اسيرة قدرك

البارت الثالث

اسيرة_قدرك..
بقلمي رسل..
البارت الثالث..
واتباد @rasolaa7

انه بعازة ضوه يدليني بجروحي
بعناويني
بتقاويم السنين الضاعن بعمري..

-بهاي الأثناء وكع جداحته بالكاع و دنك
قبل لا يرفعها خله رجله على الباب و يدفع
بالباب بمحاولة الدخول وكانو ثعلب مكار
و يستغل الفرص القذرة..

-بحياتي كلها ما خفت مثل خوفي بهاي اللحظات
ربي الا شرفي
يارب استرني يارب ما الي غيرك هو من دنك
قويت نفسي و دفعت الباب كوه قفلته
جسمي كله يرجف
احس الدنيا افترت بيه الحقير النذل مستغل
الفرص شاف العينتين مقيم فوك
حسيت نفسي لعبت كلش ركضت للحمام
اتقيأ و صوته ما يروح من اذني الحقير
نوب يكلي اني اعلمج من سديت الباب..

-والله مليت من نفسي و منهم كطعت روحي
متت بجي حتى على بطني ضربت
اصرخ و كلبي ما يهدأ
ولكم تعبت تعبت الله لا يوفقكم كون
ما اعرف شلون نمت بهاي الليلة و اني فكري
كله يم الباب صارت عندي خوفة
خاف يرجع
خاف هسه ينفتح الباب و يدخل عليه
خاف احجي ومحد يصدكني اي اكيد يرجعون
عليه بهاي الليلة كوه نمت من خوفي و قلقي..

-اليوم الثاني تفاجأت من دخل اسر للشقة
رغم ما مرتاحة ويا بس مهما
يكون بوجودة اخوه ما يتجرأ و لا يتقرب مني..

-من شفته مدري شصار بيه روحي فرفحت
ركضت عليه و اني متهسترة من الوضع
و من عيشتي ومن كل شيء..

-صحت بي مو كافي اسر مو كافي
هاي عيشه هاي بربك
ليش هيج تعاملني ليش هيج محتقريني انت
واهلك عروس ما شفت شيء تجي تخلصها
وياي بحربك النفسية اني ما مرضت امك
و لا سويت الها شيء هي تكرهني
الله يخليك كافي والله تعبت ارحموني كافي
تعاملني انت واهلك هيج حتى الحيوان ما يتحمل
هاي العيشة..

-جنت منهارة ابجي و احجي هو دفرني

-لج بابا انتي شتحجين على اساس اهلج اشلون
معامليج بابا باعوج بس شافوا الفلوس
باعوج ب15 يوم شمروج علينا و عبالك مسويه
مكسورة ولج اسكتي و اكعدي لا تسوين
مشاكل انتي حتى اهل ما عندج يطلعون
وراج بت فكر تدرين بابوج قبل مجدي
قبل يومين مخابرني على 100 الف و شحته
حتى قيمة لبنته ما مخلي شمرها و يجدي من رجلها..

-والله لو ميته
لو ما جايه للدنيا
و لا سامعة هذا كلامه دنكت خجلانه و روحي
مفرفحة كمية الذل الي حسيتها بحياتي ما عشتها
تركته يحجي و كمت دخلت للغرفة
و دموعي تصب الي يأذي و يكسر الكلب
هو كلامه كله صح
و الي يذبح انو اني ما الي ذنب شنو ذنبي اذا
اهلي هيج ليش هيج سمم بدني بهذا كلامه..

-اخذت القران و كعدت اقرا دموعي تنزل
بألم و قهر للصبح اني كاعده عيني ما شافت
النوم كلامه يرن بأذني
-بت فكر
-باعوج اهلج عبالك مسوية مكسورة
كلامه جان هواي عليه بحيث حتى النوم
جافاني..

-حسيت عليه الصبح من بدل و طلع لدوامه
ما حجيت ويا و لا هو بقيت وحدي
بين خنكتي و قهري
للعصر دخلت عليه اخته اخته هجمت عليه

-سا**** كح**** انتي منو واني اشغل
المبردة علمودج عبالج ما اعرف بسوالفج
كله تمثيل مسويه روحها مريضه
و قبل فترة تمثل عود مسحورة
ولج شلون تخلين اخو يكتل ابن اخته
ليش توزينه علينا حقيرة..

