بنات حجي عمران الفصول الاربعة

البارت العاشر

#بنات_حجي_عمران
#الفصول_الاربعة
#للكاتب _ محمد_ ابو جود
#البارت_العاشر

لا تسأل الدار عن من كان يسكنها
الباب يخبر ان القوم قد رحلوا

ما ابلغ الصمت لما جئت اسأله
صمت يعاتب من خانوه و ارتحلوا

يا طارق الباب رفقاً حين تطرقهُ
فإنه لم يعد في الدار أصحابُ .

تفرقوا في دروبِ الأرض وانتثروا
كأنه لم يكن انسٌ واحبـــــــابُ .

أرحم يديك فما في الدار من أحد
لا ترج رداً فأهل الودُ قد راحوا .

ولترحم الدار ..لا توقظ مواجعها
للدور روحٌ ....كما للناس أرواحُ

نور : واكفة كدام الباب اتقدم خطوة و ارجع خطوتين راح اكدر ادخل لو لا اذا دخلت راح اسمع صوت بهية و هي اصيحلنة راح اسمع صوت عمران راح اسمع قيصر و ابنة عمران يلعبون لو راح الكة البيت صحراء مهجورة

بعد ما وصلت البنات ضليت افتر بالسيارة حيل مخنوكة للساعة عشرة رحت لبيت ابوية وكفت بالباب خجلانة على خايفة كل المشاعر و الاحاسيس اجني مرة وحدة فززني من صفنتي صوت مرة جوارينة ام فرقد

ام فرقد : هلا هلا بهل طول تعاي يمة نور

نور : اجتني المرة و حضنتني حيل هي كلش صديقة امي ضلت تشم بية و تكول افيش يا ام قيصر بوستني

ام فرقد : اشلونج يمة نوارة

نور : الحمدلله خالة برحمته

ام فرقد : يستاهل الحمد تعاي وياي

نور : وين

ام فرقد : نتريك اني وياج و الله تجين و ما تكولين لا

نور : رحت ويا ام فرقد سوت ريوك و كعدنا ناكل و ضلت تسولفلي ع المنطقه و سئلتني هم عرفتو القاتل منو

نور : لا والله لحد الان ماكو شي ما عرفنا خالة انتم هم شفتو احد اجة للبيت

ام فرقد : لا والله حتى ابو فرقد ورة ما رحتن لم جهال المنطقة و سئلهم اذا شافو احد دخللكم مو تدرين جهال المنطقة دومهم بالشارع و يلعبون بس وسفة يخالة محد عرف

نور : الله كريم خالة

ام فرقد : البارحة جنت يم حنين و ترى كلش مريضة نايمة بالفراش جنها راح تموت هاي البنية

نور : اوووف يا خالة والله تعبت هم قصرت وياها اني بس الله وكيلج نريد نموت و حجيتلها على سحر و اشلون اطلكت

ام فرقد : سودة علية جانت ام قيصر دوم تكول ما مرتاحة لذو الفقار بس سكتت لان سحر تحبة

نور : طلعت من بيت ام فرقد تقريباً الساعة 11 و نص اتصل علية عمو حازم كلتلة رحت لحنين سديتة من عندا و رحت لبيت حنين دكيت الباب فتحلي الباب طفل صغير يصير ابن اخو حنين

نور : عمة حنين موجودة و بيبي

الطفل : اي موجودات هسة اصيحلج بيبي

نور : دخل الطفل شوية و طلعتلي ام حنين بس شافتني ركضت حضنتني بالشارع و ضلت تبجي و اني ابجي وياها رحبت بية و دخلتني اول ما دخلت للمطبخ طلع عمران ابن قيصر بس شافني ركض علية و ضل يبجي و يعيط و حاضني حيل ما يقبل يعوفني شلتة و دخلتني ام حنين للغرفة مال حنين بس شافتني رفعت ايدها و كامت تبجي نزلت عمران و ركضت عليها حضنتها نايمة بالفراش ما تكدر تكوم

حنين : نور ااااااااااخ يا نوووووور

نور : ضلينا نبجي اثنينة وخرت من عدها شفتهة شصاير بحالهة جنهة هيكل عظمي باقية جلد و عظم كلتلها اشلونج يا روحي

