#الابواب_الخمس
البارت العاشر/الجزء الثاني
للكاتبة Reem
(بارت هديه ال4 مليون مشاهده تسلمون حبايبي على متابعتكم ومشاركتكم الجميله )
شايف من تضل تنعاد الايام
نفسها و ماكو شي بيهة يتجدد
يجي شجم باجر و ما يختلف شي
نفس البارحة بس عمرك ازيد
ساعتها العمر مستعمل يصير
و أحلامك شوية شوية تنهد
صح ينكتب عايش بالسجلات
بس انت مجرد رقم ينعد
اي مثل الهوى بالمقبرة يدور
لا تخنگ و لا يشتمك احد
اكبر مشكلة يواجها الإنسان
اذا ع المشكلة يبدي يتعود
طبيت للمطبخ وعطت بيها حرام عليج شسويت وتردين تسويلي سحر جفلن مني وعلى عيطتي نزل مهدي وعبد
منتبهت همه ورايه
ناي : انتي متخافين الله دربجن كله سحوره شوكت الله ياخذجن واخلص منجن متشوفين الله شسوه بيج واخذ رجلج منج لان انتي وحده متستاهلين واحد نظيف مثل خالي انتي وحده قذره حيوانه كلج شعوذه جان انجر وانركع بلباب وضربني مهدي حيييل على وجهي
مهدي : تخبلتي شون تعيطين هيج على امي اذا متعرفين شنو الاحترام وفرق العمر اني اعلمج
ناي : مااسمحلك تمد ايدك عليه
مهدي : واكسر راسج وراس كلمن يطلع وراج واذا تجاوزتي بعد اسحل بيج البيت كله
وكف عبدو ودفع مهدي
عبدالرحمن: على كيفك مهدي وياها
مهدي : وحده لسانها زفر متستحي متكول عيب وبكد امي وتغلط وصوتها واصل للشارع موزين مني مادميتها
ناي : دمعت عيني وكتله حاسب امك تريد تحطلي سحر اني شون اتجاوز عليها بدون سبب
وداد : يمه منج ومن جذبج وينه السحر بله موعيب عليج تذبين تهمه براسي هاكم مو كتلكم ذوله مو ثوبنه هاي وحده مخلصتها ويه اهل الزبل ويه سحوره نسوان عمامها عبالها كل الناس مثلهم منحطه ومتخاف الله
ناي : اباوع على ايدها كلشي ماكو بقيت امتمت والله سمعتها كالت لخاله نرجس احجي خاله مو هيه كالت الج حطي هاي جوه الجربايه لا اخليها تصيح الغوث سكتت شويه وكالت
ام عبدالرحمن: ماكو شى متوهمه ناي
ناي : لتخبلوني بأذني سمعتها والله
وداد : الله يشيلج وياخذج لا عيني هاي اليوم ذبت تهمه سحر براسي بعد جم يوم الله اعلم شذب تهم خلي يجي عمران يسويلي حل مااسكت على هذا التمسلت هاي زعطوطه ومتعلمه على عيشه مخربطه اجيب واحطها بيتي يم بتي شمدريني شسوي مااسوي
ناي : لتسوين نفسج فقيره والله جذابه
مهدي : لج كافي لاافرك حلكج
عبدالرحمن: يمعودين صلو على النبي وانتي روحي لغرفتج
وداد : وين تروح عيني اني انتظر اخويه يشوفلي حل وياها
ناي : انتي مو كلتي مااحجي ويه خالو اذا نفذ كلامه ليش اجيتي حتى تأذيني وتخلين ابنج يضربني
وداد : خوش عيني تردين توكعين بيني وبين اخويه عيني نرجس ديري بالج تره انتي حاطه عكرب بيتج يلدغ ويضم راسه
ناي : ردت احجي وعااط مهدي اسكتي وعبد غمزلي وعض شفته يعني كافي لتجاوبين
مهدي : يوم خالي ماله داعي يدخل هي بعد متتجاوز وتعرف حدها زين
وداد : لا عيني اذا انت قبلت عليها اني مااقبل تالي عمري ينغلط عليه واسكت
عبدالرحمن: مو مهدي ضربها كدامج شتردين ياعمه يكطع من لحمها ويسويلج تگه
ناي : واكفه اريد الزمها من شعرها هذا الاحمر جنه مصبوب مرگه على راسها شكد حقيره الي يسمعها يكول ياعيني مغلوب على امرها شنو من مره هاي حتى ضربتي نسيتها وضاله صافنه على طريقه تمثيلها
مهدي : اعتذري يله وبعد لتعيديها
ناي : مااعتذر عفتهم وطبيت للغرفه عفتها تعيط اني الخبلني سمعتها بأذني شون كلشي ماكو بيدها شويه واندكت الباب عدلت كعدتي وكلت تفضل مد راسه عبد ويبتسم
عبدالرحمن: هااا بشري الخد صار احمر بنفسجي برتقالي
ناي : والله مكذبت وروح امي سمعتها هيج كالت
عبدالرحمن: مصدكج بدون حلفان غير عمتي وداد هاي عدها قابليه خياليه تخلي مهدي يصدكها لو يشوف بعينه هم يكذب عينه ويكول امي صحيح حجيها
ناي : واني شنو ذنبي امه تكذب ويضربني
