#الابواب_الخمس
البارت السابع عشر /الجزء الثاني
للكاتبة Reem
(بارت طويل لعيونكم )
وين افضفضها حسرتي
ابيا مسامع
خاف افزّن والگه جرحي
معلّگ بروس الشوارع
وصلنا للمنطقه الكالو عليها مانندل خابرنا عليهم طلع عمو فلاح وصف لمهدي اول مطبكنا بلباب من حلات روحي ممصدكه شمرت سيف على مهدي ونزلت اركض بدون ابني بدون اي غراض نزلت بروحي اركض حتى على عمو فلاح مسلمت وهو بلباب طبيت ركض وجان اشوفها كدامي وركضت ابجي فتحت ايدها اليه ونزلت دمعتها من شافتني لج عمه رجعتي ممصدكه شمرت نفسي بحضنها واعيط وابجي
خوله : ياروح عمتج وعيونها
قبل بيوم ..
بديعه : جنت اشتغل اكنس ومخبوصه والاكل على النار ساعه ١١ الصبح منطقتنا ما مبلطه وكلها تراب لازم يوميه انظف واكنس واغسل حتى نكدر نكعد اليوم بان مداومت وملتهيه ويه بيبيتها
دك التلفون مبقي فلاح يمنا اخاف نحتاج شى يصير شى وخال رقم صاحبه بلتلفون شيصير اندك عليه ركضت كلت اخاف فلاح لو ناي لان تخابرنا هوايه
اباوع رقم غريب هذا مال منو جاوبت واسمع صوت خوله اخترعت هذا رقم منو
خوله : مو وكتج دليني بيتكم
بديعه : شأدلي خوله انتي وين وهذا مو رقمج
خوله : اني بكربلا بس مااندل عنوانكم زين
وهذا تلفون ابو التكسي هاج دلي الطريق وهاا لتكولين لامي اني اجيت اخاف متقبل اشوفها خليني اني ادخل عليها
بديعه : لج خلي استوعب انتي صدك بكربلا لو ناصبه عليه
خوله : مو وكت ثولج بدعه هاج الرجال دلي وبعدين اصفني وفكري وشتردين سوي
بديعه : حجيت ويه السايق ودليته لهسه مامستوعبه جيه خوله عفت كلشي من ايدي دكيت على فلاح حتى يجي وبقيت بلباب كل شويه امد راسي وبلال يطلع واطببه اخاف عليه وهو طول ميشوفني بلباب يوكف يمي مطبيت للبيت ولا حجيت ويه عمتي مأمنه بان يمها
وره اكثر من ربع ساعه طبكت تكسي بلباب وجان تنفتح الباب ونزلت خوله من شفتها مصدكت جن رديت لذيج الايام التجمعني بيها خوله اعتبرها اختي واكثر وحده من تظلم الدنيا بعيني اشكيلها
حضنتها حيييل وابجي ممصدكه
خوله : لج اوكفي خلي احاسب الرجال
بديعه : من گلتي بكربلا مصدكت كلت ناصبه عليه
خوله : هههههه خوش مفاجأه مو
بديعه : احلى مفاجأه
انطت الكروه وسحبت جنطها وطبينا حضنها بلال ويصيح عمه
خوله : توقعت نسيتني بلبل فدوة لوجهك الحلو تروحلك فدوة امك الجلبه ساهره وحضنته وهو مكيف
بديعه : تعالي ارتاحي خلي اكول لعمتي ردت اكوم سحبتني وكعدتني
خوله : لا اني اريد ادخل الها بس انطيني مي ريگي نشف وعمتج هسه تكملها وتنشفه اكثر
بديعه : ركضت جبت مي الها شربت
خوله : وين غرفتها
بديعه : ذيج
بان : بيبي عفيه ركزي ويايه شلعتي گلبي
عمشه : من احترك ابو اصلچ چا انه مركزه انتي مابيج حظ وماتعرفين تحفظيني ضاله تجوعرين
بان : هاي فوكاها اني علمودج مرحت للكليه حتى احفظج وانتي تحجين عليه ومعاجبج
عمشه : دهر الدهرج چا انه من صباحيات الله اسمعنج تگلين لامج وجعانه ومالج حيل ترحين للمدرسه شنهي يعياره تذبيها براسي
بان : وين سمعتي يمه مو اذن شون سمعتيني
عمشه : چا انه النمله لون تزحف اسمعها تجين انتي بزر بزري مااسمعنه حفظيني زين لااجسر ضروسج بحلكج وانعل شيب اهلج
بان : انتي تنسين يابيبي والله حسي راح من وراج وثاني شى اسمها كليه مو مدرسه
عمشه : گلها مجان تعلمون بيه وتاليها يايطلعون مطي مثلج يافهيم مثلي
بان : انتي ميعجبج العجب شون حفظتي ذنيج السور ماادري الله يساعدها لعمه ذكرى الله يرحمها شكد عانت وياج
عمشه : الف رحمة على روحها ذيج مي بارد ينزل يهلهل على الگلب بتموز چا تحير شون تحفظني موش مثلج غبره انه همي الوليدات الراح تعلميهم انه متوكده مابيهم واحد فهيم كلاتهم مطفين واهلهم يجون عليج يكطعوج دكطع عبنج زوملتيهم هو واحدهم ملطم الخمسه من العشره مايوجد بيهه وتجي معلمة هبشه وتجوعر مثلج هاي هيه ضاع وتسرسح عمرة
بان : خلي اتخرج واكعد واكابلج بلبيت ولا ادرس اليوم ثبتت اني فاشله ومااافهم وغبيه ارتاحيتي بيبي
عمشه : افييش چا هسه ارتاحيت جني كتلت صالحه بنعال وفوخت كلبي يله يلمدوهنه عيدي حتى احفظ زين اليوم ماتتحركين منه اله احفظ
بان : بديت اقرا وهي تقرا ورايه جان تنفتح الباب واطب عمه خوله اني حطيت القران من ايدي على الجربايه وعطت ممصدكه شفتها وابوس واحضن بيها
خوله : حاضنه بان وعيني على امي الي من شافتني هي فزه وهي وكعت دموعها على خدها اعرف بيها گلبها نار بس تكابر دارت وجهه عني
