اسيرة قدرك

البارت التاسع

اسيرة_قدرك..
بقلمي رسل..
البارت التاسع..

انه منيلي حلم وردي
غير الواقع اشعندي
ابدي بيا حزن ماضل رمش بالعين
غير المدمع اشتلكه وسط خدي
انه منيلي وطن صافي
ولو مره نمت مرتاح
كلها تكلي متعافي
شذنبي وكلشي متبدي
مامش حلم كدي
سنيني الرغبتك ماتت
يفز بيها الامل وتضيع من عندي
انه منيلي حلم وردي..

-انوم ببنتي وهو كاعد يمنا دخلت
حماتي كالتله اسر وصل الشراي و تبتسم
وتباوعلي بحقد..

-كلش انقهرت هو باوعلي كالها روحي هسه
اجي وراج..

-اتقرب مني حجه وياي بصيغة وكانو
يقنع طفل كباله..

-ريا
حبيبتي
شوفي هاي راح تضل الغرفة الج خلي تولي
الشقة ها وراح يصير عدنا سيارة بعد شتردين
ما ارتاحينا بيها بس مشاكل..

-لا ليش انقهر وعلى شنو اسر اذا اريد انقهر
و اذا تنزل دمعة من عيني فهو على نفسي
وبس بيعها عادي واذا تريد حتى هاي الغرفة
هم انطيها الهم ارجع انام بالصالة
و ملابسي اخليهم باكياس نايلون عادي
مو جديد الوضع عليه ابد..

-اصلا ما الي مكان يمكم كلكم تكرهوني
وكلكم ثكيلة عليكم
قبلك ابوي طلعني من بيته و زوجني غصب
وكلما ترجعني الهم يسمم بدني هو واخوي
و يخلوني ارجع
اجيت يمكم ما شفت و لا ضكت طعم الراحة
شفت العجب يمكم
شفت الخبث و الحقارة على اصولها
و كملت وياك كلما زعلت وتهددني بالشقة
بيعها والله بيعها اذا تشوف ابوي رخصني
علمود الفلوس احب اكولك اني مو مثله ولا كاتله
روحي على شقة مانين بيها عليه من اخذتوني لليوم بيعها و خلصني منها مسوي عليه منيه
مشتريلي شقة و كل يوم ذالني بيها اني لو
عندي اب لو اخ بيهم خير والله لحظة
ما ابقى يمك اصلا يمكن جان ما سويت بيه
هيج لان تفكر وراها اهل روح اسر
روح بيعها انطي الغرفة شتريد تسوي سوي..

-اخذت بنتي و طلعت اختنكت كلش
اخته دخلت و تقنع بي وتريد الشقة الصديقتها..

-كم يوم و بسرعة بسرعة نباعت الشقة
انطو قسم من الفلوس اشتره بيهم سياره
و الباقي لاهله سمعت منهم يردون يرتبون
الشقة مالتهم..

-من يوم الي باعها كتله بعد ما عندي كلام
وياك.. هو يتقرب مني يحجي صار ينكل
اكل ويجيب واني ولا اهتم بي حار شنو يسوي
واني تاركته عايشه لبنتي و للطفلة الي بطني
اهله اسمع كلامهم منا اطلعه منا
صار عندي كل شيء عادي لو تحترك الدنيا
ما اهتم..

-شهرين مرت واحنا علاقتنا منتهيه هو يحجي
يحاول واني اصده و ما يكدر يمد ايده مدري
يخاف على بنته مدري حالي يكسر الخاطر..

-دخلت بشهر السابع من الحمل يومين و بالليل
اجتني الطلوكه انتهيت من الالم هو اخذني
وعمتي هم راحت ويانا هاي المرة اخذوني
للجدة من بعد الألم و شفت الموت بعيوني
وجنت خايفة لان مو بالمستشفى
ولدت بنتي الثانية من شفتها انكسر خاطري
عليها ضعيفه كلش وناعمه الحمد لله طلعت
سالمة بعز كل الي مريت بي واني حامل
بيها شوفتها سكنت جروح كلبي
وحرك روحي
و مر كل الايام الي مضت
احس الله انطاني هدية بوقت كرهت بي حتى
نفسي.

