الابواب الخمس

البارت السادس عشر

#الابواب_الخمس
البارت السادس عشر /الجزء الثاني
للكاتبة Reem

اوكف يادمع لا تجرح الخدين
ولا تكسر خواطر هي مكسوره
اوكف وانتظر ارد احجي اني وياك
وسمعك قصتي عالناس مشهوره
انه اول بشر ما يعطش بصيف
انه ارتوي بس احضن الصوره
اوكف يادمع لمن اكلك طيح
وارسملي بنزولك صوره مقهوره
صوره طير جااان يطير بين الغيم
شلون يطير هسه وجناحه مكسوره

يونس : جنت بلمحل اشتغل ومكسور ظهري كلت خلي ارجع من وكت اليوم اخذت رخصه ورجعت وصلت لمحل يبيع فلافل داكل واجر مرتضى يمشي سريع هااا ولك تعال اكل
مرتضى : مو وكتها هسه خلي اروح لخاله صالحه
يونس : شكوو شبيك مو على بعضك شصاير
مرتضى : لك خالي جاسم
يونس : شبيهه العار
مرتضى : مااااات
يونس : لا بربك شموته
مرتضى : ماادري اجاني تلفون من جيران بيت  بيبي بلبصره كالو ابنها جاسم مات ومتخبله بلشارع بلغ بناتها خلي يجون
وبلغت امي عفتها ادك وتلطم واجيت ابلغ خالتي واخذها ونروح
يونس : بقيت صافن على الوضع تمنيت بيدي الزمه واشرب من دمه جنت دوم انام واحلم بلساعه الالزمه بيها واطلع كل ساعه عشتها بلحبس من خشمه واخذ حيفي منه مردته يموت الي مثله حرامات يموت ويرتاح هيج واحد يتسكط ويعيش كل ساعه ذليل ومنهان ومتأذي

عافني مرتضى وراح يركض واني عفت الاكل انسدت نفسي دفعت الحساب ورجعت اتمشى للبيت وايدي بجيبي واباوع على البيوت والجو ومفرحان ابد بموتت جاسم اريد اكطعه اذوگه كل هبطه وكتله اكلتها انعل لشتك شموتك  دخلت للبيت لكيت صالحه تعيط وادك على راسها وسما لازمتها وبنفس الوقت تعرج متكدر تتحرك بحريه صعدت واني صعدت وراها ولا درت بال واسمع صالحه تصيح ياخويه كسرت ظهري بروحتك واني اكول عساه ظهرج بلكسر وتلحكي ونخلص طبيت وركعت الباب تمددت بملابسي حتى مغسلت حدود النص ساعه صار هدوء طلعت ملكيت احد مبين كلهم راحو للبصره بعد احسن ضل البيت الي وحدي يابويه شون هدوء فتحت عيني ولا مره البيت هيج هادئ وصنطه نزلت واتنقل بلبيت براحتي هاي خوش فرصه اروح لشرهب خلي اجيبها هنا جم يوم ترتاح واجيب ناي واصالحهن ماطول ماكو ذني وياخذن راحتهن

خلي بالاول اجيب ناي لان دربها اطول واصعب وراها اجيب شرهب باوعت الساعه راح الوكت ماالحك خلي على باجر من الصبح اطلع عليهن جنت مخنوك واريد احد يمي
ناي : ماده ايدي على بطني ومكيفه راح اصير ام وحدي بلغرفه رحت قبلها بيوم للدكتوره وانطتني مقويات وكالت وضعج زين بس لازم تبقين نايمه على ظهرج اقلها هذا الشهر كله لحد مايستقر اكثر صافنه وافكر ياترى ولد لو بنيه طبت عمتي مثل كل مره بدون حتى مدك الباب طول ما مهدي ماكو تدفع الباب واطب
وداد : كومي عيني لا عبالج تضلين نايمه واميره واحنا نخدمج كومي كملي شغلج
ناي : عمه الدكتوره كالت لازم ارتاح حتى يثبت
وداد : عساه لا ثبت كومي لج راح تصير ام فلان براسي هو هذا البقه واني وبتي نخدمج
ناي : انتي مو تكعدين وتكومين وتصيحين عاكر مابيج خير شوكت تحبلين المفروض انتي اكثر وحده فرحانه مو ردتي احبل
وداد : ردت طفل لابني يحمل اسمه بس مو انتي امه

ناي :غمضت وفتحت عيني اريد اجر نفس واهدي نفسي ومااعيط شتردين عمه مني
وداد : كومي انجبي ولملمي الخطار اريدها تلمع
ناي : صار هسه نازله كمت ونزلت وجريت المكناسه والوصله حتى اكنس الفراش لان بعدها الزوالي مشايليها لان ناس رايحه راجعه دنكت وبديت اكنس جان تجي حوري تركض
حوراء : تخبلتي ولج شدسوين
ناي : انضف غير امج مسمعتي صوتها
حوراء : جيبي من ايدج واكعدي هسه تتخربطين نسيتي روحج حامل
ناي : امج تنسي الواحد اسمه جيبي يمعوده لتروح تجي وتسوي عزا ثاني علينا
حوراء : والله ولا تنظفين شوو جيبي خلي اروح اصيح مهدي اني امي مااكدر عليها اكيد لو بيت خالو حازم لو بيت خالو عمران
ناي : يمعوده مابيه حيل امج تشد اكثر ويايه
حوراء : خلي تشد المهم هسه ترتاحين

ناي : كعدت وحوراء راحت تركض اني اباوع على الباب على لحظة اطب وداد وتبدي تعد شويه وطبو مهدي وحوراء
مهدي : اصعدي فوك ارتاحي
ناي : صفنت عليه وحايره اسمع كلامه لو انتظر تجي امه واشوف شراح يصير جان اطب
وداد : ياحبيبي شو رجعت خيرك
مهدي : يمه ناي متشتغل هاي الفتره لحد مايستقر وضعها
وداد : وليش ابني شبيهه

