#الابواب_الخمس
البارت الواحد والعشرون /الجزء الثاني
للكاتبة Reem
(بارت هديه لاحلى متابعين )
يكلبي بيش اجبرتك ولحماك
ولا واحد شكف دونك ولحماك
يجيك الضيم من دمك ولحماك
عكب طيبك يجازوك برديه
لحد ماعاطت صالحه على بتها وكالت خابريلي اخوج هسه يرجع يشوفلي حل لا احرك ابوه والبيت واسوي الماسوته مره
اريد مهند باجر اريده يمي
حطيت اذني على الباب واسمع صالحه تحجي وتبجي وتعيط وعبيد هم يعيط يريد يطلعهن بس مكعد يكدر الهن
لك يمه مهند تعاااال الحك امك ابوك اتزوج عليه ابوك الناقص سواها وكسرني
باجر تجي واله وروح اخويه احركه واذبحه
عبيد : لج امشي ارجعي لا اسحلج واشمرج بلشارع وحتى ذاك البيت احرمج منه
صالحه : لك هاي منو تحرمها عبالك اني مثل امك لو اختك شوكت ميعجبك تهد عليهن لك اني صالحه ادوسك بقندرتي واخلي شرفك بلشوارع الناس تحجي بيه لك اني السويتك وبيدي ارجعك للعتيك
عبيد : شسوين سوي ذاك حايط واركعي راسج بيه وعناد بيج مالج رجعه بذاك البيت يله ديحي بلشوارع
ساهره : صالحه يمعوده امشي نرجع ومن يجي مهند هو يحلها ويه ابوه امشينا
سما : يوم امشي الجيران كلها بلباب تباوع
صالحه : عبالك تتهنى اتفل بوجهي اذا خليتك تشوف يوم عدل ياعار يالي مااحطك نعال برجلي
عبيد : ادبسسز شو تعااي
اشواق : سمعت عياط عالي فتحت الباب على كيف ومديت راسي لكيت عبيد لازم صالحه ودك بلنعال على راسها ويسحل بيها يطلعها من البيت وساهره وبتهم يعيطن يردن يفكنها من ايده وهو غركان وجهه كله دم خفت وركعت الباب ورجعت قفلته
وره هاي الهوسه انركعت البيبان يمكن طلعو سمعت عيطت عبيد تعاااي وينج طلعت اركض
خوله : اي وتالي شصار كملي
اشواق : شصار خيه طلعت ركض من الغرفه واتراجف على رجلي غركان بدمه غسل وكال اياج اطلعين من البيت او تفتحين الباب لاحد وخابري امج خلي تجي يمج اني رايح للبيت اخاف اتأخر ليضل بالج بدل ملابسه لان مكطعه وخله وطلع لج عيني مو نسوان ثيران وهدوهن بساحه ينطحن نطح
خوله : ديري بالج من صالحه اني كتلج على دربها
اشواق : لتخافين عليه حاسبه حساب لكلشي
خوله : تدرين شسوين
اشواق : شسوي
خوله : بحراره هاي الهوسه كلها اطلبي منه يسجل البيت بأسمج واذا ماقبل كله سجلي نصه اقلها تضمنين حقج منه اخاف ينخ الها ويتنازل ويدك الناقصه بيج اخذتي حقج وحق ابنج ليكدام
اشواق : حاطتها بالي خلي يجي ويصير خير لا عبالج اني مااكدرلهن جان لعبت بيهن طوبه بس اخاف على الي بطني مااريد اخسره بهيج وكت ويوكع وتتشمت بيه بلعكس اريد احرك دمها من تعرف ضرتها حامل
خوله : هاي بعد بيناتكم اني العليه كتلج على دروبها كلها وسوالفها وحذرتج تعرفين بيه احبج واريد بيت اخويه يبقى عامر ومرتاح
احجي واغم بيها
اشواق : ياا فدوة لعينج بعدج ماشفتي شى احط صالحه جوه رجلي وداعتج بعدها متعرف اشواق منو
خوله : والنعم عيني يله اروح اني وشيصير انطيني خبر
اشواق : شيصير انطيج خبر هله بيج خيه مع السلامة
خوله : سديته منها واني مرتاحه بشكل مو طبيعي بقى لازم اعرف بذاك البيت شراح يصير وبيت جوحي هم شيصير بس منين اعرف منين
خابرت بدعه
بديعه : لج يمعزايه وينج
خوله : بأرض السويد الجميله
بديعه : فوكاها تصنف
خوله : اريد منج شغله
بديعه : ياستار مايجي من وراج شغله عدله اله طلابه شكبرها
خوله : تلبك لبك اصبري
بديعه : احجي شتردين
خوله : ترحين لذاك البيت بس جم يوم بأي حجه عندج غراض تاخذيهن بان : عدها معامله وجاي تسويها اي عذر المهم تبقين جم يوم لازم اعرف شصار بذاك البيت
بديعه : ليش شكوو بذاك البيت
خوله : صالحه عرفت بعبيد متزوج وراحت هداده وصارو طماطه مهروسه ناس ضاربه ناس ولازم افهم شراح يصير
بديعه : يايمه دهر الدهرج يخوله على هاي السالفه
خوله : انعديتي من امي
بديعه : امج لو تعرف تنزع فوطتها بلشارع وتهج
خوله : لتكولين كلشي الها حتى لتفكر وتتخربط هااا شگلتي ترحين جم يوم
بديعه : لو تحضر عشيرتي من الكبور كلها مااوصل تخبلت واوصل هناك حتى صالحه تذب حركتها بيه وتشمرني من السطح اصلاً مبينه رايحه اشمشم اخبار
