غموض

٢

💦صافية كالسماء ، بيضاء كالثلوج ، ندية كالزهور ، وردية كالحياة ....تلك هي القلوب التي لا تعرف للكره سبيلا ♥️💦
                                         2
اول ما وصلتهم لقيت "أنس" و اخواتو ساندين أمهم ، و"أنس" بقول ليها خلينا نمشي للدكتور يا أمي اسمعي الكلام ، قلت ليهم بالهفة و خوف : خير في شنو ؟ عمتي مالا يا "أنس" الحاصل عليها شنو ؟ قال الغاز "بك" فيها و هي رجعت لورا و كان في طين في المطبخ و للآسف انزلقت و وقعت ، قلت ليهو يا ساتر ، قعدت جنبها و قلت ليها : يا عمتي اسمعي من "أنس " و خلينا نوديك الدكتور ، قالت لي ما بحتاج الغاز حرق لي توبي بس و الوقعه جات خفيفه ، بس عليك الله يا بتي تاني ما تدفقي مويه في المطبخ و ما تخلي الغاز فاتح ، قلت ليها بس انا ما دفقت مويه في المطبخ و ما خليت الغاز فاتح !! قالت لي عادي يا بتي كلنا بشر و ما معصومين من الخطأ و النسيان و انتي آخر وحده دخلت المطبخ  ، ما عرفت اقول ليها شنو بعد كلامها دا ، هي مصرة تطلعني انا السبب و تعملها فيني ، "أنس" فضل يحنس فيها كتير عشان يوديها الدكتور بس هي كانت رافضه ، لمن ما قدر يقنعها قال ليها خلاص خلينا الدكتور بس حأكون جنبك هنا لحدي ما أطمن انك بقيتي كويسه و ما شاكيه من شي ، قالت ليهو ماف داعي يا ولدي أمشي نوم و ارتاح ، انت براك تعبان في روحك دي ، قال ليها ما عايز نقاش في الموضوع دا ، قلت ليهو "أنس" خليني انا أبيت معاها و انت امشي نوم و ارتاح ، قال لي لا ، حتى بدون ما يعاين لي ، عرفتو زعلان مني ، شكلو صدق اني انا الدفقت المويه في المطبخ ، رجعت بيتي و انا زعلانه شديد من "أنس" بعد شويه جا داخل عشان يشيل بطانيتو ، شالها و كان طالع من الغرفه  وقفتو و قلت ليهو : يعنى مصدق إني ممكن اكون مهمله للدرجة دي ؟ "أنس" نحنا من عرسنا لينا سنتين حصل شكيت مني ؟ حصل كنت مستهتره و مستخفه و ما بعمل حسابي ؟ انت من حقك تزعل على الحصل لأمك ما بلومك و انا من حقي أزعل من تصرفك ، إتلفت علي و قال لي عارف يا مها والله عارف انك ما عملتي كدا عن قصد ، قلت ليهو معناها لسه مفتكر اني عملت كدا صح ؟ قرب علي و حضني شديد ، قال لي ما مشكلة يا مها حتى اذا نسيتي كلنا بنغلط و كلنا بننسى ، قلت ليهو يا "أنس" اقسم بالله إني ما دفقت المويه و اقسم بالله إني ما خليت الغاز فاتح ، قلت الكلام دا و طوالي دموعي نزلت ، قال لي هسسسي خلاص مسح لي دموعي و قال لي اسمعيني ، يمكن "سارة"أو "سجود" وحده فيهم العملت كدا من غير قصد ، أو يمكن وحده فيهم دفقت المويه و التانيه نست الغاز فاتح برضو من غير قصد ، انتي و سارة و سجود عارفكم مستحيل تعملوا حاجه تأذى أمي ، و انا لمن قلت ليك كلنا بنغلط و كلنا بنسى ما كان قصدي انك العملت كدا ، كنت بتكلم ليك بصوره عامة و عايز أاكد ليك إنو حتى لو جا يوم و انتي نسيتي و وقعتي في خطأ زي دا ، خليك عارفه و متأكده اني ما حأظن فيك إلا الخير لأني عارف نواياك الطيبه تجاهي و تجاه امي و اخواتي ، قلت ليهو طيب ليه قبل شويه اتعاملت معاي كدا ؟ قال لي زي ما قلتي لي قبل شويه من حقك تزعل على الحصل لأمك ، بالجد انا كنت مقهور و زعلان للحصل ليها و لو كان وحده من اخواتي اتكلمت معاي في اللحظه ديك كانت حتلقى نفس الرد الرديتو ليك بنفس الأسلوب أو اسوأ ، ف انتي ما تاخدي الموضوع على منحنى شخصي و تقولي انا قاصدك انتي تمام يا عمري ؟! هزيت ليهو راسي و قلت ليهو طيب ، قال لي يلا أرح معاي بهناك نبيت مع أمي ما بقدر أخليك تبيتي هنا براك ، رفعت ليهو حاجبي و قلت ليهو هسي كنت حتخليني أبيت براي مش جيت عشان تشيل بطانيتك و بس ؟ قال لي لا كان ممكن اتغطى بأي حاجه ما داك برضو بيتي ، بس جيت  عشان اشوفك و كنت عايز اقول ليك تجي معاي بس حسيتك زعلانه مني و قبل ما أبدا انا بديتي انتي ♥️قلت ليهو طيييب حصل خير ♥️
في صباح اليوم التالي صحيت بدري استحميت و صليت الصبح و جهزت ليهم الشاي ، بعديها مشيت لبست سرررعه سررررعه و جيت عشان ما اتأخر على الجامعة ، لمن جيت طالعه  لقيت "أنس"جاي داخل ، اول ما شافني ، ربع يدينو و قعد يتبسم و يعاين لي ، قلت ليهو مالك بتعاين لي كدا ؟ في حاجه ؟ قال لي لا بس انتي طالعه  حلوووه شديد ، قلت ليهو أول مرة تشوفني يعنى ؟ قرب مني و قال لي لا بس كل يوم بتكوني أحلى من اليوم القبليهو ، رايك شنو الليله ما تمشي الجامعه و انا ما امشي الشغل و....لزيتو و جريت منو و انا بضحك ، قلت ليهو جهزت ليك ملابسك ، اطلع بدري عشان ما تتأخر
كالعاده مشيت وقفت للمواصلات ، واقفه قريب ساعه و لحدي اللحظة ما جات عربيه و انا واقفه كدا ،في عربيه جات وقفت لي ،لمن عاينت كويس لسيد العربيه ، لقيتو دا ماجد زميلي في الجامعه كان معاهو بت كدا ما بعرفها ، صبح علي و قال لي أركبي اوصلك معاي قلت ليهو لا لا شكرا ليك ، هسي بتجي عربيه ، قال لي مها خلي عنادك دا و اركبي معانا كدا المحاضرة حتفوتك ، البت قالت لي عليك الله اركبي معانا ما فيها حاجه ، نزلت و ركبتني معاهم ما قدرت اقول ليها لا ، بعد ما ركبت أمجد قال لي بالمناسبه دي أختي ، قلت ليهو انا ذاتي قلت كدا لأنو فيها ملامح ليك ، اختو ضحكت و قالت لي ما تشبهيني ب "اب جلحات دا "قال ليها كووويس يا كلبه ، بعد دا كلو ماف زول غير "اب جلحات" دا بوديك و بجيبك قالت ليهو خلاص آسفين 😂  طول الطريق كانت بتتونس معاي طلعت ظريفه شديد ، اسمها "نور "قالت لي انها بتقرا في جامعة الرباط و قعدت تحكي لينا عن الطلاب و الدكاتره العندهم و مواقفهم المضحكه و نحنا متنا من الضحك ، لمن وصلنا الجامعة قالت لي أديني رقمك ، اديتا رقمي و نزلت ،و  ماجد مشى يوصلها و يجي راجع الجامعه
بعد يوم طويل عريض من المحاضرات و وقفة المواصلات و التعب ، رجعت البيت ، دخلت استحميت و صليت الضهر و مشيت بيت عمتي بهناك عشان اعمل شغل المطبخ ، طول وقفتي في المطبخ و طلوعي و دخولي فيهو ، عمتي صباح كانت بتعاين لي شديد و مراقباني ، و غريبة المرة دي ما قالت لي حاجه كانت قاعده معاي في المطبخ و ساكته و بتعاين لي ، كملت شغلي و رجعت البيت صليت العصر ، لمن ناس سارة و سجود رجعوا من الجامعة ، ختيت ليهم الأكل و قعدنا ناكل عن سكات ، غيتو سكوووت عمتي دي محيرني شديد و مخوفني في نفس الوقت .
