شفاه مخملية

Part 11

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#عميد الدين يگول لمعشوگته👇🏻
جاي انه بلهفه وحنين وشوك شايل بالكلب
بكد بحر حسنك وحبك رايد احجيلك خبر
اللليله اكلك روحي انت وحبي واشبه بالسحر
ارد اكلك حيل احبك يي احبك يا ملاذي والعمر
اليوم اكلك انه احبك يا بعد هذا الصبرر
فرحتي جن طير طاير من بعد فتره حضر
يا هجر كلبي وعذابه وسر جروحي والسهر
انه رايد تالي عمري وياك ابقه مستمر ....

‏..........ᓄ᎗̤ɹᓄ 𖠚
narAli905
♛ ♛ ♛ ♛ ♛ ♛ ♛ ♛ ♛ ♛

"جوري"
گاعدة انظف وامسح هففف البارحة جانت عجة والبيت مغبر تعالي جوري نظفي وامسحي، اتصلت ؏ امي من موبايل بيتنه الارضي شوف حظي العالم وين وصلت واحنه بعدنه ؏ الارضي ولو اني عندي موبايل بس عطل.. گالت هيه وخواتي شوية ويرجعن.. اييي طبعاً هنه متونسات ودايحات هيته واني مكسور ظهري امسح بالارضية..

سمعت باب البيت يندگ هاي شبسرعة رجعن، رحت افتحهه شفته بوجهي.. ساند جسمه ؏ الباب منتظر احد يجي يفتحله.. بَـس شافني ابتسم ابتسامة واسعه...

-شلونج جورية

-جوري: هففف كم مرة اكلك اسمي جوري جووووري

-اي ليش مو كل البيت يصيحولج جورية شمعنه من اني اصيحلج متقبلين

-لان كل البيت اهلي هاي واحد، ثنين اني بَـس الاحبهم اسمحلهم يصيوحلي جورية

عفس وجهه مبين ضاج، خلي يضوج عشتو ععع اموت منه، جر حسرة وكال...

-حتخليني واگف بالباب!!

-اي

-هاا!! ليش؟؟؟

-لان ماكو احد غيري

هز راسه واردف...

-بَـس جيبيلي مي متت عطش

رحت جوة اجيبله مي، ثواني واشوفه ؏ راسي.. شهگت بخوف...

-هاي شدخلك هناا؟؟

-جوري شبيج تره اني ابن خالج

-لاا انته ابن خال اخواني مو الي!!

-اي وشنو الفرق انتي كلتي اخوانچ يعني شنو ما حاسبه روحج منهم!

حچاهه بأستهزاء، نضغطت من اسلوبه.. نترت...

-وخرر شبيك لاطش بيه

-ماجاوبتيني

-هفففف شبييك انته وخر عاااد شكد مكرووه

ماحسيت الا لزگ ظهري ؏ الكاونتر وجرني من خصري حيل، فاتحة عيوني بصدمة هذا شبي!!! نترت...

-شبيك ياااء شنو هالتصرفات

همس بصوت خدران...

-جورية احبج

-واني ماحبك احب خطيبي وراح اتزوج نهاية الشهـ...

مالحگت اكمل الحچاية جرني من شعري من وره، ولزگ وجهه بوجهي...

-امووووتچ اذا صرتي ؏ ذمة رجال ثااني جوووري لا تخبلينيييي

-وخررررر شبييك لازگ بوجهييي وخرررر

-اوخر بشررط تسوين الاريده!

-اوووووه تره موتتني انته لك بابه روووح ماريدك رووووح

سحبني من زندي وجرني للغرفة، صوتي انبح واني اعيط وابچي حتى يعوفني.. كمم حلگي بأيده ونتر قريب اذني...

-صووووتچ لا تفضحيييينه اذا ماصرتي حبابه وعلي اگلب الليله حمرة عليچ

حاولت ادفعه عني بَـس ماكدر جسمه اضخم مني قاطات.. انشگت دشداشتي ودفعني بالگاع بقوة، ماحسيت الا رجع شالني من زندي وسفطني قوووي ؏ الحايط

-جوري: غزوااان فدووه وخررر شبيك غزوااان

-غزوان: ولچ ثبتي شبييچ

-وخر شبيك ليش جاي تسوي هيچ شبيييييك

اتصارع وياه بأيدي وهوه لازگ بيه، اخير شي لزم ايديه ثنينهن وثبتهن ؏ الحايط

-غزوان: جوري بَـس خليني احاچيچ

-ماااريد احچي وياك هدنيي ولك هدددني

-اهدچ والله بَـس انطيني مجال اصبري جوري شبييچ

-لييييش لازمني هيچ غزوان شبيك

عاط بوجهي..

