شفاه مخملية

Part 8

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

للكاتبه: زهراء السلامي.

لسان حال غزاله💔..
#اي وأنتَ گلش ذنِب
چم ليل عِندك رخص يالحاسبك غالي
مالي فراغك چنت بَس أنتَ مو مالي .

♛ ♛ ♛ ♛ ♛ ♛ ♛ ♛ ♛ ♛

-فيصل: مرتضى نهى ؏ غزاله جدام الشيوخ كلهه!!

-سلمى(ام غزل+ فيصل): شنووو؟؟؟؟ تخبللللت فيصللل شنو هالحچي!!! شلون قبلت بهيچ شييي

-فيصل: مو بيدي يووم يعني بنص الشيوخ والوادم وصاح اريدن بنت عمي ونهى عليهه

-حجية عطيه بفخر: وكفوو زلمه ؏ اخيه وابيه

-سلمى بصياح: عممممممه شدتگولين شنوو زلمه!!! هوه بأي حق ينهي عليهه!!

-حجية عطيه: حسچ ماهيسه (صوتچ ماسمعه) ولد عمهه ورادهه چا شنهو ينتظرهه تروح للغرب

-سلمى: لاااا انتو اكيد تخبلتووو

-هجران(علت الاصوات والمطبخ انخبص وعمه سلمى تبچي وتصرخ بعلو صوتهه، وبيبي عطيه فرحانه والضحكة تارسه وجهها.. راحت عيوني ؏ غزاله واگفه مبحلقة عيونهه مبين مدهوشة

راحت عمه ؏ فيصل تدگ ؏ صدره وتبچي وتگول

-سلمى: ولك لييييش هيچ اختك ثگيله عليك هيييچ ترضى ينهون عليهه وانته توگف تتفرج

-فيصل: يمه لخاطر ربچ شبيدي انه رحمه لوالديچ رحميني اذا هوه ابوي سكت وما تجرأ ونطگ شي تردين انه الوليد احچي

-سلمى: هوه وييينه ابوووك اني اله اليوم

-حجية عطيه: اليوم انعل شيب الخلفوچ يالسوسه منهو هذا الي تتحلفيله يالمربايه

-سلمى: ولكم يبوووو علييييه صيحلي ابوووك فيصل صيحه لا هسة اگلب البيت گلاااب

ثواني ونشوف عمو خليل ؏ راسنه، علامات الدهشة لسه ؏ وجهه توقعته رح يطب يصيح بينه لان اصواتنه عاليه واحنه نهدي بعمه سلمى

-سلمى: يبوووو خليل شلوووون ترضاهه ؏ بتك يبوووو يا حظچ يبنيتييي مارحتي اله لـ مرتضى يبووووووو

-خليل: سلمىىىى حسسسچ عالي

-سلمى: وانته هذا الهااامك صوتي عالي!! بنتك الوحيدددة ينهون عليهه بين الزلم وماعندك جرأة ترفض!!!

-خليل: سلمى شمالچ شنهو انتي ماتعرفين النهوة شونهه لو اذبح روحي ماكدر اسوي شي بَـس افشل رويحتي جدام الوادم!! ماتنحل اله مرتضى يفكهه من يمه

-سلمى: هوه وينه مرتضىىىىى سوة سوايته وذبح زلم وخبصنه وخبص اخو من وره رعونيته وهيلگته تالي ينهي ؏ بت عممه!!! اني اله اليوووووم عينه ؏ بنتي موووو يبوووو ياحظچ يمگرووودة

عمو خليل عجز يحاچيهه وهيه ؏ صريخة الوحده، حاولنه ندخلهه لوحده من الغرف وهيه متقبل اله توگف بالمطبخ وتصيح "اله افضحكم واخزيكم يبيت الشيخ" ، بيبي عطيه تصيح بيهه وتردلهه كل كلمه بعشره، اما غزل المسكينه واگفه وماكو أي ردة فعل منهه بَـس الدموع بعيونهه وساكته

-خليل: بسسسچ سلمى!! انه من الاساس ردتهه لواحد من ولد عمهه بعد هيه اجت ؏ رجليهه ونهى مرتضى عليهه

-سلمى: اييي ليييييش اله مرتضى ينهي عليهه لييييش مو عميد الدين

-خليل: يعني شلوووون اذا الزلمه ما هاويهه ويشوفهه مثل بنيته نغصبه ؏ شي مايريده!!!

