السلام عليكُم
وشلونكُم.💜
اليوم حَبيت احچي عَن جسر الأئمة ببغداد
اتمنى يعجبكُم المَوضوع، ولو هوَ اكيد راح يعجبكُم لأن من صنع ايدي، ☻✔️
------------------------------------------
خل نحجي اول شي عن موقعة و شكلة قبل ، او شلون بنوا لأول مرة...
هذا الجسر موجود على نهر دجلة ببغداد يربط بين منطقة الأعظمية ومنطقة الكاظمية والكل يعرف إنو الأعظمية بيهة الغالبية العضمى سنة
والكاظمية بيهة شيعة ،
وكل وحدة منهن بيهة مقبرة مدفون بيهة بعض الأئمة والعلماء
بالكاظمية الإمام موسى الكاظم
وبالأعظمية الإمام ابو حنيفة النعمان
وغيرهم من العلماء والأئمة بالمقبرتين
هذا الجسر قبل جان مو ثابت
يعني شلوون ؟؟!
بي طوافات على طولة
فاا كل طرف منة مربوط بحبل قوي إلى مبنى أثري من بقايا قصر المسناية
زييين ليش هيج مسوينة ؟؟!
حتى يفتحونة وتعبر منة السفن او حتى يحطون بمكانة جسر عسكري عائم مؤقت.......
يگولون مرات الحبال المربوطة تنفتح ويهج الجسر من المكان وينطلق بالنهر
ويكعد اهالي المنطقة الصبح يلگون جسرهم شارد
ف يطوع چم واحد حتى يدورون .....
ويلكونة طايف على بعد كيلومترات قليلة
ويرجعونة مُصحب بالعزف الموسيقي الشعبي،
والنسوان تگوم تهلهل لأن رجع،
ويفرحون بي
لان عبالهم شرد منهم زعلان او معصب ......
بعد الحرب العالمية الثانية شالوا هذا الجسر من قبل شركة بريطانية حتى يبنون واحد ثاني
بسنة 1957 بالضبط
وصدگ بنولهم واحد حلووو
وچااااان من اجمل الجسور في بغداد (چاااان)
نجي لأسمة ........
هذا الجسر چان أسمة جسر الأعظمية قبل التعديل اقصد
لان چانت الأعظمية اكبر بهوااااي
وأكثر إزدحاماً
وبعد ما بنوا الجديد
هم قرروا اهالي الأعظمية يسموو على منطقتهم همين (جسر الأعظمية)
من سمعوا اهالي الكاظمية إعترضوا
وگالوا احنة هم نريد نسمي جسر الكاظمية واصروا إلا يسمونة هييچ
فقررت الحكومة (العهد الملكي سابقاً)
تسمي اسم يرضي جميع الأطراف وبعيد عن العركات والمشاكل
ف سمتة (جسر الأئمة)
ماكو مكان ببغداد أو بالعراق ككُل ما صاير بي فد حادثة مأساوية
جسر الأئمة هم شِهد على فاجعة مؤلمة للعراقيين
بذيج الفترة وبسنة ال 2005
بيوم 31 آب بالتحديد
وصادف بيومهة ذكرى وفاة الإمام موسى الكاظم
و إنطلقت آلاف من الشيعة حتى يحيون الذكرى
وأنصبت الخيم والمواكب
جماعات إرهابية تابعة لتنظيم القاعدة
أطلقت سبع قذائف هاون على عدة مناطق ببغداد ومنهن قريب على مرقد الإمام الكاظم
تسبب بقتل 7 أشخاص و جرح 37
هبوا اهالي الأعظمية حتى ينقذون الزوار
وإلي يعرف يسبح دخل للنهر عسى ولعل ينقذ منهم
وحتى اكو منهم ماتوا وهمة يحاولون ينقذون الزوار
ومنهم عثمان العبيدي الي نقذ عشرات الناس
إلا إنه مات غرقاً بنفس اليوم لمن چان يحاول ينقذ البقية .......
إمتلئ الجسر والشوارع والأرصفة ونهر دجلة بالجثث ودماء الناس
ادت هاي الكارثة إلى مقتل حوالي الف شخص
و سقوط 388 جريحاً
انغلق هذا الجسر لمدة 3 سنوات
يعني إنفتح بسنة ال 2008
بيوم 11 تشرين الثاني بالضبط
و تبادل الأهل والناس القُبلات لمن إلتقوا على الجسر
وإنطلقت الهلاهل بالمكان
------------------------------------
وهاي صور للجسر
هاي من چان قبل لا يعمروا
وهاي بعد ما عَمروا
-----------------------------------------
ولهنا نكون خلصنة موضوعنا الحلو
أكيد عجبكُم
لا صدگ شنو رأيكُم بي + اي سؤال او إضافة
ودُمتُم بخير .♡