اسيرة قدرك

البارت الثاني

اسيرة_قدرك..
بقلمي رسل..
البارت الثاني..
واتباد @rasolaa7

وحگك يا حزن مليت
لا تكبر ، زهگت الناس والغربه
ولك متعوب
احس روحي زرع ما والم التربه..

-لليل جان يدك جهازة باوع بي كال كومي
اطلعي برا شوي و اصيح عليج..

-تنهدت و طلعت من الغرفة ميته على شكلك
حتى احترام ما مخليلي لا ويا و لا ويه اهلي
اسمعه يحجي ويا بنيه تركته و كعدت بالصالة..

-شعور حقير ما ينوصف شكد ثكلتي يا ريا
على اهلج بحيث شمروج على هيج واحد
تهونين عليه وما يفكر ويكول هاي تنقهر
هاي تنجرح انوثتها لو استمريت بعلاقاتي
وبنص غرفتها..

-ما اعرف شكد مر وقت اجاني صوته
ريا تعالي..

-جنت ضعيفه
جنت امشي بدون شعور وشنو يكولولي صار
و صار طفلة طفلة و فتحت عينها على ابو
يفرق بين اولاده
و رجعت فتحت العين الثانية و يا زوج
حتى ما يتسمى رجلي كل شوره بيد اهله
و مفضلهم عليه حتى وان كان الغلط منهم..

-رجعت للغرفة هو اخذني لحضنه يبوس
و اتقرب مني كالعادة الى ان شبع غريزته
و ابتعد..

-كل يوم هيج حالي بالليل يشبع غريزته و النهار
كله اشتغل و حسرة عليه الأكل..

-مرت الأيام و صلت مرحلة انتهي من الجوع
و استحي احجي و اطالب باللكمة الي هم يطبخوها و لازم انتظرهم يعطفون عليه و
ينزلولي اكل..

-وبدت معاناتي وياهم تزيد منا اهله منا هو
و كملت ويا اخته الي ما اسوي شيء اذا ما اخذ
اذنها حتى اذا اشر الملابس لازم بأمر منها و توكف فوك راسي لان الشباك صاير برا
جنت مسيرة كلش لان اخاف اخاف منهم كلش
و ما عندي احد اتقوى بي..

-و بيوم اجه أسر و جان وقت مغرب
كعد يمي طلع تليفونه..

-هاج خابري اهلج احجي وياهم لا تخافين
بي رصيد هواي..

-فرحت كلش رغم معاملتهم وياي بس يبقون
اهلي و يفرحني اسمع صوتهم و اطمن عليهم
و اني اصلا من تزوجت لليوم ما خابرتهم
غير مرة وحدة..

-كتبت رقم اختي و كعدت احجي وياها جنت
احجي واشكي ومنطلقة وماخذه راحتي و غافلة عن مكائدهم و نفوسهم الضعيفة و الخبث الي بيها
سألتني عن حالي و اني احجي بعدها كتلها
ميته جوع والله تعالي شوفي حاله و نوب اخته
هاي العربيده جنها ضابط مخلينها فوك راسي..

-حجيت و كملت هو من خابرت صعد يم
اهله لهذا جنت ماخذه راحتي شوي و نزل
رجعتله الجهاز وتشكرت منه..

-اخذ الجهاز و طلع اشو هذا شوي و رجع
عليه مثل الأعصار ملخ شعري يضرب بيه
بكل قوته واني بس اريد افهم ليش كفخني تكفخ

-ولج تشكين لأهلج حقيرة شلون هيج تحجين
ولج..

-موتني كتل و طلع شبعت بجي و نهضمت
كل فكري كال هاي خطية خلي اخليها تسمع
صوت اهلها و تحجي وياهم تالي طلع مخلي
تسجيل و سمع كل كلامي ربي تعبت منهم
تعب بعد شنو اشوف منهم و شلون راح اتحمل..

-بقيت ما احجي ويا هو ثاني يوم التحق
للعصر اجني خواتي عليه اشو هاي امه تعالي
و انزلي يمنا شلون تعوفني وحدي ويا اخواتي..

