حواجِز القلب

الحاجِز الاول

حواجِز القلب

الكاتبه غدير العزاوي

البارت الاول♡

بلحظه تدمرت حياتنه وحياة كثر من العوائل وتهدمت بيوتهم والي تعبه وخيره وكولشي عنده راح بيد الدواعش ....كلما افكر بلسالفه حيلي ينهد ...

صارلي 3 اشهر مانازل للبيت ومره وحده مطمن امي عني وادري بكلبها ميتحمل فراكي هلكد بس شنسوي هواي وكثير شباب غيري الي عنده اطفال والي عنده زوجه يعني من صدك شكد نتحمل علمود الوطن بس ميضيع حقه ...الوطن غالي ..

جان موبايل واحد يشتغل ونتصل بي ونطمن اقاربنه ...سمعت صاحني اشرف..

ولك حسين تعال موبايل الك ...كمت واني متلهف عبالي امي ....سرعان ماختفت لهفتي من سمعت بجيها وهيه تتوسل مااسد الخط بوجهها ...

سديته من دون مااسمع اي شي عيب من اخوها وصاحبي وسندي واكف يمي ...

غمزلي وكال منو ...جاوبته محد مهم رجعت كعدت واني الف فكره تجيبني وتوديني ...وذكرتها وذكرت كل ذكرياتنا سوه ...الي متسوه افكر بيها اصلا خانتني وطعنتني ....

اخخخ يبنت العم شسويتي بحالي ...مو جنه لبعض مو جانت اسامينا مرتبطه ببعض ...

كعد يمي اشرف وفتح وياي الموضوع الي جنت خايف منه ...

اشرف: اسمعني حسين ولتقاطعني مثل كل مره ..تذكر من كتلك حبيبتي طلعت لتركيا واحاجيها وواعدها بلخطوبه ...بس يااخي اني ماضامن حياتي والله ومحد هنا ضامن حياته ....اي شي يصير اريدك توصللها الظرف الاصفر ...هنه ظرفين واحد توصله الها وموجود العنوان وكولشي بي والثاني لااهلي....

حسين: هيووو شبيك انت شتحجي ولك لتفكر بهيج شي وان شاءلله الله بعونه وميصير اي شي ...

اشرف: مو كتلك لتقاطعني ليش هيج تسوي دسمعني مره مثل الاوادم ...الشغله الاولى راحت ..الشغله الثانيه انت وشيماء ادري تحبها فمااريدك تطول اريدك تروح وتخطبها ....

حسين:قصدك تجي تخطبها انت اخوها تره ..

اشرف:اهووو من سوالفك البايخه المهم تخطبها كافي هلكد تطول..واذا صارلي اي شي امانتك هيه تره اختي الصغيره بعد ..

اخخخخ يااشرف لو تدري الي بكلبي ماجان حجيت هيج ماجان كلت هل حجي ...اني كلبي نكسر منها هواي ومااضن ابدا يرجع ينصلح كدام عيني وسمعتها بااذني شلون تخوني....بس شيطلع الي بكلبي ...

حسين:صار ان شاءلله ..

ثواني وكالو يلا اشتباك اكو ....دخلنه بحالة انذار لانه اغلب القواعد الي كدامنا يطلبون الدعم ووره دقايق منسمع صوت الهم ...

ماحسينه الا وهاونات فوك راسنه من كل مكان ...بقينه 4 بس وويانه قائدنه واشرف واني منتفارق ...

كلشي اطشر بلكاع انكلبت السيارات كلها واحنه بحالة دفاع عن انفسنه لاغير حتى لاتخلالهم الساحه ويسيطرون بسهوله ....

خلصن الطلقات من عدنه بقت شكم طلقه بيد اشرف انبطحنا كلنا هاهيه اجت نهايتنا تشاهدنا ع اراوحنه .....واحنه منبطحين بلكاع ..

ماحسيت الا واشرف كام لزمته وخرني وذبني بلكاع ...كلت يخوووي يبن عمي مدام رايد الشهاده فمتصير بدوني ...

اخذت من ايد قائدنا الرشاش مالته ولحكته واني ماادري بيا جهه راح ..والدنيا ليل والتراب بس مغطي الجو ولاشي ينشاف ماسمع غير الطلقات حددت الاتجاهه...

مشيت واني مااشوف اي شي غير الظلام واني بوضعية الدفاع عن نفسي ....

ماحس غير عثرت بشي وكعت ع وجهي ...كمت واني اتلمس وماشوفلك غير جثه ...صرت اصرخ اشرف محد يرد عليه ...

