مساء الخير يحَلوين .
صيام مقبول، شلونها اجواء رمضان وياكم؟
فستان احمر
تحسين لقمان
كأنها عيون حبيبي رفيق ..
تذكرته ورحمته الالاف المرات و صار الليل ورجعنا للبيت، بالطريق مازن دك وسأل: وين تأخرت؟
بعد كل هذا الحب تضل حب ومحنة الاخ مالها بديل . رجعت راسي على زجاجة السيارة
ورتجيت وانا اتذكر اخت زياد شلون تعذبت وشافت الويل من اخوها وابوها شيصير لو الاخ بدل مايبيع
حبجياته المتروسه محنة ومودة للغريب يبادلهن ويا اخته المكابلة اربع حيطان ...
لو نوكيا السمرة الي تكابلو عليها اخوتها يحركون بجسمها بحجة غسل عار لان حبت بكلب صافي
صارت عار ولازم تندفن وكأنه تناسوا حكم الاله وجعلوا من انفسهم اله يحكم ويقتل ..
. حتى الاله مايعاقب على الحب هو وصى بالحب بأي حكم حكموا عليها ماعرف ...
واذا على غيرتهم كرجال ابدا هالتصرف مو رجولي ولا يتفسر ضمن اطار الغيرة.
بنيه ارتبطت بولد وين الغيرة بالموضوع؟ الاخ يسعى لسعادة اخته مو يطمطمها ويشمرها بحفرة
وكأنها قذارة، الغيرة الحقيقية للرجل هو ان يشوف رجل اخر غيره طيب و مثقف ويا اهله وهو لا
الغيرة للرجل هو ان يسعى لتغيير افكاره ونمطه القديم المتوارث . مو ياخذ من غيرة اقاويل همجية .
وصلنا البيت وقبل لا انزل من السيارة كال: حبيبتي ميادتي. ؟
التفتت اله وبحس دافي: عيونها حبيبي كول
جاوبني وهو يلمس خدي: خلينا على تواصل بالتليفون
ميادة: حبيبي كافي ماتعبت؟
جاوبني وهو يكرص بخدي ويروح يبوس اصابعه: اتعب من كلشي الا منج لا!
غلقت باب السيارة ومن النافذة حاجيته: روح وديربالك من الطريق
حنظل: تخافين عليه؟
ميادة: شلون ماخاف عليك وانت ابو بيتي بعد؟
نزل من السيارة طبگ بابها وهو يسولف: اموت واذوب على هيج كلام، بس فهميني شلون تردين افاركج؟
ميادة: مابقه شي واصير يمك تره، وها عود هم مل من عندي
حنظل: انا امل منج؟
تقرب وطبع قبلة بسيطة على وجناتي، عطر رقبته دخل انفي رغما عني ولمسني الخدر وخدرت بين ايديه ..
همست عند اذنه: يا حلى عطرك
ابتسم وجاوبني بهمس: خلاص لعد راح اسبح بي بليلة عرسنا
ابتعدت وضحكت ضربته بخفة وانا احاجي: يمه من سوالفك وجرأتك عيب يول
بين ضليت ادردم وهو صافن عليه ومبتسم وماحس الا جذبني عليه وهام عليه بأنفاسه يم رقبتي
نفخ على خصلة شعري والرجفة احتلت جسمي همست: كافي حنظل وخر
همس بخدر: ياعيب مو شعلتيني شعل
ابتسمت وجاوبته: وتحب غيري مو؟ وتخوني وياها فوكاها؟
جاوبني يم اذني: انعلبوها جا غير انا اثول وانعميت
غمضت عيني وجاوبته وانا خايفه لا يتحقق كلامي: ياريت تنعمي واطمن بالي منك ..
وخر راسه وهو خدران وبصوت رجولي خشن جاوبني: اها ترديني انعمي؟ جا كون انعمي وانتي اخر شي شفته بحياتي !
ميادة: اوي
حنظل: اويات، ماتخلينا نتزوج هسه؟
ميادة : اي علمود مازن يسويك وصلة مسح
حنظل: جا هي بكيفه غير الله كاتبج اليه وبس
ميادة: لابله اصلا جوز افكر ارفضك شني اخذك
جاوبني وهو يحك لحيته: ها كلتي ترفضيني ؟
وبطرف عين جاوبته: اي عندك مانع؟
باوعلي بنظرات خجلت من وراها بمعنى ترفضيني؟
جاوبته: شرفضك هو غير بالي ينشل اذا افكر برفضك !
حنظل:جا من البداية وصيري هيج اخخ الله
يساعدني عليج من هسه
افتريت كدامه وانا احاجي : يا فدوة اصلا اخبل
وبعدين وين تلكه مثلي حسن وجمال وجامعتهن كلهن
قاطعني وهو يسحبني اله: لج غير انتي مخبوط ببطينج عسل
ضحكت بصوت عالي وخله ايده على حلكي' فضحيتنا خرب . ضحكنا وحضنا بعض
طك ضهري بسرعة وانا من الالم: هو هيج شجاك وجعتني
حنظل: غير افحص عظم مرتي، وغمزلي
رحت لباب البيت من دون ماباوعله صحت بي اصعد امشي اصعد يلا يلا
انطاني بوسه بالهوى وراح صعد، دك هورن وباوعلي بمعنى روحي دخلي، دكيت الباب وشوية فتحتها
ثرية دخلت ومن وره الباب اشرتله بأيدي بمعنى مع السلامة ودخلت ليجوه استلمتني ثرية بسوالفها
النابعة من كل كلبها وهي تكلي باجر تلبسون حلقات وانا رجفت كتلها:شلون باجر يعني
جاوبتني وهي فرحانة: اتفقنا انا وعمتج ام رجلج باجر عقد وتلبسون حلقات
ولزمت خدي تبوسني وتكلي: مبروك شايفه كل الخير ام عبوسي
ضحكت وكتلها: ام ادم رجاءا لو سمحتي
اجه مازن من وراها: رجعتي اي مبروك حبيبتي
رحت حضنته بكل قوة: هواي ماراح انسى فضلك حبيبي اخوية
مسح بايده على راسي وهو يكول: اهم شي سعادتج وفرحتج يعمري
دار على ثرية وسألها: وين اوراق المكتبة؟
جاوبته: على الميز يمك غير
جاوبها: تعاي طلعيهن يالنادرة، راح وراحت وراه وهي خايفه .
