جذبني فمك البني

البارت السبعون والاخير

شَعْرُكِ البُنِّيُّ🤎
أوردةُ اليدينْ
وجهكِ العربيُّ
شاماتٍ وعَينْ
صوتكِ الرطبُ المملّح بالحياءْ
وجهكِ المنفيُّ من طينِ السماءْ
كلُّ شيءٍ فيكِ أجمل ما يكونْ
قامةً،
شَعراً، شفاهاً،
رقّةً، لوناً، عيونْ
كلُّ شيءٍ فيكِ يفقدني الكلامْ
ثمّ يتركني وحيداً لا أفيقُ ولا وأنامْ.
ادهم
__________

يحجون واني صافنه عليهم بكل كلمه يحجوها افقد ثقتي بالحياه والناس اكثر ، كل كلمه عبالك خنجر بكلبي مو طبيعي الكاعد اسمعه اكيد يكذبون عليه بس من باوعت لايفين شلون منهاره وتبجي وعيونها تراقبني خوف كلت لا سيلين الحجي صحيح...

يحجون واني استرجع مواقف ادهم وعقابه اليه بهاي الشهرين الفاتت شكد تحملت منه حجي وشكد تعذبت كمت ما اسمع كلامهم لا رجعت للشهرين العيشني بيهن ادهم ويدكن بكلبي خصوصا هذا الموقف انرسم كبالي قبل لا نتصالح بسبوع...

يوم الخميس الساعه السادسه مساءآ ( هنا تحولت لجثه هامده بكل كلمه كالها اليه هدم جزء مني ....

جان الحديث عباره عن شجار محتد بيني وبينه عدا التجريح بالكلام..

يعني بسببهم وهو يدري بيهم ودخلني بمعاتبات اني بغنى عنها.

دخلت جان كاعد على القنفه شافني ودنك راسه مثل كل مره متجاهلني...

سحبت كرسي وكعدت كباله...

هو بغضبه وشكه واني بخوفي ورهبتي من رده فعله خفت احجي ومنوصل لنتيجه وينتهي اخر امل عندي و تنتهي كل حياتي..

رفع عينه باوعلي وكال..

ادهم : سولفي شعندج من تبريرات جديده يا زوجتي المحترمه...

جاوبته بغضب..

سيلين : دير بالك تتهمني بشي اني ممسويته لان بوقتها صدكني اي مكان ميجمعني بيك واخليك بحسرتي وخلي ابالك اي كلمه منك تشكك بأخلاقي اعوفلك البيت وبعد متشوف وجهي..

ادهم : هاي الاصول الكضيت حياتي اعلمج عليها ترفعين صوتج عليه سيلين...

نزلت دموعي من وحدها وجسمي كام يرجف...

جاوبته بحديه ونضرتي اله جانت معاتبه...

سيلين : مقهوووره منك كلبي محروك ليش هيج تسوي بيه فوكها تطلكني وبعدها تتجاهلني راح اموت بعد ما اتحمل لو تحسمها واطلع من البيت لو ترجعني على ذمتك وينتهي كلشي..

ادهم : تتحملين ترجعيلي أأمن عليج واوفرلج كلشي بس حقوقج كزوجه وحبيبه تنسيها...

حجاها ورفع تك حاجب..

باوعت عليه وكتله..

سيلين : مستحيل اعيش وياك هيج وتخليني على الهامش ننفصل افضل...

ادهم : وهذا رأيي جان .

سيلين : هو انت من يوم الوقفت الحساب بالبنك وضليت تأذيني جان المفروض انسحب وما اتأمل منك شي لان من وقتها انهدت حياتنه على شنو جنت متلهفه واريد انجمع بيك..

ضحك مستهزء..

ادهم : ردت اشوفج حالج بدون ادهم شلون يكون متسووين شي بدونه ردت اشوف شلون تعيشين اذا شلت ايدي عنج كاعده بكافتريا ويه واحد وتسولف مبتسمه وبعدها تريد تتطلك وكل هاي متريدين اشيل ايدي عنج واكول والله سيلين تحبك اصبرلها ولج دمرتيني انتي..

سيلين : ماكو شي بينه والف مره كتلك هذا الولد لزكلي وكعدت وياه علمود انهي كلشي ..

ادهم : تريدين تقنعيني صدفه صارت الخطوبه ومعامله الطلاك الغيابي.

سيلين : اي صدفه ردت اتطلك منك لان اعرف بيك تستحرم تلمسني بالحرام واعرف تشتاقلي و جنت تجيني للشقه هوواي عبالك ما ادري بيك كلت اقدم المعامله علمود تواجهني وفعلا تخبلت انت ..

ادهم : صايره ذكيه..

سيلين : تلميذتك..

ابتسم مستهزء..

سيلين : صدك انت مو جنت تراقبني وين ما اروح وحتى موبايلي تفتشه من تدخل لشقتي بعد عليمن تشك

نتر بعصبيه.

ادهم : مجنت اجيج ولا مراقبج اصلا ولا شايف تليفونج منيلج هذا الحجي.

سيلين : ادهم بلا كذب لتنسه كمت اعرفك من تكذب.

ادهم : حلو تطورنه.

سيلين : شعبالك.

ادهم : ولج انه جنت طااااالع من تجربه موت تفهمين يعني شنو موت وبالكوه وكفت على حيلي وكلت هيه راح تعوضك عن ياسه انتي شسويتي لعبتي على اعصابي يوم احبك يوم ماريدك بس فهميني بشنو اذيتج بشنو قصرت وياج.

مسحت دموعي وكتله.

سيلين : مقصرت ولا اذيتني بس خفت احبك بوقتها وجنت ارفضك لان ابالي عمتي بس بعدين حبيتك والله العظيم حبيتك واصلا اكون اكبر غبيه اذا رفضتك ..

همس بصوت تعبان.

ادهم : ليشش اذيتيني ليش ؟؟

سيلين : والله ما اذيتك والله.

ادهم : بس عشتي حياتج بعيد عني سيلين وارتاحيتي..

سيلين : والله ماشفت الراحه بيوم ولا عرفت معناها اصلا النوم هجر عيني ولا زارني بيوم اله من جنت تجيني جنت اغفى بحضنك وعلى ريحتك..

عكد حاجبه ضاج..

ادهم : ماجنت اجي تتخيلين..

سيلين : جنت تجي ومتأكده بس كبريائك يرفض يخليك تحجيها لعد ليش جنت زارعلي كامرات بشقتي.

فتح عينه كلها وكال.

ادهم : منيلج هذا الحجي .

سيلين : عرفته مو مهم منين ادهم اعترف انت تحبني بعدك ليش تنكر اعترف متكدر تعيش بدوني انت بدون سيلين متكدر تكمل وسيلين بدون ادهم متعيش..

ادهم : حتى لو جنت احبج بس كرامتي اهم.

غرغرت عيني متت يعني شلون اقنعه قافل عليه رحت يمه كعدت اتوسله..

سيلين : اقراني مو تعرف تقره وجهي اقراني وشوف شلون ماكلني الندم اقره حبك بعيوني اشتياقي الك لهفتي عليك..

ادهم : قبل مثلتي عليه الحب وعرفتي شلون تتحكمين بتعابير وجهج وحركاتج لهذا كمت ما اميز كذبج من الصدك بس جان عندي احساس بيوم تتغيرين وتحبيني وجنت هواي اغالط نفسي في سبيل اضل يمج وبحضنج لج شلون كدرتي تسوين بيه هيج والله متعجب شفتي انتي شكد ظالمه.

سيلين : فهمني شغله وحده واطلع منا انت ليش جنت تراقبني خمس اشهر ليشششش.

ادهم : شدعوه خمس اشهر كل الكعدته يمج كم يوم وجنت اروح واجي ماضليت يمج هواي.

سيلين : كذب جنت مثل ضلي ليش متعترف..

ادهم : هسه شتريدين..

سيلين : ليش جنت تراقبني وما واجهتني.

