تماماً وهذا الشى الي مخلي ميشوف كدامه

ناي : والحل شنو اسوي مااريد يدمر حياتي
حوراء : لكل فعل رد فعل ومع الاسف ابن عمج راح يكون ردت فعله قويه مااتوقع يسكت هو يريد يرد الاهانه وكسرت الگلب الصارت اله وانتي الحبابه الشطوره تكوله احبه لرجله بربج هاي حجايه الكدامج صاير بارود تجين تقربين النار منه طبعاً يطك بوجهج مرات عندج سوالف تخلي المقابيلج يرد يخنكج اسكتي خلي شيكول خلي يكول تجي بكل اريحيه اني احب رجلي زين منه ماحط طلقه براسج
زين ليش متحجين لمهدي اقلها تكسبين نقطه وتسبقين مهند حتى اخاف يحجي شى مهدي يعرف ويكدر يلطه على حلكه ويوكفه عند حده

ناي : لا مستحيل احجي هو بليه شى علاقتنا مامستقره هلمره اكعد كباله واكله والله نسيت ابلغك ابن عمي يحبني وجنت منطيته وعد انتظره وضربته بوري وجاي يحاسبني ويريد يطلكني منك اخاف يجيك عفيه عود رده ولا تسكت اله من كل عقلج وين كاعدين بمسلسل تركي غير راح يطيح حظي هاي اذا خلاني اكمل كلامي
حوراء : والحل

ناي : هو اني اريد حل منج مو تجين تسأليني تدرين دمي نشف من الهبطه وهلمره امج طلعتلي صفح ومخلتني اروح لو قابله جان رحت ويه يونس واندز على مهند ونفضها
حوراء : وربج ولا تنفض هذا جاي وحاد سنونه عليج قابل راح يسمع كلام يونس او يسمع كلام اي واحد من اهلج اصلاً كلكم هو كارهكم ومحملكم ذنب الصار اذا امه دكت الناقصه بيه وقشمرته وزوجتج انتم همه دكيتو الناقصه بيه من سكتو وعفتوه مثل المطي يشتغل ليل نهار وهو متأمل يلكه حبيبته تنتظره يعني كلكم بنظره نفس الكفه ولا واحد بيكم بريئ

ناي : انتي ويايه لو عليه
حوراء : اني ويه الحق تدرين بيه مااعرف اجامل الي بگلبي على لساني اني شغله وحده مدوختني شون راح يخلي مهدي يطلكج والله لو تسمعين كلامي وتحجين راح تتلافين هواي شغلات بس شسوي براسج الگوي ضلي لحد ميوكع الفاس بلراس

ناي : ان شاء الله ميسوي شى يونس ومرتضى بلكي يتلاحكون اله
حوراء : بلكي انتي لترحين وياهم هلمره اذا صار شى ومهند دك الناقصه راح يكول اجت وشافتني يم بيبيتها ويسويلج سالفه جديده اكعدي واسكتي
ناي : هااا يعني مااروح
حوراء : خلي اخوج وابن عمج يحلوها وياه ابقي بعيده عنه اذا شافج يتخبل بلزايد

ناي : هذا هو باقيه مااروح
حوراء : نازله لامي اكلت راسي تريد اروح ويه خاله ام صلاح لبيت كرابتهم يمكن اكو عريس بلشغله لان متخليني اروح اله لهيج سوالف تعبانه
ناي : يله ياريت كون خوش قسمه
حوراء : باع هاي هي مال زواج بهذا الزلك اخذلي واحد كالب خلقته عليه اريد هيج واحد يضحك للهوا مو اربع وعشرين ساعه طابك حواجبه تكول بايكه ورث امه

ناي : مثل اخوج
حوراء : هو محد عقدني غيرج وغير اخويه
ناي : جان نسمع صوت عمتي تعيط
حوراء : هاج استلمي دك جهاز الانذار كومي انزلي ويايه وسوي نفسج ماكو شى تره وداد گلبها لعب منج واذا گلبها يلعب ماترتاح اله تجيب ساس السالفه وهم تعالي لسيوفي
ليطلع بره ويتعور
ناي : اي نازله وياج

نزلت وياها وحاولت امثل الوضع طبيعي وماكو شى وعمتي تباوع عليه عود شوفي ما خليتج ترحين بطرانه اني وين وهيه وين
التهيت بشغل البيت وبركضتي وره سيف حرك وكح حيل وشنو يشوفه يكسره لو يلعب بيه
خابرت يونس كال وصلنا لكربلا ولهسه اي خبر من مهند ماكو تلفونه مغلق
جان اليوم سم عليه واكفه اگلي ودخل مهدي
مهدي : هاا شو مارحتي
ناي : الله يساعدك
مهدي : ويساعدج استغربت من شفتج هنا
ناي : اي مرحت
مهدي : ليش صار شى
ناي : غير مره اروح صارت بيبي احسن  الْحٍمَدٍ للـّہ
مهدي : من يصير مجال عندي اوديج
ناي : ان شاء الله
مهدي : ناي جوعان حيل استعجلي بلعشا

ناي : شوي واكمل بين متسبح كامل
مهدي : خلي فوك اني وياج نتعشى بيج شى
ناي : هااا لا مابيه
مهدي : صاير شى ويه امي
ناي : لا كلشي مصاير ليضل بالك
مهدي : انتظرج فوك
ناي : كملت العشا وصعدت وبعدني اصعد امه طلعت من غرفتها
وداد : صايره الصواني تصعد ليفوك مو اكو ميز جوه ناكل عليه لو اله بلغرف
ناي : مهدي راد مو اني
وداد : تلكين انتي كلتي اله
ناي : لا والله عفتها وصعدت دخلت للغرفه حطيت الصينيه بلكاع وهو كعد ياكل

