#الابواب_الخمس
البارت العشرون /الجزء الثاني
للكاتبة Reem
(بارت طويل لعيونكم )
تكظي وداعتك وضل سوالف
لا تهتم ترى الدنيه مواقف
عيش وشوف هاي الوادم اشكال
بسيطات الشفتهن لا اشايف
انه اجروحي من هل وادم اثكال
ينشدوني وكللهم خفايف
جوحي : شتردين ويرجعن فضيني
خوله : تكول لساهره عبيد تزوج على صالحه وفلوسك وره يومين بحضنك
جوحي : تردين تحرگيها يخوله
خوله : هيج خايف على اخوك ياعيني طكت دمعتي على حنيتك اوكف خلي امسح عيوني والله تحجي الاخرس كلت اليوم اذا معرفت ساهره وبلغت صالحه بزواج اخوك اعتبر مالك ولا فلس يمي بح طارن يله روح دوختني
قبل شهرين ...
بديعه : وين رايحه مبدله وكاشخه
خوله : رايحه لبغداد
بديعه : صارت بغداد عندج العلاوي كل شويه يارايحه ياراده شنو سالفتج والله گلبي يلعب منج متحمله الطريق روحه رجعه كل جم يوم اله وراج سالفه عوجه
خوله : ماكو غيرج العوجه وخوثه بسرعه حطت انه بيها وقابل بغداد من بعدها ساعه زمان طريق لج عدنا مدن بلسويد الطريق مايقل عن ٥ ساعات شتحجين بطرانه ساعه هاي اكرزها
بديعه : السويد مو مثل هنا والطريق مو راحه ويخوف وحدج رايحه وراده
خوله : على اساس اني بت العشرين سنه والشباب تتحارش بيه ولج بابا اني لو متزوجه جان ابني هسه بطولي ويجوز مزوجته وصايره بيبي بس غير نسوان حموينج الجلبات مارادن اعيش مثل الوادم
بديعه : ربج يجازيهن
خوله : ونعم بالله علويه بديعه خلي اروح تأخرت لا تنتظروني اليوم راح ابات هناك
بديعه : گلبي يلعب منج يخوله واني من يلعب يصير وراها طلابه
خوله : لعبي زين وهزي بدربج والله بطرانه هااا نسيت اكلج اشتريت دوا امي انطيها عود
بديعه : خلف الله عليج همزين كلت اليوم اكول لفلاح بلكت يشتري
خوله : على شنو خلف الله عليه غصب عني غير امي يله عيني من رخصتج خيه ورايه امور مهمه
بديعه : بس لو اعرف شناويه جان ارتاحيت
خوله : طلعت من البيت وصعدت كيات عبريه لبغداد طول الطريق واني افكر شون راح اقنع جوحي وامشي الفلم براسه هذا واحد مينغلب اذا حتى عبيد علسه واكل فلوسه ومشه السالفه عليه اباوع من الجامه واتذكر كلشي سوه بيه وبجهال ذكرى وبأمي مااريد انسى حتى لا اتراجع وره اكثر من ساعه ونص يله وصلت لان طرق ازدحام اشتعلتي بدعه عرضتلي بلطلعه شكد اكره واحد يعرضلي واني طالعه
وصلت للبيت دكيت الباب طلع عبيد
هااا شعجب بعدك بلبيت
عبيد : اليوم ماطلعت تعالي طبي شعجب جايه
خوله : ليش متريد اجي
عبيد : هله بيج بس استغربت الصبح جايه
خوله : عندي جم شغله اكملهن واروح بشرني شونها مرتك الجديده
عبيد : اششش لحد يسمعج
خوله : يابه نصيت صوتي ولو ميحتاج تكول مبين عليك متفح
عبيد : اشواق مدللتني طايره بيه طير لو بيدي ولا اجي هنا بس شسوي اخاف صالحه تحس وتگلبها عليه
خوله : دورلك حجه وروح جم يوم يم مرتك
عبيد : خلصن الحجج كلهن متشوفين اليوم مطالع كلت اخاف تحس هواي طلعاتي صارن
خوله : شبيك يحظي كول الها رايح اجيب بضاعه من الشمال ابقى جم يوم وارجع وخلص ذني الايام بحضن عروستك
عبيد : اي ولج خوش فكرة راحت من بالي
صالحه : خير من الصباحيات تتوشوشون سمعوني حسكم لو تالي وكت صارت اسرار بينكم
خوله : صبحي كولي صباح الخير السلام عليكم كحي اي شى نازله جنج بليس تتسحبين حتى فزيت من سمعت صوتج
صالحه : ياعيني فزيتي صايره نازكه تالي وكت
خوله : اي عيني شسوي تعرفين الي يسافر بره لازم يتغير ويصير نازك
صالحه : قصدج يتلوك ويبدل جلده مثلج
خوله : خلي اذب غراضي واطلع اشوف ابن اخويه هاي مرتك حلمانه على عركه وانت تستفتحهه بيه
عبيد : شبيج صالحه كاعدين نسولف سوالف عاديه
صالحه : خوو انت صاير تتراجف على اختك اول تالي نسيت سواياتها جنك فاقد الذاكره
عبيد : سويلي ريوك كاعد راسي يريد يطك مالي حيل هوسه وصياح
صالحه : مااسوي خلي اختك الخيره الصايره تالي وكت طيبه تسويلك انتي شوكت تولين وتسافرين
خوله : هاي والله حلوة شايلتني على راسج لو على ظهرج انتي شكوو ليش تدخلين حتى بهاي حطيتي خشمج
صالحه : مو اشوفج يوميه جايه مسويه البيت فندق
خوله : بيت امي وحره بيه ابقى بيه ابات اسوي فندق اسوي ملهى انتي شعليج
صالحه : سمعتها كوم اركعها على حلكها تريد تسوي البيت ملهى
خوله : جان گبل يمه ذاك الزمن وله صلوحه كوم واسمع كلام مرتك واركعني على حلكي
عبيد : حتى ريوك مااريد طالع
صالحه : وين رايح مو كلت اليوم مااطلع
خوله : من وراج عيني حقه يهج اخويه صاير ترف ميتحمل الصوت العالي والمشاكل حقه مو عبودي وغمزت اله ودخلت لغرفه امي ذبيت الغراض
عفتهم وطلعت يتلاطشون بينهم ورحت للسوك على محل جوحي اخذت ويايه لفات كص من السوك وطبيت عليه السلام عليكم
جوحي : وعليكم خيرج اليوم هنا
خوله : اجيت اسولف وياك وكلت اكيد جوعان
جوحي : اي شويه وارجع للبيت واتغدا وره صلاة الظهر
خوله : يعني متريدهن خليهن اليه
جوحي : لا لا ليش ميت جوع انطيني اكل
خوله : جرهن من ايدي وفتح العلاكه وكعد ياكل اعرف بيك سوده عليه متكدر تشتري لفه تخاف فلوسك تقل
جوحي : هااا بدينا هاج لفاتج مااريدهم
خوله : دكل بلعافيه
جوحي : شوكت اجيتي من كربلا
