مساء الخير احبتي
أتمنى لكم قراءه ممتعه 💕
بقلم: زهراء البياتي
النشر حيكون يومين نشر و يوم استراحه يعني البارحه نزلت و اليوم هم و الباجر الاستراحه..و رجاءا اتفاعلو ويا البارت تره مدتسون واهس 🥺💕
..
أمينه..عبالج ماعرف فرحتج المن..محد يعرفج بكدي
اباوع ع اسراء خجلت و دنكت راسها
أمينه..خلروح اصلي
راحت بيبي طلعت..واني باوعت ع اسراء
ريم..وين راح تروحين
مجاوبتني لان جانت صافنه و مبتسمه
اني هم مسألتها..رجعت اكل و هيه ضلت صافنه و مبتسمه
طول اليوم بقيت يم اسراء..لان بس هيه حبابه و تحبني..بس من صارت الدنيا ليل..جنت بلكاع نايمه و اباوع ع اسراء شلون تخيط و هدى نايمه
دخلت ماما بدون مدك الباب
اسراء..عود ليش مدكين الباب
تخصرت و ابتسمت
حليمه..نسيت..تعاي ريم
ريم..وين
حليمه..شنو وين شكو تسألين داكلج تعاي
كمت و رحت يمها
اخذتني من ايدي و طلعنا من الغرفه
دخلتني للغرفه مالتها..جان عمو خالد كاعد ع فراش
حليمه.دشوف منو اجت
هو جان مدد ع جربايه ..باوع عليه بسرعه ضاج
جرتني ماما و كعدتني يمه ع جربايه
هو كام و عدل كعدته
خالد..شلونج عمو
ريم..زينه
حليمه..لا يمه احجي البكلبج لتضمين ع عمج تره يحسبه ابوج
اباوع عليها مفتهمت شنو احجي
حليمه..سوده عليا تستحين
خالد..شصاير
حليمه..والله يا خالد انته تعرف اشرف الناقص شمر بنتي هنا بدون غراضها..فليوم سبحت و لبست ملابس بنتك هدى
خالد..اي
حليمه..و جان من تشوفها هدى تجرهه من الملابس و تضل تبجي و تعيط ع ريم و تكوللها حراميه وفوك هذا اجت خلود تغلط و تسب عليه و على بنتي..و مو بس هيج..دنكت راسها
خالد..شنو
حليمه..لا هيج ماكو شي اني ماريد اصير مشاكل
خالد..حليمه احجي
حليمه..عيرتها لبنتي ع ابوها
اباوع ع عمو خالد هز راسه بعصبيه و كام من الجربايه
بس ماما لزمته
حليمه..لا حبيبي شراح اسوي ماريد اصبر مشكله بسببي
عمو خالد دفع ايد ماما و طلع من الغرفه
اباوع ع ماما ابتسمت و باوعت عليه
حليمه..راح يروح يطيح حضها..اي تستاهل محد كللها تندك بيه
ضليت صافنه حته معرفت شحجي
بس سمعنا صوت عياط عمو خالد على خلود
من رجع جان وجهه احمر و عصبي
ماما بسرعه ماعرف شلون تكدر ادمع عيونها
خالد..طيحتلج حضها حته مره ثانيه تحترم
حليمه..ليش هيج حبيبي
راحت وكفت كدامه و لفت ايدها ع ركبتها و حجت بدلع
حليمه..مردت تصير مشكله
خالد..ماطول اني عايش واتنفس هذا الهوى محد راح يقهرج
ابتسمت ماما و حطت راسها ع صدره
حليمه..ربي ليحرمني منك طول العمر
هو هم حضنها حيل و ابتسم
واني جنت اباوع عليهم و صافنه
عمو خالد انتبهه عليه و كام يكح..و وخر ماما
ماما ابتسمت و باوعت عليه
حليمه..حبيبتي روحي يم اسراء و باجر نطلع اني وياج و عمو نشتريلج ملابس..مو حبيبي..باوعت علي و ابتسمت
خالد..تأمريني انتي
هزيت راسي و رحت بسرعه طلعت من الغرفه
