بنات حجي عمران الفصول الاربعة

البارت السادس

#بنات_حجي_عمران
#الفصول_الاربعة
#للكاتب _ محمد_ ابو جود
#البارت_السادس
#زرع_الاحقاد

تلاگينه
وطغت بعيونَّه اللهفة
بوكتها "رسومك" بچفه و "سواد عيونك" بچفه
ردنه نگول ،
نتعاتب ،
لچن سكتتنه خنگتنه
ومدري شثگَّل الشفة
ثبتنة الجدم ما فاد
اثاري بروحنه الرجفة
القهرني هواي
عگب ذيج المواعيد النحَسْبلها گبل يومين
صار مشاوفك "صدفة" ..

سحر : اكلج ذكرينة باجر نكول لبابا على هاي البنية السئلت عليه خطية خاف عدها شي مهم لو محتاجة

سمر : اي هوا على بالي اريد اكلة عليها بس والله و لا مرتاحة الها

سحر : سمر هوا انتي المن مرتاحة خلصتي حياتج ياهوا تشوفينة ما ترتاحيله

سمر : ضلي استهزئي و الخبر اليوم بفلوس باجر ابلاش ... نمت و ثاني يوم كالعادة ع الريوك كاعدين و كلت لبابا ع البنية الي سئلت عليه

حجي عمران : هلا بيها اشوكت ما تجي و ان شاء الله اكدر اساعدها بس شعجب تعرف سحر

سحر : ما ادري اني حتى ما شفتهة البنية

حجي عمران : خير ان شاء الله كملن اكلجن حتى لا تتأخرن

سمر : كملنا اكل و كالعادة نور وصلتنة لجامعتنة صادف يوم اربعاء و مقررات بس نرجع من الكلية فوراً للبيت ناخذ ملابسنة و الغراض المحتاجاتهن و نروح لبيت عمي حازم

كملت المحاظرة طلعنا اني و لبنى و قمر كعدنة بالسنتر دا ناكل و اجة وسيم وكف يم الميز و يحجي معلك ويانة

وسيم : لبنى تعاي شوية اريد نكعد وحدنا

لبنى : ما بقى شي بيناتنة وسيم ارجوك روح منا ما عوزي فضايح

وسيم : لبنى كومي كلتلج

سمر : استاذ وسيم اشطح منا احسن ما يصير شي ما يعجبك يلة يا عيني

وسيم : لا تدخلين انتي احسن ما يصير شي لا يعجبج و لا يعجبني...

سمر : لاا تصدك خفت هسة حتى من الخوف راح تنكطع الخلفة مني

وسيم : كلتلج لا تدخلين و انتي لبنى تعاي نكعد وحدنا

قمر : انت ليش ما تفتهم البنية ما تريدك

وسيم حط ايدة ع الميز و دنك و حجة و هوا صاك على اسنانة كال

وسيم : و اني احبها و اريدها

سمر : ههههه والله تضحك انت يا حب قصدك تريد تضحك عليها مثل ما ضحكت على نص بنات الكلية روح بابا روح لا و چمالة طالب اسنان باجر عكبة هل اشكال تصير دكاترة والله يا الله يلوك

وسيم : ماشي سمر بسيطة اذا ما بجيتج دم ما اطلع وسيم

سمر : هاا حلو ليش شراح تسوي تهكر موبايلي و تاخذ صوري و تفبرك و تنشر و تفضحني روح باباتي العب بعيد منا يلة طكطك منا ... راح وسيم و اني ضليت من صدك معصبة الي يطخني انفجر بي

هذا وسيم ولد شاب ويانا بالجامعة حلو و مرتب و جنتل مان بكلمتين يكدر يسحل البنية علاقة حب و طلعات و طبات و ونسة ياخذ صورهة يفبركهن و يضل يهدد و ياخذ بالمقابل فلوس حتى يحذف الصور و اكثر من 30 بنية عانت نفس الشي

لبنى حبت وسيم و لمن وسيم عرف هي تحبة ضل يدكلها ناعم و صارت علاقة بيناتهم بس لبنى كانت فطنة ما دزتلة صور و لا طلعت ويا لكن دائما تتعارك ويا لان وسيم ما يثبت على بنية مثل المرض بي كل يوم ويا بنية الا لبنى يكللها انتي صدك حبيتج و ما اريد اتركج لكن لبنى جازت من عندا

احياناً اصفن ويا نفسي اكول وسيم مو مذنب لان وسيم كان ضحية من كان عمر وسيم سنة انفصلو امة و ابو و اخذتة بيبيتة ام ابو ربتة و محد يسئل على وسيم لا ام و لا اب صار عمر وسيم 6 سنوات ماتت بيبيتة ضل محد الة مخلصها بالشوارع يعني بين قوسين الشوارع هي خلقت من وسيم الطفل البريء خلقت انسان متوحش خبيث و لحد الان وسيم ما يعرف شي لا على امة و لا على ابو