بان : شلونج عمه متوقعت بيوم ترجعين
خوله : رجعت فتره واروح
بان : يعني متعيشين ويانه
خوله : مااكدر اجيت اكمل جم شغله واروح
بان : هله بيج عمه
خوله : توجهت بأتجاه امي وهي وجهه للجهه الثانيه نزلت يم رجلها اباوع عليها شون تعبانه مو عمشه الي تلاسن وتضرب وتعيط دنكت لزمت ايدها وبستها جان تسحبها مني
نزلت دموعي قهر واشتياق الها
مكافي احبيبة مكافي ١٥ سنه متحجين ويايه ماحن گلبج عليه ماانقهرتي على وحيدتج
عمشه : وحيدتي گتلت اخوها بيدهه ويتمت بزرته چا شون يصفه گلبي عليها كومي يخوله مالج مجان هنا
خوله : لا الي ومكان جبير هم بگلبج عبالج ماادري بيج واخويه مو اني يتمت جهاله وموته سوالفه هي الوصلته للكبر تعرفين بيه شكد مأذي وشسوه بلمرحومه
عمشه : مافكرتي بوكتها بزرته منهو ليهم
خوله : لا مافكرت لان اعرفه الله يرحمه لو عايش مجان صار اب زين الهم يمه وحق هذا القران اليمج السويته من قهرتي على ظلم المرحومه ابنج كتل روح فقيره وطاهره
ومالها كل ذنب والاكبر منها مااهتم انتي مايوم كعدتي ويايه وافتهمتي مني تدرين ابنج موت ذكرى وانهزم للبصره هناك شجان يسوي جان يروح لكحاب ويتونس ويه جاسم يعني البنيه ماعابره اربعين مالتها وهو سبب موتتها مادار بال خلصها ويه الموزينات واذا متصدكيني اسألي ولدج اني بأذني سمعتهم
وحده مثل ذكرى ماشفنا منها بس الخير والكلمة الطيبه وبعدها بأول شبابها اجت من الخير للطهاره وراضيه وساكته وحامده الله وشاركته ومتحمله الفقر وهي بت خير وفوكاها تحملت بت رجلها وخيانته ويه وحده صايعه من الشارع وحاطتها على گلبها واعتبرتها مثل بتها ليش تموت ظلم وفوكاها تنطعن بشرفها الله يقبلها ابنج بعده دمها مابرد وهو يتگلب من حضن لحضن ويه نسوان مايوصلن لاضفرها بيا شرع هذا حلال
يمه انتي مره كمتي تصلين وتخافين الله اني ماحجيت غير الحق
فوزي هو الكتله لان شاف الظلم بعينه مااكول الج ما متندمه اكيد تندمت لان مهما كان اخويه بس صمد لو عايش واني اشوفه يتزوج ويجيب مره لجهاله تشمرهم بلشارع واكيد هو مراح يدير بال تعرفين بيه شكد اناني ويحب نفسه اكيد بذاك الوكت اني الراح اكتله بيدي كل الصار مو اني اتحمل ذنبه كلنا نتحمل ذنبه كل واحد بينا شايل جزء حتى انتي يوم ماجبتي بنيه صغيره لا من ثوبنا ولا حياتنا وقبلتي تسوين سحر الها ولاهلها وخليتي بيوم وليله تجي لبيت كله حيايه لو عايفتها جان هسه يمكن عايشة حياتها ويه انسان يستاهلها ومستقره مجان سكنت الكبور
عمشه : چايه مناك ليغاد تنبشين بگبل
خوله : مو اني انبش انتي يمه انتي الي لهاي اللحظه ناسيه اني منو وشعانيت وشنو الشفته بحياتي ومتذكره شى واحد شون خوله حجت الحق لفوزي وحملتيني كل الصار
ناسيه صالحه وساهره وسحورتهن وشون راح مستقبلي بيوم وليله خلني مخبله ومااندل دربي وتزوجت رجال بكد ابويه شبعت كتل منه ويوم ماصحيت وخلصت من ضيمه وشفت حياتي وكلت هاي هيه فرجت ماارتاحن اله خربن كلشي وفوكاها قبل بيوم من حنتي وهجمن الباقي من حياتي ولهذا يومج اعاني من مرض لو ناسيه ولدج الميخافون من الله شون ظلموني يعني ماكفاج كل العشته تجين هسه تزيديها عليه
اله اموت واندفن بصف صمد عود بذاك الوكت تعالي نوحي عليه
عمشه : من خفت لهلسان عساها بنات غنيه يومج اطول من يومهن
خوله : ابتسمت والدمعه بعيني ودنكت رجعت بست ايدها يمه اريد حضنج اريد اشم ريحتج الفوطه مالتج من كثر مااشمها حتى ريحتها راحت
عمشه : يافوطه وتباوع صفح على خوله
خوله : فوطتج قبل لا اسافر اخذتها ومرات اشتاقلج اشمها لو من يوجعني راسي اشده بيها حتى احس راسي بين ايدج تفركي مثل مجنت صغيره من اتمرض تحطيني بحضنج وتفركين راسي تذكرين احبيبة
عمشه : انه گلبي رچيج ميلي مني
خوله : اروح فدوة لگلبج احلفج بكلام الله الجاي تحفظي انسي الفات ورجعيني بحضنج يمه تعبانه وخايفه اموت وماراضيه عني
عمشه : يايمه بسچ مو مردتي افادي شجرالج
خوله : شمرت نفسي بحضنها وابجي وهي حضنتني
خوله : انتي بس ارضي عليه وكله يهون سكتت واباوع على عيونها تصب دمع بست ايدها ودنكت ابوس رجلها
عمشه : كومي يمه الله يرضه عليج كومي تعالي اشمنج واحطج برويحتي عبن انه گلبي موجر عليج
خوله : واخيراً امي اخذتني بحضنها بقيت ابجي مثل الطفله اشهك ممصدكه اني حاضنتها باست راسي وبقت حاضنتني
