#الابواب_الخمس
البارت الرابع عشر /الجزء الثاني
للكاتبة Reem
شفت شيب بشبابي من وكت ليش
وشفت حسره وشفت اه وشفت ويل
ما شايف شمس بس غيم دنياي
شوكت يطلع نهار ويرحل الليل؟
خلص عمري عذاب بوسط آهات
تعب حيلي وبعد ما بيه كل حيل
دكيت الباب ادك ادك ماكو مديت ايدي السرگي متغير منفتح رجعت ادك ادك ذوله وينهم لحد ماسمعت صوتها اي هاي هيه مااتيهه صوتها لو بين الف بنيه شجابها مو تزوجت انفتحت الباب وصارت سما بوجهي
فتحت عيوونها مصدومه
عفتها وطبيت جان تكول
سما : شطلعك
يونس : انداريت عليها ليش تردين يعدموني ولو كلشي اتوقع منج رجعت اطب للبيت جان تجي تركض ورايه
سما : ماكو احد وين طاب
يونس : فهمت شنو ماكو احد وين راحو
سما : هسه تجي امي وتفهمك
يونس : احجي سما شصاير
سما : مالي دخل يجون وهمه يفهموك
يونس : شوو وخري دفعتها وطبيت اباوع البيت صنطه ولا الطير بيه نفس ماعفته على حطته الي تغير صار البيت مابيه روح هادئ جان گبل من اطبله هوسه صوت بيبي لو صوت بلال وشرهب لو صوت عركات صالحه ويه عمه بديعه
كعدت واباوع على سما گبالي تفرك بيدها والوجهه مكلوب مبين الخوف عليها وكل شويه تباوع بأتجاه الباب انتي شسوين هنا مو تزوجتي متوقعت راح اشوفج
سما : هاااا مووو
يونس : شبيج تمتمتين من شفتيني اخترعتي وراها تلوبين وين راحو وليش هيج البيت مابيه كل احد
سما : خلي اجيبلك مي
يونس : لا اريد اسبح وصخ وتعبان وابدل ملابسي
سما : كلشي لتسوي خلي تجي امي على جيه
يونس : عفتها وكمت مهتميت الها اني تعبان وهلكان صعدت ليفوك حتى اطب بلغرفه ابدل ملابسي اخذ نظاف واسبح فتحت الغرفه اباوع جن محد بيها حتى تراب بلكاع وما مفروشه مال شتا ولا عبالك گلبي لعب اكو شى فتحت الكنتور لكيت ملابسي على حطتهم بديت اطلع بيهم تقريباً كلهن صغرانات عليه شلبس بله هسه بقيت صافن جان اسمع صوت سما
سما : هااك ذني مال مهند اكيد ملابسك صغار
يونس : مااريد
سما : بله عناد هنه بنطرون وقميص قابل شمطيتك البسهم بين متشتري وهاي منشفه اسبح اكو مي حار
يونس : اخذتهم من ايدها ونزلت سبحت واني گلبي يگلي راح تنصدم لان وضع البيت ابد ميبشر بخير باوعت وجهي وشعري مال زيان غير وكت خلي افهم شصاير وراها اعدل بروحي طلعت لكيتها كاعده
سما : حمام الهنا
يونس : جريت مشط مشطت شعري وكعدت كبالها احجيلي اهلي وين خواتي وين سما اني لهسه ساكت لان جنت تعبان واريد بس اجر النفس وانظف نفسي شصار واني بلسجن
سما : شوف اني مااحجي شى امي تسولف الك بس اريدك تعرف اني لهسه احبك ومانسيتك بيوم وحتى اطلكت لعيونك
يونس : اطلكتي
سما : اي مكدرت اعيش وياه لان احبك
يونس : تحبيني واهز براسي تدرين سنتين واني كل يوم يمر عليه اكرهج بيه تدرين كل ليله اون بيها من الجوع لو التعب لو مرات انكتل احتقرج واكول وين عقلي من حبيت وحده مثلج
سما : عفيه يونس لتحجي هيج (تحركت حتى تكعد بصف يونس اشر بيده )
يونس : اياج تتحركين من مكانج تلعب نفسي اذا اطخيني اصلاً متعجب لنفسي على الصبر الصابره هسه ومكايم وذابحج
سما : ليش اني شعليه مو كدامك غصبوني اهلي اني حالي من حالك كسرو بختي وزوجوني لواحد ابو نسوان وحقير
يونس : اخاف جنت اصدك بيج واكول تحبني
وخطيه بعد كل الصار ياسما لو اشوفج كدامي مدمايه اتفل عليج واعبرج انتي حشره تستاهلين الدوس بلقندره مو تنحطين على الراس مثل مااني جنت مسوي ولو يله الدنيا تعلم وماكو شى بلاش
سما : ليش هلكد حاقد عليه تره انت العفتني اتزوج كله من وراك الصار نسيت شكد احبك وكفت بوجهه اهلي وردتك والصار بيك من ايدك ليش تحملني ذنب كلشي
يونس : هاي المواضيع دفنتها وعفتها هناك بلحبس من جنت اكل كتل لو انام بردان لتفتحين دفاتر احتركت شصار بيج من وره ايدج والصار بيه من ثولي ورعونتي اني الهامني هسه وين خواتي وبيبي احجي لتباوعين بوجهي وينهم شبيج ساكته احجييييي
سما : لتعيط على كيفك عمو فلاح اخذهم وراحو يعيشون بكربلا
يونس : وبيبي وخواتي ليش اخذهم ذيج المره اخذ عمه وبان شمعنه هلمره كلهم اكو شى صاير مااعرفه من وجهج مبين
جان اطب صالحه وبيدها غراض ذبتهم بلكاع
صالحه : لج سما وينج تعالي شيلي ويايه يمه هذا منو
يونس : شفتي بعبع اكو غيري