خوله : لعد شون اعرف شصار
بديعه : دبري نفسج بعيد عني مناقصه عركات هاي هسه الي تشوفه من عدنا تشرب من دمه عزه عزه اتخيل منظرهم احترك البيت وعلي
خوله : وحركتهم نارهم تاكل حطبهم وعساهم بزياده حطب وبانزين
بديعه : اكيد مراح تسكت
خوله : ليش كتلج روحي حتى افهم شراح يصير
بديعه : ولا اوصل شيليني من بالج يله روحي جسمي نمل وروح امي من الخوف اااخ منج اجيتي جم يوم گلبتيها گلاب
خوله : دطيري شكد جبانه ولي خلي اشوف احد يجيبلي الاخبار
سديت التلفون من عدها جان يدك جوحي مجاوبته عفته يتگله على نار هادئه فد ساعتين واجاوبه
اخابر شرهب اي هاي لوتيه اكيد ادبرها
شرهب : كاعده اصبغ اضافيري واغني وحدي بلبيت ماكو احد
دك تلفوني باوعت هااي عمه هله بلغاليه
خوله : شونج ام لسان
شرهب : بخير اذا انتي بخير
خوله : صوتج يلعلع وحدج
شرهب : اي وحدي عمي وعمتي طلعو سوه اليوم وسبعي الحمش طالع يقدم العلم من اجل احياء جيل جديد متعلم ومثقف وداعت عمي عبيد
خوله : من جيره بكصت عمج ورجلج
شرهب : ههههههه اي والله
خوله : اريد شغله منج
شرهب : أمري ياطويله العمر صدك جذب بس شغله وحده كولي الف شغله
خوله : انتي بس دبري هاي الشغله وكلشي مااريد منج اريد ترحين لذاك البيت بأي حجه حتى لو ساعه وترجعين اريد اعرف شصار هناك لان عمج عبيد اليوم انكمش وصالحه عرفت متزوج عليها وصايرين لحم
شرهب : طفرت من مكاني خرب عمي وكع الصبغ اوكفي عمه كلللللوووووووشششش
خوله : رعنه هلهولتج زرفت اذني منا جيرانكم ليسمعون
شرهب : يااا هذا الغالي والغالية انهجم بيتهم شون ما اهلهل
يهل القوط نزعو القوط وعبيد لبس قاطه كلللوووًش
خوله : غير تنطي صبر يمااااي
شرهب : بداعتي عمه بس اهز شويه
خوله : ياهز خبالو نسيتي انتي حامل
شرهب : يااا نسيت وكرامة صالحه الي انداست عيب خلي اثكل اخاف على ابني بس والله مااكدر لو ما اخاف العالم تكول هاي تخبلت جان طلعت بلشارع وبشعري الحلوو اخلصها ردح وشعر شعر وللكاع
خوله : شون بله منحجي اضل اسمع خبالاتج
شرهب : عماتي خلي تجي عمتي من السوك وداعتج اطك الجبه واطلع
خوله : بيا حجه ترحين
شرهب : غير ابارك لعمي عرسه يااا قابل اني ناقصه ومااروح ابارك اله واذب واهليه وجم جيس جكليت ولو ماعندي يله اشتري عندي الفين ضامتهن مااعزهن على صلوحه وعبدبد
خوله : وروح ابويه انتي شاخطه اني صوجي خابرتج
شرهب : ههههههه غير من فرحتي ياطويله العمر
خوله : هاي منين سامعتها هلمره طويله العمر جنا قبل نسمعها بلمسلسلات البدويه ويكولون لريس القبيله او العشيره طويل العمر
شرهب : ليش ريس العشيره احسن منج السويتي تجمع شيوخ العراق مايسوه خليني ساكته لا اطكج بعين
خوله : هسه فضيني ترحين
شرهب : ساعتين وكل الاخبار يمج واذا ما رهمتها اخابر مرتضى هذا كلشي يحجيلي بس اخابره يكت الاول والتالي
خوله : انتظرج شرهب مو تتأخرين
شرهب : احنه الطكينه اصبعنه وحتى الحاكم وكفناه هله هله
كمت مسحت الصبغ الوكع ولبست عبايتي الاسلاميه وكعدت انتظر عمتي كلت خلي اخابر مرتضى يدك وميشيله اني مااصبر والله
خليت ودكيت الباب على جيرانه صديقة عمتي وكتلها رايحه لاهلي ساعه وارجع وهذا مفتاح البيت كولي لعمه من تجي وطلعت اركض تكول برجلي مشدود ماطور
وصلت للبيت الباب مسدود والعياط يبووو نص الجيران ماده راسها من البيبان شون ادك الباب دكيته ومحد طلع رديت دكيت حييل جان يطلع مرتضى
مرتضى : هااا ولج شجابج
شرهب : شكوو ليش صوتكم عالي
مرتضى : روحي مو وكتج شرهب تره عالكه وصايره مطاحن
شرهب : يااا منو ومنو
مرتضى : عمي عبيد وخالتي طلع متزوج عليها
شرهب : خرب صدك تحجي اي وشصار
مرتضى : وكتج هسه روحي بعدين انتي شجابج
شرهب : خابرتني عمه بدعه عدها غراض تريدهن باجر ادز يونس ياخذهن مني تعرف يونس مايكدر يجي وهم ميندل دزتني اني اخذهن
مرتضى : بعدين تعاي مو هسه
شرهب : يمعود يابعدين بس اطب ركض اجيب الغراض واولي
مرتضى : اذا شافوج يطيحون حظج