خوله :مصار هواي ذبيت غراضي بلبيت واجيتك عندي شغله ضروريه وياك
جوحي : جايبه فلوس بعد اشغلهن الج
خوله : لا اجيت اخذ فلوسي جان يغص ويكح اختنك كمت اضرب على ظهره
على كيفك تاكل سريع شجاك طاير الاكل
جوحي : يافلوس من تدرين ذبيتهن بضاعه ومااكدر انطيج ولا فلس هسه لحد مااصرف البضاعه وانتي مصار كم يوم من انطيتيهن اليه
خوله : هاي شبيك تتراجف خلي افهمك
مو اني لكيت واحد ينطي فوائد اكثر منك ليش مااشغلهن يمه واستفاد
جوحي : منو هذا وين عرفتي
خوله : هناك بلسويد مو صديقتي حطت فلوس يمه وكلت خلي تجرب اذا طلع مضبوط اشيل وانطي الجامعتهن طلع كلاوجي مخسرانه شى صديقتي التاكلها وهاي المده كلها صار ٦ اشهر لمت كومه براسه
جوحي : وبشنو يشغلهن
خوله : بكلشي بلبورصه والاستيراد والتصدير كلشي يخطر على بالك
جوحي : بابا ذوله حراميه ٥٦ قفاصه تصدكين بيهم
خوله : وليش مااصدك غير صديقتي واهلها كلهم مشغلين فلوسهم حتى نجم والي علمك هذا الرجال مامحتاج الجم ورقه الي انطيهم اله يتفل فلوس نص ستوكهولم مشغلين فلوسهم عنده واني راح اجرب وهاا ماينطي مثلك كل كم شهر كل ١٥ يوم ينطي دفعه لان يشتغل بلبورصه والعقارات
جوحي : ماكو هيج فلم هندي وين واحد ينطي كل ١٥ يوم ذوله يردون يقشمروج لتصيرين كمش
خوله : هسه اني اريد اصير انت شعليك انطيني فلوسي واني انجاز بحالي
جوحي : ماعندي هسه انتظري فتره
خوله : دبرلي فدوة ليش حرامات ذني ال٢٥ ورقه ينطيني ربح على الاقل ١٠ ورقات
جوحي : لج لتخبليني وين اكو هيج ربح
خوله : كلشي اكو قابل احنا بلعراق هناك اكو دوله وقانون وناس ملتزمه شركة هذا الرجال تعادل هذا السوك كله انت ضل لم فتافيت ومكيف عليهن اني احب اجازف انطي جم فلس واجرب شون جربت وياك
جوحي : وشكد راح تنطي
خوله : ٥٠ ورقه
جوحي : هوايه كلش هوايه واني فتحتي عيونج وحلكج يمي ومنطيتيني غير ٢٥
خوله : همزين منطيت اكثر هاك اجيت اخذهم تصيح مو هسه وماعندي عيني خصم الحجي خلي فلوسي يمك مااريدهم عندي غيرهم اشغلهم وانت شغل براحتك ال٢٥ ورقه مالاتي عسى بعد ٦ اشهر يله تنطيني ميضيعن يمك واني بس اروح للسويد انطي لهذا الرجال والي يجيني منه المه ويفيدني اضمهن فوك العندي
جوحي : لعد شكد عندج
خوله : هااي شنو شعليك فلوسي وتعبي وحره بيهن اروح ليونس وانت كمل شغلك
جوحي : انطيني عود تفاصيل عن هذا الرجال
خوله : ليش
جوحي : هيج اريد اعرف
خوله : اي اجيبلك كلشي تريده هاي سهله اروح اني سلملي على مرتضى ومرتك لا تسلم عليها خلي تولي
عفته وطلعت ادري بيه هسه شاك بلموضوع كله خابرت نجم وكتله اخاف جوحي يخابرك يكولك شنو هذا الرجال الي انطيت فلوسك اله تكله يشغل فلوس وعلمته شيكول بلبدايه مقبل وكام يعيط كتله بروح ذكرى بس هلمره اريد منك هاي الوكفه واضطر يسكت وفهمته كلشي
رحت ليونس للمحل مالكيته كال العامل مالته اليوم ميجي رجعت اجرت تكسي وطول الطريق اخابر يدك وميجاوب ضل بالي رحت للشقه ادك بلباب وهم ماكو هذا وين راح
ناي : اسبح بسيف وعياطه ثابر الامه ميريد يسبح ولازمته وافرك بيه اندكت الباب
يمعوده حوراء افتحي الباب
حوراء : اهووو وين بيه حيل داباوع مسلسل دموع الورد لو يحظر جدي مااكوم
ناي : لج اخاف امج
حوراء : قابل امي ماعدها مفتاح البيت
ناي : وهاي المسلسل جم مره تشوفيها متملين خرب لشتج كومي عجوزيه شوفي منو لو تجين تكملين سبح سيف
حوراء : لا كايمه اففف عفيه بيت مايكدر الواحد يباوع على المسلسل براحه فدوة لعمار كوسوفي ياربي كون واحد مثله
يونس : وصلت لديالى واني حتى مااتذكر شون وصلت هلكد مامخنوك ادك بلباب
جان تطلع حوراء
حوراء : هلو يونس الْحٍمَدٍ للـّہ على سلامتك تعال تفضل
يونس : الله يسلمج ناي وين
حوراء : صاير شى شبيك وضعك مو طبيعي
يونس : عفيه صيحيلي ناي بسرعه
حوراء : تعال طب على الاقل
يونس : واكف هنا
حوراء : براحتك طبيت ركض على ناي جانت تحارب ويه سيف علمود السبح هذا اخوج بلباب
ناي : يونس يمه اخاف احد صارله شى مو من عوايده يجي بدون ميكول هاج نشفي شعره زين وبدليله بين مااشوف يونس
نزلت دشداشتي جنت رافعتها وطلع اركض ردت ازحلك لان رجلي وهدومي كلهن مي فتحت الباب هاا يونس صار شى
يونس : محتاجج كلش
ناي : سوده بوجهي شبيك حبيبي تعال طب
يونس : رجلج هنا اخاف عمتج متقبل
ناي : مالك دخل بيها لا هيه ولا مهدي تعاال وجهك اصفر سحبته من ايده ودخلته امشي ندخل بغرفتي اخذته ويايه جان التعب حيل مبين عليه
طبينا للغرفه وسديت الباب اكعد احجي شصاير كعدنا على الجربايه
حط راسه على رجلي مثل الجاهل
يونس : تعبان ناي حيل تعبان ومخنوك واجيتج من بغداد واني حتى الهوا مأذيني
مديت ايدي على شعره ودنكت بست راسه احجي شبيك منو وياك ومنو هاي الي مأذيتك هيج
يونس : هي ما أذتني الدنيا هي الي اذتني وكسرتني وماخلت عليه شى يكسرني اذا مسوته بيه بدتها من موتت امي كبال عيني لحد ما عرفت روحي شكد اني غبي ومااعرف اتصرف اوكع نفسي بشغلات اكبر مني ومن اتأذه اضل انوح وابجي
ناي : فهمني شصار حتى افهم منك وبدا يسولف عن شيار كلشي جان يحجي ومخنوك وكوه حاصر دمعته ماكام من حضني ابد ويسترسل بلكلام