ادهم : لان شكيت بيج هسه زين شكيت بيج وكلشي يدل على غدرج اليه الكل يصيح انهزمت وهاي بت امها شتطلع قابل ، الكل حجه بشرفي لحد ما وكعت وما تحملت الصار بوقت ما لكيتج جنت فرحان داخلي يصرخ يريدج وبنفس الوقت جنت اتمنى الزم عليج لزمه حتى ادمرج ، عقلي محضرلج كوارث يدمرج بيها وكلبي اخ كلبي جان واكف ضدي وحاربني بيج ...

سيلين : شلون اخونك كل عقلك انت والله حتى بفكري ماخنتك.

عاط بصوت عالي فززني.

ادهم : شلوووون تريديني ما اشك وانتي فاتحه بيت وطابه طالعه وسياره وفلوس وشغل منو ساعدج راقبت ردت اشوف منو الساعدج منوووو وتالي طلع فهد الكو******..

سيلين : يعني هسه انت رجعت على فهد ..

ادهم : طلعي برررره.

سيلين : بس احاجيك ادهم ..

ادهم : طلعيييييييي بره.

على صوته دخلت امه ضلت تحجي عليه وجرتني طلعتني بره.

فردوس : ادري تريدين تموتيه عوفيه متشوفيه مسوي عمليه يعني صاحي هو وكل يوم مشكله عوفوه معليكم بيه.

سيلين : بس اريد افهمه والله مفتهم غلط..

فردوس : عوفيه بعدين نفهمه هسه جرحه جديد..

فزيت من حماقات الذكريات بصرخه مكتومه من ادهم وهو يضرب بخفه ايده على وجهي ويصيح..

ادهم : سترك ربي حبيبي سيلينتي ولكممممم شبيها راح اتخبل والله..

باوعت عليهم ملتمين داير مدايري شوكت وكعت بالكاع وشنو الصار ماعرف المهم النتيجه اني بحضن ادهم وخايف عليه ضامني بحضنه ، اصواتهم اسمعها واحد يكله لتخاف مابيها شي مادام كعدت والثاني يكول خاف دخلت بصدمه واختي اسمعها تبجي وتتعارك ويه فهد،،

رفعت عيني باوعتلهم واكفين هو وياها كلهم ندم ابتسملي فهد ابتسامه خايفه وهز راسه يعني انتي زينه تعابير وجها كلها تكلي انتي قويه وراح تتجاوزين هذا الشي،،

رجعت التفتت على ادهم الجان خايف عليه ومحاوطني بنضرات عينه الخايفه تتفحصني هذا الرجل اكثر واحد يأثر بيه صوته لمساته هدوئه غضبه عتابه اللي اذاني من رجعت للمشهد الجان يلوم بيه من وراهم سمعته يهمس بأذني..

ادهم : بسم الله ارقيك من كل شيء يؤذيك من شر كل نفس او عين حاسد الله يشفيك بأسم الله ارقيك ...

اسمع امه تكله..

فردوس : ابني لتخاف والله مابيها شي ..

ادهم : عوفونه وطلعوا بلا امر عليكم..

سمعت صوت اقدامهم وهمه ينسحبون من الغرفه انرفعت من الكاع وجسمي توسد القنفه كل شويه يروح مني الوعي وارجع على همساته ...

ادهم : ما اتحمل خسارتج ما اتحمل والله هلمره اموت بيها كومي لخاطري سيلينتي تعبت والله تعبت..

حسيت بدموعه تنزل على وجهي وتتخلل شعري شنو من دموع نزلت بغزاره...

اريد احجي ماكدر اريد اجاوبه ماكدر ماعرف شنو الصار بيه اشرتله بيدي يعني اريد اكتب بالبدايه عكد حاجبه مستغرب بعدين راح جاب ورقه وقلم ، كعدني وكعد بصفي خلاهن بحضني لزمت الدفتر وبعدين اخذت القلم ايدي جانت ترجف كتبت بأسطر مبعثره حروف صاعده ونازله مثل نفسي المضطرب ...

انت تعرف بيهم هيج سوو بيه..

قراها وباوع بعيني هز راسه موافقني..

رجعت كتبت..

لعد ليش حاسبتني وهنت كرامتي واذيتني اذا تعرفهم اذوني..

رفعت عيني باوعتله شلون تعبان عيونه جواها انتفاخ وبيها حمار مثل النزيف الداخلي عباره عن دم متجمد هاي ماجانت بعينه قبل شويه جانت صافيه شلون هيج صارت جاوبني بخوف وقلق...

ادهم : اعتذر انه هم جنت متأذي اعتذر يا حبي اعتذر ...

اخذ اصابع ايدي قبلها بشغف عاشق اصبع اصبع ورجع طبع قبلات على وجناتي مسح دموع بيده واخذني لحضنه اسمعه يقره ايات وصوته يرجف ويدعي تعدي عليه سلامات..

ادهم : بيج حيل تكومين نصعد فوك نامي شويه ارتاحي..

هزيت راسي ب اي..

كومني رجلي ترجف اريد امشي بصعوبه بس مشيت لخاطره لان كلش جان متأذي وخفت عليه...

طلعت للهول شافوني وكفوا على حيلهم رادو يتقربون رفع ايده ادهم منعهم صعدنه على كيف ثنينه تعبانين واحد يسند الثاني وصلنه للغرفه فتح الباب ودخلنه ، مشاني للسرير دنك فتح اللحاف نمت غطاني وقلل الاضاءه نام بصفي توسد عكس ايده ، بحنيه مسدلي شعري غفيت ماريد افكر تعبت ....

ادهم

سألتها وانا مقترب من خصلات شعرها البني
كيف اوقعتني؟
تلك الجميله البائسة
تشع حيوية ومذهلة

كنتُ جالسآ في صباحاتي مع قهوتي والقليل من اشيائي اتأمل بسذاجة وجهها كانت نائمه مغضبه كالاطفال .
عند النظر الى وجهها يتم استحضار الماضي واستذكار طفولتي الهادئة .

تنهدت وقلت بيني وبين نفسي أنني لست بخير بفضلك ياصاحبه الروج البني 🤎

بقلمي عبير ادريس

كعدت الصبح مطيت جسمي هاي شكد صارلي نايمه باوعت لكيت ادهم كاعد على الكرسي المقابيلي ويتأملني شافني فتحت عيني جر نفس وخله كوب القهوه على الطبله واجه يمي سويتله مجال كعد بصفي..

باوعلي ميل راسه عكد حاجبه ضيق عينه حرت على شنو اباوع على ملامحه على ايماءاته كلشي بيه يشرح حبه اليه وحنانه..

همست..

سيلين : شبيها تفاصيلك تريد تبجي هههه.

ادهم : مرات الصمت يكون تعبيره اعمق من الكلام ..

سيلين : اووف دائما صمتك يكون ملهم...

جر نفس قوي وكال...

ادهم : شلونج يالوعتي ...

سيلين : صرت لوعتك هسه.

ادهم : دمرتيني تدرين صارلج كم يوم نايمه.

عكدت حاجبي ابتسمت..

سيلين : يوووم هههه يعني شنو اني عبالي نمت ساعه ..

ادهم : المهم حمدلله على سلامتج موتيني.

سيلين: شكد صارلي نايمه وليش هلكد نمت.

ادهم : صارلج ٣ ايام نايمه وعلى المغذي ..

سيلين :اكيد تدررت على روحي مو هو اني متعلمه كل مره هيج اصير..

حجيتها واختنكت..

تقرب باس راسي وكال.

ادهم : لا ياروحي لا يا احزاني المتجدده لا ياذنوبي واخطائي ...

سيلين : صرت اخطائك وذنبوك ادهم.

ادهم : وتوبتي انتي ..

سيلين : شلعت كلبك وتعبتك ادري...

ادهم : تستاهلين التعب والسهر يا حبي القديم والجديد انتي الفوضى مالتي...

سيلين : فوضى ..

حجيتها مستغربه وضحكت ...

ادهم : انتي المخلوقه من الفوضى انتي اشواقي المحترقه انتي الطيبه البداخلي انتي التنهيده والتفصيله ونكهة حياتي ...

