جذبني فمك البني

البارت الثامن والستون

جعلتك عاشقآ
متيمآ محبآ...

أمتأكد بأنك سلكت طريق الاتزان وحكمت بالحق؟؟؟
بأي حق تحرمني حبك
بأي حق تهجرني
بأي حق تنفيني
بأي حق تخذلني..

انا ناقصه بك مكتمله بحبك
انا بحاجه لكثير من الاشياء لأستعيد سعادتي المسروقة..

كم من المرات افسدت ايامي ولحظات الفرح وانا اضحي لكم ...
حان الوقت لاسترداد الدين....

كل ضياع سببه رجل
كل ألم سببه رجل
كل فراغ عاطفي سببه رجل
كل ضياع حلم سببه رجل
كل رحيل سببه رجل...
سيلين
________

اكملتي حديثك يالوعتي
اتسمحين لي بالبوح لكي اجيب عن اتهاماتك....

اناجعلتكٍ اميره
جعلتكِ طفلتي الكبيره المدللة.

كم من المرات كررتي ماذا تفعل ان رحلت عنك بمحض ارادتي؟
كم من المرات تراهنتي على هدمي!!!
كم من المرات غدرتي؟
كم من المرات قتلتيني...

من انتي بأي وجوه اجدكِ
بأي روايه اقرأكِ
بأي حلم ضائع ازوركِ
اي مرآة تعكس ملامحك الحقيقية...
من انتي ياصاحبه الحضور الطاغي؟
طغيتي على قلبي ..

وبالنهايه قطعتي تذكره الحياه ورميتها بنهر تابع للدخلاء المتطفلين وهكذا جلسنا في الصفوف الاخيره لنشاهد خساراتنا...

مارأيك نتبادل قبلات الفراق وتكون الوداعيه وديه!!!!!!!

ادهم...

خاطره بقلمي ✍
_______

ياربي صدمه صدمه كلبي احترك اريد اتحرك واوصله ماكدرت امشي بس عيوني ركضت قبلي حضنته ، شالوه ايمن وفهد على كيفهم ونيموه على القنفه....

ابوهم كام يضرب على راسه ويصيح..

يوسف : خلص انتهى ادهم راح من ايدي راح ذيج المره طلع منها بمعجره هلمره ميكوم منها والله..

حجاها وصفك ايد بأيد..

فهد عاط ..

فهد : هسه شمتفاول عليه انطي صبر نشوف...

نرمان كابلته وتشرمخ بوجها امه تلطم واني بس عيوني تمطر دموع بدون توقف اريد استوعب الموقف والله ماكدرت استوعبه ...

فهدالتفت على نرمان عاكد حاجبه...

فهد : شبيج تولولين كومي منا.

نرمان : ولككككككك ادهم راح من ايدنه راح.

فهد : راح تسكتن لو شلووون خلونه نفتهم صدك جذب..

ايمن : شتفتهم مبينه السالفه اخوك انجلط مثل ذاك اليوم ..

فهد : خابر اسعاف يجون يشيلوه خاف مثل ذيج المره وكالوا جازفتوا بيه من نقلتوه.

ايمن : راح اتصل واذا ماحصلتهم اروحلهم و اجيبهم..

فهد : ديله استعجل ..

فركت وجهي وكمت اسند روحي على الحايط وامشي ظهري انكسر بوكعتك يا حبيبي روحي انكسرت داخلي تهشم....

رحت يمه اريد اوصله ماكو مكان كلهم ملتمين عليه..

سيلين : عفيه خلوني اشوفه ...

حجيتها بصوت ضعيف متوسل ...

التفت عليه فهد وكام وكف..

فهد : لتخافين ان شاءالله مابيه شي.

سيلين : اموت اذا صار بيه شي اموووت..

يوسف : هو مات مات...

حجاها وضرب راسه بيده..

فهد : لتتفاول عليه لخاطر مكه..

نرمان : كله صوجكم شكو حجيتوا وياه فوك سالفتكم العوجه جيتوا كملتوا عليه.

فهد : سكتي انتي حسابج بعدين خاف عبالج ناسي..

نرمان : لتنسى ضل بحقدك والصار لاخوك انت سببه وان شاءالله ادهم ميسامحكم اذا عدت عليه ..

فهد راد يجاوبها ابوهم عاط..

يوسف : كااااافي انتو اخوان لو اعداء كافي مو متتتت حرام عليكم لا اب تحترموه لا ام توكف بعينكم لاخوه تلزمكم ..

فهد : خليني ساكت حجي لا اغردلك هسه افزز اجدادي من الكبور....

يوسف : اسكت حجايه متحجي كل المصايب من جوه راسك..

فهد : شوف حركه كلبك على ابنك وهذا كدامك يتنفس ليش انه وحد مخلف بزون مو ابني رجال هياته كبالك يعني شنو فرقي عنك انت اب وانه كو*******..

يوسف: ضل فشر لسانك متبرري منك..

فهد : لتحجيني واتجفى شر لساني..

همه يحجون واني كاعده يم راس ادهمي تقربت من اذنه وكمت اهمس عسى ولعل يسمعني ...

سيلين :حبيبي جنت دائما تكلي لازم نتعرض لشغلات تنغص علينه حياتنه واحنه بدورنا نتظاهر بعدم الاهتمام علمود نتجنب شفقه الناس علينه لان الشقفه تقتل مو صح وجنت دائما تكلي الناس اخر همي اهم شي نعيش براحه وضمير مرتاح زين هسه ليش اهتميت الهم ليش وكعت مو انت متحب الشفقه مو انت علمتني اساعد الناس علمتني الحنيه والطيبه انت علمتني كل الاشياء الاني سويتها ليش بعد ضجت مني من تصرفت بأنسانيه واني تعلمت منك الانسانيه ...

ماعرف شحجيت واصلا كلامي شيش بيش بس هذا التذكرته...

مديت ايدي على وجها مسحت قطرات العرق وطبعت قبلات على كصته وخدة نزلت قبلت النبض البركبته جان يدك بس مو بأنتظام......

لزمت جف ايده وحضنته بيدي. ...

سيلين : ربي يحميك من كل شر وتكوم بالسلامه ارجعلي ادهمي ارجعلي تعبت و صدري ضاق بالهموم ماعدت اتحمل اي ألم كلبي مليان هموم تحبس النفس ارجعلي اريد احجيلك عندي عتب وعندي سوالف مال اشهر وايام اريد احجيلك عنهن..

قطع حديثي فهد من كال .

فهد : اجتي الاسعاف كوموا دخلو جوه...

اريد اكوم رجلي متشيلني باوعتلهم وهمست .

سيلين : اريد اروح وياه ماتحمل افاركه بعد..

فهد : يابه كومي جوه باجر يطلع ان شاءالله يله استعجلي ضي تعاي سنديها ، ايفين وينها؟؟؟ صيحيها تجي يم اختها وين ولت هاي ايفييييييين وينج ايفييين..

راح يم الدرج يصيح بصوت عالي نزلت من الدرج تمسح بعيونها شايله ابنها وجاوبته.

ايفين : حمودي خاف من الصوت وصعدته فوك..

فهد : تعاي يم اختج كعدي يمها يله ..

ايفين : اي جيت..