بس تصرفك صحيح وعين العقل البنيه مو من ثوبنا ولا راح تكدر بيوم توصل الها يعني ذاب روحك بتهلكه اقوى من القبلها اذا سما بت عمك ومن ثوبنا هيج صار بيك لعد هاي بت العز من وره ابوها شراح يصير بيك
يونس : يعلكني مصلخ بلميدان اني من عفتها هسه من خوف من ابوها اني خفت على گلبي منها اذا تعلقت اكثر وحبيتها وشطح عقلي وياها راح اخسر كلشي والزاد الطين بله فرق المستوى البينا افكر اكول اشافت وحده مثلها بيه شو اعرج ومهتلف واقل منها بهوايه مو بعيد الحراس الراح يجون يحموها احسن مني
ناي : المحبه من الله مالها علاقه بلشكل والماده ويجوز البنيه ارتاحت الك هي هم خطيه تعرف فرق المستوى ورغم هذا استمرت وياك بس ارجع واكول تصرفك عين العقل انساها اروحلك فدوة ماطول ماطاب بلعمق وياها انساها هي فتره وتروح من عقلك وفكرك اطلع بأقل الخساير
يونس : هيج وحده ماتنسي ولا راح اكدر انساها العمر كله
ناي : حتى لو متنساها على الاقل ترجع لوضعك الطبيعي بلياها دنحجي جان اسمع حوراء تعيط وتصعد الدرج
اي عيني عايفتني ويه ابنج المخبل وكاعده بلغرفه جان اطب وتفتح الباب حيل طفر يونس من حضني
حوراء : خرب حضج البرتقالي ياحوري اعتذر ماادري يونس يمج عبالي وحدج غير تكولين صعدت فوك وياه عبالي راح
ناي : ههههه تعالي طبي
حوراء : اروح بكرامتي لا انطرد
يونس : اني رايح ازعجتكم
حوراء : لا عفيه لتروح والله ناي تكمز عليه هسه تكول من وراج
ناي : وين رايح تبقى تبات اليوم هنا شيرجعك
يونس : مااكدر ابات عايف المحل بيد العامل
حوراء : متروح والله واني راح اسويلك ارقى غدا وناكل سوه لان امي مراح تجي للعصر هسه خابرت مات واحد من كرايبهم وراحن هي وام عبد وام صلاح يأدن واجب وعيب يرجعن من وكت يعني البيت نلعب بيه جوله محد يدري بينا
ناي : بربك لتروح هاي فرصه تسوينا اكل اوكع دخيل بيها يله تسوي كلاص جاي يله اليوم غدانه عليج
حوراء : ١٠ دقايق وجايه
يونس : غير غدا هذا ب١٠ دقايق
حوراء : الشيف حوراء بعدك متعرفها
ناي : اليوم بلطوارئ نغسل معدتنا
يونس : مجوعان والله
حوراء : تاكل يعني تاكل رضيت وان مارضيت
طلعت واني كعدت ويه يونس
يونس : احسها فطيره حيل
ناي : كلش وگلبها طيب وحنونه ولا مثل امها ابد تدري مره بيبي ام ماما الله يرحمها شكالت
يونس : شكالت
ناي : كالت احب حوراء لان تذكرني بأمج هيج طيبه ومتشيل بگلبها والضحكه متفارك وجهه وتتحمل كلشي ومتكول اااخ وصدك بمرور الايام طلعت مثل مكالت ولوما هيه بهذا البيت جان من زمان شخط عقلي
يونس : انتي مرتاحه هنا
ناي : اول مره تسألني هيج سؤال
يونس : قبل اخاف اسأله لان اذا ممرتاحه احير وين اوديج ومااريد ابهذلج بينما هسه اذا كلتي ممرتاحه ساعه ما ابقيج واخذج ويايه شو الْحٍمَدٍ للـّہ محلي يشتغل والشقه موجوده صحيح فارغه بس بمرور الايام اترسها الج ومااخليج محتاجه شى لو اعرف ليل نهار افتح
ناي : فدوة اروح لطيبتك وحنانك ادري بيك متقصر اني مرتاحه ليضل بالك اني حيلي رايح عليك احلفك بأمي ودمها لا ترجع لشيار
يونس : هو اني عفتها للبنيه مو هيه شون ارجع
ناي : اخاف تخابرك او ترجع تتواصل وياك تجيك للمحل
يونس : المثلها كرامتها فوك كلشي مااعتقد بعد الحجي السمعته مني راح توصل او تفكر تخابر لتنسين اني ابو العتيك والفكر وهيه بت العز والجاه
ناي : الله يبرد نار گلبك وتلكي بت الحلال الي تريحك وتكون سند الك
يونس : مااتقرب لبنيه توبت خليني هيج احير بعيشتي اني مااعرف اختار وكل مااختار اوكع بمصيبه گلبي خلص
ناي : هذا حجي كلها فتره وترجع عيونك تتراكص على هاي وذيج
يونس : لو عيوني تتراكص مجان يوميه واكع بنكره
ناي : اسم الله عليك من الوكعه تعال افرك راسك حتى ترتاح
يونس : اي والله حيل يوجعني حتى عيوني مااشوف بيهن
تمدد بحضني وبقيت افرك براسه لحد مندكت الباب وطبت حوري وبيدها صينيه كوه شايلتها اخذها منها يونس
يونس : شون صعدتي بيها موزين ماوكعتي
حوراء : لتستهين بقدراتي اكدر اشيل اكبر منها لج ناي ابنج ضل جوه يمكن هسه احتركنا
ناي : من اشتعلتي اي والله نزلت اركض على سيف جبته وصعدت
كعدنا ناكل وحوري ويانه
يونس : عاشت ايدج الاكل طيب بس شوكت لحكتي تسوين فاصوليا وتمن ودجاج شوي وزلاطه لو اسرع شيف بلعالم ميلحك هيج
ناي : انت صدكت هي سوتهن
حوراء : غير تسكت ام لسان اختك ابد متفضح الواحد خليني شايفه نفسي عليه عود اطبخ وشيف لو اله تخربين كلشي
يونس : مو انتي مسويه
حوراء : الفاصوليا من المجمده طلعتها حميتها وتمن والدجاج امي مسويته قبل متطلع غدا اليوم وكامل بس حميته اني سويت الزلاطه مو بعينك شوفها شون ناعمه وحامضه وتخبل لو انتم الرياجيل ميغزر بعيونكم شو تاكل كل كاسة الزلاطه عقوبه عليك لان استهانيت بقدراتي
يونس : شحجيت اني واكلتيني يابه الزلاطه تخبل تموت بحياتي مضايك هيج زلاطه خنفشاريه صاروخ مو زلاطه هااااج اخذت خاشوكه جبيره وترستها واكلتها
حوراء : اي عفيه هيج ارفع من معنوياتي متجون اله بلعين الحمره
يونس : ابتسمت على سوالفها رغم ضوجتي