-انقهرن عليه كلش من قهرهن حجن انو لازم
يتسوك الي كالتلها اختي تجوع تريد شيء
لازم عدها مسواك ميصير هيج تندمت فضفضت
لأختي لان رجع كل شيء عليه
وهن حتى اجني ايدهن فارغة واني ما كتلها
تعالي هم فهموا غير شيء..

-من اجه امه تلكته من الباب تلعلع و حجت عن
كلام خواتي هو خزرني خزره و طلع بس شنو
احسه فاير وكوه مصبر على نفسه..

-اخواتي بقن يمي و اني بغير عالم خايفه منه
نوب زيدن همي لو ما جايات احسن عمتي
بس تخزر شوي و دخل علينا من شفته
حسيت جسمي كله رجف..

-كدام خواتي شمر عليه  دجاجة شوي و فواكه..

أسر.. هاج اشبعي بنت الفكر من كبور الي تاخذج
فكر بت فكر..

-اختي كامت عليه و اتلاغت ويا ما قبلت على
كلامه تالي طلعن خواتي بعد ما تلاغن ويا
هو هم صعد يم اهله بدون ما يحجي وياي
بقى يمهم بات و اني الي وكعت بيها لان خواته
نزلن يمي واني جنت بوضع ما طايقه حتى
نفسي مو نوب خواته..

-شهرين مر على زواجي و بدت سالفتهن الجديدة
شوكت تحملين شو ما صرتي حامل ليل نهار
ينكن على سالفة الحمل لعبوا نفسي و كانو
صارلي سنين من تزوجت و لا عبالك شهرين
تالي عمتي كالت باجر نروح لل..... هناك
اكو مزار سيد....  يم بيت اختي..

-اخذتني لبيت اختها طريق طويل و تعب
اول شيء زرنا و بعدها رحنا على بيت اختها
كالت نبات يمهم و نرجع ثاني يوم..

-بتت يمهم وكوه حملتهن هاي بت خالته كل
شوي وكالت والله أسر يموت عليه
أسر جان يحبني
اسر كتل روحه عليه و ما أخذته..

-تركتها تحجي و نمت امداه لحضي لو ماخذته
جان هسه مو هذا حالي لا و عود تقهر بيه
و تريد تغثني..

-رجعنا للبيت و رجعت نحبست لا طبه و لا طلعه
الايام و الأشهر تمر و ريا كاعدة بهالبيت
و متحمله أسر و صاحباته و سوالفه
و متحمله اهله الي ما ينجرعون..

-بهاي الفترة هو صار يتسوك و يخلي بالثلاجة
و يجيب بركر و كبه ومن اكلي هنه بس يشتمن
ريحة الأكل يدزن ابن اختهن و أسر يكلي
صعدي اكل لأهلي..

-اصعد الهم و اني ساكته شسوي اذا حجيت
يرجع عليه و غصب عني يصعده لهذا اتجنب
اتجادل ويا..

-بالليل دخلت للغرفة واسمع تليفونه يدك
شافني صاح تعاي جاوبي كوليلها نايم و من
تسألج كولي اني اخته مفهوم؟!..

-فتحت خط اجاني صوت وحدة تتموع
حجيت مثل ما طلب مني و سديته
ما اعرف شنو من بشر
و بشنو يفكر حركاته كلها نذاله بنذاله
و تعالي يا ريا تحملي و تطك روحي و ارجع
اصبر بنفسي لان اهلي هم الي غصبوني عليه
و اكيد اذا رجعت الهم راح يوجعوني اله غصب
عني..

-اشرلي اجي يمه و بدأ يتقربلي كمل ونام
و اني بقيت الوب اكرهه حالي من هيج يسوي..

-بعدها اجتني ايام صرت اتعب بيها
و خمول و الشهرية تأخرت أخذوني حللت
و طلعت حامل صدمني بفرحته
من سمع جان فرحان كلش بحيث ثاني يوم
اخذ ذبيحة للمزار الي اخذتني اله عمتي
نفسيته تغيرت شوي صار يجيب اكل و يخلي و ياخذني لأهلي بس ابد ما يقبل ابات..

