جذبني فمك البني

البارت الرابع والستون

كشف الحقائق

كان بريئا انا التي تلاعبت به
انا غيرته انا حطمته ..

كعدت راسي يوجعني ودايخه فتحت عيني بصعوبه، اني بغرفه شايفتها بس وين ضليت استذكر هاي وين شايفتها وين ياربي المكان مو غريب عليه ، شايفتها بفلم لو حقيقة حرت ضليت افتح بعيوني واسدها ..

معقوله ادهم لو فهد وره سالفه اختطافي ، اخ ياسيلين وين جان ادهم وين صار بسببج انتي غيرتيه بغبائج تلاعبتي بمشاعره انتي حطمتيه كمت كلشي اتوقع منه لان بسببي احتمال خسر كلشي ياعمري قسيت وظلمتك وتكبرت عليك بيوم من الايام  بس لتنسى اني بكل هذا ظلمت نفسي...

باوعت اني نايمه بفراش شكله غريب زين اني ليش ماخايفه عبالك متأكده هذا ادهم ماعرف احساسي يكول هو بس لا ميسويها ههههههه ياالله عقلي شخط ...

كمت اضحك بعدين بجيتتتتتتتت وكأني عايشه بحلم مرعب ميقبل ينتهي عطتتتتت.

سيلين : تعبببببببت ياالله تعببببببت رحمتك الواسعه وينها شوكت تشملني شوكتتتتتت يارحيم ارحمني برحمتك ...

انفتح باب الغرفه واشوفه فات نطفئ صوتي تنهدت بضيق وصارت خنكه قويه بصدري كمت بالكوه اجر النفس تقدم بأتجاهي ببطئ واني اتجمعت ابالي كل الوساوس الادراميه كونت فلم اباحي بمخيلتي غمضت عيوني منتضره مصيري الاسود ورجعت بذاكرتي الضعيفه للموقف الذكرته ايفين وتصورت هو صحيح مأذيها بس هددها تنكر الموقف ...

زفرت بغضب ، شفايفي ترجف واني ادعي وامتمت بكلبي كلمات ادعي بيهن ربي يحفظني منه همس بصوت حاد..

فهد : اهلا بكِ في دولتي القمعية .

فتحت عيني وكمت اباوعله بهلع ابتسم ابتسامه خبيثه ..

سيلين : يعني شنو قصدك؟

فهد : انتي معجزتي ومحاولتي الاخيره برجوع ابني من بعد فراق دام ١٤ سنه تعرفين يعني شنو ١٤ سنه اب ميشوف ابنه ...

نبضات كلبي من شدتها حسيتها تريد توكف واني استمع لجنونه.. ..

سيلين : اني شعليه انت واهلك وزوجتك واخوك وعساكم احتركتوا بنار جهنم اني شكوووو اني شعليه بيكم شعليه بيك وبأبنك طز بيك وبشعورك وبأبوبتك تره انت كلش زودتها بيك خير تعالج وروح شوف ابنك تره صار رجال يعني يكدر يختار بينك وبين امه.

ضحك وكال...

فهد : هم صح كلامج انتي شلج دخل بس المصيبه  انتي زوجة العيشني  بهاي النار وبنفس الوكت يدري همه بالعراق ويدري هيه ما متزوجه وابني مو بأسم رجال غريب ولا يصيحله بابا ورغم هذا ما كال.

سيلين : انت شبيك ادهم شمدريه هيه نرمان عرفت من صعب انت ليش تفكيرك محدود .

فهد : لا ادهم يدري لان هو الوحيد استمرت علاقته ويه بيت عمي وخصوصا صعب وصعب ابد ما يضم سر عن ادهم يعني سرهم واحد.

سيلين : وانت ليش معتمد على ادهم مو انت _____ وبالك عنك وصيطك واسمك والدنيا حركتها وخربت حياتي وحياه اخوك ابنك ماكدرت تلكاه.

تقرب من الجربايه رفع تك رجل عليها وسند ايده على رجله وحجه..

فهد : سؤال جيد برأيج انتي انه مادورت ما نبشت عليهم نبش ما راقبت لحد ما مليت تخيلي مجند اشخاص يراقبون بيت عمي وين يروحون ومنين يجون وماوصلت لخيط يوصلني لابني..

سيلين : صارلك ١٤ سنه تراقبهم وما لكيت اثر شنو هالجذب...

فهد : لا من عرفت همه بالعراق خليت ناس تراقبهم بس قبلها ماجنت ادري عبالي فعلا مسافرين وين ماعرف ناس تكلي قجق ناس تكلي سافروا للشمال ومناك طلعوا سألت على اسمائهم بالمطارات صح مره مسافرين لدوله معينه بس اذا سافرت وين الكاهم وين ادورهم اشيل سماعه واصيح لهذا ايست وصدكت هيه تزوجت..

سيلين : منو كال تزوجت هيه الترتبط بيك تكدر تتزوج مره ثانيه.

ضحك ...

فهد : شوفي اول ما طلكتها رحت لعمي كال سفرتها جنت مصدوم عقلي ما مستوعب ويكدر يخطط ويتكتك..

قاطعته..

سيلين : قصدك مثل هسه.

فهد : عفيه مثل هسه اخذت ابوي وجدي وعمامي والدنيا كلها ،،
وكعت على عمي هاشم وهمه توسطولي يمه كدر يقنعني هيه سافرت وابني وياها.

سيلين : شلون ابنك سافر وانت ماعندك علم سامعه ميصير..

فهد : اخذو موافقه من المحكمه لان اخويه شهد ضدي انه خطر على حياتهم و وجودهم مهدد بالعراق لهذا سمحولهم بالسفر بدون ما ياخذون اذني شفتي زوجج شسوه بيه.

سيلين : هم رجع على ادهم متعوفه لخاطر الله..

فهد : المهم شنو رأيج بهاي الاجواء هههههه.

سيلين : انت موصاحي واليوم ثبتتلي هذا الشي..

فهد : شنو رأيج نسمع صوت دكتور ادهم هسه وصله الخبر تلكيه مفرفح عليج.

سيلين : لحظه انت شلون جبتني لهنا وشلون سمحولك تطلعني من العماره والدنيا صبح والشارع متروس ناس..

