الابواب الخمس

البارت الثامن عشر

#الابواب_الخمس
البارت الثامن عشر /الجزء الثاني
للكاتبة Reem

(بارت طويل لعيونكم )

الماتنام  اعيونه مو معناهه حاب
           ايجوز عنده من الوكت لجمة گلب
هي مو كل دمعه توگع يعني شوگ
               مره تبجي العين من وحشت درب

عمشه : شنهي ياخير من عبيد صايره دهن ودبس ويااه شجرالج انتي ماتصفين هيج اله وراج بليه سوده
خوله : يمه حضري نفسج رايحين لبغداد باجر نخطب لعبيد
عمشه : من دهر الطك رويحتج ياخطبه لج خوله شعملتي
خوله : لتوكعين لزمتها تريد تكوم من حضني وترجف يمه اوكفي على كيفج
عمشه : چا علگتيها يخوله وراح اطيح على روسنا
خوله : اوكفي كعدتها عدل كدامي دفعت ايدي وتعيط
عمشه : سولفيلي انه هذا الوكت گله گلبي يعلب منچ اكولن شجابها على عبيد وهي تشوف دم سنونها وما تشوفه وجاي هسه تعرسيله خايبه تسودنتي وعلي

خوله : يمه رحمه لابويه لتعيطين وافتهمي مني واحكمي اني صار جم سنه افكر واكول شون اخذ حقنا من صالحه
عمشه : چا هسه خذيتي يملطومه ماتعرفين زيتي النار بانزين مو وليتي وهجيتي شرجعج لو تردين اطيحن على راسي وراس المكاريد
خوله : ليش هيه ماطاحت يايمه بس كوليلي شنو الماسوته صالحه شو انتي وكسرتج ولتكولين وكعت بلحمام اعرف وكعتي بس البنات كالو جان اكو زيت بلكاع وهاي تاليها سنه كامله الحاجتين جواج وحال الضيم حالج كسرتج بصحتج وماكفاها هذا الشى رجعت على اليتامه ماخافت الله بيهم طفله وزوجتها وشمرتها ويه واحد چلب ربه دينه الفلس وصلها للموت من وره الفلوس لو ناي الي تزوجت غصب ابن خالها صحيح مهدي زين وياها بس تبقى مكسوره وذليله عوفج منج ومن البنات يونس يايمه يونس الوكع بيها عبالج جاسم هيج اجه من وحده وصار بدرب يونس اكص ايدي واذبهن للجلاب اذا مو نسوان ابنج البرابيك دازاته عليه

عمشه : وذاك جويسم كلاه الدود ومات
خوله : عكبيش بعد مادخل السجن وضاعن سنتين من عمره وبقت طمغه بعمره جان مسجون لو من طرده عبيد وصالحه انتي تدرين يونس خلص كل هاي السنين بلشارع ياكل وينام ويشتغل شاف بلاوي سوده من وره صالحه هي واختها نايمات ومرتاحات وهو يدك عليه الشمس بلصيف والبرد بلشتا عدا الوادم الجانت تتعرض اله ويوميه يضربوه لو يتعاركون وياه عدا السكاره والموخوش اوادم وقلت الحيله  هذا يونس تكولين اعز من ولدي اجت ايام ينام مكتول وما ماكل وطعم حلكه بس الدم تردين وره كل هذا اعوف صالحه لا والخلقني اله اهجم بيتها

عمشه : يايمه تعرفين بسوالفهن چا انه اعلمج على دروبهن عبالج صويلحه لون عرفت الج ايد بعرس عبيد تجوز مني خايبه تاكلج نيه ماتبقي عظمه صاحيه بيج نسيتي يخوله سوايتها يوم ماسودنتج بسحورتها وهجيتي بلشوارع ونكض بيج ماتنكضين چا منهي خلاج ماتعرفين رويحتج وتكطعين بلحمج

خوله : هو لان سوت هذا الشى اجه وكت اطيح حظها وارد سواياتها كلها ضليت اربع سنين طول مااني بعيده عنكم افكر لا اني اكدر أذي عبيد وصالحه واسمهم واخلص منهم ولا اكو شغله تكسرهم يوم بعد يوم يتفرعنون حارو شيسون جنت ماانام الليل من اسمع شيصير بيكم واني مربطه هناك
ومالكيت غير هذا الحل ماتنكسر المره لو شكد متكون قويه اله بمره مثلها خلصت صالحه عمرها تسوي اشكال السحوره حتى عبيد يصير طلي بيدها وحتى البيت يصفى الها خلي اسحبه من ايدها واضيع تعبها

عمشه : وبت الوادم شنهي ذنبها چا انتي تجسرين صالحه وتحملين نفسج ذنب البت الخذاها عبيد لله شتكولين وتعالي گليلي هذا البعير ابو راس معنجر شقنعه
خوله : لا عبالج تعبت وكعدت اقنع اني جنت اذب الحجايه واكوم تره عبيد رجال حاله حال كل الرياجيل عيونهم مايمليها بس التراب وهو تربات سوك واشكال النسوان يشوف يوميه واني انتبهت عليه يبصبص للرايحه والجايه يعني جان رايد بزه صغيره ويهجم

عمشه : والبت شنهي ذنبها
خوله : ليش التقبل بواحد مثل عبيد متزوج ولده بطوله تكون بت بيت وصغيره وتعبانه على نفسها من كل عقلج يمه على شنو تاخذه
اكيد وحده يعرفها ومثل صنفه وخشت جوه اباطه
عمشه : منين يعرفها

خوله : لعد بشهر واحد يصيح تعالو خطبولي تقنعيها شنو اشتراها من البسطيات مال السوك اكيد يعرفها من زمان بس شون يروح يخطب بدون اهله ومنو ياخذ  جوحي وحده ميكفي كدامهم اني حسسته اكثر من مره بأن راضين يتزوج وبنفسنا نروح وياه اكيد كيف وحسبها صح وحتى يرتاح گلبج اني الزمها البنيه واحجي وياها وافهمها كلشي اذا رضت كان بيها مارضت نشوفله غيرها