-انتييي شبيچ حرااام عليچ الدتسوي بيه حراااام

-ليش اني شمسويييه؟؟؟!

-غزوان: تدرييين كم مرة اجيت لبيتكم بَـس اريد اللمحچ لمححه وانتي تعذبيني ومتقبلين ولچ كم مرة اگول لعمة صباح بَـس اشوفهه حتى لو خطف وانتي تعاندين وتموتينييي

-شتسوي تشوفني غزواان فدووه بَـس هدّ ايدي ترا دتخوفنيي انته

هدّ ايدي وابتعد عني، هز راسه بحزن وگال بصوت أذاني

-غزوان: معقوله تتوقعين مني اأذيج؟؟ اني أأذي حبيبتي وحلم عُمري؟!!

گامت تنزل دموعي من كلامه ونبرة صوته تفطر الگلب

-جوري: لعد ليش سحبتني هيچ للغرفه وحچيت هذا الحچي

-غزوان: لان ادري مراح تقبلين تحاچيني اله اخذچ غصب! بَـس لتخافين ولچ اني أأذي روحي واموتهه ولا أأذيچ

-غزوان فدوه انساني، ترا اني ؏ ذمة فيصل وراح اتزوج قريب

گام يصفگ ايده بقهر، گال بصوت مبحوح واشوف دموعه بعيونه

-غزوان: اااخخخخ من فيييصل اااخخخخ اخذچ منييي اوووف جوووري لو بَـس تحسين بلوعة گلبي چان ما لمتنيني!! سنييين واني احبچ واتحلم بيچ كلشيي اشتريت البيت والاثاث حتى غرفة النوووم كلشييي!!! كل يوم احط راسي ؏ المخده واگول يله غزوان مبقه شي وتجي حبيبتك تحط راسهه براسك وننام ؏ نفس المخده اااخخخ يالقهررر

ظليت ساكته واني اشوف عيونه اكلتني، مسحت دموعي وگلت انهي الحديث

-جوري: غزوان اطلع بره حَ يجن امي وخواتي وننفضح

هز راسه بـ "اي" ومسح دموعه الگامت تنزل، اووف ليش الدنيا هالگد قاسية!! الانسان اليحبنه واليموت علينه منگدر نبادله ونظل نأذي كل يوم بجفاءنه وابتعادنه عنه

طلع من الغرفه ووصل للمطبخ واني امشي وراه، دار وجهه يباوعلي نظرة اخيره، وهمس بكلمات عمري كله ما انساهن

-غزوان: روحي يجوري عساچ مهناية وسعيده ومتشوف عيونچ الحلوة الزعل وادعي من الله فيصل يكون صدُك رجال ويحبچ ويحتويچ ويخاف عليچ لو نص من خوفي وحبي الچ، ديري بالچ ؏ نفسچ يبت گلبي

منزلة راسي ودموعي تكت، ماعرف شبيه حسيت گلبي انلثم ؏ حچيه.. جفلت من تقرب عليه مرة ثانيه ورفع وجهي بأيده

-غزوان: ماريد اشوف هالدموع، انتي مالچ ذنب بكل احلامي، اني الي عشت بوهم وعيشت اهلي وكل الاحبهم بي، لتخافين جوريتي اوعدچ بيوم عرسچ ما احظر ولا اخلي واحد من اهلي يجي حتى منخرب فرحتچ لو تسمعين شي يغثچ

-جوري: غزوان اني اسفه

-غزوان(ابتسمت): ماكو داعي تعتذرين ويله مع السلامه

عافني وطلع من البيت، رحت بسرعة قفلت الباب لسه بعدهه الرجفة بجسمي، انهد حيلي وگعدت بالگاع ابچي بحرگة غزوان ميستاهل وهواي أذيته دست عليه بَـس شأسوي ماريده يتعلق بيه وهوه الله يسلمه ما يأس وظل يحاول عباله اتنازل عن فيصل

رحت للغرفة ونمت بفراشي واني راسي مصدع وكلماته ترن بأذاني

"ادعي من الله فيصل يكون صدُك رجال ويحبچ ويحتويچ ويخاف عليچ لو نص من خوفي وحبي الچ، ديري بالچ ؏ نفسچ يبت گلبي"

