#الابواب_الخمس
البارت السابع /الجزء الثاني
للكاتبة Reem
كالولي اكتب فرح وانسة الحزن وارتاح
اعترض بيدي القلم والدمع مني طاح
اجروح عدنة شكثر ومنين نلكي افراح
لو مات كلي الزرع هم يفرح الفلاح
لو ثكل ليل الحزن لاشمس تطلع بعد
طول علينا الفجر والكمر طوه وراح
روحي مدينة صفت مابيها غير اشباح
اصرخت صرخة حزن موش المؤذن صاح
الله واكبر صحت حسبالهم ذباح
شرهب : فزيت من صفنتي واني اكوم وراهن وكعدوني وره الباب وبدا يكتبون شهادة موتي
بعدني اريد العب اريد ادرس اريد اضحك اريد اعيش بعدني ماشفت من عمري شى ليش تغتصبون طفولتي ليش تحرموني من ابسط حق اليه اختار حياتي
عشت بيتم وبفقر وقله حال عشت بألم وكسرت نفس وتاليها افتح عيني والكه نفسي ويه رجال اكبر مني ب١٨ سنه
صالحه : تعالي اكعدي هنا
ام عدي : يمه صلوات على ابوابراهيم محمد
شحلاتج احبيبة تعالي اكعدي يمي
صالحه : خلي تعقد وتكعد يمج لان كالو حظروها يردون يعقدون ويخلصون من وكت قبل ممنوع التجوال
ام عدي : اني اخذها
شرهب : امشي وعيوني بلكاع اباوع على خطواتي واكول بگلبي شبيج شرهب ليش ساكته احجي عيطي هوسي لتسكتين ذني دمرنج بس عمري الصغير وقلة خبرتي خلت عقلي المراهق يصورلي شغلات جبيره راح تصير اتخيل اختي تروح بيها ناي يزوجوها لواحد عنده مره وجهال ويوميه يكتلوها واتخيل بيبي يذبوها بلشارع لو يونس يرجع ويطردوه من البيت ويرجع للسلابه ويصير مجرم عقلي بهاي الثواني الجنت امشي بيهن صورلي افلام بتاريخ السينما ماصايرات لهذا طاوعت صالحه وسمعت كلامها
انمدت ايد ولزمتني من ايدي وكعدتني بصف البرده لان البيت مابيه بس هول (صاله) جبيره قاسميها نصين وحاطين برده حتى الزلم بجهه والنسوان بجهه محضرات كلشي الحقيرات كعدوني بصف البرده رفعت راسي واشوف هاي المره الجبيره جانت عيونها كلها حنيه اباوع عليها وبعيوني اطلب يرحموني ينقذوني من التهلكه الرايحه بيها
وكفت ساهره من الجهه الثانيه
ساهره : عيني ام عدي اكعدي ارتاحي هسه نكمل العقد وتصير جنتج وراها شسوين بيها سوي
ام عدي : شنو سوي بيها هاي بنتي الثانيه راح تصير حالها حال ابتسام
ساهره : فهمتيني غلط اقصد تصيرين امها
شرهب : كاعده وامرد بلصايه اللابستها من اعصابي وخوفي منتبهت عليها لحد ما شوي ركزت هاي وين شايفتها تذكرت مال سما كرهت نفسي لان لابسه شى منها فتحت عيني البس ملابس ناي التصغر وعلى گلبي مثل العسل هلمره حسيت بلعبان نفس لان مال سما رفعت عيوني واباوع ساهره وصالحه وحده واكفه يمنه والثانيه يسره تكول حرس عليها منظرهن والغل والحقد ينكط من عيونهن فتحو شوي البرده حتى يسمعون صوتي ومدري رجال معمم كال انتي موافقه بنتي نطقتها بصوت كله قهر وياها دمعه رجع السيد كال علي صوتج بنتي
كحيت اريد اجر النفس كعدت عدل وكلتها
رجع كال كولي لعبيد انت وكيل وكلته للعقد
جنت اسمع واحدهم شون يردد وره السيد واني جسمي كام ينفض لحظه ابرد ولحظه اختنك ولحظه احتر اريد اكوم من كالو هلهلو اول اثنين سمعتهن هلاهل ساهره وصالحه وراها هلاهل ام عدي وبتها الكاعده بلزاويه
وشغلن اغاني
تقربت صالحه عود تبوسني كدامهم وخرتها بيدي مااريدها اطخني جان ادنك وتشاورني
صالحه : هاي عقوبه اليندك بتي حتى مره ثانيه من تفكرين تحرگين احد تحسبين الف حساب قبل متسويها موبتي التوصل للموت ومااخذ حقها اگليها بلعافيه
شرهب : رفعت راسي عليها ردت اكوم واملخها من شعرها جان تجرني ام عدي باستني وباركت واجت مره ثانيه وياهم هم باركت وبتهم وذني الحقيرات مابطلن هلاهل ويركضن يجيبن كيك وببسي خوش صارفات محتفلات يخلصن مني
اسمع صوت مثل العياط بيه بحه وتعب بس لان هوسه واكو هم جهال يلعبون وصوت الاغاني مو عالي بس يأثر محد مركز كمت بسرعه عرفت هاي بيبي
غرفه بيبي من جهتنا طبيت ركض لغرفتها لكيتها واكعه من الجربايه ركضت اكومها بس لان ثكيله مكدرت عدلت بس كعدتها وجان تحضني حيييل وتشهك بلبجي
عمشه : سوده بوچهي يمه خذوج مني عساهم لاتهنو
شرهب : فدوة بيبي لتبجين انتي مريضة
عمشه : چاانه زمن طاح بيه وتعليت وضليت خرگه بيد الكحاب بنات غنيه لون بحيلي يكضون شعرج منج اااااااخ من اهمداني وامده بزرتي الضلت مطايه بيد نسوانهم يمه زوجوج وانه عليله عساني جوه التراب ولا اشوفنج مكسوره رويحتج ومتكدره