سيلين : وانت صوابي وضياعي انت كل امنياتي حبيبي...

خله ايده على راسي وكال..

ادهم : اعيذك بالله من العالمين اعيذك بالله من كل شر ..
جر حسره واسترسل بكلامه..

ادهم : سيلين لتسوين بيه هيج تعبت صارلي ٣ ايام مكابلج وكاعد مانمت لحظه واختج تخربطت خطيه..

سيلين : ايفين شبيها ؟

ادهم : من شافت حالتج متحملت تعاركت ويه فهد وضلت تصيح انهارت وتالي وكعت وضلينه حايرين بيج وبيها ..

سيلين: ادهم.

ادهم : ها عيني.

سيلين : ماريد اشوفهم بعد تعرف شكد تأذيت بسببهم

شال ايدي وباسها حضنها بأتجاه قلبه وكال.

ادهم : صار بس كومي ..

سيلين : شوكت نسافر.

ادهم : براحتج تريدين اسبوع الجاي اتحرك واكمل كل شغلي...

سيلين : ياريت اريد اعوف كلشي ماريد اضل هنا ماريد اشوفهم ولا اسمع صوتهم.

ادهم : صار بس اكمل اجراءات البيت واحول الفلوس وعندي شغله صغيره اكملها ونروح..

سيلين : شنو بعته البيت البغداد.

ادهم : اي بعته.

سيلين : ليش ؟

ادهم : شلون نعيش هناك غير لازم عندي فلوس حتى ابدي بمشروع صغير وعلى الله التوفيق.

سيلين : خسرت بسببي مو ؟

ادهم : سيلين عوفي كلشي انسي تعبت.

سيلين : ماشي..

ادهم : تاكلين لتكولين لا جوعان لكمه ما ماكل..

سيلين : يله اكل على واهسك

ابتسم كرص خدي وكام طلع من الغرفه..

باوعت الغرفه كلها شمس فاتح البردات والجو حلوو حسيت بأنتعاش ، كمت رحت للحمام وانصدم لابسه حفاظه يعني صح تدررت على نفسي كمت ابجي متت قهر ، ذبيت ملابسي وسبحت اريد المي يزيل همومي ، ماعرف اكرهم احقد عليهم لو شسوي...

كل شويه تجي ابالي سوالف سامر واذيته والرعب العشته وياه لو اهانته اليه ، طلعت من الحمام رجعت لغرفتي لكيت ادهم كاعد منتظرني..

شافني ابتسم..

ادهم : نعيما ..

سيلين : شكرا.

كعدت تريكنه ثنينه ساكتين..

ومرت الايام ضليت بغرفتي لا اطب ولا اطلع على كد الحمام وبس وادهم كابلني وكعد محتاجين هذا القرب بينه والبعد عن الناس بلشنه نحضر كلشي يخص سفرنه وادهم باع البيت وحول الفلوس وحجز وتحدد الموعد ، وبيوم اجاني ادهم كعد كبالي حاير عرفت عنده موضوع.

سيلين : شنو حبي كول .

ادهم : باعي ما اريد اذكرج بأي شي سيء مر بحياتج بس اكو شغله سويتها ولازم تحضرين مره وحده وبس..

سيلين : شنو هي غير اعرف.

ادهم : قبل فتره قدمنه شكوه ضد سامر واريدج تحضرين بس تأكدين كلامنه وهذا هو.

سيلين : قدمتوا منو ومنو ليش.

ادهم : انه وفهد لان هو عنده فديوات سامر دازهن اله وساعدني هواي حركناه حرك يعني لا ضل اله مستقبل هنا ولا سمعه..

سيلين : هسه وينه .

ادهم : اهله ميعرفون بيه وين بس داخل العراق خاتل لابد يظهر بيوم شكد يريد يختل قابل..

سيلين : ماشي شوكت تريدني اروح.

ادهم : باجر اذا تكدرين.

سيلين : تمام..

ادهم : حبيبتي ..

كرص انفي وضل يشاقيني ...

ثاني يوم رحت وحجيت كلشي سجلو افادتي وطلعنه ، ملف سامر وصل للتعليم العالي يعني مستقبله اندمر وهاي اكبر ضربه اله ويعتبر مطلوب لا يكدر يسافر ولا يمارس مهنته..

اجه رمضان وتحشيشات فهد مستمره رغم زعلي منهم بس اضحك من يحجي هواي بادر علمود يصالحني مارضيت ايفين ما الها عين توصل غرفتي ولا هيه تتواجد بالمكان الاتواجد بيه..

تعلمنه نضل لوكت السحور كاعدين نصلي ونقره قران ، عدا غرفتهم الطرب بيها مستمر لا يعرفون رمضان لا صلاه لا اذان ادهم يسمع ويستغفر اخر شي تصدق سد القران وطلع من الغرفه ، غرفتهم كبال غرفتنه دك الباب عليهم بابنه مفتوح واشوفهم ، طلع فهد شايل ابنه شاف ادهم ضحك.

فهد : هااا صار السحور ننزل ناكل انه وابني.

ادهم : هي طايح الحظ متكول ناس تقره قران تصلي صدك تحجي انت شوكت تكبر وتنعدل..

بهاي الاثناء فات ابو الدمام سمعه فهد وكال.

فهد : من رخصتك هسه اجي..

اخذ ابنه ونزل يركض عجبني اشوف شنو يسوون جنت لابسه الجادر طلعت من الغرفه..

سيلين : ادهمي راح انزل اشوف الدمام حباب.

ادهم : نزل الشعار كبلج روحي انتي هم ..

سيلين : الله عليك لتضوج.

ادهم : شفتيه شلون تجاهلني ماعنده احترام لاحد لاجبير يوكف بعينه لا شهر فضيل مسربت طول عمره.

نزلت اضحك وهو ضل يدردم فوك..

طلعت للطرمه لكيت ايفين وايمن وضي كلهم بالباب اني هم مديت راسي اباوع وياهم واشوف فهد شايل ابنه على اكتافه ويردح والولد يدكون ابابنه..

خربت ضحك اكو كم واحد من الجوارين هم طالعين بالباب باوعت عليهم يضحكون ويهزون بيدهم ليش هو معبر احد مهتم ولا يمه..

اخر شي تعب التفت لايمن وكال.

فهد : حاسبهم تعبو.

اخذ ابنه وفات جوه ..

ايمن ضل يدردم.

ايمن : تعال انه شكو ولك فهدد..

التفت عليه وكله.

فهد : حاسبهم لخاطر ابن اخوك..

ايمن : احلف عليك مو صاحي..

سمعه ضحك وفات جوه..

دخلت اضحك صدك غيرت جو التمينه على السفره اليوم السحور على ضي وايفين ويوم عليه وعلى نرمان ..

فرشنه السفره ونقلنه الاكل كعدنه ناكل فهد كل شويه يطلب مني شي ويدري منتحاجه بس يحارشني علمود نتصالح.

فهد : لبن من يمج مرت اخي.

نطيته اللبن ..

وره شويه كال.

فهد : خبز فدوه.

نطيته خبز ..

اخر شي كال.

فهد: نبيذ

من كال هيج غصينه من الضحك ابوه رزله..

يوسف : ابن القندره كاعد تتسحر لو تسكر انعل ابوك لابو تربيتك..

فهد : لعد ذاك شنو شكله يشبه النبيذ..

نرمان : هههه ولك هذا عصير عنب.

فهد : ففتي هاي انتي مسويته مو عصير اسلامي والله وعاشت ايدج بله صبيلي اضوك .

يوسف : سد حلكك كافي احترم النعمه ..

هو بس يضحك مغلس عليهم وياكل..

ادهم : ليش هو يصوم بس هيج يكعد ياكل ويضل يصنف..

فهد : ففتي صبي صبي عطشت..

صبتله اخذه والتفت لابوه..

فهد : بصحتك حجي يوسف..

شال الخاشوكه ركعه بيها...

كام من السفره وصعد فوك يركض.

يوسف : انعل ابوك لابو تربيتك بعد ممنوع هذا يكعد ويايه على سفره وحده لو تصبولي وحدي..