عمشه : جوزي منه ومن هاي الطلابه كلاتها لاتمسچ نارها وانه ماعودت جازت منج
خوله : ولا اجوز وعيونج اني هسه فرحانه اكثر من عبيد
عمشه : چا انت تاخذين حگج من صالحه وعبيد موش اذاج واذه الوليدات هاي انتي تريحي وتعرسيله

خوله : صحيح عبيد راح يرتاح بس بلمقابل صالحه مراح تعوفه بحاله واذا عافته وعاش عيشه زينه ربج موجود يمه هو كادر ياخذ حقنا منه موشرط البني ادم الموزين يتعاقب بلدنيا اكو هواي ناس ذره رحمه ماكو بگلبهم وأذو وجرمو وماتعاقبو بلدنيا بلعكس عاشو احسن عيشه وماتو مرتاحين بس اكيد بالاخره ربج يشويهم شوي اذا ضاع حق بلدنيا يم الله مايضيع

عمشه : ونعم بالله زين عليش هاي الهوسه كلها اطردهم من البيت وانرد بيه واعيفهم بلشوارع يتهجولون وهيج خذيتي حكج وحكنا وانتي كضي رويحتج وعيفي اخوتج لاتكربين صوبهم انه جدامهم انه طردتهم ومايصيبج شى
خوله : لا بالله هاي شبيج عموشه تره من تطرديهم مراح يضلون بلشوارع ابنج الكحف عنده فلوس واكيد هاي السنين كلها يجمع حتى يشتري عبالج يكعد ويسكت لو صالحه تشوف عند اختها بيت وماتصير مثلها تلكين الدوده ماكلتها وخاصه وره ماضاع البيت من وره سالفه سما ميه بلميه رجع يجمع ويلم ويشتغل حتى بلحرام في سبيل يصير عنده فلوس اطرديهم منا تطلع الملايين منا ويشتري بيت وبهيج بنات غنيه وحدتهن متسوه نعال كعدن ببيوت وترقن ويونس والبنات وانتي متهجولات ماسوينا شى بلعكس خدمنا صالحه خدمة العمر لا اطردين ولا تسوين شى عوفيها يمي  اله افلسها من رجلها ومن البيت خلي تصبرلي ماضليت هاي السنين كلها افكر واطحن واكل بروحي حتى بالاخير احط ايدي على خدي

عمشه : افكارج كلها طلايب مايوم حطيتي راسج الكوي هذا ماهجمتيها على روسنا اااااخ منج وتعض بأصابيعها
خوله : هههههه لتخافين هلمره طلايب على راس بت اختج
عمشه : من كرطه تاكل هذا الخشم فوكاها تكركر من الضحك
خوله : مو بس اضحك واهلهل هم كلللللووووووش

بديعه : سمعت صوت هلاهل طبيت اركض هاااا خيركم  منو راح يعرس
خوله : ابو العبد اخويه هلهلي خيه مااعرف اهلهل زين
بديعه : عزه عبيد راح يتزوج
خوله : وليش عزه هاي فرحه العمر هلهل لا اكوم اكسر عوده الماسحه على راسج
بديعه : لج اوكفي خلي استوعب يابه وروح امي لو كايله فلاح راح يتزوج عليه ماانصدم هيج
عمشه : عيفهه على خوله يجوز تزوج حتى رجلج هاي ثور شايش وهدوه ضاله تناطح بلوادم لكم كضوها هاي البت جاي تحرك الاخضر واليابس
خوله : وحركتهم هلهلي بدعدع

بان : منو الراح يعرس
خوله : عمج الشفيه
بان : على عمه صالحه
خوله : اي راح يكسر خشمها
بان : اني اهلهل كلللووش
خوله : من فدوة لحلكج هاااج هاي ترباتي ادك عيني دك اريد اليوم اردح كامت بان ادك وتهلهل وخوله تصفك وتكول
جبنالك برنو ماملعوب بسركيها
اكلجن خاف ملعوب بسركيها ماسألت يله عادي المهم يتزوج اخويه العود على كولت الخلايجه

بديعه : انتي وراها موو
خوله : مع خوله مش حتقدر تغمض عنيك
بان : هله بعمتي هله اني بس اريد اشوف شگل صالحه من تعرف يمكن تنجلط
خوله : دير بالكم تعرف هسه
بديعه : اكيد راح تعرف
خوله : لا مو هسه
بديعه : بعد ميتزوج
خوله : ولا بعد ميتزوج خلي اشوف العروس واشوف مايها شنو ومن يا ذبه وراها اني احدد شوكت تعرف صالحه
بديعه : الله يستر راح تعلكها علك علينا
خوله : واحنا شكوو قابل رجلها كزه ويلعب صگله بلشارع واخذناه من ايده وزوجناه رجال شكبره شكده راد يتزوج حقه والشرع محلل اربعه قابل نمنع ماحرم الله
بديعه : لا يابوي احنا وجهه هيج شغلات
خوله : شفتي احنا ناس نخاف الله ونمشي بتعاليمه ومابيدنا غير نهلهل ونطش جكليت ونرجع وهمه اهل بيت عيب ندخل شتكولين عموشه

عمشه : عيوني تسوربت خايبه ميلي مني حتى عضاي تراجف
خوله : هههههه كبرتي يايمه وكمتي تخافين
عمشه : انه مااخاف على رويحتي انه ورجلي والگبر انه گل حيلي مهدود على الوليدات اخافن يطيحون بيدها
خوله : مو هيه خطيه مقصره ام مهند متسكتين رحمه لابويه يله ولجن دكن وركصن وياي

شرهب : كاعده اتعلم الطبخ ولجعت المركه ويايه واكفه ومااعرف شسوي اباوع البتيته لازكه
ام عدي هااا يمه بشري
شرهب : شبشر لجعت لجعه الكافرين بمعركة بدر مالزكو هيج
ام عدي : يااا اني مو كتلج عينج عليها وبس شوي تثخن نصيها
شرهب : جنت واكفه بس ذوله ولد بتج خبلوني عياطها يدك براسي واحد لازم شعر الثاني طلعت كتلتهم اثنينهم وطبيت
ام عدي : وتاليها ضلينه بليه غدا يله فدوة الج طلعينا باذنجان نسوي تشريب ماطول اكو وكت قبل رجعت عمج ورجلج
شرهب : علميني عليه
ام عدي : حتى تلجعي مو ضاله اذب نعمه الله بلزبل من وراج
شرهب : غير شوي شوي ياعمه
ام عدي : بعمرج اني اخبز واطبخ وذاك التركيب اسوي حتى مال عزايم كل جدر اتختلين بيه من كبره اوكل كل ٢٠ زلمه سوه وانتي جدر مابيه ماعونين ماتسيطرين عليه