ناي : حوراء طبيعتها فكاهيه وتضحك وتتشاقه وهي تاخذ ميانه بسرعه لان متعلمه على صلاح وعبد وحتى ويه مهدي لهذا اعتبرت يونس مثلهم وبيومها جانت تتقصد تضحكه شكد هو جان مهموم وضايج من سوالفها ضحك
سمعنا صوت عمتي
حوراء : اجت الاستخبارات ضمو سلاحكم والمخدرات وداد اذا عرفت انت هنا مو بعيد تبيتني بلشارع وناي تعلكها بلبنكه ولو تستاهل اختك الصراحه التعليك
ناي : عوفج مني وانزلي يمعوده مابينا حيلها
يونس : اروح اني مااريد مشاكل تصير
ناي : متروح والله هسه يجي مهدي اليوم عدهم كعده راح يجتمعون الولد اجه دور ولدنا والضيافه يمنا وراح يبقون للفجر سوالف وضحك ولعب وحتى دك وركص
يونس : هذا مو جوي والناس مااعرفهم مااحب اطفل عليهم اجيت ارتاح يمج واحجي وارتاحيت
ناي : طب مهدي ويه وكفت يونس استغرب وجوده وبنفس الوقت رحب بيه ويونس كله اجيت على ناي اشتاقيت الها وهسه راجع مباشره لزمه مهدي ومخلاه يروح وهذا الشى ريحني مااريد يرجع يبقى وحده ويفكر ويتعب
عمتي شافته ليونس بس معرفت بأن حوراء جانت يمنا من سألتها سوت روحها متعرف بوجوده وبهيج فلتنا اني وحوري من المصيبه جان سوتها وداد بينا
بليل اخذه مهدي وياه وكعد ويه الولد جنت اباوع على يونس من الشباك مطفيه الاضويه حتى لا ابين بالي يمه حيل اني من جان يسولف كوه صابره لا ابجي متت قهر عليه مردت ابجي وازيد همه بس من شفته كاعد ويضحك ويه الولد ومبين عليهم حبوه نزلت دموعي لا ارادياً سوده عليه حتى اصدقاء مثل الناس ماعنده لا اخ يسند ظهره بيه ولا صديق حتى الاصدقاء الي يعرفهم مجرد صداقه عاديه مو صديق يعتمد عليه شون علاقه مهدي وصلاح وعبد
حتى بهاي اخويه مظلوم امسح بدموعي المراضيه توكف جان اسمع صوت ورايه صوت حوري
حوراء : شنو الخله يونس يجي من بغداد مفرفحه روحه
ناي : انتبهتي عليه مبين جان
حوراء : كلش مبين
ناي : انتي دخلتي لابسه الربطه معناها تدرين هو يمي بلغرفه موو
حوراء : اي اعرف بس سويت نفسي ماادري الفضول كتلني كلت اكيد صاير شى بيه وانتم تأخرتو مابينتي سويت هيج حتى اطب وافهم ومن دخلت عليكم وشفته نايم بحضنج زاد شگي لان وضعه متخربط وتقصدت اكعد وياكم ناكل ونضحك اغير جو اله
ناي : اووف ياحوري اخويه من هبيه لهبيه يوميه شئ كاسر گلبه
حوراء : لتكوليلي راجع لسما
ناي : لا يانعل هلمره غير بنيه
حوراء : منو ومنين عرفها
ناي : وبديت اسولف كلشي لحوري وهي ساكته
حوراء : خطيه ولا عنده حظ ميخالف تجربه وعدت كولي همزين تلاحك لروحه
ناي : همزين تتوقعين ينساها
حوراء : ينسى ماكو شى مينسي الله يريح گلبه
ناي : امين
حوراء : خلي ننزل نسوي العشا وهم احظر شغلات رادها مهدي علمود الولد
ناي : راح انزل اساعدج
يونس : بقيت سوالف وضحك ويه الشباب كعدتهم حلوة وسوالفهم تضحك وركصهم خلاني شويه اغير جو بس بالي مابطل يفكر بشيار طلعت التلفون لكيت عمه هواي داكه عليه ومصطفى العامل وماكو اي اتصال من شيار دكيت على عمه طمنتها وكتلها يم ناي وهم رجعت دكيت على مصطفى وكتله اطلع باجر فتح واني اجي الظهر
ناي : بليل وكت النوم طلبت من مهدي انام يم يونس استغرب طلبي بس معارض نزلت يمه بغرفه الخطار
يونس : هااا شنزلج
ناي : اجيت انام يمك مثل قبل
يونس : وهذا الجابني طاير عليج جنت كل مااتأذه وانام اكعد الكاج يم راسي
ناي : نام ياعيون اختك وارتاح اليوم راح انام يمك فرشت قريب منه وسيف بصفي الليل كله اباوع عليه وهو غافي وادعي الله يريحه هذا الولد دومه معلعل وماشاف يوم عدل
كعدت الصبح وسويتله ريوك عمتي گالبه خلقتها بس ماحجت شى مبين مهدي محذرها
حوراء : راح يونس
ناي : لا بعده يتريك ويروح
وداد : وليش تسألين عنه
حوراء : يمه فزيت
وداد : وجع مو سألتج
حوراء : هيج غير اعرف اخاف انزع الربطه اعلي صوتي
وداد : تنجبين واطبين غرفتج مطلعين لحد مايولي
ناي : هزيت راسي ضايجه من عمتي سويت الريوك
وداد : اي عيني اترسي الصينيه ترس مال بلاش شعنده من البارحه اكل ونسه
ناي : شلت الصينيه وطلعت وايدي على گلبي لا يونس سمع همزين ملتهي ويه سيف يضحك ويتشاقه وماسمع صوت عمتي الي يجيب التايهه
كعدنا نتريك ونسولف دك تلفونه فز باوع عمه خوله
خوله : صباح الخير
يونس : هله عمه صباح النور
خوله : شوكت ترجع
يونس : شويه ان شاء الله وطالع
خوله : بلغ ناي بعد ٤ ايام السفر مالتي
ناي : فتح الحاكيه وسمعت عمه شگالت لزمني گلبي هم راح ترحين
خوله : شسوي تأخرت هوايه ولازم اروح اريد اشوفج گبل مااسافر اني اليوم راح ارجع لكربلا وقبل بيوم من سفرتي اجي لبغداد حتى ثاني يوم من الصبح طيارتي تعالي خلي اشوفج تجين لكربلا لو لبغداد
ناي : لا لبغداد اجي وهم اشوف شرهب
متكدرين تبقين بعد
خوله : لا حبيبتي والله مااكدر اجي ان شاء الله كل متصير فرصه اجي وهاي التلفونات سترت علينا كل ماتردين شى نتخابر
ناي : اوووف ياعمه كطعتي گلبي من كلتي على السفر
خوله : اسم الله عليج مو متجين
ناي : شون مااجي ان شاء الله على الموعد يمج
يونس : يله عمه خلي اتوكل كلها ساعه ويمج
خوله : لا يمه متلحك راح اطلع هسه وارجع فد يومين واشوفك انت دير بالك من دربك
يونس : ان شاء الله سديته منها وكمت
يله ارفع الزحمه اني تعبتج ويايه