ضل وين ما يلكة شغل يروح يركض و يشتغل و بنفس الوقت يضحك ع البنات الزنكيلات و يضل ياخذ منهن فلوس

نور : بعد ما وصلت البنات للجامعة رحت لجامعتي دخلت للقاعة ما لكيت انهار ما بقى بس خمس دقايق و تبدي المحاظره اتصلت عليها مغلق ضليت مستغربة عرفت صايرلها شي

اجة الاستاذ مالتنة و بدات المحاظرة على نص المحاظرة و دخل العميد للقاعة

العميد : نور عمران وينها

نور : كمت وكفت وكلت نعم اني نور عمران

العميد : جيبي غراضج و تعاي وراي للمكتب

نور : حاظر ... اخذت اقلامي و الدفاتر و اني جسمي ضل يرجف رحت لمكتب العميد لكيت رجال كاعد و مرة دا تبجي و العميد واكف دكيت الباب و كلت نعم استاذ طلبتني

العميد : باباتي نور راح اسئلج كدامهم على سؤال مهم و ارجوج بدون جذب و بدون لف و دوران

نور : اتفضل استاذ و اني صريحة مستحيل اجذب

العميد : انتي صديقة انهار عبد الكريم صح لو لا

نور : اي صح استاذ اني صديقتهة الوحيدة بالجامعة

العميد : كانت علاقتكم قوية اسرار بيناتكم

نور : اي استاذ صح و حتى اعرف مشاكلهة وية اهلها

العميد : باوع للرجال و بلل شفايفة و وجهلي الكلام و كال .. نور انهار وين

نور : عفواً شنو انهار وين

العميد : كلامي واضح انهار صديقتج وينهة

نور : ما اعرف اليوم هي ما مداومة

العميد : هذولي الي كدامج همة اهل انهار

نور : جنت كاعدة فوراً وكفت و حتى الدفتر وكع من ايدي كلتلهم انهار بيها شي

ام انهار و هي تبجي كالت ابوس ايدج اذا تعرفين مكان انهار كولي مو گلبي مثل النار والله

نور : شنو الموضوع فهموني والله ترى قلقتوني

العميد : اشوكت اخر مرة شفتي انهار

نور : شفتهة يوم السبت اخر شي جانت ضايجة و حيل تعبانة بسبب مشاكل اهلها و اني يوم الاحد و الاثنين و الثلاثاء ما داومت و بهل ايام الي ما داومت بيهن هواي حاولت اخابر على انهار لكن كلة مغلق و تعال شوف استاذ ....

طلعت موبايلي من الجنطة و دخلت على سجل المكالمات و كلتلة شوف استاذ قبل اكثر من نص ساعة قبل لا تبلش المحاظرة اني اتصلت عليها و طلعلي مغلق

ابو انهار : استاذ خلينة ندخل للقاعة مالتهة و نسئل الطلاب

نور : ما يصير هيج راح تفضحهة كدام كل الطلاب كل واحد راح يفكر بيهة شكل و تشوه سمعتهة انتم يا يوم جنتو تفكرون بانهار مصرف ما عدها الله شاهد اني جنت اوكلهة بحجة اعزمهة حتى ما احرجهة

ابو انهار : احترمي نفسج من تحجين وياي و صوتج ما يعلى علية

نور : اني محترمة من يوم يومي لكن روح راجع نفسك و حتى انتي يا ام انهار هم راجعي نفسج والله حقهة إنهار تطفر منكم لانكم بزعتوهة بحياتهة

العميد : بابا نور ما يصير هيج تحجين ويا بكد ابوج

نور : ايخسة يكون مثل ابوية ... عفت المكتب و طلعت كعدت بالحديقه اتصلت على انهار اكثر من مرة كلة مغلق دزيتلها رسالة

'' انهار من تفتحين الموبايل ضروري تتصلين علية لخاطر العشرة و الصداقة البيناتنة''

شوية و شفت ام انهار و ابوهة طلعو من الجامعة ضليت اني بمكاني فكرة تاخذني و فكرة تجيبني

فزيت على صوت استبرق

استبرق : نور ممكن اكعد يمج عندي موضوع مهم كلش مهم والله

نور : استبرق كلش ما الي خلك ترى

استبرق : يخص انهار

نور : فوراً فزيت وكفت و كلتلها ' تندلين مكان انهار

استبرق : بيت انهار يمهم مول صح

نور : اي صح بيت امها يمهم مول بنفس الشارع كلش قريب عليهم مول صغير

استبرق : خلينة نكعد نحجي

نور : كعدنا اني و استبرق و حجتلي حسيت انضرب عقلي من كلامهة معقوله انهار هيج تسوي

كمت من يم استبرق بدون ما انطق حرف واحد امشي واني صافنة و بغير دنيا صعدت بالسيارة ضليت كاعدة بيها انتظر يخلص الدوام و اروح للبنات اخذهن