نفضت راسي اريد انسى الصار واكمل حياتي ويه الانسان الاحبه ومتأكده مراح يجي يوم ويزعلني لو يخذلني

مرت قريب النص ساعه وباب البيت اندگت، خفت افتحه صحت بخفوت

-منووو؟؟

-صباح: جورية ماما فتحي البااب بسرررعه

قتحت الباب واذا اشوف امي گوة سانده هجران وندى بصفهه دموعهه تصب

-جوري بخوف: ماما هجران شبيهه؟؟؟

-صباح: ولچ ماادري مادري طگ خشمهه دم وعيونهه ذبلت من چنه عد ابو الموطه

-جوري: هاي خاف صار عدهه هبوط بالضغط لو ارتفاع؟؟

-ندى: اي اي اكيد اروح اسويلهه ليمون؟؟

-صباح: لاا تعالن اتصل بـ فاضل ناخذهه للمستشفى

اتصلت ماما بفاضل دقايق وهوه يمنه، خطيه انخبص خبص، اخذناهه گوة وهيه حچاية متحچي بَـس عيونهه گوة مفتحات، گعدنه بالسيارة وشگد حاولت احچيهه وهيه ماكو عبالك بغير عالم

وصلنه للمستشفى والدكتور گال صار عدهه ارتفاع بالضغط، وحالتهه هسة طبيعية واستقرت ماكو شي يدعو للخوف

سمحلنه نرجعهه للبيت، واني ساندتهه ؏ ايدي هوه اني احتاج احد يسندني من وره خرعة اليوم، امي راحت تسوي العشه من بعدما تطمنت صارت زينه واني نيمتهه ؏ الفراش

-جوري: هجرانه شبيچ حبي احچي شي

-ندى: جوريه لييش متحچي ترا خفت اني

-جوري: كافي ندى لتبچين مابيهه شي لتخافين

طلعت ندى تساعد امي واني گابلت هجران وگعدت بلكي تحچي، دگ موبايلهه گمت اشوف وچان يطلع "بكر"

-جوري: هجران هذا بكر يدگ عليچ

ظلت ساكته ومجاوبت عكس عادتهه من يدگ تگوم تگمز من الفرح، هاااي شبييهه اختييي!!! جاوبت بدالهه

-جوري: هلوو بكر

-بكر: هـلا هجران اگلچ كملتي كلشي؟؟ الفلوس كفتكم؟

-جوري: بكر اني جوري هجران تعبانه

-بكر: هاا شبيهه؟

-جوري: تخربطت بالسوگ

-ليش؟

-مادري وديناهه للطبيب وگال عدهه ارتفاع بالضغط

-هاا سلامتهه يله انه اتصل بعدين مع السلامه

-حوري(انضغطت من بروده): الله وياك

اففف شنو هالبرود الشايله هالرجال!! لو چان فيصل بداله ويدري بيه متخربطة چان گلب الدنيا گلاب وفوراً يجي لكربلا يشوفني، اخيراً طلع صوت هجران، سألت والدموع بعيونهه

-هجران: شگال من گلتيله متخربطة؟

-جوري: هجراان اخييراً حچيتيي ولچ متت خوف عليچ شبيييچ يا الله لو تشوفين امي....

-قاطعتهه: بكر شگال؟؟

-هاااا؟؟

-هجران: ماهتم صح؟

-جوري: لا لا شنو ماهتم بالعكس ظل يدعيلچ و.. اممم گال رح يتصل بيچ بعد شويه

ظلت ساكته وتباوعلي بشك، بَـس بقيت مُصرة ؏ رأيي ماريد اضوجهه وامرضهه اكثر من وره هذا كتلة الثلج بكرر

-جوري: هجرانه رح تحچين شبيچ لو شلوون؟؟؟

نزلت دموعهه مرة ثانيه يبوو هاي شبيهه

-جوري: هجران لتبچين احچي شكو؟

-هجران(گلت واحس گلبي يتگطع): بكر وجواهر يحبون بعض

-جوري بصدمه: شنوووو؟؟؟؟!!

