جذبني فمك البني

البارت الستون

جنت شايل دنيا بيدي
ومن لكيتك صفكت..

ادهم

____________

حقائبي بيد و اشيائي وكنزتي بيدي الاخرى
انا الان في دوله طقسها بارد وربما مثلج...

سماعة هاتفي بأذني استمع لرائعة من روائع عبد الحليم حافظ ...

شووف بقينا فين يا قلبي
وهي راحت فين
شوف خدتنا لفين يا قلبي وشوف سابتنا فين
في سكة زمان راجعين في سكة زمان
في نفس المكان ضاااااااايعين
لاجراحنا بتهدى يا قلبي
ولاننسى الي كانوا يا قلبي
شوف شوف

وكفت اشتريت شريحه وفعلت نت علمود اتصل بيها واطمنها عليه...

اتصلت ردت...

ادهم :تعرفين امشي ومبتسم اتذكر وجهج بأروقه الاماكن وممرات المطار حتى حجيت وياج بفكري تصوري الناس عبالهم دكتورج مصاب بالجنون...

سيلين : هههههه حياتي حمدلله على سلامتك هسه يله ارتاحيت تصدك مكدرت انام لحظة وحده..

ادهم : ولا انه كدرت انام تخيلي خيالي بيج غلب المنطق...

سكت وحجه بالانكليزي ...

سيلين : الوو

ادهم : لحظة وتيني انتضري..

سيلين : اوك.

ادهم : فتحي كامره .

سيلين : يووو ادهم شعري مهوس وعيوني مورمه شتشوف مني..

ادهم : احبج بكل حالاتج يله اشوفج.

سيلين : الله عليك اعفيني هلمره ..

ادهم : راح افتح انه واشوفج شي.

سيلين : يله..

فتح كامره وصارت على وجها خشمه احمر من البرد واللفاف على حلكه ضحكت من شفته بعدين فر الكامره على الجهة الثانيه باوعت وردات مفرده الوانهن تجنن..

سيلين : هاي شنو الورد طبيعي.

ادهم : اي شفته كدامي وماكدرت ما اشتريه .

سيلين : المن اشتريته اكيد عندك صديقه وراح تهديها ورد من توصل.

ادهم : صح عندي صديقه وهذا الورد لان ذكرني بيها ماكدرت افوته وهسه اوصل واشوفج شلون اهديها الورد.

سيلين : ادهممممم.

حجيتها بضوجه هو ضحك..

ادهم :شسوي يعني انتي تتحرشين كوه تره مبين الج اشتريته حتى وان كنتي بعيده عني هم اشتريلج ورد.

سيلين : واني شلون راح اصبر بدونك ادهمي تعبت.

ادهم : حياتي والله مضطر هذا ضيغم مو تعرفين بيه عنده عقد ملتزم بيه ويه الدوله يعني شغلنه يضيع وكل فلوسي بيه اذا تركته اخسر كلشي..

جريت نفس قوي..

سيلين : حقك بس اني هم حقي.

ادهم : صبريلي راح اسعى واقرب المده بلكت تضبط.

سيلين : ياريت ادهم ياريت .

ادهم : مو كلتي ماعوف ايفين وما اجي وياك شو اختلفنه ..

سيلين : عبالي من احجي هيج راح تعوف سالفه السفر بس انت مخطط لكلشي يعني اي شي ميوكفك..

ادهم : اعرف راح تتعبين ورايه بس تحملي حبيبتي والله اعوضج ومستقبلنه هنا هواي افضل وحتى ممكن بالمستقبل يصيرلج اسم هنا..

سيلين : الله كريم دير بالك على نفسك البس زين مبين بارده..

ادهم : حبيبج متعلم على البرد عاش نص عمره هنا.

سيلين : الله يحفظك ، شكد بعد وتوصل للشقه.

ادهم : مسافه ساعه ونص تبعد عن المطار ..

سيلين : ها زين سلملي على ملاك وضيغم.

ادهم : من اوصل لهناك اخليهم يحجون وياج.

سيلين : ماشي انتظر ..

ادهم : اروح انه لان ثلجت من اوصل اتصل.

سيلين : منتظرتك بكل ممنونيه..

ضحك وكال ..

ادهم : سيلينتي..

سيلين : نعم ؟

ادهم : احبج.

سيلين : هههههه احبك

ادهم : مع السلامه.

سيلين : بحفظ الله..

سديته منه واختنكت ، طلعت من الغرفه ورحت للحمام غسلت وجهي وطلعت صارت ايفين بوجهي ..

ايفين : هاا واخيرا طلعتي.

سيلين: هههه سمعت صوته يله ارتاحيت

ايفين : يارب دوم مرتاحه وسعيده .

سيلين : شكرا شلونج اليوم.

ايفين : احسن بس اريد اتحرك متت.

سيلين : كضيها شلون مجان تخلص هالكم يوم وبعدين براحتج شتسوين سوي..

ايفين : هو هم هيج تنزلين نتغده.

سيلين : ما اشتهي..

ايفين : البارحه كلشي مماكله واليوم بدون ريوك شنو سالفتج ؟

سيلين : يله راح انزل بس سكتي ههههه ..