شرهب : اسم الله عليج بيبي كاافي وجهج اصفر صار فدوة هسه اجيج بس اصيح احد يشيلج ويايه
جان تلزم ايدي
عمشه : يمه وحك دمعتج هاي لا اخذك حگج مايتهنون بعون الله تضل حركتج بيهم وعساهم بنار ازيد من نارج انه مايهود راسي لون اشوفن بنات غنيه مكدرات والطراكيع من گل صوب على راسهن
شرهب : الله كريم بيبي خلي اكومج
دنكت باست ايدي وراسي وتبجي جنت احس بكسرتها مثل كسرتي وكعتها مو بس هي ادمرت بيها احنا ضعنا وراها واله لو بيبي زينه وصحتها مثل قبل مستحيل وحده منهن تتجرأ تسوي هيج هلمره شاخن اكثر ويهددن لان يعرفن محد يكدر بعد عليهن نسن الله موجود اكبر الكل
طلعت اباوع عليهن هسه اني اصيح ذني الحقيرات محسيت بروحي غير رايحه لهاي البنيه اسمها ابتسام جانت اكبر من بان بلعشرينات عمرها
عفيه تكدرين تساعديني بيبي وكعت واريد احد يشيلها ويايه
ابتسام : اي عيني ليش مااساعدج
طبت ويايه وجانت تباوع على كلشي قطعه قطعه عيونها تروح عليها اثنينا تعاونا وصعدناها بفراشها جانت حيل متأذيه مبين الوكعه قويه خلي ذوله يرحون وراها اصعد لناي ولعمه بدعه ينزلون على بيبي لان الگلبه صالحه قفلت الباب عليهم مجرمات المافيات مو مثلهن مدري شون يفكرن لكلشي حاسبات بلورقه والقلم
ردت اصعد جان تجرني من ايدي صالحه
صالحه : وين موليه
شرهب : عوفي ايدي
صالحه : امشي اكعدي يم النسوان خلي يطب العريس يلبسج حلقه
شرهب : خلي يلبسها الج مو عقدتو شتردون مني بعد
ساهره : هااا شبيجن تتبسبسن الناس كامت تنتبهه
شرهب : وخلي تنتبهه والله اذا مجزتو مني هسه اعيط واخزيكم
صالحه : حتى اجرج من شعرج واذبج على رجلج واكله اخذها من هسه استري على نفسج واسمعي الكلام تره اطلعج وياه هسه بطرك اللابسته لا عبالج مستحيه منهم لو اهتم الهم صرتي جنتهم وغصب عنهم ياخذوج خلي هاي الساعه تفوت على خير لا افوتها الج بفضيحه ومااخليج متشوفين اختج وتباتين اليوم بحضن رجلج تعرفين بيه كد حجايتي
شرهب : خفت من تهديدها ورجعت كعدت كل دقيقه تفوت واني اغلي وعقلي وكف لا يفكر بشي زين ولا بلموزين انفتحت البرده وطل رجال المفروض صرت مرته ردت اشوفه جان شكله زين بس جبير واغلب شعره مشيب رغم عمره ٣٢ سنه ملابسه مسحوكه وعيونه قذره يباوع من فوك ليجوه انطته امه حلقات مالتي جانت بيضه عرفت الحلقه فضة مو ذهب مهتميت ليش المثلي وبمثل وضعي تفكر بحلقه
حطها بيدي وكمت وانطيته الحلقه مالبستهه اله كاعده على اعصابي جابو الكيك والببسي وذني يهوسن ومكيفات متحملت خليت وكمت بعد لهنا وخلص صبري صعدت اركض ليفوك شكو جوه صار ماادري وشراح يكذبن بعد يطبهن طوب لكيت سما واكفه وتكول بلخير عيني عليج ام الخضره مفهمت شنو ردت اركض لحضن اختي ابجي انام انسى الصار كله
وصلت للغرفه المفتاح بلباب من بره فتحته وطبيت اركض
ناي : من نزلت شرهب واني مثل المخبله لابقيت ضرب ماضربت نفسي لا هدوم ما وكعتهن لاغراض ماكسرتهن تهسترت وعمه تبجي وتباوع عليه لان متكدر حتى تگلي ليش هيج تسوين حبسونا هنا مثل الحراميه حتى مننزل ونسوي شى من سمعت الهلاهل كمت اضرب بلباب حتى يفتحوها ومفاد
بديعه : كاافي بنتي راح تموتين
ناي : عساني عمه ليش هيج اختي يصير بيها شسوت حتى تتزوج هيج عمر: وبهاي الطريقه
بديعه : والله لو بيدي ولا اخليهم كدامج لعبو بينا طوبه لحد ماسونها الله لايرضى عليهن نار جهنم تحرك بلحمهن وروحهن مثل ماحرگن گلبنا
ناي : بقيت بلكاع يم الباب حاطه راسي وابجي شرهب من هي وصغيره بحضني جنت اشوفها بتي رغم مو هواي عمر بينا اكول هاي اختي من امي وابويه ولا يوم فكرت هيه من غير ام بهاي اللحظات كرهت الكل كرهت عمه بدعه وضعفها وفلاح والجبن مالته ونجم الحقير الماكفاه موتت امي اخذ عمه خوله من عدنا حتى عمه خوله كرهتها لان عافتنا لو موجوده ولا يكدرون يلمسون شعرة من شرهب رغم اعرف عمه لو باقيه ذني يخبلنها بلسحوره وضعي وحالتي خلتني اكره الكل حتى يونس حملته ذنب شرهب لوما راكض وره الجلبه سما مجان حال الضيم حالنا ردت احرك البيت والي بيه كاعده بلكاع واركع راسي بلباب وبان وعمه وحتى بلال يبجون
