#الابواب_الخمس
البارت الحادي عشر
للكاتبه Reem
محتاجه لحـــضن مابي عطر شـمات ...
محتاجه لحـــنان وشـــوگ يچــويني ...
محتاجه لنـ،ــهر مابـــي ولا سابـــوح ...
امـوت بــداخلة وبـــلهفة يحـــييني ...
محتاجه المــطر بس مو مطر بالصيف ...
ثلـــــج فــــوگاية ينزل مــــو يأذيني ...
محتاجه الشمس ملـيت شكل الغيم ...
اريد احضن ضــــواه وخلي يعميني ...
محتاجه استقر واضحك صدگ فد يوم ...
مو تضحك اشفافي ودمعتي بعيني ...
خوله : فتحت عيووني هاي شتحجي جان نسمع هوسه بلباب بلحظتها جان تندفع الباب ويطبون اخوتي
جان حالهم يصفن كل واحد ماكل طن كتل العيون والوجوه مزوركه وحال الضيم حالهم ركضنا من لهفتنا عليهم ومينفرز صوت عياطنا من بجينا بفرح لرجعتهم
امي ركضت ومتعرف تحضن بمنو
ذكرى : كاعدين فوك وهاي بدعه مااعرف شبيهه تشبج حجايه ويه الثانيه اخر شى زهكت وكتلها
والزبده شنو من هذا الحجي كله
بديعه : هاي شبيج غير نسولف
ذكرى : يمعوده عندي هدوم كومه اريد اغسلها وحضاين مال ناي مو وكت سوالف
جان نسمع هوسه طفرت من مكاني جان تجرني بدعه
بديعه : انتي ابقي هنا خلي اشوف شكو جوه وراها انزلي
ذكرى : لج هوسه قويه جوه اخاف عركه بله متوخرين ودفعت بدعه ونزلنا نركض ويه نزلتنا ساهره وصالحه هم طلعن من الغرفه وحده وره الثانيه ركض نزلنا وجان نشوف الولد تحضن بيهم عمشه وخوله
مصدكنا من رجعو رغم صمد جاف بلتعامل ويايه ومايوم سمعني كلمة تسر الخاطر بس يبقى رجلي وابو جهالي والعشره متهون اله على ابن الحرام نزلت اركض بلهفه وحضنته
الْحٍمَدٍ للـّہ على سلامتك
صمد : ااااخ على كيفج
ذكرى : العفو والله مو قصدي
صمد : مصار شى الله يسلمج وين الجهال
ذكرى : فوك هاي شمسوين بيك اباوع على الباقين كلهم مضربين ونجم ماكو
صالحه : يمه أحبيبي وابو بيتي عبيد
كلللللوووووش نورت بيتك
عبيد : حضريلي ملابس اريد اسبح حيل تعبان
كل وحده بينا فرحانه برجعه رجلها وسهاد صافنه بلوجوه وعمشه تبوس واحد واحد بيهم
عمشه : يمه يبعد هلي وگل عشيرتي من عمري على عمرگم يمه ريتكم سالمين
ركزت بلوجوه يمه اخيكم وين
جوحي : بلمستشفى يمه
عمشه : ضربت على وجهه وعاطت يايمه انهجم بيتك يعمشه ولكم وليدي وينه تاركين اخيكم وجاايين تهفون
فلاح : لتخافين يمه مابيه شى رضوض بجسمه وايده انكسرت
سهاد : ياستار عفيه ودوني اله
عمشه : چاشنهي عايفين اخيكم مكسر واردين وحيدكم خذوكم خمسه تردون خمسه چا انه ادكن والطم وافادي راح عبن تردون واخيكم شامريه مارضيتها منكم يولد عمشه
جوحي : شنسوي ابنج متحمل ضرب مايع هاي مو كدامج كلنا مزوركين وماضاله عظمه بينا بس واكفين على رجلنا هو جم ضربه على جلاق وكع من طوله
صمد : تكول مو رجال هاج شوفي ورفع تيشيرت اللابسه ظهره كله ملخ مال وايرات
شفتي
عمشه :نعلت الله على شيب ابهاتهم يمه وليداتي مساكيط
سوده بوجهي عساه بحضه وبخته السواها كون حسره عليه شمت الهوا
چا گلكم هيج
عبيد : اي يمه كلنا اول مدخلنا استلمونا دك كتل وضرب ومنعرف ليش
صمد : وابنج المدلل ممتحمل وكله من وراج لو جان يطلع ويانه بلشغل والتعب وكسران الظهر جان طلع زلمه حوك مو خلصها علينا نايم للظهاري
عمشه : چا شنهي استلمو اخيكم انه هسه ماارتاح اله اشوفه يمه نجم كون بيه ولا بيك يممممممه