و سمعت عمو خالد يكول لماما
خالد..حتبقين بهذا دلعج مو موتيني
حليمه..يمه الف اسم الله حبيبي..يومي قبل يومك
خالد..اموت ع هل لسان الينكط عسل
حليمه..هو هم يموووت عليك موووت موووت..جانت ماما تحجي بدلع
بسرعه رحت لغرفه اسراء..دخلت و هيه جانت متمدده و صافنه..رفعت راسها باوعت عليه
اسراء..تعاي حبيبتي
ابتسمت و رحت ع فراش تمددت
اسراء..يلا نامي
ريم..تصبحين ع خير
اسراء..اجمعين
غمضت عيوني بس مكدرت انام من التفكير
فتحتهن لكيت اسراء صافنه ع سكف و مبتسمه
ريم..اسراء
فزت و باوعت عليه
اسراء..ها
ريم..ليش ماما تحجي بصوت ناصي يم عمو خالد و دائما تحضنه و تنام هنا..أشرت ع صدري
هيه شهكت و فتحت عيونها
اسراء..صخام الصخمج حليمه كدام الطفله هيج تصخمين
ريم..شدتحجين مسمعت
اسراء..حبيبتي هذول مزوجين يعني همه المزوجين هيج سوالف واحد يحضن الثاني و شسمه..اهو انتي ميصير هيج تحجين انتي طفله..لازم من تشوفيهم هيج مره ثانيه تغمضين عيونج او تباعين ع غير صفحه
زين
هزيت راسي بتفهم
ريم..اني هم جنت احضن خواتي
ابتسمت
اسراء..حضن عن حضن يختلف
ريم..مشتاقتلهن هواي
باوعت عليه
اسراء..احجي ويا امج خلي فد يوم تروحين تزوريهن
ريم..اتمنى اجيبهن هنا يمي و اخذهن من عمه سناء
اسراء..وين تجيبيهن حته بيبي تنجلط
ريم..بيبتج متحبني
اسراء..لا كلبها طيب بس متحب امج
ريم..الكل ميحب ماما
اسراء..مالومهم..هيه امج هم تنحب
ابتسمت بوجهي
خاف تزعلين لان احجي ع امج
هزيت راسي بلا
و هيه ضحكت
اسراء..لعد يلا نامي
ريم..تصبحين ع خير مره ثانيه
اسراء..اجمعين مره ثانيه
غمضت عيوني و نمت..و نفس كل مره احلم بخواتي
كعدتني ماما ثاني يوم..حته نطلع مشتري ملابس الي
كمت وياها و غسلت وجهي..و هيه فرحانه
بعدين اجت خاله خلود طلعت ملابس مال طلعه من كنتور هدى و انطتنياهم بس جانت مجبوره مدري ضايجه يمكن لان عمو خالد عيط عليها
لبست و ماما هم لبست و ضلت نص ساعه تحط مكياج
و اني اباوع عليها
دارت وجهه و باوعت
حليمه..حلوه طلعت
هزيت راسي
ريم..اي
حليمه.دتعاي احطلج حمره خفيفه
تقربت و حطت الحمره ع شفايفي
اني فرحت و كمت اباوع ع مرايا ممصدكه
و ماما تباوع و تضحك
حليمه..شكد تشبهيني..يلا امشي عمج دينتظرنا جوه
حطت العبايه ع جسمهاا و نزلنا جوه
باوعت ع الكعب مالتها شكد حلو يطلع صوت من تمشي
عمو خالد بسرعه كام و اشرلنا براسه
خالد..يلا امشو..طلع عمو
جانت خاله خلود كاعده بالصاله و الحجيه أمينه
فتنا من يمهم بس حجت الحجيه
أمينه..متستحين رايحه لسوك و هيج لابسه كعب و حاطه هل الوان بوجهج
ماما باوعت عليها و ابتسمت
حليمه..ليش حجيه شايفتني عمري بال ٤٠ حته تحجيلي هيج..شو بعدني بعز شبابي اذا مو هسه اكشخ و اتمكيج و اتونس شوكت لعد..يلا بيباي حجتها بدلع و طلعنا من البيت
صعدنا يسياره عمو و طول الطريق
