"ان لم تعش لنفسك
لن يأتيك العالم ليدُلك على الطريق الصحيح ،
الكل لديه اولويات بعيدة عنك تماماً،
فإن لم تحب نفسك لن يحبك الآخرين "
الليلة الاولى ...
بعد ما انجريت من ايدي ودخلت الغرفة من الغرف گلبي چان راح يوگف منو هذا اللي راح يسوي هيچ وشنو اللي يريدة مني ،
... منو انتي وشدتسوين هنا محد گالچ وحذرچ ، اهل ما عندچ انتي يخافون عليچ
نار: غييث ، حچيتها متفاجئة
غيث: اي صخام جاوبيني
سحبت ايدي منه بقوة بعد ما چان لازمها قوي
نار: عفوا بس انت شدخلك وشهالطريقة الهمجية هاي ما تگدر تحچي بهدوء وبلا ما تلزمني وتجرني عبالك طلي عندك
غيث : بنتي انتي دتستوعبين اللي دا اگوله لو عقلچ قافل رجعي على مدينتچ وبيتچ سمعي كلامي المكان هنا ما يفيدچ
استغربت كلامه وطريقته بالحچي ليش ديگول هيچ عن اهله الا اذا جان يعرف شي ،
نار : ليش ما يفيدني ممكن توضح حچيك
باوعلي بنفاذ صبر ونفخ انفاسه بقوة وكأنو ديحاول يتمالك اعصابه
غيث : باعي الناس هنا مو خوش ناس ما راح ترتاحين طلعي باچر من هنا ولگيلچ غير مكان صوري بيها
نار: انت دتلاحظ انو الناس اللي دتحچي عنهم همه اهلك وليش مو خوش شنو اللي راح يسوو ياكلوني يعني اشو من اجيت الى حد الان شايليني بالصلوات
غيث : انتي شگد تعاندين لا تسألين زايد روحي منا وخلص
نار: ليش
باوعلي مستغرب
نار : اي انطيني سبب يخليني اعوف شغلي وارجع بعد ما لگيتلي مكان واستقريت ، مو معقولة اعوف كلشي بسهولة ما صدگت جدك وافق على بقائي هنا وانت تگولي روحي وما عندك اي سبب مقنع غير غيرة تافهة
غيث : غيرة تافهة
حجه باستنكار
غيث: انتي تعرفين عن شنو دتحچين حتى تگولين شي تافه
نار : لا ما اعرف ولا اريد اعرف و ياريت تخليني بعيدة عن صراعاتك مع اهلك اني جايه هنا وراح ابقى ٧ ايام وبس اكمل شغلي وارجع لا تشوفني ولا اشوفك ..
درت وجهي طالعة من الغرفة بس قبل ما افتح الباب حچيت
نار: من يكون عندك سبب او شي واضح تحچي وكتها راح اسمع كلامك
باوعت علي بنظرة اخيرة قبل ما اطلع من الغرفة تاركته ساكت ومحتار شيجاوب مبين انو تصرفاته متسرعة وما يحسب للخطوة قبل ما يخطيها ،
جذب انتباهي خيال شخص عالدرج نزل جوا استغربت منو هنا مشيت بهدوء ناحية الدرج بس ما شفت شي يجوز دا اتخيل ...
واكفة عالشباك بغرفتي افكر باللي حچاه مبين انو يعرف هوايه اشياء بس مجبور عالسكوت والخوف مسيطر عليه
،اللي متأكدة منه انو چان قلق من صوته الناصي كلش وكأن يعرف انو احنا مراقبين او اتباعا المقولة الحيطان الها اذان ، طلعني من افكاري صوت سيارة داخلة للبيت ما چان واضح منها شي بس لحظة وگفت السيارة
رحت عالسريع طفيت ضوا الغرفة ورجعت عالشباك اشوف منو اللي اجه خصوصا الوقت كلش متأخر
نزل منها شخص...
ما اعرف ليش گلبي نغزني خليت ايدي على گلبي مستغربة هالشعور وبنفس الوقت خايفة من شنو ما ادري بس كل اللي اعرفه هذا الشعور مو مريح ابدا ، رجعت باوعت من الشباك اللي نزل چان شاب اعتقد ضخم مبين ولابس اسود انتبهت عالسيارة چانت جيب سودا كلشي اسود باسود يا ترا منو هذا اللي جاي اخر الليل ،
رفع راسة وكأن انتبه علية اي انتبه ديباوع عالشباك اللي واگفة ورا ابتعدت عالسريع من الشباك يا الله نظرتة تخوف ملامحة ما چانت مبينة بس عيونة لمعت بالضوا لونها مو اسود غريبة هواي ونظرتة عميقة ،
اريد اشوفة واعرف منو هذا لازم اعرف
لفيت حجابي ولبست سترة فوگ ملابسي ...