فلاح : تره حيل زوتوها تدرون كلش زين نجم اكل كتل اكثر منا كلنا واستلمو تلاثه دك وين ميوجعه اصلاً حسيت متقصدين يأذوه اكثر واحد احنا من اول كم ساعه حاطينا بغرفه سوه وعلكونا وبلسره كتل اله نجم وحده استلمو وقت كلش طويل غيره واحد حتى لو انتم والله يموت ميضل اصلاً نجم بنيته تتحمل وقوي بس تلاثه عليه ومبقو شى ماكسرو على جسمه ومن طلعونه فاقد اخذوه شمروه بلمستشفى
عمشه : عمت عيني عليك نجومي يمه ولكم خذوني ليه انه اموتن بلياه تروح وتجي تهسترت من الخوف
جوحي : والله ندري احنا طبنا مرض وهو الاهم لو كلنا ميتين عادي المهم نجم يرجع الج
عمشه : خايب اسكت ابو حلك الجايف هاي عود حجيت ودكيت صدرك چا انه طلعتكم من حلك الموت تسودنت وبنص الزلم افر براسي وانخه اليسوه والمايسوه عبن تردون وهاي جزاتهه تفو على البطن الشالتكم
فلاح : يمه لتضوجين هسه اغسل وابدل واخذج
ساهره : هاااي منو واشرت ساهره بيدها الكل اندار
خوله : نسينا هاي الاجت علمود صمد من هوستنا مندلينا دربنا لان الكل تحجي وهذا يجر طول وهذا عرض وراحت من بالنا وهي كاعده على كعدتها لحد منتبهت ساهره عليها
الكل اندار ومن ضمنهم صمد من شافها فتحت عينه مصدوم وامي تباوع عليها وعليه
صالحه : انتي منو
عمشه : هاااا مالكم شغل بيها هاااي صديقه خوله اجت تهنيها على الخطبه موش صحيح بنيتي
رفعت تاك حاجب وكالت اي صديقة خوله وجاي ابارك وماادري بأخوته صاير هيج اعذروني
ساهره : وشبيج تحجين من وره خشمج
خوله : اهووو ساهره مو وكتها مشيت سريع وسحبت هاي البنيه وكتلها تعالي بلغرفه ناخذ راحتنا من رخصتكم
وسحبتها وهي عيونها على صمد وصمد مدنج مرفع راسه
ذكرى : شكد عيب صار ساعه نحجي ونهوس ولا وحده انتبهت بينا
عبيد : هي هم متستحي دتشوف حالنا المن صافنه علينا
صالحه : هاي النسوان يموتن على هاي السوالف يردن يعرفن گلشي
صمد : اني صاعد فوك يله ذكرى
سحب ذكرى من ايدها وصعد فوك
بديعه : الله يساعدك يبو بان والحمدلله على سلامتك عساك سالم كون بعدوينك وتنذكر وماتنعاد
فلاح : هله بدعه الله يسلمج
يله يمه روحي بدلي واني اغسل واخذج لنجم
سهاد : عمه اجه وياكم
عمشه : وين موليه احودب بيج اشوفن وليدي وارد وغير وكت ياخذوج مو وكتج
سهاد : غير رجلي ولازم اشوفه واطمن عليه
عمشه : لاتعاندين كتلج غير وكت
خوله : كعدت هاي البنيه يمي وكتلها
همزين اكدتي كلام امي
لو ما امج والحاله الجانو بيها اخوتج جان فضحته كدام الكل
خوله : انتي شسمج اسمي
عيني اسمي جليله
خوله : ومنين تعرفين اخويه
جليله : اكلها مرته تگلي منين تعرفي
خوله : ادري مرته قابل طلعتي من بطن امج تعرفي
جليله : صيحي وهو يحجيلج
خوله : مبين شغلتكم لايصه
جليله : انتو لازم تسولي حل ويه صمد تره والله هسه اطلع وبنص الشارع اعيط تحملته هوايه ولعبت نفسي منه ومن كذبه اكلج هاي الحضنته هي مرته ذكرى مو
خوله : اي مرته خوش والله تعرفين بضرتج
جليله : بكلشي اعرف كل صغيره وجبيره بهذا البيت اعرف واكو شغلات انتي نفسج هنا ومتعرفين بيها
خوله : ماشاء الله طلعتي اضرب من بنات غنيه
جليله : قصدج ساهره وصالحه
خوله : هلا والله حتى ذني تعرفيهن
جليله : كتلج ماكو شى مااعرفه صيحيلي امج اريد اتفاهم وياها
خوله : واني كلت بس صمد مو خيخه بيد مرته طلعت غلطانه اثاري العينتين يم ذكرى عنتر شايل سيفه ويم جليله بزون بايكين عشاها
جليله : مبين معاجبج الوضع وتستهزأين
