جذبني فمك البني

البارت الواحد والخمسون

البني صار حكاية وحديث الناس
حبيته من غير غاية برقة واحساس🤎
( فارس كرم )
________________

تعالي وجربي جنوني ...
فشخصي انتزع هدوئي..

عيشي حماقاتي..
وجربي قبلاتي ..
شاركيني اشيائي..

كوني في اهب الاستعداد لأحضاني في صباحاتي..
اتودين الاستيقاض على قبلاتي ؟
تتبعها لمساتي مشاعري وهمساتي ..

توددي الي كما توددت اليكِ
عيشي مغامراتي
فهي ببساطه قبلة يتلوها نزال المحبين ....
يتبعها عناق دافئ وحنين ....

فجنوني من شفتيكِ
وهيامي بجمال عينيكِ

اعدكِ سيزداد شغفي مع سيل قبلات تتوزع بترافه على تقاسيم ذاك الجسد الممشوق..

حفل من الاحضان وصخب جنون
وان قالوا ما ذالك الصخب قولي لهم اني ارتبطت بدكتوري المجنون....

يقال اقرب طريق لقلب الرجل معدته ..
اما انا اقول اقرب طريق لقلبي شفتيكِ بروجها البني ..

بقلمي
عبير ادريس🤎
____________

ادهم : يعني بشنو تجازيني مثلا..

حجاها وخله القلم وره اذنه رفع تك حاجب منتظر جوابي...

سيلين : اي شي ابالك كلي اسويه عاجبني اردلك الجميل صرت هواي تطلبني.

ادهم : اي شي يعني اي شي متأكده..

سيلين : اي والله اي شي تريده وتطلبه اسويه حتى اذا ردت روحي انطياك .

سكت وصفن بوجهي بعدين همس.

ادهم : حتى اذا ردتج حبيبتي...

سيلين : شلون يعني مفهمت ؟

ادهم : تشاركيني رحلتي بالحياه وتصيرين زوجتي..

بهتت وفكيت حلكي ...

سيلين : انت من كل عقلك..

ادهم : اي من كل عقلي وكلبي هم..

سيلين : شتقصد ادهم ..

ضحك من لفظت اسمه بدون عمو لان شفت الكلمه ما الها داعي بعد هو شال الحواجز كلها من طلب الزواج مني..

ادهم : رايدج على سنه الله ورسوله مابيها شي ولا عيب ولا حرام ..

سيلين : صدك تحجي؟؟؟

ادهم : وين المشكله سيلي شكو بيها اذا تزوجنه ، اول و تالي انه لازم اتزوج تعرفين بيه كثير السفر وعندي طفله واحتاج زوجه ترافقني وحدتي ليش نكون مثاليين زياده عن اللزوم الحياه لازم تستمر..

سيلين : وعمتي؟؟؟

ادهم : ياسة الله يرحمها صار ٤ سنوات من توفت
وانه حبيتج شلون اطلعج من بالي ماكدر بعد..

سيلين : شتريد مني..

ادهم : اريدج كلج كافي عشتي بوحده سنين انتي هم تحتاجين رجل بحياتج يسندج ويحميج ويدللج وانه محتاجج خلينه ننجمع بيت واحد وبطلي عناد ..

نبره صوتي علت وجاوبته بحديه ..

سيلين : ليش اني من دون البنات يعني ذيج الفتره اهتمامك وخوفك عليه جان بدافع غريزي مو ؟؟
اذا اي فمع الاسف عليك..

ضحك ودنك راسه فرك كفوف ايده وحده بالثانيه رفع راسه غمزلي وكال ..

ادهم : متكدرين تستفزيني لتحاولين ...

سيلين : لان ماعندك جواب لهذا تتهرب ...

ادهم : لا مو هيج غلطانه ، بس اسألج سؤال وجاوبيني بصراحه.

سيلين : شنو ؟؟؟

ادهم : شتفسرين فكره القدر يجمعج بأنسان بأكثر من فرصه ، يعني انتي تزوجتي وانه ايست منج وشبه فلست وردت اسافر واعوف كلشي لان فراكج موتني وفكره انتي بحضن واحد غيري جانت تطير عقلي من راسي ورجعتي بالوقت الصح وفركشت كلشي لغيت سفرتي ورجعتيلي سيلي انه ما انتظر اكثر ما اظل حاط ايدي على خدي و تروحين مني مره ثالثه..

باوعلي ونضراته تتوسل وتتوزع على تفاصيل وجهي بحيره منتظر جوابي..

سيلين : اعذرني طلبك مرفوض..

كام من مكانه وتقرب يمي راد يلزم ايدي نترتها منه وعطت..

سيلين : دير بالك تلزمني وخر من وجهي واطلع بره.

عكد حاجبه وكال..

ادهم : سيلين ليش مكبره الموضوع..

سيلين : من باجر تأجرلي بمكان ثاني وادور شغل اشتغل واعيش منه معليك بيه بعد.

ادهم : مو بكيفج تحلمين اخليج تطلعين تعيشين وحدج بغير بيت وممنوع تشتغلين بأي مكان...

سيلين : شلون مو بكيفي اطلع وغصبن عنك واشوف شتسوي..

ادهم : سيلين لتتحديني تعرفيني كلش زين اذا خليتج ابالي شسوي لهذا امشي عدل احسلج..

سيلين : لتهدد تعرفني كلش زين اني ما اتهدد..

ادهم : سمعيني انه محتاج مرأه بحياتي وانتي هم ثنينه محتاجين الراحه ليش تكابرين..

سيلين : مممم خليني اخمن معنى كلمه الراحه قصدك اصيرلك عشيقه مو دكتور...

بهت بوجهي وعكد حاجبه كال ..

ادهم : تعرفين شنو مشكلتج انتي وحده طفله ومتعرفين معنى الحب شنو ولا تقدرين الانسان اليحبج فعلا واصلا متفرقين بين اليحبج لذاتج او يحبج برغبه...

ضحكت ...

سيلين : شكو بيها نتعلم منك الحب والوفاء والتضحية مثل ما وفيت وضحيت لعمتي..

خزرني ورجفت ايده حجه بصوت رج الغرفه رج...