والاوراق حجة اخترعها اخوية علمود ينعزل بكيمر ثرية ،دخلت غرفتي وذبيت روحي على الجرباية
تعبانه الي يشوفني يكول خلاص جانت تحصد بتيته، رن موبايلي بأشعار فتحته وكان من تويتر
تابعني ولد، ماتابعته بس اخذت فره بحسابه وحاولت اعرف عنه اي شي، الى ان اجتني رسالة من حنظل: مو بلغتج صفي الولد الي عندج لو لا؟
ميادة: حنظل افندي
حنظل: ميادة حسابج خاص والولد ينحذفون
كاعده اجاوبة من خلال الكتابة اتصل عليّ
جاوبته: حنظل يعني اكعد استغل الوكت واحجي وياك لو ارتب بحسابي؟
ياعيني شويه صحصح
نتر بيه: ميادة اذا يصير الصبح وماسويتي الكلت عليه يصير غير حجي
نترت بي: لا تهددني عاد والله يالله
حنظل:ماشي سهلة
تأففت وجاوبته: شو اوكف هاي كدامك ينفولو وللصبح ..
حنظل: من البداية وهيج وها كتبي متزوجة
ميادة : انت منيلك هاي السوالف هسه احنه تزوجنه علمود اكتب متزوجة
حنظل: معليج راح نتزوج يلا كتبي
جاوبته: يصير خير
كال: الخير يصيبج حبيبتي بس شي بسيط يم متزوجة سويلي اشارة
ميادة: لا بله!
حنظل: الحساب الي مابي اسمي مابي بركة ف اي من تخلين متزوجه كتبيني يمها وسويلي اشارة
ميادة: وف من سوالفك ، الله يساعدني عليك
حنظل: لج غير احبج واموت عليج لو ماخاف عليج من هذا وذاك جان ماخليتج تسوين هيج
ابتسمت وحبيت اثير غيرته: يلا يولي التويتر عندي الانستكرام وهناك وجوه الخير هوايه
صاح: شنو انستكرام شنو وجوه
كتمت ضحكتي وجاوبته: شبيك اهده تره حبابين ماعندي غريب اصدقاء وصديقات
حنظل: لعد ذوله منو اخوتي بالرضاعة
ماتحملت وضحكت بكل قوتي وهو مستمر يدردم عليه جاوبته: شش وداعتك والله اشاقه وياك
اخذ نفس وكال:تنشل ايدج وتتوقف رحمة الله عنج اذا طلع صح
وانا غاصة بالضحك ناديته: حنظل
جاوبني: ماي عيوني كولي حبيبتي
ميادة: تحبني؟
حنظل: شتكولين انتي؟
ميادة: جاوب عاد فضني
حنظل: جا انا معروف جوابي ميت بيج للاخير
ميادة: ربي لا يحرمني منك
حنظل: شتحسين من سؤالج؟
ميادة:بكيففي
حنظل: بس فهميني شوكت يجي باجر ويابوية البسج بيدية الحلقة غير يوم المبارك
ميادة: الله يكتبلنا الخير حبيبي لا تفكر من هسه
كاعد يحجي وصحت رأسا: حنظل حنظل
جاوبني: ها شكو عيونه لحنظل
ميادة:باوع هسه ساعة 11:11 اتمنى امنية
حنظل: ليش؟
ميادة: يكولون اذا الدقايق تشبه الساعة فتتحقق الامنية
حنظل: بوياي جا هنه وحده ثنين هسه كلهن اسطرهن
ضحكت وجاوبته: لا لازم وحده ميصير
كال بعلو صوته: ربي لا تحرمني من هالصوت واجمعني ويا تحت سكف واحد
تغطيت باللحاف من الخجل وجاوبته بهدوء: اااااااا احبك
حنظل: انا اكثر حبيبي، ترحين تنامين؟
ميادة:ياريت لان تعبت وباجر ورانه حفلة وهيج شي
حنظل: هاهي حب نتشاوف باجر، نامي زين مو ها تضلين منا ومنا
ميادة: تصبح على خير، اطمئن حبيبي
حنظل: اصبح عليج يخيري ودنيتي
نهيت المكالمة ورحت طفيت الضوه ورجعت لفراشي وانا مبتسمه على كلشي، كأنها الدنيا بدت
تضحكلي وتفتحلي ابوابها،رجع رن جهازي فتحت الاتصال اجاني صوته وكال: اشتاقيتلج ولج
ضحكت وجاوبته انا ونايمة على بطني مرتاحة: انا اكثر حبيبي
حنظل: تجين تنامين يمي، تره جربايتي فارغه وبس انا
جاوبته وانا مبتسمه: كريم وبالكرم معروف ..
ماتقصر روح نام وراية شغل
حنظل: بعد يوم وتصيرين بغرفتي الله شكد حلو
ميادة: جوز انام بغرفة امك اسبوع بين ماتعود على البيت ارجع يمك
ضحك وكال: اي علمود تلكين الثانية على فراشج تهلهل خبط فرنسي وياباني
ميادة: علمود اشنقك انت وياها
حنظل: و اي تلزمين عده عليه وكذا
ميادة : لاعده ولابطيخ الراح الله ويا خاصة اذا انت
ثخن صوته ووحسيته شلون الضاج: يلا نامي باي
وخرت الغطة : لا لحظة اوكف
حنظل: ها؟
ميادة: شبيك؟
حنظل: مابيه روحي نامي
ميادة: تعال
حنظل: مو اذا رحت عادي يلا روحي
ميادة:حنظل كافي عاد هو غير يكولون من حبك لاشاك شجاك اوي
طكها ضحكة وكال: لا
بس اصبريلي اذا ماكطعة للسانج
نترت بي: تريدني نتعارك؟
حنظل: ليش كايل شي غلط يابَ؟
ميادة: اي كايل بدل متتوعد اليه اصلخ واكطع ومدري شنو ، اوعدني تطلعني تسفرني تراويني خلك الله
حنظل: ولا يهمج التردي يصير
ابتسمت وجاوبته: يلا امشييي
جاوبني: تصبحين علية
انهيت الاتصال و غمضت عيوني ورخيت كل جسمي وراحت عليه الاحلام تنهال وحده وحده
مره اطلع لابسه ابيض ونرقص انا وحنظل ومره نكرز حب على دجلة بأحد ليالي الربيع و و هواي
فزيت وياريت ماصحيت، الحلم احلى من الواقع ولذلك مايتحقق !