خوله : لا عمي العفو منج مرت اخويه والله ياصمد لتشوف ايام سوده ههههههه مكلتي وين بيتكم
جليله : بغداد الجديده قريب السوك
خوله : وين يعني بلضبط وكعدت توصف البيت
وبس توصلين كولي ام جليله السماجه الكل تعرفها
خوله : خوش
جليله : ليش تسألين
خوله : غير مرت اخويه شون مااندل بيتها
جليله : جنج ضامه ضميمه
خوله : ماطول تعرفين كلشي بهذا البيت معناها تعرفيني
جليله : كلشي مااريد منج ولا منكم بس اريد يشهر زواجي منه وراهه وين مايولي خلي يولي
جان اطب عمشه
جليله : سمعي عمه
عمشه : وعمه العماج منين انه عمتج
جليله : عمتي وغصب عن ابنج الجذاب واذا تردين هسه اطلع واگلب البيت كله على راسكم
عمشه : بسچ حسج لا يطلع اركدي شوي واكرصيهه انه رايحه لولدي اشوفنه وانتي تولين لبيت هلج وانه اجيب صمد واجيج
جليله : اذا مااجيتو باجر عكب باجر تلكيني هنا واخلي المنطقه كلهه تسولف بيكم
عمشه : والغسل كون تسودنتي انه باجر ساحله البغل وجايتج عبن سوايته البغل مايسويهه كومي ردي منين ماجيتي
جليله : كامت وعدلت العبايه فوك راسها وكالت
ضلت يمكم العافيه عمه
عمشه : اخذيهه وياج ماتفيدنه
خوله : طلعت وياهه وصلتها للباب وراحت وطبيت ركض لامي
شلوون يمه شراح تكولين لذكرى
جان تسحبني من اذني
ااااخ يمه اااخ
عمشه : حسج عينج تطلع جلمة من خرابيط هاي المفجوعه اشوفن صمد طايح الحظ وهاي شنهي سالفتهم ونحاول نحلهه ولا ذكرى تعرف ولا اي احد بلبيت يحس
خوله : يوم دوم تضمين الشغله لازم تنعرف
عمشه : كضي لسانج مايعرف احد
خوله :مااحجي بس عوفيني ااخ كطعتيها لاذني
عمشه : ربي منين اتلكاهه من ولدي طليان نسوانهم لو من السكوتي الطلع كله البله بيه لو الصغير المكسر ومااعرفن عنه شى لو البت المسودنه
خوله : اجه دوري مو حيري بولدج ومالج دخل بيه شو كاعده وساكته
عمشه : اروحن لاخيج عينج على البيت لاتضلين مدمغه
خوله : جناينج موجودات ومكفيات وزايد
عمشه : ااااخ كون اردن بت واشمرن نفسي بشط ولا اتزوج فرج واخلف هاي الخلفه المسودنه
خوله : اي والله جان ريحتينا وارتاحيتي
عمشه : ميلي مني وين العباا
خوله : هااج سلميلي على ابنج العزيز
عمشه : اريدن وحيد منكم گلبه عليه ماكو گلكم تذبون حيايه منه
خوله : روحي يمه فلاح يصيحج
ذكرى : جان وضع صمد مو طبيعي كعدت بصفه وكتله
بيك شى صمد صمد مو احجي وياك
صمد : ها ها داسمعج
ذكرى : اي ليش مجاوب اذا تسمع
صمد : تعبان ودايخ وجسمي مكسر صدك معرفتي منو مبلغ علينا
ذكرى : عمك فلاج
صمد : ايا گلب ابن الگلب حشه جدي والله حسيتهه منهه هاي الدكه
ذكرى : ولوما عمتي ولا اطلعون
صمد : ليش شصار
ذكرى : وكعدت اسولف اله كلشي رغم يسمعني بس احس باله مو ويايه
سحب ناي وباسها ويونس بحضنه ويبوس بيه
واكول بگلبي كون دوم هيج تضل حنين على جهالك
تنزل تسبح احظرلك ملابسك
صمد : اي اريد اسبح وانام
ذكرى : متاكل
صمد : لا
ذكرى : نزلت اسوي عشا وكلت اسوي للكل لان بكل الاحوال العشه عليا بديت اگلي
واجت بدعه تسوي ويايه
جان اطب خوله والابتسامه بحلكها
ذكرى : خيرج سحبت خياره وتاكل بيها وحاطه الايد الثانيه على خصرها
خوله : ماكو سلامتج
بديعه : گلبي ممرتاح منج يخوله شعجب بلمطبخ واكفه
خوله : ضجت من الغرفه وكلت اطلع اشوف شكو ماكو اخوتي بغرفهم
ذكرى : اي
خوله : كملن عيني كملن
وطلعت
بديعه : شوي واجي ذكرى
وطلعت وره خوله وسحبتها