نزلت ودخلت لغرفه عمو يوسف واحنه هم دخلونه لان فاتوا الولد علمود ياخذون ادهم ، اخذوا عبالك اخذو روحي وياه ضليت اباوع شلون شالوه على كيفهم وخلوه بالسديه شدوه وشالوه متت بدمي رجعت كعدت بالغرفه قرفصت على نفسي  ، سديت اذني وغمضت عيني كل الاصوات تأذيني عقارب الساعه صوت النبض مال كلبي صوت تدفق الدم بعروقي كله كمت اسمعه ويزعجني هدوء مدمر مرات الهدوء يقتل الانسان لان يكوم يسمع دواخله شتحجي ....

ضعت وتهت بين نيران الشوق والذكريات ، ذكريات الألم والدموع...
ألم استفخل على كل اجزاء جسمي هذا الألم قضيت سنوات عمري احاول ترويضه علمود اكدر اعيش بس هسه استفحل عليه مثل المرض واحتلني ..

مر الوقت حرج وخلصته بين الذكريات والتضرع لله سبحانه ، شفت البجي ميفيد كمت توضيت وفرشت سجادتي وفصلت عن الكل بس اني وربي ، تعبت رجعت راسي على القنفه الورايه سندته وغمضت عيني بقوه نزلت دموعي ...

امه ونرمان شافوني اصلي واقره قران همه هم فرشوا سجاداتهم وكعدو يمي صلاه ودعوه جماعيه للأدهم ، خوف وقلق مصحوب بالدعاء والتضرع ربي يشفيه ويوصلنه خبر عنه يطمنه هو بخير...

مرت الساعات والدقايق ثكيله تخنك ساعه عشره الصبح زاد الخوف والتوتر لا خابرونه لا اجوي دب الخوف بكلوبنه اكثر ، عمتي كالت..

فردوس : يابنات خابروهم كلبي وجعني ..

نرمان : هسه اكوم اتصل..

كامت نرمان اتصلت عليهم..

نرمان : محد يجاوب..

فردوس : شلون بله نروحلهم شتكولين..

نرمان :وين تروحين منو يقبل ..

فردوس : انه انتظر يقبلون لو ما يقبلون وابني عزيزي بالمستشفى بين الحياه والموت..

حجتها ولطمت صدرها..

نرمان  : ماما على كيفج ادعليه فدوه اللطم ميفيد ...
خليت ايدي على خدي وصافنه عليهم ضايعه حتى بصفنتي...

صارت ساعه ١٢ اتصل ايمن على نرمان كلنا كمزنه يمها وكفنه...

سيلين : فتحي سبيكر فدوه.

اشرت براسها اي وجاوبته..اجه صوت ايمن تعبان كوه يحجي.

ايمن: ها نرمان ؟

نرمان : ادهم وينه شلونه طمني فدوه..

ايمن : ادعوله وطلعوا صينيه تصدقوا بيها عنه.

عاطت فردوس يبووووو وعاط ايمن عليها..

ايمن : يمعووووووده كولي ياالله قابل مات وهيج تسوين ادعيله يكوم بالسلامه انتي امه اقرب وحده لرب العالمين ادعليه وبس...

فردوس : ولك يمه ايمون احجي الصدك اخوك شبيه لا تضحك عليه..

ايمن: دخلوه بالانعاش كلبه ضعيف واحتمال يسووله عمليه هسه دزونه على جراح يشتغل بمستشفى اهليه يكولون زين راح نتفق وياه وننقله بس تستقر حالته..

فردوس : يايمه اخوك انذبح مو كتلك ايمن مو كتلك ادهم مايكوم منها مو كتلك.

ايمن : يمه اروحلج فدوه انه تعبان وصايبني الضيم ادعيله وبس لتتفاولين عليه.

فردوس : اريد اجيكم ما اتحمل بعد.

ايمن : وين تجين والدنيا مكلوبه هنا ..

فردوس : اول ما اخابرك تشيله دير بالك اتصل وترفضه لو مترد عليه.

ايمن : اي غير مشغول وماكدرت ارد..

فردوس : معليه تجاوبني ترهه والله اجي..

عفتهم يحجون ومشيت من يمهم دخلت للأستقبال لا بيه ابجي بعد ولا بيه ادعي ولا بيه اعيط ماعرف شسوي بس الاعرفه شي واحد اني ضعت وانتهت حياتي هذا احساسي كرهت كلشي والدنيا طلعت من عيني اكثر ماهيه طالعه...

مشت الايام بين اللوعه والقهر والاتصالات الولد كلهم يمه بالمستشفى والفهمته حتى اولاد عمهم هاشم هم رايحين ويه باقي الولد....

بعد مرور ٤ ايام من الهم والقهر وحركان الدم طلعوه من المستشفى بعد اجراء عمليه للقلب (دون ذكر التفاصيل ونوع العمليه )......

بيوم الطلعوه قبل بيوم جهزنه الاستقبال وهيئناها علمود ينام بيها ..

جابوه دخلوه للأستقبال من الباب الخارجي ماشفته لان محاوطيه اخوته و ولد عمه وابوه ...

هوسه البيت انترس اقاربهم كلهم اجوي ، ابوهم وعمامهم جابوا ذبايح فجران دم على سلامه ادهم واجوي طباخين طبخوا الاكل لان مابينه حيل وكفه ونسوان عمامهم وبناتهم همه تكفلو بالصب وتجهيز الغده ، اني مثل الميته كاعده وعيوني تفتر عليهم ، اريد بس الاستقبال يفرغ علمود افوت يمه ، بعدين سمعت صوت واحد صاح  من سألت منو هذا كالوا صعب.

صعب : ادري شنو سالفتهم لزكوا يمه مو موزين النفس عليه غير فتره نقاهة لو نعل هيه..

يوسف : ادري قابل اطردهم صدك جذب على كيفك ابويه.

صعب : عمي شنو سالفتك الرجال توه طالع من عمليه صعبه قابل جان بسفره متونس وكلها ملتمه فوك راسه اذا ما فتت طلعتهم افوت اطردهم وعلي..

يوسف : لك ابني عيب لتحجي هيج ..

صعب : من خ ***** بالعيب شو دوخر..

راد يفوت لزمه عمه يوسف من ايده ،باوع لمكان لزمه ايد عمه ورفع عينه عليه وكله.

صعب : وخر عمي وخلي الامور طيبه لا اصيح صوت اهججهم وعلي ابن ابي طالب..

يوسف : لك يابه لتفشلني عيب كلها رياجيل كبار..

نتر ايده من عمه وكله.

صعب : موتوني بالخجل مالتكم شو هدني..

عافه وفات سمعته يكللهم.

صعب : يابه من رخصتكم اريد اغيرله ملابسه خوما تشوفوه كما خلقني ربي..

تعالت الاصوات بالاعتذار لان طولوا بالكعده ، وشويه شويه طلعوا من البيت طلع وراهم صعب وكف بالباب والاكل خلاهم يصبوه سفري وياهو يطلع ينطيه علاكته بيده ، من فات للهول جان فهد كاعد ، طب يصنف..

صعب : كلمن اخذ علاكته وقوطيته وراح لا غسلوا مواعين ولا هوسه خلصتكم. 

يباوع على البنات ويحجي..

ضحك فهد وجاوبه..

فهد : ادري لك كو**** قابل جايين قرايه مال نسوان وشيلتهم اكلهم بيدهم ههههه ...

يوسف : خزاني النذل هيه هاي طلعه منك ...