ادهم : يشهد الله عليه ما يوم باوعت على وحده غيرها ولا حبيت ولا رف كلبي بس اعجاب اي انعجبت بيج ما انكر وانتي كبالي اربع وعشرين ساعه انعجبت بهدوئج ونزاكتج واضافه لهذا شاركتيني بكل شي يخص حياتج ودخلتيني ب ابسط تفاصيلها وتجين تشكيلي شلون ما ادمنج شلون ما ادمن صوتج واخزنه بالي ، سيلين انتي تربعتي بكلبي وخلص ، كل تصرف مني بدر الج جان بدافع الحب والله العظيم وداعت مرايم ....

سيلين : رغبه .

ادهم : والله حب ، تتذكرين من جنتي تشوفين عيوني حمر وتكليلي تحب وحده اكلج اي احبها بس هيه متحس بيه قصدي عليج جنت قاصدج الج سيلينا...

سيلين : كلمه وحده اكلك حرامات علاقتنه الحلوة نهيتها بسبب تفاهات....

ادهم : الحب عندج تفاهات.

سيلين : اي اذا اجه بوقت غلط تفاهات..

ادهم : وهسه عرفتي مشاعري اتجاهج شلون راح نكمل سوه وانه ما اكدر اتغاضى عنج اكثر من هيج.

سيلين : اطلع منا..

ادهم : ما اسمحلج جربي وشوفي ..

سيلين : بكيفك هسه اخابر على عمي صلاح واروح يمهم.

ادهم : هههههه صدك تحجين ؟؟؟

سيلين : اي صدك.

ادهم : لهدرجه كارهه فكره ارتباطج بيه وقربي بحيث تذبين روحج بالنار ولا تبقين قريبه مني ..

سيلين : كتلك قبل وارجع اكولها لو عندي اهل بيهم حظ لو عمام عدهم غيره لحظه ما ابقه هنا بس الصار انت تدري بيه وانجبرت اضل هنا وفكرت وايقنت وصدكت انت عم النه غير هذا الشي استبعدته لهذا لتتوقع بيوم اصيرلك زوجه فعليه.

ادهم : مو بكيفج..

سيلين : هههههه تجبرني يعني ؟

ادهم : اذا عاندتي اي اجبرج..

جان واكف واني كاعده كمت رحت يمه وكتفت ايدي رفعت راسي وخليت عيني بعينه.

سيلين : شلون تجبرني بله مثل ما اخوك جبر اختي .

ادهم : اسوي الاضرب منه اذا عاندتي.

سيلين : واوووو دكتور شنو هذا تفكيرك صاير تخوف..

ادهم : لان متعرفين مصلحتج وين..

سيلين : انت تعرف لعد.

ادهم: والله غبيه وهسه اكتشفت نفسي شكثر جنت غلطان من كتلج انتي خارقه الذكاء..

سيلين : هههه يعني المشاعر مو بالكيف الغباء شعليه اريد افهم.

ادهم : ماريد منج شي بس اسمي يرتبط بأسمج وهذا هو اريد أأمن عليج وادخلج بحمايتي وهم اذا ضليتي هنا محد يكدر يحجي وضلي سنين ممتقبلتني عمي راضي بكلشي.

سيلين : حلوووو

ادهم : ولتخافين زواجنه راح يكون سري بالبدايه..

فتحت عيني كلها وشهكت.

سيلين : انت صدك تحجي ؟

ادهم : اي صدك .

سيلين : مو كتلك تريدني عشيقه الك مصدكت.

ادهم : لا مو هيج.

منطيته مجال يكمل ضليت احجي احجي احجي وهو صافن بوجهي اخر شي لزمني من ايدي وهززني.

ادهم : دكافي انتي منين تطفين اسمعيني انطيني مجال اشرح ...

سيلين : شنو تشرح شنو وانت تريدني ازوجك بالسر اذا مستعار مني ليش كاتل روحك عليه..

ادهم : لج بابه افهمي انه اريد اعقد عليج بالسر لان ناوي اسافر اخذ اوراقج واروح ل _______ هناك اكمل معاملتج علمود اكدر اسحبج وراح اطول اقل شي ست اشهر من ارجع اعلن عن خطوبتنه..

سيلين : ومن شنو خايف ليش متحجي.

ادهم : اول شي لحد الان ما عرفت سالفه سامر وانتي ليش شنيتي العداوه عليه اكيد اكو دوافع ومسببات انتي ساكته عنها ،ثنين شاك بفهد يريد يأذيني بيج لهذا ما اريد انطيه فرصه يأذيج بغيابي ويحرك كلبي عليج اكمل كلشي وارجع اخذج ونسافر وهناك اسويلج احلا حفله بحضور ملاك وضيغم لان همه هناك..

سيلين : ليش ضيغم مثلك ماخذ اقامه.

ادهم : اي سافرنه سوه ، ها شكلتي.

سيلين : يعني مصر متخليني أأجر ولا اشتغل مو ؟

ادهم : اي ما اسمحلج.

سيلين : طلبك مرفوض ومن باجر ادور شغل وادور بيت واشوف شلون تمنعني.

ادهم : لو اعرف احبسج اسويها لتخيليني اعاند.

سيلين: ليش هسه انت شدتسوي ..

جر نفس وطلع باكيت الجكاير خله وحده بين شفايفه ورثها ، اخذ منها اكثر من نفس حركها للجكاره حرك ويباوعلي من الدخان الفاصل بينه...

نفخ الدخان على صفحه ورجع باوعلي همس بصوت حنين..

ادهم : انتي ليش متفكرين انه خايف عليج اكثر من حاجتي الج اتركيلي نفسج وسلميلي كل مفاتيح حياتج واوعدج راح تكونين بخير طول حياتج..

جريت نفس طويل وتنهدت ...

ادهم : اعرفج ومتأكد تريدين تكولين اي موافقه بس عندج حواجز بداخلج تمنعج ..

سيلين : مثل شنو حواجز؟

ادهم : حبج لعمتج وفائج الها وحجي الناس..

سيلين : تره مبينه من بدايتها علاقه فاشله ومتأكده اذا ارتبطنه راح نفشل وانت اكثر واحد تتندم.

ادهم : انه ما عندي ايمان بشي اسمه ندم لتخافين.

سيلين : حتى لو عشت ويايه علاقه فاشله ؟؟

ادهم : انه عندي مشاعر الج احتضنتها وصنعتها وترجمتها بفكر انيق وراح اخليج تحسين بيها وتعيشيها بس انطيني مجال ولتشلعين كلبي اكثر افديج.

سيلين : ما مرتاحه لهاي العلاقه ابد..