شرهب : راح تعيرني شو اله اتعلم واطبخ احسن منج واخلي عمي يكول مااكول اله من ايد جنتي
ام عدي : ورجلج
شرهب : بصوت ناصي عساه لا اكل ياكل سم
ام عدي : شنو
شرهب : لا هيج عمه احجي ويه نفسي شخطت لاتركزين وياي
ام عدي : يله تعال اشوفج شون اسوي التشريب

كملنا الاكل واجه عمي انقهر عليه من اشوفه محني الظهر ويدفع بلعربانه طلعت اساعده وادخل صناديك الخضره والمسواك
ابو عدي : الله يرضى عليج بنيتي
شرهب : الله يساعدك عموو يله ادخل غسل واني شون مسويه تشريب الك مال بيذنجان يخبل
ابو عدي : انتي طبختي
شرهب : اي ويخبل طلع
ام عدي : جذابه اني طبخته
شرهب : مو جنت واكفه بصفج ويكولون الاكل نفسيه واني حطيت نفسي بالاكل وطلع يخبل هم كولي جذابه

ابو عدي : اذا هيج حقها لعد هيه سوته ام عدي
ام عدي : نسيتي مركة البتيته
شرهب : قابل حاركة قوزي ياعمه هي جم بتيته لزكن والله يرحمهن
ام عدي : يمه من لسانج يله امشي نصب ام لسان
شرهب : كعدنا ناكل ونسولف وعمي يحجي سوالف السوك والصاير اندكت الباب كمت
باوعت شفته يونس طلعت اركض
حماتك تحبك صابين الاكل تعاال
يونس : شبعان والله اجيت اكلج باجر عمتي وبيبي يجون اخاف تردين تشوفيهم
شرهب : بيبي بيها شى
يونس : لا بس عمتج خابرتني ولازم اجيبهم باجر لهنا لان جاين يخطبون لعبيد

شرهب : شنوووووووو ياعبيد عمك
يونس : جم عبيد اكو
شرهب : راح يتزوج وصالحه ماتت
يونس : عمه تكول لتحجون لاحد وخاصه انتي لسانج متبري منج
شرهب : يونس اكرصني عضني ادفرني برجلك ممصدكه عبيد طلع رجال وراح يتزوج على صلوحه يابه ماافوت هيج حدث تاريخي اجي وياهم
يونس : وين تجين هو عمه كالت تعال واني مقبلت اروح
شرهب : اذا متاخذوني هسه ابدل واروح لصالحه واخرب كلشي
يونس : هو مو صوجج صوجي اني كتلج

شرهب : خابر عمتي يله كدامي
يونس : روحي غسلي ايدج كلها اكل جنتي تسبحين بالاكل حتى خدج بيه
شرهب : تعال طب بين مااغسل طبيت ركض
يونس : شونك عمي شونج حجيه
ابو عدي : هله بويه مد ايدك ويانه
يونس : بلعافيه شبعان
ام عدي : مبين مامشتاق لاكلي يله ابني تعال تونا بدينا
يونس : وعيونج حجيه شبعان الف عافيه
شرهب : يله غسلت خابر
دك على عمه اخذت التلفون وطبيت للمطبخ
خوله : هااا حبيبي
شرهب : شوفي عمه وداعتج وداعتج اذا متاخذيني باجر وياج اخرب كلشي
خوله : هااا ولج هاي شرهب شتردين
شرهب : تاخذوني وياكم
خوله : واذا سويتي شى
شرهب : وشرف صالحه مااسوي اريد اشوف عمي من يشوفني ادري بسالفه خطوبته وحاضره واكعد كدامه وهو يخاف مني لا احجي اووويلي يرادلها بخت
خوله : اكعدي وسكتي
شرهب : هيج تكسرين بخاطري زعلت

خوله : اني زايده مني كلت ليونس يبلغج ردت من تجي امي تشوفج هي كالت مشتاقه لشربت موتتنه بيج ياشربت وياشربت خلصتي عمرج شربت شوكت تگلبين ببسي ماادري
شرهب : احرك بيبي عليج والله اذا متاخذوني
خوله : تجين وحسج مااسمعه
شرهب : وداعتج اعقل مني ماكو بس اصفن بوجهي عمي الغالي لعد هو يحضر خطوبتي واني مااحظر حتى عيب
خوله : ام الواجب انتي
شرهب : كلش خلي احظر نفسي لباجر تجون بلسلامه ولتنسين فد جيس زين جكليت وياج اذا كونيه تسوين فضل ماعندي فلوس جان اشتريت اريد اطش على راس عمي
خوله : هههههههه تدللين

شرهب : بلغت عمي بطلعتي ماكتله نروح نخطب اخاف ابتسام تسمع هاي سوسه وتروح لصالحه كتله بيبي اجت واريد اشوفها واكفه اعدل بملابسي الصغرت عليه وشوي بيهم ضيك وهذا عدي ميقبل يشتريلي على وين رايحه هو انتي كاعده بلبيت شسوين بيهم اضطريت البسهم واصعد على ابتسام اخذ حذاء منها ماعندي
كل الهدايه الجابتهم عمه ملابس بيت وعطور هسه لو جايبه مال طلعه جان خوش استفاد نزلت وصار بوجهي ايهاب ويباوع من فوك ليجوه
ايهاب : الحلوو وين رايح
شرهب : للكبور عندك اعتراض