-هي تحجي واني كل شيء ما فاهمه منها
شنو علمودي تشغل مبردة شنو اسر كاتل
ابن اخته..

-والله ما ادري شتحجين ما وازته اصلا
اسر طلع لدوامه من الصبح شلون كتله و هو
لهسه ما جاي..

-هههه شنو
منو الي كاعد يمنا فوك من الصبح لهسه
بس حقه من يصعد كبل ميريد يشوف جهرتج..

-اذا هو يمج بعد ليش تكولين وازته هو اني
حتى ما اعرف بي من رجع..

-بقت تلعلع و مصره طلعت و تركتني
بهمي يعني شلون ما ارتاح منهم اني
كل يوم واحد هاجم عليه من امده حضي
على هيج قسمة وعيال..

-مرت الأيام كالعادة تأقلمت على الوضع
مجبورة و من كبرت بطني شوي اخذوني
اخذت سونر و طلع بيه بنية عمتي ضاجت
تركتهم و كعدت بشقتي بالليل من اجه اخذت
الجهاز منه و تأكدت من البرنامج يلا خابرت
على اختي جنت مجمعة كم فلس هو من ينطيني
ما اصرفهن لان ما اطلع بشرتها و كتلها
تعالي عليه عندي كم فلس جهزولي بيهن
و جيبوهن عود منكم لا تفشلوني كدام عيالي
لان كالوا اول طفل اهلج يجهزوا..

-و فعلا انطيت الفلوس لأهلي و جهزولي
و على اساس منهم شسوي مالي خلك اسمع
كلام من عيالي فكر و فكر و اهلج شامريج
جابوا جرباية و كم شغلة مال اطفال
رغم كل شيء فرحت بيهن و عبالك فعلا
هم الي جابوهن يمكن لان جنت محتاجة
هالشيء او لان ما ردت اسمع كلام يغث..

-مرت الأشهر و اقترب يوم ولادتي
عمتي ما قبلت الا اروح للجدة اخذتني
واني احس احشائي تتكطع الم الم مو طبيعي
دخلنا و جان تكول ما عدها توسع اخذوها..

-رجعنا ركضت للحمام سبحت والألم موتني
بحيث حتى راسي صرت اضربه بالحايط
ثاني يوم رجعت عليها ونفس الكلام تالي
من شافتني اعيط كالت اخذوها للمستشفى
ما اكدر اجيبها..

-رجعت للبيت للأربعة الفجر انتهيت حسيت
روحي راح اموت وهاي نهايتي خبصوني
اتحملي و اتحملي و خلي يصير عندج توسع
صرت ابجي بجي من الألم..

-اخذوني هو و حمواتي للمستشفى جانت اهليه
حماتي من شافت حالتي انقهرت عليه اسمعها
تتوسل بي خلي تجيب عملية و ترتاح خطية
راح تموت و هو رافض تالي كالتله اني ابيع
ذهبي اسر فدوه لا تروح البنية..

-ما قبل و اصر الا اجيب طبيعي ما سمع منها
وهذا هم حضي هاي الوحيدة الي شويه زينه
وياي بس هم ما كدرت عليه..

-للعشرة يلا جبت احس ردتلي روحي
انتهيت و شفت الموت بعيني
كل شوي و تجي حماتي عليه وكالت دزني اسر
عليج و خطية يوزع عليهن بالفلوس حتى
يديرن بالهن عليج..

-جنت متأذية و بس اندب يا علي
تعبت كلش ما كدرت اجاوبها شوي و جابولي
كرسي متحرك طلعت هو اجه عليه باس راسي..

-كعدني بالسيارة و بنتي بيد عمتها
من وصلنا يلا شفت بنتي نسيت كل تعب و هم
من شفتها عبالك مسيحية بيضه و حلوة
تجنن..