فهد : مو مهم تعرفين عود بعدين يسولفولج هسه كليلي تحبين نخابر ادهمج ونشوف معزه البني عنده .

حجاها وضحك.

سيلين : انت كلش تغار منه لان هو احسن منك واذكى ..

فهد : احسن صح بس اذكى لا غلطانه ..

سيلين : انت ذكائك بدهاء ومكر وهو عكسك ذكي بعلم نظيف وتربيه.

فهد : هواي مخدوعه بيه تره.

سيلين : حتى وان كان اسوء الناس يضل احبهم الى قلبي..

صفك وكال.

فهد : الله اعد ..

سيلين : سخيف.

فهد : توج دريتي.

سيلين : هسه شتريد.

فهد : اريدج تعيطين بصوت يبووووو ادهم الحكلي وبس كلشي ماريد.

سيلين : لو تموت ما عيشه هيج شعور لو تموت.

فهد : مو تخليني أأذيج من صدك وغصب عنج تعيطين..

سيلين : لو تموتني ماسويها..

فهد : نشوف .

طلع من الغرف ورجع جايب جلابتين صدك خفت بس مابينت..

سيلين : هاي شنو؟

فهد : اتداين منج اظفر.

سيلين: انت صدك تحجي؟

فهد : اي والله هاي اسهل طريقه استجوب بيها من اظفر واحد يكتولي الاول والتالي ..

سيلين : الله لا يوفقك انت فعلا مجرم مريض مختل عقليآ.

فهد : لا كلهن اتقبلهن بس سالفه مختل عقليآ صعبه شويه هههه.

سيلين : شكوك ادهم بيك بمحلها من كال عليك سايكو ..

فهد : هههههههههه لا بربج ادهم هيج كال.

سيلين : مقرف.

فهد : هاي عود تصلون وتاخذون غيبتي لعد اذا متصلون شتسوون.

سيلين : سايكو

فهد : اهوووو جلبت ياطركاعه السوده ..

سيلين : شبيك متصدك انت سايكوباثي..

فهد : متشرحيلي عنه بله اشوف نفس صفاتي..

سيلين : انت ابحث واقره عنه اني شكو ..

فهد : احجي شعدنه كاعدين بشرفج شيكضيه الوكت.

سيلين : ليش شكد ناوي تخليني هنا.

فهد : حسب سباعيه وشطاره وذكاء دكتورج ..

سيلين : شكد حقدت عليك ياربي بكد هاي الدنيا.

فهد : راح اتصل ونسولف وياه نشاقيه ندردش شويه وشنو اكلج تسوين لو اتداين اظفر منج.

درت وجهي مجاوبته..

همست بصوت ناصي..

سيلين: مخبل..

فهد : شكلتي ؟

سيلين : مكلت شي مو وياك.

رفع حاجبه وكال

فهد : هاااا..

طلع من الغرفه وعاف الباب مفتوح كمت راسي يموتني الله لا ينطيك شلون ضاربني ضربه بحيث فقدت الوعي..

طلعت وراه باوعت شنو من بيت هذا عبالك مال مخابيل كلشي بيه غريب ، بس الاستغربته اكثر اكو ركن مسويه مثل البار لعبت نفسي ....

البيت جبير بس مال منو هذا ...

افتريت ودخلت مكان اعتقد مطبخ ما مبين من شكله مطبخ لو ما الطباخ ماعرف هذا مطبخ جان واكف يم الطباخ ناطيني ظهره..

سيلين : احنه وين بيا منطقه؟

التفت عليه و بحلكه جكاره ضيق عينه وكال.

فهد : سويتلج ريوك تاكلين؟؟

سيلين : انت صدك تحجي .

فهد : غير انتي جايتني هيج وكت لا هو وكت غده لا وكت ريوك غير تنطيني خبر قبل لاتجين؟؟

سيلين : انت شبيك بابه، بس والله مقهوره عليك..

ضحك ودار وجها شال قبغ القوري بيده والقوري حار يفور صدك فاقد الاحساس...

كتفت ايدي وكتله.

سيلين : شوكت ترجعني؟

فهد : توج جيتي بعد وكت .

سيلين : لتستهزء احجي .

فهد : شوفي شغلتين اتخبل منها اذا حجيت حجايه ويجي غبي يكلي عيد مافهمت واذا سحبت طلقه ويكلولي لتضربها.

سيلين : لااله الاالله.

فهد : هههههه

سيلين : بس فهمني يعني اني عرضك مرت اخوك شلون طلعتني من العماره شنو كلت الهم زين مافكرت شلون ارجع اعيش هناك بعد الصار؟

فهد : فكرت بيها وكلت انتي اول وتالي راح ترجعين لادهم عليمن ظاله وحدج.

سيلين : بداعه ابنك من شوكت تلعب ويايه هاي اللعبه حلفتك بعد.

فهد : شنو قصدج؟

سيلين : قصدي واضح فهد ..

فهد : سأليني واجاوبج ماحب الحجي المبطن.

سيلين : شلون اندليت مكاني ؟؟؟؟؟

فهد : سؤال وجيه .

سيلين : جاوبني لتستهزء ..

فهد : يابه ما مستهزء غير اجاوبج.

سيلين : يله جاوب..

فهد : ندز صوت لادهمج وبعدين احجيلج كلشي .

سيلين : يعني انت متخاف عليه تريد تموته حرام عليك هو على ايفين شصار بيه عاد مرته ..

فهد : ميصير بيه شي لتخافين ..

سيلين : فهد الله يوفقك عوف ادهم والله اموت اذا صار بيه شي ابوس ايدك شوف انت دليني على بيت عمك واني اروح اوكع على ايدهم علمود يدلوني ابنك وين.

فهد : لا يابه عليمن تبوسين ايدهم وتنذلين همه راح يبوسون ايدي علمود ارجعج واشوف ابني بس صبر ..

سيلين : شلون نضل هنا وحدنه شنو يكولون اهلك اذا سمعو مو سمعتي وسمعه اخوك راح تتطين بالوحل.

فهد : اكلج اختج مرتي وعلى ذمتي ضلت اشهر تنام بصفي نفسي ما دنت عليها اله هيه بادرت تريدين نفسي تدني عليج تره انه مو بهالحقاره..