صعب : اي غير نريد نبدله قابل ابدله كدامهم.

يوسف : ادري مو غيرنه كل ملابسه قبل لانجي منيلك هاي السالفه.

صعب : عجبني اغيرله ملابسه شلون بله.

فهد : هههههه خبال لخبلك.

صعب : اسكت انت نذل شكد مشتاقلك.

فهد : ههههه مشتاقلي كو*****

صعب :******** لتخليني افشر..

فهد : نذل مو بيدك ابوك النذل شو ما اجه.

صعب : عوفه يمعود معليك بيه ابنك ويمك شتريد منه.

فهد : لا يابه شريد منه..

عفتهم وكمت ردت افوت للغرفه اجاني صوت ابوهم وكفني بمكاني التفتت عليه من كال.

يوسف : لتفوتين ديري بالج.

عكدت حاجبي وكتله.

سيلين : ليش مافوت اريد اتطمن عليه واطلع..

يوسف : لتدخلين يمه ابد لا انتي ولافهد.

سيلين : يعني شنو مافهمت.

يوسف : تعبان منريد اي ضغط عصبي عليه.

سيلين : واني هسه صرت ضغط عصبي عليه.

يوسف : بنتي هو ليش وكع اخر مره مو جانت مشكله وياج و ويه اخوه بعد شنو ....

سيلين: ماشي اسفه...

سكتت ومشيت بهدوء صعدت فوك متت قهر حتى دموعي خلصت شلون ابجي وابرد كلبي بعد وهيه متنفسي الوحيد ، دخلت بغرفته نمت على سريره اعصر بالفراش بيده عضيت المخده وكمت اضرخ صرخات مكتومه لحد ما صوتي انتهى ....

سمعت باب الغرفه انفتح ضليت دافنه راسي بالمخده سمعت صوت ايفين تكول...

ايفين : حبيبتي سيلينه كومي اكلي لكمه فدوه راح تموتين صارلج ٣ ايام كلشي ما ماكله..

وجهي بالمخده وصرخت.

سيلين : اريدددد اموت علوااااه اموووت مليييييت ملييييت حياتيش هاي حياتيش العايشتها شنو الذنب السويته شنوووووووو..

خلت ايدها على ظهري كامت تفرك بيه براحه ايدها..

ايفين : كومي حبيبتي كومي مو احجي وياج فدوه لعينج.

جرتني جر يله كمت كعدت باوعتلها عيونها مورمه وجها اصفر بعد اتعس مني مسحت دموعي وكتلها..

سيلين : شبيج انتي ليش هيج وضعج..

ايفين : ليش الصارلكم قليل اني داموت عليكم يوميه ابجي للصبح عيوني متغمض لحظه وختمها عمو بوكعته...

سيلين : برأيج الصارلنه هذا كله سببه منو وليش هيج عشنه بضيم وقهر ماكو يوم ارتاحينه بيه..؟

ايفين : شي اكيد تماره منو غيرها وبعدها يجون عمامج الشفيه ، بس بالاسم رياجيل..

سيلين : تدرين بيها اجتني للشقه..

عكدت حاجبها وحركات وجها كلها تدل لعبانه نفسها....

ايفين : شجابها عليج شوصلها وشتريد..

تحمحمت حتى صوتي يطلع متشحرج من البجي..

سيلين : ماعرف السبب الحقيقي الجتني بيه بس حسب ما هيه كالت على اساس غزوان متزوج عليها بنيه صغيره ومخيرها تبقه لو تطلع هيه كرامتها ناغزتها وطالعه وشلون وصلتني عن طريق زاكروز وين شافته وين لكته مادري وهو شلون اندل جامعتي هم ما ادري عن طريق الجامعه وصلتني وشتريد هههههه تريد تعيش ويايه ونرجع علاقه ام وبنتها تخيلي..

ايفين : لج هاي جذابه كل الحجته جذب ..

سيلين : شلون يعني جذب مافهمت؟

ايفين : غزوان لا متزوج ولا مخيرها غزوان انحبس بتهمه خطفج وقتل ابوج وبلاوي زركه طلعت عنده وهسه انحبس..

سيلين : لا لا جذب..

ايفين : اي والله شبيج وحتى انحكم بس ماعرف شنو حكمه اكيد مؤبد وعمو ادهم هو القدم الشكوى عليه..

ضحكت مستهزئه..

ايفين : شبيج ؟

سيلين : يومين ويطلع هسه تشوفين يامؤبد تحجين عنه.

ايفين : لج لا والله سمعتها من عمو الحجايه مو واحد حاجيلي حتى اكول ممكن يكذب..

سيلين : الله ينتقم منه وشكو جايه عليه تريد اخذها بالاحضان بعد ما شفت ضيم وظلايم بسببها..

ايفين : زين تسوين اني لو منج جان ملختها تملخ وكلبي ميبرد ، زين معرفتي وين راحت.

سيلين : لا معرفت بس دوختني شغله زاكروز منين عرف دوامي..

ايفين : عمو ادهم دلاه كليتج.

سيلين : ادهم شجابه عليهم ..

ايفين : من انهزمتي راحلهم وراح لامج عباله انتي رايحتلهم لان ماخله مكان يعتب عليه مادورج انشلع كلبه ياسيلين ، عاد زاكروز كايله اجي وياك ادورها واجه لبغداد دورج كم يوم ايس وراح.

سيلين : خلف الله عليهم ..

حجيتها مستهزئه..

سيلين : تعاي انتي ليش تبريتي مني شنو الصار وخلاج تفرطين بيه وتحقدين هلكد شسويتلج اني ..

ايفين : هااا مو شفت عمو تمرض ضجت منج  ..

سيلين : بس على عمو لو غير شي..

ايفين : يعني شنو غير شي مافهمت.

سيلين : ماعرف احس اكو شي تريدين تسولفيه اليه..

ايفين : مثلا ؟

سيلين : يعني رجلج لمحلي تلميحات ..

ارتبكت وجها صار اصفر كامت متعرف شنو تحجي عرفت اكو شي جبير ضامته عليه بس متصورت فضاعه الامر لهدرجه من بعدين سمعته.....

ايفين : رجعي سأليه هو يسولفلج اذا اكو شي اني ماعندي شي احجيه اكلي غداج برد اروح اشوف حمودي عفته وحده جوه.

سيلين : ماشي ..

طلعت بس كلبي لاعب منها شنو ضامة عليه بعد،، شلت الصينيه خليتها على الميز لزمتني الدوخه ردت اوكع انتظرت لحد ما صفت الدنيا لان صارت سوده بعيني وره شويه رجع توازني رحت مددت ...

مر اسبوع اني مشايفه ادهم حتى من الباب ميخلوني اشوفه والاستغربته هو ما طلبني ولا سأل عني يعني اوكف اتوسل بيهم محد يخليني افوت ويكلولي هو ميريد يشوفكم لا انتي ولا فهد طكت روحي كلت اليوم لازم اشوفه ليش هيج ميخلوني شنو السبب وكفت باب الغرفه مال استقبال ونفس الشي عمو يوسف جان بالهول شافني من توجهت لغرفته سبقني وكف يم الباب وكال..

يوسف : يابه بس خلي تعدي عليه هالايام وبعدين فوتي يمه.

سيلين : ليش شنو راح اسويله هسه صارت سيلين تموت ادهم..

