شفاه مخملية

Part 2

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

للكاتبه: زهراء السلامي

#لو اتاحت لنا الحياة فرصة العيش مرتين ، هل سنكرر اخطائنا؟
لو تحققت خُرافه ان الميت يصبح نجمه ، هل كُنا سنحب الليل؟
لو بدأت الحياة دون ام ، هل ستصبح كالاحلام الورديه ؟
(بقلم ithuda )

♛ ♛ ♛ ♛ ♛ ♛ ♛ ♛ ♛ ♛

"هجران"
صحت جوري وبَـس تونّ وايدهه ؏ راسهه وتبچي، هاي شبيهه شصارلهه!! صوت عياط الولد بره عالي واسمع صوت ابويه يهدي بيهم، وصوت زلم هواي مبين حمت السالفه وهواي تدخلو.. فجأة ومنسمع غير صوت طلق قوي وابويه يصيح...

-ابويه: لاااااااء لاااااااء ليييييش لاااااااء

رحت ارككض ؏ باب الحوش اريد افتهم شصار، ماكو اية قرآنيه ماقريتهه، گلت خلص غزوان راح لو واحد من ولد المنطقة..

مديت راسي واني ابچي بسكته اخاف واحد يشوفني، اشوف ابويه واگف بمكانه وجهه احمر وفيصل واگف ؏ جهه لازم وجهه مدمى وغزوان نفس الحاله والزلم كلهه واگفه بعيد.. ورجال واگف بالوسط لازم مسدس ورافع ايده فوگ ومتحظر يضرب طلقات بالهوا، أشر ؏ جهة ابا الفضل العباس(عليه السلام) وگال بحرگة

-الرجال: وحگ هذا ابو فاضل لو صاب اخوي شي اگلب عاليهه واطيهه

-فارس(الاب): يابه استهدي بالله ماصار شي شباب وتعاركو ماصار شي

-الرجال: عمي فارس شني السالفه الوليد مدمى بله صارله شيي

-فارس: ابني الله يخليك هد السلاح ماكو شي وليدي انته واعي وتفهم وهسة معصب، اخوك مابي شي مو عمو فيصل؟

-فيصل: اي ماكو شي خلص ماصار شي خوية

-فارس: عيوني انته هد السلاح هسة الشرطة تجينه و..

بعده ماكمل الحچايه واجوي الشرطة خصوصاً احنه عايشين بالولاية بالعباسيه الشرقية، ومنتسبين العتبات يروشون بكل مكان لان منبعد دقايق عن الامام الحسين وابا الفضل(عليهم السلام) واكيد سمعو صوت الطلق، اجو الشرطة وسحلو كلمن چان واگف..

اكو منهم طفرو ومالحگو عليهم، بَـس الرجال ابو السلاح واگف بمكانه، اجه الشرطي يحاچي بهدوء وصعد وياهم بالسيارة..

اجتني امي تصيح

-امي: سووودة بوجهيي ولچ شصااار منين هالطلقق

-ماما ماعرف بَـس هذا رجال چان لازم سلاح و... (كملتلهه الصار وظلت تلطم ؏ وجهها من گلتلهه اخذو غزوان وبابا وفيصل اكيد.. والحظ الزفت چانو فاضل وحيدر اخواني هستوهم جايين يشوفون جوري وهم اخذوهم

-هجران: ماما جوري صحت؟؟

-صباح: اي وندى يمهه

-شبيهه؟؟ شصارلهه؟؟

-صباح: مادري مادري بَـس تبچي ومتقبل تحچي شي

تضرب بچفوف ايدهه بحيرة، رحت اركض اشوفهه بَـس چانت تعبانه ووجهها اصفر.. اني ادري بأختي خوافه حتى لو مصايرلهه شي تخرب وتوگع من طولهه..