-سلمى: اييييي وتغصبون بنيتيييي ؏ ابن عمهه الساقط

-حجية عطيه: ولچ طمممه تسكتين لا وحگ علي اجيبن مرجانه تحوس بفادچ منهو الساغط غيرچ يالسحليه

-دلال(العمه): سلمى ؏ بختچ شمالچ خية شوف البت ساكته (قصدهه ؏ غزاله) يعني اكيد موافقه

سلمى: لاااااا مموافقه اني اعرف بنتي واعرف شنو براسهه والبگلبهه!!! ولكم حراام عليكم حرااام طفله تزوجوهه بهيچ عمررر لييييش

ركضت غزل جوة تبچي، راحت وراهه شهد وجوري وندى اما اني وجواهر رجلينه جامده ماتحركنه من مكاننه، جواهر همستلي

-جواهر: حيجي عميد الدين يموتهه

-هجران: اكولج حقهه لعد بتهه ينهون عليهه وترديهه توگف تتفرج

-جواهر: ولچ لااا هيه مو هاي غايتهه هيه تدگ وتشگ ؏ عميد الدين

-هجران: جواهر من كل عقلچ!! ولچ الرجال بگد ابوهه

-جواهر: لو چان عميد الي ناهي عليهه حلگهه متفكه وتكيف وتلگيهه تهلهل وترگص بَـس لان مرتضى وهيه متحبه

-هجران: لا لا مستحيل ولچ انتي شدتحچين

-جواهر: ولچ خاالتي واعرف شنو براسهه، هذا وجهي اذا متطلع السالفه هيچ
ً
وفعلاً صدقت جواهر، دخل بكر الوجه احمر وعروگه ناطه، تلگته سلمى

-سلمى: وينننك يالهيبببة يا اخوووهه يمدللهه وينك بكرررر ترضاااهه يصير هيچ بأختتك

-بكر بعصبيه: عمه لخاطر الكائنات حسسسچ انفضحنه بين الوادم

گامت تضرب ايد بأيد مثل التصفگ وتصيح بعرامه

-سلمى: اييييي انتو كلكم نفسسسسس الطگعه يهمكممم بَـس صوتنه ليطلععع بناتنه يرحن فصليات ونهوات وانتو حايرين بهيبتكم وسمعتكم بين الناس

-دلال: رحمة لوالديچ سلمى بسچ خيتي خلينه نتفاهم بهدوء

-بكر: عوفيهه عمممه هاي لسانهه متبري منهه وماتگدر تكظه

-سلمى بشهگه: هيچ تحچي عليييه ولك بكررر تحچي ؏ مرت ابوووك!! اسمع خلييل اسمع ابنك المؤدب

-خليل بعصبيه: سلمممى بسسس شني هالعياقة ولچ لسانچ لسان دلاله!!!

-حجية عطيه: عوفهه خليل يبعد امك هاي مريتك جلدهه يحكهه ييبهه ليه (جيبهه الي) اسگطهه بهااي (رفعت العوچية)

-سلمى: يبوووووو صيحولي الشييييخ وينه الشيييخ فحل الفحول ؏ گولتكممم وينه!!! گضاهه غزل مثل بنيتي وتاالي اتفق هوه واخو عليهه سووا سوايتهم وكسروا گلبهه و...

قطع صياحهه دخول عميد الدين للمطبخ، زئر مثل الاسد المفترس

-عميد الدين: شمااااله عميد الدين شماااله طرگاعه كلما سويتو سوايه ولطشتوهه بي شمااااله!!!!!

