كل شيء سيكون على ما يرام في النهاية ، و إن لم يكن كذلك اذا هي ليست النهاية ♥️️✨.
- قايلاها نافعه يعنى ؟! ما هنديك ليها مقضيه زمنها كلو صياعه و قلة أدب و من عربيه لعربيه ، هسي لو قعدت في الواطة دي و سوت ليها وليدات ما احسن من أمورها الفارغة دي ؟.
مش كان قلتي لي الدكتور قاليكم عندها إلتهابات و مشاكل في الإنجاب يعنى لسه ما حليتوا المشكلة دي ؟!
- هي قاعده لينا ولا فاضيه لينا عشان نحلها ليها ، تدخل بيجاي و تطلع بيجاي ، تقول قاعده ليها في جحر نمل ، بدل تشيل القروش البتطلع ليها من شغلها دا و تمشي تتعالج بيها بترسلها لأهلها ، اصلو قرش منها ما بدخل البيت دا التقول كاتلين ليها زول .
والله لو دايره الصراحة يا "صباح" انتي الغلطانه ، من البداية ليه فضلتي الغريبة على القريبة ؟ هسي صفاء بت اختك دي مالا عيبيها لي ، ما احسن من قليلة الأدب دي ؟
- صفاء ما فيها كلام تب هديه و رضيه ، من البداية كنت دايراها لولدي ، بس العارض دي دخلت لينا في النص و خلت ولدي يجري وراها ، لحدي الآن ما برفض ليها طلب التقول كاتباهو ، و اظنها كاتباهو ، اصلو ماف راجل بطيع مرتو للدرجة دي .
واقفه و بسمع في الكلام دا كلو ، ما استغربت و ما اتفاجأت اتعودت على الكلام دا ، مع إنو ما جديد علي بس في كل مرة بتتكلم عني بالطريقة دي ألمي بيتجدد و وجعي بزيد ، ما حصل رديت عليها ما حصل اتجادلت معاها ، دايما بتجاوز كلامها الكعب عني و بقول معليش هي أم و اكيد ما عايزه حاجه غير مصلحة ولدها .
جهزت الشاي و شلتو وديتو ليهم ، أول ما شافتني لوت لي خشمها ، ختيت ليهم الصينية و سلمت على خالتو سعاد ، قلت احسن اقعد اتونس معاها حبه عشان ما تقول علي كعبه ، طول قعدتي معاهم كانوا بطاعنوني بالكلام ، بالجد الحاجه دي مؤذيه و مؤلمه شديد ، كونك تتونس مع ناس و انت عارف و متأكد انو كل حرف طالع منهم انت المقصود بيهو ، لمن غلبني القعاد و ما قدرت اسمع اكتر من كدا ، قلت ليهم عن اذنكم ماشه اكمل باقي شغلي ، اول ما اتحركت منهم سمعت عمتي قالت ليها ، اها شفتي ؟!! مشيت بعيد منهم و انا لسه سامعه وسوساتهم و ضحكهم و همساتهم ، دخلت بيتي و قعدت ابكي هناك ، بكيت قدرتي ، بكيت على كل حرف انقال عني ، بكيت على كل حاجه مريت بيها من يوم ختيت رجلي في البيت دا ، صليت العصر و مشيت للبيت التاني ، اصلا نحنا ساكنين في بيت واحد و كبير بس قاسمنوا نصين ، جزء ساكنين فيهو انا و أنس و الجزء التاني ساكنين فيهو عمتي "صباح أم انس " و بناتها و بيناتم في باب و مطبخنا واحد في الجزء بتاع عمتي "صباح"، طلعت الخضار من التلاجه و بديت اطبخ ، قلت لازم اعمل أكل كتير عشان يقعد لبكرا ، لأنو بكرا عندي جامعه و حأكون مشغوله و كدا ح اتأخر ، اثناء ما انا واقفه بطبخ ، جات عمتي "صباح" داخله ، عاينت للحلل و فتحتهم واحده واحده ، ادتني نظره كلها حقد و كراهيه و قالت لي دا شنو ؟ قلت ليها أكل لبكرا عشان حأجي متأخره ، بدت تكورك و تعلي صوتا قالت لي انتي ليه مسرفه كدا ؟ولا عشان القروش دي ما بتجيبيها انتي ؟! ولدي هناك شقيان و تعبان و انتي هنا بكل بساطة تشيلي و تسرفي ؟!! في بيت ابوك كنتي بتعملي كدا ؟؟ اكيد لا ، متأكده انك كنتي بتعمل ألف حساب لمصاريفكم و أكلكم ، لكن دا ما بيت ابوك عشان كدا ما هاميك و شغاله على كيفك ، فعلا والله "جسدا ما جسدك جر فيهو الشوك " قلت ليها لا ما كدا يا عمتي ،في النهاية الأكل دا ليكم انتوا ، زي ما انتي عارفه انا بتأخر في الجامعه و ما عايزاك تتعبي و تطبخي ، يعنى دا كلو عشان راحتك بس والله ، البيت دا ذاتو بيتي و انتوا أهلي و انتي في مقام امي بحترمك و بعزك زيها والله ، عاينت لي من فوق لتحت و مشت ، بعد ما انتهيت من الغدا ، دخلت المظلة لقيت "سارة" بتقرا في شيتاتها ، هي في الجامعة المستوى التاني ، قعدت جنبها و قلت ليها كيف عامله مع الإمتحانات ؟ ما ردت علي ، شفتها زهجانه و متجرسه ، شكلها المادة دي صعبة عليها ، قلت ليها جيبي اشرحها ليك ، انتفضت من مكانها و قالت لي انا ما طلبت مساعدتك و ياريت ما تدخلي في حاجه ما بتخصك ، عليك بنفسك و بس ، عمتي "صباح " سمعتها بتجوط و بتكورك ، جات جاريه و قالت ليها في شنو يا "سارة" قالت ليها بت الناس اللصقه دي كرهتني حياتي ، دايما بتجي و بتعكر لي مزاجي ، و بتتحشر في حاجه ما بتخصها ، شوفي يا امي مرة ولدك دي لو ما قادره عليها فأنا عندي تصرف تاني معاها ، عمتي "صباح" جاتني قريب و رفعت لي اصبعها ، قالت لي اسمعي هنا يا قليلة الأدب ، بتي دي ما عندك شغله بيها ، لو لقيتيها في الشارع ما تسلمي عليها ، و تاني ما اشوفك قريبه منها أو بتتكلمي معاها ، عايزا تلهيها لي عن القرايه بأمورك و كلامك الفارغ داك ؟ قلت ليها بس انا م.....قاطعتني و قالت لي كلامي واضح و يلا اتحركي من قدامي ، مشيت من جنبها و انا العبره خانقاني ، يمكن أبرر كراهية عمتي لي بس سارة ما لاقيه ليها مبرر ما عارفه ليه هي بتكرهني للدرجة دي كأني ضرتها أو عدوتها ، رجعت بيتي و كالعادة بكيت ، اصلا دي الطريقة الوحيده البقدر افرغ بيها كل حاجه جواي ، المغرب آذن صليتو و رقدت في المصلايه ، شويه كدا سمعت صوت باب الشارع ،قلت أكيد دا "أنس" جا ، بسرعة مسحت دموعي و مشيت فتحت ليهو الباب ، قال لي مرتي الحلوه كيف أمسيتي ؟ قلت ليهو الحمدلله ، عاين لي مسافه و قال لي كنتي بتبكي ولا شنو ؟ قلت ليهو ابكي ؟!! لا لا ما كنت ببكي ولا حاجه و اصلا ابكي عشان شنو ؟ مسك يدي و دخلني جوا قعدني في السرير و قال لي يلا احكي لي زعلانه من منو ؟ قلت ليهو أنس والله ماف حاجه انت بس مكبر الموضوع ، قال لي يعنى ما كنتي بتبكي ؟!يعنى بتكذبي علي ؟! قلت ليهو بكيت عشان القرايه غلبتني و بس ، قال لي طيب من البدايه ليه ما قلتي كدا ؟ قلت ليهو لأنو حاجه عاديه و ماف داعي اقول ليك و انت ذاتك ماف داعي تدقق كدا ، قال لي مع إني ما مقتنع بكلامك دا بس حأعمل نفسي صدقتك ، قلت ليهو انسانا من الموضوع دا و قول لي شغلك الليله كان كيف ؟ قال لي احسن شويه ، قلت ليهو الله يعينك ، طيب خش استحمى لحدي ما اجيب ليك الأكل ، قال لي طيب ، لبست توبي و مشيت بهناك ، لقيت عمتي راقده في الحوش برا ، أول ما شافتني قالت لي خير في شنو ؟ قلت ليها أنس جا و عايزا اشيل ليهو أكل ، قالت لي ناديهو لي هنا انا ذاتي ما اتغديت خلينا ناكل سوا ، قلت ليها حاضر ، مع إني شفتها قبيل اتغدت مع بناتها ، بس ما حبيت اكتر معاها الكلام عشان حاجه بسيطه زي دي ، رصيت الصحاني في الصينية و شلتها و ختيتها جنبها ، قلت ليها ماشه انادي أنس و جايه ، قالت لي آيي ناديهو و ماف داعي انك تجي ، اخدت نفس عميق و اتحركت من جنبها ، دخلت البيت لقيت أنس طلع من الحمام ، قلت ليهو أنس بالمناسبه عمتي ذاتا قبيل ما اتغدت عشان كدا أمشي اتعشى معاها بهناك ، قال لي امي لييه ما اتغدت مش عندها ادويه بتاخدها بعد الغدا طوالي؟ قلت ليهو آيي بس قبيل ما اكلت كويس بس بلعت أدويتها ، قال لي طيب ارح ليها بهناك ، قلت ليهو انا عندي شغل عايزا اخل.....ما انتظرني اكمل كلامي و طوالي مسكني من يدي و ساقني معاهو ، قلت ليهو أنس بس انا اتغديت و ما عايزا آكل تاني ، قال لي متأكد إنك ما أكلتي شي لأني عارفك لمن تكوني زعلانه و زهجانه ما بتاكلي ، ما عارف المزعلك شنو بس العارفو إنك أكيد ما أكلتي ، عمتي أول ما شافتني جايه مع أنس ، حمرت لي حسيتا شويه كدا و حتقوم تكفتني ، قعدت معاهم و انا ما قادره آكل كويس من نظرات عمتي لي ، قادره احس بكمية كبيره من الكره من ناحيتها لي ، يعنى احساس إنك تقعد مع زول بكرهك و ببغضك و بدعي عليك في كل ثانيه دا احساس مرهق و متعب شديد ليك انت قبل ما يكون ليهو هو ، غلبني القعاد و اللقمه ذاتا أبت تتبلع لي ، قلت الحمدلله ، أنس قال لي وين وين ، ما أكلتي شي ، هسي دا أكل ليك ؟! قلت ليهو اصلا انا أكلت قبل شويه و هسي انا قلت ليك كدا ، شبعانه ما قادره آكل اكتر من كدا ، ماشه اعمل ليكم الشاي ، قال لي لا خليهو "ساره" بتعملو ، قلت ليهو سارة عندها امتحانات أنا بعملو ، قال لي طيب خلي "سجود" تعملو ، أمو قالت ليهو سجود من قبيل قالت مصدعه و هسي بتكون نامت ، خليهو انا بقوم اعملو ليك ، قلت ليها لا لا انا بعملو انتي ارتاحي ، اتحركت من جنبهم سريع عشان "أنس" ما يكتر لي اسئلتو، مشيت عملتو ليهم سرعه سرعه و جبتو ليهم ،و رجعت بيتي ، فتحت اللابتوب و بديت اتم في شغل قبيل يلي هو تصمم شعار لشركة برمجيات ، بحاول قدر الإمكان اني اوفر مصروفي بتاع الجامعه و مصاريف أهلي عشان ما اضغط على أنس و اضاعف ليهو الهم همين ، قبل ما اخش الجامعه و قبل ما اعرس أنس كنت بتعلم البرمجة ، اخدت فيها دروس كتيره من اليوتيوب ، تلفوني هو الساعدني ، عن طريقو اشتغلت تسويق ، صممت برامج و شعارات و تطبيقات لشركات كتيره كلو من خلال تلفوني و بعد العرس "أنس " جاب لي اللابتوب دا و بقيت اشتغل فيهو ، ما عندي اخوان اكبر مني عشان يمسكوا البيت بعديني ، أخواني و اخواتي لسه صغار في منهم في الأساس و منهم في الثانوي ، ابوي بعمل سندوتشات طعميه و ببيعها في السوق بس برضو ما بتغطي كل مصروفات و احتياجات أخواني و البيت ، أنس الفيهو مكفيهو ما بقدر احملو مسؤولية أهلي بالإضافة لمسؤولياتو هو اتجاه أمو و أخواتو ، هو ما بقصر بحاول قدر الإمكان انو يساعد ابوي ، بس ابوي ما برضى يشيل منو حاجه هو انا ما برضى يشيل مني ، مع إنو القروش دي بطلعها انا من شغلي بس بعيدا عن شغل أنس بس برضو ما بقبل يشيل مني حاجه عشان كدا بدي القروش لأمي و بحذرها ما تجيب سيره لأبوي ، على الأقل تمشي بيهم حالهم لحدي ما الله يفرجها ، اثناء ما انا مباشرة في شغلي ، سمعت صوت عمتي "صباح" و هي بتصرخ ،قلت يا ربي الحاصل شنو ؟ قمت من مكاني و بسرررررعه مشيت ليهم بهناك
يتبع.......