سيلين : ههههههه

رفع حاجبه وكال..

فهد : حجيت نكته ؟

سيلين : لا على كلمه الحقاره شويه استوقفتني..

فهد : ندز فويز علمود اطلع واجيج العصر.

سيلين : وين تروح وعايفني اخاف وحدي..

فهد : عندي شغل ارتباطات فارغلج انه.

سيلين : لعد شلون تفرغت وضليت تراقبني ؟؟

فهد : انه اراقبج شبيه تخبلت ههههه.

سيلين : انت دعمت سيارتي وانت ابو التخاطر وانت جنت تظرب الجام من بيتي صح لو لا..

فهد : ممكن بس مومعناها انه مراقبج جوز حبيت اتسله وياج اشاقيج شويه شبيج متحبين الشقه..

سيلين : تتسلى و تشاقيني واني ردت افقد عقلي ..

فهد : شبيج كلشي مابيج مثل الورده..

سيلين : شنو هالبرود البيك.

فهد : بيض عيون لو خشم.

سيلين : نعم.

فهد : كاعد اكلي شبيج.

سيلين : استغفر الله ربي الله يتمم علينه العقل.

فهد : فعلا نحتاج دعوه جماعيه انه وياج هههه.

هزيت ايدي وعفته رجعت للغرفه كلبي يفور بالي يم ادهم شلون اذا سمع شنو راح يصير بيه والله يتخبل شلون ياربي حتى ما ادري اني وين لا عندي فلوس لا جايبه موبايلي استغفر الله ربي واتوب اليه.

وره شويه اجه وصاح من وره الباب.

فهد : مرت اخي لابسه حجاب افوت؟؟

سيلين : فوت هو انت خليت بيها حجاب..

طب يضحك خله الصينيه كبالي وكعد..

سيلين : شنو هاي ؟

باوعلي ورجع باوع للصينيه جاوبني مستفهم بنضراته بعدين كال..

فهد : شنو ؟؟

سيلين : بصل .

فهد : اي بصل عليش مستغربه.

سيلين : هذا كله تاكله وحدك ..

فهد : حسبت حسابج غير.

سيلين : انت كل عقلك راح اكل وياك .

فهد : تموتين جوع يعني..

سيلين : فهد انت تعرف السويته شكد جبير وصعب شو ماخذها بالضحك يعني متخاف اذا اشتكيت عليك من اطلع منا.

فهد : لا ماخاف..

سيلين : شلون يعني متخاف؟

فهد : مامسوي شي غلط .

سيلين : شلون مامسوي وانت خاطفني..

فهد : منو يثبت انه خاطفج ؟؟

سيلين : شلون طلعتني مغمه عليه وتجاوزت الناس كلها محد شافك كامرات اكيد صورتك.

فهد : طلعتج كبال الناس كلها شبيج انتي ..

سيلين : محد سألك وين ماخذها وانت منو؟

فهد : انتي عليش مدوخه نفسج ومدوختني  وياج تريكي ويجيج الصافي.

سيلين : ياصافي اليجيني اكلك اريد اطلع مناااا رجعني لادهم حرام عليك تريد تموته انتتتتت.

فهد : لتصيحين وتطلعين خبالي عليج خليني كاعد ومسيطر على الوضع اكلي يله.

حجاها بنتر..

سيلين : ماريد اخذ اكلك واطلع بره.

فهد : عيب تطرديني هاي غرفه نومي تره.

سيلين : وففه تدري بيك عندك بيت هنا .

فهد : شلون متدري هواي جايبها هنا.

سيلين : خوش مسويلك مقر كم واحد خاطفه وجايبه هنا.

فهد : خاطف شنو هههههه شبيج بابه.

سيلين : تريد تقنعني انت مو مجرم.

خله ايده على ذقنه وكال..

فهد : هذا الوجه البريء مال مجرمين برأيج ..

سكتت مجاوبته كمل اكله شال الصينيه طلع ورجع شايل موبايله بيده تقرب وكف قريب مني وكال.

فهد : شوفي ندز فويز ويعرف انتي يمي افضل ما يضل يدور عليج وحاير منو اخذج ولو هو راح يعرف اني هههه بس اطمنه..

سيلين : هسه يعرف لتخاف .

فهد :ممممممم هسه ندز لو شلون؟؟

سيلين : مادز..

فهد : كيفج ..

عافني وطلع..

_____

ايفين

الليل كله ضلينه كاعدين يم عمو حلكه يبس هلكد ما فرفحت روحه نرمان جانت كاعده يمه وضلت تحجي وياه هواي..

نرمان : حبيبي اعرف مقدار القلق والخوف والشك البداخلك بس صدكني تروح وتصير سوالف انت بس قوي نفسك واتمالك اعصابك كلشي يهون وينحل...

جان متمدد على القنفه وخال ايده على عينه همس بتعب.

ادهم : اليوم اصعب يوم مر عليه هواي شكوك انزرعت ابالي هواي عندي اسئله اجهل اجابتها ادهم صار اضعف من طفل عمره خمس سنوات لا يعرف يفكر ولا يعرف شنو يسوي تكسرت اخوج ضرب ضربته وقضى عليه شنو من نفسيه مهجج زوجتي ودمر صحتها خسرني شغلي ورجعني للصفر اجيت هنا ادور عليها مثل المخبل وشافني شكثر تعبان ومتدمر وافرفح عليها وهو واكف يتفرج عليه شلون اذوب واحترك وكعت هو شالني وداراني عبالي صدك سندي وحزام ظهري طلع يمثل عليه ماعرف ضميره يأنبه لان مرات اشوفه يبجي فوك راسي تصورت على حالتي الصحيه لان تدهورت ، طلع ضميره يأنبه بس لا هذا منيله ضمير ....

نرمان : ادهم هدأ اعصابك وريح بالك وفكر زين شنو راح تسوي اكيد فهد مخطط لشي او مساعد سيلين واحتمال هيه متدري انت مسافر زين رقمك العراقي وينه ليش مافعلته احتمال اتصلت عليك وماكدرت تتواصل وياك لا تظلمها ...