ايهاب : هااي شبيج بس تشوفيني تنترين بوجهي هو سؤال عادي
شرهب : واني جاوبتك شويه خلي اطلع
ايهاب :مكلتي وين رايحه
شرهب : وانت شكوو ابن عمي ابن خالي رجلي حتى تسأل
ايهاب : ياريت رجلج شفايتلي
شرهب : تقربت منه ورفعت اصبعي وكتله وخر من دربي لا اطلع ضيم گلبي بيك
ايهاب : لو اعرف ليش تضوجين مني شمسويلج
شرهب : استغفر الله كعد تشوف نفسك شكد تلح ويايه هاي الايام
ايهاب : گلبي عليج انتي مو مال رجال مثل عدي انتي الماسه واحد يحطها بجيبه ويخاف عليها من روحه هذا ميستاهل اضفرج شايفه شصايره انتي تموتين كبرانه وطاكه ويعض بشفته
شرهب : اذا عدت هذا الحجي اكول لعدي
ايهاب : خوفتيني كمت ارجف لج ياعدي هذا رجلي بيدي افعصه

شرهب : كون تفعصكم تريله اثنينكم واخلص منكم بيوم واحد وعطت لج ابتسااااام ابتسسام
هو ركض صعد غميته مدت راسها ابتسام
هاااا شكوو تعيطين
شرهب : اني طالعه عينج على البيت عمتي طالعه يم الجيران
ابتسام : على اساس هو قصر الباشا
شرهب : قابل بيت ابويه ومكعدتج بيه وثاني شى احمدي ربج هذا البيت ملفيج وملفي رجلج الكعيدي 
ابتسام : بدينا
شرهب : لا بديت ولا انتهيت سمعت صوت الهورن وعفتها وطلعت 

لكيت بتكسي يونس كاعد ليكدام وعمه وبيبي ليوره فتحت الباب وصعدت وضليت ابوس بيهن
هااا بيبي جابتج عمه
عمشه : اسگتي حبوبه اني معدتي جن نار وگابه بيها هاي عمتج تسوي الهوايل وتاليها اطيح بروسنا
خوله : اني شمسويه اخويه وفرحانه اله
شرهب : وين جيس الجكليت
خوله : هاااج شوفي شكبره

وصلنا لبيت العروس جان بمنطقه بسيطه وبيتهم هم يونس مقبل يدخل وصلنا وراح  دخلنا لكينا عبيد وجوحي گبلنا
شرهب : من شافني عمو كام يبلع ريك ااااخ شكد حلوو انعاد الزمن قبل ٣ سنوات جنت خايفه وارجف منه وهو يعقد الي وكاعد ومسيطر وهسه اني الكاعده وهو خايف مني عمه جانت ساكته وتباوع
حجينه ويه امها مبينه مو فقيره تاكل اكل المقابيلها طلعت تصيح العروس وبقينا وحدنا
عبيد : هاا يمه شو ساكته
عمشه : شحجي
عبيد : احجي كولي بلخير
عمشه : شنهي ياخير وانت تعرس على مريتك
خوله : قابل مسوي شى حرام
عمشه : تسگتين لا وروح ابوي العب بيج فلك يمه ارجع لبيتك تره مريتك تگضي بيك التوبه
خوله : شنو قصدج يخاف من مرته عيب هذا الحجي ام عبيد ابنج رجال

عبيد : من شوكت حابه صالحه وهيج ادافعين الها
عمشه : من حبتها حيه ام سليمان وتلزم بخوانيكها انه اخافن عليك
خوله : ماعليه شى ومحد يدري جان تلزم العوجيه الي تسند عليها امي  وضربتني  برجلي
عمشه : كرمينا بسگوتج كضي هذا اللسان الصاير جنهه كصب كل شوي يطول وانت يلبعير لاتمشي وره هاي المچلوبه مايلوحك منها غير الصخام انت يمه مدمغ بلسحوره وصالحه ماتعيفك
عبيد : ماعليه شى يوم محد يعرف لتخافين واني هاي البنيه من زمان رايدها صار اكثر من سنه ونص بس هي رادت اهلي يجون ومعودت الله دزلي خوله حتى اكدر اتزوجها

خوله : هااا شكتلج مو كتلج من زمان يعرفها
عمشه : انت يبو فليس شنهي الحجي صار بفلوس وساكت
جوحي : شحجي هو كاتل روحه واني حجيت شكد وهو مايقتنع
عبيد : سدو الموضوع البنيه اريدها وراح اتزوجها بس خوله اني مو كتلج بس لامي كولي ليش جايبه هااي بله حجت
خوله : لا متحجي مو شرهب

شرهب : شون احجي عمو بلعكس اجيت اشاركك فرحتك بلخير عليك عروستك وينها شو امها طبت بعد ماطلعت
عمشه : ماطول ماتسمع چلمتي حيل بيك وابو زايد انه مالي دخل اجيت من وره هاي كادتني كود من كربلا لهنا عبن تريد اخطبلك انت فضها واني مااحجي
خوله : اي يوم اسكتي واتفرجي

طبت خطيبة عبيد جانت حلوة طويله مبين عمرها بالثلاثين شكلها من ذني الي يلبسن عبايه اسلاميه مثل الخليجيات وحاطه كيلو مكياج سلمت وكعدت تقربت من عبيد
اكلك اني ما سألتك ارمله مطلقه بت بيت
عبيد : ارمله صار خمس سنوات من مات رجلها
خوله : ماعدها اطفال
عبيد : لا سنه وحده وترملت
خوله : اي حبيبة سمعينه صوتج شسمج
اسمي اشواق
خوله : هله بأشواق شكد عمرج
اشواق : ٣٣ سنه

ام اشواق : عيني مثل متفقنا ويه عبيد الحاظر والغايب عشره بعشره
عمشه : عليش ماخذله بت چا هيه عزبه
ام اشواق : واذا عزبه حجيه مو من حقها
عبيد : يمه عادي هو حبر على ورق
عمشه : يلغبر چامانصحت بالاولى وادمغت تعيدها بلثانيه تضل اغم واجرب ومابيك حظ
وياهي التكودك تسرح بيك

