المحامي (خفايا القدر)

31

روايه :-

#المحامي .

♡ خفايا القدر ♡.

الحلقه :-

♤ الواحده والثلاثون ♤ .

بقلمي :-

#zezo_a_saad.

عند سفيان :-

كل شي كنت متوقعه الا أن عمي هاشم يكون وراء كل هالمصايب .

صدمه كانت بالنسبه ليا...بس بهالوقت لازم نركز ونحاول نطلع من هالمكان لان عمي هاشم الباين انه مش بعقله وناوي ع قتلتي.

حاولت نلهيه بالدوه وننسحب شوي شوي ...كثر ضرب السلاح برا وبدي الصوت يقرب .

وباللحظه اللي غافلته فيها ولفيت كيف بنفتح الباب حسيت بشي سخون نزل مني وبدت الارض تلف بيا ..الرؤيه بدت مضببه قدامي .

بديت نفقد ف توازني والصوت يبعد ونفسي يثقل وكيف بديت نفقد ف الوعي حسيت بحد شدني  ليه .

سند بعياط وخبط ع وجهه:-

سفيان سفيان رد عليا ... سفيان يرحم بوك رد  عليا .

سفيان وهو يكح والدم يطلع من فمه :-

س...سند انا بن كح كح كح بنموت .

سند وهو يحضن فيه ويبكي :-

لااا..لااا ماتحكي هكي انت رح تعيش فاهم رح تعيش .

سفيان وهو داهش وصوته يادوب طالع :-

اسراء...هااااا اسر هااااااا    .

سند وهو يحضن فيه ويبوس فيه :-

ماعاد تحكي بالله عليك ....اسعاااااف بالله عليكم ساعدوني.

رضوان وهو يحكي باللاسلكي :-

معانا مصاب ف الموقف ابعتو اسعاف بسرعه حول .

اللي ع الجانب التاني :-

علم سيدي وينفذ .

رضوان :-

عناصر رحلو كل اللي تم القبض عليهم لمركز المباحث الجنائيه طرابلس وشددو الحمايه وممنوع اي زيارات او مكالمات او تواصل مع اي حد مفهوم.

الضابط :-

مفهوم سيدي .

وشوي ووصلت الاسعاف وحطو سفيان ف الاسعاف وحطوله جهاز التنفس الصناعي وسند شاد يده ودموعه ع خده وملابسه كلهم دم.
.
.
.

عند حمزه :-

وكلت  المحامي خيري عشان يرفع قضيه مضاده لقضيه اهل ريناد .

وفهمت من المحامي ان  لو هما فعلا جابرينها فالقاضي رح يطلب رايها ف المحكمه .

اتصل بيا اليوم عمي خيري ..وقال ان خالها مفتاح جايب شهود من العياده يثبتوا انها لما وصلت عندهم كانت متعرضه للضرب ونازفه .

اللي محيرني كيف عرف اذا كانت ريناد ماقالت شي لاهلها ..اكيد شك ف الموضوع يوم اللي اتصلت بيه وقتله تعالى روح بيها وشاف الاثار ع وجهها.

الباين ان موكل محامي شاطر اللي فكر بهالطريقه .

هالخبر صدمني ع الاخر..لأن هكي رح نخسر هالقضيه وننجبر ع ان ننفصل عليها .

ركبت ف سيارتي وطلعت طول ع سرت وف ظرف ساعه كنت عندهم ..نزلت من السياره وانا مش شايف شي قدامي.

خبطت ع الباب وانا حاس بروحي رح ننفجر وشوي فتحت امها.

عواطف باستغراب :-

حمزه خي...

وقبل ماتكمل كلامها ..دفيتها وخشيت ننادي بأهلي صوت :-

ريناااااد...انزلي نبي نحكي معاك رينااااد.

عواطف وهيا مصدومه من طريقته :-

حمزه اهدي ياولدي ...هذه طريقه تخش بيها ع حياش الناس عيبه مايصير.

حمزه بغضب :-

نبي زوحتي ياخالتي خليها تنزل ومش رح نخليكم اطلقوها مني عشان ياخذها ولد خالها.

عواطف بتوتر :-

ومن اللي قال هالكلام .

حمزه بغضب :-

شفته يومها جاي عندكم وقال هالكلام...وخوك لما سمع الكلام مانفاه خليها تنزل ياخالتي بالله عليك.

عواطف بهدوء :-

مش هكي تنحل المشاكل ياولدي .

حمزه وهو شاد شعره بعصبيه :-

امالا كيف يكون ...وانتم رافعين قضيه وتبو اطلقوها مني.

عواطف :-

حمزه خليني انا نتصرف ف الموضوع ولو مادرتش راي تصرف انت بعدها زي ماتبي.

حمزه :-

خليها تنزل نبي نشوفها .

عواطف :-

تعوذ من الشيطان ياولدي وماتزيد تعقد الموضوع  قتلك رح نتصرف ف الموضوع .

حمزه :-

استغفر الله العظيم يارب...باهي نبي نشوف.ولدي ممكن .

عواطف بتنهيده :-

تمام رح نركب نجيبهولك استريح انت.

قعمز حمزه وهو ع اعصابه ..وركبت عواطف عند ريناد  .

عواطف :-

هاتي الولد يابنتي ..بوه يبي يشوفه.

ريناد حضناته بقووه وتبكي :-

لا ياماما بالله عليك...اكيد يبي ياخذه ويحرمني منه بالله عليك.

عواطف :-

اسمعي الكلام قتلك يبي يشوفه ..لو كان يبي ياخذه كان قال ومش رح يرده شي.

خذت عواطف الولد من حضن ريناد.

ريناد بدموع :-

ماما بالله عليك ماتعطيهوله بالله عليك ماتخليه ياخذه ياامي والله نموت .

عواطف :-

استهدي بالله ومش رح يصير شي.

نزلت عواطف بجبران ...واول ماشافها حمزه جي يجري عليها خذاه منها وقعد يحضن فيه ويبوس .

قعمزت عواطف بجنبه وبهدوء :-

ممكن تحكيلي شن اللي صاير بينكم ووصلكم لهالمواصل.

حمزه شافلها وخذي نفس وحكالها كل اللي صار من اوله لأخره.

عواطف بغضب :-

ضربتها ياحمزه هذه اخرتها.

حمزه بضيقه :-

كانت ساعه غضب ...واي راجل ف مكاني كان رح يتصرف نفس التصرف.

عواطف بتعصيب :-

بس هالشي مايبررلك انك تضربها وتلوحها علينا وكانها مدايره فالطه.

حمزه نزل عيونه ف الارض :-

والله عظيم غلط ومش رح يتكرر ..وانا مستعد انفذ كل شروطك وشروطها بس ردوها ليا بالله عليك.

عواطف بضيقه :-

رح نشوف

حمزه بوجع :-

ماتقولي رح نشوف...القيلي حل بالله عليك .