-خليل: عمي عميد شمالك عفت الوادم وجيتنه

-عميد الدين بعصبيه: راحوا الوادم انفضحنه وتخزيييينه من اصوات النسواان وعلي الاسمع حسهه اطرهه نصين

وفعلاً الكل سكت حتى الزلم، عيوني ؏ بكر وجهها ينطي اللوان من العصبيه اكيد ضاج لان نهوا ؏ اخته

اشرتلي امي ادخل للغرفه واروح اشوف غزل، خطيه دخلت واشوف حالتهه تكسر الگلب دموعهه عشره عشره ورهف حاظنتهه وتهمس بأذنهه

-حلا: غزل بسچ يرويحتي لا تكدرين عمرچ

-رهف: غزاله گولي شي لا تسكتين شمالچ

-جوري: بنات شبيهه ليش لسه ماحچت شي؟

-شهد: سوده عليه اكيد مصدومه

-جوري: اكلچن شدعوة هالدراما السووهه جوة، خو اذا متريد مرتضى خليهه ترفض وانتهى الموضوع!

-حلا: مايصير النهوة لو اكبر واحد يتدخل ما تفك اله مرتضى يصيح بين الزلم انه ماريدنهه وفكيتهه مني

-جوري: اووّك خلي يسوي هيچ، غزل حاچي انتي وگوليله ماريدك وماحبك

-رهف بقهر: اي غزاله حبي حاچي واذا ماسمعلچ گولي لأبوي اكيد مايسكت عنه

-هجران: ايي خوش فكرة انتي مو تكولين عميد يحبچ وميقبل عليچ اكيد يوگف وياچ

ساكته متحچي شي المسكينه، بَـس دموعهه تصب وتنوح بقهر، اجتنه امي گالت رح نرجع لكربله وبابا منتظرنه بالحديقه، حظرت غراضي بسرعه وودعت البنات واحنه بعدنه بالصاله جاي نودع بيبي عطيه وعمه دلال، فززنه صوت عميد الدين، رعد بصوت خلانه نتراعش اول مره اسمع صوته هيچ عالي وهوه صوته من النوع الخشن والقوي يبووو انخلست

-عميد الدين: مرتضىىىىىىى وييينك ولك صخااااااام

جوري همستلي بخوف

-جوري: يبوو انلاصت

-ندى بهمس: وبدأت الحرب بين الاخوان حرمات حنفوت الاكشن

اجه مرتضى الوجه محتقن والعيون دم شويه وينفجرن

-مرتضى: هاا خوية؟

-عميد الدين بعصبيه: عسى مات اخوك كول امين ولك طرگاعه شنهو ناهي ؏ بت عمك!!!

-مرتضى: وين المشكله؟

-عميد الدين: ولك شنهو وين المشكله انته تلعب علييييييّ!!!!

-حجية عطيه: يمه عمييّد يواشك ؏ رويحتك يبعد حبوبتك لا يوگف گليبك من العصبيه

-عميد: حجييية ليش السواه هالاغم يخليني ارتاااح

-مرتضى: عمييد شمالك وياي شني كفرت!! لا والله تريدني اشوفنهه تروح فصليه لمروان السگط ولزم اسكت واتفرج

-عميد: من اشتعل مروان وخلفتتته واحد واحد بجاه ابو فاضللل ولك النهوووة موش حللل يا زماااال انه ردت افكهه وياه واساومه بفلوووس واحشي زردومه

-مرتضى: واذا ماقبل!!

-عميد: غصباااً ؏ الخلفوو يقبل ولكك لييييش نهيت ؏ البت واذيتهه يعني انه ماعندي لساااان وانهي عليهه!!!!!

-مرتضى: لان انه اريدنهه وانته ماتريدهه وهنا الفرق

-بكر بعصبيه: مرتضى هسسسسه تفك النهوة هسسسة

-مرتضى: وحگ هوه علي مافكنهه

-فيصل بصياح: ولك مرتضىىى شمالك تخبلللت علينه!!!