فتحت الشبابيك وضربني الهوى اخذت منه نفس وندكت الباب فتحتها وطلعت ثري
. حضنتني وهي تكلي حبيبتي يلا انا اسبحج سبحة العقد، بوستها بوجناتها وبعدتها عني: ثرية خيتي ماعرف شنو اكول الج بس ما املك
الا الدعاء وعسى من الله ان مانفترك
رجعت حضنتني وكالت: مانفترك حبي هو غير ارواحنا مترابطه ويا بعضها
اخذتني من ايدي للحمام وكعدتني على دجه عالية وفتحت المي وبدت تسبحني بكل حنية وطيبة . ثرية ماتتكرر ابد ..
كملنا وطلعت تلكتني ياسمين بضحكة وهزت جتف: لك عيوني لك هلا اليوم عقد الزين
وتهلهل وتهز جتف، طلعت علجها وطكتها بوجهي: عيوني شدي حيلج اول ماتعقدين نامي على الرجال لا تشردينه
ثرية: دمشي حيري بزوجج سلطانوو
ياسمين: اوي يمه عيوني شو مدللني لو شايفته من يمشي شنو اذا يشد حيله يصير سلطان من صدك
ضحكنا كلنا وتقربت مني وحضنتني : حبيبتي ميادة هواي احبج ولا تتوقعين راح نتركج
اطوي الصار والف مبروك ياعمري كله
جاوبتها وانا خجلانه: ويبارك بيج وهو وين نخلص منج راح تلحكيني لنفس البيت
ثرية: اي عيناي وكوله نفس العمة
ياسمين: خلنها سكته اذا ماعلمها هزت الجتف اطلع فلا ياسمين
ضحكنا كلنا وثرية تجاوبها: هي وين بيها حيل بس تكول هجع ينشل السانها صدك جذب
حجينا وماتوادعنه الا ثرية كالت: اي وانا المسكينة باقية هنا شنو
ياسمين: لا تخافين كلها تبقه وحيدها الا انتي يمج مازن وبعد هو دكتور ويمج الحساب يمشي ويزوع الف
ضحكنا و كلنا سوه التمينا جوه حضنها، اخذتها ثرية لداخل الحمام وانا رحت. ابدل
اجتمعنا على الريوك وراها نظفنا البيت وغده ماسوينا مازن تكلف بي واحنا كل وحده بينه
تتحضر شكل ووحده احلى من الثانية، مر الظهر وكلب كل وحده بينا يدك حيل
وكأنه على استعداد للانفجار . صار العصر ونطرقت الباب سمعنا اصوات الزلم بالاستقبال
وام حنظل دخلت النا هي وجوارينها طشت جكليت وهلهلت وهوسة ، كعدت بصفها نفس ماطلبت
وصار تعرفني على جاراتها وهي توصيني اقره ايات بكلبي لا انحسد منهن
وانا ابتسم لطريقة كلامها وخوفها عليه، بلغنا مازن راح يعقد بالاول السيد اليه وبعدها لياسمين
تقربت على الباب وصرت استمع لكلامه والف فكرة صارت ببالي هو وخذلانه
و رفيق وحبه وابنه وتعبي وتعب ابويه وخوفه عليه لا يروح ويعوفني
سألني السيد موافقة او لا، وافقت بجملة " نعم انت وكيلي
شعور فرح على خوف وقلق هجمن عليه ثرية وياسمين حضنني وباركلي وام حنظل بموضع الهلاهل
دور ياسمين عقدت وصاحت بعلو صوتها " موافقة عيوني وانت شنو عيد ماسمعت "
وكعنا من الضحك انا وثريه على جرأتها وطريقتها رجع السيد كلها وكيلي، طكت العلج
وكالت: وانت وكيلي يعيوني، وكامت تهز خصر على حيلها فرحانه وثرية اطكلها اصبع وتهوس بصوت ناصي" وجان صاحبها وخذاها وجان صاحبها"
وذيج تبوس ام حنظل وتسويلها بجتفها: هجع هجع هلا هلا، فرحنا وضحكنا لهذا اليوم مايتكرر ابد
كأنه عام كامل، سمعناهم يباركون لبعض وانا وياسمين كعدنا ننتظر دخولهم لحد ماصاح
مازن راح يدخل حنظل وسلطان، دخلوا وياجمال ابو بيتي، سمارة وغمازته اخذن كلبي والشعر مرفوع
واللحية الخفيفة المرسومة بشكل خليجي يامحلاه تقرب مني بكل هيبة ويسويلي بيده بمعنى حنظل عظلة
ابتسمت ونصيت راسي تقرب مني وكال: احبج يعمري واخيرا!
وامه فرحانه بيهم واكفه بالنص بينه وبين اخو تهوس وتطش جوكليت وجاراتها يهوسن ويصفكن،
تقرب يم اذني تنفس وهمس: اموت واعرف الحجية شداعيتلي من دعوة علمود هالعسل كله اليه
همستله: استحي منا كلها تباوع علينا
حنظل: ويباوعون لا تخليني اعرس كدامهم وغمزلي .