عايدة : دخلت للجامعة لكيت تيسير بالسنتر كاعدة رحت سلمت عليها وكعدنا راجعنة شوية بالمحاضرات العدنا قبل لا ندخل للقاعة

دخلنا خلصت اول محاضرة بلشنة بالمحاضرة الثانية الدكتور تأخر علينا ربع ساعة و دخل العميد ويا ولد يطلع عمرة تقريباً بالثلاثين

العميد : مرحبا طلابي الاعزاء دكتوركم القديم تم نقله لغير جامعة و راح يستمر وياكم الدكتور فرات

طلع العميد من القاعة و الدكتور عرف عن نفسة

الدكتور فرات : مرحبا اني الدكتور فرات دكتوركم الجديد اتمنى نكون اصدقاء قبل لا نكون طالب و استاذة اهم شي اريد التفاعل بيناتنة خلونة دائما نكون قريبين لبعض و هسة عرفوني عنكم

بدو الطلاب واحد واحد يكوم يوكف و يعرف عن نفسة لحد ما وصلي الدور كمت وكفت حجيت بهدوء و صوت ناصي

عايدة : اسمي عايدة عمران

الدكتور فرات : عفواً سمعيني صوتج

عايدة : اسمي عايدة عمران

الدكتور فرات : عايدة !؟؟

عايدة : هزيت راسي بدون ما احجي

الدكتور فرات : اسم حلو و غريب

عايدة : ضليت ساكتة مو من طبعي اخذ و انطي بالكلام ويا الدكاترة و بلش الدكتور درسنة شي بسيط لان اكثر من نص المحاضرة ضاع خلصت المحاضرة و الطلاب طلعو و استاذ فرات ضل كاعد ع المكتب الي بالقاعة

تيسير طلعت كدامي و اني كمت اخر وحدة بقيت بالقاعة لان كتبت كم ملاحظة بالدفتر عن الدروس كمت اريد اطلع صاح الدكتور فرات

دكتور فرات : عايدة ممكن لحظة من وقتج

عايدة : رحت وكفت يم الميز و مدنكة راسي كلتلة نعم دكتور تفضل

دكتور فرات : تعبت و اني احاول اوصلج و اخر شي قدمت طلب حتى اكون دكتور بهاي الجامعة

عايدة : رفعت راسي متفاجئة من كلامة كلتلة عفوًا دكتور تعرفني

دكتور فرات : اشلون ما اعرفج و اني حتى نوم الليل انسلب مني بسببج

عايدة : العفو اني مسويتلك شي

دكتور فرات : سلبتي عقلي و گلبي و روحي و نفسي و راحتي و نومتي صرت بكل مكان افكر بيج و اني اكل و اني اشرب و من اريد انام بكل مكان و بكل زمان افكر بيج

عايدة : تفكر بية ؟ اني ليش ؟

دكتور فرات : اي افكر بيج عايدة متت الف موتة باليوم و اشكد قدمت طلبات لهاي الجامعة حتى بس اجي و اشوفج كل يوم كدامي

عايدة : ضليت صافنة ما اعرف هذا دا يحجي شنو قصدة يحبني لو اني مسوية شي غلط ما عرفت شحجي او شسوي اصلاً

دكتور فرات : كام وكف و كال.. دفعت 15 مليون للدكتور القديم حتى ينتقل من هاي الجامعة و اجي اني بمكانة و اشبع شوف منج و اعترفلج

عايدة : تعترفلي

دكتور فرات : عايدة احبج قسماً بالله احبج خلصت حياتي دائما حزين و عصبي و محد الي و لمن شفتج من اول مرة دخلتي گلبي ما اهتميت لكن شفتج مرة ثانية حيل فرحت و أتأكدت اني احبج ضليت كل يوم اجي للجامعة قبل وقت طلعتكم و اشوفج و اتمنى من انتي اطلعين كون يوكف الزمن و اشبع شوف بيج

عايدة : ضليت مصدومة و فاتحة عيني و صافنة و احس جسمي تكهرب من كلامة لمعة عيونة و دفو صوتة و رجفت صوتة حسيت كلامة نابع من اعماااااق گلبة خلتني ادوخ و انسى العالم كلة

دكتور فرات : حتى ما تكولين اني دا اضحك عليج او نيتي سوء ما اريد منج غير عنوان اهلج و من باجر اجي اخطبج عايدة تقبلين تكونين شريكة حياتي و ام بيتي و ام اولادي

عايدة : ما اتحملت كلامة جسمي ضل يرجف طلعت ركض من القاعة جسمي مشتعل نار و ارجف

فردوس : ساعة 10 جنة كاعدين اني و حنين بالمطبخ نشوف شنسوي غدا و حجي عمران و قيصر طالعين و ام قيصر راحت للخياطة اندكت الباب راحت حنين تفتحهة و اسمع صوت

حنين : و عليكم السلام... اهلاً و سهلاً تفضلو... لا والله بالمكتب عمي عمران بس هسة اخابرة يجي حياكم تفضلو