خفت اتقرب من الجثه خفت تطلع جثة الي ببالي ...يخووي اشرف كمت اصيح بعلو صوتي وماكو اي صوت يجيني ...حتى صوت الطلقات توقفت وانسحبو بعدما دمروا كولشي بعدما دزو هواي شهداء للجنه ...

صحت مره ثانيه اشرف ...اجاني صوته الرايح التعبان الي يحجي بلكوه ...

اشرف: ها ولك خوي تخاف من الظلمه

بسرعه اتقربت من الجثه شلته وهو بااخر انفاسه ...اشرف ولك كوووم لتموت تره والله اكتل روحي وراك كوم لتضيع شبابك كوم مو ردت تتزوج حبيبتك مو ردت تموتني قبلك ...كوم خلي اموت بدالك ....وهنا رسلت قطعة مني للجنه وبيدي فارق روحه ...

الكثير والكثير غيري الي استشهد صديقه والي استشهد اخو وابنه او الاب وتيتمو اطفاله بهل حياة القاسيه ..

.........................................................
بعد الفاتحه ..

دز عليه امر اللواء مالتنه واني لبيت ندائه ورحت ...

انطاني 3 ظروف بيدي عرفت الظرفين بدون ميشرح او يكول شي ..كتله هنه مو ظرفين ..جاوبني انه من انت جنت نايم اجاني وسلمني هل الظرف هم ..عفته وطلعت...

..جان اكو 3 ظروف بيدي حجالي عن ظرفين بس الظرف الثالث ماحجالي عنه ...اول شي سويته ضميت الظرف الاصفر ..صرت اكلب بلظروف الثانيه الباقيه بيدي ..اني اعرف اقره واكتب بس شي قليل لانه خامس ابتدائي وبطلت من المدرسه يعني ادبر روحي كوه بلقرائه والكتابه....عكس اشرف الي كمل دراسته بس ماتركني من التحقت بلحشد واجه وياي..

شفت الظرف الثالث الي ..مادري ليش ماحجالي عنه ...طفيت السياره بااحد شوارع بغداد وكانت الدنيا ليل وبس نسيم الهوه يلعب بلجو ...

شغلت الضوه وفتحت الظرف ...

الى اخي العزيز حسين

ماادري شلون ابدي الكلام ومن وين ابدي ..وراح اكولك همينه ماادري شنو شعوري واني اكتب وصية موتي واصلا ماادري ليش فكرت بلموضوع بس اجاني فجأه وكلت مااخليك وافارقك وماتارك ذكرى مني الك ..انت جنت اخوي وسندي قبل لاتكون ابن عمي وصديقي ..انت جنت حزام ظهري ..مااريد اطول بلحجي بس الشغلتين اكيد هسه اني كايلك اياهن سويهن لخاطري اذا الي خاطر عندك ..اختي تزوجها ادري تحبها والله ادري ...لاتكسر بخاطرها حساني ...هههه تتذكر من جنت اصيحلك حساني وتعصب وتعوفني بنص السالفه ..هسه بما انه تقره الرساله ماراح تعوفني لااول مره واني اكولك حساني وتسمعني للااخير ...تدري شغله دموعي تصب واني اكتبلك هاي الرساله مادري ليش ...اني ماخايف من اي شي والله وماخايف من الموت شحلات الشهاده في سبيل الوطن بس خايف انه تروح قبلي وتعوفني واني ماريد هذا الشي ...مااريدك تنهار من بعدي كل واحد واله يومه واني هذا يومي واجه ...صير قوي وديربالك ع ابوي ادري ماتحبه تره هاا بس هم اريدك دير بالك علي ادري بااخواني مو كولش ويا ...ومااريد اوصيك ع كليبي الي بتركيا وتوصللها الامانه وكول انه ماتخلى عنج ...هسه مايضحكني غير انه واني اكتب الرساله وانت نايم يمي واحنه سوه هسه ...ازعجتك شويه تره السماح اخوي ...يلا اني اذا ضليت اكتب الرساله راح ابللها بدموعي ...لاتضعف علي ولاتجرك الحياة لشغلات مو زينه ....( الرساله نصا وصلتني بلصوره وكتبتها بس غيرت الاسماء )

نزلت من السياره ووكفت بنص الشارع واني اصيح بعلو صوتي ...يااااالله ليش هيج ليش ليش تحرمني من الغوالي دوووم ليشش ياربي اذا تريد تختبرني والله اني مو كد الاختبار اخذت مني الغالي ابوي وهسه صديقي ..موتني اني موتني اخذني يمك اني ليش عايش بلحياة وشنو عنددي بعد اخسره ...ياااالله انت اعلم بحالي اذا ماتريد تاخذني يمك هون ع كلبي ..