نزلنه اني وياها لكيت نرمان بالهول سلمت عليها وكامتلي حضنتني وضلت تحجي ويايه واني اهز راسي والعبره خانكتني بالكوه مسيطره على نفسي ما بجيت..

رحنه للمطبخ صبينه الغده وكعدنه نتغده.

سيلين : فهد وين ميتغده؟

ايفين : التحق الصبح.

سيلين : ها الله وياه.

كملنه غده وره ساعه دك موبايلي باوعت ادهم رقمه الجديد عفتهم وكمت رحت للغرفه جاوبته ..

سيلين : ها حبيبي.

ادهم : هلو شلونج.

سيلين : الحمدلله وصلت؟

ادهم : توني طبيت ..

سيلين : الحمدلله على سلامتك.

ادهم : الله يسلمج

سيلين : شلون راح تاكل راح تنزل تتسوك لو شنو؟

ادهم :  لكيت ملاك منظفه الشقه ومحضرتلي اكل خطيه...

سيلين : عاشت ايدها شو افتحلي فديو اشوف.

فتحه وكام يمشي ويصور الشقه ..

سيلين : كلش حلوة و واسعه.

ادهم : اي مرتبه ان شاءالله تجين انتي ومرايم تنوروها..

سيلين : ان شاءالله..

بهاي الاثناء اندك الجرس فتح الباب سمعت صوت تراحيب ضيغم وملاك ، نطاها الموبايل سلمت عليها وضلينه نسولف شويه بعدين نطته لضيغم سلمت عليه وسديته..

وهيج مشت الايام كل يوم يتصل بيه ادهم  قبل لا يروح للدوام ومرات من عنده محاضره ويتأخر من يرجع يتصل ومرات نسهر مرات ميصحله يتصل لان الوقت بينه مختلف ، لهذا اخذت رقم ملاك وصرنه نتواصل اني وياها كامت تحجيلي عن حياتها وشويه وشويه صرنه صديقات ، من تدخل تطبخ لادهم تسألني شنو يحب وشنو ياكل رغم هو ميقبل بس هيه تسويله ومرات تطبخ بيتها وتوديله...

مر شهر كامل على سفر ادهم ونفسيتي بدت تتعب كمت اتحسس من اي شي احس نفسي ثكيله عليهم ما اكدر اطلب شي من فهد مو مثل ايمن جنت امون عليه ، مره من المرات جنت ابجي وكلبي محروك واعتقد صوتي مسموع اندك باب غرفتي كمت فتحتها جان فهد واكف ومكتف ايده..

سيلين : هلو فهد محتاج شي؟

فهد : سمعتج تبجين خوما بيج شي.

سيلين : لا بس نفسيتي تعبت..

فهد : تهون يمعوده ما ضل شي.

سيلين : شتهون وهذا الشهر بطلعان الروح خلصته.

فهد : زين ليش متاخذين علاج مو احسن ترتاح اعصابج.

غضبت حاجبي وكتله.

سيلين : علاج ؟

فهد : اي انتي مو جنتي تاخذين مضاد للأكتئاب لو انه غلطان.

سيلين : اخذته فتره وادهم منعني عنه لان كال تدمنين..

فهد : اخذي علبه وحده متضر تره.

سيلين : ماعرف اسأله اول

فهد : هو اكيد ميقبل بس انتي اذا متريدين عادي لتاخذين انه حبيت اساعدج.

سيلين : لا شكرا ماريد

فهد : محتاجه شي ؟

سيلين : سلامتك.

فهد : تصبحين على خير.

سيلين : وانت من اهله.

راح وسديت الباب وراه صح هو ما جبرني اخذه بس زرع الفكره ابالي واني هذا العلاج جنت ابوس ايد نرمان يله تنطيني منه بالقطاره وبدون علم ادهم ،

لليل ماصبرت نزلت ادور بالكاونترات لان اعرف وين ضامهن عنده منهن بكثره ، باوعت علبه جديده اخذتها وصعدت وبلشت اخذها واعصابي بدت ترتخي وترتاح صرت انام براحه بدون قلق ولا تفكير ، ونهاري يخلص بالنوم واذا كعدت انزل يم البنات والتهي..

هاي اول شغله اسويها بدون علم ادهم ..

وبيوم جنت كاعده  بالحديقه واجه فهد يمي كعد وسألني بأبتسامه مرسومه على وجهة..

فهد : شلونج اليوم..

سيلين : احسن .

فهد : شنو رأيج نروح لطبيب وتجين وياي.

سيلين : ماعندي استعداد اذا تحب انت روح.

فهد : اريدكم انتي ونرمان تجون ويايه واول مره اطلب منج هذا الطلب..

سيلين : اشوف ادهم اذا قبل اجي وياك..

فهد : ماشي كليله بس انه محتاج تجين ويايه.

سيلين : شمعنى يعني تريدني اني اجي وياك.

فهد : احسج انتي راح ترجعيلي ابني.

سيلين : اني.

حجيتها مستغربه.

فهد : اي انتي

سيلين : شلون ارجعه.

فهد : ماعرف عندي احساس راح يرجعلي ابني من خلالج بس باعي اريد ابني بدون ما يتأذه بشر بسببي والله كاعد اموت على شوفته شايفه بحياتج رجال يبجي كل يوم تعرفين ما انام ابد ولا اعرف راحه البال شلون تكون من سنين ناسيها بس تخيلي ويايه كل يوم افكر ابني محتضنه رجل غريب ويصيحله بابا ويحبه وانه ناسيني تعرفين شكد كاعد اعاني و اتعذب ..