فردوس : كمت بسرعة لبست حجابي و طلعت شفت عمي منهل و جاسم جايين ما بينتلهم احنة ضايجين رحت سلمت و رحبت بيهم

الجد منهل : بنيتي فردوس اتصلي على عمران خليه يجي

فردوس : اي عمي هسة اخابرة ... رحت خابرت عمران و حنين ودتلهم مي

فردوس : الو عمران عمي منهل و ابنة جاسم هنا و عمي كالي اخابرك يريدك

حجي عمران : هلا بيهم حضرن غدا زين هسة جاي اني مسافة الطريق

فردوس : سديتة من عمران و صفنت على باب الاستقبال و اني افكر ليش جايين بعد المشكلة الصارت معقولة يعتذرون ما اتوقع جاسم يعتذر الا اذا وراه غاية وهل غاية جبيرة حيل الله يستر بس .. فززتني من صفنتي حنين

حنين : عمة شنسوي غدا

فردوس : سوي تمن احمر و اني راح البس عباتي اروح لهذا الي براس الشارع احجز دجاجتين شوي و اخابر قيصر يجيب سمجة من برة شوي و هسة روحي نكعي التمن

حنين : اي عمة رايحة بس انتي شبيج شو چن لونج مخطوف

فردوس : لا يمة ما بية شي ...

رحت بسرعة حجزت دجاج و خابرت قيصر على سمج و جبت لبن و رجعت لكيت ام قيصر راجعة و كاعدة يم ابوها و اخوهة جاسم

اجة عمران و دخل سلم عبالك ما صاير شي هذا عمران طيب و حنون و ماكو مثلة بحياتة ما شال حقد على احد

عدلت حجابي و رحت كعدت يمهم

الجد منهل : اي وليدي عمران الله شاهد اني ما قابل على فعل جاسم و اليوم جاسم حس بغلطة و جاي يعتذر منك

حجي عمران : الله يسلمك عمي و واعتذار جاسم واصل و هاهية احنة اهل ان شاء الله و كل الي صار هي ساعة شيطان و الف لعنة ع الشيطان و ساعتة

جاسم : اي والله خوية اني اعتذر منك شديد الاعتذار

حجي عمران : كول يا الله جاسم احنة اهل و كل الي صار راح و انتهى و احنة اولاد اليوم

فردوس : اعتذار جاسم ما دخل عقلي بس هاهية بلكت صدك الله هداه

سحر : جنت طالعة من الجامعة انتظر البنات يجني شفت بنية كاعدة ع الرصيف و تبجي بنية شابة لابسة عباية و مبين التعب واضح عليها

رحت عليها لان كلش قهرتني مبينة الدنيا لاعبة بيهة طوبة

سحر : مرحبا اختي ليش دا تبجين محتاجة شي كولي اني هم اخيتج أمريني

رحمة : فدوة لعيونج بس اني حامل و ما ادري شبية لزمني وجع موتني

سحر : يا عيني كومي كومي

رحمة : وين

سحر : اخذج لهنا اكو مستشفى قريبة

رحمة : دنكت راسهة و حجت بخجل و كالت لا ما اريد اروح لان والله ما عندي فلوس

سحر : ياااا صدك جذب كومي علية كلشي معليج

رحمة : ما اريد اكلف عليج

سحر : يا صدك جذب يمعودة الناس لبعضها... سندتهة كامت اخذت تكسي للمستشفى الحمدلله الدكتورة مو هواي عليها دخلنا فحصتهة

الدكتور : الطفل تعبان و ضعيف شنو ما ماكلة لان الطفل محتاج تغذية

رحمة : لا دكتورة ماكلة

الدكتورة : المهم هذا الطفل ما بي شي راح اكتبلج مقويات اخذيهن من برا و حاولي تاكلين لان الطفل محتاج تغذية ما بيج غير العافية

كتبتلهة الدكتورة علاج اخذتة جبتة من الصيدلية صار 20 الف و رجعت للبنية مبين من وجهة ما ماكلة خطية وجهة اصفر

سحر : حبيبة مبين عليج ما ماكلة الله عليج ماكلة شي لو لا

رحمة : دنكت و حجت بخجل و كالت لا والله من البارحة العصر ما ماكلة شي

سحر : يا ليش انتظريني هنا ... رحت لمطعم قريب كلش ع المستشفى اخذت لفتين كباب و اخذتلهة نص دجاجة شوي الولد بالمطعم خلة ويا الدجاجة صمونتين كلتلة خليهن اربعة صمونات و صدك خلة اربعة و اخذتلها بطلين مي

شفت الجنطة مالتي بقى بيهة بس 17 الف شلت 15 و انطيتهن الهة

رحمة : لا لا والله هيج هواي علاج و الدكتورة و اكل و هسة تنطيني فلوس

سحر : عليج اعزاز گلبج تاخذيهن احنة بنات بيناتنة اعتبريني اختج

رحمة : والله وكفتح اخت ما سوتهة

سحر : بعد عمري بخدمتج محتاجة بعد شي عليج الله... بوستني من راسي و كلتلي رحم الله والديج عسا ربي يسعدج و يرزقج و يحفظج