-جورية شبيچ يا حبيبتي حاچيني اني مو اختچ

-جوري (بصوت مبحوح): فدوة هجران تعبانه اريد انام

-احچيلنه يا عيني امي ماتت عليچ ولچ احچي

دخلت علينه امي عيونهه بگصتهه، عاطت بحرگة بصوت هز البيت

-امي: جوررري احچيييي ولچ شصااايرلچ شنو هالحااال مو والله گلبي ماات احچي وريحي گلب امچ يا بعد امچ شبيهه عباتچ مشگوگة ووجهچ اصفر؟!!!

جوري انفجرت بالبواچي، حظنتني حييل ودفنت وجهها بصدري.. امي تصيح بيهه حتى تحچي اخيراً نطقت بأنفاس متقطعه

-جوري: مامااا راد يااااخذني ويااااه

-امي: لچ سووودة بوجهييي منو هذاااا منوووو

-جوري: ماعرفه والله ماااعرفه اجاني و.. و.. و.....

تشاهگ متگدر تكمل حچيهه راح منهه النفس ركضت افتح البنكه ؏ اعلى شي واهفيلهه.. حرنه وياهه ومنعرف شنسوي

-جوري: ماما فدوة تعبانه اريد انام

امي شاطت ماتحملت بعد، واضح صبرهه نفذ.. جرتهه من شعرهه حيل وعاطت

-صباح: رح تحچيييين لو شلوووون

رجعت اختنگت وتبچي بحرگة.. گوووة قنعت امي تعوفهه شويه ترتاح، لان ادري بيهه مستحيل تگدر تحچي بهالحال وهيه اصرت علينه تريد تنام لان عيونهه وحدهن ينطبگن طلعنه من الغرفه عفناهه وحدهه.. ردت اغافل امي واطب عليهه وحدي بَـس ماقبلت الا هيه تجي ويايه..

گعدنه بالصاله وامي تلوب ؏ ابويه واخواني، ساعه تبچي ساعه تگمز تريد بَـس خبر عنهم، تدگ ؏ ابويه من موبايلهه وكله يطلع مغلق وفاضل نفس الحاله، لبست عبايتهه وراحت تسأل الجيران واني وندى گاعدات وحدة مگابله الثانيه ننتظر جوري تصحى حتى تسولفلنه، طبيت عليهه للغرفه چانت دايره وجهها ومنطيتني ظهرهه

-جورية گاعده؟ جووري تسمعيني؟؟

ماكو لا حس ولا نفس عفتهه وطلعت بره خليهه ترتاح

**

"جوري"
چذيت ؏ امي وخواتي وگلتلهن نعسانه ومثلت النوم لان مالي عين احچيلهم الصار ويايه، الغلط مني اني صوچي ماحجيتلهم من اول يوم تجاوز ويايه الچلب..

بَـس قبل لا احچي خليني استغل الفرصة واعرفكم عن نفسي.. اني جوري بَـس كل البيت يصيحلي "جورية" اصير بت اخت خالو فارس(ابو هجران) امي وابويه توفو واني بت انفاس بعده ماطالع اربعيني ماعرف عنهم أي شي ولا بيوم حاولت اسأل عنهم، خالو فارس رباني وكبرني لحدما شبيت وصرت شابه تملك من الجمال احسنهُ، وطبعاً هذا مو كلامي هذا حچي الناس كلما يشوفوني..

بشرتي حنطيه وعيوني وساع، شعري بسل لونه اسود فحمي.. احب اعتني بنفسي وبشكلي عكس هجران، اصلاً اليشوفنه يگول مستحيل نگرب لبعض حتى

كبرت ووعيت ؏ الدنيا ابويه "فارس" وامي "صباح" واخواني "فاضل" و "حيدر" و "هجران" و "ندى"،، مافد يوم حسسوني اني مو منهم لو اني اصير بت عمتهم لا الله الشاهد يحبوني وامي صباح روحهه معلگه بيه يمكن لو چانت امي الحقيقية عايشة چان ماحبتني هلگد..