-عمتي مطنكره عليه تالي كالت هاي على
امها هم بنات حجيت بكلبي على اساس انتي
ما مخلفه ثمانية بنات..

-من طلعت بت حماتي كالت تدرين ليش بيبي
هيج تحجي وياج؟!..

-ليش..

-لان تعاركت هي وخالو هي تريدج تجيبين
يم الجدة و هو اخذج جبتي بالمستشفى..

-تنهدت ما انصدم منها عادي عدها اني وصلت
الموت و هي تتعارك على جدة و مستشفى
صبرت نفسي ببنتي كلهم ما يهموني المهم
بنيتي طلعت سالمة..

-تعجبت من ذبح ذبيحة ثاني يوم و عزم اهلي
و مبينه الفرحة بعيونه
سوالهم مشاوي و فرحان اهلي اجوني و باركولي..

-من طلعوا كلهم هو اتقرب يمي
باس راسي و رجع يبوس بيه وعينه على الطفلة..

-البنية حلوة كلش حلوة طالعة عليج بيضه..

-ضحكت جنت مصدومة على فرحانه
والله بدون مبالغة اول مرة هيج يعاملني
جنت محرومه من الكلمة الحلوة ويا
رجع باسني و حضني و هو فرحان كلش بهاي
الطفلة..

-تصرف بسيط بس فرحني هواي
مثل الطفل الي ينطونه قطعة حلوى..

-مر على ولادتي عشر ايام و صاروا ياخذون
الطفلة يمهم فوك وكلما اعارض خواته يهدن
عليه بنتي تعلمت على الممة لان ياخذونها يمهم
من الصبح لليل اشبع بجي و اتوسل وما يفيد
لان هو بيده ياخذها و يوديها يمهم..

-اخذها و شبعت بجي لما نزل شافني منتهيه
من البجي باوعلي شكو شبيج عليمن كل هالدموع..

-اريدها اسر الله يخليك فدوه بس جيبها يمي..

-بابا شبيج غير يم بيت جدها و عماتها..

-يحجي يريد قفلت بيومها بنتي يا ناس يا عالم
بنتي وحارميني منها هو من شافني هيج
دز عليها جابتها حماتي..

-شدعوة عليج غير بنيتنا غصبا ما عليج
نشوفها و نجيبها يمنا..

-ما اهتميت لا لكلامها و لا لسكوته من كلامها
جنت طايره ببنتي اخذتها ابوس بيها
و هاي عينها عليه احسها راح تنفجر..

-بهذا اليوم فرحت بنتي يمي و العب وياها
كم يوم و جان يدخل عليه اسر و من العصبية
ما يشوف بعيونه..

-ركض على الكنتور فتحه جان يطلع مثل الكيبل
بس بي حديدة منبله وجان يجي عليه
وعلى ضهري اعيط اريده بس يوكف ماكو
ما اكدر اقاومه بعدني نفسه و تعبانه..

-ولج شلون تنزلج اختي و ما تنطيها الطفلة
لا و تلاسنيها شنو انتي شنو تعلمتي على المدمغة
احجي لج..

-احجي ويا ما يفيد ضل يضرب ضربة اجت
على ايدي الدم ضل يصب من وخر كتله ما لا سنت و لا سويت هيج جذابه كل شيء يذبنه
براسي و انت تصدك بيهن..

-هو كام كال اذا صدك لعد صاعد اني
اكتلها الها واذا جذابه راجعلج..

-طلع و اني ظهري يوجعني من الكتل مددت
بصف بنتي ايدي كلها دم اسمع عياط و صياح
من فوك من نزل كعد يمي..

-كتلتها ما دام جذبت اجه يمي باسني
نزلت دمعتي كتله محد نزل اصلا و لا حجيت حلفتله هو كال ميخالف خلي ياخذون الطفلة
يمهم انتي نامي قابل وين ماخذيها..

-بقى يباوعلي كال باجر تنزل مها يمج
و تروحين وياها تلقحون الطفلة هاي حماتي
بعدها ما متزوجة وهم معاملتها الي مو كلش..