حجيتها واختنكت بعبرتي..

سمعت صوته يصيح..

ادهم : يابه خليها تجي ...

باوعتله لعمي وتعديته فتحت الباب وفتت اني شفته لو داخلي اهتز شكو بيه قهر وحركه وبجي طلعتهن كدامه شكد حاولت اكتم ماكدرت مسحت عيوني وتقربت منه ..

حضنت وجها بجفوف ايدي غمض عينه طبعت قبله على كصته وهمست..

سيلين : حمدلله على سلامتك حبيبي ان شاءالله تنذكر متنعاد متتصور شصار بيه هاي الايام وشلون مرت صعبه عليه..

تنفس بغضب نزلت عيني على مكان الجرح مالته دنكت طبعت قبله خفيفه عليه سمعته يكول ..

ادهم : كعدي اريد احجي وياج..

رفعت راسي مستغربه اسلوبه لا ذكر اسمي لا حبيبتي عرفت بعده شايل بكلبه عليه رحت جبت كرسي وكعدت كباله بدون مقدمات حجه بوضوح وصوت ثابت...

ادهم : لازم نتفق على كلشي قبل لا اسافر..

استغبيت قصده و اني فاهمته ومبين من ملامحه ونبره صوته شنو يرد يحجي مع هذا سويت روحي ما مفتهمه وجاوبته بتساؤل..

سيلين : على شنو نتفق وشنو تسافر وحدك يعني شو اسافر مو نسافر ..

حجيتها وابتسمت ابتسامه باهته بخوف منتظره الاجابه منتظره الحكم الجائر بحقي..

ادهم : انتي تشوفين اكو طريق يجمعنه سوه..

ضحكت بقهر درت وجهي استغفرت ربي ورجعت باوعتله.

سيلين : ليش لعد ماكو طريق يجمعنه اكو شي اسمه حب بينه اكو رابطه بينه اسمها زواج لو نسيت دكتوري.

ادهم : هذا الارتباط خسرني كلشي واخرها صحتي شنو اخسر بعد من وراه..

سيلين : شنو السويته الك حتى هيج تحجي.

ادهم : يكفي خليتي ايدج بيد فهد وخسرتيني كلشي شوفي متهمني الفلوس ولا يهمني المنصب بس الخساره العظمى فقدت ثقتي بيج وهاي شيرجعها..

سيلين : من اي ناحيه فقدتها غير افهم ..

ضحك بتعب..

ادهم : سيلين انه ماعدت احزرج وكتلج من قبل كتلج فقتيني وصرتي التلميذه التفوق استاذها بعلمه ، بمعنى تمثيلج والحقيقه صارت واحد ماكمت افرق بينهم ، حبج كذبه اهتمامج بيه كذبه،،،

صدك وين اهتمامج انه الدائما مهتم انه مو انتي شنو شفت منج ذكريني جوز ناسي ولج حتى اللحظات الحميميه جنتي تمثلين بيها عليه وجنت انطيج اعذار اكول مريضه ميخالف اصبر عليها وسافر وهناك عالجها ومن اسافر تستغلين الموقف وتطلعين من البيت بالاتفاق حتى ارجع وغصبن عني اجيب علي شفتوا ما تحملت الموقف وكعت وانهارت صحتي فوك الثمن اشهر وبالجذب ما اجيتي وسألتي عني لا منتظره تكملين الخطه البديتوها سويه ، ورجعتي اتفقتي عليه من صرت زين انتي تريدين تموتيني
ليش اريد افهم شمسويلج اذا هيج كارهتني جان طلبتي الطلاق..

حجاها وضحك بتعب بعدين كال..

ادهم : اساسا انتي طلبتي الطلاق شفتيني متمسك كلتي اقضي عليه بسمعته والرجال شنو الشي الينهيه غير سمعته وشرفه وكرامته وعزه نفسه بين اقاربه والناس ، ولج شتسوالي من يخابرني الضابط يكلي مره ثانيه تأكد من اهل بيتك يله تقلق الامن...

بهتت ماعرف شنو اجاوبه وهو كلشي مفتهمه غلط بصوت يرجف كتله.

سيلين : لعد انت ليش حركت الدنيا عليه ودورت عليه اذا اني متفقه عليك جان طلكتني ورجعت سافر ويطبني مرض ليش سمعت لفهد ..

ادهم : غير عبالي مجبوره وصدك خاطفج لان شفت التصوير شايلج ونازل بيج ، بعدين من شهدتي ضدي وحذرتج بنضراتي متخالفيني كلت لا هاي بايعتك وحتى نزلتج وياه خطه علمود اصدك انتي مخطوفه لان تعرفون بيه اقره الحركات وراح اعرف اذا نزلتي بطولج وياه معناها لعبه لهذا جان الاتفاق بينكم يكون بهيج صوره مثل ما اتفق ويه ايفين قبل..

سيلين : ادهم انت تصلي حرام عليك تتهمني هيج اتهامات باطله اذا ما شايف بعينك...

حجيتها ورجف جسمي ردت اوكع من القهر...

ضحك مستهزء رفع عينه عليه وكال..

ادهم : بيوم الشفتكم بالمطعم شلون يلزم ايدج ويركض وراج يصالحج وانتي تتعاركين وياه من يومها المفروض افهم خيانتكم اليه بس الصار اختج لعبت بعقلي وحجتلي سوالف خلتني اصدك انتي فعلا مظلومه وفهد لاعب بعقلج وبدون دلائل صدكت بالرغم كلشي يدل على خيانتج اليه تصوير كامرات محادثات كلشي يثبت عليج التهم..

هنا متحملت اكثر طلعت من الاستقبال اصيح بعلو صوتي.

سيلين : فهددددددد وينك فهددددد فهددددددد.

نزل من فوك يركض والكل التم على صوتي شافني ارجف عكد حاجبه وكال ..

فهد : شكو ادهم بيه شي.

سيلين : اني بيه اني مو هو..

حجيتها وكمت اضرب على صدري حيل.

فهد : شكو غير افهم.

سيلين : تعال يكلي اني عندي شي وياك ومتفقين عليه انت مو تكول عندي دلائل اشوفه ويصدك جيبهن وينهن راح اموت فهمه لاخوك كله اني لعبه بيدك جنت كله الصار انت سببه اني ما اليه دخل اني مظلومه كله الله يخليك ...

عافني وفات لادهم رحت وراهم وكفت استمع  ..

فهد : انت صدك تحجي مو اجيت وفهمتك على كلشي بعد عليمن الحجي.

ادهم : وارجع اصدك بيك شجاني تخبلت.

فهد : كتلك شوف الفديوات الباقيه وراح تصدك ليش رافض تشوف شي..

ادهم : اطلعوا بره لا اريد اشوف فديوات ولا اسمعكم .

فهد : بس هيه معليها الف مره كتلك..

ادهم : ذنبها خلت ايدها بيدك وهذا الشي اتصوره كافي يخليني انفر منها وما اكمل..

فهد : بس هيه ماعدها غيرك وين عايفها..

ادهم : البركه بيكم زوج اختها واختها انه شنو هههه.

ضحك مستهزء اباوعله مو هذاك ادهم القديم ادهم ابو الحنيه الطيب لا هذا يختلف واحد قاسي وكلبه ميت حتى نضراته تختلف كلها كره ..