متت قهر عليه وكلبي كام يأذيني ويه كل كلمه يحجيها اني ابجي دم ماعرف ليش اثر بيه هلكد يمكن لان اعصابي ضعيفه او لان ادهم بعيد عني صايره ما اتحمل واريد حجه حتى ابجي..

اني ابجي وهو يبجي ..

فهد : تعاي وياي اشوفج شغله.

سيلين : شنو ؟

فهد : امشي معليج .

سيلين : اوك يله..

كمت مشيت وراه دخلت للمطبخ تلاكينه ويه ايفين كرصها من خدها وحضنها بتك ايد وصعد فوك..
ردت افوت جرتني من ايدي..

ايفين : وين جنتو وليش باجين ؟

سيلين : حجالي عن ابنه.

ايفين : يبووو يافهد يمعوده لتسمعيله الله يخليج.

سيلين : ليش يعني ؟

ايفين : اذا تنطيه مجال نفسيته تتعب.

سيلين : انتي شبيج تعرفين هذا لازم واحد يحتويه ويسمعله بالعكس اذا تصديه نفسيته تتعب اكثر وحالته تسوء..

ايفين : وانتي من يمته وجاي تنقهرين على فهد ..

سيلين : من قبل اني انقهر على ابنه بس سوالفه ويه ادهم متعجبني وجان حجيه ويانه مو حلو هسه محترم نفسه ليش ما احترمه واسمعه.

ايفين : انتي هواي متغيره.

سيلين : ممتغيره انتي هيج تحسين.

عفتها وصعدت لكيته واكف على اول بايه فوك شافني وكال.

فهد : وين رحتي ردت انزل ..

سيلين : جيت ..

جر خشمه ومسح عيونه دخل للغرفه مال ابنه ودخلت وراه موتني قهر من طلع ملابس ابنه بعدهن جدد بالجيس يطلع بيهن ويخليهن بالكاع ويشوفني مشتري ملابس لاعمار مختلفه..

سيلين : ليش القياسات تختلف.

باوعلي ورجع باوع على الملابس..

فهد : تدرين ذني الملابس صار كم سنه اشتري واضم كل موسم اشتريله صيف شته وكل سنه اكول راح اشوفه ولهذا يومج انه ماشفته وابني راح يصير رجال ..

سيلين : شوف فهد تعالج وقدم اوراقك للمحكمه وغصبن عليهم راح يرجعولك ابنك لو يخلوك تشوفه..

فهد : ساعديني سيلين الله يوفقج ساعديني والله اتعالج بس اشوف ابني.

سيلين : شلون اساعدك شبيدي..

فهد : ماعرف اريدج تساعديني يمكن غلطت بحقج وحق ادهم واذيتكم هواي بس والله الدافع الاول ابني اريده اريد اشمه اريد احضنه تعرفين بليل من اريد انام ما اكدر كلبي يفور وافكر بشغلات كارثيه اريد احرك الدنيا واهدها على روسكم..

سيلين : يابه حقك شنو تحجي حقك بس توعدني وعد مقابله اساعدك.

فهد : شنو ؟

سيلين : متأذي ادهم ولا ايفين .

فهد : اذا ابني رجع نمله ما أأذيها.

سيلين : نفرض روايه رجعت تعوف ايفين؟

صفن بوجهي بعدين دار وجها كام يلم بالملابس ويسفط بيهن بالكنتور..

سيلين : سألتك جاوبني.

يضم بالملابس وحجه ناطيني ظهره.

فهد : احب روايتي القديمه هاي الحرمتني من ابني ماعرفها وما اتمنى اتعرف عليها لان راح ادمرها.

سيلين : وهذا الردت اوصله اذا اذيتها ماساعدك.

فهد : سيلين  اريد ابني وطز بالكل فاهمتني انتي..

سيلين : شلون أأمن بيك.

عكد حاجبه وكال.

فهد : شنو تريدين اقدملج وتأمنين بيه.

سيلين : ماعرف اريد شغله تثبتلي بيها انت متأذي احد واولهم ادهم ذاك الوكت اساعدك.

فهد : اكتب تعهد خطي ونروح نصدقه بالمحكمه.

سيلين : منو يكول هذا ياكل ..

ضحك ..

فهد : شلون يعني مياكل.

سيلين : انت شغلك بال_______ اكيد مثل هيج ورقه بسهوله تجيبها وبسهوله تمحيها.

فهد : انتي شنو تريدين اسوي.

سيلين : اريد أأمن بيك وبس.

فهد : امني وداعت ابني ما أأذيج ولا أأذي ادهم ولا ايفين ولاحتى روايه.

سيلين : وابنها تحرمها منه لو لا ؟

فهد : من هيه حرمتني من ابني حلال بس انه حرام مو .

سيلين : فهد اني ما اكدر اعيش عذاب الضمير ما اتحمل كلشي ولا هاي السالفه نقطه ضعفي هاي لهذا اريد اساعدك وبنفس الوقت ماريد تأذي روايه بأبنها.

