المحامي (خفايا القدر)

25

رواية :-

#المحامي.

♡ خفايا القدر ♡ .

الحلقه :-

♤ الخامسه والعشرون ♤ .

بقلمي :-

#zezo_a_saad.

عند إسراء :-

من بعد ماتعاركت مع اللي اسمها بنت عمي وسمعتني كلام يجرح .

طلعت من الصاله نجري بنركب لداري قابلني سفيان كان عاطي بالظهر وواقفه عليه الحربه اللي اسمها
هديل .

قربت منهم من غير ماينتبهولي وسمعتها تقوله .

اسراء بدلع :-

سفيان بالله عليك انت انجليزيتك حلوه ساعدني ف الكورس اللي ناخذ فيه بلييز.

سفيان من غير نفس :-

ماعنديش وقت اسف.

هديل زادت قربت منه :-

امتي باهي تكون فاضي عادي مش مستعجله انا.

سفيان تأفف :-

اووف..هديل اختصري الموضوع وقولي شن تبي مني من الاخير هكي.

هديل انصدمت ف السؤال وشافتله بتوتر :-

نبيك ف موضوع خاص.

سفيان دخل ايديه ف جيوب السروال :-

اللي هو شنو بالضبط .

هديل بدلع :-

امم مش هنا...نبي مكان تكون فيه بروحك عشان نحكو براحتنا.

سفيان شافلها من فوق لتحت :-

تعرفي هديل درهتيلي كبدي وانتي تتلوني من بكري ..ادوي كان بتدوي ماعنديش مكان نكون فيه بروحي .

هديل ببكي مصطنع :-

خيرك معاي هكي ياسفيان تعامل فيا بقسوه .

طلعت اسراء من وراه :-

ياعيني ..اهلا ببنات الشرف والعفه .

تلفت عليها سفيان بصدمه ..اما هديل شافتلها بحقد :-

احترمي نفسك واعرفي شن تدوي وبلاش تلقيح واتهامات.

اسراء :-

انا مانلقح ولا تتهم ...انا شفت بعيوني وسمعت بوذاني .

هديل شافتلها باستحقار :-

وانتي شن دخلك بيني وبين ولد عمي .

اسراء لقتها فرصه عاد باش تردهالها ..حطت ايديها ف النص :-

لانه خطيبي ياماما .

هديل شافتلها بصدمه وبعدها شافت لسفيان :-

بالحقه الكلام هذا ياسفيان.

سفيان شاف لاسراء ببرود وبعدها شاف لهديل :-

وانا شن اللي يجبرني نبررلك يعني .

هديل بتعصيب :-

تسيبنا نحن بنات عمك وتخطب ملعبه العصابات هذه .

قرب منها سفيان بغضب وشدها من يدها وبغضب  :-

هديييل ..اعرفي شن اطلعي من فمك احسن نخربلك وجهك اسراء بنت عمنا زيكم واشرف وانزه من اللي قاعده تقولي فيه.

وتوا تشوفي ف الباب :-

اطلعي اقلبي وجهك احسن نجرجرك من شعرك وماعاد نشوف خليقتك ف حوشنا .

هديل وهيا نازله من الدروج تبكي :-

تطردني انا ياسفيان من حوشكم ...والله لما نقول لجدي.

سفيان بغضب :-

تي بري ملحي انتي وجدك .

وبعدها تخطي اسراء وركب لداره وهو متعصب ومن غير مايزيد ولا كلمه .
.
.
.
.

عند حمزه :-

اليوم هو موعد ريناد عند الدكتوره ...طلبت من علاء يرفعنا باعتباري مانقدرش نسوق برجلي المجبسه ...رفعنا علاء ومشت معانا سحر اخته.

بعد ماطمنتني الدكتوره ع وضع ريناد  وطلعنا مشينا للمحلات لان ريناد مازال ماشرتش شي للبيبي .

ريناد اصرت ان انا نكون معاها ونطلع معاها ف كل مشاويرها ...تحاول ان تعزز ثقتي فيها بأي طريقه وهذا ليش رفضت تطلع لاي مكان من غيري.

طلعنا وخشينا لمحل اطفال كبير ..قعمزت انا ع الكرسي لان مانقدرش نوقف هلبا ع رجلي وبدت هيا وسحر يتبضعو وياخذو ف حاجات البيبي .

مر حوالي نص ساعه وهما ياخذو ويلمو ..بعدها خشو زوز شباب للمحل .

حسيت روحي تضايقت وبدي شيطاني يخدم وسبحان الله ع طول فهمت هالشي ..جت ع طول جيهتي.

ريناد :-

حمزه خلاص كملنا خلينا نطلعو.