ادهم : الشريحه تركتها هناك ليش انه ضل عندي فكر حتى اجيبها وصلت لهنا يله تذكرت وتعال روح للشركه وجيب الوصل وطلع شريحه جديده اختصرتها اشتريت وحده جديده وهم مو انه اشتريتها ضيغم ما اجتي ابالي حلول وماجنت افكر بشي سوى وينها وين راحت ماتت عاشت تره الصارلي مو قليل نرمان الصارلي شي اشبه بالموت تخيلي اعز انسان على كلبج يضيع منج غفله والدنيا جبيره وين الكاها وين لو ابيع العندي والماعندي ما الكاها وتريديني افكر صح...

نرمان : كم مره رايحه للبيت سيلين.

ادهم : البغداد قصدج؟

نرمان : اي..

ادهم : هواي جايه بس انه جنت مريض ونايم شمدريني من صحيت ورحت سألت الجوارين كالو اجتي بنيه سألت عنكم اكثر من مره..

نرمان : لعد ليش شكيت بيها هيه لو عدها شي جان ما اجتي وسألت عنك.

ادهم : نرمان نسيتي اخر فتره شلون كامت تمثل عليه حتى مشاعرها مو حقيقيه جانت بارده وتمثل الحب غير هذا اكثر من مره كالت اذا اخذتني غصب تندم وادهم شتسوي اذا عفتك ورحت مرتين عادتها عليه غير الرهن متراهنه ويه اختها تهدمني سمعت من فهد ومن واجهتها كالت ساعه عصبيه من حجيتها عدا من خابرتها جنت مسافر كالت اسبوع اذا ما رجعت اكلب حياتك ،

رجعت لهنا وشفت تصوير كامرات يأكدلي هيه مهزومه بليل وصاعده سياره مجهوله ماعرف المن موبايلها مسجاتها ويه سامر ومن خابرته اكدلي هيه عدها علاقه بيه ،
ومن الكاها انصدم بالقوه والجرئه العدها فاتحه بيت وعدها شغل وسياره خاصه ورجعت للكليه ، كل هاي متخليج تشكين كلها ادله يعني لو اموت عليها هم اكون غبي اذا ما شكيت..

نرمان : هم صح بس لتنسه انت عليك الحق من عفتها جانت اعصابها ضعيفه وتعبانه .

ادهم : هيه هاي غلطتي الماتغتفر عفتها بهيج وضع بس صدكيني يانرمان جنت مضطر هم شغلي وهم وظيفه محترمه وبيتي وردت اعالجها هناك  ..

نرمان : ان شاءالله ترجع علاقتكم وتسافرون وتبنون روحكم من جديد الفلوس تروح وتجي بس العافيه اذا راحت او شخص عزيز هنا المصيبه ..

ادهم : فدوه الها هو انه يايوم اهتميت لفلوس حتى هسه اهتم ..

نرمان : شهادتك تجيبهن كلهن صدك.

ادهم : الله كريم ..

نرمان : على شنو ناوي باجر؟

ادهم : باجر يجون عمامج وولدهم ابرئ سيلين وبعدها اسوي جره اذن لفهد.

نرمان : شتسوي يعني؟

ادهم : بعدين تعرفين.

نرمان: ادهم راح تزيد الحقد والعداوه بينكم.

ادهم : تريدين اعوفه بله حساب وهو دمر سيلين وشوه سمعتها ..

نرمان : بعد صارت ياعيني روح جيب مرتك وبرئها  كدام الكل مثل ماكلت واخذها وسافر واخلص من الهم ..

ادهم: اربيه اول يله اروح.

نرمان : هسه انت عصبي ارتاح وبعدين نحجي ، صدك شوكت تجيب سيلين..

ادهم : باجر بعد الظهر اروح اجيبها بأذن الله.

نرمان : متلهفه اشوف اللقاء ...

ادهم : انه خايف منه.

نرمان : ليش ؟

ادهم : ماعرف شنو راح اسوي شلون نتعاتب شنو احجي خوفي لا أأذيها بالكلام شلون اذا قسيت عليها كلبي محروك منها شلون هيج تصرفت على الاقل تتصل بيه شلون تتبع فهد وتأمن بيه المفروض تجيج او تروح لاختها تدبر موبايل تتصل تبلغني تشوف رأيي بالموضوع هواي تساؤلات ابالي ..

نرمان : اكعد وياها واحجوا راح تلكه كل الاجوبه.

ادهم : كلها بكفه ودعوه الطلاق الرفعتها بكفه ثانيه..

نرمان : دخت اني ادهم.

ادهم : انه شكول لعد ؟

نرمان : الله يساعدك ، هسه ما الله يهديك وتتعشه حتى تاخذ حبوب الضغط اكيد هسه صعد وانت عندك جلطة سابقا ياعيني دير بالك على صحتك..

ادهم : ما اشتهي ابد ..

نرمان : علاجك شلون؟

ادهم : جيبيه اخذه.

كامت جابتله العلاج ومي اخذه وغمض عينه اباوع على عضلات وجها تتحرك بغضب..

للصبح اني ونرمان كاعدين يمه بس لا هيه تحجي ويايه ولا اني واصلا بوجهي متباوع اخذت موقف السكوت بيا عين احجي وياهم ..

ساعه تسعه بلشت الكرايب تتوافد للبيت بس اعلبهم رياجيل ، نسوان قليل اجتي بس نسوان عمومتهم..

السمعته جايين ولد عمهم الجبير هاشم، صعب واخوانه اربعه ..وعمهم طالب و ولده وعمهم مشتاق و ولده..
بس الوحيد الما اجه عمهم هاشم ابو صعب..

حجوا بهدوء بعدين تعالت الاصوات كلها ذم بفهد اخر شي دزو عليه لبست عبايه وطلبوا مني اوكف وره الباب واحجي ، عمهم وكف يسألني واني اجاوب وكل شويه يكلي علي صوتج ميسمعون..

حجيت كلشي ارجف خوف وخجل من السويته بأختي...

_ هاهيه روحي ..

عفتهم ورحت كعدت بالهول اجتي عمتي.

فردوس : ادري ابنج مات جوع شوكت توكليه..

ايفين : هسه..