-عميد الدين: مو بكيفه باااچر يفك النهوة بين الزلم والشيوخ كلهه هوه ياهو اليكسر چلمتي

-مرتضى: خوية چلمتك ؏ راسي من فوگ بَـس انه اريدن البت وماريدنهه تروح لغيري

لهناك وطلع عمو خليل من الغرفه، عاط بجملة خلانه مصدومين

-سيد خليل: انه مارضى يفك النهوة، انه من الاساس اريدنهه لواحد منكم (اشر ؏ عميد ومرتضى) ومرتضى طلبهه مني وحاچاني عليهه گبل لا تصير السالفه ورادهه ليه وانه انطيته چلمه البت تكبر وياخذهه بعباتهه

-عميد: بَـس عمي..

-سيد خليل: لا بَـس ولا هم يحزنون بسكم طولتو السالفه وعرضتوهه ابن عمهه ونهى عليهه وجدام الكل وانه احبنه مرتضى ومتأكد يحافظ ؏ وحيدتي

-مرتضى بفرحة: احطنهه ببطن عيني عمي

-سيد خليل: ادري بيك، ويله سدوا السالفه البت وراح تروح لابن عمهه موش غريب، اهم شي ماراح ننطي فصليه ولا دم وگدرت انته شيخ عميد تحل السالفه بذكائك وفطنتك هاذ هو وفنه اليحچي فوگ چلمتي ويعارض وحگ هوه علي اغضب عليه

-حجية عطيه: وكفوو يبعد امك من اغدي سبع فدوات لهلهيبه يبن بطني، من اشتعلو مروان وخلفته واحد واحد بجاه ابو فاضل ؏ هالفصول الناقصه

الكل سكت ومحد اله جرأة يحچي فوگ عمو خليل، انصدمت حتى سلمى صوتهه اختفى وين جانت تلعلع بره بَـس واضح تخاف من عميد الدين لان من دخل للبيت هيه سكتت، اما بكر وعميد الوجوه مگلبه عبالك ماتلهم ميت وواحد يباوع ؏ الثاني بحيره

ودعنه سيد خليل واصرّ ؏ امي ينطينه لحم، بابا هواي خجل بَـس عمو خليل نفسه طيبه ويدري بينه ماعدنه امكانيه نشتري هيچ لحم وهالگد كمية

شلت العلاگة يا فاذر يا بويه انهبدت ايدي، اتوقع فوگ العشر كيلوات هاي او يجوز ذبيحة كامله.. شايلتهه وگوة امشي بيهه، حسيت بواحد شالهه نيابة عني، درت وجهي اباوع واذا اشوف "بكر"

-بكر: انطيني عنچ

-لا عادي اگدر اشيلهه

باوعلي ورفع تك حاجب، قهقه خفيف

-بكر: اي واضح انتي شيلي رويحتچ هسة

-شنو قصدك؟

-ماگصدي شي

-شنو يعني اني سمينه مثلاً

-هههههههههههه لچ بويه وين السمن انه گلت سمينه

-اي مو انته تگول شيلي روحچ بالاول يعني واضحة سمينه

-ههههههه لا منيلچ سمينه هالگدادتچ چنچ عصفورة

ابتسمت ؏ حچايته، اساساً فهمت قصده بالبدايه بَـس ردته يسولف ويايه

-هجران: بكر شصار بالموضوع؟ عميد الدين لسه رح يكتلو؟

-لا لا اسم الله خلص فضيناهه وياهم

-هااا شلون انته مو گلت السالفه تخوف واكيد يروح منكم واحد؟

-بكر: ذول سالفتهم طويله واصلاً من گبل عدنه ثار وياهم ودم بيناتنه بَـس مروان النجس تجاسر علينه وعود راد يطلع بطولاته ويفشلنه جدام الوادم واجه بيوم الناصرية كلهه متجمهرة يمنه حتى عود يفضحنه بَـس عميد خوش خلسه ولطه ؏ حلگه

-شسوه؟؟

باوع عليه ورجع نظره ؏ الطريق

-بكر: هدده ياخذ منهم فصليتين

-يااا يعني لافهه عليه؟؟

-بكر: لا ما لافهه عليه لان گتلچ من گبل عدنه ثار وياهم وماخذينا

-ليش ما اخذتو؟

تنهد بعمق واردف..