لحد ماسمعت طكت الباب بلمفتاح كمت ولكيت شرهب كبالي حضنتها واثنينا نبجي لا ام اطبطب علينا ولا اب يحامينا ولا اخ يسندنا اثنين بنات والرايح والجاي يلطش بينا
شرهب : اريد انام بحضنج عفيه
ناي : تعالي اجت عمه بدعه تحضنها وخرتها مااريد احد كلت عفيه عوفونا وحدنا
بديعه : ليش اني ميته بدمي والله روحي تتكطع ليش تذبين اللوم عليه وحتى متردين ابقى يمكم
ناي : عفيه عمه اترجاج اخذي بان وبلال وياج
شرهب : عمه تره بيبي وكعت عفيه روحيلها
بديعه : انقهرت حيل بس حقهن اني عاذرتهن الديصير بيهن جبال متحمله وهنه يعرفن كلش زين اني لا حول ولا قوة قبل لا اطلع كتلهن اني لو عندي اهل بيهم خير ويسندون ظهري مجان ظليت عمري كله بهذا البيت يدمغون عليه وضاله بقهر وسحورة ذني صحيح اني مو يتيمه اب وام مثلجن بس اني احس بيتم اكثر منجن لان اصعب شى بلدنيا من ابوج وامج عايشين ومعتبريج ماموجوده وينسوج ويعيشوج طعم اليتيم وهمه عايشين جن سجينه عمينه وتكطع بلحمج اني يتيمه اكثر منجن ومكسوره اضعاف كسرجن وانطاني رجال ماينسند عليه ضليت ظهري والهوا لا من الاهل ولا من الرجال
ومااكول غير الله يجبر خاطرجن ومتعيشن الي عشته وتبقن بناتي الله شاهد ومعزتجن من معزه بان واكثر يله يمه بلال وبان امشونا لعمتي نشوف حالها هاي المكروده هم وكعت وكع هذا البيت على راسنا الله يعينا على الجاي
ناي : طلعت عمه واني وشرهب سكتنا نعرف مابيدها شى وهيه مغلوب على امرها مثلنا شنسوي من قهرنا كمنا حتى منعرف نفكر ونميز ونتصرف بلا تفكير
حضنت شرهب وتمددت على فراشي وهي على ايدي والعب بشعرها
شرهب : كون ارجع طفله اضحك واكمز والعب بلشارع ويه بلال وبيبي تكعد تعيط علينا ومن تصير عصبيه تركعنا بنعالها وناخذه وننهزم وتبقى تغلط واحنا نصحك ومن تطلع صالحه وتريد تضربنا نختل بحضنها وتبقى اشكال تغلط عليها واني اعيب واخذ حقي منها ناي اني فقدت الامان والضحكه مااريد اتزوج اني مااعرف شى كلاص الجاي انتي تسوي اليه شون اتزوج اريد ادرس اشتاقيت لمدرستي عفيه مااريد وختلت وجهي بحضنها مثل الطفل الخاتل بحضن امه
ناي : شوفي شرهب شوو رفعي راسج خلي احجي وياج واسمعيني عدل
شرهب : رفعت راسي ورجعت ناي شعري ليوره
ناي : خلي يهدا الوضع ونطلع منا
شرهب : كعدت عدل وين نروح
ناي : ننهزم لبيت خال مهدي
شرهب : ومنو كال يقبل ياخذنه يمه
ناي : ماعدنا غيره ولا نعرف احد اذا انهزمنا لغير مكان راح يأذونا اثنينا منندل الشارع وشفتي الكتل بلجمله اخاف احد يخطفنا ويكتلنا اقلها خال مهدي حباب وطيب وخوش انسان ودوم يكول اليه شتحتاجين بس اشري
شرهب : تحتاجين فلوس مساعده مو ننهزم ونروح نختل يمه مااتوقع يقبل
ناي : اذا مقبل نروح لاي مكان ولا اخليج تتزوجين على كيف صالحه
شرهب : والعقد الصار اليوم
ناي : يطبهم طوب ينكعونه ويشربون مايه
شرهب : شوكت نطلع ونكول لبيبي لعمه
ناي : ابد منكول لاي احد نطلع وحدنا من الصبح وهمه نايمين
شرهب : اخاف يلزمونا
ناي : شيردون يسون اكثر سودو حياتنا وعبالج يكعدن راحه شوفي بعد شضامات
شرهب : ليش ماسويتي هذا الشى قبل العقد
ناي : مو كدامج شلون حبسونا حتى عمه ميخلوها تطلع النفس يحسبو علينا وخاصه عمامج السگط الله يشيلهم هسه الرادو صار اكيد فك الحصار عنا وميتوقعون نسويها وننهزم
شرهب :شوكت نطلع
ناي : انتظري كم يوم وهم بلكت الم يومياتي حتى تفيدنا كروه حتى نوصل لديالى
شرهب : رجعت بحضن ناي واني گلي امل اخلص من الجحيم الشمروني بيه
ناي : بقينا كم يوم هادئين ومنحجي اني رجعت اداوم جان شهر الرابع اكثر الدروس بدت تخلص ومراجعه لان ورانه شفهي وامتحانات نهايه السنه كل يوميه عمه تنطيني علمود اشتري من الحانوت بطلت اشتري واضم حتى اجمع الكروه وطلبت منها فلوس ملزمه مال انكليزي كتلها ضروريه وانطتني محبيت اكذب عليها بس مجبوره
اما ساهره وصالحه خلصنها دياحه وياهن سما كل يوم مدري وين يطلعن ومرات اكول هيج الله يحبنا ويطلعن ميرجعن ومن اشوفهن راجعات اموت قهر صار البيت جحيم
واجه مرتضى بعد مده وجان ميدري بسالفه شرهب اجه يعيط ويهوس شنو الفايده
