بنات حجي عمران الفصول الاربعة

البارت الرابع

#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الرابع

وطبعاً أخسر
نيتي بيضه
وما تعرف اويه الصخام تذب جرش

رائد ابو فتيان

سمر :
جنت محتاجة اقلام جاف فرحت لمكتب اول ما دخلت الباب صار بوجهي ولد طالع و انزكعنا وجه بوجه و كان بيدة كلاص جاي انگلب علية حيل اتعصبت

سمر : لخاطر الله انت اثول ما تشوف

الضابط رسلان : لج احترمي نفسج منو اثول اني جاي بسرعة لو انتي جنج ثور هايج

سمر : والله ماكو غيرك ثور هايج احترم من تحجي وياي لا امسح الشارع بيك ذهاباً و اياباً

الضابط رسلان : هلا يابة باع منو تمسح بية الشارع لج اني الضابط رسلان على سن و رمح

سمر : ايباااااخ الضابط رسلان لعد اني سمر بنت حجي عمران دولةةةة و علممم

لبنى : يمعودين كولو يا الله ما صار شي

سمر : راح الضابط بدون ما يحجي شي بس حيل استفزني عطت وراه كلتلة ع الاقل اعتذر لو ما تعرف .. باوعلي و لبس نظاراتة و راح

قمر : كافي شموسة تعاي طبي اخذي الي محتاجتة حتى نرجع

سمر : ناس لا حياء و لا خجل ... دخلت للمكتبة اخذت كم شغلة محتاجتهن و طلعنا شربنة عصير و كعدنا سولفنا شوية بعدين كلمن رجعت لبيتهة

نور : رجعن عايدة و سمر و شوفنة ملابسهن كلش حلوات و عايدة سولفت عركة سمر و الولد كلش احب سمر لمن تفتخر بنسبها دائما من تتعارك تصيح اني بنت حجي عمران

كمت من يم البنات اتصلت على انهار مغلق استغربت ليش موبايلها مغلق مو من عوايدها هي دائما ملتهية بالموبايل حتى تخلص من مشاكل اهلها

فكرت عادي يكون مغلق ابداً ما خطر ابالي الي صاير وياها ... شوية و اندكت الباب راحت سحر فتحتها دخل جعفر ابن عمو حازم هوا و ورود و جوري

سمر : كاعدات اني و سحر و عايدة اندكت الباب فتحتها سحر و اجو اولاد عمي حازم كلش احب و احترم جعفر لانه ولد محترم و مثقف و شاغول كان بوقتهة جعفر سنة اولى كلية عسكرية من دخلو كمت وكفت صحت

سمر : هلا بسور الوطن

جعفر : هههه هلا بيج اشلونج

سمر : جنت زينة من شفتك صرت مو زينة

جعفر : ضحك و كال طاح حظج

نور : شبيكم شو وجوهكم ما تبشر بخير

جعفر : ابوي خابرني كالي اجيب البنات و اجيكم لان اليوم ما يرجعون لان شيخ ريسان مات

سحر : كلش انقهرت من سمعت شيخ ريسان مات حتى كعدت ابجي فوراً رحت توضيت قريتلة سورة ياسين ما شايفتة ابد لكن من عمي حازم حجالي اشلون ضل موافي لحبيبتة متت قهر عليه

فردوس : مرحبا اني فردوس اخت حجي عمران ارملة و عايشة ويا بيت اخوية عمران ما عندي اولاد لكن بنات عمران و بنات حازم عوضني عن كلشي و صارن الية بنات و عزوة و سند

بيوم الي رحنة لبيت شيخ ريسان جان كلش تعبان كعدنا بالصالة اني و اخواني و نسوانهم و شيخ ريسان و اخوات الشيخ اثنين شكرية و صبرية

ضلينا كاعدين شوية نسئل عن اخبارهم و احوالهم شوية و حجة الشيخ بس جان بالكوة يحجي و صوتة تعبان

شيخ ريسان : بوية عمران أمانة الله العشيرة ضلت بركبتك و اني اعرفنك شهم و ابن حمولة و كدها لا تكسر بخت العشيرة احلفنك بالله من بعدي انت للعشيرة

حجي عمران : شيخنا و تاج راسنة ان شاء الله ترجع لحيلك لا تكول هيج

شيخ ريسان : الب البارحة اجتني منتهى و كلتلي حان وقت اللقاء كلتلها ما اموت گبل ما اودع العشيرة عد عمران

فردوس : من الشيخ ذكر اسم منتهى نزلت دموعة و حتى اخوات الشيخ ضلن يبجن

حجي عمران : كول يا الله شيخ و حتى تطمأن هاهية اني للعشيرة و ان شاء الله اكون عند حسن ظنك

شيخ ريسان : خوية صبرية طيني القرآن اخله بيدي عبن گربت ساعتي ...