مهدي : تعاي اكلي ويايه
ناي : مجوعانه اكلت متأخره
مهدي : وجهج تعبان مال وحده باجيه
ناي : كعدت بصفه وكتله مختنكه مهدي خلي فد يوم نطلع سفره ولا مره طالعين حتى سيف محبوس ويايه مرات تاخذه وياك واكثر الوكت محبوس خلي نطلع مكان نغير جو بيه
مهدي : عندي روحه لسليمانيه اكو صديق هناك جاي من تركيا نتفق على بضاعه وياه وابقى يومين اكدر امددها ٤ ايام تجين ويايه بس من هسه اول يومين عندي شغل واخر يومين اطلعج انتي وسيف

ناي : هو كال هيج لو طرت من الفرح اي ياريت
مهدي : حضري نفسج باجر طالعين
ناي : كمت فرحانه وبديت احظر ملابس لسيف واله واني صفنت بله شلبس صار هواي ما مشتريه ملابس فاتحه الكنتور وصافنه وماعندي وكت اشتري انتبهه عليه وكال

مهدي : البسي اي شى وهناك اشتريلج
ناي : راح اخذ بنطرون وبلوز وقمصله  من حوراء عدها
مهدي : اي كلش زين ومناك شتردين اشتري وكثري لسيف الجو بارد هناك ابرد من ديالى
ناي : نزلت فرحانه وكلت لحوري وهيه هم كيفت كلت الها تعاي ويانه ماقبلت
حوراء : لازم ابقى يم امي حتى لتسويلكم زفه واطلع حجج
ناي : شون يعني

حوراء : ابسط شى تخابر مهدي تكول الك تعال الحك تخربطت وماكو احد يمي مباشره تلكين روحج بديالى وتخرب السفره كلها خلي ابقى اني يمها حتى شتريد تسوي فلم اتلاحك الكم
ناي : حضنتها يمه فديتها للحنينه
حوراء : جيبيلي حلويات مناك وكرزات مو تجين ايد وره وايد كدام
ناي : من عيووني
اخذت ملابس ورغم اليوم كله خلصته متأذيه نسيت كلشي وحرت بسفرتي اول مره بعمري كله اطلع سفره

كعدنا من الصبح واخذنا الجنط وهو مهدي نزل بلغ امه گلبت وجهه وهو صاحني طلعت اركض وسيف نايم بحضني حتى ماكلت رايحه عمه ماردت تذب حجايه تسمني بيها
اباوع بلطريق ومكيفه وسيف يكمز يمنا الجو بارد والهوا يرد الروح
طول الطريق مشغلين اغاني وسيوفي يصفك يباوع عليه مهدي ويبتسم
مهدي : الي يشوفج البارحه شون الوجهه مگلوب ميشوفج هسه
ناي : غير رايحه سفره متريد افرح

مهدي : بلعكس ليش لعد كتلج تعاي ويايه اريدج تغيرين جو
ناي : بقينا نسولف عن الشغل وعن سوالف صلاح وعبدو واضحك على دكات عبدو شمسوي بيهم بحيث نسيت حتى طول الطريق وراها غفيت ماادري بروحي فديت على ايد مهدي وهو يكعدني
هااا وصلنا
مهدي : اي وانتي خلصتيها نوم

ناي : شسوي الطريق طويل متوقعت هيج وسيف نام وكاعده من الصبح متحملت
مهدي : نوم العافيه يله نزلي جم حاجه واني اشيل سيف وباقي الغراض
ناي : احنا وين
مهدي : هذا بيت صاحبي من عدنا شغل نجي بيه
ناي : اباوع جمال الطرق والبيوت والاشجار رغم الجو يكص كص من البروده بس يخبل طبينا للبيت جان مأثث ونظيف حطينا الغراض وشغل التدفئه تمنيت هنا نعيش اويلي بدون صوت وداد ودوختها وكرابها
راح جاب اكل واني بقيت افتر بلبيت جان كلش مرتب وراقي

مهدي : اني رايح
ناي : وين عفيه عايفنا وحدنا
مهدي : كتلج عندي شغل بس اليوم وباجر تحملي وعكب باجر نطلع نفتر وهنا كلش امان لتخافين وتلفونج يمج شتردين دكي عليه خلال ربع ساعه اني يمج وجبتلكم اكل ومي وكلشي جاهز والبيت صار دافي حاولي ترتاحين وراح اعوف نسخه الباب يمج تعاي قفليها ورايه
ناي : لتتأخر علينا
مهدي : ما اتأخر
ناي : طلع وقفلت الباب وراه كعدت اكلت وكعدت سيف من النوم وكلته وبقى مكيف يكمز دخلت للحمام شون حمام يخبل سبحت بيه واكمز وسيف يمي يضحك عليه

