♛ ♛ ♛ ♛ ♛ ♛ ♛ ♛ ♛ ♛
"شفاه مخملية"
بقلم: زهراء السلامي.
#اعلى خدي گام ڪف يروح ڪفياي
اهــنا يـلي مـشــيت بـعـيـد ڪفياي
وحگڪ چـذب تلگـه فـيـاي ڪفياي
شـجـرتـي والـطـيور شـهـود بــيـــه
♛ ♛ ♛ ♛ ♛ ♛ ♛ ♛ ♛ ♛
-جوري: هجراااان ولچ هجراااان گوميييي ولچ صخااام
-هجران: ايييي شكووو شكوو موتينيي
-جوري: ولچ يلهه منلحگ بعدد گومي بسرعه
-هجران: خووش
گمت من الفراش گوة، شلت موبايلي اشوف خاف بكر متصل عليه بَـس ماكو صارله اسبوعين نحچي اتصال كُلش قليل ومن يحاچيني مخبوص ومبين عليه ديشتغل فَـہ اني ماضغط عليه هم خطيه خلي بحاله المهم زين ويايه وممقصر بشي دائماً يراسلني ويسأل اذا چنت محتاجة شي لو مريضة
وحتى قبل اسبوعين من صارت سالفت الرساله مال عووود جواهر دزتهه ماگتله حتى متكبر السالفه خفت عليه يعصب لو ينقهر، وخطية اتصل بيه ثاني يوم واتطمن عليه وگال اذا محتاجة دكتور يجي لكربلاء يوديني لأحسن طبيب
اوقات احسه يهتم ويريد بَـس يرضيني واوقات يصير ابرد من الثلج، بَـس بالحالتين اني راضية لان احبه واموت ؏ سمعة صوته واضوج اذا نتراسل لان اريد اسمع لسوالفه بَـس هوه ميحب المكالمات يگول تقيدني واني مشغول يعني اشتغل واحچي وياچ
باچر الحنه مالتي ومال جورية ومخبوصات خبيصة وامي وندى هم ويانه، فرحتي مانطيهه لأحد كله يومين وراح اعيش بييت حبيبي واصبح وانام ؏ وجهه
-هجران: نداوي شبيچ تبچين؟
-ندى: امييي متقبل تشتريلي البدله العجبتني
-جوري: ندددى انچبيي رايحه ؏ اغلى بدله وتريدهه ولچ حتى اغلى من بدلتي وبدلة هجران تگولون هيه العروس
-ندى: مااا مااا اريد اكشخ مثل بناتهم شمعنه غزل ورهف لابسات احلى البدلات بيوم المهر شبيه اني ما اللبس
-جوري: والله يمامي خيصير عدچ فلوووس مثلهم ذاك الوكت اتطلبي
-هجران: حبيبتي نداوي ميخالف اني اقنع فاضل يطلعچ وتشترين بدله
-جوري: ولچ متقبللل الا هاي الغالية تريدهه
-هجران: لاا ندى حرام عليچ ابويه منين يجيب ولچ هوه بَـس الحنه وانكسر ظهره بالمصاريف امة محمد كلهه جاية باچر
-جوري: اگولچ شو غريب يعني ميسوون حنة للولد؟
-هجران: لا يسوون اليوم وباچر مالتنه
-جوري: شنو السالفه عود ليش هيچ
-هجران: ليش فيصل ماشرحلچ عاداتهم؟