خوله : حاولت الطف الجوو لان امي تريد تخربها كلت لام اشواق تقربت منها ومثل اشاورها الحجيه تعبانه وتعرفين امهات گبل على كلشي يحجن ماطول همه متفقين بيها البركه بس اريد احجي شويه ويه اشواق دقايق ونرجع
ام اشواق : اي عيني براحتج
عمشه : شنهي وحيدكم ابوها وين عمامها چا جايين نخطبها منج
ام اشواق : ابوها متوفي واخوتها واحد توفى بلطائفيه قبل سنتين والثاني هج وسافر والعمام كلمن حاير بروحه ضاله اني واشواق واختها وبتي الثالثه الجبيره  كاعده بعد جم بيت منا
شويه وتجي هيه ورجلها

خوله : اخذت اشواق وطلعنا دخلتني بغرفه ماادري مال منو وكعدنا شوفي خيتي اني اريد احجيلج كلشي وانتي بعد ترضين لا بكيفج اني مااعرف عبيد شنو حاجيلج وشنو ضامه منج
اشواق : كلشي كايلي
خوله : راح احجي وانتي اسمعي حتى اطلع من ذنبج اني مره ورايه طريق مااريد اتحمل اثم لو يصير عليه شى من دعاويج
انتي تدرين بيه متزوج وعنده ولد وبنيه كبار شى اكيد حاجيلج

اشواق : طبعاً اعرف
خوله : وتعرفين مرته شنو وبديت احجيلها ماحجيت كلشي يخصنا بس على الاقل حجيت شكد صالحه مأذيه ومتخاف الله ودربها اعوج واليوكف كدامها ادوسه واتأذي واذا عرفت متزوج احتمال ادمر حياتها كلشي عند صالحه مباح وحجيت كم موقف النا وياها احجي وهي ساكته وتسمع
وهاااا هذا مو كل سوالفها لو احجيلج بلتفاصيل هسه اطردينا

اشواق : اني حجالي شغلات والصراحه اني هم سألت عن زوجته عندي بنيه بمنطقتكم اعرفها صديقه اليه وانطتني شويه عنها لتخافين هيج شكول متهز مني شعره
خوله : انتي وياها بعد مالي دخل اني احجي ضميري وانتي بكيفج
اشواق : اني احبه لعبيد ولو الف صالحه مااخليها تاخذه مني
خوله : باع هااي هو منو اخذ من منو والله عمي النسووان اذا رادن شى يلعبن فلك على كولت امي مبينه مو هينه من حجيها وكحه
اشواق : هااا شو سكتي

خوله : فزيت من صفنتي وابتسمت يعني راضيه بكلشي
اشواق : اني من زمان راضيه ولو جاين من سنه ونص خاطبيني جان هسه عندي جاهل منه متعرفين شكد احبه واريده بس هو دوم يكول اهلي مقاطعهم وامي ماقبلت اله تجون
خوله : وهاي اجينه بلخير احبيبة بستها انطيني رقمج اخاف احتاجه اخذته منها  وكمنا دخلت اختها وزوجها وقربنا الفاتحه

شرهب : اخذت الجيس وطشيت جكليت واهلهل وامها واختها يهلهلون
جاب جوحي السيد وعقد الهم وامها رادت عقد محكمه يله ياخذها وهو بادي بالاجراءات يركض ركض كال اسبوع اعقد الها واخذها طلعنا من بيتهم
عمامي باسو بيبي وهي مراضيه عنهم اخذونا تكسي ورجعت اني للبيت وعمه وبيبي لبيت بيبي كالو باجر نرجع لكربلا ماضل وكت

خوله : يمه مااوصيج مااريد تحجين شى
عمشه : شحجي غير اتحطني وتحطج بلتنور وتحرگنا اريدن اتمدد تعبت دخليني يله
دكينا الباب فتحته سما
سلمت وهي مستغربه جيتنا
عمشه : امج وين
سما : شويه وتجي راحت لخاله
خوله : وهي عايفتج وحدج هيج دوم اطب وتطلع وتعوفج
سما : شكو عليه قابل صغيره
عمشه : دخليني يمه
دخلتها لغرفتها وتمددت على جربايتها
عمشه : افيييش ياريحه ديرتي وتعب سنيني هذا مجاني موش ذاك

خوله : ليش مترجعين يايمه
عمشه : منهو ليه هنا وفلاح مايرضى يرد طگ افادي وانه اقنع بيه ومايرضى ضليت هناك ويه بدعه خلف الله عليه البت مامقصره مداريتني انه لون اضل هنا هذني يخنكني وانه نايمه وانتي گلها جم يوم وتردين لمجانج المن راده وحيدي
خوله : بست راسها نامي ارتاحي اخابر يونس يجيب عشى النا لان مااريد اكل من ايد هاي المسمومه

بقت امي نايمه وخابرت يونس جاب العشا من الباب وراح عنده عامل صغير يساعده بلمحل من يطلع يسد مكانه
ردته يدخل مقبل كعدت امي وكلتها ورجعت نامت واني سبحت ونمت وثاني يوم كعدت الصبح جنت اغسل على المغسله نزلت صالحه وبتها حتى مسلمت
صالحه : يله يمه البيت صاير يخنك من يرحون نرجع
ولا جاوبتها خليج هيج احجي بزودج
كعدت امي وريكتها وشربتها علاجها جنت منتظره عبيد يجي البارحه نمت من وكت ماشفته
صارت ساعه ٤ وطب صحته
تعال اكعد ماطول مرتك ماكو
عبيد : هااا خيرج
خوله : جنت انتظرك همزين اجيت
عبيد : صار شى
خوله : اني كاعده وافكر بكعدتك ويه مرتك الثانيه
عبيد : اششش صوتج لحد يسمع
خوله : هاي شبيك اكله مرتك ماكو طلعت هيه وسما من الصبح يعني وحدنا بلبيت

عبيد : هاا ماطول هيج احجي
خوله : كلت ليش تكعد ايجار وتذب فلوسك وتعبك بالايجارات ليش متشتري مشتمل صغير وتكعد بيه
عبيد : الفلوس يم صالحه شون اسحب منهن
خوله : امده حظي اكو واحد يحط كل فلوسه يم مرته
عبيد : لعد وين اخليهن هو اني ادري راح اتزوج خليني هيج استر ايجار ادفعه من وارد المحل وراسي بارد