شرهب : وانت شنو وجودك غير ابن عمي وتحاميني لك علكت
مرتضى : روحي روحي
شرهب : دفعني وطب وبقيت واكفه بلباب شون اطب سمعت بس تكوله اذا مطلكها احركك واحركها وفلوسي ترجعلي والباقي بس عياط كلشي مافهمت خليت ورجعت متفيد وكفتي اخذت المفتاح بعدهم عمي وعمتي مراجعين خابرت عمه وبلغتها تمنيت اطب اهوس واتشمت يله قابل يطيرون يجي يوم واتشمت
خوله : ضل جوحي يدك لحد مامرت ساعتين وجاوبته
جوحي :ليش متجاوبين حقيره
خوله : لتغلط تره اسده بوجهك وتحلم تسمع صوتي
جوحي : الردتي صار واخوج ومرته صارو علج بحلك العالم بلمنطقتين وصالحه لاعبه لعب وماادري شون تصفه
خوله : متصفه
جوحي : ولا تصفه متهمني اريد فلوسي
خوله : والله يااخويه ياابن امي وابويه ارجعهن الك وفوكاهن بوسه بس عندي طلب ثاني والفلوس يمك
جوحي : خوله لا تلعبين عليه هاي حركاتجن تخليني احرمج حتى ادخلين للعراق
خوله : مو انت وزير الخارجيه حتى تحرمني شوف الاريده منك اطلك ساهره وتشمرها بيت اهلها واليوم ومو انت توديها مرتضى اليوم ساهره متبات بيتها واذا حيل مارهمت باجر اشمرها لاهلها المهم باجر بيتك فارغ وساهره مطلكه
جوحي : تخبلتي انتي انعل ابوج لابو اليحجي وياج ياگلبه يابنت الگلب خلي الزمج اذا مااحط طلقة براسج حتى كبر مااخلي يسولج مااطلع جوحي
خوله : عادي اغلط فشر شسوي سوي تريد الخمس دفاتر مالاتك اطلك ساهره وتروح لاهلها متروح يم صالحه ابد افتهمت ابد واذا عاندت اوزعهن تدري قبل سنين طويله من ضاعن فلوسك وضليت تلطم عليهن اني اخذتهن وزعتهن وجنت فد مرتاحه يابويه تكول مي بارد على گلبي تريد ينعاد الصار من باجر اصورلك فيديو شون اطشر فلوسك لو كل فقير اشوفه احط الدولارات بيده واخليك تنجلط ومايتلاحكون الك
جوحي : لج خوووووووله هيج هيج منج (كام يگفر ) ويعيط
خوله : من خفت لهلصوت كون الله يضربك على حلكك من وره هذا الكفر سوي الاريده وتوصلك فلوسك متسوي يطبك طوب راحت فليساتك يجوحي
جوحي : انطيني نجم
خوله : باع هذا من كل عقلك تحرك نجم عليه لك انت ليش هيج اغم وعقلك شاطح لو مو نجم لو ابوك من كبره يجي يريد يذبحني وخلاصي انطيك فلوسك هم ماانطيك جر عدل وسوي الاريده سده بوجهي
والله عطشت من الصياح ريگي نشف
شربت مي ودكيت على مرتضى جاوب
مرتضى : ها عمه شونج
خوله : حبيبي انت شلونك
مرتضى : عالكه اكيد تدرين
خوله : هو خابرت حتى افهم احجيلي شصار
مرتضى : هاي خالتي حركت الدنيا فشار وعياط بلشارع واني واكع بنصهم
خوله : خطيه وتالي
مرتضى : شتالي خابرو على مهند وهذا هم حجز على اول طياره وجاي عكب باجر
خوله : وعبيد وينه
مرتضى : ماادري لان خالتي وكعت تخربطت صعد ضغطها واني هسه بلمستشفى
ضربوها ابره مدرر حتى ينزل جان انجلطت وكالو احتمال بدايه سكر لان سگرها هم معلك
وهسه منتظر الطبيب يجيك وضعها شويه واخابرج اجه الطبيب
خوله : سده وراح اووف ياصالحه اكلي من نفس الماعون الي ياما وياما وكلتينا منه حيل وابو زايد
ناي : خابرتني شرهب وبلغتني بلصار فرحت حيل لحد ماوصلت لسالفه رجعت مهند واني كمت ابلعم روحي شرهب بعدين نتخابر
شرهب : صار شى شبيج
ناي : روحي هسه وبعدين نحجي رجعت دكيت على عمه
خوله : هااا نايه شلونج
ناي : الْحٍمَدٍ للـّہ عمه انتي شلونج
خوله : مرتاحه على النص بقت شغله ثانيه اذا تصير بذاك الوكت الفرحه فول تصير
ناي : حجتلي شرهب كلشي اكلج عمه اني ميته خوف
خوله : من شنو
ناي : من رجعت مهند
خوله : وانتي شعليج بيه
ناي : مووو
خوله : وجعوو شمسويه يمصخمه وياه وهيج ترجفين احجي
ناي : ماسويت شى والله بس هو قبل ميروح كال اوعديني تبقين تنتظريني واني حتى بس افض السالفه وعدته
خوله : من صخم الله وجهج على هاي السالفه اني جم مره كتلج ابعدي عن ابن صالحه لج مايجيك منهم غير وجع الراس
زين من سافر لهسه صار اتصال حجي اي شى بينكم
ناي : كلشي مصار ولا اعرف شى عنه
خوله : بعد شكو خايفه صار اكثر من ٤ سنين مسافر وتزوجتي ومكال شى ولا اجه ولا حاول يحجي وياج معناها الشغله منتهيه ويجوز هسه يحب وحده هاي اذا ما متزوج لتخافين ولا اكو اي شى