ماما تغني لعمو خالد اغاني مال حب و هو يبوس بأيدها..لحد موصلنا للسوك و نزلنا
ضلينا نفتر و ماما مخلت شي مشترته الي..وهم اشترت الها هواي ملابس..فتنا بالشارع البي محل بابا قصدي اشرف
بسرعه حجيت لماما
ريم..ماما هنا مح..قاطعتني
حليمه..اي محل اشرف..و محل عمج خالد صاير يمه
مشينا و ماما ابتسمت من شافت اشرف
و عمو خالد اتقصد و لزمها من ايدها
و عمو اشرف جان واكف باب المحل من شافنا..بسرعه رجع دخل
خالد..لتباعين ع محل
حليمه..لا داباوع جنت ع ريم
دخلنا بمحل عمو خالد
جان محله جبير و كله اقمشه و بردات و بي هواي نسوان
ماما ضلت تفتر بالمحل واني وراهه.. و عمو خالد يحجي ويا العامل
لحد مصاح ماما ع زاويه و كللها
خالد..ها ارجعكم هسه لو تبقين هنا
حليمه..ها لا اني و ريم حنرجع بتكسي
خالد..مستحيل ما اخليكم..اني ارجعكم
حليمه..شبيك يا عيني هسه هو البيت قريب..على شنو تعب نفسك و بعدين دتشوف النسوان شلون هواي لتعوف المحل هيج..تقربت و غمزت
و ديربالك تحط عينك ع وحده
هو ابتسم
خالد..تغارين
حليمه..اي اغار غير احبك
خالد..واني عيوني متشوف غيرج لتخافين
حليمه..فدوه لكلبك يلا مع السلامه حبيبي
خالد..الله وياج..هاج هاي العلاكتين جانت بيدي
حليمه..انطيهن لريم
انطاني العلاليك و اني اخذتهن
ماما تقربت مدري شنو شاورته و هو ابتسم
طلعت ماما من المحل و طلعت وراهه
مشينا بالشارع و جان ازدحام..نسوان جايه و زلم رايحه
بسرعه ماما لزمتني و وكفتنا ع صفحه
ريم..شكو ماما
حليمه..اش
اباوع عليها تباوع ع محل عمو اشرف
ابتسمت و جرتني وراهه
دخلنا للمحل مال عمو اشرف و هو عكد حواجبه بس شافنا..اني كمت اباوع ع شارع خفت لا يجي عمو خالد و يشوف ماما
حليمه..السلام عليكم
اشرف..اطلعي بره
حليمه..هيج تعاملك ويا الزبائن..اذا هيج لعد عرفت السبب ليش محد يشتري منك و المحل فارغ
اجه و وكف كدامها
اشرف..شتردين
ابتسمت
حليمه..شمرت بنتي عند البيت
اشرف..كتلج و انطيتج مهله و انتي مرجعتي لبنتج
حليمه..تعرف شي همزين رجعتلي بنتي لحضني..لان اريد اني اربيها ع ايدي..احسن من ما تتربى يم اختك
فيعني لا عبالك مقهوره لان ريومه يمي بلعكس كولش فرحانه
ضحك
اشرف..هو لو مو اني رجعتها جان انتي مسألتي عليها
فلسوين نفسج عود حنونه ع بنتج
ماما صارت عصبيه و تقربت منه
حليمه..ابقى هيج طول عمرك تباوع عليه و تتمناني
اعرف بيك تريدني ارجعلك..بس لو تموت لو تبوس ايدي مراح اباوع بخلقتك..رجعتلي ريم و سويت هذا كله اعرفك ردتني ارجع اتوسل بيك
ابتسم
اشرف..اني كتلج لو جايه هذاك اليوم للفندق جان بقيت ريم يمي..بس مأجيتي
حليمه..تريدني اخون خالد..بس لو اموت ما اخونه
لان مو بس احبه اعشقه اني.. و لتصير مره ثانيه ذكي و تهددني بنتي..لان هاي السوالف اني متمشي عليه
و خلشوف هسه ريم و صارت بحضني..بعد بيمن تريد تهددني..رفعت حواجبها