نرمان : صار بابا بس لتضوج..

كام من السفره يدردم ...

وهيج مشت الايام واجه العيد الصبح كلنا انجمعنه بالهول نزلت عايدتهم وفهد وايفين هم وكفولنه بعد مكدرت اتجاهلهم سلمت عليه ايفين وحضنتني ضلت تبجي وتتوسل بيه اسامحها.

سيلين : كافي انسي..

ايفين : عليج الله كلبج نظف عليه.

هزيت راسي ساكته فهد نط من يمه.

فهد : هسه فره فرتين بالغساله ينظف ويرجع توب..

ضحكت وكتله.

سيلين : كل عام وانت بألف خير.

فهد : وانتي بألف خير يووووم اوديج لمكه..

سيلين : شجلبت اذا زياره مكه وياك ماريدها استغفر الله كوه تحجيني..

فهد : كيفج يابه عبالي اخذج وياي.

ادهم : انت بس جفيها شرك هيه بخير.

فهد : كل عام وانت بخير ابو مرايم..

مد ايده صافحه وتحاضنوا..

وهيج صار الصلح بيني وبينهم...

اجوي اقاربهم عايدناهم وشي على شي حلوه اجواء العيد جانت واول مره اعيشها بهيج لمه...ثاني يوم العيد رحنه زرنه عمه ياسه هواي بجينه قرينه يمها قران وهديناه لروحهة وطلعنه...

اجه موعد السفر وحزمنه الامتعه ونزلنه بعد ساعتين ونطلع..

ادهم وايمن كدامي نزلوا الجنط ومريم واني نزلنه الشغلات الخفيفه..

سمعت صوتهم يتناكرون من الصبح ضحكت ...

فهد : لج ففه تتذكرين من انتحرتي ونقذتج والله جانت ايام..

حجاها ويضحك..

ايفين : يااااناس ياعالم ياساعه السوده القررت بيها انتحر دكافي جوز مني مو موتتني كل يوم عايدها كل يوم بزعتني ..

فهد : ولج ففه بيدي هاي شلتج وركضت بيج هيج تبيعين بسرعه ياناكره المعروف يا ففه..

ايفين : عمه عمه تعااااي اخذي ابنج راح يجلطني بالنبي..

فردوس : ههههه خبال لخبلكم ان شاءالله..

كعدنه وهمه هم اجوي كعدو..

فهد : هاا وين ..

ادهم : ضايج كلت افتر وارجع..

فهد : انت وهاي الجنط تفتر..

ادهم : يعني تعرف اليوم اسافر شكو تسأل.

فهد : صاير حشاش ماعرفتك

ادهم : اي شفت..

فهد : تروح ومترجع ..

ادهم : اي والله كون ما ارجع بعد.

فهد : انه وففتي هم راح نسافر وعليوي ويانه شتكول بابه علي..

يوسف : زين تذكرت عندك ابن بطولك كلت من راح تشوفه تعقل تثكل تستحي منه ..

فهد : ادري شمسوي واخجل قابل نازع الشورت وكاعد بنصكم....

يوسف : سخيف..

فهد : راح اخلصك مني وتضل وحدك هنا انت وقنواتك  كابلهن واكعد هو انت شخبلك عليه غير هاي القنوات..

يوسف : هو انت خال على حالي حال كل يوم كاطع الفيشه مال ستلايت .

ادهم : لا حجي يحول القمر لا عبالك ..

يوسف : لا يانذل وانه اكول ما يطلع يمي شي.

فهد : هيه مرتين بالاسبوع شصار عليك..

يوسف : معليك مني بعد تشتري وحدك جهاز وصحن خلصني منك ..

فهد : اكله راح اسافر يكلي اشتري عليمن اصرف متكلي.

التفت على مريم واشرلها.

فهد : تعاي مرايم راح اشتاقلج واشتاق تغسليني بالبلي..

مريم : نفتح كام واشوفك..

كعدها بحضنه باسها وحضنته ، هم اخذت فتره زعلت منه وبعدين صالحها.

ادهم : وين راح تروح شو مكلت..

وخر مريم وكعد عدل تغيرت ملامحه لجديه.

فهد : راح نسافر ويه ايمون هناك اتعالج افضل هنا بس مضيعه وكت كلشي ما استفاديت.

ادهم : من شنو تتعالج بالضبط غير تفهمني صار كم مره سألتك.

فهد : اريد اخلص من العلاج الاخذته وهم اكو شغلات حافره اثر بداخلي ساعه الساعه تهيج وتحركني حرك ، اتعالج وهم اونسهم ..

ادهم : اخذت اجازه لو شنو.

فهد : اي اخذت اجازه مرضيه وقدمت اوراقي .

ادهم : علاوي عمو انت هم تروح ويه ابوك.

علي: اي عمو شلون اعوفه وحده.

ادهم : بطل عفيه عليك..

ضلو يسولفون واني رحت يم البنات بالمطبخ جانوا كلش ضايجين علينه اخر فتره قوت علاقتنه وكعداتنه سويه خصوصا من يطلعون الولد واجواء رمضان هواي قربتنه ...

سمعنه صوت فهد يصيح.

فهد : يووم يمه..

امه جاوبته ..

فردوس : هااا

فهد : لا مو عليج.

فردوس: عليمن.

فهد : ففتي..

كامت تصيح عليه.

فردوس: تعال يوسف اسمع ففه صارت امه تالي وكت هو انه شقبضت منك وففتك صارت امك..

ضحك وباسها براسها.

فهد : انتي امي الكبيره وهيه امي الصغيره هههه.

هزت ايدها معاجبها عافته وراحت..

مشى الوقت بسرعه وصار موعد روحتنه وهاهيه راح نودعهم ونودع بغداد ونسافر لدوله جديده ومكان جديد وحياه جديده وناس جدد..

وكفنه بالطرمه ادهم وكف كبال ابوه وامه وحجه وياهم بكلمات هزتنه هز كلنا بجينه وهو هم بجه عبر عن تعبه واذيته والمر بيه بهاي الجمل الحجاها..

ادهم : كل مره اسافر وانتو ماراضين عليه وبالسفرتين ما توفقت وخسرت كلشي تزوجت مرتين من دون رضاتكم وبالمرتين هوواي خسرت اول مره زوجتي ام بنتي راحت ولسه كلبي ينزف دم عليها والمره الثانيه تزوجت سيلين وشفتو بعينكم شصار بينه وشكد تأذيت وهنا عرفت غلطتي شكد ما انه زين وماشي عدل وراضي ربي بس تجاهلت رضاكم عني بهاي المسئله وبالتالي خسرت جان المفروض اجاهد حتى ترضون عليه ، بس مادام انه بشر معناها خطاء وخطأت واخذت الدرس وتعلمت..

ابوه حضنه ويبجي وامه تبجي جانت طلعتنه من بيتهم دماااار ..

طلعنه وسدينه الباب ورانه مودعين كل ألم وذكرى مؤلمه عشناها هنا واكيد ما انسه لحضات الفرح والضحكات القليله العشتها وياهم..

وصلونه للمطار ايمن وفهد تحاضنوا ويه ادهم والبجي البجوه عبر عن سنين الألم العاشوها وعن الحروب الصارت بينهم حرب العمالقة هواي كلفتنه صحتنه وحالنه ومالنه وحتى سمعتنه لولا لطف الله علينه ...

راحوا يلوحون النه بيدهم واحنه ويه كل حركه ايد منهم دمعه مذروفه بقهر منه..

كاعدين على كراسي الانتضار و اعلنوا عن قرب موعد رحلتنه مشينه ايد بأيد اني من جهة ومرايم لازمه ابوها من الجهة الثانيه صعدنه بالطياره اني يم الشباك وادهم بصفي ومرايم من الطرف الثاني..

ادهم : بناتي خايفين.

سيلين : لا هههه.

مريم: شويه هههه.

مد ايده حضنه مهدأنه...

مر الوقت بين سالوفه وغفوه وصلنه بس كلش تعبنه وقت طويل...