بديعه : واكفين نبجي مامصدكين واخيراً بعد ١٥ سنه خوله رجعت لحضن امها وعمتي رضت عنها جان حلم مامتوقعين ترضه بس الظاهر عمتي مشتاقه الها ومكدرت تقاوم وخاصه هاي الاشهر الاخيره كل متخابر خوله تكولي افتح الصوت خلي اسمع حسها ولا تگليلها انه اسمع جنت اضحك على سوالفها لان ادري بيها مشتاقه الها وبالها يمها
بديعه : يله كافي بجي خلي اخابر البنات ويونس يجون
خوله : لا خليها باجر طريقهم بعيد راح الوكت عليهم واخاف يجون يستعجلون ويصير شى لا سامح الله وهم ارتاح اليوم لان اريد اعرف كلشي صار اريد بال صافي ومرتاحه مسويه اكل مشتاقه لاكلج لو ندز من بره
بديعه : مسويه تمن ويابسه (فاصوليا)
خوله : اي ولج حيل مشتاقه اكلها اكوم اسبح بين متكملين
عمشه : يمه اخيج شونه لويش مارد وياج
خوله : زين ويسلم عليج هوايه منكدر اثنينا لازم واحد يبقى حتى اخاف يصير شى يسد بمكانه
بديعه : تأخرتي هوايه صار ٤ سنوات
خوله : شسوي بين مطلعت الاقامه مال السويد واستقرينا وكملت اموري واشتغلت يله كدرت ازوركم براحتي
اكوم اسبح واجيكم
بان : عمه محلووة وبيضانه راجعه شباب
عمشه : صلي على النبي يلمدهربه
بان : قابل احسد عمتي
خوله : وحتى لو حسدتيها فدوة الج تعالي لحضني مشتاقتلج
بان : والله اني هم كلش وبستها
بديعه : عوفي عمتج تسبح حتى نتغدا
خوله : طلعت اشوف البيت وحالهم وافكر بوضعهم وضع امي
بان : هاااا بيبي نعوف القرايه
عمشه : ولي من وچهي اليوم عمتج هنا
بان : همزين اجت خلصت
عمشه : ماتخلصين يبت بدعه اكضج وين تولين غصب عنج تعلميني يلخوثه يلمابيج دفع ونفع
بان : هههههههه اي عفيه مابيه كلشي اودعناج وطفرت اركض
مكيفه بجية عمه
بديعه : جنا طايرين برجعتها وفلاح اجه فرحان من شافها كعدنا كلنا على الغدا وعفناها براحتها نامت وارتاحيت اليوم خلصته نوم لان سفر طويل
ثاني يوم من الصبح خابرت عليهم حتى يجون مثل ماخوله مشتاقه الهم اني هم اما ناي صار سنين مشايفتها نتخابر تقريباً يوميه بس مشايفتها ولا شايفه ابنها
ناي : حاضنه عمه وممصدكه ابوس بيها
خوله : متغيره وكبرانه وصايره تخبلين
ناي : وين اخبل شحالني انتي الصايره گمر شونج عمه صحتج
بديعه : من شاف خوله نسه بدعه
ناي : كمت وحضنت عمه وهم بوستها وبوست بيبي وبان الكل مشتاقه الهم
خوله : رجلج وين وابنج
ناي : هااااا نسيتهم يمكن بلسياره بعدهم طب عمو فلاح وكال رجلج يكول خلي تجي تاخذ الغراض اريد اروح ردته يطب مقبل كال مستعجل
ناي : طلعت وعمه طلعت ويايه هو شاف عمه انگلب وجهه
مهدي : اخذي سيف والغراض باجر اجي اخذج
خوله : مبين خوالك ماعلموك السلام
ناي : نزل مهدي من السياره وبقى واكف بمكانه اني كلت راح يتعاركون
مهدي : الْحٍمَدٍ للـّہ على سلامتج
خوله : الله يسلمك ماشاء الله جنك نسخه ابوك بس الفرق ابوك صاحب ملكه انت وجهك مگلوب
مهدي : محتاجه شى ناي
ناي : هاااا لا حسيت مهدي عطب من الاعصاب تقربت منه عمتي وراحت بلجهه الواكف بيها
خوله : اعرف بيك كارهني وحالك حال امي مشيلني الذنب هيه جانت مشيلتني ذنب صمد وانت مشيلني ذنب ابوك الله يرحمه
خلي اكولك شى وحطه بالك
مهدي : مااريد افتح هيج مواضيع هاي بت اخوج يمج وباجر اجي اخذها
خوله : لا تسمع وتسمع زين وفكر بكلامي
ابوك جان زلمه حوك مايرضى بلحال المايل وجانت اخته بعزيت روحه وسبحان الله انت لو تشوف حالك هم عندك اخت وحده واكيد بعزيت روحك لو بيوم زوجتها وره مده ماتت شراح يصير بيك
مهدي : شلج بهذا الحجي عمرها طويل
خوله : شفت شون انقبض گلبك متحملت حتى مجرد افتراض عاد ابوك دفنها بيده وهيه بعز شبابها وعافت ٣ جهال وراها
مهدي : اثنين
خوله : لا ٣ شرهب جانت عزيزه على ذكرى وتنومها بحضنها وتعتبرها قطعه من روحها ولو عايشه جان هسه شرهب تصعد وتنزل بلنفس وياها وحالها حال ناي اذا مو اكثر لان اعرف ذكرى حنينه وطيبه واكيد تعوض شرهب حنان الام بس مع الاسف هو هذا الزين مايحوي غير الگبر المهم نرجع لموضوعنا لو اختك حوراء الله يحفظها مااريد افاول على البنيه صار مثل ذكرى راح تنام مرتاح تكدر تعيش عادي وتنسى كلشي اني مسويت شى غير حجيت الحق وابوك لان يحب اخته مارضى تنام بكبرها مظلومه
مهدي : بس لو ساكته جان هسه عايش واخوج هم عايش من حجيتي دمرتي كلشي