خطيه فشلت محاولاتك..يلا اترخص
جرتني و طلعنا من المحل..و كمنا نمشي عسريع
و هيه كلساع تتلفت خايفه
لحد مطلعنا من الشارع و اخذت نفس
ريم..ايدي ماما دتوجعني
عافت ايدي و كامت تعدل بالعبايه
ريم.. ماما عمو اشرف جان يهددج بيه
باوعت عليه
حليمه..اي الناقص عباله يكدرلي
ريم..ليش يهددج
حليمه..اي اسكتي انتي خلي اوكف تكسي
وكفت تكسي
و صعدنا و اني كمت اباوع من الشباك ع شوارع
بس فزيت من شفت شارعنا
باوعت ع ماما
ريم..هذا شارعنا
حليمه..اي اريد اشوف خواتج
ابتسمت و فرحت كولش..واخيرا حشوف خواتي
وصلنا للبيت و اني عفت العلاليك و نزلت من السياره ركض و ماما تعيط من وره
حليمه..تعاي العلاليك ولج حيوانه
كمت ادك بالباب حيل..انفتح و شفت عمه سناء بوجهي
من شفتها راحت ابتسامتي
هيه اطمت ع صدرهه
سناء..ولج فد لا رجعتيلي
ماما صاحت من وره و هيه شايله العلاليك
حليمه..شلونج سنائووووو
بسرعه عمه عوجت حلكها
سناء..لا هله
وخرت و اني دخلت ركض ادور ع خواتي
سناء..خواتج فوك بالغرفه
صعدت فوك ركض..اول مدخلت للغرفه..لكيت براء نايمه و زهراء يمها تلعب بالملاعيب
ريم..براء
بسرعه فزت و رفعت راسها..من شافتني ركضت عليه
حضنتني حيل
براء..ررررريم وووينج
دنكت و كمت ابوس بيها و هيه تحضن بيه
حضنتها حيل و كمت ابجي
و اباوع ع زهراء اجت تركض ممصدكه و تعثر
وخرت براء و شلت زهراء ابوس بيها
باوعت ع براء..تمسح بدموعها
ريم..لتبجين حبيبتي
براء..مشتاقتلج
ريم..اني هم انتي شلونج..عمه سناء دتسويلكم شي
براء..تعيط علينا بس مدتضربنا
ريم..لتسون وكاحه حته متعيط
براء..انتي بعد مترجعين هنا
دنكت و كمت امسح ع شعرهه
ريم..لا مراح ارجع بس راح اجي دائما ازوركم وعد مني
براء..ليش مترجعين
اخذت نفس
ريم..ماكدر ارجع
براء..هم حرجع اشتاقلج
ريم..كتلج راح اجي دائما ازورج..صدك بيبي وين
براء..طلعت تتسوك
هزيت راسي و
رجعت باوعت ع زهراء و بوستها
و سمعت صوت صياح ماما من جوه
كمت و لزمت براء
ريم..يلا ننزل ماما تريد تشوفكم
اخذتهن و نزلت جوه
ماما بسرعه اخذت مني زهراء و ضلت تبوس بيها
و براء بقت واكفه يمي
حليمه..تعالي براء حبيبتي
براء راحت ع كيف و ماما دنكت باستهن
حليمه..شلونج زينه..اكو احد ديسويلج شي
حجت و باوعت ع سناء الجانت متخصره
براء..لا
حليمه..اي زين
سناء..يلا الله وياكم
حليمه..تره مميتين حته نبقه يم جهرتج
سناء..دباعي ع جهرتج انتي الملونه
حليمه..غيرانه ما الومج
همه بسرعه شهكت
سناء..ليش من شنو اغار منج مثلا
حليمه..يعني ازوجت اخوج و جان ميت عليه و يحبني وراهه حبني واحد ثاني مات مات عليه..يعني دتشوفين شلون الرياجيل ميته عليه..وانتي ازوجتي فاروق سنه و رجعج و مسأل عليج وكاعد ادورين ع رجال و محد يقبل بيج
سناء..قصدج انتي ساقطه و كوا... و توكعين الزلم بيدج بس اني شريفه