عبدالرحمن: انتي هم مو لسان كلاشنكوف نزلتي بيها نزله مسواها يونس محمود من الطوبه برجله وحده بلملعب اضربي بريك شغلي دبل اشاره كبل انطلق اسحك
ناي : حقك متعرف شكد اخاف من هاي السوالف مال السحر متدري شيسوي بلواحد
عبدالرحمن: اني هاي الامور مااصدكها سوالف شرشبيل متمضي بيه ولا اصدك بهيج خرافات
ناي : السحر مذكور بلقران
عبدالرحمن: وَلَا يُفْلِحُ السَّاحِرُ حَيْثُ أَتَىٰ وهاي الايه مذكوره بلقران لهذا صيري ايمانج قوي وسوالف السنافر عوفيها
ناي : ماالومك لو شايف الشفته متكول هيج
عبدالرحمن: اني اجيت اشوفج اخاف تأذيتي
ناي : لا مابيه شى
عبدالرحمن: بعرضي ضربه بشده فرت وجهج فر من يمي لزمت خدي لو منج اكعد بلشارع اخلصها بجي
ناي : تضحك عليه مووو
عبدالرحمن: اجيت اواسيج
ناي : لوما داريت طيورك
عبدالرحمن: هو هذا الوكف بعيني
ناي : خوش واكف
عبدالرحمن: محتاجه شى
ناي : ابتسمت وكتله مشكور ذكرني بسوالف مرتضى عبد الرحمن شخصيه مركبه متعرفه يضحك لو ساكت جدي بحياته عايش لنفسه وبس
ورجعت لصفنتي صارت صديقتي ماعندي شى بس اتصفن
ومقهوره من الصار كله وحايره شون اخلص عمري وياهم واسأل نفسي ليش ما مكتوبلي الفرح والراحه طبت ام عبد تصيحلي على الاكل
كتلها مااريد جان اسمع صوت وراها واكف خالو عمران
عمران : وضعكم معاجبني صاير شى واني ماموجود
ناي : باوعت على زوجته كلت اذا احجي راح تصير عركه ومشكله جبيره ومالي حيل للكال والكلت اكتفيت وكتله ماكو شى خالو تعبانه ونعسانه اريد انام من اكعد اذا جوعانه اكل
عمران : اكلي خالو لتضلين هيج
ناي : اي اكل ليضل بالك عافوني وطلعو ورجعت تمددت بلفراش وعيوني بعد الصار مستحيل تاخذ نوم مرت ساعتين وانفتحت الباب اني منطيه ظهري بس اعرف هاي خاله نرجس لان بس هيه تدخل مباشره كعدت بصفي على الجربايه وكالت
ام عبدالرحمن: اعرف بيج كاعده وگلبج معصور من الصار لو تعرفين وضعي تعذريني اني مامجبوره احجيلج واكدر اسكت بس مااريد اشيل خطيتج وانتي يتيمه وتطلع بخلفتي بعدين كومي عدلي كعدتج واسمعيني زين هاي اول واخر مره تسمعين مني هذا الحجي
ناي : كمت وكعدت بصفها اريد اسمعها وبديت اركز بكلامها
ام عبدالرحمن: اني بت عمهم مو غريبه فتحت عيني واشوف وداد الكل بلكل وداد البنيه الوحيده على ٣ ولد
ناي : اعرف همه اثنين
ام عبدالرحمن: مو واحد هو صغير توفه عمي ابوعمران رجال خير ومن الحلال عنده خير من الله الناس كلها تحلف براسه من مات ابنه الصغير واجت وداد للدنيا صار روحه بيها ادللت وشالها على راسه جانت تأمر وتنهى وحتى طلب من ولده ابو صلاح حازم الله يرحمه وعمران ميأذون اختهم بيوم وشتريد ينفذون الها ومشت الدنيا وكبرت وداد وعايشه بنص خير ابوها واخوتها لحد ماشافت فوزي لو تخبلت حبته وحبها وكالت مااتزوج غيره ورغم اهل فوزي حالتهم زينه عايشين مستورين بس مقارنه بوداد واهلها فرق جبير وهي مااهتمت بلبدايه ماقبلو لا عمي ولا ولده كطعت الاكل والمي وتمرضت وخافو لا تموت لوت ايدهم واستغلت معزتها بگلبهم وافقو وتزوجت وراحت وياه لبغداد ماكو جم شهر واشتغلت المشاكل جانت كورها وكور امج تغار منها حيل تعرفين وحده مدلله ومحد ينافسها على العز والمحبه اعتبرت ذكرى تنافسها بگلب فوزي
ناي : غير اخته هيه مو اخوتها يحبوها
ام عبدالرحمن: يووو شكد حجو اخوتها وابوها مافاد شون يحب ذكرى بكدي وكل فتره طلابه شكل الشهاده لله طلع فوزي رجال وينحلف براسه من اخلاقه وتحملها هوايه كل فتره زعلانه وجاي مراضيها وترجع تطحن من امج صارت ذكرى الله يرحمها ضرتها مو حماتها و مره وحده من العركات عافها جم شهر زعلانه وماسأل عنها جابت حوري يمنا اجه شافها وسماها حوراء ورجع ومااخذها وياه كلت راح يطلكها ماطول مارجعها جان تسمع ذكرى انخطبت لو الدنيا ماحملتها من الفرح تصوري بيدها اخذت مهدي وحوراء ورجعها ابو صلاح الله يرحمه بعد وداد رادت ترجع لازم محد يكسر بخاطرها
