الأبواب الخمس

ب٢٣

#الابواب_الخمس
البارت الثالث والعشرون
للكاتبه Reem

بجينه ومالكينه دموع بالعين
بس بگلوبنه صدك بجينه⁦
صدگني الزمن أمتعب الروح
ورغم كل التعب لا مانسينه
ومرات الفراگ يباعد الاحباب
ولاوينه البعد بثنين ادينه⁦
مو نص الدرب نتفارگ انه وياك
نكمل الدرب من حد مابدينه
ونوصل للنهاية ونحلف هناك⁦
وكل الناس خل تسمع حجينه
احنه اثنينه نتشارك بروح
وبس الموت فركنه  وكدر علينه

خوله طلعت من باب المطبخ بعد ما تأكدت ساهره وصالحه ملتهيات
لكت فوزي باب بيتنا واكف لان جيران واكفين واخوتي بعد مسافه عنها بس صمد ماكو
جان تصيحه وكف متفاجئ منها تقرب عليها خير تفضلي
خوله : عندي شغله ضروريه لازم تعرفها
فوزي : احجي اسمعج
خوله : اتلفت على اخوتي اخاف يشوفوني
مو هسه مااكدر احجي تشوف اخوتي موجودين كول اريد جهال ذكرى حتى امك تشوفهم واني بيدي اخذهم لاهلك وانت تعال هناك واسمع مني

فوزي : لهاي الدرجه الشغله متتحمل تتأجل
خوله : ابد ولازم هسه صدكني الشغله تخص ذكرى اني رايحه وانت بكيفك بعد تريد تعرف سوي الكتلك عليه
ورجعت امشي ولا كأن الوضع طبيعي صار بوجهي جوحي

جوحي : شعندج ويه فوزي واكفه وبلشارع تخبلتي
خوله : الرجال لمحني  من بعيد وصاحني وكال اريد جهال ذكرى الله يرحمها
جوحي : وشطلعج ولمحج
خوله : اريد اخذ القماشات للخياطه حتى تخيط النا هدوم سود ماعندي لا اني ولا بدعه لازكين بهاي الملابس

جوحي : طبي جوه وبعد لتشوفيني وجهج
خوله : اكله اريد اخذ القماش
جوحي  : وينه القماش
خوله : هو كعد انتظر بدعه تجيبه من فوك وطلعت وشافني فوزي وصاحني وهو شنو تحقيق تره موتتني تكول مسويه مصيبه وجاي تحاسبني عليها

جوحي : طبي جوه وبله لغوه زايده
انداريت امشي واجه فوزي
فوزي : ابو مرتضى اذا مصارت زحمه اريد جهال اختي الحجيه تريد تشوفهم
جوحي : هاا هسه ادزهم الك
فوزي : ولو ازاحمج اختي ومن رخصته لابو مرتضى ودي الجهال لامي لان وضعها كلش صعب
جوحي : خلي نشوفهم اخاف نايمين

فوزي : اني مكلت لا لابوهم ولا عبيد لان كلت انت الك كلمتك وميحتاج ارجع للاكبر منك
جوحي : اي اكيد الي كلمتي خوله اخذي الجهال للحجيه ورجعيهم بيدج
خوله : مااشي طبيت ركض لكيت بدعه تاكل بأضافيرها من القلق
بديعه : يمعوده وين صرتي مو دمي نشف وشفت جوحي يحجي وياج كلت لزموها

خوله : شكد جبانه ياربي وين الجهال
بديعه : ياجهال
خوله : جهال المرحومه يونس وناي انطينياهم اخذهم لبيت اهلها نص ساعه وارجع
بديعه : ماطول بعد بيها مجال خوله فدوه جفي الشر وعوفي كلشي ربج ياخذ حوبتها تره الراح اتسلمي لاخوها اخوج
خوله : وين الجهال وكافي ادوخيني

بديعه : لو على قبل ينطيج گلبج هيج تسوين بأخوج
خوله : مامسويه شى غلط اني احجي الحق يريد اخوها يرفع شكوى يضربه يكتله هاي مشكلته مو مشكلتي المهم مااسكت واضيع حق المظلومه هذا بعد جم يوم تبرد السالفه ويروح يتزوج وحده ويجيبها هنا ويجوز يرجع جليله ينطيج گلبج ياام گلب رهيف وحده تنام بفرشت صاحبتج

يرضى ضميرج ياصايمه ومصليه والي تعرفين الله تشوفين الكتل صاحبتج يجول ويصول ويه مرته الثانيه وذيج المكروده سكنت التراب وهي بعز شبابها
عدا مرته الراح يجيبها واني متأكده هو مثل الچلب يحب العظم راح يركض على جليله ويجيبها بمكانها شوفي شراح تسوي بناي ويونس وتتفرعن هنا بلبيت وتاخذ مكان ذكرى ينطيج گلبج احجي شبيج بس تبجين

