هذا البارت هدية مني الكم لان باجر ماكو بارت لان جمعة
و هذا البارت اخر بارت مرتاحين بي من يوم السبت راح تبلش القصة من صدك و يا ترى شنو الي راح يصير و شنو الي راح يواجهنة بنات حجي عمران
#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الخامس
واگول انت..
و أشوف الراح كلّه انتَ
و أشوف الجاي هم انتَ
أو يذبل كل حچي الدنيا ،
وأشوفك تشتعل سكتة
نِده ، و كلّ العطش بالروح نشّفته
گمر ياخذني لآخر ليل..
و ارجع چنّي ما شفته
تهت واستغربت ناسي
و نسيت أهلي
و كُبر تنّور وهواسي
و لگيتك حرز من الله
إعلى كل مجنون علّگته.
من بغداد الحبيبة الى احد مناطق و قرى محافظة الكوت حيث يسكن جد البنات منهل و خوالهن ....
**** جنت انظف و شفت جاسم دخل للربعة (استقبال او المضيف مال الخطار ) رحت وكفت قريب الشباك و اسمعهم شيحجون...
الجد منهل : جاسم و حگ من تعبد اذا ما كفيت بلاك من عمران اكسر ظهرك
جاسم : چا شني نخلي العشيرة بيد عمران
الجد منهل : ولك انت اشمالك اخبن و ما براسك حظ چا ياهو احسن من عمران يصير شيخ شو هوا معدل و ابن اجاويد و معزب و متحجي و ياما و ياما حل مشاكل واصلة بيها للدم
جدة ربيعة : يمة جسام فدوة اغديلك عوف عمران و بعدين العشيرة كلها مشاكل و مسؤولية شلنة غرض بيهم عوفهة يا يمة و عوف المشاكل تالي تطلع انت الخسران
جاسم : هاهية يمة معلية بيهم رايح الف راسي و انام تعبان
جدة ربيعة : فدوة لطولك نوم العافية
كام جاسم و راح لغرفتة .. و اني رجعت اكمل شغلي لكن جنت اعرف جاسم ما يكعد راحة لليل شفتة كاعد ع المصطبة يم الهوايش جانت ظلمة و يالكوة ينشاف الواحد
طلعت مرت جاسم و مثل عادتهة تتمختر بمشيتهة و لابسة خلخال برجلها و صايرة جنهة حية ام الجرس راحت وكفت يم جاسم و حطت ايدها على جتف جاسم و تڤرج بي
مرت جاسم : اي يجاسم فكرت بكلامي لو لا
جاسم : فكرت فكرت و كلامج هوا الصدك خليني اسكت منهم
مرت جاسم : اي عفية و لا تنسى عندك ورود بنت حازم بعد كم يوم العقد مالتها و ماكو غير هاي المناسبة حتى يفضالك الجو
جاسم : اي والله صدك ماكو غير هاي الفرصة
مرت جاسم : و هسة كوم مثل البطل و تروح لابوك و تنوي باجر لبغداد و تعتذر من عمران و تبيض صفحتك يلة و اني منتظرتك بالغرفة
*** رجعت مرت جاسم دخلت لغرفتهة و جاسم كام دخل للربعة و اني هم وكفت اتصنت عليه
جاسم : الله بالخير بوية
الجد منهل : هلا بوية الله بالخير و العافية
جاسم : بوية قبل لا تنام جايك بموضوع مهم
الجد منهل : احجي بوية شني العندك
جاسم : نروح اني وياك لبغداد
الجد منهل : عدل كعدتة و كال ها خير شني العندك حتى تروح لبغداد
جاسم : اني فكرت بكلامك و اريد اروح اعتذر من عمران يبقى عمران ابن عمي و زوج اختي و اخوية و عضيدي و الله يلعن الشيطان و ساعتة
الجد منهل : اي بوية الله يرضى عنك بجاه الحبيب محمد
*** ما كدرت ابقى اسمع اكثر لان مرت جاسم طلعت من غرفتهة و خاصة غرفتهة قريبة ع الربعة رجعت لحجرتي و ما كدرت اكمل و اسمع كلامهم لكن الي جنت متأكدة من عندا انو الموضوع مو مثل ما مبين مستحيل جاسم يعتذر و الاكبر مرتة قنعتة يعتذر معناها اكو سالفة اكبر لان هاي الحية مرت جاسم ما تسوي شي لله اذا ما الها فايدة بي ......
نرجع لبغداد الحبيبة ....