اخذته منها ورحت للمطبخ ماكو عشر دقايق وانخبص البيت انثبرنه ثبر ماشوف اله الولد طلعوا بالطرمه وياهم ادهم محاوطيه اغلبهم شايل اسلحه ،،، اعتقد بيهم منتسبين بالجيش ، عمهم هاشم مكانته جبيره واصل بالدوله،،
عمو يوسف عنده نفوذ بسيط بالدوله وفهد هم بس الباقين ماعرف المهم طلعوا ويه ادهم شنو الصار وهيج خلاهم يطلعون بسرعه رحت للهول استفسر شنو الصار وخلاهم هيج ينخبصون..

ايفين : شكو شصار؟

عمو يوسف كاعد وحاط ايده على راسه نرمان واكفه مكتفه ايدها وصافنه على ابوها شافتني دارت وجها..

ايفين : شكو نرمان صاير شي؟

نرمان : ماعرف بس على الاغلب رجلج خاطف سيلين .

ايفين : جذببب شمدريج وشلون عرفتي؟

نرمان : هسه خابرو ادهم كلوله زوجتك اجتي سياره مال مكافحه طبكت باب العماره ونزلو منها زلم لابسين زي عسكري اوكف ما اوكف جتفو ابو العماره وصاعد واحد للعماره نازل شايل بنيه على جتفه ماعرفوها منو مغطيها بعبايه من نازل كايل الهم اني اقاربها من رايحين صاعد ابو العماره وشايف باب سيلين مفتوح داخلين للشقه لاكيها ماكو وقبل بيوم شافين واحد كاتب رموز على سيارتها وعلامه x وكاتب على البنيد رقم ٦ و٧ وحرف F مصوريها ودازيها لادهم وتخبل عرف هو ماخذها اتصل عليه كايله ابني مقابل مرتك والك اسبوع اذا مارجعته اليه انسه مرتك..

ايفين : صدك تحجين؟

نرمان : ومن شنو مستغربه يعني السويتوه لاشيء من السمعتيه هسه .

جريت نفس قوي وكتلها..

ايفين : لا ما استغرب شي بعد..

.....

سيلين

جنت مفرفحه واصيح عليه لان استفزني هواااي دك موبايله اشرلي اسكت ضليت عاكده حاجبي وخازرته..

شافني ضحك وهز راسه ، فتح سبيكر قربه من حلكه وكال.

فهد : توني احجي بيك ابن الحلال بذكره.

اجاني صوته يابه كلبي راد يوكف يحجي متوسل وصوته يرجف..

ادهم : لتأذيها فهد بداعت الخوه ...

فهد : ياخوه هاي ياخوه..

صار عصبي وكام يحجي بصوت يرجف..

ادهم : فهددددد اذا اذيتها ادمرك والله اطلع من انسانيتي وادمرك لتنسه ابنك ومرتك يمي اخليك بحسرتهم ومحمد..

ردت احجي خزرني و لزم اصبعي لواه قوي عطت..

ادهم : لك عوفها جبان كدرتك على النسوان يانذل مو ووووووياك  عوفها فهدددددد.

فهد : اوكف وحده وحده تريد تاخذ ابني وزوجتي مره ثانيه وتخفيهم يعني تعترف انت تعرف مكانهم وساكت كل هالسنوات.

ادهم : ماعندي علم بيهم ولا شايفهم تريد تصدك متصدك طز بيك يابه يافهد اذا مسيتها بورده ارشك بدم.

فهد : هسه بدال ما نتناحر وبدل المهاترات هاي طيب خاطري بكلمه وكلي ابنك العصر تسمع صوته وباجر تشوفه وانه اجيبلك مرتك بيها شي اصلا اسهل منها ماكو بس انت مصعبها..

ادهم : ما ادري بيهم وين والله العظيم ما ادري..

فهد : مشكلتك عندك اسبوع واحد بعدها انساني وانسه سيلين..

ادهم : هيج ايفين ومحمد ميهموك ؟؟

فهد : تعودت على الخسارات عادي ابدي حياتي من جديد واكون عائله ويه سيلينتك ونعيش طبيعي ونجيب درزن جهال وانت ربي جهالي..

عاط ادهم بعلووو صوته.

ادهم : لككككككككك لاتحجيها حتى بالشقه نذللللل .

فهد : صوتك طرشت اذني كتلك علي مقابل مرتك تره انت مصعبها.

ادهم : بسيطه فهد انه اعلمك سنه تلعب عليه سنه.

فهد : وانت ١٤ سنه لعبت عليه خسارتك مقابل خسارتي لا شيء ،،
سنين عمري راحت هدر وانه ادور ابني وما لكيت اثر تخيل ١٤ سنه انه متوهم ابني مسجليه بأسم رجال غريب ويصيحله بابه لان ما خليت مكان مادورت على اسمه وين ماروح اسأل على اسم علي فهد يوسف ما الكاه اختفى اجتي فتره ايست كلت مات وضامين عليه لهذا يا دكتور خساره سنه من عمرك لا شيء يم ١٤ سنه من عمري..

ادهم : انت وين ؟

فهد : جيب علاوي واعزمك على سمج مسكوف وبصل من ايد سيلينتك واخوك..

ادهم: يابه اذا لزمت شعره منها امرعدك..

فهد : مفرداتك مو مال مثقفين منين تعلمتهن.

ادهم: فهدددددددد انت وين ؟

فهد : لتصيح كتلك بنص الخير كاعدين ونسولف مكانك
خالي.

ادهم : انطيني سيلين احجي وياها اريد اتأكد هيه بخير..

فهد : ابني اول

ادهم : انسه عندك ولد اسمه محمد وايفين انساها واريد اشوف شلون تلوي ايدي بسيلين.

فهد : متسويها.

ادهم : اسويها ومحمد وشوف يافهد اذا ما ثبتت عليك كل التهم وبشهود عمامك و ولد عمامك وهاي المكالمه تسجلت ياغبي نهايتك على ايدي..

فهد : خوش تعلمت تحارب احييك .

ادهم : اذا ما رجعتك للمصح بيدي انه ما اتسمى ادهم وبرجلك تفوته وانت الممنون ...

فهد : اروح بدون متحجي لان انه تعبت واريد ارتاح بس رجعلي ابني والله ماريد منك شي..

ادهم مجاوبه وسده بوجها ...