طلعت الشسوار مالتي وشسورت شعري ومكيجت ولبست دشداشه قصيره بيها روب رغم الجو بارد بره بس البيت كلش دافي بقيت هواي انتظر مهدي لحد مصار الليل نومت سيف واندكت الباب الداخليه خفت اصيح لحد مندك التلفون جاوبت
مهدي : وينج كعد ادك الباب
ناي : هاي انت والله خفت عبالي شو منو
مهدي : فتحي ثلجت
ناي : اي اجيت نزلت ركض وفتحت الباب اله
مهدي : شكد ادك ياعيني غير تكولين منو
ناي : خفت لا واحد من جماعتك
مهدي : يعرفون عائلتي هنا بلغتهم لهذا محد يجي
ناي : اكلت
مهدي : اي تعشيت وهاج جبت الج ويايه
ناي : شبعانه من اكل الظهر
مهدي : ميخالف اخاف تجوعين بليل
ناي : صفن عليه وبقى يباوع عليه من فوك ليجوه
مهدي : طالعه عروس
ناي : ابتسمت بخجل ليش اول مره
مهدي : مو متعلم من اجي لابسه ملابس بيت عاديه مو تفتحين الباب هيج
ناي : غير مو وحدنا وبيتكم ميفرغ مرات خالو يجي وام عبد وام صلاح لهذا دوم البس مستور
مهدي : تعااي
ناي : سحبني من ايدي وكعد جان يحطني بحضنه خدودي دم صارن
مهدي : اريدج هلكم يوم متلبسين اي ملابس بيت عاديه كله هيج تفترين
ناي : مجايبه هوايه

مهدي : حتى لو تبقين بهذا او ليش باجر من اجي اجيبلج ويايه قطعتين
ناي : زين ليش
مهدي : شكلج حيل مغروي وحلو
ناي : كمت احك بحواجبي من الخجل والله ولا عبالك مهدي كعد يسولف ويايه مامتعلمه هيج يتعامل باسني من خدي وكومني راح يسبح ومن رجع جاب نركيله وعمرها وكعد يشرب هناك بديالى بلبيت ابد ميشرب سألته كال
مهدي : البروده هنا تسوي واهس وليش ماانركل هو جو طيب وهو وجهه حسن
ناي : بيك شى
مهدي : ليش
ناي : شو كلامك كله متغير جن واحد بدلك
مهدي : هههههه خاف واحد يسمعج عباله لازم الحزام ويوميه اكطعج بيه
ناي : لا مو هيج بس انت دوم هادئ ومتحجي واذا حجيت سوالفنه كلها عن الشغل
مهدي : اليوم الشغل مشه عدل ويايه وجهج خير عليه وهم شفتج تضحكين وعلى واهسج مرتاح
ناي : الله يجعلك دوم مرتاح

مهدي : صدك البارحه امي كالت اجه ابن عمج مهند هو مو مسافر
ناي : بلعت ريكي وكتله اي اجه من تركيا قبل كم يوم ومر يشوفني ويسلم وراح متأخر حتى مقبل يطب
مهدي : ولا ارتاحله من زمان مرتضى احسه افقر منه مرتين شفته قبل وشايل خشمه وحركاته تستفزني مااريدج تحتكين بيه واذا هو بيت بيبيتج يروح يله ترحين
ناي : مااروح اصلاً هاي الفتره باقيه
مهدي : اي زين مااريد اشوفه ولا اريد بيوم الكاج واكفه يمه تنسين عندج ابن عم اسمه مهند مالج دخل بيه لا من قريب ولا من بعيد جيته للبيت ابد ماحبيتها وبلعتها لان محاجين قبل بهذا الموضوع اذا تكررت جيته مطلعين اله وتكولين لامي او حوراء ماموجوده افتهمتي
ناي : اي افتهمت اني نعست راح ادخل انام ردت انهزم منه صدك الي بعبه صخل يمعمع هو جاب طاري مهند لو حتى الفرحه مال السفره طارت

مهدي : اني هم جاي وياج خلي انام من وكت ورايه طلعه الصبح
صعدنا اثنينا اباوع غرفه جديده تخبل تركيه بدلت بس الفراش اخاف احد نايم عليه اضوج طفيت الاضويه بقى ضوا التيبلم ضوا خافت
مهدي : تعاي بحضني وانزعي الروب
ناي : نزعت ونمت بحضنه مد ايده على شعري ويلعب برگبتي رفعت عيوني بعيونه ويحجي بصوت هادئ
مهدي : بيج شى يسحرني ومااعرفه شنو هو
ناي : يسحرك

مهدي : بيج جاذبيه عجيبه مرات احب اباوع عليج عيونج بيهم لمعه احبهم وخاصه من تصفنين عليه
ناي : اكص ايدي اذا ما بدلوك وانت مو مهدي جان يطكها بضحكه وضرب راسي على راسه بخفيه

مهدي : هيج اني مابيه خير ومااعرف احجي حجايه حلوه
ناي : لا حشاك كل الخير انت بس شايف الجبل الموجود هنا
مهدي : جبل ازمر
ناي : مااعرف اسمه هو يتحرك وانت ماتتحرك
مهدي : اممم لعد خلي اتحرك اليوم اني واوريج اذا جبل مهدي تحرك شيسوي

ناي : بقى يضحكني ويدغدغ بيه وبلحظات بسيطه انقلب الضحك الى لمسات وشفايفه تتنقل بهدوء بين وجهي ورگبتي جرأته بحركاته خلتني اغوص وياه و لكيت نفسي اتجاوب ويه كل حركة يسويها همس بصوت هادئ بأذني
مهدي : تحبيني وطبع بوسه
ناي : مغمضه عيوني وبقمه النشوه كتله احبك مهدي كلش احبك

مهدي : اسجنيني بحضنج ونسيني حتى اسمي اريدج بكل جوارحج ومشاعرج اريد اشوف العاشقه بحضن معشوقها شون تكون
ناي : نبضات العشق الي بگلبي اعلنت استسلامها وشعوري بأن مهدي متقرب مني بحب مو رغبه خلتني انطلق وياه
ليلتي وياه كانت بمنتهى الغزل والرومانسيه والجرئه نمت بحضنه واني ممصدكه الصار
غمضت عيوني والابتسامه على وجهي كعدت وشعري ينجر فتحت عيني لكيته سيف يكعدني
باوعت مهدي ماكو شفت الساعه حيل لهسه نايمه ساعه ١٢ الظهر