خوله : عليمن وفلوس حلوة تروح ايجارات ويوميه واحد داك بابك اطلع من البيت مثل ام البزازين يوميه بيت شوف اكو حل ثاني كول لصالحه لكيت بيت مرتب اريد اشتري واخذ الفلوس واشتري وكول الها لعبو عليه وضاعت الفلوس تتذكر من دخلت بمشروع ويه جوحي وطارن فلوس الحواسم سوي نفس شى دبر فلم عليها وضيع الفلوس
عبيد : اخاف تحس هاي داهيه متفوتها فوته
خوله : شوف حتى تقتنع اكثر كول الها فلوس البيت متكفي ولازم اچمل فوكاها وماعندي بيعي حصتج بيت ابوج وفلوسك على فلوسها تشتري بيت وكول الها اسجل نص البيت بأسمج راح تركض ركض اتجيب ورثها

عبيد : بس البيت بيه امها قابل تبيعه
خوله : بيتهم جبير وهنه ورثن اخوهن لان تعرف حتى مااريد الوث لساني واذكر اسمه المهم اخوهن ماعنده لا ولد ولا مره تورثه وحصته توزعت عليهن ساهره وصالحه وغنيه والبيت ٢٥٠ متر يعني وحدتهن توكع الها اوكف خلي احسب توكع اكثر من ٨٠ متر تكدر مرتك تقسم حصتها وتعزلها وتبيعها يصير مشتمل زين وبفلوس ال٨٠ متر على فلوسك تشتري بيت مرتب وتسجله بأسمك ومن تسألك كول الها ضاعن كلهن واحد قشمرني ودخلت وياه بورصه بمشروع انطيتهن يشغلهن شهر ويرجعهن وطفر الف فلم اكو

عبيد : زين ليش اخذ حصتها فلوسي تجيب بيت
خوله : مو حتى تصدكك ومن تكول الها اسجل نص البيت راح تأمن وتنطيك فلوسك وفلوسها وانت للامان اخذها لاي بيت بأي منطقه بس كون بيت مرتب ومبين سعره غالي شوفها كول الها هذا البيت حاط عيني عليه راح تركض تبيع حصتها وتنطيك خوش مبلغ انت اشتري البيت التريده واشتري اثاث مرتب حتى مرتك الثانيه تحس انت شكد شاريها

عبيد : ماادري السالفه يراد امخمخ الها هاي صالحه اذا فكست تلعب جوله مو بعيد تحرگني واني نايم
خوله : انيالي اي والله هاي شبيك عبيد هاي انت الجبير الهيبه تخاف من مرتك
عبيد : هااااا لا مااخاف بس

خوله : بس شنو يمعود كول ياالله وتوكل هم بيت جديد واثاث جديد ومره جديده موخلصتها ضيم وقهر وعركات وطلايب متريد تبرد راسك ليش العايشين ببيوت جديده احسن منك وشفت مرتك مبينه دلوعه وراح ادلعك وياها متأكده راح ترجعك شباب مامطلوب منك بس تصير سبع وتمثل زين كدامها حتى لو تسوي نفسك تمرضت وكعت حتى تصدك يمعود زلم متزوجين اثنين ومخلفين وسنين ومحد يدري بيهم لحد ما ماتو شبيك يحظي تتراجف من مرتك

عبيد : لج خوله دوختيني بهاي السالفه عقلي شطح
خوله : لا دوختك ولا شى انت سوي الكتلك عليه امشي ورايه ومراح تخسر وهم أمن نفسك من صالحه حتى يوم ماتعرف انت متزوج متكدر تسوي شى البيت وبأسمك ماكو اي فلوس يمها حتى تطفر بيهم وتحرك گلبك وهم ماكو مكان تزعل واتروح بيه لان باعت حصتها وحتى وان راحت لامها تبقى تحت رحمه غنيه هاي اذا لفتها من الاساس وتعرف خالتك اكيد راح تزعل من صالحه لان قسمت البيت ويجوز حتى تطردها  يعني صالحه ضلت تحت ايدك وراح ترضى بكلشي منك لان ماكو مكان تروح اله وتبقى هنا بهذا البيت معززه مكرمه وغصب عنها تسلم امرها وتسكت سالفتك يرادلها گلب قوي واني اعرفك قوي وهيج سوالف متهزك

عبيد : اي صحيح كلامج خلي افر السالفه براسي واشوف شون ترهم
خوله : اني بعد نصحتك صير اذكى منها وأمن نفسك والله يكتبلك الخير
عبيد : اروح لجوحي عندي غراض يمه وصيته عليهن
خوله : هذا اخوك لو يتزوج شبيهه ميت على الدنيا واهلها وضال على الوحيد
عبيد : غسلي ايدج منه مستحيل يتزوج ويصرف على بيتين هو لو بيده ساهره يطلكها حتى مايصرف عليها
خوله : خلي كاتله الفكر روح لشغلك وسلملي عليه

رجعنا لكربلا بس بقيت على تواصل ويه عبيد
واقرا براسه واجل العرس حتى يشتري بيت واني حجيت ويه اشواق حتى تدلع عليه وهم تلح عليه بسالفه البيت الملك  بحجه لمصلحته ومصلحتها لحد ماقنع صالحه وصار مثل ماردت وصالحه تعاركت ويه امها علمود حصتها وباعت حصتها بيت ابوها وانطت الفلوس لعبيد وهو كال الها شهرين واشتري البيت لان الفلوس انطيتهم لرجال يشغلهن اليه وراح ينطيني خلال هاي الشهرين ربح فوك الدفترين  وبما ان صالحه طماعه كيفت
واشتره البيت وسجله بأسمه ورتبه خلال اسبوع واني اقترحت يكول الها بعد شهرين لان بالي اكول عسى ولعل مرته تحبل او عبيد يطمس حيل ويه اشواق حتى من تعرف صالحه متخرب كلشي بسهوله ولو مبين اشواق مو سهله ابد حتى امي كالت عبيد مكتوب اله يوكع بنسوان ارجل منه
وهاي اني اخابره وابارك اله عرسه اليوم عرس عبيد وجاب زوجته اشواق بلبيت الي دوم تحلم بيه صالحه وسوت اشكال حتى يصير الها مثله كافي شمرت ايتام حتى تحصله وتالي لا حصلت البيت ولا ورثها من ابوها والبيت صفه لوحده غيرها