ناي : وصار هيج يسمعون كلامها
ام عبدالرحمن: كله من وره عمي الله يرحمه گبر راسها حيل خلي اكملج كولي رجعت وامج تزوجت وجرت جم شهر الحال هادي گلنا ياالله انصلح الوضع وهم رجعت تعاركت على شنو فوزي يكوم ويكعد يتنغص لذكرى وگلبه محروك عليها لان تزوجت من اهل العتيك وقسمتها موزينه ويشوف اخته مشلوعه گلب وهلمره العركه اكبر ضلت ٣ اشهر بس الصار مهدي لازم يدخل مدرسه وهو متعلق بأبوه كام يتمرض ويبجي ودوني لبابا اجه فوزي واخذها وكدام اخوتها كال هاي المره الاخيره تطلع زعلانه تطلك خلصت سنين كل فتره مسويه مشكله شكل وعمي رضه فوزي ومشه الوضع
ناي : اي وشصار بعدها
ام عبدالرحمن: صار الي لا على البال ولا على الخاطر اجت امج زعلانه ورجعها جدج هنا لعبت بعقله لفوزي وكام باع محله وصفه شغله حتى يشتري يمنا بديالى مات عمي الله يرحمه وعاف الها ورث وكالت اله بهاي الكاع نبني بيت وكاع ثانيه يسوي مشروع عليه وهو مقبل اله كعد اخوتها وانطه فلوس الكاع واشتراها منها لان الكاع ملازكه لبيوتنا وهو ورثها كال مااخذ فلوس واعيش بيت مال مرتي وبهاي سوايته گبر بعين اخوتها وشكد جانو يحبوه ويحترموه صارت المعزه اكثر والتزم الكاع حازم الله يرحمه وبنه البيت وكمله لان بهذا الوكت جان عمران يركض على شغله وشغل ابوه العافه الهم وحازم ضابط جبير بلدوله جاب عمال وجنود وبنوه للبيت لحد ماكمل بس فلوس البناء لحد الحصوايه من فوزي مقبل بدينار يساعدوه
ناي : وبعدين
ام عبدالرحمن: كمل كلشي والمفروض يجون جان هلمره تجي امج زعلانه والشغله اكبر لان بوكتها فوزي ضرب ابوج ودخل مستشفى ورادو يشتكون على فوزي ويدخل سجن وهاي وداد شاطت للستار حتى عقل ماضل بيها حست تعبها وحرگان اعصابها كل هذيج الاشهر راحن بلشط لان معناها امج راح تطلك وتكعد گبالها وترجع لنفس المنوال والطحن وخاصه من طلع فوزي من السجن وكال الها راح ابيع البيت والكاع بديالى ونبقى بغداد وانسي سالفه نروح يم اهلج لان بعد ذكرى رجعت وراح تبقى عايشه ويانه واني مااكدر اعوفها لج عيني شكد مااحجيلج شصار بيها قليل مثل المخبله حتى لاخوتها اجت كالت اقنعوه بس همه استحو يدخلون وانطو عذر لفوزي لان تبقى اخته وهلوحده عنده وحتى عمران كال الها لو انتي صاير بيج هيج شى نسوي مثله واكثر المفروض رجلج تحطي على راسج مو تتعاركين وياه
خلاصه الشغله محد طبك وياها هلمره
وبليله ويوم رجعت امج لرجلها شون مالون منعرف ومعودت وداد جابت فوزي واجت عاشت هنا وطارت طير الرادته من سنين صار
ناي : وانتي شون تدرين بهاي السوالف كلها
ام عبدالرحمن: وداد جانت صديقتي حيل بحكم اني بت عمها وهي ماعدها اخت وصرت مرت اخوها تحجيلي كلشي وجنا گلب على گلب ولو سوت سوالف مااحبها وبعدها شلت ايدي منها لان وكحه ومتكعد راحه وادور مشاكل من عاشت هنا لا اني ولا ام صلاح سلمنه من لسانها عوفج من عدنا المهم من امج ماتت الله يرحمها وفوزي انجن وضاع تعب وداد كله وگتل فوزي ابوج ودخل السجن ومن انعدم وداد وكعت تمرضت اشهر وصلت للموت صارت بيها ذبحه وكوه كامت على حيلها وبعدها جابت عمتها لان بقت وحدها ومهدي يبجي ليل نهار عليها كامت وخلتها يمها ومن يومها الي يجيب طاري ذكرى تنبش اهل اهله لان تعتبر ذكرى وره كلشي ومن اجيتي انتي جن ذكرى ورجعت وهلمره صرتي مرت مهدي زاد الخبال عليها
ناي : كل الكلتي مينطيها الحق هيج تسوي بيه كدامج خاله اني انجبرت عليه ولوما الظروف مااتزوجه لو اموت وليش تحجيلي قصه حياتها
ام عبدالرحمن: ردت اشوفج هيج وحده عايشه دوم الي تريده تسوي اريدج تنتبهين منها