-جوري: اييي گالي بَـس شو مافهمت
-هجران: بكر گال عدهم حنه الولد تصير قبل يومين من العرس وحنه البنية لااازم اهل العريس يحظرون ويسووهه قبل بيوم ويباتون ببيت العروس لو بيت يقربلهم حتى فرد مرة يطلعون ثاني يوم زفة لبيت العريس
-جوري: وشنو هالدووخة ؏ شنوو
-هجران: شمدريني خية اني هم دخت شنو هالعادات الغريبة
-ندى: عوووفوووا العادااات شلووون بيه بالبدلللة
-هجران: گتلچ فاضل ياخذچ يشتريلچ
-ندى: اريد اله الحمرة العجبتني
-هجران: اووووف ندى اوووووف
-ندى: ايييي احنه راح نظل طول عمرنه بالفگر وبيت الگصاب يباوعولنه بتك عين
-جوري: وشكووو يباوعولنه تك عييين
-ندى: اني شفت بناتهم شلون يباوعنلنه خصوصاً هاي نرجس مبينه فد وحدددة
-جوري: اييي عييع اني هم محبيتهه ابدد
-هجران(سكتت وماعلقت، تذكرت من جواهر اتصلت بيه تبچي وتحچيلي شنو صار من راحت لـ نرجس وواجهتهه ليش تكتب الرساله بأسمهه، متت قهر عليهه فحطت بچي وهيه تحچيلي شلون عميد الدين غصبهه وشنو صار بيناتهم ومحاورتهم كلهه
عفت خواتي يتدانشن ؏ البدله وجورية تقنع بندى بلكي تقبل تشتري بدله عاديه، رحت لأمي بالمطبخ خطيه تركض مناا ومنا
-ماماتي ترديني اساعدچ؟
-صباح: لا بنيتي روحي انتي سوي ماسكات وهالسوالف ويه جوري
-هجران: هههههه ماما كملنه كلشي
دارت وجهه تباوعلي، گالت بهمس
-صباح: نظفتي كل جسمچ؟
-هجران(وجهي اشتعل نار): اءء اي ماما
-ايي عفيه ببنيتي يله امي تعاي ساعديني لعد
-حاظر
رحت ؏ السنك مترووس مواعين طبخ، گعدت اغسل وماملحگة، اجتني جورية ترجف
-شنو جوري شبيچ لونچ مخطوف؟
-جوري: هجران تعاي اريد احاچيچ
-هاا اجيت خير؟
تبلع بريگهه وتهفي وجهها
-هجران: وچ شكووو احچييي
-جوري: هجراان خاايفه اني خااايفه
-من شنو اسم الله؟؟
-من يوم العرس
-وشكو خايفه؟
-ولچ شبيييچ ثوووله سالفه الاحم احم
-هجران(فهمت قصدهه): هاااا اءء اي اني هم خايفه
-وجععع فوگما جايتچ اريدچ تصبريني وتگوليلي سهله وميرادلهه خوف
-اليسمع اني مجربتهه شوف حظيييي
-اييي شبيچ الحچي بفلوووس
- ديله سهله وميرادلهه شي مو امي گالت
-ايي بَـس شو ما صدگتهه اني حسيتهه تچذب علينه
-هجران(ضربته بخفة): ولچ شنو تچذب علينه غير متريد تخوفنننه
-جوري: افففف شون بيييه!!!
