كان نفسي اقول الكلمتين دول
من ١٨ سنة .. فعلا كان دة حالنا !!!!
بوست عميق ولمس حاجات كده الواحد نساها 😓
مش حيحس بالكلام ده غير المنتقبات والمختمرات القداااامى بسسسسس
👇
( واشوقاه إلى أوقات البداية)
بقالي يومين من ساعت ما قرأت الجملة دي للجنيد البغدادي رحمه الله وأنا عمالة استرجع وافتكر تفاصيل جميلة من أوقات البداية...
التفاصيل جميلة..بس استرجاعها في الوقت الحاضر قاسي جدا وصادم!
افتكرت الرفاهية اللي حسينا بيها لما ظهرت النقابات اللي بطانتها ناعمة، كانت بطانة النقاب طبقة تقيلة بتوبر بعد الغسيل وتبقى خشنة على البشرة ومتعبة في التنفس.
كنا بنسأل ساعتها النقابات الجديدة دي أمان؟ يعني بتغطي الوجه كويس ولا عشان خفيفة ممكن متكونش ساترة زي التانية؟
افتكرت واحنا بنسأل بعض على الجوانتي أبو وردة ينفع يتلبس؟ : )
واللاميه اللي بيلمع ده مش ملفت؟
كان اللبس عند المنتقبة ده موضوع كبير، وتفاصيل كتير
وكل حاجة معمول حسابها(الهوا، ركوب المواصلات، رفع الايد....)
حتى النقاب نفسه كان له هيبة كدة وطبقات كتير فوق بعض...
وبعد كل التفاصيل والاحتياطات تقوم المنتقبة بقا تلبس فوق كل ده حاجة اسمها ملحفة😅 (شيء عظيم كدة ممكن يتفصل منه ٣ دريسات من اللي بيتلبسوا دلوقتي)
كانت اللي بتقرر تلبس النقاب فاهمة انها لما تغطي وجهها وإيديها يبقى كل ما سواهما أولى بالستر والتغطية،
وانها اختارت درجة أعلى من المححبة والمختمرة ولازم تبقى قد المسؤولية...
المختمرة كانت بتلبس خمار بجد، واصل لحد الركبة وتحته هدوم واسعة وفضفاضة، والألوان وقورة وهادية.
كان شكل الحجاب العادي مع البنطلون شاذ جدا مهما كان البنطلون واسع كنا بنستغرب إزاي محجبة ولابسة بنطلون!
كانت كل حاجة منطقية، والحدود بين درجات الاحتشام واضحة ومقنعة...
المحجبة فاهمة ان في حاجات أولى من شعرها بالستر، وان اللي كانت بتلبسه قبل الحجاب مبقاش ينفع يتلبس بعد مااتحجبت..
والمختمرة فاهمة ان الخمار أستر من الطرحة العادية( اللي كانت كبيرة أووي بردو قبل ما الدنيا تتقل بركتها😅)
فلازم لبسها يكون ساتر ومحتشم وفضفاض.
والمنتقبة فاهمة ان دي بقا أعلى درجة( ليفل الوحش في الحجاب😊)
وانها اختارت الاحتجاب الكامل ولازم تبقى قد اختيارها وقد ثمن المسؤولية دي...
كان عادي ننصح بعض💔، وننبه بعض...
مكناش حساسين للنصيحة وبنقف لبعض على الواحدة...
ومكناش بنفكر ١٠٠ مرة قبل ما نتكلم عشان خايفين اللي بننصحه يزعل ولا يحرجنا...
بالعكس...كان فيه في كل شلة واحدة كدة بنخاف منها كلنا👀
عشان مش هتسكتلنا لو شافت حاجة فيها مخالفة ولا تهاون بشروط الحجاب...
ضيقي فتحة النقاب انت حاطة كحل..
متلبسيش جينز تحت الملحفة علشان بيبان وانت ماشية...
كعب جزمتك بيعمل صوت...
متغسليش هدوم الخروج بداوني عشان ريحته نفاذة...