مهدي : مو كدامج تخربطت وكال الطفل مهدد بالاسقاط واخذتها للدكتوره كالت لازم ترتاح بعد شون تكنس وتمسح
وداد : هاي شبيك ابني قابل هو ملزوك بعلج وهلكنسه والمسحه توكعه هاي عياره النسوان لدخل روحك بيها وتوجع راسك كدامك مو خلفتكم اثنين واصعد وانزل وانظف بيت عيالي شو ما وكعتو هاي مرتك تدلل عليك وتريد تنام براسك واحنا نخدمها

مهدي : ميخالف يوم خليها ترتاح روحي اصعدي وعندج حوراء هي تساعدج شو البيت يلهث من النظافه وميتوصخ والناس قلت رجلها ومكامت تجي
وداد : وتضل اختك وحدها شنو هذا الحجي مهدي
مهدي : كتلج خليها ترتاح لتنسين هذا هم ابني واخاف عليه ومااريد لا هيه ولا الطفل يتأذون تحمليها هلكم يوم لخاطري
اصعدي ناي
ناي : اني كمت وصعدت وصلت لنهايه الدرج اسمعها تكوله لتنطيها عين تكوم تشيخ عليك وتسوي نفسها بس هيه وبس
سمعت رده وكاال

مهدي : هذا مو طبعها واعرف بناي متسوي هيج ولوما تعبانه مجان قصرت وكدامج صار اشهر البنيه حسها مطالع ليش ماادري بيج مشيلتها البيت كله واكول هنه نسوان وبينهن وماادخل بس من يوصل الحال حامل ومتكدر تشتغل وانتي اتجبريها لهنا مااقبل
وداد : خوش والله بت اهل العتيك كامت تحط رجل على رجل وتمشيك مبقى شى بحجة الطفل تركب وادندل رجلها
مهدي : كل هاي لان كتلج خلي ترتاح تردين اخذها واطلع منا لشهر اروح لبغداد حتى البنيه ترتاح ومتشوفيها ويحترك دمج
وداد : هيه هاي الضلت
مهدي : لعد عوفيها ومااريد اسمع شايله ورقه من الكاع يوم تره البيه كافيني مالي خلك مشاكل عديها ياام مهدي
عافته وطبت وركعت باب غرفتها

مهدي : حوري عينج على ناي ولتخليها تتعب وانتبهي على اكلها
حوراء : اي عيني هذا كله لخاطر ابنك
مهدي : وهيه هم خطيه مبين التعب عليها واذا امي سوت مشاكل انطيني خبر
حوراء : تعرف بيه مااضم بسرعه اجي واحجيلك
مهدي : مسمعتي شى عن سدره
حوراء : ليش تسأل مو تدري تزوجت حتى ميصير بعد تسأل عنها
مهدي : حبيت اطمن على وضعها ماكو شى من الي بالج
حوراء : زينه خابرتها البارحه ومرتاحه انساها فدوة وفكر بمرتك وابنك والله نايه ذهب صافي وگلبها ابيض كافي متحمله امي ومتشكي
مهدي : يصير خير اني راجع لخالي
حوراء : الله وياك

ناي : دخلت للغرفه بعد مسمعت كل كلامهم بعده يسأل عنها ولو اكيد يسأل قابل بيوم وليله ينساها هاي اذا نساها اصلاً
بقيت نايمه خلصت اليوم كله نوم ومطلعت غير للحمام والاكل صعدته حوري اكلنا اني وياها سوه جنت حيل محتاجه هاي الراحه
ثاني يوم الصبح تفاجأت بجيه يونس وكعدنا بلصاله وحجالي عن موتت جاسم والبيت شون فارغ
يونس : رجلج يتأخر حتى نبلغه واخذج وارجع لبغداد ماضل وكت
ناي : راح اخلي حوراء تخابره صحت حوراء طبت
حوراء : السلام عليكم شلونك يونس
يونس : وعليكم السلام  الْحٍمَدٍ للـّہ انتي شلونج

حوراء : زينه
ناي : فدوة حوري خابري مهدي شوفي شوكت يجي واذا يتأخر انطيني احجي وياه
حوراء : راح اجيبلج الموبايل وانتي احجي
ناي : عمتي وين
حوراء : طلعت لبيت كرابتها تأدي واجب وتجي
ناي : شو انطيني الموبايل
اخذته وطلعت للمطبخ اخابر

حوراء : جوعان اسويلك اكل
يونس : مدنج واحجي وياها كتلها مشكوره
حوراء : على الاقل اشرب الجاي عايفه على حطته
يونس : مو من محبي الجاي
حوراء : اني هم مااحبه بس بلريوك اكلك نازل عصير يخبل بيه حبيبات خوخ خلي اجيبه عندي قوطيتين الي والك هاي ناي تعيب عليه تكول مطيب اوكف
يونس : ابتسمت على طريقة كلامها راحت ركض ورجعت بيدها القوطيه
حوراء : شوف اني محطيته بكلاص لان هو هيج ينشرب اطيب تفضل
يونس : اخذته منها وابتسمت بوجهه وفتحته وشربت منه
حوراء : الله عليك طيب لو لا مو تجذب
يونس : طيب ليش اجذب بلعكس حبيته
حوراء : ايي وينها اختك الخبله شربت منه وتصيح مطيب لعبت نفسي منه اني وياك حبينا صرنا اثنين واحد

يونس : باوعت عليها لاارادياً مو قصدي اتفحص شكلها بس هيه تحجي بفطاريه وتسوي واهس واحد يحجي وياها دخلت ناي
ناي : خابرته بلبدايه مقبل اروح لحد متوسلت بيه يكول طريق واتعبين
يونس : ليش مريضة
حوراء : ياااا متدري راح تصير خال واني عمه
ناي : كام يونس وباس راسي فرحان
يونس : الله يكومج بلسلامه ماطول هيج اخذلج تكسي من الباب للباب حتى لتتأذين واذا متردين ترحين عادي ابقي غير مره
ناي : لا هاي فرصه متتعوض قبل مهدي