-خلص يمعودة كافي تفكرين
-لا لا اني راح اگوله لفيصل ماسويهه لو امووت
-هوه بكيفچ وراچ وراچ السالفه
-يبوووفااضييييل اني ابد ممفكرة بالموضوووع وماخذته بجدية
-هههههههههه ديله كافي امشي نكمل تنظيف
رجعنه ننظف وامي استلمتنه اكس مربع، كملت كلشي ورحت ارتاح، شلت موبايلي شفت رساله من بكر كاتب
-بكر: هجران اني باچر ما اجي
انخمش گلبي، ماتحملت بسرعه خابرته
-بكر: الوو
-هجران: هلوو بكر اگولك شنو متجي شلون لعد؟؟
-شني شكو؟
-انته مو كاتب متجي باچر؟؟
-بكر: هااا ايي صار شگد من دازهه هسَّ ياله شفتيهه
-اي مو چنت ملتهية، المهمم هسة گول ليش متجي؟؟ شنو يعني حتى بالزفة متجي؟؟
-بكر: ههههههه ولچ شون بالزفة ماجي شون رهمتيهه بَـس فهميني
-شمدريني انته مو تگول
-ايي گلت باچر ما اجي بَـس ؏ الزفة اكيد احظر چا شني تگعدين بالسيارة وحيدچ
-هجران(تنفست بأرتياح): يممماا وگفت گلبي بكررر
-لا لا تخافين اجي
-تماام، اييي انته شنو اخبارك
-بكر: ماكو صافيه دافيه
-شنو سالفتك كلما اسألك تگول صافيه دافيه شنوو معقوله ميصير عدكم اكشن؟؟
-اكشن شني بويه بيش طالبتنه
-ههههه لا اسم الله بَـس دا اتشاقه وياك
-بكر: اممم
-هجران: بكر صدُك شهر العسل حَ نروح لأيران؟؟
-اي
-يا الله شگد متحمسسسه ولا ادري عدكم من تزوجون ترحون شهر عسل
-ليش بويه اشايفتنه بدو
-لا لا العفو بَـس يعني مادري تخيلت ستايلكم مو من هذا النوع
-لا من هذا النوع وازيد بعد
-هااا واممم صدوك كل اهلك رح يجون ويانه؟
-بكر: ايي شو عبالك ما عاجبچ
-هجران: لا لا والله مو هيچ بَـس اءء...
-بكر: لا بَـس ولا شي لا تخافين مايظلون ويانه بَـس عبن عميد الدين مواعد رهف يسفرهه لأيران من تكمل امتحانات نص السنه فَـہ بعد هيه صادفت ويانه وحجزنه ؏ نفس الرحلة
-هااا ومنو يجي بعد؟
-بكر: الكل حتى بيت حجي اسماعيل وهله
-هجران: حجي اسماعيل ابو جواهر وشهد؟؟؟
-اي
-ياااي شگد حلووو لعد رح تكون سفرة تجننن
-بكر: ممم
-هجران: حبيبي شبيك شو عبالك گوة تحچي؟
-مو متمدد ؏ الفراش جاي اريدن انام
-هجران: هاا هاا يله يروحي تصبح ؏ خير
-وانتي بخير
سديت الخط واني الفرحة غامرتني، بحياتي ممتخيله يجي هاليوم، اتزوج واحد واحبه بجنون وهم اسافر وياه ونتونس اووف يارب تممهه عليه
نمت گوة الارتباك والقلق اكلني تفكيري كله بيوم العرس اخاف اطلع موحلوة وما اعجب بكر، رغم هو ابد ميحچي ؏ شكلي وولا فد يوم حسسني اني موحلوة ان شالله عاد كون يبقى هيچ
گعدت الصبح ورحنه اني وجوري وعمتي نادية للصالون بَـس ماما بقت بلبيت تستقبل المعازيم، اباوع لجوري وجهها اصفر متت ضحك عليهه وعمتي نصبت عليهه نصبة يبووو خلتهه تبچي
كملنه مكياجنه واني كالعادة حطتلي مكياج خفيف مثل المهر بَـس الحمرة لون ماروني مخملي طوخ، ولبست بدله مارونيه يعني من صدُك طلعت اميرة
اباوع لروحي بالمرايه ممصدگة اليوم حنتي اففف يربي اخاف احسد روحي من الحماس والفرحة، طلعت جورية من الغرفه الي بدلت بيهه يبووو شنو من جمال، مسوية تسريحة عالية ولابسه بدله حمرة دم غزال طالعه لعابة
رجعنه للبيت واذا اشوف الشارع كللله سيارات ذوله وين گاعدين؟؟؟ بيتنه مستحيل يتحمل هالاعداد!!