سحر : اتأكدت البنية ما محتاجة شي رجعت للكلية مشي لكيت البنات منتظراتني صعدت و حجيتلهن الصار

نور : عاشت ايدج صدك تربية عمران

عايدة : بعد ما طلعت من القاعة رحت كعدت بالحديقه و اني ارجف اجتني تيسير جابتلي عصير وياها وكعدت يمي

تيسير : شبيج ترجفين

عايدة : ههههه ما بية شي

تيسير : لا يالحمزة بس لا راح تتخبلين ترى بس انتي عاقلة بالجامعة

عايدة : ضليت ساكتة و صافنة اجة مهند وكف يمنة و كال

مهند : عايدة ممكن شوية اريد احجي وياج بموضوع مهم

عايدة : احجي هنا تيسير مو غريب

مهند : اذا ممكن نكون وحدنا اذا ما بيها زحمة

تيسير : اني راح اروح اجيب شي ناكلة و ارجع

عايدة : راحت تيسير و اني باوعت لمهند بمعنى احجي

مهند : لمن خلصت المحاظره ليش بقيتي يم الدكتور فرات

عايدة : عفواً و انت شنو تحاسبني

مهند : ما جاي احاسبج بس غلط توكفين ويا الدكتور و هوا جديد بعدج ما تعرفين شي عنه

عايدة : رجاءً اخي هذا الشي خاص بية

مهند : ادري و اني مو من طبعي ادخل بخصوصيات احد لكن انتي شي مهم بالنسبة الية

عايدة : ضليت ساكتة و بنفس الوقت شفت دكتور فرات واكف ابداية الحديقة و عينة علية خازرني و مهند التفت شاف دكتور فرات

مهند : اهااا اجة الظاهر حقج تسكتين مع السلامة

عايدة : راح مهند و دكتور فرات اجة وكف قريب علية حسيت رجلية بعد ما تشيلني صارن خيوط اجت تيسير جايبه قطع كيك من شافت الدكتور

تيسير : اهلا دكتور تفضل اكل ويانا

دكتور فرات : الف عافية بس هسة جنت اباوع للبحوث القديمة و شفت بحث للطالبة عايدة عمران بي اغلاط هاي

تيسير : عايدة تغلط بالبحث مستحيل

دكتور فرات : عفواً اني جذاب لو شنو قصدج

تيسير : لا عفواً بس اني اقصد عايدة الاولى على جامعة الصيدلة كلها و مستحيل تغلط

دكتور فرات : علماء أسسو كتب و مذاهب و علوم و حياة بشرية و غلطو تردين طالبة ما تغلط ... اذا ممكن عايدة تعالي للمكتب لان غلطج لا يغفر لازم تصححينه

عايدة : كمت ويا الدكتور و اني احس نفسي من الخجل حتى نعست دخلت للمكتب مال الدكتور فرات

الدكتور فرات : الولد الي جان واكف يمج شيريد و شسمة

عايدة : اسمة مهند

دكتور فرات : شعندة واكف وياج هذا باجر ينتقل من الجامعة مستحيل اخليه بيها

عايدة : عفواً يعني كل واحد يوكف وياي تنقلة من الجامعة

دكتور فرات : لعد شعندة واكف وياج

عايدة : اعتقد سمعت تيسير من كالت اني من الطالبات الاوائل بالجامعة يعني اني باليوم يجوني اكثر من عشرين طالب او طالبة يطلبون مني افهمهم موضوع او درس و كلش عادي اني الحمدلله كلش شاطرة و دا ادرسهم و يفتهمون علية
دكتور فرات رجاءً اذا تنقل مهند من هاي الجامعة معناها اني هم اطلع و ثق بالله دقيقة ما ابقى اذا نقلت مهند مع السلامة

عايدة : طلعت و اني اسمعة يصيحني بس ما وكفت رحت يم تيسير اكلنة بسرعة و دخلنة للمحاظرة خلصت دوام و اجتني نور و رجعنة للبيت

سمر : رجعنة للبيت الساعة 2 الظهر لكينة جدي منهل و خالي جاسم كاعدين بالاستقبال ويا ابوي و عمي حازم موجود دخلنة سلمنة عليهم و صعدنا بدلنة نزلنة تغدينة اني و البنات و انوب صعدنة حضرنة نفسنة نروح لبيت عمو حازم

نور : كملنة و حضرنة نفسنة و اني بالكوة اتحرك من جهة انهار و من جهة كلام استبرق الي ضرب عقلي كملنة نزلنة لكينة بس بابا و عمو حازم لان جدي منهل و خالي جاسم رايحين