من واني صغيره اسمع هالمقولة "جوري وغزوان لبعض" وغزوان كبر وكبر حبه تجاهي، يعشقني بخبال.. بالبدايه چنت معجبه بي وبشخصيته بَـس مو حب، ضحكت ؏ روحي وگلت بيني وبين نفسي "يجوز احبه من اكبر" بَـس طلع العكسسس ماگدرت اتقبله.. هوه ميت ؏ لمحة مني واني ماگدر انطي والسبب ماريده يتعلق بوهم ويبني احلام واوهام ؏ شي مراح يصير مو بيدي بس نفسي متتقبله، ماريد أأذي لو اجرحه بَـس ما باليد حيلة

خطبني كذا مرة وارفضه، بابا فارس دائماً واگف بجانبي ميقبل يضغط عليه ويگول براحتهه تتزوج اليعجبهه اما امي تريدني لـ غزوان لان يصير ابن اخوهه وتمدح بي وتگول وره الزواج حَ تحبي بَـس اوووف گلبي الاغبر شسويله وهوه متعلق بواحد ثاني وماخذ عقلي ونبضي وكل نسمه بجسمي

كبرت وكثرت خطاطيبي كل يوم داگين الباب ويخطبون، ناس شايفيني بقرايه، وناس ابنهم شايفني واني راجعه من المدرسة وناس شافوني بالزيارة وناس وناس وناس...

فد يوم من الايام طلبت من اخوية فاضل موبايله اللعب بي متعودين ينطينه موبايله نباوع يوتيوب ونلعب لان ماعدنه موبايلات..

صار عندي فضول اروح للفيس واشوف شنو بي مابي اسمع صديقاتي يحچن بي ويگولن عنه حلو ويونس، بَـس ما فد يوم تجرأت ورحت اله لان فاضل مانعني وميقبل افتح البرنامج حتى، بَـس الفضول اكلني ونخر گلبي فتحت البرنامج وگعدت اگلب، واني ملتهيه ومتونسه بي اجت رساله من واحد اسمه "فيصل" كاتب بيهه...

-هـلا فاضل شونك، اكلك اخوي انه نازل لكربله شوكت اشوفنك؟

ظليت صافنه ؏ الرساله ومافتحتهه، رحت ؏ صفحته وشفت معلوماته كاتب خريج معهد صناعه، ومحل سكنه ذي قار، فتحت صورته الشخصيه.. شاب مرتب مبين محترم من منشوراته، بشرته بيضه عيونه وساع كُلش الي يشوف بَـس عيونه يگول عيون بنات ورموشه كثيفه وطويله..

شكله نازك وناعم مبين من ذوله الشباب اليدارون رواحههم.. ماهتميت طلعت من صفحته وظليت اگلب..

راحت ايام واجت ايام واني كل يوم اخذ موبايل فاضل واقره المحادثات بينه وبين فيصل.. گلبي يرجف كلما عيني تطير ؏ صورته الشخصيه..

فد يوم دا اگلب وكتب...

-فيصل: ها خوي مو عساس تريد تقره شو نشط ؏ الفيس

ماجاوبته، رجع دز سمايلات مال ضحك وكتب..

-خوب گول تريد تخلص مني شني السالفه ههههه

دا اوخر الاشعار وانفتح بالغلط يبووو ؏ عمري شلون بيه.. طلعت بسرعه وردت اودي الموبايل لفاضل، رحت اسأل هجران...

-هجران وين فضولي؟

-هجران: طلع گال يروح بالعباس يقره هناك بالمكتبه

-هاا

-هجران: ليش تسألين؟

-جوري: لا هيچ ولاشي

بعده الموبايل بيدي ورجع كتب فيصل...

-فيصل: فاضل شجرالك؟ شني انه مسوي شي مضوجك بي؟ ليش تشوف الرساله وماتجاوب شمالك وياي

حسيت عيب اغلس، كتبتله..