دخلنه للبييت واستقبلتنه الهلاهل والهوسات، شفت غزاله بوجهي مو بنية طرگاعه ههههه شنو من جماال طالعه تگولون هيه العروسة لابسه بدله ذهبية وشعرهه ذابته ؏ چتافهه ومكياج بسيط فدوه تمووت
-غزل: كلووووووولللشششش الف الصلااااة والسلاااام عليييييك يا حبييييب الله محمدددد
والنسوان وياهه يهوسن ويهلهلن، اجت الملا وردحنه ردحح يممه متت تعب بَـس الفرحة الاني بيهه يابه يخسي التعب خليني متونسه
ساعتين ضبط الملا تقره واحنه نرگص، تعجبت حتى بيبي عطيه تهوس بالعوچية وتصفگ وكل شويه مطلعة 25 الف من صدرهه وتحطهه بأيد الملا وتگولهه اقري لـ بكر متت ضحك عليهه واضح تحبه كُلش
الكل متجمع والكل فرحان بَـس استفقدت وحدة صارت اغلى صديقة واقربهن الي بآخر فتره "جواهر" شو مالهه وجود؟ معقوله ما جايه؟؟؟ صحت لـ شهد
-شهد: هاا يعروسه أمريني
-هجران: يروحي انتي اگولچ جواهر وين؟
عفست وجهها ورفعت چتافهه بحركة ماعرف
-هجران: يعني جاية؟؟
-شهد: اي اي جاية
-هجران: لعد وينهه شو لسه مشفتهه؟؟
-شهد: لحظة اروح اصيحلهه
راحت وره شويه اجتني گالت بالحمام تغسل وتجي، وفعلاً خمس دقايق واجت مبتسمه بَـس مبين عليهه ضايجة، سلمت عليه وباركتلي
-هجران: ولچ جوااهر شنو هالجماال يمعوده كسرتي عليه وع جورية
-جواهر: حبي جمال عيونچ هاي
ابتسمت وظليت ساكته، گعدت بصفي واني كل شويه اباوعلهه جمالهه اجنبي خو عيونهه يموتن، عيون النسوان تتطاير عليهه وكل شويه اسمعهن يسولفن وياهه يمكن عشرين وحدة خطبتهه اليوم قليل
كملنه كلشي ونص من المعازيم طلعوا راحو يباتون ببيت عمة نادية والنص الثانيه بقوا يمنه، كل البنات بقن يمنه (جواهر، شهد، غزل، رهف، حلا) اللتمينه بغرفتنه وگعدنه ؏ شكل دائره نضحك ونسولف
-شهد: ولچن اييييي باچر اليوم الچبييير يباااوووو
-جوري: انچبييي شهد اني گوة گاعده
-شهد بغمزة: بعد لسه كلشي ماكو شو من هسة وجهج اصفر ولچ
-هجران: هههههه ولچ صارلهه تلث تيام بَـس تتقيأ حشاكم وتبچي تگولون حامل ورجلهه عافهه
-غزل: ههههههه شني السالفه خيه ترا عادي
-حلا(تغمز لـ غزل): هااا غزيلان چنچ مفلفله ؏ اخوي
-غزل بأستهزاء: هه هه هه اخرر وحده متحمسه لهليوم انه گولي اخوچ مفلفل ايي بَـس انه مستحيييل
-رهف: ولچن شمالچن تتبچبچن هيه شنهي شيرادلهه بدال ما تنامين بفراشچ نامي بقراش رجلچ