حجت و هي بالكوة يطلع صوتهة بي بحة و مخنوك و يتقطع كلامهة لان حيل مريضة

حنين : م... مو.... مو.... زينة... ن... نور ....اذا ... متت .. عم ... عمران أمانة عن ... عندج

نور : اسم الله عليج عمرج طويل اريدج تشدين حيلج اذا مو لخاطرج لخاطر عمران ابنج

ضلت ساكتة و بالكوة تجر النفس ضليت كاعدة يمها و ضلت تسئلني عن حياتنا سولفتلها على سحر ضلت تبجي شوية و أذن الظهر كملت صلاة و رحت يم حنين

حنين : نور اريد اكلج شي مهم حيل

نور : اي احجي اسمعج

حنين : بيوم عقد ورد من رحتن كلجن و امج راحت هم و ابوج طلع عندا شغل و قيصر هم طلع و اني عند اهلي يعني البيت ضل فارغ اتصل علية قيصر و كالي خلي عمران الصغير يم اهلج و اطلعيلي بالباب عندي موضوع وياج من طلعت اخذني و راح لبيت حجي عمران دخلنة جانت بيدة علاكة فتحهة طلع من عدها كاميرا مراقبة صغير كلش صغيرة جنهة تمراية كلتلة شنو هاي

قيصر : اسمعي حنين و فتحي عقلج و اذنج وياي هاي كاميرا مراقبة راح اعلكهة بالصالة بمكان مخفي اذا بيوم من الايام صار بينة شي تكولين لعمي حازم لو البنات عليها

حنين : شنو شيصير عليكم

قيصر : سالفة طويلة بس ترى هاي الكاميرا حتى ابوي يدري راح اركبها و اني أمنت بيج و كلتلج لا تنسين اذا صار شي تكولين لو لعمو حازم لو للبنات عليها

حنين : هزيت راسي و الخرف أكلني أكل و هوا ركب الكاميرا بصف صورت جدج ابو عمران الي بالصالة يعني أكيد الكاميرا صورت القاتل
و ترحين لغرفة قيصر تلكين بالكنتور جنطة سودة تفتحينهة تلكين لابتوب الكاميرا مربوطة ع الابتوب هاي الأمانة وصلتها الج روحي هسة بسرعة نور

نور : طلعت بسرعة من بيت حنين رحت لبيتنة وصلت لكيت الباب مفتوح دخلت بسرعة لكيت سمر و وياها دكتورتها دكتورة اماني و وياهن ولد اني اتفاجئت بيهم و همة تفاجئو بية

سمر : اخذت الرقم من لبنى و اتصلت على الضابط رسلان رد علية

الضابط رسلان : الووو

سمر : مرحبا رسلان اني سمر

الضابط رسلان : اهلاً و سهلاً عرفتج يا لبوة

سمر : شنووو

الضابط رسلان : ههههه مو مهم المهم شعجب اتصلتي علية

سمر : اكدر التقي بيك عندي موضوع مهم وياك

الضابط رسلان : اي عادي اشوكت و وين تحبين نلتقي

سمر : تكدر هسة تجينة للجامعة ........... بس توصللها خابرني و اطلعلك اذا تكدر

الضابط رسلان : اي اكيد تدللين

سمر : سديتة من رسلان بدات المحاظره البنات دخلن و اني رحت لمكتب الدكتورة اماني كلتلها ع الموضوع كلة

دكتورة أماني : و هسة شنو شسوين ويا الضابط

سمر : اروح ويا للبيت يفتش يشوف اكيد نلكة شغلة بي

دكتورة اماني : اني اروح وياج ما اكدر اخليج ترحين ويا الضابط وحدة

سمر : ياريت بعد احسن والله اكون ممنونة

دكتورة اماني : تدللين من يوصل كليلي حتى نطلع اني وياج

سمر : رحت الكافيتريا شربت جاي و نص ساعة و اتصل علية رسلان كال اني اباب الجامعة طلعنة اني و دكتورة اماني سلمنة عليه و صعدنا ورة كلتلة خلي نروح لمكان كون هدوء نحجي وحدنا

دكتورة اماني : اني اقضل نبقى بالسيارة و احجيلة

الضابط رسلان : اي تفضلي اسمعج

سمر : حجيتلة كلشي عن مقتل اهلي و سئلني اذا ابوي عندا عداوة كلتلة لا ما عندا بس قبل فترة صارت مشاكل هوا و خالي لان خالي راد العشيرة الة