حوراء : ياريت يقبل اجي وياكم اغير جو والله ميته من حبست البيت
ناي : اخابره علواه تجين
حوراء : مستحيل يقبل مهدي واعرفه نجرب شخسرانين
ناي : لزمت التلفون وبلغت مهدي مباشره عاط بيه حوراء متوصل لذاك البيت ردت بس افهمه كتله ماكو احد رد عاط وكال حتى انتي مااخليج ترحين اذا لحيتي اضطريت اسكت لا اعم على روحي

حوراء : مو كتلج ميقبل
يونس : لتضوجين
حوراء : لا مضايجه
يونس : وهذا وجهج العنفس وخدودج الدم صارت
حوراء : من وره العصير
يونس : بله جذب
حوراء : ضجت وانقهرت ارتاحيت
يونس : احجي اني وياه
حوراء : لا توكلو وراكم طريق
ناي : راح اصعد احظر غراضي صعدت واني طايره راح اشوف شرهب

يونس : طلعت حوراء شويه ورجعت غاسله وجهه مبين عليها الضوجه وبيدها لفتين جان تنطيني لفه
حوراء : هااك اكل
يونس : شنو هاي
حوراء : لفه بتيته وبيها مكعبات لحم وزلاطه وطرشي طيبه اكل مو اني من اضوج اذب حرگتي بالاكل واوكل ناي غصب عنها ويايه اضوج اكل وحدي وبما ان ناي حامل ومتكدر تاكل ومخبوصه وراها طريق اكل انت ويايه حتى لو شبعان

يونس : جيبي خلي اكل ماطول هذا الشى يريحج كعدنا ناكل واني خلصت اللفه قبلها جانت كلش طيبه واني هم بيه جوعه
حوراء : شون تكول مجوعان اللفه سويتها لكمتين وانزلطت بطنك
يونس : جاي توكليني لو تعيريني
حوراء : شنو رأيك اسويلك وحده ثانيه
يونس : لا شبعت

حوراء : خلي اروح اجيب واشوف منو المياكل
يونس : هههههه اكل يابه لتعيطين
راحت جابت وكعدت اكل وكل شويه عيوني تروح على شفايفها من تاكل واتعوذ من الشيطان واكول عيب هم بيتهم وهم عرضي بت خالي واحط عيني رجعت دنكت

ناي : نزلت اخذت كم قطعة ملابس واخذت فلوس من مهدي  دوم يكلي من تحتاجين اخذي من الكنتور كلت مااريد اثقل على يونس خطيه
نزلت ولكيت يونس وحوراء يسولفون
يله كملت عفيه حوري انتي بلغي عمه اخاف تتأخر
حوراء : افلتي بجلدج عمتج اذا اجت متخليج ترحين
يونس : رايح اجيب تكسي ابقي هنا
طلعت واجرت تكسي وصحت ناي وطلعنا لبغداد

ناي : وصلنا لبغداد واني متت من الطريق لعبان نفس صار عندي واوجاع واقرا ايات هلمره السيطره ازدحام طلعت روحي لحد موصلنا لمنطقتنا طبيت البيت فتحنا الباب وطبينا
يايمه صار شكد مداخله اله اشهر
يونس : فارغ يصوصي
ناي : ايي ولا توقعت بيوم هذا البيت يفرغ
يونس : رايح اجيب شرهب وانتي طبي ارتاحي بين مااجي وهاا اجيب غدا ويايه لتسوين اي شى
ناي : طلعت من الجنطه وحطيت بيده فلوس
هااك بروح امي لتاخذهم
يونس : بله مو عيب عليج تاخذين من رجلج وتنطيني حك لكمتج هيج اني مو كفو بعينج ومو رجال
ناي : لتكول هيج هو وين اكو منك بس اعرف حالك وضعك واني مو غريبه
يونس : رجعي الفلوس لرجلج عندي والحمدلله مو اني اخذ فلوس اوكل خواتي منهن صحيح الزمن كافخني بس مشال الغيره من راسي

حضنته وبسته لتزعل بداعتي مو قصدي اضوجك بس ياعيني
يونس : اششش بله وسدي السالفه خلي اجيب اختج واجي
شرهب : اركض وره جهال ابتسام بلنعال لان يوصخون ياكلون ويذبون بلكاع وابتسام مطيه الاذن الطرشه كلت مابيها مجال اني اطيح حظهم واعلمهم ميذبون  اركض والنعال بيدي والكفشه مالتي تكمز ويايه واعد واصف عليهم لان وكحين
اندكت الباب وطلعت صار يونس بوجهي
حضنته لك يويو اشتاقيتلك
يونس : هذا شنو البيدج
شرهب : هليكوبتر مو كدامك نعال لاستيك
يونس : وره منو تركضين
شرهب : وره ذوله جهال ابتسام العوبه عوفكم منهم شونك ذبيت النعال ولبسته وعدلت شعري تعاال طب

يونس : تكدرين تجين ويايه
شرهب : وين
يونس : للبيت
شرهب : اني اروح وصلوحه هناك اله تخبلت
يونس : ماكو احد بلبيت راحت للبصره كلهم راحو
شرهب : عساهم لا ردو ليش ولو
يونس : جاسم مات
شرهب : لا بشرفك شون اهلهل عساه بنار جهنم
يونس : الموت مابيه شماته كلنا على هذا الطريق
شرهب : اله غنيه وخلفتها ماشفنه يوم عدل منهم شيصير حيل بيهم وابو زايد لعد ماطول البيت فارغ خلي البس واجي وياك
يونس : ورجلج شون تبلغي
شرهب : ابلغ عمتي هو وينه السبع مالتي لليل يله يجي تعال طب بين مااحظر