حمزه حاول مايوضحلها انه مضايق :-

لالا كملو براحتكم.

ريناد باصرار :-

لا خلاص الضروري كله خديته قعدت حاجات بسيطه تو ناخذوهم حتي مره تانيه.

حمزه وقف :'

تمام اوك.

خلصت الحاجات وطلعت انا وياهم لمكان السياره وين يستني فينا علاء.

نزل خذي مننا الحاجات خوي هذا ماشفتش احن  منه وارق منه ف الدنيا انسان لطيف ويفهم كويس ف الاتيكيت .

ركب الحاجات للسياره ...وركب يسوق .

علاء يشوف بالمرايا :-

قولولي وين خاطركم تمشو.

ريناد شافت لحمزه بالمره وهزلها راسه بمعني اوك :-

بصراحه خاطرني نمشي للبحر لو ممكن .

سحر :-

ايه ياريييت حتي انا.

علاء شاف لحمزه  :-

شن يابرنس شن رايك.

حمزه :-

تمام زي مايبو هيا.

ساق علاء للبحر ...واول مانزلنا قعدت نتمشي انا وريناد ع الشاطي وسحر قعمزت هيا وعلاء.

ريناد بقلق :-

حمزه خلينا نرجعو بحدا علاء ونقعمزو رح توجعك رجلك هكي.

حمزه بتعب :-

باهي تمام..انا نقعد مع علاء وانتي تمشي مع سحر المشي كويس ليك هالفتره

ريناد :-

المكان هادي وحلو ...ياريت جبنا ملاك معانا.

شافلها حمزه وابتسم :-

هناك وحده تطلع مع زوجها وتجيب العيله كلها.

ريناد باحراج:-

رومانسيه معدومه صح.

قعد حمزه يضحك :-

اول مانشفي ان شاء الله رح نجي انا وياك هنا شن رايك.

ريناد بفرحه :-

اكيد ومعانا جبران الصغيرون .

وصلنا عند علاء قعمزت بجنبه وناضت سحر تتمشي هيا وريناد.

علاء بهدوء :-

من الواضح انك وريناد تجاوزتو خلافاتكم وف تناغم بينكم الحمدالله.

حمزه بتنهيده :-

مافي شي يقعد ع حاله ياعلاء..قدامك خيارين ياتتعايش مع واقعك ياتتجاوزه .

علاء بحسره :-

عندك حق ياتتعايش ..ياتتخلص او تهرب.

حمزه لف يده ع كتف علاء وبهدوء :-

عليوه ماتبيش تفتحلي قلبك وتقولي خيرك ليك زمان مش ع بعضك .

علاء وهو يتأمل ف البحر وبتنهيده :-

ملاك ياحمزه.

حمزه بصدمه :-

ملاك خيرها مافهمت.

علاء تلفت ع حمزه وبصوت مخنوق :-

نفسها البنت اللي حاكيلك عليها كنت نبيها وخطبتها وعمها رفضني .

حمزه مش قادر يحكي من الصدمه :-

م...ملاك.

علاء بتنهيده الم :-

ايه ملاك اللي عمها رفضني وفضل خوي عليا وزوجهاله تخايل..قتلني ياحمزه والله قتلني وكل يوم يقتل فيا اكثر.

حمزه ومازال مش قادر يستوعب او يصدق :-

مستحيل هالشي مستحيل..باهي سامر يعرف زعما.

علاء بالم :-

مااعتقدش هالشي ...ومانبيشي يعرف.

حمزه بألم :-

الله لا يبارك ف هالوصيه ليش هيا بالذات ليش.

علاء تنهد بوجع :-

يمكن عشان يكون درس ليا وعقاب نتعلم منه مانفرط ف الشي اللي نبيه من بين ايديا عشان مانشوفه عند غيري.

حمزه شده لحضنه :-

بس انت درت اللي عليك ياعليوه وخطبتها وعمها رفض.

علاء :-

ايه صح...بس بسرعه يأست واخترت ننسحب ونتعايش مع وضعي مافكرتش نمشي نخطبها بعد ماتخرجت وقتها يمكن عمها كان رح يوافق عليا والنتيجه خوي كان هو الاقرب .

حمزه ومازال مصدوم :-

معقول بوي كان يعرف .

علاء :-

مااعتقدش ..لانه اصلا عمها ماكانش يعرف ان بوي جبران مربيني ويكون زوج امي ولا بوي يعرف ان البنت اللي نبيها هذا عمها.

حمزه بتنهيده ضيق :-

لامتي بيقعد حالك هكي باهي.

علاء شاف لحمزه بانكسار:-

تعرف ليش خبرتك بهالشي...نبيك تعرف ان اول ماسامر رح يطلقها رح نتزوجها انا ونتخلى عن نصيبي ف الورث.