جريت سيوفي وبسته جووعان حبيبي يله خلي اكوم كمت بدلت ونزلت لكيت الريوك موجود صمون واجبان تريكت ورجعت كلشي لمكانه خابرت على مهدي انطاني رفض ودز رساله مااكدر احجي مشغول وارجع على العشا اريد عشى طيب من ايدج ام سيف ملاحظه اكو مسواك بلثلاجه تسوكت واكو علاكه بلصاله اريد اشوفه عليج
ناي : بست رسالته وركضت للصاله فتحت العلاكه لكيت سيت نوم يخبل لونه اسود كلش حبيته هاي شوكت اشتراه
دك تلفوني يونس جاوبته وعرف بيه بسليمانيه وحيل فرح لان حس بصوتي الراحه سألته عن مهند مجاوبني بس كال اتونسي ولتفكرين بأي شى

فتحت الباب اباوع على الجبال المحاوطه المنطقه خابرت شرهب وكامت تكمز من عرفت تمنيتها ويايه
مر اليوم واني بقمه الراحه كملت العشا وحضرت كلشي وسيف عشيته ونومته ماردت يكمز يم راسنه كاعده وانتظر مهدي ولابسه الي جابه ومكياج حطيت وشلت شعري طلعت غير وكل شويه اباوع على نفسي بلمرايه ومكيفه بلتغيير احسب دقيقه دقيقه لحد مندكت الباب كمزت وفتحته
مهدي : هاا هاي المره مخايفه
ناي : تعلمت على دكتك بسته من خده وهو بادلني وباسني من خدي وبقى يباوع عليه

مهدي : طلع احلى مما توقعته القالب غالب
ناي : عيونك وذوقك الحلوو
مهدي : ميت جوع كامل الاكل
ناي : اي كلشي بس صمون ماعدنا
مهدي : جبت ويايه او نسيته بلسياره طلع جايبه واجه
صبيت وكعدنا ناكل سوه وطول ماهو ياكل عيونه تاكل بيه صار يومين مامصدكه بمهدي
وبقينا نباوع فلم وحاطين كرزات وحلويات اتنغصت لحوري تمنيتها ويانه
ومثل الليله القبلها جانت ليلتنا تمنيت ماارجع لديالى وابقى على طول هنا وهيج اعيش وياه

ثالث ورابع يوم بقى يفر بينا حيل تونسنا رغم الجو بارد اني جانت ونستي مو بس لان بمكان جديد ونستي الحقيقه لان مهدي يضحك ويسولف ولازمني ولازم ابنه ويمشي جنت سنين احلم بهيج مشاعر منه رغم مكال احبج بس اهتمامه هلكم يوم ادل بأن عنده مشاعر الي واني راضيه بساطت هاي المشاعر اول الغيث قطره اشترالي ملابس واخذت شغلات لحوري وحلويات وكرزات مثل مطلبت وهو اشتره لامه اني ردت اخذ لشرهب ويونس بس استحيت وهو كال اخذي لاخوتج اذا تردين واخذت الهم كرزات وعسل جبلي وحلويات ردت شرهب تتقوى هاي حامل واكلها قليل جنا نطلع من الصبح منرجع اله تالي الليل كل ساعه استغليتها ضحك ونسه

راجعين لديالى بعد ٤ ايام اعتبرهم كنت بلجنه مو بلدنيا فكرة راجعه لوداد وذاك البيت طفتني بس هاي الدنيا ماكو شى حلو يدوم وصلنا بعد ٥ ساعات ونص شكد جان الطريق طويل بروحه محسيت بيه اله بلرجعه طكيت منه
دخلنا جان ماكو احد صعدنا الغراض ومهدي دك على امه طلعت رايحه هيه وروحي لبيت خالو عمران
اجوي من سمعو رجعنا اول مطبت حوري حضنتني
حوراء : ولا توقعت الج هيج وحشه من ترحين اختنكت والله وحدي مثل البومه اتصفن
ناي : شالت سيف وتبوس بيه

ناي : رجعت وراح اگابلج واكعد
حوراء : شونها روحتكم وجبتي الي كتلج عليه
ناي : كلشي تردي جبته
دخلنا لغرفه حوري وكعدت اسولف الها
حوراء : مبين اخويه هلمره لاعب بلكيم مالتج شوف اللهفه مالتج
ناي : صلي على النبي لتحسدي ويرجع يكتب كيم اوفر
حوراء : هههههه كلشي توقعي لج امي تتحرمص هنا تحرمص كل شويه تريد تخابركم واني اطلع الها سالفه والهيها لو رايحه وياج لو تموتين ما تتونسين هيج
ناي : تسلمين تعبتج ويايه وانطيتها غراضها اما عمتي حتى بوجهي ماباوعت اووي عساج لا باوعتي خليني مرتاحه

بعدها رجعت للكراب مال وداد هاي الاربع ايام حتى حوري ما خلتها تكنس او تنظف بقت الشغل حتى من ارجع تكرب عليه اني مهتميت لان جنت مرتاحه ومهدي بقى ويايه على تصرفاته الحلوة ويسولف ويكعد ويايه اني طول هاي الايام مخابرت بعد اهلي وحتى مهند ولا اجه بالي لحد ما اليوم السابع من جيت مهند يعني بعد يومين من جيتنا من سليمانيه طلع عادي مهدي للشغل مثل كل يوم واني فزيت الصبح اكمل شغلي مابيه حيل وداد وهوستها سيف صار يومين ينام يم حوري نزلت اكلت خبزة وجاي مااشتهي اتريك وبديت اكنس وامسح اطراف الكاع لان فارشين وامسح بالاثاث عمتي طلعت من غرفتها حتى مسلمت من يوم رجعتنا وهي گالبه خلقتها ولا اهتميت لحد مصارت ساعه ١١ هي جانت تطبخ الغدا واني امسح الغراض بغرفه الخطار طب مهدي يعيط وركع الباب شمرت الوصله من ايدي وطلعت اركض

