شفاه مخملية

Part 3

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#يَقول الشـاعِر :
لَقيتها ليتني ماكُنت القاها
فأنا اكمل من بعده ..،
قد ميزتها من بين النساء كـ سَطر قصيدة مَنبوذ وقعت في غرامه،
سمراءُ عشقت حروفها
ما لي بـ باقي النساء وهيَ لقلبي ملجأٌ..
مدري شحچت لعيوني وساعتهة مدري شلونّي
يدوروني مايلگوني
قُلت لهم من بعدها ارجف واگول اشاه
فـ لم اجد شيء دافئ كـ  قلبها اللامِع المُخملي♥️
(بقلم ithuda )

♛ ♛ ♛ ♛ ♛ ♛ ♛ ♛ ♛ ♛

"هجران"
گظت الايام ممللله خاليه من أي شي الى ان اجه اليوم الغير حياتي وگلبهه گلاب، عشت عيشه ومريت بأحداث ماتخيلت روحي يجي يوم واجربهه واعيشهه، اجتني امي تعيط...

-صباح: وچ هجراااان گووومي گوومي بسرررعه

-ها ماما شبيچ؟

-صباح: جايينه خطاار بسرعة حبيبتي گومي حظري عشه هم ياله نلحگ

-ياا عزه ماما شنلحگ!! انتي صدُك تحجين تره ساعه بثمانية وين اكو وقت بعد

-امي: يله هجران انتي گدهه گومي بنيتي سوي العشه ما بقه شي ويوصلون العالم

گمت بسرعه حتى ما سألت امي منو جاي من الخبصة، لفيت شعري سويته كبة لان يزعجني طويل ويلعب بي الهوا

طلعت كبب وبورگ وهالسوالف گلت اسوي نواشف لان مستحيييل عندي وقت ابدع واسوي اكل، استلمت الطباخ واگلي وماملحگة انداريت اسوي الزلاطات وندى بين رجليه تحوس اما جوريه هه جوري من تسمع اكو خطار تشرد وتختل مثل الفارة تخاف تشتغل، بَـس لا والله ليش اظلمهه هم تشتغل حرام عليه

سمعت باب الحوش يندگ، رحت ركض شمرت شال ؏ راسي ونزلت دشداشتي بعدما چنت شايلتهه.. صحت...

-منووو؟؟؟

اجالي صوت رجال ميزت صوته هذا غزوان، فتحت الباب وگلت بضحك...

-اجيييت بوقتك جايينه خطاار و...

انگطمت حچايتي من شفت واحد واگف بصفه لابس دشداشه سوده ولاف شماغ ؏ راسه لفه اماراتيه شكله مألوف وعبالك شايفته من قبل.. چان يباوعلي من اللتقت عيوننا دار وجهه بسرعه..

-غزوان: شلونچ هجران؟

-زينه

-غزوان: اكولج هذا بكر محتاج شاحنه عدكم؟

-هاا.. اءء منو؟

اشر ؏ الرجال البصفه واردف...

-غزوان: بكررر هذا بكر يريد شاحنه عدكممم؟؟

-احم اي مال فاضل عدنه

-غزوان: جيبيهه حبابه احنه بالاستقبال نطب

-خوش

رحت جوة تلگتني امي بباب المطبخ تسألني منو اجه گلتلهه غزوان وواحد وياه.. گالت بَـس تكمل گلي الكبه وتلبس حجاب وتطبلهم جوة، هاا يعني هوه هذا الخطار؟؟ بَـس شعجب رجال جاي وحده مو من عوايد ابويه يجيب شباب للبيت، والزيد حيرتي امي گالت طببي الشاحنه الهم هاي شبيهه امي شو صايره فالتو

رحت ادور ؏ شاحنه فاضل ماكوو اختفت، سألت جوري عنهه گالت بالميز.. اخذتهه ورحت ركض للاستقبال دگيت الباب، وانتظرت يجيني صوت غزوان او حتى يفتح الباب وياخذ الشاحنه مني..

أيست يجي مديت راسي من الباب وانتبهت غزوان اصلاً مو هنا، چان بَـس "بكر" كاعد بس خيااات شلوون بكر خرب حظييي بَـس والله شايفته وين؟؟ وانتبهت لرجال ثاني گاعد گباله هذا شوكت اجه؟؟ استحيت اباوعله لان حسيت نظراته عليه چانت، انتبهلي بكر وگال...