ناي : خايفه حيل
خوله : لو يريدج جان على الاقل خابر سأل من عرف متزوجه يجي هو فص ملح وذاب يعني الشغله كضه عليها الوكت
ناي : ان شاء الله ميصير شى اروح اني هذا سيف گلب البيت وعمتي تعيط خبصتني
خوله : روحي الله وياج
يمه خلصت اليوم كله تلفونات حتى اذاناتي ماعن بقى كلام ناي بالي كلت باجر اخابر مرتضى وافتهم منه
لليل خابرتني اشواق وكالت رجع عبيد للبيت لان صالحه طارته وهو عايفها لان متخربطه وخاف تموت وتوكع براسه خله ورجع يمها كتلها اقري براسه على سالفه البيت ومبين اشواق ميحتاج اعلمها لان هيه مبين عليها الطمع وادور منه فلوس ومقشمرته بلدلع والضحك والركص ومسويته محبس بيدها
نجم دوخني اكل راسي تالي عفته وطبيت نمت مالي حيل اتناقش وياه
ناي : نايمه واباوع على مهدي الخوف حيل سيطر عليه اريد افهم شبيهه كلام عمتي صحيح الولد صار سنين ماكو لعد ليش گلبي ما مرتاح جني منتظره مصيبه
تقربت وهو نايم وحضنته هو حس عليه وسحبني بحضنه رغم شبهه نايم حضني لحظات افكر احجيله كلشي وابرد راسي وبعدين اكول اخاف ميفهمني وعباله عندي شى وياه وهم اكول ليش اجيب المصايب الروحي انجب واسكت غمضت وادعي بگلبي تكون جيت مهند بعيده عني وعن حياتي
خوله :نايمه ودك التلفون شلته حتى بدون مااعرف منو اجاني صوت مرتضى
مرتضى : هاا عمه ليش هيج هاي دكه منج
خوله : شبيك ولك شكوو وافرك بعيوني
مرتضى : تخلين ابويه يطلك امي
خوله : طفرت من فرشتي طلكها بشرفك طلكها لك احجي
مرتضى : صدك تحجين ومكيفه اكلها طلكها وهسه اني بلشارع باب البيت واكف منتظرها تلم ملابسها واخذها للبصره ماتوقعت هاي الدكه منج واني اكول انتي حنينه وطيبه ومالج بدرب الاذيه
خوله : احلف طلكها
مرتضى : والكعبه الشريفه طلكها هي هاي شغله بيها شقه لو كذب انتي صدك طالبه من ابويه مترجع فلوسه اله يطلكها
خوله : لك ابوسك على هذا الخبر
مرتضى : فهميني تره ماضل عقل بيه صار يومين احتركنا حرك منا خالتي وعمي ومنا احنا شديصير رحمه لموتاج مو اشتعلنا شعل واني ضال مثل الاثول عيوني هنا وهنا وماادري بيمن احير
خوله : انت بس ودي امك للبصره ومن ترجع كلشي افهمك
مرتضى : شتفهميني لخاطر الكائنات مو حتى حوصلتي طكت من وراهم احجي ويه هذا وذاك الخبلني كلها ذابه الصوج براسج ومبين حجيهم صحيح اني كلت من اخابرج تكولين مالي دخل وابوك متحجج بيه وهاج من صوتج مبينه فرحانه يعني ابويه ماجذب من كال هذا طلبج
خوله : لك يمه لا تشلع گلبك ولا تصير عصبي انت مالك دخل بيني وبين اخوتي اطلع منها تعرف بيه شكد احبك ومالي دخل منو ابوك ومنو امك الاريده منك تودي امك واني شتريد تعرف اسأل واجاوبك بس بالاول تودي امك
مرتضى : هو راح اوديها وباجر ارجع كون الحك على هذا الثاني الجاي من تركيا محد اكل تبن بلصار كله غيري صرت اخطبوط ايد هنا وايد هناك وهاي خالتي هم بلبيت وصحتها مو زينه هلمره كتله لابويه خلي اودي امي يم خالتي كام يعيط مقبل اله تروح للبصره وخالتي صالحه كتلها تعاي وياي هم اخذج هناك اقلها بين متفض السالفه متقبل تطلع من البيت اله يجي مهند واني باقي اشيل روحي واركعها هنا وهناك
خوله : نسيت اسألك مهند يدري بناي متزوجه
مرتضى : ياطلابه الماتخلص كون اهج بجزيره محد بيها بس اني
خوله : شكوو
مرتضى : هذا سالفته اعوج من سالفه ابويه وعمي مهند مايدري بزواج ناي عباله لهسه تنتظره
خوله : شون ميدري ما سأل ماكال وينها ماتت عاشت وياانتظار فدوة عايش على الاطلال العينتين صايرلي روميو
مرتضى : طلعت امي خلي اوديها ونحجي بعدين
خوله : من توصل للبصره خابرني حتى لو الفجر
مرتضى : عمه بروح ابوج وكل ميت الج فضي سالفه ابويه تره حالنا تخربط ابويه متخبل يمشي ويفشر ويعيط حتى امي ضربها لان مقبلت بسالفه الطلاك ولوما اني موجود جان شمرها من الدرج
خوله : لو عايف يشمرها خرب غيرتك
مرتضى : خلي اروح والي عتب بعدين وياج