حمزه بصدمه وعصبيه :-

شن قاعد تخرف ياعلاء من عقلك هالكلام...تبي الناس تاكل وجهنا خذي طليقت خوه .

علاء وقف وبنبره الم :-

مش رح نسيبها ياحمزه والله لو نفوني من البلاد وعشت معاها ف الشوارع مش رح نسيبها.

وكيف بنرد جت ريناد وسحر ومشينا للسياره وانا حاس روحي رافع حمل جبال ع كتافي .
.
.
.
.

عند سفيان :-

طلعت معصب بعد مابدلت ملابسي وركبت ف السياره وانا مانشوف ف شي قدامي وف راسي شخص واحد نبي نفش فيه غلي.

درست قدام استراحته ونزلت خشيت ولقيته قدامي قاعد يأرقل .

قربت منه بغضب وشديته من تيشرته وع طول تيرو ف راسه.

سفيان بغضب :-

انت ياهاني صح انت اللي درتها ياكلب.

هاني وهو يمسح ف الدم من انفه :-

شن هيا ..شن قاعد تخرف انت .

سفيان قرب منه بغضب من جديد :-

نقصد الفضيحه اللي درتها لبنت عمك يافاسد انت اللي وراها ياحقير انت والفاسد التاني اللي اسمه سراج صح.

هاني بخوف :-

ابعد عليا انا مافهمت شي من اللي تقول فيه.

قرب منه سفيان زي المجنون ونزل فيه ضرب وبعدها مدده ع الارض وخنقه بيده لعند بدي يربش تحته :-

بتحكي والا نطلع روحك بيدي توا.

هاني وهو هارب عليه النفس :-

تقتلني ع خاطر بنت ياسفيان.

سفيان بتعصيب :-

هذه بنت عمكم عرضكم يافاسد...تفوو عليكم ياللي ماتجوش تريس

هاني وهو يكح من الخنقه :-

وحده بوحده ياسفيان تعرفنا مش رح نسكتو ع اللي درته فينا.

نزل فيه سفيان ضرب من جديد لعند قريب ضيعه وبعدها قرب من وجهه وهو طايح ع الارض :-

هالشي مش غريب ع انذال وفاسديت زيك وزي الكلب التاني...بس صدقني مش رح ننسهالكم والايام بيناتنا وبالنسبه لاسراء فخطتكم فشلت لانها رح تكون مرتي وقدام الناس الكل.

وضربه ع بطنه من جديد وطلع وسيبه وهو يغلي.
.
.
.
.

عند سامر :-

ااه ياعلاء لو تعرف قداش تعذب فيا وتوجع ف قلبي بس كل ماتقول ان الراي رايها هيا.

واللي حارق قلبي أكثر أن هيا حتي نحكي معاها ماقالتلي ع الموضوع نهائي.

معقوله رح توافق عشان تخفف الحمل ع خوها اصلا شن اللي يجبرها تستناني وانا مجرد شخص ماتعرفه نهائي شخص ماتعرف عنه الا انه مربوط بشروط وصيه ياعالم رح تنفك او لا.

خشيت للفيلا وانا حاس بهموم الدنيا جبال ع كتافي .

وانا ف عز همي وتعصيبه نشوف مؤيد واقف علي سحر ف المدخل متع حوشنا .

نحس بشويه العقل اللي براسي طارت خلاص ..اول ماقربت منهم وشافتني خشت ع طول .

مؤيد بارتباك :-

اهلين سامر.

سامر بتعصيب :-

انت شن قاعد ادير  هنا

مؤيد بارتباك :-

هذه مش اول مره نجي لحوشكم ياسامر .

سامر بتعصيب :-

ايه صح مش اول مره ...بس اول مره نشوفك واقف مع واحد من نسوان الحوش بروحكم طبعا هذا لو فعلا اول مره .

مؤيد :-

احترم نفسك عاد شن لقيتني ندير عشان تتهمني انا وسحر بهااكلام الفاضي.

سامر بضيقه :-

ياسلام ورفعت الكلفه اخري سحر صار.

مؤيد بتعصيب :-

انا ماغلطت ف شي ..وقفت قدام نظر الكل لاتخرمدت ولا اندسيت وكنت نسأل فيها ع موضوع يخصني مش اكثر.

سامر بتعصيب :-

ودين ربي يامؤيد مازالت نلقاك واقف عليها تاني ماحازك مني واحد وجهك نقرطه...طلبتها من خوها كلامك معاه ماتجيش تتوقف عليها من وراه فاهم.