ناي : هااي شنو الرسميات اول تالي تعال خلي احضنك دير بالك على نفسك حضنته وبسته وطلعنا بلباب
يونس : سلميلي على حوراء وكولي الها عاشت ايدها الزلاطه لهسه حموضتها بمعدتي حركت اهل اهلي بلجالي
ناي : ههههههه يوصل جان نسمع صوتها
حوراء : هم بعدك تحجي عليه متجوز
يونس : يابه كعد نمدح بأكلج
حوراء : عبالي اي هيج صير حباب وامدحني
ناي : عيني عليهم وعين على غرفه عمتي لا تطلع وتشيب راسنا وجان تكول حوري بكل جديه وهدوء
حوراء : يونس كلشي نعيشه هو لحكمه من رب العالمين واذا الله احب انسان ابتلاه خلي كولشي عشته جوه رجلك حتى تصعد اعلى واعلى لحد متوصل للي تريده والمصايب الصارت خليها تقوي گلبك مو تكسره ولتخاف ماطول ماتسوي شى حرام ولا تغضب ربك راح تتوفق حتى لو بعد سنين يجي يوم وترتاح المهم ما تيأس من رحمه الله ولا تقلل من نفسك ابد محد يستاهل تقلل من نفسك وتكره روحك وتلومها لخاطره حب روحك حتى تعيش مرتاح تره ماكو انسان كامل الكمال لله وحده واذا الله اعابك بشى اكيد فضل بيك شى ثاني كافي تنام وضميرك مرتاح هذا يسوه كنوز الدنيا ارجع لشغلك وحياتك ولتفكر بأي شى يخليك ضعيف محد يستاهل تنام وانت زعلان ماكو اهم صحتك ونفسك ابد لتضيعهم لان محد يستاهل تضيعهم على موده واذا بيوم صار جرح بسيط لزكه بتيب قبل مايمشي ويكبر
يونس : ابتسمت على كلامها ولمعة عينها وهي تحجي جن الحروف تطلع من گلبها مو من حلكها جاوبتها تيب مال فلوس
حوراء : هههههه اي شفاف حتى محد يشوفه ويلجمك منه
يونس : ان شاء الله مبين ناي حجت الها مادققت لان اعرف ناي علاقتها قويه بحوراء يجوز ضاجت علمودي وسولفت الها
ودعتهم ورجعت حسيت براحه والحمدلله
ناي : راح يونس وسدينا الباب وراه تعاي لج صايره متكلمه ماعرفتج
حوراء : شعبالج قابل ياهو اليجي يتكلم كلامي مال فلاسفه وعباقره ارسطو ميلحكني
ناي : امشي حوراء ارسطو ورانه شغل لا امج تطلع هسه وتسوينا نيوتن
حوراء : اي والله
خوله : رجعت لكربلا وبقيت يومين واليوم لازمه جنطتي حضرت كل غراضي راجعه للسويد كل مااكول تعلمت وهاي هيه ارجع لنقطه الصفر واتأذه
طبيت على امي جانت لازمه السبحه وعيونها حمره من البجي كعدت يم رجلها
عمشه : هااا يمه نويتي
خوله : مابيدي حل احبيبة لازم اروح طولت هنا
عمشه : هاااج رديت على شلاع الگلب والفرگه چا انه ياربي مامكتوبلي الراحه
خوله : فدوة لتبجين مو كطعتي گلبي
عمشه : وانه افادي متكطع عليكم انتي بجهه وذاك الماشايفه طوله بجهه
خوله : مو يخابر يايمه
عمشه : چا الالووو مالته تعوضني شوفته
خوله : كال بلكت تصفى اموري ويجي للعراق
عمشه : انه لون متت يخوله منهي يغسلني تعيفيني بيد الجناين
خوله : الرحمن من عمري على عمرج كون يومي گبل يومج لتكولين هيج عمرج طويل
عمشه : انه اريدنج وياي جن رويحتي تهفهف ومرتاحه عبن انتي موجوده
خوله : اجي وعيونج اجي كل ميصير مجال اجي حصلت الاقامه واكدر اروح واجي
عمشه : چا انه مكتوب على كصتي ماتضل وحيدتي وياي لا الوليدات كرباي ضال كل واحد بديره وناسين امهم وهاي انتي جملتيهه وياهم رايحه لاخر الدنيا
خوله : ابوس ايدج لتزيديها عليه الله شاهد گلبي نار ولو بيدي ابقى بس لازم اروح
خوله : توكلي بالله يمه محروسه بالله ومحمد واهل البيت مااريدن اعرضلج
خوله : اي يمه دخيل الله العرضه تخربط احوالي انطيني ايدج بستها وبست راسها وحضنتها افييييش ياريحتج يايمه كون انام بحضنج هيج العمر كله ومااكوم منه
عمشه : اصفكنج بعجل اطفي عيونج چا لويش موليه ماتضلين كارصيج من رجولج وفالته
خوله : يمه انفكت عموشه شيسكتها
عمشه : انه من لوعتي عليج لو بيدي اكضج واشدج ومااخلي رجولج تخطي عتبت البيت
خوله : رجعت حضنتها وبستها وطلعت
بديعه : هاااا خيه راح تعوفينا
خوله : شسوي هواي بقيت عينج على امي بدعه اعرفج متقصرين انتي بمكاني واني بس ارجع للشغل وتتعدل اموري ادزلج فلوس علاجها
بديعه :بعيوني عمتي تدرين بيه مااقصر وياها
خوله : والله انتي اصيله وبت اوادم الله يجازيج على تعبج وصبرج كل خير
بديعه : امين راح يضل البيت فارغ بلياج
خوله : حضنتها وسلمت على بان وبست بلال سمعت صوت الهورن يونس اجاني كال اني أجر تكسي مرجع لبغداد علمود الجنط ميريد اجي وحدي اخاف احد يتعرضلي سمعت الهورن وطلعت الغراض يونس طب ركض سلم على امي وبدعه وبان وطلع
يونس : يله عمه عفت بيبي تعيط تريدني ابقى
خوله : تعال الها خطيه من تشوفك ترتاح
يونس : ان شاء الله اجيها وابات يمها ليضل بالج
انذب ورايه الماي واكفه بلباب بدعه وبان وبعيونهم القهر ميعرفون اني ميته مو بس
مقهوره لان عايفتهم وصلنا بغداد جان وكت الظهر حدود ساعه بلوحده نزلنا الغراض
يونس : ناي بلطريق ورايح اجيب شرهب واجي
دخلت للبيت صالحه تطبخ وسما تنظف
صالحه : هلمره جنط هوايه بشريني راح تولين حتى افرح
خوله : اي افرحي وارتاحي رايحه واذا تردين اليوم يفوت على خير ومااحرك البيت على راسج واهجج منه لو تصعدين لغرفتج ومااشوف وجهج لان ناي وشرهب ويونس جايين يبقون اليوم يمي ياترحين يم اختج حتى راسج يبرد وراسي
صالحه : خوش والله اطرديني من بيتي
خوله : اممم بيتج مبين ورث غنيه موو