فهد : وداعت ابني بس اشوفه واشمه ماريد شي من هاي الدنيا حتى لو اموت بعدها عندي عادي.

سيلين : ماشي يافهد راح اساعدك.

فهد : مرت الغالي ما انساها الج ابد.

سيلين : ماريد اسوي عليك فضل بكد ما نرتاح كلنا ونخلص من هذا الكابوس ونتخطى كل الاذيه المحتمل حدوثها..

جر نفس وتنهد مرتاح ابتسم وكال.

فهد : اخذي راحتج تصبحين على خير.

سيلين : وانت بخير..

طلعت سديت الباب لكيت ايفين واكفه على صفحه عاقجه حاجبها شافتني واجتي ورايه لغرفتي دخلت وسدت الباب.

ايفين : شعدكم صار نص ساعه سادين الباب وتحجون على كيف.

سيلين : شنو تغارين يمه.

ايفين : شوف هاي اغار شنو بابا فهد عوفيه شبيج انتي شنو هالتطور بالعلاقه تره كلش واكفه عمو يقبلها...

سيلين : شنو قصدج يعني تشكين بينه لو تغارين وبعدين هذا حمايه مثل اخويه حاله حال ايمن وين الغلط اذا كعدنه وحجينه .

ايفين : الغلط لان هذا فهد مو ايمن فهد يختلف واتصور عمو ما اله رضا تطوخين علاقتج بيه.

سيلين : والله لا اطوخ ولا شي وتعرفيني كلش زين جنت اضوج منه بس بعد ما شفته كسر المطبخ على راسج وحالته تبجي الصخر قررت اتغير وياه ومو عيب اذا سمعتله..

ايفين : زين متحسيها واكفه ياخذج وياه للعلاج النفسي ؟

سيلين : اخابر ادهم واخذ رأيه اشوفه شيكول ذاك الوكت اتصرف .

ايفين : وبرأيي كليله على علاقتكم الجديده وعلى التطورات.

سيلين : اي احجيله مابيها شي احنه كاعدين بيت واحد مو عيب ولا حرام اذا سولفنه بحدود الادب .

ايفين : اعرف بحدود الادب بس انتي كاعد تلعبين بالنار واني خايفه عليج ..

سيلين : لتخافين ما اسوي شي غلط.

ايفين : نشوف يا سيلين وين راح يوصلج عنادج..

سيلين : تعاي صدك انتي ليش عفتي ايمن شوكت ناويه تحجيلي.

ايفين :شذكرج بيه بله..

سيلين : ليش اني ناسيته بس هسه اجه ابالي السؤال واريدج تجاوبني ..

ايفين :  عفته تحت تهديد وضغط هسه زين.

سيلين : حجه وياج من رحتو بالعرس لو لا؟

اجتي كعدت يمي دنكت راسها وكالت.

ايفين : حجه اي مرتين حجينه بالموضوع وتعاتبنه هواي بس شيفيد.

سيلين : على شنو تعاتبتوا.

ايفين : يعني كال ليش هيج غدرتيني وجان هسه احنه متزوجين وعدنه طفل وكال شلون كلتي زواجي على ورق وراح اعوفه لفهد واكتشف بعدين انتي حامل منه.

سيلين : هاي شوكت حجيتوا وكتيله زواجي على ورق.

ايفين : بالمهر مالتكم شافني بالمطبخ واجه حجه ويايه جان ميت قهر ..

سيلين : سوده عليه ايمن احجيلي شصار.

ايفين : ماعندي كلب والله ياسيلين ماعندي كلب احجي بيه.

سيلين : عليج الله احجي.

جرت نفس قوي وكالت..

ايفين : بالمهر مالتج جنت اسفط الكيك بالصينيه حسيت واحد واكف ورايه التفتت لكيت ايمن مغمض عينه ومصعد راسه ليفوك همست..

ايفين : شلونك ايمن.

جر نفس بنفاذ صبر فتح عينه باوعلي وكال.

ايمن : ليش هيج غدرتيني شسويتلج اريد افهم شنو سويت وعفتيني جان هسه متزوجين يا ايفين عفتي كل الدنيا واخذتي اخويه وين صايره هاي ..

ايفين : هواي تراكمات صارت وانت متدري بيها واني انظلمت وانت بس المشكله اني انظلمت بحق تعرف ليش.

ايمن : ليش ؟

ايفين : فضولي وغبائي وتدخلاتي خلتني فريسه سهله لاخوك وهو استغلها صح.

ايمن : شنو لازم عليج ليش متحجيلي.

ايفين : اذا كتلك شنو لازم عليه راح تعذرني وتسامحني..

ايمن : اي ممكن اعذرج بس اسامحج صعب..

ايفين : راح اكلك سر وهواي تراكمات تبعت هذا الشي بس ماكدر كلشي احجيلك .

ايمن : احجيلي السر الجبرج تعوفيني ماريد الباقي اريد كلبي يرتاح راح اموت من التفكير.

ايفين : تعال ويايه نكعد بمكان واحجيلك.

ايمن : امشي يله.

رحنه كعدنه بغرفه مريم وسدينه الباب ..

ايمن : احجي اسمعج.

ايفين : تتذكر اسامه من اتصل عليكم ودزلكم صوري والمحادثات الك ولعمو ادهم وبوقتها انتو ما نطيتوا مجال تتذكر بشنو هدد.