فهد : هسه شنو فهمني.؟

ادهم : انت لتدخل بشي ميخصك لتدخل بيه ابنك رجعلك وحياتك استقرت بس ضاملك ضمه راح تتفاجئ بيها خاف عبالك سكتت و هذا هو ..

فهد : شتريد تسوي سوي بس سيلين طلعها من الموضوع.

ادهم : شدعوه هلكد خايف عليها وترجف ..

فهد : لشنو تلمح ادهم ؟

ادهم : دفاعك مستميت عليها اول تالي وانت جنت سيف بخاصرتها دوم تأذيها وانه الاحامي عنها شنو الاختلف هسه ابو علاوي..

فهد : يعني شنو قصدك انه خنتك ويه زوجتك.

ادهم : ماعندي ثقه بيكم ثنينكم شلون طلعت من البيت وشلون انت مأجر الها الشقه وداير بالك عليها هاي كلها علامات استفهام جانت بالنسبه الي وتصرفكم الاخير حلها...

فهد : غلطان ويجي يوم تتندم على حجيك هذا..

باوع لفهد ورجع باوعلي بكل برود كال..

ادهم : سيلين انتي طالق...

ركضت عليه حتى ميكررها سديت حلكه بوسه قويه  ضليت بايسته واتنفس سريع جسمي يرجف رجع راسه ليوره غمض عينه ونزلت دمعه ضايعه منه ، مسحتها بيدي ورجعت ابوس بكل وجها واتوسل بيه بصوت مخنوك..

سيلين : لا لتكولها احبك والله فدوة حبيبي اموت ما اتحمل ابويه انت اضيع بدونك اضيع حتى لو تكرهني حتى لو متريدني بس خليني على ذمتك عفيه ادهمي لتسويها بيه..

فتح عينه باوعلي وكال.

ادهم : سيلين انتي طالق..

فقدت كمت اعيط واملخ بوجهي كعدت بالكاع انهاريت اضرب على وجهي كمت اصيح.

سيلين : لتكولها بعد لتكولها اتحرم عليك لتكولها وتضيعنه لتكووووووووولها كاااافي كااافي...

حسيت بأيد كبيره كتفت ايدي حتى ما الطم بعد ، انرفعت من الكاع ماعرف منو شالني وطلعني من الغرفه كعدني على القنفه من اباوع هذا فهد ، التفت على ايفين وعاط بيها.

فهد : تعاي لزميها مو ويااااااج شبيج صافنه...

اجتي يمي لزمت ايدي واني ماشوف منو اكو ومنو ملتم داير مدايري بس رجليناتهم اشوفها ، سمعت فهد يعيط بصوت عالي..

فهد : انت شبيك تخبلت شعليها هيه الف مره كتلك شوف القنا***** المصورهم كتلك ماصار بينه شي سألتني الف مره وجاوبتك ماصار بينه ماصار.

ادهم : شفتهن الفديوات شفتهن اسبوع هيه تضحك وماهامها زوجها يحترك ما مبين عليها جايه وياك مغصوبه سوالف وضحك وتاكلون اصلا لعبت نفسي منكم و ما كملت ..

فهد : يعني شتسوي تموت روحها ليش ما شفت باقي الفديوات شلون تبجي ومنهاره..

ادهم : صعبه عليكم تمثلون كدام الكامره حتى الاثول يصدك بيكم السويتوه سنه ونص متكدرون تحبكوها فتره الاسبوع الضليتوا بيها اطلع بره وتعال انت بيا عين جاي تحجي ويايه بيا عين ..

فهد : لك حاسبني الي انه الغلطت بحقك وحقها انه اذيتهة انه والله هيه متدري ماعدها علم وداعت اولادي..

ادهم : عليش مستقتل تدافع عنها فهمني؟

فهد : تكدر تكول صحوه ضمير متأخره..

ادهم : لتضحكني فهد عنده صحوه ضمير اطلع بره لتشوفني وجهك منا لحد ما اسافر واخلص منكم وعساني لا شفتكم ولا تلتقي دروبنه بيوم من الايام ..

فهد : انت الخسرتها سيلين متتعوض..

ادهم : جيد لازم خسرتها قبل وشفت خسارتها صعبه ومتندم..

فهد : لك لتحجي هيج انه مو نذل واخلي عيني على مرتك ..

ادهم : واضح.

فهد : انت شنو شاك بيناتنه شي فهمني ليش تحجي مبطن.

ادهم : شاك شنو ههههه ولي من كدامي احسلك..

فهد : يجي يوم وتتندم على السويته كله..

ادهم : البركه بيك اخويه البركه بيك وبمرتي حبيبتي..

سمعت حجيهم كله واني اكل بروحي وارجف قهر الى اني فقدت بعد محسيت بشي ...

ايفين

الصار صدمه شي فوك شي وكعه عمو طلاق سيلين ضربه اقوه من القبلها ، نزلنه على صوتها وهيه تصيح على فهد ،شهدت على توسلاتها بعمو وشلون يقابل دموعها وتضرعاتها برووود وجفاء الى ان طلقها وانهارت اعصابها شالها فهد طلعها من يمه خلاها بالهول ورجع يم ادهم ، ضلوا بينهم مناوشات بالحجي الى ان وكعت سيلين فقدت الوعي تخبلت كمت الطم على وجهي شالها ايمن خلاها على القنفه .

ايمن : شمموها عطر غسلوا وجها هسه تصحى..

كعدت يم وجها ابوس بيها وابجي ندم وقهر وعلى السويته بيها وعلى الحال الوصلتها بيه اني السبب اني غدرتج اني كمت احجي بصوت عالي ، اجتي نرمان غسلت وجها متكعد تخبلت كمت اعيط ..

ايفين : فهددددددددددددد اختي ماتتتتتتتت لك فهدددددد كلنه شاركنه بقتلها..

طلع من الاستقبال يركض وتبعه عمو ادهم يمشي ولازم مكان العمليه وكف بعيد يباوع ما اقترب كمت يمه وكفت وكتله.

ايفين : سيلينتك ماتت كلتلك اذا عفتني اموت شوفها ماتت..

جانت عينه على سيلين باوعت ايده ترجف حنكه يرجف اعرفه خايف عليها بس يكابر ومبين هو ثابت ما مهتم ، عفته ورجعت على اختي كلهم ملتمين داير مدايرها..

فردوس : هاي ما ماكله شي لو تاخذوها تشدولها مغذي مو احسن.

يوسف : ايمن شوفلنه مضمد وجيبه للبيت..

فهد : مضمديش ناخذها للمستشفى احسن خاف عدها انهيار عصبي.

يوسف : بكيفكم ..

فهد : ايفين جيبي عبا وبدلي بسرعه..

ركضت فوك لبست وجبت الها عبايه نزلت خليتها عليها شالها فهد التفتت على عمو اريد اشوف رده فعله شنو ومرته لا ايد ولا رجل ، من شاف فهد شالها فات للغرفه وسد الباب..

طلعنه خلاها بحضني ليوره وهو وايمن ليكدام ، الطريق كله شويه يتعاتبون ويرجعون يتعاركون وصلنه للمستشفى نزلو الولد دخلوا جوه بلغوهم واجوي الممرضات وممرض وياهم اخذوها من حضني فاقده خلوها على السديه وللطوارئ فحصوها ضغطها مصفر كبل شدولها مغذي وتحاليل ، يريدون ياخذون منها دم ماعدها اوردتها كلها مابيهة ، زرفوا ايدها تزرف يله لكولها وريد اخذو منها دم وسوولها تحاليل سألونه متزوجه جاوبناهم ب اي...