بديعه : تخيلت المنظر متت بدمي
خوله : لعد اسكتي واطلعي منها انتي سوي الي دوم تسوي تشوفين كلشي وساكته
بديعه : وشفادني الحجي اول مره اصير سباعيه واواجهه واحجي خسرت صديقه عمري واختي
جانت ذكرى منطتني القوه والجرئه وراحت منو الي بعد ارجع مثل قبل انجب وابلع لساني

خوله : وهسه هم ابلعي لسانج وجيبي الجهال الوكت راح واخاف عبيد لو فلاح يعرضون على روحتي وميقبلون
بديعه : رايحه وركضت دخلت لغرفة عمتي
تعال عمه اخذ اختك وعمتك خوله تنتظرك بلطرمه
يونس: مااريد اروح
بديعه : كومي حبيبي عيب عمه تنتظرك الزم اختك من ايدها ولتعوفها ابد
يونس : تعالي جيبي ايدج
ناي : وين الوح (نروح) يويو
يونس : نشتري مصاص
ناي : اليد نونايه
يونس : صغيره خطيه منكدر ناخذها يله امشي

خوله : طلعو الجهال سحبتهم واخذتهم جانت رجلي مو تمشي تركض اريد بس ادخل بيت اهلها كلت بس يشوفني عبيد مراح يخليني دفعت الباب لان مفتوح وطبيت لكيت باب الاستقبال مالتهم مفتوح وبيه ام ذكرى واثنين نسوان ويبجون كتلهم اركضو على بيبي بوسوها
وهمه ركضو وهي عاطت تحضن وتبوس بيهم اني عفتهم ودخلت للمطبخ اروح واجي اريد فوزي يجي زين مرته وين شو ماكو احد شنو السالفه واني صافنه طب فوزي

فوزي : تفضلي خيتي احجي تره شغلتي بالي وكوه سحبت نفسي من الجماعه
خوله : شوف اني اليوم اجيت حتى ابري ذمتي كدام ذكرى اذا تواجهنا بيوم القيامه وكالت ليش ماحجيتي الحق اني انسانه مااكلك مخلصتها ركوع وسجود و٢٤ ساعه بلدين  اصلاً حتى صلاة مااصلي بس ضميري تكدر تكول عليه صاحي ومااخاف من كلمة الحق

فوزي : وليش هاي المقدمات كلها
خوله : انت ظلمت اختك يوم معفتها وانطيت ظهرك الها وهاي السنين كلها تعاني بيها بذاك البيت وتعرف كلش زين مامرتاحه ومتأذيه ومهتميت  اني مجايه ازيد الطين بله ولا جاي ازيد همك البيك كافيك بس مااعتقد ترضى اختك تموت كتل جفل وجهه انگلب وعااط

فوزي : گتل شنو
خوله : اختك ما وكعت من الدرج اختك انشمرت منه
وبديت احجي الصار وهذا تكول بركان وطك عيط عياط وشكو غراض على السنك كسرها اني جفلت وخرت على صفحه اجت امه تركض

ام فوزي : يمه شبيك اسم الله الرحمن
فوزي : يمه روحي يم الجهال
ام فوزي : باوعت على خوله استغربت وكفتها ويه فوزي
فوزي : يمه روحي يمهم
ام فوزي : اي يمه هسه بس على كيفك العالم يمنا وفزو من وراك تكول كسرت البيت مو المواعين شجاك شصار

فوزي : مصار رحمه لموتاج روحي
ام فوزي : ماشي رايحه
خوله : عفيه على كيفك افهم كلشي
فوزي : شفهم من كل عقلج افهم اليوم احرك اهلج وصمد وكل البيه
خوله : اني من اجيتك حتى بس احجي الحق مااكولك لتحرك وتتعارك وتسوي بس على كيفك اي تعدي هسه راح يحبسوك ومتحصل شى قبل سبقت ايدك عقلك وشحصلت دخلت سجن وتاليها المرحومه رجعت واني متأكده مو بوعيها

فوزي : تعرفين انتي هسه شسويتي كعد تنطين اخوج للموت
خوله : اني مااحدد شنو الراح تسوي اذا تحب تشكتي حط في بالك محد راح يشهد وياك وحتى اني لان اكيد اخوتي راح يمنعوني
فوزي : شنو مصلحتج من هذا كله
خوله : كتلك كلمة الحق

فوزي : لهاي الدرجة وصلت بيهم النذاله يطعنون بشرفها لج حتى نجم اذبحه
خوله : ابو مهدي ان تجي للحق جانت اكو مشاعر بين المرحومه ونجم بس وروح ابويه وروحها الطاهره مصار شى بينهم موزين جان نجم رايدها وصمد خطبها قبله وشغله راحت وانتهت بس الشيطان بعد دخل وخرب كلشي والشيطان نسوان اخوتي ومرت نجم وتره نجم حابسي لان كال بس الزم صمد اكتله خلاص