-والله

-شمعرفچ انتييي؟؟؟؟

-جواهر دزتلي رساله شوفي

راوتني الرساله واني مصدومة اقره بيهه واحس عيوني تگلبت من العصبيه

-جوري: وشسويتي انتي؟؟؟

-هجران: مسويت شي

-وماناويه تسوين؟

-شسوي يعني؟

-تحاچين بكر وجواهر وتلعنييين سلفه سلفاااهم

-ماكو فائده اني الوحيده الراح اخسر همه يحبون بعض ورح يظلون سوه واني اكلهه

-لا داده متاكليهه بالعكس انتي محظوطه دريتي هسة!! اوووووف لو اللزم هالساقطة املخهه تملللخخ بيدييي

-شسوي جوريه اني خايفه

-لتخافين ولا علبالچ شوفي اني هسة رح اروح اگول لأمي وتنهون كلشي انعل ابو لابو الجابه هالكلب

-هجران(گمت ابچي): جوري گلبي محرووگ اوووف نار وتلهب بيه

-حقچ حبي انتي لان تحبين هالكلب هيچ تحسين خيولي عسى ما تهنى وياهه ام الـ اءء ام الـ.. اءء الـ..

-هجران: افففف حتى منگدر نغلط عليهه لان مابيهه شي موحلو حتى نگدر نعيب عليه

-جوري: لا معليچ اللگالهه المهم هيه سااقطة وادبسزز شنو فائده الشكل الحلو وهيه زباله وعينهه ؏ واحد خاطب

-هجران: هه حقه بكر متخبل عليهه وچ انتي شايفه شكلهه شايفه جسمهه شايفه تماوعهه اوووووف يالقهررررر

-ختولييي معليچ بيهه ولا تحرگين گلبچ ؏ وحده فاشله مثلهه

-حسبي الله ونعم الوكيل

-جوري: ايي عفيه خلي السالفه يم ربچ واني هسة گايمة احاچي امي تتصل ببيبي عطيه وتطيح حظهم

-هجران: لا جورية باچر گوليلهه خاف تتأذه هسة تالي الليل وابويه يفتهم وننفضح

-جوري: هم صح خوش لعد باچر نسولف

نمنه بليلتهه وهجران دمعتهه مانشفت، نمرد گلبي عليهه، هاي لان خوش بنيه وگلبهه نظيف وفطيرة ينداس عليهه

گعدت الصبح شفت هجران گاعده تنظف كالعادة متعرف تگعد هالبنيه، تريگنه بَـس هيه طبعاً مأكلت شي تگول روحهه ممروده ومتستقبل اكل

-جوري: يله هجرانه رح اسولف لماما كلشي

-هجران: ماشي

-جوري: هجور ترا انتي رح تسوين الشي صح من راح تعوفين هالكلب والله يرزقچ بواحد يستاهلچ ويستاهل گلبچ الذهب يا ذهب

هزت راسهه وعيونهه مغورگه، دا اريد اگوم ودگ موبايلهه، تفاجأت من شفت المتصل "جواهر" هجران انگلب وجهها اصفر وگامت تبچي، اخذت الموبايل وجاوبت

-جوري: خيييير هم الچ عين وتدگين؟!!

-جواهر: هاي منو ويايه؟

-جوري: اميييي يعني منوو هاي انييي جوري

-جواهر: هاا اني عبالي متصله ؏ هجران

-اي اي هذا موبايل هجران دفضيني اللغي شتردين لو هم عندچ سالفه وياهه تضوجهه

-جواهر: جوري شبيچ شنو هالاسلوب

-دنچبيييي هم الچ عين وتحچين ولچ

-جواهر: ياااا ولچ شبييچ عليه شكووو

-جوري: جواهر صمي حلگچ وفضيني شرايده من هجران

-جواهر: جوررري عيب هالحچي لتشوفيني ساكته تگولين ماعرف احجي بَـس اني لازمة اعصابي لان لسه محترمتچ ولچ عيييب اني اكبر منچ شلون تحچين ويايه بهالطريقه

-جوري: والله حبي اكبر مني اصغر منييي المهم انتي وحدة سافله وساقطه

-جواهر: جووورييي احترممي نفسسسچ ولچ شنو هاللساااان

-جوري: شو دولييي (دا اسد الخط بوجهه وهجران اخذت الموبايل من ايدي

-هجران: جوااهر حرااام عليييچ لييش تأذيني لييش؟؟ ولچ اني شسويتلچ هيچ حاقده عليه وتكرهيني

-جواهر: هجران شبيكم ترا اني كلشي مافاهمه

-هجران: ورسالتچ البارحة شنووو

-جواهر: ولچ يا رساله اني اصلاً ماراسلت احد البارحة

-هجران: جواهرر شنووو خرفتيييي

-جواهر: هجران ورب الكعبه ماراسلت احد البارحة، ردت اتصل بيچ بالليل بَـس عندي امتحان وچنت اقره وملحگت

-هجران: لعد شلون وصلتني رساله من رقمچ؟!