صالحه : جفي الشر ياخوله هاي المده كلها ساكته الج اكول اتحملها لان راح ترحين واخلص منج لا تخلين احط عقلي وياج واخلي هذا اليوم اسود عليج
خوله : يله حطي عقلج اريد اشوف شسوين
سما : يوم عفيه امشي نروح لبيت خاله بليه مشاكل
خوله : اي عفيه اسمعي كلام بتج واخذيها وروحي اعتبري روحج رايحه سفره واكعدي ويه تكچ وكصن بينا
صالحه : مو بكيفج شو اعناد مااطلع
سما : عفيه امشي اذا متجين اني اروح وانتي ابقي مااريد اشوف اي واحد منهم
خوله : بقت سما تعيط على امها تريد تروح لحد مقتنعت وهي طفت الجدوره وشالتهن بلثلاجه ولبست عبايتها وسما هم وطلعن
كيفت ماردتهن موجودات حتى لا يغثن البنات
ناي : طلبت من مهدي يجيبني اودع عمه وابات يمها وقبل وطلعنا وعمتي گلبت خلقتها ولا درت بال الها واخذت سيف وطلعت
وصلنا بغداد جانت عمه هستوها واصله فتحت الباب سلم مهدي عليها من وره خشمه وهي مبتسمه بوستها وكتلها عفيه لتتعاركين وياها
خوله : لج رعنه هسه اني حجيت فتحت حلكي شكد جبانه حرامات ماطلعتي عليه جان هسه مهدي يبوس برجلج امـداج ولا بيج خير بس راس دماغ ماكو
دك هورن وراح طبينا للبيت وعمتي جرت سيف تبوس بيه
هذا ابنج حقنه على ابوه غدي عائله تشل
ناي : مبقى شى وانشل عوفج منهم خلي اليوم نخلصه بحضنج من باجر طافره وعايفتنا
طبت شرهب ويونس
شرهب : وينكم ولكم هذا البيت صاير مو راحه كل مااطب اله هدوء
خوله : غير صويلحه هججتكم كلكم
شرهب : ماضل شى وتهج هيه هم منه فدوة عمه بداعتي خلي اني اكول الها على عمو عبيد اريد اشوف شكلها من تعرف هو متزوج يبووو يمكن ٧ ليالي احييها دك وركص
خوله : اياج تعرف منج اني بالي سالفه هاي مثل الحيوان المفترس من ينجرح يضرب ياهو الجان شيشوف كدامه يهمشه اكعدي مالج دخل اذا تعرف تهلس هاي شعراتج وتخليج كرعه حتى بليه كفشه تبقين استري على روحج
وهااك هذا التلفون
شرهب : مال منو
خوله : اشتريته الج اياج ياخذه هذا رجلج الخايس اريد من ادك الكاج خوما يضل يونس راح راجع عليج كلشي منعرف وهم حتى احس اني وياكم من صار كلكم عدكم اكدر اخابركم براحتي
شرهب : ولكم طكيت سولي درب صار عندي تلفون وحديث
خوله : مو تنطي مثل ماكتلج
شرهب : يااشحده غير اگلبها عزه عليه
خوله : اي بس انتي تفوخين گلبي هاي النعجه الثوله اختج ضاله لا تحجين على مهدي لتسمعي گلمة تتراجف منه
ناي : اي غير رجلي ياعمه
خوله : من عمه لعماج لج الرجال اذا ميحس مرته عدها شخصيه يدوسها بلقندره لازم يحس بيج عندج رأي وزعلج يحسب اله الف حساب مو ضاله تفرين براسج ولا فهم ولا علم بس تتراجفين تخافين على مشاعره وانتي ماعندج مشاعر مسويلها رفع مثل المراره اااخ محد راح يطك مرارتي غيرج
ناي : اليوم عمه شاده حزامها عليه
شرهب : اكلكم تره اني حامل
خوله : هاااا بلخير حبيبتي تعاي ولج راح تصيرين ام وانتي من اجيتي تكمزين
ناي : الف مبروك حضنتها وبستها همزين لهيتي عمه عني
خوله : سمعتج تره وماالتهي عنج لحد مااطلع گلب الج
ناي : هههههه نسخه بيبي الثانيه من تريد تسمع
بقينا سوه ناكل ونسولف للعصر اندكت الباب طب عمو جوحي اني وشرهب صعدنا منريد نشوف جهرته ويونس كال رايح ساعتين للمحل اشوف شون الشغل وارجع
خوله : هااا ابو مرتضى خيرك جاي تودعني
جوحي : اي سمعت بيج مسافره باجر
خوله : بأذن الله خيرك كول
جوحي : اني فكرت هوايه وكلت ليش مااجازف مثلج واشغل فلوسي عند هذا الرجال الكلتي عليه اني سألت هواي كالو اكو هيج ناس تشغل فلوس وينطون ارباح انطيج جم فلس وشغليهن كتجربه ونشوف
خوله : ومنو كال اني اقبل لا عيني لا تورطني وياك فلوسي اذا راحن عادي بس فلوسك شيخلصني مالي دخل ولا اخذ دينار منك
جوحي : هااي شبيج هنه كلهن ١٠ ورقات
خوله : هااا ١٠ لك ذني الي تكول عليهن فلوس عطر هناك ميجيبن نكعهن واشرب ميهن
جوحي : انتي مو تردين تنطين ٥٠ انطيج ٢٠ مو ١٠ يعني يصيرون ٧٠ كدام الرجال ومن ينطيج الارباح انطيني من حصتي واذا صار عليهن شى فلوسج يمي اكطعهن منهن وبهيج ضامن حقي
خوله : ماتنلعب يبن ابويه
جوحي : شعبالج لازم اشوف بعيني يله اصدك وبنفس الوقت مااذب فليساتي بلشط
خوله : قصدك فلوس الحواسم
جوحي : ياحواسم صار سنين وراحن وانتهن ذني فلوسي وتعبي بطرانه ضلت حواسم
خوله : شوف اني مراح اردك خليهم ٢٥ ورقه اني مو منطيتك ٢٥ اذا صار شى على فلوسك اخذ ال٢٥ الي يمك وبهيج ماخسرت ولا فلس
جوحي : خوش حجي هاج اني جايب ال٢٥ كلهن
خوله : مو تكول ماعندي وبجيت ولطمت من اجيتك
جوحي : دين شبيج نطيتي دين من صديقتي
خوله : دين رشوه بوك هذا الشى مالتك مو مالتي جيبهم وشيصير نبقى على اتصال
جوحي : اروح اني توصلين بلسلامه ومااوصيج ويوميه اخابرج حتى اطمن
خوله : ماشي
ناي : نزلنا بعد ما راح جوحي وبقينا كاعدات ويه عمو وحدتنا استلمتها استلام مابقت مره ترزل ومره تنصح واحنا كلنا اذان صاغيه الها حتى يونس مافلت منها وبقت توصي مر الليل بسرعه وكلنا بحضنها واجه الصبح
لحظات صعبه علينا من نفارك الي نحبهم عمه خوله اجت بمده بسيطه گلبت الحال كله وسوت اساس النا قوت يونس وقوتنا وياه
جانت كلماتها الاخيره وهي واكفه بعتبت الباب وادموعنا تصب تزرف گلبنا لان هم راح تبتعد عنا بس الي مطمنا صار وسيله اتصال بينا