حجي عمران : حازم خوية اخذ البنات انت لان نور عندي شغل نريد نطلع اني وياها

نور : ها بابا وين نروح

حجي عمران : بشغل اني وياج نروح و خلي اخواتج يرحن ويا عمج

نور : ماشي بابا ... رحت دخلت للمطبخ دا اشرب مي فاتت حنين شايلة عمران الصغير و مبينة تريد تبجي

نور : ها شبيج

حنين : ما ادري قيصر شبي شو كلتلة خلي اروح ويا لبنات لعقد ورود بنت حازم و ابات هناك و باجر نرجع ويا البنات شو باوعلي متفاجئ كالي باجر العقد مال ورود كلتلة اي شو صار عصبي صاح بية حيل كالي اخذي ابنج و اطلعي من الغرفة يلةةة

نور : عرفت قيصر مقهور و ما ناسي ورود كلت لحنين لا تهتمين حبيبتي اني راح اصعد و احجي ويا

صعدت لغرفة قيصر دكيت الباب و دخلت كانت احد اغلاط عمري اخلي باب الغرفة مفتوح رحت كعدت يم قيصر كمشت جف ايدة و كلتلة

نور : حرام بعد تفكر بورود ساعات قليلة و تصير على ذمة رجال ثاني و انت هم عندك مرة و ابنك قيصر انسى حب ورود و شيلة من گلبك

حنين : قيصر يحب ورود

نور : باوعت للباب اتفاجئت حنين واكفة بالباب عيونهة مدمعة و تتنقل بيني و بين قيصر و اني و قيصر اثنينة ساكتين قيصر طلع من الغرفة و هي بعدها صافنة علية واكفة بالباب كمشت ايدها و دخلتهة للغرفة حجيتلهة كلشي و هي عيونهة مدمعة كامت من يمي شالت موبايلها و خابرت على قيصر

حنين : راح اخلي نور توصلني لاهلي ابقى يم امي على ما يرجعن البنات

نور : قيصر قبل اوديهة ضلت هي تحضر حاجات عمران الصغير و اني طلعت من الغرفة

سحر : طلعت من غرفتنة شفت قيصر طلع من غرفتة و حنين واكفة بالباب و انوب نور دخلت حنين للغرفة ركضت وكفت يم الباب و ريتني ما وكفت حيل انصدمت من عرفت قيصر يحب ورود جنت دائما الاحظ نظراتة الها بس و لا مرة اتوقعتة يحبهة

نور : نزلت اني و حنين بابا خلة ماما هي توصل حنين و عمو حازم اخذ البنات و اني و بابا طلعنة بشغلة ما اعرف شنو هي

وصلنة للمكان كانت مسافة نص ساعة او اكثر نزلت من السيارة شفت ولد شاب و 3 زلم لابسة عكل بابا سلم عليهم

حجي عمران : هاي بنتي نور الجبيرة جبتهة حتى تكون شاهدة ع الكلام الي راح يدور بيناتنة

نور : سلمو علية الزلم و دخلنة كعدنا بالاستقبال اني و بابا و الولد الشاب و الزلم الثلاثة

سمر : طلعنة لبيت عمي حازم اني و سحر و عايدة و عمو حازم و عمة فردوس جان بيومهة اربعاء رحنة قبل بيوم حتى نساعدهم بالترتيب و سوالف الحفلات

احنة عدنا بعاداتنة بعقد البنية لازم نسوي حلاوة بيضة يعني محلبي لو زردة بيضة او رز بحليب

اول ما دخلنة للبيت ضليت اهلهل و سحر و عايدة و عمة فردوس وياي ع الواهس اتلكتنة جوري تهلهل تسالمنة لكينة بيبي لبابة كاعدة تصلي

جرينة نفس شوية ارتاحينة و انوب قسمنة الشغل و بدينة ترتيب و تنظيف و اكيد ما يخلى من الشقة و الضحك بعد لمة حبايب

بنات عمو صبري ولا وحدة اجت و كالت نساعد ورود كلش ما احب اسلوبهن لان ابد مو صاحبات واجبات عبالك غريبات و اصلاً الغريبات احسن لان والله صديقة ورود اجت ويانة اشتغلت و هي صاحبة صالون و هم تمكيج ورود هدية العقد منها

كملنة شغل و سحر و ورود و صديقت ورود راحن للسوك و اني و خالة منيرة جهزنة جدرية جبيرة حتى باجر الصبح نطبخ محلبي بيها و جهزنة كاسات سفري همات

امي و خالة منيرة و بابا و عمو حازم اصحاب واجبا يعني دوم متواصلين ويا الناس لذلك احنة محسبات حساب العقد مال ورود يجن نسوان بالقليل اربعين مرة

كملنا كلشي و كعدنا نسولف و خالة منيرة تعدد بالناس العزمتهم و بيبي و عمة فردوس يذكرنهة ببعض النسوان خاف ناسيتهم

سمر : اكول خالة انتن هسة عددتن بالاربعين مرة زين احسبو حساب نسوان تجيب جهال و نسوان تجيب اخواتهة و بناتهة جناينهن يعني يجوز فوك الستين نفر يجي