سحر : نور و سمر كاللي ع البنية الي سئلت على بابا و الغريب ذكرت اسمي يعني تعرفني ما اهتميت للموضوع و كمت ساعدت البنات كملنة شغلنة و طبكنة الاكل
سمر : للمغرب اندكت الباب رحت فتحتهة لكيتهم اهلي راجعين سلمت عليهم و دخلو و مبينين مو على بعضهم صبينة العشا بسرعة و كعدنا ناكل و كلها ساكتة محد حجة و لا حرف الابرة من تنشمر ينسمع صوتهة
كملنا العشا شلنة المواعين و عايدة غسلتهن و اني اخذتلهم الچاي و سمعتهم يحجون
صبري : هذا جاسم صار لازم ينكسر ظهرة لان استهتر حيل و طغى
حجي عمران : لا صبري لا يبقى جاسم ابن عمنة و هوا خوش جاسم فترة و راح يهداء و يجي يعتذر لا تخاف جاسم اعرفة متسرع و هاهية
سحر : اندكت الباب رحت فتحتهة طلع حيدر ابن عمي صبري بس شافني كال
حيدر : استغفر الله اني شايف واحد لابس نعال تك و تك مو عيونة تك و تك
سحر : اشكد تافه انت فوت عيني فوت حتى السلام صعب تسلم مو
حيدر : منو يمكم
سحر : كلها اهلك و بيت عمي حازم و بيبي و كلهم كاعدين بالصالة
حيدر : سمر وين
سحر : استغربت سؤال حيدر عن سمر كلتلة ليش تسأل على سمر
حيدر : لا هيج بس لان شسمة صار هواي ماكو
سحر : اهاا موجودة جوة تفضل ادخل
دخل حيدر للبيت و كعد يمهم بالصالة بس انتبهتلة هواي يتلفت و عبالك دا يدور على شخص
صرت قريبة عليه و حجيت بصوت ناصي كلتلة شبيك حيدر مضيع شي
حيدر : ها لا شكو كلشي ماكو
سحر : زين شبيك اتوترت ترى ما كلتلك شي
حيدر : هههه لا ما توترت يلة يابة نروح
صبري : اي اي نروح بعد يلة جليلة
سمر : سمعت حيدر اجة ما نزلت لان ما الي خلك اشوفة و لا احبة ما اعرف ليش حتى بيت عمي صبري كلهم علاقتي بيهم سطحية كلش رغم ما شايفة عليهم شي
نور : اي صار الوقت اعترف حتى لنفسي بهذا الشي اني احب حيدر من شفتة دخل حسيت نفسي اريد اصرخ من الفرحة طب بكل هيبتة و جمالة و طولة احتار اشلون اوصف حبي الة اتمنيت يبقون كل العمر يمنة و ما يرحون و اشبع عيوني بشوفتة
لكن اللحظات الحلوة ما ادوم اشوية و راحو و عمي حازم هم كامو هوا و خالتي منيرة و بابا حجة وياهم جان بيومها ثلاثاء
حجي عمران : خوية حازم خلي ورود تسوي العقد مالتها الخميس خطية خلي البنية تفرح و ربي يكتبلها السعادة تعاي عمو ورود
راحت ورود يم ابوية باس راسهة و باركلهة و انطاهة فلوس هدية عقدها
راحو بيت عمي حازم و بيبي هم راحت وياهم نظفنة البيت و كملنا بابا و امي دخلو لغرفتهم نامو و قيصر راد يصعد صحت عليه كلتلة اريدك بموضوع بالاستقبال
قيصر : خير صاير شي
نور : لا ماكو شي بس نريد نكعد وحدنا نسولف اذا ما عندك شي
قيصر : اي خوية تعاي
نور : رحنة للاستقبال كلتلة خلي اجيبلك ماعون فواكه و اجيك رحت جبت ماعون تفاح و برتقال و موز كعدت بالاستقبال ضليت اكشرلة و انطي
نور : اي قيصر رايدة منك شغلة
قيصر : اي خوية أمريني
نور : اريدك هسة و كدامي تصيح لحنين و اطيب خاطرهة بكلمتين خطية و الله ترى حنين وردة مال الله يلة قيصر لخاطري
قيصر : نور ترى حنين تعبتني تصرفاتهة لا ابالي و بدون عقل
نور : تبقى مرتك و ام ابنك و عشرت سنين لا يوم و لا يومين
قيصر : بس تدرين اني كنت مجبور عليها و تعرفين كلش زين الظروف الحكمت علينا هل زواج لا اني و لا هي جنة رايدين