ايمن : بشنو ؟

ايفين : هدد يتصل بفهد ويدزله كلشي وحتى لابوكم.

ايمن : اي كملي.

ايفين : متواصل ويه فهد وفهد ماكذب خبر رايحله لبيتهم وناطيه كل الصور والفديوات وحتى المكالمات مسجلهن.

ايمن : وهذا الشي ميخوف وانه اعرفه ليش خفتي وتركتيني مو انه ادري بكلشي..

ايفين : المتدري بيه اني ..

دنكت راسي وسكتت نتر بيه...

ايمن : لتكليلي صايره علاقه كامله بينكم.

هزيت راسي ب اي...

ايمن : كذابه..

ايفين : للأسف مو كذب بس..

عاط بيه.

ايمن: لعد شلون من حاجي وياج وادهم مسجل المكالمات كايلج ماريد بس صور وكذا اريد شغلات اعمق ومن هالحجي.

ايفين : ماجنت اعرف والله العظيم محد معلمني عبالي شي عادي ماعرف هذا مرتبط بشرف البنيه هو ابن عمي وامنت بيه وفهمني هذا الشي يصير بين اي ثنين يحبون بعض.

ايمن : لج انتي شنو انتي كارثه بشريه خرب بيج وبالجذب مالتج بعد بعد احجي شنو ضامه.

ايفين : هذا هو والله ماضامه شي.

ايمن : وفهد شلون تقبلج لعد.

ايفين : فهد متقبلني علاقتنه بس كدامكم طبيعيه وحدنه كل واحد بجهة وهو راد يضربك بيه ويحرك كلبك .

ايمن : لا حجايته صحيحه من كال خلصتك منها وراح تشكرني فعلا راح اشكره..

ايفين : لتظلمني والله جنت ماعرف ومريضه ومحد علمني.

ايمن : لج انتي شنو شيطانه شنو محد علمني وخليتيني اتعلق بيج ولج وصلنه للعرس تعرفين شنو للعرس وطلعتي ويايه نشتري غرفه وبعدين اكتشف انتي عاقده وصعدتي ويايه بالسياره وسايرتيني يعني تلعبين عليه جنتي ...

ايفين : شوف اني مجنت اعرف والله العظيم وكلت انت تحبني وراح تتقبلني بكل عيوبي ..

ايمن : ههههههه واحبج واتقبلج حتى لو جنتي معيوبه هيج غبي انه.

ايفين : ماعرف هيج فكرت المهم فهد هددني اتركك بس بطريقته هو يعني بدون ما انت تعرف اني بيه شي واقنعكم بالسالفه الصارت .

ايمن : سالفه الاغتصاب قصدج ؟

ايفين : اي هو راد يهزكم ويخرب الهدوء الانتوا بيه راد يضربكم من خلالي ..

ايمن : وشنو الصار بعدها شنو الاتفاقيات العقدتوها..

ايفين : ماكو غير الحجيته الك.

ايمن: ربي خلصني منج يا رحمته الواسعه.

ضحكت بقهر .

ايفين : فعلا خلصك مني لهذا اكلك اني اذيتي من فهد جانت بحق واستاهل كلشي يصيرلي ..

ايمن : نصيحه من اخوج لتخليه يستعملج بأذيه ادهم ومرته لان ادهم يشور وعنده حوبه ..

ايفين : لا والله وعد ما اسمع كلامه ابد ولا امشي وراه وراح احاول اغيره واخليه يتعالج.

ايمن : الله يوفقج ..

حجاها وكام وصل للباب صحته.

ايفين : ايمن ..

التفت عليه وكال.

ايمن : نعم.

ايفين : سامحني..

حجيتها وبجيت..

جر نفس قوي وهمس.

ايمن : الله يسامحج ..

عافني وطلع...

ايفين : شبيج صافنه صارلي ساعه احجي الوو سيلين .

سيلين : انتي تحجين صدك لو ناصبه عليه؟

ايفين : هاي شبيج شنو ناصبه عليج اكيد احجي صدك.

سيلين : شنو اسامه شنو فهد شنو ايمن يدري شنو هددج احجي لا اموتج هسه

ايفين: لتصيحين ليسمع فهد الصار صار واني هسه حامل يعني لو تموتيني ميتغير شي..

سيلين : مصدومه بيج تدرين.

حجيتها وكمت الطم على وجهي وابجي بحركه...

لزمتني من ايدي وتتوسل بيه اهدأ واسكت لا يسمعها فهد.

سيلين : وليش هلكد خايفه منه واذا سمع شنو يعني.

ايفين : اذا سمع ايمن يدري وحاجيتله يدفني بمكاني وانتي تشيلين ذنبي وذنب ابني.

حجيت بحركه كلبي ودموعي تجري..

سيلين : بختج بأبنج يا ايفين حضج جبير لان حامل يلا عرفت جان سويت بيج سوايه عمرج متنسيها ، اكو شي بعد ضامته عليه كتيهن كلهن مادامج انفتحتي.

ايفين : هاا لا ماكو بس الحجيته

سيلين : متأكده.

ايفين : اي .

سيلين : لعد بعرسه شنو حجه وياج ايمن ..