خير شبيك مهدي
مهدي : شوفي اذا كذبتي قسماً بالله اذبحج واعلكج بلشجره
ناي : شصار عفيه بلحظتها ضغطي هبط وجسمي ثلج امه اجت تركض
وداد : خيرك ابني شرجعك
مهدي : شعندج ويه مهند
ناي : بهتت ومعرفت شجاوب بس طلعت مني كلمة ماعندي شى
جان يضربني راشدي حييل
مهدي : راح اعيد سؤالي اذا كذبتي هلمره اسحلج واكسر البيت على راسج شعندج وياه
ناي : نزلت دمعتي وكتله والله ماعندي شى
جان يدفر الطبله وعليها تحفيه وكعت وتكسرت جفلت من الخوف
مهدي : لج ابن عمج الكواد يگلي مرتك جانت صاحبتي مرتك جانت اليه وهي تزوجت غصب طلكها وعوفها لان بعدها تحبني

ناي : جذاب وروح امي جذاب لزمني من ايدي وحييل لواها واني اضرب برجلي من الالم والخوف
مهدي : تدرين شيكول جانت تنام بحضني وعلاقتي بيها واصله لمرحله متتوقعها كل قطعه بجسمها اني شايفها
ناي : ابجي واكول الك خلي يولي الچلب شعره ملازم مني انت شلون تسكت اله
مهدي : العار لو جايني وجهه بوجهه جان ذبحته وذبحتج لان جبان خابرني لججج جاوبي شعندج ويااااااه وكلامه صحيح
وداد : ماطول ابن عمها هيج كال معناها الشغله جبيره اني من اجه هنا وهي تتلفت وتتراجف كلت سالفتها مو خاليه

ناي : حرام عليج مو عندج بنيه لتظلمين بختي
طلعت حوراء على العياط مخروعه وتحاول تجر ايدي من مهدي الصاير نااار دفعني حييل وكعت على وجهي صار فوكايه احجي ناي
ناي: اعيط بهستريه انطيني مجال احجيلك
جان يجرني من ملابسي ودفعني على القنفه
مهدي : يله اسمعج
ناي : اباوع عليه يريد يذبحني بديت اشهك واجر النفس كوه واسولف اله بس ماكتله جنت عندي مشاعر تجاهه كتله هو رادني واني مرفضت لان ابن عمي بس من صارت سالفه يونس رفضته ولان امه تكرهني  وكلشي كملت وماكذبت وهو يباوع عليه والجكاره بيده يطفي وحده يشغل الثاني ورجله تهتز
لزم النفاضه الكدامه وشمرها على الحايط فوك راسي صارت طشااار اني حضنت روحي من الخوف وحوراء حضنتني

مهدي : ماتبقين ساعه بيتي خابري اخوج ياخذج اني المره الي تجذب عليه متضل على ذمتي
ناي : وروح امي ماجذبت انت شون تصدكه صار سنين عندك ماعرفت اني شنوو
مهدي : اني غلطت من تزوجتج على عماي جان المفروض اسأل واعرف كلشي ومنو يكول متجذبين وليش هيج يحجي بثقه لوما اكو شى لج لو واحد من الشارع افرغ شاجور بحلكه ومااصدكه بس هذا ابن عمج العايش وياج اكثر مااني عشت وياج انتي عرضه وحجه هيج شون تردين مااصدكه
حوراء : لان سكط وناقص عرض ورادك اطلك ناي لهذا ذب تهمه عليها عفيه مهدي كول ياالله وخلي يولي

مهدي : اسكتي انتي الثانيه احسابج بعدين مبين تعرفين وساكته
وداد : كتلك هاي تربيه ناس خلصو عمرهم بلشوارع اكيد تطلع خلفتهم ساقطه ومنحرفه
ناي : مستعده احلف الك على كلام الله كلشي كلته صحيح
وداد : امشي قرچ مابقت بس تحلف كوم يمه ذبها بره هيج وحده تلوث بيتك لعبت لعب وجايه تريد تحلف
مهدي : خابري اخوج يجي ياخذج
ناي : ليش متصدكني
مهدي : اذا ضليتي كدامي اشرب من دمج
كومي

ناي : جرني من ملابسي حييل
مهدي : يله مثل مااجيتي بطرك ملابسج اطلعين بطرك ملابسج
ناي : حرام عليك بسرعه حكمت عليه كول تريدها حجه حتى تخلص مني داكولك مستعده اطب على القران احلف على راس ابني مهند مالامس شعره مني
تقرب حيييل وشاورني
مهدي : والشامه بنهايه ظهرج من جوه شون يكول شايفها لج انطاني دليل بجسمج مينشاف اله انتي مصلخه

ناي : باوعت بعيون مهدي شكول بعد كل الكاله حتى حلفاني مراح يفيد سكتت وباوعت على حوري
جيبيلي سيف
مهدي : كلت اطلعين بطرك ملابسج مالج ابن يمي
ناي : لا لا كله ولا ابني كطعني اذبحني بس ابني مااطلع بدونه
وداد : هم عايزه تاخذي ويااج
ناي : هنا فقدت كله ولا سيف دنكت
ابجي واعيط وابوس بالايد بس انطيني ابني والله مااريد شى منك اطلع وبعد مااشوفك وجهي بس ابني لا تاخذه مني اموت بلياه