-مادري مادري والله شبيچ صدگيني

-مستحييييل شووفي كاتبتلي انتي وبكر تحبون بعض

-انييييي

-ايييي

-عزاااا لا لا مستحييييل انتي شدتگولين هجراااان

-هجران: جواهر لتضحكين عليه گولي هاي انتي لو منو

-وراس امي واخواني مو اني ورب العزززه ولچ هجرااان اني اصلاً ماحب بكررر

-لا تچذبين

-ولچ بيمن احلفلچ ماااحبه والله شبيييچ

-لعد شلون بيوم المشكله من چنه بالناصريه شفتچ طالعه من غرفته بنص الليالي وتگوليله جاوب ؏ اتصالاتي

-ونبي محمد چنت اسأله ؏ الاحبه لان متت من الخوف عليه ميقبل يجاوبني فَـہ بكر اقرب واحد اله وردت اتطمن بَـس

-جواااهر مدا اقتنع

-هجرااان صدگيني اني اصلاااً ماحب بكر ولا عندي أي مشاعر تجاهه احنه مجرد اصدقاء

-يعني هاي مو انتي الدزت الرساله؟ لعد منو؟

-لا مو اني بَـس اني شاكة بوحدة

-منو؟

-لا معليچ انتي بَـس خلي راسچ بارد ولتصدگين بهالرساله!! وترا هاي الرساله مارادوا يأذوچ انتي بيهه رادوا يوگعوني الي والللف الحمد لله اتصلت بيچ وافتهمت منچ قبل لا تكبر السالفه وتوصل لأذن الكبار

-يعني هسة معليچ ببكر انتي؟ وهوه مجرد صديقچ

-اي والله هجران اني لو احب بكر تشوفيني زينه وياچ واحبچ؟؟!! لا طبعاً چان حاربت حتى تبتعدين عنه مو اني الادافعلچ گدام فتوح وبتهه الحقيرة نرجس

-هجران: اني اسفه جواهر

-لا يروحي لتبچين ولا تعتذرين حقچ حسيتي روحچ انخدعتي ما اگدر اللومچ

-هجران(جوري اخذت الموبايل مني واني نهاريت بچي بَـس طبعاً بچي فرح الحمد لله طلع الكلام چذب، مي بارد ونزل ؏ گلبي، بَـس هم انقهرت من ظلمت بكر وما واجهته من البدايه

-جوري: جواهر اني اسفه لان حچيت عليچ

-جواهر: هههههه ولا يهمچ بَـس شنو هاي ولچ شنو هاللسان

-جوري: ههههه ولچ ماتحمل واحد يأذي خواتي والله ادوس ببطنه

-جواهر: عفيه عليچ، يله حبي اني اروح عندي سالفه

-جوري: لعد شلون متداومين اليوم؟

-لا لا مابيه انهبطت من الصباحيات

-جوري: ههههه يله الله وياچ حب

"جواهر"
سديت الخط منهن ورحت گبل ؏ نرجس النذلة ماكو غيرهه الي يريد يوگعني ويسويلي مشاكل

-جواهر: ولچ نرجسسس

-نرجس: ويعة امي شكووو

-جواهر: احچي عدل ولچ شمسويه البارحة؟؟؟ دازة لهجران رساله وحاچيه عليه؟!!

-نرجس: شنهو بويه هوه ياهو كاظ طرگاعتچ موبايلچ

-جواهر: انتيييي منو غيرچ اجيتيني البارحة تتبچبچين تگولين ماعندي رصيد واريد اخابر صديقتي

-فتوح بعرامه: اييييي گوليهه گوليهه تردين تسودين سمعه بنيتي عبن مطلگه

-جواهر: عمه اني شگلتت قابل ذكرت شي عن انفصالهه؟!!

-فتوح: انلصمييي انتي واخيتچ حالچن حال صباح وبناتهه السعلوات خطافات الزلم (قصدهه ؏ جوري وهجران)

-جواهر: عمممه اني شيخصني بخاله صباح وبناتهه

-فتوح: ايييييي وبعد الچ لساان وتراددين يالساقطة نايمه بحظن بچر ليل نهااار تردين تذبين بلاچ علينه

-جواهر(فتحت عيوني بذهول، الدم صعد لراسي من العصبيه، وبهالاثناء الكل طلعوا من غرفهم غزل ورهف واگفات مصدومات وبيبي عطيه وحتى خالة سلمى وشهد انصدمن من الكلام ومحد علق ؏ شي، عطت بصوت حسيته طلع من اعماق اوتاري الصوتيه