نور : قيصر لا تفتح الدفاتر و القديمة هل سوالف باب اذا انفتح يدخلون هواي أشخاص غير مرحب بيهم
قيصر : بس يبقى زواجنة واقع مرير مرفوض
نور : لخاطري هسة صيحهة و طيب خاطرهة بكلمتين خطية
قيصر : ماشي روحي صيحيلهة و تعاي
نور : كمت بست قيصر من راسة و طلعت صحت لحنين كلتلها قيصر يريدج رجعنة اني و حنين للأستقبال
قيصر : تعاي حياتي ما اكدر اكل بدونج
نور : هااا خير خوية و اني ال صارلي ساعة اكشرلك و اوكلك ... ضلينة نضحك عفتهم وحدهم وصعدت
ما انكر الظروف حكمت على قيصر و حنين يتزوجون مجبورين .. حطيت راسي ع المخدة و رجع بية الوكت لهذاك اليوم الما اعرف اسميه مشئوم لو لا
... كاعدين اني و امي و ابوية و سمر و قيصر كاعدين العصر چاي و كعك و سوالف جان بوقتهة عايدة و سحر ابيت عمي حازم
اندكت الباب بقوة طلع قيصر ركض فتح الباب دخلت جوارينة ام حنين تصرخ و تخرط بخدودهة لدرجة يصبن دم
ام حنين : خوية ابو قيصر الحكلي الحكلييييي
حجي عمران : خير خير شصايرر
ام حنين : فدوة الحك راح يذبحون حنين الحكلهم ابوس رجلك
نور : ركض ابوية لبيت ام حنين هوا و قيصر و حتى بدون ما يفهم الموضوع
ام قيصر : خية ام حنين فهمينة شصاير
ام حنين : و هي تلطم على خدودها كالت خية حنين كضاهة ابوها و هي تحجي ويا ولد ع السطح و حلف الا يذبحهة موتهة كتل موتهةةةةة
نور : كلش اتفاجئت معقولة حنين هيج تسوي
ام حنين ضلت ترجف و تبجي و امي تواسي بيها تريد بس تسكت ماتت من البجي اكثر من نص ساعة و دخل بابا هوا و قيصر بس قيصر دخل مشتعل نار و عصبي فوراً دخل لغرفتة و ركع الباب حيل
ام حنين : ها خوية فدوة اروحلك راح يوكف گلبي
حجي عمران : خوية لا تخافين ما صار الا كل خير روحي لبيتج و زلمتج يفهمج شكو
نور : راحت ام حنين تركض و امي استلمت بابا
ام قيصر : ها حجي شصار وياك و شبي قيصر عصبي
حجي عمران : حجية ام قيصر خابري على مرت حازم و مرت صبري و خابري عمات قيصر و على امي لبابة و باجر ترحون تخطبون حنين لقيصر و الي صار اليوم ما اريد احد يعرف بي لان حتى اخوان حنين ما يعرفون الصار
نور : ضلينة ساكتين لان حتى امي ما تكدر تناقش ابوية بكلمتة و تعرف ابوية يسوي كلشي حتى ما تعم المشاكل
و صدك ثاني يوم خطبناهة و ورة فترة تم العرس و حنين صارت اول چنة لبيت النداف و قيصر حتى بليلة العرس ما راد يتقربلها
قيصر : يمة لا تحاولين لو اموت ما المس حنين
ام قيصر : يمة فدوة لطولك ابو حنين راد بياضهة و حجة ويا ابوك اروحلك فدوة لخاطري يمة
قيصر : والله العظيم و العباس ابو فاضل بس هسة اتقربلهة علمود بياضهة لا اكثر بلة اني بيهة عليها راحت ورود من ايدي ... و راح دخل لغرفتة
نور : ضليت مصدمة ورود شعليهة فوراً باوعت لامي و بعيوني الف سؤال
ام قيصر : قبل لا تسئلين اي قيصر يحب ورود بنت حازم و جان رايدهة بس ربج الظاهر ما كاتبلة ورود
نور : ضليت ساكتة و قيصر اتقرب لحنين بس على كد بياضهة و لكن للقدر و لرب العالمين كلمة ما تتغير و مكتوبة ع الجبين ورة اسبوعين تبين حنين حامل و هيج انربطو حنين و قيصر بزواج فاشل لكن دا يحاولون يحسنون من عندا لخاطر ابنهم عمران الصغير
فززتني من صفنتي سحر و هي تحجي ويا سمر ...
يتبع....
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا abu_joud212