عواطف :-

مانقدرش نوعدك بشي...بس رح ندير جهدي .

وقف حمزه ومدلها الولد :-

انتي قلتي بنفسك ياخالتي لو انك فشلت انا مسموحلي ندير اللي نبيه ورح نفتح عليهم حرب كلهم ومستحيل ياخذها حد مني وانا عايش .

طلعت وانا متعصب ومش شايف شي قدامي ..حاس بالدنيا كل يوم تضيق عليا اكثر وبننجن .

نسوق ف السياره ونفش ف غلي بالتخبيط ع الدومان...لعند رن فوني وكان سند.

حمزه بغضب :-

ايوا سند .

سند ببكاء :-

سفيان نصاب ياحمزه .

حمزه بخوف وصدمه :-

كيي...كيييف.انت شن قاعد تخرف ياسند شن تقول ياراجل.

سند وهو منهار:-

تعالي بسرعه الله يربحك حالته خطيره.

حمزه بخوف :-

ابعتلي العنوان بسرعه اهو جايكم.

سقت بأقسي سرعتي وانا مش شايف شي قدامي ..وبعد حوالي ساعه وربع وصلت للعنوان .

نزلت نجري لدرجه خليت باب السياره مفتوح وهيا تشتغل .

خشيت وانا تايه وندور بين الوجوه ع واحد من خوتي ...لعند شفت سند من بعيد قاعد قدام قسم الطواري وملابسه معبيه دم ومنهار بالبكي.

حسيت بالنفس ضاق ...ورجليا ثقلو والخطوات تباعدت عشان نوصللهم .

كل مانقرب خطوه نحسهم يبعدو عني خطوات

وصلت وكان سامر مستند ع كتف علاء والاتنين منهارين بالبكي .

طحت ع ركابي وانا مش مستوعب شي.

حمزه بخوف ونفس متسارع :-

سفيان وين...ليش تبكو احكوووو سيفو مات قصدكم .

قرب منه علاء :-

حمزه اهدي ..خليني نقولك.

حمزه وهو متهستر :-

لالالالا نبيش نسمع ...وين سفيان ..وييينه من اللي دار فيه هكي احكو.

سند بدموع :-

عمي هاشم.

حمزه تلفت عليه بصدمه وقعد يخبط ف راسه ويعيط :-

كله مني ....انا السبب كله مني ..كنت نشوف فيه ماشي ف طريق الغلط ومارديته ولا حميته لاااا ياربي لااا .

قرب علاء من حمزه ويحاول يشده بس هو كان متهستر.

لعند شوي وانفتح باب الاسعاف وطلع الدكتور .

قرب منه سامر وسند بلفهه.

سند :-

طمني يادكتور ...خوي كيف حاله.

د.مجدي :-

بصراحه الحاله وصلت وهيا نازفه دم هلبا مصابه بطلقتين لعيار ناري .

الخبر الكويس انها ماصابتش الكلي...بس للاسف جت بالكبد وحاليا رح يدخل للعمليات ..مانخبي عليكم الوضع حرج وربي هو اللي بيده كل شي ادعوله انتم .

تنهدت براحه ...وحسيت رجليا ماعاد حامليني قعدت ع الكرسي وانا ع اعصابي ياهو فرحان مازال حي...وخايف من الجاي .

قعدت ندعي وندعي وانا مش طالب الا العزيز الرحيم لانه الوحيد اللي بيده كل شي.

سامر شاف لسند :-

فهمني بس ليش عمك الكلب هذا دار هكي.

سند ودمعته ماوقفتش :-

لان هو اللي وراء كل شي صار لعمي صبحي .

حمزه بصوت مرتعش من اثار البكي :-

وين هو توا الفاسد هذا.

سند يمسح ف دموعه بكمه :-

قبضو عليه جهاز المخابرات.هو وعصابته .

حمزه بصدمه :-

عصابته ..!!.

سند :-

ايه عنده عصابه متع تجاره بالبشر وغسيل اموال وهلبا مصايب...الحمدالله ان اسراء حكتلي كل شي وخدينا احتياطنا بكري كان هذا مش عارف شن كان رح يصير.

رديت قعدت ع الكرسي وانا مش مستوعب شي ولا قادر نصدق كل اللي سمعته.
.
.
.
.

عند ريناد :-

كنت قاعده بداري ونستني ع نار خايفه من حمزه ومن عناده خايفه ياخذ ولدي من جديد .

كيف.قدمت خطوه للباب فتحاته امي وخشت ومعاها ولدي ف حضنها.

قربت منها بخوف وخذيته وضميته لصدري :-

خيرك عطلتي وقفتيلي قلبي كان زدتي شوي راني نزلتلك بروحي

عواطف :-

ايه عاد هذا اللي يبيه حمزه تنزليله برجليك .

شفتلها وكانت تشوفلي بنظرات غريبه ..وبعدها قربت وقعمزت ع حافه السرير.

عواطف بهدوء :-

ليش ماقلتيلي انه مد يده عليك وضربك.

ريناد نزلو دموعها ع خدها :-

وشن الفايده ياماما...ماكانش رح يتغير شي اللي صار صار.

عواطف بتعصيب :-

مش من حقه يمد يده عليك تحت اي ظرف من الظروف ..رح نحكي مع خالك مفتاح ونردك ليه.

شفتلها بصدمه وانا مش مصدقه اللي سمعته...تنهدت بقوه :-

حمزه مش رح يسكت وخصوصا ان ايمن قاله يبي يتزوجك بعد ماتطلقي منه ..ورح نخشو ف مشكلات نحن ف غني عنها ..حمزه يده طايله ونحن مش قده وفوق من هكي الراجل نادم وجاي شاريك وطالب رضاك وراضي بكل شروطك .

وقفت عواطف وكيف بتطلع تلفتت ع ريناد :-

هالمره رح نخش فيها ونقنع عمك بس لو تكرر هالشي رح يلقاني قدامه بالمرصاد ويديرلك ربي انتي مازال ادسي عليا شي زي هذا.

نزلت امي وخلتني مع ولدي قعدت نغيرله ف شمولته وعطيته الحليب عشان يرضع وسرحت ف كلام امي.

بعد حوالي نص ساعه ..خشت عليا امي من جديد.

عواطف :-

لو وليدك رقد انزلي معاي نبيك ضروري.

وقفت وحطيت جبران ف سريره ....ونزلت لتحت لقيت امي قاعده مع خالي.

عواطف اول ماشافت ريناد :-

تعالي يابنتي خشي.

خشيت وقعدت بجنبهم والصمت سيد المكان لعند حكت امي.

عواطف :-

مفتاح اوخي ريناد لازم ترجع لزوجها هذا هو الراي الصح

مفتاح بغضب :-

انتي عارفه انه ضربها ومد يده عليها.