بديعه : احجيلي منو هاي الاجت اليوم وخليتيني اضم ذكرى من وراهه
خوله : اكلج ومتكولين
بديعه : شتعرفين بيه احجي
جان تبتسم وتكول
خوله : ضرت حبيبتج
بديعه : هااااا مفهمت
خوله : مرت صمد الثانيه مدري الاولى والله ماادري ههههههه
بديعه : صخام الصخمني صدك تحجين
خوله : مجذبه عليج قبل
بديعه : يمه عزه عفيه كمت ارجف منو يكول يجوز جذابه
خوله : هههههه يجوز الدور جاي عليج اربطي رجلج لا يطير اني كلت اخوتي مالهم درب النسوان هي وحده يتزوجها ويدمغ بيها العمر كله طلع تحت السواهي دواهي
بديعه : راسي كام يوجعني وجسمي ثلج رغم حاره اتخيل منظر ذكرى اذا عرفت
خوله : هااا شو صفنتي اخاف السره الجاي على فلاح
بديعه : بس فهميني انتي ليش فرحانه
خوله : اي شى يطيح حظ اخوتي افرح بيه اني ذكرى ماعندي شى وياهه بلعكس البنيه حبابه وطيبه بس صمد راح ياكل نعل اذا عرفو اهلها اني لو منها ساعه مااضل هنا بس لو افهم على شنو باقيه بهذا البيت وعايشه ويه صمد الغثيث
بديعه : المره لازم تتحمل مكانها بيتها ورجلها وجهالها قابل وين تروح
خوله : هاي السوالف التعبانه احتفضي بيها لنفسج وعينج على رجلج يجوز بعد جم يوم اطب وحده كذلتها حمره وتكول مرت فلاح حتى يصير عدنا كذله حمره وصفره هههههه
بديعه : عوذه منج ومن سوالفج اروح اكمل العشا احسلي
خوله : هو انتن بس مال كراب روحي
بديعه : خلي نشوف من ترحين لبيت رجلج شسووين
دارت وجهه تضحك وطبت وركعت الباب واني حيل ماضل بيه رحت للمغسله ذبيت مي على وجهي اغمض وافتح اكول اخاف هاي ناصبه عليه وماكو هيج شى واتذكر هوسه ذكرها وشلون مرادت احد يشوفهه اكول حجيها صحيح
دخلت للمطبخ واباوع على ذكرى شون نظيفه ومعدله وهادئه حتى بلشغل مينسمع الها حس والله لو جايفه وام سحوره مثل ذنيج الفوك جان كعد حظها
ذكرى : شو تأخرتي
بديعه : ماكو شى غسلت واجيت
دخلت سهاد تباوع وتفتر بلمطبخ
سهاد : اني جوعانه شوكت تكملن
بديعه : يااا انيال گلبج رجلج مكسر وانتي حايره بالاكل
سهاد : مو ردت اروح ويه عمتي ومقبلت وبعدين شسوي احرم روحي من الاكل
ذكرى : هسه شوي واكمل واكلي بلعافيه
سهاد : تردون اساعدكم
بديعه : مشكوره عيني عمتي ماكو من تجي تعالي ساعدي
سهاد : شنو قصدج
بديعه : مالي قصد عفيه تره البيه كافيني
سهاد : ليش صار شى
بديعه : ماكو شى سلامتج شو تعالي حتى لتفترين علينا هاج هاي لفه وروحي اكلي
سهاد : اي انطيني
بديعه : جنت حيل عصبيه ومااندل دربي وكل شويه تجي عيني بعيون ذكرى شون ياربي اكلها اخاف تصير مصيبه اسكت اخاف تعرف بعدين وتزعل مني لان مكتلها
ذكرى : عمتي شوكت تجي
بديعه : ليش
ذكرى : نشوف نجم شلون صار خطيه اكيد متأذي
بديعه : اي يكول فلاح اكثر واحد كتلوه بينا
ذكرى : الله لايوفقهم حركو گلبنا صار جم يوم بيها عليها وحتى صمد هسه دايخ وبس يتصفن ومدري شبيهه
بديعه : مابيه خافي على نفسج
ذكرى : شنو يعني
بديعه : ماكو شى اني كملت كلشي لتحسبين حسابي مااكل
ذكرى : ليش ويانه على الواهس
بديعه : اخذي بان وكليها فدوة واني صاعده فوك
ذكرى : روحي ارتاحي
كعدنا كلنا نتعشى وساهره وصالحه طايرات برجولتهن اول مره ادري بيهن هيج يحبن رجولتهن الله يهديهن
صالحه : بدعه وين
ذكرى : متريد تاكل
باوعت على صمد كوه يبلع اللكمه لزمت ايده وكتله بيك شى فز من صفنته وكال
صمد : مابيه الْحٍمَدٍ للـّہ شبعت وعاف الاكل وكام كلت اكيد الشافوه مو هين