كامت صبرية و هي تبجي و تنحب شالت القرآن باستة و انطتة للشيخ

الشيخ كمش القرآن و ردد الاية الكريمة

شيخ ريسان : ((كُلُّ مَنْ عَلَيْهَا فَانٍ  وَيَبْقَى وَجْهُ رَبِّكَ ذُو الْجَلالِ وَالإكْرَامِ  فَبِأَيِّ آلاءِ رَبِّكُمَا تُكَذِّبَانِ)) رددها 3 مرات

شكرية : سودة علية يخوية عسى الموت و المرض لعدوينك

شيخ ريسان : هاهية يخوية خلنة نموت حوينة ذنوب واجد

حجية لبابة : كول يا الله يا شيخ و ان شاء الله ترد لحيلك و لناسك

شيخ ريسان : اشهد ... اشهد ان لا اله ألا الله و اشهد .... و اشهد ان محمد نبي الله و اشهد

فردوس : الشيخ ما كدر يكمل التشهد و فوراً انعوج راسة و مات ركضو صبري و حازم و عمران و اخواتة ضلن يتصارخن فوراً طلعت شكرية ركض للشارع نزعت شيلتها و ملشت شعرهة و خرطت الخدود

شكرية : ياااا اهل السللللف طاح السلف كلةةةةةةة يا اهل السلف راح البخت كلةةة يا اهل السلف تبدت ادلال الشيووووخ يا اهل العكل طاحت عكلكم يا اهل العكل ذبو العكل راح ريساااااااااااااااان

فردوس : ضج السلف كلة بموتت الشيخ و عبالك جانو متحظرين و الناس التمت كلها للشارع و اجو اولاد عم الشيخ و اقاربهم و اشالو الشيخ لداره الاخير الابدي اخذو يغسلونة حتى يندفن

دخلت شكرية تصرخ و تردد الگولات و تهوس و تصرخ و تلطم كابلنهة حجية لبابة و نسوان حازم و صبري و عمران و صبرية و نسوان من السلف دخلن يلطمن و الصريخ هز البيت هز

شكرية : وسبع أدول على ريسااااان مجدرين ..

حطوو بالنجف دلال .. طب راعي العزوبية

صبرية :
اجاويد العشاير كلفه من تجفون
وفجه اصير عدنه والله من ترحون
وعليكم يارجال الزود ظل كل السلف محزون

(هاه هاه هاه اسباع بيوم اللازم عازتكم عازه

فردوس : ضلن يرددن بالكولات و الاهازيج و لطمهن و الصريخ و دخلن مجموعة عجايز بيهن فوك الثلاثين مرة و كلهن يصرخ بعلو صوتهن و يدبجن بعمري و حياتي ما شفت هيج فاتحة

باقل من ساعة فوك 100 مرة و كل الي تدخل بالصريخ و الهوسات و يتلكنهة الكاعدات للمغرب جابو تابوت الشيخ و هي بدات النسوان ادبج و تصرخ و اخوات الشيخ موتن نفسهن بحيث الما يبجي ع الشيخ يبجي على شكرية و صبرية

شكرية ذبت نفسهة ع التابوت و تصيح خااااب يخوية جا من رحت ياهو البكالي ياهو الي انةةةةة

شكرية : جبح طير اليطير بغير جنحان
وجبح زلمة اليهد بغير خوان
بس الباع بالميزان ربحان

فردوس : للفجر اخذو التابوت و راحن وياهم من النسوان حجية لبابة و صبرية و شكرية و كم مرا من اقاربهم العجايز و راحو عمران و زلم من السلف

حازم : بعد موتت شيخ ريسان ضلينا 3 ايام الفاتحة و جادر واحد ما كفى للجايين نصبو 5 جوادر و كل جادر حييييل جبير و يا دوبهن مكفيات للجايين و كل الي يجي يهوس للشيخ ريسان لانه جان شيخ و النعم منه و من اصله

باليوم الثالث و من عاداتنة لازم يسلمون العشيرة للشيخ الي بعد شيخ ريسان و جان لازم يسلمونهة لعمران عدنا زلمة هوا جبيرة بالعمر كام هوا جاب عكال و عباية شيخ ريسان و راد يلبسهن لعمران ما سمعنة بس الرمي و الصياح من باوعنة جان جاسم و بيدة سلاح

جاسم : وحگ محمد لونهة العشيرة صارت لعمران الا اهدر دمة اليوم و هذا سلاحي ما ارجعه الا و اني مفرغ الشاجور براس عمران

عمران : بطل رعونيتك يا جاسم العشيرة ما تصير الك عبنك مو خوش زلمة شنهي تريد الحكم بالإجبار ولك انة عمرااااان ما اخاف من حشرا مثلك

جاسم : اليوم اخلي الدم للرچاب

صبري : لك جاسم خاف عبالك احنة ساكتين و خايفين منك لا ترى لو اطخ بروسنة نعلگ روسكم اباب بيتكم

حازم : جاسم تكفى الشر و روح منا لا تخليها تصير مو حلوة وياك

رجال من العشيرة : بوية اتهدو بالله و خلونة بفاتحة الشيخ ريسان و العشيرة و المشيخة نخليها لغير وكت زحمة السالفة تكبر احترمو الشيخ ريسان