خجلت وماعرف شنو اسوي ابداً
حنظل: اروح فدوة لليخجلون لو هيج الخجل لو مينراد
قاطعته امه وهي تقدمله تخم الذهب والحلقة بعلبة ثانية فتحها واخذ اصابعي باسهن وبكل
خباثه عظ نهاية اصبعي ، لبسني الحلقة وهو ماسكت عن كلامة وغزله اليه
لبسني الكلادة والتراجي، شويه وقطعنا كيك العقد شربني العصير ورجعت شربته
وبعدها قطع قطعة من الكيكة ولازم بالشوكة يوكلني واوكله، وهو انتهز هاي الفرصة وسواها بطريقته
خلّه الكيكه بين سنونه وانا لازم اكل منها وبكل جرأة سويتها وهو نسى الداير مدايرنه بلع الكيكة
واكل شفايفي ولكل يهوس" حبها ولك حبها"
ابتعدت عنه خجلانه تقرب عليه وسألني : تحبيني؟
جاوبته: رفيق اكو احد يسأل هيج
بدون قصد كلت رفيق وسهوا مني!
الا هو رفع حاجبه وقبض ايده بقوة وهو يكتم غضبه الّي عبرت عنه شرايين الايد وهي تبرز اكثر ..
_________________
ياسمين
سلطان: انا اريد اكلج من هسه افضل
عقجت حواجبي وكتله: خير سلطان خوفتني؟
جاوبني وهو مبتسم: ماكو شي حبيبتي، بس ماخذ بالسر بيت وكاعد اسدد بفلوسه
ياسمين: بس ليش بالسر مامسوي شي غلط
سلطان: الوالدة ماتقبل اطلع عنها من اتزوج وخاف انتي تنزعجين ومتاخذين راحتج من حماج
ابتسمت وجاوبته: سلطان صدك تحجي؟
سلطان:وداعت عيونج يعمري
مسكت ايده دفيتها بحرارة كف ايدي وجاوبته:حبيب كلبي امك امي، واخوك اخويه وكلبك بيتي، اي ازعاج ماكو ماحب اعزل
حلاوتها هي حركات المشاغبة الجنة والعمة ببداية الزواج ومن نطلع نحف لو من نباوع مسلسل
نكعد نكرز حب وتقليدنا المستمر لا تهتم
ضحكنا وكال: ها لج تردين تدخلين امي النار
ياسمين; جا شسوي بالجنة كرايبنا واهالينا كلها بالنار عاد هناك عدنه عرف
ضحك وجاوبني: احبج ياستي توعديني تحبيني للموت؟
ياسمين: هو انت من تموت اعتبرني ميته وياك، مجرد تنازع الموت تخيلني وياك ولا ليش تتخيلني اتاكد وياك
اخذ كف ايدي وطبع شفاهه عليها باوعلي بنظرة مليانة دفو: عمري قبل عمرج يروحي ودنيتي كلها
جمدنا مع بعض واحنه نباوع بعيون الثاني، تخيل لي عالم صوفي مطرز بأنغام موسيقية ترقص عليها قلوبنا ...
سلطان: انتي ليش حلوة؟
رفعت اكتافي وجاوبته: بكل بساطة حبيبي سُلطان
شلون تريدني لعد؟
سلطان: هاي شنو معقولة هيج انا ملاك؟
ياسمين: لعد هيج انا ملاك؟
سلطان: اكو احلى من الملاك انتِ وحي كلبي
ساكته وصافنة عليه : لك هلا هلا باليخجل انا شلون بي
ياسمين : يوو كافي حباب اصلا ماعرف شحجي
جاوبني بكل خدر: لا تحجين يروحي شوفتج ووجودج يمي كافي
ياسمين: صدك يصير اسألك سؤال بله عاد انا شكد جنت بمستنقع مليان زلم محد حبني بكدك
فرك وجهه وطك ركبته وجاوبني بعصبية: هذا سؤال؟ الا تطلعين الطلعة من خشمي؟
غميت روحي بكلبي وجاوبته: لا مو قصدي اوي هسه انا شكلت
عدل ياخته وسولف بحذر: ياسة سمعي زين بالج واياج تجيبين طاري ولد كدامي
قاطعته: واياك تحاجيني هيج
سلطان: صبرج ياروح بابا انتي ماتفهمين شني كاعد وتكليلي جنت بين الصخام محد حبني
شتردين اجاوبج فهميني مثلا اكلج جانوا يباوعونج خرب سكتي كافي
حك شعره وعظ اصبعه من العصبية جاوبته: ماقصدي شي وميحتاج هالعصبية الماخذها من غيرك
ضرب الميز بيده ونتر: لج ياغيري لج صخام انتي واعية على نفسج شنو تحجين تعرفين شنو فاره ولد الدنيا كلها بحيث كمتي تنسبين
كلامي لغير واحد
دمعتي صارت بطرف عيني نترت بي: وصلني للبيت حتى عشه منك ماريد هالله
سلطان: فوكاهه فوك ماغلطانه انتي ام الراهي ؟
ياسمين: ماغلطانه واصلا حشاية من الغلط انت ماتفهمني اوكي
دفع الكرسي بعصبية ونهضت ويا اخذ السويج وهو ضايج وطلع مفور للسيارة، صعد قبلي شغلها وانا
صافنه اباوعله فتح الجامه : يالسلام ماتصعدين شني واكفه
افأفت وانا اباوع للسماء بودي اعانده وافور دمه وهيج احرك دمه هالله اجتي مجموعة ولد صعدو بلسيارة
الي انا واكفه يمها فتح جامته ووجه كلامه اليه: حورية البحر شلون تمشي على اليابسة مادري
نزل سلطان وانا يمه كلبي وكف ركضت جريته صعدته بالسيارة بالمدافع وهو يدردم وذاك حرك سيارته
غميت روحي وصعدت اول ماكعدت انفجر بوجهي بركان: متعمده مو توكفين علمود هالشله القذرة تشوفج وتحجي وياج
ضليت صافنة وافرك بيدية ضرب ستيرن السيارة وصاح: يول احجي وياج لا تجنينييي
نترت بي: خير شحجيشكو
سلطان: شتحجين مو؟ احجي سمومج الي ماتهني الواحد لا بطلعة ولا بكشخة
ياسمين: انا بطلت يلا رجعني للبيت
سلطان: خادم جوه ايدج اني !