وداد : اسحلها لهاي الساقطه اني يوم مااجت مهزومه كلت وراها مكسوره وكتلك على بياضها هاي وحده عاشت ويه اثنين من ولد عمها بنفس البيت منو يكول ما واحد منهم قشمرها وتونس بيهاوانهزمت  وانت ضليت ادافع الها وسويتها اشرف من الشرف براسي اكلها هسه وهااك بنفسه ابن عمها كال شبعان منها طلكها واخلص من شرها ماجانه من يوم شوفتها غير الفكر بت الفكر

ناي :ركضت وعفتهم حافيه لبيت خالو عمران وهو ركض ورايه وجرني من شعري
مهدي : اياااج توصلين لخالي اكص رجلج
ناي : كصها موتني بس ابني لتاخذه
طببني للبيت سحل وحوري جرتني منه وتبجي ويايه جر تلفونه وخابر
مهدي : هااا يونس تعال اخذ اختك
وسده بوجهه

كعدت على الدرج حالتي حاله وهاي وداد اشكال الحجي عيد وفرح هذا اليوم يومها اني مدنكه ودموعي ترست الكاع
عااط بيها مهدي وسكتها كعد كبالي على التخم ويدخن ويباوع عليه
اندك الباب سمعت صوت ام عبديمكن على الهوسه اجت طلعت الها وداد ومدري شكالت وخلت وراحت

كعد سيف واجه يركض بحضني حاضنته واشهك وابجي
وداد :صخمان اخذي ابن اخوج منها هاي حرامات ينحط طفل بحضنها
حوراء : يمه حرام والقران على كيفكم وياها غير ابنها وتعرفون سيف من يكعد من النوم يصير نحس وميريد بس امه
مهدي : اخذي منها

حوراء : بروح ابويه خلي بحضنها لتخرعو للطفل شوفو شون يباوع بوجهه امه مخروع
ناي : تقرب مهدي وسحب سيف من حضني
فدوة عوفه احلفك بتراب ابوك عوفه بحضني وخليني اخذه ويايه والله مااشوفك وجهي لاخر العمر ولا اسوي اي شى يضوجك بس ابني خليني اخذه

مهدي : تحلمين تشوفي هاي دكتج بيه ياناي لا اخليج العمر كله تحلمين تشوفي
ناي : لك ليش شسويتلك وهيج تجازيني طول هاي السنين واني صاينه بيتك ومتحمله امك وضيمها
وداد : شبيهه امه عيني تسوه راسج وراس امج ام الزلم ولو هي منو امج اذكرو محاسن موتاكم مو نفسها الي ماتت لان تحب حماها

ناي : كمت على حيلي وعطت حييل احترمي نفسج امي اشرف منج جان يضربني على حلكي صارت بفچي وطك سن بسن عبالك اسنوني تكسرت من الالم عضيت لساني وجيت يريد يخنكني وكفت حوراء بلنص واجت ضربه على عينها وجرتني حيل ودخلتني بغرفتها وقفلت الباب
مهدي : فكي الباب لا اكسره

حوراء : ماافكه لو تذبحني خلي اخوها يجي وياخذها شبيكم تقاويتو على المسكينه امك ترفع وانت تكبس ملختوها كاافي حرام عليكم
ناي : كعدت على الجربايه واني مااعرف منو شنو اتألم من الضرب الي اكلته لو من الاهانه لو من كلام مهدي لو وداد لو حرماني من ابني ادور حوري على تلفونها انطيني رقم يونس
ناي : رديته الها لان حافظته

حوراء : شلونك يونس وينك عفيه تعال بسرعه
يونس : جاي بلطريق شكو شصار خابرني اخوج وسده بوجهي وادك عليه ميجاوب
حوراء : هذا ابن عمك الحقير كايل لمهدي عدها علاقه وياه وشغلات موزينه بحق ناي وهذا مهدي تخبل يحير شون يضربها تعال اخذها بسرعه اني حابستها بلغرفه

ناي : بقيت ابجي ولا سكتت واسمع صوت سيف طول ماابوه موجود مايبجي ابد اعرف بيه وهاي وداد تحير شنو تحجي ويسكتها وتسكت عشر دقايق وترجع تخربط بلحجي
حوراء ساكته وتمسح دموعي وهي هم تأذت لان وكفت بلنص انضربت اكثر من مره

حوراء : روحي ويه يونس بليه مشاكل
ناي : اروح والله بس اخذ سيف ويايه مااكدر هذا ابني شون انام بلياه مرات هو يمج انزل نص الليل اشوفه اخاف متكشف واغطي يله اصعد انام شون اروح لبغداد وهو هنا اخوج كعد يموتني والله لو ذابحني هواي اشرف
حوراء : يرجع لحضنج بس هسه الشغله حاميه واذا عاندتي اخاف يونس يتلازم ويه مهدي وتكبر روحي وياه واكيد خالي راح يدخل ويحلها
ناي : خابري عفيه خلي يجي

حوراء : ماشي
دكت على خالو عمران كال اني بخانقين شصاير كالت اله حوري مقتطفات وسدته
ناي : شفتي حظي من دون الايام رايح لخانقين
حوراء : لا صاير يومين هناك واليوم يرجع مااتوقع يلحك يجي
ناي : حطيت ايدي على راسي وانوحي على حالي وشراح يصير بيه فوك الساعه ونص احنا محبوسين بلغرفه ومرتين اندكت الباب وحوراء متقبل تفتحها وسيف يدك الباب ويصيح ماما طفرت افتحله الباب حوري مقبلت كالت استري علينا هذا مهدي متخبل وايده ثكيله ليضربج ويسكطج