ساهره : هاك حبيبي اكل زين قوي گلبك شحالك صاير
ذكرى : كمت من يمهم عفتهم براحتهم وصعدت للغرفه
لكيت صمد متغطي ومغمض عينه مبين منايم بس عفته براحته
عمشه : يمه وليدي كون بيه ولا بيك
فتح عيونه نجم وامه فوك راسه تبجي وادك على راسها
نجم : كوه يطلع الكلمة وكال
يمه مابيه شى ليضل بالج
عمشه : چا شنهي مابيك شى شوف حالك جنك شفل ومگلوب على ظهره اااااخ يفليح كون اكضك اشرب من دمك واكسر كل عظمه صاحيه بيك هيج وليدي ينام هاي النومه
فلاح : شد حيلك خويه حتى تطلع من المستشفى
نجم : طلعوني مااريد ابقى هنا
فلاح : ميقبل الدكتور كال على الاقل اسبوع
نجم : ماابقى طلعني نجم
فلاح : ايدك بيها كسر چبسوها وجسمك كله رضوض
نجم : ميخالف بلبيت اتعالج هنا اختنك
عمشه : يمه باجر اطلعك اليوم ضل هنا ارتاح عبن دكاتره وتفتهم
نجم : اخوتي كلهم بخير
فلاح : بخير ليضل بالك
ذكرى : رجعت عمتي ونزلت عليها اطمن لكيت سهاد كاعده يمها وتسألها
سهاد : لوماخذتني وياج ياعمه
عمشه : علاكه واحودب بيج باجر راد لبيته واشبعي منه
ذكرى : اهم شى هو زين
عمشه : يم الله نحمده ونشكره رجلج وين
ذكرى : نايم
عمشه : صحي وگليله امك تريدك
ذكرى : تعبان عمه خليها لباجر
عمشه : انه اگلج صحي لاتراددين وتشلعين افادي
ذكرى : ماشي صاعده اكعده
صعدت ولكيته كاعد وحاط ايده جوه خده
همزين كاعد عمه تريدك
صمد : اجتي
ذكرى : اي اجت وكالت تريدك
صمد : نازل الها
خوله : حاطه البكرات مال صوف وارتب بيهم ودخلت امي
عمشه : شيليهن
خوله : هااا خير شو ضايجه نجم بيه شى
عمشه : بخير رديت وعفت فلاح يمه
خوله : لعد شبيج ضايجه
جان يطب صمد هاااا من هيج
صمد : اطلعي بره خوله اريد احجي ويه امي
خوله : وعلى شنو اطلع شو زواج واعرف متزوج على ذكرى
جان يطب ويسد الباب وجيت عليه ولزم حلكي
صمد : اسمعي لج اذا حجيتي لاحد اشك حلكج
خوله : دفعت ايده حييل وخررر فوك شينه كوات عينه جاي تهدد وانت مسويلك مكسوره شكبرها
عمشه : عيف اخيتك وتعال ليه يلمدوهن ولك انت الخنيس هذا البله بيك متزوج على مريتك انه اريدن افهم شوكت لا يوم شفتك بتت برات البيت ولا الك ختلات انه وين من مصايبك يبن عمشه
صمد : يمه مااريد احجي بهذا الموضوع واني باجر اروح لجليله اطيح حظها ومااخليها توصلنا لهنا بعد
عمشه :سولفلي گلشي وياويلك وضميت شى وتراب ابيك اكطع النعال على راسك لا تكول كبرت ومالك صداد ورداد عبن شما تكبرون تخرفون وانه الي حك عليكم يله سولف شوكت تزوجتها
صمد : طلعي خوله واحجي
خوله : بس اطلع اصعد لمرتك هسه واخليها طشار ماله والي
: جان تكفخها لخوله
اسكتي وغمه بعينج ولك گلبي موجر منك سولف
صمد : يمه اني اعرف جليله قبل مااتزوج وحبيتها وردت اتزوجها بس هي تزوجت
عمشه : چا هي مو حركتك متزوجين اثنين
صمد : لا يمه شبيج خلي اكمل
مو اتزوجت اني احبها تأذيت لان عافتني وضليت فتره لحد موعيت على نفسي واجيتي انتي كلتي على ذكرى كلت ليش لا اتزوج واستقر وانسى جليله
خوله : الله فلم عربي قديم
صمد : تسكتين لا اكوم امسح بيج البيت
خوله : ولا تكدر والله كمل عبد الحليم
عمشه : كضي لسانج لااگلبنچ وحيده خليل كمل ولك
صمد : تالي تزوجت ورجعت جليله اطلكت وشفتها بلسوك وحجيت وياهه ومن عرفت مطلكه متحملت وكتلها اتزوجج وتزوجتها وشرطت عليها محد يعرف وهيه قبلت