اختك شريفة والعيبه متطلع منها وسوت بيتنا المحد كدر سنين يسوي وبلحظه وحده خسرت كلشي اني لازم اروح حجيت كلشي والقرار الك ورحمه لروحها لتجيب طاري اني كتلك
فوزي : روحي الله وياج
خوله : طلعت للاستقبال ام فوزي تباوع عليه سحبت الجهال وكتلها اجيبهم غير مره خاله من رخصتج لزمتهم وطلعت اتمشى
يونس : عمه ماما بعد مترجع
خوله : اي حبيبي مترجع
ناي : لاحت تجيب نفاخ
خوله : الله يعينكم راح تشوفون يله تعالو اشتري من الدكان وارجعكم

بديعه : الوب اروح واجي وامرد بيدي ياربي دخيلك
صالحه : شبيج تلوبين جنج عندج طلوكه
بديعه : مالج دخل بيه
صالحه : ياا قحط شبيك عيني حتى بوجهي متباوعين
بديعه : كتلتي اختي وتردين احجي وياج بعد
صالحه : اني شكو يمه منو كال الها تحط عينها على حماها خلينا ساكتين واذكرو محاسن موتاكم

بديعه : ينكص لسان اليحجي عليها ذكرى اشرف منج ومن كل واحد بهذا البيت النكس
ساهره : ماكو غيرج النكس يانكسه هاي عليمن ولج لا عبالج ذيج موجوده بعد وتختلين بسدها وطلع الج لسانها اكصه واعلكه برگبتج وانومج بصفها
بديعه : عمي كويات ومتخافن الله وكل المصايب من وره راسج وكلشي اتوقع منجن الكتلن مره يكتلن الف مره وبگلب بارد بس اتذكرن شى شكد متكونين قويه اليوم ربج اقوى واعظم ويجي يوم يطلع حوبتها بيجن

صالحه : هاي صايره تهذري مأثر عليها موتت ذكرى هاي مكان متشكرينا شلنا الفاتحه كلها جايه وتغلطين
بديعه : لا خلف الله عليكم ولا على اي واحد
ياريت مامديتو ايدكم على شى ماشايفه هيج قباحه هم موتن المره وهم توكفن بفاتحتها زين الموت الها رهبه يعني هيج مأثر بيكم ما فكرتن وكلتن شسوينا احنا
اخاف الله بعدين يطلعها بينا معقوله ماكعدتن ولو ساعه ويه نفسجن وتندمتن

ساهره : والله مو احنا اللعبنا بذيلنا وحطينا عيونه على حمانه ولا نتختل بليالي بلمطابخ
مرت نجم وعاطت وتعاركت ادافع عن رجلها وصمد عرف وصعد الدم براسه رجال ومن حقه غير شرفه احنا شكوو بعد كل شويه وذابه الصوج بينه
خوله : هااي ام المطابخ تسوه راسجن التراب النامت بيه اشرف من عشيرتج كلها ياام الوصخ يونس اخذ اختك وادخل بلغرفه

صالحه : اجت الثانيه تكول عصابه ومتحالفات امشي ساهره خلي يولن ذني الحجي وياهن يتعب فوك زينيتنا صار ٤ ايام الفاتحه على راسنا
خوله : عسى كون راسج بلوحل يصير واتشمت بيج اوووف كون الله بس ينطيني عمر واتشمت بيج كلشي مااريد من الدنيا

صالحه : متشوفين هذا اليوم لو تموتين
وضلن اطحنن هنا وجع كون بگلبجن مايوكف بعينكم شى
بديعه : اخذت اختها وراحن للهول
انداريت على خوله تأخرتي يمصخمه
خوله : متأخرت بس انتي جبانه وضاله ترجفين وكل دقيقه عليج بساعه

بديعه : اي والله وتالي شصار
خوله : حجيت كلشي اله وهو بعد بكيفه
بديعه : معدتي انلوت وگلبي يوجعني راح اخرب من الخوف
خوله : مشي الوضع طبيعي اي حركة غلط راح يحسون اني الحجيت
بديعه : وعلى اساس شكد خايفه انتي
خوله : مخايفه بس مااريد يصيرون رياجيل براسي

بديعه : دخيلك ياالله عديها سلامات
خوله : لا بالله بعد كل هذا وتعدي روحي اشربي شى دافي وغطي معدتج ام سلامات
بديعه : دخلت للغرفه وسحبت الجهال وصعدت ليفوك اعدل غرفه المرحومه واشوف حل لهذا الوضع الجديد
اباوع كل ركن بغرفتها اول مره ادخل غرفتها وره وفاتها حتى الملابس وغراض الجهال خوله متكفله بيهم
باوعت بلكاع علاكه اني شفتها وكمت الطم افتح بيها واعيط
ولج مالحكتي تلبسيهم هدوم العيد ضلو اخلافج يتامه تمشين وتكولين هذا حلو على يونس هذا حلو على ناي وهذا يخبل على خدود شرهب ولج تعالي شوفي حالهم
وينج يم گلب الطيب شلعتي الفلس من زردومج حتى تشترين هاي الملابس