-فاضل هسه طالع وموبايله عندي

-فيصل: چا وانته ياهو؟

-اني اخته

-هاا هجران؟؟

-لا جوري

-بَـس فاضل ماعنده اخت اسمهه جوري؟

صفنت هذا شمعرفه بهالتفاصيل، وحتى لو چان صديق فاضل معقوله يگوله اسماء خواته، رجع كتب...

-اسف بعد اخوچ حسبالي فاضل نشط ؏ الفيس

-لا عادي فاضل شويه ويرجع

-هاا خير ان شالله

ظليت انتظره بعد يحچي بَـس طلع من الفيس كله، ظل براسي وبيومهه مانمت واني افكر بي، ثاني يوم تكرر نفس الشي.. ووراهه بكم يوم هم كذلك، گمت اسويهه بالعمدني وافتح الرساله واگوله بالغلط انفتحت..

هوه يدز سمايلات ضحك..

-ليش تضحك؟ اني گلت شي يضحك؟

-فيصل: هههه لا بَـس احب من تبررينلي

-تره مدا ابررلك مجرد دا اكولك حتى متفهمني غلط

-افاا وليش افهمچ غلط، لا والحمزة ماكو شي ببالي من هالحچي

-ممم زين

-اكدر اسألج سؤال؟

گلبي رجف، ماعرف ليش..

-تفضل

-ليش تلعبين بموبايل فاضل؟

-هوه ينطيني ويخليني اللعب، لان ماعندي موبايل

-هاا

-جوري: زين اگدر اني اسألك سؤال؟

-فيصل: اكييد

-انته صديق فاضل من شوكت؟

-هههههه لا انه مو صديقه انه گرايبكم

-صدددُك تحچي؟؟؟

-اي

-عززه ولا ادري زين انته منو وابن مَن؟؟

-انه ابوي يصير ابن خال امچ

-هااا

-اييي

-ههه ليش كتبتهه هيج

-هههه مادري

ظلينه ؏ هالحال كل يوم نسولف واني امشي وامسح بمحادثاتنه لا انفضح ويشوفهن فاضل.. استمرت علاقتنه تقريباً ثمان اشهر واني حبيته وتعلقت بي اشوف حنيته وشلون يحاچيني واسلوبه راقي بالكلام، متت عليه اريد اشوفه واتمنى اگوله يجي لبيتنه بَـس استحي، اني كل البيت يگولون عني جريئه عكس هجران كُلش خجوله ومنطويه ؏ نفسهه بَـس طبيعتي ما اتنده للشباب ابدد بَـس شلون حبيت فيصل ووگعت في شباكه ومتغمض عيني لوما احاچي مادري

دخلت سادس تجارة واني ماراغبه للدراسه بَـس لخاطره ادرس وانجح، يگول ماريد مريتي جاهله.. چنت افررح واكيّف من يگول هيچ وافتهمت قصده شريف وناوي يخطب مو بَـس لعب جهال، چنت اشد حيلي واحاول انجح رغم كرهي للدراسه بَـس لخاطر عيونه

ويوم من الايام چنت دا اطلع من المدرسة وصادفني واحد شكله مو راحه، حاول يصچمني بَـس ماهتميت رجعت للبيت وركض اخذت موبايل فاضل وراسلت فيصل، گتله عن هالولد گلب الدنيا وگال ديري بالچ ؏ نفسچ

ويوم بعد يوم يتماده هالولد ويسوي حركات وسوالف سخفيه بوجهه بَـس يريد يشد انتباهي واكثر من مرة يذبلي رقم واني اللبسه واروح، واني كلشي اگول لـ فيصل كلللشي ماظم سالفه..