يونس : مو اريدج تباتين
شرهب : شون ماابات غير مشتاقه لفرشتي ومكاني لا اكمز واعيط والعب لعب بلبيت بس انتظرني
يونس : روحي واكف هنا
شرهب : تعال ادخل جان يفوت واحد من الجهال ولزكته بعلابيه (ضربته على رگبته) خليته يكمز ابن الزفره حتى تبطل اتذب جيس الحب والكشور بلكاع
يونس : لج خطيه
شرهب : اني الخطيه ذوله مو جهال ذوله احفاد بليس متعرف شيسون بيه رايحه دقايق مااتأخر

شرهب : بدلت واخذت دشداشه ويايه وبلغت عمتي وطلعت كيفت لان راح ارجع ويه يونس
وكفنا اخذ دجاجه كامله شوي
شنسوي بيها هوايه
يونس : حتى تكفي
شرهب : هو احنا نفرين
يونس : امشي شكد تلغين
شرهب : طبينا للبيت ودخلت واشوف ناي كبالي جمدت اريد اروح اركض احضنها وابوسها واخاف تضربني وتزعل مني
يونس : شو واكفه مترحين لاختج
شرهب : باوعت عليها وركضت وحضنتها
يونس : على كيفج وياها يمعوده راح تصيرين خاله

ناي : حضنت شرهب وابجي جنت حيل مشتاقه الها وهي حاضنتني ومن عرفت حامل دنكت وباست بطني
شرهب : تكومين بلسلامه اريدها بنيه وحلوة مثلي وشعرها اهم شى مثلي حتى من نطلع الزمها ونمشي بلشارع نكمز سوه
ناي : تعاالي ام التكمز احجيلي شونه وضعج
يونس : السوالف متخلص تعالن اكلن وراها براحتكم
ناي : كعدنا اني ويونس وشرهب من يوم طلعته منجمعنا هيج اباوع عليهم ودمعتي حاصرتني شون كل واحد بمكان
وراها شرهب تتعارك ويه يونس على الجناح واني اضحك عليها تمنيت بيبي هنا وعمه خوله وبديعه وبان جان صارت لمه تخبل

كملنا الاكل وراها كعدنا كل واحد يحجي الصار بيه يونس كاعد وماد رجله اني حطيت راسي على رجل وشرهب على رجل وهو يضحك علينا
يونس : كله مني موو
ناي : رفعت عيوني عليه واني بعدني نايمه على رجله  وكتله
قسمتنا هيج لا كل شويه وتكول كله مني
يونس : هذا الصار قابل جذب
شرهب : صار وراح ماله داعي تاكل بروحك صدك سما الچلبه شونها وياك
يونس : اخر مره خليت ابوها يكطعها
ناي : حجالنه شسوه بيها خفت عليه لان اني وشرهب مجربين هاي الحربايه من واحد يطخها شسوي بيه

يونس : ماكو شى خلي تولي
شرهب : لتاكل من ايدهن ابد
يونس : مااكل بلبيت كله مخلصها بره
شرهب : اكلكم حابه اكمز بلبيت واعيط وادك على البيبان
يونس : كومي احد لازمج
ناي : كامت شرهب وتعيط صالحه العوبه ساهره الحقيره وتغلط على كل واحد وتعيط سحارات وادك بلبيبان واحنا نضحك عليها
حارت شسوت

نمنا بغرفتنا القديمه رجعنا لمكانه الاصلي بغرفه امي يونس بلكاع واني وشرهب على الجربايه غمضنا عيونا وتخيلنا نفسنا بعدنا جهال صغار اندور ريحه امي بكل واحد نحضنه اندور الحنيه الي انحرمنا منها تخيلنا بعدنا صغار راح انام ونكعد على عياط بيبي وصوت عمه بدعه وهي تكعدنا للمدارس نمنا وكعدنا بس مع الاسف كلنا تغيرنا كل واحد بينا بداخله جرح جبير يحاول يداري حتى ميضوج الثاني كبرنا وماشفنا غير القهر يفتر داير مدايرنا

بقينا ٣ ايام ناكل ونضحك ونسولف يمكن اكثر ٣ ايام سعيدة من سنين مفكرنا بأي شى غير احنا سوه
وراها توادعنا وكل واحد رجع لحياته يونس رجع شرهب لبيتها واني اخذني ورجعني لبيتي عفت الفلوس على جربايته حتى من يرجع يلكاها ٣ ايام مطالع للشغل وحار شصرف اكل وشرب حتى يفرحنا اكيد صرف هوايه وميقبل ياخذ مني عفتهم على فرشته وبهيج راح ينجبر ياخذهم
يونس : من رجعت لكيت الفلوس اوف منج ياناي شوكت الله يفتحها بوجهي واعوضج كلشي

ناي : خابرت بيبي وبلغتها على جاسم وهي سكتت توقعت تفرح بس كالت
عمشه : يعينهه الله لغنيه وحيدهه لاجن يستاهل عبنه خايس وحرامي كلها هاي حوبت يونس والوادم العلسها چا عند ربج تفوت حشه لله ربج ضرباته جبيره وهذا الطاخي ياگلها مدبسه خلي يلاكي ربه شراح يگله
ناي : انقهرتي على غنيه متوقعت
عمشه : انه غنيه گلبي موجر منهه عبن خلفتها اذتني وسكطت گلشي زين بحياتي وتستاهل گلشي يصير بيها لجن انه فاكده وليد واعرفن الضنه شكد غالي وهيه روحهه معلكه بجسام سكتت شويه وكالت

بير التشرب منه مي لا تذب بيه حجر وجسام حار شذب طراكيع وكلاها
يله يطبه طوب يوم ماتفرحيني بصويلحه واختها ااااخ نذر عليه البس برتقالي هيييج مشعشع يجيب التايهه واصبغ شعري مثل عمتج المفلفله واطش واهليه
واردح للوادم للصبح چا لون مجسره وعلى عكاز اردج وروح فرج