خوله : دخلت اركض سمعت عياط كلت خاف صار شى للجهال لكيت بدعه بلكاع تلطم وحاضنه الملابس
بديعه : شوفي ذني التفتر عليهن وريكها ناشف ذني الكالت افرح جهالي بيهن ذني المارضت تشتري دشداشه جديده كالت اخاف ميكفن الفلوس همه اوله ولج ياريت مارحتي ولا اشتريتي عسانه لا عيدنا ولا اجه العيد

خوله : كافي خوفتي الجهال
بديعه : شيبرد نار گلبي وهي وحدها تدرين نسولف ونضحك وتكولي بدعه اريد شربت نومي بصره من ايدج سويلي سراحيه كامله بداعتي اريدها بارده ترد الروح حتى من افطر اشرب نصها ميته عطش لهسه ترن بأذني احجايتها ميته عطش وتالي ماتت وراحت روحها

خوله : وتردين اسكت على السوه ااااااااخ
باوعت على يونس حاضن ناي ويبجي
تعال حبيبي تعاال لتبجي
يونس : اكرهه بابا هو الوكعها
خوله : الله ياخذه الحقير كافي اسكت اختك خافت وانتي الثانيه كافي الجهال يخترعون
بديعه : مو بيدي والله مو بيدي كل شبر هنا ايدها بيه ملابسها ريحتها سجادتها سبحتها
شوفيها شكد نظيفه ومعدله حتى هدوم جهالها تصفط بيهم اكلها مابيه حيل اني اشمرهم شمر بلسله تكول لا احب اصفطهم حتى ماادوخ والملابس هم تبقى مرتبه

خوله : هي معدله ونظيفه من كلشي الله يرحمها اني راح انام هنا يم الجهال
بديعه : وصمد
خوله : راح يولي للبصره امي صاحته وكالت من باجر تروح للبصره
بديعه : مسحت دموعي وكتلها شعنده هناك
خوله : تهزمه امي كالت اخاف يصير شى وهم حتى تعوف نجم يرجع للبيت طولت حبسته

بديعه : ولشوكت يتهزم من نجم
خوله : على كولت امي من تبرد النار وتهدا الگلوب جوه انزلي مجتمعين والمسمومات كاعدات وحاطات رجل على رجل
بديعه : بنات الگلب لو يوميه اكوم واكعد وادعي عليهن ميبرد گلبي

خوله : راح انام هنا يم الجهال واني وياج عينه عليهم وعكب باجر دوام يونس خلصت عطلتهم بعد ولازم يداوم
بديعه : سوده عليه جانت هيه ادرسله وياه وياه
خوله : اني ادرسه ومنا وهيج خلي ذني يشاركن بشغل البيت الجانت شايله البيت على راسها ماتت
بديعه : عساه انهجم على راسهن وراس امهن الحيه راح انزل اكول لعمتي هيه تحجي وياهن اني بعد لساني ميطخ لسانهن الجلبات

نزلت ولكيت عمتي كاعده وكبالها صمد وجوحي وفلاح وعلى صفحه كاعدات الحقيرات
عمشه : يمه اسمع الچلمه ولا تعل افادي چا شنهي فوك دكت الماتسولف ماترد تروح للبصره
صمد : ماسويت شى لحظه عصبيه وكعت قابل متقصد اكتلها والصحيح نجم ينهزم ويختل مني مو اني شنو كله عدكم بلمگلوبي

عمشه :يمه اخيج ماجاس مريتك وماتكرب عليها يشهد الله وروح ابيك الطيب الوليد رادهه على سنه الله وقسمه وماصارت ومن صارت الك بعد ماتكرب منها وصارت حسبت اخته ومايوم طلعت العيبه منه ومن المرحومه لا تظلم بختها البت بيد ربك الحين ولاتشيل ذنب فوك ذنب كتلتها گلكم تعرفون ذكرى البت شريفه ومتدينه وتخاف الله وجنهه جمار ومايوم اذت احد ولا كدرت خاطر احد وجانت شايله هذا البيت على راسها چاشنهي نسيتو وانت يلمصخم وملطم البت تزوجت عليها وخذت بتك وحسبتها ضناها چا نسيت الظيم العاشته من وره راسك

صمد : تقنعيني نجم متحارش بيها
عمشه : اسكت يلاغم لا بارك الله بيك  اكله حسبت اخته والبت سكنت النجف چا لهسه الشيطان متربع براسك نعله الله عليك وعليه
صمد : يمه اني اذا شفت نجم والله يمكن اكتله خلاص

عمشه : حلت الك الشغله يبن عمشه چا شنهي تايهين الك لا تهدد وتوعد وحط القندره بحلكك وبسك تهوبز وهاي جدام اخوتك لون مسيت شعره من نجم وحك هو علي ابلغ عليك واخليك تخيس بلحبوس
صمد : اعرف بيج تسويها غير الشغله مست عزيز گلبج
عمشه : گلكم عندي اعزاز ولون موش اعزاز يصمد چا هسه انت كاتلك الهبري ويه الحراميه وبلسجون انه سكت الكل لون مايمسك شى ولا اخيها يحس ويكتلك