ماتحملت ونفجرت ودموعي اخذت انهر على وجناتي: هسه انت شنو فرقك عن مطلك وهوسته صياح وعصبية والله شنو لان كلت ليش محد حبني بكدك
وين الاهانة الي بيها او الي متوجهه الك هو عاميتكم تسوون من الحبة كبة
سلطان: بعدج مصرة يعني؟
ياسمين: اي ويلا بلا زحمة استاذ ودكتور سُلطان رجعني للبيت
اخذ نفس وكال بثكل: سهلة مو تدللين!
شغل السيارة وماحس الا داس بانزين وهف بيه بين السيارات ويصيح" هين ياسة
ياسمين: لك اوكف يمه يمه سيارة لك هاي يمنى
وهو يصيح: علمود توبين وتنتهبين لكلامج وياية
وانا مخلية ايدي على صدري واصيح: لا فدوة فدوة يمه يمه يارب يالله يامحمد يارب لا لا
يحجي ويضحك وسياقته سريعة بين السيارات صار كدامنه تقاطع سيارات وانا لزمت عكس ايده: مروتك سُلطان خلاص انا الغلطانه حياتي اريدها اوكف اوكف خفف يدنيا يمعود
خليني اصلي وموتني يالله كلبي كلبي
سلطان: رضا الزوج باهمية الصلاة التردين تصليها قبل لاتموتين
انا خايفه وابجي واصيح: هسه رضايه هم ينراد هو مابي ترميشه فدوة اوكف كافي خلاص احبك واموت بيك يماي عيوني
باوعلي بمكر: كطعي البجي واخفف مو هينه دموعج ها
مسحت دموعي باردان ملابسي : صار والدموع لاجلك انمسحن بس اوكف تعبت والله تعبت
خفف السرعة وانا خليت وجهي على رجلية وبجيت بحركة وهو ماوكف السيارة ، هدوءه ثار اعصابي
ومادفعني الا البجي، شويه ووكفت السيارة كال بكل هدوء: نزلي يروحي مو عذبيتها
نزل من السيارة وفتح الباب الي بأتجاهي رفعت راسي لكيت نفسي على الكورنيش
سلطان: تعالي يا هيام كلبي تعالي يروحي شو هاي الدموع كلها من ورايه الله ياخذني كون
صحت بي: ما ما مانزل يلا هسه رجعني
واضرب بارضية السيارة وابجي وهو يضحك عليه ويحاول ينزلني، نزلت ومشينا بأتجاه الشط
كعدنا على كرسي يتسع النا الاثنين وكال: اسف ياسة بس كلامج موتني مو قصدي
جاوبته وانا مخنوكه: سُلطان رجعني وعوفني ويلا هسه هم ححضرك
ضحك وكال: اها جا من اول عركة حضرتيني
ضربته على راسه وانا احجي: اي اي احضرك ويلا ما وخر بعيد عني شو يلا كدامي
جر وجهي عليه وبكلمة دافية كال: احبج
نزلت راسي رجع رفعه، نترت بي: الي يحبني يفهمني
سلطان: مو بيدي غير اغار عليج جا شسوي انه
ياسمين: يوغار خطية يوغار والله يالله عفيه وخر
سلطان: اها تضحكين عليه يبنت كلبي ؟
ابتسمت وجاوبته: عاد تستاهل ليكون ماعاجبك
سلطان: كلشي عاجبني اهم شي لا تزعلين مني جا انتي تدوسين بيه وترديني ماحرك ساكن انسي الصار تعاي جوعانه؟
باوعتله وجاوبته: انت شلون هيج تفتح وتسد مواضيع؟
سلطان: هاي بعد محد يلحكني
ياسمين: المهم مو قصدي اجرحك وهيج شي بس خانني التعبير
سلطان: لا تهتمين يروحي تعاي نروح ناكل كيك منا
رحنا لمحل صغير كاعد بي رجال كبير بالعمر شيب الايام مغطي ...
اخذنا كيك واكلنا بعفوية وبسرعة لكينا حجية متربعة على قطعة من الكارتون
ومخلية دلة الكهوة والريحة تفوح بكل طيبة باوعلي وكال: ناخذ فنجان كهوة؟
هزيت راسي بمعنى اي ، طلبنا منها فنجانين وكالت بصوت تعبان : جا تاخذونها وترحون ماتردون اقراها؟
جاوبتها وانا اكعد يمها: يا خالة تعرفين تقريها
سلطان كعد بصفي وكلمها: حجية من هسه لا تكليلي هاي الوردة تصير
لغيري تره منا واجيت بالشط ويمج الحساب
ضحكت بروحها البردانه والذبلانه من قسوة الوكت وياها كالت: يا خالة لا تهتم واضح عليكم
لبعضكم بس شني انتم جدد جا خايبة وين لكيتي هذا الحليو واخذتي
ابتسمت على طريقتها وبساطتها جاوبها سلطان: اي يابعد حيلي كليلها وفهميها اكطع واخبل كليلها حجية
ضحكت وجاوبتها: يا خالة اهم شي مضمون داخله
شيفيدني جماله اذا مايفهمني،وغمزتله
سلطان: حجية تدوس بمصاريني وتكول مافهمهه جا هاي عاقلة بله؟
جاوبتنه: يمه هاي حبشكلات لعد يمه من تتزوجون شتسون اذا من هسه منطلقين فلك طركم انا
بعمركم انامن من وكت لا ام القواطي تجي تاخذني تالي الليل
ضحكت وجاوبتها: حجية ام القواطي منو هاي
تقدملي الكهوة وتسولفلي: شربي كهوتج هاي حجايات اهلنا كبل حبوبتي
وسلطان اخده فنجانه اخذت رشفه من فنجاني وطلب الفنجان: اخذي مالتي وانطيني مالتج
تفاجأت من طلبه: ليش ؟
سلطان: شوفي دائرة الفنجان عليها طبعة شفايفج خلاص اكيد صار الها طعم ثاني اخذي مالتي
وانا مبتسمه عليه والحجية تمسد على رجلية وتهمس: يحبج يحبج جا هذا يمه العشك جتال ويخبل الواحد
سلطان: اي حجية ثقي متخبل بيها
وهي تهزله براسها وانا ميته ضحك، كملنا الكهوة سويه وعلمني من اكمل اهزها مرتين معناها
ماريد واحنا نهزها عيوننا تقابلت مع بعضها تقربنا من بعض قاطعته وهمست" احبك
قدمنا الفناجين وخلتهن على الصحن وانتظرنا: فنجان منو اقراه بالاول بيمن ابلش يمه؟
جاوبها سلطان وهو مبتسم: فنجاني حجية بس ها اذا اكو مكسرات ستري عليه
ميلت راسي على كتفه وانا اكله: انا اعلمك بسيطة عندك مكسرات مو ومكايلي
اخذت الفنجان وبدت تقره، وهو سوه حركة الة العود وبدأ يعزف ، يبتسم ويغني روعات عبد الحليم..