عمشه : من شوكت متزوجهه يلزلمه يلحوك
صمد : وره زواجي بأربع اشهر
خوله : حيييل يعني صارلك ٣ سنين ونص
يمه يلرياجيل ولا تنعرفون ويكولون النسوان ماينجرعن لا عمي احنه افقر من الفقر
عمشه : چا انه وين مريتك وين گل الوكت ويانه شوكت تروح ليهه
صمد : الصبح من اطلع وياج مو كل واحد يروح لمكان اروح ساعتين تلاثه يمها وارجع جانت بلبدايه راضيه وساكته بس صار كم شهر تخبلت اله تعلن زواجنا واريد الكل تعرف
عمشه : وين تكضي وياهه وكتك يلخنيس
صمد : بيت امها
عمشه : والنعم چا البيت مگلوب كواده خوش والله
صمد : يمه غير مرتي وحلالي
عمشه : اشتعل شيب اهلك واهلهه تعرف ذكرى واهلها لون درو بطركاتك يعلكوك بلتيل هذا فوزي مايسكت الك وحك العباس
ولك انه ماشايله هم غير لفوزي مايسكت يلمصخم مايسكت وتضرب عمشه على راس صمد
صمد : شحده قابل مسوي شى بلحرام شرع الله وتزوجت ومن حقي
خوله : على الخير المعيش مرتك بيه وادور حقك اني لو منها ماابقى وياك لو يصبوك ذهب
صمد : انجبي انتي ولتدخلين
عمشه : لا والله انت التنجب وتاكل تبن عبن سالفتك جايده ااااااخ وتعض اصابيعها ولزمته من شعره كون بعدك صغير لا اكطعنك تكطع
صمد : اااخ يمه راسي يوجعني كله معنجر من الضرب
عمشه : وفوزي يطبره الك اطبر اصبر على رزقك ماضل شى
صمد : خلي يلزمني حتى امده بلشارع هاي شبيج يمه قابل مخلفه مره واخاف غير رجال
عمشه : لو مخلفه بت ولا هاي الضميمه الكشره يايمه انشديني من نكره لنكره
اسمع ولك باجر نولي لهاي البت واطلكهه
صمد : مااكدر اطلكها
خوله : وليش عيني هاي الحب الاولي
صمد : جليله حامل
خوله : جان اطك اصبعتين وعلكت والله
صمد : ولج خوله اذا ماسكتي اذب حرگت گلبي كلها بيج وادفنج بمكانج
عمشه : انه شمسويه بدنياي يربي عطيتك ليه مصخمه نروح للبت نسكتها وتضل على ذمتك لون ماتفرج
صمد : اني باجر اروح الها واطيح حضها واسكتها وبعد متشوفوها ابد هنا بس لحد يحجي بلبيت
خوله : سرك ابير يابن امي وابويه
عمشه : خوله
خوله : يمه ادري اسكت كتلج هذا هو
عمشه : وانته خف ويه ذكرى چا لا ترحمها ومتزوج عليهه والغسل كون
صمد : اي مااشي حتى لاهلها بعد اخليها تروح ومااسوي مشاكل وياهه
ذكرى :بقيت انتظر صمد لحد مصعد ومبين التعب عليه سحبني لحضنه ونام وهاي اول مره يسويها بدون ميتقرب مني كلت ربي يجوز المر بيه علمه قيمه العنده تمنيت يكون دوم هيج هادئ وطيب ويايه ومو نحس وساكت
ثاني يوم اجه نجم وعمشه ذبحت لوجهه الله فداء لولدها والهلاهل مالتها مسمعه الجيران كلها خطيه تعبت وشصار بحالها الله جبر بخاطرها ورجعهم سالمين
شفت نجم وسلمت عليه جان اكثر واحد من اخوته متأذي يمكن شكله خله گلبي يوجعني لان ميستاهل الصار بيه
دخل لغرفته والجيران اجو يباركون وكل واحد جايب حاجه وياه لسلامه الولد
مر اسبوع والبيت مخبوص ناس طابه وناس طالعه بدعه دوم شارده وبالها مو يمي وصمد هم ساكت ومرات ادخل اشوفه يلعب ويه الجهال
طلعت خوله من غرفتها مبدله
عمشه : خيرج
خوله : اروح لامل يمه ما اتأخر
عمشه : اخافن بيت اكرم موش امل
خوله : لامل يمه لو اكرم اكول
عمشه : لا تأخرين
خوله : اروحن للسوك وياهه اشتري قماش وادزه للخياطه
عمشه : لا تأخرين
خوله : مااشي
ذكرى : طلعت خوله وقت ورجعت دخلت غرفتها ساهره وصالحه يباعن عليها وحتى ميحجن وياهه بعد الصار الكل ساكت بلبيت