صمد : هسه شتردون مني
جوحي : تروح للبصره لبيت خالتي وجاسم راح ينتظرك خابرته بالارضي على جيرانهم وكال خلي يجي وهو يختلك فتره ومن انشوف الوضع كلشي ماكو عود ارجع
صمد : باجر اولي للبصره
عمشه : اليوم يمه لا تأخرها
صمد : كتلج باجر يمه احظر غراضي وشغلاتي وماعندي فلوس اروح
عمشه : انه اخذ من اخوتك وانطيك
جوحي : اني ماعندي مفلس وتعالي كولي فضل الفاتحه وينه الدفتر انترس وكلها الحسابات جانت عندك

صمد : غير صرفنا اكل وشرب ٣ ايام
جوحي : هم متغسر الفاتحه لان جماعه اخوها كومه وانطو خوش فضل وعندك خوال ولد فوزي جابو ٣ طليان وذبحوهن عدا كواني التمن وتنكات الدهن والثالث سويناه بفضلهم وصار خير من الله وانت فلس مصرفت
صمد : جاي تحاسبني كتلك ماعندي
جوحي : واني هم ماعندي وماانطي فلس تردون انتم انطوه

بديعه : فوك ما موتتها تاكل فلوس عزاها
فلاح : اسكتي بدعه
صمد : مالج دخل الله اعلم شضامه غير انتي تكهه وسرها وياج
بديعه : حرامات ذكرى جانت مرتك انت جان المفروض تتزوج وحده مثل ذني لو جليله هنه كافيان عليك
صمد : سكت مرتك فلاح لهسه لازم نفسي عنها
فلاح : لو تصعدين فوك لو ترحين للمطبخ كلمة ثاني تصير موزينه
بديعه : سكتت وانجبيت

عمشه : يمه انه اطيك فلوس بس ولي وفض السالفه
دخل عبيد
هااا يمه شفت اخيك
عبيد : اي يمه رحت واخذت اله اكل مثل الثور الهايج هو يشوف واحد من عدنا يتخبل بلزايد حار شسب شغلط حتى كفران كفر فاقد ابنج ويعيط كتال صمد اني
صمد : والله خوش المره مرتي وهو يگتلني لان دافعت عن شرفي غيره واحد يختل ويخاف اني اذبحه على دكته الناقصه بيه العديم الشرف العار
عمشه : بسگم يبوووو على حظي وانت عبيد باجر يولي صمد للبصره وترد نجم للبيت اريدن اشوفه واهدي باله بلكت الله يهدي ويركد

عبيد : باجر العصر اجيبه
بديعه : عمه بعد اني مااشتغل كل البيت الجانت شايلته الله يرحمها هاي جناينج يمج واحجي وياهن
عمشه : تردن مثل گبل وحده الغدا عليها ومواعينه والثانيه العشا عليها ومواعينها وانتي يبدعه تنظيف البيت عليج والخبز
وكل جمعه ساهره وصالحه عليجن تنظيف البيت من فوك ليجوه
صالحه : شطلعت هاي عمه هوايه
عمشه : شوفن بعينجن المكروده شحامله من ضيم وتعب الله يرحمها

بديعه : كل واحد راح لغرفته جنت حاطه ايدي على گلبي ومنتظره شنو يصير خوله ولا يمها
ثاني يوم راح صمد للبصره ونجم مقبل اصلاً يطب البيت كال يحرم عليه وعمشه ادك وتلطم
كعدت الصبح رجع الدوام خلص العيد الاكشر صار علينا
خوله تبدل ليونس وهو الدمعه بعينه
خوله : شبيك عمه
يونس : اريد ماما
خوله : اوووف منين اجيبلك ماما ياعيني يله حبيبي وراك مدرسه صير شاطر حتى اوديك عليها شو تعال انطيني بوسه وين بوستي

باسها ونزل ومرتضى ومهند وياه وبان وسما
سوت بديعه اللفات الهم وراحو
خوله : شبيج
بديعه : هيج وكت تكعد تلوب على ابنها اكل شرب اخاف وكع اخاف تإذه وتوكل بناي شون بينا تعبانه حيل خوله حيلي راح من راحت البيت گبر صار عليه
خوله : قسمتها هيج يله تعالي نصعد انشيل ملابسها من الكنتور ونطيهم ثواب على روحها

بديعه : كل قطعه الزمها اصرخ بعلو صوتي مكدرت اكتم قهري ولا لجمت روحي جنت اشيل ملابسها اشمهن وابوسهن واحطهن
اشوف شون نظيفات رغم قديمات لكيت ترجيتها سحبتها وضميتها لناي والحلقه هم شلتها كلت اخاف هذا صمد الخايس ياخذهن اقلها اضمهن للجهال
كملنا كلشي واني وخوله ما بطلنا بجي متوقعت خوله هيج تحب ذكرى اعرف بيها كتومه وجانت تضحك وتسولف ويانه بس مجانت تبين محبتها بس للجهال ومن ماتت عرفت خوله شكد تحبها