صالحه : شدخلك لهنا وانتي الثوله ليش تفتحين الباب اله
يونس : مبين البيت صار الج واني ماادري
صالحه : عيني ورينه عرض جتافك منلفي محكومين
يونس : من يصير البيت بأسمج لو بأسم رجلج عود طرديني
صالحه : دماغ سزز كله من وراج غير تسألين منو بلباب يله تفتحي وانت شجابك علينا ماوليت لكربلا على بيبيتك
يونس : انطيني عنوانهم عرفت هاي اللحظه همه بكربلا
صالحه : يجي عمك واخذه اني مااندلهم وبعد لتجي ابقى يمهم
يونس : احد گلج طفل وتمشي على مرامج
صالحه : هله يبن ذكرى طالع لسانك مبين السجون ربتك
يونس : عفيه ربتني وخلتني ساقط يعني لا يوكف بعيني عم ولا مرت عم اليندك بيه اطيح حظه بايع ومخلص
صالحه : يمه عوذه منك ومن لسانك الله لايثردلي وياك ولا يشوفنا وجهك وانتي كومي اصعدي اذا نزلتي رجلج اكسرها
يونس : اني صاعد انام بين مايجي رجلج كعديني
صالحه : وين صاعد نام هنا بغرفه بيبيتك
يونس : راح انام مو لان انتي ردتي مااصعد بس لان مابيه حيل اصعد
عفتهم وطبيت للغرفه شمرت نفسي على الجربايه اااااااااخ شكد تعبان وحيلي مهدود نزعت القميص ونمت بس بلبنطرون وغطت نفسي ونمت غفيت حتى بدون ماافكر شصار كلت اروح وافتهم من بيبي لان هاي شسألها راح تجذب
نمت نومه مال سنتين ليكدام كعدني الجوع فتحت عيني وتيهت الوكت حتى المكان تيهته اني وين نسيت اني طلعت ورجعت لمكاني كمت اطك برگبتي وبجتافي شكد صار منايم هيج سحبت القميص ودكمته وطلعت ادور على الساعه بيش لكيتها ساعه ٦ الصبح حييل من البارحه نايم شعجب محد كعدني طبيت للمطبخ ادور اكل فتحت الثلاجه لكيت بيض مو مال بيض اريد شى يسند گلبي فتحت الفريز لكيت جدر بيه فاصوليا طلعت حميتها وطلعت خبز وخضره مديت راسي خوش راس خس طلعته وكعدت اكل جنت ميت جوع خلصت ٤ كرص خبز
صار شكد مماكل اكل بيت ولو اني مااحب اكل من ايد صالحه بس من جوعي كعدت حميت الجاي وصبيت وطلعت بره اباوع على المحل وافكر شراح اسوي منين ابدي لازم ارجع بيبي وخواتي لهنا واشيل حملهن خطيه عمو فلاح اكيد تأذه وحده شايل همهم
بقيت افتر طلعت بلباب هدوء والجو ثلاجه والناس كلها نايمه خليت وطبيت ورجعت نمت بيه جوعه نوم مو طبيعيه كعدت على فتحت الباب فتحت عيني لكيت مرتضى فوك راسي
مرتضى : الْحٍمَدٍ للـّہ على سلامتك شده وزالت
يونس : الله يسلمك كمت وسلمت عليه وهو حضني
مرتضى : تعال اكل
يونس : مجوعان اكلت وجه الصبح
مرتضى : عمامك بره يردوك
يونس : منو ابوك وعبيد
مرتضى : اي اكو شى اريد اكوله الك
يونس : خير
مرتضى : بروح اهلك لتصير عصبي انت طالع تعبان وضعك موزين لتسويلك مشاكل
يونس : غير افهم شصار
مرتضى : تعال وهمه يحجولك
يونس : طلعت وياه واني براسي الف سالفه
طلعت سلمو عليه مديت بس ايدي وسلمت وكعدت كبالهم
كال مرتضى اكو شى شصاير
عبيد : ابني انت غلطت وغلطك جبير وكون السجن جر اذنك وبعد متسوي مشاكل
يونس : شويه اختصر شكو
جوحي : اسمع عمك وافهم منه ولاتقاطعه الصار لمصلحة خواتك وهم مصلحتك لو طالع هسه وبراسك بنات اثنين جان منين تعيشهم
يونس : خواتي شبيهن
عبيد : كل الخير بيهن كل وحده هسه بيت رجلها ومرتاحه
يونس : طفرت مخروع يارجلها شتحجون انتم
مرتضى : على كيفك يونس
يونس : هدني خلي افهم ذوله شديخربطون
عبيد : لك شون تزامط وتعيط مو كاعدين كدامك افهم لتصير مطي هذا الشى صار لان البنات حملهن ثكل واجتهن قسم زينه شرهب اخذت معلم وعائله طيبه ويحبوها ومدلليها وناي اخذت ابن خالك وعايشه بذاك البيت لو بعد ١٠٠ سنه تشتغل متكدر تشتري غرفه منه وعايشه بعز شلك بعد بهاي الهوسه المفروض تشكرنا
يونس : على شنو اشكركم على شمرتكم لخواتي وهنه بعدهن جهال لكم شرهب كل عمرها ١٤ سنه هاي مال زواج مال بيت وعيال
صالحه : على شنو تعيط وخابص الامه خواتك هنه رادن وحدتهن كتلت روحه على الزواج حتى انهزمن من البيت هاي الصغيره التتراجف عليها انهزمت ٣ ايام مندري بيها وين وبيا كااع ولمن رجعت احنا لا ليلنا ليل ولا نهارنا نهار حتى ردنا نوديها طبيب يفحصها اخاف رجال مقشمرها لك ٣ ايام بره ومعودنا رجعت كومي ناي واخذي اختج وارجعي انهزمي لك عندك خوات الله ميجرعهن فانصات انت انسجنت وذني فلتن وسمعتهن خاست بين الجيران تالي حتى نخلص من خفيتهن خفنا لا يسودن وجهك وجهنا بلزايد زوجناهن ولو هيج خايف على خواتك مجان بقيت فوك راسهن وهاا تره شرهب صارت ١٥ مو ١٤ يعني تستحق الزواج