خوله : تره هو كلشي مدمر من اساسه اني مادمرت شى مشكلتكم كلكم تحبون اتذبون اللوم على واحد وتشيلو كل اركان المصيبه حتى تقشمرون نفسكم وتنامون مرتاحين مثل امك الشايله واحد من الذنوب واكيد فهمتك خوله ساس البله كله من وراها هي لو ساكته جان فوزي عاش ومنو يكول يعيش يجوز الله ياخذ امانته بغير طريقه يندعم يصير سكته قلبيه من القهر ويموت ليش تحسسوني الموت بيد البشر مو بيد الله
كلمن ويومه تعددت الاسباب والموت واحد
مهدي : امي شعليها
خوله : لا عبالك امك فقيره وماتشيل ذنب المرحومه اني متأكده بيوم مارجعت ذكرى بعد زعلتها امك السبب وروح اسألها سالفه ذكرى مثل الثوب المربع كل واحد شايل جهه نسوان اخوتي طرف وامك طرف وامي عمشه طرف واني طرف بس الاطراف الذكرتها ماتعترف بذنبها بس الله موجود هو اليحكم بلحق والعدل اني اجيت افهمك شى واحد هاي الي تشوفها واشرت على ناي
صارت مرتك وام ابنك وتبقى بت عمتك الي ابوك يحب امها لدرجه ضحى بروحه دير بالك عليها هاي امانه ابوك مثل ما حوراء امانه عندك
مهدي : واني ممقصر
خوله : انت فاهم الاكل والشرب والفلوس من توفرهن يعني ممقصر اكو شغلات اهم من ذني اذا توفرن عود بذاك الوكت كول ممقصر
مهدي : مثل شنو
خوله : تحس عندك مره مو مزهريه بيها ورد شوكت ميعجبك تشم وردها ودير وجهك وتعوفها تره يجي يوم الورد يذبل واذا ذبل لو تحط روحك بيه ميرجع مثل الاول وتبقى المزهريه فارغه
روح ابني على دربك وفكر بكلامي ولتنسى اكو شغلات تنحس متنكال ولا تنطلب لتحمل هاي المكروده كلشي صار وياك ويه اهلك تره هيه مناقصه اذيه
ناي : صعد مهدي وشغل السياره وراح طبينا للبيت عفيه عمه ليش هيج حجيتي وياه هسه يدري اني كلشي احجيلج
خوله : انجبي انتي قابل هو غبي وميعرف كلشي تحجين شايل خشمه على شنو يمه
ناي : شسوي قسمتي هيج هو حباب وطيب
خوله : ضلي قشمري نفسج حباب وطيب وممقصر ويايه كافي من يكعد يمج باله بغير مكان
ناي : لطفيني بداعتي فرحانه بجيتج ومااريد ينكسر واهسي
خوله : تعاال لك ابوسك همزين ابنج مطالع على وداد جان خنكته
ناي : ههههههه اني جان خنكته
بقينا نسولف ونضحك جان تندك الباب وطبت شرهب ويونس اجوي يركضون وحضنوها ويبوسون بيها
خوله : اكلكم شو انتم كلكم كبرانين وانتي شرهب هاي شصايره
شرهب : اخبل موو كولي اخبل احلى وحده بلعشيره كلها
خوله : هههههه تخبلين انتي وكفشتج كبرتي وبعدج تفتحين شعرج شعجب حاطه شال على راسج
شرهب : غير من وره يونس يكول طريق وميصير
خوله : رجلج شعجب ماحجبج
شرهب : مو الشال بفلوس ويخاف يطلب مني اتحجب واطلب فلوس اشتري شالات غير ينجلط لهذا عايفني هيج اصرف اله
خوله : الله يساعدج عليه لو اني جان من زمان سميته
شرهب : وليش اسمه وادخل السجن اخذ فلوسه يصير جلطه ويتوكل هو غير لو اندلهن اله اخلي يمشي ويحجي ويه نفسه مدري وين ضمهن
ناي : لج جوزي منه ليأذيج
شرهب : زمن الگتل رااح شحده
خوله : كفخه وحده اطيرين اسكتي بوخه
ناي : مبين انتي وبيبي متصالحات
خوله : اسكتي لتذكريها هسه تعيط
شرهب : شتنطيني ومااخليها تعيط
خوله : من عاشر القوم صرتي مثل رجلج جايبه غراض الجن شويه واوزعها عليكم
شرهب : بس تنطيني قليل احرك فلمج واخلي بيبي تعد هسه
خوله : تربيه عدي
شرهب : غير معلم اسم الله
خوله : باوعت على يونس الواكف يباوع ويبتسم اشرت بيدي تعاال ويايه
يونس : هااا راح تبوكيني
خوله : ياريت اكدر ابوكك واخذك ويايه وهم شوف طولك صاير رجال الله يحفظك تشيلني بيدك
يونس : مو لهاي الدرجه عمه
خوله : امشي بلغرفه
يونس : لكم نقذوني منها
ناي : مالنا دخل انت وعمتي اني اروح لعمه بدعه اساعدها بلغده يله شرهب
طبيت وياها كعدت بصفها لزمت وجهي
خوله : الرحمن يحفظك كبران واللحيه زايدتك رجوله بس تعبان وجهك اسود من الشغل احجيلي
يونس : شحجي عمه
خوله : كلشي
يونس : ماكو شى اشتغل والله كريم
خوله : كلشي يايونس
يونس : اووووووف ياعمه اذا احجي ياريت اشهر يله اكمل
خوله : عوفك من سوالف السجن كلشي اعرف اريد اعرف لحد مطردك عمك الحقير وين صفه الوكت بيك ولتكول عايش بغرفه مإجره وضعي زين لان مايوم خابرتك وسمعت هدوء حتى بليل مره خابرت عليك سمعت صوت سيارات وهذا الجابني اكو شى مااعرفه وين تنام
يونس : واحد يتيم وانطرد بليله ظلمه وماله اخ ولا سند ولا اهل ولا شهاده ولا فلوس وين يروح غير الشارع يلفي ياعمه
خوله : سوده بوجهي من شوكت