-بكر: لان چان انفضحنه وانشهرنه

-عزااا ليش؟؟؟

صفن بيه عبالك شلون الي فلت لسانه، ظل ساكت وماحچة شي بعد، وصلنه للسياره

-بكر: يله طبي بالسياره وتوصلون بالسلامه

-الله يسلمك

-دگي عليّ بَـس توصلون

-ابتسمت: بعيني

الطريق كله اني مبتسمه وفرحانه، هم عميد الدين مراح يصيرله شي وهم ولا وحده من البنات حتروح فصليه والاهم من هذا كله دا احس بكر زين ويايه ويسولف ويباوعلي يعني حسيت روحي صدوك مخطوبه بعد مدة دامت الشهر ونص

وصلنه للبيت ودگيت ؏ بكر حاچاني لمدة لا تجاوز التلاثين ثانيه، اسمع هوسة وخبصه يمه مبين هم علگت.. اوووف الله يساعدهم

مشت ايامنه طبيعي ماكو شي مهم بَـس بالي يم غزاله وخايفه عليهه حتى متجاوب ؏ اتصالاتي ولا رسائلي، فَـہ اني اتصل بـ بكر واسأله عنهه يگول حتى ميشوفهه اله نادر، اما علاقتي وياه هواااي تحسنت حتى من ادگ عليه يجاوبني ويضحك ويايه ويحشش صح عصبي وبسرعه يزعل بَـس اني خوش مداريته واخاف عليه وع مشاعره

ويوم بعد يوم واتصال وره اتصال صرت مو بَـس احبه لاا اعششقه وهوه اويلي شگد محبوب وسوالفه تجنن داااائماً يحچي بعميد الدين وسوالفهم سوه، فد يوم اتصلت بي جاوبني

-هلوو حبيبي

-بكر: يا هـلا

-هجران: هاا وينك اليوم ظل بالي

-بكر: سلامة بالچ بَـس اليوم طلعت اصيد

-يااا شتصيد؟؟؟

-هههه شمالچ ولچ اصيد طيور چا شنهي

-هاااا شگد حلوو زين رايح وحدك؟

-لا انه وعميد والولد والبنيات هم ويانه

-هااا يعني يطلعن البنات وياكم عادي؟

-اي چا ليش

-هههه لا مو عبالي عدكم تعقيد من هالناحية مال ولد وبنات

-بكر: لا ماعدنه حتى ؏ الاكل الطلعات السفرات دائماً سوه

-هجران: هاا شگد حلوو، زين شنو مناسبه هالطلعه؟

-عادي حنه دومنه نطلع نصيد بَـس اليوم اجه اخوي عثمان من الانبار وحنّ وونّ اله نطلع نصيد وطبعاً مايرضى بطلعه عاديه اكييد يريد البنيات ويانه

-هههههههه ليش عود؟؟

-بكر: بعد سوالفه هاي

سمعت صوت بنات ورجال قريب عليه، صار عندي فضول اسأل منو

-هجران: بكر حبيبي منو يمك؟

-بكر: هذا عثمان ورهف وجواهر

انگطع نفسي من گال جواهر يمه!! اني نسييييتهه ونسيييت اليوم الشفتهه طالعه من غرفته!!! حتى هالكم يوم ماحچي وياهه هواي لان دائماً تگول مشغوله وجاي تدرس، سألت واحس روحي طالعه