نزلنه بهذا البلد الغريب مشيت واحسب شكد نهدر من عمرنه بين اللوعه والفركه ورغم هذا حمدت ربي على وجوده بجانبي رغم الألم...

صعدنه سياره وتوجهنا لشقتنه لمكانه الجديد وصلنه تقريبا ٣ الظهر صفت السياره كبال عماره كلش حلوة ومبينه راقيه نزلوا الجنط واني ومريم مشينه كدامهم صعدنه بالمصعد وصعد ادهم صعدوا الجنط تشكر من السايق وحجه وياه بلغته حاسبه وراح..

وكفتي صارت كبال ادهم يعني ظهري عليه ومريم بصفي المرايا كدامي واشوفه مغمض عينه ويشتم بريحتي ضحكت والتفتت عليه.

سيلين : ها ادهمي شلونه الوضع يمك..

فتح عينه ابتسم وكال.

ادهم : مربك..

ضحكت وكف المصعد جانت شقتنه طابق ثالث انفتح الباب وطلعنه جرينه الجنط وصلنه كبال باب الشقه..

تقرب ادهم وهمس بأذني..

ادهم : الله يعلم شلون سديته هذا الباب اخر مره وبشنو جنت احس مامصدك اجيبج ونفتحه سويه..

دمعت عينه وكتله.

سيلين : اريدك تحجيلي كلشي..

ادهم : صار ارتاحي اول ، هاج هذا المفتاح افتحي الباب انتي ..

ابتسمت واخذته منه فتحت الباب ودخلنه البيت يخبل ابد مامبينه شقه ضحكت من تذكرت شقتي بغداد هاي وين ذيج وين هههه تجولت بيهة بفرح ، جانت عباره عن صاله كبيره كلش ومطبخ واسع غرف نوم ٣ ثنين منام وحده مال ضيوف حسب ما ادهم وضحلي.

بيها حمامات ثنين وبالكون يطل على منظر يجنن..

سيلين : ادهمي هذا المكان ونسه بحد ذاته..

ادهم : تصدكين ماكاعد ولا شايفه ملتهي ..

سيلين : ويايه راح نكعد هواي هنا ..

ادهم : كلشي وياج اله طعم ثاني حتى وان كان محلو وبارد.

سيلين : حياتي..

حضنته وبسته..

ادهم : حبيبي منا وجاي لازم ناخذ احتياطنه وندير بالنه على تصرفاتنه لان مرايم ويانه ماريد ينخدش احساسها ولا تتأثر ..

سيلين : صار حقك حبيبي..

ادهم : بغرفتنه كلشي يعجبج سوي بس بره لا راح نتقيد شويه..

سيلين : مومهم حبيبي مومهم المهم اني يمك وانجمعت بيك ..

قطع كلامنه صوت الجرس ..

ادهم : ذوله ضيغم وملاك .

سيلين: افتحلهم عيب ..

ادهم: اي رايح..

راح فتح الباب وفعلا همه دخلو يضحكون رحبو بينه بفرحه وكأنما شايفين اهلهم بينه..

سيلين : شلونج ملوكه واخيرا انجمعنه ههه.

حضنتني وضحكت.

ملاك : واخيرا حياتي شفتج هههههه حمدلله على سلامتكم..

سيلين : الله يسلمج..

ضيغم: وانه ماكو سلام اليه.

سيلين : هههه شلونك ضيغم ان شاءالله بخير.

ضيغم : بخير مادام شفتكم بشريني شلونج خوما تعبج السفر..

سيلين : لا هونها عليه ادهمي مثل ماهون عليه الحياه..

ضرب ادهم على كتفه وكال.

ضيغم : هذا العلم منو يلجئ اله ويطلع خايب..

ادهم : تسلم عضيدي انت..

ضيغم : حبيبي والله ، يله عيني الغده جاهز تفضلوا يمنه.

ادهم : كلفت روحك والله..

ضيغم : هاي شنو يابه تكلفه شنو عود رجعها من ترتاح.

ادهم : اكيد وتضوك اكل سيلينه هو غير يجنن.

ضيغم : اويلي ههههه امشي عيني تغده وبعدين ضوكني..

ضحكنه ورحنه لشقتهم بعدنه بملابسنه حتى تغسيل غسلنه يمهم..

كعدنه على السفره وضيغم كال.

ضيغم : ياهله وميه هله بالجاي والمتعني من بغداد..

ادهم : هله بيك ابو الضياغم.

ظلينا نسولف وبنفس الوقت ناكل جانوا فرحانين بينه كلش...

كملنه اكل رفعنه السفره وساعدنه ملاك اني ومريم ردت اساعدها اغسل المواعين مقبلت واصرت اروح يم ادهم ، رحت كعدت وره شويه ادهم كال.

ادهم : سيلي متسويلنه جاي راسي صدع وخوفي تلزمني الشقيقه وبلكت بندول وياج..

سيلين : هسه اسوي واسأل ملاك.

كمت دخلت للمطبخ ورجعت طلعت خجلانه وصلت يم ادهم شافني وكال.

ادهم : هاا شو حمره شبيج

سيلين : شكد عيب والله فتت لكيت ضيغم حاضن ملاك وهيه تغسل مواعين يعني شنو دزيتني.

ادهم : ههههههه يله عادي خرب بغيرتك والله لو تشوفيه شسوه بيه من جيت لهنا ..

سيلين : عود احجيلي اني ملاك سولفتلي بس هيج على السريع لان نفسيتي جانت مجعوصه بالي مو وياها وتحس عليه ما اتجاوب لهذا جانت تسكت ..

ادهم : خطيه والله ملاك..

سيلين: الله يعينهم كلهم تعبوا..

ادهم : فعلا...

وره شويه اجه ضيغم شايل صينيه بيده مال جاي قدملنه واخذ كوب وكعد..

ضيلنه نسولف شويه وتشكرنه منهم ودعناهم ورجعنه لشقتنه ...

نمنه نوووومه عميقه جدا ثاني يوم يله كعدنه ، مر الاسبوع بين ترتيب الاغراض وبين نزلتنه نتسوك الجو حلو والبلد احلى ، اجواء تجنن يمكن لان اول مره اسافر شفت كلشي حلو وغريب ادهم عادي عبالك طالع بمنطقتنه..

سيلين : ادهمي شوف..

التفت عليه وكال.

ادهم : شنو حبيبي..

سيلين : شوف المناظر تجنن ..

ادهم : سبحان الخالق بس انه شبعان منهن ههههه.

سيلين : نيالك..

ادهم : هسه يله شفت كلشي حلو ، جان باهت وكئيت وكل هاي المناظر جانت رماديه بعيني قبل لا تجين..

سيلين : فدوه لكلبك ...

رحت حضنت ايده ومشينه تسوكنه كم شغله ورجعنه للشقه رحت كبل للمطبخ رتبت الاغراض وهو يمي يساعدني وكل شويه حضنه وبوسه..وعينه على الباب خاف تجي مريم..

سيلين : هو منو الميصبر اني لو انت مو عندك غرفه ههه

ادهم : نسيت اذا انتي كبالي يبقه عقل براسي يبقه وعد..

سيلين : ههههه حياتي..

ادهم : سيلي

سيلين : نعم..

ادهم : باجر اعزم ضيغم وملاك على عشا شتكولين.

سيلين : براحتك .

ادهم: اريد احجي وياه علمود نرجع نفتح المشروع..

سيلين : ياالله ان شاءالله خير..

ادهم: اسمنه نعرف هنا وماريد اضيع الفرصه.

سيلين : الله يعوض خسارتك..

ادهم : ماكو خساره مادام نشم الهوه الحمدلله.

سيلين : الحمدلله.

ثاني يوم حضرنه اني وياه الاكل وسوينه عشا معتبر اجتي ملاك قبل بوقت وساعدتني حضرت زلاطه وهيج شغلات ادهم راح يم ضيغم واحنه ضلينه بالمطبخ كملنه العشا تعشينه وطلعوا الولد بالبالكون رغم بارده بس الضاهر همه متعلمين على هيج جو ، سويت جاي وملاك اصرت هيه تغسل المواعين مخلتني ، اخذت الجاي ورحت اوديه الهم استوقفني حديثهم وجبرني اوكف استمع..