المسا جا و "أنس " جا راجع من شغلو ، ما قلت ليكم هو شغال شنو ، شغال ليهو في محل حلويات ، مع إنو خريج و بشهادتو ، بس في السودان دا كما بقى عندك واسطات ما بتاكل عيش ، شلت ليهو مويه و اديتا ليهو ، شكلو الليله جاي زهجان و تعبان ، قلت ليهو في شنو مالك الليله زهجان و قافله معاك كدا ؟ قال لي اتشاكلت لي مع واحد في المحل ، قلت ليهو ليه ؟ قال بزهج و نبرة حاده كدا : مها والله ما عندي قدره عشان احكي ليك ، و قافله معاي من الصباح  ، قلت ليهو طيب ما مشكلة ، غير ملابسك و تعال لينا بهناك ، قمت منو كدا مسك لي يدي ، إتلفت عليهو ، قال لي زعلتي ؟ قلت ليهو لا ما زعلانه والله ، قال لي ما تكذبي علي ، قلت ليهو والله ما زعلانه ، عادي بعد مرات الإنسان بتمر عليهو لحظه أو فترة بكون ما عايز يتكلم فيها مع زول أو ما عايز يحكي حاجه معينه لزول، و انا متفهماك والله ، بما انك قلت ما قادر معناها بالجد ما قادر و بالجد تعبان و مرهق ما عتبانه عليك ، قال لي ليه انتي كدا ؟ قلت ليهو كيف ؟ قال لي انسانه واعيه و متفهمه ، كل يوم بشكر ربي و بحمدو على وجودك في حياتي ، رغم وضعي المادي السيئ جدا إلا انك لحدي اللحظه واقفه و صامدة معاي ، قلت ليهو ما تقول كدا ، يعنى انا عرستك عشان القروش ؟ ما انا برضو كنت عايشه نفس العيشه دي و ما عندي اعتراض عليها ، فما تشيل هم و تضغط نفسك عشاني ، صدقني ما عايزا منك حاجه اكتر من وجودك جنبي ♥️
جهزت ليهو الأكل و ناديتو ، جا قعد مع أمو و اخواتو و كلنا قعدنا نتونس ، عمتي "صباح" قدام أنس بتعاملني معامله تاااانيه خالص ، عشان كدا "أنس" ما عارف امو بتعاملني كيف في غيابو ، و انا ما عايزاهو يعرف عشان كدا ما حصل شكيت ليهو منها ، لأني متيقنه انو اسوأ الحاجات انك تشوف حقيقة امك ، انك تشوف الحقد و الكراهية نابع من نفس الإنسانة الربتك و الكبرتك و الأدتك حنية الدنيا دي كلها ، كلنا ما بنرضى نشوووف أمهاتنا بصورة غير الراسمنها ليهم ♥️
اثناء ما انا بتونس معاهم كدا ، هبشت يدي ما لقيت الخاتم في اصبعي ، أنس كان بعاين لي ، قال لي ما لقيتي خاتمك ولا شنو ؟ قلت ليهو ايي ما لاقياهو ، طوالي عمتي "صباح " قالت لي بتكوني نسيتيهو في العربية القبيل ما مشكله بكرا بتلقيهو ، اتخلعت من كلامها و طوالي نظري اتحول ل"أنس" تعابير وشو اتغيرت ، اتحرك من مكانو و جا علي و رفع يدو و.....💔
يتبع.......