فهد تخبل ركع الموبايل بالكاع تفلش فقد اعصابه كام يكسر بالغراض تحول وحش خلال لحظات حول البيت طحين كلشي ما سلم منه كعد بالكاع مد رجله سحب باكيت الجكاير من جيبه ورث جكاره وكعد يدخن .....

عفته ورحت للهول كعدت بالي يم ادهم ياربي تعدي سلامات يارب..

وره نص ساعه طلع من الغرفه اجه وكف يمي طلع موبايله الثاني وخلاه كبال حلكي ..

فهد : عيطي بعلوو صوتج واذا ما سويتيها اضطر امد ايدي عليج واخليج تعيطين من صدك.

سيلين : لو تموت ماسويها..

فتح تسجيل وجرني من شعري حيل تأذيت وطلعت صرخه مسموعه مني ...

فهد : عفيه عليج..

حجاها ونتر راسي وراح كعد على القنفه المقابيلي.
عاكد حاجبه ويكتب بالموبايل عرفت دزها لادهم...

فهد : ننتظر ونشوف معزتج عنده شكد..

سيلين: نهايتك على ايد ادهم وشوف ...

ربت على القنفه الكاعد عليها وعدل الجرجف وكال..

فهد: خلينه ما نسبق الامور انتي بنيه ذكيه بس سوالفج بيها غباء شويه..

سيلين : نشوف بالنهايه منو سوالفه غبيه اني لو انت ؟

عفته وكمت رحت للغرفه مجرد سديت الباب دموعي نزلت واني اتذكر صوته اليرجف والمتوسل بعدين علت نبرته وصار يهدد اوووف ياحبيبي شوكت انجمع بيك واحجيلك كلشي وافهمك الصار..

ضليت كاعده مطلعت بس رحت للحمام توضيت ورجعت للغرفه باوعت لا سجاده لا اعرف القبله وين وكفت صليت على نيتي وان شاءالله ربي يتقبل ضليت ادعي وابجي...

مر اليوم عادي وبعد مشفت فهد ثاني يوم هم مشفته يدك الباب ويصيح من وراها ...

فهد : هذا اكلج بالباب عود اكلي..

بالبدايه كابرت بعدين بطني مغصتني طلعت اخذت الاكل جايب لفات ثنين وعصير كعدت اكلت لفه والثانيه عفتها بالجيس...

قررت ما احجي وياه ابد ولا اروح يمه خاف يأذيني لان وضعيته ختلفت وره اتصال ادهم حسيته توتر واوضاعه تخربطت..

بليل اريد انام راسي يوجعني وتفكير الليله المضت اني منايمه غير ساعه غلبني النعاس وراها فزيت وضليت كاعده للصبح ، وهسه نعسانه كلش..

توتي غمضت عيني اريد اغفه واسمعه شغل اغاني صعد الصوت صار عالي كلش عالك اغنيه ...
لو هالمركب لوما نركب
لو هالملعب لوما نلعب
احنا عكال الزلم الزينة
من اطيح الدنيا تخرب
احنا الجرينا اذن الدنيا
لو طكنا طكنا مجرب
ونجدح جدحة النار نسوي
الزلم طشار نحجيها والكل تسمع
خلوها الزلم ترجع
ها ها ها ها ها
وخلي الما فهم يفهم
اليرشنا بمي نرشه بدم
يا باطل احنا اهل الحك
ولا منخاف احنا من الطك
اسمنا من تكولة الناس
بحروف الاسم تشرد..

كل شويه تخلص ويعيدها بحيث حفظتها على الغيب اخر مره من عادها كمزت من فراشي فتحت الباب لكيته كاعد بالهول مسوي جو ..

سيلين : ادري ممليت تره راسي انسطر اريد انام.

شال السلاح من الطبله وياشرلي بيه ويغني بصوت يجر الحجايه جر..

فهد : ياباطل احنه اهل الحك لا منخاف احنا من الطك وها ها ها...

خفت منه حسيته مو طبيعي فتت للغرفه سديت الباب ردت انام مكدرت صوت عالي وهو صوته اعله...

استغفرت ربي وغمضت عيني للصبح مكدرت انام لان هو كاعد وصوت الاغاني كلها مدري شلونها تدك بالراس..

باوعت ساعه ٧ ونص الصبح طلعت من الغرفه لكيته نايم على القنفه رحت بأتجاه السماعات اريد اطفيهن مديت ايدي طفن من وحدهن التفتت بأتجاها  لكيته كاعد وبيده الموبايل رفع عينه باوعلي وكال.

فهد : طفيتهن..

حجاها وشمر الموبايل على الطبله كباله رجع نام وخله ايده على عينه هاي الحركه هو وادهم مشتركين بيها ثنينهم من ينامون يخلون ايدهم على عيونهم ...

سيلين : فهد كوم وديني ..

جاوبني بتثاقل وصوت مليان كسل..

فهد : وين اوديج..

سيلين : وديني لادهم لو ترجعني للشقه ..

فهد : روحي نامي وتغطي زين بارده تره..

سيلين : الله يهديك كلشي ماكول..

حجيتها وفتت للغرفه مرت الساعه وتبعتها الاثنين وصارت ٣ ساعات واني على كعدتي سمعت موبايله دك كمت وكفت يم الباب فتحتها شويه سمعته يكول.

فهد : فلوسج وصلتج بعد شكو ، ورامي حسابه واصل من زمان ....

فتحت الباب ركعتها بعصبيه وطلعت وكفت كباله كتفت ايدي وخزرته باوعلي وكال..

فهد : سيلين تسلم عليج.

حجاها وضحك نهى المكالمه وضل يكلب بالموبايل متجاهل وجودي..

سيلين : هاي نسرين مو ؟

فهد : سلمت عليج.

سيلين : احجيلي كلشي ليش لعبت عليه وشنو جان هدفك..

فهد : اذا حجيت تصدكين بيه لو تكذبيني..

سيلين : مستحيل أأمن بيه لو اثق بس مع ذلك اريد اسمعك هواي تساؤلات تعصف بدماغي اريد افهمها واجابتها يمك..

فهد : منين تريدين نبدي..

سيلين : من طلعتني من البيت شنو جان هدفك ؟

فهد : اعيش رجلج العشته.

سيلين : زين انت جنت مخطط على هالشي من البدايه يعني من اول ما طلبت مني المساعده.