الضابط رسلان : شوفي اول شي نروح نفتش البيت اني وياجن و ثاني شي خلي يكون بعلمج 90‎%‎ خالج هوا القاتل

دكتورة اماني : والله اني هم شاكة بخالج

سمر : هوا خالي فاهي مو مال يكتل بوخة بس يصيح

الضابط رسلان : خوفج منهم الساكتين هذولي خبيثين حيل المهم هسة دليني على بيتكم

سمر : دليتة ع البيت رحنة اني ما عندي المفتاح فعبر هوا من الباب و فتحة و دخلنة ضلينة نفتش بالكت اكو فد دليل انوب ضل يسئلني كم سؤال على بابا و هوا يفتش

الضابط رسلان : تعالن شوفن بسرعة هاي شنو

سمر : رحنة وكفنة يمه كال شوفن هاي شنو و أشر على صورة جدي ابو ابوية

سمر : هذا جدي ابو ابوية متوفي

الضابط رسلان : اروح فدوة لجدج الي اتزوج بيبيتج الي خلفت ابوج الي اتزوج امج الي خلفتج

سمر : هذا قرف لو غزل

دكتورة اماني : خلونة بموضوعنا

الضابط رسلان : شوفو الصورة بيها كاميرا

سمر : صفنت ع الصورة كلشي ما بيها كلتلة شنو الموضوع وين الكاميرا

الضابط رسلان : هاي يمعودة ... صعد ع التخم و كال هاي كاميرا مراقبة بس المشكلة وين الجهاز او الشاشة او الابتوب المربوطة عليها الكاميرا

سمر : هاي صدك كاميرا والله عبالي الاطار مكسور

الضابط رسلان : المهم لازم اكو جهاز بي تسجيل لتصوير الكاميرا

سمر : ضلينا محتارين منين نجيب هذا الجهاز و هي اصلاً من اشوكت اكو كاميرا بهل اثناء دخلت نور

نور : هاي شدا يصير هنا

سمر : رسلان فوراً نزل من التخم و كال انتي منو

نور : اني بنت حجي عمران الحبيرة بنت صاحب هذا البيت

الضابط رسلان : سمر هاي اختج

سمر : اي هاي اختي شجابج لهنا نور

نور : انتم شسوون هنا و منو هذا الولد

سمر : حجيت كلشي لنور و هي حجتلي على حنين

الضابط رسلان : حلووو معناها الكاميرا مربوطة بـ الابتوب جيبو و اني اعرف اطلع التسجيل

نور : دخلت لغرفة قيصر و اااااخ على جروحي الي اتفتحت اخر شي جنة كاعدين هنا و انصح بي ينسى ورد

فتحت الكنتور جريت التشيرت مالتة شميتة حيل و اخذت الابتوب و انطيتة للضابط رسلان

فتحة كدامة و ضل يبحوش بي شوية و كال يا يوم ماتو اهلج

سمر : كلتلة ع التاريخ و شغل التسجيل

و كال تعالن اكعدن هنا و شوفن التسجيل و اني كايم خاف تطلع بنية بدون حجاب

سمر : هزيت راسي و رحنة كعدنا اني و نور و دكتورة اماني و بدا التسجيل و كل شويا نقدم بي اول شي الصبح امي كعدت انوب كعدو يتريكون انوب اندكت الباب راح قيصر يفتحهة و امي و بابا كاعدين طب قيصر و وياه خالي جاسم تسالموا طبيعي و خالي كعد شوية و قيصر راح للمطبخ بقو بس امي و بابا و خالي فجأة خالي مد ايدة بالجيب مال الدشداشة و جر مسدس

فوراً على بابا و ضغط عليه و اجت الطلقة بصدر بابا امي صرخت و قيصر اجة من المطبخ ركض جاسم وجه سلاحة على قيصر و رمة اجت الطلقة ابطن قيصر و رجع رمة الثانية اجت بجتف قيصر رجع باوع لامي الي وكعت فوك ابوية و تصرخ تقرب عليها و ضربهة دفرة بكل قوتة على ظهرها وكعت بصف بابا و جاسم وجه السلاح عليها ضربهة طلقة اجت بكصت امي و رجع على بابا ضرب طلقتين على جسمة
و طلع من البيت و كأنو شيءً لم يكن