غمزتلها ماما
حليمه..وين اكو وحده شريفه بهل زمن
سناء..كلمن يشوف الناس بعين طبعه
حليمه..المهم..بوست زهراء و حطتها ع كاع
اني اروح بس ها قبل لا اروح خلي ابشرج
سناء..خيييير
حليمه..فاروق طليقج مو ازوج..الحمدالله مرته حامل بتوم عود روحي باركيله لان عيب مهما يكون انتي ويا عشره عمر
اباوع ع عمه سناء صارت نار من الاعصاب
و وجهه اصفر.. عاطت بماما
سناء..امشي اطلعي برررررررررره يا ساقطه طلععععي من البيت
حليمه..هسه مو زين ابشرج
سناء..طللللعي بره
حليمه..عساس اني ميته ع شكلج..تعاي ريمه يمه
ريم..بسرعه حضنت براء و بوستها و همست بأذنها
ديربالج ع زهراء
رجعت بوست زهراء ع سريع و ماما جرتني و حطت علاكتين بأيدي
حليمه..يلا امشي حنتأخر
طلعنا من البيت و التفتت..شفت براء دتبجي يم الباب
من شفتها هيج كمت اني هم ابجي
و ماما تسب بعمه سناء و تجرني من ايدي
طلعنا لراس الشارع..و ماما وكفت تكسي
صعدت و كمت اباوع ع بيت
و قبل ليشغل ابو التكسي..شفت زيدون ديدخل بالفرع و شايل طوبه
فزيت من مكاني بس تحركت السياره و هو مشافني
ضجت ورجعت لمكاني
من وصلنا للبيت..اخذت علاليك و نزلت و ماما هم
باوعت عليها
ريم.دجان اشترينا لزهراء و براء اشياء
حليمه..ليش مو ابوهن موجود هو خلي يصرف عليهن
ضليت صافنه اكو ام متكفر تشتري لجهالها..ليش بس امي تختلف عن باقي الامهات
دخلنا للبيت و الحجيه أمينه رجعت تعاركت ويا ماما
اني عفتهم و رحت صعدت فوك يم اسراء
دخلت للغرفه و جان هدى تكمز
هدى..خلشوف ششتريتو
اجت و اخذت العلاليك مني.. و كامت اطلع بالملابس و تباوع
اسراء..شبيج هيييي على كيف..بعدين من تقبل ريم تشوفين بلا يحقلج مو اتجرين العلاليك
هدى..دشوفي اسراء الملابس احنه ليش بابا ميشترينا هيج
اباوع ع اسراء صار وجهه اصفر
اسراء..انشالله اسبوع الجاي نطلع ويا بيبي و نشتريلج كولشي تردي
هدى شهكت من شافت بلوز بي ملاعيب
هدى..شكد حلو
ريم..اخذي
هدى..عادي
ريم..اي
اسراء نترت بهدى
اسراء..هددددددى رجعععي
هدى..اوف هاج ماريده
عافت الملابس و رجعت للجربايه
اسراء باوعت عليه
..عادي اطلعين شوي ريم
هزيت راسي و طلعت من الغرفه انتظرهم بره
اسمع اسراء تكول لهدى
..حبيبتي ميصير تاخذين اول شي العلاليك بدون استأذان ثاني شي احنه ممقصرين وياج بشي ملابس و عندج بالكنتور و ملاعيب و متروسه الصناديق..فميصير تكولين ليش بابا ميشترينا مو اخر مره بيبي اشترتلج علاكتين
هدى..بس مو بابا..بس الهم يشتري لان يحبهم
اسراء..حته لو المهم ممقصرين وياج بشي احنه..و لتتعلمين تاخذين شي من غريب..صح ريمه كلبها طيب بس كل إنسان بهل حياه ميتأمن باجر عكبه يعيرج بهل لبسه او بغير شي..اني داحجي هيج حته اوعيج
هدى..بابا ميحبنا هنيالها ريم بسرعه اجت هنا و كام يحبها