ايفين :ماحجه شي مهم بس كال انتي جذابه وكلتي علاقتنه بس شكل وبعدين اسمع بيج انتي حامل واكيد عندج ماضي اسود وشغلات تعبانه واني ما ادري بيها ومن هالحجي اخر شي كتله الله خلصك مني والله يهنيك بزواجك ويسعدك اخر شي كلي ديري بالج على اختج وعينج عليها اذا ادهم سافر لتخلين احد يأذيها هاي امانه ادهم كتله ليظل بالك..

سيلين : كومي طلعي بره.

ايفين : هاي شبيج..

سيلين : ما متحمله وجودج طلعي بره.

كامت وصلت للباب كتلها.

سيلين : خلف الله على فهد سواج مره وامن بيج وحقه تخبل من سمع بيج حامل ومنا وجاي اني ويه فهد بكل شي يسويه بيج واذا فكيتي حلكج وحجيتي لادهم احجي لفهد كلشي..

التفتت عليه وكالت..

ايفين : سيلين تهدديني.

سيلين : اي اهددج واني اعرف شلون اكتشف باقي سوالفج واعلمج عليهن وحده وحده صبر يا ايفين صبر..

ايفين : براحتج هيه خربانه خربانه خلينه نحترك ونخلص..

حجتها وطلعت سدت الباب واني كمت شربت كبسولتين من العلاج الاخذته من فهد..

ردت انام ردت انام حاولت ماكدرت صعب السمعته صعب وماكدرت اهضمه ولا ابلعه ...

ماعرف شكد مر وقت انسطرت ونمت كعدت على صوت الموبايل يدك ، فتحت عيني وراسي يموتني من الوجع مديت ايدي حتى اخذ الموبايل اباوع عليها ترجف اريد اسيطر عليها ماكدر كمت كعدت ولزمت ايدي قوي اريدها تثبت نفس الشي مديت ايدي على الموبايل بصعوبه فتحته وجاوبت.

اجاني صوته متلهف مثل كل مره..

ادهم : حبيبي شلونج ..

سيلين : هلو حياتي الحمدلله انت شلونك.

ادهم : الحمدلله صباحج عسل ..

سيلين : صباحك فل هههه.

ادهم : انتي راح تكعدين وانه راح انام حبيت اخر شي اسمعه صوتج.

سيلين : ياحبيبي واني صبحت على صوتك.

ادهم : شكو ماكو مرايم شلونها البارحه حجيت وياها شويه وراحت كالت عندي دراسه.

سيلين : اي صح عدها واجبات هوايه البارحه وزينه ليضل بالك بس عندي موضوع اريد اخذ رأيك بيه ..

ادهم : خير ان شاءالله.

سيلين : فهد راح يتعالج يم دكتور نفسي حجز قبل كم يوم.

ادهم : ياالله ياالله احله خبر سمعته اليوم.

سيلين : بس اكو شغله ثانيه اريد اكلك بيها.

ادهم : شنو ؟

سيلين : انت تدري بيها.

ادهم : شنو غير افهم.

سيلين : ارافق فهد برحله علاجه.

ادهم : شنوووو وليش بله ؟

سيلين : ليش حسيتك تفاجأت وانت تدري وناطيه الموافقه.

ادهم : منو هذا انه ؟

سيلين : اي انت هو كلي.

ادهم : ماكو هيج شي ومن الاخير ممنوع توصلين لدكتور نفسي ديري بالج سيلين اذا سمعت ازعل.

سيلين : زين ليش ؟

ادهم : سيلين انتي بعدج مريضه تعرفين لو لا شلون تروحين تحضرين جلسه فهد ..

سيلين : ليش عصبت اني الادري بيه انت عندك علم لهذا بلغتك

ادهم : وهسه عرفتي انه ما ادري وعرفتي رأيي بالموضوع راح تخالفيني لو شلون ؟

سيلين : اكيد ما اخالفك هذا هو ما اروح.

ادهم : عفيه عليج.

سيلين : يله اروح اني.

ادهم : الله وياج لتخلين بالج عليج.

سيلين: ليضل بالك.

نهينه المكالمه بحب وسديته..

ومرت الايام ونفس الشي ماكو تغيير اني على العلاج وزاد خبالي اكثر بحيث اذا اتركه املخ نفسي حسيت حالتي بدت تتراجع اريد اترك وماكدر ، بيوم خلصت العلاج ونزلت جوه ادور بالمجر ماكو اي علبه تخبلت  التفتت على صوت ايفين وهيه تكول....
.
ايفين : تدورين على هاي ..

التفتت باوعت بيدها علبه مال علاج نفسهة العندي تقربت ردت اخذها منها خلتها وره ظهرها.

سيلين : انطيني ايفين الله يخليج.

ايفين : انتي شدتسوين بنفسج ليش هيج دمرتي روحج.

سيلين : شمدريج كاعد اخذ علاج.

ايفين : نومج مو طبيعي تصرفاتج مو طبيعيه صايره نسخه من فهد دخلت غرفتج لكيتهن بالمجر شلون تاخذيهن بكيفج شلووووون هيج تسوين.

سيلين : معليج مني جيبيها.

ايفين : شبيج انتي تخبلتي..

كمت ارجف وابجي .