ضيغم : ليش يعني مو صارت زينه وكلشي مابيها تضحك وعال العال.

جر نفس ادهم بحيث وصلتني حسرته..

ادهم : ضيغم سيلين اعصابها تعبانه والضاهر علاجها مطول هنا وهيه تريد طفل دتلح عليه وانه ماكدر اكللها وراج علاج بلقليل ست اشهر ولو ترجع لو مترجع.

ضيغم : كول ياالله شبيها يمعود والله مابيها شي انت توهس.

ادهم : ما اوهس اعصابها تعبانه متابعها واعرف.

ضيغم : شلون عرفت غير افهم.

ادهم : يعني ابسط شي متكدر تشتغل فتره طويله يعني ساعه مثلا متتحمل تكعد اذا نطلع نمشي الهورن يفززها من جنه بغداد اصوات البائعين ينرفزها ، بليل حركتي بالفراش اذا انكلبت تفز ، عدا الكوابيس التحلم بيها من غير تكعد مرات تبجي وحدها ومن اجي تضحك ولا كأنما شي صاير بس اعرفها تكتم تكتم في سبيل متحسسني بشي ولا اضوج ولا اقلق ..

جر نفس وسمعت صوت الجداحه ...

ضيغم : رجعنه للتدخين هو شدمرك غير الجكاير ..

ادهم : ماكدر تركتها ورجعتلها تعويد بعد..

ضيغم : تهون تهون انت راح تعالجها مو ..

ادهم : لا اعرضها على طبيب مختص هنا..

ضيغم : شعجب مو انت

ادهم : حالتها المرضيه تجاوزت كفائتي يرادلها مراقبه وتحاليل وتنظيم علاج خصوصا هيه تريد طفل وماريد اكسر بيها اكثر ضيغم كاعد اموت عليها من اشوفهة شلون تتمنى وتدعي بطفل وتنقهر من تسمع رفضي للموضوع.

ضيغم : الله كريم ياخويه مكتوب عليك الضيم انت.

ادهم : الحمدلله على كل حال.

ضيغم : الحمدلله..

سمعت صوت ملاك ورايه خلاني التفت عليها عيوني مليانه دموع..

ملاك : ها وينهم.

سيلين : هاا هنا هنا

تقربت عاكده حاجبها اخذت مني الصينيه وكالت.

ملاك : شبيج صاير شي.

سيلين : لا بس اخذيلهم الجاي جدديه لان برد واني راح اغسل وجهي واجي.

ملاك : متأكده مبيج شي.

سيلين : اي ليضل بالج..

عفتها ورحت للحمام اتنفس سريع اريد اهدأ اريد اسيطر على اعصابي ، شلون يعرف بيه ابجي بدون ميدري شلون يدري بيه الاصوات تأذيني بحيث مرات اريد افقد الوعي من كثر الاذيه الاني بيه..

مبجيت لان اعرف حالتي ومن سمعت متفاجأت بس القهرني شغله الاطفال هزتني يعني شكد انتظر بعد وشوكت اخلص من العلاجات شوكت اصير ام وافرح وافرح ادهم لا اني صغيره ولا هو صغير يعني يادوب نسوي طفل..

غسلت وجهي باوعت بالمرايا اخذت نفس عميق ابتسمت ويااصعبها من ابتسامه تكون طالعه من وره القلب..

طلعت ورحت يمهم جانوا كاعدين بالهول شافوني ابتسموا كعدت يمهم همه يسولفون واني اهز براسي متفهمه واني بالي مو يمهم اصلا..

طلعوا لملمت الشقه ودخلت للغرفه غيرت ملابسي وخليت مكياج وتعطرت اجه ادهم تغزل مثل كل يوم بس حسيته يداري مشاعري وخايف من شنو ماعرف المهم جان ممرتاح ...

ثاني يوم رحت لملاك الصبح بعد ما طلع ادهم كعدنه نسولف ومن ضمن الكلام سألتها ..

سيلين : ملاك شنو خسر ادهم هنا..

جرت نفس بقوه وسوت حركه بحلكها متأسفه.

ملاك : اوووف سيلين لتذكريني.

سيلين : الله عليج كليلي لان كم مره سألته مقبل يحجي.

ملاك : واذا هو مقبل اجي اني احجي.

سيلين : حبابه لخاطري..

اصريت عليها هواي يله قبلت تحجيلي.

ملاك : باعي اول شي خسر وظيفته هنا محد يحصلها بسهوله يعني شي توب شغله الثانيه مشروعهم بكذا مليون يعني يجيب بيت جبير بالعراق ومنطقه راقيه ، هواي خسر خطيه الله يعوضه خير.

مكدرت احجي بعد اختنكت ردت الوكت يخلص تسولف ملاك بالي مو يمها استأذنت منها ورجعت للشقه ضلت مريم يمها الظهر اجه ادهم من الباب صاح.

ادهم : الحب وينه اليوم متلكاني وينها حياتي ..

جاوبته بصوت مخنوك.

سيلين : هنااا تعال حبي.

اجه شاف عيوني حمر تخبل جانت علاكه بيده شمرها بالكاع واجه كعد كبالي..

ادهم : شكو منو وياج.

سيلين : اريد تحجيلي كلشي ليش ضام عليه خساراتك.

ادهم : وحجيت شنو راح يتغير غير تضوجين وتأذين نفسج

سيلين : اريد اسمع كلشي ..

ادهم : يعني مصره.

سيلين : اي ..

ادهم : كومي بدلي اخذج نتغده بمكان حلو على البحر صح بارده بس راح يعجبج.

سيلين : اذا سمج اجي.

ادهم : هههههه اي سمج تدللي ..

بدلت ولبسنه نفس الالوان بني وبيجي بلوزات لوون بيج وكوت لونه بني ...

وطلعنه مرينه على مريم كالت ما اجي بارده رحنه وحدنه اخذنه تكسي للمكان الكال عليه ادهم ..

نزلنه وكعدنه المكان يجنن يفتح النفس طلبنه سمج اكلنه بهدوء ثنينه ساكتين...

كملنه وشربنه جاي وبعدها كمنه نفتر نمشي بعدين كعدنه بمكان قريب البحر بس شنو من برد يكص كص...

ادهم : هسه تتمرضين انتي وين متعوده على هيج جو..

سيلين : خليني ادهمي اريد اتنفس هوه نظيف ..

كمت اخذ نفس بقوه وازفره التفتت عليه لكيته يضحك

سيلين : ها ادهمي تضحك ؟

ادهم : والله عبالك طفله ياعمري ..

سيلين : ههههه يله احجيلي..

ادهم : منين ابديلج..

سيلين : ابديلي من اول ما سمعت..

ادهم : ماريد اتذكر والله ..

سيلين : لخاطري حتى اني هم احجيلك..

ادهم : ميحتاج تحجين شفتج وسمعتج هم.

سيلين: صدك والله..

ادهم : اي والله.

سيلين : شلون ؟

ادهم : كلشي صار وياج بالشقه جانت فتره علاجيه الج ..

سيلين : شلون يعني مفهمت.

ادهم : مثلا ام عبد

سيلين : شبيها ..

عكدت حاجبي مستغربه .

ادهم : عن طريقي اجتج

سيلين : جذبب لا مستحيل يعني ام عبد تعرف بيك انت زوجي ومكالت وخلتني احجي هلكد.

ادهم : هههه لا يا حبي انه دزيت عبد الله ابنها وطلبت منه يبلغ امه حتى تجي وتسمعلج.

سيلين : ليش هيج سويت

ادهم : لان عرفت دكتورج الرحتيله ماراح يعالجج مثلي لان بالمختصر محد يعرفج بكدي.

سيلين : مممممم وانت جنت تدز رحله علاج سيئه سيلي..

ادهم : اي انه جنت ادز لان كلبي محروك منج ..

سيلين : اي احجيلي بعد..