عواطف :-

عارفه وغالط بهالشي ..بس حتي بنتي غلطت باللي داراته ..وهو جي نادم ومعترف بغلطه ومستعد ينفذ كل شروطنا .

مفتاح بتنهيده :-

كنت نبي نأدبه عشان مايعاودها ويمد يده عليها ثاني....ومادام هذا رايكم فانا مستحيل نجبرها ع شي ماتبيشي بس علم يوصلكم ويتعداكم لو تكرر هالشي مش رح يشدني حد عليه ورح ندير ماف راسي

عواطف :-

وهذا كلامي حتي انا..لو تكرر هالشي ماعاد يحلم يطول ظفرها.

مفتاح :-

ماسمعنا رايك ياريناد.

عواطف :-

ريناد رايها من رايي وشي قررته انا مستحيل هيا تكسر كلمتي.

مفتاح بضيقه :-

شن يعني بترديها بالغصب.

عواطف.:-

ريناد وحمزه بيناتهم ولد ومانييه يتشرد بيناتهم ..خلينا نكونو حياديين ونفكرو ف مصلحه الولد عشان مايدفع ثمن عنادنا.

بعدين حمزه ندمان واعتذر ومعترف بغلطه ومافيش انسان مايغلطش وربي غفور رحيم

مفتاح وقف بضيقه :-

ع راحتكم ديرو رايكم ..بس نبيك تعرفي ان انا مش راضي ..ويكون بعلمكم هالمره كانت درس ليه بس وربي المعبود لو تكرر هالشي ماعاد يفكر يشوف وجهها وانا عايش

تحرك من بجنبنا وهو يغلي :-

لما بيجي قولولي عندي كلام مهم معاه.

خش خالي مفتاح للمربوعه ...وقربت مني امي.

عواطف :-

اتصلي بزوجك وقوليله امتي مايبي يجي ياخذك.

ريناد بارتباك :-

ليش ماتحكي معاه انتي باهي.

عواطف شافتلها بتفنيصه :-

راجلي انا والا راجلك هو .

ركبت ريناد لدارها ...وطلعت فونها من الكوميدون ..فتحاته وخذت نفس واتصلت ع طول بحمزه .

حمزه بلهفه :-

انا قاعد نحلم والا حق.

ريناد بجديه :-

لا تحلمش .

حمزه بخوف  :-

صاير معاك شي فيك شي انتي والا جبران.

ريناد بتنهيده:-

كلنا بخير الحمدالله.

حمزه :-

باهي خيره صوتك هكي شن في.

ريناد خذت نفس :-

حمزه تقدر تجي تروح بينا

حمزه بصدمه :-

جديات تحكي...يعني رح ترجعي معاي خلاص .

ريناد :-

ايه امتي مايناسبك تعالي.

حمزه بفرحه :-

اكيد خالتي اقنعاته صح

ريناد :-

ايه صح .

حمزه :-

والله هذا احلي خبر سمعته اليوم...لو بيدي كنت نجيك توا ونروح بيك بس ظرفي مايسمحش .

ريناد باستغراب :-

خير شن ف ..صاير معاك شي.

حمزه بوجع :-

سفيان انضرب بالرصاص وهو ف العمليات توا.

ريناد بفزع :-

اللطف علينا ...خيره شن في ..باهي ليش العمليه حاله باهي هو .

حمزه بضيقه :-

قاعد تحت العمليات .

ريناد بخوف ودموع :-

ياربي استر ...يارب احميه وعافيه ..خالتي عرفت.

حمزه :-

لا ماحدش يندري قاعد.

ريناد بدموع :-

ياروحي عليك ياخالتي...طمني بالله عليك اول مايطلع من العمليات.

حمزه بتنهيده :-

حاضر ان شاء الله .

سكرت من حمزه ..وانا قاعده ع اعصابي ياناري عليهم هالعيله يطلعو من مصيبه يخشو ف التانيه.

.
.
.
.

عند صفيه :-

تصرفات ولادي اليوم مش  عاجبتني...تهامسو ف بعض وطلعو يجرو ..ولعند توا ماجي منهم حد وحمزه طالع من الصبح وماجاش .

نتصل بيهم وماحدش يرد عليا..يبو يجلطوني معاهم ياربي شن بندير.

خشت عليا اسراء :-

خالتي خيرك شن في وجهك مستصفر وانت مش تمام.

صفيه بخوف :-

مش عارفه يااسراء يابنيتي..حركه اولادي اليوم مش طبيعيه ونتصل بيهم مايردوش خايفه يكون صاير فيهم شي.

اسراء بفزع :-

سفيان...ياحليلي اكيد سفيان.

صفيه بخووف :-

سفيان خيره ...شن اللي صاير فهميني .

طلعت اسراء تجري لدارها وصفيه لاحقتها ومش فاهمه شي.

خذت فونها وقعدت تتصل بيه اكثر من مره وهو مايرد.

صفيه بخوف :-

شن ف يااسراء مايردش عليك.

اسراء بدموع :-

لا ياخالتي مايرد...ياخوفي بس.

صفيه شدتها من كتافها وهزتها بقوه :-

ياخوفك شنو...شن اللي صاير يااسراء وداساته عليا.

اسراء انهارت بالبكاء :-

انا السبب ياخالتي ....كله من تحت راسي...خالتي بالله عليك ارفعيني ليه الله يربحك .

صفيه ولونها انخطف :-

يابنتي انا غير نعرف شن صاير ويردو عليا بس .

شدت اسراء فونها من جديد واتصلت بسلافها كلهم وماحدش رد عليها .

بعدها قررت تحكي مع ملاك ..اتصلت بيها واول ماردت.

اسراء بخوف :-

ملاك..ملاك ياوخيتي احكي مع سامر خوك واساليه عن سفيان بالله عليك.

ملاك بحيره :-

غير شن في بس..سفيان خيره العفو.

اسراء بدموع :-

بسرعه ياملاك بالله عليك عشان خاطري .

ملاك :-

تمام حاضر شوي ونرد عليك.

سكرت اسراء ...وقربت منها صفيه بخوف :-

شن صار شن قتلك.

اسراء :-

قالت رح تكلمه وترد علينا.

شوي وعاودت ملاك ..وع طول اسراء ردت

اسراء بلهفه "-

شن صار معاك ياملاك.

ملاك :-

ياوخيتي اتصلت بيه 4 مرات ومايرد .

اسراء بدموع :-

ياحليلي كيف بندير بس...ملاك عشان خاطري اتصلي بعلاء اكيد يرد عليك بالله عليك.

ملاك سكتت وبعدها خذت نفس :-

تمام يااسراء توا نشوف.

سكرت اسراء من ملاك...وشافت لصفيه .

اسراء :-

كيف الحل ياخالتي بالله عليك قوليلي سامر مايرد حتي ع ملاك وقلتلها تحكي مع علاء بس الباين ماتبيش .