عمران : هاهية حجي هاهية ما عندي شي اني والله شاهد حتى المشيخة ما رايدهة بس هي بعد وصية شيخ ريسان

الرجال : يلة بوية جاسم روح منا كفى بلاك

حازم : راح جاسم و الزلم رجعو للجادر و عمران طلب منهم يوكفون سالفة المشيخة لورة الفاتحة يحددون يوم و نكعد بي

سحر : جنت كاعدة اتراسل ويا ذو الفقار و عايدة دا تسبح و نور و سمر طلعن للسوك و بنات عمو حازم كاعدات يمي

ذو الفقار : مشتاقلج حيل

سحر : و اني هم والله

ذو الفقار : سحر يروحي خلي نقرب موعد الزواج و الله ما عاد اتحمل

سحر : حبيبي خليها ورة الامتحانات النهائية بالعطلة و نتزوج

ذو الفقار : اوووف ربي اشكد بعدلها الامتحانات بلة ؟

سحر : اربع او خمس اشهر و نمتحن و هاهية

ذو الفقار : كولي سنة و فضيهة

سحر : ههههه لا حبيبي والله ما تحس بيهن و خلي هل فترة نجهز على راحتنة نشغل نفسنة لحد العرس

ذو الفقار : اوووووف سحر اشكد احبج و العباس اموت عليج و اتمنى كون اسعدج بكل حياتج اخلي العالم كلة يحجي بيج

سحر : و اني اموت عليك يكفي انت وياي و هيج اكون اني اسعد وحدة بالعالم والله

ذو الفقار : الله يحفظج الية يلة حبي اجاني خطار بعدين اراسلج

سحر : الله وياك... طفيت الموبايل و كمت كعدت يم ورود و جوري هههه و ورود گالبة خلقتهة لان عقدها اتأجل للخميس

ورود : حظي ما لكة الا هسة يموت

سحر : ههههه لعد هوا بكيفة غير الله اختارلة هسة يموت

ورود : حظي هههه

سحر : المهم خوما عندج نقص بالتجهيزات حتى نطلع اني وياج نجيبهن

ورود : لا ما عندي نقص حتى صديقتي كالت تجي للبيت تمكيجني عدها صالون

سحر : والله و كبرتي و راح تتزوجين

ورود : هههه و انتي و ذو الفقار اشوكت عرسكم

سحر : حددناه ورة الامتحانات احسن بالعطلة

جوري : الله يتمم على خير بس شو جنج ضايجة شبيج

سحر : جريت حسرة و كلت ما ادري بنات راح اتوفق بهل زواج لو شنو مصيري

ورود : كولي يا الله ترى عمتي تحبج و الفقار يحبج و ان شاء الله ربي يسعدكم بحق علي الكرار

سحر : فدوة لعيونج حبيبة و ربي يسعدكم انتي و المكرود الاتأجل زواجة ههههه

ورود : ااااخ خية لا تذكريني

سمر : طلعنا اني و نور و جعفر للسوك جبنة مسواك و جبنة عشا من برة و رجعنة دا نتمشى ابداية الشارع و انتبهت اكو بنية شابة لابسة عباية و مبينة تعبانة حيل و تتلفت عبالك ضايعة
من شافتنة اجت تقربت علينا

رحمة : السلام عليكم

الكل : و عليكم السلام

رحمة : وين بيت حجي عمران بيت النداف كالو بهذا الشارع

نور : هلا بيج حبيبة وصلتي احنة بنات حجي عمران و هل ولد ابن اخو عمران

رحمة : انتي سحر

نور : لا حبيبة اني نور و هاي سمر و سحر موجودة بالبيت حياج نفظلي

رحمة : لا لا بس اريد احجي ويا حجي عمران

سمر : والله حجي عمران بالبصرة بس كولي أمر خدمة شتردين

رحمة : لا لا ارجع غير وكت بس هوا اشوكت يرجع من البصرة

نور : ما اعرف والله لان عدهم فاتحة بالبصرة و يتأخرون

رحمة : اذا رجعت بعد 3 ايام الكاه لو لا

نور : اي اي اكيد تلكينة هلا بيج بكل وقت

رحمة : مشكورات اخواتي يلة اني اترخص

نور : هلا و مرحبا بيج الله وياج

سمر : راحت البنية و حيل استغربت من عدها لان كلامها حيل غريب و ترجف و خايفة و متوترة الظاهر وراهة سالفة جبيرة

رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥

______________________________
توقعاتكم منو رحمة احب توقعاتكم الاكشن ؟
_____________________________

احبكم

اتمنى ما تنسون النجمة و التعليقات و بتفاعلكم الحلو تصعد القصة ♥️🙏

تحياتي

#للكاتب _ محمد_ ابو جود

للتواصل انستا author_abu_joud

اريد رأيكم بالقصة و بالسرد بس بصراحة ؟