جلست والخوف بعينيها
تتأمل الفنجان المقلوب
قالت ياولدي لاتحزن
وهي كملتها عنه بصوت عذب: الحُب عليك هو المكتوب ياولدي
صاح: افيش حجية اموت عليها غير
جاوبته: يمه على عينها ودخلتها بحياتك خير وبركة وكأنه وليد جديد للدنيا
اخذت فنجانه وكتلها: يلا حبابه يلا اقريلي
وباوعت عليه وكتله: ها الخير اليجيك بالنص انا وياك
وهو يطك اصبع ويجاوبني: انا وياج يم شامه
واهزله جتف: انت بسطح وانا بسطح
سلطان: كيفتي لهاي مو
كالت: يمه ثنينكم انت من وراها يجيك رزق وانتي نفس الحالة بس شنو حبكم راح يكبر ويكبر كلش هواي محروسين يمه محروسين
تقربت عليها وبوستهه: فدوة حجية الخير يصيبج وربي يرزقج ويفرحج مثل مافرحتينا
توادعنا وياها هي تدعي واحنا نفرح وكأنه الدعاء مستجاب بنفس الوقت، تمشينا انا وسلطان
واصابعنه حاضنة بعض بكل حب .
سلطان: وين نروح بعد لانرجع هسه خلينا نتمشى!
ماشبع منج تره
جاوبته بفرحه: عمري هيج تدري شنو اصيح بعلو صوتي واغني وافرفش مادري بس كون اطلع من الجامه وهيج اصيح مادري فهمتني لو لا؟
اخذ ايديه وتوجهنا للسيارة: تعال وين ماخذني
سلطان: امشي ومعليج نتوجه على طريق الدولي وهناك فارغ ونتونس ونرجع للبيت
امشي وراه بسرعه وانا اجاوبه: تخبلنا اليوم على الاخير
صعدنا السيارة واحنا ناوين فعلتنا، انطلقنا واول مادخلنا الطريق الدولي، فتحت الراديو وطلعت اغنية فيروز يسهر الليالي فتحت نافذة السيارة
ياسمين: خفف خليني اطلع
خفف سرعته وكال: لا تخافين ماتوكعين الباب مقفولة وقوي ايدج على اليدة ومعليج
طلعت وكعدت على الباب وصحت بعلو صوتي الاغنية انطيها صوت ووولعها للسيارة سُلطان افندي
ماحس الا الاغنية صوتها يصدح بكل مكان والسيارة وذرت بسرعتها وانا اغني وياها
كان عنا طاحون عنبع المي
قدامه ساحات مزروعة في
وجدي كان يطحن للحي
قمح وسهريات
ويبقوا الناس بهالساحات
شي معهن كياس شي عربيات
وشعري يطاير ويا الهوى واكمل الاغنية والضحكة مافاركت شفايفي
آه يا سهر الليالي
آه يا حلو على بالي
نغني آه نغني آه
نغني على الطرقاااااات
وسلطان يدك هورن ويغني وياي ويصيح على الطرقات
مد راسه وصاح بعلو صوته : يااااسة احبجج
وانا اضحك واكمل الاغنية
ياي ياي ياي
يا سهر الليالي
ياي ياي ياي
يا حلو على بالي
نغني آه نغني آه
نغني على الطرقات
وسلطان يضحك ويسوي حركات بالسيارة ويغني: ياي ياي ياي نغني على الطرقاااات
ضحكنا وتونسنا، يوم مايتعوض ابد لابجماله ولا بمشاعره النابعة من كل كلبنا، دخلت السيارة وعلى انغام الاغنية بادرت وحضنت شفايفه بشفايفي
وانفاسنة تختلط مع بعضها، وخرت وصارت سيارة كدامنه رأسا اخذ بريك باوعنه لبعض والخوف مالينا وطكينها ضحكة كأنه اليوم خصوصي للضحك .
احبك جاوبني اموت عليج . رجعنا للبيت تالي الليل متأخرين وطول الطريق واحد يتغزل بالثاني
كأنه ارتوينا من الشاطئ، خمرَ عشقنا ....
وصلنا وتوادعنه بتقبيل بعض: ياسة حبيبتي
جاوبته: عيون ياسة سولف
سلطان: شسولف وانتي سالفتي
حركت اكتافي وبعدت شعري ليوره بحركة خجلانة، جاوبته: اروح فدوة كول حبيبي
سلطان: فدوة، من اراسلج جاوبي بسرعة لا تشغلين بالي وها لا تطلعين باجر حلوة كلش
ياسمين: ليش عيوني تريدني مو حلوة؟
جاوبني وهو يلعب بوجناتي ويعصرهن بيده بهداوة: مو ماتحمل كدام الحلو فرحميني لا اذوب
وغمزلي
ابتسمت وبوسته بالهوى، رحت لباب البيت ودخلت على اصابعي لا احد يحس الكل ساكن بفراشة
فتحت غرفتي ومن دون اي اهمية لا لملابسي ولا لحذائي من تعبي رخيت جسمي ونمت بشكل مريح والابتسامه مرسومة عليه بعد يوم كامل !