تخيلوا أيامها ده مكانش اسمه تشدد؟
آه والله كان عادي😅..ونشكرها كمان عشان نبهتنا وندعيلها🙏
كان ممكن واحدة متعرفكيش توقفك في الشارع وتنصحك أو تنبهك لحاجة في لبسك وبعدين كل واحدة تكمل طريقها عادي ولا كأن حاجة حصلت...
مكانش في اتنين صحاب منتقبات يقابلوا بعض ويقولوا إيه الجمال ده ولا إيه الشياكة دي؟!
كانت الصديقة فاهمة دورها في حياة صديقتها، وعارفة يعني إيه حقوق الصحبة في الله...
الشياكة أيامها كان معناها هدوم سليمة ومغسولة ومكوية...بس كدة😅✋🏻
أصلا كلنا كنا شبه بعض...
الكلام عن ألوان الموضة والاستايلات كان له علاقة بالبيت أو المناسبات اللي بنتجمع فيها...
مفيش مجال للكلام ده في لبس الخروج...
مفيش مجال للزينة طول ماانتي في الشارع!
فاكرة زميلة لنا كانت بتفك الكحكة وتعمل شعرها ضفيرة قبل ما تلبس وتخرج، عشان بتخاف من وصف( رؤوسهن كأسنمة البخت...)
تخيلوا مكناش بنتريق عليها ولا بنقول محبكاها...
بالعكس...كنا بنغير منها علشان أحرص مننا...
كان في مساحة نحط بعض الزيادات تحت مسمى التقوى..مش التشدد، مدام مبتفرضهوش على حد ولا بتلزم غيرك به...
المنتقبة مكانتش بتقول على نفسها حورية..ولا على النقاب انه حتة من الجنة، كانت بتتهم نفسها بالتقصير وتراقب عملها أكتر من غيرها.
ولا كانت بتكبر الموضوع وتوقف حياتها والدنيا كلها على الخطوة دي وتوثيق وفوتوسيشن وحفلة لبس النقاب وتورتة منتقبة وعنيها بتغمز🙆...
عادي لبسنا النقاب الحمد لله نشوف اللي بعده...هنختم امتى...هنعود نفسنا على خُلُق ايه...هنتوب من ذنب ايه...هنبتدي ندرس كذا...
خدنا خطوة نشوف اللي بعدها...
العروسة المنتقبة دي مكانش حد بيشوفها، الناس كانت بتقف في البلكونات عشان تلحق النص دقيقة الحَدَث بين باب بيتها وباب العربية😅
مكانش في حاجة اسمها فستان فرح منتقبات!! ولا حتى بتلبس فستان محجبات!
بتلبس اللي هي عاوزاه ومنتهى الانفتاح والاوبن مايند هي وصاحباتها🥳😅، وقبل ما يخرجوا من القاعة ترجع كل حاجة لأصلها ويطلعوا من الباب أخوات ملتزمات وقورات تاني، وبردو كلهم شبه بعض والعروسة شكل الهودج في وسطهم😅.
معرفش إيه بالظبط اللي حصل خلانا نوصل للي وصلناله ده؟!
مع ان مفيش إيدت نزل ولا حاجة؟!
هو هو الدين وهي أحكام الشريعة نفسها...
آيات الحجاب اللي كانت بتحكم لبسنا وشكلنا ساعتها لسة زي ما هي في كتاب الله متغيرتش ولا هتتغير...
ليه بقينا محتاجين نتكلم في بديهيات، ونقنع بعض بحاجات مش محتاجة إقناع، وننزل رخص وتخفيفات وتأويلات من عندنا؟
ليه مبقاش عندنا استعداد ندفع تمن حاجة؟
ولا ضريبة قرار؟
ليه عاوزة الحجاب للآخرة وعاوزة معاه الدنيا كلها؟
بزينتها وموضتها وألوانها واستيلاتها وحزامها وفيونكتها وعيونها الكحيلة ووقفتها المعووجة ومعاها وردة عشان الصورة تطلع حلوة؟