مرتضى : وانتي شون تقبلين
ناي : تتوقع اقبل
مرتضى : محد گلي والله هسه اليوم بلصدفه دريت عيطت وهوست بلبيت وتعارك وياهم وطلعت امي تكول هي تريده للولد وتعرفه وقبلت عليه
ناي : لتزعل مني اني اعتبرك اخويه بس امك وحده باطله وجذابه هي واختها جابنه مدري منين تصور منعرف كلشي غير اسمه عدي ويگبر شرهب ب١٨ سنه
مرتضى : شون بله اكتلهم خلاص هم يكولون كتل امه وابوه شون الله بلاني بأهل كل خير منهم ماكو
ناي : زين احجي ويه الولد انت بلكي الله هو يفصخ وميريدها وتنحل هاي السالفه كلها
مرتضى : هي وينها شرهب وينج ام كفشه
شرهب : طلعت من غرفه بيبي بأتجاه مرتضى جنت هادئه لان كلشي طافي بيه حتى الضحكه اختفت
مرتضى : شون سگتي وانتي الياخذ شغله منج يبتلي على عمره
شرهب : أذوني وهددوني وكلها اتفقت عليه
مرتضى : رايح هسه للولد عسى ولعل يطلك وتفض هاي السالفه كلها
شرهب : ياريت مرتضى اترجاك
مرتضى : لو اعرف بسالفه من الاول مااخليها تصير وينج وين الزواج بعدج طفله ذوله تخبلو بشرفي عائله شاخطه ولا واحد عنده عقل ويفكر هي هاي مال رجال
ناي : ماعدنا غيرك هسه تحلها النا
مرتضى : ان شاء الله تنحل
شرهب : واذا تعاركو اهلك وياك
مرتضى : على اساس شلونهم مداريني مثل الماي بلصينيه متسكتين اروح اني شوي واجي
ناي : طلع مرتضى ومتأملين يصير حل والصار گلب گلشي شويه واجت ساهره بعبايتها وتعد وتصف
بديعه : ياستار خيرج
ساهره : سمعن بنات صمد اخاف عبالجن تگلبن ابني عليه وعلى خالته هذا عشم ابليس بلجنه تنجبن وتثگلن والصار اليوم اذا انعاد من باجر اخذ شرهب من ياختها لبيت عيالها واذبها بملابسها اني يجي ابني مدمه ولجن من شفناجن شفنه كل الفگر
بديعه : على اساس جنتي عايشه بلجادريه بله متكرمينا بسكوتج وشبيك تهوسين
ساهره : راس الحيه انتي ذني القنادر الاثنين الوراج دازات ابني على عدي ومتعارك وياه وجايني خشمه مكسور ويخر دم وهو ضارب عدي هاي سالفه بله لج عيني حقنا نزوجهن خفيفات ماينرادن وحدتهن تفر الرجال فر بعدهن بكد زري ولاعبات لعب
بديعه : انداريت على ناي صدك هذا الحجي
ناي : هو مرتضى دك صدره وكال اني احلها حجيت بهدوء كلت بلكي اجرب ولو مره احجي عدل ويه ساهره لخاطر اختي عسى يحن گلبها تقربت منها عفيه عمه احنا هم ربينا كدام عينج وتعرفينا ومنعرف احد غيركم انتي وعمه صالحه ونعتبركم من اهلنا فدوة ابوس ايدج خلي هذا الرجال يطلك شرهب والله بعد متسوي شى يضوجكم ولا اني ومستعده حتى اني ابطل من المدرسه ويوميه اشتغل الج بلبيت خلي اختي تبقى ومتتزوج والله صغيره شوفيها احنا هم حسبت بناتج ولو مره خلي گلبج يحن علينا
ساهره : ايييع حسبت بناتي امشي لج اني لو عندي بنات مثلجن اطمجن واخلص منجن اشفنه منجن غير اللسان الزفر والعجرفه لو نسيتي من تمشين والكاع مشايلتج من عمتج الله لايردها خوله تتعارك ويانه وانتي مكيفه
عبالج ناسين سوالفج
ناي : العفو والله جنت صغيره وشتردين هسه اسوي
ساهره : الشى الوحيد الي يشفي گلبي نخلص
منجن اثنينجن ونذب سبع حجارات وراجن شون اثنين بت ذكرى وبت جليله وحده انكس من الثانيه ابعدن عن ابني وخلصن الجم يوم الضال الجن هنا بخير لا ابجيجن دم
يخلص الامتحانات وياخذج وتبقين انتي الثانيه هم نشوفلج واحد اغم مثلج ونخلص عااد
بديعه : حسبي الله عليجن
ساهره : باع هاي تحسب امشي ولي انتي الثانيه بيج خير دوري رجال لبتج واستري عليها لتصير مثل ذني
ناي : طلعت وركعت الباب ورجع اليأس لگلبنا شوي وطب مرتضى خشمه ملفوف وكوه يحجي مبين متأذي وطلع متعارك ويه عدي لان كايله طلك وذاك ماعنده اسلوب عباله مرتضى يريد شرهب ومعاند واحد لازم الثاني ومتضاربين والناس بلمنطقه مفاككتهم
بديعه : شجاك يمه تعاركت واجت امك صوتها وغلطها لراس الشارع
مرتضى : حرك دمي بله هاي القسمه الخايسه وين لكيتوها
ناي : غير امك وخالتك
بديعه : مسألت عنه
مرتضى : طلع معلم يدرس بأبتدائيه ماده رياضيات واحد حقنه گلب ابوه ميعرفه اخلاقه صفر ويه الناس ماكو واحد اسأله عنه ومكالو اهوو استاذ عدي فد واحد لكمه توكف بلزردوم اريد واحد يمدحه ماكو