نور : اباوع ع الفيديو بكل حواسي صفنت و فقدت فصلت عن الدنيا الدكتورة اماني كامت ما كدرت تكمل و ضلت تصيح لعنة الله عليك يا نكس

و سمر فجأة وكعت من التخم للكاع حتى الابتوب وكع ركضنة عليها اني و دكتورة اماني و اني بالكوة اجر النفس كل شوية اضرب على صدري و اصيح يا ربي بس الصبر

بالكوة كمت مشيت خطوتين و كعدت بالكاع ايدي ترجف مديتهة بالكوة جريت الجنطة فتحت الموبايل دخلت على رقم عمو حازم و انطيتة لدكتورة اماني بألف يا ويل حجيت

نور : هذا عمو حازم بس احجي ويا خلي يجي

اخذت دكتورة اماني الموبايل و اتصلت عليها شوية و سمعتها تحجي

دكتورة اماني : اهلا اخوية اني مو نور اني دكتورة اماني دكتورت سمر بالجامعة ..... لا بس ياريت تجي لبيت البنات يعني لبيت ابوهن بس ضروري تجي بسرعة

فردوس : جنت كاعدة دك موبايلي رقم غريب كمت رديت عليه شفت حازم نزل مستعجل و طلع و اني دخلت للغرفة احجي

فردوس : الوووو

*** : السلام عليكم

فردوس : و عليكم السلام تفضلي منو وياي

**** : اني *** من بيت منهل اشلونج فردوس

فردوس : جنت كاعدة من كالت اسمها كمت وكفت بحياتي ما اتوقعت ارجع و احجي وياها بحياتي ما اتوقعت اكو شي يربطني بـ***

*** : راح تضلين ساكتة عندي شي مهم وياج

فردوس : 14 سنة كلش هواي اخر مرة شفتج و سمعت صوتج قبل 14 سنة و لا اتوقعت اسمعج لو اشوفج ابد

*** : البقية بحياتج على عمران

فردوس : مو بس عمران مات بهية و قيصر هم ماتو لو هذولي ما الهم وجود عندج

*** : عندي موضوع اهم من هل سالفة

فردوس : خير ان شاء الله شكو تدرين بعدني مصدومة ما مصدكة جاي احجي وياج بعد كل سواياتج

*** : عوفي الدفاتر القديمة و لا تفتحين جروح هي بالكوة انسدت خليني بالاهم

فردوس : اي و شنو الاهم احجي اسمعج

*** : اني اعرف من الكتل عمران و بهية و قيصر

فردوس : بس سمعت كلامها حسيت كهرباء سرت بكل جسمي بسرعة تحركت و سديت الباب و كلتلها تعرفين منو و ساكتة و احنة جاي نموت الف موتة حتى نعرف منو القاتل و ناخذ حقنا منه

*** : حتى لو كلتلكم ما راح تستفادون لان القاتل شرد و من زمان و يجوز هسة صار ببلاد الواق واق

فردوس : *** احجي منو القاتل

*** : حجيتلها كلشي على جاسم و مرتة و اشلون جاسم اعتذر لان عندا غاية

فردوس : يعني لان جاسم اعتذر انتي تكولين هوا القاتل هذا مو منطق ترى

*** : خلي اكمل ... و قبل عقد ورد بيوم جنت كاعدة من الفجر و شفت جاسم طلع و بيدة مسدس للعصر رجع جاسم و الوقت كلة هذا مرت جاسم بس تحوس و تفتر و كل شويا عينها للباب لحد ما اجة جاسم و دخلو لغرفتهم ركضت اتسمع عليهم

مرت جاسم : ها ولك سويتها لو لااا

جاسم : اقري على عمران و بهية و قيصر الفاتحة

مرت جاسم : كتلت بهية و قيصر ليش مو كلتلك اريد بهية هنا حتى اذلهة

جاسم : ما كدرت اخليها لان جانت موجودة

مرت جاسم : و بنات عمران

جاسم : كلهن ابيت حازم

مرت جاسم : دير بالك منهن

جاسم : ما اخاف منهن و لا مهتملهن

مرت جاسم : خوفك منهن بنات حجي عمران بألف رجال مو سهلات جاسم روح اشرد يلةةة

**** : بنفس اليوم جاسم شرد و محد يدري بي وين راح لليل و عرفت مرت جاسم ليش خلت جاسم يكتل عمران مرت جاسم جانت غايتهة تضيع جاسم و حتى هي تلعب شاطي و باطي و صدك بنفس اليوم ساعة 2 بليل مرت جاسم شردت ويا عشيقها و الدنيا مخبوصة عليهم