صفيه :-

ياحليلي  وين بنطير بس ..فرح ماهناش مشت للجنوب...وريناد ماعنديش رقمها شن هالغباره عليا.

اسراء :-

خالتي مش عندك رقم ام ريناد.

صفيه بلهفه :-

اي صح ..والله نسيت مره وحده هاك اتصلي بيها وانشديها.

خذت اسراء الفون من صفيه وع طول اتصلت ردت عليها عواطف وقالتلها اسراء انها تبي ريناد.

حكت معاها وع طول البنت تهسترت وبدت تبكي وتريش ف روحها وصفيه مش فاهمه شي مسكينه.

شوي ورن فون اسراء وكانت ملاك...ردت صفيه لان اسراء ف عالم تاني.

صفيه بخوف ودموع :-

ايو ملاك يابنيتي ..فهميني شن اللي صار الله يربحك.

ملاك بتوتر :-

خالتي.

صفيه :-

احكي الله يرحم اميمتك نحس ف ركابي نزلت فيهم الميه .

ملاك خذت نفس :-

خالتي وكلي ربي وادعيه ..سفيان انصاب برصاص بس الحمدالله توا كيف طلعوه من العمليات .

بدت صفيه تحس بالارض تلف بيها ومش قادره توقف ...وقربت منها اسراء تجري وسندتها وقعمزتها ع الكرسي .

شديت فوني بغيض وكتبت مسج لسند 💌 :-

نحن عرفنا كل شي ياريت ترد عليا لان امك تعبت عليا وانا بروحي مش عارفه كيف نتصرف .

ع طول سند اتصل باسراء واول ماردت عليه.

اسراء بغضب :-

ماعندكمش قلب انتم ..كيف اديرو هكي فيها وماتردو عليها.

سند بلهفه :-

امي فيها شي احكي يااسراء..امي خيرها.

اسراء بدموع :-

اول ماسمعت بسفيان ...داخت عليا وسندتها ع الكرسي وحالها مش عاجبني لونها مستصفر نعرفش خيرها.

سند بلهفه :-

اني جايكم.

اسراء ببكي :-

شن اللي صار مع سفيان ياسند.

سند بتنهيده :-

انصاب بطلقتين ..وداروله عمليه ونجحت.

اسراء بدموع :-

هما اللي كانو بيقتلوه صح

سند بتنهيده :-

ايه صح ..والحمدالله ان راقبناها من الاول وجهاز المباحث متواجد بالتنسيق مع المخابرات وقبض عليهم كلهم .

اسراء بدموع :-

وانا شن استفدت بالله...حاله باهيزهو ياسند ماتدس عليا بالله عليك.

سند بالم :-

ماندسش عليك يااسراء...حالته حرجه ويستني ف رحمه ربي مش ف يدنا الا الدعاء بس.

بدت اسراء تبكي بصوت عالي.

سند "-

اسراء قوي عزمك نعرفك قويه انا ...من اللي بصبر امي امالا ...انا ف الطريق اهو قريب نوصلكم .

اسراء بدموع :-

تمام .

سكر الخط وقعزت ع الارض وانا حاسه برجليا مش حامليني يارب تلطف بيه يارب ..
.
.
.
.

عند ملاك :-

فاجئتني اسراء لما طلبت مني نحكي مع علاء وقعدت ف موقف محرج ماقدرت نرفض وهيا بهالوضع.

سكرت منها ...خذيت نفس قوي واتصلت به ورد ع طول.

علاء :-

ملااك.

ملاك من غير مقدمات :-

ايوا...احم اتصلت عشان اسراء كلمتني وقالت انكم ماتردو عليها.

علاء بتنهيده :-

اه فهمت تمام.

ملاك بجديه :-

شن في ان شاء الله خير.

علاء بصوت مغصوص بالدموع :-

سفيان انصاب بالرصاص..وحاليا ف العمليات .

ملاك بخلعه :'-

لاحول ولا قوه الا بالله...شن وضعه باهي توا وكيف حاله كويس.

علاء وهو يمسح ف دموعه :-

مش معروف شي ...قالو جت ف الكبد وحالته حرجه.

ملاك بخوف :-

ربي يتلطف بيه ان شاء الله...ربي يحميه ..خلي سامر يكلمني ويطمني بالله عليك.

علاء :-

تمام ان شاء الله .

ملاك :-

ربي يحفظه ويطمنك عليه وينوض بالسلامه يارب.

علاء بوجع :-

الله امين ياارب.

سكرت ملاك من علاء...وهيا محتاره كيف بتنقل لاسراء الخبر ...قوت قلبها واتصلت بيها وردت هالمره صفيه قعدت تتلكك بالدوه وبعدها قالتلها ع اللي صار.

ملاك :-

عاودت اتصلت باسراء وفهمت من كلامها انها قاعده بروحها ...وفرح ف الجنوب وخالتي صفيه تعبانه .

قعدت نفكر كيف بنتصرف وبعدها نزلت حكيت لعمي شن اللي صاير استأذنت منه يوصلني ليهم  مهما كان هالعيله عشت بينهم عام كامل وماشفت منهم الا كل طيب وبالاخر هما عيله خوي ولازم نقف بجنبهم.

وافق عمي ورفعني لعندهم ..خشيت اطمنت ع خالتي وقعدت مع اسراء .

كلمني سامر وطمني قال ان العمليه نجحت وقلتله ان انا ف حوشهم وطلب منه مايقول لعلاء ..ماعنديش قدره تحمل ان نواجهه او ناخذ ونعطي معاه نهائي .

.
.
.
.

عند علاء :-

خبر اصابه سفيان كان زي الصاعقه بالنسبه ليا.

سفيان بالذات من بين كل خوتي هو الاقرب ليا ...نتفكر زمان لما نجي من عند حوش بوي عندهم كان ع طول ياخذ فيا من يدي من قبل حتي مايشوفوني باقي خوتي ويدخلني لداره ويفتح دولابه ويطلعلي لبسه جديده معلقه يقول هذه ليك خذيت منها زوز وحده ليا ووحده ليك .

رغم انه اصغر مني بس اكثر واحد كان يفهم عليا من غير حتي مانحكي ..لدرجه حتي لما نرقد يسيب ف داره ويجي يرقد بجنبي

نتفكر بمره كنت عندهم وكان ضهري فيه اثار ضرب من بوي ..لما نزلنا ع المسبح وشافه قعد يبكي بالعبره ومشي لبوي جبران يترجي فيه ماعاد يخليني نروح لبوي.