-بكر: ها جبتي شاحنه؟

هزيتله براسي "اي" تجرأت وطبيت جوة واني منزلة راسي، سألت...

-اءء غزوان وين؟

واگفه انتظره يجاوبني بَـس چنه ماسمعني لان حتى مجاي يباوعلي، ملتهي يسولف ويه صاحبه بالاشارات ويضحكون خاف ذوله يضحكون عليه هففف هجران وشكو يضحكون عليج گبر، عليت صوتي...

-غزواان وييين؟؟؟

دار وجهه يباوعلي...

-بكر: بالحمام

-هاك هاي الشاحنه

-بكر: عيب تگولين هاك گولي تفضل انه مو گد فروخچ

-شنوو؟؟

رفعت راسي اباوعله بصدمه، خاف هذا عباله اني اشتغل عند الخلفوو، اللتقت نظراتنه للمرة الثانيه هااااا عرفت وين شفته هذا نفسه الچان يضرب طلق بعركة فيصل وغزوان، بَـس شو عبالك چان غير شكل هاي هيج الشماغ مغير شكله.. قاطع دهشتي صوت الرجال الگاعد گباله من گال بضحك...

-اويلي بكر ما تجوز من سوالفك لك خوية شمالك ويه البت

-بكر: ههههه وعلي اتخبل من كلمه هاك شأسوي

-خوفت الطفله شمالك ههههه

گعدو يضحكون ورجعو يسولفون واني واگفه چني طرنه، دخل غزوان للاستقبال

-غزوان: هاا هجران وين عمه صباح؟

-هسة تجي

غزوان صفن بيه عبالك هستوه استوعب اني طابه هنا وحدي، طلعت بسرعه خفت انعلس.. عزلت المطبخ واندگت الباب للمرة الثانيه بس گلت لأمي تفتحهه مابيه حيل هم يطلعلي رجال ويگعد يضحك ويرزل بيه، دخلت مرية سلمنه عليهه ووياهه بنيه شابه، رحت افرش السفرة بالصالة، اجتني امي...

-صباح: هجران استعجلي راح نفرش سفرة وحدة

-صدُك؟؟ ليش عود خو الزلم بالاستقبال والنسوان بالصالة

-صباح: لا مو الاكل مو مال نعزله مامسوية هواي

-ماما ليش مامسويه اني مو گليت كوومة؟؟

-ايي بَـس فشله مو مال نعزله، ديلاا همه اهلنه هسة شكوو

-منو اهلنه؟

-لچ ماما هجراان شبيييچ ذوله الجايين يعني منوو!!

-شمدريني شو اني بَـس شفت زلم ثنين واحد طافره روحه ويرزل والثاني گاعد ويتمضحك

-ديلاا عوفچ من هالسوالف حظروا الاكل

رحت اني وندى نجيب الاكل بَـس تفاجأت من شفت الزلم طبو للصاله، هاي شبيهم اهلي شو مستفلگين الوضع كُلش.. صارت عيني ؏ واحد جذبتني ملامحه بريئة وابتسامته تجنن تحسوهه طالعه من گلبه.. هذا اكيد الچان گاعد ويتمضحك جوة، چان لابس دشداشه نيلي وشعره مخربط ؏ وجهه زايده وسامه..

صارت عيني بعينه ابتسم من شافني صافنه عليه، استحيت ونزلت راسي، دخل وراه بكر مغندب وگالب وجهه عبالك طالب الدنيا بطلابه، اجتني البنيه الشابه الجاية وياهم چانت گاعده بالزاوية، سحبتني من ايدي وگالت بحماس...

-حبي هجران وين جوريه؟

صفنت بوجهها شو هاي گالت اسمي واسم جوري شمعرفهه بينه؟! ليش احس اكو سالفه غريبه بجيتهم وعيون امهم تتطاير عليه.. ماتحملت ابقى ساكته...

-هسة جوري تجي، بس العفو حبي ماعرفت اسمچ شنو؟

ابتسمت ابتسامه حلوة وگالت بصوتهه الناعم...

-اسمي غزاله

-عاشت الاسامي حب..