ادهم : شحجيلج مضيكات خلكي الليالي بليل افز مرعوب وابجي على حالي هههههه.

سيلين : احجي مو تغني ههههه.

ادهم : سمعي يابه احجيلج بالمختصر ، من سمعت هنا انهاريت حيلي راح شي شبهته بالموت نفسي صار ثكيل عليه ملابسي احسهن جبل مو قماش ، صفيت كلشي هنا عملي وظيفتي كلشي تعبت لاجله تبخر وراح ،،

بعدها رجعت لبغداد ادور عليج مثل المخبل مالكيت اثرج بس الدمرني من سمعت انتي جايه تسألين عليه راجع لو لا

، رجعت لبيت اهلي وانصدم هناك محادثات ويه سامر النذل وتتوسلين بيه علمود يخلصج مني لان ماكادره تتقبليني اكثر وقبلتي بيه علمود تهدميني وتسويلي درس انه هذا الكلام سامعه قبل لهذا انهارت قواي كلها ماحسيت اله وانه بالمستشفى ويمي اجهزه تك تك تك ترجمت دكات كلبي واضطراباته المهم ،

عشت ايام ما اتمناها لعدوي كلها بكفه وحركه كلبي عليج بكفه واسألتي المتكرره وينها شصار بيها شلون عاشت منو يصرف عليها خاف تمرضت خاف ماتت ايست منج مثل ما ايست صحتي ترجعلي ...

التفت عليه شافني ابجي مد ايده مسح دموعي تنهد وكمل..

ادهم : صرت زين تجاوزت محنتي وبيوم مأيس جنت الكاج كلت هاهيه ضاعت اجاني اتصال زوجتك رجعت للدوام شنو شعوري سيلين ،

عبالك اول مره التقي بالاحبها رغم جنت ضايج منج بس دخلت لغرفتي تهندمت برغبه مو مثل كل يوم شلون مجان لا اختاريت ملابس تليق بهذا اللقاء طلعت من الغرفه صعدت سيارتي واني بين الحلم والحقيقه معقوله ادهم راح تلتقي بيها معقوله لكيتها عبالك مو تسع اشهر فقدتج لا دهر ،

كل شويه ارتبك وارجع اهدد نفسي ادهم اثبت ادهم قوي نفسك ادهم كذا ادهم كذا الى ان وصلتلج انه شفتج سيلين اختل توازني اختفت رزانتي ذاك الدكتور الجان يدخل هنا بهدوئه وترتيبه دخل انسان ضايع فاقد كلشي ويتفاجئ حبيبته عايشه حياتها وتسولف اعتيادي وهو جان متخيلها ماتت او يمكن ارتدت السواد بسبب فراقه ....

القرب الجان بيني وبينج عشر امتار بس تلتفتين تشوفيني ..

سيلين : اويلي يابه وشكد دورت عليك وعلى ريحتك بكل مكان بالجامعه كل يوم اتخيل الكاك بمكانه القديم

ادهم : جنت اشوفج كاعده ومن تكومين ترجعين للبيت انه اكعد بمكانج بس الشك اكلني ، المهم اتفقت ويه عبد الله ينطيني نسخه من المفتاح وجنت افوت براحتي اشمشم ملابسج انام بفراشج ، واحترك كل يوم عليج ..

سيلين : اويلي ادهم..

ادهم : وجنت اعرف وقت رجوعج واطلع قبل لا تجين ، مره دخلت لكيت قائمه مال مسواك رحت تسوكتلج وخليتها بالباب انتضرتج تجين شفتيهن وضليتي تفرين براسج وينه منو جابهن ورحتي لبيت ابو عبد تسألين.

سيلين : هههههه بيومها تخبلت فعلا هههه.

ادهم : شديت كامرات مو قصد شاك بيج وانما جنت اريد اشوفج اكثر شي هههه وهم اراقب وضعج لان ماجان يعجبني..

سيلين : يعني انت جنت تشك بيه لو لا فهمني .

ادهم : مامرتاح يعني كلبي يلعب من جهة مامصدك انتي تسويها وجهه ثانيه انتي ماعندج جرأه تأجرين وتلكين شغل وترجعين للدوام جنتي بكلشي معتمده عليه واضافه لهذا عفتج مريضه يعني شلون دبرتيها وحدج الى ان سمعت سيارتج انضربت ورحتي سحبتي فلوس ضحكت كلت راحت فلوسك ادهم هههه عرفت اول شي منين اجتج الفلوس بس جنت اريد اعرف منو ساعدج كلت بس اعرفه خلص راح نتعاتب ونرجع والصراحه جنت شاك بفهد بس ما متأكد والدليل انه لكيتج ومابلغته ...

سيلين : زين ليش وقفت الحساب مال بنك وبنفس اليوم اجيت للكليه القيت محاضره.

ادهم : هاا مو اجيت اسأل عليج بالشغل الجديد ردت اعرف منو متوسطلج كالو ولد اسمه محمد منو محمد اقارب نسرين جنت اعرفها وابد ماحبيتها.

سيلين : لحظه لحظه نسرين شعرفك بيها

ادهم : ليش منو بطلج من شغلج الاول غيري.

سيلين : لا والله شلون ههه.

ادهم : ماعجبني تشتغلين هناك ورحت طلبت منه يبطلج كتله اختي وماريدها تشتغل هنا واعزها وتزعل عليه اذا لحيت عليها وهم مريضه تتعب بسرعه خاف توكع عليكم وتتورطون بيها ثاني يوم بطلج.

سيلين : ههههه يااا واني شكد ضجت منه واحترك دمي اي كمل من اجيت للشغل الجديد جنت ناوي تبطلني هم.

ادهم : كتلج ناوي اعرف منو محمد وانصدم انتي كاعده ويه هذا الولد الكتلج عليه.

سيلين : اي صح.

ادهم : اي بعدها دخلت للمدير وكتله هاي زوجتي واريد ابطلها منا بس ماريد تذكر اسمي عرفني دكتور ورحب بيه وتدلل وتأمر من هالحجي اول شي زيد اوقات العمل عليج بعدين اخر الرواتب ، و جنت سامع انتي مقدمه معامله تفريق تخبلت منج رحت وقفت الحساب وجيتج للجامعه احرك دمج وارجع واجيت حركت روحي قبل لا احركج و قبلها بيوم اجيتج حضنت وبوست وحرت شسويت.

سيلين : هههههه خبيث جنت احس عليك بس بدلت علاجي وخليتني انام.

ادهم: باعي بالنسبه للعلاج انه صح بدلته بس مو مقويات علاج نفسي جبته الج منا من دخلت للشقه لكيتج تشربين نوعيه مقويات واصلا مابيها فائده الج بالنسبه لحالتج يعني.

سيلين : زين

ادهم : بدلته الج جان يشبه علاجج بالشكل...

سيلين : صح لهذا منتبهت .

ادهم : وعرفت الصيدليه التترددين عليها رحت حجيت ويه الولد وكتله هاي زوجتي خاف تجي تطلب علاج ممنوع تنطيها غير هذا الراح اكتبه الك ومن يومها اني وياه على اتصال.

سيلين : هههههه اي كمل كمل.

ادهم : اي هاهيه بعد شتريدين تسمعين.

سيلين : بيوم دخلت جنت بين النايمه والكاعده وكتلي اعرف بيج مسلوبه الاراده بس حضنيني تعبان تتذكر..

ادهم : اتذكر بيومها جنتي مدري شبيج استغربت تصرفاتج انتضرتج تنامين ودخلت لكيتج لا ايد ولا رجل تخبلت كلت بسببك ادهم هيج صار بيها ضليت اكل بروحي.

سيلين : ليش انت شعليك.

ادهم : مو العلاج البدلته الج قوي وبيه نسبه منوم عاليه لهذا خفت عليج .

سيلين: مره كتلي عذريني سويت شغله اذيتج بيها بس ماعندي حل اجيج اله بهاي الطريقه شنو الشغله ضلت تدك بكلبي.

ادهم : مره خليت منوم بالمي ههههه ومره رشيت على وجهج بس جنتي بسرعه تخدرين وتنامين هههه.