حضناها وكل واحد بينا جن يودع امه مو عمته هاي الانسانه الله دزها النه بوكت صعب وتمنيت بيوم زواج شرهب موجود مجان هسه تزوجت ولا جان هواي امور صارت بينا بس نرجع ونكول كله مقدر ومكتوب ذبينا دولكه المي وراها وننتظر اليوم الترجع ونشوفها اخذها يونس للمطار
بقينا وحده صافنه بوجهه الثانيه حضنت شرهب واجه مهدي وصلها لبيتها واني رجعت لديالى
خوله مثل الاعصار اجت بسرعه وراحت بسرعه بس وره كل اعصار من يهدأ اكو خسائر وامور اتهدمت وهاي الخسائر وكعت على راس صالحه وساهره وهذا الي صدمنا كلنا محد توقع عمه هيج مسويه شوكت وليش محد يعرف لحد ما گبت العيطه
خوله : وصلت للسويد رجعت للوحده والجو الكأيب والبرد بلجو والمشاعر مااكدر ارجع للعراق لان اعرف أذيتي هناك اضافه بلسويد اكدر من خلال شغلي اساعدهم هناك بلعراق شنو الي اشتغله حتى اساعدهم اي شغل للي مثلي ماكو لهذا بقائي سيف ذو حدين
رجعت ال٢٥ ورقه لنجم وبقيت ٢٥ عندي
دورت على شغل وقدمت وكدرت ارجع اشتغل وره ٢٠ يوم من وصولي دزيت لجوحي من ال٢٥ ورقه الي انطانياهم ٥ ورقات وكتله هذا ربحك كيف وطار ومصدك
رجع دز ٥٠ ورقه وره كم يوم اني هم انتظرت عشرين يوم ودزيتله ١٥ ورقه وكتله ربحك وبعد كم يوم هم ادز انتظرني كمت اطمع بيه اعرف هو طماع والطماع مستحيل يقبل بلقليل
دخلنا ٢٠١٠ بشهر الواحد بدايته خابرته وكتله اني انطيت للرجال دفترين ودزلي ربح منهن ٧٠ ورقه وهو سمع هيج كام يلطم
جان يكولي راح احولج ٥ دفاتر وبما ان التحويل ياخذون فلوس هواي وضربه جان يحولي عن طريق واحد يمنا بلسويد واهله بلعراق يشتغلون مثل الصيرفه بس بطرق مختلفه وياخذون فائده اقل وهم مابيه ضربه جوحي ينطي ال٥ دفاتر لاهل الولد والولد الي بلسويد ينطينياهم جنت انتظر فلوس جوحي والوب حتى الليل ماانامه اخابر يفكس ويخرب كلشي
واخيراً استلمت الفلوس كمت وقفلت تلفوني ٣ ايام حاطه فلوسه كدامي والعب بيهن واضحك اتخيل شكله وحسره گلبه عليهن رابع يوم فتحت التلفون وركع اتصالات ابد مافتحت الخط عليه عفته يتلوع بلساعه الوحده يدك بين ٥٠ مكالمه وخالته صامت ومرات انطي رفض حتى اخلي يكمز ونجم يهز بيده ومراضي على سوايتي وكل مايفتح الموضوع اسده مااريد احجي اريد استمتع بحركت اعصابه
لحد خامس يوم من استلام الفلوس اجاني اتصال من تلفون بدعه جاوبت طلع جوحي يعيط عرفت رايح لكربلا حتى يخابر لان يعرف مااجاوبه بقيت احجي وياه واحرك بدمه ردت منه يكول لساهره بسالفه عبيد وسديته منه وعفته شايط لله
نجم : بله هاي سالفه من كل عقلج وعليش هاي الهوسه كلها والدوخه وصار شهرين ونص احتركتي حرك ودز وروح وتعال تلفون صغير من اي احد يخابر صالحه ويكول الها رجلج متزوج وفضت شنو هاي افلام الاكشن العايشه بيها
خوله : ادري مااكو اسهل منها ابلغ صالحه اني مااريد هيج اني اريد تطلع من جوحي حتى يتخاربون لان اذا طلعت مني عبيد وحتى صالحه راح يلزموني من ايدي التوجعني وراح يأذون يونس اني اريد ابعدهم عنه ومو بس هيج اريد الوع گلب جوحي على فلوسه اريد اخلي الليل مينامه مثل ما يونس جان الليل مينامه وهو بلشارع يعني بربك اخوك السكط ملايين جواه وبيت عنده من شاف عبيد ذبه بلشارع ميكدر ياخذه يمه شو حتى بنات ماعنده حتى يخاف عليهن من يونس بطرك هلولد يكعده ويه ابنه بنفس الغرفه ويحافظ عليه بس هو عاار وسكط سنين نايم على فلوس وابن اخوه يبيع كلينكس ونايم ويه شرابين العرك وبهاي دكته لازم احرك گلبه اعرف دربه مايجي بلنسوان مو مثل عبيد هذا بخيل مايصرف على بيتين كلمن اله نقطه ولزمتهم منها عوفني امخمخ براحتي
نجم : كولي بلغو صالحه مجبوره ترجعين فلوس جوحي
خوله : لا عيني لا مو بهاي السهوله خلي تعلك على صالحه بالاول وبعدين اطلب الطلب الثاني
نجم : ياطلب يمعوده والله كمت اخاف منج شناويه
خوله : ماارجع فلوسه اله يطلك ساهره
نجم : لا بربج صدك تحجين
خوله : بكيفه يريد فلوسه يطلك ساهره وترجع اله مايطلك احركهن كدام عينه ولتخاف صوت اخوك وفرفحته راح يخلي مو بس يطلك ساهره يشعل اهل اهلها
نجم : كولي هم طلكها وراها
خوله : ارجع فلوسه لان مااريد يأذي يونس
نجم : ماسويتي شى هم راح يرجع ساهره لذمته
خوله : خلي يرجعها مو اني شراح اكول اله تطرد ساهره من البيت ومرتضى ياخذها للبصره مو انت واذا سمعت باقيه احرك فلوسك لك عيني لازمته من روحه متعرف هسه هو شيحس ميت والقران واشرط هم يبقيها شهر يم اهلها يله ادز فلوسه بهذا الشهر ساهره راح تنجن ومن راح يرجعها لذمته مراح تكون ساهره الاوليه الي گلبها على جوحي واطمطم اله راح تعرف قيمتها زين وشون بحركة بسيطه شمرها بلشارع وطلكها راح ترجع حاقده وراح هي تكوم تبوك بيه بعد مجانت ساندته يعني زرعت بينهم الشك والخراب وبهيج حال ساهره هي ادمر جوحي وتنعل يومه وبهذا الشهر هم ابعد ساهره عن صالحه لان كل وحده راح تحير بمصيبتها مااريدهن يتفقن سوه على عبيد ويلعبن على اشواق