-شگلتييي انييييي ناااايمه ويه بكرررررر

-نرجس: اي خية انتي لا لبالچ حنه ماندري

-سلمى(ام فيصل): ولچ نرررجس شهالحچي متستحييين

-حجية عطيه: ولچن يمغموگات شني هالطرگاعه السمعتهه

-جواهر(دموعي گامت تنزل بقهر): بيبي، خاله والله العظيم كذب وافتراااء اني مستحيل اسويهه

-فتوح: هه ولچ يالملعبه نايمه بحظن الزلم وترحين للجامعه وتگظيهه من واحد لواحد ما عدى بچر (بكر) شفته يطلع من حجرتچ بنصاص الليالي اكيد الليل كله اهاا واهااا (وتحرك بحواجبها بخبث)

-جواهر: انچبييييي ماسمحلچ اني اشرف منچ ومن بنتچ!!!! الي طليقهه عافهه بسبب نگهه ونكدهه واجت عاااله ؏ گلب عميد الدين لفاچن ببيته!!!!

لهناك وسمعت صوت عالي رج گلبي قبل لا يرج الصاله

-ولچ جوااااهر

درت وجهي واذا اشوف عميد الدين وجهه محتقن وصاير دم، يباوعلي بنظرات غضب وضغينه، لوما بيبي متدخله چان گمز عليه وافترسني

-حجية عطيه: ولچن شني هاللسانات انه عمري ماشايفه هيچي شي وحده تصد والثانيه ترد

-جواهر: بيبي اني بَـس دافعت عن... (قاطعني عميد ونتر بغضب گوة كاتمه

-عميد: روووحي لحجرتچ جواهر!!!

-جواهر: عمييد فدوة خليني اشرحلك

-عميد: گلتتتت روحي لحجرتتتچ ولچ!!!!

-جواهر(باوعتله بنظرات مليانه لوم وعتب وهوه داير وجهه عني واگف وعيونه ليگدام حتى ما باوعلي نظره، رحت لغرفتي ونمت بفراشي ومتت من البچي اجنلي رهف وغزل وشهد وحلا يصبرني، گمزت من الفراش من سمعت صوته يحاچي فتحو (فتوح) بالصاله ولان غرفتي تطل ؏ الصاله اگدر اسمعلهم بوضوح لان اصواتهم عاليه

-عميد: عمه شمالكم

-فتوح(تمثل البكاء): سمعتهه يا بعد عمتك سمعت هالبلا عينك عينك تطردنه من بيتك يالشيخ

-عميد: عمه مسحيهه بلحيتي

-فتوح: لا يبعد حيلي مامسحهه انته شني ذنبك ملفي هالشكولات ببيتك انه دقيقه ماظل گاعده هنا لو ظلت هالسوسه واختهه بهالبيت

-عميد: عمه اغديلچ فدوه استچني انه احلهه واجيبهه بنفسهه تجي تعتذر منچ

-نرجس: لا سيد انه وامي مانظل دقيقه هنا يله يما

-عميد: نرجس بهداي (؏ كيف) شوي شوي ذكري الله خلونه نحلهه وبسكم من المشاكل

-نرجس: لا سيد انه مالي مچان بهالبيت حتى لو امي رادت تگعد انه ما اظلن وهاي جواهر هنا

-حجية عطيه: بسچن فتوح نرجس استچنن ولا تظلن تهوبزن ؏ الزلمه وتأذو

-عميد: عمه گتلچ مسحيهه بلحيتي واگعدي انتي وبنيتچ احطنكم ببطن عيني شني تردين تكسرين چلمتي؟

-فتوح: ماااا عاااشت التكسر چلمتك يهيبتنه اندارلك فدووه يبعد طوايفي

-عميد(زفرت بأرتياح): الله يحفظچ عمه وانتي چبيرتنه ومكانچ هنا (حطيت ايدي ؏ راسي)

-فتوح: يااا بعد حيلي وانه اگولن لنرجوسه ادري بسيد عميد مايتركنه وانته لفيتنه ببيتك وحافظت عليّ من بعد وفات المرحوم ولفيت بنيتي من دگ بيهه الناگصه زلمتهه وطلگهه

-عميد: عمه هذا مو بيتي هذا بيت ابوي الله يرحمه وهوه وصاني بيكم واحد واحد گبل وفاته