عفتهه ودا اريد اروح اكمل السفره، سحبتني المرة الجاية وياهم من ايدي وگالت بأبتسامه

-انتي جوري؟

-هجران: لا لا جورية بالغرفه جاي تبدل هسة تطلع

-المرة: هااا هم عبالي

صفنت بيهه هاي شبيهه وشنو هالاسلوب وععع عبالك شايفه جريدي گدامهه، دخليهه تشوف خلقتهه هيه وحلگهه الملغمط عبالك ماكله مرگه وعيونهه المكحله جارتهه لأذاناتهه عبالك جاية عرس، لبستهه ورحت للمطبخ واني عيني ؏ غزاله سبحان الخالق شنو من عيون شايله، ملامحهه طبيعيه كأي بنيه عاديه ما بيهه شي مميز غير عيونهه وهيه جارتهن بكحل مسويتهن بعد اكبر عبالك عيون غزال بالحقيقية..

جبت المواعين واجيت ادنگ اريد احطهن بالسفره، اجه هذا ابو ملامح البريئة عليه، گال بصوت خشن...

-عنچ انه احطهن

-لا العفو منك عادي اني انزلهن مابيهه مشكله

گال بأبتسامة برزت سنونه...

-لا انه احطهن زحمة عليچ تدنجين

صفنت هذا حقيقي؟ معقوله اكو هيچ رجال؟؟ شلون غيره عنده فدوة لالله ربي يحفظه، هزيت براسي ورحت اجيب باقي الاكل وغزاله وندى ويايه يفترن.. انتبهت عليه ياخذ الماعين منه وينزل يحطهن بالسفره اجو فاضل وحيدر اخواني من شغلهم تسالمو ويه الشباب، وابويه لسه ما اجه بعده بالدوام، فاضل استغرب من شاف هالرجال ينزل ويحط الاكل بالسفرة...

-فاضل: عميد الدين شجاي تسوي خوية هذا شغل البنات

-عميد الدين: لا بعد اخوك مو مشكله نتساعد

فاضل ركض عليه ياخذ منه، وبكر چان گاعد يلعب بشواربه وموبايله بيده عبالك منتظر مكالمه، ما فتح حلگه وگال شي..

كملنه السفره وگعدنه ننتظر ابويه، شويه ودخل ويه رجال چبير ووياهم فيصل، اخيييييراً شرفت ست جوري تلگوهه سمعت صوت فيصل واجت تركض..

اللتمينه حول السفره، وماعرف شبيه عيني كل شويه تروح ؏ هذا الرجال الساعدني بالسفره چماله صارت گعدتي گباله وجوري من جهتي اليمنه وغزاله من جهتي اليسره، اباوعله هوه ملتهي ياكل مارفع راسه ابد سمعت فاضل گال اسمه "عميد الدين" شنو هالاسم الغريب والمميز، غزاله كل شويه ترفع عينهه تباوعله وتبتسم خفيف من تلتقي نظراتهم وهوه يبادلهه الابتسامه.. سمعتهه تهمسله...

-غزاله: باباتي تريد صمون؟

-عميد الدين: لا عيني اكو گدامي

صفنت هاي گالت باباتي لو اني اذني بيهه خلل؟!! معقوله هذا ابوهه؟؟؟ لا لا مستحييل هذا شاب مو مال غزاله بته.. ماتحملت سألتهه...

-هجران: غزاله هذا ابوچ؟

دارت وجهها تباوعلي، ضحكت خفيف وگالت بخجل

-غزاله: لا عميد الدين ابن عمي

-صدُك!! لعد ليش صحتيله باباتي

-اني احب اگوله هيچ(علّت نبره صوتهه) مو بابا؟؟

عميد الدين ابتسم وهز براسه، صح استغربت بَـس ماحچيت شي بعد.. حرت اگرص بجوري الاكلت فيصل اكل بعيونهه وهوه عيني ماقصر النظرات الصارت مال افلام هندية..

-كااافي اله تحصليلچ رزاله من فاضل

-جوري: وانتييي اله تسمعيي

-اني مراح اسمعه بَـس رح يشوف نظراتكم الحارقه لبعض وهسه عباله اكو سالفه

-جوري: ولچ دباعي الخلقه شلون جمال فدوه لالله

-هجران: اييي خو افتهمنه حلوو بَـس مو چنه كُلش قصير؟

-جوري: لا لا حلو مابي شي

-ههههه ولچ طالع مدحدح بصف بكر وعميد الدين

-جوري: منو ذوله؟

-ذوله الگدامنه گاعدين

-جوري: هااا هذا الصاك ابو دشداشه النيلي شنو اسمه؟

-هجران: عميد الدين

-اول مره اسمع هيچ اسم

-حتى اني

-جوري: بَـس والله يخبل دباعي

-هجران: وچ كااافي انوب اندارت ؏ عميد الدين هههه

-جوري: هههههه لا لا خلص هاهيه سكتت

كملنه اكل وگمنه نلم السفرة، الزلم گعدو بالصاله وامي صاحت بينه نسوي الچاي..