ناي : اني من سمعتكم اتذكرت عمتي شصار بيها من وره هاي الامور وخفت وكمت اعيط
ام عبدالرحمن: وداد دربها مو درب السحوره والشعوذه والعياذ بالله دربها الحيله وهذا اصعب مراح تجوز منج طول مااخذتي ابنها راح يوميه تسويلج مشكله واطلع نفسها الخيره الطيبه المغلوب على امرها وانتي هجامه بيتها ومأذيتها حذري منها بتي وامشي بصف الحايط وحتى تمشي حياتج بليه هوسه شتكول كولي صار شتريد انطيها لا تناقشيها
ناي : زين هيه شون كذبت هيج
ام عبدالرحمن: اني جنت واكفه اكمل طبخ وهاي كل شويه تمد راسها كلت شجاها اكلها بيج شى تكول انتظري هي شافتج نزلتي وبدت تعلي صوتها حتى تسمعين واني صافنه ايدها مابيها شى شنو اخذي وحطي جوه جربايه عبالي شخطت تالي من نزلتي تعيطين عرفت ليش هيج سوت ورادت تعلك وتتعارك وياج وتشكي لعمران ومهدي بس حظها حلوو مهدي يمنا وهي تدري وشفتي من وره لسانج ضربج ومصدكج
ناي : وانتي ليش سگتي وماوكفتي ويايه
ام عبدالرحمن: اني صحيح مرت اخوها وبت عمها بس گلبي خلص من سوالفها ومعودت هاي الفتره هدت بينا تدرين بتي شافت الويل منها وكل فتره هوسه عبالها اريد ازوج بتي لمهدي والحمدلله الله قسم لبنتي قسمه زينه وراحت يله انفكيت من لسانها وماردت ترجع تشد ويايه ولازم يوميه تعال يعمران خلصني من وداد اني البيه كافيني يابتي منا عبد وابوه الماتصفه بينهم ومنا ابني السافر وابجي دم عليه وبتي البعيده عني مالي حيل ادخل بشغلات متجيب اليه غير وجع الراس
اني اجيت اكلج وداد مو هينه ولا تسكت وتبلعها ومتجوز اله تخليج تهجين بليله ظلمه اما سالفه السحوره مو دربها
ناي : اني اطلع من بيت كله مشاكل اطب بواحد اضرب منه
ام عبدالرحمن: كتلج داري خبزتج واسكتي عندج حوراء طيبه وحبابه خلصي وكتج وياها والحجيه تحبج وتبقين بت بتها واكيد تريد مصلحتج ومهدي طيب وخوش رجال بس هو يحب امه حيل يعني ماينطي بيها لخاطر احد لو الدنيا تنگلب واذا قبل بأمر خاله لان ميحب يكسر كلمته لكن بنفس الوقت امه بلمقام الاول لسانج الزمي ولتتجاوزين ولا تسوين شى تخليها تلزمه عليج والله يهدي النفوس يابنتي اكوم اصلي العصر راحت الصلاه مني وكل السمعتي هسه بينا اني اجيت احذرج وابين الج ويه منو راح تعيشين مااكول غير الله يساعدج على وداد والله يحنن گلب مهدي عليج
ناي : بقيت افكر بكلشي سمعته والحيره سيطرت عليه اكثر من قبل واشتعلت لهفه لاختي اريد اشوفها اني ليش مااطلب من خالو ياخذني اشوفها طلعت ولكيته كاعد يباوع اخبار ويگلب بلتلفزيون
عمران : هله بعروستنا
ناي : خالو اريد شى منك
عمران : كولي اذا اكدر مااقصر
ناي : اريد اشوف شرهب
عمران : واني ليش تجين عليه ذاك رجلج وروحيله
ناي : عرفت خالو يريد اتقرب من مهدي والصار الصبح خلاني لو اموت مااروح اله بقيت ساكته وكتله شكراً
عدا اليوم والبعده والبعده واني الوب على اختي شون بيه ياربي ومر اكثر من ١٠ ايام واني مهدي مشايفته ولا هو اجه واعتذر لان ضربني لحد ماسمعت صوته وكلت لازم اخلي ياخذني الها بعد مااتحمل طلعت ولكيته كاعد يضحك ويه خالو هو شافني غابت ضحكته
ناي : اريد تاخذني لشرهب
عمران : هيج خالو بدون سلام رجلج صار ايام ماكو خارج المحافظه حتى الْحٍمَدٍ للـّہ على سلامتك ماكو
ناي : الْحٍمَدٍ للـّہ على سلامتك
مهدي : الله يسلمج
ناي : اذا مصارت زحمه اخذني لاختي
مهدي : مو هسه عندي شغل جم يوم يصير مجال عندي واخذج
ناي : مطالبه هوايه تكدر هسه تبقى بليه امك مده طويله ومتعرف شى عنها ارحمو حالتي واخذوني لاختي تعبت والله تعبت محبوسه كل الوكت والتفكير اكل عقلي كمت احجي ويه نفسي مرايده شى جبير اشوفه ساعه وحده واطلع
عمران : اني جان وديتج يابنتي تعرفين بيه بس لازم رجلج يقبل