فردوس : حسيت عقلي وكف من كلامها الموبايل وكع من ايدي بالكوة مشيت و اتعثر بخطواتي طلعت من الغرفة مصدمة صافنة اتعثر يحجون وياي ما ارد

منيرة : اسم الله فردوس شبيج

فردوس : ما رديت عليها طلعت للحوش و ردت اطلع للشارع ركضت عليه منيرة و كمشتني

منيرة : شبيج ولج فردوس طالعة للشارع بدون حجاب شبيييج فردوس صاير شي

فردوس : وخرت منيرة و اني وكعت بالكاع ركضت عليه منيرة

منيرة : ولج فردوس شصاير مو انهد حيلي ولج

فردوس : اخوج النذل جاسم هوا الكتل عمران و كتل قيصر و المصيبة كتل اختة بهية

منيرة : ما اعرف اوصف حالي من سمعت كلام فردوس كمت من يمها و ارجع خطوات ورة و اهز براسي و اعيط لا لا مستحيل و ضليت اضرب على خدودي و اصرخ طلعن حجية لبابة و ورد و كلها تسئل شكو

سمر : اخر شي شفتة من جاسم ضرب امي طلقة بعدين الدنيا اضلمت بعيوني و ما حسيت على شي بعد الا و اني بحضن دكتورة اماني فتحت عيوني مصدومة و ما مصدكة الي شفتة و ضليت اتلفت و كأنو اريد احد يكلي ترى الي انتي بي حلم مو حقيقة اريد كلشي يتغير اريد كلشي يرجع مثل ما جان امي و بابا و قيصر احنة بنات عمران شنو الي سويناه بحياتنا حتى هيج يصير بحياتنا ما أذنبنة بحق احد ابوية ما غلط ويا احد اصلاً ناس من تلفات الدنيا تجي محتاجة و يساعدها ليش هيج صار و شكو شنو وين احنة وين راح تصفى الدنيا بس غير دم جاسم و كل بيت منهل ما راح تنحل السالفة

دخل رسلان كال وين صاير بيت خالجن جاسم هسة اخذ فرقة و نجرة جر هوا و كل اهلة

نور : اولاً هذا مو خالنا ثانياً مشكور تعبناك ويانا بس ثارنا ناخذة بالعشاير ماكو قانون دولة يبرد گلبي الدولة اقصى عقوبة عدها لو تعدمة لو تسجنة مؤبد و هل سوالف ما تمشي وياي مستحيل اخلي جاسم يموت بسهولة اذا ما اذلة و اعذبة هوا و كل اهلة زلم و نسوان ما ارتاح لا والله

الضابط رسلان : بس الدولة لازم تعرف

نور : عشر ايام مرت و الدولة لو مهتمة بشي جان لكت القاتل

سمر : رسلان ضل ساكت و شوية و دخل عمي حازم يتراجف نور حجت ويا و شوفتة التسجيل ضل صافن كام وكف بدون ما يحجي حرف واحد طلع موبايلة من جيبة و اتصل

عمي حازم : الو بهاء اريد هسة تجي انت و كبارية العشيرة لبيتي بسرعة و اذا اتأخرتو اسوي شي اخلي الدم بين ولد العم يوصل للركاب

سمر : سدا من بهاء و اجة صور التسجيل بموبايلة و كال يلة كومن طلعنة من البيت رسلان اتشكر منه عمو حازم و راح و اني و نور و دكتورة اماني بسيارة نور وصلنة دكتورة اماني للجامعة و اتصلنا على سحر و عايدة خليناهن يطلعن و رجعنة للبيت وصلنا لكينة ورد و جوري و عمة فردوس محتارات بخالة منيرة و بيبي لبابة متخربطات اثنينهن

بهل لحظة كرهت الكل بدون أستثناء اقل الساعة اجة جعفر و اجو صبري و ولدة حيدر و جلال و سامي و اجو احمد و محمد ولد عمة بدرية و اجو حسن و حسين اولاد عمة صابرين
و اجن عمة بدرية و صابرين و البيت انضج و كلها صايرة نار كبرة