ايام ظلمه موحشه مالها طعم اختفت الضحكه من البيت واختفى صوت القران الجان  يشتغل كل عصر للمغرب وراها صوت الاذان يعلى بلبيت وتجي اتجرنا كوه للصلاه
اختفى كل طعم حلو موجود ورجع البيت خنكه ومتعب ومؤذي واني عيني على الجهال وخاصه شرهب لان حيل صغيره ومااعرف شسوي حتى اكدر اداري ٥ جهال صارو برگبتي رغم خوله ويايه بس مو مثل مجانت ذكرى

مرالاسبوع الاول وبعده الثاني وبعد يومين الاربعين مالتها الايام تركض ركض وكل ميفوت يوم نشتاق الها ونشتاق لكل شى يخصها
صالحه وساهره سكوت مالهن حس ولو بعد على شنو يطلع صوتهن الجانن ضايجات منها موتنها وارتاحن
عمشه : يمه بدعه بدعه مو اصيح
بديعه : هاا عمه جنت صافنه خيرج
عمشه : يمه لاتنسين اربعين اخيتج والكليجه والحلاوه والخفيفي عبن ناخذه للمكبره انثوب على رويحتها
بديعه : اي عمه عجبنت وفد شويه اسوي اكلج عمه شو اهلها صنطه
عمشه :ام اسماعيل تكول ابوهه مريض بلفراش الزلمه طايح والمره حايره بيه

بديعه : وزوجة فوزي ولا اجت للفاتحه ولا حتى وره الفاتحه
عمشه : كطعيه اعرفن بيها ينكط السم من عيونهه خليها لا هله بيها شلنا دخل عساها لا اجت ولا شفناهه
بديعه : كعدت بلكاع وجبت العجين واجت ناي وبان يمي يلعبون بلعجين
وبلال مدد ويباوع ويضحك ويه ناي وكل شويه تكرصه من خدوده وهو يضحك الها
باوعت عليه ياريتني مثلك مااعرف شكو بلدنيا طشت رشت

صافنه عليهم ودخل عبيد يركض
يمه يمه
عمشه : يااا وغمه شنهي خرعتني شسودنك
عبيد : يمه صمد ماكو
عمشه : كامت وكفت على حيلها ولطمت على صدرهه شنهي اخيكم موش بلبصره

عبيد : اي يمه ومن البارحه طلع كال لجاسم عندي شغله يم ولد صاحبي والروحه روحه وشحار شسوه جاسم گلب البصره ومبقى واحد مسأله عنه ماكو تالي دك على جيرانه الصبح عباله رجع لبغداد واجاني ابو حسين يدور عليه وكلي راح يدك بعد ساعه وجنت منتظر ومن جاوبت جاسم حجالي كلشي وكتله صمد صار شهر مندري شى عنه من يوم مااجاك

عمشه : يمه وليدي يمه دخيلك ياابا الحسن دهر الصابك واكف جدامي واخيك ماله حس لك انعل شيب الخلفك اخذ اخوتك ونبشو الكاع عليه اريدن صمد يعبيد اخافن طاح بيد اخيك نجم
عبيد : مانعرف وين فلاح مارد
بديعه : فلاح فوك نايم
عبيد : كومي صيحي بسرعه شمنتظره
بديعه : ركضت وبيدي العجينه وكعدت فلاح
كووم اخوك ماكو

فلاح : يااخ
بديعه : شبيك صحصح ويايه صمد ماكو من البارحه لليوم يدورون عليه
فلاح : لا بربج
بديعه : اي والله كوم عبيد گالب الدنيا
فلاح : اي نازل
هو نزل واني ركض لغرفه ذكرى بيها خوله نايمه وبصفها شرهب
كوومي كوومي
خوله : شكوو نعسانه عوفيني
بديعه : جنه اخوج وكع يخوله
خوله : كمت بطفره من مكاني وعيوني مورمه اريد استوعب يااخويه
بديعه : اخوج صمد ماكو من البارحه يا وكع بيد نجم يابيد فوزي وبلحالتين اقري عليه الفاتحه

خوله : منو كااال
بديعه : هسه اجه عبيد ويعيط جاسم مخابره من البارحه مفقود
خوله : نبض گلبي بقوه رغم السواه يبقى اخويه بس من ارجع واتذكر سوايته بيه وبذكرى يرجع گلبي يقسى
معقوله فوزي لكطه صار اكثر من شهر من كتله وهو هدوء
بديعه : يجوز جان يدور عليه لتنسين هو بلبصره مو هنا كدام عينه والشغله مو هينه