-حجية عطيه: وكفوو كفوو منك يبعد چلاويي ولك حبوبه بَـس انته التشفي الافاد

-عميد(بست راسهه): الله يديمچ ليه حبوبه

-انتصار(ام عميد): هااا وانه يعمييّد لو نسيت اميمتك

-عميد: يمه انتي هين (اشرت ؏ گلبي، وبست راسهه)

-انتصار: يروح امك

-فتوح: سيد انته گلتلي جواهر تجي تعتذر مني موش صح؟ لو غيرت چلامك

-عميد الدين: افاا عمه انه اغير چلامي هسة اروحن بَـس اسبح وابدل واحاچيهه ماتشوفيني كلني دمايه مال بهايم

-فتوح: يممممه يبعد العافية رووحي يمه نرجوسه روحي حبي (بوسي) يد ابن خالچ

-نرجس: حاظر يوم (رحت ابوسن يده، جرهه بساع

-عميد: لا العفو شني السالفه عمه مايحتاج كل هذا

-فتوح: شلون مايحتاج وانته ما كسرت بخاطري ورح تجيب بت نبراس هنا وتعتذرلي وتحبن راسي

-عميد: لا عمه مايحتاج، ويله من رخصتكم

-جواهر(اسمع الحچي واني گلبي مفرفح لو بيدي اروح اگطع نرجس وفتوح هالحيايه، وطبعاً ماتعجبت من خالة سلمى سكتت ومادافعتلي لان اكيييد تخاف من عميد الدين ومتگدر تحچي فوگ كلامه

-شهد: جواهر كافي يمعوده والله متستاهل السالفه

-حلا: اي حبي جوهرة عيفي الموضوع وروحي اعتذري وخلونه نخلص

-جواهر: ااانننييي اعتذر من هالحية فتوووح والله لو اموووت لو تذبحوني وتشرحوني وتگصبوني وترجعون تحييوني وتعيدون هالسوالف هم ماعتذر

-غزل: جواهر مو عميد انطاهه چلمه ومايصير يرد بيهه

-جواهر: وانييي شكووو لو شيخ عميد بَـس حاظر بنطي وعود وعباله رح انفذ واگوله سمعاً وطاعه

-رهف: جواهر فدوه لا تكسرين ابوي ترا والله سوه هيچ لخاطرچ حتى ما يأذنچ

-جواهر: خيووولن ذني الحيايه يأذني يخسسن

-رهف: السالفه مو جديده عمه فتوح ونرجس مايحبونچن ويردن بَـس يسون مشاكل فَـہ لخاطري ولخاطر هالوجوه الطيبه واگفات ونقنع بيچ روحي اعتذري يله يرويحتي

-غزل بضحك: ولچ شني هاي رهيفه ماعرفتچ شو صايره متكلمه وتحچين حچي كبار

-رهف بفخر: چا انه بت ياهوو

-حلا: ونعممم وسبع تنعام والله

-جواهر: رهوفه كلامچ ؏ عيني وراسي بَـس من الاخر اگولهه اعتذااار ماعتذر لو اموووووووت

-شهد بهمس: جواهر ميصير عيب ترا احنه گاعدين بييتهم وعميد الدين متفضل علينه

-جواهر: هااا اذا هيچي حقه يله لعد اني ارجع لبغداد

گمت احظر جنطتي والبنات حواليه يقنعن بيه بَـس اني مستحيل اعتذر لهاي النذله فوگما حچت ؏ شرفي وسوتني نايمه بحظن الزلم ولااا يريدني شييخ عميد الدين اروح اعتذرلهه والله لو تبچي دممم ماباوع بخلقتهه مو انوب اعتذر

اتصلت بأخوية حلاوة وگتله يجي عليه عشتوو شكو گاعده ببيته فوگما انهانيت انوب ابقى هنا اله الچان مخبله

ظليت گاعده بغرفتي انتظر اتصال من حلاوة اكيد رح يتأخر الطريق يبعد فوگ الست ساعات، وشهد اكلت راسي شلون ارجع واعوفهه هنا وحدهه بَـس كلشي ولا كرامتي

شويه وصاحولنه ؏ الغده لا بله يردوني اگعد ويه هالعگارب وتنزل لگمه من بلعومي واني اباوع لوجوههن التگطر سَم.. طلعن البنات يتغدن بعدما عجزن ويايه وبقيت وحدي، شويه واندگ الباب