اول يوم الامتحانات چنت جاي اروح للمدرسة وصادفني نفس الولد بس هالمرة جاي بسيارة كشخة.. حاول وياي وسوه سوالفه ومانطيته مجال، كملت امتحاني وكلشي تمام، وگفت انتطر هجران تجيلي مثل كل مرة بَـس شفتهه تأخرت وصديقاتي كلهن راحن بقيت بَـس اني وكم بنيه ويايه.. رجع هذا الولد الملطلط نزل من سيارته وتوجه عليه...

-الرجال: اسمچ جوري صح؟

باوعتله بنظرات استغراب، هذا شمعرفه بأسمي؟ ماجاوبته درت وجهي من الجهه الثانيه.. كل هذا وما راح بكل جرأة گعد بصفي ؏ الرصيف، ضحك وگال...

-اني بشير

ماجاوبته، اردف...

-بشير: ديلا عيني شبيچ متحچين، (گال بأستهزاء) ياااا اخاف خرسة واني مراقبچ صارلي سنه ههههه

انضغطت من اسلوبه، خزرته قوي ونترت...

-شتريييد؟؟؟؟

-بشير: هاا الحلوة مو خرسة همزين

-هفففففف

-اروح فدووة

گمت من مكاني وردت اروح، سحبني من ايدي وگال بصوت هامس..

-بشير: اريد اضوگ هالكيك تعاي وياي وانطيچ التردي

لعبتتت نفسي من اسلوبه وشلون مستفز بكلامه، نفضت ايدي بقوه منه وابتعدت.. شفت هجران جايه رحت اركض عليهه، ومشت ايام الامتحانات كللل يوم اشوفه انوب ما اكتفى بَـس هوه يجي لااا المصيبة گام يجيب جماعته يجون يتفرجون عليه، گلبي طگ منهم ولعبت روحي من اسلوبهم ولطلطتهم، بَـس ماگلت لـ فيصل ماريده يعصب لو يظل باله وحتى لو اگله هوه شبيده..

اليوم اخر امتحان امتحنه فَـہ صديقاتي گالن خلونه نحتفل نجيب كيك ونحط مكياج وهالسوالف بَـس كل هذا بالمدرسة.. صدُك كملت امتحان وسوينه الاحتفال..

برجعتي للبيت عيوني تطاير اخاف موجود بَـس حمدت ربي ماهوه.. رجعت للبيت وشفت غزوان وفيصل وهاي چانت اول مرة اشوفه وجها لوجه شكله بالحقيقه احلللى بهواي وطلع اقصر مما تخيلت.. بَـس ميهمني يبقى حلو بعيني صارت بيناتنه نظرات استغربت شلون عرفني بهالسرعه، بس اكيد من شرحتله شكلي ومواصفاتي عرفني منهن..

دخلت للبيت ورحت بسرعه اراسله، بَـس فاضل چان بالاستقبال وماخذ موبايله فَـہ ماگدرت.. وچنت ناويه احچيله عن هذا الملطلط..
كملنه غده واجه غزوان استلمني اشتريت قطعه ارض واريد ابني واريد اتزوج و و و.. طگت روحي وگلت اروح احاچي فطم صديقتي من موبايل امي الصرصور، گالت تريد تجيلي للبيت باچر فكرت بيني وبين نفسي كلشي ماعدنه حبشكلات ونميات بالبيت مخلصين شلون بيه اذا اجت خوما اتفشل وياهه..

فكرت گلت اخلي اخوية حيدر يجيب بَـس ادري بي ميجيب الشغلات الاريدهه بالضبط لازم عنده نقص ويجيب سوالف متعجبني.. قررت اطلع اني واروح للعطار الي براس الشارع بدون لا احد يدري وارجع بساع، رغم ادري بأبويه مانعنه من الطلعه وگوه يقبل نروح للمدرسة وحدنه بَـس گلت عنده خطار ومستحيل يدري..

طلعت چان الشارع يصفر وقت قريب المغربيه، اشتريت الشغلات وجاي اطلع من المحل وصادفت بشير الزاحف ظل يذبلي حچي ويگول كلام زباله..