-نداوي انتي عليچ الچاي واني وجوري نغسل الماعين زيين!!

-ندى: هجراان والله مابيه شو تعبانه

-جوري: من شنوو تعبانه خية من النووم؟!!!

-ندى: وانتي منو حاچي وياچ امشي روحي عن وجهي

-جوري: ولللچ ام لسااان

-هجران: اسكتننن لتفضحنه

-جوري: گولييلهه صايره نفسيه ولسان طويل

-ندى: اهووو تره والله چنت اقره وضايجة

بقيت اضحك عليهن وع سوالفهن، وجوري كل شويه تطلع بالصاله تشوفهم وترجع حسيتهه مو طبيعيه ومبينه متوتره، شكيت اكو سالفه بينهه وبين فيصل بَـس غلست وماحچيت شي، اجتني تركض گالت بهمس...

-جوري: هجران برأيچ ذوله ليش جايين هنا؟

-والله علمي علمچ اني هم مستغربه من جيتهم

-ندى: بلكييي يخطبون وحدة منچن لذوله ولدهم الصاكيين

-جوري بفرحة: واااي الللله يارب صدُدددك

-هجران: اثگلي انتي لتصدگين روحچ وتعيشين الدور

-ندى: لاا عادي خليهه تعيش الدور اصلاً جورية حلووة وشفايتلهم لو ابويه قبل ينطيهه

-هجران: ماقصدت ؏ الشكلل اقصد خاف تتوقع شي وبعدين تضوج من ميصير

-جوري: لا عادي ماضوج اصلاً جاي نتشاقه

-ندى: اووووي بلكي يخطبوووني لهذا الصاك ابو الدشاشه النيلي فديته حتى اسمه يخبل ويجذب

-هجران: ههههه منو قصدچ عميد الدين؟؟

-ندى: ايي ولچ شگد مملوح ودائماً مبتسم

-ايي وابتسامته كُلش حلوة

-ندى: اكلج هجران اذا خطبني اوافق؟؟

-هههههههههههههه لچ سكتييي لا تفضحينه خرب متت هههههههه

-جوري: ههههههه هاي مصدگة الاخت، بَـس بناات احسسسس اكو شي بينه وبين غزاله

-ندى: چذااااابة

-جوري: والله لان سوالفهم مو طبيعيه وهيه شلون تباوعله وتبتسم و....

گطمت حچايتهه من شفنه غزاله تدخل علينه...

-غزاله: بنات تحتاجون مساعده؟

-هجران: لا حبي تسلميلي روحي ارتاحي انتي

-جوري: اي غزوله الحلوة ارتاحي انتو جايين من طريق طويل

-غزاله: لاا شدعوة بنات تره الناصريه هاي وينهه ههههههه

-ندى: صدُك؟؟ اني عبالي بعيده؟

-غزاله: اي گلبي بعيده بس جاي اتشاقه

-ندى: شگد تبعد؟

-غزاله: حوالي خمس ساعات بُعدهه عن كربله

-ندى: حيييييل اووف الله يساعدكم شلون تحملتي

-غزاله: عادي متعوده لان دائماً نروح لبغداد وطبعاً الطريق يصير أبعد

-جوري: شعجب ترحون لبغداد لو هاي عادتكم؟

-غزاله: بيت جدي اهل امي من بغداد فَـہ نروحلهم

-ندى: هاا.. ءء غزاله انتي اسمچ الحقيقي غزاله يعني معقوله اهلچ سموچ غزاله؟

-غزاله: لا اسمي غزل بَـس بابا عميد يصيحلي غزاله من الصغر

-جوري: منو بابا عميد؟

-غزاله: ابن عمي عميد الدين

-جوري: هااا شعجب تصيحيله بابا؟

-غزل: صراحة مادري هههههه

-ندى: اممم، ءء ابن عمچ...