اجرولها التحاليل طلعت النتيجه ..
حمل ماكو بس فقر دم عدها حاد وصاير عدها شد عصبي لهذا وكعت وبعد ماحست بشي ، كعدت يم راسها اباوع عليها ضعيفه وهزيله صايره وين جانت عبالك تفاحه كمت ابجي واتوسل بيها تكعد..الى ان سمعت صوت ايمن سكتني من كال.

ايمن : يوجع عذاب الضمير مو ؟

رفعت عيني باوعتله جاوبه فهد.

فهد : عدكم ضمير من يم الناس كلها اله من يم فهد وابنه ماهزكم ضميركم الميت من خرب بغيرتكم اذا عدكم غيره حولتوني وحش خليتوني احرك الاخضر واليابس يله حصلت ابني وذني البنات الوحيدات صارن عائلتي وعوضني عن عشيرتي وخساراتي ذني الضميرهن ميت بالنسبه الك ولاخوك ، نقذو انسان من موت محتم ، او جنون ،

جمعن ولد بأبوه من بعد فراق ١٤ سنه هذني البنات الميتات الضمير ضميرهن حي ازيد منك ومن اخوك ، بسببهن انه بديت اتماثل للشفاء بسببهن كمت احب الحياه وبلشت اترك الشرب بسببهن ابني شاف ابوه بسببهن وكفت الحرب بيني وبين اخوك صح هو خسر هواي بس امام خساراتي لا شيء لهذا انجب واسكت لا اخليك تتعالج هنا على حسابي..

ايمن معجبه الحجي عافنه وطلع من الغرفه ، فهد جر كرسي وكعد...

التفت عليه وكال...

فهد : عينج على الصونده لتأوت..

مجاوبته لان اني هم ضايجه منه الصار لسيلين وعمو بسببه حتى لو جان صاحب حق بس همه هواي تأذوا بدون ذنب..

انتضرنه المغذي خلص وشدولها الثاني بدت تصحى شويه شويه مجرد فتحت عينها شافتنه عبالك اتذكرت رجعت تعيط وتبجي اجتي الدكتوره ضربتها ابره مهدئه ،

عدها علم مسبق بحالتها وشرحنه الها الصار شلون بجت وفقدت كالت اول متكعد نضربها ابره تهدأ بعدين طلعوها ،
انتضرنه ساعتين اكثر مادري وطلعناها رجعنه للبيت نيمناها بالهول على القنفه غسلت ايدها ورجلها ووجها عدلت شعرها وخليت الشال عليه، صار الليل الكل راح لغرفته ، وفهد اخذ حمودي وصعد كال .

فهد : انتي نامي يمها وانه انيم حمودي..

هزيت راسي موافقه ، من رجعنه من المستشفى جانت الساعه تسعه ونص بليل وهسه ب ١٢ الغريب عمو ابد ما طلع ولا سأل عليها شلون صارت ،

فرشت بالكاع وطفيت الضوايات ونمت كلش تعبانه جنت ،
بس بالي يم سيلين اي حركه تصدر منها افز اي صوت يفززني حتى نفسها بالي يمه خاف تختنك حسيت باب الهول انفتح فتحت عيني باوعته عمو ،،

ضحكت بكلبي اخ ياكلبك اعرفك تلوب عليها بس استغربت هلكد طولت يله اجيتها كنبص يمها يم القنفه ، شال ايدها خلاها على وجهه باسها وخلاها على بطنها..

كام وكف يم راسها مسد شعرها ودنك باسها براسها جر حسره شكبرها  من يمي احتركت حرك ، عافها ورجع للأستقبال سد الباب...

ماعرف المن انطي الحق من سمعته نطيته الحق ومن سمعت فهد كلت حقه وسيلين جانت الضحيه بين هاي الحقوق....

ثاني يوم بلشت وياها مداراه واغسل وابدل الها واوكلها وعمتي ونرمان وعمي والولد كلهم مقصروا وياها الكل جان داير مدايرها وقلقين عليها حسيتهم صدك يحبوها...

سيلين

فتحت عيني واني بلبيت ياريت ما فتحتها عبالي متت وخلصت بس لا بعدني بعدلي هواي وراح اعيش الاصعب...

جنت ضحيه بين حرب العمالقه ولان تدخلت حتى افك هذا النزاع الدام ١٤ سنه حبيبي شن عليه حرب المحبين ويااصعبها من حرب....

سيلين : شيلي الصينيه ما اشتهي واريد اطلع بالحديقه اشتم هوه...

ايفين : شلون تمشين تكدرين لو لا..

سيلين : اكدر بس سنديني..

ايفين : يله ..

مدتلي ايدها لزمتها وكمت طلعتني بره جانت ساعه خمسه العصر والجو حلو بدايه شتا مشيت من يم باب الاستقبال جان مفتوح والشبابيك هم باوعتله كاعد وخال ايده على راسه تعديته ورحت كعدت على الكراسي جانت قريبه من باب الاستقبال...

سيلين : ليش فاتحين الباب مو بارده عليه..

ايفين : كالو لازم نفتح الباب مرتين باليوم  حتى يتغير الجو عليه..

سيلين : مسأل عليه محن كلبه من شافني وكعت لو ما مهتم..

ايفين : اجاج بليل باسج ورجع لغرفته شوفي هو هم تلكيه متأذي واكثر منج بعد بس يكابر..

سيلين : شسويله اني بعد ما ارجعله هو راح يسافر واني ارجع لبغداد..

ايفين : بكيفج تروحين لبغداد وتعوفيني وحدي بعد منفترق ابد ، اله اذا سافرتي ويه عمو روحي الله وياج غيرها ماعوفج بعد..

سيلين : مادري افونه تعبانه ماكاعد اتحمل اي شي .

ايفين : الله يساعدج بس باعي متأكده هو سوه هيج علمود يرجع كرامته النجرحت وصدكي هسه متندم وياكل بروحه ومستحيل يسافر اذا مو انتي وياه..

سيلين : ههههه لتضحكيني يحن انتي مشفتيه من طلكني شلون ملخت روحي كدامه وتوسلت وبجيت ومارفله جفن ورمه عليه اليمين مره ثانيه ولو ما فهد يطلعني جان رمه الثالثه وتحرمت عليه تكليلي يحن ويتندم لعلمج ادهم ميسوي شي بحاله عصبيه وتسرع لا يسويها عن درايه ودراسه عميقه اني عشت وياه واعرفه..

ايفين : اذا تعرفيه هيج صعب ليش شهدتي ضده ؟

سيلين : انتي شبيج بابه اذا ماسويت هيج راح تخلقون وحش جديد ويرجع يحركنه كلنه ومو بعيده يكتل ادهم يعني شنو استفاد اذا لا سامح الله مات ادهم وزوجج يدخل سجون واني وياج مصيرنه بالشوارع فكري انتي بيها والملامه كلها توكع عليه واولهم انتي تلوميني جان كلتي شصار عليج سيلين جان كلتي ماخطفني وبعدين طيبتي خاطر ادهم بس كلكم تفكيركم غلط اني فكرت لا عبالج وهواي هم يله قررت اساعده.....