ما اعرف الله يعين منو بينة يعين لبابة الخسرت ابنها و حفيدها

لو يعين بنات لبابة الخسرن اخوهن

لو يعين بنات عمران الخسرن ابوهن و امهن و اخوهن

لو يعين منيرة الي اخوها كتل اختها

شوية و دخلو زلم العشيرة صعد حازم جاب عكال و عباية ابوية حتى يلبسوهن لبهاء من شفت عمي دا ينزل ع الدرج و بيدة العكال الي دمر حياتنا و گلبها على روسنا ركضت بكل حيلي جريت العكال و دخلت حتى بدون حجاب للاستقبال بنص الزلم كلها وكفت متفاجئة بية شلت العكال و طريتة بالكاع و عطت

سمر : هاكم هاي الخيوط الخرا الي بسببهن مات زينة زلم العشيرة و ضلت العارات

اجو احمد و جعفر و سامي بالكوة جروني جر من الاستقبال و اني اعيط و اصيح ع الزلم و اكلهم الله لا يوفقكم الله ياخذكم و ياخذ هل عكل الزبالة مالتكم يا حيوانااااات يا عديمين الانسانية لكم هاي العكل سبب دمار كلشي

بالكوة طلعوني من الاستقبال عمي حازم كلشي ما حجة لان فاصل من الدنيا يمشي بدون وعي دخلو للأستقبال و صار بهاء شيخ للعشيرة كامت بيبي لبابة و بالكوة تمشي على عكازتهة

بيبي لبابة : ورد روحي جيبلي شال من نور و شال من سحر و من سمر و من عايدة و جيبي شيلتي بسرعة

راحت ورد حابت الشالات و الشيلة و انطتهن لبيبي و بيبي اخذتهن و راحت للأستقبال

فتحت الاستقبال و دخلت عليهم كلها كامت كلها تعرف بيبي لبابة

بيبي لبابة : اسمع يا بهاء تحرم عليك كلمة الشيخ اذا مو كتال ابني جواي يصير و شمرت عليه الشالات و الشيلة و كلتلة هذني ستر اخياتك بنات عمران و شيلتي وياهن اليوم انذبن عليك و نريد حقنا منك

شيخ بهاء : دنك شالهن و كاللها و حق علي داحي الباب شاربي ازينة كدام الزلم و كدام بنات المرحوم حجي عمران اذا ما اجيب الكتال جواجن مهدور دمه

بيبي لبابة هزت راسها و طلعت حسيتها كبرت الف سنة بهذا اليوم الزلم اخذولهم ساعتين و راحو بقو بس ولدنا و شيخ بهاء لان عرفو جاسم شارد شوية و بيبي لبابة كامت دخلت كعدت يم شيخ بهاء و عمو حازم و ولدنا الموجودين طلعتهم كلهم و بقت بس هي و بهاء و عمي حازم ما عرفنة شحجو نص ساعة و راح بهاء

اجو بيبي و عمو و كعدو بالصالة و كلنا رحنة كعدنا يمهم و بدا عمو حازم يحجي

عمي حازم : منيرة حتى لا تكولين ظالمج هاي كدام الكل اسئلج و اخيرج تردين تبقين ويا اهلج و تنسين عندج رجال و بنات و ولد لو تبقين ويانا و تنسين عندج اهل

خالة منيرة : والله العظيم لو مطلكني قبل لا تسئلني هل سؤال اطلع اعيش بالشارع و اجدي على كد لكمتي و ما اروح لبيت ابوي جا شني اني اروح لبيت كتال اختي و اعيش وياه شمالني تخبلت اني منكم و بيكم يحازم و بيت منهل كلهم ما اريدهم لا اريد ابوي و لا امي و لا اخوتي كلهم ماتوا و ما اريدنهم

بيبي لبابة : اصيلة يا منيرة اصيلة بس ترى ها خله يكون بعلمج اني راح انتقم من بيت منهل كلهم يعني باجر لو صار شي على اهلج لا تحزنين عليهم

خالة منيرة : ايدج و ما تنطيج اني هم ما اريدهم ابقى هنا لبناتي و بنات اختي بهية

سمر : من هذا اليوم علنت خالتي منيرة انقطاعها من بيت منهل و احنة صرنا اعداء لبيت منهل و ما اعرف شنو الي راح يصير و لشنو مخططين بالضبط بس الي اعرفة راح تشتعل نار تحرك هوااااي