-هجران: هااا شنو ديسوون؟؟

-بكر: هيچ گاعد عثمان يطلع بطولاته عليهن

-هجران: امممم

-يله محتاجة شي؟؟

-لا سلامتك

-ثيمالا

سديت الخط واني منهااارة شبييه ليش احس نار بگلبي تلهب، دگيت ؏ جواهر بَـس يطلعلي مغلق لييييش غالقه موبايلهه؟؟ اوووف يمممه شسووي!! ماحسيت ؏ روحي اله اني ابچي بقهر، اهمدايه لييش ابچي هوه شكوو شصاار بَـس اوووف ويه راسي والافكار الدتجيني.. گعدت اتخيل واألف سوالف وقصص براسي واموت روحي بالزايد

نمت بليلتهه واني ميته قهر، اتصلت بـ بكر وماجاوبني ايي اكيد ميجاوبني اذا يمه الحسن كله والدلال والجمال شيسوي بيه الچلحة

گعدت الصبح نظفت وطبخت كالعاده، گعدت بالغرفه ارتاح واجتني جوري

-جوري: هجران اگولج هذا فيصل البارحة اتصل بيه وگال ابو اكل راسه علمود زواجنه

-هجران: اي وشسويلكم؟

-ماريد اتزوج هسسة ترا صارلنه 3 اشهر مخطوبين بسسس

-هجران: جوري ماعرف روحي حاچي واتفقوا

-وانتو؟؟

-منو احنه؟

-انتي وبكوري شوكت؟

-هجران(ضربتهه ؏ راسهه بخفة): اني كم مرررة اگولچ لتصيحيله بكووري هااا

-جوري: ههههههه تغارين عللليه

-طبعاً اغار عليه

-هههه اووّك اووّك يله هسة ماگلتيلي شوكت عرسكم؟

-مادري ماحچينه بهالموضوع

-لااا بشرفچ!! وچ اني وفيصل حتى اسماء جهالنه سميناهم من هسة

-اييي احنه مو مثلكم

-جوري: ليش انتي مو تگولين علاقتكم زينه؟

-اي زينه بَـس استحي احچي وياه بهيچ مواضيع هسة شيگول عني

-جوري: هسة يگول مشتهية ومستحية ههههههههه

-طاح حظچ

-يبووو شبيچ انتي كئيبة وگالبه الخلقه هسة غير افتهم شنو يدور بهالصماخ (بهالراس)

-هجران: اووووف جوري اووووف حمووووت

-اسم الله شبيچ ولچ

-هجران: طبگي الباب وتعاي احچيلچ

حچيتلهه الموضوع كله وشلون شفت جواهر تطلع من غرفه بكر والحچي السمعته، جوري هواي تفاعلت وبالنهاية صفنت بوجهي، وگالت

-جوري: اييي وبعدين شصار؟؟؟

-هاهية شصار يعني

-جوري: اكيد تشاقين صححح؟؟؟

-ياااء هاي شبيهه دتشوفيني اضحك

-زعلانه ومقهورة لان شفتيهه تطلع من غرفته بسسسس؟!!

-لعد شنو ترديني اسوي اهلهل؟؟! عليچ الله انتي لو بمكاني شتسوين؟؟

-جوري: ارووح اسحلهه من شعرهه واطييييح حظهه

-ياااء هاي شبيچ مو هستوچ تگولين دا ابالغ

-ومنو گال تبالغين!!! اصلاً قصرتي ما رحتيلهه وشگيتيهه نصين

-اوووف جوري شسوي هسه؟؟؟ اكيد صارلهم شهر ويه بعض والله اعلم شيسوون

-اني اگولچ شيسوون تلگيهه شابعه بي وبحظنه

-هجران(گمزت من مكاني): حقييييره ليش هيج تحچيييين

-انتي سألتي واني جاوبت

-اووووف وانتي تزيدين عذااابي

-سمعي لللچ هسة تتصلين بهالساقطه وتسحليهه ذهاباً واياباً لا اني اسحلهه وافضحهم واشهرهم