ناي : الله ياخذك يامهند لك شنو السويته الك وتهجم بيتي
حوراء : كتلج احجي لمهدي مقتنعتي وهاي تاليها والله گلبي عالم راح يصير هيج شى
ناي : سمعت صوت يونس طلعت اركض لكيته لازم مهدي ويردون يتضاربون وكفت بنصهم
يونس : لك شون اتمد ايدك عليها

مهدي : واذبحها المفروض تستلم جثه مني الي مثلها الذبح حلال
يونس : اختي ماكو اشرف منها واتحداك شفت شى موزين عليها
مهدي : روح اسأل ابن عمك لتجي تهوبز بوجهي
يونس : هذا حسابي بعدين وياه اما انت عيب عليك تستقوي على مره بيك زود روح جيب مهند وكعده كدامك وحلفه وهي تكعد وافتهم مو مثل المخبل تضرب بيها ياهو اليجي يكول عندي علاقه بمرتك تصدكه

ناي : بدت الاصوات تعلى وناس تريد تضرب ناس ركضت حوري على صلاح ملكته ولكت بس عبد بدا واحد يضرب الثاني واني الطم دخل بينهم عبد وفاككهم واني لزمت يونس
فدوة امشي
يونس : وين ابنج

مهدي : متاخذه اذا اخذته مااخليكم تطلعون منا
ناي : راح بسرعه وصعد وجاب سلاح واني انتهيت هاي هيه راح اخويه بيها شيطان بينا يحرك حرك وهاي وداد تعيط گلبت الدنيا لبست نعال وسحبت شاال وكمت اعيط عوفه لابني غصب عنهم اخذه
وداد : لك يمه لا تضيع روحك ذوله ناس نكسين خلي يولون اخذ اختك وروحو منا الله ياخذكم عساكم لا وصلتو ولا شفتو خير حراميه بواكه ولا واحد بيكم عنده غيره وناموس
عبدالرحمن: يمعود تخبلت شجاك جيب السلاح
مهدي : اذا تاخذه طلقه براسه وبراس اخوها
عبدالرحمن: يونس اخذ اختك هذا تخبل ومشي الوضع
يونس : طالع اني وتذكر يامهدي يوم ماتجي تريد ترجعها لو تبوس رجلي ماارجعها الك
مهدي : اطم روحي وازين شواربي واكعد بين النسوان اذا رجعت اختك متشوفني هيج وحده تصير مرتي وام ابني
يونس : هاي التحجي عليها تسوه راسك وراس عشيرتك

عبدالرحمن: امشي يمعود
ناي : دفع يونس طلعه وسحبني وصاح على حوري تجيب جبه البس او عبايه جابت وطلعت من هذا البيت
اباوع ويه كل خطوه اخطيها اجيت بهزيمه لهذا البيت وطلعت بفضيحه منه

صعدنا بسياره عبد يونس ماقبل كال بس وصلنا للكراج وهو كال اوصلكم لبغداد يونس كال نروح لكربلاء ومقبل عبد ننزل وكال اني اوصلكم طول الطريق اصب دموع ومحد حجه لا يونس ولا عبد
لحد ما وصلنا لكربلا واني انتهيت شفتي ترجف وتعبانه وجهي اصفر ودايخه على ساعه اوكع على وجهي
وصلنا ويونس جلب بعبد بس هو كال لازم ارجع اكيد هناك الوضع تخربط
راد يونس جلب بيه وهو اصر يرجع
دكينا الباب طلعت عمه شافتني جفلت
بديعه :  ناي شبيج
ناي : بيه عله وبيه نار يعمه بيه ضيم حملته من اني وبطن امي ورثت الحظ الموزين منها

بديعه : تعالي سودة عليه هاي شصاير بحالج يونس شبيهه اختج
يونس : عمه شربيها شى لتوكع
بديعه : ابنها وين رجلها ولكم شصار تعااي
ناي : دخلت واباوع وين بيبي
رحت دخلت لكيتها كاعده وبلا ل يمها هي شافتني فتحت عينها
عمشه : يمه ناي شجرالج حبوبه
ناي : صعدت على الجربايه وشمرت نفسي بحضنها
بيبي تعبانه
عمشه : ريت التعب بيه ولا بيج ولكم شجرالها البت صايره ورگه يابسه
ناي : غمضت عيني بحضنها ويونس يسولف الهم الصار مكدرت كلشي احجي حيل مابيه

عمشه : تسودن ابن الزمال چاي وجايب الطلايب گلها وياه ابن صويلحه عركه نكس خابروه ليه انعنع ضلوعه
يونس : هو اني لاكفه لا اسحك على راسه
بديعه : على كيفكم يمه انطو صبر وخلي نفتهم
عمشه : اريدن خوله كله من وراهه انه گلتلها جوزي بطلي يايمه ماتسوين هبيه بأخوتج اله يلوحنا طشار منهه وهاي البت طاحت بيها خابروها من اشتعل ابهاتكم صافنين بوجهي
يونس : اي بيبي راح اخابرها هااج دك

خوله : اسبوع كامل اراقب الوضع جوحي يدك علية ومااجاوب اخر شى جاوبته وكتله شهر ويوصلن الك الفلوس وخلال هذا الشهر اذا رجعت ساهره احركهن ورجع يكفر ويفشر مايكدر يسوي اي شى لان بعيده ومستحيل يوصلي وهددته اذا طخ او حتى حجه كلمة ويه يونس انفذ تهديدي وهو اضطر يقبل جنت اشوفه شون يتلوع ساعه يغلط وساعه يتوسل لكم من واحد يذل واحد حقير غير حلو يابه شعور عالمي