خوله : كمت فتحت الشباك اجر هوا بارد كلشي خططت اله صار سنين نجح كل لجمه اكلتها منهم واكلوها ذكرى وجهالها وامي منهن اليوم ضاكنها دك تلفوني مجاوبت اعرف جوحي
طبيت سبحت وتريكت براحه صار سنين مامرتاحه هيج وطلعت للشغل مردت افكر بأي شى يغثني متوقعت بيوم اخذ حقنا صحيح وره سنين طويله وتأخرت بس على الاقل كدرت اعيشهن بقهر وبذل ومهانه
ما ندمانه ولا بيوم راح اندم على دكتي بيهم لان يستاهلون راح اشمرهم وره ظهري بس بالاول لازم افهم سالفه مهند لان مرتضى من كال عباله تنتظره گلبي لعب
شرهب : قرر عدي يسوي غرفه ابوه وامه للدراسه حجيت وياه
وين يرحون خطيه
عدي : يصعدون لغرفه ابتسام مو اكو غرفه فارغه
شرهب : ذوله گبار بلعمر شيصعدهم وخاصه عمي هو كوه يمشي هلمره يصعد درج
عدي: بلهول مااكدر ادرس الطلاب وانتم طابين طالعين هواي عندي طلاب مااكدر اروح الهم للبيت لان ماعدهم مكان يستقبلوني بيه
شرهب : واحنا عدنا قصر ٥٠٠٠ متر هو البيت هلكدوته ومخنوك خنك اكعد بلهول واني مااروح ولا اجي يمكم اخلصها لو بلمطبخ لو بغرفتي
عدي: انتي مالج دخل لا تدخلين عود اذا انلاصت اخلي الدروس النهار كله وتالي الليل ينامون بغرفتهم
شرهب : والله حرام عليك تبهذلهم عمي ينام من وكت
عدي واني هم اخلص الدروس من وكت اني راح اشيل جربايتهم ابقي الكنتور واحط كراسي وعود بليل من يردون ينامون يفرشون بلكاع ويوخرون الكراسي وينامون قابل هي معضله كلها جم دقيقه وتفض
شرهب : وامك وين بيها حيل تشيل وتحط وابوك خطيه يختنك اذا نام بلكاع
عدي : انتي شعليج ابوج لو ابويه اني احجي وياه وخري من دربي خلي افصخ الجربايه واكمل الغرفه اليوم
شرهب : حاولت افهمه مااقتنع كلت اكيد عمي وعمتي مايقبلون وتالي سكتو من وره لسانه ميردون مشاكل وبدت الطلاب تجينا للبيت كلهم طلاب ابتدائيه سادس بكلوريا وعنده اول متوسط وثاني بنات بس بله حاطين معلم يدرسهم شبيهن الامهات مايدرسون جهالهم تمنيت ارجع للدراسه
شكد جنت احبها انحرمت منها جان هسه ادرس سادس وزاري والسنه الجايه ادخل كليه شدعي عليج ياصالحه ولو الي انتي بيه مو قليل وعساج بعد وبعد نار تاكلج اكل وافرح بيج
خوله : رجعت من شغلي متأخره وبقيت انتظر تلفون مرتضى وخابرته كال التهيت بأمي ادك وتلطم
وليش تلطم كلها جم يوم ويرجعها
مرتضى : يعني تدرين بيه يرجعها
خوله : اي ادري وينها امك انطينياها ماعندي رقمها جان خابرتها
مرتضى : عمه فكج منها المره متخبله شعرايه واوديها للشماعيه
خوله : انطينياها لك بله شلعان گلب
مرتضى : مو تهيجيها
خوله : وينهااااا
مرتضى : خلي انزل جوه هيه فلتت منها حتى اخابرج
خوله : بس اكمل ويه امك اريدك مو تفلت
مرتضى : وين اهج هااج
هااا سهوره شلونج
ساهره : الله ياخذج يلكحبه يلبربوك يلهجمتي بيتي كون هنا بعدج جان شوفتج شسوي بيج اله اطلعج مصلخه بلشارع
خوله : لتمسلتين حيري بروحج امي ولا تهددين لو بيج خير مجان علمود جم فلس طلكج
ساهره : ارجع على عنادج
خوله : تردين اخلي يطلج ٣ مرات وتحرمين عليه
ساهره : شتردين مني الله ياخذج يلزركه
خوله : ردت اكلك شى واحد خلصتي عمرج متحمله بخل جوحي وادافعين عنه وصابره على خبالاته ومايوم قصرتي وياه شفتي شون جازاج
ساهره : غير من وراج انتي ادري بيج غيرانه لان متزوجتي وضليتي بحسره الرجال هاي الدوده البيج الخلتج ميته مني ومن اختي
خوله : الي يعيب ينعاب ياام مرتضى ولو اتزوج واحد مثل جوحي امداني اضل العمر كله وحدي راسي بارد ولا انام يم رجال يباوع على التفله عباله ميت فلس لج الي مثلج تحرك روحها احسن الها هم عايشه ويه واحد متلت فلوس كدامها ويحاسبها على اللكمه وفوكاها لخاطر الفلوس طلكها وشمرها بلشارع تسوه عمرج جابج شمرج يم اهلج وهم مو هو جابج ابنج غير اهانه وبعدج واكفه وتحجين طمي روحج يلغبره وعناد بيج راح اشوفج رجلج الي ترجفين عليه شون الفلوس اهم منج اله اخليج تحمضين شهر بلبصره وشوكت مااطخ بعقلي اخليج ترجعين راح اشوفج بعينج شون جوحي يفضل فلوسه عليج وعود اكعدي انفخي روحج كدام نسوان المنطقه من يدرن رجلج علمود يرجع فلوسه طلكج