ناس فقره حيل حالتهم تعبانه ابوه وامه يبيعون مخضر بلسوك ماعدهم اذيه مو مثل ابنهم العكره واخته كاعده وياهم وزوجها هم واحد اتگالي يوم يشتغل وعشره كاعد
وبيتهم حيل تعبان وضعهم اتعس من وضعنا يعني قسمه تكسر الظهر
بديعه : هو اني اكول مستحيل صالحه تجيب قسمه زينه لشرهب
مرتضى : حجايه مني والثانيه منه تضاربنا ميقبل يطلك ويعيط ويفشر امده الشهاده الماخذها طيحت حظه وسحلته بلكاع بس هو غدرني وضربني بلطابوكه على خشمي لوما الناس اله اشرب من دمه
بديعه : شون ياربي شيحلها
ناي : انطيني تلفونك
مرتضى : هااج ترى رقم عمران ماعندي
ناي : خرب حظي وين راح مو خازنته بتلفونك
مرتضى : من رجعت من الشمال اشتريت واحد جديد حولت الارقام متأكد اله رقمه ماكو
ناي : هذا انمسح وماكو غير امك
مرتضى : شجابها على تلفوني
ناي : تقنعني كل الارقام موجوده ورقم خالو عمران ماكو من دونهن شمعنه
تسلم عيني مرتضى ماقصرت كومي شرهب
مرتضى : بعدني ممكمل
ناي : ميحتاج اني ولا انت نعرف كلش زين مراح يتغير شى الرقم وماكو وهذا مبين قافل على شرهب امك وخالتك خوش جابن واحد حتى يطين عيشتها اكثر ما هيه مطينه وحسبن حساب لكلشي ولو كلشي اتوقع منهن امشي نصعد
شرهب : صعدنا وعرفت ناي ناويه على الطلعه
ناي : احسبي حسابج الصبح باجر نطلع مابيها مجال بعد
حضرت كم قطعة ملابس بعلاكة سوده ودورت على جناسي مالتنا اتذكر اخذهن عبيد حتى يعقد لشرهب نزلت اركض بغرفه بيبي همزين مرجعهن بلكنتور
عمشه : هااا يمه نايه شنهي تبحوشين
ناي : ماكو شى بيبي
عمشه : وريني شنهي بيدج
ناي : ماكو شى الهويات ردت اصعدهن فوك واضمهن
عمشه : تعالي ليه يايمه
ناي : تمشيت وصعدت على الجربايه وكعدت يمها
لزمت ايدي وكالت
عمشه : الي براسج ماراه غير المصايب
ناي : شنو براسي
عمشه : لا تشردين يايمه تبهذلين رويحتج واخيتج وذوله عمامج چلاب يايمه مايرحمون
ناي : استغربت بيبي عرفت البراسي وبقيت ساكته
عمشه : انه اعرفن بنيات غنيه عبن اطيحين بيدهم ياگلوج جفي الشر وضلي الوادم الرايح ليهم موش ابرك منهن گلهن برابيك يايمه وماكلبهن رحمه
ناي : منو قصدج
عمشه : چا من تشردين وين تولين مالج مچان غير بت حبوبتك وحبوبتك مربيتلهه حيه جنهه الحيايه اليمي اطلعين من نگره اطيحين بنگرة اخيس
ناي : لعد تقبلين تتزوج شرهب
عمشه : انه لوبيه حيل اخلي الغمان يجيسوهه چا غير الطاح بيه جسرني بيج خير دوري على عمتج ماتحلهه غير خوله
ناي : هي وينها دزت مره واختفت والرقم الاجه ويه الفلوس دكيت مره عليه من تلفون مرتضى ميحصل منين اجيب عمه تكول معودت سافرت ونستنا
عمشه : يمه اسمعي چلمتي شردتج وراها طلابه ماتنحل
ناي : عساها لانحلت فدوة بيبي لتكولين لاحد وخلينا نروح بلكت خالو عمران يلكانا حل
عمشه : الزلمه غريب ومايحق يدخل والبت بذمه زلمه يحقه من السما للكاع يمه لاتصيرين علچ بحلوچهن المعفنه استري على رويحتج
ناي : اذا عدنا معزه بگلبج احلفج بلموته وبينه لتحجين لاحد بست بيبي وكمت وماسمعت كلامها
كمت وبيومها اكلنه كوه لان خايفات الدنسوي مو هين طلعت العلاكه وكلشي بيها فلوس وهويات وحطيتها جوه الدرج حتى بس ناخذها ونطلع
نمنا ونفكر شون راح يعدي علينا الجاي كعدت من ال٦ همزين الشمس تطلع من وكت لان صيف وتغير الجو كعدت شرهب وكمنا على كيفنا
نزلنا بهدوء واخذنا غراضنا وطبينا على كيف بلحمام وحده وره الثانيه بدلنا ملابسنا وجنت بليل محظره شالين اخذتهم من عمه بدعه بدون متدري حتى نلبسهم اني وشرهب ورانه طريق ويخوف
كملنا كلشي والكل نايم لابسات تنورات وقمصان مستورات وشالات وبيدنا العلاكه وطلعنا فتحنا الباب جنه كل وحده بينا تحسب انفاسها ودكات گلبها من الخوف
طلعنا وبعد نص ساعه تكعد عمه تسوي ريوك طلعنا نمشي سريع جنت خايفه لا ماكو سياره تاخذنا للكراج وصلت كيه عبريه وصعدنا ورحنا للكراج مال بغداد الجديده طبينا ولازمه شرهب حيل اخاف عليها وعلى نفسي واغلب الموجودين يباوعون علينا لان بنات صغار شابات وحدنا وبهاي الظروف التعبانه سمعنا واحد يصيح بعگوبه رجال جبير سألته يمر بمنطقه ذكرت اسم منطقه الخال لان حافظتها كال اي وصعدنا اني وشرهب ليوره ومن سألت على الكروه همزين الفلوس تكفي ٣ نفرات حجزت الوره كله حتى لحد يكعد يمنا اخاف احد يتحارش بينا كعدنا وبلسياره كلها ولد بس مره وحده دمي نشف لحد ماصعدت المره ومشت السياره اندارت شرهب عليه