مهدي : ميحتاج خالي اني اوديها عكب باجر حضري نفسج نروح حسبت الطريق منتأخر
ناي : مااخرك وابتسمت فرحانه واخيراً راح اشوفها
شرهب : تعالو ويايه اخذكم لبيت عيالي
البيت الدخلت اله واني بت ال١٤ سنه
عمي رجال من اهل الله فقير لا يهش ولا ينش
ويشتغل بلسوك يبيع مخضر يطلع من الفجر للعلوه يجيب مخضر وينزل للسوك يبيع هليكدر عليه وعمتي مرات تطلع وياه اذا مريض مجنت اعرف تطلع وياه لحد ماوره اكثر من اسبوع من عرسي نزلت اسأل عليها استغربت ابتسام تطبخ كالت امي اليوم طلعت ويه ابويه انقهرت عليهن كبار بلعمر مال يبيعون مخضر وتجرأت وسألتها
ليش يطلعون مو عدي عنده راتب وهو ينطيهم
ابتسام : هذا منو الينطي رجلج عيني فلس ماينطي غير ٥٠ الف بلشهر غيرهن ماكو وشوكت متسألي وكال ماعندي
شرهب : ياصخام هذا نسخه جوحي خرب حظي الاكشر اذا صدك
ابتسام : جوحي منو
شرهب : عمي
ابتسام : بيج خير اقنعي يزيد الشهريه
شرهب : وزوجج شيشتغل
ابتسام : ماكو شغل مرات يلكه ومرات يضل كاعد
شرهب : زين مصرفكم مصرف جهالج عندج اثنين
ابتسام : على اهلي هاي شياكلون ناكل وياهم والحياه ماشية
شرهب : وشنو ذنبهم عمو وعمه خطيه شفت عمو حتى ظهره محني المفروض رجلج يطلع يشتغل يدور مو كل الوكت نايم من اجيت لهذا البيت واني اشوفه اكل ونوم
ابتسام : مالج دخل انتي هاي خوش عيني بعدج عروس وتردين تحرگين على رجلي جاي يمج كرباج لتندكين بيه
شرهب : اني شكلت وكمتي تعيطين مالي دخل بعد مااحجي
ابتسام : اي لتدخلين ويله نظفي البيت بعد التنظيف عليج والطبخ عليه
شرهب : كمت انظف اني زين اعرف انظف رغم مو معدله ميه بلميه مثل عمه بديعه وبان وناي بس يطلع شغل مني ومن ازهك اشربت اضل ادحس هنا وهنا وهو البيت صغير ميتعب هواي
جنت اشتغل وبالي يم عدي اذا مينطي مصرف زين لاهله وين حاط فلوسه يا خاف اصير مثل ساهره واضمضم بيهن اشتغل واضحك على عقلي وتفكيره
تغديت وحدي صبيت ماعون تمن وفوكاه مركه وكعدت اكل مردت ويه ابتسام ورجلها لان ماارتاح وياهم وعدي ميرجع الظهر وعمه وعمتي وره العصر يله يجون
شكد حبيت اطلع اروح لبيت بيبي اشوفها واشوف عمه وبان وبلبل شكد مشتاقه اله وناااي اااخ يابت ابويه شكد طاكه روحي عليج
دخل عمي وشايل صندوك على راسه ويدفع بعربانه وعمه شايله صندوك ثاني مال مخضر انكسر گلبي عليهم وطلعت للحوش اساعدهم
ابوعدي : هله بويه
شرهب : الله يساعدك عمو
ابو عدي : ويساعدج بنيتي
ساعدتهم ورحت ركض صبيت الهم اكل
ام عدي : يايمه ينطيج العافيه اول مره واحد يصبلي اكل اني وعمج
شرهب : ليش وابتسام
ام عدي : خليها سكته يبنتي تعالي اكلي ويانه
شرهب : تغديت اكلو بلعافيه
من يومها قررت اني اصب الهم الاكل واسويلهم الجاي وحتى ملابسهم اني اغسلها لان شفت عمتي تغسل بيدها صفنت على حالهم لا الولد حنين ولا البنيه وفوكاها اثنينهم عايشين من خير ابوهم وامهم شكد عدهم نعمه محاسين بيها اني لو ابويه وامي مثلهم لا ليل نهار اكون جوه رجلهم مع الاسف ابتسام وعدي ولد ذوله الطيبين
ناي : كعدت من الصبح ولبست نفس ملابسي الاجيت بيهم وحطيت الشال على راسي لكيت مهدي واكف ينتظرني بلسياره صعدت
صباح الخير
مهدي : صباح النور
باوع عليه يشوف ملابسي لو شميكول ولا احجي مااريد اتعارك وياه ويلغي الطلعه
جنت حاقده عليه وكوه جارعته لان ضربني
الطريق كله ساكتين لحد ماحجه وكال
مهدي : ذاك اليوم الصار مااريده ينعاد
ناي : شنو الصار
مهدي : تجاوزج على امي
ناي : تره هيه البدت اعرف بيك متصدكني وميهمني اذا صدكت او لا واني متجاوزت اله بسبب
مهدي : حتى لو بسبب بعد مااسمع تغلطين عليها اني مااحب امد ايدي عليج اكعدي ساكته وبله مشاكل حتى لاتشوفين وجهه محلو مني
ناي : ليش مطلكني وتريح نفسك وتريحني