ساهره راح تكون حايره بمصيبتها واني هم اخابر ساهره اشعلها زياده على رجلها لا اخليها تكرهه كرهه العمى وترجع وهي متحلفه اله واني ارجع فليساته ومرته هي تحير بذاك الوكت شون اطيح حظه اما صلوحه هاي راح تلعب جقه شبر عليهم وخاصه عرفت البارحه اشواق حامل خابرتني وبشرتني يعني عبيد مراح يطلكها وراح تعلك للستار واني اكعد واحط رجل على رجل واشوف شون واحدهم مدمر بيته
نجم : ليش كل هذا ياخوله اني بعدتج عنهم تجين برجلج للمصايب ليش
خوله : لعيون اليتيم النام بلسجن والشارع لعيون الطفله النامت جوه رجال شكبره وتحملت رجال بخيل حقير وانحرمت من دراستها لخاطر عيون ناي الي انحرمت من احلامها وعايشه ويه رجال يادوب يباوع بوجهه وعمه متخاف الله ليل نهار تهين بيها وتعيرها ومسويتها خدامه لعيون امي الي وره كل هذا التعب والضيم وسنين القهر كسروها وضلو يتفرجون عليها والغريب يصرف عليها ومحد دك بابها وكلها يوم محتاجه شى
انت بلذات يانجم اسكت ولتلومني لان انت هم ماحافظت على امانه ذكرى وخنتها وهربت بروحك وعفتهم يتلطمون بلدنيا وحدهم اذا همه ماكدرو ياخذون حقهم اني اخذه
عفته وكمت ومنتظره جوحي يسوي الاريده
عمشه : لك يمه تهدا بالله هاي اخيتك
جوحي : هي لو هنا اضل ساكت لا اذبحها جوه رجلج هاي الساقطه تلعب عليه اني لكم اني الي ملفلف السوك كله على ايدي
بديعه : على كيفك ابو مرتضى هسه ترجعهن
جوحي : هاي جلبه ونذله واعرف مترجعهن
عمشه : يايمه انه اخليها ترجعهن بسك مداهر وياها
عافنه وطلع وهو متخبل
عمشه : شفتي انه عرفت هاي البت مسودنه ماتجوز اله تخربه
بان : والله زين تسوي عمه عفيه سباعيه كون اصير مثلها
عمشه : كضي لسانج لا اجسر ضلوعج چااحنه محروگين ومشعوله ابهاتنا وهاي تريد تصير مثلها من لطم وحمس بهلوجهه المعنفس
بديعه : عوفج من بان عمه شنسوي بسالفه خوله وجوحي
عمشه : خابريليها اريدن انعنع ضلوعها ماجازت اله حركتنا
بديعه : خابرنا ومتشيله مبين صدك ناويه على كارثه
عمشه : يبوووو وليداتي تذابحوو انه وين انطي وچهي ماتهود خوله اله تشعلها
جبيره علتي ومامش طبله
وعلي دنياي متحزم طبله
تدري الناس ياهو الي طبله
ابليس وخرب الخي وي اخيه
بديعه : على كيفج عمه لتعيطين لتتخربطين وين نحير بيج هسه
عمشه : للكبور اريدن اولي للكبور عبن ماضل مجان ارتاح بيه ودوني ودفنوني ماضل شى بيه من قهرهم
خوله : انتظر يومين ورجع خابرني جوحي ويعيط ويفشر حتى كفر كام يكفر وما فاد قفلت عليه وراح لساهره وبلغها
اني انطيت خبر لاشواق بأن راح ابلغ صالحه حتى تاخذ حذرها وهي كيفت لان متريد تبقى بلسر ويتختل عبيد ويجيها وخابرتني اشواق
اشواق : كاعده ويه عبيد ومنتظره جيه صالحه هو حس بيه مو طبيعيه واروح واجي ومتوتره
عبيد : شبيج صاير شى
اشواق : هاا لا مصار شى بس مشتاقه لامي اريد اروح الها
عبيد : مو وكتها اجيتج مشتاق الج
اشواق : اريد اكلك شى
عبيد : مو وكتها تعالي
اشواق : اوكف لازم تعرف اني حامل
بقى صافن بوجهي كلت راح يعيط ويتخبل شو هذا كيف وضل يبوس بيه جان تندك الباب تريد تتكسر عرفت صالحه
ركض عبيد يفتح الباب ويعيط ياهو منو هذا اليدك هيج جان اطب صالحه وكل عيطه مال عايقه گلبت الامه يريد يلزمها عبيد ميكدر وياها بنيه ومره ثانيه يمكن هاي اختها ساهره اني ركضت للغرفه وقفلت الباب عليه خفت يگتلني ويأذن بطني بس اسمع كلامهم لان صوتها يسمع بغداد كلها تلطم وتفشر وتعيط
صالحه : لك اني تتزوج عليه ياحافي ياابو الوصخ لك اني السويتك ادمي اني الخليت الك قيمه بين اخوتك
عبيد : انجبي وامشي رجعي للبيت هناك نحجي شجابج هنا
صالحه : بفلوس ورثي فاتح بيت الها وتكول فلوسي راح يشغلوهن الي اليوم احركك واحرك اهلك والبيت عليك يبووووووووووو
لك تالي عمري تنزل عليه ضره يبووووو يلخايس الي اني مره ارجل منك صاير رجال وادور نسوان وتتزوج عليه
ساهره : هاي تاليهه يبو مهند مو عيب عليك بشنو قصرت صالحه
عبيد : انتم منو كلكم
ساهره : جوحي كاال والله تخبلت من عرفت
عبيد : امشن طلعن بره وجاي وراجن واني اله الجوحي الگلب
صالحه : اليوم اذبحك واذبح مرتك الكحبه الساقطه ام الزلم لج وينج تفترين على رجلي لج الاقوى منج دستها بقندرتي وخر من دربي اليوم افضحكم فضيحه
عبيد : كافي صوتج لميتي الجيران علينا
صالحه : وينهم تعااالو تعاالو شوفو هذا الرجال الكواد لميته من الزبل جان عتاك وتحملت ضيمه وفكرة وريحته الجايفه وتالي يتزوج عليه تعاالو شوفو هاي الي لامه من الشوارع وجايبها ضره عليه ومكعدها بفلوسي
اشواق : بس اسمع الطاب والطبيب منو يضرب منو ماادري واشياء تتكسر حسيت البيت كله تفلش والباب كسروها عليه مابقن فشار يعتب عليهن عليه وعلى عبيد وعاط حييل عبيد مدري بشنو ركعته وساهره تكولها ولج غرك بدمه خفت اطلع واشوف شكوو بقيت محبوسه بس اسمع ونين عبيد يعني بعده عايش هاي شسوت عزه
لحد ماعاطت صالحه على بتها وكالت خابريلي اخوج هسه يرجع يشوفلي حل لا احرك ابوه والبيت واسوي الماسوته مره
اريد مهند باجر اريده يمي
حطيت اذني على الباب واسمع صالحه تحجي وتبجي وتعيط وعبيد هم يعيط يريد يطلعهن بس مكعد يكدر الهن
لك يمه مهند تعاااال الحك امك ابوك اتزوج عليه ابوك الناقص سواها وكسرني
باجر تجي واله وروح اخويه احركه واذبحه
يتبع .....