مالحگت تكمل الحچاية لان موبايل غزاله دگ، جاوبته...

-غزاله: هاا باباتي؟ اي تمام هسة اجي هههه لاا لا جاية يااء عميد شبيك عبالك رح اعبر شلالات وجبال.. ههههه شمالك.. يله.

سدت الخط وگالت..

-غزاله: حبي هجران اريد ماي لـ عميد الدين

-هجران: يي عيني

انطيتهه المي وراحت طايرة الضحكة تارسه وجهها، سحبتني جوري من ايدي...

-جوري: شفتيييهه ونبي ونبي ونبي بيناتهم شييي!!!

-اي ولچ شفت

-ندى: حرماات عبالي مامرتبط

كملنه شغلنه ورحنه للصاله چانت فارغه لان كلهم جوة بالاستقبال گاعدين.. جوري اختفت كالعادة مادري وين تروح هالبنيه، صحنه لـ غزاله تجي تكعد يمنه حتى نسولف وياهه..

وندى اشتغلت تسألهه ؏ عميد الدين لكم اني ذني خواتي شگد زاحفات ماصدگن يشوفن واحد صاك لوما يولنه وليه.. چان عندي فضول اسألهه بكر وفيصل شيصيرون منهه..

-غزل بكر وفيصل شيصيرون منچ؟

-غزاله: اخواني

-صدُك!! شو ماكو بيناتكم شبه؟

-غزاله: هههه اي بعد حظنه هذا عود انه وفيصل نتشابه من العيون، احنه عدنه بعائلتنه الولد كلهم يتشابهون وكلهم نفس قالب الجسم والهيئة عدى فيصل ضرب القاعده واجه گصير وناعم

-هجران: هههه خطيه بَـس ترا مو ذاك القصر يعني حلو مربوع

-غزاله: لاا وييين شوفي اخواني الباقين وولد عمي كل واحد تكولين عنه شاروط ؏ ابوي طالعين جسم وعضلات اله هوه وخطيه متعقد من هالسالفه هههههه

-هجران: ترا انتي هم مو قصيره

-غزاله: اي انه همات طويله ؏ ابوي واخواني، وحنه بنات عشيرتنه كلهن طوال همات بَـس الشكول كل وحدة شكل مثل ورد الباگله هههه

-هجران: هههه لا احنه هم هيچ عدنه وبس اني طلعت گصيره، وتردين الصراحة احنه بعشيرتنه البنات حظهن مصخم ولدنه ماخذين كل الجمال والصكوك واحنه جگمات

-غزاله بحماس: يااااء نفسسسنه والله عدنه وليداتنه حلوين كللش خوب شفتي اخواني بكر وفيصل وابن عمي شلون وسيمين وهيبة، عندي بعد اخوي عثمان بعد احللللى منهم كلهم، بَـس حظنه بنياتنه جمالهن ؏ گدهن عدى بنات خالي اسماعيل

-هجران: ههههه حظنه بعد يا خيه

-غزاله: اي والله انه اغار منهم اگلهم شمالنه ماعدنه جمال بَـس انتم مايصير هيج

-هههه لا حبي انتي هم حلوة ليش تحچين ؏ روحچ

-غزاله: بَـس مو نفسهم انتي ما شايفه بنات خالي اسماعيل اووف يجيبن راس اكبر شيخ بجمالهن

-ندى: صار عندي فضول اشوفهن

-غزاله: ان شالله تشوفيهن ليش لا

گظينه الوكت ضحك وسوالف ويه غزل فدوة شگد محبوبه وحركاتهه طفوليه ولطيفه، هيه مبينه صغيره من سوالفهه بَـس ماشالله جسمهه وهيئتهه تگولون اكبر مني..

ظليت الوب اريد اسألهه ليش اسماء اخوانهه هيج "بكر" و "عثمان" يعني احنه منسمي هيچ اسماء، ماتحملت سألتهه، جاوبتني...