اسراء..يمكن بابا يحبها..بس خطيه هيه ماعدها اب حقيقي و عدها ام متتعامل وياها نفس ما ماما ويانا لا تتعامل وياها بحنان و لا تحسسها بالامان..احنه عدنا اب و ام و اثنينهم يحبونا..فأنتي دتكولين عليها هنيالها و هيه هم يمكن من تفكر بهل شي تكول عليج هنيالج
هدى..لو تحجين لعكب باجر مراح احبها
اسراء..انتي ليش ماليه كلبج بالحقد و الغيره
احنه معلينا بسوالف الكبار..همه يتعاركون او يتمالخون
احنه معلينا احنه لازم يكون عدنا رحمه و انسانيه
هدى..ماحبها يعني ماحبها..انتي اصلا هم ميصير تحبيها لان لازم توكفين ويا ماما مو توكفين ويا بت خاله حليمه
اسراء عاطت بيها
اسراء..انتي ميفيد بيج الحجي..كولشي ماما تحجي تحطي بعقلج و ماعندج لا انسانيه و لا رحمه..شكد احاول اعلمج بس متتعلمين
ريم..جنت اسمع عركتهم و انقهرت..حته الخوات من وراي اتعاركن
انفتح الباب و اسراء ابتسمت
..يلا حبيبتي فوتي
دخلت و اسراء تخنزر بهدى و هدى ادير وجهه
مرت الايام و جان كل يجي لازم ماما تتعارك ويا خاله خلود او ويا الحجيه أمينه.. تعودت عليهم و كمت ما استغرب منهم..و همه هم تعودو على وجودي
بس مديتقبلوني ابد لا خاله خلود و لا بتها هدى و لا الحجيه أمينه..حته عمو خالد مرات احسه بس علمود ماما يضحك بوجهي و من ماما تكون مموجوده حته ميياوع عليه
بس اسراء التحبني..و اني تعلللقت بيها هواي هواي
كمت اعتبرها نفس اختي..تهتم بيه و تسولف وياي و تضحك..عكس الباقين..حته هيه اتعلقت بيه..لان اختها ابد ممتفاهم وياها
اجه الدوام و اني داومت صف ثالث الابتدائي
و اسراء ثالث متوسط و هدى رابع أبتدائي
عمو خالد سجلني بنفس مدرستهم حته اروح وياهن و ارجع..انقهرت لان نقلني لان لو باقيه هناك جان شفت اختي براء..هل سنه هيه ثاني ابتدائي
بس مكطعت عن خواتي صح ما اشوفهن هواي
بس كل اسبوعين اني و ماما نروح نشوفهن
دخلنا سنه 1999
و طبعا بده الدوام واني التهيت بالدراسه..لان اني شاطره كولش بالصف و وين ما اروح المعلمات يحبوني.. كمت من ارجع للبيت بسرعه اركض للغرفه و ادرس.. بحيث خاله خلود دائما تعير هدى و تكللها شوفي بت حليمه
ماعرف ليش يصيحولي بت حليمه و اني عندي اسم
اتعودت ع خاله خلود و كرهه الي هيه و بتها..حته الحجيه أمينه متأذيني بس دائما اتسمعني حجي
بس اني ما اجاوبهم..بس اضل ساكته..و ماما هيه التتعارك بدالي..مو محبه بيه بس هيه تحب المشاكل
بقيت على هاي حياتي متغير شي..اني اسكت و اسمع حجيهن و عياطهن عليه..و افرح من تجي اسراء ادافع عليه و اشتاق من انام و افكر بخواتي
نجحت من الثالث و الرابع و الخامس
و هسه اني صف سادس ابتدائي..بكلوريا
هدى رسبت بالسادس و صارت بالصف وياي و اسراء سادس اعدادي ادبي
سنه 2002
شهر الثاني بالتحديد
لبست جاكيت من الصوف.. و طلعت شعري الطويل من جوه الجاكيت..لبست الشحاطه
و طلعت من الغرفه ع كيف لان هدى نايمه