-جواهر: تفضل

تفاجأت من شفت عميد واگف بالباب بَـس ماد راسه، گال من وره خشمه

-عميد: تگدرين تطلعين اريدن احاچيچ شوي

-جواهر(رديتهه بنفس صيغة كلامه): لاااع ماطلع

زفر بضيق وظل يباوع لناحيتي

-عميد: يعني شوون ماتطلعين

-ابددد

-عميد: بَـس احاچيچ شوي شمالچ سحلتيني

-اني مسحلتك كل ما بالموضوع ماريد اشوفك واحچي وياك

-عميد: بَـس انه اريدن

رفعت عيوني اباوعله چان مبين عليه التعب والقهر ماخذ من حيله، خطيه هالفترة هواي تأذه ومصيبه وره مصيبه دتجي ؏ راسه، بَـس رغم هذا بقيت مُصرة

-جواهر: ميهمني

هز راسه وطلع بره وطبگ الباب، متت قهر لان عافني وماحاول اكثر ويايه هه وشكو يحاول اليسمع اني مهمه عنده

مرت ربع ساعه واني گاعده اكش ذبان وحدي، بطني تقرقر من الجوع حتى متريگت مثل العالم ولا حتى داومت لعبت نفسي من نماذج فتحو ونرجس الغضب، هم سمعت باب الغرفه يندگ چانت رهف

-رهف: جواهر ابوي يريد يحاچيچ

-جواهر: هاااا عجز يقنعني جابچ انتي تقنعيني

-رهف: لا مو هيچ السالفه بَـس صاحلي حتى يجي يطب هنا بالحجرة ويحاچيچ

فتحت عيوني بدهشة يدخل لغرفتي ويحاچيني؟!! دگ الباب وفتحتله رهف، دخل وگعد مقابيلي ؏ سرير شهد بَـس منزل عيونه ماعرف ليش

-عميد: سمعيني جِواهر انه من يوم يومي محد كاسرلي چلمه ولا احد عاندني بَـس انتي!! وهسَّ جيتلچ انه بنفسي واريد اطلبهه منچ ترحين تعتذرين من عمتي فتوح وتحبين (تبوسين) راسهه

-جواهر: هههههه عميد انته صدُك تحچي؟؟! يعني مقتنع بكلامك

رفع عيونه يباوعلي بأستغراب

-عميد: وشماله چلامي؟

-ابددد يخبل وكُلش موزون

-جواااهرر لا تتجاوزييين احترمي

-جواهر: اني ممتجاوزه عليك بَـس مال اروح واعتذر من فتوح وبتهه المصخمة نرجس لو اموووت

-وليش؟

-لان داسن عليه يعني لييش؟!!!

-وانتي ماقصرتي طلعتي لسانچ مية متر تگولين رشاشه موش لسان

-اييي لان حچن عليه ومال اسكتلهن بأحلامك

-عميد: هااا يعني هيچ صارت؟ سالفت عناد؟

-بالضبططط مثل ما انته دومك تعاند ويايه اني هم اعاند ويلهه خنشوف منو الكلمته تمشي

زفر بقوة شويه ويطيرني، سَرّت رعشه بسيطة بعظامي لان ماعرف شنو حَ تكون ردة فعله، بَـس انصدمت من گال بصوت قوي

-عميد: رهففف بوويه طلعي برره

-رهف: حاظر بابا

طلعت رهف وهوه گاعد گبالي يسحب شهيق قوي ويزفر اقوى، عيونه عليه يجدحن لاا بالله رحت بيهه اليوم، بقيت گاعده انتظر منه كلمه ورگبتي غايصه بصدري مدا اگدر ارفع راسي واباوعله

سمعت صوت طگطگه سرير معناهه گام، يبوو عطره صار بنص خشمي معناهه اقترب عليه، اخيراً رفعت راسي واذا اشوفه بوجهي واگف، بلعت ريگي واني اباوع بعيونه الي واااضح گوة متحملني وشويه ويرگعني راشدي يرجعني لبغداد

انصعقت من حركته وشهگت بصدمه من اسلوبه، لزمني من زندي حيل ووگفتي گباله، صرنه وجه بوجه وعين بعين، انفاسه الحارة تضرب وجهي

همس بهدووء بصوته الخشن خلاني انصاب بقشعريره بكل جسمي وذبلت عيوني واني اباوع بعيونه الياخذّني لغير عالم

-جواهر انه احبچ.....

يتبع☘️...

♛ ♛ ♛ ♛ ♛ ♛ ♛ ♛ ♛ ♛
وديلهه شلونهه القفله مو تخببل😘💔 ترا اني حبيت كُلش بعد مادري عنكم😁

المهم دنطوني توقعاتكم ولتنسون التعليق والتصويت😎🤝