ادهم : انتي حقج وانه حقي وكل الطلبته منج فرصه

سيلين : تعرف انت حبك تملكي.

ادهم : لو فعلا تملك جان ما سلمتج بهاي ايدي لواحد ثاني وعشت بوسط نار..

سيلين : نصيحه ادهم انصحك لخاطر عشرتنه والايام الحلوه بينه والزاد والملح لتضغط عليه اكثر لان الضغط يولد انفجار وانت كاعد تضغط عليه لدرجه لا تطاق ولا تحتمل.

جاوبني بلهفه وحماس متجاهل كلامي الكلته..

ادهم : عاجبني عاجبني تصير عندي بنيه نسخه مصغره منج اعشقها وادللها مثل ما عشقت مريم وراح احبها اضعاف حبي الج لان تشبهج ...

سيلين : ههههههههه اذا ضليت يمك صدكني راح اكرهك..

ادهم : ادهم مختلف راح يخليج تضحكين وتعيشين حياة مختلفه راح يسعدج لدرجه عيونج تلمع فرح وسعاده اعيشج براحه ابديه.

سيلين : ماكو هيج حب بس بالقصص.

ادهم : وانه عندي قصه وعاجبني ارويها الج.

سيلين : هواي مندفع.

ادهم : مجنون مرتجف..

بلعت ريكي بغصه جاوبته بصوت يرجف.

سيلين : راح تكرهني وتلومني وتتندم لان اصريت عليه.

ادهم : كلتها الج وارجع اعيدها كلشي منج اتقبل وانه الممنون .

جاوبته بغضب وصوتي يرتعش لان مكاعد يفهمني ضليت اتخبط بالكلام وهو بقمه الاتزان يجاوبني...

سيلين : وثقت بيك وامنت بيك واكثر من مره اثبتت انت حبك اليه ابوي ليش تغيرت وشوهت علاقتنه ليششش..

رفع ايده وكتفه مستسلم.

ادهم : بكل بساطه حبيتج والحب مو بالكيف..

سيلين : والتقبل هم مو بالكيف..

ادهم : والله ماريد شي غير اسمي يجاور اسمج ليش هالانانيه..

سيلين : انت اناني مو اني.

ادهم : صح اناني وهوواي هم بس اناني بحبج وخوفي عليج اناني بلهفتي من اشوفج مريضه لو تعبانه ...

سيلين : بدينه بكذب وراح نستمر بكذب..

ادهم : وين الكذب يعني ؟

سيلين : كل هاي اللهفة الكاعد اشوفها بعيونك تريد تقنعني تبقه علاقتنه مجرد اسماء متجاوره انت المن تقنع او بالاصح عليمن تكذب.

ادهم : لاول مره بحياتي انحني لمرأه ومستعد اموت علمود اعيش وياها وكل يوم احلم بنفس الحلم ارتبط بيها ونعيش بسعاده صدكيني انه استحق منك هيج فرصه..

سيلين : مو كتلك اناني وبس تفكر بنفسك.

ادهم : حتى اثبتلج مو اناني اخذي وقتج بالتفكير منا لحد ما تشوفين نفسج مستعده بلغيني ونرجع مثل قبل انه عمج وانتي مثل بنتي.

حجاها وضحك.

سيلين : تستهزء مو ..

تقرب مني وهمس بأذني.

ادهم : تسع شهور انتي تنامين بحضني تسع شهور سيلينه ادمنت وماعاد اصبر اكذب اذا كلت عندي صبر .

وخرت وجهي بعيد عنه ربكتني انفاسه من لاحت وجهي..

سيلين : شفت ليش اكلك اريد اعيش وحدي لان اني ماعرف بفتره مرضي شسويت وشخربطت وانت شنو شفت وشنو سويت لهذا مستحيل نكدر نعيش سوه بمكان واحد مثل الغرباء واحنه انفاسنه اختلطت سوه وصار تقارب حميمي بالمشاعر حتى وان كنت غايبه عن الوعي..

ادهم : وربي وربي اجمل اختلاط واحلا خربطه وانقى تقارب بالله مافكرت بسوء ولا استغليتج وداعت مرايم عاملتج مثلها كأنما مريم وكاعد اعالجها وربي ..

سيلين : صاير هواي تحلف واليحلف هواي يعني كذاب.

ادهم : صح وانه كايلها قبل بس شلون اقنعج بمشاعري ..

سيلين : شوف انت تكول اقنعج يعني شي ما مرغوب بالنسه اليه افهمني يا ادهم.

ادهم : انه افهم وهذا يفهم..

اشر على دماغه وبعدين اشر على قلبه وكال ..

ادهم : وهذا شيفهمه..

سيلين : معقوله دكتور وكل هالعلم والثقافه التمتلكها متكدر تسيطر على قلبك ومشاعرك.

ادهم : اكبر عالم يخسر امام مبارزه العقل والقلب وهنا تكمن الخسائر.

سيلين : الاكدر اكوله الك بدون كذب راح تخسر وتخسر هواي.

ادهم : خسارتي وياج افضل من ربحي بدونج.

سيلين : كيفك ..

عفته وطلعت من الغرفه اغلي اغلي نار اريد اعيط اريد انفجر ايدي ترجف دخلت للحمام وصابتني رعشه الادمان احتلت جسمي كله فتحت بوري المي دنكت غسلت وجهي رفعت راسي باوعت بالمرايا وابتسمت ابتسامه خبيثه ماعرف بوقتها شنو جنت احس ، عندي احساس بداخلي اريده يتأذه اريد اعذبه ، بس شي مو بيدي شي خارج عن الشعور...

سديت البوري بسرعه لان ما اتحمل صوت المي ابد اكرها ، الحلو بالموضوع عيوني كامت متفضحني يعني ادهم مستحيل يكدر يقراني وهنا بده اللعب..

طلعت من الحمام صار بوجهي واكف مبتسم.

بيدي الخاولي نشفت وجهي عبرته ومشيت استوقفني من كال.

ادهم : انه ما حبيتج عبث ..

وكفت بمكاني صفنت بكلامه والتفتت بهدوء كتله.

سيلين : شتقصد؟

ادهم : فكرت هواي ودرست الموضوع وحللته من كل الجوانب ولكيتج انتي الوحيده تليقين بالادهم..

سيلين : ما اعتقد كلامك صحيح انه وين وانت وين ، اختلاف جذري انت شنو ناقصك لحتى تاخذ امرأه غير مكتمله بكلشي عدها نقص بعقلها وجسدها وبمشاعرها والاهم ماتكدر تبادلك الحب ولا تنطيك ربع حبك الها..