-بشير: اويييلي يابه اليوم اخذتني النومة وماشفت الگمر، شوف الله شلون يحبني شلون صدفة كحلت عيوني بشوفتچ غلاااي

مشيت واني اقره ايات قرآنيه حسيته شيطان وطريقه كلامه وشلون يسوي اصوات بحلگه نرفزني.. فجأة ماحسيت اله جر عباتي من وره ووگعت من راسي، سحبني من ايدي قوي ودخلني بدربونه واحنه ولاية وكلهه درباين وهيچ وقت يفرغن ويكونن ظلمات يممه گلبي وگع، سفطني ؏ الحايط واني گوة واگفه، مكمم حلگي بأيده وماگدر حتى اتنفس

فجأة وماحس اله شي اجه بخاصرتي، نتر بين سنونه

-بشير: اذا سمعت هسسس هاي السچينه تدخل بيچ وبعد بكيفچ انتي تردين سچينه تدخل لو شي ثاني

يغمز من يحچي وضحك ضحكة شيطانيه، جسمي يهز ماگدر اسيطر ؏ روحي ودموعي تجري.. فتح حزامه وراهه سحابه اني هناا انتهييت گلت خلص ضعت..

فتح عباتي وشال قميصي وراهه اتجه ؏ بنطروني وحاول يمد ايده ماعرف منين اجتني القوة وشفته ملتهي يريد يسوي سوايته استغليت الفرصه ودفرته بمنطقته الحساسه، صاح بألم مكتوم..

انهزمت واني ادعي وانخي الائمه يخلصوني من هالوحش، اشوف الناس تمشي عادي ذوله وين چانو وليش هسة ياله طلعو ركضت بكل سرعتي الكل صافن ومستغربين من حالتي طبعاً ميعرفون بشنو مريت، اركض واني لابسه عبايه چني خفاش يطوطي، ثواني وماحس الا واحد سحبني من ايدي قوي، شهگت بخوف...

-فييصل؟؟؟؟

-فيصل بنتر: امشييي وياااي

-انته شجابك؟؟ مو چنت بالبيت؟

دار وجهه يباوعلي، صفن بعيوني ثواني وهمس بنتر...

-فيصل: ابوي وخواني طلعو واني غافلتهم وطلعت ادخن گلت اردن وحيدي، وشفتچ طلعتي من البيت ردت احاچيچ بَـس مالحگت رحتي تهفين موليه (رايحة) لمادري منهوو

-جوري: وبابا شافني من طلعت؟؟

-وانتي هاذ الخايفه منه

-فيصل رحت للعطار اشتري نميات

-فيصل: شمالچ تلهثين وعيونچ مغورگه؟

-هاااا

-اششش لا تحچين شي، يله امشينا هذا رقمي دگي عليّ اليوم ضروووري لا عشيرتچ اشعلهه

حط ورقة بيدي، خفت من نبرة صوته..

-جوري: فيصل اني..

قاطع حچايتي بشير، عاط بأستهزاء

-بشير: ماشاااء الله ست جوري من حظن واحد لواحد وتگولين شريفه طلعتي خبرره

-فيصل بعصبيه: شنهوووووو؟؟؟!!!!

صار ملاطم بالكلام هذا يصيح وذاك يرده، انفضحنه بالشارع الزلم اللتمت والعيون عليه تغشيت بعباتي خفت احد يعرفني.. فيصل اللتفت عليه وعاط...

-فيصل: ردي للبييييت بساااااع

رحت اركض واني اتلفت اخاف يجيني بشير، اتعثر بعباتي واحس گلبي مات بادت رجليه من شفت صديق بشير واگف قريب بيتنه يباوعلي بنظرات كلهه خبث ومكر، تقرب عليه وگال بتلاعب

-خلص بشير اجه دوري هسسه

ماحسيت ؏ روحي الا واني واگعه غشيانه وصايره بحظن بابا، شلون اجاني وشوكت اجاني مادري، ووين راح بشير وصديقه هم مادري، فيصل فوگ راسي يغسل بوجهي وبابا يحاول يصحيني.. شالني بابا ودخلني للبيت وبعد استلموني امي وخواتي وغزوان اكيد..