وكبرنا ومازال هالترابط بينا سيفو اللي يعرف كل اسراري..سيفو اللي بعمره ماكان خاطري بشي ومادارهولي...سيفو اللي يتنازل عن أي شي ع خاطري...سيفو اللي كان يقولي مستعد نعطيك روحي وانت مايصير عليك شي وفعلا نتفكر لما كنا بالثانوي نلعبو بالدراجات وطالعين للشارع ف غفله مني مانتبهت للسياره اللي جايه من بعيد ..رغم صغره بس من كثر حبه ليا دفني بقوه وضرباته السياره بدالي وانكسرت رجله وقتها .

قرب مني سند وانا منهار ولف يده ع كتفي وشدني لحضنه.

سند بدموع :-

وسع بالك ياعلاء..ماتنهار ياراجل حني شادين عزمنا بيك من بقوينا امالا .

علاء ببكاء :-

راهو سيفو ياسند ...عارف شن معني سفيان عندي ...سفيان راهو الروح والله والله لو نقدر نعطيه من سنين عمري ومن نبض قلبي ونفسي اللي نتنفس فيه لما نعطيهوله ..سيفو مستعد نموت انا بداله وهو مايصيرله شي ...اقسم بالله نموت انا لو هو يصير عليه شي.

سند يبوس ف راسه ودموعه ع خده:-

تعوذ من الشيطان ...ادعيله بس ماينفع الا الدعاء توا.

علاء وهو منهار :-

يااارب ...يااارب تلطف بيه يااارب ..يارب ماتحرمني منه يااارب.

قرب منهم حمزه والحزن باين ع وجهه وعيونه محمره من الدموع .

سند :-

شن صار ف جديد.

حمزه :-

يستني ف لطف الله...الدكتور قال خاش ف غيبوبه وع ال24 ساعه الجايه شن يصير.

سند :-

لطفك يارب ...لطفك بينا ياارب.

حمزه :-

وين سامر امالا.

سند :-

بعته للحوش عند امي..سمعت وقالت اسراء تعبت عليهم بنمشي انا بعدين شفت كيف منظري ومعبي دم مابيتش نخوفها بعته هو.

حمزه :-

ان شاء الله خير وخلاص .

وقعمز حمزه بجنبهم وكل حد الوجع والحزن مش لاقي وين يطلعه.
.
.
.
.

تسريع ف الاحداث :-

بعد مرور يومين :-

عند ملاك :-

مرو يومين ع وجود سفيان بالعياده ومافيش اي جديد ف حالته ...قاعد ف العنايه وداخل ف غيبوبه .

بالنسبه لخالتي من يوم مامشتله بالعياده ومارضت تروح نهائي ع قد ماحاولو معاها اولادها .

اما خوته فقعدو يتبادلو بالدور كل يوم يباتو زوز ويروحو زوز يستريحو ويرجعو يمشو ثاني .

اسراء يعلم بحالها كان ربي مسكينه ..وحاطه اللوم علي روحها ف اللي صار ..وامها صحتها ع قدها ويادوبك قادره تتحرك .

اليوم قاعده بالمطبخ نحضر ف العشي وندعي بداخلي يارب مانتصادمش مع علاء .

يومين وانا نتجنب فيه ومايعلمش بوجودي الا حمزه وسامر .

حضرت العشي وبديت نجهز ف.السفره ومن بختي خش علاء .

جت عيني بعينه ..وحاولت نتجنبه وطلعت نجري للمطبخ.

ملاك بسرها :-

يارب يجي سامر يارب ...سامر ياوخي تعالي الله يربحك.

حست بحركه وراها وكان علاء ..كيف جت طالعه شدها من يدها ودفها ع الحيط وحاصرها بيديه الزوز.

ملاك بارتباك :-

علاء حول مايصير ..احسن يجي حد ويشوفنا.

علاء بجديه :-

مش قبل مانحكي معاك ..ونقول اللي بخاطري فاهمه ..مش قبل ماتسمعيني فاهمه.

ملاك بارتباك :-

علاء حول بالله عليك...مايصير يخش حد من خوتك ويشوفونا هكي.

علاء خبط بيده بقوه ع الحيط :-

شن اللي يصير ها...يصير عادي تعذبيني فوق ماانا متعذب قولي .

ملاك بتعصيب :-

ماطلع روحك بريئ ياعلاء انت اللي اخترت هالشي...بكل مره كان قرارك نفسه تنسحب ومن غير حتي مادير اعتبار لمشاعري.

قعد علاء يتأمل ف وجهها وساكت ...ملاك بهدوء :-

ابعد لو سمحت ومش رح نطلع.

علاء باصرار :-

لا مش رح نبعد...ملاك اقسم بالله مادرت هالشي الا عشان مصلحتك لان ماكنتش نبيك تتعذبي وتتعبي اكثر ..هالشي كان اصعب عليا من الموت وعاهدت نفسي تحرم عليا النساء من بعدك .

ملاك بدموع :-

انت سيبتني ف الماضي وعاودتها توا اعترف بهالشي وماكلفت نفسك حتي تاخذ رايي لو كنت بس قلتلي كنت رح نرفض عارف ليش...لأني غبيه ونحبك ومش شايفه غيرك.

علاء :-

والله ماخليتك ورحمه بوي جبران..انا مشيت وجيت ع عمك لعند حفيت بس هو رفضني وقال ان حجته ماكملتي قرايتك شن تبيني ندير بالله عليك.

ملاك بدموع :-

كان بامكانك تتصل ..تبرر تقولي وانا نختار نواجه عمي او نستناك طول العمر بس ماتهرب وتخليني نتعذب بروحي وانا مش عارفه حتي اخبارك لعند ننصدم بيك وتطلع خو الشخص اللي كنت ع اساس زوجته.

علاء وهو يخبط ع صدره بيده :-

تحسابيه كان ساهل عليا ...كنت نتعذب كل يوم وانا نشوف فيك قدام عيوني ومش قادر نوصلك..نموت بكل مره تجي عيني ف عينك حسي بيا بالله عليك .

بدت ملاك تبكي وانهارت بالبكي ..قعد علاء يشوف فيها وبعدها ماعاد قدر يشد روحه اكثر شدها ليه وحضنها بقوه

علاء بتنهيده وجع  :-

ماعاد تبكي بالله عليك ياسرك ...انا اسف والله اسف سامحيني .

ملاك ببكاء وهيا شاده تيشرته بقوه :-

ليش درت فيا هكي بالله عليك ليش عذبتني كل.هالعذاب.

علاء :-

اقسم بالله نحبك...وانتي كل حياتي .انتي النفس اللي قاعد نتنفس فيه صدقيني .

دفاته ملاك وطلعت تجري لان ماعاد قادره اكثر ...وتلاقت مع سامر كيف خاش من الباب وطلبت منه ان يوصلها لحوش عمها.
.
.
.
.

عند فرح :-

اتصل بيا سند وقال انه مش رح يقدر يجيني لان سفيان خوه مصاب وف العنايه .