وعيت على ثرية تكعدني تريد تسبحني هي سبحة العقد، من الممكن كلشي انسى من الماضي
الا ثرية وطيبة كلبها وشخصيتها وحضورها الحلو! انتظرت يخلص دور ميادة ، كملت ولاكيتهن عن باب الحمام
حضنا بعض كلنا وبعدها دخلت سبحتني ثرية وتسويلي هاليفة فرحانه، وهاليفة فرحانة!
جاوبتها: منو كلج انا ماسبح ام عطوب ...
تونسنا بالسوالف كملت كلشي انا وميادة من تحضير يشمل ملابس وصبغ اضافر لحد ماصار الوكت الي
ابدل واكشخ واظهر معالم انوثتي لحبيبي ومفتاح كلبي . صار العصر وخليت اخر لمسات على فستاني الكلاسيكي المطرز بورد ناعم
وياس اخضر مثل اسمي وروحي! نثرات بسيطة من مساحيق الوجه، عدلت رسمة الحواجب وحمرة
خفيفة على شفايفي وتسريحة شعر مرفوعة للاعلى طالعة اميرة زماني لحبيبي سُلطاني ..
فتحت رسائلنا لكيت هواي باعث مسجات فتحت صورته وخليتها كدام ملامح وجهي
ثرية سألتني شتسوين؟
جاوبتها: ابيض وجهي بأميري .
تقربت عليه تحبي؟
ياسمين: اغلى شي عندي سووولطان
ضحكت وكالت: تتهنين يعمري
بوسنا بعض ووحده من الثانية استمدت الحب! ندكت الباب وطلعت ميادة بفستانها وجمالها
طلعت من الغرفة وهناك صارت كدامي ام سلطان، سلمت عليها وهي تهلهل وتطش عليه جوكليت
. كلما اباوع بعيونها اشوف ذاك الحب اللامع بروح معنوية !
شويه وسمعناهم يقرون ايات الهية، ميادة نطقت بحروف حبها نعم وانت وكيلي، ونهالت عليها دموع
الفرح وحان اللقاء لفترة طويلة من قطار العمر لأوكف وافتح باب جديد لحياة مليئة بعشق حبيبي سُلطان .
بلغني السيد بأن اقبل توكيله، سكتت شويه اخذت نفس ورفعت راسي وبكل فخر وفرحة وخجل جاوبته: نعم وانت وكيلي، راد يحجي وقاطعته بصوت عالي:
وكلتك لتزوجني فلذة كبدي
ورفيق ايامي المقبلة، وانيس لي بليالي الاحاد
وكلتك نعم لذلك الرجل الذي لم تفارق ضحكته احلامي، للرجل الذي ارى بعينيه الضاحكتين جمالي ليالي القدر، فهل هناك ازكى من ذلك؟
اقولها وبملئ الفم نعم وانت وكيلي . ...
امه وثرية يهلهلون علينا فرحانين وانا الخجل اكلني حضنتني ميادة ودموع الفرح تصب علينا
همست: شايفه الخير كله ياوجه الخير .
مرت دقايق ودخل مازن بلغنه راح يدخلون عدلت كعدتي ودخل عليه بزي رسمي رجولي
عطره غزه حواسي الخمسة وبقربة مني تخدرت بأبرة الحُب
قبلة طبعها على جبيني وهي الاولى حلال ..!
مذاقها كأس ماء من الجنة ..!
همس: عروستي كرز طالعة اليوم
جاوبته بصوت ناصي: على عريسها التُكي
ا بكل حنية لبسني الحلقة منحوت عليه من جوه ""حبيبة سلطان"" وانا اعطيته حلقته منحوت عليها "ياسة حبيبتي"
ابتسمنا بوجه بعض وكملنا روتين المجوهرات الباقية ، كعدنا على التخم واحنا مبتسمين على كل شي حلو بينا وبخباثه منه نفخ على ركبتي وهمس " ياسة ، ياسة
طلبت منه يكرر اسمي، سألني بأستغراب ليش؟
جاوبته وانا اوكله كيكة: صيحني بأسمي لحد ما اموت ..
_________________
وحضنتها اشبه بحضن القمر لليل .
بعدتها عني وانا اباوعلها بعيون مليانه شوك، سألتني بأستغراب: منو؟
جاوبتها وانا اشهك" انا اخيتج يثرية اخيتج ملوكة
وكع منها المسواك وصاحت: ملاكك
شبكتني بكل قوة عندها ونتمايل يمنى ويسرى ودموعنا هلهلت هلهولة الفرح
اجاني زياد من وراية: تعالن هنا العالم تباوع علينا
لزمت خدودي وتصيح: شصار بيج ملوكة اخيتي، وترجع تبوسني وتشبكني
ردت احجي قاطعتني وكالت بصوت تعبان:لج ملوكة لاليلي ليل ولا نهاري نهار وين انتي هسه زينه
وتمشي ايدها على راسي وتهمس" جوعانة احجي يبعد روحي
سمعيني صوتج، مشكور مشكور ربي ماقصرت
مسحت دموعي واخذت نفسي وبتعب: زينه اني انتي شنو اخبارج
باوعت لزياد وكالت: شلونك خوية ، ورجعت عليه: شنو تشتغلين يمه؟
ضحكت وجاوبتها: زياد، زوجي
ايدها على حلكها وبتعجب: يمه الدنيا شمسوية بيج متزوجه ،ياسودة عليه
جاوبها زياد: خوية تره ملوكة نظر عيني ليش سوده عليها بالعكس فرح وسعادة وخير عليها
جاوبته: فدوة لكلبك ماوصيك عليها بعد هي ام بيتك، وامانة خليها تجيني
ملاك: ليش انتي وين كاعده تعالي كعدي ويايه بالييت، شتكول زياد
زياد: صدك جذب البيت بيتها، اهلج اهلي ملوكة
مسحت دموعها وكالت: متقصرين حبيبتي انا
كاعده ويا ميادة وياسمين البنات. مادري جوز ماتعرفيهن
ملاك: زين عندج صفحة او موقع اتواصل بي وياج
طلعت موبايلها من جنطتها وبدت تردلي رقمها
تكول صفر وانا اصابعي ترجف من تكتبه، بعد لقاء جان محله بشوك الاخوة .