-هو راح لدوامه و هي نزلت طلعت وياها
اخذنا تكسي و طلعنا وجهه مكلوب و ودها
تموتني مبينه غصب جايه وياي
وصلنا و اني شايله بنتي و افتر وحدي
منا ومنا لقحوها و قست وزنها
كملنا من طلعنا هي باوعتلي و ضحكت
كالت عبالج كتل اختي لا ابد
بس صيح و نزل لا تفرحين ترى بس انتي
الي تعود جسمج على الكتل..

-بلعت غصتي بداخلي شكد نهضمت
الجذاب الحقير يبوس بيه و يكلي كتلتها
وهو طلع جذب..

-حياتي روتين متعب نوب حتى النوم
نحرمت منه للأربعين و هي كوه تنام
صار النوم حسرة عليه..

-نعست كلش جنت سهرانه وياها
عيني كوه افتحها نومتها بصفي و خليت
راسي توني غفيت و جان افز على طبة
قوية طفرت واني روحي رايحة
بنتي واكعة على كصتها..

شلتها احرك بيها لا صوت و لا حركة
خليتها على كلبي و اصرخ يمه مهرة شبيج
ياربي دخيلك ياعلي فدوه لاسمك
ما اعرف شسويلها
احس فقدت نزلت حماتي اخذتها مني وهي
لا صوت و لا تحركت ركضنا بيها للمستشفى
وهناك يلا اطمنت كل حيلي راح
من اخذوها مني كالوا ما دام ما اتقيأت
يعني حالتها مو خطرة..

-شوي و طلعنا و اني الطريق كله اتوسل
بيها ما تحجي لأسر فدوه و عيني والله
يكتلني لا تحجين و الطفلة ما بيها شيء الحمد
لله هي حجت عليه مهمله و تاركه البنية
وهمزين ما راحت و كتلتي نفسج كتل
من اخذناها و هسه جان خسرناها بسببج
يا مهمله..

-سكتت بس دموعي تصب بقهر على بنتي
اخذتها و صعدت واني بقيت الوب عليها
للمغرب دخل اسر باوعلي باستغراب..

-شبيج وجهج اصفر و شفتج بيضه ريا منو
وياج؟!..

-بلعت ريكي خايفه منه مابيه شيء شبيه يعني..

-تركني و صعد يم اهله شوي و نزل و مهرة
بيده انطانياها كال ريا شو مهرة تعبانه
شبيها مريضة؟!..

-بجيت ما تحملت جان مبين عليها التعب
خفت اضم عليه اسر شوف هو اليوم
مهرة وكعت..

-شنو شتحجين وكعت شنو..

-والله ما ادري حجيتله هو بس يتنهد بغضب..

-لج باجر اخذها اذبحج اموتج اذا صار عليها
شيء ريا انهيج..

-للصبح و اني الخوف تارسني و بنتي
خاملة و تقهر هو من شافها هيج
تخبل لج كلبه حقيرة راجعلج هسه اذا ما موتتج..

-طلع و نزلت حماتي كعدت يم بنتي و تلعب
وياها وتحجي واني عيني على الساعة
و اترقب بخوف ما اعرف الي جاي اسوي صح
لو غلط بس اهون من ما يرجع و يموتني
نوب حماتي لطشت يمنا..

-ندك الجرس كمت بسرعة و اني احس
طاقتي خلصت فتحته..

-يلا بسرعة قبل لا يجي..

-اشرتلها و دخلتها حماتي كالت منو كتلها
اختي جاية تشوفني اختي كالت يلا يمعودة
ترى ابوي جوه..

-حماتي كعدت شوي و صعدت لان اختي
يمي واني ركضت فتحت الكنتور لميت
كم لبس و اخذت مية من فلوسة و اخذت
بنتي و طلعنا اني واختي مثل الحرامية
شايلة الطفلة و العباية تسحل صعدت بالسيارة
تنهدت بخوف و طلعت من بيتي بدون ما افكر
شنو الي راح يصير لو رجع اسر وما لكاني....

يتبع....

التصميم للمبدعة qx_sh23

اللهم صل على محمد وال محمد❤️