شرهب : شراح يسون من يعرفون
ناي : حايط ويركعون راسهم بيه المهم طلعنا
شرهب : دايخه ونفسي تلعب
ناي : لان ما متريكه الطريق مو طويل اقل الساعه ونوصل الشوارع فارغه ودنيا صبح لان ذيج المره من اجيت ويه مهدي بسرعه وصلنا
شرهب : خلي انام على جتفج
ناي : سحبت راسها ونومتها وعيوني على الشارع والطريق وماادري السويته صحيح لو غلط
نزلنا ومنندل منين الطريق نباوع بلوجوه شون ياربي شنسوي هسه
امشي واسأل عن بيت الخال عمران هواي يكولون اسمه عشيرته جنت مااعرف امشي واسأل تعبنا من المشي ومن نظرات الناس الصافنين ذني منو بسبب الوضع بذيج السنه والقتل على الهويه جان قليل نسوان يطلعن وحدهن مو عاد بنات مراهقات لهذا الرايح والجاي بعيوونه الف سؤال ذني منو
وبقينا ساعه ونص نمشي ونسأل هلكنا وممتريكات عدا الخوف انتهينا كوه نمشي لحد ماكمنا نسأل ميأسين
فات رجال جبير
شرهب : عمو عفيه تعرف رجال اسمه عمران ابو عبدالرحمن عنده ولد اخته مهدي فوزي
عنده سياره بيكب هيج طويل ضخم وبديت اوصف شكله
الرجال : ابو عبدالرحمن وعبد الله
ناي : اي اي عفيه هو
الرجال : شون مااعرفه هذا صديقي انتو منو وليش تسألون عليه
ناي : احنا ناس دازينه عليه دخيل جنت اسمع هواي هاي الكلمة من بيبي ومره سألتها شنو معناها وشرحتها واول شى اجت بالي وكلتها
الرجال : هله بيكم تعالو بنياتي اوصلكم ليه
ناي : ترددت بالاول ولزمت شرهب هو حس بينه خفنا
الرجال : عمي انه بكد ابوجن وابو رحمن خويي ولد اخوه صلاح ولد اخته مهدي اصدقاء ولدي
ناي : اطمأنيت من ذكر اسم الولد وخاصه صلاح مذكرنا ركبنا بسيارته ليوره وبدا يسوك وادك السياره شكد عزه لوما هذا الرجال ما نلكاه لو نموت
وصلنا لمنطقتهم اتذكرها ولباب البيت وصلنا اطمأنيت ودك الباب وطلع اله صلاح نزلنا من شافنه استغرب
صلاح : هاا عمي ابوناصر
عمي ذني البنيات يسألن على عمك شفتهن بلشارع وجبتهم
صلاح : مشكور عمي مقصرت تفضل
ابو ناصر : مستعجل يابويه غير وكت سلملي على عمك
صلاح : يوصل
ناي : راح الرجال واكف صلاح ممستوعب جيتنا ومبين مباشرة عرفنا
صلاح : وحدكم جايين من بغداد
ناي : هزيت راسي اي
صلاح : تعالو طبو شجابكم وحدكم مخفتو
ناي : اريد خالو عمران
صلاح : اصيحه الج بس ادخلي يمعوده اني لهسه مثل المضروب على راسي ممصدك واكفات بلباب
ناي : دخلنا وهنا مشاعري اختلطت على خوف وقهر وندم مشينا وره صلاح عبرنا بيت مهدي هذا داخله اله جان الباب مسدود همه كم بيت وداير مدايرهم سياج جبير وباب رئيسي واحد وصلنا لبيت يمكن هذا بيت صلاح طببنا جان البيت نظيف نزعنا احذيتنا وطبينا بغرفه خطار اثاثها كلش حلو
صلاح : شويه واجيكم
شرهب : لج ناي ذوله شنو بيوتهم تخبل وشكبرها وكل حديقه اركض بيها متخلص
ناي : اي الله يرزقهم
شرهب : اني حيل جعت
ناي : اني هم والله لازم ننتظر بقينا شوي كاعدين جان يطب خالو عمران يركض
عمران : خيرج خالو صار لجديتج شى
ناي : حطيت العلاكه بصف رجلي وكتله اني جايتك دخيل
صفن بوجهي وعرف الشغله كلش جبيره
عمران : لتكولين مهزومه من بيتكم
ناي : هزيت راسي ب اي
كعد وهو مصدوم وصلاح يباوع
صلاح : رايح اصيح مهدي
عمران : اوكف انتظر خلي افهم كلشي امشي ويايه للبيت متريكين
شرهب : لا والله خالو
صلاح : خليهم هنا هسه ابلغ الحجيه تسوي ريوك
عمران : لا اريدهم يمي حتى افهم
ناي : كمنا وياه والخجل كاتلنه ماعدنا غير حل وطلعنا ومسافه بسيطه طبينا على بيت الخال تفصلهم حديقه
جانت مره كاعده بلمطبخ تسوي غدا
عمران : ام عبد سويلنا ريوك زين
ام عبد : منو ذني
عمران : بعدين
ناي : مشينا وراه وهم كعدنا بصاله حلوة محجه شى وطلع شوي واجت ام عبد جايبه صينيه بحياتنا مشايفين هيج ريوك ريوكنا اصلاً كل وحده بيضه يااما جبن نكعد ٣ او ٤ نفرات ناكل اباوع بلصينيه البيض والگيمر والزبد والجبن نوعيتين حتى الزيتون عسل ومربى
من جوعنا هواي اكلنا حتى مستحينا
عافونا وحدنا لحد ماكملنا ورجعنا كعدنا بمكانه وره وكت اجه