هالعيله ربي يكون ف عونها ..كل يوم حالها للخلف والله يسخفو رغم انهم ناس طيبه .

جت قعمزت بجنبي خالتي عائشه :-

فرح بنتي خيره جوك مش عاجبني .

فرح بهدوء :-

نعرفش ياخالتي نحس ف حياتي ملخبطه ومش قادره نتأقلم ونعيش حياة طبيعيه مع سند تعودت عليه جمال اللي مايحكيش واللي نحبه بطريقه معينه فاهمه عليا خالتي.

الحاجه عائشه قربت منها وشدت يدها :-

فرح بنتي هالافكار رح تفسد عليك حياتك..تخايلي لا سامح الله كان هو بدال خوه ف العنايه كنتي رح تحسي بشي مختلف ورح تكون اقسي امنياتك ان يرجع سالم وماتبي شي تاني .

فرح دموعها نزلو :-

مستحيل نقدر نتخايل هالشي.

الحاجه عائشه :-

فهمتس توا اللي نحكيلك فيه..شوفي يابنتي الانسان فينا طبعه ملول ..لو كانت عنده التعاسه رح يتمني السعاده ..ولو كانت عنده السعاده نغص ع روحه وتنكد ..لو كان صيف يقول الله ماحلاه جو الشتاء ..ولكا يجي الشتاء يقول مابهاك يانوي...ومايرساش ع بر لعند يفسد حياته بيده.

ردي بالك يابنتي تفسدي ع روحك وتخربي حياتك وتقعدي من غير لا جمال ولا سند...لو يرجع الزمان ويرد جمال رح تقولي ياريته يتكلم ونعرف ماف قلبه بس ..لو نسمع صوته..لو نعرف عيلته ونكون معاهم وتتربي بنتي وسطهم ياسر ماتربيت انا يتيمه.

فرح تمسح ف دموعها :-

عندك حق والله كله فكرت فيه.

الحاجه عائشه :-

تعوذي من الشيطان يابنتي واحمدي ربك ع النعمه اللي انتي فيها لان النعمه ماتدوم لعبد جاحد وارضي باللي قسمهولك ربي الرضا اساس التوفيق ف الدنيا ..الانسان يابنتي قيمته بقلبه مش بشن عنده او لا..وسند قلبه ماتغير هو نفسه قلب جمال فهمتيني.

فرح :-

ايه فهمتك.

الحاجه عائشه :-

الراجل اللي يحب مرته بدي نادر ف زماننا هذا..والراجل بلا عاطفه مايعيشش راهو لو لقي منك الجفاف والجفى صدقيني حتي لو يموت فيك رح يخليك ويمشي لغيرك لان اساس العاطفه عنده الحنان وان زوجته تحس بيه حتي من غير مايحكي اعطيه حب وعاطفه وحنان وهناء وراحه ف بيته يعطيك كل اللي تبيه حتي عيونه ماتخلي زةجك ينفر منك يابنتي ..خوذي الكلام اللي يبكيك مني وماتاخذي الكلام اللي يضحكك ويضحك عليك وربي يهدي سرك .

ناضت خالتي عائشه وخلتني مع حيرتي ...من غير اي تردد فتحت فوني وبعتله مسج 💌 :-

نحبك سند ومستاحشاتك ومحتاجتلك.

ع طول اتصل بيا ..وكأنه فعلا محتاج بس لهالكلمات البسيطه .

سند ابتسم :-

قريب نجيك توا ف هالليل عشان نروح بيك نتحملش انا راهو.

فرح بدموع :-

انت مش زعلان من تصرفاتي صح.

سند بتنهيده :-

لا مش زعلان ..بس عاتب عليك .

فرح بدموع :-

نحبك سند.

سند :-

شنو...اه ماسمعتش.

فرح بابتسامه :-

غشاش سمعتني.

سند :-

عاوديها تاني بالله عليك.

فرح بصوت هادي  :-

سند خالتي عائشه ف المطبخ نخاف تسمعني.

سند :-

امم مكاره رح نفوتهالك هالمره.

فرح :-

كيف حال خالتي وسفيان .

سند تنهد بحزن :-

ع حاله ماتغير شي ..ادعيله بس ربي يتلطف بيه .

فرح :-

ربي يشفيه ويعافيه يارب...انت بالعياده والا ف الحوش.

سند :-

لا ف العياده ..شوي ومروح.

فرح :-

خلاص سلملي ع خالتي..ولما تروح نتكالمو.

سند :-

تمام حبيبي ف حفظ الله .

احيانا لما نضيعو طريقنا محتاجين بس من ياخذ بيدنا ويردنا للطريق الصحيح وهذا اللي داراته خالتي عائشه معاي.
.
.
.

عند حمزه :-

كان لازم نمشي اليوم نجيب ريناد ..لما وصلت لقيت سياره خالها مدرسه وهرفته قاعد بالحوش.

خبطت ع الباب وفتحلي خالها مفتاح ..وخش قدامي من غير حتي مايحكي واضح مازال ناقم عليا .

خشيت سلمت عليهم وكانت ريناد قاعده مع امها ف الصاله وشاده جبران ف يدها.

مشيت وقفت قدامها وخذيته منها وحضنته وقعدت نبوس فيه .

قعدت ع جنب وكان الكل ساكت لعند حكي خالها مفتاح.

مفتاح :-

اول شي حمد الله ع سلامتك خوك ..وربي يشفيه ويعافيه

حمزه وهو حاضن جبران :-

الله يسلمك بارك الله فيك ...قبل ماتحكي اي كلمه نبي نقولك انا جاهز لكل شروطك ومش رح نروح الا بيها هيا وولدي.

مفتاح بجديه :-

مدت يدك عليها وضربك ليها ياحمزه شي مستحيل نسامحك عليه وزيدك يازايد تلويحتك ليها وكأنها رخيصه...ولولا اصرار امها لمصلحه ولدك ماكنت رضيت نردهالك ولو حفيت ..خذلتني بجد ياحمزه كنت نحسابك زي المرحوم الله يرحمه .

حمزه بضيقه :-

ليش تهين فيا وانا جاي طالب رضاكم ..عارف روحي غلطت وكالب السماح منكم كان سوء تفاهم وهيا ساهمت فيه.

مفتاح بتعصيب :-

ماتوصلش للضرب ياحمزه وخصوصا انها حامل..كلنا عندنا نساوين وتصير بيناتنا مشاكل والناس الاولي قالت حتي مصارين البطن يتعاركو بس مافكرنا نمدو ايدينا عليهم ونرقبوهم ع الموت ...مش من الرجوليه ترفع يدك ع من اضعف منك عرفتك راجل والمواقف تشهدلك .

حمزه نظل عيونه بالارض :-

انا اسف وحقكم عليا .

مفتاح بحزم :-

ومش رح يتكرر هالشي.