يونس : كله البله منج متأكد اكيد سويتي ملعوبه وخليتي ذني اليتيمات يهجن بليله ظلمه
عبيد : لتحجي هيج ويه مرت عمك
يونس : كوم مرتضى وديني عليهن
عبيد : اكعد بعدنا مكملنا كلامنا هذا البيت مالك جيه عليه بعد اني عندي بنيه مطلگه وانت تربات سجون واخاف عليها رجعه لهنا ماكو شوف وين الك ديره روح بيها
يونس : تخاف على بتك مني هاي الكدامك توديك للبحر وترجعك عطشان ومثل ماكلت لمرتك البارحه من يصير البيت الك عود اطرد براحتك يله مرتضى
طلعت ويه مرتضى واني مجمر
مرتضى : وين نروح
يونس : وديني على ناي وشرهب خلي افهم منهن الصار
مرتضى : شرهب هنا بيتها قريب بس ناي بديالى مو كالو الك اتزوجت ابن خالك
يونس : احجيلي الصار كله
مرتضى : اسمع من خواتك احسن مني شغله وحده اكولها الك خواتك اشرف من الشرف والعيبه ماطلعت منهن
يونس : ميحتاج تكول هيج خواتي واعرفهن لو الدنيا كلها تطعن بيهن مااصدك عندك جكاره
مرتضى : كمت ادخن
يونس : لعد شيخلص السنتين بلسجن
مرتضى : تعال اشتريلك
يونس : مااريد عبالي عندك
مرتضى : يمعود امشي
يونس : اشترالي باكيت وجداحه وبديت امشي وادخن يمكن الدخان يطلع من راسي مو من خشمي من اعصابي وصلنا بيت قديم دكينا الباب طلع طفل
مرتضى : صيح عمتك شرهب
شرهب : رجعت لبيت عدي اول ايام مااتقرب منه ولا الي علاقه بيه ومن اشوف وجهه شون مورم افرح واترحم لعبد على كتلته اجوي معلمين ومعلمات والمدير مالته حتى يطمنون عليه اسمع بيهم شون يمدحون بيه كدام عمتي وشون هو انسان خلوق ومجتهد وانسان تربوي والكل تحمد بيه شكد طيب والطلاب تحبه وينصح بأصدقائه لعمل الخير واني اهز ايدي صاير وجهين ويه الناس ماكو مثله ويايه ويه ابوه وامه اجلب منه ماكو صدك الناس عليها الظاهر
فات اكثر من شهر ونص على رجعتي وطول هاي الفتره مااعرف شى عن ناي بعدها زعلانه مني ولا حاولت تتواصل عفتها براحتها حقها ماالومها افكر بيها دوم واشتاق احضنها
خلصت ايامي انظف واساعد عمي وعمتي بشغلهم يجيبون مسواك عزاله (تعبان ) ونكعد انلكط الزين ويطلع عمي يبيعه وبلي يربحه ناكل اما ابتسام من رجلها اشتغل ومشت شويه بيده طلبت من امها تعزل اكلهم واشترت طباخ وحدها فوك بلسطح تطبخ متريد ويانه بحجه مااريد ازيد حملكم ردت اكفشها واسحل بيها البيت كلت لعمتي لو ضاله بليه خلفه ولا هاي خلفتج الزفره وهي ماعدها غير تهز راسها وتحمد الله وتستغفر حيل انقهر عليهم
اما علاقتي بأبتسام مره ناس تهد على ناس ومره هدوء كمت اصير وياها ند بند مااسكت الها وخاصه رجلها ايهاب يطب ويطلع يباوع عليه ونظراته نكسه ويذب بسامير ودوم اعيط بيه شكوو شبيك متيهه شى وهو يضحك خايس مثل مرته واكفه الهم مثل عظم السمج بلزردوم
كاعده اثرم بلسبيناغ حاطه التخته بلكاع ومتربعه واثرم واغني هااا نسيت اكلكم غير طلع صوتي حلوو عمتي تكول من تغنين صوتج يطب الگلب وحنين وعمي يكولي غنيلي اغنيه لوحيده خليل اكله مااعرفها يكعد يغني كدامي واني ارد وراه مثل طلاب المدارس وتضل عمتي تضحك
جنت اغني عيونك حلوة صوبن گلبي ماخلني اندل دربي مال هيثم يوسف وبعدين واني اغني تذكرت عيون عدي من مزوركه اثر ضربت عبدو واضحك وحدي مثل الخبله صدك صوبن گلبي ماخلني اندل دربي من الضحك
جان يطب ابن ابتسام شبيك تعيط مكروص ابوك مات
عمه ابن عمج بره
شرهب : طفرت عدلت دشداشتي وغسلت ايدي كلت اكيد جايب خبر من ناي يجوز هي دكت عليه وكالت روح الها حتى احجي وياها طرت وطلعت اركض وصلت لباب الشارع فتحته واشوف يونس كدامي
جمد دمي وعيوني صبت دمعها حتى بدون ماارمش جن روحي تشكي لاخويه وتصيح تعال لاختك شوف حالها بعدك شمرت نفسي وابجي وحاضنته واعيط
وهو حضني ويبجي ويايه
مرتضى : طبو جوه يمعودين الناس الرايحه والجايه تباوع عليكم
شرهب : سحبته ودخلتهم بلطرمه ورجعت حضنته كل ظلم وكع عليه بذيج اللحظه اترجم دمع بحضن اخويه وخرت من حضنه واباوع عليه وابوسه من خده ممصدكه شفته وهو جرني حيل وباس راسي