خوله : وامي وينها
بديعه : امج ادك وتلطم هسه شنسوي
خوله : هاي شنو بيدج
بديعه : شوف هاي وين حايره
خوله : غير اعرف
بديعه : عجين مال خفيفي ثواب علمود الاربعين
خوله : جنا راح نطلع ندفن واحد مو نزور واحد

بديعه : خفت حيل وقطرة دم ماضلت عندي
خوله : امشي ننزل ونشوف شكو
نزلنا بسرعه لكيت عمتي فاتحه الفوطه وتلطم على صدرها
عمشه : كضو وليداتي تطشرو يعمشه راح التعب وكسران الظهر انهجم بيتج يعمشه وينك يابويه تنشد عليه بنيتك لاحها الضيم والقهر ومايوم مرتاحه گله يهون عكب وليداتي

خوله : على كيفج يمه هسه يبين
عمشه : انه خايفه الاخ يكتل اخيه چا شنهي من وره مره يتذابحون ياويلي عليج يعمشه طاحت السما على روسج وتضلين مكدره
خوله : اخاف احجي وتعيطين هذا اليمشي بلغلط من الاول شعبالج من سحلتي البنيه بسحر وزوجتيها لابنج راح تفوت عادي

عمشه : ميلي مني لا اجسر ضروسج انه نار وشابه بيه وهاي تزيدني حطب بسچ لاافوخ گلبي بيج
بديعه : عوفي عمتي وتعالي اكعدي نكمل الكليجه
خوله : اروح اجيب شرهب لتبجي
بديعه : كعدنا كملنا وصحنا مرتضى ومهند اخذوها للفرن شوها واجوي وعمشه اطب وتطلع ترفع ايدها للسما ساعه انقهر عليها وساعه اكول هاي حوبه ذكرى

لثاني يوم يدورون وصمد مختفي ومحد يعرف شى عنه بلغو الشرطه والمفارز بغداد والبصره وجاسم وعبيد يدورون بلبصره وجوحي وفلاح يدورون بغداد
مر على اختفائه ٣ ايام واليوم الاربعين مال ذكرى مكدرنا نروح لان الوضع حيل تعبان للظهر نومت شرهب وكلت بلال ومنتظره الجهال وزعنا الثواب بلمنطقه وبقينه شويه اخاف نروح للمكبره

البيت حيل متوتر والكل على اعصابه كل ساعه تمر تحيرنا اكثر منعرف وين صمد ومنو مسؤول عن هذا الحال نجم لو فوزي
لحد ثاني يوم من الاربعين من الصبح نايمه يم خوله بغرفه ذكرى لان فلاح ماكو كبت عيطت عمشه
فتحنا غرفنا واحنا الجناين ويانه خوله نزلنا نركز
شفنا عمتي كاعده بلكاع وتملخ بشعرها
عمشه : يمه راح وليدي ولكم انكسر حيلي
يبووووووو عساني متت ولا ادفنك بيدي

خوله : شكوو يمه على كيفج ملختي نفسج
طب فلاح يبجي
ركضنا عليه
صالحه : شكو ابو بان عمتي كطعت نفسها ليش تبجي
فلاح : صمد انكتل
بديعه : رغم متوقعين هذا الشى بس هم انصدمنا شون انكتل ومنو كتله

فلاح : لكوه مشمور بلشارع بلبصره هسه خابر عبيد لاعبين بحاله لعب مبين معذبي يله كاتلي لكم اخويه مااااااات
وكع بلكاع يبجي
بديعه : صافنه دمعه منزلت مني وصافنه على خوله الجانت بغير ملكوت ودموعها تنزل بهدوء ماطول معذب هيج معناها فوزي لان لو نجم مستحيل يعذبه هلكد يكتله ويخلص

اباوع ساهره  وصالحه يبجن ويلطمن ويه عمتي وخوله كعدت على صفحه وتبجي وفلاح حاضن عمتي الملخت روحها درت وجهي على الدرج ومكان الوكعت بيه وغركت بدمها وبگلبي اكول كتالج مادامت اله يذكرى ومثل ماكتلج انكتل ومثل ماعذبج كل هاي السنين تعذب مااكول غير الله يرحمه اجاج يذكرى وعند ربج اشكي السواه بيج

انگلبت المنطقه بلعياط والصياح وكلها اجت تركض علينا
عمشه : طاح بيتج على راسج يعمشه
يا دنيا انطفت فرحة سنيني
ليش وياي هيچي تمرمريني
عمية اصبحت لفراگه عيني
راح وأيست منه اليجيني
ياوليدي يبعد جبدي يمه صمد ريت يومي گبل يومك

بديعه : ضلينا ننتظر يومين يله جابوه بين استلام الجثه والتشريح والشرطه والتحقيق وبين مجابوه للبصره وطلعو گبل للنجف لان الوضع ميتحمل التأخير
حاضنه كبرها وابجي عليه اني وخوله ونباوع على اسمها وتاريخ موتتها
وبصفنا بعد مسافه دينزلون صمد بلكبر وعمشه بلتراب تشيل وتحط على راسها وصالحه كوه لازمتها
البقت بلبيت ساهره ويه الجهال
احساسنا غريب ميتين قهر وبنفس الوكت حاسين هذا الشى يستاهله 