الممر ظلمة والكل نايم وصلت الدرج وباوعت من فوگ عالطابق الارضي ما شفت شي ،
نزلت عالدرج بهدوء المشكلة اني ما اعرف البيت وما لحگت احفظة زين بس مكان المطبخ والديوان والصالة اللي اكلنا بيها لحظة هاي الغرفة ضواها معلوگ شدت انتباهي هي الوحيدة اللي مفتوح الباب شوية والضو معلوگ بيها يا ترا منو گاعد لحد الان ،
مشيت ناحية الغرفة بهدوء هسة انتبهت الباب خشب اعتقد هذي غرفة المكتب صوت طالع منها
ثواني هذا صوت الشيخ بس مع منو ديحچي ، طلعت موبايلي وشغلت الكاميرا احاول اسجل اي شي من اللي ديگولو ..
...شدتسوين هنا
تجمدت بمكاني الصوت مو غريب عليه درت راسي بهدوء ناحية الصوت
نار: اا رغد اني اني
رغد : انتي شنو شدتسوين واكفة هنا بهالساعة هاي دتتنصتين
نار:لالالا فهمتيني غلط اني بس عطشت ونزلت اشرب مي بس تهت وما بعد اندل مكان المطبخ
بعدم تصديق ونظرة شك رغد : المطبخ من هناك مو من هالجهة مو دخلتي ويانه عالعشه شبسرعة نسيتي
جاوبت بابتسامة مترددة : ااي صح بس بعدها النومة بعيني وما مركزة زين ، رايحة هسة
مشيت بهدوء واني اتلفت چانت واكفة دتباوع عليه وهاي ثالث شخص مو مرتاح اليه بهالبيت عمار غيث ورغد ...
رجعت الغرفتي بعد ما رحت عالمطبخ وجبت ماي اخاف طلعلي واحد اللاخ وتعالي وضحي وچذبي هاي كارت عبور ابتسمت باستهزاء على تفكيري ، بس كل هذا اللي سويتة وما عرفت الشيخ مع منو چان ديحچي ، خلي انام احسن شي گعدتي هيچ ما راح تفيدني ...
الاثنين
صباحا 8:00
گعدت على صوت دگة الباب ،
نار: تفضل منو
بابتسامة بعد ما فتحت الباب سمر: هاي اني صباح الخير شلونچ ان شاء الله نمتي زين
ابتسمت بهدوء بعد ما تثاوبت
نار: صباح النور هلا بيج والله احس جسمي مكسر ومو شبعانة نوم الساعة شگد
سمر : ساعة ثمانية وجدة دزتني عليچ حتى اگعدچ تجين تفطرين ويانه
باستغراب نار: شعجب تگعدون كلكم من وگت هيچ
بضحكة وهي تجاوبني : هو متعودين على هذا الشي الكل لازم يگعد ويروح الشغلة
نار: اممم زين ابدل وانزل
سمر : ماشي
نزلت سمر وگمت اني بالگوة لان الصراحة مو متعودة اگعد من وكت هيچ بس مجبورة هالمرة مو بس لان عيب منهم اني هم لازم استغل الوقت التأخير مو من صالحي ابد ...
نزلت من الدرج متوجهة للصالة بعد ما غسلت و غيرت ملابسي اليوم راح يكون مليان شغل ،
نار : صباح الخير
گلتها بابتسامة مترددة والكل التفت على صوتي ،
الشيخ : تعالي نار گعدي هنا
اشرلي على كرسي يمة مع اني استغربت هذا الشي بس رحت وگعدت بهدوء ، انتبهت على كرسي غيث مو موجود طبيعي بعد السوا البارحة مبين ما يجي الا بالعركات ،طلعني من افكاري صوت الحجية
الحجية : شلون نومتچ چانت ان شاء الله ارتحتي
نار: اي الحمد الله حجية كلش ارتحت
الشيخ : نار من تخلصين لحگيني على مكتبي
كالها وهو يكوم من مكانه
نار : ححاضر
گلتها بتردد واني مستغربة ليش يريدني بمكتبه عالعموم اني لازم استغل هذي الفرصة
گمت من مكاني بعد ما استأذنت منهم وطلعت الغرفتي قبل ما اروح للمكتب ،
طلعتها من مكان مخفي بالچنطة وباوعت عليها بتمعن
نار: انتي راح تبينين هواي امور محد گدر يبينها
حطيتها بجيبي وطلعت من الغرفة واني دا امشي لاگاني غيث هذا الرجال راح يضل يطلع بطريقي هواي
غيث : انتي ما رحتي لحد الان اكو بعقلچ شي
نار : اني ما گلت راح اروح انت حچيت وقررت بكيفك گتلك اعطيني سبب يخليني اروح بس انت سكتت
باوع وهسة هم ساكت بس بيك حچي بعد عن طريقي
لزم ايدي بقوة قبل ما امشي
غيث: راح تندمين