خالة منيرة : اي اي حاسبين حساب يعني احنة نسوي بيهن فد مية طاسة من هاي السفري محلبي و حازم راح يجيب كراتين كيك و بيبسي و وصيت بنية هنا عدنا بالمنطقة تسوي كليجة كلش طيبة و تبيع وصيتهة تسويلي فد 5 كيلوات كليجة تمر و حلقوم

بيبي لبابة : يمة منيرة لا تبذرن هواي حرام التبذير خلو كلشي بسيط حتى الله يبارك بي

خالة منيرة : اي عمة لا تخافين ما اسوي هواي حتى لا ينذب و بعدين الي يزيد اخليهن بيد الجهال التجي و اطلع للجوارين و ادز لبيت عمران و صبري

عمة فردوس : فدوة لعينجن اشكد حنينات منيرة و بهية ( ام قيصر)

جوري : فديت امي

سمر : هي خالتي معدلة بس غلطت عمرها لو من جانت حامل بجوري منزلة الجنين احسن

جوري : ولي ولي جنج حمار وحشي شعرج لا هوا اسود و لا هوا اصفر

بيبي لبابة : خايبة من عساج بالمرض جا شني قصدج انة هم حمار وحشي انة هم شعري اسود و اصفر لهيج طلعت سميرة علية

جوري : حجت بصوت ناصي كالت كومي خلي نرتاح فوك بيبي راح تاكلنة اكل

سمر : صعدنة فوك و ضلينة نسولف و نخطط شنسوي باجر

سحر : طلعنة اني و ورد و صديقت ورد ميساء للسوك اخذنة كم حاجة مال بنات محتاجتهن ورد و كعدنا شربنة عصير و احنة راجعات انتبهت اكو محل عارض تشيرتات جان موديل جديد نازل كلش حلو يصير التيشرت بحد الركبة

سحر : تعالن خلي نشوف هاي التيشرتات كلش حلوات

ورد : ادخلي انتي شوفي هنا على ما ندخل للكوزمتك اني و ميساء ناخذ صبغ اظافر

سحر : تمام روحن على ما اختار شي اشتري .. دخلت للمحل جانو كاعدين اثنين ولد

سحر : السلام عليكم

الولد : و عليكم السلام

سحر : شعندك نقشات و الوان من هاي التشيرتات

ابو المحل : هسة اطلعلج العندي

سحر : طلعلي كم نوع نقشة و الالوان البيهن عجبتني نقشة بيهن بس ما بيها اسود و جان لون حلو بيها الوردي و النيلي و اكو نقشة ثانية بيها لون اسود و النقشة مو كلش حلوة ضليت صافنة اخذ منو

الولد الثاني حجة كال : ترى كل الالوان تلوكلج تخبلين ترى

باوعتلة بطرف عيني و سكتت

الولد : على شنو ضجتي ترى ما حجيت شي

سحر : انت ابو المحل

الولد : لا اني امة

سحر : اها يعني تعترف انت مرة

الولد : احترمي نفسج لججج اني الضابط رسلان

سحر : اولاً احترم نفسك و لا تعلي صوتك علية و ثانياً لا تكلي ولج و ثالثاً ان كنت ضابط فعلى نفسك لان اني ما اخاف و رابعاً انت كطعت رزق صاحبك لان ما راح اشتري... طلعت من المحل مشتعلة نار لان صدك ما يستحي اشلون اسلوب عندا عابتلة

سمر : رجعن البنات كملنة شغل ما عدنا شي بعد ثاني يوم كعدنا من الصبح سحر و ميساء كعدن يعدلن بورود و خالة منيرة و نور يسون محلبي و اني و جوري علكنة الزينة و عمة فردوس سووت طاولة صغيرة بالصالة خلت عليها كيك و الحلويات و فواكه و رتبتهن

للساعة 3 بلش العقد و كملو و تقريبا نص ساعة و راحو اهل الولد بعد ما لبسو الحلقات و الذهب و النسوان الكبار راحن كعدن بالاستقبال و احنة البنات شغلنة اغاني بالصالة و ضلينة نركص و كلنة نهز و نهوس و ضحك و صوتنة العالي موضوع اخر

بعدين شغلنة اغاني دبكات و ضلينة ندبك جان يوم كلش و الدبكة سحر و نور و ميساء سونهة حلوة و اني و جوري و ورد بس نتحرك ما نعرف شي منها هههههه

يمكن كان اخر يوم مرتاحين بي من كل گلبنة بهذا اليوم الكل كان فرحان و مرتاح بلمة الحبايب و لكن ....