ادهم : المهم انه احبها ..

ارتخت ايدي جنت سادتها حيل ابتسمت ...

ادهم : متأكد راح تبادليني المشاعر بيوم ..

سيلين : صدكني كوه متمالكه نفسي وما اذيتك لحد الان .

ادهم : حلو من يجتمع الجنون مع العقل بالتالي واحد ينتصر يا اما الجنون يا اما العقل.

سيلين : شفت هذا ابسط اختلاف بينه انت عاقل واني مجنونه.

ادهم: وانه عشقت جنونج وخلصنه..

سيلين : والله عاجبني اكمل حياتي وحدي ماريد اشارك احد اكتفيت ولتنسه توني طالعه من تجربه بائسه كرهتني بكل الرجال.

ادهم : حقج بس من تحبيني راح تستمرين ويايه..

ضليت ساكته تنفست بعمق واني افكر بكلامه وبنفس الوقت اريد أأذيه ...

ادهم : ارتاحي هسه وبعدين نكمل حديثنا...

دنكت راسي ورحت للغرفه مددت وصافنه على السكف واتخيل شغلات تحرك دمي حرك كمت اتذكر شلون جان يدز لسامر فيدوات واحد بيوم العقد مالتي من رحت يمه ولزمت وجها بالحديقه ،

كاتبله شوف الحب البينه انت هدمته لو الفديو من باس راسي من عقدت هم دازه اله وشارح بيه كل مشاعره لو شنو اتذكر الرسائل التجيني بموبايلي وتنمسح وره لحضات مرتين وكعت بيد سامر وقراهن وبيومها يشوفني الويل ويضوكني المر لو بعدين اكتشفت هو حاجيله عن الماضي مالتي وحتى التصوير مال زاكروز بوفاه عمتي دازه اله كاتبله هذا الماضي مالتها بس اتركها ورجعها اليه...

هاي الفديوات شوكت شفتها بعد ما شبعني ادمان يعني مو بذاك عقلي اليفرزن شخصيه ادهم من عدمها سواء بطريقه الكتابه او التعبير لهذا حقدت عليه وصدكت هو هيج اذاني بس من رجعلي عقلي كلت لا اني غلطانه جوز هاي لعبه و من رجع طلبني مره ثانيه وشرح مشاعره رجع الشك استوطن بداخلي وكلبي كام يلعب منه يعني هووو صحيح داز هاي الراسائل والفديوات لسامر حتى يخرب حياتي وكل العشته والعذاب الشفته حملته مسؤوليته كامله....

للمغرب دك الباب وفات وكف كبالي ونزل ردنه جان كافها..

ادهم : كومي صلي صرتي زينه وذاكرتج رجعتلج واجبج تشكرين الخالق ولو بسجده شكر..

باوعتله وضحكت مستهزئه..

ادهم : حجيت شي غلط؟؟

نترت بيه..

سيلين : وعلى شنو اصلي ؟

صفن بوجهي وعكد حاجبه..

ادهم : بابه حرام هيج تحجين صرتي زينه غير تصلين..

سيلين : اصلي و على شنو ماصلي..

ادهم: استغفر الله ربي واتوب اليه زين ليش لتخبليني..

سيلين : لعد اذا رب العالمين يدري بيه اتعذب ليش منقذني ..

ادهم : انتي صدك تحجين ؟؟؟

سيلين : اي صدك احجي انت مو تكول هو ابويه ليش لعد ما نقذني..

ادهم : استغفر الله بابه حرام هيج تحجين شجاج..

سيلين : لا مو حرام الصارلي هو الحرام .

ادهم : لا حرام هيج تحجين واكبر حرام.

سيلين : طيب اقنعني علمود ارجع اصلي..

اجه كعد على جربايتي واني تدنيت ليغاد...

ادهم : باعي احنه بشر والبشر معرض لهواي امور ويمر بعده اختبارات يلا يوصل لمحطه معينه لكن اليفوز بالغنائم هو المؤمن الحق ...

سيلين : شلون يعني مفهمت..

ادهم : يعني الله سبحانه كريم واحن علينه من ابائنه واقرب النه من حبل الوريد كلشي كاذب بالكون فقط سبحانه هو الحقيقه الثابته بهذا الكون المتشتت كلشي ينطمر ويروح الا الله سبحانه يضل موجود لان هو خالد

و موجود وياج واقرب الج من نفسج لكن يختبرج ويختبر حبج اله فعلا تحبيه حتى بالصعاب لو تتخلين عنه اذا مريتي بأختبار صعب ، ربنا يحبج لهذا اختارج من بين عباده وميزج بهيج اختبار صعب يريد يشوفج تستمرين بعبادته وقت الشده لو تتخلين وبس بوقت الراحه تلتجئين اله..

دنكت وبجيت بنفس الوقت ، بس كلامه ماعاد يأثر بيه مثل قبل واقتنع بسهوله لهذا استبعدت فكره ارجع اصلي مره ثانيه ، درت وجهي ومددت نطيته ضهري وتغطيت ، سمعت نفسه ارتفع حسيته ضاج طلع وسد الباب ...

بليل ساعه ٩ اندك باب غرفتي درت وجهي انفتح ايفين فاتت تضحك وشايله بيدها صينيه قربت الطبله من السرير سحبت كرسي وكعدت بعد ما بوستني وسلمت عليه..

ايفين : تعشي ..

اخذت اللفه بدون ماجاوبها مدنكه واكل رفعت العصير وخلته بيدي..

سيلين : اذا اريد اني اخذ رجعيه.

ايفين : براحتج..

اكلت نص لفه ورجعتها بالماعون ...

ايفين: كمليها .

سيلين : انتي شيوجعج...

ايفين : هاي شبيج.

سيلين : طلعي بره.

ايفين : صدك تحجين؟؟

سيلين : طلعي بسرعه..

ايفين : شسويت..

سيلين : مسويتي سلامتج بس طلعي.

اخذت الصينيه وطلعت بدون كلام..

ضليت متمدده ، هيج حقد بداخلي على كل الناس شي مو طبيعي اصفن على روحي اني هيج احقد وعلى منو على اعز ثنين عمو وايفين ياربي شنو هالتغيير البداخلي عجيب ..