بديعه :احجي ويه ذكرى وابوس بكبرها شونج خيتي يااعز من امي وابويه عندي اكيد اشتاقيتيلي مثل ما اشتاقيت الج جهالج زينين لتخافين يمي شفتي اجه يمج ومتهنى بلياج ضل كل الايام خايف ويتهزم وتالي سكن الكبور مثلج بس الفرق انتي مظلومه وهو يستاهل الصار بيه مدااشمت والله من اتذكر دمج شون اتصفى اكول لازم يتعاقب
خوله صافنه على كبر اخوها وتبجي اعرف بيها متندمه وبنفس الوقت تحس روحها سوت الصح يمكن اكثر وحده هسه هيه ضايعه ومتشتته لان المات اخوها

رجعنا من النجف وكلنا تراب وعمتي بين الفاقده والصاحيه
معرفنا لهسه منو الكتله وعبيد يعيط اذا نجم ادفنه بصفه اباوع تحس شون وحوش ناس تنهش بناس
دخلنا للمنطقه ونزلنا ودندخل جان يجي جيرانه كاال
يابه البقيه بحياتكم بس لازم تعرفون تره الكتل صمد اخو مرته فوزي
عبيد : شمدريك حجي
كل المنطقه تدري هو سلم نفسه

ركضو الولد لبيت اهله وعمتي وياهم كسرو الباب ويعيطوووون مثل الثيران وهدوهم وكم شاب بلمنطقه واكفين هم ركضو
طلع ابوه وامه كوه يمشي ومتجي على مرته

عبيد : ابنك دمه النا كتال اخويه ميشتم الهوا
عمشه :ولكم كتلو ولدي وضالين بعين كويه جدامنا اليوم وليداتي يحركون بيتكم عليكم
ماينشف دم ابني اله دم ابنكم يتصفى
ابو فوزي : وبتي الكتلها ابنج مالها ديه لو ولدج اعزاز عليج ولدي رخاص
عمشه : بتك طاحت والله اخذ امانته وليدي شله دخل ولكم يبوووووووو تاخذون طيحت بتكم بدم زلمتها الله يرضاها

ابو فوزي : بتي ابنج كتلها وكلكم تدرون هذا الشى ودفنتوها ولا عبالك كلكم تدرون صمد السبب بموتتها حتى بشرفها طعنتوها ولكم خافو الله يلمتعرفوه بتي انطيتها ورده الكم تسوه راسكم وراس اهلكم تالي ترجعوهت اليه بتابوت شتردون من اخوها من يعرف رجلها كتالها يزوجه مره ثانيه لو يتشكر منه

عمشه : منهي كال جتالها
عبيد : هذا الحجي مصار بتكم وكعت من الدرج وماتت ومتحقونا بشى وهسه احنا نحقكم
ابو فوزي : اذا الكم حق اخذوه مني هاي اني رجلي والكبر واذا على ابني ذاك بلسجن الله اعلم يعدموه لو مؤبد يخلص عمره ويموت بلسجن
وانتي يعمشه اذا مات الج ولد ومحروك گلبج عليه اتذكري عندج اربعه غيره بس اني منو اليه همه اثنين ردتهم وكت العوزه والگبر وتالي دفنت البنيه بعز شبابها والولد كلها ايام وادفنه بصف اخته واضل راسي وراس هاي المره انتي بسوايتج وسوايه ولدج ضيعتي عايله كامله كل غلطتها انطت لناس ميسون وميقدرون النعمه ناس موخوش اوادم

اخذي ولدج ورجعي واذا الج حق اخذي مني ومن هاي المره الخلصت عمرها تربي وتكبر حتى انتي ولدج ادفنون بزرتها

جوحي : لا عبالك تفلت ابنك منرتاح اله ينعدم
ابو فوزي : ابني رجال من ظهر رجال ميكتل ويظم راسه مثل ابنكم كتل بتي ويتم جهالها وضم راسه مثل النسوان فوزي اخذ حق اخته وسلم نفسه حتى لا يسوه والمايسوه يكول مثل الجبان كتل وضم راسه
فلاح : ليش مشتكه ليش الكتل شنو هي خرابه لو غابه لكلمن اله
ابو فوزي : المثلكم ناس متعرف الله ومتشهد الحق اكيد يوم منطلب الحق منهم راح ينكرون

ام فوزي : انتم جايين هداداه وتحجون على ابني شتردون منه من سمع اخته انكتلت واذا تردون تحاسبون حاسبو اختكم الاجت وهيجت ابني على ابنكم وضيعته وهدمت عائلته وخلته مثل المخبل  وحلف يمين متعبر اربعين المرحومه اله وصمد جوه التراب هاااي كله من وراها
واشرت على خوله

يتبع .....
💥💥💥تصويييييت