تعاال طبو جوه تعاال الْحٍمَدٍ للـّہ على سلامتك
يونس : مسحت عيوني واني ممصدك اشوفها شون متغيره وكبرانه
شرهب : اكعدو لزمت ايده شوكت طلعت
يونس : البارحه
شرهب : الف الْحٍمَدٍ للـّہ رجعتنا سالم ليش مااجيت عليه البارحه
يونس : هسه يله دريت تزوجتي
شرهب : غابت فرحتي ودنكت مخنوكه
يونس : احجيلي شصار وشون قبلتي تتزوجين وينج وين هاي السالفه مو جنتي شاطره وتحبين الدراسه
شرهب : اوووف شحجي يايونس خلي المدفون مدفون بس يطلع يعجج الدنيا
يونس : اريد اسمع كلشي وهسه
مرتضى : اني اروح انتم اخذو راحتكم
شرهب : ابقى على الغدا
مرتضى : لا مشكوره وانت من تكمل تعالي للبيت حتى نطلع نروح لناي
يونس : ماشي
شرهب : ركضت جبت مي فتحت الثلاجه اكو قوطيه ببسي ضامتها مرات عمي يجيبلي وياه واني اضمها حتى لحد يشربها
هاك اشرب ولو الجو بارد هسه شويه وتجي عـمتي تطبخ الاكل لان بعدني مااعرف ونتغدا سوه
يونس : عوفج من كلشي اريد افهم الصار
شرهب : تعال فوك بغرفتي
يونس : لا ميصير رجلج موجود
شرهب : بلمدرسه دوام وشنو ميصير مااكدر احجي هنا امشي فوك وكلشي احجيلك
جان تنزل ابتسام
ابتسام : هذا منو
شرهب : اخويه
ابتسام : شو اول مره اشوفه
شرهب : قابل صاحبي واكذب عليج اخويه اطلع الج الهويه حتى تصدكين
يونس : على كيفج شرهب حقها غير مشايفتني
شرهب : حبيبي اعرف شنو تقصد بالها شى ثاني عن اللي بالك تعال امشي عفيه
سحبته من ايده وصعدت وياه وهي واكفه عبرناها ويونس دنج يستحي وهي كل عين صلفه تباوع كصته كص جان قبل مااطب للغرفه كتلها عود من الباب من يجي اخوج كولي اله شرهب مصعده رجال بغرفتها مااوصيج وركعت الباب
اكعد كعدنا واحد مقابيل الثاني اباوع عليه اخويه كبران فدوة لوجهك وصاير عندك لحيه
شتريد احجيلك
يونس : كلشي من يوم ماانسجنت لليوم
شرهب : جريت نفس اضحك بقهر قهرت يتيمه انگلبت حياتها بيوم وليله واحجي بدون ماانسى كلشي سنتين من عمرنا كعدت تربعت واسولف شويه يتعصب ومره يعيط ومره تنزل دموعه ومانزل الغلط والفشار على عمامي ونسوانهم من حلكه
صار جمر واني مستمره احجي ومن كتله على سالفه سما يضرب على راسه ويغم كصته ويعيط وين عقلي من ضحيت علمودها
مبقيت شى ماحجيته حتى يفهم ساس الموضوع كله
يونس : كومي
شرهب : وين
يونس : اخذج ويايه ماتبقين لحظه هنا
شرهب : اكعد فدوة وجر نفس وجهك صار طماطه من الاعصاب
يونس : لج هسه اذا الزم عمامج ونسوانهم اشكهم بلنص
شرهب : اكعد فدوة اروحلك
يونس : كومي لمي ملابسج وامشينا
شرهب : وين نروح
يونس : ارجعج للبيت
شرهب : يابيت تحجي عنه اني ذاك البيت ماارجع اله
يونس : لعد تبقين هنا ويه هذا الحيوان
شرهب : غير يكعد وافهمه
يونس : انجبيت وكعدت احجي
شرهب : صحيح سنتين انسجنت بس بهاي السنتين الحال انگلب كله انت البارحه طلعت بعدك مشايف بغداد والبلاوي الي بيها العيشه تعبانه والانفجارات دك والشباب اليطلع مايرجع حالنا زباله بلقدره عايشين وانت طلعت من السجن لا شغل ولا عمل والله اعلم تلكه شغل لو لا يونس حبيبي هيه مو سهله مثل متتوقع هاي عمو فلاح اخذ عائلته وبيبي وهج وعيشتهم تعبانه اجي ازيد حملك وحملهم
يونس : لعد تبقين هيج
شرهب : ماكو غيرها يمكن لو بعدني ممتزوجه وبس مخطوبه بطرك ملابسي اجي وياك بس هسه لا اذا طلعت وياك وين نعيش ذاك البيت ماارجع عمامك ونسوانهم ميخافون الله اذا ماوكعوني بمصيبه احتمال يسون شى يدمرني لو نسيت عمه خوله ودكاتهن بيها
يونس : اني احميج وشحده اليطخج والعيشه اني ادبرها لو اعرف ليل نهار اشتغل شنو مو بعينج اني
شرهب : بعيني وعلى راسي ورجال وكدها بس بهذا وضعك راح ازيد همك انت نفسك متعرف شون تعيش واذا مثل مكلت عبيد منعك من البيت يعني زاد الطين بله والله لو اعرف عدي خوش رجال ويقبل تعيش يمي جان خليتك هنا ويايه اقلها اني اداريك
يونس : انتي اداريني لو اني الي المفروض اشيلج على راسي حضنتها وميت قهر اختي كل عمرها صار ١٥ وحايره بلعيشه بلوكت اللازم تحير بدراستها
شرهب : انت روح لناي وشوفها وراها اطلع لكربلا وشوف بيبي كلش راح تفرح بشوفتك هيه وعمه وبان وراها حير بروحك اني وناي هاي قسمتنا من الدنيا تريد تساعدنا شد حيلك وكون نفسك حتى يوم مانوكع نلكاك تسند ظهرنا بهذا حالك اني وياها أذيه مو نفع