وعمتي طلعت للجيران تأدي واجب وكت عصريه مبقى شى للمغرب كلت اصعد للجهال اوكلهم وارضع ناي وانزل
بديعه : لكيت علاج مال نجم محطوط بلهول دكيت الباب وفتحت سهاد
سهاد : تعالي ادخلي
بديعه : ردت اسلم وانطيكم هذا لكيته بلهول
سهاد : من اجه ابويه انطيته العلاج وبعدها نسيت ادخله للغرفه
بديعه : شونك خويه نجم
نجم :يم الله
بديعه : صرت احسن
نجم : الْحٍمَدٍ للـّہ
سمعت صوت الباب وكتلهم من رخصتكم وطلعت فتحت ولكيت نفس البنيه وياهه مره شو هاي دفعتني وطبت تعيط
جليله : ولك صمد وينك يصمد
ذكرى : جنت ابدل لناي بلغرفه واسمع صوت وحده تصيح صمد
فتحت الباب ودت اتأكد
بديعه : يمعوده اسكتي وامشي اطلعي بره جرتها بدعه من ايدها تريد اطلعها جان تدفعها
جليله : وخري لج هاي منو الي اطلعني اني الي بهذا البيت مثل مالج وانتي جنه واني جنه
ذكرى : سحبت ناي للكاع خفت اعوفها وتوكع لان تگلب صايره وتتحرك ونزلت
شكوو
جليله : تعاي عيني باصريني تعاالي ضرتي
بديعه : مالج دخل بيها هاي وحده مخبله وهسه تروح
جليله : والله ماكو غيرج المخبله وخري مني تعااالي ام يونس
ذكرى : صفنت عليهه هاي شبيهه
سمعت باب صالحه انفتح ونزلت
صالحه : منو تعارك
نزلت وصارت وره ذكرى وكالت
صالحه : هاي مو صديقه خوله
خوله : خير شكوو
جليله : عيني خوله كولي لنسوان اخوج اني منو
خوله : هاي شجابج هنا مره ثانيه
ام جليله : وين امج اليوم منطلع اله وهو كايل لكل الناس جليله مرته
ساهره : مرت منو
ذكرى : درت وجهي لكيت ساهره هم واكفه تلاثتنا نريد نعرف عن منو تقصد
نزلنا ليمها واني جنت بصفهن واكفه وصافنه عليها
جليله : مرت صمد
ذكرى : هااااا صمد رجلي
جليله : ورجلي عيني على سنه الله ورسوله وهذا البطني ابنه
ذكرى : كعدت بلكاع رجلي محملتني اريد افهم هاي شتحجي
خوله : هسه ارتاحيتي مرته ودرت روحي يله
ام جليله : يعني منروح اله يعترف كدام الكل
طلع نجم كوه وايده مجبسه ويمشي على كيفه
نجم : شنو هاي الهوسه
صالحه : تعال عيني شوف اخوك صمد هاي مرته الثانيه
ذكرى : باوعت على نجم ومثلي انصدم مثل الواحد يكول للثاني شفت وين وصلنا
محجيت اي شى
دنكت بدعه وكومتني على كيفج فدوة ليصير بيج شى كمت اريد احجي كوه تطلع الكلمة طبيعتي من اخاف او انصدم الحروف صعب نطقها يصير بحلكي
ذكرى : انتي جذابه
جليله : لا عيني مااجذب صار ٣ سنوات ونص متزوجني وجنت حاطه نعال بحلكي وساكته اكول اتحمله بفكره بس من حبلت كلت لهنا وبس شيكولون عليه الجيران كرايبي اذا كبرت بطني وشنو انتي اطبين واطلعين براحتج وياه وكدام الناس وجهالج مرتاحين واني اجيب جاهل اضمه من الناس
صالحه : وين جانو الناس من اتزوجتي مكلتي عيب ميصير لو من مليتي وشبعتي كمتي ادورين حقوق
جليله : يعني انتي لتدخلين هاي الشغله بيني وبين رجلي وضرتي انتي شكوو
صالحه : اني بت خالته وجنه البيت الحبيره ومن حقي ادخل جايه ادورين حقوق وره تلث سنوات ونص مستحيتي من اخذتي رجال من مرته ولج شون دنت نفسج وقبلتي تعيشين سنين وخاتله بلظلمه عفيه نسوان ماعندجن غيره على سمعتجن ونفسجن
نجم : امشي اطلعي بره ومن يجي صمد النا حجي ويااه
جليله : ليش يمه اطلع هذا البيت بيت رجلي ومثل ماهاي الها بيه اني هم اليه بيه
نجم : امشي اطلعي لتخليني اطلعج بيدي
عاطت جليله جان توخر ذكرى ايد
بدعه لان لازمتها
ذكرى : اني الاطلع من هذا البيت
نجم : خلي يجي صمد ونفهم