يونس : من يوم ماطردني ابو محل الملابس صار سنتين ياعمه انام بلشارع ومرات أجر غرفه بلبتاوين خاصه بلشتا بلمطر لان صعب انام بلمطر لحد مايكسر الجو وارجع خلصتها هيج
خوله : انعصر گلبي حيييل واختنكت وكتله وشتشتغل
يونس : مو سوه مرات ابيع گلينكس مرات الم قواطي بلزبل وابيعهن واكثر من مره اشتغلت حمال بلشورجه وماطولت لان رجلي ما عانتني اتعب وثكل واعثر واوكع واخاف على غراض العالم اكثر الناس من تشوف رجلي اكزل متشغلني لهذا وين ماالكه شغل اشمر نفسي لحد مايفرجها ربج
خوله : لك ليش ماكتلي لييييش سكتت
يونس : شسوين قابل اليه اني رجال واكدر اعتمد على نفسي قابل شيصير عليه اني عشت سنتين بلسجن ويه ارذل الوادم قابل الشارع اخطر منهم كلها نفس الشى اجت مرات اكول لو مطالع من السجن اقلها جان مكان يلمني ومااشتغل واكل صحيح الاكل تعبان بس على الاقل اكو سكف حاميني
وبعدين اتندم واكول شنو هذا التفكير الخايس اكو احلى من الحريه
وبديت اسولف لعمه المواقف الي امر بيها مواقف صعبه بس جنت اطلع نفسي منها
خوله : بعد ماكو نوم بلشارع ولا شغل
يونس : ليش طلعلي ورث واني ماادري
خوله : اني من سافرت صرفتنا الدوله راتب واضم من عنده جنت مااصرف واشتغلت بياعه بمحل وجليسه عجزه شغلتين كمت اشتغل ومااصرف فلس حتى المهم واساعدك بيهم صار سنتين اشتغل لحد مالميتهم
يونس : واني اجي على الحاظر اخذهم هاي شبيج عمه كولي ياالله ماعليه شى لتخافين الشارع يربي ويقوي
خوله : حجايه زايده مااريد لوعت گلبي بسوالفك شون متحمل هاي الفتره
يونس : حضنتها وابوس براسها لتخافين على ابنج ماعليه شى
خوله : اذا تحبني صدك تاخذهن
يونس : تدرين بيه مااخذ فلوس ولا امد ايدي لواحد
خوله : انجب هستوك كلت ابنج ولو انت ابن عاق اتضم على امك
يونس : اني اكدر اضم على خوختي وعيونج محد يعرف بكلشي صار بيه بس انتي هسه
خوله : خلي اشوف خواتك ونخلص اليوم سوه ويصير خير واريد اشوف يارجال يرد حجايتي
ناي : اباوع على كعدتنا ولمتنا وضحكتنا الماليه وجهنه وشون فرحانين كلنا كاعدين على الغدا نضحك ونسولف وكل واحد بينا يحجي شغله وبيبي تضحك ومكيفه بوجودنا
اليوم حسيت بأهلي اليوم يله ضحكت من گلبي قبل سنين انسلبت راحتي وضحكتي واليوم رجعت برجعة عمه
بقينا اليوم كله عمه تسأل واحنا نجاوب مثل الواحد كاعد بتحقيق وضعنا ابد معاجبها بس ماكو حل سواء اليه او لشرهب اثنينا محكومات بزواج ومسؤوليه بس التكدر تغير حياته هو يونس
خوله : باجر نروح لبغداد مبدأين راح اجرلك شقه تكعد بيها واذا اكو سر قفليه بعد احسن ونشوفلك محل تأجره ونملي بضاعه تشتغل بالاسواق مو احسلك
يونس : عمه كتلج مااخذ اي شى
خوله : وروح ابويه وامك يايونس اذا عاندت لساني ميطخ لسانك ليوم الدين شنو هذا الراس اليابس
عمشه : اسمع عمتك وامشي بشورهه لاتضل هيج ملطم بگل مجان انت هم كبرت واريدن ازوجنك
يونس : هاي البقت اجيب مره واتزوجها حتى اضيعها ويايه
عمشه : شنهي يمه الرزق على الله اشوفلك بت اوادم تصونك وتراعي بيتك چا تضل هيج
يونس : اضل قابل عمري ٦٠ سنه كلها ٢٣ سنه بعدني بيبي عوفي الزواج
خوله : من باجر الصبح نطلع
عمشه : وين تضلين هناك
خوله : غير عدنا بيت لو نسيتي يمه
عمشه : شناويه يبت بطني
خوله : كل خير احبيبة
ناي : سهرنا كلنا سوه وكاعدين نضحك ونسولف وسيف يلعب ويه بلال واحنا متمددات وحده بصف الثانيه وبعدين عمه وزعت الهدايه شلت نصهم وانطيتهم لشرهب هيه تحتاجهم اكثر مني
وثاني يوم اجه مهدي واخذني الصبح صعدت وياه سلمت وكعدت والطريق كله ساكتين لحد مكال
مهدي : انتي حاجيه شى لعمتج
ناي : عن شنو
مهدي : يعني شغلات تخصنا او تخصني شخصياً
ناي : لا
مهدي : متأكده
ناي : اي متأكده بقيت الهي روحي ويه سيف
حتى ميسألني
وصلنا للبيت دخلت سلمت ردت اصعد سمعت صوت بغرفه حوراء فتحت الباب طلعت سدره يمها
اجت حضنتني
سدره : يابذاته متسألين عليه
ناي : شونج گلبي هااي شنو باوعت بطنها عاليه حامل بلخير گلبي فرحت هوايه الج شكد عليج
سدره : خمس اشهر
ناي : الله يكومج بلسلامه ليش حوري ماكلتي
حوراء : هي غير مكالت متشوفين زعلانه منها
سدره : غير ردت اجي بنفسي وابلغج وحتى تشوفين بطني
حوراء: جان خليتيها لحد متجيبين بعد وكت سدره : اي صنفي حضرت جنابج
ناي : شكال زوجج من عرف حامل