گبر اي والله وفوكاها مكيفه عدها رجال
جان تسده بوجهي
بقيت اضحك شويه ودك تلفوني
مرتضى : هيج عمه هاي المرجيه منج
خوله : اني كتلك لا تدخل
مرتضى : شون ماادخل وهاي كطعت دشداشتها شكتها من طول للطول من وره حجيج وياها اني شون اخليج تحجين وياها سمعي صوت عياطها كعد تسمعين
خوله : اي والله سنفونيه مال بتهوفن يخبل حركان گلب امك
مرتضى : خلي اروح احترك دمي حيل والوضع حيل خانكني وانتي هم قهرتيني منج ماتوقعت هيج تسوين بينا
خوله : بعدين اراضيك واطيب خاطرج بس احجيلي عن مهند بسرعه
مرتضى : مهند من سافر واستقر هناك جانت امه تكول اله كمل امورك وابني نفسك وازوجك وهو دوم يكول الها اريد ناي وهي تسكت تخاف تعانده ويرجع تالي لزمتني امه وامي واگلن راسي اخاف يخابرك كول الهم شالو يونس اخذ خواته واجر بعيد عنا وكطع علاقته بينا لان مرات يخابر مهند يكول الهم صيحولي ناي اسلم عليها ملكن غير هاي الجذبه يونس طلع من السجن تعارك واخذ خواته وهج بيهن وميقبل احد من عدنا نتواصل لا وياه ولا ويه خواته وهو بطلهن من المدرسه وكاعدات وساكتات بلبيت لا طبه ولا طلعه لهذا منكدر نروح الهن ونخليك تحجي ويه ناي
ومثل متوقعن ماصدك بيهن وخابرني وكلت الي اتفقنا عليه
خوله : ليش ولك سويت هيج انت هم طرن وطلي تكودك امك وخالتك
مرتضى : من اتزوجن البنات خفت مهند يرجع وتگبر السالفه اضطريت اجاريهن حتى اريح راسي
خوله : وصدكك
مرتضى : ماعنده غير حل وراد اكثر من مره يحجي وياج لو ويه بيبي يعرف بسفرج وماكو اتصال نكدر نوصلج وبيبي حجه وياها مرتين وسألها عن ناي وكالت اله زينه يم اخوها
خوله : ليش امي تدري
مرتضى : اني حجيت ويه بيبي كتلها اذا دره ناي تزوجت يجي ويسوي طلابه وبيبي خافت وكالت اله ناي زينه ومرتاحه ليضل بالك واكدت كلامنا وهو بقى يشتغل حتى يكدر يسحبها
خوله : شون صبر هاي السنين كلها ليش مااجه
مرتضى : لان سنه ونص اشتغل ولم خوش مبلغ ودزه لامه حتى تجهز اله وتالي امه اخذتهن كالت اله سويت بيها عمليه لاختك لان من وراك كليتها موزينه ومااريدها تموت وهو جذب لا سوت عمليه ولا بطيخ اخذت الفلوس الها حتى ليرجع تعارك وياها وراد يجي واني قنعته يرجع يلم وميدز جنت اطيب خاطره انقهر عليه رغم شكد جنا نتعارك وند بند اني وياه بس من سافر اشتاقله يبقى ابن عمي وابن خالتي والدم يحن وبهيج رجع للصفر وبدا يكون نفسه وهسه عنده محل واموره حيل تحسنت
خوله : وشوكت ناوي يجي لوما شغلت ابوه مااعتقد يجي
مرتضى : هو جان ناوي نص السادس يجي وبلغني قبل شهر وكلت لامه وكالت عود اني احلها بس كدامج امه من وكعت بسالفه زواج عمي متحملت وخابرته وهو حجز وجاي
خوله : وشون راح تحلها يلفهيم راح توكع براسك
مرتضى : اني شعليه عمه كلها من وره امه هي كالت يوم من عمري مااخلي بت ذكرى جنه اليه ومن صرت وياهن علمود ناي وداعتج لخاطرها لان جانت المشاكل من كل صوب اخوها بلسجن واهلي محد راحمها وشرهب تزوجت غصب واني لو شكد مااوكف ويه البنات مااكدر الهم صارو عصابه كفيلج الله وكلت اذا اجه مهند راح يزيدها مو يخففها راح تعلك اكثر اني شفت مهدي خوش رجال وابن خالها وراح تعيش بعيد عن امي وعن خالتي واكيد ترتاح دورت راحه ناي وحق الله قبل راحه اي احد
خوله : وهذا باجر جاي
مرتضى : قابل شيريد يسوي يعيط يهوس ويسكت البنيه تزوجت وعدها ولد وعايشه ويه رجلها اقوى شى يكسر البيت على راس امه ويطلع يوم يومين ويرجع يسافر واني ليش راجع لبغداد باجر رغم والله رجلي خيوط من التعب بس راجع حتى ابقى وياه
خوله : عينك عليه مرتضى مو تعوفه وحده اخاف يأذي ناي
مرتضى : مستحيل يأذيها هذا الخبل يحبها ينقهر منها ومن احجيله اكيد يعذرها ان شاء الله تفض السالفه
عمه بيش احلفج فضي سالفه اهلي تره لعبت روحي
خوله : شهر وترجع امك
مرتضى : هوايه عمه بروح موتاج اقل
خوله : شهر وداعت امك وخالتك ودير بالك تحجي بعد وتكول قللي ازيدها وداعتك واسويها شهرين خليني حبابه وفقيره وساكته