گالها بحدة وهو يباوع بعيوني
نار: لا تخاف مو اني اللي اندم
فلتت ايدي منه ومشيت رايحة للشيخ ،
دگيت الباب بهدوء ودخلت بعد ما سمعت صوتة يگلي تفضلي
الشيخ: تعالي نار گعدي عندي حچي وياچ
نار : تفضل
الشيخ : انتي من بغداد گلتي مو
نار : اي صح
الشيخ : زين شنو اسم ابوچ عائلتچ منو
باوعت علي بعدم فهم بس جاوبته
نار : اني يتيمة ابوية ميت من زمان وما عندي بس امي الله يحفظها ويطول بعمرها وگاعدة مع خالي بغير محافظة واني اعيش ببغداد لان شغلي بيها وبالنسبة الاسم والدي فاني اسمي الكامل نار سليمان ايوب
الشيخ بتفكير : اممم اني بس ردت اعرف منو موجود ببيتي بما انچ گاعدة معانا على نفس المائدة ومشاركتنا
وهمينة بيچ شبه من شخص چنت اعرفه
نار بغموض : وهذا الشخص وينة هسه
الشيخ وهو يگوم من مكانه متوجه نايحة الشباك ، ضل واگف دقايق قبل ما يجاوبني بهدوء
الشيخ : مات من زمان ونظرة عيونچ ذكرتني بي
اندار عليه
الشيخ : روحي نار على شغلچ خلص هذا كل اللي ردت اعرفة
باوعت علي بحقد قبل ما اگوم من مكاني واني اگول
نار: عن اذنك
اومئ براسة اليه وهو يدير وجهة ناحية الشباك ،
تعمدت اني وگايمة اوگع كتاب جان موجود عالمكتب
نار: ااني اسفة راح اشيله
اعتقد انه مو مهتم للي دا اگولة ضل واگف وكأنو ما سمعني حتى ، شلت الكتاب ورجعته عالمكتب بعد ما لزگت شي تحت الميز وتأكدت انه ثابت ومو مبين وبعدها طلعت من المكتب وهو على نفس وگفتة ...
بعد ما طلعت من المكتب توجه ناحية الميز ولزم موبايلة قبل ما يجري مكالمة مع شخص
الشيخ : ابحثلي عن صحفية تشتغل بقناة ***واريد كلشي عنها من يوم ولادتها الى حد هاللحظة اسم هالصحفية
نار سليمان ايوب ....
اتوجهت للمطبخ ادور على سمر ، چان الخدم واثنين نسوان كبار واگفين وحدة منهن اعتقد هي ام غيث
سألتهم ..
نار: عفوا وين الگي سمر
باوعولي اثنينهم بنظرة طويلة قبل ما تجاوبني وحدة منهن
المرة: سمر بنتي شتريدين منها
اتفاجئت من اسلوبها الهجومي بالحچي
نار: اا ما اريد شي بس اسألها على شغلة
ام غيث : سمر تلگيها بالبستان برا
نار: شكرا الچ خالة
بمجرد ما طلعت من المطبخ اندارت ام سمر
ام سمر : نهال هاي انوب منين اجتنا ناقصين احنا
نهال : سكتي يمعودة اني هم معاجبني وجودها ومستغربة شلون وافق الشيخ على گعدتها هنا
ام سمر: هو هذا اللي قالقني احنا ما نقبل الغريب يدخل قريتنا انوب يگعد بدارنا
سكتو بدخول الحجية للمطبخ ،باوعتلهم وهي تگول
الحجية : شبيكم وحدة حاطة راسها براس الثانية وتاركين الشغل
نهال: ماكو شي حجية دنسولف عادي
الحجية : اي صدگتج بس سوالف عادية مو
وحدة باوعت للثانية يعرفون ما مصدگتهم منو يگدر يچذب عليها ، التالي كل وحدة راحت الشغلها متجنبة الخلاف مع چبيرة العائلة ...
طلعت للبستان چان كلش چبير وبي انواع الاشجار والزرع شلون راح الگيها هنا ، باوعت ماكو احد بالمكان غريب وين الفلاحين لعد ..
خل استغل الفرصة ما دام هيچ ، مشيت بين الزرع چان عالي والهوا كلش قوي والشمس تضرب بالراس الى ان وصلت مكان الزرع بي غريب شكلة ومبين متعمدين يخفونة بين الشجر هو هذا اللي دا ادور علي لگيتها
گلتها بابتسامة نصر، طلعت الكاميرا حتى اخذ صور هذي الصور كلش مهمة وراح تفيدني هواية
بديت اخذ الصور بس ..
صوت رجال وگفني عن اللي چنت دا اسوي
... انتي شدتسوين ومنين دخلتي الهنا
يتبع ..
لا تنسون اللايك ❤️
ومتابعة للصفحة ❤️❤️❤️
عيد فطر مبارك ينعاد علينا وعليكم بالصحة والسلامة 🥰🥰