عمران : هاا خالو بشرو طيب لو معجبكم اخلي الحجيه تسوي غير اكل
ناي : لا شكراً اكلنا خير من الله
عمران : كلها ساعتين وره الاذان نصب ونتغدا
ناي : تريكنا مال يوم كامل
عمران : بلعافيه احجولي شصار
ناي : بديت اسولف كلشي وهو مره يباوع عليه ومره على شرهب كام يفرك بلسبحه حسيته توتر حيل وكاتم عصبيته
بعدني ممكمله جان يطب مهدي متخبل مدري منو كال اله
مهدي : شجابكم هنا
ناي : مكدرت اجاوب وخاصه اخر مره وعدته مااخابر ولا اطلب مساعده هلمره اجيت مهزومه سويت الاكبر منها
عمران : صوتك واكعد وافتهم
عمران : اجاني صلاح وبلغني مصدكت شون اطلعن وحدجن من بغداد لهنا مخفتن شنو هاي الصلافه
عمران : افهم بليه عياط وهوسه عدنا شغله جبيره متفض بعياطك البنات مهزومات
مهدي : هي هاي الكملت كتلك ياخالو لتنطيهن عين ضليت ادك هذا الحصلنا هسه امشو كدامي هسه ارجعكم
عمران : كتلك كافي واكعد
مهدي : شكعد وذني جايبات مصيبه علينا
ناي : كومي شرهب
عمران :وييين
ناي : غلطت من اجيت اني لو باقيه بلشارع ولا جايه هنا
مهدي : اي مو متعلمين على الشوارع عندج عادي تفترين بت منو بعد
ناي : عطت حييل كااااافي عفيه كل متشوفني تسم دمي بحجيك اعرف كارهني ولوما وضع اختي ولا اجي
مهدي : ذيج المره بيبيتج وهلمره اختج كل مره حجه شكل
ناي : شسوي حظي خلاني احتاج احد يساعدني
مهدي : هسه ارجعهن لحظه ميبقون هنا
عمران : على منو اجيتي انتي
ناي : عليك خالو
عمران : سمعت عليه لو تكعد بأحترامك وصوتك مااسمعخ ياتطلع
مهدي : خالو وتالي وياك
عمران : من طبيت لهسه ساكتلك ذني دخيلات عندي من شوكت انرد الدخيل يمهدي لو نسيت شهامه الزلم ونخوتهم هذا العلمته الك
مهدي : خالي رحمه لابويه كتلك الف مره روحي جوه رجلك گلشي أمر مو تطلب اله سالفه ذوله ابعدهم عنا رحمه لاخوك وابويه
عمران : وتعرف كلش زين مااكدر اردهم اكعد وانطي صبر وافهم كلشي وبله صياح وصلت حدها وياك
ناي : كعدنا ورجعت عدت الصار واباوع على مهدي وهو يحرك رچله ويقرض اضافيره طلعت اكو صفه مشتركه بينا اثنينا من نتوتر ناكل اضافيرنا من التوتر
مهدي : والمطلوب هسه نبقيكم هنا
ناي : اني مفكرت شريد ردت شى واحد اختي متتزوج
عمران : نشوف شلون نحلها كوم مهدي ويايه نبلغ عمام البنات لان منريد سمعتهن تطلع على انهزمن وسون شى موزين
ناي : لا عفيه خالو
عمران : ليش نسيتي سالفه شرهب من بقت ٣ ايام بسلمان باك شون عمامج طعنو بيها مااريد ينعاد الوضع واني راح اكول اجه مهدي واخذكم بحكم هو ابن خالج اني اذا كلت اجيت يحقوني بس هذا ابن خالج تخف السالفه
البيت بيتكم وراح اوصي ام عبد روحو ارتاحو وياها ويصير خير
الوكت كله شرهب ساكته
شرهب : حسيت روحي ورطت اختي وذليتها واذيتها وهي متحمله كل هذا علمودي
حرت شسوي واخفف عنها گلبها محروك ومتعرف شتتصرف حتى مااتزوج
ناي : اجت ام عبدالرحمن ودخلتنا بغرفه مال بنيه كعدنا بيها ومحجت اي شى ولا سألت وره ساعتين اجه الغدا جنا شبعانين و هم اكلنا
مر اليوم وكلشي ماكو حتى خالو من اجه شافنه ساكت منعرف بشنو يفكر ومهدي مشفته كال نامو وباجر الها رب يحلها
شرهب : بليل انحصرت اريد اروح حمام وكمت الوب طلعت مديت راسي جانت ناي نايمه كلت اكيد قريب كمت افتر على كيف جان اسمع صوت واحد
ام كوشه شتدورين
شرهب : كمزت من الفزه انت منو
عبدالرحمن: هم نزل وهم يدبچ على السطح اني ابن ابو البيت عبدالرحمن
شرهب : واني
عبدالرحمن: الي يشوف كفشتج مينساج اسمج شراهب
شرهب : اسمي شرهب
عبدالرحمن: ام كوشه احلى شتدورين بليل
شرهب : استحيت اكول وكتله ماكو شى ردت ارجع جان يكول
عبدالرحمن: الحمام ذاك
شرهب : مشيت مستحيه ورحت دخلت ومن طلعت اغسل جاان يمد ايده هااج
شنو هذا
عبدالرحمن: حب شمس
شرهب : اني كلش احبه اخذت منه شكراً
عبدالرحمن: بله هاي شكل وحده تتزوج
شرهب : شسوي غير عمامي
عبدالرحمن: يله حتى الياخذج من كفشتج ينهزم اكيد كلها كمل شو متحگين
شرهب : هاااك رجعت الحب بيده جان يضحك
عبدالرحمن: هاااج كرزي وراج بلاوي منا لشهر من وراج لازم ماالفي للبيت لان اكيد عمران راح يطلع حرگته بطيوري اروح اشوفلي بيت يلفيني من شفت كفشتج كلت ياستار منها هههههه