فطسنه ضحك ؏ تفكير رهف متفهم شدتگول واحنه اخذناهه ؏ گد عقلهه وأيدناهه
-هجران: ايي حبي رهوفة بَـس هاي جوري جبانه وتخاف
-ندى: وجعع لعبت نفسي شنو اول وحده تتزوج
-جوري: ولچننن شبيييچن انتو متعرفون اني ليش خايفههه
-شهد: اييي بله گولي ليش خايفه؟
-جوري: اني خايفه لان رح اروح بعيد عن اهلي بمحافظه بعيده وشو مادري احس ممرتاحة مال اعوف كربلا واروح لغير مكان
-هجران: سوووودة عليه منووو الكتلت روحهه ؏ فيصل وماتت من اجه خطبهه
-جوري: ولچن يبوووو لو احچي منااا لعگب باچر محد يفهمني
-شهد: لا داده اني فهمت انتي تخافين تعيشين بمكان وتخافين متتأقلمين ويه عيشتهم وحياتهم واسلوبهم
-جوري: اححح والله مال بووسه بنص عينچ ؏ هالحچي
-شهد: هههههه ماريد البوسه انطيهه لفيصل باچر (وغمزت)
هجمت جوري عليهه وظلن يتصارعن ويضحكن ويه بعض، وغزل وحلا ورهف وندى هم يسولفن، اما جواهر عبالك بغير عالم گالبه وجهها ومبين زعلانه، صراحة بيني وبينكم متت من الخوف، خفت صدُك السالفه وتحب بكر بَـس ضحكت عليه وذبتهه براس نرجس، رحت عليهه بلكي أجر لسانهه
-شبيهه الحلوة گاعده وحدهه؟
-جواهر: ماكو شي حبيبي
-هجران بحماس: سمعت رح تجون ويانه لأيران
-جواهر: اي
-شو عبالك مفرحانه؟
-لا يعني عادي
-شنو العادي؟
-جواهر: يعني هواي مسافرة وصراحة المود مالتي مو مال سفر حالياً
-بَـس هالمرة احنه وياكم وراح تصير جَمعة حلوة
هزت راسهه وابتسمت، ظلينه ساكتين لفترة واني اشوفهه تتنهد وتلعب بشعرهه
-هجران: جواهر اگدر اسألج سؤال شخصي؟
-جواهر: هههه انتي تموتين ؏ الاسألة الشخصية
-هجران: ههههههه ولچ اعترف انييي فضوووليييه
-جواهر: هههه داداه جنس حواء اتوقع كلنه فضوليات، المهم گولي شنو سؤالچ؟
-هجران(سكتت شويه واحاول ارتب السؤال براسي حتى ما ابين حشرية ولو هوه سؤال حشري): احم اءء جواهر انتي شعجب لسه ممتزوجة؟
-ههههه هذا سؤالج الشخصي؟؟؟
-اي
-امممم مادري صراحة ممفكرة بهالموضوع تدرين
-بَـس اني شفت هواي نسوان حچن ويه امچ وخطبوچ انتي وشهد وامچ تگول ميقبلن يتزوجن يعني واضح مفكرة بالموضوع موو؟؟
صفنت بوجهي وابتسمت
-جواهر: عينچ ؏ امي وتنتظرين جوابهه
-ههههههه ياااء لاااا بَـس هيچ يعني انتبهت مرة وحده بَـس
-امممم يي صح اني ماقبل اتزوج
-ليش؟
-اتوقع تعرفين السبب
-لانچ مرتبطة!