يونس : لج بابا شون اعوفج امداني اذا عفتج هيج
شرهب : ابوس ايدك اسمع الكلام ولتشلع گلبي وگلبك وروح لناي وراح تسمع نفس الشى
يونس : شنو فايدتي وخواتي مدمرات واباوع عليهن
شرهب : حسك بلدنيا وطلعتك هسه قوت ظهري وظهرها ويوم ماتوكف على رجلك وحده بينا تحتاجك راح تشوفنه على بابك هو منو ابونه واخونه غيرك
سحبني وطك بجي ويعيط يكول كله من ورايه لو مداخل السجن مجان صار هيج بيجن جان يونس منهار حيل تأذه ساعتين ونص نحجي ونبجي لحد ماگلبنا وجعنا اريد بس اهدي اندكت الباب مسحت دمعتي وهو هم
طبت عمه
ام عدي : هله يمه بلخير على طلعتك
شرهب : هاي عمتي
يونس : هله حجيه رحمه الله والديج
ام عدي : يله يمه كملت الغدا صبيت جيبي الصينيه لاخيج ماكدرت اصعدها تعرفين رجليه ماتعيني واعذرنا وليدي هلجود من الموجود انت حسبت ولدي وتعرف الحال اكيد اخيتك كالت الك
يونس : الله يديم خيركم حجيه ويحفظج ويطول بعمرج اني اروح غير مره اجيكم واتغدا
ام عدي : وترضى متاكل من ايدي صار شكد واكفه واطبخ وماتضوك طبخي كومي شرهب اخيج جوعان
شرهب : كمت ركض ونزلت لكيت عمه محضره صينيه مسويه تمن وسبيناغ ومگليه سمجه يمكن جابتها من عرفت هنا يونس شكد نفسها طيبه صعدت الصينيه وهي نزلت متاكلين ويانه عمه
ام عدي : لا يمه انتظر عمج اكلي ويه اخيج كون دوم اسنونج هيج تلالي من الفرحه
شرهب :صعدت مكيفه راح اكل ويااه طبيت لكيته يدخن
يونس : محترك دمي دخنت بغرفتج بعد مااتحمل لحد مااطلع
شرهب : فدوة الك الغرفه وصاحبها
يله تعال اكل ويايه
يونس : مجوعان والله
شرهب : لخاطري اليوم عيد عندي غير ممصدكه راح اكل ويه يويو
يونس : ابتسمت واباوع عليها مردت اكسر خاطرها كعدت اكل وهي تحط الاكل بحلكي وفرحانه بس معدتي نار من القهر على حالها وكارهه نفسي
جان الاكل كلش طيب عمتج نفسها طيبه بالاكل حييل
شرهب : اي اموت على اكلها واريد اتعلم منها ابشرك عرفت اگلي بيضه بدون خسائر لان كل مااگلي احرك لو اصبعي لو يطفر على ايدي واضل اكمز اما هسه تعال شوف اختك البيض والجاي من ايدها اضبط مره متسوي مثلي
يونس : هههههه لج هنه بيضه وجاي
شرهب : العافيه بلتداريج بيت الله مانبنى بيوم وليله تريد شرهب تتعلم بيوم وليله
يونس : شكد مشتاق لسوالفج
شرهب : واني مشتاقه انام بحضنك انت وناي وانسى حتى اسمي
يونس : وداعت كل دمعه وقهره صارت الج يجي يوم اعوضج وانسيج
شرهب : اعرفك كدها وعيونك
يونس : خلي اروح تأخرت
شرهب : ابقى اليوم يمي حباب
يونس : ورايه روحه لديالى
شرهب : ماضل وكت راح يصير ممنوع تجوال
يونس : بعد وكت اجيج وين اروح بست راسها
شرهب : نزلنا سوه جنت امشي واني اكول عندي اخ بعد مااخاف ولا اتحامه بلغريب ياخذلي حقي
طلع واني عيوني عليه واباوع للسما واكول ربي انت اعلم بلحال افتح بوجهه الخير ولا تسد بابك انت بابك عظيمه وماتنسد بوجه يتيم أذته الدنيا
ناي : يومي يشبهه القبله ويشبهه البعده رغم عرفت علت مهدي يحب غيري بس متغير شى واعتقد مراح يتغير قابل شريد اسوي وشنو البيدي اغيره لا اكدر اتقبل اتقرب منه وادري بگلبه غيري ولا اكدر اعوفه لان هو مامسويلي شى ولا مأذيني وهذا الي مخليني دوم بحيره رغم العذاب الاشوفه من امه بس هو ماشفت منه بس الطيب هادئ شحتاج يجيبلي حتى مرات مااطلب منه شى هو يسألني ناقصج شى هاج فلوس روحي اشتري اليعجبج يعني موفر كل متطلبات الحياه اله مشاعر الحب كالمعتاد بارد ثلج سلمت امري لله وقنعت روحي بأن هو حقه كون انجبر يتزوجني والوكت كفيل يغير البينا
صعدت انظف غرفتي بعد يوم مدمر من وره وداد وشغلها المايخلص سمعت صوت حوراء
وينج نوونه
ناي : تعااي بلغرفه
حوراء : خالو عمران يريدج دز خاله ام عبد يكول خلي تجي بسرعه
ناي : ياستار شصاير
حوراء : ياداده كدامج اني كاعده اباوع فلم وسمعت صوت ودزوني عليج
ناي : امج وين
حوراء : بغرفتها
ناي : طلعت العبايه الاسلاميه وحطيت شال على راسي ونزلت وينها خاله
حوراء : يجوز راحت گبلج
ناي : ما اتأخر
طلعت امشي سريع وطبيت لبيتهم من باب المطبخ
هاا خاله
ام عبدالرحمن: روحي بتي اكو من جاي يشوفج