هذا ثاني مره ينزلن دموعي الي بعمري مانزلتهن ..والي ينزلن بس للغوالي واني شلون غوالي فاقدلي ...اخخخ يادنيا اخخخ ...

صعدت سيارتي ومشيت لبيتنه وصلت لمنطقتنا واني اتذكر اول مانزلنه ببغداد من بعد النزوح شلون استقبلونا بشكل حلو مااكول كولهم هيج ..اكو بكل مكان الزين والموزين بس الله شاهد اهل كرم...

هنا هيج سوينا وهنا هيج وهيج ...طلعت سيارة صديقي الي من بغداد كبال سيارتي ...الدنيا ليل والوقت متأخر ..اخذ بخاطري وكال تفضل حسين اعزمك يمي ...راح انسيك الدنيا كلها وحزنك كله ...اني جنت اصلا اريد هيج شي وانسى الدنيا ولااول مره بحياتي طاوعته ورحت ويا ودخلني لبيته وحط البطاله كدامي ...صرت اباوع عليهن واتذكر كل وصيه وصاني اياها ابوي من جنت صغير وابتعد عن هيج شغلات ...

اطلعو من بالي اطلعو خلوني انسى الالم شويه ...اخذت البطل وجريته جره وحده وللعلم اول مره احطه بحلكي .....

نسيت الامه والدنيا كلها رحت لعالم مابي اي حزن مابي اي هم وقهر ....( اغلبكم راح ياخذون هنا عن حسين نضره مو حلوه وزينه وادري بهل شغله غلط بس لاطلعون من القصه كملوها لانه بيها هواي عبر واريدكم تستفادون وماننسى هاي البدايه وبس وسبحان الله مغير الاحوال )

كعدت الصبح راسي ثكل جسمي يون عليه وعيوني بلكوه افتحهن ...شويه شويه صحيت ع نفسي وشنو سويت البارحه كمت بسرعه شفت روحي بيت خضير صاحبي الي من بغداد ...

شفت كولشي كدامي والبطاله والريحه لوين واصله ...طب للبيت وبيده علاليك ...يدندن بااغنيه ...

خضير:ها حسين كعدت جبت ريوك يلا غسل وتعال نتريك...

بدون اي شي هجمت علي بوكسات بوجهه دافع عن نفسه اي بس انه ضربني لاا ...عفته وطلعت صعدت سيارتي والي هيه اصلا سيارة اخوي واني ماعندي سياره ...وصلت لبيتي ماردت انزل ادري باامي واسئلتها وانه تشوفني بهل حال صعبه ...طلعت لبيت اخوي دكيت الباب طلعلي اخوي مستعجل ...

سمير:وين جنت ولك واني انتضر وراح يوصلون الجماعة ...عافني بدون ماينتبه لااي شي ركب السياره وطلع ..

طبيت للبيت واجتني مرت اخوي الجبيره سألتني اذا متريك او لا ماجاوبتها طلعتلي خديجه زوجته الثانيه لااخوي ...اخذتها ع صفحه وحجيتلها السالفه وهنا ومنا بدت هيه تصير صندوق اسراري وأئمن يمها كولشي عني ...سبحت ولبست ملابس اخوي وطلعت لبيتنه قريب اصلا مسافة مشي واوصل للبيت ...

طبيت للبيت تلكتني امي بطيبتها الي ماتخلص وحنيتها الي خجلتني من نفسي واني اتذكر البارحه شسويت ...اخخخ ياخضير شسويت بيه ...الله شاهد انسان كولش زين ومافديوم سمعنا عنه شي مو زين وصاحب نخوه وشهامه بس السالفه المخربه علي وسمعته انه يشرب وشنو فائده الانسان شكدمايصير زين وهو بعين ربه الي خلقه مو زين ...مرات اقارن بيني وبين نفسي بين خضير وبين باقي الناس الي ساكنين بمنطقتنا ...تشوف غيره لسانه زفر ومينحمل ويجرح ويسوي شكو شغله طايحة حضها ...بس سمعتهم متخرب ليش لانه بلظاهر يصومون ويصلون ...بس من اجي لااخلاق خضير تختلف كولش وكأنه عدم وجود امه وابو ...اجا بمكانهم الشرب وربا ...بس الشي الي يسوي حرام ثم حرام واكبر حرام ....بس المقصود لاتحكم ع الكتاب من غلافه

صحاني من تفكيري صوت امي وهيه تسألني شسوينا بشهادة الوفاة ...جاوبتها مختصر وكلت تعبان اريد انام ....