اخذت نفس و رحت نزلت جوه
فتحت الباب..و طلعت للحديقه
ابتسمت بس شفتها كاعده
رحت ع كيف من وره و غمضت عيونها
ريم..منوووووو انيييي
اسراء..سليمه انتي
ضحكت و كعدت يمها
ريم..كافي عاد بس سليمه و سليمه تره اسمي ريم
اسراء..ليش منايمه باجر وراح دوام
ريم..انتي ليش منايمه لان هم باجر وراج دوام
ابتسمت و باوعت عليه
اسراء..مجايني نوم
ضيقت عيني و حجيت نفس متحجي هيه
ريم..اني هم مجايني نوم
ضربتني ع كتفي
اسراء..انجبي
ابتسمت و حطيت راسي ع كتفها
ريم..سروو
اسراء..ها
ريم..لو انتي مموجوده جان اني انتحرت
اسراء..سمالله لتحجين هيج
ريم..همزين انتي موجوده بحياتي
اسراء..تعرفين شي
ريم..شنو
اسراء..ماعرف احس اني هم هواي احبج..احس ربيتج ع ايدي
وخرت منها و باوعت عليها
ريم..ع ايدج لو رجلج
اسراء..اهو رجعنا لسوالفج الطايح حضها تره مضحك
ريم..لان انتي نفسيه
اباوع عليها اخذت نفس و راحت ضحكتها
ريم..شبيج احجي اني اعرفج اكو شي
باوعت عليه
اسراء..رجعت اتعاركت ويا هدى
ريم..ليش
اسراء..لان البارحه سمعتها وهيه اتسمعج حجي
ريم..يمعووووده اني تعودت على شنو انتي ترحين تتعاركين وياها..بعدين هيه مهما يصير اختج ميصير هيج ع كولشي تتعاركين وياها
اسراء..ريم اني مو بس علمودج اتعاركت لا اتعاركت وياها علمودها هم ماريد اختي شخصيتها هيج تصير
حته بالمدرسه المعلمات يشكن من اسلوبها بالصف و الوكاحه..اني اريدها تتعدل اريدها اصير رزنه و تفكر بعقلها احسن من الطيش مالتها هذا..شكد انصحها و متهتم لكلامي..عدها اهم شي تتعارك و تسوي مشاكل
ريم..اي صح حقج بس اكلج شي و لتزعلين
اسراء..شنو
ريم..هدى متأثره بأمها هواي
اسراء..اعرف ماما دتزرع بكلبها هذا الحقد..و مدللتها كولش لان دائما تريدها تشبها و بصفها توكف
باوعت عليه
عكسج انتي امج شكد مختلفه عنج بس صرتي احسن منها
ريم..بفضلج..جنت كل ما اسوي شي غلط تجين انتي توعيني
اسراء..ياريت لو هدى هم تصير هيج و تتغير
ريم..اتصير اتصير و تتغير لتخافين
اسراء..انشالله
كمت و رحت بنص الحديقه افتر و فتحت ايدي
ريم..تعاي وياي افتري و الله حترتاحين
اسراء..يمعوده اني تلعب نفسي
وكفت و باوعت عليها
و برطمت..و كمت ارمش بعيوني
ريم..حبابه تعاااي يلا جرربي
ابتسمت و كامت وكفت يمي
اسراء..اتعرفين اتشبهين امج من تدلع
ريم..هههههههههه ع كولتها ماخذه الكيد منها..حجيت و هزيت جتف
اسراء..ههههههههههههههههه
ريم..تعاي نفتر
اسراء..يلا
لزمت ايدها و هيه هم لزمتني و ضلينا نفتر حيل على شكل دائره..واني فرحانه و هيه تعيط
اسراء..كافي كافي حتلعب نفسي
وكفت و كمت اضحك عليها
ريم..جبانه
اسراء..خرب يومج والله لعبت نفسي
ريم..مبروك حامل
اسراء..انجبي و امشي ندخل
لزمتها و دخلنا للبيت
على كيف كمنا نمشي حته الحجي أمينه من تكعد مترزلنا
صعدنا للغرفه و بسرعه كل وحده راحت لفراشها