سيلين : واني عبالي هيج صار بيه بسبب التخاطر العلمني عليه فهد الخبل.

ادهم : حجالي النذل جان يريد يفوتلج بيومها ويكول انت منعتني من فتت ، انه شفتج مسطوره كلت هاي شبيها تخبلت عليج بيومها.

سيلين : بعد شغله اريد اسألك عليها.

ادهم : شنو كولي

سيلين : جنت تتعده حدودك ويايه احجي الصدك.

ادهم: سيلين سكتي.

سيلين : الله عليك احجي .

ادهم : معليج سكتي.

سيلين : والله ازعل اذا متحجي لان جنت اصلي بدون ما اسبح .

ادهم : لا مو لهدرجه يعني بس جنت اتوكح وياج هههههه ابدلج الصبح واطلع..

سيلين : ياااا صدك تحجي خرب..

ادهم : شفت شفت بس ميخالف...

كام يضحك ضربته على ايده حيل.

ادهم : المهم انه جنت محاوطج وخايف عليج مرات اريد اختبر عقلج بمكانه لا هههه كمت اكتبلج عبارات مره كتبت على الباب كتلج الساعه ١٢ اله دقيقه وانتي تخبلني.

سيلين : بيومها عبالي تهددني والله

ادهم : هيه هم هيج جانت النيه يعني هههه.

سيلين : اي وبعد

ادهم : مره مشيت وراج صفيتي ونزلتي للمطعم دخلت وراج جنت كاعد وانتي تدورين ههههه كتبتلج على اصابع قدمج تتذكرين.

سيلين : اتذكر واني شكد دورت مشفتك تخبلت كلت جني شنو.

ادهم : جانو ناس بيناتنه لهذا مشفتيني.

سيلين : همممم .

ادهم : المهم بهاي الفتره جنت اريد اعرف منو الكاعد يساعدج منو محمد منو دبرلج شغل منو موصي عليج بالسكن ليش محد يقبل ينطي الاسم هواي شغلات ابالي ماردت اتسرع واخسرج وماردت ارجعج وأأذيج لهذا طولت خلك ردت اثبت لاهلي برائتج اكلو وجهي وبنفس الوقت جنت اعالجج بدون متدرين.

سيلين : متأكد ام عبد متدري بيك شو مداصدك.

ادهم : والله متدري.

سيلين : زين سالفه اني بالجنوب مو بغداد ويامن جنت تحجي وليش هيج كلت.

ادهم : شغل والدي عنده بغداد فتح فرع وجنت اروح وياهم اتصل بيه العامل بنكلادش الجنسيه انكليزيته اقوه من العربي لهذا حجيت وياه كتله انه ماموجود حتى ليدزون عليه .

سيلين : بس ايفين هم كالت انت مو بغداد.

ادهم : هو الهم هم بلغتهم كتلج جنت شاك بفهد وردت الزمه بس جان ذكي ماكدرتله..

سيلين : ادهمي.

ادهم : ها

سيلين : شوف ذوله شلون حلوين مبين يحبون بعض.

ادهم : لا هاي رغبه وبس

سيلين : ليش شلون عرفت.

ادهم : اقري عيونهم مابيها لهفه مابيها حنيه فقط اعجاب .

سيلين : ممممم انت اعرف هههه

ضلينه نمشي ونفسر حركات الناس ونضحك كل شويه يصير ويانه موقف..

ثاني يوم عزمني على عشا بره تعيشنه ورجعنه للبيت ، بعدها ب ٣ ايام صادف عيد ميلاده واتفقت ويه ملاك وضيغم يجيبولي شغلات مال عيد ميلاد لان ما اندل وحدي وفعلا ما قصروا ويايه ،

حضرت الشقه ورتبتها اني ومريم مليناها نفاخ وطلبنه من ضيغم يأخر ادهم ، من كملنه اتصلت على ملاك كتلها كملت وهيه بلغت زوجها ، جنت لابسه فستان ابيض قصير ومكياج بسيط وشعري رفعته ، وكتبت على كارتات صغار كد كف اليد صفاته المشتقه من اسمه وعلكتهن على الحايط صار كلش حلوو.....

ادهمي الاسمر

اسمك من اسم الاسود
والليل الشديد
ابو الكرم الحنين
صاحب الشخصيه المتميزه
قيادي محب للخير
كثير السفر
انسان قوي لا ييأس ولايستسلم
انسان محب للنجاح يسعى دوما للوصول الى اعلى المراتب
انسان قادر على موجهة الظلم متمسك بأرائه الصائبه شخص يتسم بالتسامح والصدق وصريح لابعد الحدود

انسان يحب ان يرى كل الناس سعداء ويسعى لاسعادهم ،
حبيبي وسيم ويهتم بممارسه التمارين الرياضيه

ذكي متميز صاحب شخصيه قويه ذو اخلاق طيبه ومتواضع
حبيبي يحب الخيال ويعشق التأمل متميز بعمله متفوق بدراسته واهم من هذا كله عاشق متجدد محب لحبيبته ومضحي .

كل عام وانت ادهمي...

دخل تفاجىء وضحك..

تقدم حضني وحضن مريم ..

سيلين : كل عام وانت بألف خير يارب يخليك النه.

ادهم : وانت بألف خير وتيني.

سيلين : شنو معنى وتين.

ادهم : وتين اخ ياوتين ، الوتين الشريان الرئيسي يغذي الجسم بالدم النقي اليخرج من القلب ويطلق على اسم الشريان نهر الجسد وكلمه وتن يعني استمر ودام ولم ينقطع ذكر اسم وتين في القران الكريم بسوره الحاقه حيث يقول عز وجل ( ثم لقطعنا منه الوتين ) بمعنى هذا الشريان اذا قطع مات الرجل وانتي وتيني شفتي من فقدتج شلون وكف كلبي.. ..

احتفلنه وخلصت ليلتنه بكل حب متمنين اله طول العمر والبركه برزقه الجديد ، اني بلشت بفتره صعبه شويه بين العلاجات وبين دراستي دخلت كورس اتعلم اللغه حتى اكمل دراستي وحلمي الماكدرت احققه بالعراق ، مرايم هم دخلت ويايه علمود تتحضر للسنه الدراسيه الجديده..

صار الوقت اسد الباب ونكمل حياتنه مع السلامة..

١٢ / ٦ / ٢٠١٩
......

هاي القصه تتلخص بجمله وحده .

جبران خليل جبران يكول

بين منطوق لم يقصد ومقصود لم ينطق تضيع الكثير من المحبة..

وانا عبير ادريس اقول

بين منطوق لم يقصد ومقصود لم ينطق تضيع الكثر من الحقائق والمفاهيم..

_____

وصلنه لنهايه المحطه وصار لازم ننزل من القطار يؤسفني تنتهي الرحله لكن وصلنه لمحطه هادئه من حياتهم وهمه مستمرين بيها لهذا يومنه نتمنى الهم السعاده وراحه البال...

اذا وافقت سيلين ندخل لحياتهم مره ثانيه ونكمل السنه والنص راح اكتبها بكل ممنونيه على كوله دكتور ادهم...

تكون مع قصة دارت الدنيا لتدق طبول قلبي ...

هاي القصه تعتبر جزء ثاني لجذبني فمك البني لان بيها راح اطرح قصه ملاك وضيغم صعب ونرمان وممكن نكتب عن دكتور ادهم وسيلين..

لهذا ما وضحت بخصوصهم اي شي....

الى ذلك الوقت استودعكم الله متمنيه لكم دوام الصحه والعافيه..

احبتي الغالين شكري وامتناني لحسن متابعتكم وتفاعلكم الحلو وارائكم الحلوه جنتوا سندي طيله كتابه القصه ..

اعذروني اذا قصرت وياكم لان الوقت الطرحت بيه القصه كان خطأ وقت مدارس ، ان شاءالله القصه الجايه اكون مرتبه كل اموري...

شكرا لأدمنيه كروب عبير ادريس الحلوات على التعب ..

مع السلامه...

عبير ادريس
كل الحب..