ناي : سمعت بزواج عبيد عرفت عمه وراها جيت عمه غيرت هواي اشياء كافي خلت يونس تستعدل اموره ويكدر يوكف على حيله
عمه تعرف قوة يونس معناها قوتنا النا لهذا ذبت كل العدها ليونس وصتنا اني وشرهب شيصير نرجع لاخونا
من يوم ماحجيت ويه مهدي والحال نفسه استسلمت اي بعد ماعندي غير الاستسلام المحبه مو كوه ولا جبر واقنع نفسي من اشوف حال شرهب وضيمها ويه عدي اكول اقلها مهدي يحترمني وطيب وما مأذيني باوعت حالي حال هواي نسوان باقيات وعايشات لخاطر جهالهن
كمت اتعامل مثله برود شسوي شبيدي اغير 
اما عمتي بعدني الخدامه الها ومايوم رحمت بحالي او على الاقل احترمتني

يونس : جنت اشتغل بلمحل وملتهي ارتب بلغراض طبت بنيه مبينه مستعجله
عفيه اريد بطل مي
فتحت الثلاجه وانطيتها واشرت على عصير هم انطيتها وطلعت تركض شفتها واكفه بسياره حديثه بصف الرصيف كبال المحل مالتي ومره جبيره كاعده ليكدام مبين متخربطه
طلعت عليها محتاجه مساعده اختي
ماما هبط سكرها

يونس : على كيفج هو انتي راح تتخربطين
صوجي اني لحيت عليها تجي ويايه اني هاي المنطقه مااندلها وصار وكت طويل نفتر وهي داخت وهبط سكرها
يونس : شوو جيبي اني اشربها انتي كعد ترجفين اخذت العصير وشربتها هااج المي غسلي وجهه
فاتحه الباب وكنبصت وكعدت لابسه بنطرون ضيك حيل فوكاه قميص كصير من كعدت انرفع وبين شوي ظهرها درت وجهي بس انتبهت احنا بلشارع وشباب رايحين جااين
اختي عدلي كعدتج مراهمه كلش مدت ايدها على ظهرها وعرفت قصدي وكفت
هااا العفو وكفت تعدل بملابسها

اباوع على امها بدت تحس وتصيح ماما شيار بيج شى وينج
شيار : هياتني ماما ولزمت ايد امها
يونس : نوديها مستشفى
شيار : لا ميحتاج دقايق وتصحى
عفتها ورحت للمحل وجبت عصير ثاني
هاج اشربي
شيار : لا شكراً مااريد
يونس :  وجهج اصفر انتي تسوقين
شيار : اي سيارتي
يونس : ماطول تسوقين وراج طريق رجعه وانتي اكلتي هبطه الافضل تشربين

شيار : زين تكدر تبدله بعصير عنب مااحب البرتقال
يونس : صار رحت بدلته الها وفتحته وكعدت تشرب باوعت عليها البنيه كلش حلوة ونازكه ومبينه بت خير حتى ملابسها كشخه على اخر حبه فززني واني اتمعن بيها صوت مصطفى العامل
مصطفى صغير عمره ١٣ سنه يتيم الاب ومعيش امه واخته واخوه ومن اجاني رغم الشغل قليل شفت نفسي بيه مكدرت ارده وكلت اليجري عليه يجري عليه طلع شاطر وشاغول ويساعدني هوايه
مصطفى : عمي محتاج شى
يونس : اوكف بلمحل

شيار : اخرتك عن شغلك
يونس : مصار شى فتحت عينها لامها وصحت وبدت تحجي وتشكرت مني هوايه
شيار : تعبتك ويايه
يونس : ماكو اي تعب انتي وين رايحه اذا تحتاجين مساعده
شيار : اجيت على صديقتي هنا بلنواب كالت وانطتني العنوان اتزوجت واجيت ازورها واني مو من سكنة هاي المنطقه ومااندل لهذا تيهت
يونس : انتي منين جايه
شيار : من المنصور وكوه وصلت وتالي ضاع الوكت والمكان عليه
يونس : انطيني العنوان يجوز قريب
شيار : لا ميحتاج لازم ارجع ماما ماطول صحت شكراً مره ثانيه
خلت البنيه وساقت السياره وراحت حتى فلوس العصير والمي ماانطتني يله بلعافيه متسوه فلوسهن

جنت متوقع موقف وصار هواي مواقف امر بيها متوقعت راح ترجع مره ثانيه
بعد يومين كاعد بلمحل ومصطفى يبيع طبت البنيه نفسها وكفت من شفتها جانت ابتسامتها هادئه وجميله بشكل مو طبيعي
هلوو
يونس : هلو بيج
شيار : اجيت اعتذر منك ذاك اليوم اخذت العصير والمي وما انطيتك فلوسهن
يونس : وجايه من المنصور لهنا علمود الف وربع انتي صدك تحجين
شيار : حقك هذا
يونس : متسوه والله شلون صارت امج هم جبتيها وياج
شيار : لا هلمره اجيت ويه صديقتي من الكليه هم اندليت بيتها وهم اجيت انطيك فلوسك
يونس : مااخذهم
شيار : لا عفيه اخذهم
يونس : ابد والله اعتبريها ضيافه من اهل الرصافه لاهل الكرخ ومايرد الكريم اله البخيل
شيار : هههههه واني مو بخيله ضيافتك مقبوله لعد خلي اشتري شغلات وتاخذ فلوسهم
يونس : خلصت ضيافتج اكيد اخذ
بدت تتسوك هواي شغلات ترست ٣ علاليك حتى حسابها عبر ال٦٠ الف انطتني الفلوس وكالت
شيار : انت شسمك

يونس : ابتسمت وكتلها يونس
شيار : واني شيار
يونس : اعرف سمعت امج تصيح بأسمج انتي كرديه
شيار : بيبيتي كرديه وهي سمتني
يونس : اسمج حلو ابتسمت بخجل ياربي هاي البنيه ليش هيج مثل النسمه ابتسامتها
سلمت وطلعت
مصطفى : عمي ريحه هاي البنيه تخبل ترست المحل ترس
يونس : روح كمل شغلك لا اعلكك بلبنكه صدك عطرها فواح وطيب بشكل هي هاي البنيه كلها تبهر الي يشوفها