مؤيد تخطاه وفاات :-

وانت شن علاقتك والا كان تسكن عندكم بتتحكمو فيها الكلام مش معاك الكلام مع علاء.

سامر شده من تيشرته بغضب :-

يديرلك ربي عالم يسمع بحاجه...والله راسك نقطعه يامؤيد تسمع فيا .

مؤيد فك روحه من ايدين سامر وطلع من غير مايزيد ولاكلمه .

اما سامر خش للفيلا ينتفض ومايشوف ف شي قدامه من الغضب .

كان يدور ع سحر بعيونه واول ماشافها طالعه من الصاله وماشيه جهة المطبخ قرب منها بغضب.

سامر وهو يحاول يسيطر ع انفعاله :-

سحر شن كان يبي منك مؤيد .

سحر بارتباك وخوف :-

طل...طلب يسمع رايي ف موضوع اللي حكي فيه مع علاء.

سامر وهو يمسح ف وجهه بقوه ويحاول يسيطر ومايفصل فيها لان خايف لو فصل هالمره علاء فعلا يرفعها من الفيلا :-

وانتي شن قلتيله.

سحر منزله راسها لتحت وتفرك ف ايديها ببعض وخايفه.

سامر بتعصيب :-

سحرررر.

سحر بخوف وارتباك :-

اقسم بربي انا مانعرفه ...هو هو اللي وقفني وقال يبي يحكي معاي.

سامر تنفس بقوه ويحاول يضبط اعصابه :-

سحر ماتزعلي مني زي المره اللي فاتت بس غلط اللي درتيه مكانش لازم توقفي عليه .

سحر نزلت راسها :-

انا اسفه ..بس هو اللي وقفني والله

سامر بحيره :-

سحر انتي موافقه ع الزواج منه.

شافتله سحر بصدمه ... وارتبك سامر :-

قصدي يعني ..لو كنتي موافقه.

ماعاد عرفت شن نحكي او شن نقول وطلعت خليتها واقفه ...ركبت ف السياره وقعدت ندور ف الشوارع ومش عارف وين نمشي .

أخيرا قررت نمشي لحوش طارق صاحبي ..درست السياره قدام حوشه وضربت الجرس فتحلي خوه الصغير.

معاويه :-

عمو ثامر ...زبتلي سوتلاطه معاك.

قامه سامر ف حضنه وباس خده :-

طارق يضربني قال ماعاد تجيبلهم شوكلاطه ..المره الجايه رح نجيبهالك باهي.

معاويه :-

لاااا...انت ديمه جيب سوتلاطه.

سامر نزله ع الارض من بعد ماباسه :-

وعد المره الجايه نجيبلك معاي ....الاميره الحلوه وين ها .

ميرال وهيا واقفه وراء الباب ومطلعه راسها تشوف فيه :-

سوكلاطه .

سامر :-

هههههه قعدت علامه الشوكلاطه ف هالحوش.

نزل طارق يبتسم :-

كله منك فسدتهم عليا .

سامر شافله بابتسامه :-

علاش تمنع فبا نجيبهالهم امالا.

طارق  :-

مشينا.لدكتور الاسنان السوسه مدايره فيهم عمايلها ياراجل.

سامر :-

امم لا هكي مشكله..خلاص نجيبو بدالها حاجه تانيه.

معاويه :-

حلوه .

طارق :-

لا حتي الحلوه ممنوع.

ميرال :-

بمبلا باهي.

معاويه ضربها ع راسها :-

لاا غبيه .

بدت ميرال تبكي وطارق كشخ ع معاويه وخش يجري لداره.

سامر قام ميرال بحضنه وقعد يبوس فيها ويسكت فيها :-

خلاص اميرتي ماتبكي حبيبتي .

طارق بضيقه :-

هذا اللي مقلقني ياراجل...ف امور ماتعرف تتصرف فيها الا النسوان ونخاف نجيب وحده تظلمهم وتظلمني معاهم .

سامر قعد بجنبه :-

هذا ليش مازال مااخترت وحده .

طارق بتنهيده :-

هذا واحد من هلبا اسباب.

سامر :-

امم نفهم من كلامك مانسيت الاولى .

طارق بتنهيده :-

كل شي ياخذ وقته ياغالي.

سامر يحاول يغيرله جوه :-

شن رايك ندورلك انا .

شافله طارق من تحت :-

ياخوفي تطلع زي الاولي.

سامر بتنهيده :-

لا الاولي قصه بروحها ..ومن الاول كان غلطي انا.

طارق بحيره :-

ليش مافهمت طلع عليها شي البنت .

سامر باندفاع :-

لااا حشاها والله ماصارت والبنت الماسه والله  بس قصه طويله توا يجي وقت ونحكيهالك.