-بيومها كال امشي اخذج لأهلج تونسي
لان رايح على صديقي طلعت ويا
بقينا للليل يلا رجعنا دخلنا للشقة و اشوف
غرفتي كلها طين مفصص على الجرباية
باوعت وحجيت بصدمة أسر شنو هذا؟!.
جان تحجي اخته بسرعة..

-لا تخافين هاي سوالف امي هي نذرت
وهذا تراب من المزار..

-غيرت ملابسي وبديت انضف بي شلت
التراب و الطين خليته بعلاكه شحجي بعد..

-وره اسبوعين بديت اتعب كلش
و اختنك رجلي ثكلت كوه امشي عليها
هو ما اريده اختنك منه و بس ابجي
الليل كوه اغفه بي شوي يوم عن يوم
حالتي تصير اسوء..

-أسر حار بيه وما يعرف شيسويلي لان حالتي
بالنازل و كرشه رجلي صارت شكبرها تخوف و مرات اضرب على بطني ما اعرف ما اعرف
وين الألم بس الي اعرفه انتهي يوم عن يوم...

-هو حاير بيه ياخذني من طبيب لطبيب
واشوف الخوف بعيونه بس ما بيده شيء
كل طبيب اروح عليه ما يفيد وياي
و صل بيه الحال اخلي ايديه على ركبتي
واخنك روحي حتى بس ارتاح..

-عشر ايام واني الوب واختنك والله وصلت
الموت بيهن انتهيت هيج صرت اتمنى بس
اموت و اخلص..

-تالي كالوا خلي ناخذج لسيد يقرأ عليج
بلكي تصيرين زينه اخذوني للسيد واني روحي
رايحه من الألم من جهه الخنكه ومن جهه
رجلي الي صار شكلها يخوف..

-السيد جان عنده مثل العودة و يضرب بيها
على اصابعي متت من الألم و بس دموعي تصب
بعدها كعد يجكجك بكرشة رجلي الموت شفته
بعيني احجي وما اعرف شنو بس اتذكر حجيت
على اهلي لأن شمروني هيج شمره وكلما
يزيد الألم ازيد بالحجي..

-من كمل السيد كتلهم اريد اروح لأهلي ما اروح
وياكم ما اريد الشقة تخنكني خنك بعد ما اتحمل
والله خلي اروح يم اهلي..

-رحت لأهلي و هم ما عارضوا لان جانت
حالتي حالة رجلي كوه امشي عليها اعرج عرج
اسبوع بقيت يمهم و رجعت لان ضلن يحجن
وما قبلوا ابقى اكثر يم اهلي..

-من رجعت هن حقدن عليه و اسمع منهن
كومه حجي واغلس فتحت الشباك واشوف عمتي
واكفه هي و جيرانه يم شباكي و عمتي تشكي
عليه سمعتها تكلها مدري من يا زبالة جابها
و حجي كومه عليه تنهدت و رجعت سديته
واني ناوية هاي المرة اشكيله تعبت نوب وصلت
بيها تحجي عليه هي و الغريب..

-من اجه سولفتله كل شيء هو تركني و صعد
دزوا عليه و عمتي تنكر و تكول جذابه
حماية كال متأكدة هيج الي صار..

-اي متأكدة وهي و جيرانه يغلطن و حتى فشرن
عليه حجيتها جان يكول لأخته كومي جيبي
لقران و اثنينجن تحلفن اليوم..

-جاب القران و حلفت و نصدمت من خلت
ايدها و حلفت وراي بقيت بس صافنه عليها
شنو من بشر والله ابد ما تخاف من الله
بعدها كالوا يلا رجعي
طلعت منهم و عيني عليه مفروض هو امان
الي مفروض ياخذ حقي وما يسمح لاحد يحجي
عني بكلمة بس اخ منه كل شوره بيد اهله
نزلت وهو ضل يمهم..

-شوي ونزل وراي اول ما فات كتلني
حقيرة ليش سويتي مشكلة..

ريا.. ولعد هي ليش تحجي عليه ما مسويتلها
شيء ليش هيج وياي نوب طلعت اني
الي مسوية مشاكل..

-انجبي لج حقيرة عبالج بهاي سوالفج
راح اكطع بيهم لو اكطع عنهم المصرف
هو ينطي لخواته كل وحدة 50 من يستلم
وامه 70 واني 25 رزلني و مدد
هزيت ايدي اني وين وهو شنو يفكر..