بهاي الاثناء اندكت الباب فاتوا فهد وصعب وعلي اجوي يمي مبتسمين سلموا عليه وتحمدولي بالسلامه سحبوا كراسي وكعدوا.

ابتسم صعب وكال..

صعب : شلونج مرت اخونه احسن ان شاءالله..

كلبي عصرني عرفت محد يدري بيه مطلكني ابتسمت بضعف وكتله.

سيلين : الحمدلله احسن..

صعب : بفهد القند*** ولا بيج.

ضحك فهد وكله..

فهد : اكوم اجعصك هسه شعليك بز*** كل شويه جايبني بالطاري..

صعب : ههههه تعرف بنفسك انت هيج..

علي : صدك جذب عود انه كاعد بنصكم شتعلم منكم متكلولي..

فهد : روح يم عمك جوه تلكه مدرسه متكامله شيعجبك اخلاق علم ثقافه احنه سربتيه منفيدك ماعرف خالك شلون رباك على الاخلاق وهو ماعنده اخلاق..

صعب : لا يانذل يافهيد هاي عليه شوف منو ياخذ اختك..

فهد : تحلم ازوجها الك لو ازوجها الك واسحبها يمي ١٤ سنه واكلهم صعب ميت ماعنده بس الصور مال صلعيته...

صعب : نذل تسويها .

فهد : هيج ابوك يخوف خلاك تضم سر عمره ١٤ سنه.

صعب : هم رجع اكلك انت بكل سالفه تلف وترجع لهذا الموضوع متمل..

فهد : كلبي محروك  منكم هسه عندي شعور اكوم افلش وجهك وكلبي ميبرد..

صعب : وجهي شعليه لو تغار مني لان احله منك..

فهد : الجمال مو للزلم هجان..

صعب : شوف وجهك خرايط كله مضرب متكلي ويامن تتعارك وهيج راسميلك وجهك رسم..

فهد : ويه خالتك اتعارك..

صعب : نذل مو بيدك..

طلع علي من باب الاستقبال وكال.

علي : خالو عمي يريدك..

فهد : كوم بلش الدرس ههههه.

كام صعب كفخه على راسه ومشى..

صعب : نذل مو بيدك.

دخل للأستقبال وسد الباب وراه والشبابيك هم...

من راح جر الكرسي فهد وتقرب كعد يمي...

فهد : موزينه بعدج مو ؟

سيلين : انت شتشوف..

فهد : موزينه..

سيلين : بعد عليمن تسأل.

فهد : بالي يمج والله مانايم صارلي يومين.

سيلين : نام اذا سهرت شراح تغير نفس الطاس ونفس الحمام..

فهد : خليه يهدأ شويه وتمر فتره على عمليته وارجع احجي وياه اموته اذا ماقنع اعرف راسه يابس بس اعرف شلون اخليه يلين..

سيلين : شلون ؟

فهد : بيناتنه الحجي مو تحجين اعرفج فطيره..

ضحكت.

سيلين : شنو احجي ..

فهد : اذا قفل اكله بس تسافر ازوجها انه مو حمل مسؤوليتها واتفق ويه ابوي هم اخليه هيج يحجي وانتي اذا سألج كليله اقبل مو تصيرين بطله وتكليله اعيش على الاطلال اتذكرك ومن هالحجي لا قوي كلبج وكولي اي اتزوج انه شنو شفت من حياتي وبعدني صغيره وكذا واذا ضل قافل عدنه ولد عمام خير من الله المثقف مثل ادهم والخبل مثلي اشوفلج واحد عود..

سيلين : ههههههههه والله بعز ضوجتي تضحكني..

ابتسم وكال.

فهد : شبيج والله دضحكني من خرب غيرته لادهمج..

سيلين : وين صايره اتزوج ابن عم ادهم هاي بس عندك.

فهد : انتي شعليج كلشي يرهم..

سيلين : انت ناوي تكمل عليه خاف وكف على حيله من تحجي هيج يروح بيها استر علينه يمعود.

فهد : ها انتي هيج تكولين.

سيلين : طبعا..

فهد : نشوف شغله ثانيه نحجي وياه بيها واذا قفل اصير نذل واكله بهاي السالفه.

سيلين : لا دير بالك اذا صار بيه شي ماسامحك والله.

فهد : يعني هسه انتي مسامحتني؟

هزيت راسي ب اي..

فهد : يله ويكلولي ليش تحبهن عمي والله بنات تماره علم ..

سيلين : هههههه هسه صرنه علم تتذكر شنو جنت تحجي علينه.

فهد : شنو شكايل ؟

حجاها وعكد حاجبه.

سيلين : منو جان يكله لادهم بنات تماره راح يطلعنك من الدين..

فهد : اي غير شفتجن تركصن والله انه هم طلعت من الدين بيومها..

سيلين : شكد سخيف وانت شلون تباوع مو حرام.

فهد : هههه حرام شنو هذا وين يشتغل.

سيلين : اسكت كافي..

فهد: سكتت يابه سكتت ..

ورة شويه اجتي ايفين كعدت يمنه وخلت حمودي بحضني..

فهد : اكل اليوم .

ايفين : اي اكل بس قليل.

عكد حاجبه ضاج.

فهد : ليش ؟

ايفين : مغص بطنه وبس يبجي خبلني..

فهد : اذا ضل هيج باجر ناخذه طبيب..

ايفين : اني هم ردت اكلك ..

ضليت اباوع بوجه حمودي وسرحت بعيونه وبرائته ماحسيت اله دموعي نزلت بجيت بحركه..

فهد : شبيج يمعوده ...

كامت ايفين مسحت عيوني واخذت ابنها من حضني باست راسي وحضنتني..

سيلين : شنو السويته حتى استاهل الصارلي هاا فهميني يعني اذا ابوه انسجن هذا منو اله وانتي تضلين وحدج تحيرين بيه يعني من شفت لمتكم هسه وفكرت اذا اني جنت السبب برفكتكم شلون اكمل حياتي واعيش مرتاحه واني ساجنه زوج اختي ومفرقته عن اختي وعن ابنها ..

فهد : مو اكلج انتي علم عمي لو شما اسوي ما اوفيلج دينج لو الله يهديج واخذج لمكه على راسي..

ايفين : صلي اول وبعدين اخذها لمكه.

فهد : وانتي شعليج اذا صليت لنفسي قابل راح تطبين لجهنم وياي حتى هناك لاحكتني غير حظ اسود مصخم اذا صدك شفتج هناك..

ايفين : على كدك جهنم ان شاءالله.

فهد : لج لتتجاوزين..

سيلين : يعني اريد افهم ليش اي شي اسويه ينكلب ضدي..

فهد : المؤمن مبتلى عمي انه مو مؤمن وابتليت ابتلاء النبي يعقوب عليه السلام اذا اصلي شيصير بيه...

سيلين : استغفر الله ...

بعز ضوجتي سوالفه تضحكني..

فهد : هسه افوت لادهم اشوفه لو يرجع ينجلط عبالك مكوكيه كل يوم مجلوط.

ايفين : من سوالفك تجلط اكبر واحد.

فهد : جان انجلطتي شبيج السبع ياكل بيج اسبوع.

ايفين : البلكلب بلكلب يافهد....

فهد : شاعره المليون ايفين وضاح ...

ايفين : ضل استهزء لحد ما تخسرني واني شلون شايله بكلبي عليك.