مرت الايام مر الاسبوع الاول وتلاه الثاني واني مستمره بالعلاج ثالث اسبوع جنه كاعدين بغرفه المكتب عندي محاضره تخص الاعصاب وكاعد يعلمني شلون اسيطر على نفسي اجاه اتصال جاوب وحجه وياه بالانكليزي وجها ضحك واستبشر كمل المكالمه والتفتلي..

ادهم : سيلينه لكيتلج علاج لحالتج واكدر اعالج اذا التزمتي ويايه ممكن نقضي على ١٥ بالميه وتضل عشره بالميه مو مهمه نكدر نتجاوزها بمرور الوقت.

سيلين : قصدك التغيير الصار بحالتي.

ادهم : بالضبط.

سيلين : من شنو اعاني صارحني لان تعبت واني افكر اذا فعلا اني شخصيتي نرجسيه او سايكو..

ادهم : شلون شخصتي نفسج على اي اساس..

سيلين : على شرحك للحالات عرفت اني عندي هيج حاله..

ادهم : باعي ما اكذب انتي عندج هيج حاله بس اكدر اعالجها واسيطر عليها اذا انتي حبيتي تتعالجين اما اذا كذبتي عليه او خدعتيني واوهمتيني تعالجتي ما راح اعرف اذا تعالجتي فعلا ، لان التجربه والنتيجه متوقفه عليج..

سيلين : وشلون راح اتعالج عن طريق شنو..

كام من مكانه وسحب كرسي كعد كبالي بينه اقل من اربع اصابع...

ادهم : انه بلشت اعالجج من زمان ومن ضمن علاجي الج التوجيه الديني علمود ترجعين لطريق رب العالمين ولصلاتج هذا من ضمن العلاج الروحي اما الدعاء الج دائما ادعي بدون متوصيني اصلا ..

سيلين : شنو الفائده من هاي المحاضرات الدينيه وشنو الربط بينها وبين علاجي..

ادهم: اعالج بمحاوله ايقاظ الضمير والمشاعر بداخلج من جديد لان اغلب مشاعرج واحاسيسج فقدتيها بسبب الصار والصارلج موقليل اعرف ومتفهم ...

سيلين : وبعد شنو انطيني كورس علاجي امشي عليه..

ادهم : انطيج كتب اقريها وكل يوم نسوي لقاء ديني و روحي،، انه وياج نتناقش بأمور الدين واداء الفرائض والمناسك الدينيه ....

وضل يحجي ويايه عن عظمه الله سبحانه وان المؤمن مبتلى ومرور الانسان بتجربه قاسيه هيه فائده اله علمود يظهر القوه الايجابيه البداخله ويترك السلبي ..

وراها بلش علاجي عن طريق الادويه منها مضادات الاكتئاب ومضادات الذهان ومثبتات المزاج بس ميسمحلي اخذ هواي منهن ومن اكله ليش يكلي ممكن تعرضج للأدمان عليهن وكل ما يقطعهن عني احقد عليه واكوم املخ بروحي...

واخر فقره الاختلاط كام ياخذني وياه وين ميروح نتسوك او نروح لاهله والكل تعامل ويايه بصوره طبيعيه وفوق الطبيعيه لان ادهم مهددهم اذا سمعوني كلمه او ضوجوني ياخذني ويسافر وميرجع بعد...

مره رحنه يمهم جنه كاعدين بالهول تغدينه وكمت اريد اغسل وكفت يم المغسله اغسل بيدي وسمعت صوت فهد سديت البوري وضح الصوت اكثر اسمعه يكلها لايفين..

فهد : لتخرمشين بعد مجلوبه ،، لتخزرين افكس عينج والله..

صوتهم جاي من غرفه ايمن القديمه ...

اندارت اريد ارجع للهول طلعت ايفين ضايجه روحها طافره صعدت الدرج بسرعه وهو طلع عصبي من الغرفه وصعد بايات الدرج يركض وراهتا بعدين سمعت عياطه تالي خنسوا..

عيني على الدرج ضل بالي يمها خاف يأذيها التفتت على صوت ام ادهم وهيه تكول...

فردوس : لتصعدين هاي يوميه هيج يتناكرون ونكول راح يذبحها وره شويه ينزلون يضحكون ويتغزل ففه ما ففه ، لفها البين ان شاءالله...

حجتاها وراحت للمطبخ شايله مواعين الغده هزيت راسي مدري اضحك مدري انقهر عليها حيره رجعت للهول كعدت ...

وفعلا وره ساعه فاتو للهول كفوف ايدهم متحاضنه ويضحكون فعلا ثنائي سايكو ....

اجتي مريم كعدت بحضني وضلينه نلعب اني وياها عدها لعبه تشبه الاتاري بيها باتريات جايبها الها فهد وثبرتنه ثبر بيها هاي عمو جابها وهاي من عمو..

همسلي ادهم..

ادهم : شكد اجيبلها العاب ماسمعتها بيوم كالت بابا جابها وفرحت هلكد ...

سيلين : هيه حظوظ والظاهر حظ اخوك قوي..

سكت وسافر بصفنته بوجهي ...

ادهم : سؤال سيلين ..

سيلين : جواب.

ادهم : اذا بيوم صار بيه شي او سافرت ما راح اترك اثر بداخلج..

رفعت راسي باوعت عليه بعدين دنكت و همست..

سيلين : مرت سنوات عمري هدر ولكيتها عندك و بفضلك لهذا اكيد راح انتهي وراك بس هذا مو معناه راح اتقبلك او احبك كزوج...

رجع راسه على القنفه وهمس بصوت ناصي لان الكل كاعد..

ادهم : لو ما ظهرتي بحياتي جان شلون كملتها ....

سيلين : ماعندي طاقه لكلامك ادهم ...

ادهم : حبيت اسمي من تنطقه شفايفج ..

سكتت واخذت نفس عميق ...

سيلين : انت الظاهر مثل الطفل صاير وتريد من يحتويك.

همس بصوت ذايب.

ادهم : صح رجعت طفل بعمر خمس سنوات هيج متعلق بيج مثل هذا الطفل من تعلق بأمه ، انتي غيرتيني غيرتي بادهم هوووواي ...

سيلين : صدكني ما اكدر اكمل وياك بعد صعب الله يخليك لتوكف بطريقي وافهمني اريد استقر وحدي واذا متقبل اشتغل انت اجرلي بيت اهم شي مفصول عنك بعد ما اتحمل..