اني بالكاع و هدى و اسراء ع جربايه
باوعت ع أسراء
ريم..تصبحين ع احلام جميله نفس وجهي الجميل
اسراء..غير تكعد راحه
ريم..جمالي مو بعينج
اسراء..شكد تحبين تلغين وياي..و ويا الباقين اضلين بس ساكته
ريم..قصدج اني احب اصير مرحه و اشاقه ويا الاحبهم بس الماحبهم شعندي اطلعلهم جمال روحي..صح لو غلط
اسراء..اهو كامت تكول عبر
ريم..اذلج بيهن
اسراء..اجمعين ررريم يلا نامي
ابتسمت و نمت صفح و غمضت عيوني و نمت
كعدت ثاني يوم
ع صوت صياح هدى
باوعت لكيتها عصبيه و تعيط ع اسراء
هدى..يعنننني كم مره اكلج لتستخدمين المشط مالتتتي ماحب ماحب
اسراء..انتي شبيج خبله تره هو مشط
هدى..اني هيج ما احب غراضي لوحدي بس الي
اووف يعني وين احطهن
اسراء..لتعيطين تره هوو مشط مشط
هدى..متفتهمين انتي داحجي هندي..غراضي ممنوع احد يتقرب منهن
ريم..عوجت حلكي
ديلا عيني عساس غراض سندريلا..اشو هو مشط و خشب هم
هدى..مدخلج انتي كم مره اكلج لتدخلين بين الخوات
ريم..ادخل لان كعدتيني من النوم
هدى..عساس مراح تكعدين للدوام
طفرت
ريم..بيش ساعه
اسراء..بعد بالسبعه..ردت هستوني اكعدج
اخذت نفس
ريم..اي زين
كمت و بقت هدى تعيط و اسراء تحجي عليها
عفتهن و رحت للحمام
غسلت وجهي و فرشت اسناني
اندك الباب..سديت المي و رحت فتحته و شفت عمو خالد كدامي
ريم..صباح الخير عمو
صفن بوجهي بعدين كال
خالد..صباح النور
فتت من يمه جان هو يحصرني بالباب
اني بسرعه عطت
ريم..عمووووو شبيك
ابتعد و لزم راسه
خالد..اسف شوي دخت
باوعت علي بخوف يمكن صدك داخ
ريم..اكول لماما
خالد..لا لا راحت الدوخه
ابتسمت
ريم..ماشي
طلعت من الحمام
و رحت للغرفه شفت هدى ماكو
ريم..وينها اختج
اسراء..راحت لماما تشكي و تبجي علمود مشط اتخيلي
ابتسمت
ريم..كارررثه اختج
رحت للكنتور و طلعت الصدريه و القميص
جنت مصفطتهم و حاطه فوك الملابس القراصه و العطر مالتي و الجوراب هم
اخذتهن و حطيتهن ع فراش
اسراء..هدى متحب احد يجي يم غراضهه..انتي مهوسه بالنضافه عايشه ويا مخبلات
برطمت
ريم..هسه النضافه صارت خبال
اندك الباب و اني و اسراء استغربنا
اسراء..شوكت هدى كامت ادك الباب
ريم..صدكيني مو هدى لان مستحيل
انفتح و دخلت الحجيه أمينه
اني و اسراء طكيناهه بضحكه
ريم..مو كتلج مستحيل هدى ههههههه
أمينه..يا شبيجن من الصبح تتمضحكن
اسراء..صباح الخير بيبي
راحت و بوستها
أمينه..صباح النور يروح بيبتج
أسراء..شو اليوم مغبشه شنو خير
أمينه..اجيت اكلج عمج خابر و كال يلا ننتظركم البيت جاهز و كولشي جاهز شوكت تجون
اباوع ع اسراء..فتحت حلكها ممصدكه
اسراء..صدك بيبي تحجين
أمينه..و غلاتج
بسرعه اسراء حضنت بيبي و عيونها دمعت
اني هنا بسرعه خفت..الاعرفه عمهم بديالي عايش
و يشتغل هناك..معقوله اسراء حتعوفني و تروح و اني ابقه هنا بدونها؟!
يتبع...
زهراء البياتي