ناي : عفتها وطبيت للهول وصلت لباب الخطار دكيت الباب اجاني صوت خالو تعالي بتي
طبيت واشوف مرتضى واجت عيني على اخويه على من فتحت عيني واشوف بيه اهلي وكل عزوتي الباقي من ريحه امي ركضت وحضنته وابجي ممصدكه كدام عيني
عمران : من رخصتكم البيت بيتكم
مرتضى : مشكور حجي
ناي : ابوس بيه وبيده وهو يبوس براسي ويحضني جنت اشهك بحضنه
مرتضى : اني هيج مواقف اتعبني
ناي : شوكت طلعت
يونس : البارحه
ناي : سودة بوجهي ولا واحد جان وياك من طلعت
يونس : شونج انتي صحتج
ناي : الْحٍمَدٍ للـّہ انت شلونك اروح فدوة لهلوجهه وحضنته اووف شكد مشتاقتلك
يونس : جنت يم شرهب
ناي : شونها
يونس : ليش زعلانه من اختج
ناي : زعلانه عليها مو منها حجت الك لو لا
يونس : كلشي كالت
ناي : كلشي
يونس : من يوم دخلتي للسجن لحد مادكيت بابها
ناي : دنكت مقهوره رفع راسي بيده وكاال
يونس : من ورايه ضيعتج وضيعت اختج
ناي : قسمتنا بعد شراح تسوي هسه
بدينا نسولف ونحجي اكثر من ساعه واشوفه شون محروك گلبه علينا وشايل همنا
تره كلام شرهب صحيح بعد الصار ميتغير تريد تساعدنا اشتغل وكون نفسك ولتغلط بعد وتذكر شى واحد خواتك مالهن سند غيرك انكسرنا مره لا تكسرنا مره ثانيه
يونس : وعبيد وجوحي ونسوانهم اعوفهم هيج
ناي : باوعت على مرتضى وهو مدنك يبقون ابوه وامه وصعبه يسمعنا نحجي عليهم وهو ساكت
شراح تسوي الهم مراح يجيب نتيجه
سلمناهم بيد الله هو القادر ياخذ حقنا منهم فدوة يونس حير بروحك وعيشتك وعوفهم كافي الاجانه منهم اي شى تسوي راح يرجعوك من وين ماجنت ونرجع اني وشرهب ظهرنا والهوا اذا تحبنا وتريد تعوضنا عوفهم واوكف على رجلك لتضيعنا اكثر ما احنا ضايعين
يونس : الله كريم يله مرتضى امشي نرجع
ناي : وين عفيه ابقى اليوم
يونس : خلي ارجع وباجر ورايه روحه لكربلا
ناي : ابقى بات عفيه مالحكت اشبع منك
يونس : غير مره اجيج عندي عتب على مهدي شون يتزوجج بدون حتى ميكلف نفسه يجي ويسألني يوم ما رادج تجين لبيبيته مو اجه للسجن
ناي : صارت بعد الظرف صعب وصارت ركض صدك متجي تشوف بيبي ام ماما
يونس : لا مااريد وخلي اروح حيل اختنكت
طبت خالو عمران ومقبل يرحون وجبرهم يباتون حيل فرحت لان بقو
ورجعت اركض مكيفه انتظر مهدي ابلغه وهم اروح يمهم اليوم خالو من كتله خلي يونس يجي ويايه مقبل الظاهر فكر بوداد اخاف تحجي شى وتفشلني
رجعت طلعت عمتي تعرف هي شافتني
وداد : وشبيج هيج فرحانه الي يشوفج يكول اخوها جايب الدكتوراه وراجع من الخارج لوما من السجون طالع
ناي : يبقى اخويه وعندي يسوه الدنيا
وداد : لتجيبي هنا اخاف يبوك شى يسوي شى واحد سنتين نايم يم الحراميه اكيد صار مثلهم
ناي : عمه متغثيني ولا راح اهتم لكلامج الفرحه البگلبي بشوفته لو تعدين وتصفين لباجر ماتهزين شعره من راسي
عفتها وصعدت
بدلت لان جنت لابسه تراكسود شتوي لبست دشداشه ورجعت لبست العبايه وانتظرت مهدي حتى اطلب منه ابقى هناك اجه وكتله
مهدي : روحي عادي باتي هناك واني جاي وياج اسلم عليه
نزلنا سوه وشافتني عمتي وسكتت ادري بيها متحجي شى كدام مهدي وطلعنا جنت مثل الفراشه طايره من الفرحه برجعته
تسالمو ويونس عاتب مهدي واعتذر مهدي منه وحتى خالو اعتذرو منه جان كلامهم وياه بمنتهى الاحترام والتقدير واجه عبدو وصلاح وكعدو كلهم سوالف على الاوضاع والسياسه والحال ابد محد حسس يونس بشئ موزين وهذا الشى كلش ريحني وسوالف عبدو وضحكه وشقاه لكيت اخويه يضحك ومنطلق
ساعدت ام عبد بلعشا وهي طيبه بهيج سوالف حارت شسوت والله بيضت وجهي كدام اخويه وابن عمي وكلهم تعشو وتالي الليل كلمن راح
مهدي : محتاجه شى
ناي : سلامتك
مهدي : هاااج
ناي : شنو هاي اباوع فلوس
مهدي : انطيهم ليونس اني مااكدر انطي اخاف احرجه واعرف نفسه عزيزه كوليله منج عود انتي جامعتهم من مصرفج حتى ياخذهم اعرف بيه ماعنده وطالع البارحه والامور ما مترتبه عنده وراه روحه لكربلا ولحد مايلكه شغل يرادله ايام رغم اني كتله تعال هنا نشوفلك شغل ماقبل اله بغداد انطي ذني يمشي اموره بيهن لحد ما ربج يفرجها
ناي : حنيته وطيبة گلبه دوم تفاجئني اخذت الفلوس منه جان كلامه صحيح واكيد يونس ماعنده حطيتهم بيدي وطبيت عليهم
مرتضى : اريد اروح حمام