تجاهل كلامي وياه وصدمني من فاتح اهله بالموضوع وحدد يوم للعقد مالتنه..

عدل كعدته وكال..

ادهم : بما انو اليوم مجموعين بخير اريد ابلغكم العقد مالتي على سيلين يوم الجمعه القادم..

فردوس : شنووووووو تخبلت .

ادهم : مشكوره ..

يوسف : تحلم اسمحلك.

فرودس : تخبلو ولدي تخبلوو..

ادهم: العاجبه يحظر اهلا وسهلا والماعجبه اخليه على راسي انه جيت ابلغكم ما اخذ رأييكم.

يوسف : احسنت دكتور هذا التعلمته من دراستك..

ادهم : ضيعتها مره ما مستعد اضيعها اكثر..

كمت من يمهم ورحت بغرفه ايمن اغلي اغلي من القهر هم حرجني وهم ما اخذ بكلامي دخلت ايفين كعدت كبالي وكبل كالت..

ايفين : المفروض تفرحين مو تضوجين..

سيلين : ليش افرح يعني افرح بالغضب لو بالاهانه التعرضت الها من اهله.

ايفين : شعليج منهم سيلين شعليج اهم شي عمو ..

سيلين : كومي من وجهي احسلج.

ايفين : عمو مصر عليج.

سيلين : واني مستحيل اقبل مو بالغصب هيه..

ايفين : وين تلكين من عمو انتي بطرانه تره..

سيلين: معليج مني ..

ايفين : وشلون تضلون هيج وانتو بنفس البيت وانفضحت مشاعره وصار كلشي علني بعد صعب تضلين وياه بدون ارتباط رسمي.

سيلين : هو راح اطلع من بيته كرهت كلشي بيه ..

ايفين : صدك تحجين.

سيلين : اي.

ايفين : واذا مسمحلج..

سيلين : اذا مسمحلي ادمره..

ايفين : شنو ناويه تسوين سيلين ؟؟؟

باوعتلها واني ارجف غضب ..

سيلين : اهدمه ..

ايفين : لج ليش مو يحبج لدرجه الجنون ...

سيلين : مشكلته المهم راح اخليه يندم على ملحته هاي..

ايفين : يعني شتسوين مثلا؟؟

سيلين : اخسره كلشي واولها اعصابه..

ايفين : مفهمت عليج تره دوختيني وشلون ينطيج كلبج هيج تأذيه بعد السواه النه وخاصه الج.

ايدي ترجف وجسمي يرجف اعصابي تعبت جاوبتها بضعف..

سيلين : بعدين تفهمين...

جان الباب شويه مفتوح واني صوتي عالي يعني اذا واحد واكف يم الباب يسمعني انفتح الباب فهد واكف مبتسم..

خال ايده بجيب التراك ويباوعلي هز راسه برضا وضحك نص ضحكه وكال .

فهد : ففتي اريد جاي..

ابيفين ربتت على رجلي بحركه تطمني بيها وكامت فاتت من يم فهد ضربها على ****** وصاح..

فهد : تخبل حبيبي..

همست بيني وبين نفسي..

سيلين : ادبسزز...

لعب حواجبه ضحك وسد الباب ...

رجعنه للبيت والطريق كله يحجون هو ونرمان واني كاعده ليوره امسد بشعر ميلي جبتها ويايه جانت يم ايفين من تزوجت تركتها يمهم ...

اول ما صف السياره نزلت درت وجهي على الجهة الثانيه بين ما فتح الباب دخلت قبلهم ورحت لغرفتي كبل سديت الباب ردت انام للصبح مكدرت من التفكير مرت اربع ايام واني حابسه روحي بغرفتي خامس يوم جنت متمدده صارت ساعه تسعه الصبح وعبالك شيطان ركب راسي بدلت واخذت كم قطعه ملابس وطلعت من غرفتي فتت للهول حتى منه اطلع للطرمه شافتني نرمان سألتني مستغربه.

نرمان : وين رايحه من الصبح.

شمرت الجنطه من ايدي للكاع ونزلت دمعتي.

سيلين : اريد اطلع منا .

اجتي يمي وكفت عاكده حاجبها ..

نرمان : ليش ؟؟؟

سيلين : كلشي هنا يخنكني حتى الهوى..

نرمان : منو ضوجج.

سيلين : ضايجه من نفسي..

نرمان : ليش حبيبتي ..

سيلين : تعبت محد يفهمني الكل يريد اصير مثل ما يحب بس اني ما اريد ارتبط بأحد ولا اريد اسوي علاقه اني الصارلي مو قليل اني شفت اشياء مشمئزه استحي حتى اتذكرها مو عاد احجيها..

نرمان : ياعمري انتي هاي شصاير بيج تعاي كعدي نحجي لتبجين كلشي اله حل.

حضنتني ومشينه كعدنه على القنفه..

نرمان : باعي اني عرفت سبب ضوجتج هو عرض ادهم بس البارحه حجيت وياه من رجعنه وقنعني بفكرته يريد يرتبط بيج بالاسم وبس يعني ماكو شي يصير بينكم اذا انتي ما ردتي والاهم يريد ياخذج بره يعالجج حتى ترجعين طبيعيه ياحبيبتي فكري بأيجابيه وكلنا وياج واني اول وحده مساندتج..

سيلين : اذا انتي صدك ويايه وتحبيني قنعيه يأجرلي ..

نرمان : شلون يصير غيرته متسمح يخليج تعيشين وحدج ولج يخاف عليج ويرجف شتريدين اكثر والله لو يتقدملي واحد عنده صفه وحده من ادهم اقبل واني مغمضه..

سيلين : يعني حاصرتوني من كل الجهات.

نرمان : لو تدرين وين راح اليوم؟؟

سيلين : وين ؟

عكدت حاجبي وهيه ابتسمت

نرمان : سافر للخليج عنده ندوه وكال اريد اجيبلها نيشان مناك ..

سيلين : الله كريم ...

نرمان: هاهيه قنعتي حبيبتي منريد نجبرج على شي فرحيه الله عليج ادهم تعب هوواي.

سيلين : اذا بس بالاسم وعلى الورق اقبل بس اذا زواج فعلي يعذرني..

نرمان : هسه انتي قبلي والله كريم تصفى بعدين...

سيلين : ماعرف خايفه ...

نرمان : من شنو

سيلين : من نفسي وخاف اضعف..

نرمان : معناها تحبيه.

سيلين : اكيد احبه بس ماريد اتقبل هاي العلاقه ماريد..