فهد : لا

سيلين : لعد شوكت؟

فهد : من عرفت روايه وابني بالعراق .

سيلين : لعد على شنو جنت ناوي من طلبت مساعدتي..

فهد : كلت بلكت تحجين ويه ادهم ويبلغج بمكانهم واروح اجيبهم فضت راحت بس من عرفت هاي السنين كلها همه قريبين مني وانه غافل لا تغير الوضع كله وانتي جنتي الضحيه بس رغم هذا ما عفتج وهواي ساعدتج .

سيلين : انت ساعدتني ؟

فهد : اي

سيلين : شلون بله؟؟

فهد : رحت لابو الملك تكفلتج يله قبل تكعدين بالشقه.

انصدمت اريد احجي ماكدر جاوبته بصوت ضعيف..

سيلين : جذب

فهد : بكيفج عليه احجي وعليج تصدكين او لا.

سيلين : زين شمدريك اني طلعت من البيت ودورت على سكن جديد..

فهد : جنت مكلف ولد يراقبج..

سيلين : يعني مو انت تراقب.

فهد : ماعندي شغل وعمل اوكفلج بالباب كلفت ولد وماقصر وانه ماقصرت وياه بالفلوس.

سيلين : منو هذا رامي خطيب نسرين.

فهد : اي عفيه.

سيلين : وهذا منين تعرفه.

فهد : منتسب ..

سيلين : وهذا ماعنده دوام مكابلني وكاعد.

فهد : هههههه لا اكيد عنده بس سابقا لان فصلوه تجاوز على ضابط واكل علقه معدله وفصلوه بس الضابط جان يستاهل استهزء بيه بنص الجنود ورامي ماسكت لهذا ضل ابالي هذا الولد وحبيت اساعده..

سيلين : وشلون وافق يساعدك شنو كتله؟

فهد : شبيج ترجفين تعاي كعدي واحجيلج كلشي.

حجاها واشرلي  بيده على المكان البصفه..

سيلين : معليك مني احجي ..

فهد : كتله زوجه اخويه زوجها سافر وانه عندي دوام ماكدر اتواجد هواي عينك عليها واي شي يصير خابرني.

سيلين : نسرين شنو زوجته لو صدك خطيبته؟

فهد : زوجته وعدها بنيه..

سيلين : تقربت مني بطلب منك لو شنو؟

فهد : اول شي همه محتاجين شغل وتعينت بالمكان الجنتي تشتغلين بيه تواصلها جان ويه زوجها ورامي يوصلي اخبارج اول بأول بس اخر فتره تواصلت ويايه ..

سيلين : الشغل انت بطلتني منه مو ؟؟

عكد حاجبه وكال.

فهد : اي شغل قصدج ؟

سيلين : الجنت اشتغل بيه وبطلوني غفل قبل لا اتعين بالشركه..

فهد : ماعرف

سيلين : جذاب.

فهد : وداعت ابني ماعرف عبالي انتي بطلتي واساسا انه دبرتلج شغل بالشركه الاشتغلتي بيها بعد شلون بطلتج..

سيلين : كم رقم ادهم عنده؟

فهد : شمدريني.

سيلين : رقمه نهايته ٨١٩ لو ٩٠٨..

ضحك ..

سيلين : جاوبني ..

فهد : رقمي نهايته ٩٠٨..

سيلين : شلون رقمك ؟؟

فهد : رقمي والله.

سيلين : شلون تعال فهمني

فهد : شفهمج سألي واجاوبج.

سيلين : الرقم هذا جان يدزلي شغلات تخص علاقتي بأدهم شلون بعد رقمك.

فهد : مادزيت بس رسالتين منه.

سيلين : ياهنه.

فهد : ههههههه وحده منهن كتلج بيها انجلت الغيمه البيضه عن سمائج وهيج شي ..

سيلين : موسم الغربان وجنت اعرف صحبتج سيئه ومن هالخريط صح.

ضحك وكال.

فهد : صح ..

سيلين : زين ليش وبعدين انت شلون سمعت حديثي ويه نسرين حتى تدزلي كافي تخسرين ناس ازيد.

فهد : والله جانت نيتي نصيحه الج لان ردت تستمرين ويه نسرين ومتخسريها اما شلون سمعت هيه جانت تسجل صوت وتدز لزوجها وهو يدزلي ..

سيلين : شلون عرفت رقمي الجديد.

فهد : ميرادلها علم اكيد من نسرين..

سيلين : كم مره راقبتني..

فهد : ولا مره بس من عرفت ادهم عرف مكانج ترصدتكم مرات اجي ومرات اضل على تواصل ويه رامي يجيبلي اخباركم كتله اذا التقت خطواتهم بلغني بس العرفته الدكتور جان شاك بيج ويريد يتأكد من شي لهذا ضل يراقبج...

سيلين : شوكت عرفت ادهم عرف بمكاني ..

فهد : بيوم السويتي بيه التخاطر..

سيلين : شلون عرفت ؟؟

فهد : جنت واكف باب العماره ردت ادخل وهو طب استغربت شعنده بهاي العماره من اصعد لكيته مأجر شقه وبعدين دخل لشقتج..

سيلين : وشلون صعدت للعماره وابو عبد موجود.

فهد : كتلهم عندي اقاربي هنا جاي زياره وصعدت....

سيلين : على شنو جنت ناوي من هيج سويت وشنو غايتك..

فهد : على شنو جنت ناوي نويت اخذج يمي يومين استضافه يعني شلون هسه واساوم الدكتور على ابني بس هو خرب كلشي..

سيلين : وليش التخاطر يعني..

مدد رجله على الطبله وطلع باكيت الجكاير ورث وحده نفخ الدخان وكال..

فهد : قريت عنه يخلي الانسان يفقد الوعي وانتي منا شاخطه كلت ماراح تعبني ولا تعيط اخذها وانزل تكون بين الصاحيه وبين لا واذا احد سألني انه مغطي وجهج اكول اقاربي تخربطت وخابرتني اوديها طبيب  ...

سيلين : انت شنو من بشر شلون هيج تفكر انت شيطان والله..

فهد : شسوي ذكي مو بيدي..