گلبي مفرفح ؏ فيصل، اخاف فهم شي او شافني ويه بشير العكرة المشكله حتى ماعندي موبايل اتصل بي الا الچان اخذ موبايل امي من دون متدري، بَـس شلوون بيه اذا هجران لگفتني والله مترحمني، اني ابد محاچيه ويه فيصل مكالمه لهيچ محد منتبه عليه.. قاطع تفكيري دخول امي وخواتي للغرفه، استلمتني امي بالرزايل

-امي: احچيييي جوووري شصاااار

رجعت احچيلهن الصار بَـس ماتعمقت بالسالفه يعني گلتلهن بَـس تحرش بيه واحد حتى ماخبلهن، وامي غسلتني غسسسل تدگ ؏ وجهها وتلطم هجران گوة جرتهه عني وطلعتهه بره، رجعتلي للغرفه لونهه مخطوف وعلامات الاستغراب مرسومه عليهه..

-هجران: جورية متأكده ماصار غير شي؟

-جوري: اي هجران شبيچ يعني شيصير مثلاً؟

-مادري عنچ شو اجيتينه ميته

-اي بَـس خفت لا اكثر

-هجران: مممم (گمت عنهه متنرفزة، هالبنيه الا شي يوم تجلطنه، طلعت بالصاله شفت امي تدگ ؏ ابويه واخواني لليل وسمعنه باب البيت ينفتح.. ركضنه عليه شفناهم يدخلون، سلمت عليهم وامي تبچي وتبوس بأخواني، وابويه استلمني..

-فارس: ومحمدددد اذا اشووووف وحده معتبه باب البييييت الااا اكسر رجليچننن فهمتتتتيييي!!!!

هزيتله براسي وشردت بالسطح افرش المنادر حتى يبردن، هاي العوبة جوري عمّت علينه كلنه من وره سوالفهه الصبيانيه..

صعدو بابا والولد وامي مصعده صينيه العشه وندى شايله الصمون ودولچة المي هاي عادتنه بالايام الحارة نصعد فوگ نتعشه وحتى نومه ننام هنا.. سألت عن جوري امي گالت لگتهه غافيه جوة، امي گعدت تسأل عن الصار وابويه ميقبل يحچي يگولهه سوالف زعاطيط وتصافو وتصالحو، انصدمت يعني همه چانو سابحين بدمهم وعركتهم واصله للستار شبسرعة تصالحو، مع ذلك ماهتميت ومحد سأل بعد.

مشت ايامي طبيعي گظيتهه بين الشغل والكرف وغسل الهدوم والعزايم المتخلص.. الخطابة يوميه داگين بابنه بَـس طبعاً مو الي لا عيني منو يگلب هجران الچلحة طبعاً يرحون كلهم ؏ جوري وحتى لو جايين الي بَـس يشوفون جوري يغيرون رأيهم ويردوهه الهه..

وطبعاً كالعاادة جوري مطنگرة ورافضة فكرة الزواج بشكل نهائيي، متأملة تزوج عن حب والله بطرانه هاي عايشة بالاحلام، ويوم من الايام سمعتهه تحجي بموبايل امي چانت تگول ببكاء..

-جوري: وحق الله فيصل ماعرفه والله العلي العظيم بيمن اقسملك ماعرفه ولا عندي أي علاقه بي واني حاچيتلك كلشي عنه.. اني شلي علاقه هوه نذل وحارشني فدوه اروحلك صدگنيييي

اسمعهه مفرفحة ودموعهه عشره عشره، من طبيت عليهه للغرفه نزت وخافت مني سألتهه وماقبلت تحچي شي تگول چانت تحاچي صديقتهه بَـس اني مو غشيمه سمعتهه تكول اسم ولد بس ماردت اضغط عليهه..