فرشولي ولفيت راسي ونمت ....

............................................................

بليل سمعت اندك الباب فتحته شفته فلاح اخو اشرف ....

حسين:خير فلاح اكو شي صاير شي الوالد بخير ان شاءلله ..

فلاح:ماكو شي بس رايدتك بموضوع ..تعال للسياره ...

-مشيت ورا وسديت باب البيت ...طلعت للسياره ..بس فاجأني كولش موضوع...

فلاح: حسين شوف اني ادري بموضوع حبيبة اشرف الله يرحمه وادري بموضوع الظروف فاانطيني الظرف مالة حبيبته واني اخذه الها ..

مستحيل فلاح شنو تحجي انت هو مأمني ع هاي الامانه ومستحيل انه اسلمه بيدك ..انت اخو ع عيني وراسي بس اعذرني ماانطيك ايا...نزلت من السياره بدون مااسمع اي كلمة منه ...

طبيت للبيت وسديت الباب واني ضايج كولش من حجيه ...ماادري ليش بس هيج ضايج ...

شفت الساعه 11 كلت بعدهم مانايمين خلي اروح هسه لبيت عمي وانطيهم الامانه بعدين لايسويلي سالفه هل فلاح ...

لبست كالتلي امي وين رايح كتلها لهنا قريب اوصل وارجع ان شاءلله ....

مشيت لانه نفس منطقتنا همه همينه ...وصلت لبيتهم ودكيت الباب فتحتلي الي ماجنت اريد اشوفها ...

متغيره هواي لابسه اسود وعيونها حمر من البجي وشعرها طالع من الشال ...

-ماكو غيرج يفتح الباب وبهل ليل شطلعج للباب ..

ماردت عليه دارت وجهها الي جنت متعود اسمع نكدها وحجيها وعتابها الي ..

ماسويت شي ...طبيت للبيت واني اصيح يالله ولو مايحتاج لانه ماعدنه نسوان تفتر بلبس مو محجب ..ع اي ساعه وغفله يجونه خطار....

سلمت عليهم وكعدت يم عمي وكتله جايك وعندي امانه الك ...بدون مقدمات ولاشي انطيت الورقه وطلعت من يمهم ...

قبل لااطلع شفت ضل بنيه بلحديقه الخلفيه الي بيتهم كاعده المشكله انه الكل لابس اسود ...

هيه الوحيده الي كاعده هناك ..مشيت يمها وقبل لااوصل عرفتها هيه ...كعدت وسندت ظهري ع حايط بدون متحس عليه ...

سمعت بجيها وعتابها لااخوها لانه هو الوحيد الي جان يهتم بيها اكثر شي اما باقي اخوانها لا يستحقرون البنيه ومينطوها حقوقها باي شي ...

اتذكر لمن اشرف جابلها الموبايل شكد ضلت فرحانه وطايره من الفرح ...وياريت ماجايبلها اخخخ لو يرجع بيه الزمن ماجنت خليت يمها موبايل ...

الجو هادء كولش والدنيا ليل وبس ضوه النجوم بلسما ...افيشش ياريحة ديرتي شكد مشتاقتلها ...شكد ماجان الانسان عايش بقصر وبمحبة الناس بس ماتحلة بعينه غير موطنه الي ولد بي وعاش بي ...

وينك اشرف مو وعدتني نحررها سوه ونسترجع ذكرياتنه كولها ...هدئت شويه وكعدت اسمع حجيها...

-ليش هيج بسهوله فارقت الحياة وخليتني وحدي احارب ...مو كلت هاي الوجبه اذا نزلت للبيت اجيب حسين من ايده واخلي يخطبج ...مو كلت ماعوفج ومحد يأذيج واني عايش ...صحيح انت ماتعرف هواي شغلات صارت بيني وبين حسين بس والله تندمت بكد شعر راسي والي خلقني ماادري شلون سويت هيج وخنته ...ماادري شلون حجيت ويا بمجرد مانطاني رقمه وكل يوم بليل ضل يتصل عليه وخدعني وجرني للهاوية ...اعتذر منك واسفه انه رحت من الدنيا وانت مو مفتخر بيه ...