مهدي : هذا الحجي فات وكته انتي هسه مرتي وكلها شهر او شهرين بلزايد وتصيرين بيتي تعلمي على حياتي وشنو احب وشنو اكرهه حتى تعيشين مرتاحه امي خط احمر ناي اثنينكم وحده متريد الثانيه وانتي لتوصليني لمرحله أذيج حتى ماازعلها اكسري الشر من الاول ومالج دخل بيها ادري متحبيها على الاقل احترميها
ناي : درت وجهي على الشباك وبقيت اباوع للطريق الفارغ وحتى مجاوبته
مد ايده بلچكمچه وطلع علبه حمره وحطها بحضني
مهدي : لبسي حلقتج صغرتها
ناي : فتحت العلبه ولبستها ورجعت وجهي للشباك
وصلنا لبغداد وطبيت لمنطقتنا شكد مشتاقه لمتنا سوه بيت عيال شرهب قريب على بيتنا
وصلنا ودكينا الباب طلعلي جاهل
صيحلي شرهب
ركض الطفل وصاح عمه عمه يردوج
شرهب : رافعه شعري جني وحده مسحوله اني وكفشتي وشايله الدشداشه منا ومنا لان ايهاب طالع مدري شعجب وبس اني وابتسام بلبيت واغسل هدوم واتخيل روحي نانسي عجرم واغني آه ونص
اجه ابن ابتسام يصيح عمه بنيه بره تريدج
شرهب : نزلت الدشداشه وغسلت ايدي وطلعت مستغربه منو يجي وجان اشوف نصي الثاني حيلي كله راح وحضنتها وابجي
ناي : حاضنتها حييل وابجي وياها ابجي على حظنا الخلانه كل وحده بمكان وطشرنا
مهدي : طبن جوه وتحاضنن لا بلشارع
شرهب : تعالو ادخلوو والله ممصدكه
ناي : دخلنا لبيتهم جان تعبان حيل وصغير ولو بيت بيبي هم جان تعبان بس مو هيج
كعدنا بلكاع على جودليه مفروشه
شرهب : ممصدكه انتي كدامي
ناي : رجعت حضنتها حييل واباوع على وجهه وشعرها
مهدي : منو عدكم
شرهب : بس حماتي هنا
مهدي : لعد اني طالع ساعه وارجعلج
ناي : كيفت من كال هيج ردت اكعد وحدي وياها عافنه وطلع واجت حماتها سلمت
شرهب : امشي فوك نسولف
ناي : صعدت وياها بلغرفه شفتها قديمه حيل ومصبوغه كعدت وكتلها مرتاحه
شرهب : تتوقعين بلياج وبليه بيبي اكو راحه
ناي : رجلج شلونه
شرهب : ماادري
ناي : شنو ماادري
شرهب : كل الوكت طالع يرجع بليل ينجلب عليه وهيج ماشي يومي
ناي : عساهن بحضهن وبختهن من كسرن بيج
شرهب : احجيلي شصار كالو عقد عليج مهدي
ناي : عقد الاكشر
بدينا نسولف كل وحده شون خلصت الايام الفاتت لا اني المرتاحه ولا اختي
مرت الساعه جنهه ٥ دقايق واجه مهدي نزلت واني حاضنتها وعايفه قطعه من روحي يمها
ديري بالج على نفسج
شرهب : لتخافين عليه انتي ديري بالج
ناي : سلميلي على عمه وبيبي اذا شفتيهم لان مااكدر اروح الهم
شرهب : ماشي اوصل سلامج
ناي : صعدت ومد ايده وحط فلوس مهدي بيدي وكال انطيها لاختج وكولي الها ملحكت اشتري هديه عرسج فتحت ايدي لكيتهم هوايه مديت ايدي وكتله ميحتاج يوم ميصير عندي اني اشتريلها
مهدي : بليه وجع راس واسمعي الكلام
ناي : فكرت اختي هم تحتاج تشتري شى تاكل شى خلي اخذهن وانطيها اله وبعدين من يصير عندي هاي اذا صار ارجعهن اله رديت نزلت وهي بعدها تبتسم بلباب
شرهب : شنسيتي ونزلتي
ناي : حطيتهن بيدها
شرهب : والله مااحتاج
ناي : اششش فدوة تمنيت اكدر اشتريلج هديه بست خدودها وكصتها وحضنتها وصعدت
رجعت واني ميته قهر على حالها شوفتها زيدت نار گلبي مابردته
شرهب : طردت بجيه ناي ومن اجوي عمي وعمتي حجيت الهم وانطيت الفلوس الها جانت ٣٠٠ الف مبلغ جبير اول مره يصير عندي هلكد فلوس يمكن لغيري لاشى بس اليه هوايه
ام عدي : بتي ذني مالاتج هديه من اخيتج
شرهب : ماكو فرق بيني وبينج عمه اخذيهم اتسوكو بيهم انتي وعمو
ام عدي : يمه يرضيج ويطعمج الذريه كون على گلبج الابيض هذا الْحٍمَدٍ للـّہ والشكر ربي انطيتني جنه على گلبي
شرهب : كيفت لان فرحت وصعدت لغرفتي اخاف ناسيه شى ممحضرته ويعرس عدي عليه
تالي مدامت اليه طب وكعد ياكل مثل كل يوم واني اشيل بملابسه وكاال
عدي : اختج اجت اليوم
شرهب : منو گلك
عدي : شعليج منو كال شجابت مجابت لو طبت ايد وره وايد ليكدام