-غزاله: شوفي حبي، انه اخواني بكر وعثمان جايين من غير أم، وانه وفيصل من أم، واخواني احمد وغيث من أم

-هااا يعني ابوچ متزوج تلاثة؟

-غزاله: اي، فَـہ ام اخواني بكر وعثمان الله يرحمهه متوفيه، وهيه بالاساس انبارية ومن غير طائفة.. بَـس ابوي عشگهه وتزوجهه صح اهله مارضوا بَـس عاندهم وخذاهه وبعد عادي تقبلو الامر الواقع گالو ابننه حباهه خلي ياخذهه واحنه موافقين احسن مما ياخذهه من وره ظهورنه

-خوش يسوون

-غزاله: اي والله انه هم گلت، بيت جدي اهل ابوي چانو ناس متفهمين، بَـس حبوبه عطيه ماگدرت تتقبل ام بكر فَـہ گالت انه راضيه ؏ وليدي بَـس خلي يتزوجهه ويبقى گاعد بالانبار يم اهل مريته

-ندى: وابوچ صدُك عاف اهله وراح للانبار؟

-غزاله: اي لان بالاساس ابوي چان كاعد هناك چا شلون عرفهه

-هجران: صدُك شلون تعرف عليهه؟

-غزاله: هاا هاي قصتهم طويييله بس اختصرهه ليكم اخو ام بكر (چساب) وابوي اصدقاء روح بالروح فَـہ هوه شني ابوي وعمامي كلهم گصاصيب وچساب واخوانه همات گصاصيب فَـہ روحه ورده عليهم وگعدات بالدواوين اتفقو ورادو يوسعون شغلهم واشتركو سوه وفتحو شلون المجزرة ؏ گدهم بسنة الثمانينات بالانبار، فَـہ چساب هواي لح ؏ ابوي يجي للانبار ويعاونهم بالمجزرة.. فَـہ ابوي طخ واقتنع بعد مجادلات وحچي وتقنيعات من عمي عباس (اخو) وراح  ويه چساب للأنبار ومناك عشگ اختهم الي هيه ام بكر وتزوجهه

-هجران: ترا دخت ههههه

-غزاله: هههه حقچ خيه انه همات ابوي حچالي القصه الف مره ياله فهمت السالفه

-هجران: بَـس الفهمته من كلامچ ابوچ ذباح صح؟

-غزاله: ههههههههههههه ولچ خرب عقلچ ههههههههههه ذباح شني

-اي مو انتي گلتي

-غزاله: لچ گلت گصااب گصاااب

-هاا شمدريني ههههه

-ندى: شنو يعني گصاب؟

-غزاله: يعني يذبحون بهايم وهوايش وطليان بين قوسين كل انواع الحلال

-ندى: بووويااي يعني كله بالدم شغله

-غزاله: اي هههه بَـس فديته ابوي ماكو احن من گليبه من اروح فدوة اله

-هجران: الله يحفظه، زين انتي ذكرتي عندچ بعد اخوان وينهم؟ شو ما اجو اليوم بَـس بكر وفيصل؟

-غزاله: اخواني الباقين غيث واحمد متزوجين وكلمن حاير بمريته، وعثمان بالانبار ما عايش ويانه

-هاا شعجب؟؟

-غزاله: هوه بقى ويه خواله من ماتت امه الله يرحمهه، بَـس ابوي جاب بكر ورجع للناصريه لان بكر حزام ظهر ابوي مايگدر من دونه

-هاا الله يرحمهه، وبعد ما ماتت ام بكر تزوج امچ صحح؟

-غزاله: لا امي الاخيره بالاول تزوج ام احمد بعدين خذاه امي

-هجران: هاااا دا احس روحي محققه واني اسألچ بس عذريني تره اني فضوليه ههههه

-غزاله: ههههه عادي حبي انه همات فضوليه لچ خيه يمكن الفضول يمشي بدمنه ومتوارثي

-هجران: ههههه اي يجووز

-ندى: اگولچ غزل انتي گلتي ابوچ گصاب؟ واخوانچ شنو شغلهم؟

-غزاله: كللللهم گصاصيب (قصابين)

-هجران: عزززه يعني كلهم كلههممم؟؟؟؟

-غزاله: اي بعد هيه هاي المهنه صارت النه ونزلت بنسلنه، يعني كلل اخواني وولد عمي گصاصيب

-هجران: واكيد گلوبهم جلدة صح؟؟

-غزاله: لا مو كلهم، بَـس اكيد شغلهم يعكس عليهم يعني شتترجين من زلم كل شغلهه بالذبح والسفح والدمايه

-هجران: ههه اي

بگت هوا من حچت هيچ غزاله، ماعرف بشنو حسيت بَـس احساس ابد موحلو.. نمنه بليلتهه وهمه رادوا يرجعون بَـس ابويه اصرّ يباتون يمنه..