ناي : هههههههه والله يابيبي عندج سوالف
عمشه : اكلج اخيج شونه
ناي : بخير بيبي لتخافين
عمشه : چا انه يايمه اخافن عليه من سمايه الزريكه لاتغوي
ناي : حجيت شسوه يونس بيها
عمشه : بعد ايدي حيل هااي بربوك تربيه امهه العوجه انه اخافن لايطكنه بسحر يخلن الوليد مايندل دربه
ناي : ربج الحارس بيبي بقينا نسولف وسلمت على عمه وبان وسديته وانطيت التلفون لحوراء

يونس : رجعو من البصره اول ايام صنطه مالهم صوت وصالحه تسحل بروحها سحل
اني اروح بدربي وارجع بدربي مالي شغل وبيوم راجع افتح الباب مينفتح حاولت ادك اريد مينفتح
دكيت الباب حيل محد طلع رجعت دكيت جان يطلع عبيد
عبيد : روح من وين ماجيت
يونس : شنو السالفه عمو افتح الباب تعبان اريد ارتاح
عبيد : مالك مكان هنا هذا البيت بعد مااطب اله
يونس : البيت مو بيتك حتى تطردني

عبيد: لا بيتي واذا شفت خيالك هنا ارميك واكول الهم تعدى على بتي وكتلته
يونس : ضربت الباب حيييل افتحه جان يطلع مسدس وجهه عليه
عبيد : اذا مرحت هسه طلقه براسك واذبك للجلاب بعد جيه لهنا ماكو اخاف تحملتك جم يوم بعد مااتحملك
يونس : خلي اروح لبيبي واشوف شسوي
عبيد : روح لبيبيتك واذا رجعتك ازين شاربي واكعد بين النسوان

يونس : بقيت اغلط واعيط عليه جان يرمي بلجووو
عبيد : هذني بلجو البعدهن براسك
يونس : دومك ناقص وحقير جروني الجيران الطلعو على صوت الطلق
وكعدت بيت جيرانه جان رجال طيب وخوش انسان ردت بس تلفون اخابر بيه
جابولي وحجيت ويه بيبي جان تكولي
عمشه : يمه اكسر الشر وشوفلك مجان ثاني تريد تعال هنا ويه عمك اشتغل وعينا عليك
يونس : شتحجين بيبي اكلها طردني
عمشه : چا شنسوي يايمه اتلاوه وياه عبيد سايكته مريته واخافن يتسودن ويطكك جا انه اموتن وراك يايونس
كامت تبجي بيبي وتتوسل
عمشه : يمه اروحن فدوة لطولك ولشبابك كض الشر وارميه بلشط ولا تعلعلني اكثر ماانه معلعله وحك علي انه اموتن كل ساع واعرفن بيك متبهذل ومابيدي شى منتظره فرج ربك
يحلها

يونس : لتبجين هذا هو راح اخذ ملابسي وغراضي واطلع من البيت
عمشه : بروح امك الطيبه لاتندك بعمامك وعيفهم ملطمين وغمان ولاتحرك افادك ربك ياخذ حكك منهم چا حوبه اليتيم هينه
يونس :اختنكت حيل وسديته
بديعه : قبل بيوم من عركه يونس عبيد اجانه
لكربلاء ويعيط على عمتي مااستحه صار شكد مشايفها يشوف صحتها احوالها واحد عاق اجه يهددها بيونس اذا بقى بلبيت يگتله خلاص عمتي تفلت عليه وضلت تغلط وهو بقى يعيط ويهدد محد كدر يوكف بوجهه متخبل ميريد يونس وياه وعمتي خافت على يونس لان تعرف بسوالفهم اذا مو هو فمرته مراح تكعد راحه  لهذا من خابر يونس كالت اطلع جانت ميته قهر وحاطه الفوطه على وجهه وتنعي وتبجي
ابن مرتك صرت ياحيف وكفيت
ولاجني بصغر وياك وكفيت
سهري اعليك وي رباك وك فات
كل ذاكه نسيته وخنت بيه

بديعه : كافي عمه لاتتخربطين
عمشه : چا هو يونس لون شوي گبران عوده وكويان چا وحك العباس ابو راس الحار مايضلون ليله بلبيت انه اخلي يونس يتهجول بلشوارع وصالحه نايمه ومرتاحه اهمداني
انه گل خوفي لا يسوون جوحي وعبيد  شى يغدرون بيه لون عرفو
بديعه : شعرفو عمه سكتت وكالت
عمشه : دخليني ارتاح وربج كريم ماادوم چا هيه لون دامت ماوصلت ليهم
حسيت عمتي وراها شى وسكتت ومكالته
دخلتها لغرفتها وحيل بيومها تعبت وضلت الليل كله تنعي حتى دواها مشربته اني معودت صارت شويه احسن رجعت تعبت

يونس : دخل الرجال جيرانه وطلب منهم بس يدخلوني اخذ غراضي طبيت بعد ما الجيران كلهم كامو يحجون على عبيد وهو عود استحه الخايس صعدت للغرفه جبت جنطه عندي وحطيت ملابسي والمستمسكات وجم فلس ضامهم ونزلت
شفت صالحه بلهول كاعده وسما باب المطبخ تباوع بحقد درت وجهي منها و باوعت على امها  وكتلها
يونس : لتفرحين ذاك اخوج سكن الگبور شحصل متروس ذنوب ومكطع سمعت بيه مكتول بمداهمه وشايلي مكطع وباقي ايام مشمور خايس وفاحت ريحته يله لكوه
صالحه : اطلع بره لك ساقط جاي تحجي على اخويه اليسوه راسك وراس امك العايبه ام الزلم

يونس : تعرفين بيها اشرف منج ومن بتج لهذا دوم تحجين بيها حتى وهيه ميته تغارين منها لعد شكد جانت داقتج
الله يرحمها ماتت وخلصت من شكولج
صالحه : امشي سگط ابو رجل العاريه
يونس : ابتسمت وكتلها اني سكط الرجل مو سكط الشرف عفتها وطلعت صار بوجهي بلطرمه عبيد