حمزه :-

لو تكرر ..ليكم الحق ف اللي تبو اديروه.

مفتاح :-

مش رح نديرو شي ..بس ماعاد تحلم اطول ظفرها.

وقف مفتاح وشاف لريناد :-

لو تكرر هالشي ودسيتي علينا ..صدقيني مش رح نرحمك ووقتها رح يكون الكلام كلامي لا رايك انتي ولا امك فاهمه.

وبعدها تلفت ع حمزه :-

وانت ياحمزه عرفناك وانت ولد اعدل الناس والعادل ربي ..خاف ربي ف هاليتيمه ولو ماعاد تبيها ردها لينا نحن مش قالقين منها بس ماتظلمها.

وبعدها طلع مفتاح ..وقفت عواطف وشافتلها.

عواطف :-

شوف ياولدي انا مش رح نكثر من الدوه...انا من هالدنيا طلعت ببنتي هذه بس وترملت بيها ع صغر وعشانه سكرت حتي باب الزواج...يمكن زواجك بيها كان عن غصب وانا يشهد الله رضيت نعطيهالك لأن هالشي كان وصيت المرحوم ...وجبران الله يرحمه شهاده لله ماعقب ناقصه يوكسوه بيها رباها بدم قلبه وتعب عليها وكأنها كبده من صلبه وكنت متاكده ان مستحيل يحطها حطه عافنه ويكفي انه خذاها لولده .

المشاكل تصير ..والخلافات تصير بس اهم شي القدر ياولدي مايطيحش ..مانبيش منك شي بس نبيك تحطها ف عيونك وهذه امانتي امنتهالك لعند نلاقيك ونخاصمك بيها يوم حكم الحاكمين ريح قلبي الله يريحك ودير بالك عليها خليني حتي نموت نموت مستريحه عليها.

حمزه :-

بعيد السو عليك ياخالتي ربي يطول بعمرك وانا نوعدك وعد رجال اللي صار كان ماضي وانتهي وف الجديد مكانها بعيوني ومش رح نخلي النسمه تقرب منها وهذا عهد عليا ليوم حكم الحاكمين.

عواطف شافت لريناد :-

نوضي يابنتي خلي نوتو باقي شناطيك ..وتوكلي مع راجلك هذا سندك ومادايملك بعد ربي الا هو.

ركبت ريناد مع امها لدارهم ةبدت توتي ف شناطيها .

عواطف :-

ريناد ماما ماتتحملي الظلم عشان مشاعرك ..الراجل لما يحس بضعف المراه وان ماعندهاش سند يبدأ يطب فيها زي الكره ...هو تو فهم غلطه وعرف ان لو جيتي مره تانيه فما عاد يحلم يشوفك بس ديري بالك تفسدي كل اللي درناه وتحسسيه ان ممكن تتستري عليه ف الجديد لان رح يرد يعاود اللي داره.

ريناد حضنت امها بدموع :-

امي حمزه الفتره الاخيره والله تحسن وضعه معاي هلبا وهذا اللي خلاني نسامحه وزيدك يازايد انه عانى ف حياته هلبا وهذا اللي وصله للمواصيل هذه.

عواطف باستها من جبينها :-

ربي يهدي سرك يابنتي ويسعدم ويصلح الحال بينك وبين زوجك .

..وبعد شوي نزلت بشناطيها ..خذيتهم منها حطيتهم ف السياره ... وكيف جاي بناخذ ولدي وقفتني ريناد .

ريناد :-

حمزه ف عندي شرط لازم تسمعه قبل مانمشو.

شاف حمزه لعواطف :-

شرط شنو مافهمت.

ريناد :-

ماما ممكن تخلينا بروحنا حبيبتي.

عواطف :-

تمام انا الفوق خوذو راحتكم .

ركبت ماما الفوق ...وقربت من حمزه .

حمزه بحيره :-

شنو شرطك .

ريناد :-

ف شي لازم تعرفه ..وحكتله ع امها وكيف جتها وقالتلها انها كانت محبوسه.

حمزه بصدمه :-

امي مازال حيه مستحيل .

ريناد :-

هذا اللي صار..جتني تبكي وتبي تشوف جبران ولو مره لان الباين والواضح عليها انها كانت مريضه.

حمزه بغضب :-

تشوف جبران صار...ف احلامها.

ريناد :-

حمزه امك غلطت صح ..وانا بروحي عاتبتها ع هالشي بس مافيش حد معصوم عن الغلط وخير الخطائون التوابون.

حمزه بتعصيب :-

انتي ماعشتيش اللي عشته ياريناد ..ونحن بشر مش برحمه ربي عشان نقدرو نغفرو ونسامحو.

ريناد بهدوء :-

عارف شن اللي خلي امك ادير كل اللي داراته طلاق امها وبوها والفراغ العاطفي اللي عاناته والتشتت اللي عاشت فيه ..وهذا ليش انا مارضيت لولدي يعيش نفس المأساه وتتكرر معاه معاناتها ومعاناتك .

حمزه شافلها بصدمه :-

انا.

ريناد :-

ايه انت ..بسبب معاناتك انت صرت هكي ووصلت للي وصلتله وهذا اللي خلاني نعاني انا معاك ..شرطي ياحمزه انك تخليها تشوف جبران ولو مره انا ام وعارفه شن شعورها وحاسه بيها ع خاطري بالله عليك.

حمزه تنهد بوجع :-

جبران بس..انا ماتحلمش تشوفني.

ريناد :-

تمام اساسا هيا عارفه انك مش رح توافق تشوفها ولهالسبب طلبت تشوف جبران.

حمزه :-

عندك عنوانها.

ريناد :-

لا .

حمزه :-

وكيف الراي امالا.

ريناد :-

عادي مايصعبش عليك نعرفك.

حمزه :-

تمام يصير خير.

سلمت ع امها وطلعت ركبت بجنبي وهيا ساكته .

كنت طول الطريق نحاول نستميلها جيهتي او نحكي معاها وهيا بس ساكته .

وصلنا الحوش بعد حوالي الساعه وكان فاضي مافي حد الا ام اسراء راقده ...ركبت ريناد لجناحنا ولحقتها .

خشيت وراها وحضنتها من الخلف وقعدت نشم ف ريحتها بعمق :-

اقسم بالله مخنوق ..حاس روحي توا بس تنفست.

ريناد دموعها نزلو ...لفها حمزه ليه وقعد يمسح ف دموعها بيده :-

انا اسف حبيبي ..والله حقك عليا ان شاء الله يدي تنكسر وماتنمد عليك ياعمري.

ريناد بغصه :-

اخر شي توقعته منك تقسي عليا كل هالقسوه.

حمزه :-

اسف ياعمري والله اسف..مستعد نركع عند رجليك ونبوسهم عشان تسامحيني لان بجد غلطت ف حقك والله والله نحبك وحياتي من غيرك ماتسوي حاجه كنت تايه ومخنوق من غيرك سامحيني بالله عليك واللي تبيه انا فيه
.