ناي : صحت على عبدو حتى ياخذ مرتضى وكعدت بصف يونس وبسته من خده
يونس : شعندج
ناي : ههههه بعدك تعرفني من اريد شى
يونس : قابل عفتج عشرين سنه هنه سنتين احجي شنو البالج
ناي : احلفك بأمي وترابها تاخذهن
يونس : شنو ذني
ناي : ذني جامعتهن اخاف احتاج شى واني الْحٍمَدٍ للـّہ ممحتاجه اخذهم مشي امرك بيهم
يونس : من كل عقلج اخذ منج اني المفروض انطيج واطب محمل اشكال عليج
ناي : ليش نسيت سنين عايشه اني وشرهب بخيرك هو منو بطل من دراسته لخاطرنا منو ضيع مستقبله لخاطر نكمل شهادتنا
يونس : وبالاخير ضيعت كلشي غبي
ناي : عوف الفات عفيه واخذ ذني حلفتك بامي وترابها اعرف ماعندك اغلى منها
بقيت اتوسل بيه وهو قافل حطيتهم بجيبه وكتله اعتبرهم دين ويوم ميصير عندك رجعهم شمرهم عليه واني اشمر لحد مادخل مرتضى حطيتهم بجيبه وكمت شاورته اذا تحبني وتحب امي لتردني وانت بكيفك بعد دنك وسكت عمت عين الوكت الخلاك ادنج ومكسور متت قهر عليه
واكفه حاضنته واودع بيه طلع الصبح بسرعه ومثل مافرفحت روحي بشوفته هاي اني مفرفحه روحي بوداعه
دعيت الله يبرد گلبه وميسوي شى ويدمر كلشي
يونس : انطلقت من ديالى لكربلا واني بلطريق افكر شون احل وضعي وشسوي حتى ارتب حياتي ساكت وصافن بكلشي صار بيه وبخواتي من روحتي الهن وضعهن شرهب ماتضل ويه رجلها متأكد بس ناي مبين وضعها احسن دخلنا لكربلا ودك مرتضى على عمو فلاح مبين التلفون عايفه بلبيت طلعت عمه بديعه كتله لمرتضى لتكول اني وياك وانطونه العنوان جانت اطراف كربلا منطقه تعبانه اكثر بيوتها مامبنيه وكامله دكينا الباب وفتح بلال النا حضنته وهي يصيح يويو وطب يركض
بديعه : هااا منو بلباب
بلال : يويو
بديعه : يايمه ولك يايويو ماموجود وجان يطب عطت ولج عمه تعالي شوفي منو اجه ركضت وحضنته هذا وليدي الماخلفته
يونس : دخلت واني فرحان بشوفتهم بس عيوني ادور على بيبي طلعت بلعربانه وهي شافتني شهكت
عمشه : ياااايمه يالوعت افادي وضيم عمري
يبعد هلي وناسي يمه يونس
يونس : حضنتها وابوس بيدها وراسها وهي تبجي هااي الكعده مو الج بيبي هاي الكسره مو ثوبج
عمشه : شبيدي ياوليدي ان طاح الگوي كثرت سجاجينه وانه طحت والذيابه گلتي شون گيفك ولجن هلهلن العزيز رد
بديعه : اني وبان نهلهل من فرحتنا
عمشه : بدعه اخبزي بساع وزعي خبز العباس المستعجل چا هذا يونس حزام الظهر وتجوه الطيحه رد ليه سالم غانم خايبه اريدن اكومن وادبچ للصبح عبنه جدامي
بديعه : لتروح توكعين معودنا صرتي زينه هسه اخبز واوزع تعالي يمه بان
مرتضى : واني ابن البطه السوده ولا واحد سلم عليه
عمشه : چا شرايحلك لون امك بطه سوده لو فسيفس امك عكرب تلدغ وتضم راسها مايفيد بيها غير المداس دهر فرها ماياخذها الموت ضاله الوادم مجطله بلشوارع وامك مثل الصل
مرتضى : يعني ارجع متسلمون
عمشه : تعال ليه انه احبنك عبن انت حنين موش مثل امك وابوك الكطعي موت الكرفهم
يونس : بقيت بحضن بيبي واسولف وياها اجت عمه وتوقعو مااعرف شى لحد ماكلت الهم كلشي اعرف لتعبون نفسكم
بقت بيبي تبجي واباوع على حالها لكم سنتين هيج يصير بيكم كلكم اجه عمو فلاح سلمت عليه وماحجيت وياه اي شى اعرف مابيده شى من يومه ضعيف وماعنده كلمة
بقيت يمهم ٣ ايام ورابع يوم قررت ارجع لبغداد وادور على رزقي
عمشه : يمه وين تنام اريدن تروح للبيت ومالك دخل بعبيد انعل شيب اهله لون اندك بيك
يونس : ارجع بلبيت وخلي يمنعني حتى احركه على راسه عباله مثل قبل اسكت اله
عمشه : يلمسودن
مرتضى : هاا عموشه
عمشه : اريدن هذا اليحجون بيه دكلي على عمك البعير
مرتضى : ماعندي رصيد
عمشه : دك لا ادك على عظامك واجسرها وحك علي
مرتضى : مو طولين اعرف بيج ياخذج الواهس بلسوالف
يونس : شتردين منه
عمشه : تجيك السالفه دك
اخذت بيبي التلفون وفتح الحاكيه مرتضى وكلنا نسمع وصاحت هلاووو بصوت عالي ولك عبيد اسمعني زين يونس راد للبيت حاجي چلمة واكسر خاطره وروح ابيك العافكم عله على گلبي وراح للكبور ثاني يوم اسجل البيت بأسمه واشردكم بلشوارع كض دودت مريتك ولا تندكون بولدي
عبيد : شلج بهاي يمه ومرتي شعليها