سيلين : زين من طلبت منك اريد حبوب تخليني انام ليش كتبتلي نوعيه قويه شنو جانت غايتك هم تخطفني...

فهد : لا عرفت ادهم يراقبج ماحبيت اجازف بهيج شي بس ساعدتج من صدك ...

سيلين : والله سوالفك السويتها بيه لو اسولفها محد يصدكني وعبالهم اني مخبله واتخيل.

فهد : بالفعل وهذا الراح يصير وين ما تحجين محد يصدك ولتنسين انت مريضه نفسيآ يعني محد ياخذ بكلامج لا امن ولا غيرها احتمال ادهم يصدك بيج وبس..

سيلين : انت الجنت تضرب جام بيتي بالحجار..

فهد : اي .

سيلين : ليش ؟

فهد : جنت مو صاحي ثكلت بالشرب وماحسيت اله انه كبال شقتج.

فركت وجهي اريد استوعبه لهذا البشر الكدامي ماكدرت..

فهد : كعدي ما تعبتي؟؟

سيلين : التهنئه والورد والكارت الكاتب بيه ابقي هادئه منك لو من ادهم ؟

ابتسامه انرسمت على وجها..

فهد : مني .

سيلين : ليش ؟

فهد : شفتج متوتره حبيت افرحج.

سيلين : جنت تدري بأدهم يعرف مكاني من دزيت الورد.

فهد : لا والله صدفه صارت..

سيلين : زين ليش تلاعبت بمشاعري واذيتني تدري اني عبالي ادهم سوه كل هالشغلات..

فهد : حبيت اسوي الواجب وبس هاي موزينه.

سيلين : انت ضربت سيارتي لو ادهم؟ اكيد انت ميحتاج سؤال بس ليش؟

فهد : جنت سكران ردت اطبك تعرفين الجارجر سريعه  ماحسيت اله لازك بسيارتج ومفلشها وهي جنها سياره ام الخيط من جنه صغار نسحب الخيط ونخليها بالكاع تمشي ههههه شمدريني بس اطخها تنشال بيومها رجعت للبيت خربان ضحك بس ثاني يوم وصيت رامي يشوفلج مصلح زين وهو تكفل بتصليح سيارتج رجعها جديده تتذكرين بوكتها كلج خليها عليه ردت انه ادفع بس بعدين انتي رحتي سحبتي من عمو ...

حجاها وضل يضحك.

سيلين : واني عبالي هو هيج سوه لان يعرف ضميري يانبني اسوي شي غلط وتصورت راد اسحب اكثر واتأذه اكثر يعني اني اساعدج وانتي اذيتيني لك عيشتني شعور لو اكصكص من لحمك ما ارتاح.

فهد : جان سألتيه انت هيج سويت لو لا كم مره اجاج للشقه..

سيلين : ولا مره اجاني واني صاحيه خاف عبالك ملتقين وحاجين سوه.

فهد : هههههههه لوتي الدكتور مداري وضعه.

سيلين : انت كتبت على الباب بس اكيد مو انت لان القريته شي خاص بينه محد يدري بيه .

فهد : لا هذا اختصاص رجلج ..

سيلين : والرقم الثاني لادهم صح.

فهد : صح..

سيلين : زين ليش جنت تدزلي وتغلقه.

فهد : هيج دواعي امنيه.

سيلين : خفت ابلغ عليك يعني

فهد : مو خفت وانما تحذرت ازيد.

سيلين : زين ليش شغلتني بالشركه ولتكلي ردت اساعدج لان ما اصدك.

فهد : فعلا ردت اساعدج لان انتي ما الج ذنب بالصار وضميري انبني عليج وصيت عليج وبس بعد اي شي معليه الصارلج كله من ادهمج.

سيلين : لحظه يعني مو انت السبب بطلوني من دوامي.

فهد : لا

سيلين : ابو عبد البواب يدري بيك انت الموصي ابو الملك عليه..

فهد : لا

سيلين : شنو كتله وقبل يأجرلي ..

فهد : كتله انه ال______ فهد يوسف عمران هو انخبص سيدي ما سيدي وتدلل ومن عيني كتله اريدها بسريه تامه واسمي ما ينجاب بالطاري كال تأمر وتمت والشركه نفس الشي وصيت عليج وطلبت اسمي ما ينذكر..

سيلين : عقلي ربي احفظلي عقلي راح انجن..

فهد : عليمن تكبرين وتنسين..

سيلين : ماعرف ادعي عليك لو ادعيلك ربي يشافيك..

فهد : ادعي اشوف ابني وبس.

سيلين : ادهم شلون استقبل الخبر وشنو جانت رده فعله؟

فهد : ياخبر ؟

سيلين : خبر هروبي من البيت مثل ما انت فهمتهم.

فهد : ماسوه شي دورنه عليج وبس..

سيلين : ضليتو سنه ونص تدورون عليه ..

فهد : انه اعرف مكانج هو دور وبعدين مل وسافر.

سيلين : مستحيل يسافر وميعرف مكاني وين.

فهد : كيفج لتصدكين.

سيلين : طبعا ماصدك لعد شلون عرف مكاني اذا هو مسافر..

فهد : خابروه ورجع ابسط منها ماكو..

سيلين : تدري خايفه عليك.

فهد : عليه

سيلين : اي

فهد : من شنو؟

سيلين : ادهم شنو راح يسوي بيك اذا لزمك..
_____

ايفين

ايمن رجع من السفر والعشيره كلها اجتمعت بيت عمو يوسف حتى عمهم ابو صعب اجه بعد ما رحنالهم اني وعمو ادهم ....

عمو بوكت هروب سيلين الكل تبره منه حتى ابو وجان وحده يلوب ويدور عليها لحد ما وكع وتمرض هسه الكل محاوطه ابوه عمامه ولدهم ، اهله كلهم وياه والكل اعلن الحرب ضد فهد .....

عمو بالضبط ينطبق عليه هذا الكلام .

كان وحيدا ف اصبح حزب وعشيرة ودوله ..

يتبع....

متابعه ممتعه احبتي ماضل شي للختام...💋

حبايبي هواي تسألون عن الكروب مال فيس واني تاركه الرابط بصفحتي بالواتباد وبس تبحثون عنه بالفيس يطلع اسمه روايات عبير أدريس ...