عبيد : يله لك خلصت
يونس : خو انت لو تلبس شيله احسلك هااي مرتك ارجل منك زين شاربك واكعد بمكانها اقلها من يسألون ليش عمك شمرك مااكول من وره مرته اكول هو مره ومتحمل وجودي بلبيت
جان يجيت عليه يريد يضربني لزمه جيرانه وسحبني من ايدي وكاال يله ابني ماله داعي هذا الحجي امشي

طلعت وبيدي غراضي جيرانه مقبل اطلع من بيته جلب بيه انام عدهم خلف الله عليه
تمددت بعد ما فرشولي واني افكر وين اروح الليل كله مانمته
من الصبح تريكت وتشكرت من عدهم وسحبت جنطتي وطلعت امشي بلشوارع مالي مكان اروح اله اذا اروح لشرهب هيه حالتهم ضعيفه وهذا رجلها حقير اخاف يأذيها ومن افكر بناي استصعبها على نفسي لان اعرف بعمتها ولسانها ومااريد ابقى عاله على احد كعدت بلشارع والناس تمشي رايحه جايه الي رايح على رزقه والي للدوام وطلاب واني حاط الجنطه بين رجلي وصافن وين اروح

ساعتين واني على نفس الكعده لحد مصار وكت شغلي رحت للمحل وشاف ابو المحل جنطتي كتله اكدر ابات بلمحل وحجيتله ظرفي وقبل همزين انحلت سالفه نومتي
رجعت اشتغل جان السوك تعبان وحركه قليله يوميه انفجار والناس تتهزم وتخاف واحنا يوم بعد يوم الرزق اقل
جان المصبرني الم جم فلس حتى اخاف يصير شى وانطرد عندي فلوس اكدر اشيل نفسي كمت اكل وجبه بليوم اقتصد حتى بالاكل شرهب امر عليها وما احسسها بشى لان اعرف راح يخابروها اذا ناي او بيبي اريد تكلهم زين حتى ليضل بالهم

شفت ولد يلكط بلعتيك واتذكرت شغلي اتفقت وياه اذا احصل معدن قواطي ابيعهم اله وهو قبل المحل  يعزل العصر حدود ساعه ٦ اني اقفله واطلع افتر الكط قواطي مال ببسي وسفن وشكو معدن واخليهم بكونيه شجمع المهن وانطيهن اله وهو ينطيني فلوسهن اقلها يوميه المحل اضمها والاحصله من بيع القواطي اكل واعيش بيه

وبيوم الكط وانجرحت انشكت ايدي جان ويه الزبل كزاز هوايه منتبهت عليه شك ايدي لفيتها وحاولت اوكف الدم كل شويه يطك وكفت لم لان تأذيت رجعت للمحل وجبت براسيتول ودكيتها على ايدي حتى بس يوكف النزف باوعت بلمرايه على حالي وريحتي وايدي طكت دمعتي حيل انقهرت على نفسي كعدت بلكاع ومدنج وابجي المفروض اني رجال ماابجي بس مو بيدي الديصير بيه مكعد اتحمله ضربه وره ضربه مكعد تنعدل ويايه دوم عوجه
نمت بلكاع حتى مافرشت ردت بروده تلزم عظامي لان جمرت من القهر

ثاني يوم سبحت من الصبح واباوع على ايدي لفيتها وكمت انظف وكع اللفاف مهتميت كلت اكيد بعد مينزل دم منها بس لان امسح بلماسحه واضغط على ايدي رجع الجرح انفتح منتبهت من ثولي ونعاسي لان منايم زين ولزمت الملابس المعلكه اعدل بيهم واشوف خمس تشيرتات صاير بيهم دم كمت ادك على راسي
شسوي الهن اغسلهن اكيد يبين غسلت ايدي ونزلتهن اريد اشوفلي صوره حل سريع اجه ابو المحل هو شافهن تخبل كام يعيط ويسب وراد يضربني لزمت ايده
لتمد ايدك
اخذ غراضك واطلع بره فوك ماتالفلي ملابس لسانه شطوله صوجي اني الملفي واحد مثلك

رجعت للشارع مره ثانيه افتر من مكان لمكان والقهر كاتلني وهلمره نمت بلشارع رحت لحديقة الامه باب الشرجي وتمددت حالي حال السكاره والنشاله والمحششين ضميت فلوسي حتى لا انباك وحطيت جنطتي جوه راسي ونمت  هنا محد يسألك ولا يطردك
اباوع على حالي وين صفه الوكت بيه واباوع للسما واكول هم يجي يوم وتباوع لحالي تعبت حيل تعبت
كعدت الصبح وادور على شغله استرزق منها
شفت شباب تبيع كلينكس وصل مال سيارات بازه سحبت من فلوسي واشتريت بس حيرتي وين اضم جنطتي البيها ملابسي الرجال ابو المحل الشتريت منه الكلينكس انقهر عليه وكال حطها بلمحل ولتتأخر لان اعزل

كمت افتر بين السيارات واشتغل واكو ناس من تشوف رجلي وضعي تنقهر عليه وتشتري واكو بيهم ينطوني صدقه واني مااقبل لان اني مو مجدي اني اشتغل على باب الله
كمت شويه شويه اشتغل والم واالليل ابات بلحديقه
هواي يجون امريكان ومرات مفارز مال الشرطي من انطي هويتي ويعرفون ماعندي شى يعوفوني

وكل اسبوع امر يوم واحد على شرهب اطمنها انطيها ملابسي تغسلهم جنت اتحجج كدامها مابيه حيل اتعاجز اغسلهم تدري بيه كاعد بغرفه مأجرها متعرف نايم بلشارع اخذ النظيفات وانطيها الوصخات وارجع لمكاني للشارع جنت اسبح بواحد من المحلات بيه حمام صغير كلش كل كم يوم اسبح استحي اثقل على الرجال زين منه ومأمن ويقبل ومرات اسبح بحمام بلسوك
وابدل ملابسي المسحوكه
مر الشهر والشهرين وصار ٧ اشهر هاي تاليهه من السجن للشارع