سمر : كمت دخلت للغرفة كعدت كدام المرايا و صافنة على نفسي يا ترى وين نهاية المطاف

هذه الليلة ، و انا اذرع غرفتي
اسير في كل الإتجاهات و الساعة تدق نصف الليل
تفكير شديد ، هل أصبحت بحاجة إلى يد تأخذني بأمان؟
لقد تعبت ، تعبت
و كأني عطشان إلى يد هادئة
يد دافئة تربت على كتفي
لقد عشت مع وحدتي ما يكفي من العمر
أما ألآن
لا ادري ، أقف أمام المرآة أنظر إلى عيني التي تملؤها الاحزان
كانت الأفكار تشعرني و كأني احاول إنتزاع جلدي من نفسي
نعم ، سأعود إلى وحدتي
رغم تلك الأصوات التي اسمعها من جوف روحي
ايها المسكين ما اسخف الوحدة و ما اضيعها ..

من هذا اليوم بديت احس نفسي وحيدة ما الي احد .... القاتل يطلع من عدنا و مو غريب هاي وحدها صدمة كانت للكل

نور : الولد كلها واكفة برة و بالكوة عمو حازم مسيطر عليهم كلها تريد تهد على بيت منهل و تحركهم

كلها تصيح و كلمن يريد شي و الغريب بيبي لبابة هادئة لحد الان كامت طلعت للزلم و كلتلهم

بيبي لبابة : اهدو يمة ناركم مو اقل من ناري ابني و حفيدي و جنتي الي انكتلو ثقو بالله و اعتقدو باجر راح يصير شي اخلي العشيرة كلها تحجي بي و لا تضنون القصاص بس باجر
لا القصاص كتل جاسم و الي راح يصير باجر جزء من القصاص

كلها ضلت تسئل شنو الي راح يصير باجر بس بيبي ما انطت جواب لاحد كان جوابها الوحيد انتظرو و شوفو و راحت دخلت و الولد كلها محتارة و صارت بين الي يريد يهد على بيت منهل و عمي حازم كامشهم و بين الي كاعد على نار و منتظر حكم بيبي لبابة

.................

سمر : واكفات كدام المرايا و مخبوصات و نعدل بنفسنا محتارة كل شويا اكول يمكن طالعة مو حلوة و جوري تكلي ديلة عاد والله حلوة بس امشي خلي ننزل

كملت و نزلنا اني و جوري الكل فرحان و يضحك شوية و اجن نور و خالة منيرة جابن ورد من الصالون دخلت مثل الاميرات بالبدلة البيضة كلها ضلت تهلهل بس دخلت و الكل فرحان

اي اي اليوم عرس ورد مرن سنة و 3 اشهر على موت اهلي و القصاص اخذنا مربع و بيت منهل خرجو من بكارة ابيهم

جنت واكفة و اباوع بالوجوه وجه وجه لكل وجه حكاية و خفايا ما يعلمها بس الله لكن كل سر ما بموت الا يصير معلن امام الكل واكفة و اباوع

نور سحر عايدة سمر ورد جوري سما نورس لبابة فردوس منيرة حيدر جلال سامي جعفر ام ماجد

كل واحد و كل وحدة عدهم قصة خلف هاي الوجوه السعيدة

خلف كل هاي السعادة قصة احزان ما تنتهي

خلف كل هاي البرائه قصة نذالة و حقارة ما تنتهي أثارها لليوم

فززتني من صفنتي صوتهة و هي تكلي بس قصة بنات حجي عمران الفصول الاربعة ما انتهت بعد وراهن هواي كل فصل الة حكاية مكتوب من قبل لا تخلق لكن كلنا تحت رحمة البارئ و واثقات ما ينسانة و عدنا ثقة نار و نور ربي حلوات و تاج على راسنة ........

ليس النهاية و لكنها بداية للفصول الاربعة ...

يتبع...

رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥

احبكم

اتمنى ما تنسون النجمة و التعليقات و بتفاعلكم الحلو تصعد القصة ♥️🙏

تحياتي

#للكاتب _ محمد_ ابو جود
للتواصل انستا abu_joud212
للتواصل فيس بوك Mohammed Fadhel