-جواهر(ضحكت واشرت ؏ گلبي): لا هذا مربوط ربطططه موووت ومدا يقبل يفك
-اويلييي منو سعيد الحظ
جرت حسره وهزت راسهه بحزن
-جواهر: والله احسه مو سعيد حظ
-يااا ليييش بالعكس انتي حلوووة ومرتبه والف واحد يتمناچ
-اي بَـس هوه ميتمناني
-هجران: يااا امدااه شگد ماعنده ذووق كل هالجمال والنزاكة وميريدچ
-جواهر: ههههه حبي الجمال مو كلشي، يعني شنو الفائده عندي وجه حلوو بَـس حظ زباله
-هجران: اوووف جواهر كسرتي گلبي لهدرجة تحبي؟
-جواهر: ههههه يمعودة شنحصل من الحب غير وجع الگلب والهم
-هجران: ولچ خوفتينييي
-جواهر: لتخافين حبي انتي ان شالله غير المهم ضبطي من بدايه الزواج ولتخلين عينه تروح منا ومناك
-هجران: امدااية ليش اني بيه خير غير اذوب اذا بَـس اباوع بعيونه
-جواهر: عادي داده كلنه هيج من نباوع بوجه النحبه بَـس تبقى الكرامة اهم شي
-هجران: بَـس امي تگول ماكو كرامة بين اليحبون
-جواهر: تعاي افهمچ شنو قصد امچ
وگعدت جواهر تشرحلي وتعلمني وكملنه سوالفنه ونمنه، گعدت الصبح وهم طلعنه للصالون بَـس هالمرة عمه سلمى وغزل ورهف ويانه، والباقيات بقن بالبيت ينظفن ويه امي
كملت كلشي ورجعت للبيت واستقبلتنه الهوسات مثل البارحة، وهم ركص وردح وسوالف بَـس هالمرة التوتر ينخر بيه، مرت تقريباً ساعتين وچان نسمعلكم الطلقات وصوت الدبچ بره، نسمع هوساتهم وكل شويه واحد مسوي هوسه لـ بكر وساعه لفيصل
گمت اغير بدلتي وهم فرصة اشوفهم من شباك الغرفه شلون يهوسون، گامن البنات ويايه والفضول اكلنه نريد نشوف شديكولون ولو مافهم شي بَـس ميخالف
-غزل: اهووو هذا فوااز هنااا بعد شيخلصنه
-رهف: يبوووي فواز رفيج ابوي رقم واحد بالهوسات
-حلا: هههههه ولچن خيات هذا ما يدبچ يگمز وعلي، اسمعن اسمعن اسمعن وضحكن
متنه ضحك واحنه نشوفه يدبچ، ويصيح
-فواز: اهلاً بالثبت يوم الحد ثايه
مافهمت شنو گال بَـس هوه گال هيچي لو الدنيا انگلبت الهوسات والمطافر صار ماله والي واحد فوگ الثاني، واحنه واگفات فاطسات من الضحك، امي صعدتلنه
-صباح: ولچنننن وينچنننن
-جوري: هههههه ماماتي تعاي شوفي شلون يدبچون
-صباح: اييي جاي نسمع جووة
-هجران: تعاي ماما شوفي شوفي والله حلوو
-صباح: مو خاف يشوفوچن ولچن
-هجران: لا ماما بيتنه عالي ميشوفون
-صباح: لعد دوخرنن خلني اشووف
عفنه المعازيم وگابلناهم وگعدنه، اخير شي ماما صاحت
-صباح: ولچن گووومن شلون فشله عفنه العالم جوة وگاعدات هنا!! شنو هالصوت هاي عبالك وحده جاي تتعارك مووو؟؟؟
-جواهر: ههههه خالة عادي تلگين بيبي نازلة ؏ وحده من السلبوحات وترزل بيهه وين الله وتطلع نرجس
-رهف: هههههه اميييين
-هجران(ردنه نگوم ونكمل الحفلة جوة لوما نسمع واحد صاح
-نريد هوسة من الشيخ
كلنه رجعنه مدينه راسنه، لمحت بكر واگف وبصفه عميد الدين مبتسم وحاط ايده ؏ راسه بعدين نزلهه ؏ صدره
-شهد: رهوفه ابوچ ليش حاط ايده ؏ راسه؟