شرهب : انطتني فلوس
عدي : وينهن وشكد انطتج
شرهب : سكتت واندار بعصبيه كال وينهن
جاوبته وكتله انطيتهن لخاله جان يشمر الصينيه واطشر الاكل وكاام عليه جرني من شعري حيييل
عدي : احد صخم وجهج وكال الج صيري خيره وانطي الفلوس لامي
شرهب : هاي شبيك مكان متكول خلف الله عليج عوفني عدي شعري تملخ بيدك
عدي : هسه تنزلين تجيبيهن لا اخلي وجهج مثل ليلج
شرهب : ماانزل شون اكلها انطينياهن عيب
عدي : اذا منزلتي متلومين اله نفسج
شرهب : ميعرف عدي طبعي ميعرف ماكو وحده بكدي عنوديه وكتله ماانزل لو تذبحني
وهو انجن عليه ثور وهدوه كطعني تكطع جر حزام البنطرون ودك وين مايوجعني بلحظتها عاندت اكثر ومنزلت ونتيجه هذا العناد ايدي ورجلي تملخن وجهي تزورك حار يتفنن بضربي على شون تعاندين لحد ماتعب وشمر الحزام ونزل مدري وين وله كعدت متأذيه وابجي وامسح دموعي واصيييح ااااخ انكسرت ايدك يلنكس شويه واجت عمتي خطيه ريكها ناشف ومبين صوتنا مسمع الكل هااج يمه اخذيهن عساني ميته جوع ومااخذ دينار منج
شرهب : اذا مااخذتيهن والله ياعمه اشكهن هسه واحركهن واحرك گلب ابنج وياهن
ام عدي : شوفي شمسوي بيج انكسرت ايده
تخبل لو ادري يدميج وحق الرسول مااخذ دينار
شرهب : انتي مو تردين راحتي اخذيهن وانزلي واذا اجه ورادهن عليج صلاتج وصومج لتنطي اله
ام عدي : استغفر الله العظيم يابتي گلج عظمه لحمه مابيج ويضرب ويكطعج شيضل بعافيتج
شرهب : يضل عمه فدوة انزلي
كوه قنعت وباستني وادردم على عدي ااااخ جسمي كمت واتلمس بأيدي ورجلي عساك ياعدي بسياره شفل يسوقها واحد اعمه ويثرمك ثرم ااااخ يمه ملخني المعفن ابو ريحه
بديعه : صار البيت اظلم وراهن ودوم اسمع ضحكتهن وسوالفهن صاحتني عمتي
عمشه : بدعه اريدن ابن ساهره
بديعه : شتردين منه عمه
عمشه : شلچ دخل انشدي وگليله حبوبتك تريدك
بديعه : هسه اروح اله تاكلين
عمشه : مااريدن بساع انشدي للوليد
بديعه : اخذت عباتي ورحت لبيتهم همزين لكيته سحبته وجبته ويايه
ورجعنا للبيت
عمشه : هااا ولك يلسيود ماتسأل حبوبتك طيبه ماتت
مرتضى : كل مااجي الكاج نايمه يابيبي كولي عموشه أمريني
عمشه : اريدن هذا الصغير تخابرون بيه
مرتضى : الموبايل
عمشه : اي البايل
مرتضى : ههههه خوش اسم شتردين منه
عمشه : اريدن اسولف ويه عمران اخو وديد
مرتضى : خال مهدي
عمشه : اي
مرتضى : ليش
عمشه : وانت شمالك نازلي عليش وين انجب ودگلي على الزلمه
مرتضى :هااج راح اخابره
بديعه : شرايده عمه منه اذا تردين ترحين للطبيب اني اوديج
عمشه : اريدنه هو يوديني مااريدن احد
مرتضى : اني اخذج بيبي
عمشه : لا اطكون افادي اريدن عمران
بديعه : خابر مرتضى وحجه عمران وياها وكال الها باجر اجيج حيل استحينا منه بس عمتي داكه رجل اله هو يوديها
وثاني يوم اجه ومقبلت اروح وياها رادت وحدهم توسلت عالجت مفاد الغريب الصار ثالث يوم هم اجه وراحو وحدهم ومن احجي تگلب الامه بلعياط مااريدن احد وحيدي اروح
عفتها براحتها
وبعدها بكم يوم اندكت الباب وطلعت بان
بان : يوم يوم
بديعه : شبيج تعيطين
بان : خالي جبار بره
بديعه : خالج لزمني گلبي وطلعت اركض صار سنين مشايفته جان تعبان وعيونه حمره حضنته تعال ادخل
جبار : بدلي اخذج ويايه
بديعه : لتوكع گلبي شصاير
جبار : امج انطتج عمرها
بديعه : وكعت من طولي الطم ماشفتها ماتهنيت بيها انحرمت منها واني كل ليله اتمنى انام بحضنها واشم ريحتها كمت ادك على صدري وجبار وبان يردون يسكتوني لمت ابويه واخويه لان حرموني منها
منتظرت فلاح وبدلت ونزلت اركض ويه جبار وعفت خبر يم عمتي الصدمني اكثر اهلي صار شهرين اشترو مشتمل هنا بلحريه وكاعدين بيه ومحد بيهم دك بابي قهرتي على امي وموتتها خلتني احقد عليهم يعني الله اكبر بتكم سنين مشايفيها وبينكم وبينها نص ساعه متجون ماذكرتوني لحد ماماتت امي