عفتهه ورحت اكمل شغلي اجتني ندى مبوزة

-شبيچ نداوي؟

-ندى: اكره حياتنه

-شنوو؟؟

-ندى: اي هجران ايي اكرره حياتنه شنو هالعيشه العايشيهه دباعي بيتنه شوفي وضعنه

-ندىىىى حرام تحچين هيچ حمدي ربچ غيرچ ماعدهم سگف ينامون جواه

-ندى: هجران اني ماحچي بَـس هيچ بَـس والله كاسر گلبي بابا ليل نهار يشتغل ويجون العالم يعيرون بيه علبو ابوچ چايچي (يسوي ويبيع شاي)

-وشبي الچايچي عيني معاجبچ هذا الشغللل ساترنه وثانياً بابا مو بس چايچي ترا هوه منتسب بالعتبه همات نسيتي تعيّن بالجديد

-ههههههه ضحكتيني ايي تعيّن بالجديد رح يذبو ؏ الكشوانيه يم الاحذيه والقنادر ليييش هالذله اني ماقبلهه ؏ ابويه

-ندى بسس عااد ماطول ممقصر وياچ بشي ميحقلچ تحچين عليه شو كلشي تردي جوه رجليچ بجيچ

-هجران شبيچ انفجرتي عليه تره اني مقصدت شي كل ما بالموضوع كلما اريد اشتري شي جديد امي تگول ابوچ خطيه ماعنده لنضغط عليه

-اي معناهه لتضغطين عليه فهمتينييي

-اففف ماكو واحد اكدر احجي وياه بهالبيت رأساً تنگلبون محاميين

-نداوي مو سالفه محاميين بَـس بابا تعبان يصيح من الم ظهره انتي متسمعي بالليل يونّ هاي كله من وره الوگفه وهوه يبيع چاي للاوادم حتى يجيله كم فلس ويستر علينه بيهن

-ندى: والله ادري والله العظيم بَـس مو ملزوم يدخل فاضل كليه اهليه وقسطهه اربع ملايين

-لتنسين فاضل شاطر وچانت امنيته يدخل تحليلات مرضيه وخطيه معدله مجاب فَـہ ابويه ماراد يكسر خاطره ودخله ؏ حسابه وانتي تذكرين من فاضل ماقبل بَـس بابا أصررّ عليه وگال يريد ابنه محلل

-ايييي وانتن متكسرن خاطره من انتي تبچين حتى تدخلين كليه لو حلال ؏ الولد وحرام ؏ البنااات

-لا مو هيچ الموضوع بَـس انتي تدرين بابا يخاف ويتراجف علينه، احنه روحه من هالدنيا وميتحمل لو صارلنه شي

-ندى: طبعاً تدافعين عنه غير انتي حبيبت ابوووچ

-هجران: افف ندى اففف

راحت عني وهيه گالبه وجهه، مالومهه حقهه ندى بدت تكبر وگام بعجبهه تلبس وتشتري حالهه حال البنات، سنه الجاية هيه خامس اعدادي وحادة سنونهه من هسة تنگ ؏ راس بابا تريد تدخل جامعة

گظت الايام ممللله خاليه من أي شي الى ان اجه اليوم الغير حياتي وگلبهه گلاب، عشت عيشه ومريت بأحداث ماتخيلت روحي يجي يوم واجربهه لو اعيشهه، اجتني امي تعيط...

-صباح: وچ هجراااان گووومي گووومي بسرررعه

يتبع☘️...

♛ ♛ ♛ ♛ ♛ ♛ ♛ ♛ ♛ ♛
توقعاااتكم للبارت الجااي ولا تنسووون التصويت والتعليق بين الفقرات، والي يسألون عن غزاله تظهر بالبارت الجاي🤭☘️

تابعوا هالكاتبه الكيوت🌸 noorjojp78