-ولچ اخاف اسوي هيچ وميطلع بيناتهم شي

-هااا هم صح، شوفي اتصلي بيهه واحچي وياهه حاولي تجرين لسانهه وتحچيلچ كلشي

-واذا طلع بيناتهم علاقه؟

-تعوفين بكر والخلففف بكررر وتلعنين والدييي

-هجران(گمت ابچي بحرگه): ماااگدر احببببه

-حبته حيييه ام سبعين راس ولچ هجرااان لتصيرين عوبه ترا بعدين يطيح حظچ وتعيشين بالذل من هسة دوسي ؏ گلبچ وعوفي احسن مما بعدين يصير بينكم جهال وعشره وتاكليهه

-اششش جوري سكتي راسي حينفجر من القهر

-جوري: حبيبتي شبيييچ انتي بالعكس الله يحبچ اذا بوقت الخطوبه اكتشفتي هالشي

-انتي تحچين صدُك ايي اتطلگ من بكر بعد منو يگلبنييي

-وليش عيني شبييچ

-شبيه هم جگمة وهم مطلگة

-جوري: فااسخة مو مطلگة هاي واحد ثنين هسة عوفچ من اللغوة واتصلي ؏ جواهر وافتهمي السالفه كلهه لنظل نندب حظنه ونتبچبچ

هزيتلهه راسي بـ "اي" واتصلت ؏ جواهر، كالعادة يدگ هواي ومتشيله ماعرف شبيهه وليش هيچ متغيره؟؟ چانت تحبني ودائماً تحب تتصل بيه وتسأل عني بَـس شغيرهه عليه وخلاهه جاحده ويايه مادري

جوري گلتلي انطيهه مجال وارتبلي فد محاورة براسي حتى متشك بشي وتحچيلي كلشي بدون متحس

وفعلاً ثاني يوم وره ما ابويه واخواني طلعوا للشغل سمعت موبايلي يدگ، چان المتصل "جواهر" جاوبته بسرعه

-هلوو جواهر

-جواهر: هـلا يروحي شلونچ هجرانه الحلوة

-هجران(اتنرفزت من گالت "هجرانه الحلوة" مادري ليش حسيتهه جاي تضحك عليه لو تستهزأ): الحمد لله زينه انتي شلونچ؟

-اني الحمد لله تمام، البارحة عذريني لان مجاوبت بَـس والله هذا موبايلي موتني يعلگ وميشتغل صاير حتى من اريد أجاوب ؏ احد ماگدر، عاد اليوم بكر اشترالي هذا وبدلته

-شنوو؟؟ منوو اشترالچ؟؟؟

-بكر

-هجران(يمممه من اشتعلتي شعل عساچ فوگاهه بكل عين صلفة تگولييهه): هااااا

-جواهر: ايي المهم شخبارچ امورچ

-اني صافيه دافيه الاخبار كلهه يمكم

-جواهر: اييي ولچ البيت يوميه هوسة ومگلوب گلاب

-يا ستار ليش؟

-يعني ماكو شي جديد عشاير وشيوخ وعمايم واشتعلو مروان وخلفته و و و... سوالف زلم احنه شعلينه ههههه

-؏ گولتچ، شونهه دراستچ؟

-اوووف يا دراستي دمرتني وشلعت گلبي ولچ داده اني شگلت لروحي ودخلت صيدله لااا فوگاهه عدت سنتين بالسادس حتى اجيب معدلهه

-هجران: صدُك انتي شعجب رحتي جامعة ذي قار؟؟ ليش مو جامعه بغداد؟؟

-گامت تمتمت: هااا لان شسمه.. اني احب جامعه ذي قار واحب خالة سلمى فَـہ ردت هنا

-امممم تحبين خالة سلمى

-اي هواي احبهه واحب غزل وفيصل و..

قطعت حچايتهه وماكملت، هه خوب گوليهه وارتاحي تحبين بكر

-هجران: ايي وبعد منو تحبين؟

-جواهر: ههههه احبهم كلهم

-هجران: هااا اگولج جواهر...