رحت لكيتهم دياخذوها للمغيسل ويرحون للنجف دخلت وشفت امي سنين ماشايفتها ويوم مااحضنها واشم ريحتها على دچت المغيسل كملنا ورحنا للنجف من فض كلشي ودفنوها واباوع على كرابتنا وزوجة جبار وجهاله حسيت روحي غريبه اني مكاني مو هنا اجه ابويه يسلم عليه وخرت منه ماخليته يطخ ثوبي وكتله
اني ميته بلنسبه الك يابه سنين ماعرفت بديعه وشمرتها ودرت وجهك لا تجي وتحضن وتسلم مشكور الحضن بلميت مايسوه بعد مابيه دفو وحنيه
اجيت اودع امي واروح وياريت محد منكم بعد يوصل ليمي مثل ماكلت مالج مكان يمي وسويتها صدك وعفتني اتلطم وحدي بلدنيا وتاكل وتنام وعايش ومااجيت على بالك اني هم مااريدكم وماعندي اهل يله يمه بان نرجع لبيتنا ذوله ناس غربه عيب نبقى يمهم بعد
بان : بجيت على امي اووف يايمه شكد متحمل گلبج وتعبان حاولو اخوها وابوها وهي ولا اندارت عليهم واخذتني من ايدي
بديعه : صعدنا من الكراج عبريه وطلعنا لبغداد والطريق كله ابجي اني اليوم مادفنت بس امي حتى اخويه وابويه اثنينهم گلوبهم حجر ماواحد منهم حن عليه ومن اليوم مااحن عليهم والي الله هو القادر يريح گلبي التعبان
مر شهر ونص بسرعه خلصتهم بيت خالو عمران ومرات نخابر مرتضى علمود يروح لشرهب احجي وياها وخالو انطاني جهاز كال دزي الها وهيه مقبلت استغربت من رفضها وكالت من اشوفج احجيلج بقينا خلف الله على مرتضى حاير بينا يروح ويجي مره لشرهب ومره لبيبي من اسمع صوتهم اخلصها بجي وقهر
وعرفت بعمه خوله وهذا الشئ أذاني اكثر
يوميه صدمه شكل
هاي الفتره اكثر من عركه بين خالو واخته وداد علمود العرس رادت تخرب اكثر من مره ومارهمت ومهدي ميجي ولا اشوفه لان مرتين صاحني حتى اشوف بيبيته واني مقبلت ومن عدها كام ميجي اما حوري كلش اتونس وياها هيه مخففه عليه الخنكه تجي بسكوت من امها تخاف تعرف وتزفها
وام عبد تشتري غراض اليه مقبلت اكثر من مره ومحد سمع كلامي وحتى ماقستهم على ذوقها خلف الله عليها مقصرت جنت اشكرها ماعندي غير الشكر اقدمه
لحد مايوم كاعده اتعشه بيدي لفه وكلاص جاي جان الجو حار صيف
اجه خالو وصاح زوجته مهتميت وعبد
وصاحوني
نعم خالو
عمران : بتي الوضع يمنا صار موزين والگتل والاغتيالات زادت ومنعرف شيصير غير الله يسترنا
ناي : الله يستر شكو خالو خوفتني
عمران : اليوم احد
ناي : اي
عمران : الجمعه عرسج
ناي : غصيت وبديت اكح
ام عبدالرحمن: اسم الله شبيج
ناي : عفيه مو هسه
عمران : اذا طولنا بعد منعرف شيصير اني اتفقت ويه مهدي وهو كمل غرفته وباجر نبدي نعزم واخوته صلاح وعبد يسوكون للحنه والعرس ويكملون گلشي
ناي : شراح يصير ميحتاج عرس
ام عبدالرحمن: هاي اول فرحتنا بتي وكل كرابتنا تجي اني ماخايفه غير من وداد لتسويلنه مصيبه وتفضحنا
عمران : متسويها تخاف على شكلها كدام الوادم وبعد متكدر تغير كلشي الجمعه ناي بيتها
بيت مو بيتي وناس مو اهلي وعيشه مو عيشتي وقسمه صارت غصب عني ويه رجال لا اريده ولا يريدني هذا حالي واني اباوع بلوجوه واني بدله العرس والبركع مغطي وجهي اشوف ايامي بلبركع بيت عمشه وضحكتي ويه اخوتي شرهب ويونس وبلال يلعب ويه شرهب وبان كاعده يمي تضفر شعري
وعلى جهه مهند واخته ومرتضى يتعاركون اشتم ريحه قوري الجاي على صوبه علاء الدين وبيبي كاعده وحاطه استكان الجاي يمها وتعد وتغلط علينه وعلى امهاتنا لان مسووين هوسه وصوت عالي وعمه بدعه تشتغل وتنظف ورانه ماتمل ولا تگل وعمه خوله تغلط على صالحه وساهره وادعي عليهن وحاطه رجل على رجل وتاكل ولا تهتم اتذكر كل ركن جمعني بذاك البيت بخيره وشره
وحالياً منتظره اروح لبيت وداد حياة ثانيه عيشه ثانيه الكل منتظر الزفه اله اني منتظره اهلي
وين اهلي وينكم
يتبع ....