-رجعنا للبيت سماح اخذت الطفلة من عدنا
و حماي بس شافها كلب الخلقه كال سموها
.... استغفر الله حجيتها و سكتت سكير و طايح
حظ مو بعيدة عنا يكفر الي يشوفه يكول البنية
بنته هو زوجي ما ضاج مثله..

-ولا حدة منهن تحمدت الي بسلامة كوه نمت
منا تعب الولادة ومنا بنتي تفز وهن ضايجات
لان بنية وما جبتلهم الولد ابوها سماها على
اسمي كال هاي ريا الصغيرة..

-ثاني يوم بدت وفود الخطار عليهم
حمواتي انتقلن يمي تلفزيون و حب
وضحك واني الوب بس اريد انام لو ارتاح
شوي ما اكدر لا يكولن نفسه لا يهمهن مريض
و عمتي هم ما تحجي وياهن..

-يوم عن يوم صحتي بدت تتراجع كلش
تجيني اوقات ما اكدر اتنفس اريد هوا احسه
يشح عني ورغم هذا اكوم على بناتي لان
محد الهن ذبيت كل حيلي عليهن انقهر عليهن
ما اريدهن يعيشن بنقص حنان واهتمام مثلي
عماتهن بس يوصخن الغرفة و يطلعن
واكوم بيه ما بيه انضفها ما اعرف انام بالوصخ..

-يوم عن يوم انعزل عنهم صرت انعزالية
كلش لا اطيقهم و لا اطيقه خطار يجون
يوجبوني اشيله انطي العمتي بس يطلعون
ما اريد شيء منهم وهي عينها على الي ينطوا
الي لهذا اشيله واخلي بيدها لان كل خلك
ما عندي الها..

-اسر منتبه عليه و على صحتي الي تراجعت
كلش بس ما يكدر يحجي كلش يهتم لامه
ويعرف اذا اخذني بعد للطبيب راح تكلب الدنيا
على راسنا..

-صادف اليوم دورت سنة ابوهم سووا عزيمة
و عزموا اغلب اقاربهم نور اجتني ودك على
باب الغرفة وتضحك راح يجن الي تحبيهن
يا ريا استعدي..

-رغم كارهته ورغم كارهه حتى روحي
بس ما اكدر ما ادري من اشوفهن مدري
شيصير بيه كمت كشخت و رجعت على بناتي
لبستهن و عطرتهن ونور ميته ضحك عليه..

-خرب ولج ما اعرف بالغيرة هيج تسوي
ها نكول يالله تصافيتوا انتي واخوي و تغمز..

-لا تحجين بكيفج شنو واحد يبطل يكشخ..

-اكشخي اكشخي وذاك هم يكشخ انتظر
بس النتيجة حجتها و طلعت..

-ضحكت عليها ما يفوتها شيء..

-قبل الغدة اجوي كلهم عمتي لطشت ببتت
عمتهم هي حلوة بس عمتي هواي صبغت
بيها تحجي كدامي و تغور بيه..

-ما ادري شجاه ابني عاف هذا الجمال
جنها اصالة نصري و راح مدري منين
جابلي شكول متعافي اسر متعافي والا شلون
يعوف كل هالجمال..

-طنشتها وكانو ما سمعتها اخذت عهد على
نفسي اعيش لبناتي وبس ما الي دخل بيهم
لو مو يحجون لو شنو يسوون..

-لليل بديت اغفي واني كاعدة من التعب..

-جيبي الطفلة يمي وروحي نامي..

-باوعت معقولة سماح هيج تحجي صافنه
عليها من الصدمة صاحت جيبيها شبيج
وروحي.. خليتها يمها و كمت والله ولا ارفض
منتهيه من التعب..