كان اكو من ينغص علينا فرحتنة و هذا هوا درس من الحياة اتعلمنا ان الفرحة ما راح ادوم بعد كل ضحكة اكو مقابل و هوا الدموع

يا ترى شنو كان مصيرنة و شنو الثمن الي راح ندفعة نتيجة هذا الضحك و الفرحة هاي

لليل اجة قيصر اخذ امي و راحو
و اني و البنات و عمة فردوس بقينة بايتين عد عمي حازم و الليل كلة هم خلصناهة سوالف و ضحك و كعدنا ويا عمو حازم سوالفة تخبل

عمي حازم حنون و طيب بمعنى الكلمة سوالف ما تنمل و علاقتنة ويا مثل اصدقاء علاقتنة مضمونهة الثقة

بيبي لبابة : لو شايفات عمجن حازم من جان صغير اشكد وكح مرة بيوم واحد فشخ واحد و كسر ايد الثاني و كتل بنت الجوارين و ابو عمران يكتلة و هوا يضحك و ما مهتم

جوري : فديت ابوية ضاحك للحياة الجارحة

عمي حازم : يمة فضحتيني كدام بنياتي ... ضلينة كلنا نضحك على سوالف بيبي و عمي حازم

سمر : كانت طبيعة ورد خجولة و هادئة بس ويانا منطلقة اما جوري شخصيتهة مثلي قوية و ام لسان و وكحة بس فطيرة و دمعتهة بطارف عينهة

جوري : كملي كملي لبوة كملي فضايح حزوم

سمر : ههههه اي عليج بيبي احجيلنا

بيبي لبابة : خلي احجيلكم على زواج حازم و منيرة

سمر : كلنا كلنة اييي و عدلنة كعدتنة و تقربنة يم بيبي و هي بدات تسولف

بيبي لبابة : حازم جان ما يريد منيرة و ابو عمران جبرة على منيرة لان بنت عمه و بيوم العقد من شافها اتخبل عليها اني عرفت خازم هواهة من رجعنة للبيت ثاني يوم كلتلة عرسكم نخلي بعد سنة هوا تخبل شنو بعد سنة و صار عصبي ههههه و تالي راح لمنهل و كالة يسوون العرس بهل يومين و صدك تزوج بيومين و عود هوا جان ما هاوي ههههه و من ليلة العرس صار جعفر

سمر : عمي حازم ضل يضحك و جر راسة خالة منيرة و باسة

جعفر : ما شاء الله اني من ليلة العرس لعد اشكد متفاعل

سمر : ضلينة نضحك كلنة ضلينة شوية ماعدين و صعدنة نمنة

ثاني يوم بعد الغداء رجعنة بسيارة نور كلنا اني و نور و سحر و عايدة و عمة فردوس و احت ويانة جوري و مرينة بطريقنة جبنة حنين و عمران الصغير وصلنة للبيت لكينة باب الشارع مفتوح
دخلنة حانت سيارة بابا بالكراج

فردوس : شعجب سيارة عمران هنا شنو ما رايح للمكتب شعجب

نور : بس لا مريض

سمر : دخلنة كلنا البيت هدوء ما بي صوت ما اعرف ليش گلبي قبضني فتحنة باب الصالة و دخلنة

اول ضربات الحياة النة بالصالة هاي بيت انبنى بالحب و الحنان و الدفئ اليوم احترك و ادمر و احنة نشوف كدامنة

امي و قيصر و بابا واكعين للارض و غركانين بدمهم

ها هنّ بنات الحاج عمران .. عادن من مناسبة فرح ، تعرف كيف تكون متعباً ومتعرقاً من الرقص لزفاف أحد احبابك او لخطبة صديقك او قريبك.. يدخلن البيت لكن كان هناك احساس وصمت رهيب
و بخطوات بطيئة وكأن القلب يشعر بأن حدث شيء ما..
قطرات الدم في ارضية المطبخ هناك ايضاً يا ربي ما الذي حصل!!
هناك خطّ من الدم وكأنني في عالم آخر رعب ومنظر رهيب والذهول يخيم على البنات كل واحدة تمسك بكتف الأخرى كل واحدة تتمسك بيد الأخرى وبفم مفتوح من الخوف والرهبة ..
رعشة الخوف تنتقل من واحدة لأخرى ، تهرع احداهن الى الاستقبال لترى تلك المصيبة
فاجعة ومنظر لا يمكن لأحد وصفه بنت حواء بكل ضعفها كيف ان تواجه هذا الموقف تصرخ و تلحق بها الاخوات
هل شاهدت الفراخ حين تلحق بالبطة الأم؟ لست امزح صدقني
يلحقن بأختها بكل ذعر تصرخ " ... " بصوت جهش كان الصراخ متقطعاً احداهن اغمي عليها فوق جثة والدها
كانت الجثث قريبة والدماء تختلط الوالد الحاج عمران وزوجته و ابنه
لقد قتُلوا جميعهم بأبشع صورة

يتبع...

رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥

احبكم

اتمنى ما تنسون النجمة و التعليقات و بتفاعلكم الحلو تصعد القصة ♥️🙏

تحياتي

#للكاتب _ محمد_ ابو جود
للتواصل انستا abu_joud212