حضناته ريناد بقوووه :-

مانبي شي اكثر من هكي...يكفيني سمعت منك كل هالكلام وعرفت انك نادم وجبرت بخاطري.

بعدها حمزه وشد وجهها بين ايديه :-

والله والله ورحمه بوي نحبك ..ووعد مني رح انسيك كل اللي شفتيه بسببي.

وقرب منها وباسها بعمق وحضنها لصدره بقوووه .

.
..
.

عند اسراء :-

واقفه زي التمثال المحنط قدام الحاجز الزجاجي متع العنايه .

سفيان ياروحي ليش ماتفتح عيونك وتحكي معاي..ليش مش راضي تنوض ونتعاركو زي قبل ..مش رح نسامح نفسي لو صار عليك شي اقسم بالله.

نزلت الدموع من عيوني وحسيت بيد انحطت ع كتفي ..لفيت وكانت ريناد.

وع طول ارتميت بحضنها وانهرت بالبكاء .

اسراء بدموع:-

رينو قداش مااستاحشتك ياقلبي.

ريناد وهيا تمسح ع ظهرها :-

حتي انا هلبا ياصغيرونتي .

اسراء ببكاء :-

سفيان بيموت ويخليني ياريناد.

ريناد تحاول تغيرلها جوها وماتنهار معاها وبصوص مغصوص بالدموع:-

من هذه اللي تتكلم ...اللي وراته النجوم ف عز الظهر باش وافقت عليه ها.

اسراء ببكي :-

كان زمان...انا السبب ياريناد انا كله من تحت راسي.

بعدتها ريناد عليها :-

اسراء نعرفك قويه وشرسه ولسانه اطول من سنوات الحرب ع ليبيا شن جاك توا.

اسراء ابتسمت :-

ماصحك قاعده تلصقيلي ف عيوب ع اساس ناقصيني ماهو.

ريناد :-

لا مش تلصيق بجد هذا انتي.

اسراء :-

استاحشتك واستاحشت بوجودك بيناتنا والله...وين وليدي امالا.

حمزه من وراها وهو جاي :-

اهو وليدك ..يدور عليك حتي هو.

قربت منه وخذت جبران وحضناته وقعدت تبوس فيه :-

ياحليلي ..ليدي نا مايبكيش شكله مانسانيش كان هذا راهو ولع زي عادته.

حمزه "-

شفتيها ملكاته ليها...لالا خلي ولدي ف حاله وهيا وتي روحك اول مايطلع سفيان من هنا ان شاء الله ديرو عرس ع طول وجيبوله ولد عم يلعب معاه.

ريناد شافت لاسراء :-

كيف حاله سفيان اليوم ..ووين خالتي.

اسراء مسحت دمعتها :-

الحمدالله فاق قبل شوي ..ولانه كان يتوجع هلبا عطوه مسكن ورجع رقد من جديد.

حمزه :-

بالله عليك...الحمدالله الحمدالله اخيرا فاق ليش ماحدش كلمني وين سامر امالا.

اسراء :-

سامر خالتي ضغطها هبط وطاحت علينا لما شافت سفيان ناض ويتوجع دخلوها للطوارئ وعطوها ابره تعديل ضغط هو بجنبها توا.

حمزه بخوف :-

تمام خلي نمشي نشوفه ..ونشوف الدكتور مره وحده نطمن ع حالة سفيان.

ريناد :-

استني حمزه خلي نمشي معاك نشوف خالتي ...سرو خلي جبران عندك شوي ونجيك .

اسراء :-

تمام اوك .

مشي حمزه هو وريناد لعند صفيه واول ماشافت ريناد حضنتها ع طول وانهارت بالبكي.

شاف حمزه الدكتور وطمنه ع وضع سفيان ...وطلب من سامر يروح بأمه والبنات ورح يبات هو الليل عند سفيان لان سند الصبح ماشي للجنوب عشان يجيب فرح .
.
.
.
.
.

عند ملاك :-

كنت قاعده بداري وقاعده بجنبي زبيده ونهدرزو  ع تحضيرات فرحها .

رن فوني وكان علاء يتصل تجاهلته زي العاده .

شافتلي زبيده ويبتنرفيز :-

ملاك انتي شن تبي بالضبط ارحمي روحك وارحمي الولد ..لانك سيبتيه ونسيتيه ولانك راضيه ترجعيله بدي لعب صغار الحق.

ملاك :-

خليني ف حالي يازبيده .

شوي ووصلني مسج 💌 وخكفت زبيده الفون مني وفتحاته وكان من علاء وبدت تقري فيه بصوت عالي.

" مش رح نيأس لو مهما صديتيني ولو قعد بعمري يوم واحد رح نتزوحك وتكوني حلالي ...نحبك ياقاسيه ".

زبيده :-

الله الله ع الرومانسيه اقسم بربي وجه فقر انتي

ملاك بزعل :-

زبيده يابارده والله ماتتحشمي .

زبيده وقفت "-

انزلي انزلي كان بتتعشي ...احسن يجي بوي  ينزلك.

طلعت زبيده وشوي بعدها.خش عمي .

العارف :-

السلام عليكم بنتي.

ملاك :-

وعليكم السلام ورحمه الله .

العارف :-

بنتي قعمزي نبي نحكي معاك بموضوع مهم .

ملاك :-

ان شاء الله خير ياعمي .

العارف :-

ملاك بنتي ..علاء جاني كم من مره وخطبني منك ومازال ماعطيته رد قلت ناخذ رايك قبل.

ملاك :-

احم مانبيش نتزوج ياعمي.

العارف وقف :-

بنتي مواضيع زي هذه يفكر فيها الانسان بعقله مش بتهور العاطفه متاعه ..والفرص الحلوه تجي مره وحده بالعمر ماتضيعيها مادام جت عندك  بسبب كبرياءك ووقفتك عند الماضي احسن تندمي طول عمرك .

وتوا تعالي كان بتتعشي الكل يستني تحت.

بالليل الساعه 2 بالليل :-

كنت راقده بداري ومش واعيه بشي...لعند خشت زبيده تجري وتنوض فيا.

زبيده :-

ملاك ملاك نوضي ملاك.

ملاك بخلعه :-

ها...شن في خيرك .

زبيده :-

علاء علاء نوضي.

ملاك وقفت وبصدمه  :-

خيره .

زبيده :-
.......
.
.
.
.
.

#يتبع.

برايكم شن رح يصير ...وشن تتوقعو تكون نهايه الروايه وشن الاحداث الجايه لأخر حلقتين .

بانتظار تعليقاتكم وارائكم وتفاعلكم الرائع والمميز.

تحياتي أختكم وصديقتكم دائما :-

#zezo_a_saad❤😍