طارق بمكر :-

خلاص تو نمشي انا نخطبها بروحي من خوها.

سامر باندفاع :-

لاااا رد بالك.

طارق شافله بشك :-

تي شن ياراجل شكلك طحت ع راسك.

سامر بارتباك :-

قتلك موضوع طويل تو يجي وقت ونحكيهولك.

طارق :-

باهي وزوجتك انت راجل متزوج ياسامر.

سامر بتنهيده :-

وهذا موضوع اكثر تعقيد ولخبطه .

طارق :-

تغيرت عليا ياسامر قبل كل شي تحكيلي فيه توا بديت ماعاد فاهم منك شي.

سامر يحاول يتهرب من الموضوع :-

المهم خلينا ف اللي جيت ع خاطره هيا وتيلي وليداتي خلي نرفعهم اليوم دوري ف الطلعه هيا

سامر وقف وبصوت عالي :-

وينهم اللي يبو يمشو لمدينه الالعااب.

طلعو معاويه وميرال يجرو وشدو ف يد سامر ..تلفت ع طارق :-

نكمل مشوارنا ونروح بيهم تمام.

طارق بابتسامه :-

ربي مايحرمني منك ياسامر والله شاد معاي الحمل ومعاوني هلبا بجد .

سامر بابتسامه :-

خوي انت ياراجل..شوف شن عندك بدير ومادورش العشي توا بنجيب معاي واتي .

وطلع سامر ومعاه خوت طارق بيدهورهم ويغيرلهم جوهم.
.
.
.
.

عند سحر :-

لازم نشوف علاء ونعطيه راي بالموضوع ..محتاره شن بنقوله او شن نقرر .

لازم نفكر ف خوي ونخفف عليه الحمل لامتي بنقعد نرفض ف العرسان ونستني ف سراب مانعرف حتي اسمه...بس انا بجد نحبه ونبيه كيف رح نقدر نخذله ونفوته.

بعز تفكيري وحيرتي خش عليا سفيان بالمطبخ.

سفيان :-

سحر ممكن نحكي معاك شوي .

سحر بتوتر :-.

اا..انا .

سفيان :-

ايه لو سمحتي مش رح نعطلك ممكن .

سحر بارتباك :-

تمام .

طلع سفيان وطلعت وراه سحر ..قعمزو ف الصاله .

سفيان شافلها :-

سحر انتي زي اوخيتي ويعلم الله يهمني امرك ...نبي تعطيني رايك ف موضوع مؤيد وصدقيني رح نوقف معاك مهما كان قرارك ومش رح يعرف بكلامنا لا علاء ولا سامر.

سحر باستغراب :-

بس شن دخل سامر.

سفيان بتنهيده :-

سامر تعارك مع مؤيد عشان شافه واقف عليك ..وقبلها تعارك مع علاء.

سحر بحيره :-

وليش يتعارك معاهم هو شن دخله .

سفيان :-

والله مانعرف بس يمكن عشان رفضتي صاحبه ..المهم توا خلينا فيك انتي شن رايك.

سحر خذت نفس :-

انا مش موافقه .

سفيان وقف :-

معناتها اعتبري الموضوع انتهي خلاص...ومن غير علم حد تمام.

سحر وقفت :-

بس ليش ادير هكي .

سفيان :-

قتلك لانك زي اوخيتي ويهمني مصلحتك ومانبيكش توافقي لمجرد انك تبي تخففي ع خوك المسؤوليه.

طلع سفيان ع خشت اسراء ..شافت سحر قدامها.

سحر بارتباك :-

اسراء..اسراء بالله عليك ماتفهمينا غلط والله ماف حاجه.

اسراء قربت منها :-

اهدي يابنتي خيرك ..ليش خايفه هكي.

سحر بتنهيده :-

خفتك تزعلي مني وتفهمينا غلط

اسراء بهدوء :-

لا حبيبتي مش رح نفهمك غلط لان نعرفك شني ..بس قوليلي ف شن كنتو تحكو.

سحر براحه :-

مشكله كنت.ندورلها ف حل من دون علم علاء...والحمد الله بعتلي ربي خطيبك وطلعني منها.

اسراء بضيقه :-

حتي انتي تقولي خطيبك .

سحر :-

ورح تكوني غبيه لو ضيعتيه من بين ايديك ..والله هالولد مايتعوض وقليل تلقي زيه بوقتنا هذا.

اسراء بضيقه :-

اساسا هو ماعاد مهتم بالموضوع ولا حكي فيه .

سحر باستغراب :-

ليش صار بيناتكم شي.

اسراء :-

ماصار شي..ومانعرفش خيره ومافكرت نسأله.