-رحت للغرفة خليت راسي على المخدة
واطرد بالافكار تعبانه واريد بس انام
حسيت عليه سحبني لحضنه كمت
خليت مسافة بينا و رجعت تغطيت ونمت
والله لاحاربك حرب نفسية يا اسر
وتشوف..

-ثاني يوم اجتني نور فرحانه وتبوس
بيه ها شعحب شنو هالحب النازل
عليج من الصبح..

-لج ريا راح يتقدملي ولج راح اخلص
واطلع منا..

-منو؟!..

-شبيج الي وياي بالكلية..

-تذكرت مره هي حجتلي عنه بوستها
وباركتلها والله حقج هو منو ما يفرح
يطلع من بيتكم نور كلش تكره العيشة ويه
اهلها..

-ضحكت هي واختها الجبيرة كالت
ولج والله مقهورة عليج تبقين وحدج
يا كلنج ذني..

-الله يسعدج الي الله مو وحدي..

-وفعلا اجوي و شافوها و حددوا يوم
للمشية نور جانت فرحانه كلش و سماح
تخبلت تعاركت ويه نور حقيرة تتمعشكين
مودينج منين جبتي علينا..

-اجتي نور مقهورة سماح كلش اذتها بكلامها لج ريا هي الي تحب
الحقيرة تدرين هي تحب جيرانه سكير
وطايح حضه ودك اتصالات ويا فوكاها
جبير وابنه متزوج بناته كبار وجايه تعاتبني..

-هي تحجي وتذكرت بيوم الي رحنا للمستشفى وهي ويانا دك تليفون و طلعته
من صدرها بيومها غلست و هي هم عبالها
ما شفتها..

-ما حجيت لنور ما عايزني مشاكل
هي واعية وجبيرة واكيد تعرف الي جاي
تسوي..

-من بعد كم يوم اجوي اهلي لاول مرة
استقبلهم بوجه ثكيل كل الي بيه هم
سببه ابوي وامي ما اجوي ما يكدرون
يصعدون درج العمارة بس اخواني
و خواتي وزوج اختي اجوي..

-جابولي هدايا للطفلة وملابس اباوع
لاخوي الجبير انطلق ويه اسر
شافوني ما طايقتهم شوي و اترخصوا
وطلعوا وصلت مرحلة بفضلهم اكرهم
واكره كل شيء يتعلق بيهم بفضلهم خلوني
جسد بدون روح
طفلة و فتحوا عيونها على مصايب اكبر
من انو تتحملها
خلوا الوان العالم تشوفها اسود و ابيض
ما عاد يفرحها احد
ولا يستهوي فضولها شيء
باختصار طفوا شمعة شبابي من وافقوا على زواجي..

-وراها بدينا نحضر لمشية نور كمت وياها
لان تستاهل ساعدتني هواي ببناتي
و حتى بوجه خواتها جانت توكف علمودي
خطية جانت كلش فرحانه و اني فرحانه
لفرحها وهي كل شوي وصاحت والله
انتي احسن من سماح الي حتى فرحتي
نغصتها..

-اسر يقترب واصده احس عليه الصبح
يبوسني و يطلع للدوام من يجي اطلع
من المكان الي هو بي بس قايمه بواجبه
اكله ملابسه..

-صار الليل لو احس روحي طلعت
والله احس واحد مخلي ايديه على ركبتي
بقوة خليت ايدي على صدري اريد
بس اسحب الهوه ماكو اسر جان كاعد
على الجرباية يباوع تلفزيون كوه حركته
بيدي واني اريد بس هوا يدخل لريتي
لحظات حسيت بيها الموت اقرب اليه
من كل شي..

-هو التفت عليه من شافني طفر
على حيله صاح ريا شبيج....

يتبع....

وهذا البارت الثاني تدللون..
ول يابه مدللتكم مو بلا..

اللهم صل على محمد وال محمد❤️