غزاله وامهه ويانه بغرفتنه والزلم نص بالاستقبال والنص الثاني بالصاله، بيتنه مابي غير غرفه وصاله واستقبال.. ادري لا تنصدمون بَـس ذكرت من قبل حالتنه المادية ضعيفه وبيتنه بالاساس بيت ورثه يعني مو مُلكنه

طول الليل ما اجاني نوم اتگلب بالفراش وافكر بحياتي، بمستقبلي، بزواجي.. يا ترى هم اتزوج ويصير عندي بيت وعائله؟ لو محد يقبل بيه؟ منو يريد وحده سمره وجسمهه ناعم وموحلوه ويفوت حورية مثل جوري تقطر نزاكة وجمال بعيونهه الساحرة وبوجهها الطفولي ورشاقتهه وجمال هيأتهه، فَـہ كل العيون اكييد عليهه خوب غزوان يصير تراب لو بس تگوله هلو..

عطشت مي وگلت اروح اشرب، افف تذكرت الزلم نايمين بالصاله شلون بهالحالة اطلع؟؟ بَـس معليه حمووت من العطش..

لبست شالي وطلعت امشي ؏ اطراف اصابعي، ماميزت منو النايم بالصاله لان صايره لخة.. اخاف يطلع صوتي ويجي فاضل لو حيدر يگومون يعزوني حسيت بواحد منهم يتحرك يبااااووو هسه اني شمطلعني اله افضح روحي امداچ هجرااان

توجهت للمطبخ وفتحت الثلاجة.. طلعت مي وگعدت اكربع منه اوووف شگد چنت عطشانه سلام الله عليك يا ابا عبد الله سودة عليه شلون بيكم وانتو تلث تيام بدون مي حبيبي يا حُسين

دا اريد اطلع من المطبخ وسمعت صوت جاي من الطرمة صار عندي فضول اشوف منو هذا؟ وشعنده واگف بطرمتنه؟ مديت راسي من الشباج ماكدرت اشوف زين.. بَـس انتبهت لضوة جگارته المشعوله..

تقربت اكثر وركزت نظري چان "بكر" خجلت من انتبهت عليه طالع بالبجامة والفانيله الداخليه.. تمايزته وهوه گاعد ؏ الدچة سرحان..

طلع موبايله وحطه ؏ اذنه عبالك ديتصل والطرف الثاني ميجاوب زفر بعصبيه وشمر الچكارة، شعل الثانيه وهوه يفرك وجهه صار عندي فضول اعرف بيمن يتصل بنص الليل هسه انيييي شعلييييه خرب يووميي، تصنطت عليه بلكي يحچي لو يگول شي بس حظي الاغبر خله نعالي يشطح من تحركت.. رفع عيونه يباوع لجهتي..

ابتعدت بسرعة قبل ليلگفني واتفشل، بس فضولي الا شي يوم يوديني بستين داهيه خلاني ارجع امد راسي اباوعله چان بعده مركز نظره لجهتي وعلامات الاستغراب مرسومة ؏ وجهه.. ضحكت ؏ شكله وهوه متعجب، بقيت واگفه ؏ جهه اباوعله وهوه باقي يباوع ناحيتي، ميكدر يشوفني لان بس مادة راسي وطالعه عيوني..

سمعت صوت رجال ورايه نززني، درت وجهي جفلت من شفته كذلك بالفانيله الداخليه ولابس بجامه بيضه وشعره مخربط ؏ وجهه، گال بصوته الخشن المميز...

-شجاي تسوين؟؟

يتبع☘️...

♛ ♛ ♛ ♛ ♛ ♛ ♛ ♛ ♛ ♛
حبايبي رح اطلب منكم تصوتون وتعلقون شگد متگدرون تره التفاعل ابددد ميسوي واهس للكتابه، وحتى مدا اگدر اكتب بسبب التفاعل القليل💔 فَـہ انطو القصه حقهه اذا حبيتوهه
+
وبالنسبه للي يسألون ؏ شبيهين الابطال ان شالله انزل بارت كامل واشرحلكم عنهم وعن شكلهم وانزل صور تشبههم بما ان اني شايفتهم فَـہ احچي عنهم من وجهه نظري😁♥️