سحر وهيا ماشيه:-

ماتضيعيه من يدك يااسراء..ف حاجات مانعرفو قيمتها الا بعد مانفقدوها.

خشت سحر لدارها وسكرت الباب..وخذت فونها تتصل ع سامر وهو مايرد عليها .

بعتتله مسج 💌 :-

صارلك مده ماعاد ترد عليا...عارفه اني ماعاد نعنيلك شي بس ع الاقل طمني عليك.

ع طول بعتلي مسج 💌 :-

انا كويس .

بعتله مسج تاني 💌 :-

باهي ليش زعلان مني انا شن درت .

ماعاد رد عليا مانعرفش ليش تغير عليا هكي او انا ف شن زعلته .

حطيت الفون وطلعت نشوف ف البنات وين.
.
.
.
.

عند سفيان :-

كنت قاعد مع مؤيد ونحاول نقنعه بموضوع شاغل بالي وبراسي .

سفيان :-

مافيش حد نقدر نعتمد عليه غيرك يامؤيد.

مؤيد بتردد :-

بس هذا بوي ...كيف تبيني نديرله هكي.

سفيان بتعصيب :-

ودين ربي لو كان بوي كنت درتها من غير تردد.

مؤيد بهدوء :-

باهي من قالك ان هما اللي مدايرينها .

سفيان بجديه :-

ف امور عرفتها .. خلتني نشك فيهم.

مؤيد :-

اللي هيا !!.

سفيان بضيقه  :-

لازم نقولهالك يعني.

مؤيد :-

اكيد لو ماحطيتني ف الصوره مش رح نقدر نساعدك.

سفيان خذي نفس:-

وصلتني معلومات من رجل كندي ان ف.واحد عربي وراء تهمه عمي صبحي ف كندا..بحثت عليه ولملمت معلومات وعرفت انه من طرابلس وكان يشتغل مع جدي زمان".

مؤيد بعدم اقتناع :-

بس هالشي مايثبتش ان بوي والا عمي وراء الموضوع.

سفيان بضيقه :-

فوت الموضوع يامؤيد.

مؤيد بتعصيب :-

خيرك هكي ياراجل ..عطيني فرصه نقول كلمه معاك.

سفيان بضيقه :-

لانك الباين ماتبي لاتصدقني ولا تساعدني ليش نتعب ف راسي.

مؤيد بضيقه :-

مستحيل ندير هكي ف بوي ياسفيان مهما كان .

سفيان شافله بغضب :-

وترضي عادي يدير هكي ف عمك ..شوف قداش عانى بسببهم وقداش عيلته عانو...خاب ظني فيك يامؤيد.

مؤيد :-

حط نفسك بمكاني لو انت ماكنت رح ادير هكي ف بوك ...وبعدين انت ماعندك دليل قاطع مازال.

سفيان بتعصيب :-

اقسم برب الكعبه لو كان بوي اللي مدايرها كنت حبسته من غير مايرفلي جفن .

وطلع وهو متعصب ركب ف سيارته وروح ...خش للفيلا وركب ع طول لجناح حمزه .

خبط ع الباب  وفتحتله ريناد :-

السلام عليكم ...ريناد كيف حالك.

ريناد :-

وعليكم السلام...الحمدالله تفضل .

خش سفيان وسلم ع حمزه وقعد بجنبه .

سفيان :-

تي نوض ياراجل ياسرك دلع والله مغير استحليت  اهتمام ريناد بيك .

حمزه :-

هههه ومن شر حاسد اذا حسد .

سفيان بضيقه :-

عيب عليكم والله العيله كلها تتهم فيا اني حسود.

خشت ريناد وقعمزت بعيد علينا .

سفيان :-

هههه ذكرتيني بيوم فتح الوصيه نفس التقعميزه وف الاخير طالك القصف وف نص الجبهه.

ريناد بتعب :-

اسكت بالله ماتذكرني بهذاك اليوم.

حمزه :-

ماصحك وتقولي فيها ف وجهي..وانا اللي  بديت نقول هذا اجمل يوم ف.حياتي .

ريناد بابتسامه :-

لا عاد هذاكا يوم وهذا يوم.

حمزه بزعل :-

صدمتيني الحق.

سفيان :-

وووه فكونا عاد ماتتعاركو بسببي مازادا حسود وتزيدو اطلعو عليا اشاعه اني فتان.

وقفت ريناد :-

يلا نخليكم تهدرزو ونمشي نحضرلكم قهوه.

سفيان :-

لالالا قعمزي وين ماشيه اساسا انا جاي ع خاطرك نبيك ف موضوع.

ريناد بمزح :-

تربح كان موضوع فيه مصيبه اجله لبعد مانجيب بديت ماعاد نتحمل اقسم بالله.