غمزلها وكال.

فهد : ففتي اصالحج بليل ونكعد وكأن شيئا لم يكن.

ايفين : هو شحصلت ليلى شقبض مجنونها...

فهد : على كولتج يله انه جوه اذا احتاجيتوا شي لتصيحوني لان احتمال اناملي ساعه..

حجاها وراح...

سيلين : هههه الله يعينج عليه والله..

ايفين : اسكتي زرعلي كلب بصف كلبي لازم لا يتعب ولا يمل.

سيلين : كلبه طيب ديري بالج عليه.

من كلت هيج صفنت بوجهي جرت حسره وكالت..

ايفين : كومي طبي جوه برد الجو..

سيلين : هسه شويه وافوت ..

ايفين : اتصلي عليه واجيج لتكومين وحدج

سيلين : ماشي..

دخلت ايفين طلعت مريم اجتي كعدت يمي وره شويه كالت ...

مريم : سيلي.

سيلين : ها حبيبتي.

مريم : ليش متقبلين تسافرين ويانه؟

سيلين : منو كال ما اقبل؟

مريم : ماعرف اني هيج فكرت

سيلين : ليش هيج فكرتي .

مريم : مو بابا كال حضري كل اغراضج لتنسين شي احتمال بعد اسبوعين نسافر كتله ويانه سيلي كال لا ..

سيلين : سألتيه ليش..

مريم : سألته مجاوبني..

جريت نفس قوي وسكتت ..

وره شويه طلع علي ابن فهد شافنه كاعدين اجه كعد باوع لمريم بعكده حاجب وسألها.

علي : انتي شكد عمرج..

مريم : ليش تسأل؟

علي: هيج مجرد سؤال خطر ابالي وحبيت اسألج.

مريم : عمري ١٤ .

علي : هاا بس ما مبين.

مريم : شلون يعني مامبين.

علي : عبالي بكدي..

مريم : ليش انت شكد عمرك..

علي : انه ١٧ سنه ..

مريم : العمر كله..

علي : شكرا  .

مريم : انت بيا صف

علي : خامس علمي.

مريم : هاا ..

سيلين : مرايم صيحيلي افونه اريد اكوم

علي : اسندج انه ..

سيلين : خاف زحمه عليك..

علي : لا يابه شمسوي قابل..

مديت ايدي لزمت ايده ومشيت دخلت جوه نمت..

ايفين
بعد اسبوع من انتكاسه سيلين بلش فهد يراجع دكتور نفسي رافقه الدرب هجان وابنه علي علمود يتعالج من صدك ، الجلسات مره  بالاسبوع واذا احتاج شي خارج الجلسه يروح مركز خاص بالعلاج النفسي ، وحددوله جلسات مرتين بالاسبوع يروح للمركز ومره يروح للدكتور ، دوامه اخذ اجازه اول ما وكع ادهم لان بات وياه بالمستشفى وبعدها صارت سالفه اتعس من سالفه وكملت بجلسات العلاج هاي شويه الشي ايجابي الصارلنه...

الما متوقع والمفاجئ من تندك الباب ويدخل ايمن يكول سوو طريق اجه عمي هاشم واجتي وياه روايه يريدون يشوفون ادهم ...

كبل صارت عيني على فهد الجان يلعب ويه حمودي مبتسم شلون تغيرت ملامحه ورجله كامت تهتز ، ارتبك حار شنو يسوي احسه فصل عن الكل وتفكيره كله انصب يم روايه ،..

فردوس : دخلهم من ذاك الباب ليطبون منا..

اعتقد استلمت الاشاره من فهد يمكن الكل انتبه عليه مو بس اني ،..

سيلين

كاعده بالهول اني والميته سويه وسمعت ايمن يكول اجتي روايه كبل اجتي عيني على ايفين وفهد ، ايفين عيونها على رجلها تراقب بيه وبحركاته ، فهد تغيرت ضحكته تحولت الى عكده حاجب ورجفه بعضلات الوجه يريد يلهي روحه ويبين هو ما مرتبك ويمشي الامور عاديه بس ماكدر سيطرت عاطفته وانفعالاته عليه ،،،

بينت داخله وشرحت احساسه ، باوعت لاختي حسيت بكسرتها ، ثنينه مكسورات وكاعدات ننتظر خساراتنه ، اني تطلكت وماعندي مكان اروحله غير هذا البيت بس قررت بيني وبين نفسي ارجع للشقه القديمه مالتي يم ابو عبد مجرد ادهم يسافر ، واذا فهد رجع روايه اخذ ايفين ويايه ونعيش وحدنه نعتمد على نفسنه كافي الصار تعبنه ثنينه وعانينه ، يكفي كسرتنه هسه شكبرها...

اكبر كسره بالدنيا هيه كسره الخواطر..

ايفين متحملت الوضع صعدت فوك ردت اكوم اصعد وراها بس مكدرت اسبوع صارلي بس نايمه ماكدر اكوم منا لهنا حتى الحمام افوته ويه ايفين ساندتني  ...

دخل عمو يوسف وحجه ويه فهد..

يوسف : كوم يابه سلم على عمك مادام اجه لهنا مو جنت ناوي تروحله هسه هو اجاك كوم وخلي تنتهي السالفه ونخلص..

فهد ساكت ويهز برجله بعصبيه..

يوسف : شبيك كوم مو وياك..

فهد : شجابها وياه..

يوسف : قصدك روايه..

فهد : منو غيرها..

يوسف : تريد اخليها تطلع من الغرفه وانت تفوت تسلم بس يابه لتنسى بينكم ولد وهاي امه راح يزعل ويشيل بخاطره عليك حتى لو ميبينلك ولازم بيوم من الايام تتصادفون الى متى تضل مهزوم منها.

فهد : مهزوم شنو بس مايعجبني اشوفها ..

يوسف : كوم سلم واطلع لتضل يمهم..

كام فهد وره ابوه باوعت عليه حك شعره متوتر.

نرمان..

جنت كاعده يم ادهم اغديه ودخلوا عمي هاشم وروايه انصدمت اني بحلم بعلم ضليت فاتحه عيني مستغربه وادهم مستغرب اكثر مني دخلوا سلمت عليهم وكعدوا وره شويه دخل والدي تسالموا ارتاحيت نوعا ما لهذا الصلح بعدها طلع والدي وره شويه دخل هو وفهد بسرعه عيني تحولت على روايه ردت اشوف رده فعلهم ثنينهم بهذا اللقاء شلون راح تكون..

فهد ماباوع عليها راح سلم على عمي صح صار صلح بس حسيت الكلوب متخدشه يعني شر لابد منه هيج حسيت سلامهم...

اما روايه عينها عليه فصلته تفصل ونزلت دموعها ضلت تمسح بيهن بكف ايدها ، التفت فهد راد يطلع ابوه كله..

يوسف : هاي ام علي يابه خاف ماشفتها..

التفت نص التفاته وكال.

فهد : شلونج ام علي..

مجاوبته دار وجها وطلع....

سيلين

طلع فهد من الاستقبال وكعد يمنه طلع باكيت الجكاير يشرب مرت فوك النص ساعه على جيتهم نزلت ضي من فوك تركض وتصيح ...

ضي : فهددددد فهدددد الحك ايفين...

يتبع...

متابعه ممتعه ..

عبير ادريس🤎