ناي : دخلت بشهري ومبقى شى واجيب اتذكر بيوم من رحت اشوف جنس الطفل بلسونار شون عمتي من الباب تكول اله ابنيه لتوجع گلبك يمه وتروح وياها
وهو يكول الها ياريت بنيه هو اكو احلى من البنات ومن شاف بلسونار ولد ابتسم بفرح
وعمتي كل شويه تكول لتفرح تره يگلب مرات السونار مو صحيح واني اسكت مااجاوبها

رغم الفتور البينا بس ابد ماكسر بخاطري وطول هاي الاشهر من اشتهي شى يجيبه ومن اتعب يوديني طبيبه ماقصر ابد حتى مرات يتجادل ويه امه بسببي علمود الشغل صحيح تجوز كم يوم مني وبعدين ترجع اتعس بس يكفي من يشوفني تعبانه ميغلس يمنعني اشتغل او اشيل شى ثكيل وعمتي حارت طول هاي الاشهر شتعمل حتى بلكت يسقط بس اراده الله فوك كل اراده وعدت اشهر حملي بتعب
والخفف عليه مهدي وصده لامه ومن هاي التصرفات البسيطه المواقف الجمعتني وياه بديت اتعلق بيه وبديت اشتاقله رغم مايوم سمعت منه كلمة غزل او حب بس طيبة گلبه ويايه جبرني احس بأتجاه بمشاعر جديده

عطت بكل علوو حسي واني اطلك جنت خايفه ليصير بأبني شى
حوراء : شبيج ناي هااي شنو المي
ناي : لج اتكطع صيحي مهدي وعمتي
يدورون على مهدي ماكو وصوت حوراء خله صلاح يجي يركض
صلاح : شبيج حوري
حوراء : فدوة صلاح مشفت امي ومهدي
صلاح : امج يمنا بس مهدي طلع ويه عبد للخان (خان بني سعد ) ويتأخرون
حوراء : هاي ناي تطلك يمكن اتجيب
صلاح : اني راح اجيب سيارتي وانتي صيحي امي وامج يله

ناي : جريت العبايه وحطيتها على جتفي ونزلت وابجي اريد اوكف ردت اوكع
وهاي حوراء مدري وين راحت
طبكت السياره قريب الباب واجه صلاح يركض
تعاالي اصعدي ناي
ناي : استحيت وباوعت عليه شكول اله
صلاح : يمعوده مو وكت صفنتج شوفي حالج
ناي : اجتني الطلوكه حييل عطت متحملت ردت اوكع لزمني ويصيح انتي اختي لتستحين تعااي تجاني من ايدي وصعدني بلسياره واني حاطه طرف العبايه بحلكي اجت عمتي وام صلاح يركضون
وداد : مو صخام الصخمج غير تكولين عندي طلوكه

صلاح : هو بكيفها ياعمه هو هذا وكت هيج حجي ليا مستشفى ناخذها
وداد : مستشفى البتول بسرعه
ناي : وصلنا واني كلت راح اجيب بلسياره دخلوني للولاده لزمت ايد ام صلاح خفت احجي ويه عمتي ترزلني
خاله فدوة بلغي مهدي
ام صلاح : اي بنتي خابره صلاح جاي بلطريق
ناي : عياطي وطلوكتي خلتني انتهي
ضليت اطلك اكثر من ٥ ساعات لحد ماجبت
ابني واجه ضي عيني وروحي ( سيف )
طبعاً عمتي رادت تسمي فوزي بس مهدي مقبل كاال مااريد بيوم اغلط عليه معناه اغلط على ابويه وسماه سيف

فتحت عيني بعد تعب باركلي مهدي جان فرحان بأبنه حييل
كتله بلغ اهلي اريد اشوفهم
وداد : يااهل ناقصين هوسه وشعندج وياهم مو جبتي
مهدي : صلاح اخذ امي وامك وروحو
وداد : يااا ومنو يضل يمها لازم مره
مهدي : ام عبد راح يجيبها عبدو ويجي
وداد : لك بعدك مصارت اب غير كم ساعه وطردت امك
مهدي : يوم ماطردتج بس حتى ترتاحين
ناي : طلعت امه ادردم وبقينا وحدنا اني وياه
مهدي : خوما متأذيه
ناي : عدت  الْحٍمَدٍ للـّہ
مهدي : تردين اجيبلج شرهب
ناي : اريد اروح يم بيبي وعمه لكربلا
مهدي : لا ناي مااكدر لهناك وهم طريق والطفل ابن نفاس مو مال هذا الطريق اجيبلج اختج يمج اقلها هم تشوفيها وهم اداريج

ناي : بكيفك
شرهب : سمعت ناي جابت واني طرت واخيراً صرت خاله بلغت يونس وكال اني اوديج جان يعيط عدي ماكو روحه
شرهب : ليش مااروح
عدي : هي اختج عارفتج شايفتج سائله عليج مساعدتج بجم فلس
شرهب : ليش تريدها تصرف عليه والله خوش مطلع فلوسك الدافنهن
عدي : رجعنا مو كتلج مالج دخل بيه وبفلوسي
شرهب : وانت هم مالك دخل بأهلي خليني اروح لاختي تره انزل لعمي واحركه عليك وتاليها بيده يوديني
عدي : فد يوم الزم لسانج واكصه
شرهب : عود من يجي هذا اليوم بلغني حتى اطلعلك لسانه كله