ذكرى : هنا صوتي صار عالي لاول مره بهذا البيت وعطت وجني اطلع ضيم السنين العشتها بهذا البيت وبكل الصار بيه
يانفهم منه تكولك صار ٣ سنوات ونص متزوجها يعني اني صار سنين عندي ضره وماادري تحملت الضيم والقهر والجوع والقله واكول خطيه ماعنده مااريد اضغط عليه حسره عليه الكلمة الطيبه واكول تعبان لازم اعذره
تحملت حتى البعد عن اهلي واني بيني وبينهم كم بيت واكول ميخالف هو البنيه من تتزوج مرجعها لبيت رجلها وخطار عد اهلها كلشي شفت منه برود اهمال وكلت عادي طبعه ولازم اتعود عليه يطلع حضرته مخلص شوقه ولهفته وضحكته بحضن هااي
جليله : وشبيهه هااي يمه تسوه راسج كاافي اتزوجني عليج يعني انتي مابيج خير
نجم : انجبي واحترمي نفسج
ذكرى : لا ليش تنجب والله صحيح كلامها وانداريت على خوله وكتلها دومج تكولين مابيج خير وهااي كدامج طلعت صدك مابيه خير حتى محسيت رجلي متزوج عليه ومن سنين اكو اكثر من هيج ثول وفهاوه
خوله : ميخالف ذكرى على كيفج خلي تجي امي وصمد ونكعد ونحلها
ذكرى : محلوله وداعتج لا نكعد ولا اندوخ روحنا
ساهره : انتظري ذكرى اقلها خلي يجون الولد وانتي روحي لبيتج كافي الهوسه السويتيهه
جليله : كتلكم مااطلع من هذا البيت لو على كص رگبتي اليوم اريد اعرف شلون صمد يريد اجيب وياخذ ابني وينطي لهاي ويطلكني شلوون اريد اشوف يارجال يسويها
ذكرى : لا عيني مااربي جهال غيري اني عايفتلج صمد وهذا البيت كله خليت وركضت ليفوك ورايه بدعه
بديعه : اصبري فدوة خلي يجون يجوز يطلكها
ذكرى : لو مو يطلكها ماارجعله ولج متزوج عليه متزوج عليه وكمت ادك على راسي وملخت شعري فقدت
بديعه : كاافي يمه اسم الله على كيفج وحضنتها حيل انهارت المكروده الله يعينها
ذكرى : ساعديني الم ملابسي
لميت كم قطعه وشلت ناي وسحبت يونس من ايده ونزلت وكفت نجم گبالي
نجم : مطلعين ذكرى هذا بيتج
ذكرى : من حرگت گلبي وفاقده كلشي ومااحس بلكدامي كتله كله من وراك ودفعته ومشيت وطلعت من البيت
امشي بلشارع واشيل كوه بناي احس راح توكع من ايدي والعلاكه وكعت وردت شلتها مو كم متر بيني وبين اهلي احس المسافه منا للبصره سمعت صوت يصيح ذكرى ذكرى انداريت واشوف صمد مجاوبته ودرت وجهي
دخلت لبيت اهلي وكعت بلمطبخ وذبيت ناي بلكاع ويونس يبجي واكف اجت وداد تركض
وداد : الرحمن شبيج ذكرى
ذكرى : عطت بكل صوتي متزوج عليه وداد الگلب طلع متزوج بعد كل هذا الفگر والضيم
اجه يركض ابويه وفوزي
فوزي : شبيج شبيج
ذكرى : كمت من الكاع وشمرت نفسي بحضن فوزي واشهك الحك لاختك انداست كرامتها وانهانت
فوزي : ماعاش ولا انولد اليلمس شعره منج
احجي
ذكرى : احجي واشهك فقدت وامي تريد تهدي بيه هلمره ازيد
كمت اعيط كله منكم انطيتوني اله كله منكم
طلع فوزي بلجامه للشارع
وداد : فدوة عمو اطلع وراه خاف يسوي شى
ذكرى : ابجي بحضن امي لحد مسمعنا عياط بره وطلعت حافيه
لكيت فوزي لازم حديده ودك على راس صمد والناس تريد تفاكك بيهم
جان يوكع صمد مدمه وجتفو فوزي وهو يعيط
اليوم انعل شرفك وشرف اهلك
مااخليك عايش يااعار لك هاي تاج راسك وراس اهلك واخوتك ولكم انتم ماتسون اللابسيه برجلنا يهل الزبايل والعتيك تحلمون تاخذون مره من عدنا وتالي هيج يصير بيها اليوم مااخليك تتنفس الهوا ياساقط
طلعت اركض على اخويه خايفه عليه صحيت على نفسي راح يضيع فوزي من ورايه طبكت النجده
يتبع ...