-رهف: يعني ممنون منكم بَـس عذروني
-حلا: وليششش خلونه نسمع هوسات عميد وعلي يموتن وثگال
-هجران: ليش عميد الدين هم يدبچ؟
-رهف: اي بَـس كللش ؏ الخفيف وبس من يطلبوهه منه
-غزل: بَـس ما اظن يدبچ اليوم لان شكله مريض
جواهر گمزت
-جواهر: شبيي مريض؟؟؟
-رهف: مادري صارله اسبوع كللش تعبان وسخونة تنخر بعظامه
-شهد: ايي مسكين حتى اني منتبهه كُلش منتهي حتى ميطلع من البيت
-جواهر: ويين شو اني مشفتت
-شهد: طبعاً عيني ليش انتي تطلعين من الغرفه
تحچي وياهه بمكر ورافعه تك حاجب، اما جواهر زفرت قوي وعافتنه ونزلت، كلنه نزلنه وراهه وبيبي عطيه استلمتنه، لازمه بطل مي ورد وترش علينه تگول يجيب السعادة
دگ موبايل غزل واجتنه تركض وتهوس
-غزل: العرسااان رح يطبووون
انخبص البيت وجوري دموعهه عشره عشره انوب اني شفتهه هيچ لو متت من البچي، دخلوا فيصل وبكر واحنه كلمن بمكان
توقعته رح يلبس الزي العربي بَـس استغربت من شفته لابس قاط، بس يا يممه شنو من كشخة عليه صفنت وعيوني لزگت بوجهه، ضحك وهمسلي
-بكر: شمالچ خازرتني
ضحكت ونزلت راسي يباااو يالفشله، صاحوا بدلوا الحلقات والمصوره بيناتنه كل شويه تگول سووا حركة شكل
-هجران: حبيبي شعجب منروح لستوديو؟
-بكر: ماحبهم هاي احسن وأأمن
-هجران: هاا اي هم صح
كملنه المراسيم وصار الوقت الي اودع بي اهلي، جوريه فحطانة بالبچي ولازگة بحيدر وهوه دموعه تصب وياهه، گوة شلعتهه ورحت اسلم
بابا اجه ووصى بكر وفيصل علينه، لبست عبايه وشال ابيض وگوة طلعت ماشوف شي، حسيت بوحدة ورايه جرت عباتي من وره، چانت جواهر
-جواهر بهمس: هاچ هجران اقري سوره الفتح الطريق كله وابد لتوگفين من التسبيح
هزيتلهه براسي واجت حظنتني وهمست شي بأذني صدمني ولو تمر الف سنة ما انسه جملتهه من گالت..
-جواهر: كلشي تسمعي عني كذب ولتصدگين بجنس بشري حتى لو كان بكر نفسه يحچيلچ!! صدگي بَـس بـ عميد الدين!!
باوعتلهه بأستغراب بَـس هيه متگدر تشوف ملامح وجهي لان مغطيته، امي دخلتني للسيارة وودعت حياة العزوبيه حياتي البسيطة الي چان همي بَـس شوكت اگعد الصبح وشلون اللحگ ؏ تنظيف البيت وشلون اغسل الطرمة واطبخ، وبديت بمرحلة جديدة من حياتي!
مرحلة قتلت الطفلة البريئة الي جواية، قتلت شخصيتي وصارت ويه الگاع، مرحلة ماگدر انطي رأيي الخاص واگول احب هيچ لو اريد هيچ، بدت حياتي الچنت اظنهه مخملية وكلهه عز وترف وراحة بَـس طلعت حياة باردة، جافة، كلهه أذية وضيم وظلم!
صعبة من تلوم گلبك
كلة منك .. وانت تدري الكلشي منهم..
صعبة من تصير وياهم عليك
وتگعد تچذب الظنون وتبررلهم
وفشلة من تفيض عينك يم صورهُم
وانت تدري الوادم المستعز بيهم
مايحبوك وتحبهُم
يتبع☘️...
♛ ♛ ♛ ♛ ♛ ♛ ♛ ♛ ♛ ♛
وهاي داريتكم بالقفلة، لكن اريدكم تشدون الاحزمة وننطلق لبيت الگصاب🔪💔 وتشوفون حياتهم بعيون بطلاتنه هجران وجوري
+
لتنسون التصويت والتعليق🤓♥️
احبكم واايد واايد♥️