مالحگت اكمل السؤال، سمعت صوته!! صوت حبيبي "بكر" اجه يحاچيهه ولان صوته عالي گدرت اسمع محادثتهم بوضوح

-بكر: جوهرة اگلچ شلونه نقالچ الجديد؟

-جواهر: حلو عاشت ايدك

-بكر: هاا صگد؟ يعني مرتاحة عليه؟

-جواهر: اي هوااي احسن من مالتي القديم

-بكر: ها زين اگلچ شنهو طالبته من مرتضى؟

-جواهر: گتله يجيبلي نميات

-بكر: جواهر انه شحچيت مو گلت ماتطلبين من واحد غيري!!

-جواهر: بكر انته مچنت بالبيت واني اشتهيت چبس ونساتل فَـہ گلت لمرتضى يشتريلي

-بكر: حتتتىىى لووو تحتاجين غرض انتظريني انه اجيبه فهمتي لو لاا

-جواهر: تمام ماشي

-بكر: ديري بالچ لا تحترگ يدچ الدهن يفور

-جواهر: تمام

طوول المحادثه واني ميته گلبي مجمر منهم، رجعلي صوتهه

-جواهر: هاا هجرانه ويايه؟؟

-اي

-ايي وين چنه نحچي؟؟

-هجران: اختچ شهد شلونهه؟

-اوووف منهه شهد نايمه ؏ الكتاب نيوووم سچاچة مو بيدهه

-هجران: اي خليهه تدرس احسن مما تلتهي بسوالف ثانيه

-وداعتچ هم ملتهية بسوالف بَـس هاي اختي متحچي وسكوتيه

-هجران: مثلچ

-انييي؟؟؟

-ايييي

-جواهر: يمته اني سكوتيه اني كتاب مفتوح

-هجران: المهم عوفچ من هالموضوع انتي وين گاعده شو دا اسمع صوت دهن يفور؟

-اي اني بالمطبخ دا اگليلي بتيته جوعانه متغديت وياهم

-هااا، اءء جواهر؟؟

-ها حبي؟

-جواهر اسألچ سؤال وتجاوبيني بصراحة؟

-هههه حسب السؤال

-ليش عود؟

-لان اكو سوالف سريه وماگدر احچي بيهه

-اممم لعد سؤالي هم مراح تجاوبي ادري

-لا اسألي يجوز اجاوب

-هجران: جواهر انتي تحبين؟؟

ماراوغت بالكلام چطيتهه بوجهه مابيه حيل اسأل واسولف وياهه واني شاكة عدهه علاقه ويه خطيبي

ظلت  ساكته عبالي انگطع الخط

-هجران: الووو جواهر ويايه؟؟

-اي حبي وياچ

-هاا عبالي انگطع الاتصال

-لا موجودة

-ايي ماجاوبتيني؟

-ليش تسألين؟

-فضول!

-لا مو فضول

-لعد شنو قابل

-جواهر بثقه: انتبهتي ؏ نظراتي؟

-شنوو؟؟

-جواهر: انتبهتي لنظرات عيوني عليه؟؟

-هجران(حسيت گلبي وگع ببطني يعني الحچي صدُك اوووف يا نار گلبي اتمنى اطبلهه بالتلفون واملخهه، متت قهر من اردفت بثقه

-جواهر: اي احب ومو بَـس احب عاشقه

-هجران(گلت واني صوتي يرجف): منو؟

-جواهر: تردين تعرفين اسم حبيبي؟

-اييي

-جواهر: لحظة هجران ثواني

-هجران: الووو جواهر وييينچ احچييي!!!!

اسمع صوت عياط يمهه، وصوت بنيه تبچي قوي.. مبين شمرت التلفون وراحت واني اسمع وشوشه، بَـس ميزت صوت عميد الدين يصيح..

-عميد الدين: بووويه غزززل شمااالچ جوااهر شمالهه غزلل ولكم شصااير؟؟؟

يتبع☘️...

♛ ♛ ♛ ♛ ♛ ♛ ♛ ♛ ♛ ♛
رمضان كريم جميلاتي ان شالله شهر مليء بالطاعه والرحمة والغفران والله يبعد عنه وعنكم السوء والوباء✨🌙