سيلين : افونه انطيني اعصابي تعبانه ما اتحمل.

ايفين : ما انطيج والله وهسه اخابر عمو يشوفلج حل شلون نعالجج .

سيلين : خابريه واني تعرفين شنو اسوي

ايفين : تره اني خايفه عليج ليش تهدديني.

سيلين : معليج مني التهي بحياتج وعوفيني.

ايفين : شنو غركانه السفن مالتج حتى تعيشين على المهدئات شبيج تخبلتي انتي ..

سيلين : لتصيحين وتلميهم علينه انطيني العلاج وسكتي.

ايفين : تريديه.

سيلين : اي.

ايفين : تمام تدللي..

عافتني ومشت للسنك فتحت البوري وفرغت العلاج كله تلفته بالمي.

سيلين : هاي ليش لج ..

ايفين : اني اريد اعالج فهد واخلص هسه وكعت بينكم ثنينكم انتي شنو متخافين على عمو مو حرام عليج تأذيه.

سيلين : ممأذيته اني

ايفين : من تأذين نفسج تأذيه وتعرفين بيه كلش زين شكد يحبج.

سيلين : معليج مني انطيني العلاج اذا عندج حبابه والله ما اتحمل.

ايفين : ولج رجعتي مدمنه ياحظي بس ادمان على المهدئات وذني اتعس من المخدرات ذني لعب بالاعصاب ولج اني عشت ويه فهد وشفت شلون دمرته سمعي كلامي يا اختي مره وحده..

سيلين : اول تالي اسمعج وانتي كلج غلط بغلط.

ايفين : صح اني غلط وسيئه ماكلت العكس بس مرات السيء تطلع منه حجايه صحيحه او يكدر يقدم فائده استفيدي مني قبل لتضيعين وتضيعيني وياج.

سيلين : وخري من وجهي.

عفتها  وصعدت فوك ارجف جسمي كله يختض ، باوعت على موبايلي اجتي فكره ابالي اتصل بفهد هو الوحيد يكدر يدبرلي العلاج ..

اتصلت اكثر من مره مجاوبني عفت الموبايل ومددت وره نص ساعه دك موبايلي باوعت فهد سحبت الموبايل جاوبته..

سيلين : هلو فهد شلونك.

فهد : اسف متصله عليه وجنت بالدوام ماكدرت اجاوب.

سيلين : فهد الله يخليك اريد علاج وعلاجي خلص منين اجيب هسه.

فهد : جوه بالكاونتر تلكين جايب منه ..

سيلين : اخذته ايفين وفرغته كله بالمي..

ضحك ..

فهد : خرب بعقلها ففه  باعي روحي لغرفتي القديمه فتحي اول جرار راح تلكين منهن هووواي اخذي شكد متريدين بس سيلين اذا نبشتي بشي ميخصج العب بيج لعب تعرفيني.

سيلين : يمعود اني بيا حال بس كلي وين المفتاح لان سمعت الغرفه محضوره علينه.

فهد : هههههه الغرفه مفتوحه ماقافلها بس محد يتجرأ يفوتلها بدون علمي.

سيلين : ماشي شكرا فهد .

فهد : تدللي ماسويت شي.

سيلين : باي.

فهد : هله.

سديته ونزلت مثل المخبله فتت لغرفته وفتحت الجرارات ادور لان مادري ياهو منهن من لكيته العلاج عبالك شو شنو لكيت من الفرحه اخذت ٣ علب سديت الباب وطلعت اركض صعدت فوك...

ومرت الايام  على نفس الوتيره وبيوم اجه فهد وطلب مني اروح وياه للدكتور رفضت وكتله السبب ادهم ميقبل ..

راح هو ونرمان من رجعوا جنه كاعدين بالهول بليل اجه فهد وكبل ربط الحاسبه على التلفزيون جان بيده فلاش صغير دخله بالحاسبه وشغلها باوعت غرفه دكتور نفسي وفهد كاعد يمه باوعت على نرمان سألتها مستغربه.

سيلين : منو مصوره وليش ؟

نرمان : هو طلب مني اصوره حتى تتأكدون هو راح يتعالج وبنفس الوقت دليل يقدمه للمحكمه هو خضع لجلسات علاج وهاي فكره الدكتور مالته.

سيلين: هاا زين ربي يوفقه ويشافيه..

نرمان : امين..

فتح الفديو وبلشنه نتفرج..

اول شي سأله عن اسمه ومواليده..

بعدين بلش يسأله عن نفسه ..

_ اريد اسألك اسئله شخصيه تتقبل مني لا.

فهد : اسأل دكتور اسأل اتقبل كلشي منك عادي يعني تكدر تجرحني بأسئلتك وتتدخل بخصوصياتي هههههه ليش هيه ضلت خصوصيات تخيل العشيره كلها عرفت بفهد وتعرفو على حياتي وتعمقوا بيها زياده وتدخلوا بيها بشكل مو طبيعي واخذو مني حياتي تخيل ياخذون ابنك منك بدون حق والله شنو انت تعنف زوجتك ، ما سألوني ليشش ماسألوها الها ليش استفزيتي الوحش البداخله دكتور انه تزوجت بالجديد وجاييني طفل عن قريب ماضل بس ثلاث اشهر وينور حياتي اجيبلك زوجتي واسألها شلون مدللها واحبها لان فهمتني عرفت شلون تتصرف وياي وتحتويني وتمنيتها زينه واجيبها وياي تشهد انه زين وطبيعي..