مرت الايام وكمت كل كم يوم تجي شيار تشتري ونبقى واكفين نسولف جنت اكول مستحيل هيج وحده تباوع لواحد مثلي اشافت مني وهي تعجب الوزير من جمالها واناقتها ومستواها كمت انتظرها يوم يوم وعيوني على الشارع تنتظر شوفتها الربع ساعه او العشر دقايق التوكف بيهم يمي جانت تنسيني حتى اسمي اضل دايخ وين اباوع على ابتسامتها عيونها نزاكتها لو سوالفها التدخل الگلب ومن تروح تاخذ فكري كله وياها  لحد مااجت مره من المرات واتجرأت اطلب رقمها طلعت مني واني مستحي وبنفس الوكت كلت هسه ترزلني والصار طلعت تلفونها وردت رقمها بكل هدوء جنت ممصدك رقمها بتلفوني
ومن هنا بدت قصتي ويه شيار

شرهب : اليوم عمتي اخذت ابتسام وجهالها وراحن للسوك تريد تشتري غراض الهم مبين رجلها صاير عنده فلوس ماكو احد وحدي بلبيت وكاعده امسح كلت ماطول الجهال ماكو يلحك ينشف ومايبقى طبع بلكاع مدنجه امسح وشايله دشداشتي واغني وادندن ومنطلقه وحدي ماكو دوخه متوقعت ايهاب فوك مطمور ادري بيه هيج وكت بلشغل واني اتحرك ومدنجه محسيت غير واحد يحضني من وره اني طفرت مخروعه اباوع ايهاب بلفانيله والشورت نازل
ايهاب : فدوة لهذا الصوت الكروان شكد حلوو
شرهب : لك حقير شون تلزمني هيج انت مو طالع للشغل شرجعك

ايهاب : اليوم مطلعت لعيونج وانطيت فلوس لابتسام حتى تشتري ويفرغلي البيت وياج
شرهب : وخر مني لا اعيط والم الجيران عليك
ايهاب : لج شبيج انتي ثوله اسمعي كلامي تربحين اغركج فلوس شوفي حالج دشداشه ماعندج بيها خير ورجلج حاير يلم فلوس تلكي حتى مينام وياج
شرهب : انجب وخر مني انعل ابوك ياابو فلوسك شمرت الوصله مال المسح بوجهه وركضت اطلع من الباب كلت افضحه بلشارع ركض كبلي وسد طريقي

ايهاب : وين رايحه تعالي بحضني وشوفي الراحه شونها لج شرهب اني احبج ميت عليج انام واكعد اتخيلج بحضني هذا جسمج دمرني
شرهب : اذا تقربت اشعل اهل اهلك لك عاار
انت واحد ماعندك شرف تريد تتعدى على مرت نسيبك بيت الناس الي لفوك من الشارع

ايهاب : شتحجين احجي اليوم مااعوفج اله اطفي ناري بيج
شرهب : رفعت الصطله وشمرتها عليه مااجت بيه بس اني ركضت حيييل صعدت للغرفه مال النوم جنت اسرع منه وقفلت الباب وهو يدك حييل ويريد يكسرها جريت الكومدي مال الجربايه وحطيته وره الباب وكعدت عليه وارجف من الخوف وهو يدفر يريد يكسرها

ايهاب : وين ترحين مني خلي بالج انتي اليه ومااعوفج
شرهب : انجب لك تموت ومااطخ شعره مني مابقى عليه بس الحافي ابو الوصخ خلي تجي مرتك اله اخليها تسحلك بلشارع
ايهاب : مرتي تصدكني اني كايل الها شرهب دوم تتحارش بيها واطلع صدرها كدامي وتسويلي اغرائات واني اغض البصر عنها لعيونج يعني اذا كتلها جيتي عليه وطلبتي مني انام وياج راح تصدكني متصدكج
شرهب : خووش هيج صار بعيني
ايهاب : افتحي الباب بس احجي وياج عمي مااسوي شى

شرهب : بقيت اقرا ايات والخوف خله ايدي ورجلي تنمل وگلبي اسمع دكاته  بقى يضرب بلباب وكام يفشر ويگفر واني ساده اذني  واحسب دقيقه دقيقه على جيتهم  لحد ما راح الوكت عليه وكاال
ايهاب : عبالج تخلصين مني الج صيده يشرهب واختفى صوته بقيت افرك ايد بأيد واكول ربي رجعهم مابقيت ايه ماحافظتها ماقريتها واطرافي ثلجت من الخوف وكل شويه اتخيل كسر الباب وطب فات ساعه ونص سمعت صوت الجهال عرفت اجوي باوعت على نفسي خربطت شعري زين ولزمت جانب من الدشداشه من الجتف وشكيتها وفتحت الباب ونزلت اركض اعيط الحكوني
ام عدي : يمه الرحمن بتي شبيج
شمرت نفسي بحضن عمتي
عمه هذا ايهاب الجلب راد يتحارش بيه وهنا كمت ابجي متحملت لان الموقف كله خوفني حييل

ابتسام : انجبي رجلي ميسوي هيج كولي انتي تحارشتي بيه
نزل ايهاب مبدل متوقع هيج راح اسوي عباله اسكت
ايهاب : شكوو شصاير
شرهب : تسوي نفسك خير يچلب واني ردت تتحارش بيه
ايهاب : لا وداعت جهالي ماواصل يمها
شرهب : جذاب عمه والقران جذاب طب عمي واحنا نحجي وجان عدي جاي وياه انصدمو من شافو حالي وصوت العياط
ابتسام : يمه لا تصدكيها اصلاً هو ايهاب دوم يشكي منها ويكول تتحارش بيه وتسوي حركات
ابو عدي : شصاير هنا
شرهب : كعدت بلكاع ابجي عمي انت مو تكول انتي بتي اليوم بتك راد هذا يلوث شرفها ترضاها

يتبع .....