سفيان :-

هههه خوافه غير قعمزي بجد نبيك ف موضوع.

ريناد قعمزت بجنب حمزه :-

ان شاء الله خير شن في.

سفيان :-

نبيك تجيبيلي رقم هويدا بنت عمي .

ريناد شافت لحمزه باستغراب :-

ليش مافهمت.

سفيان :-

شوفي انتي جوك مليح مع هويدا وسمعت انك متصاحبه معاها نبيك تطلبي منها رقمها ممكن.

حمزه :-

بس ليش فهمنا قبل.

سفيان :-

الموضوع يخص عمي صبحي وهويدا هيا الوحيده اللي تقدر تساعدنا.

حمزه بتركيز :-

كيف مافهمت وضحلنا شن تقصد.

سفيان خذي نفس وقعد يحكيلهم ع اللي عرفه كله .

ريناد من الصدمه حست راسها لف ..قرب منها حمزه بلهفه :-

ريناد بسم الله خيرك شن في.

ريناد بتعب :-

ولاشي حسيت راسي لف شوي وخلاص.

سفيان :-

اسف ياريناد والله مابقصدي .

ريناد :-

ولايهمك ياسفيان ديمه تصيرلي الدوخه هذه...بس فهمني شن دخل هويدا ف الموضوع.

سفيان :-

نبيها ادورلي بين اوراق بوها .

ريناد :-

برايك رح توافق.

سفيان :-

هويدا حتي هيا كانت معارضه بوها وضربها حتي الضرب ومتأمل ان هيا يمكن توافق.

حمزه :-

بالعقل ان بوها ضربها شي...وانها تفرمط فيه شي تاني ياراجل.

سفيان وقف :-

نجربو مش خاسرين شي.

حمظه بتعصيب :-

ياغبي رح تخسر لو البنت مشت قالت لبوها.

سفيان مشي جهة الباب وببرود :-

يبلط البحر ويشرب من ميته.

حمزه بتعصيب :-

شن تخرف ياراجل...هاذو عمامك مهما كان والعار اطول من العمر قدام الناس.

سفيان لف عليه وبعصبيه :-

وصبحي اللي مات مش خوهم مش حتي هو عمي...بعدين يامتعلم يلي عارف ربي ربي قال لاتخافو ف الحق لومه لائم هكي الدين والشرع وصونا .

وطلع قربع الباب وراه ومشي يغلي.
.
.
.
.

عند اسراء :-

البرود والطريقه اللي يحكي بيها سفيان معاي بدت تضايق فيا...بدي ماعاد مهتم ولا يسأل عني وحتي لما نحكي معاه يحكي باختصار هالشي مضايقني ونحس ف شعور بداخلي مش فاهماته.

سألت عنه خالتي وقالت ان ركب عند حمزه ..قعدت نستني فيه قدام الجناح ومن كثر ماعطل عندهم نحسابه الا بيبات قداهم.

اول ماطلع قربت منه .

اسراء بهدوء :-

سفيان.

سفيان ببرود :-

نعم .

اسراء :-

صار شي جديد بخصوص قضيه بابا.

سفيان تخطاها :-

لا ماصار شي.

اسراء بغضب :-

ليش تحكي معاي ببرود باهي ..انت زعلان مني.

سفيان تلفت عليها وبنفس البرود :-

ومن قال هالشي .

اسراء :-

تصرفاتك تقول .

سفيان بتنهيده :-

حيرتيني معاك يااسراء لاهكي عاجبك ولا هكي عاجبك تعبتيني.

شافتله اسراء بصدمه وعيونها تعبو دموع وهربت من قدامه تجري ..لحقها وشدها من يدها.

سفيان بهدوء :-

اسراء شوفيلي.

اسراء ببكي :-

مانبيش خليني ف حالي

وخشت تجري لدارها ...لحقها سفيان وقعد يخبط ع الباب :-

اسراء افتحي نبي نحكي معاك.

قعد يحاول معاها ولما ماردتش...فتح الباب وخش لقاها غامه راسها ف الوساده وتبكي .

قعمز ع طرف السرير وبهدوء :-

اسراء نحكي فيك نوضي كلميني .

اسراء ومازالت ع وضعها وبصوت مخنوق بالدموع :-

مانبيش .

سفيان يمسح ع شعره بعصبيه :-

اسراء احكي معاي ماتخليني نتصرف تصرف مايعجبك .

قعمزت ع السرير ومنزله راسها :-

اهو قعدت شن تبي تقول .

سفيان بابتسامه :-

كنت نبي نشوف وجهك وانت تبكي...هذا حدث مايتكررش الا مره بعد قداش عام.