عمشه : عبنهه هي المسيرتك واعرفنك مالك شور الشور كله لمريتك الحيه ام راسين اركد وبسك من الوليد لاتشوفني كاضيه انه لون اشوفن يونس متبهذل ابهذل احوالكم يرد وماتندك بيه البيت گله اله وانتم خطار عنده سمعتني
عبيد : يمه اني غير عندي بنيه مطلكه وهو شاب واخاف عليها
عمشه : خايب اسكت من خفت لجهرتك يابت هااي چا انه اخافن على يونس منها بتك عرمه ومهتلفه وماعدها حيه چا نسيت شلعبت غيرك وحيد يطم رويحته ومايكولن عندي بت انه مااعيدن وجعانه ومالي حيل يونس يرد لبيته ولحجرته ولاتندك بيه يعبيد وكض مريتك وبتك عنه واستحي على شيباتك
راكض وراهن مثل النعجه ولاتنسى هذا بيتي جلمة منك تكدر خاطره ثانيه يوم اديحكم والعب بيكم فلك
هاااك سده وجعانه
مرتضى : هو انتي انطيتي مجال يرد وفوكاها تكول وجعانه
يونس : جان دبرت حالي يابيبي
عمشه : زهر بفاده چا تنام بلشوارع وبنات غنيه يسرحن ويمرحن انه لون احد يداريني ارد وياك مااعيفك وحيدك
بديعه : لا عمه منو الج هناك هنا يمنا وعينا عليج يحير يونس بيج لو بروحه
عمشه : انه هذا الكاتلني كون اكومن على حيلي وارد اوليه واجعص على رگابهم
يونس : ان شاء الله بيبي اروح اني مبقى وكت ورايه هم ازور وبعدين نرجع
عمشه : محفوظ بأسم الله واهل البيت يمه
يونس : طلعت منهم ورحنا للزياره صار شكد مواصل وكفت ابجي مثل الجاهل على حالي وحال اهلي كل نسمه تهب على وجهي بارده اكول بردها عليه بالايام الجايه توضيت وصليت وبقينا اني ومرتضى ساعتين ورجعت لبغداد وصلت للبيت دكيت الباب فتحت الباب صالحه ودارت وجهه وطبت كون الزمها اشرب من دمها الگلبه صعدت لغرفتي اعدل بيها نظفتها وطلعت ادور ملابس اليه اشتريت جم قطعه رخاص تنزيلات الفلوس الي انطتهم ناي اليه كلش فادوني بقيت من عدهم مااريد اصرفهم كلهم وثاني يوم طلعت من الصبح ادور على شغل وانصدمت الوضع كلش موزين والشوارع نصها فارغه وبدت حيرتي تزداد وين اشتغل ويوم يجر يوم وماكو شغل جنت اقتصد بلفلوس اشتري لفه وحده واكل وارجع انام لان بلبيت مااكل من صالحه
حسبت فلوسي الباقيه بقن ٣٠٠ لان ناي انطتني ٥٠٠ تعبت من التفكير وين اشتغل قابل ارجع للعتيك وبهاي الاوضاع
لحد مايوم شفت محل ملابس محتاج عامل وتوسلت بيه وقبل اشتغل سويت البيت مثل الفندق بس للنوم وسما دوم تفتر وتحاول تحاجيني واني اريد اشرب من دمها كل مااشوفها واصدها
ناي : بقى بالي حيل يم يونس ومااعرف اخباره كمت اخابر مرتضى ويكول يدور على شغل وميلكه اكل گلبي التفكير بحاله ومر شهر جنت كاعده انفض الفراش سمعت صوت جوه نزلت شفت سدره جايه اول مره اشوفها ينقبض گلبي ومااحب شوفتها هي شافتني اجت تركض وحضنتني
سدره : اشتاقيتلج ولج
ناي : هلو سدره
سدره : هاي شنو شو تحجيها من وره خشمج
ناي : لا ليش
سدره : هو اني لو انتي
ناي : تعبانه شويه اعذريني
سدره : هاي عود اجيت ابشرج انتي وحوراء اول الناس
حوراء : شكوو خير ولج وجهج يضحك
سدره : اجوني خطابه
ناي : فتحت عيووني متفاجأه انتبهت على حوراء وجهه انگلب
حوراء : منو هو وانتي قابله
سدره : ولد ويايه بلكليه يدرس دراسات ماجستير دوم جان يباوع عليه ويراقبني كتل نفسه ومنطيته مجال تالي دز عليه وكال نيتي شريفه وحجه ويايه والصراحه ارتاحيت اله قمه بالادب ومن عائله راقية ومرتبه واخذ عنوان بيتنا وسأل والكل مدحو بيه وامه خابرت ماما وراح يجون عكب باجر متشوفون جايه
حوراء : وانتي قبلتي
سدره : ليش لا قسمه زينه ومن عائله كلش ممتازه وابن خير وفوك هذا كاتل نفسه عليه واني ارتاحيت اله واي وحده عاقله مستحيل ترفض هيج قسمه
شو صافنات بوجهي
ناي : بوستها وكتلها بلخير تستاهلين كل السعاده
سدره : فدوة لعمرج وانتي ولج حوري شبيج
حوراء : بلخير حبيبتي
سدره : ليش احسها من وره خشمج افرحي هوسي هلهلي لو اني بمكانج مجان گلبت الدنيا
ناي : خليها مصدومه لان راح تعوفيها
سدره : اني العليه كلت الكم اول الناس حتى لتكولون ضمت علينا اروح ارتاح تعبانه من الطريق
ناي : بعد شهر اباوع من الشباك على حال مهدي الضايع كاعد بلحديقه ويدخن نزلت بعد مامسحت المكياج وره رجعتي من العرس
تمشيت بهدوء وظهره عليه حطيت ايدي على جتفه رفع وجهه وعيونه دم وكتله كوم امسح عيونك كافي تبجي عليها راحت بعد لبيتها مو قسمتك
يتبع .....