_ كملت كلامك لو عندك شي تضيفه.

فهد : لا دكتور كملت تفضل.

_ الفهمته من كلامك انت متعرض للتعنيف بالصغر وصار عندك ميول تعنف الناس وتشوف ياهو يتأذه اكثر  السؤال انت متعرض للتعنيف صح ؟؟

فهد ارتبك وفرك وجها بيده بعدين ضرب على رجله وهزها بتوتر والدكتور يراقب حركاته.

فهد : دكتور ممكن نتجاوز هذا السؤال ونروح كبل للعلاج.

_ لا ضروي تجاوب شلون اعالجك اذا ماعرفت الماضي مالتك..

كام يرجف وايده تختض.

فهد : ههههه ميصير اتعالج بدون ما اذكر طفولتي المغتصبه والمعنفه ..

_ ضروري تحجي.

وبلش يحجي فهد الماضي مالته وفتره علاجه بالمصح جان عمره تقريبآ ١٥ سنه من دخلوه مصح يعني ادهم هم جان صغير  مو كبير حتى يكدر يحتوي اخوه ويعالجه ..

وحجه شلون تزوج وشرح حياته كلها ويه زوجته وشلون يحب ابنه ومداريه ويشتريله فرحان بيه ، وذكر شلون اخذو زوجته ونطوه وعد يتعالج ويرجعوها اله..

ورجع لكه ايده والكاع.

هنا فهد انهار يم الدكتور ومن من سمع الفديو  تخربط علينه كامت نرمان طفت التلفزيون والتمينه على فهد ، اختنك يريد يتنفس ميكدر ركضت نرمان جابتله مي غسلت وجها وايفين تفرك بصدر وتنفخ على وجهة مددوه بالكاع غمض عينه وخله ايده عليها كوه يجر النفس بصعوبه..

هنا اني حقدت على الدنيا كلها لان شفته بهيج حاله  ماعرف ليش صارت عندي رغبه قويه اساعده بس مجنت اعرف العواقب شلون راح تكون وممكن تخسرني هوااي واولها ادهم ..

ماحسبت حساب لهذا الشي تصورت اساعده ويرجع ابنه والكل يرتاح ويعيش سعيد بس ماعرفت الدخول بهذا الموضوع مثل اليدخل رجله برمل وتغرك مايكدر يطلعها بعد وتضل تبلع بيه الكاع لحد ما تخفيه ومايبقاله اثر..

ب الف يا الله يلا صحى ورجع وضعه طبيعي ومنا بلشت رحلتي ويه فهد اساعده ، بديت بفكره مني اعرف مكان روايه وين بس مكتله بيها انتضرت اعرف مكانها يله ابلغه..

وفعلا رحت لنرمان جانت كاعده بغرفتها شافتني ضحكت سلمت عليها وكعدت يمها..

سيلين : نرمان عندي موضوع اريد احجي وياج بيه.

نرمان : كولي اسمعج.

سيلين : شلونها علاقتج بهجان.

نرمان : مو حجيتلج كتلج هواي امور تطورت بيناتنه..

سيلين : اي صح كتيلي زين سؤال.

نرمان : جواب هههه اليوم داخله حاميه عليه.

سيلين : والله فهد قهرني وضميري كاعد يأنبني علمود ابنه.

نرمان : مابيدنه شي نسويه اله يا سيلين..

سيلين : الله عليج نرمان بروح زوجج احجيلي الصدك تعرفين روايه بيا دوله.

نرمان : اش اش سيلين شبيج تخبلتي شعليج منها عفيه..

سيلين : يعني تعرفين بيها وين؟

نرمان : سيلين وين تريدين توصلين؟

سيلين : اريد اعرف هيه وين.

نرمان : وشنو راح تستفادين اذا عرفتي.

سيلين : ما استفاد بس فضول اريد اعرف شلون عاشت وشلون كدرت تنسى فهد وحبه بهيج سهوله وتخلي ابنها يصيح لرجال غريب بابا وشلون بعد الشافته كدرت تتقبل رجال ثاني وتدخله حياتها..

نرمان : لج اصلا روايه ممتزوجه هاي لعبه من عمو هاشم وهجان علمود يبعدون فهد عنهم واصلا روايه بالعراق مأمنين عليها يعني ممسافره.

شهكت وخليت ايدي على حلكي..

سيلين : يااااااااا ولج شنو هااااي.

بعدني ما مكمله الجمله واندفعت الباب علينه باوعت فهد صاير نااااار..

يتبع...

صباح الخير حبايبي الغالين.

اولا هذا البارت هديه الثنين مليون مشاهده.

ثنين كتبت بارت كلش طويل والاحداث كلها مهمه حاولت اختصر واعبرها علمود نوصل للحاضر مثل ما وعدتكم بس ماكدرت باجر بحيل الله نوصل للحاضر الاحداث هيج حكمت ..

ياريت تتفهمون وبدون تجاوز وتضطروني احضر ماضل شي ونختم اني اكثر وحده اريد اختمها حتى ارتاح ...

متابعه ممتعه..