نرمان : كولي ياالله وكافي تشلعين كلبه حبيبتي انتي فدوه لخاطري اني ماعندي خاطر يمج ولا شويه.

ضحكت وعيوني مليانه دموع تقربت باستني وكالت..

نرمان : نريد نفرح بيكم عيني والله ادهم خوش ادهم ويحبج هووواي ويريد راحتج.

سيلين : صحيح

نرمان : اخابره ابشره

ضحكت وكتلها.

سيلين : خابريه..

كامت حضنتني وباستني ركضت للموبايل اتصلت على ادهم وفتحت مايك جاوبها وره دكتين ...

ادهم : الووو

نرمان : شلونه الحب مال اخته ...

ادهم : ضحكتج وراها سالفه كولي شنو عاجبج اجيب.

نرمان : ظلمت اختك ابو البني..

ادهم : هههههههههه ها لج شو كمنه نسمع بالحجي.

نرمان : عندي بشاره الك بس اريد مقابل.

ادهم : اويلي عليك ادهم كلها تريد منك محد ينطيك.

نرمان : حبيبي اذا كلتلك على الخبر العندي راح تجيبلي دبي كلها وياك..

ادهم : هسه غير تحجي عندي اجتماع مهم وطلعت استراحه خمس دقايق عندي بس.

نرمان : والله متأكده بعد سماعك للخبر راح تترك الندوه وحتى الاجتماع متحضره.

ادهم : كولي يمعوده فهد صار زين.

نرمان : يعني اذا صار زين فرحتك جبيره..

ادهم : اي والله فرحه ماتضاهيها فرحه.

نرمان : اسمع يابه حبك المستحيل ...

سكت سمعت نفسه صار عالي ونرمان تباوعلي وتضحك.

ادهم : احجي شبيها سيلين رجعت انتكست لو شنو ؟

نرمان : سيلينتك صارت الك.

ادهم : شلون يعني مافهمت؟

نرمان : يعني جهزلها من كل كلبك.

ادهم : شنو وافقت؟؟

نرمان : اي وهياتها تضحك كبالي واكفه..

ادهم : تتشاقين مو ؟

نرمان : لا والله هاك اسمع صوتها ...

جابت الموبايل خلته بيدي لغيت الحاكيه وخليته على اذني واسمع بوضوح اضطراب انفاسه همست...

سيلين : شلونك ؟

جر نفس كلش قوووي بحيث حسيته بصفي تنهد وكال بصوت ذايب...

ادهم : تداويت من ليلى بليلى عن الهوى كما يتداوى شارب الخمر بالخمر ..

( معذبتي لو لاك ماكنت هائماً أبيت سخين العين حران باكيآ )

سكتت جر نفس وضحك بعدين همس بصوت عذب ...

ادهم : الا زعمت ليلى بأني لا احبها
بلى والليالي العشر والشفع والوتر
بلى والذي لا يعلم الغيب غيرهُ
بقدرته تجري السفائن بالبحر
بلى والذي نادى من الطيور عبده
وعظم ايام الذبيحه والنحر
لقد فضلت ليلى على الناس
مثل ما على الف شهر فضلت ليله القدر..

(لقيس بن الملوح)

سيلين : هههههه ياويلي... ؟؟؟

ادهم : هذا الشاعر اشعاره كلها انه مدونها وحافظها وبكل سطر اشوفج بين كلماته واحسه يكتب عني وعنج ..

سيلين : ماعرف شنو اكول بس انتضرني واصبر عليه بين ما اتعود واتقبل الفكره.

ادهم : وياج وانتظرج ..

سيلين : شوكت ترجع ؟؟

ادهم : حنيتي ؟

سيلين : هههه بعدنه ماكلنه بسم الله..

ادهم : ماشي ماشي المهم يومين وانه يمج.

سيلين : توصل بالسلامه...

سديته واني بين احساسين احساس الرفض واحساس القبول غمرتني فرحه بداخلي بس هل هيه فرحه فعليه لو تخبط بالمشاعر...

مرت اليومين ورجع من السفر والفرحه مرسومه رسم ومخططه ملامح وجها بدقه مثيره..

تقرب من مريم بوسها ودنك حضنها وراح على نرمان حضنها وبوسها وايمن كذلك وصل يمي ابتسم واخذ راسي طبع قبله رقيقيه على كصتي وهمس..

ادهم : كلما داعب الحنين قلبك تأكدي هذه لفحه حب مني..

ضحكت عافني وراح للحمام سبح وطلع تغدينه وكل شويه يسرق نظره مني ويبتسم ويرجع يكمل اكل...

حددنه موعد للخطوبه وعزم اهله واقاربه كلهم وحتى ضيغم خابره وبلشنه بالتحضيرات الكل فرحان بينه عدا ابوه وامه فجأه سمعنه رجعو للمحافظه مالتهم وضلو فهد وايفين بذاك البيت ...

اللي فهمته ما قابلين على تصرفات ادهم وما راضين على هاي الزواجه والاصح سمعت الاب مهدد ادهم يتبره منه وادهم ماسامع ولا مناقشهم يعني بين قوسين ناطيهم الاذن الطرشه..

الفستان هو جابه لونه بني مفصل وراسم تقاسيم جسمي بعنايه وكأنما يعرف قياسي بالمليم مكياج جايب كله ترابيات وتدرجات البني والصدفه او مو صدفه لان ايفين كالت اخذ قلم الروج مالتج وضمه عنده ، لهذا جايب سيت كامل من نفس هذا اللون ...

الادهم ويعشق هذا اللون ويحب يشوفه على حبيبته ...
لهذا مشتري اغلب ملابسي هذا اللون...

حجزنه صالون واقترب موعد العقد اخذنه ادهم اني ونرمان وايفين ...

نرمان ..

قبل لا تطلع سيلين اجه ادهم يمي وكال.

ادهم : خلولها مكياج هادئ ماريد تضيع ملامحها ..

نرمان : ماشي ههههه

ادهم: اعتمد عليج..

نرمان : تحبها؟؟

ادهم : هذا سؤال بربج عبرت هاي المرحله..

اجتي سيلين تمشي وبيدها الفستان مالتها بالجيس راحلها ادهم ماعرف شنو حجه وياها واخذه من ايدها وطلعنه وصلنه للصالون نزلنه بعدنه نعبر الشارع صاح...

ادهم : نرمان ؟؟؟

التفتت عليه لكيته يضحك..