وصلناها للبيت وزياد ضايج لكن ضغط على روحه وابتسم كدامها واول مانزلت تحركنا بالسيارة وانفجر بوجهي: طلعة ماكو بعد و نفسج ماسمعة وتنزرعين ببيتج وتسكتين
صحت بي: مو من حقك تتصرف ويايه هيج وهو شنو صاير ها والله لان لزم ايدي وانجرحت مشاعرك
صاح بيه، زياد: لا تجاوبيني يالغضب لا تجاوبيني هو منو طلع السان الج غير الدلال والسفر وهاي السوالف
ملاك: بله يادلال وانت مكضيها عركة وصياح
زياد: ها هسه صرت اصيح وطلعتيني من ماعونها ؟
ملاك: حقك تضوج هو منو يفرح من يسمع الحقيقة
دخلنا فرعنا وضغط بريك، تقدم راسي للمقدمة
بسرعة وصاح بعصبية: من اكول شي منا ورايح تكولين اي وبس لا تجادلين ولا تحجين ولا تكولين
ردت احجي، لزم شعري وصاح اعلى; يادين الكائنات
لاتحجين لاتراددين
وانا افتح شعري من قبضة ايده: اي اي خلاص بس عوفني دتوجعني
يلف بشعري بقوه ويقربني اله، كأنه تغير عليه تغيير تام وبحرارة وبحدة كال: تكليلي حاضر وبس
هدني بقوة وضرب الستيرن وصرخ بيه: شتكولينن
جاوبته من بين الخوف والدموع: حاضر حاضر بس اهده
زياد: لاتحجين لاتكولين شي سكتي سكتي خبلتيني لج تعرفين شني احبج
وانتي تحاولين تطغين عليه بهاي تصرفاتج وملابسج وضحكتج وشعرج ليشششش
رجع لزمني وصرخ بأذني: ليشش تسوين هيج
ملاك: التوبه بس هدني حباب
زياد: نوصل للبيت بسيطة سهلة سهلة
قاد السيارة بجنون لحد مادخلنا البيت، انا ابلع بريكي وامسح بدموعي اول مره اشوف زياد بهذا الوجه .
ضليت الوم بروحي على عنادي وكلامي، سد باب الكراج واجه عليه بكل حيل، فتح السيارة ونزلني، دفعني داخل الهول وكال بحدية: شايفه هذا الباب لو لا؟
بخوف جاوبته: اي اي
رعد بوجهي: منعا باتا اشوفج طالعة وقسما ان كلتي طلعني فبساعتها اقري الفاتحة على روحج، الى ان تتأدبين وتعرفين تحشمين نفسج
جاوبته بعصبية على خوف: تره هو لزمني
بعدني مامكملة كلامي، واخذ مزهرية الورد وكسرها بالحايط وانا شردت لغرفتي بركضة سريعة وقفلتها عليه، يدك ويصيح
" فتحيها لا و حك نجم الليل اكسره عليج
وانا من وره الباب بعناد قوي" افتحها علمود تتطاول وتضربني
انا كلت وهيج لو جنيت على روحي ، بدفعة قوية منه انفتحت الباب واعلن عصبيته من خلال نظراته
وانفاسة الحارة، تقرب عليه وانا وضعت ايدي امام وجهي وبنبرة انوثة كتله: لاتضربني حباب
جر ايدي بقوة وبايدة الثانية عصر وجناتي واخذ شفايفي بكل مشاغبة
قطع نفسي وانا اضرب بي يوخر عني ماكو، رجعت راسي بقوة للخلف اخذت نسمة هوى وهو يتنفس بركبتي بكل حرارة
ملاك: اتركني روح امشي، همس بمعنى اسكت ، سحبني لسرير الغرفة
وبسنونه على ركبتي طبع اسمه ..
وانا بحمرتي خطيت ملوكة على وجناته
نفسي يتسارع ويا حركاته لحد ما تبادلنا العوالم مثل اصابع تطرق اوتار العود بقوة . ..
_________________
أكل التفاحة وقلبي تألم
صديقتنا ماري كانت تتقرب منكَ وانت تأكل التفاح لم اسمع مادار بينكم لكن حين طلبت
ُ منكَ الحديث عن ذلك، اجبتني بعدم اللامبالاة بلغة الاطفال .
في ربيع الاعوام الماضية جاء صديق لي وطلب محاظرة للدكتور هاني، رفعت رأسي ورأيتك
بجانبه والدهشة تعلو وجهك، سألتني بثقل عن هاني، اجبتك بلغتك اللامبالاة
بسرعة البرق حملتني على اكتافك وامام الجميع ركضت فيَّ كما يفعل الصبي عندما يدخل بستان ما يقطف ثمرة ويهرب ...
صرختُ حينها النجدة ، لكن لاجدوى بذلك
ركضتُ حتى وصلنا الشاطئ و جعلنا من حبنا جنبهُ صنبور ماءً يروي العطشى ....
ماذا افعل حتى تأتي من تلك الاخرة وتأخذني اليك َ ونروي العالم ماء افواهنا من اعالي الغيوم ..
احبك، ليلى .
_________________
يتبع ...
النشر يعتمد على التصويت
للمتابعة في الانستكرام: tahsin_luqman
تويتر: thaseenluqman
التقيكم بألف خير في بارت جديد، مودتي .