سدره : لج عيني لو تشوفين عيالي وزوجي طارو من الفرح تعرفين تأخرت هوايه وعلاجات بس ربج كريم واخيراً صار
ناي : ان شاء الله تولدين وتقر عينج بشوفته سمعت صوت مهدي يصيحني واجه ورايه
مهدي : هااي وينج
ناي : باوعت عليه شاف سدره وركز عيونه على بطنها ذاك هو مفضوح علامات الصدمه والاستغراب واضحه على وجهه
مهدي : شونج سدره
سدره : الْحٍمَدٍ للـّہ انت شونك
مهدي : زين تعاي ناي هذا سيف وصخ نفسه
ناي : اي اجيت عرفت مكدر يتحمل يشوف شكلها وهي حامل هذا الشى أذاه حيل بعدك تحبها ادري بيك بعدها بالك وشوفتها تأذيك بعدك من تشوفها عيونك تاكلها هي كلشي بالك واني لا شى صدك مزهريه على كولت عمتي
رحت على سيف غسل اله ورجعت للبنات وبقيت اسولف وياهم شفت سدره شون تحب زوجها وشون سعيده لان اختارت صح وحكمت عقلها وهاي نتيجتها زين اني ليش كاعده اضحك بلوجهه وداخلي نار گآبه اليوم حسيت بغيره اگلتني اكل حتى من طلع مهدي تمنيت ميرجع لحد ما سدره تروح
كملت اليوم واني اجر النفس كوه لحد مااجه بليل وتمدد بصفي اني منطيته ظهري وهو هم كتله بعدك تحبها
مهدي : منو
ناي : سدره
مهدي : هاي شبيك هو هذا موضوع تفتحي هسه واني اريد انام
ناي : مرايده شى بس جاوبني
مهدي : لا مااحبها
ناي : جذاب
مهدي : اندار عليه وعااط احترمي نفسج شنو جذاب
ناي : عدلت كعدت واني ارجف واحجي وياه الغيره سيطرت على عقلي اي تحبها ومن شفتها حامل تخبلت شنو عبالك تطلك لو تعوف رجلها وترجع لحضنك تره سدره تحب زوجها وهو يحبها لو تشوفها شون تتغزل بيه وتمدح بيه تغسل ايدك منها
مهدي : هواي تماديتي وصوتج نصي دنيا ليل لحد يسمعج
ناي : وخلي يسمعون ليش اهلك والعشيره كلها متدري انت تحبها كلها تدري وكلهم يدرون انت متحبني وباقي من لا جاره ولخاطر ابنك ضال ويايه تزوجت بت عمتك اليتيمه غصب من وره خالك ولفيتها بيتك وتصرف عليها من باب الواجب اما گلبك وعقلك ويه سدره
مهدي : تسكتين لو اسوي الليل اظلم عليج
ناي : ليش هي بقت على هاي الليله كل ليله انام واني اشوفك نايم بصفي جني اخت الك ياريت هم اخت مو اشوفك ويه حوراء تضحك وتتشاقه وتسولف اما اني كلشي ماكو تحجي بلقطاره حالي حال الغريبه لشوكت ابقى هيج
مهدي : استغفر الله تخبلتي بابا شجاج
ناي : اي تخبلت من اشوف عيون رجلي تاكل اكل مره ثاني واسكت معناها تخبلت من اشوف الحسره والقهره تاكل بروحك من ينذكر اسمها وتسأل عليها كل متشوف حوراء واسمعك بأذني تطمن عليها وتنام بصفي وتفكر بيها واسكت معناها تخبلت تدري شكد حامله منك تدري شصار بيه من سنين واني اتمنى واكول الايام تنسي وانت مانسيت
مهدي : شتردين ناي
ناي :اريدك تحس وتحترم مشاعري كدامك مو حجر حتى تبقى تبلع وتسكت اذا متريدني كول وخليني اروح لحالي كافي تعاملني اني والماكو سوه
مهدي : هاي من وره عمتج شوفي شزرعت بالج وخلاج تتخبلين
ناي : لا كلشي وتذبو براسها ولتتهرب من الشغله الاساسيه مشكلتنا مو عمتي وشكالت وشحجت مشكلتنا انت عايش ويايه وروحك ماموجوده
مهدي : خليني انام تعبان انتي مبينه مرتاحه وتردين تفتحين مواضيع متخلص لباجر
ناي :ناام انطيته ظهري كمت ارجف عليه اريد اكووم اضربه حييل واكله حس بيه اني احبك اريد روحك اريد گلبك اليه مااريد عاطفتك اريد اطب تبوسني تحضني بمحبه من امرض تخاف عليه مااريد واجبات تعبت من برودك تعبت من هدوئك انمرد يوميه من اكعد بلساعه والساعتين وهو مشيل راسه من الحاسبه ولا حتى يباوع شلابسه او شحاطه
ولا حتى يستفقدني اذا نزلت حتى الاطفال طلب مني مااسوي لحد مايكبر سيف لان ميريد يورط نفسه بيه اكثر كمت افقد ثقتي بنفسي بسببه
نمت بليلتها ودمعتي بعيني
يونس : نزلنا لبغداد اني وعمه وصلنا شرهب لبيتها بالاول بعد عركات وهوسات ويه عمه رضيت اخذ الفلوس منها واعتبره دين لحد ماتفرج وراهابدينا اندور على شقه هواي اماكن وغاليات لحد مالكينا عماره بلمشتل قديمه وعدد شققها قليله وايجارها مناسب اجرناها وكعدت بيها جبت غراضي واستقريت تعشينا بمطعم ومن كملنا رحنا للبيت مردت ادخل اله بس عمتي ضلت ادك اله نروح دكينا الباب
طلعت صالحه فتحت عيونها بجفله من شافتني وشافت عمتي يمكن اكثر اثنين متريد تشوفهم بلدنيا كلها
خوله : وخري بله شو ساده الطريق
صالحه : شجابكم وانتي شرجعج
خوله : بيت امي قابل بيت الخلفتج وارجع وكت مايعجبني تعال يونس
خوله : طبيت للبيت غمضت وفتحت عيني اتحسس كل زاويه بيه