-لليل دك عليه ابن اخته كاله الحك امك
حلكها نعوج..

-هو طفر و خزرني طلع وهو يتوعد الي
هنا صدك حسيت بالخوف حالي جان مثل المجرم
الي ينتظر الحكم نوب خفت كلش لان اني بوقت
ما احلف دعيت ابو فاضل عليه السلام يظهر
الحق..

-اباوع عليهم من الشباك ينزلون بيها
وجان تنزل اخته الجبيرة طبت علينا
وجان تسحلني من شعري اريد اوخرها ما اكدر
تسحل بيه وتغلط امشي اصعدي لج
امي اذا صار عليها شيء اموتج انهيج حقيرة
كله منج..

-اباوعلها الي يشوفها يكول حنينه و مكطعه
روحها على امها و هي اصلا من دونهم
تكرهه امه وما تسميها الا الكح****
بس شلون ترفض هيج فرصة اذا ما تغلط
و تلوم بريا..

-لبست عباتي و صعدت وياها جانت هي وحماي بالبيت بس كعدت بالصالة ودموعي
تصب خوف و قهر و قلق
خايفه لا تموت عمتي و يذبوها براسي وهذا العوينجي نظراته كلها شهوة عليه حسسني ما لابسه شيء شوي وعافتني بالصالة و طبت لغرفتها تنام..

-بقيت وحدي و كوه مجاريته لان يكبسل و يشرب
خفت منه كلش لازمه كلبي بيدي لحظات
كرهتني بالحياة وحيدة و بين وحوش ما عدا
الخوف من مصيري و التفكيري من يرجع
أسر شيسوي بيه..

-وره ما اعرف شكد انفتح الباب و دخلوها
وجان يجي عليه و يسحلني من شعري و ذبني
يم امه..

-يلا بوسي ايدها و راسها يلا بسرعة..

-صرت اشهك والدموع حجبت النظر ومحد
رحمني منهم دنكت على اديها و راسها بستهن
كال يلا امشي ولي نزلي..

-نزلت واني ابجي فوك ظلمها نوب اني الي
اعتذر فوك ما حلفت بكتاب الله جذب
رجعوا عليه ربي تعبت تعبت خلصني منهم
المن عايشه اني المن
لا اهل بيهم خير
لا زوج سند و كفو..

-كوه نمت من القهر هو ما نزل بيومها
بقى يم اهله اسبوع كامل ما شفت احد منهم
لا هو و لا اهله مسواك يدزه بيد ابن اخته
يذبه يم الباب و يروح حاربوني نفسيا
طول ايام مرض امهم خواته كلهن اجن
على امه..

-وحدي بالشقة و خايفة جانت الساعة بالتسعة بالليل ندك الباب جنت اقرا قران كمت
اشوف منو فتحته جان حماية كتله ها خوية
رايد شيء..

-هو جان يباوعلي بنظرات مقززة  كال اني ادري بأخوية اذاج انقهرت عليج ريا
هواي انقهرت عليج..

-اني بس واكفه بتوتر ولازمه الباب بيدي لان ما عندي
ثقة بي حسيته بدا شوي شوي يتقرب وعينه
عليه بنظرات شهوه و قذره..

طلع العلبة وخلاها بيدي

هاج اكلي..

-اخذتها  هو رجع كال
هسه اكلي كدامي طيب كلش هذا..

-ها لا بعدين اكل ما اريد هسه حجيتها و اني
بداخلي شك جبير ما اثق بي نهائيا..

-بهاي الأثناء وكع جداحته بالكاع و دنك
قبل لا يرفعها خله رجله على الباب و يدفع
بالباب بمحاولة الدخول وكانو ثعلب مكار
و يستغل الفرص القذرة..

يتبع....

حبايبي النشر مو محدد ع الأغلب يكون
يومي اذا شفت تفاعل لانو تسوولي واهس
كلما تتفاعلون اكتب اسرع..

اما الشخصيات تتعرفون عليهم و يتوضحون
اكثر من خلال البارتات بعدنا بالبداية
لا تستعجلون
واحبكم..

اللهم صل على محمد وال محمد❤️