نرمان : هااا

ادهم : حطولها بني بني....

ويأشر على شفته...

نرمان : كتلك كتل البني.

ادهم : اي والله..

دخلنه للصالون وكل وحده لزمتها عامله كملنه واتصلنه على ادهم كال جاي..

اتصل علينه طلعنه اباوع سيارات ايمن وفهد وضيغم كلمن جايب سيارته وجاي ومسوين زفه بالهورنات...

نزل ادهم مشى سريع وصلنه يمنه واستعجلنه نصعد صعدنه بسيارته وانطلقنه فهد سيارته كلش سريعه تشبه سيارات السباق وتك باب رياضيه...كل شويه يكسر علينه ويهز السياره مالته.

ادهم : هذا خبل هذا راح يكلبني .

نرمان : هههههه عوفه فرحان.

ادهم : شفرحان ولابس اسود.

نرمان : معليك بيه دعوفه..

لهناك وسد علينه الطريق صفينه السياره باوعت ورانه ضيغم وايمن ، علك المسجل ونزل يهز بنص الشارع كابله ضيغم نسخه فهد بالتصرفات والتحشيش اصدقاء من الصغر واكيد صديقهم الثالث ادهم اعمارهم متقاربه..

ضيغم خليط من شخصيه ادهم وفهد من كل واحد ماخذ شويه ، وعندي قصه وياه بعدين ارويها الكم ...

اجه ضيغم راد ينزل ادهم علمود يشاركهم الفرحه وادهم رفض مقبل ، بس من شاف فهد طلع المسدس وسحب اقسام نزله يركض نزلت وراهم اعرف راح تصير مشكله..

ادهم : هاي شنو تريد ترمي.

فهد : غير عرس الغالي.

ادهم : رجع مسدسك احنه نحجي على اليرمي هلمره نصير مثله..

فهد : بالله مايرجع اله ارمي.

ادهم : لتنغصني فهد ماريد ناس تموت على حساب فرحتي ..

فهد : يول شبيك خليني ارمي.

ادهم : استغفر الله واتوب اليه.

ضيغم : ادهم متعرفه لفهد اذا سحب اقسام لازم يضرب متعرف مترجع الطلقه ..

ادهم : اعرف بيه كلش زين بس مو ويايه سوالفه يسويها.

فهد : هسه شلون ..

ادهم : اذا رميت تصير محلوه.

فهد : وانه الطلقه من اسحبها متبات بمسدسي بعد.

ادهم : روح اضربها بالكاع بأي مكان بس بالجو مترمي.

فهد : شنو مخبل واضرب الكاع قابل تطلبني ثار.

ادهم : تره هواي لحيت وضوجتني.

ادهم يحجي وضيغم يحشش وفهد ارفع ايدك وارمي..

ادهم ضل يرزل بيه وهذا يهز تالي ادهم هز ايده والتفت توه يريد يصعد ورجع فهد سحب اقسام ورمه.

ادهم : نعله علا **************

كام يفشر عليه..

الطريق كله يحجي واني اهدأ بيه وصلنه للبيت اقاربنه كلهم جايين عدا ماما وبابا كسرو فرحتنه وادهم كلش انقهر بس مع ذلك كسرت عليه ورجعتله ضحكته..

اجه الشيخ علمود يعقدلهم واصر ادهم يكعد يم سيلين من يعقدون ، الاغلبيه اعترضو وكالو ميصير وهو هذا جان رده.

ادهم : اريد اشوف فرحه القبول بعيونها..

الشيخ طلب نسكت وصار هدوء بلش يقره ومن وصل لادهم علمود يكول نعم كال.

ادهم : موافق ارتبط بيج بكل ممنونيه.

ضحكنه كلنا وهو هم ضحك وحتى سيلين جانت فرحانه وتضحك من كلبها.

بعدين سألها الشيخ باوعت لادهم وكالت نعم...

مجرد نطقتها كام ادهم شالها بتك ايد وحضنها دفن راسه بركبتها ...

قسم يضحك وقسم يتهامس وتعالت الاصوات بالهلاهل والاهازيج طلع الشيخ والادهم مجلب بسيلينته نريد نباركلها حاضنها وضام وجها لصدره.

نرمان : مطلعت هاي نريد نبارك شلون يا ادهم.

ادهم : تحسدوها شوفيها طالعه تجنن وخري هاي مالتي...

نرمان : هههههه ادري مالتك وبعدين انت شلون توخر عنها الكبوس والشيخ كاعد.

ادهم : شمدريني بعد صارت.

نرمان : الله يسعدكم حبيبي

بسته بخده ، واقاربنه باركولهم بالتتابع سيلين ماعت من الخجل صارت حمره دم وبس تضحك وهو كل مايشوفها تضحك هو هم يضحك ويرجع يحضنها ، رحت علكت الهم اغنيه بالصدفه اكلب وطلعتلي خزنتها اسمها البني المحروق لفارس كرم..

واخويه انطلق يركص وياها ، وين ادهم وين الثكل مالته بس للأمانه ركصه بثكل يهز ايده اكثر شي...

وكفنه يمهم نصفك ونركص فرحتنه من فرحتهم اتصل عليه ايمن فتحت الخط .

ايمن : وين اخوج الناس بره تريد تباركله حتى ترجع لبيوتها.

نرمان : ولك مجلب بسيلينته تعال شوف ..

ايمن : صدك جذب انطيني احجي وياه.

وديت الموبايل لادهم انغ بيه بيدي مينتبه..

نرمان : يمعود بعدنه ياالله والعقل راح .

التفت عليه مبتسم وهايم اخويه ..

ادهم : هممم

نرمان : هاك امين يريد يحجي وياك..

اخذه مني فتح سبيكر لان صوت الاغاني عالي..

ادهم : ها ايمن.

ايمن : تعال الناس منتضرتك بره شنو سالفتك انت..

ادهم : شويه واجي .

ايمن : ولك دعوفها شجاك

ادهم : والله ماعوفها اليوم

ايمن : ولك منا العالم عيب

ادهم : اسكت انت معليك اذا نبقه وحدنه متخليني..

سيلين

سده من ايمن وهمس بأذني كلمات اقشعر جسمي منها.

ادهم : يقال اقرب طريق لقلب الرجل معدته
اما انه اقرب طريق لقلبي شفتيكِ بروجها البني ..

يتبع...

صباح الخير
متابعه ممتعه...