صالحه : شتردين
خوله : شون بله اكلها بيت امي ورجعت من السفر واريد ارتاح بيه عندج شى ويايه ماعندج وخري اريد ارتاح بغرفه امي
طبيت للغرفه لكيتها على حطتها ونظيفه همزين منظفتها
يونس : عمه خلي نروح منا مااريدج تتلاطشين وياهم
خوله : ياااا خلي واحد يفتح حلكه احط النعال بيه اكعد ومالك دخل
خلي اكوم اغسل تعبت رجليه او الاحسن اسبح حاره وين علاكتي
يونس : هاااي
خوله : جبت ملابس ويايه حاسبه روحي ابات اخاف يجي عمك سلم عليه
يونس : لو اموت مااسلم
خوله : سلم بداعتي
يونس : شنو بالج عمه والله مدوختني من اجيتي
خوله : اسمع الكلام ومالك دخل
رحت للحمام باوعت مركبين دوش جديد ام وصخ صالحه تسبح بدوش ام الوعث جوه المي واتذكر شصار بيه مثل شريط الفلم مر كله كدام عيني
طلعت من الحمام وبراسي الخاولي جان يطب عبيد مبين عنده خبر يجوز خابرته
تمشيت عليه راد يعيط حضنته وبسته شونك اخويه
عبيد : شرايده خوله جايه
خوله : هيج تستقبل اختك الصار ٤ سنوات مشايفها
عبيد : فضيني شرايده
خوله : سلامتك يبن امي وابويه اجيت اشوفك يوم يومين واروح متستقبلني بيتك هاي تاليها
من كتله بيتك فش
تبقى اخونا الجبير ومعزتك جبيره حتى لو تعاركنا تخاربنا دمنا واحد واني بعد مسافرت عرفت قيمتك وصار اربع سنوات كلت بس ارجع اراضيك وابوس راسك حتى ترضى ومايبقى بگلبك شى مني اني تغيرت وشفت دنيا غير الدنيا ومااريد شى غير سلامتكم واجيت اسلم وتالي مستقبلني
عبيد : شون مااستقبلج بس عبالي تتعاركين وهذا يونس المن جاي
خوله : لخاطري تحمله كم يوم ونروح تعال اشتاقيت الك ولجوحي
عبيد : انتي بيج شى
خوله : هههههه هاي شبيك فاتح حلكك غير اخوتي وعزوتي ومالي غيركم
عبيد : هاي النغمه مو نغمتج خوله
خوله : ياااا صاير تحجي بلنغمات اطورنا
عبيد : اخوج اجه وياج
خوله : لا نجم بقى هناك وكعدت اوصفله الحياه والشغل وهو صافن جان تنزل صالحه تخبلت من شافتنا كاعدين وماكو عركه
صالحه : هذا الوصيتك عليه عبيد
عبيد : شبيج صالحه غير اختي وجايه من سفر كالت جم يوم وتروح
خوله : اني بمرتك مالي دخل ولا راح اجاوبها لعيونك صدك جبتلك هديه كمت فتحت العلاكه ورجعت هااك شون عطر ماركه يخبل
صالحه : الله اعلم شحاطه بيها
خوله : كلت مااجاوبج لخاطر اخويه
عبيد : كافي صالحه مشكوره خوله امي شونها
خوله : بخير تعرفها زعلانه منك بس عادي ولا تهم اني اراضيك عليها غير صالحتها والحمدلله
صالحه : جيتج مو خاليه گلبي يلعب منج
خوله : اكوم انام احجي وياك غير وكت تصبح على خير خويه
يونس : جنت اسمع عمه حقها صالحه تنصدم حتى اني عقلي ميشيل تصرفات عمه
خوله : طفي الضوا خلي انام
يونس : شنو وراج عمه
خوله : كله خير نام ورانه فره باجر
نمت وثاني يوم كعدت من الصبح اجت سما تسلم سلمت عادي عليها اباوع شون تكص يونس من فوك ليجوه سلمت عليه مجاوبها
يله ابني خلي نطلع
يونس : طلعنا نفتر وصينا اكثر من واحد على محل وانطيت رقمي ردت قريب على الشقه حتى لا اصرف كراوي هوايه
بقينا ٦ ايام وكل يوم نرجع عمه تبقى ويه عبيد بلساعات سوالف وتشوفه صور المناطق بلسويد وهاي صالحه متخبله واني منتظر شراح يصير لان كل ما اسألها متجاوب وراها تنام وتعوفني دايخ اني لا سلمت عليه ولا هو باوع بوجهي كوه صابر لخاطر عمه بهذا البيت
ونرجع ثاني يوم اندور تعبنا من الفر اكثرها غاليه لحد مالكيت محل بمنطقه النواب سر قفليه وعمه جلبت بيه واجرته صغير بس على شارع تجاري وقعنا العقد باوعت للسما ربي اني تعبت وانسحكت وتمرمرت وشفت الويل اريد بركتك برزقني ماتقربت للحرام بيوم ولا مديت ايدي شكد احتاجيت نمت ايام بليه اكل ولا كدرت ابوك لو أذي واحد كلشي مااريد غير ترزقني وماتحوجني لبشر ولا انكسر واصير شمات لاحد
خوله : شبيك حبيبي تباوع للسما
يونس : اتوسل برب العالمين ماانكسر ويبارك برزقي حتى مااخليج بيوم تتندمين انطيتيني رزقج وتعب عمرج
خوله : وحتى اذا ضاعن فدوة لتراب رجلك هااك ذني خليهن يمك حتى تتسوك اريد تملي المحل حتى تفتح وهذني جم ورقه اشتري المهمات للشقه تبقى هيج لا فراش لا شى
يونس : النام مثلي بلشارع يعتبر الشقه قصر عادي واذا نمت بلكاع
خوله : ماارضى ابني روح اشتري على الاقل الاساسيات فراش على ثلاجه على مبرده وراها من الله يرزقك عود كمل كلشي
يونس : ان شاء الله امشي ارجعج