ماقاومت جريت باكيت الجكاير وشعلتلي جكاير الي احس الشعله مالتها بكلبي مو بلجكاير ...

بمجرد ماشغلت الجداحه اخترعت ودارت وجهها عليه ...وهيه مصدومه ..

-كملي حجيج ليش سكتي يااااست شيماء ولا اصيحلج ست فاطمه ع كولة حبيبج الخايس الي كضيتي ويا ليالي من دوني ولججج عفتج ايام بس ايااام واجي اشوف خيانتج كدام عيني الي ...تعرفين شنو متستاهلين عشكي الي عشكتج ايا من طفولتج ...

سمعي يبنت العم اني اجي اخطبج ع عيني وراسي بسس مستحيل تكونين زوجه الي ...اخذج بس لانه انتٍ امانة اخوج الي ...ولتفكرين بغيرها انه رجعت احبج ابدااا شيلي هل فكره من بالج ..

بس يطلع اربعين الشهيد البطل حظري نفسج لاعرس ولابطيخ...

طلعت من يمها واني تاركها وراي وهيه تبجي ودموعها يصبن الي ماجنت اخليها تزعل مو بس تبجي ...بس اخخخ شسوت بروحها وبيه ...

الله يسامحك يااشرف انت رحت وعفتني بهل دنيا اوجهه مصيري بروحي ...

بلطريق واني امشي شفت فلاح لاحكني ...

حسين خليني احجي وياك والله اني مثل ماتوقعت بس لانه ادري اولا السفر هسه لتركيا ماكو طيارات وكله ع البحر وخطر ومو مال انه تسافر انت وراك امك شيصير بيها اذا صار بيك شي ...اقتنع والله نيتي مو سيئه مو عندي زوجني وبناتي ..احلفلك بغلاة ابني الي بطن زوجتي ماعندي غيره نيه احلفلك بروحه لااشرف ماكو شي ببالي ...بس اني علمودك دااكول هل شي ...

ماادري شلونه طاوعته بوكتها وكتله الحكني للبيت وطلعت الظرف وانطيته ايا ...لانه حلف بروح ابنه وماعتقد يسوي شي واخو ستوه مستشهد ...
..........................................................

راحت ايام واجت ايام واني مكضيها دوام وبيت وماعندي غير شغله ...طلعت اربعين اشرف الله يرحمه وكلت لازم انفذ وصيته بعد واخذ شيماء ...

اول مافتحت الموضوع ويه امي طارت من الفرح ولوما اشرف الله يرحمه جان هلهلت لانه دوم تكلي تزوج وتزوج الام وكلبها بعد ...

اتصلت على حسن الي هو اخو اشرف الاصغر منه وكتله انه باجر جاين وهيج وهيج ماكال شي كال هلا بيكم

رحنه لبيتهم ثاني يوم واخواني فتحو الموضوع ويه عمي ...

شو هذا كبل كال مااوافق ابداااا وماعندي مره الك ...كتله بلازحمه عمي ليش مو شيماء محجوزه الي من الصغر وعلى اي اساس هسه جاي وتكلي مااقبل ..

حجه حسن من يمه ...وحده بوحده حسين ولاتخليني افتح دفاتر قديمه ...

باوعتله بنضره رجعت كل شي صار وشلون منعته انه يتزوج بنت اختي ...لانه ادري بي مو خوش واحد ومايصونها ...وهو جان يحبها ..

عصبت اني كولش شلون مينطوها لوما وصيته جان عفت وطلعت بس شسوي هيه ذمة بركبتي ..

صار حجي منا وحجي منا ...شفت شيماء طبت للاستقبال ...وكالت الكلمات الي كسرت كلبي وسدت كولشي بوجهي ...

_روح حسين الف بنيه تتمناك اني مااريدك ...عافت كولشي وعافت جرحها وكلماتها الي مثل السجين بكلبي وطلعت ...

...........................................................

رمضان كريم عليكم حبايبي ..الله يتقبل صيامكم وطاعاتكم بهل شهر الفضيل..

نشرتلكم بارت واحد بس علمود شويه يجيب تفاعل لانه مستحيل انشر قصه ومابيها تفاعل يضيع حقها ..

انتضروني ان شاءلله شوكت مايصعد التفاعل ابدي انشرها ....

وهذا الفيديو حسيته يعبر عن حالة حسين بهذا البارت....

الى اللقاء حبايبي
دمتم بخير🖤