شرهب : حضرت ملابسي ونزلت ركض ويه يونس جانت عمتي تسولف وياه ومسويتله اكل
يونس : بس اطب اسبح شرهب مالحكت وعيب اروح عركان وصخ هيج
شرهب : اي تعال اسبح وعندي ملابس نظيفه الك
طب سبح وبدل وطلعنا
ناي : وصلت شرهب ويونس عبالي مهدي يجيبهم تالي من سمعو همه اجوي
فارشين بلهول وشرهب تكمز تريد تشيل الطفل عمتي شافتهم خلت وطبت وركعت الباب ومهدي بقى يسولف ويه يونس حتى لينتبهه

بقو يمي ٣ ايام ومكدرت شرهب اطول كالت اذا ابقى الزم عمتج اسحلها بساتين ديالى كلها
بيبي وعمه خابروني مكدرو يجون لان بيبي تعبانه والطريق يأذيها بقى تواصلي الوحيد ويه اهلي هو التلفون
اما ابني عمتي لكت شى جديد تحاربني بيه وهو ابني متريده يتعلم عليه تريده يتعلق بيها شون تفكر وشتريد تسوي هاي المره حيرتني وتعبتني حيل

لك سيف وينك امي خرب
حوراء : شبيج تعيطين
ناي : لج عيني شكد حرك موتني
حوراء : خلي شرايده منه تلكي راح يم عبدو على الطيور اكيد شافه واخذه من الباب
ناي :غير اخاف عليه لج عمره سنتين ومرمرني من الوكاحه من يكبر اكثر شيسوي
مرت سنتين اي الدنيا تركض ركض احنا ٢٠٠٩ حالياً يمكن تستغربون ليش هاي السنتين مرت مرور الكرام لان بهاي السنتين كلشي متغير لا عمتي عدلت ويايه بلعكس تخبلت بلزايد ولا مهدي تغير بقى زوج جيد لكن مو حبيب
وتعودت على طبعه الشى الجديد بحياتي تعلقه بسيف هوايه يموت عليه  وكلهم يحبوه

اما شرهب محبلت بعد وهي مدايره بال كل ما اسألها تكول ميستاهل عدي يصير اب خليني هيج ماطول ميقبل يوديني طبيبه حتى ليصرف يطبه مرض خلي بليه خلفه وباقيه اداري عمتها وعمها ومتحمله وساكته

اما يونس منعرف شى غير هو يشتغل وكاعد بغرفه وكل فتره يروح على شرهب هم يطمنها وهم ينطي ملابسه تغسلهم حتى مكانه مندري بيه لحد مااشترى موبايل مستعمل حتى شوكت منخابر نلكاه وهاي بسبب بيبي الي دوم تنوح على شوفته اشتراه حتى من تريده تخابره
اما شديسوي وشيصير بيه وشنو العاناه كله منعرفه

اما عمه بديعه عايشين على شغل عمو فلاح وبيبي كدرت تمشي بس على عكاز وتتعب مرات وتكعد على الكرسي بس على الاقل تكدر تدخل حمام وحدها مو مثل قبل اله عمه بديعه
بينما عمه حيل تعبت وياها ودارتها ودوم بيبي تكلها الله يرضى عليج
بان رجعت لدوامها قنعت ابوها وكالت اله حتى اتخرج واتعين واساعدك وهو رجعها راحت بس سنه وحده عليها وسوت استضافه من المستنصريه لكربلاء
وتقرا ليل نهار حتى تنجح ومتعب اهلها بلمصاريف

صالحه وساهره كل وحده كاعده بيت ومرتاحات وعايشات افضل عيشه كلنا تأذينا اله هنه يفور الخير عليهن

اليوم كعدت على خبر صدمني خلاني مااندل دربي اريد اروح لكربلا جنت لازمه الموبايل مالتي لان مهدي اشترالي واحد حتى اخابر ومااطلب مال امه لان متقبل وهذا الشى فرحني دك عليه فتحت عيني واسمع صووت طاك گلبي عليه رغم قليل نتخابر بس هلمره المخابره غير مصدكت السمعته عطت وكمت وخابرت على مهدي وبلغته
وتوسلت بيه ياخذني لان جان عنده شغل وكال خليها غير يوم من لوعتي بجيت وكمت اتوسل انقهر عليه وكال
مهدي : يمعوده اوديج بدلي امري لله
شويه ودكت شرهب وهي هم ممصدكه وحايره شون تجي استحيت اكول لمهدي يجيب شرهب وضليت الوب لحد مخابرت كالت حصلت يونس وراح ياخذني نلتقي هناك

اي نركض كل واحد بجهه مثل الجهال ممصدكين بدلت لسيف وبدلت اني هم وجان مهدي ينتظرني بلسياره نزلت اركض والجنطه بيدي بيها غراض ابني حليب وحفاظات واتعثر بلعبايه الاسلاميه
وداد : خيرج من الصبح هاجه وين رايحه
ناي : لكربلاء
وداد : شكوو

ناي : سمعت هورن مهدي وكتلها عمه بعدين مهدي يفهمج وعفتها وطلعت اركض لوبيدي اطلع بطياره لو اغمض وافتح والكه روحي هناك
اني ابد مرايحه الهم ولا وصلت بس شرهب قبل سنه اخذها يونس وبقو اسبوع اما اني مهدي مقبل وبقيت ولا وصلت خلصتها مخابرات
اباوع للطريق ودموعي تنزل اريده يخلص شيخلصه شيوصلني

وصلنا للمنطقه الكالو عليها مانندل خابرنا عليهم طلع عمو فلاح وصف لمهدي اول مطبكنا بلباب من حلات روحي ممصدكه شمرت سيف على مهدي ونزلت اركض بدون ابني بدون اي غراض نزلت بروحي اركض حتى على عمو فلاح مسلمت وهو بلباب طبيت ركض وجان اشوفها كدامي وركضت ابجي فتحت ايدها اليه ونزلت دمعتها من شافتني  لج عمه رجعتي ممصدكه شمرت نفسي بحضنها واعيط وابجي
خوله : ياروح عمتج وعيونها

يتبع ...