مرتضى : كله من وره عمشه اجت وخلفتكم واحنا وكعنا بيها لو ضاله عمشه تسرح بلحلال ويوميه مصادقه واحد ولا متزوجه فرج وجابتكم
خوله : هههههههه روح لك وعينك على ابن عمك من خفت لوجهك يله اودعناك
مرتضى : الله وياج
ناي : مر يومين وكلشي عادي خابرت عمه وكالت مااعرف شئ غير عالكه بعدها واشواق حابسه روحها بيتها وعبيد قبل يسجل نص البيت بأسمها مبين كدرت على عبيد بسهوله اما صالحه بعدها تهدد بس حالياً بلفراش مكعد تصحى تكوم وتوكع وكالت مهند اجه بس كلشي متعرف لان ماكو احد يجيب النا الاخبار حتى نعرف شصار
واني ثولت الوضع كلت ماطول عدت هليومين معناها كلشي تمام
كاعده اغسل ملابس وفاتحه باب الحمام لان اختنك عدنا غساله ام حوضين اشيل الملابس اشطفهن من التايت واحطهن بلنشافه واريد اخلص انكسر ظهري وحوراء وسيف يلعبون بلهول وام عبد وعمتي كاعدات يمهم ويسولفون سمعت صوت تلفوني يدك عطت على حوري حتى تجيبه
حوراء : هااج هذا يونس يدك
ناي : حطي على اذني ايدي كلها تايت
انفتح الخط وجان صوت يونس عالي ومتوتر
يونس : ناي
ناي : هااا عيني شبيك
يونس : هذا مهند اجه وعرف بيج متزوجه وكالب البيت على اهله
ناي : وكعت الملابس من ايدي واخذت التلفون وصعدت ركض لغرفتي
شكعد تكول اي
يونس : مرتضى جان يمي كوه مسكته وكايل اله احجيلي كلشي واني مااسوي اي شى وهذا خارط الاول والتالي وعباله مهند سكت وأمن ونايم يمه بلبيت لان طلع من بيت اهله كعد مالكاه ويدك عليه تلفونه مغلق واجاني مرتضى يلهث اجرت تكسي وجايج اخاف هذا يجي لديالى ويسويلج مشكله
ناي : كمت اكمز واضرب على وجهي وصدري من سوده بوجهي لك عمتي هنا اذا اجه شون هو يندل البيت
يونس : الاغبر مرتضى كايله على المنطقه واذا سأل الكل يعرف خال رجلج واكيد يدلوه خابري مهدي وكولي لازم اروح ويه يونس لبيبيتي متخربطه واني اخذج لكربلا وبلكت نلكه مهند واخلي يجي علينا هناك ونفهمه ونفض الموضوع كله هذا شايش هسه وميشوف كدام عينه اخاف يسويله طلابه ومنكدر انسدها
ناي : اندكت الباب وطبت حوراء
حوراء : حوري اكو ولد بلباب يكول اني ابن عمها
ناي : لك يونس هذا هنا شسوي
يونس : على كيفج شبيج لترجفين راح تبينين اكو شئ كدام عيالج ابن عمي وجاي من السفر واجه يسلم تعاملي بهدوء راح تفتحين العين عليج
حوراء : اكو شى ناي شبيج
ناي : عفيه حوري لتخلين امج تطلع ورايه فدوة
حوراء : ليش اكو شى
يونس : انزلي ولتخافين ميكدر يسوي شى بس توكفين يمه انطيه التلفون خلي احجي وياه
ناي : اي عفت الخط مفتوح ولبست شال على راسي ونزلت جنت امشي واحس اطرافي جامده على ساعه وتلزك بلكاع مااحس يمشي الدم بيهن وحوري ورايه عيونها حايره والف سؤال بيهن فتت من يمي عمتي وام عبد
وداد : منو هذا يمه جايج كثرت خطاطيرج يوميه يااخ ياابن عم اذا هيج عندج اهل المن شمروج على ابني
ام عبدالرحمن: شجاج وداد البنيه جاي عليها ابن عمها استلمتيها ذاك الاستلام دوم لسانج متبري منج
وداد : حجي الحق ماينراد شستلمت منها مسويتلي البيت مزار ياهو اليجي لديالى يضل هنا عبالك بيت ابوها وتسرح وتمرح بيه
ناي : عفتها وطلعت فتحت الباب مشيت كم خطوه يم الكراج وجان يصير مهند بوجهي
جريت نفس خوف على رهبه على رجيف بعمري ماخفت بكد ماخايفه هسه صرنا وجهه بوجهه
مهند : شونج ناي لو اكول ام سيف
ناي : بلعت ريك وعدلت شالي بتوتر الْحٍمَدٍ للـّہ على سلامتك جانت عيونه تجدح نار من الاعصاب
مهند : هذا وعدج اليه
ناي : عفيه روح هسه هنا عمتي اذا سمعت تصير مشكله هااك احجي يونس يريدك مديت ايدي وانطيته الموبايل اخذه مني وسد الخط حتى بدون ميباوع عيونه متشخصه عليه ورجع حطه بيدي
مهند : اجيت اسمع منج صار سنين اسمع اشكال وانتي الوحيده الماسمعت منها
ناي : عفيه مهند روح اترجاك رجلي على جيه لتسويلي مشاكل
مهند : هذا الهامج رجلج والمشاكل زين واني وعمري الراح حتى اجمع واكون نفسي حتى تصيرين اليه
ناي : انت رحت وعفتني وحدي اواجهه مصيري لتجي هسه وتلومني