خوله : لا عندي شغله اكملها وارجع للبيت
يونس : وين رايحه
خوله : هااا ولك تحاسبني
يونس : غير اخاف عليج
خوله : لتخاف عمتك ب١٠٠ رجال
ركبت تكسي ورحت لعبيد بمحله شافني واجه يركض
عبيد : صار شى
خوله : لا اجيت اشوفك وراها اشوف جوحي مااجه وشاف اخته عرف اجيت
عبيد : اي عرف وكال العصر امر اشوفها
خوله : اكلك عبيد انت الله رازقك وابنك الله وفقه ويشتغل ومعتمد على نفسي بتركيا وهاي سما هم كبرت ويجي يوم وتتزوج وتروح وتضل وجهك وجهه صالحه ليش متسوي خلفه
عبيد : هاي شلج بيها خوله غير كبرنا
خوله : شكبرت ياعيني شوف راجع شباب شحلاتك
عبيد : وصالحه غير بتها بطولها وبعد متكدر تخلف كبرت متتحمل حباله
خوله : وتضل هيج بس ولد وبنيه واحد هاج والثانيه يجي يوم وتروح
عبيد : شسوي قابل
خوله : لو تخلف لو تتزوج
عبيد : اني اتزوج وعلى صالحه
خوله : قابل انت اول واحد يتزوج على مرته لو خاف تخاف من مرتك احجي الصدك اني اختك
عبيد : هااا بدينا مو جنتي جاره عدل
خوله : اني ضكت الوحده ياخويه كدامك لا تلد ولا ولد وضاله مثل الغراب مرات تجي ساعات ابجي لان وحدي وماكو طفل يشيل وحدتي بله اني مجبوره لان مره قابل ادور رجال اليه وهم فاتني القطار بس انت شجاك رجال وعندك محل وخير من الله اربط نفسي واضل بليه خلفه
عبيد : غير عندي اثنين
خوله : وينهم ياابو مهند وينهم شايف هسه اذا تتزوج هاي الفرافير البنيات الحلوات وتجدد شبابك وترد روحك العمر واحد كفر تخلصه ويه صالحه شو تكدر تتزوج وحده باقيه بيتها ومرتاحه والثاني اجر الها شقه وبحجه الشغل اخلص يمها الوكت وربك تدعيلي واذا متريد مشاكل لتخلف منها اني افكر بمصلحتك والله بعدين تشكرني
عبيد : انتي لان تكرهين صالحه هيج تحجين اني احبها ومااكدر اتزوج غيرها
خوله : براحتك اني هيج حجايه وحجيتها وراح ترد بمكانها على كولت امي وضل ويه صالحه انيال گلبك بنص السوك ومتباوع على هاي النسوان الي تخبل بخيته صالحه بيك يله اروح اني ضلت يمك العافيه
خوله : عفت عبيد يدوخ ويفكر ذبيت السناره ومنتظره السمجه تبلعها
يونس : استقريت بلشقه والحمدلله بس عمه ضلت بذاك البيت وتروح وترجع لكربلا
مر ١٥ يوم وبديت اشتغل جنت فرحان بشكل مو طبيعي وممصدك رحمتك يارب من الشارع لشقه ومحل صحيح الرزق على الكد بس الف الْحٍمَدٍ للـّہ والشكر وين جنت وين صرت
خوله : رجعت لكربلاء وصار شهر على جيتي ويوميه اخابر البنات واطمن عليهم ويونس الصبح وبليل اخابره كدرت اسوي شى بسيط
واليوم رايحه لبغداد لازم اكمل طعم السمجه
صالحه : لا هله هم اجيتي
خوله : ذبيت الجبه والربطه وكعدت شتردين مني صار شكد اروح واجي اندكيت بيج تقربت منج شبيج شايلتني على راسج
صالحه : ممرتاحتلج
خوله : ليش
صالحه : شنو وراج خوله
خوله : كل خير اختج وين ولا شفتها
صالحه : متريد تشوفج وياريت اكدر مثلها مااشوفج شوكت تولين
خوله : صدك نسيت اخذ من خاطرج علمود اخوج رغم صار شكد اشوفج ومااتذكره كالو لكوه خايس معفن جان تلزمني من دشداشتي
صالحه : اذا حجيتي على اخويه ارجعج بسديه للسويد
خوله : اكوم انام من يجي عبيد كعدوني
عفتها وطبيت وثاني يوم رحت لمحل عبيد وهم حجيت وياه بهاي السالفه فوك الساعه وهو ساعه يكسر وساعه يجبر ويصفن لحد ما دخل جوحي علينا سلمت وحضنته اعرفه حقير وميحبني وعباله رايده فلوس منه كتله
صدك جوحي اريد اشغل فلوسي
جوحي : ليش عندج فلوس
خوله : ياااا لعد شجنت اسوي بلسويد العب تگي غير اشتغل وهناك الشغل كله بلورق وعندي فلوس خير من الله اريد اشغلهم واعرفك كدها وراح تربحني خوش فلوس هو سمع هيج هذا صار انعم من الدخن
جوحي : صدك كذب تدللين شكد عندج
خوله : انت بس انوي تشغل فلوسي وابلغك تعرف ما أمن بواحد وانت وعبيد اخوتي واولى من الغريب
جوحي : اي اكيد من عيووني
خوله : يله اروح اني اودعناكم
خوله : متمدده وماده رجلي وحاطه راس امي بحضني وافلي بيها وهي كل شويه غالطه عليه واني اضحك دك تلفوني باوعت عبيد شلته
هااا عيني عبيد هااااا ايييي ايييي احجي اسمعك كمل اييي سكتت واسمع اله اخر شى كتله صدك جذب جم عبيد عندي تدلل من عيووني وهاااا شرط اجيب امي ويايه بعد شتريد بيها الخير وسديته
عمشه : شنهي ياخير من عبيد صايره دهن ودبس ويااه شجرالج انتي ماتصفين هيج اله وراج بليه سوده
خوله : يمه حضري نفسج رايحين لبغداد باجر نخطب لعبيد
يتبع ......