شافتله اسراء يضيقه ..سفيان بهدوء :-

اسراء لامتي هالشي بالله عليك.

اسراء مابتش ترد ..وقف سفيان وهو مضايق :-

اسف ع الازعاج .

طلع سفيان وهو راقيله ...ومشي للصاله متع الرياضه يفش ف غله فيها .

شوي وجت اسراء وخشت ووقفت وهيا منزله راسها :-

رح تردلي حق بوي ..رح اديرها مهما طال الزمان .

قرب منها سفيان وابتسم وقام وجهها بيده :-

مش رح يكون اسمي سفيان لو مارديته.

اسراء بخجل :-

معناها موافقه ع الزواج .

سفيان بغرور :-

وين الجديد ف الموضوع .

اسراء :-

اساسا هذا ليش وافقت.

سفيان :-

امم عشان هذا بس.

اسراء :-

وعشان تبطل تزن ع هالموضوع وترحمني .

قرب منها سفيان اكثر :-

وشن تاني.

وخرت اسراء  خطوه للخلف :-

وعشان الفضيحه اللي سببتهالي طبعا.

قرب منها سفيان خطوه تانيه لعند لصقت ف الحيط :-

وشن تاني.

اسراء بارتباك :-

سفيان خيرك انجنيت.

سفيان :-

ههههه وكيف تبيني نقعد عاقل وانتي اخيرا وافقتي عليا.

اسراء بارتباك :-

بس عندي شروط .

سفيان بهدوء :-

وشن هيا  هالشروط

اسراء :-

قرايتي مانبيش نكملها هنا.

سفيان قرب منها وبهمس :-

وشن تاني.

اسراء بتوتر :-

وماما

سفيان حاصرها بين ايديه :-

خيرها .

اسراء دفاته بارتباك :-

سفيان خيرك شن جاك بعد عليا.

سفيان بهيام :-

كيف تبيني نبعد وانتي تذكري ف اسمي هكي.

اسراء بتهديد :-

لو مابعدت عليا مش رح نكمل كلامي معاك 

سفيان :-

هههههههه ياخوافه ماتوقعت تخافي مني هكي...مش رح نؤذيك ماتخافي انتي حبيبتي .

اسراء بارتباك :-

ومن امتي قعدت حبيبتك ان شاء الله.

سفيان بهمس :-

من اول يوم شفتك فيه.

اسراء بتوتر :-

تعرف لو ماتتباعد عليا نعيط ونلم عليك العيله .

سفيان :-

هههه خلاص بعدت احكي .

اسراء :-

مش رح نتزوجو الا بعد ماتحققلي شروطي.

سفيان :-

ييه علينا ع الحال هذا مش رح نتزوجو بكل ...تعبتيني معاك ياسراء راهو قداش بنقولك انا نحبك ونبيك ادهشي فيا معاك

اسراء بدموع :-

ماعاد تحكي معاي بهالطريقه مانتحمل منك هكي.

سفيان قرب منها وباس راسها :-

اسف وحقك عليا .

اسراء بارتباك وتوتر :-

خلاص خلينا نكملو باقي كلامنا بكرا.

سفيان :-

لا خلاص كملناها...الموضوع تم ورح نتزوجو ف اقرب وقت

اسراء :-

نعقدو بس ..الزواج مازال.

سفيان :-

ليش باهي .

اسراء :-

هكي انا نبي...ننهو موضوع بابا قبل.

سفيان بتنهيده :-

باهي خلاص زي ماتبي.

اسراء طلعت من بين ايديه :-

باهي تصبح ع خير توا .

طلعت تجري وسيبت سفيان بيطير من الفرحه .
.
.
.
.

عند فرح "-

اكيد كلكم تستنو شن صار فيا ووين مشيت امم شن رايك زيزو نحكولهم اليوم.

العبده لله زيزو :-

لالا فرح دهشت راني وماما قريب تضربني المطبخ حوسة الغدي قعده من بكري متمرعشين من الضرب يادوب كتبت.

فرح :-

باهي شنو كيف الحل.

زيزو :-

احكيلهم بكرا وخلاص .

فرح :-

امم شفتاها كيف سكرت راسها...خلاص بكرا وعد نحكيلكم اللي صار معاي بالتفصيل يلا يازيزو اكتبي يتبع يلا.

.
..
.
.
.

#يتبع .

برايكم شن رح يصير من احداث وشن الجاي وشن رح يصير من تطورات

ملاحظه /

وحق ربي نحبكم هلبا تزعلوش مني بليييز والله والله دهشت ويادوب كملت الحلقه .

تحياتي اختكم وصديقتكم دائما :-

#zezo_a_saad❤😍