اما اخبار عبيد وصالحه جنت اخذهم من اشواق
واخيراً تسجل نص البيت بأسم اشواق وكعدت مسيطره اما صالحه انتظرت مهند وجيته بأول يوم اجه بقى يتعارك ويه ابوه وتلازم وياه وصلو لاتفاق يرجع فلوس الورث مالتها ويطلك اشواق ولمن كال الهم اشواق حامل هاي صالحه تخبلت وتعاركت ويه عبيد وطردته وجان المفروض ثاني يوم تروح صالحه للبصره حتى تصيح عمامها وجبير عشيرتهم حتى يدخل لان اكل ورثها ومهند كال اني وياج شتردين اسوي بس الصار راد يروح يشوف ناي ويسلم عليها وراها ياخذ امه ويرحون للبصره خاف لا يتأخرون بلبصره وطلب من مرتضى ياخذه لبيت يونس حتى يشوف ناي ولو ساعه ويرجع وهنا صارحه بلحقيقه كلها ومكان ميصير ويه امه صار ضدها وتعارك عركه قويه وياها وطلع

طبعاً كل هذا عرفته عن طريق مرتضى وجنت اعرف بسالفه روحته لناي وبقينا ايام ندور على مهند وكل كم ساعه اخابر على الولد عسى يلكوه حتى فرحتي بكسرت صالحه وساهره طارت
واسبوع وهو ماكو قررت ارجع للعراق لان الوضع تأزم بس نجم منعني كال اخوتج يلزموج يأذوج نسيتي سوايتج بيهم مصار اسبوع حركتي بيوتهم حرك مو بعيد يلزموج ويگتلوج خلاص ويكولون انخطفت وكتلوها الي خطفوها شو دوله وماكو ومحد يحاسب يوم يومين يسون فاتحه الج ويروح دمج وحتى يضمن مااتهور اخذ جوازي

مجنت خايفه منهم بكد ما خايفه على ناي
واجاني تلفون صوت امي وهي ترعد
عمشه : احترك ابو اصلج هااا يخوله جفصتي بفادنا وارتاحيتي چا انه من اگلج كضي رويحتج ومالج دخل بيهن ماتسمعين الجلمه لسانج هاطولاته وشبجتي لحيه بلحيه لحد مايدج شبجت وياهم حليها يلفهيمه

خوله : شبيج يمه تعيطين
عمشه : وغمه نايه طاحت بيهه فختي
خوله : مكعد افتهم ناي شعليها انطيني بدعه
عمشه : من جسر بعظامج وعظامها تهذرين اريدن اطيح بصالحه واهججها اريدن اطحن بساهره وابهذل احوالها وهاج جدامج اجه مهند وضيع بت عمه
خوله : كعدت امي تسولف شسوه مهند
واني شعليه قابل اني كتله ارجع
عمشه : لو جايزه منهم مارد الوليد
خوله : يمه رحمه لابويه لاكلشي وصحتو خوله ولو لوما ذابيها براسي جان استغربت اكيد تنذب براس خوله كل مصيبه بهاي المله الجايفه تنذب براسي مو جديده

عمشه : چا موش انتي علكتيها علوادم وصويلحه نشدت ولدها
خوله : هو بكل الاحوال راجع اسألي مرتضى جان المفروض يجي بشهر السادس يعني اذا هسه او بعد كم شهر ميفرق واحسن ما تلوميني لومي نفسج انتي مو جذبتي وياهم مجان كلتي للولد البنيه تزوجت وعاشت حياتها عيش انت وانساها كلكم راس البله وراها من يصير شى جبير الكل سحبت ايدها وصاحو خوله هي ام البلاوي متبطلون لخاطر الكعبه

عمشه : چا انه لون خذيت الحك منج جنهه يوم القيامه لون ماتصوبين جبدي وتعلين افادي ماترتاحين
خوله : انطيني ناي
عمشه : كل المصايب من جوه راسج
خوله : اي ميخالف كلها وداعتج انطيني ناي
ناي : كوه اطلع الحجايه اريد ابلع ريكي ناشف وبلاعيمي طبكن من العياط هاا عمه
خوله : شبيج ميته قابل شصار
ناي : نزلت دمعتي عمه طعنو بيه واخذو ابني وطلعوني بطرك ملابسي
خوله : كومي غسلي وارفعي راسج تعرفين بروحج شريفه وتعرفين بروحج مامسويه شى وكلهم ارتكبو عليج صيري سباعيه كافي فطاريه واخذي حقج سالفه الطعن خلي نشوف مهند وينه واني اعرف شسوي بيه هلزمال هذا اما ابنج يرجع بحضنج وغصب عن اكبر شارب منهم الحضانه من حقج لو اعرف ادخلهم محاكم ويرجع ابنج ويركعون راسهم بلحايط وحتى نفقه يدفع
كاافي مهانه خلصتي سنين وانتي ساكته وبالعه الذل بحجه رجلي وبيتي وابني بعد ماكو الي يدوسني ادوسه والي يهيني اهينه والي يقلل من قيمتج عرفي قيمته همه مو احسن منج ولو همه الله خالقهم من ذهب وانتي خالقج من تراب حالج من حالهم
غسلي وافرشي سجادتج وابجي لحد ماترتاحين وراها خابريني واني افهمج شسوين اذا مااخليج تاخذين حقج مربع مااصير خوله

اصواتهم عاليه متحملت لبست شال على راسي وطلعت من غرفه بيبي وصرت كبالهم جان عمي فلاح ويونس ومرتضى ومهند كاعدين اباوع يونس وجهه متأذي ومهند هم
كلت الهم من رخصتكم اريد مهند احجي وياه
وحدنا

يتبع ....