مهند : بيومها كتلج اذا متحلفين بأن تبقين تنتظريني مستعد ادخل السجن ويطبني طوب مارحت اله حلفتي وكتلج ديري بالج تكذبين عليه
ناي : واني حلفت انتظرك لان ماردت تضيع مثل يونس واني ماركضت حتى اتزوج اني انفرض عليه الزواج اذا حاجين كلشي الك جان عرفت منو وره السالفه كلها لتجي تحاسبني روح حاسب امك شون شمرتني اني وشرهب حتى تخلص من عدنا
مهند : وانتي ليش محاولتي توصلين اليه ليش اجيتي شمرتي روحج بحضن ابن خالج
ناي : شون اوصلك وين الكاك شو تحسسني جنت ساكن بلشارع الي ورانه واني تعاجزت اجيك تره انت خارج العراق ومااعرف رقم الك وحتى لو اعرف شون اخابرك كلها صارت ضدنا انهزمنا بليله ظلمه اني واختي وتالي هيه رجعت واتزوجت واحد زايعته الكاع امك اختارته الها واني اضطريت اتزوج مهدي
مهند : اضطريتي ماطول مضطره اطلكي واني اتزوجج بس تطلع العده ثاني يوم اعقد عليج واخذج واروح لتركيا
ناي : انت تخبلت شون اطلك واني عندي ولد منه وهاي قبل جنت مضطره هسه اني احبه لزوجي وعايشين على حب الله وحياتي زينه لتخربها اترجاك مهند عاط بصوت عاالي
مهند : كتلج أذيج اذا تكسرين بيه وتكذبين عليه حذرتج لو لا
ناي : اشش عفيه صوتك ليسمعون
مهند : حذرتج لو لا
ناي : اي اي حذرت عفيه نصي صوتك
مهند : خايفه ليسمعون شون وعدتي ابن عمج وغدرتي بيه
ناي : مو اني الغدرت احجي حق الله لتصير باطل لك امك الي لعبت بيك وبيه
لزم ايدي حييل ويعت بيها
مهند : وانتي كيفتي لان اتزوجتي ابن خالج من يوم مااجيتي لهذا البيت تتذكرين من رادتج بيبيتج وانتي تغيرتي
ناي : عووف ايدي مهند لحد يجي عصر اصابيعي حيل
مهند : اذا ما طلكتج ياناي مااتسمى مهند
ناي : جريت ايدي منه أذاني امشي اطلع بره رووح عفيه
مهند : كل تعب عشته وصبر لخاطرج اله اطلعه من خشمج لا اصير كابوس عمرج مااخليج تتهنين يوم واحد واني هيج محروك گلبي
جان تطلع عمتي
وداد : هاااي شكوو شنو هذا الصوت
ناي : كمت امتمت بلكلام ماكو شى عمه ابن عمي سلم عليه ورايح
مهند : رايح سهله ياام سيف
ناي : خله وطلع
انداريت على عمتي
وداد : شبيهه يعيط هذا ابن صالحه
ناي : اي ابنها لا مجان يعيط هو مسافر جان واجه يسلم وراح عفتها وطبيت بحجه الملابس لشتي كلها ترجف ايدي تشنجت من الخوف شويه ويصير بيه ذبحه من القلق والتوتر غسلت وجهي ونكعت شعري فروه راسي نار تطلع منها
بقيت بلحمام فوك الساعه ونص مااريد اطلع حتى مااريد اشوف حوراء لان اكيد راح تسألني كملت الملابس وبقيت كاعده وافكر واكل بأضافيري شراح اسوي لحد مسمعت دكت الباب صوت حوري وهي تحجي بصوت ناصي
حوراء : نايه هذا يونس بلباب ماكلت كدام امي حتى لتحس
ناي : فتحت الباب وطلعت على يونس
باقي بلحديقه
يونس : هااا شصار
ناي : شمرت نفسي بحضنه الحكني هذا جاي يدمر كلشي فدوة يونس الزمه واحجي وياه نشف دمي اله شويه ويعيط ويفضحني وكال اله اطلكج منه
يونس : خلي يولي مو بكيفه عباله ماكو احد وراج ارتاحي وجري نفس وجهك اصفر على شنو هذا الرجف
ناي : ماشفته شسوه وشون يهدد هذا متخبل
يونس : مرتضى بلتكسي بره خابرتي رجلج
ناي : لا مكدرت
يونس : خابري وخلي اخذج ويايه لازم نفضها اليوم باجر بلزايد قبل ليجفص
ناي : خابرت مهدي وكتله وكال روحي طبيت لعمتي جان تكول مترحين يمعوده خلي اروح
جان تكول مترحين واني اخابر مهدي وابلغه واذا رحتي اكلب البيت عليج عزه استغفرت ربي اني بيا حال وهاي حطت راسها براسي
رجعت ليونس كتله روح وبلكت يجي مهدي واقنعه وهو يجيبني
راح يونس وهو باله كله يمي
طبيت للبيت والدمعه بطارف عيني
بعد اسبوع :
ابجي واعيط وابوس بالايد بس انطيني ابني والله مااريد شى منك اطلع وبعد مااشوفك وجهي بس ابني لا تاخذه مني اموت بلياه
وداد : اسحلها لهاي الساقطه اني يوم مااجت مهزومه كلت وراها مكسوره وكتلك على بياضها هاي وحده عاشت ويه اثنين من ولد عمها بنفس البيت منو يكول ما واحد منهم قشمرها وتونس بيهاوانهزمت وانت ضليت ادافع الها وسويتها اشرف من الشرف براسي اكلها هسه
يتبع ....