شرهب : عافني وراح بعد ماحط الحب مره ثانيه بيدي هذا شبي خبل واني هم رجعت للغرفه كملت الحب البيدي ونمت
ثاني يوم كعدنا على هوسه
شرهب : شصاير عفيه
ناي : والله ماادري
لبسنا شالاتنا وطلعنا نباوع وين هاي الهوسه
شفت نسوان اثنين ام عبد والثانيه مدري منو
والصاله مسدوده وصوت رياجيل ميزت صوت عمامي
كمت اكمز من الخوف جان الصوت عالي اجت ام عبد
عفيه خاله شكوو
ام عبدالرحمن: اهلكم اجو وجايبين رجل اختج وجاي وياهم ناس شيوخ وصارت هوسه جبيره وهسه ابو عبد دز على جبيرنا ومبينه السالفه كلش جبيره الله يستر طبن بلغرفه لحد متفض واني هسه اجيب الريوك الكم
شرهب : منريد شى خاله بس نريد نسمع
ام عبدالرحمن: ادخلن بنياتي وداد حاده سنونها عليجن بس تلمحجن تمرعدجن مابينه حيل لسانها منا سالفه الزلم عيب يطلع حسنا والبيت مليان شيوخ
ناي : اخذت شرهب وطبيت للغرفه
حالنا تعبان وضعنا تخربط معرفنا شنسوي
وللعصر وهذا القلق عايشين بيه لحد مطبت ام عبد وصاحتنا كالت خالو ومهدي يردونا
جنت لازمه اختي مثل الجاهل لا اخاف يضيع دخلنا عليهم والوجوه مگلوبه كعدنا واحنا ننتظر حجايه تبرد گلبنا
كعدنا والسكوت هو سيد المكان لحد ما خالو كال
عمران : بنتي ناي سوايتج من طلعتي من بيت عمامج جبيره وماتنقبل بعرفنا البت التشرد بعرفنا تنذبح وعمامج ميخافون الله لزموها عليج وعلى اختج والمصيبه شهرو بيجن اني وبلغو حتى رجل شرهب واتفقو وياها يحسبوها عار شكد شايف انذال بكدهم مشايف ازبل خلك الله حسبي الله عليهم حرامات الشارب الحاطي كوون ادوسنه بلقندره حشه اكول بوجهكم
ناي : تالي خالو شصار
ولان شرهب الها رجال يحكمها كال اني اخذ مرتي واني اربيها بعدها صغيره ومتفهم وضل الدك عليج
ناي : حضنت اختي خالو فدوة اجيتك من بغداد اختل بسدك من شرهم تالي اشيل وانطي اختي ماسويت شى جان بقيت ولا طلعت اني مااريدها تتزوج
عمران : مايفيد لو ما عاقده جان هواي فرقت واذا اخذها تشهد عليهم غاصبيها راح يأذوها بلزايد المشكله اني لا ابوها ولا من كرابتها حتى من كعدو الشيوخ ماقبلو احجي شكد حاولت افضها مارهمت يله كد شويه مهدي يحجي بحكم هو ابن خالج ولان هي اختج من ابوج مارضو يجيب طاري شرهب
ناي : اني اخذها واروح اشتكي عليهم
مهدي : ميفيد البنيه عاقده واغلب الشرطه هسه ياخذون جم فلس ويسدون السالفه ناس ذباحه يدفعون فلوس ثاني يوم يطلعون متردين مثل سالفه اختج ميفضوها ويطمون السالفه وميصعدوها للقاضي الف طريقه يخلون شرهب جوه اسنانهم وراح يأذوها وعمامج جلاب مراح يسكتون
ناي : والحل
عمران : اني لو اطلبين حالي ومالي كله كدامج بنيتي مااقصر بس سالفه شرهب عويصه ريحتج اجيتي قبل عقدها جان وروح اخوي ازوجها ابني واسد حلوكهم همه عشائرياً حگوني وجتفوني
ناي : مااخليها تروح امشي نطلع منها
ردت اتحرك جان يجرني مهددي كاافي عناد من البارحه لليوم طاح حظنا من وره سوايتج نروح ونجي ونتوسل وتوسطنا ناس وشيوخ ومارهمت كلها ويه هذا الاسمه عدي انتي حيري بروحج يجوز عمامج يأذوج
شرهب : لا عفيه اتزوج واروح بس ليأذون ناي
عمران : بتي ناي رجعتج لهناك راح تگضي عليج وتنهيج اختج رجلها كال اني مسؤول عنها بس عمامج يردون يأذوج ومن عيونهم عرفت وراهم طلابه اني حتى احافظ عليج طلبت ايدج منهم كدام الشيوخ على الاقل اكدر وحده بيجن متتأذه
ناي : اني واختي سوه مااروح لمكان بلياها
مهدي : واحنا ما مجبورين ندخل بدم من وره اختج كافي من وراها صارت مشاكل گبل وضاعت خوه فوزي وذكرى وتاليها ماتت امج وراها ابويه خليني ساكت هاي من اجت كل الشر اجه وياها اني اذا رضيت على سالفه خالي اكراماً لامج اما بت ابوج مالها مكان عدنا
ناي : كمت ابجي ومااسمع كلامهم انهاريت غلطت من اجيت هنا هم راح اسلم اختي الهم
شرهب :كاعده ولابسه البدله البيضه هي حتى مو بيضه سمره لونها لان قديمه وشعري مشيول ومكياج مال بيت وذني الحيايه متشمتات ويركصن ومكيفات دك وهلاهل واني ساكته منتظره يجي ياخذني الراح يربيني من جديد
وعيوني تباوع الكل موجود عدا ناي العفتها هناك بديالى مكسوره
وبالي يمها لان عبدالرحمن خرب الاول والتالي ولازم مهدي يحل الموضوع
يتبع .....